Read LEVITICO 1

LEVITICO1

¹Re' i QaJaaw Dios xuq'oreej chee i Moisés chupaam i rusantolaj itz'ihy naah paat molb'al iib', je' wili i xuq'or reh:²Re' hat je' wili i cha q'or keh i aj Israel: Wila' awach taq aweh xuk'am chaloq i chikop chi amayiij chuwach i QaJaaw inchol ruk'amam chaloq i ruwakax, oon rutentzuun.

³Wila' wakax i naa ruye'em chi ruk'atoj mayiij inchol chi imas wakax re' ruuk' i komanlik i nee ruk'am chaloq manlik wach i ruti'jolal. Eh ar neeruk'at panookb'al reh i santo laj itz'ihy naah paat molb'al iib', reh chi neenk'ularik cho reh ruum i QaJaaw Dios.⁴Eh nee ruyeew i q'ab' wach naah i wakax naa ruk'atam chi rumayiij, chi je' re' neenk'ulariik cho reh ruum i QaJaaw Dios, eh neenkuyarik i ru mahk.⁵Eh naa ruyok'om i ralaq imas wakax komanlik, chuwach i QaJaaw, re' taqe i k'amal b'eeh aj tiij re' taqe rak'uun i Aarón naakimolom i rukik'eel naa kikihraam chi junsuut, eh chinaah i artaal wilik panookb'al reh i santo laj itz'ihy naah paat molb'al iib'.⁶Noq naa ruq'asam imas wakax chi k'atoj mayiij naa resam i riij, eh naa ruyok'om, chi sahlal naa ruye'em.⁷Eh re' taqe i k'amal b'eeh aj tiij i rak'uun taqe i Aarón, naakiluk'um i q'aaq' chinaah i artaal naakiye'em i sii' chinaah.⁸Eh chi riij i re', re' taqe i k'amal b'eeh aj tiij re' re' naakiye'em chinaah i sii' wilik chinaah i artaal, eh chi sahlal chik i rutib'kaal i imas wakax, ruch'ihil i naah, eh ruch'ihil i ruxeb'ohiil i req'saa'.⁹Re' i naa ruq'asaniik reh i mayiij naa rutz'ajam wach i req'saa' i chikop ruch'ihil taqe i rutuuq. Eh re' taqe i k'amal b'eeh aj tiij naa kik'atam chu'nchel chinaah i artaal reh chi naa ruponiik chuwach i QaJaaw Dios, chi jinaj i k'atoj mayiij q'e' ink'ohnik.

¹⁰Eh wila' re' ruuk' i tentzun, oon re' ruuk' i kaprax xuk'am cho chi rumayiij inchol ruk'amam chaloq imas manlik wach ruti'jolal.¹¹Ar naa ruyok'om i ralaq pansak'aaj reh i artaal chuwach i QaJaaw Dios, re' taqe i k'amal b'eeh aj tiij rak'uun i Aarón naa kikihraam i rukik'eel i chikop re' re' chi junsuut chinaah i artaal.¹²Re' naa ruk'amwiik cho reh imas tentzun, oon imas kaprax chi mayiij chi sahlal naa ruye'em, pareh naa ruye'em i naah, pareh naa ruye'em i ruq'ina'iil i req'saa'. Re' i k'amal b'eeh aj tiij naa rutusum wach chinaah i rusi'il, i q'aaq' luk'uuj chinaah i artaal.¹³Re' naa ruk'amwiik chee mayiij naa rutz'ajam wach i req'saa' je' wo' taqe i rutuuq. Eh re' i k'amal b'eeh aj tiij naa ruk'atam chu'nchel chinaah i artaal reh chi naa ruponiik chuwach i QaJaaw Dios chi jinaj k'atoj mayiij q'e' k'ohnik.

¹⁴Eh awach i naa ruq'asam chi ruk'atoj mayiij chuwach i QaJaaw i re' ruuk' taqe i chikop kirupinik inchol ruk'amam chaloq i mukur, oon kok' paloma.¹⁵Eh re' i k'amal b'eeh aj tiij naa ruq'asam chi mayiij chinaah i artaal, naa resam i ralaq, naa ruqopom ruq'aq'al chinaah i artaal, re' i rukik'eel naa ruyitz'ariik i koq chuwach i artaal.¹⁶Eh naa ruchuqum i riij naa resam i ruchutwa', naa ruye'em reje chucheel i artaal parelb'aal q'iij, re' inye'arik wii' i chaaj.¹⁷Eh k'ul naa ruchopom chi ruxiik' i chikop naa ruweqem reje xa re' la' ma' naa ta resam ki'ib' chi jumpech. Eh re' i k'amal b'eeh aj tiij naa ruye'em chinaah i sii' eh naa ruqopom ruq'aq'al chinaah i artaal. Reh chi naa ruponiik chuwach i QaJaaw Dios chi jinaj k'atoj mayiij q'e' ink'ohnik. Re' i mayiij naa ruk'amariik cho chi naq'wach

¹Wila' awach i naa ruq'asam rumayiij chi naq'wach inchol chi holohik arina nee ruk'am chaloq, naa ruchihkaam i aseite chinaah, naa ruye'em i insensia chinaah.²Eh naa ruk'amam cho keh i k'amal b'eeh aj tiij re' taqe i rak'uun i Aarón. Eh jinaj keh i re', naa rumohq'em chaloq i holohik arina haa' aseite, haa' i insensia naa ruchopom chaloq. Naa ruk'atam chinaah i artaal naa ruq'asam chi k'atoj mayiij, rehtalil i k'ohnik laj mayiij imponik chuwach i QaJaaw Dios.³Re' i ruqox i arina naa ruye'ariik chi mayiij, naa ruye'ariik reh i Aarón k'amal b'eeh aj tiij je' wo' keh i rak'uun. Re' i arina re' re' santohimaj ruum xye'arik chik chi mayiij chuwach i QaJaaw Dios.

⁴Eh wila' awach taq aweh i xuq'asaj chi mayiij joximaj pan horna, inchol ruye'em i kaxlanwi'k ma' kojooj ta ch'amb'esb'al reh holohik laj arina yuq'uuj paam ruuk' aseite i ruq'oril. Eh ma' kow ta laj kaxlanwi'k ma' kojooj ta ch'amb'esb'al reh, yuq'uuj paam ruuk' aseite i ruq'oril.

⁵Eh wila' awach iraaj ruq'asam i rumayiij re' ruuk' i kaxlanwi'k ma' kojooj ch'amb'esb'al reh k'ilimaj wach pan xartiin, inchol chi holohik arina i nee ruk'am chaloq neeruyuq' paam i ruq'oril ruuk' aseite.⁶Eh chi ch'uhyaal nee ruyeew, eh neeruchihkaaj i aseite chinaah, re' ruuk' i mayiij chi naq'wach.

⁷Eh wila' awach iraaj ruq'asam i rumayiij chi naq'wach re' ruuk' i chaq'samaj chupaam chaq'teesb'al kaxlanwi'k inchol chi re' ruuk' i holohik arina i nee ruk'am chaloq kojooj aseite ruuk'.⁸Neeruk'am chaloq i rumayiij chuwach i QaJaaw Dios re' ruuk' taqe i re' korjinaq wii'. Neeruq'asaj reh i k'amal b'eeh aj tiij, eh re' chik i reh neenq'asanik reh chinaah i artaal.⁹Re' i k'amal b'eeh aj tiij nee ruchop cho k'isinoq i mayiij re' re' neeruk'at chinaah i artaal rehtalil ink'ohnik laj mayiij imponik chuwach i QaJaaw Dios.¹⁰Eh re' ruq'ox i mayiij naa ruye'ariik reh i Aarón, je' wo' keh taqe i rak'uun re' i mayiij re' re' santohimaj chik, ruum ye'ooj chik chi mayiij chuwach i QaJaaw Dios.

¹¹Eh awach i naa ruq'asam i rumayiij chuwach i QaJaaw Dios marukoj ch'amb'esb'al reh, ruum ma' jino'q i mayiij kojooj ch'amb'esb'al reh, kojooj riiskaab' ruuk', naa ruk'atariik chuwach i QaJaaw Dios.¹²Nee wo' rub'an chi neenye'arik chi mayiij i kojooj ch'amb'esb'al reh i riiskaab', i peet wach tik xa re' la' ma' nee ta ink'atarik chi nk'ohnik laj mayiij chinaah i artaal.

¹³Eh chu'nchel i mayiij naa aye'em chuwach i QaJaaw Dios naa akojom ratz'amil. Re' i mayiij re' ruuk' i chi naq'wach koruman chi naa akojom ratz'amil rehtalil i ruyejaam cho wach i Dios awuuk'. Eh chu'nchel i mayiij naa rukojariik ratz'amil.

¹⁴Eh wila' xaq'asaj chi mayiij chuwach i QaJaaw Dios i peet wach atik chi naa ajoxem wach q'aaq' i riij korax, je' wo' hoq i wach i atik chi naq'wach naa ake'em wach noq naa aq'asam chi amayiij.¹⁵Eh naa achihkaam aseite chinaah, naa aye'em i insensia re' re' naa aye'em chi mayiij re' ruuk' i ke'emaj wach.¹⁶Re' i k'amal b'eeh aj tiij naa ruchopom ruuk' i mayiij ke'emaj wach naa ruk'atam, rehtalil ink'ohnik laj mayiij. Re' re' naa akojom i aseite ruuk', ruch'ihil i aseite re' re' naa ruk'ahtiik chi mayiij chuwach i QaJaaw Dios. Re' taqe i mayiij k'amb'al iib' panotob'il ruuk' i Dios

¹Wila' awach taq aweh i naa ruq'asam i rumayiij k'amb'al iib' panotob'il ruuk' i QaJaaw Dios, re' ruuk' imas wakax, oon ixoq wakax, koruman chi manlik wach i ruti'jolal i naa ruq'asam.²Re' reh naa ruye'em i q'ab' wach naah i chikop naa ruye'em chi rumayiij, ar naa ruyok'om i ralaq panookb'al reh i santo laj itz'ihy naah paat molb'al iib'. Eh re' taqe i k'amal b'eeh aj tiij i rak'uun i Aarón, naa kikihraam i rukik'eel i chikop chi junsuut i artaal.

³Re' reh naa ruq'asam i mayiij k'amb'al iib' panotob'il ruuk' i Dios, naa ruk'ahtiik chuwach i QaJaaw, re' haa' i q'ina' wilik wach req'saa' i chikop, ruch'ihil chu'nchel i ruq'ina'iil wilik chupaam.⁴Eh re' kab'chel i rukinaq'iil paam, ruch'ihil i ruq'ina'iil wilik chinaah choplik ruuk' i ruch'akil riij. Eh ruch'ihil i rak'aal wilik chupaam, ruch'ihil i ruq'ina'iil wilik chinaah junehteesjiik naa rub'anam.⁵Re' taqe i k'amal b'eeh aj tiij rak'uun i Aarón naakik'atwiik reh chinaah i artaal, ruch'ihil i chikop ye'ooj naah sii', eh naa ruk'ahtiik chi nk'ohnik laj mayiij imponik chuwach i QaJaaw Dios.

⁶Eh wila' tentzun i naa ruye'em chi k'atoj mayiij k'amb'al iib' panotob'il ruuk' i Dios re' ruuk' imas tentzun oon ixoq tentzun, xa re' la' koruman chi manlik wach i ruti'jolal i naa ruq'asam.⁷Eh wila' k'isa rak'uun tentzun i naa ruq'asam chi k'atoj mayiij, chuwach i QaJaaw Dios.⁸Neeruyeew i q'ab' wach naah i k'isa tentzun naa ruye'em chi rumayiij, chi riij i re' ar nee ruyok' i ralaq panookb'al reh i santo laj itz'ihy naah paat molb'al iib'. Eh re' taqe i k'amal b'eeh aj tiij naa kikihraam i kik' chi junsuut i artaal.

⁹Re' i mayiij naa ruye'em k'amb'al iib' panotob'il ruuk' i Dios koruman chi naa ruk'ahtiik chuwach i QaJaaw Dios haa' i ruq'ina'iil ruch'ihil i rujeeh chi manlik wach ko chi raa' naa ruyok'k'iik chaloq, eh ruch'ihil i chu'nchel i q'ina' wilik chuwach i req'saa'.¹⁰Eh re' kiib' chi rukinaq'iil paam, ruch'ihil i ruq'ina'iil i wilik chinaah, eh ruch'ihil i rak'aleel paam, je' wo' hoq i ruq'ina'iil wilik chinaah.¹¹Eh re' i k'amal b'eeh aj tiij naa ruqopom ruq'aq'al i mayiij re' re' chinaah i artaal chuwach i QaJaaw Dios. Re' re' reh k'uxumb'al.

¹²Eh wila' ixoq kaprax i naa ruye'em chi rumayiij naa ruq'asam chuwach i QaJaaw Dios.¹³Re' reh naa ruye'em i q'ab' wach naah i kaprax ar naa ruyok'om i ralaq panookb'al reh i santo laj itz'ihy naah paat molb'al iib'. Eh re' taqe i k'amal b'eeh aj tiij naakihkiraam i rukik'eel i chi junsuut, eh chinaah i artaal.

¹⁴Eh chi riij i re' naa wo' ruq'asam chi k'atoj mayiij chuwach i QaJaaw Dios, eh re' q'ina' wilik chinaah i req'saa' i chikop je' wo' chu'nchel i q'ina' wilik chupaam.¹⁵Re' i kiib' chi rukinaq'iil paam, ruch'ihil i ruq'ina'iil wilik chinaah, ruch'ihil i rak'aal paam, ruch'ihil i ruq'ina'iil wilik chinaah, naa resam.¹⁶Eh re' i k'amal b'eeh aj tiij naa ruqopwiik ruq'aq'al i mayiij re' re' chinaah i artaal naa rukamaniik chi k'uxumb'al. Re' chu'nchel i ruq'ina'iil naa ruk'ahtiik chi jinaj ink'ohnik laj mayiij q'e' imponik chuwach i QaJaaw Dios.

¹⁷Eh ma' naa ta taq ak'uxum i kiq'ina'iil, je' wo' i kikik'eel i chikop xa aha' pa' taq nee ti patinik. Re' wili jinaj i k'uhb'aal naa nukanaam taq aweh i hat, je' wo' chi keh taq awiih aamaam, inki Dios. Re' taqe i mayiij inye'arik chi riij i mahk

¹Re' i QaJaaw Dios je' wili i xuq'or reh i Moisés:²Re' hat je' wili i cha q'or keh i aj Israel: Wila' awach jino'q i xmahkunik chi ma' reht'al, xub'an-oq jino'q i yiib' wach na'ojb'al re' i ruq'or i k'uhb'aal chi ma' toob' ta chi b'anarik. Re' aj mahk re' re' i ruk'ul chi je' wili i naa rub'anam.

³Eh wila' re' i kajaaw i k'amal kib'eeh aj tiij xmahkunik chi ma' reht'al, koruman chi naa ruq'asam jino'q i k'isa imas wakax manlik wach i ruti'jolal chi rumayiij pahqb'al kuyb'al ru mahk chuwach i QaJaaw Dios. Chi je' re' ma' nee ta ruyeew taqe pamahk i tinamit.⁴Eh re' i k'isa imas wakax naa ruk'amam chaloq chuwach i QaJaaw Dios panookb'al reh i santo laj itz'ihy naah paat molb'al iib'. Ar naa ruye'em i q'ab' wach naah, eh naa ruyok'om i ralaq chuwach i QaJaaw Dios.⁵Eh chi riij i re', re' wo' hoq i kajaaw i k'amal b'eeh aj tiij naa ruk'amam reje k'isinoq i rukik'eel i k'isa imas wakax chupaam i santo laj itz'ihy naah paat molb'al iib'.⁶Ar naa rumuhaam i ju' q'ab' chupaam i kik', eh wuq'uub' pech naa rukihraam chuwach i QaJaaw Dios ma' najt ta chuwach i koq itz'ihy tasb'al wilik chuwach i santo laj ye'aab'.⁷Eh naa wo' ruch'ulem i kik' re' re' chuwach taqe i ruk'aa' i artaal ink'atarik wii' i insensia q'e' k'ohnik chuwach i QaJaaw Dios, chupaam i santo laj itz'ihy naah paat molb'al iib'. Eh re' ruq'ox i kik' naa ruchihkaam i koq waraa' i artaal ink'atarik wii' i mayiij wilik panookb'al reh i santo laj itz'ihy naah paat molb'al iib'.⁸Eh naa resam chu'nchel i ruq'ina'iil i k'isa imas wakax naa ruye'em chi k'atoj mayiij chi riij i mahk naa wo' resam i q'ina' wilik chinaah i req'saa' je' wo' i q'ina' wilik chupaam.⁹Re' i kiib' chi rukinaq'iil i paam, re' i q'ina' choplik waruch'akil i riij, eh re' i ruq'ina'iil i rak'aal paam junehteesjiik naa rub'anam ruuk' i rukinaq'iil i paam.¹⁰Je' rukab' noq inehteesjik reh imas wakax inq'ahteesjik chi k'atoj mayiij k'amb'al iib' panotob'il ruuk' i QaJaaw Dios. Eh re' i k'amal b'eeh aj tiij naa ruk'atwiik reh chinaah i artaal.¹¹Eh re' rutz'uhumal rij, i rutib'kaal naruqohxaniik, haa' i naah, re' haa' taqe i rooq ruch'ihil taqe i req'saa', ruch'ihil i rusaa',¹²chu'nchel i ruq'ox imas wakax naa rehtesjiik reje chi riij taqe itz'ihy naah paat naa ruye'ariik chi mayiij chupaam i ye'aab' saq paam, re' inye'arik wii' i chaaj. Eh chinaah i chaaj re' re' naa kikojom ruq'aq'al.

¹³Eh wila' chu'nchel i tinamit Israel ximahkunik chi ma' keht'al, eh ma' xkikoj ta rehtaal chi xkian jino'q i yiib' wach na'ojb'al i ruq'or i ruk'uhb'aal i Dios chi ma' toob' ta chi b'anarik.¹⁴Wila' xkan chi riij kuum i tinamit i mahk xub'an inchol ruq'asam jino'q i k'isa imas wakax chi rumayiij ar naa ruk'amam chaloq chuwach i santo laj itz'ihy naah paat molb'al iib'.¹⁵Eh re' taqe i kik'amwik rub'eeh tinamit naakiye'em i kiq'ab' wach naah i k'isa wakax chuwach i QaJaaw Dios, eh ar naakiyok'om i ralaq.¹⁶Chi riij i re', re' k'amal b'eeh aj tiij naa ruk'amam i koq k'isinoq i rukik'eel i k'isa imas wakax chupaam i santo laj itz'ihy naah paat molb'al iib'.¹⁷Eh ar naa rumuhaam i ju' q'ab' chupaam i kik' wuquub' pech naa rukihraam chuwach i QaJaaw Dios, chuwach i koq i itz'ihy tasb'al.¹⁸Naa wo' ruch'ulem k'isinoq i kik' re' re' chuwach taqe i ruk'aa' i artaal i wilik wii' i QaJaaw Dios, chupaam i santo laj itz'ihy naah paat molb'al iib'. Eh re' i ruqox i kik' naa ruchihkaam i koq waraa' i artaal, re' wilik panookb'al reh i santo laj itz'ihy naah paat molb'al iib'.¹⁹Eh re' i kajaaw i k'amal kib'eeh aj tiij naa resam chu'nchel i ruq'ina'iil i k'isa imas wakax, eh naa ruk'atam chinaah i artaal.²⁰Iraaj ruq'orom chi naa rub'aan reh i k'isa imas wakax re' re' je' rukab' imb'aan reh i k'isa imas wakax ink'atarik chi mayiij pahqb'al kuyb'al mahk. Ruuk' i re' naa rukuyariik i ru mahk i reh, eh naa wo' rukuyariik i kimahk.²¹Eh naa ruk'amam reje i k'isa imas wakax chi riij i itz'ihy naah paat inkimol wii' kiib'. Naa wo' ruk'atam chi mayiij je' rukab' noq xuk'at i pampeet i k'isa imas wakax. Re' i naa ruk'atariik chi mayiij chi riij i kimahk i tinamit.

²²Eh wila' re' jino'q i k'amal b'eeh xub'an i mahk chi ma' reht'al, xub'an-oq jino'q i yiib' wach na'ojb'al re' i ruq'or i k'uhb'aal chi ma' ruk'ul ta chi naa rub'aan. Re' reh naa rukahniik chi wilik ru mahk.²³Eh wila' xureq chi riij i ru mahk xub'an inchol ruq'asam chi ruk'atoj mayiij i k'isa imas kaprax manlik wach i ruti'jolal.²⁴Naa ruye'em i q'ab' wach naah i imas kaprax ar naa ruyok'om i ralaq re' wo' hoq i naa ruyok'ariik wii' i ralaq imas wakax, chuwach i QaJaaw Dios. Re' mayiij wili pahqb'al kuyb'al ru mahk i k'amal kib'eeh i tinamit.²⁵Eh re' i k'amal kib'eeh aj tiij naa rumuhaam i ju' q'ab' pankik', eh naa ruch'ulem chuwach taqe i ruk'aa' i artaal ink'atarik wii' i mayiij. Re' i ruqox i kik' naa ruchihkaam i koq waraa' i artaal i naa ruk'atariik wii' i mayiij.²⁶Naa ruk'atam chu'nchel i ruq'ina'iil chinaah i artaal, je' rukab' noq ink'ahtik i ruq'ina'iil i chikop ink'atarik chi mayiij k'amal iib' panotob'il ruuk' i QaJaaw Dios. Re' i k'amal b'eeh aj tiij ruuk' i mayiij re' re' naa rupahqaam kuyb'al ru mahk i k'amal kib'eeh i tinamit, eh naa wo' rukuyariik i ru mahk.

²⁷Eh wila' xmahkunik jino'q xama' nim ta wach, chi kixilak i tinamit xub'an-oq mahk chi ma' reht'al xkan-oq chi riij chi xub'an jino'q i yiib' wach na'ojb'al, re' ruq'or i k'uhb'aal chi ma' ruk'ul ta chi naa rub'aan.²⁸Eh xureq-oq chi riij chi xub'an i mahk inchol ruq'asam chi ruk'atoj mayiij jino'q ixoq kaprax pahqb'al rukuyb'al chi riij i mahk xub'an xa re' la' re' i chikop re' re' koruman chi manlik wach i ruti'jolal.²⁹Naa ruye'em i q'ab' wach naah i ixoq kaprax re' re' naa ruq'asam chi riij i ru mahk. Eh naa ruyok'om i ralaq chupaam i ye'aab' ink'atarik wii' i mayiij.³⁰Chi riij i re', re' i k'amal b'eeh aj tiij naa rumuhaam chee ju' q'ab' chupaam i kik' naa ruch'ulem chuwach taqe i ruk'aa' i artaal ink'atarik wii' i mayiij. Eh chu'nchel i ruqox i kik' naa ruchihkaam i koq waraa' i artaal.³¹Eh re' naa ruye'wiik reh i mayijimaj chikop naa resam chu'nchel i ruq'ina'iil, je' rukab' noq i nehtesjik i ruq'ina'iil i chikop inye'arik mayiij k'amal iib' panotob'il ruuk' i QaJaaw Dios. Re' re' naa ruk'atariik chinaah i artaal chi jinaj mayiij q'e' k'ohnik imponik chuwach i QaJaaw Dios. Re' i k'amal b'eeh aj tiij naa ruk'atam i mayiij chi riij i aj mahk re' re', eh naa wo' rukuyariik i ru mahk.

³²Eh wila' re' aj mahk re' re', tentzun i xuk'am cho chi riij i ru mahk inchol chi ixoq tentzun i naa ruk'amam chaloq xa re' la' koruman chi manlik wach i ruti'jolal.³³Eh naa ruye'em i q'ab' wach naah ixoq tentzun, chi riij i re' naa ruyok'om i ralaq naa ruq'aasam chi k'atoj mayiij chi riij i ru mahk, chupaam i ye'aab' i naa rukanteesjiik wii' i chikop naa ruk'atariik chi mayiij.³⁴Eh chi riij i re', re' k'amal b'eeh aj tiij naa rumuhaam chee ju' q'ab' chupaam i rukik'eel i chikop inye'arik chi mayiij, eh naa ruch'ulem chuwach taqe i rukaa' i artaal, ink'atarik wii' i mayiij. Eh re' ruqox i kik' naa ruchihkaam i koq waraa' i artaal.³⁵Naa resam chu'nchel i ruq'ina'iil i chikop, je' rukab' noq inehteesjik i ruq'ina'iil i chikop i nq'ahteesjik chi k'atoj mayiij k'amb'al iib' panotob'il ruuk' i Dios. Eh re' i k'amal b'eeh aj tiij naa ruk'atam i chikop re' re' chinaah i artaal chuwach i QaJaaw Dios. Re' k'amal b'eeh aj tiij naa ruk'atam i mayiij re' re' chi riij i ru mahk i aj mahk, eh naa rukuyariik i ru mahk.

¹Wila' awach i xk'amarik haa' pan q'atb'al q'orik chi riij jino'q i xb'aan i xrib'iraj, eh xrilow-oq wo' noq chi xb'aan, eh ma' xuq'or tee korik, re' reh xkahnik i mahk chinaah.

²Eh wila' awach i xutz'a'j reh i ch'uwa' wach re' i kiti'jolal i kamnaq chikop, atoob' ta pantaq ch'ahn wilik, atoob' ta ruuk' paat wilik, oon i chikop xa rujukem riib' noq imb'ehik ch'uwa' wach, naa rukahniik chi wilik ru mahk atoob' ta naq komajaa' i rukoj rehtaal.

³Eh wila' xutz'a'j i xa chib'ih jariik chi ch'uwa' wach i nelik cho ruuk' jino'q i kiristianu' eh noq nee rukoj rehtaal chib'ih i xub'an neenkahnik i mahk chinaah.

⁴Eh awach i xa pan jumehq'iil xuq'or i korik parub'ihnaal i QaJaaw Dios chi naa rub'anam i holohik oon ma' holohik taj, je' rukab' noq inq'orarik i korik chi ma' kapeb'imaj ta riij eh ma' nee ta rukoj rehtaal noq neerub'an koq'uun chik nee rukoj rehtaal i xub'an, neenkahnik i mahk chinaah.

⁵Eh awach neemb'anik reh i mahk je' rukab' taqe re' inchol rupahqaam kuyb'al ru mahk chi riij i rub'an.⁶Koruman chi naa ruq'asam chi rumayiij jino'q ixoq tentzun oon k'isa rak'uun tentzun oon ixoq kaprax chuwach i QaJaaw Dios. Eh re' i k'amal b'eeh aj tiij naruk'atwiik reh chuwach i QaJaaw reh chi neenkuyarik i ru mahk awach imb'anik reh i mahk.

⁷Wila' ma' chih i rutumiin loq'b'al reh jino'q i k'isa rak'uun tentzun. Neerub'an chi nee ruq'asaj chuwach i QaJaaw chi rumayiij kiib'-oq chi mukur oon kiib'-oq chi kok' paloma pahqb'al rukuyb'al chi riij i ru mahk. Jinaj i naa ruye'em chi riij i ru mahk, eh re' jinaj naa ruk'ahtiik.⁸Eh re' chikop naa ruye'em chi pahqb'al kuyb'al ru mahk, naa ruk'amam cho reh i k'amal b'eeh aj tiij. Eh re' i k'amal b'eeh aj tiij peet naa rutoqom ralaq, xa re' la' ma' naa ta ruch'uqum iloq i naah chi jumpech.⁹Re' i rukik'eel i chikop naa ruchihkaam i koq chuwach i artaal. Eh re' kik' naa ruqohxaniik naa ruchihkaam i koq waraa' i artaal, re' i wili i mayiij naa rukamaniik chi pahqb'al kuyb'al mahk.¹⁰Re' i chikop jinaj naa ruq'ahteesjiik chi mayiij je' rukab' i ruq'or i k'uhb'aal. Re' k'amal kib'eeh i aj tiij naa ruk'atwiik i mayiij pahqb'al kuyb'al ru mahk awach xb'anik reh i mahk. Ruuk' i re' nee wo' inkuyarik i ru mahk.

¹¹Eh wila' re' xb'anik ree mahk ma' xureq tz'aaq i kiib' chi mukur, oon kiib' chi kok' paloma, neerub'an chi nee ruyeew chi rumayiij pahqb'al kuyb'al ru mahk i k'isiin ma' hoob' libra chi arina re' ruuk' i q'e' holohik. Eh ma' naa ta rukojom aseite, insensia chinaah, ruum naa rukamaniik chi pahqb'al kuyb'al mahk.¹²Naa ruk'amam cho reh i k'amal kib'eeh i aj tiij, re' reh naa ruchopom chee jumohq' chi arina re' ruuk' i q'e' holohik junk'atariik naa rub'anam ruuk' i mayiij naa ruye'ariik chinaah i artaal chuwach i QaJaaw Dios. Re' re' naa rukamaniik chi pahqb'al kuyb'al ru mahk i xb'anik reh i mahk.¹³Je' re' naa rub'anam i k'amal kib'eeh aj tiij reh chi neerureq kuyb'al ru mahk i xa chib'ih jariik i mahk xub'an. Ruuk' i re' nee wo' inkuyarik i ru mahk, je' rukab' noq inkuyarik i mahk noq inye'arik i mayiij xa chi naq'wach. Eh re' i ruqox i arina naa ruye'ariik reh i k'amal kib'eeh aj tiij.

¹⁴Re' i QaJaaw Dios je' wili i xuq'or reh i Moisés:

¹⁵Wila' awach i xmahkunik chi ma' reht'al, wixuch'uwa'risaj wach i wilik ruSantohiil. Inchol ruq'asam chi rumayiij chuwach i QaJaaw jino'q i q'ina' laj imas tentzun manlik wach ruti'jolal. Eh naa rukojom tz'aaq' i chikop je' wo' k'ihaal tz'aaq i mayiij inye'arik chi riij i mahk chupaam i itz'ihy naah paat.¹⁶Re' reh inchol rutojom riij ruch'uwa'resjiik wach i wilik ruSantohiil xub'an. Eh ko k'isiin chik i naa ruye'em chinaah, kora'j naa ruq'asam reh re' i k'amal kib'eeh aj tiij, eh re' chik i reh naa ruk'atwiik reh chi mayiij q'ina' laj chikop. Eh re' re' naa rukamaniik chi pahqb'al kuyb'al ru mahk, eh naa wo' rukuyariik i ru mahk.

¹⁷Eh wila' awach i xb'anik reh i mahk re' i ruq'or i ruk'uhb'aal i QaJaaw Dios chi ma' toob' ta chi b'anarik, atoob' ta chi ma' reht'al xub'an xanaa wo' rukahniik i mahk chinaah.¹⁸Ruum i mahk xub'an re' re' inchol ruq'asam chi rumayiij jino'q i q'ina' laj imas tentzun manlik wach ruti'jolal, eh naa rukojom tz'aaq. Re' i k'amal kib'eeh aj tiij naa ruq'asaniik chi mayiij chuwach i QaJaaw pahqb'al kuyb'al ru mahk i xb'anik reh i mahk. Eh nee wo' rukuyarik i ru mahk xub'an chi ma' reht'al.¹⁹Re' mayiij re' re' naa ruq'asam chi riij i ru mahk ruum re' reh korik wo' hoq chi xmahkunik chuwach i Dios.

¹Re' i QaJaaw Dios je' wili xuq'or reh i Moisés:²Wila' awach i xmahkunik chuwach i QaJaaw Dios, eh nerujot' i ras ruchaaq', eh ma' neeta-oq chik i ruq'asaj i xa chib'ih jariik kanamaj ruuk' xrelq'aaj-oq i chib'ih jariik re' i ras ruchaaq'.³Eh xureq-oq i q'ehb'inaq naq, eh mo'-oq xuq'or chi xureq, xuq'or tii chik i xti korik chi riij xub'an riib' wila' xub'an jino'q i na'ojb'al re' re' iraaj ruq'orom chi xmahkunik.⁴Re' reh chinaah naa rukahniik i mahk re' re', naa ruq'asam i xrelq'aaj i xureq chi ma' xuk'axkilej taj, je' wo' hoq i chib'ih jariik xa kanamaj ruuk'. Eh naa wo' ruq'asam i q'ehb'inaq naq, eh xureq wo' chik.⁵Eh naa ruq'asam chu'nchel i xuq'or tii chik i korik chi riij xub'an riib' naa wo' chik ruq'asam chi manlik wach, eh ko k'isiin chik i ruman naa ruye'em noq naa ruq'asam i rumayiij chi riij i ru mahk.⁶Eh chi riij i ru mahk i re' re' jinaj i rak'uun tentzun manlik wach inchol ruq'asam chuwach i QaJaaw Dios. Naa ruq'asam reh i k'amal kib'eeh aj tiij, re' chik i reh naa ruq'asaniik reh chi riij i mahk.⁷Ruuk' i re', re' k'amal b'eeh aj tiij naa rupahqaam kuyb'al ru mahk chuwach i QaJaaw Dios awach i xb'anik reh i mahk re' re'. Wila' xub'an wo' mahk nee wo' kuyarik i ru mahk. Re' i k'uhb'aal chi riij taqe i k'atoj mayiij

⁸Re' i QaJaaw Dios je' wo' chik wili i xuq'or reh i Moisés:⁹Re' hat naa aq'orom reh i k'uhb'aal wili i Aarón k'amal kib'eeh aj tiij, je' wo' keh taqe i rak'uun, chi riij i k'atoj mayiij. Re' i chikop jinaj aq'ab' naa rukahniik chinaah i wach q'aaq' wilik chinaah i artaal.¹⁰Eh re' i k'amal b'eeh aj tiij naa rukojom i ruch'utwex, eh naa wo' rukojom i runim rooq so' lino. Eh kora'j naa ruk'atam re' i chikop, noq k'ahtinaq chik naa resam chinaah i artaal i ruchajil, chucheel i artaal naa rutzub'am i koq.¹¹Eh naa wo' chik resam chi riij i ruso', tokoom chik i ruso' naa rukojom. Eh naa ruk'amam reje i ruchajil i chikop chupaam jinaj i ye'aab' saq wach, chi riij i itz'ihy naah paat.

¹²Re' i q'aaq' chinaah i artaal naa ruqopiik chi junelik. Eh re' i k'amal kib'eeh i aj tiij rajlaal wahq'eq naa rukojom ruman i sii', eh naa ruye'em i chikop chinaah re' naa ruk'atam chi mayiij. Naa wo' ruk'atam chinaah i ruq'ina'iil i mayiij ink'amwik panotob'il ruuk' i Dios.¹³Re' i q'aaq' chinaah i artaal naa ruqopiik chi juneliik, ma' jaruuj naa ruchuhpiik.

¹⁴Re' i wili i k'uhb'aal chi riij i mayiij naa ruye'ariik chi naq'wach. Eh re' taqe i rak'uun i Aarón naakiq'asaniik reh chinaah i artaal chuwach i QaJaaw Dios.¹⁵Eh jinaj keh k'amal kib'eeh aj tiij naruchopom chaloq jumohq'-oq i holohik arina ye'ooj chi mayiij, ruch'ihil i aseite, ruch'ihil chu'nchel i insensia wilik chinaah i mayiij. Eh naa ruk'atam chinaah i artaal, rehtalil ink'ohnik laj mayiij ink'atarik.¹⁶Re' i naa ruqohxaniik naa ruk'uxum i Aarón i k'amal kib'eeh aj tiij ruch'ihil taqe i rak'uun chi ma' naa ta rukojariik ch'amb'esb'al reh. Ar naa kik'uxum chupaam jinaj i ye'aab' wilik ruloq'il chi chii' reje i santo laj itz'ihy naah paat molb'al iib'.¹⁷Ma' naa ta rukojariik ch'amb'esb'al reh noq naa ruchaq'iik ruum re' naa aye'em keh re' ruuk' i k'atoj mayiij, re' wili kuxisamaj je' rukab' i kiib' chi mayiij ink'atarik chi riij i pahqb'al kuyb'al mahk.¹⁸Chu'nchel i k'amal kib'eeh aj tiij naa kik'uxum keh i mayiij re' re', i naa ruye'ariik keh. Re' ruuk' i mayiij naa ruk'atariik chuwach i QaJaaw. Eh wila' xq'ehb'ik jino'q i xa chib'ih jariik chinaah i mayiij re' re' naa rukahniik chi kuxisamaj, inki.

¹⁹Re' i QaJaaw Dios je' wili i xuq'or reh i Moisés:²⁰Re' i wili i rumayiij naa ruye'em i Aarón, je' wo' taqe i rak'uun noq naakipa'ab'jiik chi k'amal kib'eeh aj tiij kiib' libra ruuk' yejaal i libra i holohik arina naa kiq'asam chuwach i QaJaaw Dios yejaal i naa kiq'asam wahq'eq, eh yejaal i naa kiq'asam xq'eq.²¹Eh re' i kaxlanwi'k naa rukorjiik ruuk' i re' kojooj aseite ruuk', naakich'aq'sam pan xartiin. Chi ch'uhyaal naa ruq'asam i kajaaw i k'amal kib'eeh aj tiij chi nk'ohnik laj mayiij chuwach i QaJaaw Dios.²²Re' taqe i rak'uun i Aarón i naakipa'ab'jiik chi k'amal kib'eeh aj tiij chi jilow i reh, je' wo' re' i kimayiij naa kiq'asam. Ruum i ruq'or i ruk'uhb'aal i QaJaaw chi koruman chi je' re' i naa kianam, chi juneliik. Re' i mayiij re' re' naa ruk'ahtiik chi jumpech.²³Eh chu'nchel i kimayiij naa kiq'asam chi naq'wach taqe i k'amal kib'eeh aj tiij naa ruk'ahtiik chi jumpech, eh ma' naa ta ruk'uxariik, inki.

²⁴Re' i QaJaaw Dios je' wili i xuq'or reh i Moisés:²⁵Re' hat cha q'or reh i Aarón, eh keh i rak'uun chi re' wili k'uhb'aal chi riij i mayiij naa ruye'ariik chi riij i mahk. Re' chikop naa ruq'ahtesjiik chi mayiij ar naa ruyok'ariik i ralaq chuwach i QaJaaw aha' naa rukanteesjiik wii' i chikop naa ruq'ahteesjiik chi k'atoj mayiij, eh re' re' Santohimaj.²⁶Re' i k'amal kib'eeh aj tiij naa ruq'asaniik reh i mayiij chi riij i mahk naa ruk'uxum chupaam i ye'aab' wilik ruSantohiil wilik reje chi chii' i santo laj itz'ihy naah paat molb'al iib'.²⁷Eh xa chib'ih pa' jariik i nee rutz'a'j wach i rutib'kaal i chikop re' re' naa rukahniik chi wilik ruSantohiil. Eh wila' t'axlojik chuwach i rukik'eel i kiso' koruman chi chupaam jino'q i santo laj ye'aab' naakitz'ajam.²⁸Wila' panak'al xun chaq' i tiib' naa kiq'asam chi mayiij, koruman chi naakipaxem. Eh wila' chupaam jino'q i ch'ihch' xun xkichaq'saj i tiib' koruman chi naakijuk'um chi naa kitz'ajam paam chi korik.

²⁹Eh xa re' wo' taqe i k'amal kib'eeh aj tiij naakik'uxwiik reh i mayiij re' re', ruum wilik ruSantohiil.³⁰Xa re' la' ma' naa ta kik'uxum i rutib'kaal i chikop naa ruq'ahteesjiik chi mayiij chi riij i mahk re' i naa ruk'amariik reje i rukik'eel chupaam i santo laj itz'ihy naah paat molb'al iib'. Reh chi re' chikop re' re' naa ruq'ahteesjiik chi mayiij chupaam i santo laj ye'aab', eh naa ruk'atam chinaah i artaal.

¹Re' i wili i k'uhb'aal chi riij i mayiij wilik ruSantohiil inq'ahteesjiik chi riij i ruja'wachjiik i ruk'uhb'aal i Dios.²Re' i chikop naa kiq'asam chi mayiij chi riij i ruja'wachjiik i Dios ar wo' naakiyok'om ralaq aha' inkiyok' wii' ralaq i chikop inkiyeew chi k'atoj mayiij. Eh re' i rukik'eel naa kikihraam chi junsuut eh chinaah i artaal.³Eh naa wo' ruq'ahtesjik ha' i rujeeh, je' wo' i ruq'ina'iil wilik, je' wo' hoq chu'nchel i ruq'ina'iil wilik chupaam.⁴Re' kab'chel i rukinaq'iil paam, ruch'ihil i q'ina' wilik chinaah choplik ruuk' i ruch'akil riij, ruch'ihil i rak'aal wilik chupaam, ruch'ihil i q'ina' wilik chinaah junehteesjiik naa rub'anam iloq.⁵Eh re' i k'amal kib'eeh aj tiij naa ruk'atwiik reh chinaah i artaal, chuwach i QaJaaw Dios. Re' re' i mayiij pahqb'al kuyb'al ru mahk i xb'anik reh i mahk.⁶Re' taqe i chu'nchel i k'amal kib'eeh aj tiij naa kik'uxum keh i mayiij re' re' chupaam i ye'aab' Santo ruum wilik ruSantohiil.

⁷Re' i mayiij naa ruye'ariik chi riij i ruja'wachjiik i Dios, je' wo' rukab' i mayiij inye'arik chi riij i pahqb'al kuyb'al mahk. Eh jinaj wach i k'uhb'aal chi riij, eh reh k'amal kib'eeh aj tiij naa rukahniik re' i naa ruq'asaniik reh.⁸Eh re' k'amal kib'eeh aj tiij naa ruk'atwiik chi mayiij i chikop naa kik'amam chee tinamit naa rukahniik chi reh i rutz'uhumal riij i chikop.⁹Je' wo' chu'nchel i mayiij re' ruuk' i chi naq'wach naa ruk'iljiik pan horna oon pan ch'ihch' xartiin naa rukahniik chi reh i k'amal kib'eeh aj tiij naa ruq'asaniik reh.¹⁰Eh chu'nchel i mayiij naa ruye'ariik chi naq'wach xilakimaj ruuk' aseite oon chi chiqiij wach, naa rukahniik chi keh i k'amal kib'eeh aj tiij re' taqe rak'uun i Aarón, eliik wach i naakik'ulum chi kiju'junaal.

¹¹Re' i wili i k'uhb'aal chi riij i mayiij naa ruye'ariik. K'amb'al iib' panotob'il ruuk' i QaJaaw Dios:¹²Eh wila' re' i mayiij reh t'iosinik inchol ruye'ariik i suq laj kaxlanwi'k ma' kojooj ta ch'amb'esb'al reh yuq'uuj paam ruuk' aseite, oon i ma' piim ta laj kaxlanwi'k ma' kojooj ta ch'amb'esb'al reh t'urimaj aseite chinaah. Eh suq laj kaxlanwi'k re' ruuk' i holohik arina korjinaq wii' yuq'uuj paam ruuk' aseite.¹³Re' i mayiij reh t'iosinik, ruch'ihil i mayiij k'amb'al iib' panotob'il ruuk' i Dios naa ruq'ahtesjiik i suq laj kaxlanwi'k kojooj ch'amb'esb'al reh.¹⁴Eh chu'nchel i mayiij naa ruye'ariik, kok' taq i naa ruk'amariik ruuk' reh chi naa ruq'atesjiik chi mayiij chuwach i QaJaaw Dios. Re' re' naa ruye'ariik reh i k'amal kib'eeh aj tiij inkihranik reh i rukik'eel i chikop k'amb'al iib' panotob'il ruuk' i Dios.

¹⁵Re' i rutib'kaal i chikop naa ruye'ariik chi mayiij k'amb'al iib' panotob'il ruuk' i Dios ruch'ihil i mayiij t'iosb'al chuwach i Dios, chupaam q'iij re' re' naa ruk'uxariik ma' naa ta rumolariik k'isinoq reh chi junwaar.¹⁶Eh wila' re' chikop xq'ahteesjik chi mayiij xa reh chi wilik i naa ruq'oriik ree Dios chinaah rub'aan oon xa pank'uxliis naa ruchaliik noq naa ruye'ariik, i tiwik, re' i ruq'ox neerub'an chi kochi junwaar neenk'uxarik.¹⁷Eh wila' ko wilik i ruq'ox rutib'kaal i chikop paroox q'iij inchol kik'atam chu'nchel.¹⁸Eh wila' awach k'uxwik reh i rutib'kaal i chikop paroox q'iij q'asamaj chi mayiij reh i k'amal iib' panotob'il ruuk' i Dios. Ma' naa ta ruk'ulum i Dios ni xata naa rukojom paruman, ma' naa ta rajwaam wach. Eh awach k'uxwik reh i tiwik re' re' naa rukahniik chinaah i mahk re' re'.

¹⁹Eh wila' re' i tiwik xq'ehb'ik chinaah jino'q i xa chib'ih jariik ch'uwa' wach i ruk'ul chi naa ruk'atariik wach q'aaq'.
Eh re' i tiwik saq wach neerub'an chi neen k'uxarik reh chi ma' nee ta inkich'uwa'reej kiib'.

²⁰Eh wila' awach i ruch'uwa'risam riib' chuk'ux reh i tiwik mayijimaj k'amb'al iib' panotob'il ruuk' i Dios, re' reh i ruk'ul chi naa rehtesjiik chi xilak i rutinamiit.

²¹Eh je' wo' hoq awach jino'q i xa chib'ih jariik ruch'uwa'il wach kiristianu' oon ruch'uwa'il wach i chikop, eh neeruk'ux reh i tiwik mayijimaj chuwach i Dios k'amb'al iib' panotob'il ruuk' i Dios, re' reh i ruk'ul wo' chi naa rehtesjiik reje chi xilak i rutinamiit.

²²Re' i QaJaaw Dios je' wili i xuq'or reh i Moisés:²³Re' hat cha q'or keh i aj Israel chi ma' naa ta kik'uxum i ruq'ina'iil i b'ooyax, ni xata re' i ruq'ina'iil i rak'uun tentzun, ni xata re' i ruq'ina'iil ixoq kaprax.²⁴Re' i ruq'ina'iil i chikop xa neenkimik oon i ruq'ina'iil i chikop neenxereb'ik i ruti'jolal kuum i josq'laj chikop, neerub'an chi xa chib'ih neen kamanik wii' xa re' la' ma' ruk'ul ta chi naa taq ak'uxum i ruq'ina'iil.

²⁵Ruum awach i neeruk'ux i ruq'ina'iil i chikop xk'atarik chi mayiij chuwach i QaJaaw Dios. Re' reh i ruk'ul chi naa rehtesjiik reje chi xilak i rutinamiit.

²⁶Eh xa aha' pa' taq nee ti patinik ma' naa ta taq ak'uxum i rukik'eel i tz'ikin, ni xata rukik'eel chik jino'q i chikop naa taq ak'uxum.²⁷Eh xa awach pa' i neeruk'ux i rukik'eel i chikop, re' reh naa rehtesjiik reje chi xilak i rutinamiit, inki.

²⁸Re' i QaJaaw Dios je' wili i xuq'or reh i Moisés:²⁹Re' hat cha q'or keh i aj Israel chi awach i naa ruq'asam i mayiij k'amb'al iib' panotob'il ruuk' i Dios inchol chi re' reh neenk'amwik reje reh chuwach i QaJaaw Dios.³⁰Re' reh naa ruk'amwiik chaloq i chikop naa ruk'ahtiik chi mayiij chuwach i QaJaaw Dios. Eh naa wo' ruk'amam chaloq i q'ina' naa reliik chi' rik'ux i chikop je' wo' hoq i rutib'kaal chi' rik'ux, reh chi neenq'ahteesjik chi mayiij chuwach i QaJaaw.³¹Eh re' i k'amal kib'eeh aj tiij naa ruk'atam i q'ina' re' re' chinaah i artaal, eh re' rutib'kaal chi' rik'ux i chikop naa rukahniik chi reh i Aarón, chi keh taqe i rak'uun.³²Eh re' i rusak'aaj rutuuq i chikop naa ruye'ariik reh i k'amal kib'eeh aj tiij ruum i ruk'ul chi naa ruye'ariik reh.³³Re' i k'amal kib'eeh aj tiij re' ruuk' i rak'uun i Aarón naa ruq'asaniik reh i ruq'ina'iil, eh je' wo' hoq i rukik'eel i chikop reh i mayiij k'amb'al iib' panotob'il ruuk' i Dios reh naa ruye'ariik i rusak'aaj rutuuq i chikop re' re', reh chi naa ruk'uxum.³⁴Re' hin kinq'orik reh chi re' i chikop naakiye'em chi kimayiij i aj Israel k'amb'al kiib' panotob'il ruuk' i Dios, eh chi re' i rutib'kaal chi' ruk'ux ruch'ihil i rutuuq i chikop re' re' naa rukahnik reh i Aarón kajaaw k'amal kib'eeh aj tiij naa wo' rukahniik keh i rak'uun. Je' re' i ruq'or i nuk'uhb'aal ruum aj re' i ruk'ul chi je' re' naa kianam chi juneliik i aj Israel, inki i Dios.

³⁵Re' i re' naa ruye'ariik reh i Aarón kajaaw i k'amal kib'eeh aj tiij, eh naa ruye'ariik keh i rak'uun nareliik ruuk' i mayiij naa kik'atam chuwach i QaJaaw Dios. Re' wili xa re' wo' rutohq'iik chaloq noq xsik'arik cho wach ruum i Dios chi k'amal kib'eeh aj tiij taqe.³⁶Eh chupaam i q'iij noq xipa'ab'jik chi k'amal kib'eeh aj tiij ruum i Dios, xuq'or chi re' taqe i aj Israel juneliik naakiye'em i tiwik re' re', eh je' wo' re' i naa kianam i kiih kimaam.

³⁷Re' wili i k'uhb'aal chi riij i mayiij ink'atarik, eh chi riij i mayiij inye'arik chi pahqb'al kuyb'al mahk, i mayiij inye'arik chi riij i mahk noq inja'waachjik jino'q i k'uhb'aal, je' wo' chi riij i mayiij inye'arik k'amb'al iib' panotob'il ruuk' i Dios.³⁸Re' i QaJaaw Dios xuyeew i k'uhb'aal wili reh i Moisés chinaah i yuuq' Sinaí chupaam i q'iij noq xuq'or keh i aj Israel chi naa kiq'asam i kimayiij chuwach i QaJaaw Dios ar naah yuuq'. Re' i rukuxeesjiik i Aarón kajaaw i k'amal kib'eeh aj tiij ruch'ihil taqe i rak'uun (Ex 29.1-37)

¹Re' i QaJaaw Dios je' wili i xuq'or reh i Moisés:²Re' hat chak'am reje i Aarón, taqe i rak'uun, nee nak'am reje haa' i kiso', je' wo' hoq i aseite kuxesb'al keh, je' wo' hoq i k'isa imas wakax pahqb'al kuyb'al kimahk. Nee wo' nak'am reje kiib' chi imas tentzun, je' wo' hoq jinaj k'isa chakach chi kaxlanwi'k ma' kojooj ta ch'amb'esb'al reh.³Eh nee namol kiwach chu'nchel i tinamit panookb'al reh i santo laj itz'ihy naah paat molb'al iib', i nuchjik.

⁴Re' i Moisés xub'an wo' hoq i xq'orarik reh ruum i QaJaaw Dios. Xumol wo' kiwach i tinamit panookb'al reh i santo laj itz'ihy naah paat.⁵Re' i Moisés je' wili i xuq'or keh i kimolom kiib' ar: Re' wili xuq'or i QaJaaw Dios chi naa rub'aan, inki.

⁶Re' i Moisés xuk'am i koq ruuk' i Aarón ruch'ihil taqe i rak'uun, xusaqb'isaj kiwach ruuk' ha'.⁷Eh re' i Moisés xukoj chi riij i Aarón i runim rooq so', xub'ak' i paam ruuk' b'ak'b'al reh i ru k'isiin rooq so', eh chinaah i re' xukoj i ruso' xa xutak'aa' chi riij kow xub'ak' i paam.⁸Chi riij i re' xukoj wo' hoq i reh chi' ruk'ux i Aarón, eh xukoj Urim chuwach je' wo' hoq i Tumim.⁹Eh xutak'aa' wo' wach naah i reh wach naah, eh chuwach i reh wach naah xukoj i k'isa junsahl chi ch'ihch' re' ruuk' i oro k'uhtb'al reh chi xkuxeesjik chik chi k'amal kib'eeh aj tiij je' rukab' i xuq'or chee i QaJaaw reh i Moisés.

¹⁰Eh chi riij i re', re' i Moisés xuchop chaloq i aseite inkojarik chi kuxesb'al xujalk'iij chinaah i rusanto laj itz'ihy naah paat i Dios, je' wo' chu'nchel i wilkeeb' chupaam, ruuk' i re' xukuxisaj taqe.¹¹Eh wuquub' pech xukihraaj aseite wach artaal. Eh xukihraaj wo' chinaah taqe i chu'nchel i kikamanik ar, xukihraaj wo' chinaah i nimlaj ye'aab' haa', je' wo' chinaah i ch'ikaab' reh. Ruuk' i re' xukuxisaj taqe.

¹²Eh re' Moisés xujalk'iij i aseite wach naah i Aarón reh chi xukuxisaj, xkahnik chi kajaaw i k'amal kib'eeh aj tiij.¹³Eh chi riij i re', re' Moisés xuk'am i koq ruuk' taqe i rak'uun i Aarón, xukoj i kiso' xub'ak' i kipaam chi korik xutak'aa' wach kinaah i reh wach kinaah k'uhtb'al reh chi xikuxeesjik chi k'amal kib'eeh aj tiij taqe. Je' rukab' i xuq'or i QaJaaw Dios reh i Moisés.

¹⁴Eh re' Moisés xutaq'aaj ruk'amariik i k'isa imas wakax xq'ahteesjik chi mayiij. Eh re' i Aarón ruch'ihil taqe i rak'uun xkiyeew i kiq'ab' wach naah i k'isa imas wakax xq'ahteesjik chi mayiij.¹⁵Eh re' i Moisés xuyok' ralaq i k'isa imas wakax, eh xumuhaa' i ju' q'ab' chupaam i kik' xuch'ulej wataq ruk'aa' i artaal, eh je' wo' chi junsuut, reh chi xusaqb'isaj wach. Eh re' i ruqox i kik' xuchihkaaj i koq waraa' i artaal ruuk' i re' xukuxisaj.

¹⁶Eh re' i Moisés xresaj i q'ina' wilik chuwach taqe i req'saa' i k'isa imas wakax, je' wo' hoq i q'ina' wilik chinaah i rak'aleel i paam, je' wo' hoq i kab'chel rukinaq'iil paam ruch'ihil i ruq'ina'iil wilik chinaah eh junk'ahtiik xub'an chinaah i artaal.¹⁷Re' i k'isa imas wakax ruch'ihil i rutz'uhmal riij, eh je' wo' rutib'kaal, eh je' wo' i rusaa', ar xuk'at chi riij reje i itz'ihy naah paat, je' wo' rukab' i xq'orarik reh i Moisés ruum i QaJaaw Dios.

¹⁸Eh chi riij i re' xutaq'aaj ruk'amariik i imas tentzun inq'ahteesjik chi k'atoj mayiij. Eh re' i Aarón, ruch'ihil taqe i rak'uun xkiyeew i kiq'ab' wach naah imas tentzun.¹⁹Chalik i Moisés xuyok' i ralaq, eh re' i rukik'eel xuchihkaaj chi junsuut, eh chinaah i artaal.²⁰Eh xuyok' chi sahlal i rutib'kaal imas tentzun, eh re' i rutib'kaal ruch'ihil i naah, ruch'ihil i ruq'ina'iil xuk'at i Moisés.²¹Eh xutz'aj wo' wach taqe i req'saa', je' wo' taqe i rutuuq, xuk'at wo' chu'nchel i ruti'jolal chinaah i artaal. Re' re' i k'atoj mayiij q'e' ink'ohnik imponik chuwach i QaJaaw Dios. Je' wo' rukab' i ruq'or i QaJaaw Dios reh i Moisés.

²²Chi riij i re', re' i Moisés xutaq'aaj wo' chik ruk'amariik imas tentzun, jinaj re' inkojarik reh i kuxisanik. Eh re' i Aarón ruch'ihil taqe i rak'uun xkiyeew i kiq'ab' wach naah.²³Eh re' i Moisés xuyok' i ralaq i kaprax, xuchop chaloq k'isiin i kik' xuch'ulej chi raa' i rusak'aaj xikin i Aarón, Xuch'ulej wo' hoq chi ju' rumaam i rusak'aaj q'ab', je' wo' hoq chi ju' i rumaam i rusak'aaj rooq.²⁴Eh xuk'am i koq ruuk' taqe i rak'uun i Aarón, xuch'ulej wo' hoq i kik' chi raa' i rusak'aaj kixikin i keh, xuch'ulej wo' hoq chi ju' i rumaam i rusak'aaj kiq'ab', je' wo' chi ju' i rumaam i rusak'aaj kooq. Eh re' i ruqox i rukik'eel imas tentzun xu chihkaaj chi junsuut, eh chinaah i artaal.

²⁵Eh re' i Moisés xuchop chaloq i ruq'ina'iil i imas tentzun, i rujeeh, eh i q'ina' wilik chinaah i req'saa', i ruq'ina'iil i rak'aal paam kab'chel i rukinaq'iil paam, i q'ina' wilik chinaah, ruch'ihil i rusak'aaj rutuuq.²⁶Eh chupaam i k'isa chakach wilkeeb' wii' i kaxlanwi'k ma' kojooj ta ch'amb'esb'al reh. Re' i q'asamaj reh i QaJaaw, xuchop chaloq jinaj i suq laj kaxlanwi'k yuq'uuj paam i ruq'oril ruuk' aseite, eh jinaj i kaxlanwi'k ma' piim taj jinaj xkiyeew wii' ruuk' i q'ina' ruch'ihil i rusak'aaj rutuuq imas tentzun.²⁷Chu'nchel i re' xuq'asaj pan q'ab' i Aarón, pan kiq'ab' taqe i rak'uun reh chi xkiq'asaj chi mayiij chuwach i QaJaaw, je' rukab' i ruq'or i k'uhb'aal.²⁸Eh re' i Moisés xuk'am wo' chik i mayiij pan kiq'ab' i re', xuyeew chinaah i artaal chinaah taqe i mayiij junk'atariik xub'an chinaah i artaal chi jinaj mayiij reh kuxesb'al, re' mayiij q'e' k'ohnik imponik chuwach i QaJaaw Dios.

²⁹Eh re' i Moisés xuchop chaloq i rutib'kaal i chi' ruk'ux i imas tentzun. Re' re' xuq'asaj chi mayiij chuwach i QaJaaw je' rukab' i ruq'or i k'uhb'aal chi kuxesb'al, re' wo' re' inkahnik reh i Moisés, je' rukab' i xq'orarik reh ruum i QaJaaw Dios.

³⁰Eh re' i Moisés xuchop chaloq aseite reh i kuxesb'al, je' wo' hoq i kik' wilik chinaah i artaal xukihraaj chinaah i Aarón je' wo' chinaah i ruso', eh je' wo' chikinaah i rak'uun, je' wo' chinaah i kiso' i rak'uun. Ruuk' i re' xukuxisaj i Aarón ruch'ihil i ruso', je' wo' taqe i rak'uun ruch'ihil i kiso'.

³¹Re' i Moisés je' wili i xuq'or reh i Aarón, keh i rak'uun: Re' taq i hat cha chaq'saj taq i tiwik wili panookb'al reh i santo laj itz'ihy naah paat molb'al iib'. Eh ar taq neenak'ux ruch'ihil i kaxlanwi'k wilik pank'isa chakach re' i mayiij inkamanik chi kuxesb'al, je' rukab' i ruq'orom cho weh i QaJaaw chi re' i mayiij wili re' i Aarón, re' taqe i rak'uun naakik'uxwiik reh.³²Eh re' i ruqox i tiwik, je' wo' hoq i ruqox i kaxlanwi'k naa rukuxiik taq ak'atam wach q'aaq'.³³Eh wuq'uub' q'iij taq naa awihiik panookb'al reh i santo laj itz'ihy naah paat molb'al iib', ruum korehtaal chik inik'ik i wuquub' q'iij reh taq aq'ahtesjiik pan q'ab' i QaJaaw Dios.³⁴Eh re' reh ruq'orom chik nik' wach i ruye'ariik i mayiij xb'aan yu'naak je' wo' re' i naa taq a'nam chi pahqb'al taq kuyb'al reh amahk.³⁵Eh chi q'iij chi aq'ab' taq naa awihiik panookb'al reh i santo laj itz'ihy naah paat molb'al iib', chuwach i wuquub' q'iij. Eh koruman chi naa taq ak'amam naah i ruk'uhb'aal i QaJaaw Dios reh chi ma' nee ta taq tikimik, ruum je' re' i ruq'orom weh.

³⁶Eh re' i Aarón, taqe i rak'uun xkian wo' chu'nchel i xq'orarik keh ruum i QaJaaw Dios ruuk' chii' i Moisés. Re' noq xutoq'aa' i rukamaj i Aarón chi k'amal kib'eeh aj tiij

¹Eh noq waxiq'iib' chik q'iij rupa'ab'jiik chi k'amal kib'eeh aj tiij i Aarón re' i Moisés, xuyuq'eej i Aarón, taqe i rak'uun, je' wo' taqe i k'amal kib'eeh i aj Israel.²Je' wili i xuq'or reh i Aarón: Chaq'asaj chi amayiij jino'q i k'isa imas wakax pahqb'al kuyb'al taq amahk. Eh nee naq'asaj jino'q i imas tentzun manlik wach kiti'jolal neenak'at chuwach i QaJaaw Dios.³Eh je' wili i neenaq'or keh i aj Israel: Chaq'asaj taq chi amayiij jino'q imas kaprax pahqb'al kuyb'al taq amahk. Eh nee taq inaq'asaj jino'q i k'isa imas wakax, jino'q imas tentzun ju'jun haab' i wilik keh, manlik wach kiti'jolal nee taq inak'at chi mayiij.⁴Eh nee taq inaq'asaj chi amayiij jino'q i b'ooyax, jino'q imas tentzun k'amb'al taq awiib' panotob'il ruuk' i QaJaaw Dios. Eh nee wo' inaq'asaj taq i amayiij re' ruuk' i naxilakeej ruuk' aseite, ruum yu'naak naa taq ruk'uhtaam riib' aweh i QaJaaw Dios, tiko'q keh inki.

⁵Re' i mayiij xuq'or i Moisés xkik'am wo' chaloq i aj Israel panookb'al reh i santo laj itz'ihy naah paat molb'al iib'. Eh xi chalik chu'nchel i tinamit xkimol i koq kiib' chuwach i QaJaaw Dios.⁶Eh je' wili xq'orarik keh ruum i Moisés: Re' wili xuq'or i QaJaaw Dios chi naa taq a'nam, cha a'n taq reh chi nee ruk'uhtaaj taq chawach i ruloq'il i QaJaaw Dios, inki.

⁷Re' i Moisés je' wili i xuq'or reh i Aarón: Chajil chawiib' wach artaal chaq'asaj amayiij pahqb'al kuyb'al amahk, eh chaq'asaj i k'atoj chikop tojb'al riij amahk, nee wo' naaq'asaj i mayiij pahqb'al kuyb'al kimahk i tinamit, eh nee wo' naaq'asaj i k'atoj chikop tojb'al riij i kimahk, je' rukab' i xuq'or i QaJaaw, inki.

⁸Re' i Aarón xujil wo' i koq riib' wach artaal xuyok' i ralaq i k'isa imas wakax xuq'asaj chi mayiij chi riij i ru mahk i reh.⁹Chi riij i re', re' taqe i rak'uun i Aarón xkijil i koq i rukik'eel i chikop ruuk' i kajaaw, eh re' reh xuch'ulej wataq ruk'aa' i artaal. Eh re' i ruqox i kik' xuchihkaaj i koq waraa' i artaal.¹⁰Xuk'at wo' chinaah i artaal i ruq'ina'iil ruch'ihil i kab'chel i rukinaq'iil paam, je' wo' hoq i ruq'ina'iil i rutamaat i chikop xye'arik chi mayiij chi riij i mahk, je' wo' rukab' i xuq'or i QaJaaw Dios reh i Moisés.¹¹Eh re' i rutib'kaal i rutz'uhumal i riij xuk'at reje ko chi riij i paat i molarik wii' iib'.

¹²Eh re' i Aarón xuyok' i ralaq i chikop xkiq'asaj chi k'atoj mayiij. Re' taqe i rak'uun xkijil i koq ruuk' i kajaaw i rukik'eel i chikop, eh re' reh xuchihkaaj chi junsuut, eh chinaah i artaal.¹³Eh xkik'am wo' cho reh i Aarón i rutib'kaal i chikop xq'ahteesjik chi k'atoj mayiij. Yok'oj chik chi sahlal xkik'am wo' cho reh i naah. Eh xuk'at chinaah i artaal.¹⁴Re' i Aarón xutz'aj wach i req'saa', ruch'ihil i rutuuq, xuk'at chinaah i artaal chi mayiij je' rukab' i xub'an reh chu'nchel i ruti'jolal i chikop.

¹⁵Eh xuchop wo' chaloq imas kaprax xkik'am chee tinamit, xuyok' i ralaq xuq'asaj chi mayiij chuwach i QaJaaw Dios pahqb'al kuyb'al kimahk i tinamit je' rukab' i xub'an pampeet.¹⁶Xuq'asaj wo' hoq i chikop chi k'atoj mayiij, xub'an wo' hoq je' rukab' i ruq'or i k'uhb'aal.¹⁷Eh xuq'asaj wo' hoq i mayiij xa chi naq'wach jumohq' i xuchop chaloq xuk'at chinaah i artaal noq ruk'atam chik i mayiij inye'arik wahq'eq.

¹⁸Eh xuyok' i ralaq i b'ooyax, ruch'ihil imas tentzun xuq'asaj chi mayiij k'amb'al kiib' i tinamit panotob'il ruuk' i Dios. Re' taqe i rak'uun xkijil i koq ruuk' i kajaaw i rukik'eel i chikop, eh re' reh xujalk'iij chi junsuut, eh chinaah i artaal.¹⁹Re' i ruq'ina'iil i b'ooyax, i ruq'ina'iil imas tentzun, i rujeeh, i q'ina' wilik chinaah i req'saa' ruch'ihil kab'chel i rukinaq'iil i paam ruch'ihil i ruq'ina'iil i rak'alel paam.²⁰Eh re' i rutib'kaal i chi' kik'ux i chikop xkiyeew chinaah i ruq'ina'iil. Re' Aarón junk'ahtiik xub'an ruuk' i q'ina' chinaah i artaal.²¹Re' taqe i rutib'kaal chi' kik'ux, taqe i rusak'aaj kituuq i chikop xuq'asaj wo' hoq chi mayiij chuwach i QaJaaw je' rukab' i ruq'or i k'uhb'aal, je' rukab' i xq'orarik reh i Moisés ruum i QaJaaw Dios.

²²Eh re' i Aarón xuyub' reje i q'ab' chi kuxeesb'al keh i tinamit. Eh noq ruq'asam chik i mayiij chi riij i mahk, noq ruq'asam chik i k'atoj mayiij k'amb'al iib' panotob'il ruuk' i QaJaaw Dios xelik reje wach artaal.²³Re' i Moisés ruch'ihil i Aarón xi okik i koq chupaam i rusanto laj itz'ihy naah paat molb'al iib'. Noq xi elik chaloq xkikuxisaj i tinamit, eh re' i QaJaaw xuk'uhtaaj chaloq i ruloq'il chikiwach i tinamit.²⁴Eh re' i QaJaaw Dios xutaq'aaj chaloq i q'aaq' xanoq wo' xuk'atib'eej i chikop, i ruq'ina'iil chinaah i artaal. Eh noq xkilow chi je' re' i tinamit xkiloq'ej i QaJaaw Dios xkipach'aa' kiib' korehtaal xkireq wach ak'al ruuk' i yejal kiwach. Re' i mahk xub'an i Nadad ruch'ihil i Abiú

¹Re' i Nadad, i Abiú rak'uun taqe Aarón xkichop chee kisansario, xa re' la' tokoom inaq'wach q'aaq' xkiyeew chupaam, re' i ma' q'orooj ta keh ruum i Dios chi naa kiye'em chupaam, eh xkiyeew i insensia chinaah. Eh kiq'asaj chi mayiij chuwach i QaJaaw Dios.²Ruum i re' xutaq'aaj chaloq i q'aaq' QaJaaw Dios chi xik'ahtik chi jumpech ar xikimik chuwach i QaJaaw.

³Eh re' i Moisés je' wili i xuq'or reh i Aarón:
Re' aj re' wili xraaj ruq'orom i QaJaaw Dios noq xuq'or chi je' wili:
Re' hin naa nuk'uhtaam i nuSantohiil kuuk' i kisik'wik weh. Eh naa nuk'uhtaam i nuloq'il chikiwach i tinamit Israel, inki.
Re' Aarón ma' xq'orik taj chi jumpech.

⁴Eh re' i Moisés xuyuq'eej ruuk' i Misael, i Elzafán, re' taqe i rak'uun i Uziel rikaan i Aarón, je' wili i xuq'or keh:
Kim taq k'oloq taqe awesaj i ma' tokoom ta taqe awuuk' xikimik wach artaal chak'am taq reje chi riij i santo laj ye'aab', inki.

⁵Eh re' keh xi okik i koq, eh xkesaj taqe chaloq i kamnaq ko wilik i ruso' i k'amal kib'eeh aj tiij chikiij xkik'am reje kochiriij i santo laj ye'aab', je' rukab' xq'orarik keh ruum i Moisés.

⁶Re' i Moisés je' wili i xuq'or reh i Aarón, keh i kiib' chi rak'uun re' i Eliazar, re' Itamar:
Maa wesaj taq i b'urb'al wach anaah, eh maa xih taq aso' chawiij ruum ruti'kiil taq ak'ux, reh chi ma' nee ta taq tikimik haa' i hat reh chi ma' nee ta ruyeew i rujosq'iil i Dios chinaah i tinamit. Korik inchol chi ti' taq naa awik'raam i hat, je' wo' taqe i aj Israel i xkik'ul kab'chel taq aawas ruum xi k'atarik chaloq ruuk' q'aaq' ruum i Dios.⁷Eh ma' naa ta taq aweliik reje panookb'al reh i santo laj itz'ihy naah paat molb'al iib', reh chi ma' nee ta taq tikimik ruum xat kuxesjik taq chik ruuk' aseite parub'ihnaal i QaJaaw.
Eh re' keh xkian wo' hoq je' rukab' i xq'orarik keh ruum i Moisés.

⁸Re' i QaJaaw Dios je' wili i xuq'or reh i Aarón:⁹Re' hat, re' taqe awak'uun ma' naa ta taq awuk'em jino'q ha' inxohk'risanik noq naa taq awokiik chupaam i santo laj itz'ihy naah paat molb'al iib', reh chi ma' nee ta taq tikimik. Re' wili jinaj k'uhb'aal cha weh taq i hat, je' wo' chi keh taq awiih aamaam.¹⁰Reh chi nee taq inareq chi riij i wilik rusantohiil, eh i ma' xta rusantohiil, eh aha' wilik i ma' ch'uwa' ta wach, eh aha' wilik i ch'uwa' wach.¹¹Reh chi nee taq i na a'n ruk'uhtjiik keh taq awuch aj Israel chu'nchel i k'uhb'aal xnuq'or reh i Moisés, inki.

¹²Eh re' i Moisés je' wili i xuq'or reh i Aarón, keh i rak'uun re' i Eliazar, re' Itamar, koxikahnik chi k'achalkeeb': Chak'am taq i ruqox i mayiij xa chi naq'wach xk'atarik chuwach i QaJaaw.
Ar taq neenak'ux chuwach i artaal chi ma' kojooj ch'amb'esb'al reh, ruum re' re' wilik rusantohiil.¹³Eh re' hat naa ak'uxwiik reh awuch'ihil taqe i awak'uun chupaam i ye'aab' wilik rusantohiil. Ruum re' re', re' taq i hat naa ak'uxwiik reh i mayiij ink'atarik chuwach i QaJaaw Dios. Re' hin je' re' xuq'or weh i QaJaaw.¹⁴Eh chupaam i saq paam ye'aab' naa taq ak'uxum kuuk' awak'uun awixq'uun i rutib'kaal chi' ruk'ux i rutuuq chikop, ruum re' re' k'uxumb'al taq aweh. Re' mayiij re' re', re' inkiq'asaj i aj Israel k'amb'al kiib' panotob'il ruuk' i Dios.¹⁵Re' i rutib'kaal chi' ruk'ux, i rutuuq, i ruq'ina'iil i chikop xti nim wach mayiij. Re' re' i junq'ahteesjiik chi mayiij chuwach i QaJaaw Dios naa rukahniik cha weh i hat, eh keh wo' hoq awak'uun. Je' rukab' i xuq'or weh i QaJaaw Dios.

¹⁶Re' i Moisés xtohq'ik rupahqaam aha' wilik i rutib'kaal i imas kaprax xq'ahtesjik chi mayiij chi riij i mahk. Eh noq xq'orarik reh chi xk'ahtik, ma' k'isiin ta xchalik ruk'aah chinaah i Eliazar, i Itamar, re' kab'chel i rak'uun i Aarón koxikahnik chi k'achalkeeb', je' wili xuq'or keh:

¹⁷¿Chib'ih reet noq ma' xak'ux ta taq chupaam i santo laj ye'aab' i rutib'kaal i kaprax xq'ahteesjik chi mayiij? Re' re' wilik rusantohiil, re' ruyeew taq aweh i QaJaaw Dios i hat reh chi naa taq aq'asam chi mayiij reh chi naa rukuyarik i kimahk i tinamit ruum i QaJaaw Dios.¹⁸Re' taq i hat aweht'al taq chi ma' xk'amarik ta i koq i kik' chupaam i santo laj ye'aab', eh ma' xak'ux ta taq i rutib'kaal i chikop xye'arik chi mayiij chupaam i ye'aab' re' re', je' naq rukab' i xnuq'or taq aweh, inki.

¹⁹Eh re' i Aarón je' wili ruchaq'weesjiik i Moisés xub'an:
Chab'iraj i naa nuq'orom, yu'naak xkiq'asaj i kimayiij chi riij i kimahk, eh xkik'at i mayiij chuwach i QaJaaw Dios. Eh wita xnuk'ux i hin yu'naak i mayiij xkik'at chi riij i mahk ¿Mi xponik naq chuwach i QaJaaw Dios? inki.

²⁰Eh noq xrib'iraj i Moisés chi je' re' ch'iklojik ruk'ux ma' xta chik xuq'or. Re' taqe i chikop i ruk'ul chi naa kik'uxarik, eh re' taqe ma' ruk'ul ta chi naakik'uxariik (Deut 14.3-21)

¹Re' i QaJaaw Dios je' wili xuq'or reh i Moisés, i Aarón:²Chaq'or taq keh chu'nchel i aj Israel chi je' wili: Re' taqe i chikop wili naa taq ak'uxum chi kixilak chu'nchel i chikop wilkeeb' wach ak'al.³Re' taqe i chikop ch'aqeel panyejaal i kixijab' lach' i ju' i kooq, eh inkixab'ej wo' chik i kiwa' inkik'ux neerub'an chi nee taq inak'ux.⁴Atoob' ta inki xab'ej wo' naq chee kiwa' xa re' la' ma' ch'aqeel ta panyejaal i kixijab'. Re' i cameyo atoob' ta ruxab'ej wo' naq chaloq i ruwa' xa re' la' ma' ch'aqeel ta panyejaal i ruxijab' ma' naa ta taq ak'uxum ruum ch'uwa' wach.⁵Eh je' wo' hoq imul atoob' ta ruxab'ej chee ruwa' ruka'peech, xa re' la' ma' xta ruxijab', eh ma' lach' taj nah rooq ma' naa ta taq ak'uxum ruum ch'uwa' wach.⁶Eh re' i oow ruum re' chikop re' re' atoob' ta ruxab'ej chee ruwa' ruka'peech xa re' la' chik imb'anik reh ma' xta ruxijab', eh ma' lach' taj i rooq, ma' naa ta taq ak'uxum ruum ch'uwa' wach.⁷Je' wo' hoq i rutib'kaal ahq atoob' ta wilik ruxijab', eh lach' i rooq, xa re' la' chik imb'anik reh ma' ruxab'ej taj i ruwa' ruka'peech, ma' naa ta taq ak'uxum ruum ch'uwa' wach.⁸Re' i kitib'kaal taqe i chikop re' re' ma' naa ta taq ak'uxum ni xata naa taq atz'a'am i kiti'jolal chi kamnaq chik ma' naa ta taq ak'uxum ruum ch'uwa' kiwach.

⁹Eh chi kixilak chu'nchel i chikop wilkeeb' pan palaw, eh pantaq rooq ha', re' taqe wili naa ak'uxum: Re' taqe i kar i wilik kixiik', eh wilik ru tahsaal i kiij.¹⁰Eh re' taqe i ma' xta kixiik', eh ma' xta ru tahsaal i kiij wilkeeb' chi kixilak i chikop wilkeeb' pan palaw oon pantaq rooq ha' ma' naa ta taq ak'uxum ruum ch'uwa' wach chi k'uxarik.¹¹Re' taqe re' ch'uwa' wach i kitib'kaal ruum i re' ma' naa ta taq ak'uxum, eh ma' naa ta wo' atz'a'am i kiti'jolal noq kamnaq chik taqe, ruum ch'uwa' kiwach.¹²Eh chu'nchel chikop ma' xta kixiik' ma' xta ru tahsaal i kiij wilkeeb' pantaq ha' naa taq aq'orom chi ch'uwa' kiwach.

¹³Eh chi kixilak i chikop kirupinik pan taxaaj i ma' naa ta taq ak'uxum ruum ch'uwa' kiwach, re' taqe wili: Re' xihk re' ooloch' q'eq riij, eh re' i kaq riij.¹⁴Re' i k'uch q'eq riij, eh re' i kaq riij.¹⁵Je' wo' chu'nchel i chikop kirupinik re' q'oreel nik' wach ruwii'.¹⁶Re' nimlaj chikop wilik ruxiik', re' i tuhkur, re' i tz'ikin panha' inwihik, re' i xihik, re' q'oreel nik' wach kiwii'.¹⁷Re' i rajaaw tuhkur, re' i chikop je' ruwii' k'uch.¹⁸Re' i chikop wilik ruxiik' nimaq i ju', eh re' i je' nimaq patuxk, re' i nimaq k'uch.¹⁹Re' saq ikii, re' i tz'ikin molol siip, re' tz'ikin wilik rikoom, eh re' i sootz'.

²⁰Je' re' noq chu'nchel i chikop kirupinik wilik kooq ma' naa ta taq ak'uxum ruum ch'uwa' taq wach cha weh.²¹Wilik wo' taqe i k'ok' chikop wilik kixiik', eh wilik kituuq wilik kooq kipisk'anik chinaah i wach ak'al. Re' taqe re' neerub'an chi nee taq inak'ux.²²Re' taqe i wili i ruk'ul chi nee nak'ux. Re' i nimaq chili'l, re' i q'oreel nik' wach ruwii', je' wo' hoq i xa k'ok' chili'l, je' wo' taqe chili'l kipisk'anik.²³Chu'nchel i kok' chikop wilik kixiik' re' ruuk' taqe re', kijib' i kooq ma' naa ta taq ak'uxum ruum ch'uwa' taq wach cha weh.

²⁴Eh awach neentz'a'inik reh i kiti'jolal chi kamnaq chik taqe nee ruch'uwa'risaj riib' korehtaal chik inokik aaq'ab'.

²⁵Eh wila' awach xk'amwik reje reh i ruti'jolal i chikop re' ruuk' i re' inchol rutz'ajam i ruso', eh neenkahnik chi ch'uwa' wach korehtaal chik inokik aaq'ab'.

²⁶Chu'nchel i chikop wilik ruxijab' eh ma' lach' taj i rooq ch'uwa' taq wach cha weh. Eh xa awach i neentz'a'inik reh ruti'jolal nee wo' inkahnik chi ch'uwa' wach.

²⁷Re' taqe i chikop kijib' i kooq, eh re' inkiyeew wach ak'al chi korik i paam i kooq noq kib'ehik maa k'ux taq ruum ch'uwa' kiwach. Eh re' neentz'a'inik reh i chikop re' re' noq kamnaq chik neenkahnik chi ch'uwa' wach korehtaal chik inokik aq'ab'.²⁸Eh re' neenk'amwik reje i kamnaq i chikop re' re' inchol rutz'ajam i ruso', eh neenkahnik chi ch'uwa' wach korehtaal chik inokik aq'ab'. Eh ch'uwa' wo' wach taq cha weh i hat.

²⁹Eh chi kixilak taqe i chikop kijukem kiib' wach ak'al noq kib'ehik, ch'uwa' kiwach chi nee taq inak'ux re' taqe wili: Re' kuxb'ajlaq, re' ch'ooh, re' i tuhtz' re' q'oreel nik' wach kiwii'.³⁰Je' wo' i k'iix riij chikop, i nimaq k'ap, i k'ok' k'ap i tohlook, eh re' i chereun.

³¹Chu'nchel i re' ma' naa ta taq ak'uxum ruum ch'uwa' taq wach cha weh. Eh re' i neentz'a'inik reh i ruti'jolal jino'q i chikop re' re' naa rukahniik chi ch'uwa' wach korehtaal chik inokik aq'ab'.

³²Eh wila' re' jino'q i kamnaq chikop re' re' neenq'ehb'ik chinaah jino'q i xa chib'ih jariik neenkahnik chi ch'uwa' wach chee', itz'ihy, tz'uhuum, koxtaal, ch'ihch', xa chib'ih chik jariik chi kamamb'al naa rukahniik chi ch'uwa' wach korehtaal chik inokik aq'ab' konaa chik ruye'ariik panha' ra'j chik naa rusaaqb'iik wach re'.

³³Eh wila' xq'ehb'ik jino'q i kamnaq chikop re' re' chinaah jino'q i ak'al xun neenkahnik chi ch'uwa' wach, eh je' wo' hoq i chib'ih wilik chupaam. Re' i ak'al xun re' re' koruman chi naa rupaxjiik chi jumpech.³⁴Wila' xkirlojik i ha' wilik chupaam i xun re' re' chinaah jino'q i k'uxumb'al nee wo' kahnik chi ch'uwa' wach. Eh chu'nchel i ha' inuuk'jik wilik chupaam i xun nee wo' inkahnik chi ch'uwa' wach.³⁵Eh xa chib'ih pa' aj chinaah neenq'ehb'ik jino'q i kamnaq chikop re' re', atoob' ta jino'q ye'aab' q'aaq', jino'q horna ak'al korjinaq wii', naa rukahnik chi ch'uwa' wach. Eh inchol ruyojiik chi jumpech, eh ch'uwa' wo' wach taq cha weh i hat.

³⁶Eh wila' re' jino'q i kamnaq chikop re' ruuk' taqe i re' xq'ehb'ik chinaah jino'q i raasb'al ha', oon rooq ha' ma' nee ta nkahnik chi ch'uwa' wach. Eh awach neentz'a'inik reh i kamnaq chikop re' re' ra'j naa rukahniik chi ch'uwa' wach re'.

³⁷Eh wila' re' jino'q i kamnaq chikop re' ruuk' taqe re' xq'ehb'ik chinaah jino'q i ja' naa rutikariik. Re' aj re' re' ma' naa ta rukahniik chi ch'uwa' wach.³⁸Eh wila' ye'ooj panha' i ja' wila' xq'ehb'ik i kamnaq chikop chinaah i ha', re' i ja' re' re' neenkahnik chi ch'uwa' wach taq cha weh.

³⁹Wila' wilik jino'q i chikop naa naq taq ak'uxum, eh xa xchalik rukimiik. Eh awach i nee neentz'a'inik reh i kamnaq chikop re' re' neenkahnik chi ch'uwa' wach korehtaal chik inokik aaq'ab'.⁴⁰Eh re' ineenk'uxwik reh i kamnaq chikop koruman chi nee rutz'aj i ruso', neenkahnik chi ch'uwa' wach korehtaal chik inokik i aaq'ab'. Awach i nee neesaniik cho reh i kamnaq chikop koruman chi naa rutz'ajam i ruso', eh naa rukahniik chi ch'uwa' wach korehtaal chik inokik aaq'ab'.

⁴¹Ma' jino'q wo' hoq i chikop xa kijukem kiib' noq kib'ehik, naa ta taq ak'uxum ruum ch'uwa' taq wach cha weh.

⁴²Chu'nchel i chikop kijukem kiib', eh pan kijib' oon ruk'ihaal i kooq noq kib'ehik ma' naa ta taq ak'uxum ruum ch'uwa' wach taq cha weh.⁴³Re' taq i hat ma' ruk'ul taj chi nee taq i nach'uwa'reej taq awiib' ruuk' i ruk'uxariik jino'q i chikop xa rujukem riib' noq inb'ehik eh ch'uwa' wach.⁴⁴Ruum re' hin taq aaWaJaaw aaDios, je' re' noq re' taq i hat chasaqb'isaj taq awiib', eh cha santoheej taq awiib' ruum re' i hin, hin santo. Maa ch'uwa' risaj taq awiib' kuum taqe i chikop kijukem kiib' wach ak'al noq kib'ehik.⁴⁵Re' hin taq aaDios i xineesanik taq cha weh parutinamitaal i Egipto reh chi xin kahnik taq chi aaDios. Je' re' noq cha santoheej taq awiib' ruum re' hin, hin santo.

⁴⁶Re' wili i k'uhb'aal chikiij chu'nchel i chikop wilkeeb' chinaah i wach ak'al, je' chi kooq kib'ehik, je' chi wilik kixiik', je' chi kijukem kiib' noq kib'ehik, je' chi pantaq ha' wilkeeb', tiko'q keh inki Dios.⁴⁷Ruuk' i re' nee taq inakoj rehtaal aha' wilik i saq wach, aha' wilik i ch'uwa' wach. Eh aha' wilik i nee ruyeew riib' chi neen k'uxarik, eh aha' wilik i ma' nee ta ruyeew riib' chi neen k'uxarik. Re' wili i k'uhb'aal chi riij ixoq noq naa raasjiik ruha'lak'uun

¹Re' i QaJaaw Dios je' wili i xuq'or reh i Moisés:²Re' hat je' wili i naa aq'orom keh i aj Israel: Re' ixoq noq naa raasjiik ruha'lak'uun i wuq'uub' q'iij naa rukahniik chi ch'uwa' wach, je' rukab' i ruk'ul noq i rub'an i rutz'ajooj chi poh.³Eh re' i k'isa rak'uun waxihib' q'iij i wilik reh noq naa rupoch'ariik i rutz'uhmal naah i k'isa ruk'achab'⁴Eh re' ixoq oxlaj ru ka'winaq q'iij naa ruy-eem korehtaal intz'irlojik i rukik'eel, eh ma' naa ta rutz'a'am jino'q i wilik rusantohiil, ni xata naa rokiik chupaam i itz'ihy naah paat wilik rusantohiil, korehtaal i rureq i q'iij chi naa rukahniik chi saq wach.⁵Eh wila' k'isaxq'un ix-aasjik kiib' xamano naa rukahniik chi ch'uwa' wach, je' rukab' i ruk'ul noq i rub'an i rutz'ajooj chi poh. Eh waqiib' rukajwinaq q'iij naa ruy-eem korehtaal i rumay elik i rukik'eel, eh naa rukahniik chi saq wach.

⁶Eh noq ik'inaq chik i q'iij naa rusaqb'isam wii' riib' reh i raasjiik i rak'uun, oon rixq'uun koruman chi naa ruq'asam chi rumayiij jino'q i k'isa imas tentzun jinaj haab' wilik reh. Eh naa wo' ruq'asam reh i k'amal b'eeh aj tiij jino'q i k'isa paloma oon jino'q i k'isa mukur panookb'al reh i santo laj itz'ihy naah paat molb'al iib'.⁷Eh re' chik i k'amal kib'eeh aj tiij naa ruq'asaniik chi mayiij chuwach i QaJaaw pahqb'al kuyb'al ru mahk ixoq.
Ruuk' i re' naa ruk'utiniik chi rumayam chik elik i rukik'eel xkahnik chik chi saq wach. Re' i wili i k'uhb'aal chi riij ixoq naa rasjiik jino'q rak'uun, oon jino'q rixq'uun.⁸Wila' re' i tuutb'ees ma' xmanlojik i rutz'aaq loq'b'al reh i k'isa imas tentzun, nee ruk'am reje kib'-oq i k'ok' mukur, oon kib'-oq i k'ok' paloma. Re' i k'amal kib'eeh aj tiij naa ruq'asaniik keh chi mayiij ruuk' i re' naa rukahniik chi saq wach ixoq. Re' wili i k'uhb'aal chi riij awach i nelik cho raxq'aah chi riij

¹Re' i QaJaaw Dios je' wili xuq'or reh i Moisés ruch'ihil i Aarón:²Wila' re' jino'q i winaq wilik jino'q i ti' chuwach i ruti'jolal sipjinaq, oon t'ulut'aq q'aah, oon saq reeq'. Eh wila' wilik jino'q i yab'ilaal chi riij je' cho rax q'aah noq ink'utinik koruman chi naa ruk'amariik cho chuwach i Aarón i kajaaw i k'amal kib'eeh aj tiij, oon chuwach jino'q i rak'uun wilkeeb' chi k'amal kib'eeh aj tiij.³Eh re' i k'amal kib'eeh aj tiij re' re' naa rilom chi korik i ruyab'ilaal i winaq mi ma' rax q'aah, naa rukojom rehtaal wi xsaqb'ik i rismaal wilik wii' i q'aah, eh mi jul qohoq paam chuwach i ruti'jolal re' i k'amal kib'eeh aj tiij naa runab'eem chi raxq'aah imb'anik reh, eh naa ruq'orom chi ch'uwa' wach.

⁴Eh wila' saq ink'utinik i ruyab'ilaal wilik wach ruti'jolal, eh wila' ma' q'e' jul qohoq, eh wila' ma' xsutinik chi saq i rismaal wilik wii'. Re' i k'amal kib'eeh aj tiij wuquub' q'iij naa rutz'apam i yowaab' re' re'.⁵Eh wuquub'-oq chik q'iij rutz'apam naa wo' chik rupech'em chi korik mi ma' xooj chi nimaal i ruyab'ilaal chuwach i ruti'jolal. Re' i k'amal kib'eeh aj tiij wuquub' wo' chik q'iij naa rutz'apam i yowaab' re' re'.⁶Eh paruwuuq q'iij naa wo' chik rupech'em i yowaab', wila' xtohq'ik ruk'aachjiik wila' ma' xooj chi nimaal iraaj ruq'orom chi xa k'isa q'aah i xpoq' chaloq chi riij. Re' i k'amal kib'eeh aj tiij naa ruq'orom chi saq wach i yowaab', naa rutz'ajam i ruso' naa rukahniik chi saq wach.

⁷Eh raaj wila' xooj chi nimaal i ru q'aah noq ruk'uhtaam chik riib' reh i k'amal kib'eeh aj tiij noq q'orooj naq chik chi saq wach, re' yowaab' re' re' koruman wo' chik chi naa ruchaliik ruk'uhtaam riib' chuwach i k'amal kib'eeh aj tiij.⁸Eh noq nee wo' chik i rupech' i yowaab', eh nee rilow chi xooj chi nimaal i ru q'aah wach ruti'jolal, ruuk' i re' naa runab'eem chi rax q'aah imb'anik reh. Ruum i re' naa ruq'orom chi ch'uwa' wach.

⁹Eh wila' wilik i rax q'aah chi riij jino'q i winaq koruman chi naa ruk'amariik cho chuwach i k'amal kib'eeh aj tiij.¹⁰Eh re' reh naa rilom mi saq chik naah i ru q'aah i yowaab' mi ch'oleel chik wach i rutib'kaal, eh mi xsaqb'ik i rismaal,¹¹iraaj ruq'orom chi xooj chi nimaal i rax q'aah chuwach i ruti'jolal. Eh re' i k'amal kib'eeh aj tiij naa ruq'orom chi ch'uwa' wach, ruum i re' ma' naa ta chik ruye'em riib' chi naa rutz'apam.

¹²Eh re' i k'amal kib'eeh aj tiij naa rilom i ru rax q'aah i yowaab' wila' xooj chi nimaal xnujik chu'nchel i ruti'jolal, xelik cho koju' rooq, eh xponik koyejal naah ko aha' neerub'an rilariik i k'amal kib'eeh aj tiij.¹³Eh re' reh naa rupech'em i yowaab' mix nujik chu'nchel i riij chi rax q'aah. Eh wila' xnujik i riij, re' i k'amal kib'eeh aj tiij naa ruq'orom chi ma' ch'uwa' ta wach ruum xsaqb'ik chik wach i ru rax q'aah ruum i re' naa rukahniik chi saq wach.¹⁴Noq naa rukahniik chi ch'oleel wach i rutib'kaal chupaam q'iij re' re' naa rukahniik chi ch'uwa' wach.¹⁵Eh re' i k'amal kib'eeh aj tiij naa rupech'em i rutib'kaal ch'oleel wach chi riij i re' naa ruq'orom chi ch'uwa' wach i yowaab' re' re'. Korik chi rax q'aah chik imb'anik reh.

¹⁶Eh wila' re' rutib'kaal ch'oleel wach xsutinik chi saq re' yowaab' re' re' koruman chi naa ruchaliik ruuk' i k'amal kib'eeh aj tiij.¹⁷Reh chi naa rupech'em wila' xrilow chi xkahnik chi saq chik i ru q'aah i yowaab'. Re' i k'amal kib'eeh aj tiij naa ruq'orom chi saq chik wach i yowaab' ruum k'ahchi' chik ruk'achjiik.

¹⁸Eh wila' awach i wilik jino'q q'aah chuwach i ruti'jolal, eh neenooj k'aachjoq.¹⁹Xkahnik-oq paruye'aab' jino'q i sipjeel oon jun rehq'-oq chik i yab'ilaal saq metik ru kaqiil inchol chi naa ruchaliik ruk'uhtaam chuwach i k'amal kib'eeh aj tiij.²⁰Eh re' reh nee rilow i wilik wii' i yab'ilaal, q'e' chik jul qohoq paam, eh wila' saaqb'ik i rismaal wilik wii'. Eh re' i k'amal kib'eeh aj tiij naa ruq'orom chi re' yowaab' re' re' ch'uwa' wach ruum re' i ruyab'ilaal rax q'aah.²¹Wila' re' i k'amal kib'eeh aj tiij xrilow chi re' i yowaab' ma' saq taj i rismaal wilik wii' i ru q'aah eh ma' jul ta qohoq paam xtohq'ik la' ruq'ehb'iik naah xa neerutz'ap wuquub'-oq q'iij.²²Eh wila' xooj chi nimaal i ruyab'ilaal chuwach i ruti'jolal, re' i k'amal kib'eeh aj tiij naa ruq'orom chi ch'uwa' wach i yowaab' ruum i rax q'aah chik imb'anik reh.²³Eh wila' ma' k'ahchi' chik rojiik chi nimaal iraaj ruq'orom chi xa re' chik i rehtalil i q'aah wilik ar, eh re' i k'amal kib'eeh aj tiij naa ruq'orom chi saq wach i winaq re' re'.

²⁴Wila' awach i xuk'at riib' kahnik-oq chi saq oon chi kaq wach i ruti'jolal,²⁵re' i k'amal kib'eeh aj tiij naa rupech'em mi xsutinik chi saq i rismaal wilik wii' k'ahteel. Eh mi jul qohoq paam iraaj ruq'orom chi xsutinik chi rax q'aah i ruk'ahteel, ruum i re' naa ruq'orom i k'amal kib'eeh aj tiij chi ch'uwa' wach i winaq re' re'.²⁶Eh wila' re' i k'amal kib'eeh aj tiij xrilow chi ma' xsaqb'ik taj i rismaal i wilik wii' i rehtalil i ruk'ahteel. Eh mi ma' jul qohoq paam, wila' xrilow chi k'ahchi' rusahchiik wach i ruk'ahteel. Re' reh xanaa rutz'apam wuquub'-oq q'iij.²⁷Eh wuquub'-oq chik q'iij rutz'apariik naa wo' chik rupech'ariik ruum i k'amal kib'eeh aj tiij. Eh wila' xrilow chi xooj chi nimaal i ruk'ahteel naa ruq'orom chi ch'uwa' wach i winaq, ruum rax q'aah chik imb'anik reh.²⁸Wila' re' i ruk'ahteel ma' xooj ta chi nimaal, eh k'aachjik-oq chik i rub'an, iraaj ruq'orom chi xa sipjeel imb'anik reh. Eh re' i k'amal kib'eeh aj tiij naa ruq'orom chi saq wach ruum xa re' chik i rehtalil xkahnik i ruk'ahteel.

²⁹Eh wila' re' jino'q i winaq oon jino'q ixoq neenpoq' cho jino'q i q'aah panaah oon parisinchii',³⁰re' i k'amal kib'eeh aj tiij naa rupech' wii' reh. Wila' re' q'aah jul qohoq paam, eh wila' q'ank'isik chik i rub'an xapalik chik i rismaal wilik wii'. Re' i k'amal kib'eeh aj tiij naa ruq'orom chi ch'uwa' wach i yowaab' re' re' ruum rax q'aah i wilik panaah oon parusinchii'.³¹Wila' re' k'amal kib'eeh aj tiij xrilow chi re' yowaab' ma' k'ahchi'ta rukahniik chi jul paam, eh ni xata wilik i q'eq laj isb' wilik wii', xa naa rutz'apariik wuquub'-oq q'iij.³²Eh paruwuuq q'iij naa wo' chik rupech'ariik i ru q'aah ruum i k'amal kib'eeh aj tiij wila' xrilow chi ma' k'ahchi' ta rukahniik chi jul paam, eh ni xata k'ahchi' rojiik chi nimaal ma' xta wo' hoq i isb' q'ank'isik wilik wii'.³³Eh re' i k'amal kib'eeh aj tiij neeruq'or chi re' i yowaab' re' re' chuset' i rismaal naah, eh je' wo' hoq i rusinchii' chi riij i re' nee wo' chik i tutz'ap wuquub'-oq q'iij.³⁴Eh paruwuuq q'iij re' i k'amal kib'eeh aj tiij naa wo' chik rupech'em i ru q'aah i yowaab' re' re' wila' ma' xooj chi nimaal, wila' ma' k'ahchi' rukahniik chi jul paam. Re' i k'amal kib'eeh aj tiij naa ruq'orom chi saq wach i yowaab', naa rutz'ajam i ruso' eh naa rukahniik chi saq wach.³⁵Eh wila' re' ru q'aah xooj wo' chik chi nimaal noq ruq'orom naq chik i k'amal kib'eeh aj tiij chi saq wach.³⁶Re' i k'amal kib'eeh aj tiij naa aj ruq'orom chi re' q'aah k'ahchi' rukachjiik, saq chik wach. Eh re' i k'amal kib'eeh aj tiij naa ruq'orom chi saq wach i yowaab'.³⁷Eh wila' re' i k'amal kib'eeh aj tiij xrilow chi ma' k'ahchi' ta rojiik chi nimaal eh wila' xelik q'eq isb' wilik wii' iraaj ruq'orom chi re' q'aah k'ahchi' ruk'achjiik saq chik wach. Eh re' k'amal kib'eeh aj tiij naa ruq'orom chi saq wach i yowaab' re' re'.

³⁸Eh noq re' winaq oon ixoq wilik taqe saq reeq' wach ruti'jolal,³⁹re' i k'amal kib'eeh aj tiij naa rupech'em. Eh wila' re' i yowaab' re' re' wilik taqe i saq reeq' chi riij q'eeq chik k'isinoq naah iraaj ruq'orom chi ma' q'e' ta nim wach imb'anik reh, re' yowaab' re' re' neenkahnik chi saq wach.

⁴⁰Re' i jino'q i winaq reh wila' xq'ehb'ik i rismaal naah atoob' ta neenkahnik chi t'uus wach i naah xasaq wo' wach neenkahnik.⁴¹Eh wila' xq'ehb'ik i naah yejaal wach atoob' ta neenkahnik chi t'uus wach i naah xasaq wo' wach neenkahnik.⁴²Eh wila' wilik jino'q i q'aah saq, eh kaq ti'ik wach aha' xelik wii' i rismaal naah, oon yejaal wach oon rij naah iraaj ruq'orom chi rax q'aah chik i k'ahchi' reliik cho wach naah.⁴³Eh re' i k'amal kib'eeh aj tiij naa rupech'em i ru q'aah aha' i xt'uslujik wii' wach i naah mi saq, eh mi kaq wach, oon chi chii' i t'usluuj wii' wach i naah je' chik rax q'aah noq ink'utinik chuwach i ruti'jolal.⁴⁴Iraaj ruq'orom chi rax q'aah i wilik wach naah i re' re' ch'uwa' wach. Eh re' i k'amal kib'eeh aj tiij naa wo' ruq'orom chi ch'uwa' wach.

⁴⁵Awach i rax q'aah imb'anik reh, xiheel i ruso' naa rukojom chi riij ma' naa ta rub'urum wach i naah, xa re' i wach naa rub'urum k'isinoq. Eh kow i naa ruq'orom chi je' wili: Ch'uwa' nuwach, ch'uwa' nuwach, inko'q.⁴⁶Re' i rax q'aah imb'anik reh naa rukahniik chi ch'uwa' wach nik' najtiil neerub'an i ruyab'ilaal. Eh konajt ruuk' i itz'ihy naah paat naa rojiik wih-oq chi rutkeel.

⁴⁷Eh wila' awach ixpoq' chaloq i q'uux chuwach i ruso', re' ruuk' isb' korjinaq wii', oon re' ruuk' i lino korjinaq wii',⁴⁸oon chuwach jino'q i kemooj re' ruuk' i isb' korjinaq wii', oon re' ruuk' i lino, oon chuwach jino'q i tz'uhuum, oon chuwach jino'q i xa chib'ih jariik tz'uhuum korjinaq.⁴⁹Eh wila' re' i q'uux wilkeeb' chuwach taqe i re' rax muqik, eh kaq muqik iraaj ruq'orom chi re' ruuk' i rax q'aah. Eh koruman chi naa rojiik k'uhtjoq reh i k'amal kib'eeh aj tiij.⁵⁰Re' i k'amal kib'eeh aj tiij naa rupech'em i q'uux re' re', eh wuquub' q'iij naa rutz'apam, i wilik ruq'uxil re' re'.⁵¹Eh paruwuuq q'iij naa wo' chik rupech'em i k'amal kib'eeh aj tiij i q'uux re' re'. Wila' xrilow i reh chi xooj chi nimaal i q'uux chuwach i itz'ihy inkojarik, oon chuwach kemooj, oon chuwach i tz'uhuum, oon chuwach i jino'q i xa chib'ih jariik. Re' ruuk' i yiib' wach raax q'aah. Re' taqe i chib'ih jariik re' re' naa kikahniik chi ch'uwa' kiwach.⁵²Je' re' noq wila' xelik chee q'uux re' re' chuwach jino'q i xa chib'ih jariik re' re' koruman chi naa ruk'atariik wach q'aaq' chi jumpech, ruum re' i wilik chuwach re' ruuk' i ma' tob'laj rax q'aah.⁵³Eh wila' re' i k'amal kib'eeh aj tiij xrilow chi ma' k'ahchi' ta rojiik chi nimaal i q'uux re' re' chuwach taqe i itz'ihy, oon chuwach jino'q i xa chib'ih jariik tz'uhuum korjinaq.⁵⁴Re' i k'amal kib'eeh aj tiij naa ruq'orom chi naa rutz'ajariik i xa chib'ih jariik re' re' wilik wii' i q'uux. Eh wuquub' wo' chik q'iij naa rutz'apariik.

⁵⁵Eh noq tz'ajooj chik i q'uux re' re' naa wo' chik rupech'em i k'amal kib'eeh aj tiij. Wila' xrilow chi re' q'uux re' re' ma' xsahchik ta wach iraaj ruq'orom chi ch'uwa' wach atoob' ta re' q'uux re' re' ma' xooj ta chi nimaal inchol ruk'atariik wach q'aaq' i chib'ih jariik wilik wii' i q'uux re' re' nik' wach i rij je' chupaam.⁵⁶Eh wila' re' k'amal kib'eeh aj tiij xrilow chi k'ahchi' ruq'ehb'iik i naah neerub'an chi nee ruyok' iloq chuwach taqe i itz'ihy, oon chuwach taqe i kemooj oon chuwach taqe i xa chib'ih jariik tz'uhuum korjinaq.⁵⁷Eh wila' xooj wo' chik chi nimaal i q'uux re' re' chuwach i itz'ihy inkojarik chi'iij chuwach i kemooj, oon chuwach i xa chib'ih jariik tz'uhuum korjinaq wii' inchol ruk'ahtiik i chib'ih jariik i wilik wii' i q'uux.⁵⁸Eh wila' re' itz'ihy, oon i kemooj, oon re' i xa chib'ih jariik tz'uhuum korjinaq wii' neensahchik i q'uux chuwach noq neentz'ajariik wach koruman wo' chik chi neentz'ajarik ruka'peech, ruuk' i re' neenkahnik chi saq wach, inki i Dios.

⁵⁹Re' i wili i k'uhb'aal chi riij i q'uux re' ruuk' i rax q'aah i nelik cho wach i itz'ihy inkojarik chi'iij re' ruuk' i isb' korjinaq wii', oon re' ruuk' i lino, oon chuwach jino'q i kemooj, oon chuwach jino'q i xa chib'ih jariik tz'uhuum korjinaq, reh chi neen q'orarik i chi saq wach, oon chi ch'uwa' wach.

¹Re' i QaJaaw Dios, je' wili i xuq'or reh i Moisés:²Re' i wili i k'uhb'aal chi riij i tolin rax q'aah i riij, reh chi naa rukahniik chi saq wach. Re' reh koruman chi naa ruk'amariik cho chuwach i k'amal kib'eeh aj tiij.³Re' i k'amal kib'eeh aj tiij naa reliik reje chi riij i itz'ihy naah paat ko ar naa rojiik rupech'em i rax q'aah imb'anik reh, eh wila' xrilow chi xk'achjik chik i ru rax q'aah.⁴Re' i k'amal kib'eeh aj tiij naa rutaq'aam ruk'amariik kiib' chi kok' tz'ikin k'achaach ma' xta ruch'uwa'iil kiwach reh chi naa rusaqb'eesjiik wach i rax q'aah i riij, naa ruk'amariik chaloq juntoq-oq i chee' chakaltee' jino'q i kaq itz'ihy, jino'q i q'ab' chee' hisopo.⁵Eh re' i k'amal kib'eeh aj tiij naa rutaq'aam ruyok'ariik ralaq jinaj keh i k'isa tz'ikin chinaah i ak'al xun wilik k'achlik ha' chupaam.⁶Eh nee ruchop chaloq i k'isa tz'ikin k'achlik, i juntoq chi chee' chakaltee', i kaq itz'ihy, i q'ab' i hisopo naa taqe rumuhaam chupaam i rukik'eel i k'isa tz'ikin naa rukanteesjiik chinaah i k'achlik ha'.⁷Re' i k'amal kib'eeh aj tiij wuquub' pech naa rukihraam i kik' chinaah i tolin rax q'aah i riij saqb'eesb'al wach, eh naa ruq'orom chi saq chik wach. Eh re' i k'isa tz'ikin k'achlik naa roq'taam reje.

⁸Re' i naa rusaqb'isam riib' naa rutz'ajam i ruso', eh chi naa rub'anam ritiin. Eh naa rujoyom chu'nchel i rismaal, reh chi naa rukahniik chi saq wach. Chi riij i re' neerub'an chi neenokik i koq ruuk' i itz'ihy naah paat, xa re' la' kowuquub' q'iij naa rukahniik chi riij i paat re' re'.⁹Eh paruwuuq q'iij koruman chi naa rujoyariik i rismaal i naah i rusinchii', i rismaal i rumeetz', eh chu'nchel i rismaal.
Eh naa rutz'ajam i ruso' naa rub'anam ritiin chi je' re' naa rukahniik chi saq wach.¹⁰Eh paruwahxaaq q'iij naa ruq'asam chi rumayiij i kiib' chi rak'uun tentzun manlik wach i kiti'jolal, eh jinaj i k'isa ixoq tentzun jinaj haab' wilik reh, manlik wach ruti'jolal. Eh jinaj k'isa chakach i xti holohik arina, xilakkimaj ruuk' aseite, eh juntoq lemeta i aseite,¹¹Eh re' i k'amal kib'eeh aj tiij naa ruye'em i koq chuwach i QaJaaw panookb'al reh i santo laj itz'ihynaah paat molb'al iib', awach i naa rusaqb'eesjiik wach ruch'ihil taqe i rumayiij naa ruq'asam.¹²Eh re' i k'amal kib'eeh aj tiij naa ruchopom chaloq jinaj keh i rak'uun tentzun ruch'ihil i juntoq lemeta chi aseite naa ruq'asam chi mayiij chi riij i mahk chuwach i QaJaaw Dios je' rukab' i ruq'or i k'uhb'aal.¹³Re' i k'amal kib'eeh aj tiij naa rukaansam i rak'uun tentzun chupaam i ye'aab' wilik rusantohiil re' ink'atarik wii' chi mayiij k'amb'al iib' panotob'il ruuk' i Dios. Eh je' wo' hoq i chikop inye'arik chi mayiij noq inq'ehtjik i ruk'uhb'aal i Dios, je' wo' hoq i chikop inye'arik chi mayiij chi riij i mahk naa rukahniik chi reh i k'amal kib'eeh aj tiij ruum wilik rusantohiil.

¹⁴Eh re' i k'amal kib'eeh aj tiij naa ruchopom cho k'isinoq i rukik'eel i chikop naa ruye'ariik chi mayiij, chi riij noq inq'ehtjik i ruk'uhb'aal i Dios naa ruch'ulem raa' xikin awach i naa rusaqb'isam riib'. Eh naa wo' ruch'ulem chi riij i ju' rumaam i rusak'aaj q'ab', je' wo' chi riij i ju' rumaam i rusak'aaj rooq.¹⁵Eh naa wo' rut'urem k'isinoq aseite chupaam i rutz'eet q'ab'.¹⁶Eh naa rut'aqsam chee ju' i rusak'aaj q'ab' chupaam i aseite wilik chupaam i rutz'eet q'ab', eh wuquub' pech naa rukihraam i aseite chuwach i QaJaaw.¹⁷Re' i ruqox aseite naa rukahniik pan q'ab' i k'amal kib'eeh aj tiij k'isiin naa ruch'ulem paraa' i rusak'aaj xikin awach i naa rusaqb'isam riib'. Eh k'isiin naa ruch'ulem chi riij i ju' i rumaam i rusak'aaj q'ab', chi ju' i rumaam i rusak'aaj rooq. Eh naa wo' rukihraam k'isinoq chinaah i rukik'eel i chikop inq'ahteesjik chi mayiij chi riij i mahk.¹⁸Eh re' ruqox i aseite naa rukahniik pan q'ab' i k'amal kib'eeh aj tiij, naa ruch'ulem wach naah awach i naa rusaqb'isam riib'. Re' i k'amal kib'eeh aj tiij naa ruq'asaniik reh i rumayiij reh chi naa rukuyariik i ru mahk, ruum i QaJaaw Dios.¹⁹Re' i k'amal kib'eeh aj tiij naa ruq'asam i rumayiij i xk'achjik. Eh chi riij i re' naa rukansam i chikop naa ruk'atam chi mayiij.²⁰Eh ar naa ruq'asam chi mayiij chinaah i artaal ruch'ihil i mayiij naa ruye'ariik chi naq'wach. Ruuk' i re' naa rukuyariik i ru mahk i kiristianu' re' re', eh naa wo' rukahniik chi saq wach.

²¹Wila' neb'aa' i kiristianu' xk'achjik ma' nee ta rukuy tz'aaq' chu'nchel, neerub'an chi nee ruk'am reje jino'q i rak'uun tentzun. Eh naa ruq'asam chi mayiij reh chi nee rureq kuyb'al ru mahk, nee wo' ruq'asaj haa' i k'isiin ma' hoob' libra chi re' ruuk' i chihooj laj arina xilakimaj ruuk' aseite ruch'ihil k'isiin ma' juntoq lemeta chi aseite.²²Eh naa wo' ruk'amam reje i kiib'-oq i kok' tz'ikin mukur, oon kiib' chi kok' paloma, jinaj i nee ruyeew chi mayiij chi riij i ru mahk, eh jinaj i naa ruq'aasam chi k'atoj mayiij.²³Re' i xk'achjik paruwahxaaq q'iij naa ruk'amam reje taqe i mayiij re' re' panookb'al reh i rusanto laj itz'ihy naah paat molb'al iib'. Re' i k'amal kib'eeh aj tiij naa ruq'asaniik reh i mayiij chuwach i QaJaaw Dios reh chi naa rukahniik chi saq wach i xk'achjik.²⁴Eh re' k'amal kib'eeh aj tiij naa ruchopom chaloq imas tentzun ruch'ihil i k'isiin ma' juntoq lemeta chi aseite naa ruq'asam chi nim wach mayiij chuwach i QaJaaw Dios.²⁵Eh re' k'amal kib'eeh aj tiij noq ruyok'om chik i ralaq imas tentzun naa ruq'asam chi mayiij chi riij i mahk, eh k'isiin i rukik'eel tentzun naa ruch'ulem chi raa' i rusak'aaj xikin awach i naa rusaqb'isam riib'. Eh k'isiin i rukik'eel naa ruch'ulem chi riij i ju' i rumaam i rusak'aaj q'ab', je' wo' chi riij i ju' i rumaam i rusak'aaj i rooq.²⁶Chi riij i re' naa rut'urem k'isinoq aseite chupaam i rutz'eet q'ab'.²⁷Eh naa rut'aqsam chee ju' i rusak'aaj q'ab' chupaam aseite wilik chupaam i rutz'eet q'ab'. Eh wuquub' pech naa rukihraam aseite chuwach i QaJaaw.²⁸Eh re' i k'amal kib'eeh aj tiij naa ruch'ulem i chi raa' rusak'aaj xikin awach i naa rusaqb'isam riib' k'isiin wo' naa ruch'ulem chi riij i ju' i rumaam i rusak'aaj q'ab', je' wo' chi riij i ju' i rumaam i rusak'aaj rooq. Re' re' wo' hoq i xuch'ulej wii' i rukik'eel imas tentzuun xuyeew chi mayiij chi riij i ru mahk.²⁹Eh nik' chik k'ihaal aseite naa rukahniik chupaam i q'ab' i k'amal kib'eeh aj tiij naa ruchihkaam wach naah i k'ahchi' rusaqb'isam riib', reh chi neenkuyarik i ru mahk ruum i QaJaaw Dios.³⁰Eh re' i k'amal kib'eeh aj tiij naa ruchopom chaloq jinaj keh i k'isa tz'ikin mukur, oon i k'isa paloma re' q'oreel i xureq tz'aaq' i naa rusaqb'isam riib'.³¹Jinaj keh i tz'ikin re' re' naa ruq'asam chi mayiij reh i pahqb'al kuyb'al ru mahk. Eh re' i tz'ikin jinaj naa ruye'em chi k'atoj mayiij, eh naa wo' ruq'asam chi mayiij i re' ruuk' i xa chi naq'wach. Eh re' i k'amal kib'eeh aj tiij naa ruq'asaniik reh, eh naa rukuyariik i ru mahk ruum i Dios i naa rusaqb'isam riib', inki.

³²Re' i wili k'uhb'aal chi riij nik' wach noq naa rusaqb'isam riib' i tolin rax q'aah i riij i ma' nee ta rukuy tz'aaq chi k'ih i nee ruyeew chi mayiij. Re' wili i k'uhb'aal chib'ih naa rub'aan ruuk' i paat wilik i je' ruq'uxil i rax q'aah chuwach

³³Re' i QaJaaw Dios je' wili i xuq'or reh i Moisés, i Aarón:

³⁴Re' taq i hat naa taq aq'orom keh i aj Israel chi noq patinik chik inki a'n chupaam i ye'aab' Canaán re' i nuye'em keh. Eh wila' re' hin xnuyeew chaloq jino'q i q'uux chupaam jino'q i paat ar,³⁵re' i ehchan reh i paat re' re' neenooj ruuk' i k'amal kib'eeh aj tiij, je' wili i nee ruq'or reh: Re' hin jinaj i q'uux wilik panupaat, inko'q.

³⁶Eh re' i k'amal kib'eeh aj tiij peet naa rutaq'aam reje rehtesjiik paam i paat re' re', noq komajaa' inokik ar reh chi ma' nee ta runih taqe chib'ih i wilkeeb' chupaam. Chi riij i re' koraj naa rokiik chi rilariik chi korik mi ruq'uxil rax q'aah i wilik chupaam i paat.

³⁷Re' i k'amal kib'eeh aj tiij naa rilom mi wilik chuwach i rutz'aqiil i paat mi rax, eh mi kaq i q'uux re' re', mi jul qohoq paam chuwach i tz'aq.³⁸Re' i k'amal kib'eeh aj tiij naa reliik cho chupaam i paat re' re', eh naa ruq'orom chi naa rutz'ahpiik chuwach i wuq'uub' q'iij.³⁹Eh noq ik'inaq chik i wuquub' q'iij naa wo' chik rupech'em i k'amal kib'eeh aj tiij. Eh wila' re' i q'uux xooj chi nimaal wataq rutz'aqiil i paat,⁴⁰nee rutaq'aaj rehtesjiik taqe ab'aj wilik wii' i q'uux re' re'. Eh ar narojiik kutaroq chupaam i ch'uwa' paam ye'aab' chi riij reje i tinamit.⁴¹Naa wo' ruq'orom i k'amal kib'eeh aj tiij chi jotzaroq wach chu'nchel i tz'aq, eh chi re' i rupoqil naa rojiik kutaroq chupaam i ch'uwa' paam ye'aab' chi riij reje i tinamit.⁴²Eh tokoom chik taqe ab'aj naa kikojom chi jilow taqe ab'aj naa kesam. Eh tokoom chik i lech'ik laj ak'al naa kikojom chuwach i rutz'aqiil i paat.

⁴³Eh wila' xelik wo' chik chaloq i q'uux chuwach i rutz'aqiil i paat noq elenaq chik taqe ab'aj eh jotzooj chik wach, eh tokoom chik i lech'ik laj ak'al kojooj chuwach.⁴⁴Re' i k'amal kib'eeh aj tiij naa wo' chik rojiik rupech'em paam i paat re' re'. Eh wila' xrilow chi xooj wo' chik chi nimaal i q'uux chuwach i rutz'aqiil i paat, eh wila' re' ruuk' i ruq'uxil i yiib' wach rax q'aah re' i k'amal kib'eeh aj tiij naa ruq'orom chi ch'uwa' wach i paat re' re'.⁴⁵Eh naa wo' chik ruq'orom chi naa ruch'a'hjik wach ak'al i paat, eh chu'nchel i korjinaq wii' naa rojiik kutaroq chupaam i ch'uwa' paam ye'aab' chi riij reje i tinamit.⁴⁶Wila' awach i xokik chupaam i paat re' re' chuwach i wuquub' q'iij noq naa ruq'orom i k'amal kib'eeh aj tiij naa ruq'orariik chi ch'uwa' wach korehtaal chik inokik i q'iij.⁴⁷Eh wila' awach i xwirik chupaam i paat re' re' koruman chi naa rutz'ajam i ruso'. Eh wixub'an ruwa' chupaam koruman chi naa rutz'ajam i ruso' reh chi neenkahnik chi saq wach.

⁴⁸Eh re' i k'amal kib'eeh aj tiij naa wo' chikrokiiki koq chi rilariik paam i paat re' re' wila' xrilow chi ma' xelik ta chik chaloq i ruq'uxil i rax q'aah chuwach i rutz'aqiil noq jalooj chik wach. Re' k'amal kib'eeh aj tiij naa ruq'orom chi saq chik wach i paat re' re' ruum xsahchik chik wach i q'uux.⁴⁹Re' i k'amal kib'eeh aj tiij naa rutaq'aam ruk'amariik i kiib' chi kok' tz'ikin, i jun k'isatooq chi chee' chakaltee', i junsahl chi kaq itz'ihy, i q'ab' chee' hisopo, reh chi naa rukahniik chi saq paam i paat re' re'.⁵⁰Eh naa rukansam jinaj keh i kok' tz'ikin chinaah jinaj ak'al xun wilik k'achlik ha' chupaam.⁵¹Eh naa ruchopom chaloq i chakaltee', i kaq itz'ihy, i hisopo, eh re' i k'isa tz'ikin jinaj chi k'achlik wach naa rumuhaam chupaam i rukik'eel i k'isa tz'ikin naa rukahteesjiik. Eh naa ruxilakeem ruuk' ha' i k'ik', ruuk' i re' wuquub' pech naa rukihraam i paat.⁵²Je' re' noq naa rusaqb'isam wach i paat re' re', ruuk' i rukik'eel i k'isa tz'ikin ruuk' i k'achlik ha'. Eh je' wo' ruuk' i k'isa tz'ikin k'achlik je' wo' i jun toq chi chee' chakalte', ruuk' i jun sahl chi kaq itz'ihy, ruuk' i q'ab' chee' hisopo.⁵³Chi riij i re', re' i k'amal kib'eeh aj tiij naa roq'taam reje chi riij i tinamit i k'isa tz'ikin chi k'achlik wach. Ruuk' i re' naa rub'anam nik' wach i ruq'or i k'uhb'aal chi naa rusaqb'isam wach i paat re' re'.

⁵⁴Re' i wili i k'uhb'aal chi riij i ruq'uxil i rax q'aah.⁵⁵Je' wo' chi riij i ruq'uxil i rax q'aah i nelik cho wach itz'ihy inkojarik chi'iij, je' wo' hoq i nelik cho chupaam i paat.⁵⁶Je' wo' re' i k'uhb'aal chi riij i sipjeel, ruch'ihil i ti' nelik cho ruha'iil, ruch'ihil i saq reeq' i nelik chaloq.⁵⁷Re' wili naab'al reh aha' wilik i saq wach, aha' wilik i ch'uwa' wach. Re' wili i k'uhb'aal chi riij i rax q'aah. Re' i k'uhb'aal chi riij i ruch'uwa'iil wach i winaq, je' wo' ixoq

¹Re' i QaJaaw Dios je' wili i xuq'or reh i Moisés, i Aarón:²Re' taq i hat je' taq wili i cha q'or keh i aj Israel: Xa awach pa' i winaq neenelik ruha'iil i ruk'achab' ruum yab'ilaal, naa rukahniik chi ch'uwa' wach.³Eh re' reh atoob' ta kok'ahchi' chi elik ruha'iil i ruk'achab' ruum yab'ilaal, atoob' ta ma' k'ahchi' ta chik reliik ruha'iil ruk'achab' ruum yab'ilaal xanaa wo' rukahniik chi ch'uwa' wach.⁴Eh xa aha' pa' i yokaab' naa ruwiriik wii' i elik i rub'an i ruha'iil i ruk'achab' naa rukahniik chi ch'uwa' wach. Eh xa aha' pa' i tzunaab' naa rutzuhniik wii' naa wo' rukahniik chi ch'uwa' wach.⁵Eh xa awach pa' neentz'a'inik reh i yokaab' inwirik wii' i winaq re' re' koruman chi naa rutz'ajam i ruso', eh chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij.⁶Eh xa awach pa' i neentzuhnik chinaah i tzunaab' neentzuhnik wii' i winaq elik i rub'an i ruha'iil i ruk'achab' ruum yab'ilaal, koruman chi naa rutz'ajam i ruso', eh chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij.⁷Eh xa awach pa' neentz'a'inik reh i winaq elik i rub'an i ruha'iil i ruk'achab' ruum yab'ilaal, koruman chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij.⁸Eh wila' re' i elik i rub'an i ruha'iil i ruk'achab' i wila' xuchuhb'aaj reje wach i ruso' jino'q i ma' xta ruch'uwa'iil wach, koruman chi naa rutz'ajam i ruso', eh chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij.⁹Eh wila' re' winaq elik i rub'an i ruha'iil i ruk'achab' ruum yab'ilaal, xjohtik reje rij kawáyu neenkahnik chi ch'uwa' wach i rihqb'aal i kawáyu.¹⁰Eh re' i neerutz'aj i xa neeruyokib'ej i winaq elik i rub'an i ruha'iil i ruk'achab', naa rukahniik chi ch'uwa' wach korehtaal inokik i q'iij. Eh re' neenk'amwik reje reh i neeruyokib'ej, koruman chi naa rutz'ajam i ruso', chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij.¹¹Eh re' i winaq elik i rub'an i ruha'iil i ruk'achab' ruum yab'ilaal wila' xutz'a'j jino'q i xa awach chi ma' rutz'ajam tee q'ab'. Re' nee rutz'a'j re' re' koruman chi naa rutz'ajam i ruso', eh naa rub'anam ritiin. Eh xanaa wo' rukahniik chi ch'uwa' wach korehtaal inokik i q'iij.¹²Eh wila' re' winaq elik i rub'an i ruha'iil i ruk'achab' xutz'a'j jino'q ak'al xaro, koruman chi naa rupaxjiik. Wila' xutz'a'j jino'q i xaro re' ruuk' i chee' koruman chi naa rutz'a'jiik wach.

¹³Eh noq k'aachjinaq chik i winaq eh rumayam chik elik i ruha'iil i ruk'achab', wuquub' q'iij naa ruy-eem reh chi naa rusaqb'isam riib', koruman chi naa rutz'ajam i ruso', chi naa rub'anam ritiin ruuk' i k'achlik ha'. Ruuk' i re' naa rukahniik chi saq wach.¹⁴Eh paruwahxaaq q'iij i winaq re' re' naa ruk'amam cho chuwach i QaJaaw Dios i kiib' chi kok' tz'ikin mukur, oon kiib'-oq rak'uun paloma naa ruq'asam reh i k'amal kib'eeh aj tiij panookb'al reh i santo laj itz'ihy naah paat molb'al iib'.¹⁵Re' k'amal kib'eeh aj tiij naa ruq'asam chi mayiij i k'isa tz'ikin jinaj chi riij i ru mahk i winaq. Eh re' i k'isa tz'ikin jinaj naa ruq'asam chi k'atoj mayiij, re' wili i naa rub'anam chuwach i QaJaaw Dios reh chi neenkahnik chi saq wach i yowaab'.

¹⁶Eh noq re' jino'q i winaq xelik ruha'iil i ruk'achab' ruum yab'ilaal koruman chi naa rub'anam ritiin jumpa'liik. Eh xa ko naa wo' rukahniik chi ch'uwa' wach korehtaal inokik i q'iij.¹⁷Eh wila' xq'ehb'ik chinaah i ruha'iil i ruk'achab' i winaq jino'q i itz'ihy oon jino'q i tz'uhuum koruman chi naa rutz'ajariik wach. Eh xanaa wo' rukahniik chi ch'uwa' wach korehtaal inokik i q'iij.

¹⁸Eh wila' re' winaq re' re' rixoqb'eej jino'q ixoq koruman chi naa kianam kitiin kikab'cheel. Eh xanaa wo' kikahniik chi ch'uwa' kiwach korehtaal inokik i q'iij.

¹⁹Eh wila' re' jino'q ixoq elik i rub'an i rukik'eel re' rutz'ajooj i rub'an reh rajlaal poh wuquub' q'iij naa rukahniik chi ch'uwa' wach. Eh awach i neentz'a'inik i koq reh ixoq naa rukahniik chi ch'uwa' wach korehtaal inokik i q'iij.²⁰Eh xa aha' pa' yokaab' neenwirik wii' ixoq re' re' noq k'ahchi' i rutz'ajooj naa rukahniik chi ch'uwa' wach. Eh xa aha' pa' tzunaab' neentzuhnik wii' naa rukahniik chi ch'uwa' wach.²¹Eh xa awach pa' neentz'a'inik i koq reh i yokaab' naa ruwiriik wii' naa rukahniik chi ch'uwa' wach koruman chi naa rutz'ajam i ruso' eh chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij.²²Eh wila' awach tz'a'inik reh i xiila nee rukoj chi rutzunaab' ixoq re' re', koruman chi naa rutz'ajam i ruso', eh chi naa rub'anam ritiin. Eh xa konaa wo' rukahniik chi ch'uwa' wach korehtaal inokik i q'iij.²³Eh awach neentz'a'inik reh i chib'ih jariik wilik chinaah i naa ruyohkiik wii' ixoq, oon nee rutz'a'j i chib'ih jariik wilik chinaah i naa rutzuhniik wii' naa rukahniik chi ch'uwa' wach korehtaal inokik i q'iij.²⁴Wila' awach i winaq xwirik i koq ruuk' ixoq re' re' noq k'ahchi' i rutz'ajooj i rub'an reh rajlaal i poh, wuquub' q'iij naa rukahniik chi ch'uwa' wach, je' wo' hoq i yokaab' naa ruwiriik wii' naa rukahniik chi ch'uwa' wach.

²⁵Eh wila' re' ixoq ma' rumay ta elik i rukik'eel q'e' chik najt xub'an reh ma' xata je' najtiil i rub'an reh noq i rub'an i rutz'ajooj rajlaal i poh. Eh nik' pa' najtiil neerub'an elik i rukik'eel je' wo' re' najtiil naa rukahniik chi ch'uwa' wach.²⁶Eh xa aha' pa' yokaab' neenwirik ixoq re' re', eh xa chib'ih pa' jariik i neerutzunib'eej noq kok'ahchi' chi elik i rukik'eel, naa rukahniik chi ch'uwa' wach, je' rukab' noq inkahnik noq i rub'an i rutz'ajooj rajlaal i poh.²⁷Eh xa awach pa' neentz'a'inik i koq reh i ruyokaab' oon i rutzunaab' koruman chi naa rutz'ajam i ruso' eh chi naa rub'anam ritiin. Eh xa ko naa wo' rukahniik chi ch'uwa' wach korehtaal inokik i q'iij.

²⁸Eh wila' xk'achjik ruuk' ruyab'ilaal re' re' kowuquub' chik q'iij naa ruy-eem reh chi neenkahnik chi saq wach.²⁹Eh paruwaxaaq q'iij naa ruk'amam chaloq i kiib' chi kok' tz'ikin mukur, oon kiib' chi kok' paloma naa ruk'amam reje chuwach i k'amal kib'eeh aj tiij ar pan santo laj itz'ihy naah paat molb'al iib'.³⁰Re' i k'amal kib'eeh aj tiij jinaj keh i kok' tz'ikin re' re' naa ruq'asam chi mayiij chi riij i ru mahk ixoq re' re'. Eh re' jinaj naa ruq'asam chi k'atoj mayiij ruuk' i naa rub'anam i k'amal kib'eeh aj tiij re' re' naa rukahniik chi saq wach ixoq ruuk' i ruyab'ilaal.

³¹Re' taq i hat naa taq aq'orom keh i k'uhb'aal wili taqe aj Israel reh chi ma' nee ta nchalik kich'uwa' reej paam i nuSanto laj itz'ihy naah paat eh wila' xkich'uwa'risaj paam naa kikimiik, tiko'q keh, inki Dios.

³²Re' i wili i k'uhb'aal chi riij i winaq i nelik i ruha'iil i ruk'achab' ruum yab'ilaal, eh je' wo' chi riij i awach i nareliik i ruha'iil i ruk'achab' ruum i xa chib'ih jariik, naa rukahniik chi ch'uwa' wach ruum i re'.³³Re' i k'uhb'aal wili keh ixoq inki a'n i kitz'ajooj rajlaal i poh, keh wo' hoq i k'ih q'iij inki a'n i kitz'ajooj. Re' k'uhb'aal wilik keh i winaq i nelik i ruha'iil i kik'achab', keh taqe i winaq kiwiriik ruuk' jino'q ixoq noq k'ahchi' i rutz'ajooj. Re' i ruq'ijil noq inye'arik i mayiij chi riij i kimahk i aj Israel

¹Re' i QaJaaw Dios xuq'oreej wo' chik i Moisés noq kamnaq chik taqe i kiib' chi rak'uun i Aarón. Re' taqe i xikimik noq xkijil i koq kiib' chuwach i Dios, chi ruk'atariik i insiensia.²Re' i QaJaaw Dios je' wili i xuq'or reh i Moisés: Re' hat cha q'or reh aawas Aarón chi ma' chu'nchel taj q'iij naa rokiik chupaam i santo laj ye'aab' re' i wilik kochi juntar i tasb'al wilik wii' i loq'laj kaxa. Ruum wila' xokik i koq ar xanik' i wilik wii' i tz'apb'al naah i loq'laj kaxa naa rukimiik ruum re' hin naa wo' nuk'uhtaam cho wiib' pan suutz'.³Re' i Aarón noq naa rokiik i koq chupaam i santo laj ye'aab' koruman chi naa ruk'amam i koq i k'isa imas wakax naa ruq'asam chi riij i mahk, eh jinaj imas tentzun naa ruk'atam chi mayiij.⁴Eh naa rukojom reje i ruch'utwex re' ruuk' i itz'ihy lino, eh naa wo' rukojom i ruso' re' ruuk' i lino, re' i ruso' wilik ruloq'il, naa rukojom i b'ak'b'al paam je' wo' hoq rutak'aa' wach naah re' ruuk' i lino. Re' ruso' wili wilik ruloq'il ruum aj re' noq naa rukojom koruman chi peet naa rub'anam ritiin.

⁵Eh re' taqe i aj Israel naa kik'amam cho reh i Aarón i kiib' chi imas kaprax komanaan reh chi naa ruq'asam chi mayiij chi riij i kimahk i aj Israel. Eh jinaj imas tentzun naa ruq'asam chi k'atoj mayiij.⁶Eh re' i Aarón peet naa wo' ruq'asam chi rumayiij i reh i jinaj imas wakax pahqb'al kuyb'al ru mahk i reh. Eh pahqb'al wo' kuyb'al kimahk taqe awach reh parupaat.⁷Eh chi riij i re' naa ruchopom chaloq i kiib' chi imas kaprax naa ruq'asam chi mayiij chuwach i QaJaaw Dios panookb'al reh i santo laj itz'ihy naah paat molb'al iib'.⁸Eh noq naa kiwihiik panookb'al reh i rusanto laj itz'ihy naah paat i Dios, re' i Aarón naa rusik'im i kiib' chi imas kaprax i naa rukahniik reh i QaJaaw Dios, eh aha' wilik i naa rukahniik chi xanaa roq'taam reje reh i Azazel.⁹Eh noq rusik'im chik chi riij i kiib' chi imas kaprax i Aarón chi mayiij chuwach i QaJaaw Dios pahqb'al kuyb'al kimahk i tinamit.¹⁰Eh re' imas kaprax jinaj xusik' chi riij i Azazel awach, eh naa rukahniik chi k'achlik wach noq naa ruq'asam chuwach i QaJaaw Dios reh chi naa kireqem kuyb'al kimahk i tinamit, chi riij i re' naa roq'taam reje chupaam i ye'aab' chiq yuuq'.

¹¹Re' i Aarón reh naa ruq'asam chi rumayiij jinaj i k'isa imas wakax pahqb'al kuyb'al ru mahk i reh, je' wo' chi riij i kimahk taqe awach reh parupaat.¹²Chi riij i re' naa ruchopom chaloq i sansario naa runujisam chi naq'wach q'aaq' ar naa ruchopom wach artaal chuwach i QaJaaw Dios ka'mohq' chi insensia re' ruuk' i kok' naq wach q'e' ink'ohnik naa ruk'amam i koq pan santo laj ye'aab' wilik chi juntar i itz'ihy tasb'al paam i ye'aab'.¹³Re' i Aarón naa rukutum insensia chinaah i wach i q'aaq' chuwach i QaJaaw Dios re' i rusib'eel naa rutz'apam naah i tz'apb'al naah i loq'laj kaxa molik wii' i k'uhb'aal. Wila' xub'an i je' re' ma' naa ta rukimiik.¹⁴Eh naa rumuhaam chee ju' q'ab' chupaam i rukik'eel i k'isa imas wakax naa rukihraam chinaah i tz'apb'al naah i loq'laj kaxa chi korkiil reje ireelb'aalq'iij. Eh wuquub' pech naa rukihraam i kik' chinaah i tz'apb'al naah i loq'laj kaxa chuwach reje.¹⁵Chi riij i re', re' i Aarón naa ruq'asam chi mayiij imas kaprax chi riij i kimahk i tinamit. Eh naa ruk'amam reje i rukik'eel chupaam i santo laj ye'aab' wilik chi juntar i itz'ihy tasb'al paam i ye'aab'. Ar i koq chupaam naa rukihraam i rukik'eel imas kaprax, je' wo' rukab' i naa rub'anam ruuk' i rukik'eel i k'isa imas wakax.¹⁶I ruk'ul chi je' re' naa rub'anam reh chi re' Dios naa rusaqb'isam paam i santo laj ye'aab' kich'uwa'risam wach i aj Israel ruuk' i kimahk. Eh naa wo' rusaqb'isam paam i santo laj itz'ihy naah paat molb'al iib' i wilik chi kixilak ruum kich'uwa'risam wo' wach.

¹⁷Eh noq naa ruwihiik chupaam i rusantolaj ye'aab' i Aarón chuq'ahteesjiik i mayiij pahqb'al kuyb'al chi riij taqe mahk, ma' jino'q i naa kiwihiik chupaam i santo laj itz'ihy naah paat molb'al iib'. Eh noq ruq'asam chik i mayiij pahqb'al kuyb'al ru mahk i reh, eh je' wo' hoq i mayiij pahqb'al kuyb'al kimahk chu'nchel i aj Israel.¹⁸Eh naa reliik chaloq naa rojiik rusaqb'isam wach i ru artaal i QaJaaw Dios. Eh naa ruchopom chaloq i rukik'eel i k'isa imas wakax ruch'ihil i rukik'eel imas kaprax naa ruch'ulem taqe i wach ruk'aa' i artaal naa ruchihkaam chi junsuut.¹⁹Eh ruuk' i ju' q'ab' i Aarón wuquub' pech naa rukihraam i kik' chinaah i artaal, ruuk' i re' naa rusaqb'isam wach ruum xkich'uwa'risaj wach taqe i aj Israel, eh naa rukuxisam.

²⁰Eh noq re' i Aarón rukohlaam chik ruq'ahteesjiik i mayiij reh chi naa rukahniik chi saq wach i santo laj ye'aab', ruch'ihil i santo laj itz'ihy naah paat molb'al iib', ruch'ihil i artaal naa rutaq'aam ruk'amariik imas kaprax kok'achlik.²¹Eh naa ruye'em kab'chel i q'ab' wach naah imas kaprax, eh naa rupahqaam kuyb'al kimahk chi riij chu'nchel i kiyiib' wach na'ojb'al, je' wo' chi riij i chu'nchel i kimahk i aj Israel. Ruuk' i re' naa rukanaam chinaah imas kaprax chu'nchel i kimahk i aj Israel. Eh jinaj i winaq narupa'ab'jiik re' naa ruk'amwiik reje reh imas kaprax chupaam i ye'aab' chiq yuuq', ar naa roq'taam reje.²²Re' imas kaprax naa ruk'amam reje chu'nchel i kimahk i aj Israel chupaam i ye'aab' chiq yuuq'.²³Eh chi riij i re', naa wo' chik rokiik i koq i Aarón chupaam i santo laj itz'ihy naah paat molb'al iib'. Ar naa resam i ruso' lino re' i xukoj chi riij noq xokik i koq chupaam i santo laj ye'aab', ar naa rukanaam i ruso' re' re'.²⁴Eh xa chupaam wo' hoq i santo laj ye'aab' naa rub'anam ritiin i Aarón, naa rukojom i ruso' jinaj chik naa ruchaliik chi ruq'ahteesjiik i rumayiij pahqb'al kuyb'al chi riij i ru mahk i reh, naa wo' ruq'asam i kimayiij i tinamit pahqb'al kuyb'al kimahk i keh.²⁵Eh re' i ruq'ina'iil i chikop naa ruye'ariik chi mayiij chi riij i mahk naa ruk'atam chinaah i artaal.²⁶Eh re' winaq naa rojiik oq'tanoq reh imas kaprax chupaam i ye'aab' chiq yuuq' koruman chi naa rutz'ajam i ruso', eh chi naa rub'anam ritiin kora'j neerub'an re' okik chupaam i wilkeeb' wii' i kok' i itz'ihy naah paat.

²⁷Eh re' rukik'eel imas kaprax naa ruq'ahteesjiik chi mayiij chi riij i mahk, eh naa ruk'amam i koq i Aarón chupaam i santo laj ye'aab' naa rukamaniik chi pahqb'al kuyb'al mahk. Eh re' ruqox i rutib'kaal, i rusaa', i rutz'uhmal riij ar narojiik k'ahtoq kochiriij reje i itz'ihy naah paat inkimol wii' kiib' i aj Israel.²⁸Re' i naa ruk'amwiik reh taqe i re' koruman chi naa rutz'ajam i ruso', eh chi naa rub'anam ritiin, chi riij i re' kora'j neerub'an re' okik chupaam i itz'ihy naah paat inkimol wii' kiib'.

²⁹Re' i k'uhb'aal wili naa taq rukahniik cha naah i hat reh juneliik. Eh chupaam i lajeeb' rub'eeh i ruwuuq poh re' i haab' taq naa a'nam taq atiij chi ma' a'nam ta taq awa' ahaa'. Ma' jino'q taq aweh i naa rukamaniik i hat taq aj Israel, ni xata re' taqe tokoom tinamit wilkeeb' taq chaxilak.³⁰Eh chupaam q'iij re' re' naa taq areqem kuyb'al amahk chuwach i QaJaaw Dios. Ruuk' i re' naa rukahniik chi ma' xta chik ruch'uwa'iil taq awach.³¹Eh re' q'iij re' re' naa rukahniik chi q'e' looq' taq cha weh i hat chi juneliik re' i hi'limb'al q'iij chupaam i q'iij re' re' ma' naa ta taq a'nam awa' ahaa' chub'aan taq atiij.³²Eh re' i k'amal kib'eeh aj tiij naa rupa'ab'jiik naa rukuxesjiik chi jilow i rajaaw, re' reh naa ruq'asaniik reh i mayiij pahqb'al kuyb'al chi riij i mahk. Re' k'amal kib'eeh aj tiij naa rukojom i ruso' wilik ruloq'il chi riij re' ruuk' i lino.³³Eh re' wo' reh naa ruq'asaniik reh i mayiij reh chi neenkahnik chi saq wach i santo laj ye'aab', i santo laj i itz'ihy naah paat molb'al iib', i artaal. Ruuk' i re' naa kireqem kuyb'al kimahk i k'amal kib'eeh aj tiij, je' wo' hoq i kuyb'al kimahk chu'nchel i aj Israel.

³⁴Re' wili i jinaj i k'uhb'aal naa rukahniik taq cha naah chi juneliik. Eh junriim chupaam i haab' naa ruq'asam i mayiij chi riij aamahk taq i hat i aj Israel reh chi nee inareq taq kuyb'al amahk, inki i Dios.
Eh re' i Aarón xub'an wo' hoq i xq'orarik reh i Moisés ruum i Dios. Re' i Santolaj ye'aab' q'e' looq

¹Re' i QaJaaw Dios je' wili i xuq'or reh i Moisés:²Chaq'or reh i aawas Aarón, keh taqe i rak'uun, je' wo' keh chu'nchel i aj Israel noq re' hin naa nuye'em keh i k'uhb'aal wili:

³Xa awach pa' jino'q i aj Israel nee rukansaj jino'q imas wakax oon jino'q imas tentzun, oon jino'q ixoq kaprax chupaam i itz'ihy naah paat, oon chi riij reje.⁴Eh wila' ma' xk'ulik rukansaj panookb'al reh i santo laj itz'ihy naah paat molb'al iib', xuq'asaj-oq chi mayiij chuwach i QaJaaw. Re' reh neenkahnik chi wilik ru mahk ruum i re' naa rehtesjiik reje chi xilak i rutinamiit.⁵Re' i k'uhb'aal wili i nuq'or keh i aj Israel reh chi ma' naa ta kiq'asam chi kimayiij i chikop xa aha' pantaq ab'iix. Koruman la' chi naakik'amaam reje panookb'al reh i santo laj itz'ihy naah paat molb'al iib', naa kiq'asam reh i k'amal kib'eeh aj tiij reh chi naa ruq'asam chi mayiij chuwach i QaJaaw Dios k'amb'al keh panotob'il i aj Israel ruuk' i Dios.⁶Re' i k'amal kib'eeh aj tiij naa rukihraam i rukik'eel i chikop chinaah i ru artaal i QaJaaw, re' wilik ma' najta ruuk' i santo laj itz'ihy naah paat molb'al iib'. Eh naa wo' ruk'atam i ruxeb'ohiil i chikop chi nk'ohnik laj mayiij chuwach i Dios.⁷Ma' naa ta chik taq aq'asam i chikop chi kimayiij chikiwach taqe i ma' tob'laj uxlab'al wilkeeb' xa aha' re' inaloq'ej taq chaloq najtir ruum i re' xaq'eb' taq awiib'. Re' i k'uhb'aal wili naa taq nuye'em cha naah reh juneliik naa wo' kik'amam naah taq awiih aamaam.

⁸Eh cha q'or wo' keh wila' re' jino'q i kuch aj Israel, oon jino'q i tokoom tinamit wilik chi kixilak naa ruye'em i ruk'atoj mayiij, oon tokoom chik i mayiij koruman chi naa ruk'amam reje panookb'al reh i itz'ihy naah paat inkimol wii' kiib'.⁹Eh wila' ma' xuk'am reje panookb'al reh i santo laj itz'ihy naah paat molb'al iib', reh chi naa ruq'asam chi rumayiij chuwach i QaJaaw Dios. Re' winaq re' re' naa rehtesjiik chi xilak i rutinamiit. Re' i ruq'orariik chi ma' toob' taj i k'uxuj kik'

¹⁰Eh xa awach pa' jino'q i aj Israel, oon jino'q i tokoom tinamit wilik chi kixilak neenk'uxwik reh i kik' xanik' pa' wach ruk'uxariik neerub'an. Re' hin naa nuye'em i nujosq'iil chinaah, eh naa wesam chi xilak i nutinamiit.¹¹Ruum chu'nchel i k'achaach re' i kikik'eel inye'wik kik'achariik. Re' hin i nuq'or taq aweh chi naa taq aye'em chi amayiij chinaah i artaal reh chi naa taq areqem ko'lemb'al reh taq awánima ruum re' kik' inye'arik chi tojb'al riij i mahk.

¹²Je' re' noq re' hin i nuq'or keh i aj Israel chi ma' jino'q kekeh, eh ma' jino'q i tokoom tinamit wilik chi kixilak naa ruk'uxwiik reh i kik'.¹³Eh awach pa' jino'q i aj Israel, oon jino'q i tokoom tinamit wilik chi kixilak nenooj rukansaj jino'q i chikop re' ruuk' i ruk'ul chi neenk'uxarik inchol ruyitz'im i rukik'eel, eh neerutz'ap naah chi ak'al.¹⁴Ruum re' i kik' inye'wik kik'achariik chu'nchel i k'achaach. Je' re' noq re' hin i nuq'or keh i aj Israel chi ma' naa ta kik'uxum i kik' ruum re' re' inye'wik kik'achariik chu'nchel i k'achaach. Eh awach neenk'uxwik reh naakeliik chi kixilak i aj Israel.

¹⁵Eh xa awach pa' jino'q i aj Israel, oon jino'q i tokoom tinamit neenk'uxwik reh i jino'q i chikop xa kansamaj, oon xereb'ik i ruti'jolal ruum josq'laj chikop koruman chi naa rutz'ajam i ruso', eh chi naa rub'anam ritiin. Eh naa rukahniik chi ch'uwa' wach korehtaal inokik i q'iij, chi riij i re' naa wo' rukahniik chi saq wach.¹⁶Eh wila' ma' xutz'aj i ruso', wila' ma' xub'an ritiin xa nee wo' rukahniik chi rihqaam i ru mahk, inki i Dios. Re' iruq'orariik chi ma' toob' taj chi xa awach i neerixoqb'eej i winaq

¹Re' i QaJaaw Dios je' wili i xuq'or reh i Moisés:²Chaq'or keh i aj Israel chi re' hin i ki Dios.
Re' hin kinq'orik keh chi je' wili:

³Re' chi mak'am taq naah i yiib' wach na'ojb'al inki a'n i aj Egipto re' i xatpatinik taq cho wii', maa k'am taq naah i yiib' wach na'ojb'al inki a'n i aj Canaán re' i tinamit naa taq kaat nuk'amam reje wii'.
Eh ni xata naa taq ak'amam naah i ruq'or i kik'uhb'aal.

⁴Re' la' taq naa a'nam i ruq'or i nuk'uhb'aal i hin. Re' taq i cha a'n i nuq'or taq aweh, cha a'n taq panak'achariik taqe i nuq'or. Ruum re' hin, hin taq aaDios.

⁵Je' re' noq chak'am taq naah i nuk'uhb'aal, je' wo' i nuq'or taq aweh. Ruum awach imb'anik reh naa ruwihiik ruk'achariik, re' wili korik ruum re' hin i Dios kinq'orik reh.

⁶Eh re' i winaq ma' naa ta rixoqb'eem ixoq ma' tokoom ta ruuk', reh chi ma' nee ta ruk'uhtaaj ruk'ixb'ilaal. Re' wili korik ruum re' hin i Dios kinq'orik reh.

⁷Eh re' i winaq ma' naa ta rixoqb'eem i rutuut, ruum wixub'an i je' re' neeruk'uhtaaj ruk'ixb'ilaal i rajaaw. Ma' naa ta rub'anam i je' re' ruum rutuut wo' hoq.

⁸Je' re' noq ma' awach taj i neerixoqb'eej jino'q keh taqe i rixoqil i rajaaw, reh chi ma' nee ta ruk'uhtaaj ruk'ixb'ilaal i rajaaw.

⁹Eh re' i winaq ma' naa ta rixoqb'eem i ranaab', atoob' ta tokoom rajaaw, atoob' ta tokoom rutuut, atoob' ta jinaj chi paat xi-aasjik wii' ruuk', atoob' ta pan tokoom paat x-aasjik, ma' naa ta rixoqb'eem.

¹⁰Eh re' i winaq ma' naa ta rixoqb'eem i rixq'uun i rak'uun, oon rixq'uun i rixq'uun. Ruum wixrixoqb'eej i k'ahchi' ruk'uhtaam rukixb'ilaal i reh, eh k'ahchi' wo' ruk'uhtaam nuk'ixb'ilaal i riih.

¹¹Eh re' i winaq ma' naa ta rixoqb'eem i rukab' ranaab' ruuk' i rajaaw ruum re' re' ranaab' wo' hoq ruum rixq'uun i rajaaw, ruum aj re' ma' naa ta taq i ak'uhtaam ak'ixb'ilaal ruuk'.

¹²Eh re' i winaq ma' naa ta rixoqb'eem i ranaab' i rajaaw, ruum re' re' jinaj wach kikik'eel ruuk' i rajaaw.

¹³Eh re' i winaq ma' naa ta rixoqb'eem i ras, oon ruchaaq' i rutuut ruum re' re' jinaj wach kikik'eel ruuk' i rutuut.

¹⁴Eh re' jino'q i winaq ma' naa ta rixoqb'eem i rehk'een i rikaan ruum re' ixoq re' re' rikaan noq wilik.

¹⁵Eh re' i winaq ma' naa ta rixoqb'eem i ril iib'. Ma' naa ta rixoqb'eem ruum re' re' rehk'een i rak'uun.

¹⁶Eh re' i winaq ma' naa ta rixoqb'eem i rehk'een i ras reh chi ma' nee ta ruk'uhtaaj rukixb'ilaal i ras.

¹⁷Eh re' i winaq ma' naa ta rixoqb'eem i tokoom ixoq, ni xata re' i rixq'uun ixoq re' re'. Eh ma' ta rixoqb'eem i riih ruuk' i rak'uun ixoq re' re', oon riih ruuk' i rixq'uun ixoq re' re'. Ruum re' re' k'ixb'ilaal chi b'anarik, ehxiik'naah mahk chi b'anarik.

¹⁸Re' i winaq ma' naa ta ruchopom naah i rehk'een i ras, oon ruchaaq'. Ma' naa ta rutoq'aam k'acharik ruuk' noq kok'achlik i rehk'een, reh chi ma' nee ta nkitoq'aa' peleto chikiwach.

¹⁹Re' winaq ma' naa ta rixoqb'eem jino'q ixoq noq k'ahchi' i rutz'ajooj i rub'an reh rajlaal i poh.

²⁰Re' winaq ma' naa ta ruyohkiik ruuk' i rehk'een i ras ruchaaq', eh ni xata neerixoqb'eej, reh chi ma' nee ta ruch'uwa' risaj riib' ruum i re'.

²¹Re' i winaq ma' naa ta ruyeew i rak'uun rixq'uun chi mayiij chuwach i tz'aqoj tiyoox Moloc i rub'ihnaal. Reh chi ma' nee ta ruyeew chi re' chi ma' re' i nub'ihnaal i hin, hin ruDios.

²²Re' i winaq ma' naa ta ruyohkiik ruuk' jino'q i winaq chi je' rukab' noq inwirik ruuk' jino'q ixoq, ruum re' re' mahk chi b'anarik.

²³Eh re' i winaq ma' naa ta rixoqb'eem jino'q i chikop, reh chi ma' nee ta ruch'uwa'risaj riib' ruum i re'. Eh je' wo' hoq ixoq ma' ruk'ul ta wo' hoq chi naa ruwinaqb'eem jino'q i chikop ruum re' re' mahk chi b'anarik.

²⁴Eh ma' awach taj i naa ruch'uwa'risam riib' chub'aan taqe re'. Ruum ruuk' i rub'anariik taqe re' xkich'uwa'risaj kiib' taqe tinamit naa wesam taqe reje chupaam i ye'aab' naa awokiik taq wii' i hat.²⁵Eh ruum xkian re' re' xkahnik chi ch'uwa' wach i kitinamiit. Eh re' hin xnub'an jilow keh i xkian, naa nuye'em taqe chutojariik i kimahk noq naa wesam taqe reje pan kitinamiit.²⁶Eh re' taq i hat aj Israel ruch'ihil taqe i tokoom tinamit wilik taq chaxilak chak'am taq naah i nuk'uhb'aal, je' wo' hoq i nuq'or taq aweh, maa a'n taq chik aweh i yiib' wach na'ojb'al re' re' ruum mahk chi b'anarik.²⁷Eh chu'nchel i yiib' wach na'ojb'al re' re' xkian taqe i tinamit chupaam i ye'aab'. Ruuk' i re' xkikanaa' chi ch'uwa' wach i ye'aab' noq majaa' ti okik ar taq i hat.²⁸Re' taq i hat maa a'n taq aweh i yiib' wach na'ojb'al re' re' reh chi ma' nee ta taq ti wesaj reje chupaam i tinamit re' re' je' rukab' noq naa wesam taqe reje i xich'uwa'risanik wach i ye'aab' re' re' xi wihik ar chi peet.²⁹Eh xa awach pa' neemb'anik reh taqe i yiib' wach na'ojb'al re' re' mahk chi b'anarik naa rehtesjiik chi xilak i nutinamiit.³⁰Re' taq i hat chak'am taq naah i nuk'uhb'aal, ma' q'eb' taq awiib' chub'anariik taqe i yiib' wach na'ojb'al re' re'. Re' xkian i tinamit wilkeeb' ar noq komajaa' taq ti ponik i hat. Eh ni xata ruk'ul chi nee taq i naach'uwa'risaj awiib' ruuk' taqe re'. Re' wili re' hin kinq'orik hin Dios, inki. Re' k'uhb'aal chi riij i santohiil, ruch'ihil i korik chi b'anarik

¹Re' i QaJaaw Dios je' wili i xuq'or reh i Moisés:²Chaq'or keh chu'nchel i aj Israel chi je' wili:
Kik'acharoq pan santohiil ruum re' hin i kiDios, hin Santo.

³Eh kinimaj i kituut kajaaw chi kiju'junaal.
Eh kiyeew ruloq'il i hi'limb'al q'iij nukanaam. Re' hin i kiDios kinq'orik reh.

⁴Eh cha q'or keh chi mankinimaj chik taqe i tiyoox, chi mankiyejaa' chik ki dios re' ruuk' i xahaab'isamaj, ruum xa re' wo' hin, hin kiDios.

⁵Eh noq naa kiq'asam i kimayiij k'amb'al kiib' panotob'il wuuk' i hin kiq'asaj chi je' rukab' i nuq'orom reh chi neemponik chi nuwach.⁶Re' i chikop naa kiq'asam chi kimayiij xa chupaam wo' q'iij re' re' naa ruk'uxariik, eh neerub'an chi parukab' q'iij neen k'uxarik. Eh wila' wilik i xqohxanik reh i roox q'iij i naa ruk'ahtiik.⁷Eh wila' koxkik'ux i tiwik re' re' paroox q'iij ch'uwa' chik wach ma' k'uluuj taj i kimayiij.⁸Awach i xuk'ux i tiwik re' re' paroox q'iij naa rukahniik chinaah i mahk, ruum xuch'uwa'risaj wach i wilik rusantohiil. Re' naa rub'aniik reh i re' naa rehtesjiik chi xilak i nutinamiit Israel.

⁹Eh noq naa ruponiik i ruq'ijil i rumolariik i wach taq atik ma' naa ta rukuxiik amolom i wach, eh ma' naa ta taq asik'im i wach i xkahnik pariij.¹⁰Eh ma' naa ta rukuxiik taq amolom i wach taq aa-uuva, i wach taq atik q'ehb'ik wach ak'al. Naa la' taq akanaam keh i neb'aa', keh i tokoom tinamit. Re' hin taq aaDios kinq'orik reh.

¹¹Eh ma' naa ta awelq'aniik, ma' naa ta chukum i q'orik, eh ma' naa ta ajot'om taq awiib' chawach.

¹²Eh mankiq'or i nub'ihnaal ruuk' i xama' korik ta wo' hoq, reh chi ma' nee ta nkiyeew chi re' chi ma' re' i nub'ihnaal i hin, hin kiDios.

¹³Eh ma' naa ta kik'sam chi ti k'axik i kas kichaaq', ni xata naa kelq'aam i chib'ih keh.
Eh ma' naa ta kichamam kiib' chutojariik i kimoso xanoq la' wo' naa kitojom noq naa rukohlaam kamanik.

¹⁴Eh ma' naa ta kib'ajam i tz'aplik i xikin, ma' xta i naa kikojom parub'eeh i moywach reh chi ma' nee ta nq'ehb'ik. Naa la' kinkiyohleem i hin, hin ki Dios.

¹⁵Re' taqe q'atal q'orik mankiko'leej riij i neb'aa', mankiko'leej riij i b'ehoom. Re' la' i k'uhb'aal naa kik'amam naah noq naakiq'atam i q'orik chinaah i kas kichaaq'.

¹⁶Eh ma' naa ta kojiik molol wach k'utaaj chi kixilak i kitinamiit.
Eh ma' naa ta kokiik haa' chukanteesjiik i kas kichaaq'. Re' wili re' hin i kiDios kinq'orik reh.

¹⁷Eh ma' awach taj i naa rixowaam wach i ras ruchaaq' paránima, inchol la' ruq'ilim awach imb'anik reh i mahk reh chi ma' nee ta nehtrik i ru mahk.

¹⁸Ma' naa ta kiq'ajam wach i naa rub'aan keh. Eh ma' naa ta kianam nik'-oq najtiil i kijosq'iil chinaah i kitinamiit. Naa la' kik'axam i kas, kichaaq' je' rukab' noq inkik'ax kiib' i keh. Re' wili re' hin i kiDios kinq'orik reh.

¹⁹Eh naa kianam i ruq'or i nuk'uhb'aal ma' awach taj i naa ruye'em chik'onik i ruchikoop ruuk' i kihb'ur kiwach chi chikop.
Eh ma' naa ta kixilakeem i kijaa' naa kitikim pan kiye'aab'.
Ma' naa ta kikojom chi kiso' k'ih b'uhr wach i nooq' kemooj wii'.

²⁰Eh wila' re' i winaq xrixoqb'eej ixoq k'ayimaj pankamanik, eh pahqalimaj-oq chik ruum jino'q tokoom winaq komajaa'-oq intojarik riij i reliik kikab'cheel ruuk' ixoq naakiye'ariik chi tz'uhuum, xa re' la' ma' naa ta kikanteesjiik ruum re' ixoq majaa' ta noq'tejik ruum i rupatroon.²¹Re' i winaq re' re' koruman chi naa ruk'amam chaloq panookb'al reh i itz'ihy naah paat molb'al iib', jinaj imas tentzun, pahqb'al kuyb'al ru mahk chi nuwach i hin, hin Dios.²²Eh re' imas tentzun re' re', re' i k'amal kib'eeh aj tiij naa ruq'asaniik reh chi mayiij pahqb'al rukuyb'al i winaq chi riij i ru mahk. Eh naa wo' nukuyum i kimahk i hin.

²³Eh noq naa kokiik chupaam i ye'aab' naa kojiik wii' naa kitikim taqe chee' re' ruuk' i kiwachinik ixib' haab' ma' naa ta kisik'im i wach, eh ma' naa ta wo' kik'uxum ruum ch'uwa' wach chi keh.²⁴Eh re' wach i kichee' naa reliik parukaaj haab' chu'nchel naa kiq'asam chi nuwach i hin reh chi naa nukuxisam.²⁵Eh re' wach i kichee' naa reliik paroo' haab' naa rub'anam chi naa chik kik'uxum. Chi je' re' ma' k'isiin naa kiwachiniik. Re' wili re' hin i ki Dios kinq'orik reh.

²⁶Ma' jino'q i tiwik naa kik'uxum chi ko wilik rukik'eel.
Ma' naa ta kitijem keh i q'ijinik, eh ni xata re' warinik.

²⁷Eh ma' naa ta kiyok'om i kinaah reh chi ma' nee tankahnik chi toltol. Eh ma' naa ta wo' kiyok'om ju' i kusinchii'.

²⁸Eh ma' naa ta kiyok'om wach i kiti'jolal chi riij jino'q i kamnaq. Ma' naa ta kikojom kehtalil chuwach i kiti'jolal. Re' wili re' hin i Dios kinqorik reh.

²⁹Eh ma' naa ta ruk'uhtaam ruk'ixb'ilaal i rixq'uun reh chi ma' nee ta rutijej i k'oyomal. Reh chi ma' nee ta nujik chi yiib' wach na'ojb'al i kiye'aab'.

³⁰Eh koruman chi naakiye'em ruloq'il i hi'limb'al, eh naa wo' kiye'em ruloq'il i nuSantolaj ye'aab'. Re' wili re' hin i Dios kinq'orik.

³¹Eh ma' naa ta kojiik chusik'ariik kina'ojb'al ruuk' inq'orinik reh i ma' tob'laj uxlab'al, eh ni xata ruuk' i aj q'iij naa kojiik reh chi ma' naa ta kich'uwa'risam kiib'. Re' wili re' hin i Dios, kinq'orik.

³²I ruk'ul chi naa kipab'aam kiib' chuwach jino'q i mama' winaq naa ruponiik panaq' kiwach, naakiye'em wajaawriik i hin, hin kiDios. Re' hin i Dios kinq'orik reh.

³³Eh ma' naa ta kik'sam chi ti' k'axik i tokoom tinamit wilik chi kixilak.³⁴Naa la' kik'axam chi je' kitinamiit ruum nik' wach i keh je' wo' re' taqe i tokoom tinamit. Eh i ruk'ul wo' chi naa ruk'uliik cho pankik'ux chi noq xi wihik cho Egipto i keh pan tokoom tinamit wo' xi wihik chaloq. Re' wili re' hin i kiDios kinq'orik.

³⁵Ma' ruk'ul ta chi neenkijot' i kas kichaaq' ruuk' i ma' manlik ta laj pajooj ruuk' i pajooj reh ak'al, eh pajooj ruuk' pexu, eh je' wo' ruuk' i xa chib'ih jariik naakipajam.³⁶Inchol la' chi manlik i pajooj naa kianam je' wo' i xa chib'ih chik jariik i naakipajam je' wo' b'ara, je' wo' taqe ruuk' i k'ahaam. Re' wili re' hin i kiDios xineesanik cho keh Egipto kinq'orik.

³⁷Eh i ruk'ul chi naa kik'amam naah i ruq'or i nuk'uhb'aal, je' wo' hoq i nuq'or keh. Ruum re' hin kinq'orik reh, inki weh i Dios. Re' ti' k'axik ink'ularik chi riij i mahk imb'aan

¹Re' i QaJaaw Dios je' wili i xuq'or reh i Moisés:²Re' hat cha q'or keh i aj Israel taqe i q'orik wili:
Xa awach pa' keh i aj Israel, oon jino'q i tokoom tinamit wilik chi kixilak neeruq'asaj jino'q i rak'uun rixq'uun chi mayiij chuwach i tiyoox Moloc i ruk'ul chi naa rukanteesjiik chi ab'aj kuum i rutinamiit.³Eh re' hin naa ruchaliik nujosq'iil chinaah i winaq re' re', eh naa wesam reje chi kixilak i aj Israel, ruum naa ruch'uwa'risam wach i nuSantolaj ye'aab'. Eh ruum wo' chi xuch'uwa'risaj wach i nuSantolaj b'ihnaal.⁴Eh wila' re' tinamit ma' xta xkaaj reh i xub'an i winaq re' re', eh wila' ma' xkaaj kikansam.⁵Re' hin naa ruchaliik nujosq'iil chinaah i winaq re' re', je' wo' chikinaah awach reh wilkeeb' parupaat. Eh naa wesam reje chi kixilak i aj Israel, ruch'ihil taqe i awach reh, ruch'ihil taqe i naa kojiik chi rulooq'jiik i tiyoox Moloc.

⁶Eh re' taqe i ma' kinimanik ta weh i kiooj chupahqaljiik kina'ojb'al kuuk' i kiq'orinik keh i ma' tob'laj uxlab'al, oon nee kiooj ruuk' i aj q'iij. Re' hin naa nuye'em i nujosq'iil chinaah i winaq re' re'. Eh naa wesam chi kixilak i aj Israel.

⁷Eh kiq'asaj kiib' weh chi korik kik'acharoq pan santohiil ruum re' hin, hin kaJaaw kiDios.⁸Eh i ruk'ul chi naa kik'amam naah i nuq'or keh, ruum re' hin kinye'wik kisantohiil.

⁹Eh xa awach pa' i naa rub'ajam i rutuut rajaaw xti korik i nuq'or chi naa rukanteesjiik. Eh ruum chi xub'an reh i rutuut rajaaw, xa re' reh i naa ruk'amam chee rukimiik chinaah chi rib'il riib'.

¹⁰Eh wila' re' i winaq xuch'uwa'risaj wach i rukaxaro ruuk' i rehk'een i ras ruchaaq', ruum k'oyomal, chi re' winaq xb'anik reh i k'oyomal chi re' ixoq naa kikanteesjiik.

¹¹Eh wila' re' i winaq xwirik i koq ruuk' i rehk'een i rajaaw neeruk'uhtaaj ruk'ixb'ilaal i rajaaw. Eh re' winaq, re' ixoq kikab'cheel naa kikimiik, eh xa re' keh naa kik'amam chee kikimiik chikinaah.

¹²Eh wila' awach i winaq neen wirik i koq ruuk' i ril iib' kikab'cheel wo' naa kikanteesjiik ruuk' i ril iib'. Eh xa re' keh naa kik'amam chee kikimiik chikinaah.

¹³Eh wila' awach ixyohkik i koq ruuk' i winaq je' rukab' noq inwirik i koq ruuk' ixoq, kikab' cheel naa kikantesjiik. Eh ruum chi naa kianam i ch'uwa' wach na'ojb'al re' re' kikab'cheel naa kikantesjiik. Xa re' keh naa kik'amam chee kikimiik chikinaah.

¹⁴Eh wila' re' winaq xusik' rehk'een, eh xtohq'ik i koq rixoqb'eem i rutuut i rehk'een i ruk'ul chi ruuk' i q'aaq' naakik'atariik koxcheel noq naa kikimiik, reh chi ma' nee ta chik imb'aan i yiib' wach na'ojb'al re' re' chi kixilak.

¹⁵Eh wila' re' winaq xtohq'ik rixoqb'eem i koq jino'q i chikop. Re' winaq re' re' i ruk'ul chi naa rukanteesjiik, je' wo' i chikop.

¹⁶Eh wila' re' ixoq xuwinaqb'eej i chikop, chi je' ixoq, chi je' i chikop kikab'cheel naa kikanteesjiik, xa re' keh naa kik'amam chee kikimiik chikinaah.

¹⁷Eh wila' awach jino'q i winaq xuchop i koq naah i ranaab', oon neerixoqb'eej atoob' ta tokoom rajaaw, atoob' ta tokoom rituut, chi wachiil naa kikanteesjiik kikab'cheel. Ruum awach i rixoqb'eej i ranaab' xiik' naah k'ixb'ilaal i neerub'an, naa rukahniik chinaah i ru mahk.

¹⁸Eh wila' re' i winaq xrixoqb'eej ixoq noq k'ahchi' i rutz'ajooj i rub'an reh rajlaal poh. Xukoj-oq rehtaal i winaq chi k'ahchi' i ruyab'ilaal ixoq, eh xikoj-oq wo' rehtaal ixoq kikab'cheel naa kikanteesjiik reje.

¹⁹Eh ma' ruk'ul ta wo' hoq chi reh i winaq chi nee rixoqb'eej i ruchaaq' i rituut, oon ranaab' i rajaaw, ruuk' i re' neenkik'uhtaaj kik'ixb'ilaal ruum kuuk' kiib'. Eh kikab'cheel naa rukahniik chikinaah i mahk.

²⁰Eh wila' re' i winaq neenwirik ruuk' i rehk'een i rikaan neeruk'uhtaaj ruk'ixb'ilaal i rikaan, kikab'cheel naa rukahniik chikinaah i mahk, eh naa kikimiik reje chi ma' naa ta ruwihiik kak'uun kixq'uun.

²¹Eh wila' re' i winaq xrixoqb'eej i rehk'een i ras, oon ruchaaq', neeruk'uhtaaj ruk'ixb'ilaal i ras oon ruchaaq' xiik' naah ch'uwa'iil wach chi b'anarik. Kikab'cheel ruuk' ixoq naa kikimiik reje chi ma' naa ta ruwihiik kak'uun kixq'uun.

²²Eh i ruk'ul chi naa taq ak'amam naah i nuk'uhb'aal, je' wo' hoq i nuq'or taq aweh cha a'n taq. Chi je' re' ma' nee ta ti wesaj taq cho chupaam i tinamit naa taq kaat nuk'amam reje wii' naa la' taq aak'achariik ar chi jumpech.²³Ma' ruk'ul ta chi naa taq ak'amam naah inki'an i tinamit naa wesam taqe cho ar chawach. Re' keh xkian chu'nchel i yiib' wach na'ojb'al kore' xnuq'or, ruum aj re' naa taqe nuq'eb'em chi riij nuk'ux.²⁴Re' hin i nuq'or taq aweh chi re' taq i hat naa awehchaniik reh i kitinamiit i keh. Eh re' hin taq naa nuch'ikaniik taq aweh chupaam i ye'aab' re' re', aha' wilik i chu'nchel i suq atoob'.
Re' hin taq aaDios nusik'im taq chawach chi kixilak taqe i k'ih seht chi tinamit.²⁵Eh re' taq i hat inchol taq anab'eem aha' wilik taqe chikop saq wach, aha' wilik taqe ch'uwa' kiwach, naa taq anab'eem taqe i chikop wilik kixiik' saq kiwach, eh taqe i ch'uwa' kiwach. Je' re' noq maa ch'uwa'risaj taq awiib' ruuk' i kik'uxarik i chikop ch'uwa' kiwach, chi je' wilik kixiik', chi je' kijib' i kooq chi je' kijukem kiib' noq kib'ehik.²⁶Re' taq i hat ti k'acharoq taq pan santohiil, ruum re' hin i Dios hin wo' santo. Eh xnusik' taq chawach kichixilak i k'ihseht chi tinamit chi xatkahnik taq chi manlik wak'uun wixq'uun.

²⁷Eh re' jino'q i winaq, oon jino'q ixoq wilik ma' tob'laj uxlab'al ruuk', oon i rutijej reh i q'ijinik, naa rukutariik chi ab'aj noq naa rukanteesjiik. Eh xa chi rib'il riib' naa ruk'amam chaloq i rukimiik chinaah, inki Dios. Re' i ruq'orariik chi naa kik'achariik pan santohiil i k'amal kib'eeh aj tiij

¹Re' i QaJaaw Dios je' wili i xuq'or reh i Moisés: Chaq'or keh i k'amal kib'eeh aj tiij, re' taqe i rak'uun Aarón chi manki ch'uwa'reej kiib' ruuk' i rutz'a'jiik i kamnaq neenkimik pan kitinamiit.²Neerub'an chi neenkitz'a'j wila' ma' tokoom ta kuuk' i xkimik wila' re' i kajaaw, oon kituut, oon kas.³Neerub'an chi neenkitz'a'j wila' re' jino'q i kanaab' ma' xunab'eej ta wach q'orinik winaq i xkimik, oon ma' xwihik ta rub'ahiil.⁴Xa re' la' ma' ruk'ul taj chi nee nkich'uwa'risaj kiib' ruuk' i rutz'a'jiik jino'q i xa awach neenkimik pan kitinamiit.

⁵Eh ma' ruk'ul taj chi neenkiyok' i rismaal i kinaah, je' wo' hoq i kusinchii', eh ni xata nakilochom wach i kiti'jolal ruum ruti'kiil kik'ux.⁶Inchol la' kik'achariik pan santohiil, chi nuwach i hin, hin kiDios reh chi ma' nee ta inkik'uhtaaj nuk'ixb'ilaal. Ruum re' keh kiq'asaniik reh i k'atoj mayiij chi nuwach, je' wo' hoq kaxlanwi'k inye'arik chi mayiij, ruum aj re' koruman chi naa kiwihiik pan santohiil.

⁷Eh ma' ruk'ul taj chi neenkian kaxáro ruuk' i k'oyoom laj ixoq, eh ni xata ruuk' jino'q ixoq kamnaq rub'ahiil, ni xata ruuk' jino'q ixoq ch'aq kaxáro ruum santo chik taqe chi nuwach i hin.⁸Re' re' taqe i k'amal kib'eeh aj tiij kiq'asanik i kaxlanwi'k chi mayiij chi nuwach, naa ruwihiik kisantohiil, ruum re' hin i ki Dios kinye'wik kisantohiil, eh hin wo' santo.

⁹Eh wila' re' i rixq'uun i k'amal kib'eeh aj tiij xuk'uhtaaj ruk'ixb'ilaal i rajaaw xutoq'aa' k'oyomal inchol ruk'atariik wach q'aaq' noq naa rukimiik.

¹⁰Eh re' i kajaaw i k'amal kib'eeh aj tiij xuk'ul i rajaawriik noq xukoj i ruso' wilik ruloq'il, noq xt'urjik aseite wach naah. Je' re' noq ma' ruk'ultaj chi nee resaj i b'urb'al wach i naah, eh ma' naa ta ruxihim i ruso' chi riij ruum ruti'kiil ruk'ux.¹¹Eh ma' ruk'ul taj chi neenokik i koq i wilik wii' jino'q i kamnaq, ni xata ruum i rukimiik i rajaaw, ni xata ruum i rukimiik i rutuut naa ruch'uwa'risam riib'.¹²Eh ni xata naa reliik reje chupaam i nuSantolaj ye'aab', ni xata naa ruch'uwa'risam wach i nuSantolaj ye'aab' i hin, ruum noq xkuxeesjik ruuk' i aseite noq xt'urjik wach naah, eh re' wili re' hin, hin ruDios kinq'orik.

¹³Re' i naa ruk'amam chi rehk'een jino'q ixoq ma' reht'al ta wach q'orinik winaq.¹⁴Ma' ruk'ul taj chi neerub'an kaxáro ruuk' ixoq kamnaq rub'ahiil, ruuk' ixoq ch'aq kaxáro, ruuk' i k'oyoom laj ixoq. Ruuk' la' jino'q ixoq aj Leví ma' reht'al ta wach q'orinik winaq naa rub'anam kaxáro.¹⁵Koruman chi je' re' naa rub'anam reh chi ma' nee ta ruch'uwa'reej wach taqe riih aamaam naa kiwihiik parutinamiit. Re' wili re' hin i Dios xinye'wik rusantohiil, inki Dios.

¹⁶Re' i QaJaaw Dios, je' wili i xuq'or reh i Moisés:¹⁷Re' hat cha q'or reh i Aarón chi ma' jino'q i riih rumaam ma' manlik ta wach i ruti'jolal naa ruchaliik chuq'ahteesjiik i kaxlanwi'k inye'arik chi mayiij, chi nuwach i hin, hin ruDios.¹⁸Ruum ma' jino'q i ma' manlik ta wach ruti'jolal naa ruchaliik chuq'ahteesjiik i mayiij, moywach, chelej riib' imb'ehik, ma' manlik ta wach i ju', ma' manlik ta wach i xikin.¹⁹Je' wo' hoq i rutoqom i rooq, rutoqom i q'ab'.²⁰Je' wo' hoq i loklok i riij, je' wo' hoq i k'isa winaq xama' xk'ihik taj, je' wo' hoq i wilik i je' suutz' panaq'wach, je' wo' hoq i wilik t'ulut'aq chi riij, je' wo' i ruq'ojom riib', je' wo' hoq sipjinaq i rumiloj.²¹Ma' jino'q reh i riih rumaam i Aarón i k'amal kib'eeh aj tiij ma' manlik ta wach i ruti'jolal i ruk'ul chi neenchalik chi nuwach chuq'ahteesjiik i holohik laj mayiij, je' wo' hoq kaxlanwi'k inye'arik chi mayiij.²²Eh neerub'an chi neeruk'ux reh i kaxlanwi'k re' re', eh nee wo' ruk'ux reh i santo laj mayiij, je' wo' hoq i xti looq'.²³Xa re' la' ma' nee ta rub'an chi neenokik chi juntar i itz'ihy tasb'al paam itz'ihy naah paat, eh ni xata neerub'an chi nerujil i koq riib' chuwach i artaal, reh chi ma' nee ta ruch'uwa'risaj wach i nuSantolaj ye'aab'. Re' hin i Dios, re' hin xin ye'wik kisantohiil, inki Dios.

²⁴Eh re' i Moisés xuq'or reh i Aarón i xq'orarik reh ruum i Dios, eh xuq'or wo' keh taqe i rak'uun i Aarón, je' wo' keh chu'nchel i aj Israel. Re' taqe i mayiij wilik kisantohiil

¹Re' i QaJaaw Dios je' wili xuq'or reh i Moisés:²Chaq'or reh i Aarón, keh i rak'uun chi kiyeew ruloq'il i santo laj mayiij inkik'am cho chi nuwach i aj Israel reh chi ma' nee ta nkich'uwa'reej wach i nub'ihnaal. Re' wili re' hin i Dios kinq'orik.

³Chaq'or keh chi yu'naak johtoq chi qawach, xa awach pa' jino'q i rak'uun, oon riih rumaam neenokik chi k'amal kib'eeh aj tiij chi ch'uwa' wach noq neenokik chuq'ahteesjiik i santo laj mayiij neenkik'am cho chi nuwach. Re' neemb'anik reh i re' naa rehtesjiik reje chi nuwach i hin, hin Dios.

⁴Ma' jino'q i k'amal kib'eeh aj tiij wilik ruyab'ilaal re' ruuk' i rax q'aah imb'anik reh, oon k'ahchi' reliik i ruha'iil i ruk'achab' neeruk'ux reh i santo laj mayiij chi komajaa' rusaqb'isaj riib'.
Eh awach i nee rutz'a'j jino'q i ruti'jolal i kamnaq, je' wo' hoq awach i nee nelik ruha'iil i ruk'achab'.⁵Eh ma' nee ta ruk'ux reh awach i nee ruch'uwa'reej riib' ruuk' rutz'a'jiik taqe i chikop kijukem kiib' noq kib'ehik. Je' wo' hoq awach i ch'uwa' wach, eh ruch'uwa'risaj riib' ruuk' i kitz'a'jik i ch'uwa' wach.⁶Eh awach neen tz'a'inik reh i kiristianu' re' re' naa rukahniik chi ch'uwa' wach korehtaal chik inokik i q'iij. Eh noq komajaa' i rub'an i ritiin, ma' ruk'ul taj chi nee ruk'ux reh i santo laj mayiij.⁷Eh noq naa rokiik i q'iij naa rukahniik chi saq chik wach koraj neerub'an re' chi nee ruk'ux reh i santo laj mayiij ruum ruuk' wo' re' naa ruk'uxlaam riib'.⁸Eh ma' ruk'ul ta chi neeruk'ux i chikop re' ruuk' i xankimik, oon re' ruuk' i xan xerarik i kiti'jolal ruum i josq'laj chikop, reh chi ma' nee ta ruch'uwa'risaj riib' ruuk' taqe re'. Re' wili re' hin i Dios kinq'orik reh.

⁹Eh chi kunchelaal i k'amal kib'eeh aj tiij naa kik'amam naah taqe i ruq'or i nuk'uhb'aal, reh chi ma' xta mahk neenkik'am cho chikinaah, ruum re' hin i Dios kinye'wik kisantohiil.

¹⁰Re' wilik rusantohiil xa re' wo' hoq i k'amal kib'eeh aj tiij, naakik'uxwiik reh. Eh re' i kulaa', re' taqe i kiloq'om chi kimoso re' taqe i kimoso inaasjik pankipaat ma' naa ta kik'uxum keh.

¹¹Eh wila' re' i k'amal kib'eeh aj tiij ruuk' rutumiin ruloq'om i rumoso, re' moso re' re' neerub'an chi nee ruk'ux reh i wilik rusantohiil, je' wo' hoq i rumoso aasjinaq parupaat nee wo' rub'an chi neeruk'ux reh i wilik rusantohiil.

¹²Eh wila' re' i rixq'uun jino'q i k'amal kib'eeh aj tiij xub'an kaxáro ruuk' jino'q i ma' re' ta k'amal kib'eeh aj tiij. Re' ixoq re' re' ma' nee ta ruk'ux reh i wilik rusantohiil.¹³Eh wila' re' rixq'uun i k'amal kib'eeh aj tiij kamnaq i rub'ahiil, oon kanamaj ruum i rub'ahiil xsutinik wo' chik cho parupaat i rajaaw, wila' ma' chih ruha'lak'uun xkahnik wo' chik chi je' rukab' i pampeet. Re' ixq'un re' re' neerub'an chi neeruk'ux reh i mayiij wilik rusantohiil. Xa re' la' ma' jino'q i tokoom tinamit naa ruk'uxwiik reh.

¹⁴Eh wila' wilik jino'q i xa chi ma' reht'al xuk'ux i mayiij wilik rusantohiil. Re' naa ruk'uxum naa ruye'em jilow nik' k'ihaal, eh ko k'isiin chik i naah naa ruye'em.¹⁵Xa re' la' re' taqe i k'amal kib'eeh aj tiij ma' naa ta kiye'em q'ab' keh i aj Israel chi naa kich'uwa'risam wach i wilik rusantohiil inq'ahteesjik chi mayiij chi nuwach i hin, hin Dios.¹⁶Eh ma' ruk'ul taj chi neenkahnik chikinaah i kimahk ruum i ruk'uxariik i mayiij wilik rusantohiil. Ruum re' hin i Dios kinye'wik rusantohiil, inki.

¹⁷Re' i QaJaaw Dios je' wili i xuq'or reh i Moisés:¹⁸Re' hat cha q'oreej i Aarón, taqe i rak'uun, je' wo' chu'nchel i aj Israel, je' wili i cha q'or keh: Wila' awach i aj Israel, oon jino'q i tokoom tinamit wilik chi kixilak xraaj ruq'asam i k'atoj chikop chi rumayiij chuwach i Dios, re' nee ruyeew chi rumayiij re' ruq'orom chi naa ruye'em, oon xa paruk'ux neenchalik noq nee ruyeew.¹⁹Re' chikop naa ruq'asam re' re' koruman chi imas, eh manlik wach ruti'jolal reh chi nee ruk'ul i QaJaaw Dios. Eh neerub'an chi imas wakax, imas tentzun, oon imas kaprax.²⁰Ma' nee ta rub'an chi nee ruyeew i chikop ma' manlik ta wach ruti'jolal ruum re' i QaJaaw Dios ma' nee ta ruk'ul.

²¹Eh wila' awach i xuyeew i chikop chi rumayiij k'amal riib' panotob'il ruuk' i Dios re' ruq'orom chi naa ruye'em, oon xa paruk'ux naa ruchaliik koruman chi imas wakax, chi tentzun i nee ruyeew manlik wach kiti'jolal, reh chi neenk'ularik ruum i QaJaaw Dios.²²Ma' nee ta rub'an chi nee taq i nayeew chi amayiij i chikop mutz'wach, oon ruq'ojom riib', oon toqeel i rooq, oon pixp i riij, oon sal i riij, oon sipjinaq i riij. Re' taqe i chikop je' rukab' i re' ma' ruk'ul ta chi nee taq inaq'asaj chi k'atoj mayiij chinaah i ru artaal i QaJaaw Dios.²³Re' imas wakax, i imas tentzun ma' q'e' ta manlik wach neerub'an chi nee taq inaq'asaj chi amayiij wila' xa panak'ux taq xchalik. Xa re' la' wixaq'asaj taq chi amayiij i chikop je' rukab' taqe re'. Re' i mayiij aq'orom taq chi naa aye'em ma' naa ta ruk'ulum i QaJaaw Dios.²⁴Eh ma' ruk'ul taj chi nee taq inaq'asaj chi mayiij chuwach i QaJaaw Dios jino'q i chikop hopeel, oon q'ojeel ch'uquuj, oon esamaj i rumiloj. Re' taqe re' ma' ruk'ul ta chi nee taq i nayeew chupaam i ye'aab'.²⁵Eh wila' xak'ul taq i chikop je' rukab' i re' kuuk' i tokoom tinamit ma' ruk'ul ta chi nee taq inaq'asaj chi amayiij re' ruuk' ink'uxarik. Ruum re' taqe i chikop re' re' wilik kiyab'ilaal ma' naa ta nuk'ulum, inki i Dios.

²⁶Eh re' QaJaaw Dios je' wili i xuq'or reh i Moisés:²⁷Noq naa raasjiik jino'q i imas wakax, oon jino'q imas tentzun, oon jino'q imas kaprax, konaa rukahniik ruuk' i rutuut chuwach i wuquub' q'iij. Eh paruwahxaaq q'iij neerub'an chi neenq'ahteesjik chi mayiij, eh naa ruk'ulum i QaJaaw Dios.

²⁸Eh chupaam i jinaj chi q'iij ma' naa ta taq akansam ixoq wakax chi junkanteesjik ruuk' i rak'uun, eh ni xata naa taq akansam ixoq tentzun chi junkanteesjiik ruuk' i rak'uun.

²⁹Eh noq naa taq aq'asam i mayiij reh t'iosinik chuwach i QaJaaw Dios cha a'n taq je' rukab' i ruq'or i k'uhb'aal reh chi nee ruk'ul i QaJaaw Dios.³⁰Eh xa chuwach q'iij taq naa k'uxum, ma' ruk'ul taj chi nee taq i naa kanaa' chi kochi junwaar taq neenak'ux. Re' wili re' hin i Dios kinq'orik.

³¹Je' re' noq cha a'n taq ruq'or i nuk'uhb'aal, eh cha nimaj taq, ruum xa re' wo' hin, hin Dios.

³²Eh maa ch'uwa'reej taq wach i nuSantolaj b'ihnaal chi je' re' neen kiyeew nuSantohiil taqe i aj Israel. Eh re' wo' hin i Dios xin ye'wik asantohiil taq i hat.³³Eh re' wo' hin xineesanik taq cha weh pan tinamit Egipto reh chi xin kahnik taq chi hin aaWaJaaw aaDios, inki. Re' taqe i ninq'iij xkian i aj Israel chupaam i kinimanik (Num 28.16-29)

¹Re' i QaJaaw Dios je' wili i xuq'or reh i Moisés:²Chaq'or keh k'uhb'aal wili i aj Israel: Chi re' taqe i wili i rub'eeh i poh naakiye'em reh i QaJaaw Dios. Re' taq noq naa amolom awiib', re' i santo laj moloj iib' naa aq'orom taq reh i hat.

³Re' taq i hat waqiib' q'iij taq naa akamaniik, eh paruwuuq q'iij ma' naa ta taq akamaniik chi jumpech, ruum re' re' i hi'limb'al q'iij xiik'naah loq'il. Eh ar naa taq a'nam i santo laj moloj iib', xa aha' pa' taq nee ti patinik naa taq aye'em ruloq'il i q'iij re' re' ye'b'al runimaal nuwach i hin, hin Dios.

⁴Re' taqe i rub'eeh i poh re' taqe q'iij wilik ruloq'il, re' noq naa taq awik'sam i ninq'iij noq naa taq a'nam i santo laj moloj iib' ye'b'al runimaal wach i QaJaaw Dios. Eh manlik paruq'ijil naa amolom taq awiib'.

⁵Chupaam i kajlaj rub'eeh i peet poh paruxq'eqiil naa taq atoq'aam i ninq'iij inik'tesjik ruum i keliik chaloq i aj Israel ar Egipto.

⁶Eh pan ho'lajuuj rub'eeh i poh re' re' naa taq awik'sam i ninq'iij ink'uxarik wii' i kaxlanwi'k ma' kojooj ta ch'amb'esb'al reh. Re' re' naa taq a'nam chi ye'b'al runimaal wach i QaJaaw Dios. Eh wuquub' q'iij taq naa ak'uxum i kaxlanwi'k re' re'.⁷Eh pampeet q'iij naa taq a'nam i santo laj moloj iib' reh ninq'iij. Eh ma' naa ta taq akamaniik chi jumpech.⁸Eh wuquub' q'iij taq naa ak'atam i mayiij chuwach i QaJaaw Dios. Eh paruwuuq q'iij naa taq a'nam i santo laj moloj iib', eh ma' naa ta taq akamaniik chi jumpech, inki Dios.

⁹Re' i QaJaaw Dios je' wili i ruq'or reh i Moisés:¹⁰Chaq'or keh i aj Israel i k'uhb'aal naa nuye'em taq aweh. Eh noq hat taq chik okinaq chupaam i ye'aab' naa nuye'em taq aweh nee taq inasik' i peet wach atik, nee taq i nak'am cho junchuht-oq nee taq i nayeew reh i k'amal kib'eeh aj tiij.¹¹Eh chi junwaar reh i hi'limb'al q'iij, re' i k'amal kib'eeh aj tiij naa ruq'asam i peet wach taq atik chi mayiij chuwach i Dios, re' chi nee taq i ruk'ul aweh, eh nee taq i ruyeew cha weh i rotob'il.¹²Eh noq naa taq aq'asam chi amayiij i junchuht chi wach taq atik naa taq aq'asam chi ak'atoj mayiij chi ye'b'al ruloq'il i qajaaw i jinaj rak'uun tentzun jinaj haab' wilik reh, manlik wach i ruti'jolal.¹³Eh naa wo' taq aye'em ik'inaq waxiqiib' libra chi arina naa taq aaxilakeem ruuk' aseite noq naa taq ak'atam chi nk'ohnik laj mayiij chuwach i QaJaaw Dios. Eh re' taq i naa aq'asam chi xa chi t'urimaj mayiij koruman chi jinaj lemeta chib'ih pa' taq i naa aye'em.¹⁴Eh noq komajaa' taq i naaq'asaj i mayiij re' re' chuwach i QaJaaw, ma' naa ta taq ak'uxum i kaxlanwi'k, ni xata re' i trigo chi k'ilimaj wach, ni xata chi rax, konaa taq aq'asam aamayiij kora'j taq naa ak'uxum re'. Re' wili jinaj i k'uhb'aal naa rukahniik cha naah taq i hat je' wo' chikinaah taq awiih aamaam, eh naa taq a'nam xa aha' pa' taq naa aak'achariik.

¹⁵Eh chupaam i q'iij noq naa taq aq'asam amayiij iraaj ruq'orom chi junwaar reh i hi'limb'al q'iij. Ar taq naa rutohq'iik reje awajlaam i wuquub' xamano chi manlik.¹⁶Eh ar naa rutohq'iik reje chi junwaar reh i hi'limb'al q'iij korehtaal i manlojik lajeeb' roxk'ahl q'iij kora'j naa wo' chik taq aq'asam re' i ak' naq'wach taq atrigo chi amayiij chuwach i QaJaaw Dios.¹⁷Eh naa wo' taq ak'amam cho panapaat i ka'kab' chi kaxlanwi'k korjinaq ruuk' i waxiqiib' libra i holohik laj arina chaq'samaj ruuk' i ch'amb'esb'al reh. Eh naa taq aq'asam i peet wach taq atrigo chi amayiij chuwach i QaJaaw Dios.¹⁸Eh noq naa taq aq'asam i kaxlanwi'k, naa taq aq'asam haa' wuquub' i kok' imas tentzun ju'jun haab' i wilik keh manlik wach i kiti'jolal, eh jinaj i k'isa imas wakax, kiib' imas tentzun, naa taq aq'asam chi ak'atoj mayiij ink'ohnik i naa ruponiik chuwach i QaJaaw Dios. Ma' xata re' taq amayiij chi naq'wach, i riis uuva taq naa aye'em.

¹⁹Eh naa wo' aq'asam taq chi amayiij jinaj imas kaprax chi riij taq amahk. Eh kiib' i rak'uun tentzun ju'jun haab' i wilik keh naa taq aq'asam chi amayiij k'amb'al taq awiib' panotob'il ruuk' i Dios.²⁰Re' i k'amal kib'eeh aj tiij naa ruq'asaniik reh chuwach i Dios chi jinaj mayiij wilik ruloq'il. Eh noq naa taq aq'asam i kaxlanwi'k korjinaq ruuk' i peet taq wach atik naa wo' taq aq'asam chi amayiij i kiib' chi imas rak'uun tentzun, naa rukuxesjiik ruum i QaJaaw Dios.

²¹Eh chupaam q'iij re' re' naa taq a'nam i santo laj moloj iib'. Eh ma' naa ta taq akamaniik chi jumpech. Re' i k'uhb'aal wili naa ruwihiik chi junelik, naa rukahniik taq cha naah taq i hat, je' wo' chikinaah taq awiih aamaam, eh naa taq animam taq i hat xa aha' pa' taq naa apatiniik.

²²Eh noq naa ruponiik i q'iij i rumolariik i wach taq atik ma' naa ta taq rukuxiik asik'im i wach. Eh ma' naa ta taq asik'im i naa rukahniik pariij, cha kanaa' la' taq keh i neb'aa', je' wo' keh i tokoom tinamit. Re' wili korik ruum re' hin taq aaDios kinq'orik reh, inki.

²³Re' i QaJaaw Dios je' wili i xuq'or reh i Moisés:²⁴Re' hat cha q'or keh i na'ojb'al wili i aj Israel, chupaam i peet q'iij reh i ruwuuq poh, naa taq aninq'ijeem i hi'limb'al q'iij naa taq a'nam i santo laj moloj iib'. Ar taq naa ruk'uliik panak'ux i ruhuupjiik paam i tuun.²⁵Eh naa taq aq'asam i k'atoj mayiij chuwach i QaJaaw Dios. Eh ma' naa ta taq akamaniik chi jumpech, chupaam i q'iij re' re', inki Dios.

²⁶Re' i QaJaaw Dios je' wili i xuq'or reh i Moisés:²⁷Eh pan lajeeb' rub'eeh i ruwuuq poh ruq'ijiil ruye'ariik i mayiij i kuyb'al mahk. Chupaam i q'iij re' re' naa taq a'nam i santo laj moloj iib'. Eh naa taq akanaam i q'iij re' re' reh taq atiij chi ma' a'nam ta taq awa' ahaa', eh naa taq aq'asam ak'atoj mayiij chuwach i QaJaaw Dios.²⁸Eh chuwach i q'iij re' re' ma' naa ta taq akamaniik chi jumpech, ruum chupaam i q'iij re' re' naa taq rukuyum amahk taq aaWaJaaw aaDios.²⁹Eh xa awach pa' i ma' nee ta rub'an rutiij chi ma' rub'anam ta ruwa' ruhaa' chupaam i q'iij re' re' naa rehtesjiik reje chi kixilak i aj Israel.³⁰Xa awach pa' i neen kamanik chupaam i q'iij re' re', re' hin naa nusacham wach chi kixilak i aj Israel.

³¹Eh chupaam i q'iij re' re' ma' naa ta taq akamaniik chi jumpech. Re' k'uhb'aal wili naa rukahniik chi junelik, cha naah taq i hat, je' wo' chikinaah taq awiih. Eh naa taq animam xa aha' pa' taq nee ti k'achariik.³²Eh re' q'iij re' re' naa taq aye'em ruloq'il naa taq ahi'liik naa rukamaniik reh i rub'anariik taq atiij chi ma' naa ta taq a'nam awa' ahaa'. Ar taq naa atoq'aam chupaam i ruxq'eqiil reh i rub'eleej rub'eeh i ruwuuq poh, eh ko paruxq'eqiil chik chi junwaar taq naa amayam.

³³Re' QaJaaw Dios je' wili i xuq'or reh Moisés:³⁴Re' hat cha q'or keh i aj Israel i k'uhb'aal wili: Chupaam i ho'lajuuj rub'eeh i ruwuuq poh wuquub' q'iij naa taq aninq'ijeem i kok' paat korjinaq ruuk' xaq chee', ye'b'al runimaal wach i QaJaaw Dios.³⁵Eh naa taq a'nam ruuk' i santo laj moloj iib' chupaam i peet q'iij. Eh ma' naa ta taq akamaniik chi jumpech chupaam i q'iij re' re'.³⁶Eh chuwach i wuquub' q'iij re' re' naa taq ak'atam amayiij ye'b'al runimaal wach i QaJaaw Dios. Eh chupaam i ruwuuq q'iij naa taq a'nam i santo laj moloj iib', eh naa taq ak'atam amayiij chuwach i QaJaaw Dios. Re' re' jinaj i ninq'iij, ma' naa ta taq akamaniik chi jumpech.

³⁷Re' taqe i wili rub'eeh i poh q'e' looq naa taq aye'em reh i QaJaaw Dios, re' taq i naa a'nam wii' i santo laj moloj iib'. Eh chupaam i q'iij re' re' naa ak'atam taq amayiij chuwach i QaJaaw. Eh naa wo' taq aq'asam amayiij xa chi naq'awach, taqe i chikop, ruch'ihil taq aamayiij i riis uuva re' q'oreel chih q'ijil i ruk'ul taq chi naa aye'em.³⁸Xa re' la' naa taq akanaam i hi'limb'al q'iij chi loq'oomb'al reh i QaJaaw Dios, ruum re' i mayiij taq naa aye'em, ma' xata re' i naa taq asihim reh, ma' xata re' aq'orom taq chi naa aye'em, ma' xata re' i xanaruchaliik taq panak'ux chi naa taq aye'em reh i QaJaaw Dios.

³⁹Eh chupaam i ho'lajuuj rub'eeh i ruwuuq poh noq amolom taq chik i wach chu'nchel taq atik amu'uun wuquub' q'iij taq naa a'nam i ninq'ijinik ye'b'al runimaal wach i QaJaaw, eh chupaam i peet q'iij reh i ninq'iij naa taq ahi'liik, eh chupaam i ruwahxaaq q'iij naa wo' taq ahi'liik, ruum wilik kiloq'il.⁴⁰Eh chupaam i peet q'iij naa ak'amam taq chaloq i wach aachee' xiik'naah chihojal, naa wo' ak'amam taq chaloq i xaq ipak' i xaq i chee' xiik'naah kiholwochiil, i chee' q'oos wilkeeb' chi' rooq ha', manlik wuquub' q'iij naa ruwihiik taq rusuqkiil ak'ux chuwach i QaJaaw Dios.⁴¹Eh rajlaal haab' chupaam ruwuuq poh wuquub' q'iij taq naa a'nam i ninq'iij ye'b'al runimaal wach i QaJaaw Dios. Re' i k'uhb'aal wili naa ruwihiik chi juneliik naa rukahniik cha naah taq i hat, je' wo' chikinaah taq awiih aamaam.⁴²Eh chuwach i wuquub' q'iij re' re' i hat taq aj Israel i chawaasb'al taq ak'amam chaloq chi chupaam taq i xaq chee' naah paat taq naa awihiik.⁴³Je' taq re' i naa a'nam reh chi neenkinab'eej taq awiih aamaam, noq xwesaj taqe chaloq aamaam awati't xnuyeew taqe chi patinik chupaam i xaq chee' naah paat. Re' wili re' hin kinq'orik reh inki i Dios.

⁴⁴Je' wili noq xuq'or i Moisés keh i aj Israel aha' wilik taqe i q'iij wilik kiloq'il naa kiloq'em wii' i QaJaaw Dios. Re' aseite hamb'al paam i saqumb'al (Ex 27.20-21)

¹Re' i QaJaaw Dios je' wili i xuq'or reh i Moisés:²Re' hat cha q'or keh i aj Israel chi kik'am cho weh i manlik aseite oliva, reh hamb'al paam i saqumb'al reh chi neenq'op i saqum.³Eh re' i Aarón naa ruyej-aniik reh chi naa rik'iik aq'ab' chi qoplik chi juntar i tasb'al chuwach i QaJaaw Dios, chupaam i santo laj itz'ihy naah paat molb'al iib', i wilik wii' i loq'laj kaxa wilik wii' i k'uhb'aal. Re' k'uhb'aal wili naa rukahniik chi juneliik chikinaah i keh, eh chikinaah i kiih kimaam.⁴Eh re' wo' Aarón naa ruyej-aniik i saqumb'al chinaah i ye'aab' kantela, inki Dios. Re' taqe i kaxlanwi'k xye'arik chi mayiij

⁵Re' hat neenayejaa' kab'laj chi suq laj kaxlanwi'k re' ruuk' i xti holohik laj arina neenachaq'saj ik'inaq waxiqiib' libra chi arina neenakoj reh i ju'jun.⁶Eh naa akojom chinaah i mexa manlik oro wilik chuwach i QaJaaw Dios ka'lok' wach noq naa atusum wach ar, waq taq chi kaxlanwi'k i naa aye'em chi ju'jun tar.⁷Eh naa wo' akojom xti manlik insensia chinaah i ju'jun lok' reh chi neenkahnik chi je' ink'ohnik laj k'atoj mayiij ye'b'al runimaal wach i QaJaaw Dios.⁸Re' kaxlanwi'k xti koruman chi naa aye'em chuwach i QaJaaw rajlaal i hi'limb'al q'iij, re' wili juneliik taq naa a'nam, rehtalil i k'uhb'aal korjinaq cho wach kuuk' awuch aj Israel.⁹Eh re' taqe i kaxlanwi'k re' re' naa rukahniik reh i Aarón ruch'ihil taqe i rak'uun. Eh koruman chi chupaam i ye'aab' wilik rusantohiil naa kik'uxum taqe i kaxlanwi'k re' re'. Re' k'atoj mayiij inye'arik chi ye'b'al runimaal wach i QaJaaw Dios wilik ruloq'il, inki. Re' tojb'al kimahk i kib'ajwik reh i Dios

¹⁰Chi kixilak taqe i aj Israel jinaj i winaq xwihik aj Israel i rutuut, eh aj Egipto i rajaaw, re' xub'an i peleto ruuk' i jinaj i aj Israel chupaam i itz'ihy naah paat inkimol wii' kiib'.¹¹Re' winaq i aj Israel i rutuut xub'aj, eh ma' holohik ta xq'orik chi riij i rub'ihnaal i QaJaaw Dios ruum i re' xk'amarik reje chuwach i Moisés. Re' i rutuut winaq re' re' Selomit rub'ihnaal rixq'uun i Dibri, re' ruuk' taqe i kichalik Dan.¹²Eh xkikanaa' pantz'ilom i winaq re' re' kox kuy-eej chib'ih i xuq'or i Dios chi xkian ruuk'.¹³Chi riij i re', re' QaJaaw Dios je' wili i xuq'or reh i Moisés.¹⁴Chawesaj reje chi riij i itz'ihy naah paat i winaq xb'ajwik weh. Eh chu'nchel i xi ib'irinik reh i xuq'or naakiye'em i kiq'ab' chinaah, rehtalil chi wilik ru mahk, eh re' chu'nchel i aj Israel naakikansaniik reh ruuk' ab'aj.¹⁵Eh je' wili i cha q'or keh i aj Israel: Xa awach pa' taq aweh i neerub'aj i ruDios naa rukahniik chinaah i ru mahk.¹⁶Eh re' i ma' holohik ta nee nq'orik chi riij i rub'ihnaal i QaJaaw Dios inchol chi naa rukanteesjiik. Re' chu'nchel i aj Israel naakikaansaniik reh ruuk' ab'aj. Je' re' noq awach i ma' holohik ta nq'orik chi riij i QaJaaw atoob' ta aj Israel, atoob' ta tokoom tinamit i ruk'ul chi naa rukanteesjiik.

¹⁷Eh je' wo' chik, wila' awach i xukansaj i ras ruchaaq' i ruk'ul wo' chi naa rukanteesjiik i reh.

¹⁸Eh wila' awach i xukansaj jino'q i ruchikoop i ras ruchaaq' inchol chi naa ruye'em jilow i chikop re' re'.

¹⁹Eh awach i rub'an i ti' k'axik reh i ras ruchaaq', je' wo' chik re' i ti' k'axik naa rub'aan ree reh.²⁰Awach i xutoq i ras ruchaaq' naa wo' chik rutoqariik i reh. Eh wix resaj inaq'wach i ras ruchaaq' naa wo' rehtesjiik i ree reh. Wila' resaj i wach reeh i ras ruchaaq' naa wo' rehtesjiik i reeh i reh. Nik' ti'kiil i xub'an reh i tokoom i reh, naa wo' rik'raam chuti'jolal i reh.

²¹Eh awach i xukansaj jino'q i chikop naa ruye'em jilow i chikop re' re', awach i xukansaj i ras ruchaaq' naa wo' rukanteesjiik i reh.

²²Re' i k'uhb'aal wili naa ruq'atariik chikinaah i aj Israel, je' wo' hoq i tokoom tinamit wilik chi kixilak. Re' wili re' hin i Dios kinq'orik, inki.

²³Eh aha' wilik i xq'orarik reh i Moisés xuq'or wo' keh i aj Israel, kesaj reje chi riij i itz'ihy naah paat i xb'ajwik reh i QaJaaw Dios. Ar xkikansaj chi ab'aj, xkian wo' hoq i aj Israel nik' wach i xuq'or i Dios reh i Moisés. Re' haab' noq inhi'lik ak'al, eh re' haab' kioq'teesjik wii' i loq' moso

¹Re' i QaJaaw Dios je' wili xuq'or reh Moisés chinaah yuuq' Sinaí:²Chaq'or keh i aj Israel i na'ojb'al wili. Noq re' taq i hat, hat taq chik okinaq chupaam i ye'aab' naa nuye'em taq aweh i ruk'ul chi naa taq ahi'lisam aak'al ye'b'al runimaal wach i QaJaaw.³Xa waqiib' haab' taq naa atikim paam aye'aab'. Eh waqiib' wo' haab' naa amesem wach taq aa-uuva, eh naa taq asik'im i wach.⁴Eh re' i ruwuuq haab' xti naa ahi'lisam aak'al ye'b'al runimaal wach i QaJaaw Dios. Chupaam i haab' re' re' ma' naa ta taq atikim paam awak'aal, eh ni xata naa taq amesem wach aa-uuva.⁵Re' i kiwach i tik xa naa rupoq'iik chaloq chi riij i tz'apaab' wach tik taq naa a'nam ma' naa ta taq asik'im. Eh ma' naa ta taq asik'im i wach i poq'el uuva ma' naa ta taq amesem wach, naa taq aye'em ruhi'liik aak'al chi manlik.⁶Eh re' naakiwachum i tik xa naakipoq'iik chaloq naa rumanlojiik chi k'uxumb'al taq aweh i hat, taqe amoso winaq, taqe amoso ixoq, taqe tokoom tinamit wilkeeb' taq chaxilak.⁷Eh chu'nchel i naakipoq'iik cho wach ak'al naa rumanlojiik chi kiwa' taq awaakaax, chi kiwa' taqe i josq'laj chikop.

⁸Re' taq i hat naa taq awajlaam i wuquub' haab' korehtaal imponik wuqpech chi wuquub' haab'. Eh chu'nchel i re' b'elejeeb' roxk'ahl haab' narojiik eloq.⁹Eh chupaam i b'elejeeb' roxk'ahl haab' re' re' chupaam i lajeeb' rub'eeh ruwuuq poh, re' noq naa ruye'ariik i mayiij chi riij i mahk naa taq ahupem reje i tuun chupaam chu'nchel i tinamit.¹⁰Eh re' lajeeb' roxk'ahl haab' naa taq aye'em ruloq'il, ruum ar naakeliik pan k'axik i chopooj kinaah. Eh chupaam i haab' re' re' naakeliik panti' k'axik i chu'nchel i k'ayimaj pankamanik naa wo' chik kisutinik reje pankipaat ruuk' i awach keh, eh re' i kik'ayem kak'aal naa wo' chik kehchaam i kak'aal.¹¹Re' i lajeeb' roxk'ahl haab' ehteesb'al taq aweh panti' k'axik. Eh ma' naa ta taq atikim paam awak'aal, eh ma' naa ta taq asik'im i wach i tik xa naakipoq'iik chaloq. Eh ma' naa ta taq amesem wach i uuva, eh ma' naa ta taq asik'im i wach.¹²Ruum re' haab' re' re' naa taq aye'em ruloq'il ar taq naa aweliik panti' k'axik. Eh xa re' taq naa ak'uxum i wach i tik xa naakipoq'iik chaloq.

¹³Eh chupaam i haab' re' re' naa taq aweliik panti' k'axik, naa wo' chik taq awehchaam ruka'peech awak'aal.¹⁴Eh wila' awach taq aweh i xuloq' oon xu k'ayej i rak'aal, oon jino'q i xa chib'ih jariik reh i ras ruchaaq' ma' rub'an ruuk' i leq'.¹⁵Re' tz'aaq aak'al naa ruk'ulum i naa ruk'ayiniik reh, re' q'oreel nik' najtiil naa ruwihiik ruuk' i naa ruloq'wik reh, eh jarub' haab' naa resam i rutik chupaam, naa rutojom korehtaal wo' chik imponik i lajeeb' roxk'ahl haab' reh elik pan k'axik.¹⁶Wila' kook'ih haab' naa resam i rutik chuwach aak'al k'ih wo' naa rutojom, eh wila' ma' k'ih haab' chik naa resam i tik chuwach i ye'aab' xama' k'ih ta wo' naa rutojom ruum re' intojarik riij re' jarpech i nelik i tik mu'uun chuwach i aak'al.

¹⁷Je' re' noq ma' awach taq aweh i rujot' i ras ruchaaq' chayeew la' taq nuloq'il i hin, ruum re' hin, hin taq aaDios.¹⁸Chanimaj taq i nuk'uhb'aal cha a'n taq aha' wilik i nuq'or taq aweh. Wi xa a'n taq suq taq naa aak'achariik chupaam aatinamiit.¹⁹Re' taq atik naa kiwachiniik, ruuk' i re' naa taq a'nam awa' ahaa' chi korik suq taq naa awihiik.

²⁰Re' taq i hat i naapahqaaj taq chawach chi je' wili: ¿Chib'ih jariik i naa qak'uxum chuwach i ruwuuq haab' noq ma' naa ta qatikim, eh ni xata naa qamolom i wach i qatik? ti kinaa taq.²¹Re' hin naa nuye'em wotob'il taq cha naah, chupaam i ruwaaq haab' re' i wach taq atik naa reliik, naa rumanlojiik chi k'uxumb'al taq aweh chuwach i ixib' haab'.²²Eh naa wo' amolom i wach taq atik re' taq i re' naa ak'uxum noq naa taq atikim paam awak'aal chupaam i ruwahxaaq haab', eh kore' wo' taq naa ak'uxum chupaam i rub'eleej haab' korehtaal taq chik i nelik i wach atik.

²³Re' taq i hat ma' ruk'ul ta chi naa taq ak'ayem aak'al chi jumpech ruum ma' aweh ta taq, re' la' hin kinehchanik reh. Re' taq i hat xa ik'ik taq i naa a'nam chuwach.²⁴Chu'nchel taq awak'aal aloq'om i hat naa wo' chik ak'ayem taq reh awach xk'ayinik taq aweh.

²⁵Eh wila' xkahnik paneb'a'il jino'q i ma' tokoom ta taq awuuk' neerub'an chi nee ruk'ayej taq aweh i rak'aal xa re' la' nee wo' chik i rub'an chi nee taq i nak'ayej reh i rak'aal na' chub'an.

²⁶Eh wila' re' ineenk'ayinik reh aak'al ma' xta awach reh nee wo' rub'an chi nee wo' chik i rehchaaj, xa re' la' konaa rumolom wach i tz'aaq chi manlik tojb'al reh aak'al.²⁷Eh koruman chi naa rutojom i tz'aaq aak'al re' q'oreel jarub' chik i tz'aaq, eh naa wo' rajlaam jarub' chik haab' majaa' rureq i haab' reh elik panti' k'axik noq naa wo' chik ruloq'om i rak'aal.²⁸Eh wila' ma' rumol wach i tz'aaq i rak'aal chi nee wo' chik i rehchaaj, naa rukahniik chi reh i xloq'wik reh chi peet. Eh konaa chik ruponiik i haab' reh elik pan k'axik kora'j naa rukahniik chi ma' xta ehchan reh i aak'al re' re', kora'j nee wo' chik i rehchaaj re' i xk'ayinik reh.

²⁹Eh wila' awach jino'q i winaq xuk'ayej i rupaat chupaam i jino'q i tinamit kotimaj riij chi tz'aq nee wo' chik i rub'an chi nee ruloq' ruka'peech noq naa rub'anam haab' ruk'ayem.³⁰Eh wila' ma' xub'an chik ruloq'ariik i paat noq jinaj chik haab' ruk'ayem, i ruk'ul chi naa rukahniik reh chi jumpech awach loq'wik reh. Eh naa rukahniik chi reh taqe i riih rumaam, eh ma' naa ta rukahniik chi ma' xta ehchan reh chupaam i haab' noq naa rub'aan elik pan k'axik.³¹Eh wila' chupaam i k'isa tinamit ma' kotimaj ta riij chi tz'aq xk'ayjik jino'q i paat, neenb'aan ruuk' je' rukab' imb'aan reh ak'al, nee wo' chik i rub'an chi nee ruloq' i xk'ayinik. Eh naa wo' chikrukahniik chi ma' xta ehchan reh chupaam i haab' noq naa rub'aan elik panti' k'axik.

³²Eh pan kitinamiit taqe i aj Levíta keh neerub'an chi nee wo' chik inkiloq' ruka'peech xa chib'ih pa' jariik neenkik'ayej.³³Awach i winaq neeruloq'wiik reh i rupaat jino'q i aj Levíta, re' winaq re' re' inchol reliik ar na'chureq i haab' reh i elik panti' k'axik ruum re' i ye'ooj keh i aj Levíta chi kixilak i aj Israel xa re' wo' kipaat.³⁴Eh re' i ye'aab' wilik chi junsuut i kitinamiit i aj Levíta i wilik wii' i ch'ahn inkik'ux i kichikoop, ma' naa ta ruk'ayjiik ruum re' re' xti keh chi manlik.

³⁵Eh wila' wilik taq aatinamiit xkahnik paneb'a'il xooj-oq rupahqaaj rutoob'jiik taq aweh chatoob'eej taq chi je' jino'q tokoom tinamit xa ik'ik i rub'an. Eh naa taq aye'em ruye'aab' pana paat.³⁶Ma' xtaj i naa taq aq'uchum reh, eh wila' xub'an rukemeel taq awuuk' maa pahq'aaj taq tojb'al riij reh, cha k'uhtaaj la' chi nayohleej taq aaDios naa taq aye'em ruye'aab' chi korik pana paat.³⁷Eh wila' xukemelej taq rutumiin awuuk' maa pahqaaj taq reh i tojb'al riij. Ma' josaj wo' taq tz'aaq reh i ruwa' naa aye'em.³⁸Re' hin taq aaWaJaaw aaDios xineesanik taq cha weh parutinamitaal i Egipto reh chi naa taq nuye'em aweh i ye'aab' Canaán reh wo' chi naa nukahniik taq chi aaDios.

³⁹Eh wila' wilik jino'q taq aatinamiit xkahnik paneb'a'il. Eh noq wilik taq chik awuuk' xuk'ayej-oq i koq riib' taq aweh maa min taq pankowlaj kamanik je' rukab' imb'aan reh i loq' moso.⁴⁰Xa je' intaq'ab'jik awaj kamanoom, oon chi je' jino'q ulaa', eh naa rukamaniik taq awuuk' korehtaal imponik i haab' reh elik panti' k'axik.⁴¹Chi riij i re', neerub'an chi nee nelik taq reje panapaat ruch'ihil taqe i rak'uun rixq'uun. Eh naa wo' chik rojiik rehchaam i ruye'aab' naa wo' chik rojiik wih-oq ruuk' i ma' tokoom ta ruuk'.⁴²Ruum re' taqe i re' waj kamanoom taqe, re' hin xineesanik cho keh Egipto ma' ruk'ul taj chi nee kik'ayjik pankowlaj kamanik.⁴³Maaq'oreej taq panjosq'iil cha k'uhtaaj la' taq chi nayohleej taq aaDios.

⁴⁴Wila' nawaaj taq aloq'om amoso winaq, oon ixoq reh chi nee taq inamin pankowlaj kamanik neerub'an chi nee taq i naloq' chupaam taqe i tinamit wilkeeb' taq cha junsuut.⁴⁵Eh nee wo' rub'an chi nee taq inaloq' taqe i tokoom tinamit wilkeeb' taq chaxilak. Nee wo' rub'an chi nee taq inaloq' i kak'uun kixq'uun naa kaasjiik noq ko wilkeeb' taq chaxilak, neerub'an chi nee taq nawehchaaj.⁴⁶Eh nee wo' rub'an chi nee taq i nakanaa' taqe chi kaj kamanoom taq awak'uun awixq'uun noq ma' wilkaat ta taq chik i hat, xa re' la' re' taqe awuch aj Israel ma' ruk'ul taj chi kow taq nee titaaq'anik chikinaah.

⁴⁷Eh wila' wilik jino'q i tokoom rutinamitaal wilik taq chaxilak q'e' xb'ehomb'rik. Eh wilik-oq jino'q taq awuch aj Israel xchop ruum i neb'a'il, eh xuk'ayej-oq i koq riib' ruuk' i tokoom rutinamitaal re' re' oon xuk'ayej-oq riib' ruuk' jino'q chik i tokoom rutinamiit.⁴⁸Atoob' ta xuk'ayej riib', konee rub'an chi neenloq'arik reh chi neenoq'tejik reje, neerub'an chi jino'q i ras oon jino'q ruchaaq' neenloq'wik reh.⁴⁹Eh nee wo' rub'an chi jino'q i rikaan, oon jino'q rikaaq', oon jino'q i ras ineentojwiik reh i tumiin xuk'ayej wii' riib' reh chi nee wo' chik inloq'arik ruka'peech.⁵⁰Xa re' la' naakib'irim riij ruuk' awach loq'winaq reh jarub' haab' ruloq'om i reh jarub' chik haab' majaa' imponik i haab' reh elik panti' k'axik. Re' i ruk'ihaal tz'aaq i rukamaj naa ruk'ulum manlik wo' tojb'al riij jino'q i moso.⁵¹Eh wila' kook'ih laj haab' iraaj chi naa ruponiik i haab' naa rub'an wii' elik panti' k'axik konaa wo' chik ruye'em k'isinoq i tumiin xuk'ayej wii' riib'.⁵²Eh wila' xama' k'ih ta laj haab' chik ma' imponik i haab' naa rub'an wii' elik panti' k'axik, naa rusutem i tumiin reh i xloq'wik reh jarub' chik haab' ma' naa ta rukamaniik ruuk'.⁵³Re' winaq naa ruk'ayem riib' re' re' i naa rub'anam reh je' rukab' imb'aan reh jino'q i kamanoom xa chi haab' inkamanik. Mayeew taq q'ab' chi panjosq'iil neenq'orob'jik.

⁵⁴Eh wila' ma' xuyee riib' chi nee wo' chik inloq' ruka'peech chupaam taqe q'iij re' re' kore' chik na' ponoq i haab' reh elik panti' k'axik naa roq'tejiik reje, ruch'ihil taqe i rak'uun rixq'uun.⁵⁵Re' taqe i aj Israel xti manlik taqe waj kamanoom. Eh re' wo' hin xineesanik cho keh pan kitinamitaal i aj Egipto. Re' wili korik ruum re' hin kinq'orik reh, inki Dios. Re' rotob'il i Dios i ruyeew noq inimjik (Deut 7.12-24; 28.1-14)

¹Re' i QaJaaw Dios je' wili i xuq'or: Re' taq i hat maayejaa' taq atiyoox, maayejaa' taq xa chee' tiyoox maakoj wo' taq rehtalil atiyoox chikiwach ab'aj. Eh ni xata naa taq axuk'aam awiib' chikiwach, ruum xa re' wo' hin, hin taq aaDios.²Eh chayeew taq ruloq'il i hi'limb'al q'iij, eh chayeew taq ruloq'il i nuSantolaj ye'aab', ruum re' hin i Dios kinq'orik reh.

³Eh wila' re' taq i hat xanimaj taqe i nuk'uhb'aal, eh wi xak'am taq naah aha' wilik i nuq'or taq aweh, eh wi xa a'n taq,⁴re' hin naa nuye'em taq cho cha naah i jab' xti manlik paruq'ijil, eh re' taqe i tik mu'uun, re' taqe i chee' naa kiwachiniik chi korik.⁵Eh re' i wach taq atrigo naa reliik xakok'ahchi' wo' taq ak'uxum na' ponoq i ruq'ijil i rusik'ariik i wach i uuva. Eh re' i uuva xakok'ahchi' wo' taq ak'uxum na'chureq i ruq'ijil i tik naa taq a'nam awa' korehtaal taq naa anujiik chi korik, suq taq naa aak'achariik panatinamiit.⁶Re' hin naa nuye'em i suq laj k'acharik chupaam taq aatinamiit, ma' xta naa ruyohb'isanik taq aweh. Naa wesam taqe reje i josq'laj chikop. Eh ma' naa ta nuye'em q'ab' chi naa rutohq'iik ikaansanik ruuk' i q'aslaj ch'ihch'.⁷Naa taq awajimam reje i ki-ixowanik taq awach. Re' keh naa taq akansam ruuk' i q'aslaj ch'ihch'.⁸Ho'oob' taq aweh i hat naa kajiminiik reje keh i jinaj siento chi aj ixowaal. Eh jinaj siento taq aweh i hat naa kajimam reje i lajeeb' miil chi aj ixowaal. Eh naa taq rukuxiik akansam ruuk' i q'aslaj ch'ihch'.⁹Re' taq i hat suq taq awilariik naa nub'anam, naa taq kaat nuk'ihaaxb'isam. Eh naa taq nub'anam awuuk' aha' wilik i nuyejaam wach.¹⁰Eh re' i trigo najtir taq inamol chaloq' re' taq naa ak'uxum, korehtaal taq inawesaj cho panapaat i ruqox taq amolom, reh chi naa taq amolom i ak' trigo.

¹¹Re' hin naa nuwihiik taq awuuk', ma' jaruuj taq naa kaat nukanaam.¹²Eh naa nuwihiik taq panayejaal panaxilak. Re' hin naa nukahniik taq chi aaDios, eh re' taq i hat naa taq akahniik chi nutinamiit.¹³Re' i hin taq aaDios i xineesanik taq cha weh parutinamitaal i Egipto. Reh chi xat elik cho pan kiq'ab' i kiminwik taq aweh pankamanik. Re' hin xwesaj i ahl laj hi'q wilik naq taq cha naah, reh chi xat b'ehik taq chi ma' xta taq ayo'jiik, inki. Re' tojb'al kimahk i ma' naa ta kinimaniik reh i k'uhb'aal (Deut 28.15-68)

¹⁴Re' i QaJaaw Dios je' wili i xuq'or. Eh wila' ma' xanimaj taq, wila' ma' xa a'n taq chu'nchel i ruq'or i nuk'uhb'aal, naa taq kaat nuye'em chutojariik amahk.¹⁵Eh mo'-oq xponik taq chawach taqe i nuk'uhb'aal, eh wii ma' xa a'n taq i xnuq'or taq aweh wi ma' xamol taq panawánima, wi ma' xayeew taq rajaawriik i nuyejaam cho wach chi naa nub'anam taq awuuk'.¹⁶Re' hin naa taq kaat nuye'em chutojariik amahk naa nuye'em chee ti' k'axik taq cha naah re' ruuk' i q'an tz'a', ruyab'ilaal taq i naq'awach, ruyab'ilaal taq ati'jolal. Xa ma' xta chik inkih chi naa taq atikim i chib'ih aweh ruum re' chik taqe i ki-ixowanik awach naa kib'aniik rusuqkiil.¹⁷Re' hin ma' naa ta chik taq kaat nutob'eem naa taq rub'aan aweh kuum i ki-ixowanik taq awach, je' wo' taqe i ma' ti ponik ta taq panaq' kiwach. Eh naa taq amolom chi elik atoob' ta ma' awach ta naa rajiminiik taq aweh.

¹⁸Eh wila' ma' xinanimaj taq ruum i naa taq ak'ulum re' re' wuquub' pech chik chi je' re' i tojb'al riij taq amahk naa nuye'em¹⁹Re' hin naa nusacham wach i rukowiil taq anaah, je' wo' hoq i niimb'isanik wachiis taq i naa a'n. Eh ma' naa ta chik nuye'em chee jab' pan taxaaj re' taq atik amu'uun ma' naa ta chik kiwachiniik.²⁰Xa naa taq chik aq'eb'em awansil chi kamanik ruum ma' naa ta chik ruwachiniik taq atik, je' wo' taqe i chee' ma' naa ta chik kiwachiniik.

²¹Eh wila' xama' xinanimaj ta wo' taq ruuk' i re' mo'-oq xuk'ul taq ak'ux. Re' hin wuquub' pech chik chi je' re' i tojb'al taq riij amahk naa nuye'em.²²Naa taq nutaq'aam cho cha naah i josq'laj chikop naa kik'uxum chu'nchel taq awak'uun awixq'uun. Eh naakixereb'eem taq aachikoop, naa taq ak'uhliik i hat. Korehtaal imponik chi ma' awach ta chik i naa rub'ehiik taq panatinamiit.

²³Eh wila' ruuk' taqe re' ma' xokik taq ana'ojb'al xama' xuk'ul ta wo' taq ak'ux i nuq'or,²⁴je' wo' hoq i hin xama' naa ta wo' ruk'ulum nuk'ux taq i naa a'nam. Ruum i re' wuquub' pech chik chi je' re' i tojb'al riij taq i amahk naa nuye'em.²⁵Eh naa taq nutaq'aam cho cha naah i naakikansaniik taq aweh ruuk' q'aslaj ch'ihch', ruum ma' xa a'n ta taq i qayejaam wach. Eh awajiim naq naa rojiik akeb'aam taq awiib' panatinamiit, eh re' hin naa nuye'em i yab'ilaal taq cha naah ruum i re' naa taq aq'ehb'iik pan kiq'ab' i ki-ixowanik taq awach.

²⁶Eh noq naa nusacham wach i k'uxumb'al taq aweh, lajeeb' ixoq naakimolom kiib' chuchaq'tesjiik i kaxlanwi'k pan jinaj horna. Eh xa pajooj taq i kaxlanwi'k naakiye'em naa wo' naq taq ak'uxum, xa re' la' xama' naa ta wo' taq anujiik.

²⁷Eh wila' ruuk' taq i naa ak'ulum re' re', xama' xinanimaj ta wo' taq, xama' xuk'ul ta wo' taq ak'ux i nuq'or.²⁸Je' wo' hoq i hin xama' naa ta wo' ruk'ulum nuk'ux taq i naa a'nam ruum nuk'aah, wuquub' pech chi je' re' i tojb'al riij taq amahk naa nuye'em.²⁹Eh naa ruponiik i q'iij chi re' taq chik awak'uun awixq'uun taq naa ak'uxum.³⁰Re' hin naa nusacham wach anajt naah ye'aab' inaloq'ej taq wii' aatiyoox, eh naa wo' nusacham kiwach taq aatiyoox. Eh naa nuye'em taq ati'jolal kamnaq chik chikinaah kamnaq tiyoox, naa taq nuk'uhtaam aweh chi ma' waaj ta taq awach.³¹Eh naa wo' nukanaam chi ma' xta chik i wilik chupaam taq aatinamiit. Eh naa nusacham wach i rupaat taq aadios ma' naa ta chik ruponiik chi nuwach taq ank'ohnik laj iq'oom.

³²Re' taq aye'aab' naa nusacham wach. Re' chik taqe i ki-ixowinik taq awach naa kichaliik patinoq ar, eh ma' k'isiin ta naa rusahchiik kik'ux ruum i naakilom.³³Eh re' taq i hat naa taq nutukem awach chupaam taqe i nimaq tinamit ruuk' q'aslaj ch'ihch' naa rusachariik taq awach, re' taq aatinamiit naa nukanaam chi ma' xta chik i naa ruwihiik chupaam. Re' taq i wilkaat wii', xanaa chik rub'aan yo'jik chupaam.³⁴Re' taq aye'aab' naa ruhi'liik naa rusuqb'iik ruk'ux noq naa rukahniik chi ma' xta chik i naa ruwihiik chupaam noq naa taq awihiik chupaam i kitinamiit i ki-ixowanik taq awach. Ruuk' i re' naa rub'anam rusuqkiil i hi'lik i ma' rub'an ta naq chaloq noq xub'an.³⁵Eh nik' najtiil naa rukahniik chi ma' xta wilik chupaam naa rub'anam rusuqkiil i hi'lik taq i aye'aab' aha' wilik i ma' rub'anam ta chaloq rusuqkiil noq ko patinik naq i na a'n taq ar i hat.

³⁶Eh awach taq aweh i hat i konaa rukahniik chi k'achlik chupaam i kitinamiit i ki-ixowanik taq awach. Ma' k'isiin naa kiyo'jiik xa ruum chi naa ruq'ehb'iik jino'q i xaq chee'. Eh naakimolom chi elik je' cho k'ahchi' kajimjiik chi q'aslaj ch'ihch', naakiq'ehb'iik wach ak'al chi xama' awach ta wo' naa rajiminiik keh.³⁷Xak'ul chik naakiq'ojom i kiwach ruuk' i kuch'ihil je' cho chuwach i q'aq'inik elik inki a'n Xanaah re' xama' awach ta wo' naa rajiminiik keh, ma' awach taj i naa rub'anam ruko'ljiik riib' pan q'ab' i nixowanik kiwach.³⁸Re' taq i hat naa taq rusachariik awach chupaam i nimaq tinamit. Naa taq rusachariik awach chupaam i kitinamiit i ki-ixowanik taq awach.³⁹Eh awach taq aweh i hat i naa kikahniik chi k'achalkeeb' chupaam i kitinamiit i ki-ixowanik taq awach xanaa wo' kikimiik ruum i ruyib'kiil wach i kina'ojb'al. Eh junkimiik taqe ruuk' i kituut kajaaw ruum wo' hoq i kiyiib' wach na'ojb'al i keh.

⁴⁰Eh naa ruponiik i q'iij noq naa taq ayot'om ak'ux chi riij taq amahk, je' wo' hoq i kimahk xkian taq atuut awajaaw, je' rukab' i xkian i keh ma' xkinimaj taj i nuk'uhb'aal, eh ma' xuk'ul ta kik'ux i xnuq'or keh.⁴¹Re' taq i hat naa taq anab'eem chi ruum taq i na a'n re' re' naa taq kaat nuk'amam reje pan kitinamiit i ki-ixowanik taq awach. Ar taq naa aloch'om awiib' i naa taq ruk'uliik panak'ux ayiib' wach na'ojb'al taq i naa a'nam, ruum i re' naa taq atojom amahk.⁴²Eh re' hin naa ruk'uliik cho panuk'ux i nuyejaam cho wach ruuk' i Jacob, je' wo' i nuyejaam cho wach ruuk' i Isaac, je' wo' hoq i nuyejaam cho wach ruuk' i Abraham. Eh naa wo' ruk'uliik cho panuk'ux ak'al.⁴³Re' i naa rub'anam rusuqkiil i ruhi'liik noq ma' k'acharik ta taq chik i naa a'n ar i hat. Re' taq i hat naa taq atojom amahk ruum ma' xa a'n ta taq i nuq'or aweh, eh ma' xponik ta taq panaq'awach i nuk'uhb'aal.

⁴⁴Atoob' ta pan tokoom tinamit naa taq awihiik ma' naa ta wixowaam taq awach, ma' naa ta taq kaat nuq'eb'em chi riij nuk'ux. Eh ma' naa ta nusacham taq awach, ma' naa ta rusahchiik panuk'ux i nuyejaam cho wach kuuk' taq aamaam awati't. Re' wili re' hin taq aaDios kinq'orik reh.⁴⁵Naa la' ruk'uliik cho panuk'ux i nuyejaam cho wach ruuk' noq xwesaj taqe chaloq parutinamitaal i Egipto chikiwach taqe i nimaq tinamit, reh chi xin kahnik chi hin i kaJaaw i ki Dios, inki.

⁴⁶Re' taqe i wili i k'uhb'aal, taqe i xuk'uhtaaj, re' taqe i tijinik xub'an i QaJaaw Dios keh i aj Israel ruuk' chii' i Moisés ar naah yuuq' Sinaí. Re' taqe i chib'ih jariik naa ruq'ahteesjiik reh i Dios

¹Re' i QaJaaw Dios je' wili i xuq'or reh i Moisés:²Re' hat cha q'or keh i aj Israel chi je' wili: Wila' awach i pahqaljik reh i mayiij chi nee ruq'asaj chuwach i QaJaaw Dios chi tojb'al riij i xa awach. Eh mo'-oq xub'an ruye'ariik neerub'an chi neerutoj riij chi tumiin re' q'oreel nik' k'ihaal i naa rutojom.³Re' winaq wilik reh i juninaq haab', eh komponik oxk'ahl haab' re' tojb'al riij taq naa aye'em lajeeb' roxk'ahl chi tumiin re' ruuk' i plata. Je' rukab' rupajariik i tumiin imb'aan parusantolaj ye'aab' i QaJaaw.⁴Eh re' jino'q ixoq xalajeeb' ruk'a' winaq chi tumiin taq i naa atojom wii' riij.⁵Eh re' i wilik hoob' haab' reh eh komponik juninaq haab' mi winaq juninaq chi tumiin taq i naa atojom wii' riij, eh mi ixoq xalajeeb' chi tumiin taq i naah atojom wii' riij.⁶Eh re' taqe i kok' ha'lak'un jinaj poh i wilik keh, eh imponik ho'oob' haab' mi k'isa k'un ho'oob' chi tumiin re' ruuk' i plata taq i naa atojom wii' riij, mi k'isa xq'un xa ixib' chi tumiin re' ruuk' i plata taq i naa atojom wii' riij.⁷Eh re' taqe ik'inaq chik oxk'ahl haab' i wilik keh mi winaq ho'lajuuj chi tumiin i naa taq atojom wii' riij, eh mi ixoq xalajeeb' chi tumiin taq naa atojom wii' riij.⁸Eh wila' re' i naa rutojariik riij q'e' k'isa neb'aa' ma' nee ta rub'an rutojariik riij chi tumiin inchol ruk'amariik reje chuwach i k'amal kib'eeh aj tiij. Eh re' reh nee nq'orik reh nik' k'ihaal i neerutoj, eh jarub' i neerukuy rutojariik.

⁹Eh wila' chikop i naa ruq'ahteesjiik reh i QaJaaw. Xa re' la' chu'nchel i chikop naa ruq'ahteesjiik chi mayiij chuwach i QaJaaw Dios wilik rusantohiil.¹⁰Ma' nee ta chik i rub'an chi neenjaljik wach ruuk' jino'q i tokoom chikop, atoob' ta q'e' chik holohik chuwach, oon ma' tz'e'waach ta chik. Eh wila' xb'aan jino'q i jalwaach, chi re' i naa ruq'ahteesjiik chi mayiij chi je' i chikop naa rujaliik wii' wach naa rukuxeesjiik.

¹¹Eh re' i chikop ch'uwa' wach i ma' nee ta rub'an chi neenq'ahteesjik chi mayiij chuwach i QaJaaw neerub'an chi neenk'amarik reje chuwach i k'amal kib'eeh aj tiij.¹²Re' reh neenkojwik tz'aaq i chikop mi re' ruuk' i holohik, oon ma' tz'e'waach taj, eh nik' k'ihaal i naa ruq'orom i aj tiij je' wo' re' k'ihaal i naa rutojariik.¹³Eh wila' re' i xye'wik reh chi mayiij i chikop re' re' xraaj wo' chik ruloq'om, kojuninaq chik i naah i tz'aaq naa ruye'em.

¹⁴Eh wila' awach iraaj ruq'asam i rupaat chi mayiij chuwach i QaJaaw, kore' i k'amal kib'eeh aj tiij naa rukojwiik tz'aaq. Re' q'oreel i paat mi holohik paat, oon ma' holohik taj. Eh jarub' i naa ruq'orom i k'amal kib'eeh aj tiij, je' wo' re' k'ihaal i naa rutojiik.¹⁵Eh wila' re' i xq'asanik reh i paat re' re' naa wo' chik ruloq'om kojuninaq chik i naah i tz'aaq naa ruye'em.

¹⁶Eh awach i xuq'asaj yejaal-oq i rak'aal chi rumayiij chuwach i QaJaaw Dios naa rub'irariik riij nik' k'ihaal i ja' neenokik chupaam, je' wo' k'ihaal tz'aaq, eh lajeeb' roxk'ahl chi tumiin re' ruuk' i plata i naa ruye'ariik chi riij i kiib' siento ruuk' juninaq chi nimaq lemeta chi sebada.¹⁷Eh wila' ma' jaa' i rureq i q'iij chi naa rub'aan elik panti' k'axik naa ruq'asam i rak'aal konaa rutojom nik' k'ihaal i tz'aaq kojooj.¹⁸Eh wila' xuq'asaj noq b'anooj chik elik panti' k'axik, koruman chi re' i k'amal kib'eeh aj tiij naa ruq'oriik jarub' i naa rutojariik. Eh naa resam iloq chinaah jarub' chik haab' i ma' naa ta rutojom noq naa wo' chik ruponiik i haab' reh elik panti' k'axik.

¹⁹Eh wila' re' i xq'asanik reh aak'al i xraaj wo' chik ruloq'om, kojuninaq chik i naah i tz'aaq naa ruye'em, kora'j nee wo' chik i rehchaaj re' ak'al.²⁰Eh wila' ma' xub'an chik ruloq'ariik aak'al re' re', tokoom chik aj eh xk'ayjik ma' nee ta chik i rub'an chi nee ruloq'.²¹Eh noq naa ruponiik i haab' reh elik pan ti k'axik re' aak'al re' re' xa reh chik i QaJaaw Dios naa rukahniik. Eh re' chik i k'amal kib'eeh aj tiij naa ruchopwiik naah.

²²Eh wila' awach i wilik i rak'aal xaruloq'om ma' xata kanamaj reh ruum jino'q i awach reh, eh neeruq'asaj chi mayiij chuwach i QaJaaw Dios.²³Koruman chi re' k'amal kib'eeh aj tiij, ruch'ihil i ehchan reh ak'al naakib'irim riij i tz'aaq re' q'oreel jarub' chik haab' iraaj i elik panti' k'axik, nik' k'ihaal i tz'aaq naa rutojom. Eh re' i tumiin re' re' naa ruq'asam chi rumayiij chuwach i Dios.²⁴Eh chupaam i haab' noq naa rub'aan elik panti' k'axik re' i aak'al re' re' naa wo' chik rehchaam awach xk'ayinik reh.

²⁵Re' tz'aaq naa ruq'atariik taqe i xa chib'ih jariik je' k'ihaal i pajooj imb'aan chupaam i rusantolaj ye'aab' i QaJaaw, je' re' rahliil naa ruye'ariik.

²⁶Eh re' taqe i peet kak'uun i wakax ma' ruman ta chi naa taq aq'asam reh i QaJaaw Dios ruum xa reh wo' hoq. Atoob' ta jino'q i k'isa imas wakax, oon rak'uun tentzun, xa reh wo' hoq i QaJaaw Dios.²⁷Eh wila' re' ruuk' i chikop ch'uwa' wach, neerub'an chi nee wo' chik i ruloq', xa re' la' kojuninaq chik i naah i tz'aaq naa ruye'em. Eh wi ma' xloq'arik chik neerub'an chi neenk'ayjiik reh i tokoom chi je' k'ihaal i tz'aaq kojooj.

²⁸Eh awach xuq'asaj yejaal-oq i chib'ih reh chi rumayiij chuwach i QaJaaw Dios, jino'q i xa awach, oon jino'q chikop, oon rak'aal re' ruuk' i xa kanamaj chi rukooch. Eh chu'nchel inq'ahtesjiik chi mayiij chuwach i QaJaaw Dios, ma' naa ta ruk'aayjiik ruum wilik rusantohiil, eh reh i QaJaaw Dios.²⁹Eh ma' nee ta rub'an chi nee wo' chik inloq'arik ruka'peech i q'asamaj pankimik xanaa wo' rukimiik.

³⁰Eh re' taq i wach atik i naa tik panak'al, je' wo' kiwach chee' ink'uxarik lajeeb' i naa taq awesam chinaah i jinaj siento naa taq aq'asam reh i QaJaaw Dios, ruum xa reh wo' hoq i reh.³¹Eh wila' awach i xraaj wo' chik rehchaam i lajeeb' naa reliik chinaah i jinaj siento kojuninaq chik i naah i tz'aaq naa ruye'em.

³²Eh re' i lajeeb' chi wakax, oon lajeeb' chi tentzun jinaj i naa taq awesam ruuk', eh re' i jinaj re' re' naa taq aq'asam chi mayiij reh i QaJaaw Dios.³³Eh mi holohik, mi ma' holohik ta laj chikop, ma' nee ta rujal wach ruuk' i tokoom chikop. Eh wila' xujal wach, kikab'cheel naa kiq'ahteesjiik chi mayiij chuwach i QaJaaw Dios. Eh ma' nee ta chik i rub'an chi nee ruloq' ruka'peech, inki i QaJaaw Dios.

³⁴Re' taqe i k'uhb'aal wili xuq'or i QaJaaw Dios reh i Moisés naah yuuq' Sinaí, reh chi xuq'or keh i aj Israel.

Bible Society in Guatemala

https://app.library.bible/content/695aa4b9f902778f