Pumpei23
1Balaam ne Balak dage ranggai, “Aika ge recabam hena a ziemne teilu nah hetumseu hena nah meurünseu hena mteilu.”2Cine Balak, Balaam kerang nzwa teilu. Iciu eh Balak penai Balaam hetumseu ge nah meurünseu ge recabam ramsang gage peugai.3Ge Balaam ne Balak dage ranggai, “N keru ratak ga saplu nah Ih mie dizie. RAMPAUBE acu gwang redau de cilak lu. Ma keheibe de acu keu keliabe Ih ncu ranglia zie.” Cine pa hangdeutu reu tsingbangdung kegah ga mie di.4Pa hangdeutu reu ga kebam dau, Tinggwang pecu redau nah Balaam pe dage ranggai, “Ih recabam hena teilu da nah Ih recabam ramsang gage hetumseu ge nah meurünseu ge peugai dida.”5RAMPAUBE sam ge Balaam mui gage kai nah ranggai, “Balak da caili gwang daicu nah peda rangbeu.”6Cine Balaam, Balak keru ratak ga sap kebambe nah Moab muiteume pelane pecu ngngwa kebambe da cailigwang di.7Ge Balaam pe cairasam rang cudi nah pa rang eh, “Balak ne acu Aram gade ngngwa gwanglu,naimiak kepetle lamlwadung gade Moab gwangpei.‘Gwanglu, Jacob de reset lo a ziemne,’ de pa ranggai.‘Gwanglu, Israel de mlai dilu.’8Ih dainzwa eh Tinggwang ne reset kemakmedung de reset lulai?Ih dainzwa eh RAMPAUBE mlai kemakmedung de mlai lulai?9Tsura peu gade Ih pecu kengau ziemne;Ih hangdeutudung gade pecu pie.Pielo, minadung penuikatei lungh kela ge bamnah penuikatei penuide heleuh kedabe nzwa lie lama.10Caune Jacob leuhme de pei lulaimede Israelme zi mdai tei eh ket rünne de pei lulai?Acu peu makesangme ge tsit tsai lo,nah a teilung penli kecang de pa nzwa lo!”11Balak Balaam dade ranggai, “Nang a dage daipai tei zeu no. Ih ncu a ngauraumedung de reset beu kerane ngngwa gwang, dede pielo, nang penuide samlam beu dida.”12Balaam keli eh ranggai, “RAMPAUBE ne acu daige ranglo kebeu rünne Ih sünne eh rang kerabe meni?”13Cine Balak pe dage ranggai, “Kehereide acu ngngwa heni keda ga nang penui de ngaulu kera ga gwang lo. Nang penui nnatume rünne de ngau zie, penui pelane de lak, cika de nang penuide a ziemne reset gailo.”14Cine pa Balaam de Zophim luh Pisgah Deutu reuga ngngwa mielu nah recabam hena tei silu. Pa recabam ramsang gage hetumseu ge nah meurünseu ge peugai beu.15Ge Balaam ne Balak dage ranggai, “Nang ngu keru ratak teu aika saplu, Ih luga RAMPAUBE de redau kera pet kecudau.”16Cine RAMPAUBE Balaam de redaulu nah sam ge pe mui gage kaibeu. Pa ranggai, “Balak da cailigwang cu nah a sam de pecu peulo.”17Balaam peda cailigwang di, nah pielo, pa au keru ratak taiga sapbam nah Moab muiteumedung peda bam. Ge Balak pe dage ranggai, “RAMPAUBE daipai rangno?”18Balaam caiha sam rang cudi. Pa ranggai, “Cuhlu, O Balak, nah siulu.A kwa kingneilu, nang Zippor napei.19Tinggwang au mina ma, cine pa nret lak,Mede mina ge eh pe lung nreu lama.Pa ma keheibe de tei mene pe sampet gaini?Pa cide teipet kai mene mage tei zie de rangni?20Pielo, acu samlam beu kera rangbeu da.Tinggwang ne samlam ge peu, nah Ih cide keu nreu gailak.21Pa Jacob da kehung ge de ngau mamede Israelme da keherei kecu gwangma.Penui RAMPAUBE Tinggwang penuide ngngwa la,nah penui gu hegwangpei lie kecu penui kakgade sah di.22Tinggwang ne penuide Egypt gade ngngwa mpetluhetumseu pezai kesiabe kengking nzwa.23Kereka ge de Jacob de kerenia tadung teikelu gah,nah caiha kerang ne Israel de rezam ma.Ci meliene, Jacob penai Israel ha rangbi zie da,‘Pielo Tinggwang daitei gai bi!’24Pielo, minadung hingho pui ge nzwa cuh zeu,hingho ge pet nah ketang kela nzwa.Pa tuityei kera pie kelude tyeilu kemakta pa zeu lamanah pa ne teitset kelu gu hejai sakla.”25Ge Balak Balaam dage ranggai, “Penuide reset so mede samlam de beu so.”26Dede Balaam pe sam keli nah Balak dage ranggai, “Ih ncu rangbeu meni RAMPAUBE a da ranglo kecube pelane Ih rang mai kesia?”27Cine Balak Balaam de keli eh, “Cu gwanglu, Ih ncu heni keda ga ngngwa mie zie. Cide ne n ziemne Tinggwang pesuiyi de cilak cika penuide a ziemne reset beu kera.”28Cine Balak Balaam de Peor Deutu reu hetaideu pie nghung kengau ga ngngwa hanglu.29Balaam Balak dage ranggai, “Aikage a ziemne recabam pumhena teilu nah hetumseu hena nah meurünseudung hena mteilu.”30Cine Balak Balaam kerang nzwa teilu; pa hetumseu ge nah meurünseu ge recabam ramsang gage peugai.
Bridge Connectivity Solutions Pvt. Ltd.