Pumpei24
1RAMPAUBE Israel de samlam beu kera cide pesui yi kecu Balaam ngaulu ge, pa mie tadi, keda tingdaudung nzwa, reka keu kerane. Iciu meliene, pa hetaideu lebie piegai.2Pa ngang cuh pie gai nah Israel ramzeuki teipwa kebam ngau, penuikatei penui leuh ga ketket nah Tinggwang Rabe peda gwanglu.3Pa caiha aide ngaulu nah ranggai, “Balaam Beor napei marang lau da,minabe pe miak nrak le pieling kebambe.4Pa marang nah Tinggwang samdung siu.Pa Kengkiengbe dade marengei ngau,Pe miak mrak eh pe dwaga keumie.5N paikidung daihiage hezuyi no, Jacob,nang lungh kebam ni ga, Israel!6Chabakdung nzwa zangra pet,hereuki taiga heguriedung nzwa,RAMPAUBE ne ling kegai aloedung nzwa,duidung kung ga cedardung nzwa.7Penui duibungdung gade dui lwamie,nah penui tsileu au dui hetau hemilu.Penui hegwangpei au Agag swade hu kizie,nah penui hegwangram de herüt peu zie.8Tinggwang pecu Egypt gade ngngwa mpetlu, hetumseu pezai kesiabe gu kengkingbe nzwa.Pa heleuhdung de tyeilu zie pecu ncam eh regi kecumedung de.Pa penui radung tei kecai dizie.Pa penuide pe lakpitsidung le kapzie.9Pa hingho ge nzwa kwakdung mielu,hingho pui ge nzwa. Cauge pecu kebwak kera kekuu bamno?Peu keheibe de pecu samlam kebeube de samlam beu;peu keheibe de pecu reset kebeube de reset beu.”10Balak Balaam de perata cuhdi nah pa perata eh pe ba hezum ncütlu. Balak Balaam dage ranggai, “Ih a ngauraumedung de reset beu kerane ncu qu, dede pielo, nang penuide piacum samlam beu dida.11Cine cu gage a taiga de tetdi eh n kiga gwang cu. Ih n ziehi tei hemisüt beu zielie rang, dede RAMPAUBE ne peu ncu ziehi ge de ngau kera kam dida.”12Pecai Balaam Balak de keli gai, “Nang a dage langkegai samgwamedung de Ih rangbeu dida,13‘Balak acu pe hegwangki rangkanggeu nah kecak puiting eh peu liede, Ih RAMPAUBE sam gika di daulak nah keheibe de siade mede yide, mede ma keheibe Ih tei keneube liede. Ih RAMPAUBE acu ranglo de kebeube rünne rang lubui.’ Ih aide penui dage rang meni?14Cine cu, pielo, Ih a minadung da cailigwang dizie da. Dede nrai Ih ncu ranglia zie mina aidungde n minadung dage gwang dai kera le daipai teigai ziebi kecu.”15Balaam caiha aide rangdi. Pa ranggai, “Balaam Beor napei rang,Minabe pe miak nrak le pieling kebambe.16Aide au mige Tinggwang dade samdung siu lwe cairasam kerang ge,Hutube dade pa maci bam,Ngkiengtube dade pa marengei ngaubam,Pedwa ga pa pemiak nraklu eh keumie kegaibe.17Ih pecu ngau, dede pa au cu aika gah. Ih pecu piegai, dede pa au nna ma. Hegi ge Jacob dade pet zie,nah hegwang tuitie ge Israel dade cu zie.Pa Moab muiteumedung de teipop dizienah Seth leuhme pelane de ngkap dizie.18Iciu eh Edom de Israel gu dizie, nah Seir de penui gu dizie,Israel ngauraumedung,penuide Israel ne kengkieng teu ngamlu zie.19Jacob dade kengkieng teu kera hegwang ge gwang zie,nah penui gu namdi ga bangkelume de pa ngkap dizie.”20Ge Balaam Amalek de piedi nah pe caiha rangdi. Pa ranggai, “Amalek nda tingdau heleuhdung gade ngkiengtube,dede penli kamtube kekap zie.”21Ge Balaam Keniteme lambie piegai nah pe cairasam rangdi. Pa ranggai, “Heni nang lungh kebam de au ngkieng,nah n ciet au tsura ga bam.22Iciuliede nnui Keniteme de mi ne ru dizieAssyria ncu hebaangme teikera ngngwa tet kecu dau.”23Ge Balaam caiha kamtube ranggai, “Co tei lubui da! Tinggwang aide teikegai dau cauge ringlu lai?24Limdung Kittim kung gade gwang zie;penui Assyria de ketang zie nah Eber reu ngkienglu zie,dede penui liede kekap le penli tei zie.”25Ge Balaam cuhlu delwe tetdi. Pa pe kiga cailigwang di, nah Balak liedi tetdi.
Bridge Connectivity Solutions Pvt. Ltd.