Pumpei22
1Israelme Moab deu langkie Jericho kenna namdi gade Jordan reuki mbie gage penui ramzeuki teilu kemakta tetla.2Balak Zippor napei Israel Amoritme dage tei kegai pelane ngaulu.3Moab au minadung de hing sütdi kedanemene penui au kiee, nah Moab au Israelme de hing eh bam di.4Moab ga hegwangpei Midian ga hangkiamedung dage ranggai, “Hemaa kedi aide ne anui de twagwa kebam pelane tyeilu zie da hetumseu ge luhga cehei tyei nggah kedi nzwa.” Cipau tingdau Balak Zippor napei ne Moab ga hegwang tei bam.5Pa samgwamedung de Beor napei Balaam Pethor ga Euphrate reuki taiga kebam, pe leuhme deu nah pe minadung dage langgai. Pa pecu qulu nah ranggai, “Pielo, heleuh ge aika gwang bam Egypt gade. Penui kideu reu puibam dida nah cu penui a taiga nna gwangla dida.6Cine keherei de cu gwang delwe aipau leuhme de a ziemne reset dilo, kedanemene penui au a ziemne ngkieng zu di kecune. Ciciu lucai Ih penuide gwaketang kera tei lubui, nah penuide hangdeube gade gwa mpet luzie. Nang samlam kegaime de samlam beu kela nah reset kegaime de reset beu kela Ih cibam.”7Cine Moab hangkiamedung nah Midian hangkiamedung kereka ziemne pemi keulwe tetti. Penui Balaam da gwanglu nah pecu Balak samdung rangbeu.8Balaam penui dage ranggai, “Heziu aika bamlu, Ih RAMPAUBE a dage daipai rangbeu ziebi nnui da keugwang beu zie.” Cine Moab muiteumedung Balaam de ngngwa cipau ziu bam di.9Tinggwang Balaam da gwanglu nah ranggai, “N da gwang kebam mina aidungde caugame no?”10Balaam Tinggwang de keli eh, “Moab hegwangpei Zippor napei Balak, ne penuide a dage langgai lie. Pa ranggai,11‘Pielo, Egypt gade kegwang minadung ne a deu puipung la dida. Cu gwang eh penuide reset gailo a ziemne. Iciucai Ih penuide regi luzie nah gwa mpet luzie.’”12Tinggwang Balaam de keli eh, “Nang mina cidungde de ngngwa tet kerabe ma. Nang Israel minadung de reset kerabe ma kedanemene penui au samlam punglu.”13Balaam tingcang cuhlu delwe Balak muiteumedung de rangbeu, “Nnui deu ga gwang daicu kedanemene RAMPAUBE acu peu nnuide nzang gwang kera rau dida.”14Cine Moab muiteume tetti nah Balak da gwang daidi. Penui ranggai, “Balaam anui de nzang gwang rau dida.”15Balak muiteumedung kiee nakge eh keraibe maa swa mlangki kecume de langgai dai.16Penui Balaam da gwanglu nah pe dage ranggai, “Balak Zippor napei ainzwa rang, ‘Peu ada gwang kerane mage nede ncu kam kedi tei helo,17kedanemene Ih n ziehi tei hemisüt beuzie nah herüt kedi ge peu zie, nah nang keheibe de teilo de kerangbe Ih tei zie. Cine keherei de gwang eh mina aidungde de a ziemne reset gailo.’”18Balaam keli eh Balak minadung dage ranggai, “Balak pe hegwangki rangkanggeu nah kecak le pui eh peu liede, Ih RAMPAUBE, a Tinggwang sam gi ka daulak, tei tsam de gailak nah tei kiee de gailak, pa ne acu rang kebeu de gwale.19Cine cu, keherei de heziu de kwa dailu, iciu de RAMPAUBE a da kerang Ih ci si luzie.”20Tinggwang tingmui Balaam da gwang nah pecu ranggai, “Mina aidungde ncu gwang qu kela nzwa, cuhlu delwe penuide nzang miecu. Dede Ih rang kebeu be rünne teilu.”21Balaam tingcang cuhlu, pe gada reu nghang lwe Moab muiteumedung de nzang gwang di.22Dede pa mie kela ziemne, Tinggwang pe rata cuhdi. RAMPAUBE gwame ge lampuiki ga swateu pwadi Balaam de ngau ngkau kelame ge nzwa, gada reu gade hebeu tei kelabe. Balaam pe ngkwetme hangna de ngngwa la.23Gada RAMPAUBE gwame ge kingtie pwalwe lampui ga sap kebam ngau di. Gada lampui gade nreu lwe luh lebie mie di. Balaam gada de dap eh lampui gage ngngwa cailigwang dailu.24Ge RAMPAUBE gwame ge lampui nrum kecu sau kubetsi luhdung kakga saplu, kirie pegu zetle nah pegu hile kebam ga saplu.25Gada RAMPAUBE gwame de ngau dai. Pa tangdeu gage tetgwa gai nah Balaam pi cide gage gimdi. Balaam gada pui de dap dai.26RAMPAUBE gwame tetsi pet nah heni kenrum keda ga ketlam de nreu gai kelak ga sap.27Gada RAMPAUBE gwame de ngau, nah pa Balaam kangga zeu di. Balaam pe rata cuhdi nah pa petuitie le gada de dap.28Ge RAMPAUBE maranglu kera gada mui ngkei beu. Pa Balaam dage ranggai, “Ih n dage daipai teigai eh nang acu pia cum dapno?”29Balaam gada de keli eh, “Cide au kedanemene nang a dage heramie tatei kegaine lie. Ih kingtie ge aba ga bamneu da. Ma gade bam liecai ncu cu teitsetdi eh bam zie da.”30Gada Balaam dade ranggai, “Ih ngu gada nang n teilung pelane a reuga tet eh henai kecang cang meni? Ih aipau dwa a zai aide bam eh cidungde madau gede n dage teigai ni?” Balaam rang, “Ma.”31Ge RAMPAUBE Balaam miak ngkei beu nah pa RAMPAUBE gwame lampui ga pe kingtie pwalwe sap kebam ngaudi. Balaam pe peu henamie nah pezu keumie di.32RAMPAUBE gwame pe dage ranggai, “Nang daitie n gada de pia cum dapno? Pielo, Ih au mige ncu ngau keraume ge eh n da gwangla kedanemene n tadung a dwa gade sia kecune.33Gada acu ngau nah piacum nreu tetdi. Magade pa a dade nreu tetdi mecai, Ih ncu teitsetdi bi zie da nah pe teilung kelibeu zie.”34Balaam RAMPAUBE gwame dage ranggai, “Ih kemau tei dida. Nang lampui ga acu ngaurau eh sap kebam Ih cima. Cine cu, magade cide nsui melie cai, Ih caili dizie.”35Dede RAMPAUBE gwame Balaam dage ranggai, “Minadung de ngngwa lwe gwang cu. Dede Ih samdung ncu rang kebeu de rünne nang rang maisia.” Cine Balaam Balak muiteumedung de nzang gwang di.36Balak Balaam gwangla lie kecu siulu ge, pa pecu redau kerane Moab ga namdi deurai ga kebam Arnon ga miedi.37Balak Balaam dage ranggai, “Ih minadung de n dage langgai meni ncu qu kerane? Nang daitei a da gwang meno? Ih ncu hetwaherüt peulu tadi ni?”38Ge Balaam Balak de keli eh, “Pielo, Ih n da gwang bam da. Ih cu ranglu kera magede kengking bam mi gah no? Ih au Tinggwang ne samdung a mui gage kai kebeube rünne rang lubui.”39Balaam Balak de nzang tetdi nah penui Kiriath Huzoth ga gwanglu.40Ge Balak hetumseu penai meurün le ratak teigai nah heteih kesa Balaam de nah muiteumedung pecu ngngwa kelame de peu.41Tingcang, Balak Balaam de Baal hangdeu kehu ga ngngwa hang. Cika de Balaam Israelmedung de penui ramzeuki ga tuge rünne ngau.
Bridge Connectivity Solutions Pvt. Ltd.