3 Куг4
1Соломон кугыжа пӱтынь Израильым вуйлатен шоген.2Теве тудын тӱҥ тӧраже-влак: Азарий, иерей Садокын эргыже,3тыгак Елихореф ден Ахий, Сиван эргыж-влак – возкалыше-шамыч; Иосафат, Ахилудын эргыже – курымсерышым возышо;4Ваней, Иодайын эргыже – сарзывуй; Садок ден Авиафар – иерей-влак;5Азарий, Нафанын эргыже – кундем вуйлатыше-влакын тӧрашт; Завуф, иерей Нафанын эргыже – кугыжан каҥашпуышыжо;6Ахисар – кугыжан полатым вуйлатыше да Адонирам, Авда эрге – ӧкым пашам вуйлатен шогышо.7Пӱтынь Израиль мучко Соломонын латкок кундем вуйлатышыже лийын. Нуно кугыжалан да тудын полатшылан кочкыш йӧрварым конден шогеныт. Кажныже ийлан ик тылзе кондеден.8Теве нунын лӱмышт. Бен-Хур Ефрем курыкышто вуйлатыше лийын,9Бен-Декер – Макацыште, Шаалвим ден Вефсамисыште, Елон ден Беф-Хананыште.10Бен-Хесед – Арюбофышто, Сохо да пӱтынь Хефер мландат тудынак лийын.11Бен-Авинадав пӱтынь Нафаф-Дорым вуйлатен. Соломонын Тафафь ӱдыржӧ тудын ватыже лийын.12Ваана, Ахилуд эрге, Фаанахын, Мегиддо да Беф-Сан ола воктенысе уло кундемын вуйлатышыже лийын. Беф-Санже Цартан воктене, Изреель деч ӱлнырак верланен. Тудо тиде ола деч Авел-Мехола марте, тыгак Иокмеам олан вес велныже вуйлатен.13Бен-Гевер – Галаадысе Рамофышто. Тудо Галаадысе Иаир яллам вуйлатен. Иаирже Манассийын эргыже лийын. Тудо тыгак Васаныште улшо Аргов кундемым вуйлатен, тушкыжо пырдыж дене авырыме да капкаштышт той тӱкылтыш улман кудло кугу ола пурен.14Ахинадав, Гиддо эрге, Маханаимыште вуйлатыше лийын,15Ахимаас – Неффалим мландыште, тудо Соломонын Васемафа ӱдыржым марлан налын.16Ваана, Хушай эрге – Асир мландыште да Валофышто;17Иосафат, Паруах эрге – Иссахар мландыште;18Шимей, Ела эрге – Вениамин мландыште.19Гевер, Урий эрге – Галаад мландыште, аморрей кугыжа Сигон ден Васан кугыжа Огын мландыштышт. Тудо нине мландын ик шкет вуйлатышыже лийын.20Иуда ден Израиль калык шотлен пытараш лийдыме теҥыз ошма пырче наре лийыныт. Нуно кочкын-йӱыныт, веселитленыт.21Чыла кугыжаныш-влак Евфрат эҥер деч филистим мланде марте да Египет чек марте Соломонын кид йымалныже лийыныт. Нине кугыжаныш-влак тудлан йозакым тӱленыт, Соломонын илыме кечылаштыже тудын тарзыже лийыныт.22Соломонын полатышкыже кажне кечын тыгай йӧрварым конден шогеныт: кумло кор эн сай ложашым да кудло кор моло тӱрлӧ ложашым,23лу вуй ӧрдыктарыме шолдыра вольыкым, кӱтӱ гыч коло вуй шолдыра вольыкым да шӱдӧ шорыкым. Тидын деч посна пӱчым, ирказам, косульым да ӧрдыктарыме кайык-влакым конденыт.24Вет тудо Евфрат деч касвелныла улшо пӱтынь мландын – Типсах гыч Газа марте – озаже, тыште улшо чыла кугыжан вуйлатышышт лийын. Йыр улшо чыла эл дене Соломон келшен илен.25Тудын илыме чыла кечылаште Иуда ден Израиль, Дан гыч Вирсавий марте, тыныслын иленыт – кажныже шке виноград ден смоква пушеҥгыже йымалне шинчен.26Соломонын имне вӱташтыже орван имне-влаклан нылле тӱжем кыдеж, кудалышт коштмо имне-шамычлан латкок тӱжем кыдеж лийын.27Нине кундем вуйлатыше-влак Соломон кугыжалан тудын полатышкыже кӱлеш кочкышым кажныже шке тылзыштыже конден шогеныт. Чылажат ситышын лийже манын, нуно эскереныт.28Имне ден мул-влаклан шож ден олымым кажныже, мыняр палемдыме лийын, вольык шогымо верыш конденыт.29Юмо Соломонлан мунлылыкым, кугу уш-акылым да кумдан шонен моштымашым теҥыз ошма пырче наре пуэн.30Соломонын мунлылыкшо чыла эрвел еҥ ден египтян-влакын мунлылыкышт деч кугурак лийын.31Тудо чыла еҥ деч – Езрах тукымысо Ефан дечат, Махолын Еман, Халкол да Дарда эргыж-влак дечат – мунлырак лийын. Йыр улшо чыла калык коклаште Соломонын лӱмжӧ чапланен.32Тудо туныктен каласыме кум тӱжем ойым шонен луктын, а мурыжо ик тӱжемат визыте лийын.33Тудо тыгак тӱрлӧ кушкыл нерген – Ливанысе кедр гыч тӱҥалын, пырдыж шелшыште кушшо иссоп марте – умылтарен каласкален. Эше изи ден кугу вольык-янлык, кайык да кол-влак нерген ойлен.34Соломонын мунлылыкшо нерген колшо чыла калык гыч, мландымбалысе чыла кугыжа деч еҥ-влак тудын мунлылыкшым колышташ толеденыт.
Institute for Bible Translation, Finland