3 Куг5
1Соломоным ачаж олмеш кугыжалан шӱрен палемдыме нерген колмеке, Тир кугыжа Хирам тудын деке шке тарзыж-влакым колтен. Давидын илыме чыла кечылаштыже Хирам тудын кугу йолташыже лийын улмаш.2Соломон Хирам деке тыге каласаш колтен:3«Тый палет, мыйын Давид ачам шке Господь Юмыжын лӱмжылан пӧртым чоҥен кертын огыл: йыр улшо калык-влакым Господьын ачамын йолжо йымак пыштымешкыже, тудлан нунын дене кредалашыже логалын.4Но кызыт Господь Юмем мылам чыла могырымат тынысым пӧлеклен: тушманат, нимогай лӱдыкшат уке.5Сандене мый Господь Юмемын лӱмжылан пӧртым чоҥынем. Вет Давид ачамлан Господь тыгак каласен: ”Тыйын эргыч, кудым Мый тый дечет вара престолышкет шындем, Мыйын лӱмемлан пӧртым чоҥа”.6Мыланем Ливанысе кедрым руышт манын, кӱштымашым пу. Тыйын еҥет-влак дене пырля мыйын еҥем-шамычат пашам ышташ тӱҥалыт. Тарзет-влакын пашаштлан могай акым каласет, тугайым тӱлаш тӱҥалам. Вет тый палет: Сидонышто илыше-влак семын пушеҥгым руэн моштышо еҥна-шамыч уке улыт».7Кунам Хирам Соломон деч тыгай мут-влакым колын, тудо пеш чот куанен да каласен: «Чапландарыме лийже тиде кечын Господь! Тиде шуко чотан калыкым вуйлаташ Тудо Давидлан мунло эргым пуэн!»8Хирам Соломон деке тыге каласаш колтен: «Могай йодмаш дене мый декем колтенат, чыла колышт нальым. Кедр ден кипарис пушеҥге-влак шотышто йодметым тӱрыснек шуктем.9Мыйын еҥем-шамыч пырням Ливан гыч теҥыз деке кондат. Тушечын мый нуным теҥыз вӱд дене тыйын каласыме верышкет намием. Тушто пырня-влакым рудем, да тый нуным налат. Но тыят мыйын йодмем шукто: пӧртемлан кочкыш йӧрварым пуэн шого».10Тыге Хирам Соломонлан мыняр кӱлеш, тунар кедр ден кипарис пырням колтеден.11А Соломон Хирамын пӧртшылан коло тӱжем кор шыдаҥым да кид дене темден лукмо коло кор олив ӱйым ий еда пуэн шоген.12Господь сӧрымыж семынак Соломонлан мунлылыкым пуэн. Хирам ден Соломон келшен иленыт, шке коклаштышт ойпидышым ыштеныт.13Соломон кугыжа пӱтынь Израиль мучко кумло тӱжем еҥым ӧкым пашаш кычкен.14Тудо нуным черет дене Ливаныш ик тылзылан лу тӱжем еҥ дене колтеден. Ик тылзе нуно Ливаныште лийыныт, кок тылзе – мӧҥгыштӧ. Нуным Адонирам вуйлатен шоген.15Курыклаште Соломонын кӱм нумалше шымле тӱжем еҥже да кӱм руышо кандашле тӱжем еҥже лийын.16Эше Соломонын кум тӱжемат кумшӱдӧ вуйлатышыже лийын, нуно чоҥымо пашам эскереныт да пашазе-влакым вуйлатен шогеныт.17Пӧрт негызлан тӧр руымо кӱм пышташ манын, кугыжа кугу, шерге кӱ-влакым кондаш кӱштен.18Нуным Соломон ден Хирамын пашазыже-шамыч да Гевал гыч улшо еҥ-влак кӱлеш семын руэныт. Пӧртым чоҥашлан чодыра ден кӱм [кум ий] ямдыленыт.
Institute for Bible Translation, Finland