3 Куг3
1Кунам Соломонын кидыштыже кугыжа кучемвий пеҥгыдемын, тудо Египет кугыжа дене, фараон дене, родо лийын – Соломон фараонын ӱдыржым марлан налын. Шке пӧртшым, тыгак Господьын пӧртшым да Иерусалим йыр пырдыжым чоҥен пытарымешке, тудо ватыжым Давид-Олашке илаш пуртен.2Господьын лӱмжылан пӧрт эше чоҥымо лийын огыл, сандене калык надырым ончычсо семынак кӱкшака-влак ӱмбалне конден.3Соломон Господьым йӧратен да Давид ачажын кӱштен кодымыж семын илен. Но тудат надырым кӱкшакаште конден, туштак тӱтыртышым йӱлалтен.4Надырым кондаш манын, кугыжа Гаваоныш каен. Тушто надырым кондымо тӱҥ кӱкшака лийын. Тушан Соломон тӱжем надырым йӱлалтен конден.5Гаваонышто йӱдым Соломонлан омешыже Господь кончен. Юмо тудлан каласен: «Йод, мо тылат кӱлеш».6Соломон вашештен: «Тый шке тарзетлан, мыйын Давид ачамлан, кугу порылыкым ончыктенат. Вет тудо Тыйын ончылнет ару шӱм-чон дене чын да ӱшанлын коштын. Тый тудлан поро кумылетым эре ончыктенат да, олмешыже престолышко шындаш манын, эргым пӧлекленат. Тидым ме таче ужына.7Кызыт, Господь Юмем, Давид ачам олмеш кугыжалан Тый мыйым, шке тарзетым, шогалтенат. Но мый пеш самырык улам, шке пашам кузе шуктен шогаш – ом пале.8А Тыйын тарзет йыр – Тыйын ойырен налме калыкет. Тиде шуко чотан калык, тудым шотлен лукташат ок лий.9Тыйын калыкетым вуйлаташ да поро ден осалым ойырен мошташ манын, шке тарзетлан кугу уш-акылым пу. Уке гын Тыйын тиде кугу калыкетым кӧ вуйлатен кертеш?»10Соломонын йодмыжо Господьлан келшен.11Юмо тудлан каласен: «Тый шкаланет кужу ӱмырым, поянлыкым, тушманет-влакын чоныштым огыл, а судитлыме да вуйлатыме пашаште уш-акылым йодынат.12Сандене Мый йодметым шуктем, тылат мунло да умылен моштышо шӱмым пуэм: Тый дечет ончыч тыйын гае нигӧ лийын огыл, тый дечет варат тыйын гае нигӧ ок лий.13Тыгак Мый тыланет мом йодын отыл, тудымат пуэм: тиде – поянлык ден чап. Тыйын илыме кечылаште кугыжа-влак коклаште тыйын гае нигӧ ок лий.14Тый Давид ачат семынак Мыйын корнем дене кошташ да Мыйын пунчал ден кӱштымаш-влакем шукташ тӱҥалат гын, Мый тылат кужу ӱмырым пуэм».15Соломон помыжалтын да тиде омо лиймым умылен. Тудо Иерусалимыш каен, Господьын ойпидыш шондыкшо ончылно [улшо жертвенник ончыко] шогалын да йӱлалтен пуымо надыр ден татулык надырым конден, вара шке тарзыж-влаклан кугу сийым ыштен.16Тидын деч вара кугыжа деке кок яжар ӱдырамаш толын да тудын ончыко шогалын.17Иктыже каласен: «Мыйын озам! Ме тиде ӱдырамаш дене ик пӧртыштӧ илена. Мыйын азам ыштымем годым тудо пӧртыштак лийын.18Мыйын азам ыштымем деч вара кумшо кечынже тудат азам ыштен. Пӧртыштӧ ме коктын гына лийынна, тетла нигӧ лийын огыл.19Йӱдым тиде ӱдырамашын эргыже колен, тудо азажым малышыжла пызырен пуштын.20Тудо пелйӱдым кынелын да мый дечем эргым налын. Тунам мые, тыйын тарзет, маленам. Тудо мыйын эргым шке оҥжо дек пыштен, а шке колышо азажым мыйын оҥем дек вераҥден.21Эрдене мый эргым пукшаш кынелынам, а тудо колышо. А кунам волгыжалтын, йочам сайынрак ончалынам да умыленам: тиде мыйын ыштыме азам огыл».22«Уке, – манын вес ӱдырамашыже, – тиде мыйын эргым илыше, а колышыжо тыйын!» А икымшыже ойлен: «Уке, тиде тыйын эргыч колышо, а мыйын илыше!» Тыге нуно кугыжа ончылно ӱчашеныт.23Кугыжа каласен: «Иктыже ойла: ”Мыйын эргым илыше, а тыйын колышо”, весыже ойла: ”Уке, тыйын эргыч колышо, а мыйын илыше”».24Вара манын: «Кондыза мылам кердым». Кердым конденыт.25«Илыше йочам пелыгыч руалза, – кӱштен кугыжа, – ик пелыжым иктыжлан, весыжым весыжлан пуыза».26Тунам ӱдырамаш, кудыжо илыше йочан аваже лийын, чытырналт каен. Эргыжым чаманен, тудо кугыжам сӧрвален: «Мыйын озам, пуыза тудлан йочам! Ида пушт тудым!» А весыже каласен: «Руалза – тек мыламат, тылатат огеш лий».27Кугыжа каласен: «Йочам ида пушт, тудым икымше ӱдырамашлан пуыза. Тудо – йочан аваже».28Кугыжан тиде йодышлан могай пунчалым лукмыж нерген пӱтынь Израиль пален налын. Калык умылен: судитлыме пашаште кугыжалан Юмо деч мунлылык пуалтын, да нуно кугыжам пагалаш тӱҥалыныт.
Institute for Bible Translation, Finland