Leviticus26
1तूँ नऽ कोई मूर्ति बनईहऽ, आउर न कोई खोदल मूर्ति चाहे पवित्र पत्थर के खम्भा खड़ा करिहऽ, आउर जौन देश में तूँ दण्डवत करऽ हऽ ओकरा में कोई खोदल गेल पत्थर के मूर्ति न रखे के चाही काहेकि हम तोर परमेश्वर यहोवा ही।2तूँ हमर विश्रामदिन के पालन करिहऽ, आउर हमर पवित्रस्थान के भय मानल करिहऽ। हम यहोवा ही।3जदि तूँ हमर व्यवस्था पर चलवऽ, आउर हमर आज्ञा के मानवऽ, आउर ओकर पालन करवऽ,4तऽ हम तोरा लागी सही समय पर बरसा बरसायेम; जमीन अपन अनाज उपजावत, आउर मैदान के पेड़ अपन फल फरत।5तूँ दाख के तोड़े घड़ी तक दावनी करते रहव, आउर अंगूर के फसल बुने के समय तक चलते रहत। तूँ पेट भर रोटी खईबऽ, आउर जौन जमीन मे अपन घर बनईबऽ, उहाँ सुरक्षित होके रहबऽ।6हम तोर देश में शांति देम; तूँ बेगर कोई डर-भय के सूतल रहबऽ। हम खूँखार जनावर के देश से दूर कर देम आउर तलवार तोर देश में नऽ चलत।7तूँ अपन दुश्मन के पीछा करबऽ, आउर ऊ तलवार से तोर आगे से गिर पड़त।8तोरा में से पांचगो आदमी सौ के, आउर सौ आदमी, दस हजार के खदेड़ देतन, तोर दुश्मन तोरा सामने तलवार से मारल जायत।9हम तोरा पर कृपा भरल नजर करम, आउर तोरा फलवन्त बनायेम आउर तोरा बढ़ायेम; हम तोरा साथे अपन वाचा पूरा करम।10तूँ बहुत दिन से रखल अनाज खईबऽ। तोरा जमा अनाज बाहर लावे पड़त काहेकि तोर नया फसल लागी जगह के जरुरत पड़त।11हम अपन तम्बू तोरा बीच में गाड़म, आउर तोरा से घिरना न मानम।12हम तोरा बीच में चलम, आउर तोर परमेश्वर ठहरम आउर तूँ हमर प्रजा ठहरबऽ।13हम तोर परमेश्वर यहोवा ही, जौन तोरा मिस्र देश से निकाल के लईली हे, कि तूँ ओकर दास नऽ बनऽ। हम तोर जूआ के बेड़ियन के तोड़ देली हे, आउर तोरा सीधा खड़ा होके चले ला मजबूर कईली हे।14बाकि जदि तूँ हमर नऽ सुनबऽ आउर ई सभे आज्ञा के नऽ मानवऽ,15आउर हमर विधियन के तुच्छ जानवऽ, आउर हमर व्यवस्था से घिरना मानवऽ, ईहाँ तक कि हमर सभे आज्ञा के नऽ मानवऽ, एकर बदले हमर वाचा के तोड़ देबऽ।16जदि तूँ अईसन काम करबऽ, तऽ हम तोरा साथे अईसन करम: मतलब कि हम तोरा दुखी कर देम, आउर रोग आउर बुखार फैलायेम जे तोर आँख के आंधर कर देत, आउर तोर जान के भी ले लेत। तूँ अपन बीज बेकार में बुनवऽ, काहेकि तोर दुश्मन ऊ अनाज के खा जईतन।17हम तोर खिलाफ हो जायेम, आउर तोर दुश्मन तोरा पर भारी पड़ जईतन। आउर जौन आदमी तोरा से दुश्मनी करऽ हथिन, ऊ तोरा पर अधिकार कर लेतन, आउर तूँ बेगर दुसमन के पीछा कईले भाग जईबऽ।18जदि एकर बाद भी तूँ हमर नऽ सुनबऽ तऽ हम तोर पाप के सात गुना कड़ा सजा देम।19हम तोर बल के घमण्ड तोड़ देम। हम तोरा उपरे के आसमान के लोहा के जइसन आउर तोर जमीन के पीतल के जईसन बना देम।20तोर ताकत पूरा बेकार हो जायेत, काहेकि तोर जमीन अपन उपज न देत, आउर तोर पेड़ अपन फल न देत।21जदि तूँ हमरा खिलाफ चलबऽ आउर हमर न सुनबऽ तऽ हम तोर पाप मुताबिक तोरा पर सात गुना जादे दुःख देम।22हम तोरा खिलाफ खूँखार जनावर भेजम, जौन तोर बच्चा के चुरा लेत, तोर जनावर के खतम के देत आउर तोर गिनती घटा देम। तऽ तोर सड़क सुनसान हो जायेत।23जदि एकर बाद भी तूँ हमर ताड़ना नऽ मानवऽ, आउर हमर खिलाफ मे चलते रहबऽ,24तऽ हम भी तोर खिलाफ में चलम, आउर हम तोर अपन पाप के तोरा सात गुना दण्ड देम।25हम तोरा पर तलवार चलवायेम, जौन वाचा तोड़े के बदला लेत। तूँ अपन नगर में एक जगह करल जईबऽ, आउर उहाँ हम तोर बीच में रोग भेजम, आउर तूँ अपन दुश्मन के बस में कर देबल जईबऽ।26जखनी हम तोर भोजन के चीज घटा देम, तखनी दसगो औरतियन एक्के गो तावा में तोर रोटी पकइतन, आउर ऊ तोहनी के रोटी तौलके बाँट देतन। तूँ खईबऽ मगर संतोष नऽ होत,27जदि तूँ ई बतियन के बाद भी हमर नऽ मानवऽ, बलुक हमर खिलाफ चलते रहवऽ।28तऽ हम गुस्सा में आके तोर खिलाफ चलम, आउर तोर पाप लागी तोरा सात गुना जादे सजा देम।29तोर भूख एतना होत कि तूँ अपन बेटा के मांस खईबऽ; तूँ अपन बेटियन के मांस खईबऽ30हम तोर ऊँचा जगाहियन के ढाह देम, आउर तोर धूप जलावे वाला वेदी के काट देम, आउर तोर लाश के तोहनी के मूर्तियन पर फेंक देम, आउर हम खुद ही तोरा से घिरना मानम।31हम तोर नगर के खंडहर में बदल देम, आउर तोर मूर्तिपूजा पवित्रस्थान के नाश कर देम। हम तोर प्रसाद के सुखदायक खुशबू से खुश न रहम।32हम देश के उजाड़ कर देम। तोर दुश्मन जे उहाँ रहतन ऊ विनाश से अचरज रह जइतन।33हम तोरा जाति-जाति के बीच मे तितर-बितर कर देम, आउर हम अपन तलवार खींच के तोर पीछे हो लेम। तोहनी के जमीन उजाड़ देवल जायेत, आउर तोहनी के नगर बर्बाद कर देवल जायेत।34तऽ जब ला ऊ देश उजाड़ पड़ल रहत, आउर तूँ अपन दुश्मन के देश मे रहबऽ, तब ला ऊ अपन विश्रामदिन के मानते रहतन। ऊ समय के दौरान, देश आराम पावत आउर अपन विश्रामदिन के आनन्द उठावत।35जब ला ऊ सूना पड़ल रहतन, तब ला ओकरा विश्राम मिलत, ऊ विश्राम जे ओकरा तोहनी सब्त दिन में भी न मिलल हल, जखनी तोहनी ओकरा मे रहऽ हलऽ।36तोहनी में से जे कोई अपन दुश्मन के देश मे बचल रह गेलऽ हे, हम तोर मन मे डर पैदा करम, कि हवा से डोले वाला पत्ता के आवाज से भी तूँ डेरा जईवऽ, आउर तूँ अईसे भाग जईबऽ जईसे तूँ तलवार से भाग रहलऽ हे। तूँ तखनियों गिर पड़वऽ जखनी कोई तोर पीछा नऽ कर रहल होत।37तूँ एक दोसरा से अईसन ठोकर खईबऽ जईसे कि तूँ तलवार से भाग रहलऽ हे, भले ही कोई तोर पीछा न कर रहलन होत। तोरा में दुश्मन भीर खड़ा होवेला कोई शक्ति न रहत।38तूँ जातियन मे नाश हो जईबऽ, आउर तोर दुश्मन के देश तोरा दफनावल जाई।39जौन तोहनी के बीच में बचल रह गेल हे, ऊ अपन के पाप मे, आउर उहाँ तोर दुश्मन के देश मे नाश हो जईतन, आउर अपन पुरखा के पाप के कारण भी नाश हो जईतन।40तईयो जदि ऊ अपन आउर अपन पाप आउर अपन पुरखन के पाप के मान लेतन, आउर अपन ऊ पाप के, जेकरा से ओखनी हमरा साथे विश्वासघात कईलन हे, आउर हमर खिलाफ अपन कईल गेल व्यवहार के भी मान लेतन,41जौन हमरा उनका खिलाफ कर देलक हे, आउर हम उनका उनकर दुश्मन के देश में ले अईली हे, आउर जदि उनकर खतनारहित आउर जिद्दी मन दीन हो जायेत, आउर अपन पाप के सजा के मान लेतन। 42तऽ हम याकूब के साथ अपन वाचा, इसहाक के साथे अपन वाचा, आउर अब्राहम के साथे अपन वाचा के याद करम; हम देश के भी याद करम।43देश ओकर वजह से वीरान हो जायेत, येहिसे जब ऊ ओकर बिना वीरान पड़ल रहत, तब ऊ अपन विश्रामदिन से खुश रहतन। उनका अपन पाप के सजा भुगते पड़त, काहेकि ऊ खुद ही हमर विधियन के इनकार कईलक, आउर हमर व्यवस्था से घिरना कईलक।44तईयो ई सब के होते भर में भी जब ऊ अपन दुश्मन के देश में होतन, तऽ हम उनका नऽ छोड़म, आउर नऽ उनका से अईसन घिन मानम कि ओकरा बर्बाद कर देम, आउर जे वाचा उनका से बान्धली हे ओकरा तोड़ देम, काहेकि हम उनकर परमेश्वर यहोवा ही।45“बाकि उनकर लागी हम उनकर पुरखावन के जौरे बान्धल वाचा के याद करम, जिनका हम अन्यजातियन के सामने से मिस्र देश से निकाल लईली हे, कि हम उनकर परमेश्वर ठहरम। हम यहोवा ही।”46जौन आज्ञा, नियम, आउर व्यवस्था यहोवा सीनै पर्वत पर मूसा के द्वारा अपन आउर इस्राएलियन के बीच में बनईलन हल, ऊ येहि हे।
Bridge Connectivity Solutions Pvt. Ltd.