Leviticus25
1यहोवा सीनै पर्वत पर मूसा से कहलन2इस्राएल के लोग से कहऽ, जखनी तूँ कनान देश में पहुँचवऽ जे हम तोरा दे ही, तऽ ऊ देश में यहोवा लागी विश्रामदिन मनईहऽ। 3तोहनी छौ साल ला अपन खेत में बीज बुनिहऽ, आउर छौ साल तोहनी अपन खेत के दाख के बारी के कटनी करिहऽ आउर उपज जमा करिहऽ।4बाकि सातवाँ साल में, देश लागी विश्रामदिन, मतलब कि यहोवा लागी विश्रामदिन मानल जाय। तोहनी के अपन खेत में न बुने के चाही, चाहे अपन अंगूर के बगीचा के छँटाई नऽ करे के चाही।5कटनी के बाध जौन कुछ अपने आप उपज हे, ओकर तोहनी के नऽ काटे के चाही, आउर तोहनी के अपन बिन छाँटल दाखलता पर जे पर भी अंगूर फरल हे, ओकरा भी एक जौरे फसल न काटे के चाही। ई देश ला विश्राम के साल होवत।6सब्त के साल में जे कुछ भी बिन मेहनत कईले भूमि से उपजल हे, ऊ तोरा लागी भोजन होवत। तूँ, तोर दास आउर दासी, तोर भाड़ा के नौकर चाकर, आउर तोर साथे रहे वाला परदेशी, भोजन जमा कर सकलन हे।7आउर तोहनी के जनावर आउर जंगली जनावर भी जमीन के उपज खा सकलन हे।8तोरा सात-सातगो विश्राम के साल मतलब कि, सात गुना साल के सात साल गिन लिहऽ, तऽ सातगो विश्राम साल होवत, कुल मिला के उनचास साल होवत।9ओकर बाद सातवाँ महीना के दसवां दिन के सभे जगह पर जोर-जोर से नरसिंगा फूकिहऽ। पछतावा के दिन तोरा अपन सभे देश में तुरही फूँके के चाही।10पचासवाँ साल ला यहोवा लागी पवित्र करिहऽ, आउर पूरा देश के सभे बासिन्दा लागी आजादी के प्रचार करिहऽ। ई तोरा लागी एगो समारोह होवत, जेकरा में धन-दौलत आउर दास के ओकर परिवार के लौटा देवे पड़त।11पचासवाँ साल तोहनी लागी जुबली के साल होत। तोहनी के एक साथे फसल नऽ बुने के चाही, चाहे ओकरा नऽ काटे के चाही। जौन कुछ खुद उपजऽ हे, ओकरा खईहऽ, आउर जौन अंगूर बेगर काटल गेल लत्ता पर फरऽ हे ओकरा जमा करिहऽ।12काहेकि ई एगो जुबली साल हे, जौन तोहनी लागी पवित्र ठहरत। तोरा खेत के अपने आप उपजे वाला अनाज खाय के चाही।13तोर ई जुबली साल में सभे कोई के ओकरा अपन सम्पति लौटावे पड़त।14जदि तूँ अपन पड़ोसी के कोई जमीन बेचऽ हऽ, चाहे अपन पड़ोसी से कोई जमीन खरीदऽ हऽ तऽ तोहनी के एक-दोसर के धोखा चाहे, नाइंसाफी नऽ करे के चाही।15जदि तोरा अपन पड़ोसी से जमीन मोल खरीदे ला हे, तऽ अगला जुबली साल ला केतना साल आउर फसल के कटाई करल जा सकल हे, एकरा पर विचार करिहऽ। जमीन बेचेवाला तोर पड़ोसी के भी एकरा पर विचार करे के चाही।16अगला जुबली तक जेतना जादे साल होवत, जमीन के दाम ओतने जादे बढ़ जायेत, आउर अगला जुबली ला जेतना कम साल होवत, ओकरा में जमीन के दाम ओतने ही घट जायेत, काहेकि नया मालिक लागी जमीन में पैदा होवल फसल के गिनती से, अगला साल जुबली के पहिले के गिनती जुड़ल हे।17तोहनी के एक दोसर साथे धोखा नऽ दिहऽ चाहे एक दोसर पर अत्याचार नऽ करिहऽ, अईसे कर के तूँ अपन परमेश्वर के भय मानल करिहऽ, काहेकि हम तोर परमेश्वर यहोवा ही।18येहिसे तोरा हमर विधि के पालन करे के चाही, हमर नियम के पालन करे के चाही, तऽ तूँ धरती पर सुरक्षित रूप से होके रहबऽ।19जमीन अपन अनाज उपजावत, आउर तूँ पेट भर के खईबऽ, आउर उहाँ सुरक्षित रूप से होके बसल रहबऽ।20तूँ कहऽ सकलऽ हे, “सातवाँ साल हम कौची खायेम? देखऽ, हम अपन अनाज के नऽ तऽ बुन सकली हे आउर नऽ ही जमा कर सकली हे।”21हम तोरा अईसन आशीष देम कि छठा साल में तोरा पर आवे वाला आशीष आवत, आउर ओकरा से तीन साल ला बड़ी जादे अनाज होत।22तोहनी आठवाँ साल में फसल रोपवऽ आउर पिछला साल के सभे उपज आउर जमा भोजन में से खइते रहबऽ, जब ला नौवाँ साल के फसल नऽ आ जायेत, तब ला तूँ पिछला साल के भण्डार में से खा सकलऽ हे।23जमीन कोई नया स्थाई मालिक के नऽ बेचिहऽ, काहेकि ऊ जमीन हमर हे। तोहनी सभे परदेशी आउर हमर जमीन पर अस्थाई निवासी हऽ।24तोरा ऊ सभे जमीन के छुटकारा के अधिकार के पालन करे के चाही जौन तूँ अर्जित कईलऽ हे, तोरा ऊ परिवार के जमीन वापिस खरीदे के इजाजत देवे पड़त जेकरा से तूँ एकरा खरीद लऽ हे।25जदि तोर पड़ोसी इस्राएली में से कोई गरीब रहतन आउर ओही कारण से अपन कुछ सम्पति बेच देतन, तऽ ओकरा भीर के रिश्तेदार आ सकलन हे आउर ऊ सम्पति छोड़ा सकलन हे जौन ऊ तोरा बेचलन हल।26जदि कोई आदमी भीर ओकर सम्पति छोड़ावे लागी कोई रिश्तेदार नऽ हे, बाकि जदि ऊ दौलतमन्द हे आउर ओकरा छोड़ावे के क्षमता रखऽ हे,27तऽ ऊ जमीन बीके के बाद के साल के हिसाब लगईतन, आउर बचल धन ऊ आदमी के लौटा दऽ जेकरा ऊ जमीन बेचलन हे। तऽ ऊ अपन सम्पति में वापस लौटा सकलन हे।28बाकि जदि ऊ जमीन अपना लागी नऽ ले सकतन, तऽ जौन जमीन ऊ बेचलन हे, ऊ जुबली साल तक मोल लेवे वाला के अधिकार में बनल रहत, जुबली के साल में जमीन बेचेवाला के आउर मूल मालिक के ओकर जमीन लौटा देवल जायत।29जदि कोई आदमी चारदीवारी वाला शहर में अपन घर बेचऽ हे, तऽ ऊ बेचला के बाद पूरा एक साल के भीतर ओकरा वापिस खरीद सकलन हे। पूरा एक साल लागी ओकरा छोड़ावे के अधिकार होत।30जदि पूरा एक साल के भीतर ऊ घर नऽ छोड़ावल जायेत, तऽ शहरपनाह वाला नगर के मकान खरीददार आउर ओकर वंशज के स्थाई सम्पति बन जायेत। एकरा जुबली साल में वापिस नऽ करल जाय के चाही।31बाकि गाँव के जौन घर के चारो दने कोई शहरपनाह नऽ हे, ऊ जमीन खेत के तरह समझल जायेत। ओकरा छोड़ावल जा सकल हे, आउर ओकरा जुबली साल के दौरान लौटावल जाय के चाही।32बाकि लेवियन के, जौन घर ओकर नगरवन में हे, ऊ कखनियो भी छोड़ावल जा सकल हे।33जदि लेवियन में से कोई अपन बेचल घर नऽ छोड़इतन, तऽ जौन घर ऊ नगर में जहां मौजूद हे, बेच देवल जाय, ऊ जुबली साल में लौटा देवल जायत, काहेकि लेवियन के नगरवन के घर ओकर अपन जमीन में हे। इस्राएली के संम्पति हे।34बाकि ओखनी के नगरवन के आस पास के खेत नऽ बेचल जा सकल हे, काहेकि ऊ लेवियन के स्थाई सम्पति हे।35जदि तोर संगी देशवासी कंगाल हो जइतन, आउर फिन ऊ अपन भरण पोषण नऽ कर सकतन, तऽ तूँ ओकर ओही तरह से मदत करिहऽ, जईसे तूँ अपन कोई परदेशी, चाहे अपन बीच परदेशी होके रहे वाला कोई दोसर आदमी के मदत करऽ हल।36ओकरा से ब्याज नऽ लिहऽ, आउर नऽ कोई तरीका से ओकरा से लाभ उठावे के कोशिश करिहऽ, बाकि अपन परमेश्वर के भय मानल करिहऽ, जेकरा से तोर भाई जिन्दा रहतन।37आउर तूँ ओकरा पईसा नऽ दिहऽ, आउर नऽ शूद लिहऽ, आउर नऽ फायदा कमाय लागी ओकरा अपन अनाज बेचिहऽ।38हम तोर परमेश्वर यहोवा ही, जे तोरा मिस्र देश से ई लागी निकाल के लईली हे कि कनान देश तोहनी के दे देम आउर तोहनी के परमेश्वर ठहरम।39जदि तोर भाई बन्धु कंगाल हो गेल हे, आउर खुद के तोहनी के हाथ में बेच देलक हे, तऽ तोहनी ओकरा से दास के काम नऽ करवईहऽ।40ओकर साथे मजदूर के समान व्यवहार करिहऽ। ऊ तोर साथे अस्थायी आदमी जईसन रहे वाला होवे के चाही। ऊ जुबली साल तक तोरा साथे सेवा करतन।41तऽ ऊ अपन बाल-बच्चा समेत तोरा भीर से चल जइतन आउर अपन कुल आउर अपन पुरखा के अपन निज धरती पर लौट जईतन।42काहेकि ई हमर दास हे, जेकरा हम मिस्र देश से निकाल लईली हे। ओखनी के गुलाम के रूप में नऽ बेचिहऽ।43तोरा ओखनी पर कड़ाई से शासन नऽ करे के चाही, बाकि तोरा अपन परमेश्वर के भय माने के चाही।44जहाँ ला तोर दास-दासियन के बात हे, ओकरा तूँ अपन चारो दने रहे वाला गैर इस्राएली से मोल ले सकल हे, तूँ ओकरा से दास मोल ले लिहऽ।45तूँ ऊ परदेशियन से भी दास खरीद सकल हे, जौन तोहनी के बीच में रह रहलन हे, मतलब कि ओकर परिवार से जे तोहनी के साथ हे, आउर जे बाल-बच्चा तोर देश में पैदा होल हे। ऊ तोर सम्पति बन सकल हे।46आउर तूँ अपन अईसन दास के अपन बाद के अपन वंश के निज भाग कर के दिहऽ, आउर ओकरा सम्पति मान के रखिहऽ, आउर ओखनी के जिन्दगी भर लागी दास बना के सेवा करबईहऽ, बाकि इस्राएलियन में से अपन भईवन पर कड़ाई से शासन नऽ करिहऽ।47जदि कोई परदेशी चाहे तोर साथे अस्थायी रूप से रहे वाला धनवान हो गेल हे, आउर तोर साथी इस्राएलियन में से कोई कंगाल हो गेल हे, आउर अपने आप के ऊ परदेशी चाहे परदेशी के कुल-परिवार में कोई के हाथ बेच देतन,48आउर तोर साथी इस्राएली मोल लेवल जाय, ओकरा परिवार में से कोई आदमी ओकरा छोड़ा सकल हे।49ई ऊ आदमी के चाचा हो सकल हे, चाहे ओकर चाचा के बेटा, जौन ओकरा छोड़ावऽ हे, चाहे कोई भी जौन ओकर परिवार से ओकर करीबी रिश्तेदार हे। आउर जदि ऊ दौलतमन्द हो गेल हे, तऽ ऊ खुद के छुड़ा सकल हे।50ओकरा ऊ आदमी जौरे सौदा करे के चाही जौन ओकरा खरीदलन हे; ओकरा ऊ साल से लेकर जुबली साल ला साल के गिने के चाही, जखनी ऊ खुद खरीददार के बेच देलन हल। ओकर छुटकारा के कीमत, एगो किराया के दास के देवल गेल कीमत के ध्यान में रखे के लगावल जाय के चाही, जेतना साल लागी ऊ ओकरा खरीदे वाला काम कर सकल हे।51जदि जुबली के साल होवे में ढेर साल रह गेल हे, तऽ ऊ अपन छुटकारा लागी ऊ साल के गिनती के मुताबिक ओतना धन लौटा देतन।52जदि जुबली साल के कुछ ही साल बाकी बच गेल हे, तऽ ऊ जुबली के साल के बाकी बचल साल के गिनती के मुताबिक अपन मोल लेवे वाला से मोल भाव करतन, आउर जेतना साल बचल हे ओकर मुताबिक ऊ अपन छोड़ावल गेल के दाम चुकईतन।53आउर ओकरा साथे हर साल काम पर रखल गेल आदमी के जईसन व्यवहार करल जाय। तोरा ई तय करे पड़त कि ओकरा साथे कड़ाय से व्यवहार नऽ करल जाइ। 54आउर जदि कोई इस्राएली भाई जे अपने आप के कोई धनवान आदमी के हाँथ में बेच देलन होई, आउर एकरा में से कोई रीती से अपने आप के छोड़ावे लगी दाम देवे में असमर्थ नऽ होतन, तऽ ऊ आउर उनकर बाल-बच्चा वालन के जुबली साल में छोड़ावल जाई।55इस्राएल के लोग हमर दास हे। ऊ हमर सेवक हे, जेकरा हम मिस्र देश से निकाल लईली हे। हम तोर परमेश्वर यहोवा ही।
Bridge Connectivity Solutions Pvt. Ltd.