1 Ximotoosi'a4
Dhariyye Barachchiisalluwwa
1Woyyichchi Hafuuri ifiseexxi, «Udumike barro'n mitti mitti manni dedhisaaka hafuuruwwanna fuggichcha hafuurixxa barachchiisa hordofati amana ifixxa waakataan» hiyyaan.2Iitta hexxeexxi barachchiisa daggaaki eebake sibilijinni sammo insa'nexxi gubende'eechishsha diilloote'eeke ifi uggudhallo dharichcha manninaa'niten.3Iitta hedheeki manni aadha heeruma hoyyaan; amanaakinna dhugaa ege'neek manni galateefatati itaashsha Mageni dadeechcho indabaashsha ajajaan.4Mageni dedechchi huunichchinna elochcho kademmaxxe galateefatati adhdhineexxe kaddoole hunemaachchi mittichchinna hedhebaan.5Kunichchiir Hiyyichcho Magenikenninna soodachchoti woyyome'eechchon.Kiristoosike Eloke Erganjo Kada
6Tenne barachcho amaagne dayyuwwa'n qalbeeffachchiisottole, amanatika hiyyichcho'ninna adhdhiteettexxe eloxxe barachcho'ni ijaarendetexxi, Yessuusi Kiristoosike eloke erganjo kaddaton.7Yaane kinni horroondabaaxxe Mageno magenooffachcho ise'n hexxeebaaxxe melaalle geedhexxa xingo labbaaxxe yaanenaa'ni bayyaat! Tenne irra Mageno labbattoshsha ifi leenjisi;8Biso ifika maaliinxe yaane'a leenjisatixxi la'o heenoxxen; umo ifika Mageno fakkatatee ifi leenjisa kinni ta'axxeenna kaddo'o hegerixxe hedho'a adde affeexxe duuchchiinxe yaane'a la'o affaan.9Kunni hiyyichchinna manji duuchchi adhdha hasisaake dhugaatike hiyyichchon.10Tenne alfatee eloonnaannen; kurb hinnaannenni; tinninna manjo duuchcha giddii'ninni amaanaakara anjiraaka hedhaaka Mageno addantaannaxxeeten.11Tenne yaanuwwara ajaaji, barisiisi!12Dargaggeesumma atixxa ayyinna tuffatoqqe'e; tenne irra amanaake manni'a haaso'iki, galdumiki, jaalalati, amanatinna luqqinnik eloke fakkeenna kadi!13Ani dagaanno qico'n woyyichcha borreessuwwa haasseessate'n, gorsa uwwate'ninna barachchiisate'n si'i.14Geedhe anga ifixxa ati hana uggitee wodda raagik ati'aa uwwendeexxa badhaadhiinxa uwwa gagga'mi hitoxxe'e.15Atika nophphichcho manni duuchchi uudaashsha tenne yaanuwwa hedi, tennee yaanuwwa'n siitetexxi isee muuxi.16Umo atikeenna barachchiisa atixxee ifi heqqedhdhi; tenne yaanuwwa'ninna si'i; tennee yaanuwwa assittottole umo atikanna atenaa'ni laqammakaranna anjirtatton.The Word for the World International