1 Ximotoosi'a3
Mageniinxe Tuutaka Akeekisanjo
1«Ayyinna Ephisi qophphoosumma hasoole, eloxxa huje halchaani.» hiyyaak hiyyichchi amaneme'eeken.2Tennexxee Mageniixxe tuuta'a ephisi qophphoosi kadaak manji, komatemabaake, mitte areke aro'oo, danate'n hedheeke, Ifi hiraake, seerik hedhaake, keessumma adhdhaake, barisiisa dande'ake,3Machcho'abaake, lolemabaake yaane kinni siggaa, moromabaake, maalaqqa eeyyabaake kada hasissaan.4Ifika mini hado elo qico galchedha dande'aake, oose isixxi isi'a ajajenda'neeke manjo kada hasissaan.5Mitti manji mine ifinga galchatee dande'abaake kadoole; Mageniinxa tuuta hitta galcha dande'aa?6Yaane kinni hollati ufuufemeexxi durrisi ibeemmaxxe murte'n ibabaashsha reefixxe amaanye kadoqqe'e.7Iittanni komateme'e durrisiinxe fonxoro'ni ibabaashsha amanebaake manni gami'ninna eloka summa afeeke manjo kada hasissaan.Daaqonummatixxee'e
8Iittanni daaqonnuwwanna ulfeesendeexxe, lame afo'o haasotabaaxxe, lumoxxa woyinetixxa booka halchitabaaxxe; seeribeloxxa la'o hordofabaake manna kada hasissaan.9Iittanni amanatixxa buqo yaane ca'ichchi wodaninni heqedhdhake manna kadiyyote hasissaan.10Insa'nenna edinseexxi hega uudemmowwaali; ookkonneechchi uduma insa'ne'ni komachchiisaaxxi yaane afema gophpheexxe kaddoole daaqonnummatixxa huje hunjjowwaal.11Iitanni aruwwa insa'neexxi ulfesendeexxe, hamattabaaxxe, danati hexxaxxeenna duuchchiinxe yaanenni addatendeexxe kadiyyote hasissaan.12Mitti mittingi daaqontichchi, mitte mitte areke aro'o kada hasissaan; iittanni oose ifixxanna ifika mini hado elo qico galchedhaake kada hasissaan.13Seerik ergatendeexxi daaqonee umo ifikee lumoka ulfinna, Yessuusi Kiristtoosi'ni affeexxe amana'ni afo'o wo'miteexxi haaso'atixxa hunna alfitaan.Mageno Fakkaatatixxa Buqo Yaane
14Atiba rake dagatee adde afeennexxe kadoolenna konnechchi butta hedheeka ajaja ati'aa borreessaannen.15Turennexxe kadoolenna manni Mageniinke mine'n hitta hedha hasissaaxxa egendattoshaten. Kunni mininna hedhaake Mageniinxe tuutan; tinninna dhuggaatike utuphanna booson.16Mageno fakkatatixxi buqo yaane mitte mami belo lumoxxen;Isinna manjoke kade ifisemeeke,dhugaalessumma isixxi Hafuurik kokeessendeeke,Erganate'n leelleeke,gosa gosake arda'n lallabemeeke,Buttate'n hedheeke manna'n addatemeeke,ulfinkinna iimi'a me'eeke.The Word for the World International