1 Ximotoosi'a5

Aro'o Shi'witeexxe Melaallexxee Uwwemmeeka Gorsa

1Woggati ati'aa lumoke kadeeka manjo atike annishsha assitetexxi gorsi malee'e mee xixi; labbaxxa dargaggeeyye, atike dayyuwwishsha,2Geedhee melaalle, ama atixxishsha assitetexxi uudi; iittanni oossite dubarte, dayyuwwa atixxishsha wo'ma luqqinninni insa'nee uudi.
3Aro'o shi'witteexxa dhugaatixxa hiyyeteera gargaar.4Hiini aro'o shi'witteexxi hiyyeette manjo oose yookaan oosetixxa oose afeexxe kaddoole tinni oose ediseexxi ifike mine'n Mageno fakkaata leellishate kaddo'a ifike hadi'a galata hiissa barattowaal; tinni Mageno gammachchiisaaxxe yaanen.5Aro'o shi'witeexxi dhugaatixxe hiyyeette kade'e qofitti hexxeexxi manjichcho adde ifixxa Magenoke'ni uggudhitaan; Mageniinka gargaarsa alfatee soodachchote'n hashshanna barra siitaan.6Buttixxa gammashsho halchitaaxxi aro'o shi'witeexxi hiyyeette kinni hedhonni hexxeexxi rerteexxen.7Ayyinna ci'memaaxxi yaane hexxabaashsha konne ajaja ardake'n uwwi.8Mitti manji fira ifik giddii'n shiqika hado ifika gargaara gophoole amana ifixxa waakate'eeke, amanabaake manni irranna isi hara fuggichchaken.
9Wogga isexxi jaane tomme wogganni butti'a hexxeexxi aro'o shi'witeexxi hiyyeette mazigabake'ni borreessendoqqe'e; isenna mitte aro'o calla affeemmaxxe kada hassissaan.10Iittanni oose ifixxa elo qico nossedhdhati, keessumma adhdhati, amagnetixxa lekka anshati, rakkateekara gargaaratinna eloxxe huje duuchchi'a ifi uuwwati eloxxe hujanni kulendeexxe kada hassissaan.
11Oositte aro'o shi'witeexxi hiyyeette melaalle maaliinxi gaabbe insa'nee injifatee'naa Kiristoosi'a anfeemmaxxi jaalala xe'yitaa wodda heeruma hansaamaxxee insa'nee mazigabake'n borreesittoxxe'e.12Tinni melaalle sirete'n Kiristoosi'a aaggeemmaxxa kako diigati murte umo ifike'n iyyedaqqitaan.13Iittanni huje tikatinna mine mine mammarema barattaan; huje tika calla kaddebaag mine mine mammareda'n manjo hamattaaxxe, manjiinxe yaane'ni e'yittaaxxenna haaso'a hassissabaaxxa haasottaaxxe kaddaan.14Tennexxee oositte aro'o shi'witeexxa melaalle herundo'a, oose ildo'a, minne ifikanna galchexxo'a gorsa uwwaannen; konne qicinni naaphi summa insa'nee balleesaaxxa yaane gophaan.15Konneechchi edi darre mitte mitte aro'o shi'witeexxi hiyyeette meelalle durriisa hordofati amanatike orinaa'n udumi'a higge'een.16Ammaagnete kaddeexxi hiini manjichchonna mine ifik giddo aro'o shi'witteexxa melaalle afe'eexxe kaddo'oole tinni melaalle Mageniinxe tuuta'a ba'ote kaddabaashsha tennee meelaalle ise gargaartowwaal. Konne qicinni Mageniinxi tuuta haranga gargaarsa affebaaxxa aro'o shi'witteexxa malaalle gargaara dandeetaan.

Mageniinxe Tuutaxxi Geedhe Hitta Uudema Hassissaaxxa

17Mageniinxa tuuta elo qico galchitaaxxe, giddii'ninni lallabatinna barachchiisati eloottaaxxe geedhe'a dachcha'i ulfinni hasisaan.18Woyyichchi Maxaafi «Midha uxxitaaxxa qotiyyo afo'o usurtoxxe'e!» iittanni «Hujaakee rundi hasisaan» hiyyaan.19Lami yookaani sasi manji dhugaa kulebaak Mageniinxe tuutaxxe geedhe'n kexxaaxxa ku'la adhdhittoxxe'e.20Weli uudeexxi sodaataashsha cubbo hujaakaara manni duuchchi edo xixi!
21Mageni edonna Yessuusi Kiristoosi edo, filendeexxe erganna edo konne ajajuwwa gamisabelo heqqexxota'anna mitte manjonna mittekenaa'n caalchiisatixxa yaane assitabexxoshsha atee maganne hiyyaannen.22Ayye'ninna anga atixxa hana uggatee mee muddami; wele manninninna cubboti mittoondoxxe'e; umo atika luqqinnik heqqedhdhi.
23Atike godobixxe dhibexxeenna higgegge ate'n kexxaaxxe ela gonphexxee heenoxxa woyyinetixxa booka ha'wi malee ta'aanni edi'a wode'e calla ha'wittoxxe'e.
24Mitte mitte mannixxi cubbo ifisendeexxen; insa'ne'aa ediseexxi murtetiba geltaan; wele mannixxi cubbo kinni ifisendaak laanchiteetten.25Eloxxi hujenna iittanni ifisendeexxeen; ifisendebaaxxi yaane hexxeexxenna kaddoole midde buqqendeeshsha gattabaan.

The Word for the World International

https://app.library.bible/content/2b894378475c6aea