NAMBAR1

Masaty Israel Milu Rianaw

1Israel hae nynh Izip ram kyate a pounaw hae te kum ningnaw, sawpaw sah ningnaw, masaty nin khe Sinai ramkaw kya tungkunaw bu kyakhe Bawipaw nynh Moses kha hynhte a hopya:2Israel zapi balyn kha, pise miakaw lu kheit ccite mih phin te, mih puizia te, mih min thyhte milu ria hae.3Tuh-e pise hae tuh Israel ram kya umpaw kum kuin te palung lang, rhawtuknaw lang a cceih kho vae cih paw athua cih hae. Nang te Aaron nynh minmin kha aphuphute na ria cih oh.4Mih puizia raveih kya-e lupi athuapaw, phin kheit cci kyate pise lu kheit cci tuh nanning ryte a um cih hae.5E hae hynh nanning ae bawm cih oh paw pise hae mih min nynh thua: Reuben phin kyate Shedeur ccapaw Elizur;6Simeon phin kyate Zurishaddai ccapaw Shelumiel.7Judah phin kyate Amminadab ccapaw Nahshon.8Issakhar phin kyate Zuar ccapaw Nethanel.9Zebulun phin kyate Helon ccapaw Eliab.10Josef ccapaw hae kyate: Efraim phin kyate Ammihud ccapaw Elishama; Manasseh phin kyate Pedahzur ccapaw Gamaliel.11Benjamin phin kyate Gideoni ccapaw Abidan.12Dan phin kyate Ammishaddai ccapaw Ahiezer.13Asher phin kyate Okhran ccapaw Pagiel.14Gad phin kyate Deuel ccapaw Eliasaf.15Naftali phin kyate Enan ccapaw Ahira.
16E hae tuh zapi kyate po athua hae paw mih thokeinaw phin kya-e cciakhaetu hae, Israel hae mih phin kya-e lupi hae nynh thua hae.
17Moses te Aaron nynh min te po athua hae paw tuh-e pise hae kha a ko hae,18te sawpaw sah ningnaw masaty nin khe minmin nynh zapi balyn kha pynkheihlan pum hae zah, mih phin kyakhe mih puizia thyhte kum kuin te palung lang lu kheit cci mih min rianaw thyhte ccazing a law hae,19tuh-e tuh Bawipaw nynh Moses kha kaw a pya thyhte nynh thua. Tuhcite aning nynh minmin milu kha Sinai ramkaw khe a ria hae.
20Israel a ccatawccaw Reuben ciihan tuh mih thokeinaw, mih phin, mih puizia, lu kheit cci min rianaw thyhte rhawtuknaw lang a cceih kho vae cih paw miakaw, kum kuin te palung lang pise miakaw:21Reuben phin kya-e min ccazing law athua hae paw tuh sung pali thong taruh za pangaw acih hae.
22Simeon ciihan tuh mih thokeinaw, mih phin, mih puizia thyhte ria athua hae paw, min rianaw thyhte lu kheit ccite, kum kuin te palung lang pise miakaw, rhawtuknaw lang a cceih kho vae cih paw miakaw:23Simeon phin ria athua hae paw tuh sung pangaw thong takua za thum acih hae.
24Gad ciihan tuh mih thokeinaw, mih phin, mih puizia, min rianaw thyhte rhawtuknaw lang a cceih kho vae cih paw miakaw, kum kuin te palung lang:25Gad phin kya-e min ccazing law athua hae paw tuh sung pali thong pangaw za taruh sung pangaw acih hae.
26Judah ciihan tuh mih she, mih phin, mih puizia, min rianaw thyhte kum kuin te palung lang rhawtuknaw lang a cceih kho vae cih paw miakaw:27Judah phin kya-e min ccazing law athua hae paw tuh sung sari thong pali za taruh acih hae.
28Issakhar ciihan tuh mih she, mih phin, mih puizia, min rianaw thyhte kum kuin te palung lang rhawtuknaw lang a cceih kho vae cih paw miakaw:29Issakhar phin kya-e min ccazing law athua hae paw tuh sung pangaw thong pali za pali acih hae.
30Zebulun ciihan tuh mih she, mih phin, mih puizia, min rianaw thyhte kum kuin te palung lang rhawtuknaw lang a cceih kho vae cih paw miakaw:31Zebulun phin kya-e min ccazing law athua hae paw tuh sung pangaw thong sari za pali acih hae.
32Josef ciihan kya-e Efraim ciihan tuh mih thokeinaw, mih phin, mih puizia, min rianaw thyhte kum kuin te palung lang rhawtuknaw lang a cceih kho vae cih paw miakaw:33Efraim phin min ccazing law athua hae paw tuh thong sung pali za pangaw acih hae.
34Manasseh ciihan tuh mih she, mih phin, mih puizia, min rianaw thyhte kum kuin te palung lang rhawtuknaw lang a cceih kho vae cih paw miakaw:35Manasseh phin kya-e min ccazing law athua hae paw tuh sung thum thong ning za ning acih hae.
36Benjamin ciihan tuh mih she, mih phin, mih puizia, min rianaw thyhte kum kuin te palung lang rhawtuknaw lang a cceih kho vae cih paw miakaw:37Benjamin phin kya-e min ccazing law athua hae paw tuh sung thum thong pangaw za pali acih hae.
38Dan ciihan tuh mih she, mih phin, mih puizia, min rianaw thyhte kum kuin te palung lang rhawtuknaw lang a cceih kho vae cih paw miakaw:39Dan phin kya-e min ccazing law athua hae paw tuh sung taruh thong ning za sari acih hae.
40Asher ciihan tuh mih she, mih phin, mih puizia, min rianaw thyhte kum kuin te palung lang rhawtuknaw lang a cceih kho vae cih paw miakaw:41Asher phin kya-e min ccazing law athua hae paw tuh sung pali thong kheit za pangaw acih hae.
42Naftali ciihan tuh mih she, mih phin, mih puizia, min rianaw thyhte kum kuin te palung lang rhawtuknaw lang a cceih kho vae cih paw miakaw:43Naftali phin kya-e min ccazing law athua hae paw tuh sung pangaw thong thum za pali acih hae.
44E hae hynh Moses te Aaron nynh puizia raveih kya-e Israel cciakhaetu lu haw lae ning bawmnaw te milu a ria hae paw nynh thua.45Tukeiccuze Israel hae milu abalyn, mih puizia thyhte kum kuin te palung lang Israel hae kya rhawtuknaw lang a cceih kho vae cih paw miakaw—46milu abalyn tuh cciing taruh thong thum za pangaw sung pangaw acih hae.47Thuasalama Levi phin kya tuh mih thokeinaw phin maw te Israel hae kya riabia thua khyh hae.
48Bawipaw nynh Moses kha hynhte a hopya:49Levi phin kyalya kha na riabia lan khyh hae, ccangpaw Israel hae ryte minmin kha milu na riakheih lan khyh hae.50Byakinnaw beikbu kha thuasah, beikbu accinccang balyn kha thuasah, beikbu te asekuhpaw balyn kha thuasah Levi phin hae kyakhe na ap cih hae; minmin nynh beikbu te accinccang balyn kha a puih cih hae, a do-oih cih hae zah beikbu pepan khe ryahmin a sakkuh cih hae.51Beikbu kha cciakhae accan vae ze, Levi phin hae nynh a phou cih hae; beikbu kha sak lan accan vae ze, Levi phin hae nynh a sak cih hae. Te Levi phin holeite ccangpaw lukhakheit nynh a naeku lanze chia athua cih.52Ccangpaw Israel hae tuh mimaw ryahmin raveih kyakhe aphuphute ryahmin kha a tahkuh cih hae;53thuasalama Israel zapi tungvaw thinrianaw a um khyh nawlan Levi phin hae tuh byakinnaw beikbu pepan khe ryahmin kha a tahkuh cih hae; te Levi phin hae nynh byakinnaw beikbu do-oihpaw ryalaw kha a lah cih hae.54Israel hae nynh tuhcite a cyi hae; Bawipaw nynh Moses kha kaw a pya thyhte minmin nynh a cyi hae. Ryahmin Tahkunaw te Ccianaw Kawpyanaw
1Bawipaw nynh Moses te Aaron kha hynhte a hopya hae:2Israel hae tuh mih rhawkaw phu raveihte mih puizia alan kaw khe ryahmin a tahkuh cih hae; voikheit voikheit lang te tungkunaw bu kalan khe hawite ryahmin kha a tahkuh cih hae.3Nithua lang, khuanin thuanaw langkhe aphuphute a um cih paw tuh Judah rhawkaw phu ryahmin alan athua cih. Judah phin cciakhaetu tuh Amminadab ccapaw Nahshon athua cih,4tuh-e aphu tuh milu a ria hae thyhte, sung sari thong pali za taruh acih.5Judah koute ryahmin a tahkuh lanpaw tuh Issakhar phin athua cih. Issakhar ciihan hae cciakhaetu tuh Zuar ccapaw Nethanel athua cih,6tuh-e aphu tuh a ria hae thyhte, sung pali thong pali za pali acih.7Tukoute Zebulun phin athua cih: Zebulun ciihan hae cciakhaetu tuh Helon ccapaw Eliab athua cih,8tuh-e aphu tuh milu a ria hae thyhte, sung pangaw thong sari za pali acih.9Judah ryahmin kya-e min rianaw abalyn tuh aphuphute cciing kheit sung tarya thong taruh za pali acih. Ccia vae ze, minmin hynh masaty laan a maw cih hae.
10Alia langkhe aphuphute a um cih paw tuh Reuben rhawkaw phu ryahmin alan nynh thua. Reuben ciihan hae cciakhaetu tuh Shedeur ccapaw Elizur athua cih,11aning aphu tuh milu a ria thyh hae te, sung pali thong taruh za pangaw acih.12Te Reuben koute ryahmin a tahkuh cih paw tuh Simeon phin athua cih. Simeon ciihan hae cciakhaetu tuh Zurishaddai ccapaw Shelumiel athua cih,13aning aphu tuh a ria thyh hae te, sung pali thong takua za thum acih.14Oute Gad phin athua cih: Gad ciihan hae cciakhaetu tuh Reuel ccapaw Eliasaf athua cih,15aning aphu tuh milu a ria thyh hae te, sung pali thong pangaw za taruh sung pangaw acih.16Reuben ryahmin kya-e min rianaw abalyn tuh aphuphute cciing kheit sung pangaw thong kheit za pali sung pangaw acih. Minmin tuh phu ningnaw a cceih hae paw athua cih.
17Tungkunaw bu tuh Levi rhawkaw phu ryte rhawkaw phu hae angaelung khe a cceih cih; minmin nynh ryahmin a tahku hae thyhte, mih umnaw raveih khate mih rhawkaw phu thyhte a cceih cih hae.
18Niccaw langkhe aphuphute a um cih paw tuh Efraim ryahmin alan athua cih, Efraim ciihan hae cciakhaetu tuh Ammihud ccapaw Elishama athua cih,19aning aphu tuh a ria hae thyhte thong sung pali za pangaw acih.20Efraim koute Manasseh phin a um cih. Manasseh ciihan hae cciakhaetu tuh Pedahzur ccapaw Gamaliel athua cih,21aning aphu tuh milu a ria thyh hae te, sung thum thong ning za ning acih.22Oute Benjamin phin athua cih: Benjamin ciihan hae cciakhaetu tuh Gideoni ccapaw Abidan athua cih,23aning aphu tuh milu a ria thyh hae te sung thum thong pangaw za pali acih.24Efraim ryahmin kya-e min rianaw abalyn tuh aphuphute, cciing kheit thong tarya za kheit acih. Minmin tuh phu thumnaw kya a cceih cih hae.
25Palung langkhe aphuphute a um cih paw tuh Dan ryahmin alan athua cih. Dan ciihan hae cciakhaetu tuh Ammishaddai ccapaw Ahiezer athua cih,26aning aphu tuh a ria hae thyhte sung taruh thong ning za sari athua cih.27Dan koute ryahmin a tahkuh cih paw tuh Asher phin athua cih. Asher ciihan hae cciakhaetu tuh Okhran ccapaw Pagiel athua cih,28aning aphu tuh a ria hae thyhte sung pali thong kheit za pangaw acih.29Oute Naftali phin athua cih: Naftali ciihan hae cciakhaetu tuh Enan ccapaw Ahira athua cih,30aning aphu tuh a ria hae thyhte sung pangaw thong thum za pali acih.31Dan ryahmin kya-e min rianaw abalyn tuh aphuphute, cciing kheit sung pangaw thong sari za taruh acih. Minmin tuh aphuphute nyathyakou a cceih cih hae.
32E hynh Israel hae mih puizia thyhte min rianaw nynh thua; ryahmin kya aphuphute min rianaw abalyn tuh cciing taruh thong thum za pangaw sung pangaw acih.33Bawipaw nynh Moses kaw a pya thyhte Levi phin hae tuh ccangpaw Israel hae laku kya riabia thua khyh hae.
34Bawipaw nynh Moses kaw a pya thyhte Israel hae nynh a cyi hae: Minmin nynh alan hae thyhte ryahmin tahkuh hae zah, thokeinaw phin thyhte lu kheit cci mih phin thyhte phe lokuh lante a cceih hae. Aaron Ccapaw hae
1Bawipaw nynh Moses kha Sinai Mua vawlan bya a hopya lyaze, e hae hynh Aaron te Moses ccaawno hae nynh thua hae.2E hae tuh Aaron ccapaw hae min nynh thua: Ccatawccaw Nadab, te Abihu, Eleazar te Ithamar;3e hae tuh ranpibawi lante ordain pya thua hae zah, chitui thuh athuapaw ranpibawi hae, Aaron ccapaw hae min nynh thua.4Nadab te Abihu tuh Sinai ramkaw khe athyaa leipaw maee kha Bawipaw malang he a pya hae tuh, Bawipaw malang khe phe a chih hae, minmin tuh ccaawno hoi khyh hae. Eleazar te Ithamar tuh mih paaw Aaron a hiin lyakhe ranpibawi rya a lah hae. Levi Phin hae Ryalaw
5Oute Bawipaw nynh Moses kha hynhte a hopya:6Levi phin hae nynh Aaron kha a bawm ccaw hae, minmin kha cciakhae hae lah, ranpibawi Aaron malang khe thuakhae hae.7Minmin nynh tungkunaw bu malang khe Aaron elang te zapi balyn hanlan ryalawpyate beikbu kyakhe rya a lah cih hae;8minmin tuh tungkunaw bu accinccang balyn kha a do-oihtu athua cih hae zah, beikbu kya ryalawbia te Israel hae elang rya a lawpah cih hae.9Levi phin hae kha Aaron te a ccapaw hae kalan na pya cih hae; Israel hae laku kyate minmin kha Aaron kalan khaleih mawte pya athua hae.10Aaron te a ciihan hae kha ryalaw na pya cih hae zah, ranpibawi rya kha a lah cih hae, atolang e ccangpaw ccungccaw a naekuhpaw tuh chia athua cih.
11Bawipaw nynh Moses kha hynhte a hopya:12Israel hae laku kyaze ccatawccaw balyn ccelang Israel hae laku kyate Levi phin hae kha ka law vae hae. Levi phin hae tuh kamaw kya-e athua cih hae,13pawccecize ccatawccaw balyn te thanty balyn tuh kamaw kya-e nynh thua; Izip ram kya ccatawccaw balyn kha ka chia lyaze Israel hae kya tuh ccungccaw thuasah, sahiinpaw thuasah ccatawccaw balyn te thanty balyn kha kamaw elang ka thyaasah; minmin tuh kamaw kya-e athua cih hae. Kae tuh Bawipaw nynh ka thua. Levi Phin hae Milu Rianaw
14Oute Bawipaw nynh Moses kha Sinai ramkaw khe hynhte a hopya:15Levi phin hae kha puizia te thuasah, phin te thuasah milu ria hae. Sawpaw sah kheit te palung lang pise miakaw kha na ria cih.16Tukeiccuze Moses nynh Bawipaw bya thyhte, a tungvaw kawpya athua hawte minmin kha a ria hae.17Akawlan e hae hynh mih min thyhte Levi ccapaw hae nynh thua: Gershon, Kohath te Merari.18E hae hynh mih phin thyhte Gershon ccapaw hae min nynh thua: Libni te Shimei.19Kohath ccapaw hae tuh mih phin thyhte: Amram, Izhar, Hebron te Uzziel nynh thua hae.20Merari ccapaw hae tuh mih phin thyhte: Mahli te Mushi nynh thua hae. E hae tuh mih puizia thyhte Levi phin nynh thua hae.
21Gershon kyate a tho hae paw tuh Libni phin te Shimei phin nynh thua hae. E hae tuh Gershon phin nynh thua hae.22Sah kheit te palung lang pise miakaw milu ria athua hae paw tuh thong sari za pangaw acih hae.23Gershon phin hae tuh beikbu anulang, niccaw langkhe ryahmin a tahkuh cih hae,24Gershon phin hae kyaze lupi tuh Lael ccapaw Eliasaph nynh thua.25Tungkunaw bu kyaze Gershon ccapaw hae ryalaw tuh beikbu do-oihpaw kha athua cih, bu te tuh-e kya adawkuhpaw, tungkunaw bu thuakaw kya zopaw boei,26voidu kya zopaw boei hae, beikbu te silawhang pe umpaw voidu thuakaw kya zopaw boei, te a rui hae—e hae te akyngkuhpaw ryalaw balyn kha nynh thua.
27Kohath kyate a tho hae paw tuh Amram phin, Izhar phin, Hebron phin te Uzziel phin nynh thua hae; e hae tuh Kohath phin nynh thua hae.28Sah kheit te palung lang pise balyn ria athua hae paw, beikinnthyaa a do-oih hae paw tuh thong tarya za taruh acih hae.29Kohath phin hae tuh beikbu alia langkhe ryahmin a tahkuh cih hae,30Kohath phin hae kyaze lupi tuh Uzziel ccapaw Elizafan nynh thua.31Mih ryalaw tuh byakin thingkua, ccaboi, maeekhuatung, silawhang hae, ranpibawi ryalawnawpaw beikinnthyaa accinccang hae te zokhawpaw boei—e hae te akyngkuhpaw ryalaw balyn kha nynh thua.32Ranpibawi Aaron ccapaw Eleazar tuh Levi phin hae kya-e cciakhaetu hae kyaze lupi athua cih zah, beikinnthyaa a do-oihtu hae kha a uktu athua cih.
33Merari kyate a tho hae paw tuh Mahli phin te Mushi phin nynh thua hae: e hae tuh Merari phin nynh thua hae.34Sah kheit te palung lang pise balyn ria athua hae paw tuh thong taruh za ning acih hae.35Merari phin hae kyaze lupi tuh Abihail ccapaw Zuriel nynh thua; minmin tuh beikbu palung langkhe ryahmin a tahkuh cih hae.36Merari ccapaw hae kya pya athuapaw ryalaw tuh beikbu pang hae, pangccaw hae, tung hae, ccusy hae, te hynh-e hae te asekuhpaw accinccang balyn—e hae te akyngkuhpaw ryalaw balyn kha nynh thua;37voidu tung hae, te mih ccusy hae te ccong hae te arui hae kha mah minmin ryalaw athua cih.
38Beikbu malang nithua lang, tungkunaw bu malang nithua lang hawi langkhe ryahmin a tahkuh cih hae paw tuh Moses, Aaron te a ccapaw hae athua cih hae, beikinnthyaa lungkhu Israel hae elang cyi lanpaw phungzae miakaw kha minmin nynh a cyih cih hae; atolang e ccangpaw lukhakheit a naekuhpaw tuh chia athua cih.39Bawipaw nynh kaw a pya hae thyhte, Moses te Aaron nynh mih phin thyhte, sah kheit te palung lang pise balyn a ria hae paw Levi phin hae tuh thong kuin lae ning acih hae. Ccatawccaw Shawkhawnaw
40Oute Bawipaw nynh Moses kha, “Israel hae kya-e sah kheit te palung lang ccatawccaw pise balyn kha ria hae lah, mih min lawtua hae.41Thuasalama Levi phin hae kha tuh kamaw elang min na lah cih hae—kae tuh Bawipaw nynh ka thua—Israel hae laku e ccatawccaw balyn ccelang thuasah, Levi phin hae sahiin-awvaw hae kha Israel hae sahiin-awvaw kya-e thanty balyn ccelang thuasah na lah cih hae,” a cipya.42Tukeiccuze Bawipaw nynh kaw a pya thyhte Moses nynh Israel hae kya-e ccatawccaw balyn kha a ria hae.43Sah kheit te palung lang ccatawccaw pise balyn tuh mih min thyhte thong kuin lae ning za ning sung sari lu thum acih hae.
44Oute Bawipaw nynh Moses kha hopah zah:45“Levi phin hae kha Israel hae kya-e ccatawccaw balyn ccelang thuasah, Levi phin hae sahiin-awvaw kha Israel hae sahiin-awvaw hae ccelang thuasah lah hae; Levi phin hae tuh kamaw kya-e athua cih hae. Kae tuh Bawipaw nynh ka thua.46Levi phin hae laeze alunghua hae paw Israel ccatawccaw hae za ning sung sari lu thum kha shawkhawnaw mee tuh,47lu kheit ze shekel ccangpangaw cci na lah cih, beikinnthyaa kya-e shekel thyhte shekel ccangkheit ze kerah ccangkuin nynh thua.48Alaepaw Israel hae shawkhawnawpaw phua kha Aaron te a ccapaw hae kalan na pya cih,” a cipya.49Tukeiccuze Israel ccatawccaw hae kha Levi phin hae khate shaw hae zah, alae ung hae paw ccatawccaw hae shawkhawnawpaw phua kha Moses nynh a law;50Israel ccatawccaw hae kyate, shekel thong kheit za thum sung taruh ccangpangaw kha a law, tuh-e tuh beikinnthyaa kya-e shekel thyhte riapaw nynh thua;51te Moses nynh shawkhawnawpaw phua kha, Bawipaw bya thyhte, Bawipaw nynh Moses kha kaw a pya hawte, Aaron te a ccapaw hae kha a pya hae. Kohath Ciihan hae
1Bawipaw nynh Moses te Aaron kha hynhte a hopya hae:2Kohath ciihan hae kha ccangpaw Levi phin hae kyate phia oh lah, mih phin thyhte thuasah, mih puizia hae thyhte thuasah milu ccazing lah oh.3kum sung thum te kum sung pangaw cia, tungkunaw bu te asekuhpaw ryalaw apuakuhpaw balyn kha ria oh.4Tungkunaw bu te asekuhpaw Kohath ciihan hae ryalaw tuh athyaa huaccepaw uccaw hae nynh thua.
5Rhawkaw phu kha cciakhae azaw vae ze, Aaron te a ccapaw hae nynh a tee cih hae zah, zokhawpaw boei kha a khah kou hae te, byakin thingkua kha tuh-e boei khate a bong cih hae;6oute a vawlan khe nebaleihpaw saphua khate a bongthin cih hae zah, meizong boei kha a phae cih hae, te puihnawpaw ccong hae kha tuin kya a ruh cih hae.7Umkhaenaw Sanlou ccaboi vawlan khe meizong boei kha a phae cih hae, te pake hae, mynkhuhpaw angphe hae, banang lepaw hae te niapaw silawnaw elang ccekoh hae kha a nung cih hae; zungzae nung athuapaw sanlou kha mah tuh-e ccaboi vawlan nung athua cih;8oute tuh-e hae vawlan khe boei sepaw kha a bong cih hae zah, nebaleihpaw saphua khate a bongthin cih hae, tukoute puihnawpaw ccong hae kha a ruh cih hae.9Apiazon boei kha a lah cih hae zah, maee-awnawpaw maeekhuatung te a maeekhua hae, a tetakia hae, a maeloi nungnawpaw hae, te chitui balyn kha a bong cih hae;10tuh-e tuh a uccaw balyn rykhate nebaleihpaw saphua sungkua lungkhu a sang cih hae zah, puihnawpaw ccong vawlan khe a khang cih hae.11Sui silawhang vawlan khe meizong boei kha a phae cih hae zah, nebaleihpaw saphua khate a bong kou hae te, puihnawpaw ccong hae kha a ruh cih hae;12te beikinnthyaa kya mangpaw ryalawnawpaw uccaw balyn kha a lah cih hae zah meizong boei sungkua lungkhu a sang kou hae te, nebaleihpaw saphua khate a bong cih hae, te puihnawpaw ccong vawlan khe a khang cih hae.13Beikhang kyate buhhaw kha a lah cih hae zah sephaphuhpaw boei kha tuh-e vawlan khe a phae cih hae;14te tuh-e vawlan khe silawhang kya ryalaw nawlan mangpaw uccaw balyn, maee-e nungnawpaw pake, sivaw ccungthy hae, luanawpaw kawpia hae, pakekhupaw hae te silawhang uccaw balyn kha a khang cih hae zah, nebaleihpaw saphua te a bong kou hae te, puihnawpaw ccong hae kha a ruh cih hae.15Aaron te a ccapaw hae nynh beikinnthyaa te beikinnthyaa accinccang balyn kha a bong kou hae te, rhawkaw phu a thokhaeku lya hae khe, Kohath ccapaw hae nynh tuh-e hae tuh puih khylan oun cceih cih hae, thuasalama minmin nynh athyaapaw uccaw hae kha ty lan khyh hae, tuhkhyhze tuh a chih cih hae. E hae tuh Kohath ciihan hae nynh a puih lan hae paw tungkunaw bu uccaw hae nynh thua hae.
16Ranpibawi Aaron ccapaw Eleazar nynh maee awnaw lanpaw chitui, zimuin, tyty raepaw ccathae silawnaw te thuhkupaw chitui, beikbu balyn te a lungkhu umpaw balyn, beikinnthyaa kya te beikinnthyaa a uccaw hae lungkhu umpaw balyn kha a do-oih cih hae.
17Oute Bawipaw nynh Moses te Aaron kha hynhte a hopya hae:18Kohath ciihan hae kha Levi phin hae kyate na zosah lan khyh oh.19Minmin nynh athyaa huaccepaw kalan a naeku vae hae ze, hiin hae zah a chi khyh ccaw hae, hynhcite na hopah cih oh: Aaron te a ccapaw hae nynh a tee cih hae zah, lu kheit cci kha ryalaw te phupaw kha ccarou a nee cih hae.20Thuasalama Kohath ciihan hae tuh athyaapaw uccaw kha do khylan sohsoh sanmah tee lan khyh hae; tuhkhyhze tuh a chih cih hae. Gershon te Merari Mih Ciihan hae
21Oute Bawipaw nynh Moses kha hynhte a hopya:22Gershon ciihan hae kha mih puizia hae te mih phin thyhte milu ccazing lah hae;23kum sung thum te kum sung pangaw cia tungkunaw bu kya ryalaw apuakuhpaw balyn kha na ria cih.24Gershon ciihan hae ryalaw tuh ryalawpyapaw te uccaw phupaw nynh thua:25beikbu kya zopaw boei, tungkunaw bu te dawpaw, bu avawlan te dawthinpaw nebaleihpaw saphua, tungkunaw bu thuakaw kya zopaw boei,26beikbu te silawhang pe umpaw voidu kya zopaw boei, voidu sakoih kya zopaw boei, a rui hae te ryalawnawpaw uccaw balyn kha a phu cih hae; te tuh-e hae te asekuhpaw ryalaw balyn kha a lah cih hae.27Gershon ciihan hae kya-e ryalaw balyn, a phu cih hae paw balyn kya thuasah, a lah cih hae paw ryalaw balyn kya thuasah Aaron te a ccapaw hae kyate kawpyanaw thyhte athua cih; te phu lan a ci hae paw balyn kha mimaw ryalaw lang na nee cih hae.28E hynh tungkunaw bu te asekuhpaw Gershon ciihan hae ryalaw nynh thua, mih ryalaw balyn kha ranpibawi Aaron ccapaw Ithamar nynh a dopah cih hae.
29Merari ciihan hae kha mih phin te mih puizia hae thyhte min ccazing lah hae;30kum sung thum te sung pangaw cia tungkunaw bu kya ryalaw apuakuh hae paw miakaw kha na ria cih hae.31Minmin nynh tungkunaw bu kya-e a phu cih hae cite nee athuapaw ryalaw abalyn tuh: beikbu kya-e pang hae te pangccaw hae, tung hae, ccusy hae,32voidu po voilu lan umpaw tung hae te a ccusy hae, pangreih hae, arui hae, te tuh-e te asekuhpaw ryalawnawpaw uccaw balyn kha a phu cih hae; te minmin nynh phu lan accan hae paw uccaw hae kha mih min te na nee cih hae.33E hynh ranpibawi Aaron ccapaw Ithamar kuihkaw kya Merari ciihan hae ryalaw thua zah tungkunaw bu te asekuhpaw mih ryalawnaw abalyn nynh thua. Levi Phin hae Milu Rianaw
34Tukeiccuze Moses, Aaron te ccungccaw zapi cciakhaetu hae nynh Kohath ciihan hae kha mih phin te mih puizia hae thyhte milu ccazing a law hae,35kum sung thum te sung pangaw cia tungkunaw bu te asekuhpaw ryalaw apuakuhpaw miakaw;36phin thyhte a ria hae paw tuh thong ning za sari sung pangaw acih hae.37E hae tuh Bawipaw nynh Moses kya kaw a pya thyhte Moses te Aaron nynh min ccazing law hae paw, tungkunaw bu kya rya a lah hae paw Kohath phin hae nynh thua hae.
38Gershon ciihan hae tuh mih phin te mih puizia hae thyhte,39kum sung thum te sung pangaw cia tungkunaw bu te asekuhpaw ryalaw apuakuhpaw miakaw—40mih phin te mih puizia hae thyhte, thong ning za taruh sung thum acih hae.41E tuh Bawipaw kawpyanaw thyhte Moses te Aaron nynh min ccazing law hae paw, tungkunaw bu kya ryalah hae paw Gershon ciihan hae abalyn nynh thua hae.
42Merari phin hae tuh mih phin te mih puizia hae thyhte,43kum sung thum te sung pangaw cia tungkunaw bu te asekuhpaw ryalaw apuakuhpaw miakaw—44mih phin thyhte milu ccazing lawnaw tuh thong thum za ning acih hae.45E tuh Bawipaw nynh Moses kaw a pya thyhte, Moses te Aaron nynh min ccazing a law hae paw, Merari phin hae nynh thua hae.
46Ria athuapaw Levi phin abalyn, Moses, Aaron te Israel cciakhaetu hae nynh a ria hae paw, mih phin te mih puizia hae thyhte,47kum sung thum te sung pangaw laku, tungkunaw bu te asekuhpaw ryalaw te phupaw ryalaw apuakuhpaw miakaw48ria athua hae paw minmin tuh thong tarya za pangaw sung tarya acih hae.49Moses kya pya athuapaw Bawipaw kawbya thyhte lawpaw ryalaw khyhze phupaw ryalaw patae kha minmin tungvaw pya athua; tukeiccuze Bawipaw nynh Moses kha kaw a pya thyhte aning nynh minmin kha milu ccazing a law hae. Athyaa leipaw Ccungccaw hae
1Bawipaw nynh Moses kha hynhte a hopya:2“Vaethya ccinaw hoipaw, vaenae hoipaw te michi rhua kha ty zah athyaa leipaw miakaw tuh rhawkaw phu ryahmin atolang khe nung lan Israel hae kha kawpya hae;3nopi thuasah, pise thuasah ryahmin atolang khe na nung cih hae; minmin laku ka umnaw mih ryahmin kha minmin nynh thusah nan hae sah,” a cipya.4Tuhcite Israel hae nynh cyih hae zah ryahmin atolang khe a nung hae; Bawipaw nynh Moses a hopya thyhte Israel hae nynh a cyi hae. Phykunaw te Rungnaw
5Bawipaw nynh Moses kha hynhte a hopya:6Israel hae kha hynhte hopah hae: Pise khyhze nopi lukhakheit nynh Bawipaw tungvaw lungzinaw hoi leite mingccangpaw tungvaw seinaw a rae lanze, tuh-e ccungccaw tuh seinaw a hoi,7seinaw a la raepaw kha a phykuh cih. Tuh-e ccungccaw nynh a seinaw elang phe ccing lan a rung cih, pum pangaw pum kheit kha a pyachih cih zah, seinaw a la raepyapaw ccungccaw kha a pya cih.8Thuasalama seinaw a raepyapaw ccungccaw tuh a chi keiccuze rungpaw kha a lawkuh lanpaw puizia a hoi khyh lanze, seinaw keiccuze rungpaw tuh Bawipaw kalan ranpibawi elang pya athua cih, tuhpiaze a seitupaw hanlan seingaethyanaw elang tuutepaw khate silaw athua cih.9Israel hae kya-e athyaapaw ahlu hae balyn laku e ranpibawi kalan oun thuakhae hae paw lasung miakaw tuh ranpibawi kya-e athua cih.10Ccungccaw balyn kya-e athyaapaw ahlu hae tuh ranpibawi hae kya-e nynh thua; lukhakheit nynh ranpibawi kalan a pyapaw pawpaw zemah ranpibawi kya-e athua cih. A Lungzi leipaw Zu
11Bawipaw nynh Moses kha hynhte a hopya:12Israel hae kha hynhte hopah hae: Pise lukhakheit zu nynh ccouseikute pisepaw tungvaw a lungzi khyh lanze thuasah,13pise lukhakheit nynh amaw kha ikhae zah tuh-e tuh a vawpaw nynh a ny khyh lanze thuasah, tuh-e nung tuh amaw te amaw a nungsisahku vae zemah a sei lyakhe muihbia thua khyh zah ccaekia a um khyh lanze thuasah,14te a vawpaw nynh amaw te amaw a nungsisakuh vae paw a zu tungvaw a lunghiin ze thuasah, tuhkhyhze amaw te amaw a nungsisakuh leipaw a zu tungvaw khe a lunghiin ze thuasah,15a vawpaw nynh a zu kha ranpibawi kalan a thuakhae cih. Te aning nynh a zu elang pya ahopaw pyapaw, barli khui ephah ccangkheit kya-e pumhaw pumkheit kha a ccyng cih. Tuh-e barli khui kyakhe chitui kha bu lan khyh zah frankinsen mah py lan khyh, pawccecize tuh-e tuh lunghiinnaw ccathae silawnaw, nythuinaw ccathae silawnaw, hoyleinaw nythuisahnaw elang silawnaw nynh thua.
16Oute ranpibawi nynh tuh-e nung tuh malang khe a cciakhae cih zah Bawipaw malang khe a nung cih;17ranpibawi nynh laephi ang khate tui athyaapaw kha a lah cih, beikbu kya umpaw laenoi beihtaraw kha a lah cih zah tuh-e tui lungkhu khe moh a thung cih.18Ranpibawi nynh nopinung kha Bawipaw malang khe a nung cih, nopinung sang kha a phou cih zah nythuinaw ccathae silawnaw kha nopinung kuih kyakhe a nung cih, tuh-e tuh lunghiinnaw ccathae silawnaw nynh thua. Ranpibawi nynh amaw kuih kyakhe thyalawnaw a thuakhaepaw tui akhahpaw kha a ccyng cih.19Oute ranpibawi nynh nopinung kha thyalawsakute, “Humhung pise nynh mah ae ikhae khyh ze thuasah, na vawpaw kawhoinaw zakaw kya na um lyaze, athyaa leipaw kalan na maeku khyh ze thuasah, thyalawnaw a thuakhaepaw hynh-e tui akhahpaw kyate luetua.20Thuasalama na vawpaw kawhoinaw zakaw kya na um lyakhe na ccouseiku ze thuasah, namaw te namaw kha na nungsisakuh zah na vawpaw holeite pise lukhakheit nynh ae ikhae lanze thuasah,” cite hopyate21—ranpibawi nynh tuh-e nopinung tuh thyalawsakute— “Bawipaw nynh na tungvaw huakunaw kha langsakuh sah lah, na ccungccaw hae laku kya thya ae law sah, Bawipaw nynh na neita-inn kha ae lawpah sah lah, na vue kha phinsah sah;22atu thyalawnaw a thuakhaepaw hynh-e tui nynh na vue lungkhu lang teesah lah, na vue kha phinsah sah, na neita-inn kha ae lawpah sah lah!” cite hopah sah. Te nopinung nynh, “Amen. Amen,” a ci cih.
23Oute ranpibawi nynh e thyalawnaw bya hae hynh ccaw te a zei cih zah tui akhahpaw lungkhu khe a the cih.24Nopinung tuh thyalawnaw a thuakhaepaw tui akhahpaw kha a niasah cih zah thyalawnaw a thuakhaepaw tui tuh nopinung lungkhu lang a tee cih zah myarya akhah lante a ccisah cih.25Ranpibawi nynh lunghiinnaw ccathae silawnaw kha nopinung kuih kyate a lah cih, te ccathae silawnaw kha Bawipaw malang khe a hangthung cih zah silawhang kalan a cciakhae cih;26te ranpibawi nynh ccathae silawnaw kuihphe kheit kha a lah cih zah silawhang vawlan khe a u cih, tukoute nopinung kha tui a niasah cih.27Nopinung kha tuh-e tui he a niasah tuh, nopinung nynh amaw te amaw kha nungsisakuh zah a vawpaw tungvaw lungzinaw a la hoi khyh lanze, thyalawnaw a thuakhaepaw tui tuh a lungkhu lang tee zah myarya akhah lante a ccisah cih, te a vue kha a phinsah cih, a neita-inn tuh accah cih, te nopinung tuh a ccungccaw hae laku kya hua lan umpaw ccungccaw lang a tang cih.28Thuasalama nopinung tuh amaw te amaw nungsisakuh khyh zah athyaa lanze, aning tuh a lue cih zah ccaaw a poi kho cih.
29E hynh lunghiinnaw kong kya zui lanpaw upadi nynh thua, nopi nynh a vawpaw kawhoinaw zakaw kya a um lyakhe ccouseikuh zah amaw te amaw kha a nungsisakuh ze thuasah,30tuhkhyhze pisepaw thinlung kya lunghiinnaw tee zah a zu tungvaw lunghiinnaw a hoi ze thuasah, aning nynh a zu kha Bawipaw malang a thuakhae cih, te ranpibawi nynh e upadi balyn hynh nopinung tungvaw a mang cih.31Pisepaw tuh hoyleinaw kyate a lue cih, thuasalama nopinung nynh a hoyleinaw mee kha a ing cih. Nazirit Ciihan hae
1Bawipaw nynh Moses kha hynhte a hopya:2Israel hae kha hynhte hopah hae: Nopi nynh thuasah, pise nynh thuasah Bawipaw hanlan amaw te amaw kha thyaasahkunaw raeku khylan, taekhiapaw byakinkunaw athuapaw nazir byakinkunaw kha he a rae te,3aning nynh misutui te ruithyapaw kha a sungkuh cih; misutui ariapaw thuasah, ccangpaw ruithyapaw ariapaw thuasah neih lan khyh, misu thae te raepaw atui miakaw kha neih lan khyh zah misu thae, ahinpaw thuasah, aroupaw thuasah ae lan khyh.4Thyaasahku ccyh kya balyn tuh misu ku kyate apoupaw miakaw, amung khyhze akaloh heize ae lan khyh.
5Thyaasahku khylan bya a kinku ccyh balyn kya sangteih te a lu tungkuh lan khyh; Bawipaw hanlan amaw te amaw kha a thyaasahku ccyh accing makhia, aning tuh athyaa cih; a sang kha amaw sae lan a saesakuh cih.
6Bawipaw hanlan amaw te amaw a thyaasahku ccyh balyn tuh michi rhua pe lang naekuh lan khyh.7A paaw khyhze a nung, a upaw, a neitawpaw khyhze a unung, a neitawnung a chi heize amaw te amaw kha thusakuh lan khyh; pawccecize Pachia elang a thyaasahkunaw tuh a lu vawlan nynh a um.8A thyaasahku ccyh balyn tuh Bawipaw elang a thyaa cih.
9Lukhakheit nynh a pe khe kharouh chih kangmaw zah a thyaasahkupaw lu kha a thusah lanze, a thyaasahku nin khe a sang kha a ngokuh cih, nin sarinaw nin khe a ngokuh cih.10Nin taryanaw nin khe vahu sa ning khyhze valaele anopaw sa ning kha tungkunaw bu thuakaw kya ranpibawi kalan a cciakhae cih,11ranpibawi nynh sa kheit kha seithyaanaw silawnaw lante a pya cih zah ccangpaw sa kheit kha maee-ute silawnaw lante a pya cih, aning hanlan seingaethyanaw kha a raepah cih, pawccecize aning tuh michi rhua keiccuze a sei vae. Tuh-e nin mawkhe a lu kha a thyaasah cih,12te amaw te amaw kha Bawipaw elang a thyaasakuh cih zah tuutaw pise kum kheit acihpaw kha cyiseinaw silawnaw lante a thuakhae cih. Langmaw e accyh kha tuh alakaw lan a tang vae cih, pawccecize athyaa vae paw lu kha thusah athua vae.
13A thyaasahkunaw ccyh he accing te, e hynh nazir hanlan phungbya nynh thua: aning kha tungkunaw bu thuakaw kalan thuakhae athua cih,14te a lasung kha Bawipaw kalan a pya cih, douccahpaw tuutaw pise kum kheit acihpaw sa kheit kha maee-ute silawnaw lante thuasah, douccahpaw tuutaw nopi kum kheit acihpaw sa kheit kha seithyaanaw silawnaw lante thuasah, douccahpaw tuutepaw sa kheit kha ccawkunaw silawnaw lante thuasah,15te ransi phing leipaw sanlou sua kheit, chitui te pykuhpaw vaekhui te raepaw sanlou aphepaw hae te chitui pykuh zah ransi phing leipaw sanlou apahpaw hae, ccathae silawnaw te niapaw silawnaw lasung hae kha Bawipaw kalan a pya cih.16Ranpibawi nynh tuh-e hae tuh Bawipaw malang a thuakhae cih zah, a seithyaanaw silawnaw te maee-ute silawnaw kha a raepah cih,17ransi phing leipaw sanlou ryte tuutepaw kha ccawkunaw silawnaw lante Bawipaw kalan a pya cih; ranpibawi nynh ccathae silawnaw te niapaw silawnaw kha mah a rae cih.18Oute nazir ccungccaw athuapaw nynh a thyaasahkupaw a lu kha tungkunaw bu thuakaw kyakhe a ngokuh cih, te a thyaasahkupaw a lu kyate sang kha a lah cih zah ccawkunaw silawnaw zakaw umpaw maee kyakhe a phung cih.19A thyaasahkupaw a sang kha a ngokuh koute, ranpibawi nynh a thungkuh vae paw tuutepaw alya, sua lungkhu e ransi phing leipaw sanlou aphepaw phe kheit te ransi phing leipaw sanlou apahpaw phe kheit kha a lah cih zah nazir ccungccaw athuapaw kuihphe kyakhe a nung cih.20Oute ranpibawi nynh tuh-e hae tuh Bawipaw malang khe hangthung-hebiate silawnaw lante a hangthung cih; tuh-e hae tuh hangthung athuapaw aby te pya athuapaw aphae ryte ranpibawi nynh a ccou lanpaw athyaapaw nynh thua hae. Tukoute nazir ccungccaw nynh misutui kha a neih kho cih.
21E hynh byakinkunaw a raepaw nazir ccungccaw hanlan upadi nynh thua. Bawipaw kalan a silawkunaw tuh, ccangpaw a cyi khopaw laelan, a byakinkunaw thyhte a rae hahe cih. A thyaanaw elang upadi kha zuite, byakinkunaw a rae thyhte a cyih cih. Ranpibawi Hythua Pyanaw
22Bawipaw nynh Moses kha hynhte a hopya:23Aaron te a ccapaw hae kha hynhte hopah hae, Israel hae tungvaw hynhte hythua na pya cih oh zah hynhte na hopah cih oh:24Bawipaw nynh hythua ae pya oh sah lah, ae do-oih vae oh sah;
25Bawipaw nynh nae tungvaw a mitmae awsah sah lah, thaw ae ccih vae oh sah;
26Bawipaw nynh nae tungvaw maehoynaw ae pya oh sah lah, daenaw ae pya vae oh sah.
27Ou tuhte minmin nynh ka min kha Israel hae kya ho hae sah lah, kae nynh minmin kha hythua ka pya cih hae. Cciakhaetu hae kya-e Pyapaw hae
1Moses nynh beikbu kha a thadynsah koute a uccaw balyn rykhate chitui thuh zah a thyaasah, te silawhang kha a angphe balyn rykhate chitui thuh zah a thyaasah, tuh-e balyn tuh he a thangsah nin khe,2ria athua hae paw kha a uktu hae paw Israel piccan hae, mih puizia kya-e lupi hae, phin raveih kya-e cciakhaetu hae nynh silawnaw kha a rae hae.3Minmin nynh mih silawnawpaw hae kha Bawipaw malang a thuakhae hae, adawkuhpaw lee ccangtaruh te tangnuapaw sa haw lae ning, cciakhaetu lu ning elang lee ccangkheit cci, lu kheit elang tangnuapaw sa kheit cci thua zah, hynh-e hae hynh minmin nynh beikbu malang a pya hae.4Oute Bawipaw nynh Moses kha hynhte a hopya:5Minmin nynh tungkunaw bu ryalawnaw kya a mang ccaw hae, hynh-e hae hynh minmin kyate ccoupah hae lah Levi phin hae kalan khe mih ryalaw raveih thyhte pya hae, a ci.6Tukeiccuze Moses nynh lee hae te tangnuapaw hae kha lah hae zah Levi phin hae kalan a pya hae.7Lee ccangning te tangnuapaw sa ning kha Gershon phin hae kalan mih ryalaw raveih thyhte a pya hae;8te lee ccangpali te tangnuapaw sa tarya kha Merari phin hae kalan, mih ryalaw raveih thyhte, ranpibawi Aaron ccapaw Ithamar khuakhannaw zakaw khe a pya hae.9Thuasalama Kohath phin hae kha pawpaw mah pya khyh hae, pawccecize minmin tuh raw vawlan puihpaw athyaapaw uccaw hae do-oihpaw ryalaw kha pya athua hae.
10Cciakhaetu hae nynh silawhang kha chitui a thuh lya hae khe, silawhang thyaasahnaw hanlan silawnaw hae kha mah a rae hae; cciakhaetu hae nynh mih silawnaw hae kha silawhang malang khe a rae hae.11Bawipaw nynh Moses kha hynhte a hopya: Minmin nynh beikbu thyaasahnaw hanlan mih silawnaw hae kha cciakhaetu lu kheit ze nin kheit ccite a rae cih hae.
12Masaty nin kya silawnaw a rae cih paw tuh Judah phin, Amminadab ccapaw Nahshon nynh thua;13si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;14amynkhuhpaw te phe beihpaw, shekel ahaw aripaw sui pake zung kheit;15maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;16seithyaanaw silawnaw hanlan miaatepaw sa kheit;17te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Amminadab ccapaw Nahshon kya-e silawnawpaw nynh thua.
18Nin ningnaw nin kya tuh Issakhar phin cciakhaetu Zuar ccapaw Nethanel nynh silawnaw kha a rae;19silawnawpaw lante a pyapaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;20amynkhuhpaw te phe beihpaw, shekel ahaw aripaw sui pake zung kheit;21maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise;22seithyaanaw silawnaw hanlan miaatepaw sa kheit;23te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Zuar ccapaw Nethanel kya-e silawnaw nynh thua.
24Nin thumnaw nin kya tuh Zebulun phin cciakhaetu Helon ccapaw Eliab nynh thua:25si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;26amynkhuhpaw te phe beihpaw, shekel ahaw aripaw sui pake zung kheit;27maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;28seithyaanaw silawnaw hanlan miaatepaw sa kheit;29te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Helon ccapaw Eliab kya-e silawnaw nynh thua.
30Nin palinaw nin kya tuh Reuben phin cciakhaetu Shedeur ccapaw Elizur nynh thua:31si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;32amynkhuhpaw te phe beihpaw, shekel ahaw aripaw sui pake zung kheit;33maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;34seithyaanaw silawnaw hanlan miaatepaw sa kheit;35te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Shedeur ccapaw Elizur kya-e silawnaw nynh thua.
36Nin pangawnaw nin kya tuh Simeon phin cciakhaetu Zurishaddai ccapaw Shelumiel nynh thua:37si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;38amynkhuhpaw te phe beihpaw, shekel ahaw aripaw sui pake zung kheit;39maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;40seithyaanaw silawnaw hanlan miaatepaw sa kheit;41te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Zurishaddai ccapaw Shelumiel kya-e silawnaw nynh thua.
42Nin taruhnaw nin kya tuh Gad phin cciakhaetu Deuel ccapaw Eliasaph nynh thua:43si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;44amynkhuhpaw te phe beihpaw, shekel ahaw aripaw sui pake zung kheit;45maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;46seithyaanaw silawnaw hanlan miaatepaw sa kheit;47te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Zurishaddai ccapaw Shelumiel kya-e silawnaw nynh thua.
48Nin sarinaw nin kya tuh Efraim phin cciakhaetu Ammihud ccapaw Elishama nynh thua:49si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;50amynkhuhpaw te phe beihpaw, shekel ahaw aripaw sui pake zung kheit;51maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;52seithyaanaw silawnaw hanlan miaatepaw sa kheit;53te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Ammihud ccapaw Elishama kya-e silawnaw nynh thua.
54Nin taryanaw nin kya tuh Manasseh phin cciakhaetu Pedahzur ccapaw Gamaliel nynh thua:55si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;56amynkhuhpaw te phe beihpaw, shekel ahaw aripaw sui pake zung kheit;57maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;58seithyaanaw silawnaw hanlan miaatepaw sa kheit;59te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Pedahzur ccapaw Gamaliel kya-e silawnaw nynh thua.
60Nin takuanaw nin kya tuh Benjamin phin cciakhaetu Gideon ccapaw Abidan nynh thua:61si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;62amynkhuhpaw te phe beihpaw, shekel ahaw aripaw sui pake zung kheit;63maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;64seithyaanaw silawnaw hanlan miaatepaw sa kheit;65te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Zurishaddai ccapaw Shelumiel kya-e silawnaw nynh thua.
66Nin hawnaw nin kya tuh Dan phin cciakhaetu Ammishaddai ccapaw Ahiezer nynh thua:67si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;68amynkhuhpaw te phe beihpaw, shekel ahaw aripaw sui pake zung kheit;69maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;70seithyaanaw silawnaw hanlan miaatepaw sa kheit;71te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Zurishaddai ccapaw Shelumiel kya-e silawnaw nynh thua.
72Nin haw lae kheitnaw nin kya tuh Asher phin cciakhaetu Okhran ccapaw Pagiel nynh thua:73si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;74amynkhuhpaw te phe beihpaw, shekel ahaw aripaw sui pake zung kheit;75maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;76seithyaanaw silawnaw hanlan miaatepaw sa kheit;77te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Zurishaddai ccapaw Shelumiel kya-e silawnaw nynh thua.
78Nin haw lae ningnaw nin kya tuh Naftali phin cciakhaetu Enan ccapaw Ahira nynh thua:79si a lawnawpaw tuh beikinnthyaa kya-e shekel thyhte, shekel za kheit sung thum aripaw ngun pake zung kheit, shekel sung sari aripaw ngun pakepi zung kheit, ccathae silawnaw hanlan tuh-e zung ning kya phe beihpaw, chitui te pykuhpaw vaekhui;80amynkhuhpaw te phe beihpaw, shekel ahaw aripaw sui pake zung kheit;81maee-ute silawnaw hanlan tangnuapaw anopaw sa kheit, tuutepaw sa kheit, kum kheit acihpaw tuutaw pise sa kheit;82seithyaanaw silawnaw hanlan miaatepaw sa kheit;83te ccawkunaw silawnaw hanlan tangnuapaw sa ning, tuutepaw sa pangaw, miaatepaw sa pangaw te kum kheit acihpaw tuutaw pise sa pangaw nynh thua. E hynh Enan ccapaw Ahira kya-e silawnaw nynh thua.
84E hynh silawhang kha chitui thuh athua nin khe, Israel cciakhaetu hae kyate silawhang elang thyaasahnaw silawnaw nynh thua: ngun pake zung haw lae ning, ngun pakekhupaw zung haw lae ning, sui pake zung haw lae ning,85ngun pake zung kheit cci tuh shekel za kheit sung thum ri zah, pakepi zung kheit cci tuh shekel sung sari ari, ngun angphe balyn tuh beikinnthyaa kya-e shekel thyhte, shekel thong ning za pali acih,86amynkhuhpaw te phe beihpaw sui pake zung haw lae ning tuh beikinnthyaa kya-e shekel thyhte zung kheit ze shekel haw lae ning ri zah sui pake abalyn tuh shekel za kheit ccangkuin acih;87maee-ute silawnaw hanlan sahiin-awvaw abalyn tuh tangnuapaw sa haw lae ning, tuutepaw sa haw lae ning, tuutaw pise kum kheit cih paw sa haw lae ning kha mih ccathae silawnaw ryte; te seithyaanaw silawnaw elang miaatepaw sa haw lae ning;88te ccawkunaw silawnaw elang sahiin-awvaw abalyn tuh tangnuapaw sa kuin lae pali, tuutepaw sung taruh, miaatepaw sung taruh, tuutaw pise kum kheit cih paw sung taruh nynh thua. E hynh silawhang kha chitui thuh athua koute silawhang elang thyaasahnaw silawnaw nynh thua.
89Moses nynh Bawipaw te byahoku khylan tungkunaw bu lungkhu lang he a tee te, byakin thingkua vawlan umpaw thawccinaw haungnaw luki, cherubim ccangning laku kyate amaw kalan a hopyapaw roi kha a thae; Tuhcite amaw kha a hopya. Maeekhua Ccangsari
1Bawipaw nynh Moses kha,2“Aaron kyakhe, ‘Maeekhua hae kha he na aw te, maeekhua ccangsari nynh maeekhuatung malang khe awnaw a pya cih,’ cite hopah,” a cipya.3Aaron nynh tuhcite a cyi; Bawipaw nynh Moses kaw a pya thyhte, maeekhuatung malang khe awnaw pya khylan Aaron nynh maeekhua hae kha a aw.4E hynh sui kha deihping te maeekhuatung raezia nynh thua. Maeekhuatung aleihpaw kyate a haetapaw kyacia deihping te raepaw nynh thua; Bawipaw nynh Moses a langsahpyaku paw pungsan thyhte, aning nynh maeekhuatung kha a rae. Levi Phin hae Thyaasahnaw te Ryalaw
5Bawipaw nynh Moses kha,6“Levi phin hae kha Israel hae laku kyate ko hae lah, thyaasah hae.7Minmin kha thyaasah khylan mih tungvaw khe hynhcite na cyih cih: thyaanawpaw tui khate mih tungvaw na hei cih hae, minmin nynh mih pyn kya-e ming balyn kha a ngokuh cih hae zah mih boeining kha a sukuh cih hae, tuhcite thyaasakuh hae sah.8Oute tangnuapaw anopaw sa kheit te chitui ryte pykuhpaw vaekhui te raepaw ccathae silawnaw kha lah hae sah, te seithyaanaw silawnaw hanlan ccangpaw tangnuapaw anopaw kha na lah cih.9Levi phin hae kha tungkunaw bu malang na thuakhae cih hae zah Israel zapi balyn kha na pum cih hae.10Levi phin hae kha Bawipaw malang he na thuakhae hae te, Israel hae nynh mih kuih kha Levi phin hae tungvaw khe a khang cih hae,11te Levi phin hae nynh Bawipaw ryalaw kha a law ccaw hae cite, Israel hae kyate hangthung-hebiate silawnaw lante, Aaron nynh Levi phin hae kha Bawipaw malang khe a pya cih hae.12Levi phin hae nynh mih kuih kha tangnuapaw hae lu kyakhe a khang cih hae zah, minmin elang seingaethyanaw raepya khylan Aaron nynh Bawipaw kalan khe, sa kheit kha seithyaanaw silawnaw hanlan, ccangpaw sa kheit kha maee-ute silawnaw hanlan a pya cih.13Oute Levi phin hae kha Aaron te a ccapaw hae malang khe na thadynsah cih hae zah, hangthung-hebiate silawnaw lante minmin kha Bawipaw kalan na pya cih.14Tuhcite Levi phin hae kha Israel hae laku kyate na phia cih hae zah, Levi phin hae tuh kamaw kya-e athua cih hae.15Tukoute Levi phin hae kha na thyaasah hae zah hangthung-hebiate silawnaw lante na pya kou hae te, tungkunaw bu kya ryalaw khylan a tee cih hae.16Pawccecize minmin tuh Israel hae laku kyate kamaw kalan khaleih mawte pyapaw nynh thua hae; vue kyate a puipaw balyn, Israel hae balyn kya-e ccatawccaw hae hanpaw minmin kha kamaw elang ka lawku vae hae.17Pawccecize Israel hae laku kyaze ccatawccaw thuasah, thanty thuasah kamaw kya-e nynh thua. Izip ram e ccatawccaw balyn kha ka chia nin khe minmin kha kamaw elang ka thyaasah hae,18Levi phin hae kha Israel hae laku e ccatawccaw balyn hanpaw ka lawku vae hae.19Tuhpiaze, tungkunaw bu kya Israel hae elang ryalawpya khylan thuasah, Israel hae nynh beikinnthyaa kalan myarya a naeku vae hae ze, minmin laku shethya a thua khyh nawlan, minmin hanlan seingaethyanaw raepya khylan thuasah Israel hae laku kyate Levi phin hae kha Aaron te a ccapaw hae kalan lasung lang ka pya vae hae,” a cipya.
20Tukeiccuze Moses, Aaron te Israel zapi balyn nynh Levi phin hae tungvaw tuhcite a cyi hae; Levi phin hae kong te asekuh lante Bawipaw nynh Moses kaw a pya thyhte Israel hae nynh Levi phin hae tungvaw a cyi hae.21Levi phin hae nynh mimaw te mimaw kha seinaw kyate thyaasakuh hae zah mih boeining kha a suku hae; oute Aaron nynh minmin kha Bawipaw malang khe hangthung-hebiate silawnaw lante a pya hae, te minmin kha thyaasah khylan Aaron nynh seingaethyanaw kha a raepya hae.22Tukoute Levi phin hae tuh tungkunaw bu kya Aaron te a ccapaw hae malang khe mih rya kha law khylan a tee hae. Levi phin hae te asekuh lante Bawipaw nynh Moses kaw a pya thyhte, minmin nynh Levi phin hae tungvaw a cyi hae.
23Bawipaw nynh Moses kha,24“E hynh Levi phin hae te asekuhpaw nynh thua: kum kuin lae pangaw te palung lang nynh tungkunaw bu kya ryalaw kha a tho cih;25te kum sung pangaw acih hae tetuh ryalaw kyate a haeung cih hae zah ryalah vae lan khyh hae.26Minmin nynh mih uno hae kha tungkunaw bu kya rya a bawm cih hae, thuasalama mih makhaete ryalaw lah lan khyh hae. Tuhcite Levi phin hae mih ryalaw kha na lawsah cih hae,” a cipya. Sinai kya Kawtaw Poi
1Izip ram kyate a pou kou hae te, kum ningnaw, masaty sawpaw kyakhe, Bawipaw nynh Moses kha Sinai ramkaw khe hynhte a hopya:2Israel ccungccaw hae nynh accyh khyapaw kyakhe kawtaw poi kha a tua cih hae.3Hynh-e sawpaw nin haw lae palinaw nin, zetepakaw accyh khyapaw kyakhe kawtaw poi kha na tua cih oh; a upadi balyn te a phung balyn thyhte kawtaw poi kha na tua cih oh, a cipya.4Tukeiccuze kawtaw poi kha na tua cih oh cite Moses nynh Israel hae kha a hopya hae.5Minmin nynh kawtaw poi kha Sinai ramkaw kya, masaty sawpaw, nin haw lae palinaw nin, zetepakaw khe a tua hae. Bawipaw nynh Moses kaw a pya thyhte Israel hae nynh a cyi hae.6Michi rhua kha ty hae zah a thyaa khyh keiccu hae ze, tuh-e nin kya kawtaw poi a tua kho lei hae paw ccungccaw hae a um hae. Minmin nynh tuh-e nin khe Moses te Aaron malang oun thua hae zah,7Moses kyakhe, “Michi rhua kha kae ty keiccuze kae thyaa khyh zemah, Israel hae laku kya khyapaw accyh kyakhe, Bawipaw kya-e silawnaw raenaw kyate kaening kha pawcce khee kae thua cih?” a cipya hae.8Moses nynh minmin kha, “Nanning te asekuh lante Bawipaw nynh paw kaw mou oun pya cipaw ngawtua hin oh,” a cipya hae.
9Bawipaw nynh Moses kha,10“Israel hae kha hynhte hopah hae: Michi rhua kha a ty keiccuze athyaa leipaw nynh thuasah, khycce cceihpaw nanning laku e lukhakheit nynh thuasah, nae ciihan lukhakheit nynh thuasah Bawipaw hanlan kawtaw poi kha a tua mamin cih.11Sawpaw sah ningnaw, nin haw lae palinaw nin, zetepakaw khe minmin nynh kawtaw poi kha a tua cih hae; tuutaw saw kha ransi phing leipaw sanlou te akhahpaw enaw hae ryte a aede cih hae.12Tuh-e tuh awkhua cia laesah lan khyh hae, a ru kha mah khya lan khyh hae; kawtaw poi kha a upadi balyn thyhte minmin nynh a tua cih hae.13Thuasalama athyaapaw te khycce a cceih leipaw nynh kawtaw poituanaw kha a sibia lanze, khyapaw accyh kya Bawipaw kya-e silawnaw kha a rae khyh keiccuze a phin kyate vua athua cih; tuhcihawpaw ccungccaw tuh a seinaw mee kha a teing cih.14Nanning laku umpaw ramccang ccungccaw lukhakheit nynh Bawipaw hanlan kawtaw poi kha tua a ry lanze, kawtaw poi upadi thyhte thuasah, kawtaw poi phung thyhte thuasah a tua cih; ramccang ccungccaw te ramccungccaw nynh upadi ccangkheit kyalya na hoi cih oh,” a cipya. Maeking te Maee (Exo 40.34-38)
15Beikbu kha thadynsah athua nin khe, maeking nynh beikbu, ccaekiakhannaw bu kha phang a bong; maeking tuh beikbu luki khe zete te awkhualan awkhua cia maee hawte alangkuh.16Tuhcite zungzae a um: khuadae ccyh kya maeking nynh bong zah, khuazi ccyh kya maee hawte a aw.17Maeking tuh bu luki kyate a hangku thung takyh vae ze, Israel hae tuh leih a cceih hae; te maeking a nebungnaw hmin kyakhe Israel hae tuh ryahmin leih a tahkuh hae.18Bawipaw nynh kaw a pyanaw hae kyakhe Israel hae tuh leih cceih hae zah Bawipaw nynh kaw a pyanaw hae kyakhe ryahmin kha leih a tahkuh hae. Beikbu luki kya maeking a um lungkhu balyn tuh ryahmin kya a um hae.19Maeking tuh beikbu luki kya nin patae a um vae heize, Israel hae nynh Bawipaw kaw kha ngae hae zah cceih khyh hae.20Vaekhakheit vae ze maeking tuh beikbu luki kya nin beihtaraw kyalya leih um zah, Bawipaw kawpyanaw thyhte ryahmin kya leih a um hae; oute Bawipaw kawpyanaw thyhte leih a cceih hae.21Vaekhakheit vae ze maeking tuh zete te awkhualan awkhua cia leih a um; awkhua khe maeking a hangku thung vae ze a cceih hae, maeking tuh nin kheit te zi kheit po a um vae zemah maeking he a hangkuh te, leih a cceih hae.22Maeking tuh beikbu luki khe nin ning thuasah, sah kheit thuasah, khaw cia thuasah po a um ze, Israel hae tuh ryahmin kya po leih um hae zah cceih khyh hae; thuasalama maeking he a hangkuh thung te, minmin tuh leih a cceih hae.23Bawipaw nynh kaw a pyanaw hae kyakhe minmin nynh ryahmin kha leih tahkuh hae zah Bawipaw nynh kaw a pya hae thyhte leih a pou hae. Bawipaw nynh Moses kyate kaw a pya thyh hae te, minmin nynh Bawipaw kaw kha a ngae hae. Ngun Mungkae hae
1Bawipaw nynh Moses kha hynhte a hopya:2Ngun mungkae ccangning kha raetua; khah-e hae kha deihping te na rae cih hae; ccungccaw zapi pumnaw elang te ryahmin phounaw elang mungkae hae kha na mang cih.3Mungkae ccangning kha tuu athua vae ze, zapi balyn tuh na malang tungkunaw bu thuakaw kyakhe a pumkuh cih hae.4Thuasalama ccangkheit kyalya kha tuu athua lanze, Israel phin hae kya-e lupi hae tuh na malang a pumkuh cih hae.5Raeringkunawpaw kha he na tuu te, nithua lang e ryahmin hae kya um hae paw tuh a cceih cih hae;6vaeningnaw raeringkunawpaw kha he na tuu te, alia lang e ryahmin kya-e hae tuh a cceih cih hae. Minmin nynh ccia lan a ci takyh vae hae ze, raeringkunawpaw kha tuu athua cih.7Thuasalama zapi kha suelua lan accan vae ze, na tuu cih, thuasalama raeringkunawpaw roi kha na ccaesah lan khyh.8Aaron ccapaw hae, ranpibawi hae nynh mungkae hae kha a tuu cih hae, e hynh nanning elang nae she takyh kya zungzae tynpaw phungzae athua cih.9Nanning ae tuaasah oh paw nae rhaw hae kha nae ram kya rhawtuk khylan he na ccia vae oh ze, mungkae khate raeringkunawpaw roi kha na ccaesah cih oh, tuhteze nynh Bawipaw nae Pachia malang khe liathui na thua cih oh zah, nae rhaw hae kyate khum na thua cih oh.10Nae lungpaw nin, accyh khyapaw poi hae te nae sawpaw athotakawnaw kyakhe mah nae kya-e maee-ute silawnaw hae te ccawkunaw silawnaw hae vawlan khe mungkae hae kha na tuu cih oh; tuh-e hae tuh Bawipaw nae Pachia malang khe nysah thuitu lante nanning ccelang rya a lah cih hae: kae tuh Bawipaw nae Pachia nynh ka thua. Sinai kyate Pounaw
11Kum ningnaw kum, sah ningnaw nin kuin nin khe maeking tuh byakinnaw beikbu vawlan khate ahangkuh thung.12Oute Israel hae tuh Sinai ramkaw kyate san kheit koute san kheit lang a cceih hae, te maeking tuh Paran ramkaw khe a thadyn.13Bawipaw nynh Moses kyate kaw a pya thyh hae hawte, minmin nynh masaty a ccia hae paw nynh thua.14Judah ryahmin kya-e hae tuh aphuphute masaty a cceih hae, tuh-e aphu marya uktu tuh Amminadab ccapaw Nahshon nynh thua.15Issakhar phin aphu a uktu tuh Zuar ccapaw Nethanel nynh thua;16Zebulun phin aphu a uktu tuh Helon ccapaw Eliab nynh thua.
17Oute beikbu kha phou thua zah, Gershon phin hae te Merari phin hae nynh beikbu kha puih hae zah a cceih hae.18Tukoute Reuben ryahmin kya-e hae tuh aphuphute a cceih hae; tuh-e aphu ccapyn a uktu tuh Shedeur ccapaw Elizur nynh thua.19Simeon phin aphu a uktu tuh Zurishaddai ccapaw Shelumiel nynh thua,20Gad phin aphu a uktu tuh Deuel ccapaw Eliasaph nynh thua.
21Oute athyaapaw uccaw hae kha a phu hae paw Kohath phin hae tuh a cceih hae; minmin athua maw hae khe, beikbu kha phe a la thadynsah vae hae.22Tukoute Efraim phin ryahmin kya-e hae tuh aphuphute a cceih hae, tuh-e aphu marya a uktu tuh Ammihud ccapaw Elishama nynh thua.23Manasseh phin aphu a uktu tuh Pedahzur ccapaw Gamaliel nynh thua,24te Benjamin phin aphu a uktu tuh Gideon ccapaw Abidan nynh thua.25Ryahmin balyn kha nulang te a rintu hae Dan ryahmin kya-e hae tuh aphuphute a cceih hae, tuh-e aphu ccapyn a uktu tuh Ammishaddai ccapaw Ahiezer nynh thua.26Asher phin aphu kha a uktu tuh Okhran ccapaw Pagiel nynh thua,27Naftali phin aphu kha a uktu tuh Enan ccapaw Ahira nynh thua.28E tuh Israel hae nynh he a cceih hae te, aphuphute ataruinte a ccia hae paw kha nynh thua.
29Moses nynh amaw a pupaw, Midian minphuinpaw Reuel ccapaw Hobab kha, “Kaening tuh Bawipaw nynh, ‘Kae pya cih oh,’ oun cipyapaw hmin kalan kae cceih vae, kaening ryte cceihbua, hoyte kae ccuepe cih; pawccecize Bawipaw nynh Israel hanlan ahoypaw kha bya a kinpyaku vae,” a cipya.30Thuasalama Hobab nynh Moses kha, “Ka cceihbua lan khyh, ka ram lang te ka puizia hae kalan ka ki cih,” a cipya.31Moses nynh, “Kaening hynh oun cciataw nan, pawccecize nang tuh ramkaw kya ryahmin tahkunaw hmin kha na nyh zah kaening elang mit hawte rya nae lawpah cih.32Tuh apiaze, kaening ryte na cciabua lanze, Bawipaw nynh kaening elang hoynaw a rae thyhte namaw elang hoynaw kha kae raepah cih,” a cipya.
33Tuhcite minmin tuh Bawipaw mua kyate nin thum laanccia asawnaw lang a cceih hae, Bawipaw kya-e byakin thingkua tuh nin thum laanccia asawnaw mih malang khe minmin hanlan haeungnaw hmin ccung khylan a cceih ty,34ryahmin kyate he a cceih hae te, Bawipaw maeking tuh khuadae ccyh kya mih luki khe a um.
35Tuh-e thingkua tuh he a ccia takyhte, Moses nynh, “Pou Bawipaw , thoku tua, na rhaw hae tuh phiariphiarae um hae sah, te na rhaw hae tuh na malang khe ccue hae sah,” a ci.
36Te thingkua tuh a haeung takyh vae ze, Moses nynh, “Pou Israel athong patae hae Bawipaw , yn kitua,” a ci. Laesia Ram kya Byalungnaw
1Ccungccaw hae nynh mih vawsawnaw kong kha Bawipaw a thaenaw khe he a ccohkuh hae tuh, Bawipaw nynh thae zah a thinrianaw tuh maee lang arua vae. Oute Bawipaw maee nynh minmin kha u hae zah ryahmin akin-akae um hae paw ryanaw bu abang kha a u hae.2Te ccungccaw hae nynh Moses kalan a sia hae; Moses nynh Bawipaw kalan sawsang zah maee tuh adae.3Bawipaw maee nynh minmin kha a u keiccu hae ze, tuh-e hmin tuh Taberah a ci hae.
4Israel hae kya a cceihbua hae paw ramccang hae tuh myarya saw rangthua hae; Israel hae nynh mah bua rah hae zah, “Ae lanpaw saw kha, myng ah hoi oh sah lah ii!5Izip ram kya ngasaw kha alakawte leih ah ae oh, zinae, phazecci, suin naw, suinse te suinraw kha myarya ngae lang um;6thuasalama atu tuh ah thawzung athang vae, hynh-e manna sanlou ho leite tuh pawpaw mah do lanpaw um vae khyh,” a ci hae.
7Manna tuh koriander amung te lokuh zah azong tuh angro te nynh aloku.8Ccungccaw hae nynh ccia bungthungte manna kha sueluakuh hae zah, mianawpaw te a miaa hae, tuhkhyhze sung kya a phung hae, oute ang kya thung hae zah sanlou aphepaw lang a rae hae; tuh-e nynh athuapaw tuh chitui te athoukuhpaw sanlou aphepaw nynh athuapaw te nynh aloku.9Ryahmin vawlan khuazi khe vuiraw a ccaw vae ze, manna tuh vuiraw ryte leih accahbua.
10Ccungccaw hae nynh mih innbyn raveihte mih bu thuakaw kyakhe mih balyn te a raw hae paw kha Moses nynh a thae. Oute Bawipaw tuh myarya a thinria, te Moses tuh a lunghoy khyh.11Tukeiccuze Moses nynh Bawipaw kha, “Pawcce na seepaw tungvaw kya myarya ahoy lei lante nae cyi? E ccungccaw balyn kya-e phupaw kha ka tungvaw nae khang zah pawcce na malang maehoynaw ka mue khyh?12E ccungccaw hae balyn hynh ccaaw lang ka poi hae paw zawtou? Mih minpaaw hae kya bya na kinpyaku hae paw ram langkhe, ‘Ccaaw do-oihtu nynh matei a zupaw ccaaw kha a hang hawte, minmin kha na by kya pom hae lah cciakhae hae,’ cite nae hopyapaw tuh, minmin hynh ccaaw lang ka saah hae paw zawtou?13E ccungccaw balyn kalan pya lanpaw saw kha tei e mou ka lah cih? Pawccecize minmin nynh raw biate kamaw kalan oun cceih hae zah, ‘Ae lanpaw saw oun pya!’ a ci hae.14E ccungccaw balyn hynh ka makhaete ka phu kho lan khyh hae, pawccecize minmin tuh ka hanlan myaryamaw a ri hae.15Hynhcite ka tungvaw na cyi lan thua zetuh, kharouh yn theih kangmaw—na malang maehoynaw ka mue lanze, riathaenaw yn tungsah nan,” a ci. Piccan Sung Sari
16Tukeiccuze Bawipaw nynh Moses kha, “Ccungccaw hae lakuze piccan lang te minmin a uktu bawi lang na ny hae paw Israel piccan hae sung sari kha kamaw hanlan suelua hae; tungkunaw bu kalan cciakhae hae lah tuin kya namaw ryte thadynsah hae.17Kae rungbung cih zah tuin kya nang te byahoku lan; te na tungvaw umpaw muisaw abang kha ka lah cih zah mih tungvaw ka nung cih; phupaw balyn kha na makhaete na phu khyh nawlan, minmin nynh ccungccaw hae kya-e phupaw kha namaw ryte a phubua cih hae.18Te ccungccaw hae kha hynhte hopah hae: Awkhualan hanlan thyaasakuh oh lah saw na ae cih oh; pawccecize Bawipaw nynh phe a thae lante na rah oh zah, ‘Ae lanpaw saw kha myng ah hoi oh sah lah ii! Aening hanlan Izip ram maw nynh ahoyhua ccaccing,’ na ci oh. Tukeiccuze Bawipaw nynh saw ae pya cih oh zah na ae cih oh.19Nanning nynh saw kha nin kheit, nin ning, nin pangaw, nin haw, nin kuin kyalya thua leite,20sah kheit lungkhu—nae naduh kyate saw atolang phe pou lang te nae hanlan luathua-ae-ui phe um lan ciate na ae cih oh—pawccecize nae laku umpaw Bawipaw kha na vua oh zah amaw malang raw biate, ‘Pawcce Izip ram kyate kae la pou?’ na ci oh cite hopah hae,” a cipya.21Thuasalama Moses nynh, “Kamaw ka umbuanaw ccungccaw hae kyaze ccu te cceih hae paw hynh cciing taruh acih hae; te nang nynh, ‘Minmin nynh sawpaw sah kheit lungkhu a ae lan hae paw saw ka pya cih hae,’ na ci.22Minmin elang chia lanpaw tuuphu te miaa phu tuh phe zaw lan a um tou? Minmin elang kyng lanpaw ngasaw so rili kya phe zaw lan a um tou?” a cipya.23Bawipaw nynh Moses kha, “Bawipaw kuih tuh myaryamaw adyn tou? Ka bya hynh na hanlan accing cih tou, ccing lan khyh tou cipaw atu na muih cih,” a cipya.
24Tukeiccuze Moses nynh atolang pou zah Bawipaw bya kha ccungccaw hae kalan a hopya hae; te ccungccaw piccan sung sari kha pum hae zah bu pepan po voilu lan a nung hae.25Oute Bawipaw tuh maeking khate yn rungbung zah Moses kha bya a beih, te Moses kya umpaw muisaw abang kha lah zah piccan sung sari kyakhe a nung; mih tungvaw kya muisaw he a um te, minmin nynh profehbya kha a ho hae. Thuasalama minmin nynh tuhcite bua cyih vae khyh hae.
26Eldad cikuhpaw te Medad cikuhpaw pise lu ning tuh ryahmin kya um hae zah muisaw tuh mih tungvaw a um; minmin tuh min a riabua hae paw athua hae zemah bu kalan cceih khyh hae, tukeiccuze ryahmin kya profehbya kha a ho hae.27Te ccangvaepaw lu kheit nynh ccue zah Moses kha, “Eldad te Medad tuh ryahmin kya profehbya a ho cciamang hae,” a cipya.28Te Moses nynh a popaw pise hae lakuze lu kheit athuapaw, Moses a bawmtupaw, Nun ccapaw Joshua nynh, “Ka bawipaw Moses, minmin hynh daesah hae!” a cipya.29Thuasalama Moses nynh amaw kha, “Ka hanlan na eiung tou? Bawipaw ccungccaw balyn tuh profeh thua hae sah, Bawipaw nynh a muisaw kha minmin tungvaw nungsah!” a cipya.30Te Moses te Israel piccan hae tuh ryahmin lang a cceih hae. Vamyng hae
31Oute Bawipaw kyate khisan tuh azaw, te rili kyate vamyng hae kha tuh-e khisan nynh mung hae zah ryahmin pe khe, hynhlang te nin kheit laanccia, khuhlang te nin kheit laanccia, ryahmin balyn po voilu lan, laephi vawlan dong ning athaaw lante a ccawsah.32Te ccungccaw hae nynh tuh-e nin, tuh-e zi te awkhualan balyn khe vamyng hae kha a suelua hae; azyahua a sueluapaw nynh homer ccanghaw a suelua; te ryahmin pepan balyn khe rousah khylan a rei hae.33Thuasalama vamyng saw tuh mih haw laku a um lya, a ae kou maw hae khe, Bawipaw thinrianaw tuh ccungccaw hae tungvaw maee lang rua zah Bawipaw nynh ccungccaw hae kha myarya lepaw shethya te de a tah hae.34Tukeiccuze tuh-e hmin tuh Kibroth-hattaavah a ci hae, pawccecize tuh-e hmin kyakhe saw rangthuapaw ccungccaw hae kha laephi kya a u hae.35Ccungccaw hae tuh Kibroth-hattaavah kyate Hazeroth lang a cceih hae. Aaron te Miriam Eiungnaw
1Hazeroth kya a um lya hae khe, Moses nynh zu a hoipaw Kush nopinung keiccuze Miriam te Aaron nynh Moses tungvaw thethya a ho hae (pawccecize Moses nynh Kush nopinung kha zu lang a hoiku ccaccing);2te minmin nynh, “Moses kyate rou tou Bawipaw nynh bya a ho? Kaening kyate so byaho khyh tou?” a ci hae. Bawipaw nynh tuh-e tuh a thae.3Moses tuh laephi vawlan umpaw ccungccaw balyn laeze a lungne huapaw nynh thua.4Vaekheitmawte Bawipaw nynh, Moses, Aaron te Miriam kha, “Tungkunaw bu kalan nanning lu thum oun pou oh,” a cipya hae. Tukeiccuze minmin lu thum tuh a pou hae.5Oute Bawipaw tuh maeking tung khate yn rungbung zah bu thuakaw kyakhe a thadyn, te Aaron te Miriam kha ko hae zah minmin tuh parouhte malang khe a pou hae.6Te Bawipaw nynh, “Ka bya hynh thae oh:Nanning laku kya profeh haehe a um hae te,kae, Bawipaw nynh minmin kalan khevizin kya ka nysaku hae;mih maan kya ka hopya hae.7Ka ryalahtupaw Moses kya tuhtuhte thua khyh;aning tuh ka innbyn balyn kyaa lungzipaw nynh thua.8Aning kha mitmae hawiliakutebya ka hopya—phohpawbya lante thua leiteccaerarih lan ka hopya;te aning nynh Bawipaw muinsan kha a muih.Pawcce ka ryalahtupaw Moses tungvaw thethya ho lan na ri khyh oh?” a cipya hae.9Te Bawipaw thinrianaw tuh minmin tungvaw maee lang arua, te Bawipaw tuh a ki vae.
10Maeking tuh bu luki te he a nuekuh te, Miriam tuh vaethya ccinaw kae zah vuiraw hawte a raw. Te Aaron nynh Miriam kalan maeleihkuh zah vaethya ccinaw a kaepaw kha a muih.11Oute Aaron nynh Moses kha, “Pou ka bawipaw, kae ngaee kae bu keiccuze kae raepaw seinaw hanlan de yn tah nan.12A nung vue kyate he a pou te, a ngesaw angankuh ro thua zah a pui takaw te a chihpaw hawte Miriam kha thuasah nan,” a cipya.13Te Moses nynh Bawipaw kalan khe, “Pou Pachia, thawccinawte Miriam kha dansah tua,” a cipya.14Thuasalama Bawipaw nynh Moses kha, “A paaw nynh a mae kha a thoi lanze, aning tuh nin sari lungkhu maethyate um lan khyh tou? Miriam kha ryahmin atolang nin sari pousah hae sah, tukoute ryahmin lungkhu lang bua a teekhae cih hae,” a cipya.15Tukeiccuze Miriam kha nin sari lungkhu ryahmin atolang a pousah hae; Miriam kha ryahmin lungkhu lang bua teekhae athua makhia tuh ccungccaw hae tuh malang ccia leite a um hae.16Tukoute ccungccaw hae tuh Hazeroth kyate cceih hae zah Paran ramkaw khe ryahmin a tahku hae. Dophitu hae Sawnaw (Deu 1.19-33)1Bawipaw nynh Moses kha,2“Israel hae kalan ka pya cih hae paw Kanaan ram dophi khylan ccungccaw hae kha saw hae; mih thokeinaw phin raveih kya-e cciakhaetu pise lu kheit cci kha na saw cih hae,” a cipya.3Tukeiccuze Bawipaw kawpyanaw thyhte, Moses nynh Israel hae laku e cciakhaetu pise balyn kha Paran ramkaw kyate a saw hae.4E hae hynh mih min nynh thua hae: Reuben phin kyate Zakkur ccapaw Shammua;5Simeon phin kyate Hori ccapaw Shafat;6Judah phin kyate Jefunneh ccapaw Kaleb;7Issakhar phin kyate Josef ccapaw Igal;8Efraim phin kyate Nun ccapaw Hoshea;9Benjamin phin kyate Raphu ccapaw Palti;10Zebulun phin kyate Sodi ccapaw Gaddiel;11Josef phin (e hynh Manasseh phin kyate) kyate Susi ccapaw Gaddi;12Dan phin kyate Gemalli ccapaw Ammiel;13Asher phin kyate Mikhael ccapaw Sethur;14Naftali phin kyate Vofsi ccapaw Nahbi;15Gad phin kyate Makhi ccapaw Geuel.16E hae tuh Moses nynh ram dophi khylan a saw hae paw min nynh thua. Te Moses nynh Nun ccapaw Hoshea min kha Joshua cite a rulae.
17Moses nynh Kanaan ram dophi khylan minmin kha saw hae zah, “Negeb lang khuin la cceihthung oh lah, mua lang e khua taraw kalan la cceihthung oh,18te ram tuh pawmou alo, tuin ram kya um hae paw ccungccaw hae tuh mih thaw asae tou azya tou, alung hae tou azya hae tou,19a umnaw hae ram tuh ahoy tou athah tou, a umnaw hae khua tuh lungrua ruakhawkuh tou ruakhawkuh khyh tou,20te ram tuh a hoirum tou a ryachi tou, tuin kya thingku hae um tou um khyh tou cipaw la do oh. Nae rawthung sah lah, tuin ram kya-e thingthae beihtaraw kha nae phu cih oh,” a cipya hae. Tuh-e ccyh tuh misu thae avoi typaw avoi ccyh nynh thua.
21Tukeiccuze minmin nynh cceihthung hae zah Zin ramkaw kyate Lebo-hamath pe, Rehob kyacia ram kha a dophi hae.22Negeb lang cceih hae zah Hebron khua athua hae; tuin kya Anak ciihan hae Ahiman, Sheshai te Talmai a um hae. (Hebron tuh Izip ram e Zoan khua a sak maw hae kum sari lyate a la sak hae paw khua nynh thua.)23Te Eshkol Ccya kya a thua hae, te tuin kya umpaw misu ange nge kheit alonahpaw aran kha bae hae zah lu ning nynh puihnawpaw te a puih hae. Ccalee thae te eboh thae kha mah a phubia hae.24Israel hae nynh tuin kyakhe misu nge kha a bae keiccu hae ze, tuh-e hmin tuh Eskhol Ccya a ci hae. Dophitu hae kyate Thaesahnaw
25Nin sung pali aro koute dophitu hae tuh tuh-e ram kyate a ki hae.26Te minmin tuh Paran ramkaw Kadesh kya um hae paw Moses, Aaron te Israel zapi balyn kalan a thua hae; minmin te zapi balyn kalan khe bya oun phupah hae zah tuh-e ram kya-e thingthae kha a muihsah hae.27Te minmin nynh, “Kaening nae sawnaw ram kya kae thua; tuh-e ram kya mateitui te khoilutui lua zah hynh-e hynh ram athae nynh thua.28Tuhzemah tuin ram kya khuasahpaw ccungccaw hae tuh mih thawsae; khua hae tuh lungrua te koihlupaw thua hae zah myarya ale hae; tuh apiaze, Anak ciihan hae kha tuin kya kae muih hae.29Amalek hae tuh Neged ram kya khuasah hae; Hit hae, Jebus hae te Amor hae tuh mua vaw e khua taraw kya khuasah hae; te Kanaan hae tuh rili pe te Jordan vaw kin kya a um hae,” a cipya hae.
30Thuasalama Kaleb nynh ccungccaw hae kha Moses malang khe zya daesah hae zah, “Atu palou cceih oh sih lah, khah-e ram kha lah kangmaw oh sih, pawccecize khah-e ram kha solei ah tae cih oh,” a cipya hae.31Oute Kaleb ryte a cceihkheih hae paw nynh, “Khah-e ccungccaw hae kha ah dou kho lan khyh oh, pawccecize minmin tuh aening laeze mih thawsaehua,” a ci hae.32Tukeiccuze minmin nynh a dophi hae paw ram kong kha Israel hae kya thawthya lante hopah hae zah, “Kae dophipaw ram tuh ram lungkhu a um hae paw kha syrote a aepaw ram nynh thua; te tuin ram kya kae muihpaw ccungccaw balyn tuh mih pynrua myarya ale hae.33Tuin kyakhe Nefilim hae (Nefilim kyate a tho hae paw Anak ciihan hae) kha kae muih hae; kaemaw te kaemaw kha tungkhipaw hawte kae muihkuh zah minmin muihnaw kya mah tuhawte nynh kae thua,” a cipya hae. Ccungccaw hae nynh A Ei hae
1Oute zapi balyn tuh thawte sia hae zah, ccungccaw hae tuh tuh-e khuazi kya a rah hae.2Te Israel hae balyn nynh Moses te Aaron tungvaw a ccohnuaku hae; zapi balyn nynh minmin kha, “Izip ram kya myng kae la chih sah lah! Tuhkhyhze e ramkaw kya maw myng kae chih sah lah!3Pawcce Bawipaw nynh thaloi te chia khylan e ram kalan oun cciakhae? Ah zu hae te ah ccaaw hae hynh rhaw kya kyngpaw lang a tang vae cih hae; Izip ram lang ki lanze aening hanlan hoyhua lan khyh tou?” a cipya hae.4Tukeiccuze minmin nynh lu kheit te lu kheit kha, “Cciakhaetu lu kheit pokuh oh sih lah, Izip ram lang ki oh sih,” cite a hoku hae.
5Oute Moses te Aaron tuh Israel zapi a pumkuh hae paw malang khe a bakhung hae.6Te ram a dophi hae paw laku e Nun ccapaw Joshua te Jefunneh ccapaw Kaleb nynh mih boeining kha seiikuh hae zah,7Israel zapi balyn kha, “Kae la dophipaw ram tuh myaryamaw ahoypaw ram nynh thua.8Bawipaw nynh aening tungvaw a lunghoy zetuh, khah-e ram lungkhu lang oun cciakhae cih zah mateitui te khoilutui aluanaw khah-e ram kha oun pya cih.9Bawipaw kha dou nan oh; khah-e ram kya umpaw ccungccaw hae kha rih nan oh, pawccecize minmin tuh aening hanlan looh khaw tou athua hae; minmin kya-e thungkhawnaw tuh minmin kyate nue athua vae, Bawipaw tuh aening ryte a um; minmin kha rih nan oh,” a cipya hae.10Thuasalama zapi balyn nynh minmin kha lung te kae deih cih oh cite a hu hae.
Oute Bawipaw phu-enaw tuh tungkunaw bu kyakhe Israel hae balyn kya a langkuh.11Te Bawipaw nynh Moses kha, “E ccungccaw hae nynh kae kha hohseciamou yn theihrya ung cih hae? Te muihsahnaw balyn kha minmin laku phang ka rae pite, hohseciamou kae kha zyn leite yn vua cih hae?12Minmin kha akaekuh thyapaw ccinaw khate ka zia cih hae zah rho ccou lan khyh hae, te nang kha minmin laeze ale huapaw minphuin lang te athawsae huapaw lang kae rae cih,” a cipya. Moses nynh A Hopia hae
13Thuasalama Moses nynh Bawipaw kha, “Na thawsaenaw khate e ccungccaw hae hynh Izip hae laku kyate na poukhae hae zah, tukoute Izip hae nynh tuh-e tuh a thae cih hae zah,14e ram kya umpaw ccungccaw hae kha a hopah cih hae. Pou Bawipaw , nang tuh e ccungccaw hae laku na um cipaw kha thuasah; Pou Bawipaw , na maeking tuh minmin luki a thadyn lyakhe nang kha mae hawiliakute ae muih hae cipaw kha thuasah, khuadae ze maeking tung te, khuazi ze maee tung te minmin malang na cciapaw kha thuasah minmin nynh a thae vae hae.15Atu hynh-e ccungccaw hae hynh vae kheit kya pong na chia hae ze, namaw kong a thae hae paw minphuin hae nynh,16‘Kae pya cih oh cite bya a kinpyaku hae paw ram lungkhu lang Bawipaw nynh e ccungccaw hae hynh cciakhae kho vae khyh hae zah ramkaw kya phe a chia vae hae,’ cite a ho cih hae.17Tukeiccuze namaw nynh, ‘Bawipaw tuh a lungsaepaw thua zah,atynpaw sungsahnaw te phe abeihpaw,hoyleinaw te kaw-einaw kha a ngaethyapaw,thuasalama aseipaw kha alakawte a luesah leipaw,nungpaaw hae hoyleinaw khaccaaw hae tungvaw kyashe thum, she pali cia a liarupaw nynh thua,’cite bya na kinkupaw kyakhe Bawipaw thawsaenaw tuh lesae sah.19Izip ram kyate atu cia e ccungccaw hae hynh na ngaethya hae hawte, atynpaw na sungsahnaw khate e ccungccaw hae hoyleinaw kha ngaethyatua hae,” a cipya.
20Oute Bawipaw nynh, “Nae ngia thyhte ka ngaethya hae;21tuhzemah kae tuh ka hiin keiccuze laephi balyn hynh Bawipaw phu-enaw te phe abia thyhte,22ka phu-enaw kha thuasah, Izip ram kya te ramkaw kya ka cyipaw muihsahnaw hae kha thuasah muih hae salamah kae kha vae haw yn syntaw hae zah ka bya a ngae lei hae paw ccungccaw hae tuh23kae pya cih oh cite mih minpaaw hae kya bya ka kinpyaku hae paw ram kha muih lan khyh hae; kae yn theihrya hae paw nynh khah-e ram kha muih lan khyh hae.24Thuasalama ka ryalahtu Kaleb tuh thinlung ccangpaw hoi zah a thinlung balynte yn zui keiccuze a la ccianaw ram lungkhu lang ka cciakhae cih zah a ciihan hae nynh khah-e ram kha a pee cih hae.25Amalek hae te Kanaan hae tuh accya hae kya a um keiccu hae ze, awkhualan tuh maeleihkuh oh lah, Rili Se lang cceihpaw laanpi khate ramkaw lang cceih oh,” a ci.
26Te Bawipaw nynh Moses te Aaron kha hynhte a hopya hae:27E ccungccaw hoyleipaw zapi hae nynh kae kha hohseciamou rawsete yn ccohnuakuh ung cih hae? Israel hae nynh ka tungvaw rawsete a ccohku hae paw kha phe ka thae vae.28Minmin kyakhe, Bawipaw nynh, “Kae tuh ka hiin thyhawte, na ho oh paw ka thae thathyhte nae tungvaw ka cyih cih:29achihpaw nae rhua hae tuh e ramkaw ccaccei hin a huekuh cih hae; te milu na ria oh paw balyn, min rianaw kya a umpaw kum kuin te palung lang, kae kha rawsete a ccohkuh hae paw tuh,30nanning khua na sah nawlan oh bya kae kinpyaku oh paw ram lungkhu lang, Jefunneh ccapaw Kaleb te Nun ccapaw Joshua laelan, nanning lu kheit sanmah na tee lan khyh oh.31Thuasalama rhaw nynh a kyng cih hae cite na ho oh paw nae ccaaw hae kha ka teekhae cih hae zah nanning nynh pawlang na ria lei oh paw ram kha a nyh cih hae.32Thuasalama achihpaw nae pyn hae tuh e ramkaw kya a huekuh cih hae.33Te nae ccaaw hae tuh ramkaw kya kum sung pali lungkhu tuurintu hae athua cih hae zah, nyathya achihpaw nae pyn hae tuh ramkaw kya a hueku makhia hae, nae zyn leinaw keiccuze minmin tuh a teing cih hae.34Ram na dophi ccyh oh, nin sung pali thyhte, kum kheit hanlan nin kheit cci thua zah kum sung pali lungkhu nae hoyleinaw kha na ing cih oh, te ka lunghoy leinaw kha na nyh cih oh,” cite hopah hae.35Kae, Bawipaw nynh ka ho vae; kae kha rawsete pynkheihlan a pumkuh hae paw e ccungccaw hoylei hae zapi balyn hynh hynhte solei ka cyih cih hae: minmin tuh e ramkaw kya maemih athua cih hae zah tuin kya a chih cih hae.
36Te Moses nynh ram dophi lan saw hae zah he oun ki hae te, ram a hoyleinaw kong thongpang phute zapi balyn kha amaw tungvaw a ccohsah nuakuh hae paw—37ram konglang thethya oun phu hae paw tuh shethya tungte Bawipaw malang a chih hae.38Thuasalama ram dophi lan cceih hae paw kyaze Nun ccapaw Joshua te Jefunneh ccapaw Kaleb makhae nynh a hiin hae.
39Moses nynh e bya hae kha Israel hae balyn kalan he a hopah hae te, ccungccaw hae tuh thawmawte a rah hae.40Minmin nynh awkhua takaw te tho hae zah mua ahangnaw lang cceihthung hae zah, “Hein kya phang kae um. Bawipaw nynh byakinkupaw hmin kalan kae cceihthung vae cih, pawccecize phe kae sei vae,” a ci hae.41Thuasalama Moses nynh, “Pawcce Bawipaw kawpyanaw kha palei na ei ung oh? Nae laan nae sui ua lan khyh.42Cceihthung nan oh, pawccecize Bawipaw nynh ae umkhae khyh oh; naemaw te naemaw kha nae rhaw hae malang chisaku ry nan oh.43Pawccecize Amalek hae te Kanaan hae nynh tuin kya ae hawilia cih oh zah thaloi te na khuliakuh cih oh; pawccecize nanning tuh Bawipaw nulang zuikunaw kyate na maeleihkuh vae oh zah, Bawipaw tuh nanning ryte um vae lan khyh,” a cipya hae.44Thuasalama Bawipaw kya-e byakin thingkua ryte Moses tuh ryahmin kyate a pou khyh zemah minmin nynh mua alungnaw ram ahangnaw langkhe kaethung lan a tuaku hae.45Oute tuh-e mua ahangnaw kya um hae paw Amalek hae te Kanaan hae nynh oun cceihbung hae zah minmin kha phe a tae hae te, Hormah kyacia a deehui hae. Silawnaw Aphuinphuin
1Bawipaw nynh Moses kha hynhte a hopya:2Israel hae kha hynhte hopah hae: Nanning na um nawlan oh, kae pya cih oh paw ram lungkhu lang he na tee oh te,3tuuphu te khyhze vaetua phu te Bawipaw kalan maee te silawnaw—maee-ute silawnaw khyhze silawnaw kha thuasah, byakinkunaw ccingsah khylan khyhze lungthote silawnaw lante thuasah, accyh khyapaw poi hae kya thuasah—Bawipaw hanlan mynkhuhpaw na raepya oh zetuh,4tuhcihawpaw silawnaw kha Bawipaw kalan a raepaw miakaw nynh ccathae silawnaw kha a raebia cih, tuh-e ccathae silawnaw tuh chitui hin kheit kya-e pum pali pum kheit te apydekuhpaw ahoypaw vaekhui ephah ccangkheit kya-e pumhaw pumkheit nynh thua.5Tuh apiaze, niapaw silawnaw lante misutui hin kheit kya-e pum pali pum kheit kha maee-ute silawnaw khyhze silawnawpaw ryte na pya cih, tuh-e tuh tuutaw sa kheit ccite paccynde lanpaw nynh thua.6Tuutepaw athua ze, ahoypaw vaekhui ephah ccangkheit kya-e pum haw pum ning te chitui hin kheit kya-e pum thum pum kheit apykuhpaw ccathae silawnaw kha na rae cih;7te Bawipaw hanlan mynkhuhpaw, misutui hin kheit kya-e pum thum pum kheit kha niapaw silawnaw lante na rae cih.8Maee-ute silawnaw lante thuasah, silawnaw lante thuasah, byakinnaw ccingsahnaw hanlan thuasah, ccawkunaw silawnaw lante thuasah tangnuapaw sa kheit kha Bawipaw kalan he na pya vae ze,9tangnuapaw ryte ccathae silawnaw, vaekhui kha ephah ccangkheit kya-e pumhaw pum thum te chitui hin angankuh apykuhpaw kha na pya cih,10te niapaw silawnaw lante misutui hin angankuh kha maee te silawnawpaw lang na pya cih, tuh-e tuh Bawipaw hanlan mynkhuhpaw athua cih.
11Tangnuapaw thuasah, tuutepaw thuasah, tuutaw pise thuasah, miaataw thuasah, tuh-e hae sa kheit cci hanlan tuhcite cyi athua cih.12Na silawnaw alung azya thyhte, sa kheit cci kha tuhcite na cyih cih.13Israel minphuin athuapaw miakaw nynh maee te silawnaw, Bawipaw kalan mynkhuhpaw kha hynhcite a cyih cih.14Nae kya a umpaw ramccang ccungccaw nynh thuasah, nanning laku kya zungzae a umpaw nynh thuasah maee te silawnaw, Bawipaw kalan mynkhuhpaw kha a pya ry ze, na cyi oh hawte a cyihbua cih.15Zapi kyaze, nae hanlan te a um buapaw ramccang ccungccaw hanlan upadi ccangkheit kyalya a um cih, nae she takyh kya zungzae tynpaw upadi athua cih; nanning te ramccang ccungccaw hae tuh Bawipaw malang na lokuh cih oh.16Nanning te nae kya a umbua hae paw ramccang hae nynh upadi alokuhpaw te phungzae alokuhpaw kha na hoi cih oh.
17Bawipaw nynh Moses kha,18“Israel hae kha hynhte hopah hae: ‘Kae cciakhaenaw oh ram lungkhu lang na thua oh te,19ram kya-e looh kha na ae takyh vae oh ze, Bawipaw kalan ahlu na pya cih oh.20Masaty anonkuhpaw vaekhui te raepaw sanlou aphepaw kha ahlu lang na pya cih oh; ccathae tinnawpaw kyate ahlu na pya oh hawte na pya cih oh.21Masaty na non oh paw vaekhui kyate ahlu kha nae she takyh kya Bawipaw kalan na pya cih oh.
22“Thuasalama Bawipaw nynh Moses kalan a hopyapaw hynh-e kawbya balyn.23Moses kyate Bawipaw nynh kaw ae pya oh paw atyn-are kha, Bawipaw nynh kaw ae pya nin oh kyate malang nae she takyh kya tuaku ty leite, zui leite na umsei oh ze,24zapi nynh ny leite, tuaku ty leite a cyisei hae ze, zapi balyn nynh phungzae thyhte, maee-ute silawnaw, Bawipaw kalan mynkhuhpaw hanlan anopaw tangnuapaw sa kheit kha ccathae silawnaw te niapaw silawnaw ryte thuasah, seithyaanaw silawnaw hanlan miaatepaw sa kheit kha thuasah a pya cih hae.25Ranpibawi nynh Israel zapi balyn hanlan seingaethyanaw kha a raepah cih hae zah minmin tuh ngaethya athua cih hae; tuh-e tuh tuaku ty leite a cyiseipaw athua keiccuze mih Bawipaw kalan maee te silawnaw, te Bawipaw malang mih seithyaanaw silawnaw kha mih cyiseinaw hanlan oun ccyng hae paw nynh thua.26Israel zapi balyn te minmin laku a um buapaw ramccang hae tuh ngaethya athua cih hae, pawccecize ccungccaw balyn tuh cyiseinaw kya pong a umbua hae.
27“Tuaku ty leite aseipaw lukhakheit nynh seithyaanaw silawnaw hanlan miaa nopi kum kheit acihpaw kha a pya cih.28Te ranpibawi nynh cyiseinaw a raepaw hanlan Bawipaw malang seithyaanaw silawnaw kha a raepah cih, tuaku ty leite a cyihseipaw hanlan seishawnaw kha a raepah cih zah ngaethya athua cih.29Israel ccungccaw ccaccing athuapaw thuasah, Israel hae laku a um buapaw ramccangpaw thuasah cyiseinaw a raepaw lukhakheit hanlan alokuhpaw upadi kha na hoi cih oh.30Thuasalama ramccungccaw thuasah, ramccang ccungccaw thuasah ruasuate seinaw a raepaw tuh Bawipaw maethyalaw keiccuze a ccungccaw hae kyate vua athua cih.31Bawipaw bya kha pawlangria leite a kawbya kha a ro keiccuze, tuh-e ccungccaw tuh vua athua ccaccing cih zah a seinaw mee kha a ing cih,” a cipya. Sabbath Zui leinaw Detahnaw
32Israel hae nynh ramkaw a um lya hae khe, sabbath nin kya maeething a tyapaw lu kheit kha a muih hae.33Tuh-e paw kha a muihtu hae paw nynh Moses, Aaron te zapi balyn kalan khe a thuakhae hae.34Tuh-e paw tungvaw pawte cyi lan cipaw aria loh khyh keiccuze amaw kha phang a khung hae.35Oute Bawipaw nynh Moses kha, “Khah-e paw kha chia athua cih; zapi balyn nynh amaw kha ryahmin atolang khe lung te a deih cih hae,” a cipya.36Bawipaw nynh Moses kaw a pya thyhte, zapi balyn nynh amaw kha ryahmin atolang cciakhae hae zah phe chih lan lung te a deih hae. Boeining kya Ccaankuhpaw
37Bawipaw nynh Moses kha,38“Israel hae kyakhe, nae boeining aky hae kyakhe ccaannawpaw arui kha sui oh lah, aky takyh kya umpaw ccaannawpaw arui kyakhe meizong arui kha heede oh cite hopah hae.39Ccaannawpaw arui kha he na muih oh te, Bawipaw kawbya balyn kha na liathui cih oh zah na cyih cih oh, te nae thinlung te nae mit ryduaanaw kha na zui vae lan khyh oh.40Tukeiccuze ka kawbya balyn kha na liathui cih oh zah na zui cih oh, te nae Pachia hanlan nanning tuh na thyaa cih oh.41Kae tuh nae Pachia thua khylan Izip ram kyate ae poukhae oh paw Bawipaw nae Pachia nynh ka thua: Kae tuh Bawipaw nae Pachia nynh ka thua,” a ci. Korah, Dathan te Abiram kyate Dounaw
1Levi ccapaw Kohath, Kohath ccapaw Izhar, Izhar ccapaw Korah, te Eliab ccapaw hae Dathan te Abiram, te Reuben ciihan Peleth ccapaw On nynh2Israel pise hae za ning sung pangaw, zapi cciakhaetu hae, a pumkuh hae paw kya-e popaw ccungccaw hae, a minthaanpaw ccungccaw hae kha a pum hae, te minmin nynh Moses kha a rawse hae.3Minmin nynh Moses te Aaron kha rawsete pumnuakuh hae zah, “Myaryamaw na lawe vae oh! Zapi balyn tuh athyaa hae paw cci thua hae zah Bawipaw tuh minmin laku a um. Pawcce nanning nynh Bawipaw kya-e zapi hae luki khe na umsahku oh?” a ci hae.4Moses nynh tuh-e bya he a thae tuh, a mae kha a tebaling,5Oute Moses nynh Korah te a phu hae kha, “Hummou Bawipaw ccungccaw athua, hummou athyaa cipaw te hummou Bawipaw kalan naeku lan ua athua cipaw kha Bawipaw nynh awkhua khe oun nysah cih; Bawipaw nynh a po cih paw ccungccaw kha amaw kalan naeku lan a ua cih.6Korah te a phu hae balyn, e hynh cyih oh:7awkhualan pakephepaw hae kha lawkuh oh lah avawlan khe maee khang oh, te Bawipaw malang pakephepaw kyakhe mynkhuhpaw kha nung oh; Bawipaw nynh a popaw tuh athyaapaw ccungccaw athua cih. Levi phin hae nanning, myaryamaw na lawe vae oh!” a cipya hae.8Oute Moses nynh Korah kha, “Levi phin hae, atu ngaetua oh!9Bawipaw kya-e beikbu ryalaw kha law khylan amaw kalan naeku lan, te zapi hae kha ryalawpya khylan mih malang thadyn lan cite Israel Pachia nynh nanning kha Israel zapi kyate ae phia oh paw hynh nae hanlan myaryamaw adih tou?10Nang te na uno Levi phin hae balyn kha amaw kalan naeku khylan Bawipaw nynh ae ua vae oh; tuhzemah ranpibawi lang tangnaw kha mah bua na ccung ung oh!11Tukeiccuze nang te na phu hae nynh Bawipaw kha rawsete pynkheihlan na sueluakuh vae oh. Aaron tungvaw na ccohnuaku oh paw hynh Aaron tuh pawmou athua?” a cipya.
12Moses nynh Eliab ccapaw hae Dathan te Abiram kha a kosah hae; thuasalama minmin nynh, “Kae cceih lan khyh!13Kaening hynh ramkaw kya chia khylan mateitui te khoilutui aluanaw ram kyate nae poukhaepaw zah kaening tungvaw bawi lang na tangpaw hynh adihpaw ryalaw athua zawtou?14Kaening hynh mateitui te khoilutui aluanaw ram lungkhu lang nae cciakhae lei lanpaw te loo hae te misu khokhu hae kha rho lang nae pya lei lanpaw hynh phe aria. E ccungccaw hae mit hynh na khoi cih hae tou? Kaening kae cceih lan khyh!” a ci hae.
15Moses tuh myarya a thinria zah Bawipaw kha, “Minmin kya-e silawnaw kha pawlangriapah nan hae. Minmin kyate lann sa kheit sanmah ka lah khyh zah minmin lu kheit sanmah vawsaw ka pya khyh hae,” a cipya.16Te Moses nynh Korah kha, “Awkhualan nang te na phu hae balyn te Aaron tuh Bawipaw malang na um cih oh;17te nanning lu kheit cci nynh nae pakephepaw kha na ccyngkuh cih oh zah tuh-e pake kyakhe mynkhuhpaw kha na nung cih oh, te pakephepaw za ning sung pangaw tuh nanning lu kheit cci nynh nae pakephepaw kha Bawipaw malang na thuakhae cih oh; nang mah thuasah, Aaron mah thuasah nae pakephepaw kha na thuakhae cih oh,” a cipya.18Tukeiccuze minmin lu kheit cci nynh mih pakephepaw kha ccyngkute maee kha alungkhu khe nung hae zah mynkhuhpaw kha avawlan a khang hae, te tungkunaw bu thuakaw kyakhe Moses ry, Aaron ryte a thadyn hae.19Oute Korah nynh minmin kha rawsete zapi balyn kha tungkunaw bu thuakaw kyakhe a pum hae. Te Bawipaw phu-enaw tuh zapi balyn kya a langkuh.
20Oute Bawipaw nynh Moses te Aaron kha,21“Ccyh sohsoh kya minmin kha ka maemih ccaw hae, e zapi kyate nanning phiakuh oh,” a cipya hae.22Minmin nynh mih mae kha tebaling hae zah, “Pou Pachia, a hiinpaw balyn kya-e muisaw hae Pachia, lu kheit nynh a sei keiccuze zapi balyn tungvaw na thinria cih tou?” a ci hae.
23Te Bawipaw nynh Moses kha,24“Zapi hae kyakhe, Korah, Dathan te Abiram nynh a umnaw hae kyate cceih oh, cite hopah hae,” a cipya.25Tukeiccuze Moses nynh thokuh zah Dathan te Abiram kalan a cceih; Israel piccan hae nynh amaw kha a zui hae.26Moses nynh zapi hae kha, “E ccungccaw hoylei hae bu kyate maeleihkuh oh lah, minmin kya-e pawpaw mah ty nan oh, tuhkhyhze tuh minmin seinaw keiccuze nanning kha ro na thuasei cih oh,” a cipya hae.27Tukeiccuze minmin tuh Korah, Dathan te Abiram nynh a umnaw hae kyate a cceih hae; te Dathan te Abiram tuh oun pou hae zah mih bu thuakaw kyakhe mih zu hae, mih ccaaw hae te mih ccaaw taraw hae ryte a thadyn hae.28Te Moses nynh, “Kamaw lung te ka cyipaw thua leite, e ryalaw balyn hynh law lan Bawipaw nynh kae kha yn saw cipaw hynh-e hynhte na nyh cih oh:29E ccungccaw hae hynh phuchi te chih hae zah, ccungccaw balyn nynh teingpaw kha a teing hae zetuh Bawipaw nynh kae kha yn saw khyh.30Thuasalama Bawipaw nynh athawpaw ccangkhakheit kha rae zah laephi nynh a khalang awte minmin kha a hoi hae paw balyn ryte po laang hae zah mih hiin pite Hell lungkhu lang a ccaw hae zetuh, e ccungccaw hae nynh Bawipaw kha a theihrya hae cipaw na nyh cih oh,” a cipya hae.
31E bya balyn hynh he a ho kou mawte, mih zakaw e laephi tuh akoi vae.32Laephi nynh a khalang aw zah minmin kha mih innbyn hae ryte thuasah, Korah te asekuhpaw ccungccaw miakaw te mih uccaw balyn kha thuasah pong a lang hae.33Tukeiccuze minmin tuh a hoi hae paw balyn ryte mih hiin pite Hell lungkhu lang accah hae; laephi nynh minmin kha husung hae zah ccungccaw zapi laku kyate phe azo hae.34A sia hae paw roi kha mih pepan umpaw Israel hae nynh he a thae hae tuh a ccue hae, pawccecize, “Laephi nynh aening hynh mah oun laangsei cih!” a ciku hae.35Te Bawipaw kyate maee yn pou zah mynkhuhpaw a pya cciamang hae paw ccungccaw za ning sung pangaw kha phe ccung lan a u hae.
36Oute Bawipaw nynh Moses kha,37“Ranpibawi Aaron ccapaw Eleazar nynh maee aruapaw kyate pakephepaw hae kha lahsah lah, maee-e kha pazaesakuh sah.38Pawccecize e misei hae hiinnaw azo keiccu vae ze mih pakephepaw hae tuh athyaa vae hae. Pakephepaw hae kha silawhang ahu lante deihpingpaw pake lang raesah, pawccecize minmin nynh khah-e hae kha Bawipaw malang a pya keiccu hae ze, khah-e hae tuh athyaa hae. Tuhcite minmin tuh Israel hae hanlan muihsahnaw athua cih hae cite hopah,” a cipya.39Tukeiccuze maee kya u athuapaw ccungccaw hae nynh a pya hae paw sohin pakephepaw hae kha ranpibawi Eleazar nynh lah zah silawhang ahu lang a deihping hae.40Aaron ciihan athua leipaw atolang e ccungccaw nynh mynkhuhpaw pya khylan Bawipaw malang naekuh zah Korah te a phu hae hawte athua khyh nawlan Bawipaw nynh Moses kyate Eleazar kalan a hopya thyhte tuh-e pakephepaw hae tuh Israel hae hanlan raeringnaw pyatu nynh thua hae.
41Thuasalama awkhualan khe Israel zapi balyn nynh Moses te Aaron kha rawsete dou hae zah, “Bawipaw ccungccaw hae kha na chia vae oh,” a cipya hae.42Te zapi hae nynh Moses te Aaron kha rawsete he a pumnuakuh hae tuh, Moses te Aaron nynh tungkunaw bu kalan a hawi hae; maeking nynh khah-e bu kha phang bong zah Bawipaw phu-enaw tuh a langkuh.43Oute Moses te Aaron tuh tungkunaw bu malang oun thua hae,44te Bawipaw nynh Moses kha,45“Zapi hae kha ccyh sohsoh kya ka maemih ccaw hae, e zapi hae kyate pou oh,” a cipya. Te minmin nynh mih mae kha a tebaling hae.46Moses nynh Aaron kha, “Na pakephepaw kha lawkuh lah, silawhang kyate maee kha lawte avawlan khe mynkhuhpaw kha utua, te khah-e kha zapi hae kalan arangte cciakhae lah, minmin elang seingaethyanaw raepya tua hae. Pawccecize Bawipaw tuh a thinria vae zah shethya atho vae,” a cipya.47Tukeiccuze Moses nynh kaw a pya thyhte Aaron nynh tuh-e tuh lah zah a pumkunaw hae angaelung langkhe a ccue, shethya tuh tuh-e ccungccaw hae laku phe alangkuh vae. Mynkhuhpaw kha u zah ccungccaw hae hanlan seingaethyanaw kha a raepya hae.48Achihpaw te ahiinpaw laku khe a thadyn; te shethya tuh adae vae.49Shethya te a chih hae paw tuh, Korah kong keiccu a chih hae paw hobia leite, thong haw lae pali za sari acih hae.50Shethya he adae te, Aaron tuh tungkunaw bu thuakaw kya umpaw Moses kalan a ki. Aaron Hoitang
1Bawipaw nynh Moses kha,2“Israel hae kha hopah hae lah, mih puizia kya-e cciakhaetu hae balyn kyate puizia phu kheit cci hanlan hoitang ccangkheit ccite hoitang haw lae ning kha minmin kyate lawtua. Mih hoitang raveih kyakhe mih min kha ccarou zei lah,3Levi hoitang kyakhe Aaron min kha zeitua. Pawccecize puizia phu kheit cci kya-e lupi hae hanlan hoitang ccangkheit cci athua cih.4Tuh-e hoitang hae kha tungkunaw bu lungkhu, byakinnaw malang nang te ah tungkunaw khe nung hae.5Te ka popaw ccungccaw kya-e hoitang tuh anaw yn toih cih; tuhcite Israel hae nynh nang kha palei ae rawse hae zah ae ccohnuaku hae paw kha ka daesah cih,” a cipya.6Moses nynh Israel hae kha a hopya hae; te mih cciakhaetu hae balyn nynh mih puizia thyhte, cciakhaetu lu kheit hanlan hoitang ccangkheit ccite, hoitang haw lae ning kha Moses kalan a pya hae; Aaron hoitang tuh mih hoitang hae kya a umbua.7Tukeiccuze Moses nynh hoitang hae kha ccaekiakhannaw bu lungkhu Bawipaw malang khe a nung hae.
8Awkhualan khe Moses nynh ccaekiakhannaw bu lungkhu lang he a tee tuh, Levi phin kya-e Aaron hoitang tuh anaw phe la toih vae, apaw lungkuhpaw mah la um vae zah apaw phe la paw vae, te avoipaw almond thae hae kha la thae hae.9Oute Moses nynh hoitang hae balyn kha Bawipaw malang kyate Israel hae balyn kalan a cciakhae; minmin nynh do hae zah mih hoitang raveih kha a lawku hae.10Te Bawipaw nynh Moses kha, “Rawsetu hae hanlan raeringnaw pyapaw lante Aaron hoitang kha byakinnaw malang khe bua nung; tuhteze nynh kae yn ccohnuaku hae paw kha na daesah kho cih, tuhkhyhze tuh a chihsei cih hae,” a cipya.11Moses nynh tuhcite a cyi; Bawipaw nynh kaw a pya thathyhte a cyi.
12Israel hae nynh Moses kha, “Aening ah chih vae cih oh; phe ah thang vae oh, ah balynte pong ah thang vae oh!13Bawipaw boei beikinn kalan a naekuhpaw miakaw a chih cih. Ah balynte ah chih vae cih oh tou?” a cipya hae. Ranpibawi hae te Levi Phin hae Ryalaw
1Bawipaw nynh Aaron kha hynhte a hopya: “Nang te na ccapaw hae te na ciihan hae nynh beikinnthyaa te asekuhpaw hoyleinaw kha na ing cih oh, nang te na ccapaw hae makhae nynh ranpibawi thuanaw te asekuhpaw hoyleinaw kha na ing cih oh.2Tukeiccuze nang te na ccapaw hae nynh ccaekiakhannaw bu malang na um lya oh khe, na thokeinaw phin, Levi phin na uno hae nynh nang te mungkute rya ae bawm ccaw hae minmin kha ko hae.3Minmin nynh namaw ryalaw te bu ryalaw balyn kha a lah cih hae. Thuasalama minmin nynh beikinnthyaa uccaw hae te silawhang kalan naekuh lan khyh hae; tuhkhyhze tuh minmin te nang tuh parouhte na chihsei cih oh.4Tungkunaw bu ryalaw hae law khylan te bu ryalaw balyn hanlan minmin kha namaw kya pybua athua hae; atolang e ccungccaw nynh nae kalan naekuh lan khyh.5Thinrianaw tuh Israel hae tungvaw kharouh bua a thua khyh nawlan, naemaw ccaccei nynh beikinnthyaa ryalaw hae te silawhang ryalaw hae kha na lah cih oh.6Kae tuh na uno Levi phin hae kha Israel hae laku kyate a ko hae paw nynh ka thua; minmin tuh tungkunaw bu ryalaw law khylan Bawipaw kalan ap athua hae paw, nae hanlan pyapaw lasung nynh athua hae.7Thuasalama nang te na ccapaw hae nynh silawhang te zokhawpaw boei anulang te asekuhpaw nae ranpibawi ryalaw balyn kha zuakute na lah cih oh. Nae ranpibawi thuanaw kha lasung lang kae pya oh; atolang e humhung zemah a pe lang a naekuhpaw tuh chia athua cih,” a cipya. Ranpibawi Hanpaw
8Bawipaw nynh Aaron kha hynhte a hopya: Israel hae kya-e athyaapaw lasung balyn kyaze kamaw hanlan rae athuapaw silawnawpaw hae kha nang kae pya; khah-e hae kha ranpibawi hanpaw lante nang te na ccapaw hae kalan zungzae hanlan kae pya oh.9E hae hynh maee kya ubia leipaw athyaa huaccepaw uccaw hae athua cih hae: athyaa huaccepaw lante kamaw kalan yn pya hae paw mih silawnawpaw miakaw, ccathae silawnawpaw, seishawnaw silawnawpaw te cyiseinaw silawnawpaw tuh nang te na ccapaw hae nynh na ccou cih oh.10Athyaa huaccepaw hawte na ae cih oh, pise miakaw nynh a ae cih; e hynh nae hanlan athyaapaw athua cih.11E hynh mah nae kya-e nynh thua: Israel hae kya-e hangthung-hebiate silawnaw balyn kya-e lasung hae kyate taekhiate nungpaw miakaw tuh nang, na ccapaw hae te na ccanung hae kalan zungzae hanlan kae pya vae oh; na inn e athyaapaw ccungccaw miakaw nynh khah-e hae kha a ae kho cih hae.12Minmin nynh Bawipaw kalan pya lan a po hae paw ahoy huaccepaw chitui balyn, misutui ahoy huaccepaw balyn te ccathae ahoy huaccepaw balyn kha nang kae pya vae.13Bawipaw kalan oun ccyng hae paw mih laephi kya-e thaety balyn tuh namaw kya-e athua cih; na inn e athyaapaw ccungccaw miakaw nynh khah-e kha a ae kho cih.14Israel hae kyaze hlupaw uccaw miakaw tuh na kya-e athua cih.15Bawipaw kalan hlu athua hae paw ahysuepaw balyn, ccatawccaw te thanty tuh na kya-e athua cih; thuasalama ccatawccaw te athyaa leipaw thanty hae kha tuh na shaw cih hae.16A shawnaw hae mee tuh beikinnthyaa e shekel thyhte, kerah ccangkuin acihpaw ngunphua shekel pangaw khate na khya cih zah sawpaw sah kheit acih te a shaw cih hae.17Thuasalama vaetua thanty, tuu thanty te miaa thanty kha na shaw lan khyh; tuh-e hae tuh athyaa hae. Mih chii kha silawhang vawlan na hei cih zah, mih tho kha maee te silawnaw lante Bawipaw hanlan mynkhuhpaw lang na u cih;18thuasalama mih saw kha tuh hangthung-hebiate silawnaw kya-e aby te a ranglang phae na ccou hawkhate na kya-e athua cih.19Israel hae nynh Bawipaw kalan a pya hae paw athyaapaw ahlu balyn kha namaw, na ccapaw hae te na ccanung hae kalan zungzae tynpaw phungzae lante kae pya vae oh; tuh-e tuh nang te na ciihan hae hanlan Bawipaw malang loi te byakinnaw athua zungzae cih.20Oute Bawipaw nynh Aaron kha hynhte a hopya: “Mih ram kya rho na muebua lan khyh, minmin lakuze neeku buapaw thyhsan na hoi lan khyh; kae hynh Israel hae laku e na hanpaw te na rho nynh ka thua.
21“Levi phin hae nynh tungkunaw bu kya-e ryalaw kha a law keiccu hae ze, Israel hae kya-e pumhaw pumkheit miakaw kha mih ryalaw hanlan rho lang ka pya vae hae.22Atu te Israel hae nynh tungkunaw bu kalan naekuh vae lan khyh hae, tuhkhyhze tuh seinaw mee a teing cih hae zah a chih cih hae.23Thuasalama Levi phin hae nynh tungkunaw bu ryalaw kha a lah cih hae, mih cyiseinaw kha mimaw nynh a ing cih hae; e hynh nae she takyh kya zungzae tynpaw upadi athua cih. Thuasalama Israel hae laku kya rho tuh hoi lan khyh hae,24pawccecize Israel hae nynh Bawipaw kalan ahlu lang a nung hae paw pumhaw pumkheit kha Levi phin hae kalan rho lang phe ka pya vae hae. Tukeiccuze Israel hae laku kya nanning nynh rho na hoi lan khyh oh cite phe ka hopya vae hae,” a ci.
25Oute Bawipaw nynh Moses kyakhe,26“Levi phin hae kha hynhte na hopah cih hae: ‘Israel hae kyate rho lang kae pya vae oh paw pumhaw pumkheit kha minmin kyate na lawku vae oh ze, tuh-e na lawku oh paw kya-e ahlu kha Bawipaw kalan na pya cih oh, tuh-e tuh pumhaw pumkheit kya-e pumhaw pumkheit nynh thua.27Tuh-e nae hlu tuh huimin kya-e ccathae hawte thuasah, misu mianaw khu kya-e misutui hawte thuasah nae hanlan riapya athua cih.28Tuhcite nanning nynh mah Israel hae kyate na mue oh paw pumhaw pumkheit balyn kya-e kha Bawipaw kalan ahlu kha na nung cih oh; tuh-e Bawipaw ahlu tuh ranpibawi Aaron kalan na pya cih oh.29Na mue oh paw lasung balyn kya-e Bawipaw hanlan accanpaw miakaw kha na phia cih oh. Tuh-e hae balyn kya-e ahoy huaccepaw tuh thyaasah athua cih.’30Tukeiccuze minmin kha, ‘Ahlu kya-e ahoy huaccepaw kha na pya kou oh te, alaepaw kha huimin kyate apoupaw looh te misu mianaw khu kyate apoupaw misutui hawte Levi phin hae hanlan riapya athua cih.31Nang te na innbyn hae nynh tuh-e tuh teitei kya mah na ae kho oh; pawccecize tuh-e tuh tungkunaw bu kya-e nae ryalaw mee nynh thua.32Ahoy huaccepaw kha na pya vae oh keiccuze seinaw kha na ing vae lan khyh oh. Thuasalama na chisei khyh nawlan oh, Israel hae kya-e athyaapaw lasung hae kha na thusah lan khyh oh,’ cite hopah hae,” a cipya. Asepaw Vaetua Tohlaw Poi
1Bawipaw nynh Moses te Aaron kha hynhte a hopya hae:2E hynh Bawipaw nynh kaw a pyapaw upadi kya-e phungbya nynh thua: Douccahpaw te taphu a khangkuh boi leipaw, ccaenaw um leipaw vaetua tohlaw asepaw sa kheit kha nae kalan cciakhae lan Israel hae kha hopah oh.3Tuh-e tuh ranpibawi Eleazar kalan na pya cih, te tuh-e tuh ryahmin atolang cciakhae athua cih zah amaw malang khe chia athua cih.4Ranpibawi Eleazar nynh a chii abang kha a kuihdung te a lah cih zah tungkunaw bu malang khe vae sari a hei cih.5Oute tohlaw kha ranpibawi a muihnaw khe maee te u athua cih; a phua, a saw te a chii kha a-ia ryte maee te u athua cih.6Ranpibawi nynh sidar thing, hyssop thing, asepaw uccaw kha a lah cih zah tohlaw u athuanaw maee lungkhu langkhe a phung cih.7Oute ranpibawi nynh a boeining kha a sukuh cih zah a pyn kha tui te a singkuh cih, tukoute ryahmin lungkhu lang a tee cih; thuasalama ranpibawi tuh zete cia thyaa lan khyh.8Tohlaw asepaw kha maee te a utu nynh a boeining kha tui te a sukuh cih zah a pyn kha tui te a singkuh cih; aning tuh zete cia thyaa lan khyh.9Oute athyaapaw lukhakheit nynh tohlaw buhhaw kha a lua cih zah ryahmin atolang athyaanaw hmin khe a nung cih; tuh-e buhhaw tuh Israel zapi hae thyaasahnawpaw tui hanlan nung athua cih. Tuh-e tuh seinaw thyaasahnawpaw silawnaw nynh thua.10Tohlaw buhhaw a luatupaw nynh a boeining kha a sukuh cih zah zete cia thyaa lan khyh.
E hynh Israel hae te minmin kya umbua hae paw ramccang hae hanlan zungzae tynpaw phungbya athua cih.11Michi rhua a typaw ccungccaw miakaw tuh nin sari lungkhu thyaa lan khyh.12Tuh-e ccungccaw nynh amaw te amaw kha nin thumnaw nin te nin sarinaw nin khe a thyaasakuh cih zah aning tuh athyaa vae; thuasalama nin thumnaw nin kya te nin sarinaw nin kyakhe amaw te amaw kha a thyaasahku khyh zetuh, thyaa lan khyh.13Achih vae paw ccungccaw pyn, michi rhua kha ty zah amaw te amaw a thyaasakuh leipaw balyn tuh Bawipaw beikbu kha a thusah; tuhcihawpaw ccungccaw tuh Israel ccungccaw kyate vua athua cih. A tungvaw kya thyaasahnawpaw tui kha hei athua khyh keiccuze aning tuh thyaa khyh; a thyaa leinaw tuh a tungvaw a um ung.
14E hynh lukhakheit nynh bu kya he a chi vae ze, zui lanpaw upadi nynh thua: bu lungkhu lang a teepaw miakaw te bu kya a umpaw miakaw tuh nin sari lungkhu thyaa lan khyh.15Te ahungkuhpaw ang, ahu hukuh leipaw miakaw tuh thyaa khyh.16Thaloi te a chia hae paw kha thuasah, phuchi te achihpaw kha thuasah, michi ru kha thuasah, shawku kha thuasah, khah-e hae kha ryahmin atolang khe a typaw ccungccaw tuh nin sari lungkhu thyaa lan khyh.17Athyaa leipaw ccungccaw hanlan maee te upaw seinaw thyaasahnawpaw silawnaw kya-e buhhaw abang kha a lah cih hae zah, aluapaw tui kha ang lungkhu khe a ruin cih hae;18oute athyaapaw ccungccaw nynh hyssop kha a lah cih zah tui lungkhu khe a dung cih, te bu, bu uccaw hae balyn, bu kya a umpaw ccungccaw balyn kha thuasah, ru, a chia hae paw, michi rhua te shawku a typaw miakaw kha thuasah tuh-e tui te a hei cih hae.19Athyaapaw nynh athyaa leipaw kha nin thumnaw nin te nin sarinaw nin khe a hei cih hae, tuhcite nin sarinaw nin khe a thyaasah cih hae. Oute a boeining kha a sukuh cih, tui a singkuh cih zah zete khe a thyaa cih.20Athyaa leipaw nynh amaw kha thyaasahku leite a um lanze, Bawipaw beikinnthyaa kha a thusah keiccuze zapi kyate vua athua cih. Thyaasahnawpaw tui kha a tungvaw kya hei athua khyh keiccuze aning tuh thyaa khyh.
21E hynh minmin elang zungzae tynpaw phungbya athua cih. Thyaasahnawpaw tui a heitu nynh a boeining kha a sukuh cih, te thyaasahnawpaw tui a typaw humhung zemah zete cia thyaa lan khyh.22Athyaa leipaw ccungccaw nynh a typaw miakaw tuh thyaa lan khyh, te tuh-e athyaa leipaw kha a typaw miakaw tuh zete cia thyaa lan khyh. Meribah Tui (Exo 17.1-7)
1Israel hae zapi balyn tuh masaty sawpaw khe Zin ramkaw kya thua hae zah Kadesh kya a um hae; Miriam tuh tuin kya chih zah a uu hae.
2Te zapi hanlan tui a um khyh keiccuze pynkheihlan pumnuakuh hae zah Moses te Aaron kha a rawse hae.3Ccungccaw hae nynh Moses kha, “Kae puizia hae nynh Bawipaw malang a la chi lya hae khe, kaening mah kae la chibua khyh!4Kaening te kae sahiin-awvaw tuh hein kya chi khylan, Bawipaw kya-e ccungccaw zapi hynh pawcce e ramkaw lang nae cciakhae?5Kaening kha e vawsawnaw hmin kalan cciakhae khylan pawcce Izip ram kyate nae poukhae? E hmin tuh ccathae, eboh, misu te ccalee thae a umnaw thua khyh; nia lanpaw tui mah um khyh,” cite bya a lungnua hae.6Oute Moses te Aaron tuh zapi hae kyate tungkunaw bu thuakaw kalan a cceih hae; te mih maee kha tebaling hae zah Bawipaw phu-enaw tuh minmin kalan yn langkuh.7Bawipaw nynh Moses kha hynhte a hopya:8“Hoitang kha lawkuh lah, nang te Aaron nynh zapi hae kha pum oh, te lung kya-e tui mue khylan mih malang khe lungpi kha kawpya tua. Tuhcite minmin hanlan lungpi kyate tui kha na pousah cih zah zapi te mih sahiin-awvaw hanlan nia lanpaw kha na pya cih hae,” a cipya.
9Bawipaw nynh kaw a pya thyhte Moses nynh hoitang kha Bawipaw malang kyate a lawku.10Moses te Aaron nynh zapi hae kha lungpi malang khe pynkheihlan pum hae zah minmin kha, “Nanning doutu hae, ngaetua oh, kaening nynh nae hanlan e lungpi kyate tui kae pousahpah cih oh tou?” a cipya hae.11Oute Moses nynh a kuih kha hangthung zah a hoitang te lungpi kha vae ning a bua; tui tuh patae yn pou zah zapi hae te mih sahiin-awvaw nynh a nia hae.12Thuasalama Bawipaw nynh Moses te Aaron kha, “Israel hae malang ka thyaanaw kha langsahku khylan nanning nynh kae kha nae doliaku khyh oh, tukeiccuze nanning nynh e zapi hae hynh ka pya hae paw ram lungkhu lang na teekhae lan khyh oh,” a cipya hae.13E hynh Meribah tui nynh thua, Israel ccungccaw hae nynh Bawipaw kha bya a lungnua keiccu hae ze, amaw athyaanaw kha a langsakunaw hmin nynh thua. Edom nynh Laanpi A Ei
14Moses nynh Kadesh kyate locceihtu hae kha Edom siapharan kalan saw hae zah, “Nae unopaw Israel nynh hynhte a ci: Kae tungvaw accahpaw vawsawnaw balyn hynh phe na ny:15kae minpaaw hae nynh Izip ram lang la cceihbung hae zah Izip ram kya khaw cia kae umpaw kha thuasah, te Izip hae nynh kaening te kae minpaaw hae tungvaw oun tuaasah hae paw kha thuasah,16te Bawipaw kalan he kae sia te, aning nynh kae roi kha yn thaepah zah vaawpaw lu kheit kha yn sawpah zah Izip ram kyate oun poukhae; atu kaening tuh na ramri kin kya umpaw khua, Kadesh kya nynh kae um.17Atu na ram kya po beih oun cciasah. Kaening nynh loo kya thuasah, misu khokhu kya thuasah po kae cceih lan khyh, tuisung kya-e tui mah kae neih lan khyh; Siapharan Laanpi kha po kae zui cih zah na ramri kae lawe mawlaezung voilang ranglang kae maekuh lan khyh,” cite a hosahpya hae.
18Thuasalama Edom nynh Moses kha, “Na cceih lan khyh oh, tuhkhyhze tuh thaloi te kae pounua cih oh zah kae rawse cih oh,” a cipya.19Israel hae nynh Edom kha, “Laanpi kya kae zui cih; kaemaw te kae sahiin-awvaw nynh na tui kha kae nia zetuh amee kae pya cih. Ccu te kyalya po oun cciasah, ccangpaw paw sanmah kae cyih lan khyh,” a cipya hae.20Thuasalama aning nynh, “Na cceih lan khyh oh,” a ci. Te Edom nynh rhawkaw patae te alepaw zunghe ryte a pounua hae.21Tuhcite Edom nynh mih ram kya Israel hae po cciasah lanpaw kha phe a ei; tukeiccuze Israel hae nynh minmin kha a sibia hae. Aaron Chinaw
22Israel hae zapi balyn tuh Kadesh kyate pou hae zah Hor Mua kya athua hae.23Oute Bawipaw nynh Moses te Aaron kha Edom ramri kya umpaw Hor Mua kyakhe hopah hae zah,24“Aaron tuh a ccungccaw hae kalan sueluabua athua cih. Meribah tui kya kaw kae pya oh paw kha na ei keiccu oh ze, Israel hae ka pya hae paw ram lungkhu lang tee lan khyh.25Aaron te a ccapaw Eleazar kha ko hae lah, Hor Mua lang kaekhae thung hae;26Aaron boeining kha khahpah lah, a ccapaw Eleazar kha lawsahku tua. Aaron tuh a ccungccaw hae kalan sueluabua athua cih zah, tuin kya a chih cih,” a ci.27Bawipaw nynh kaw a pya thyhte Moses nynh a cyi; zapi balyn muihnaw khe minmin tuh Hor Mua lang a kaethung hae.28Moses nynh Aaron kha a boeining khahpah zah a ccapaw Eleazar kha a lawsahku; te Aaron tuh tuh-e mua dung khe a chih. Moses te Eleazar tuh mua kyate a rungbung hae.29Zapi balyn nynh Aaron a chih vae cipaw a nyh hae te, Israel hae balyn tuh Aaron elang nin sung thum rawkhuite a um hae. Daw Hupaw
1Negeb kya umpaw Kanaan minphuin, Arad siapharan nynh Israel hae tuh Atharim laanpi kya oun cceih hae cipaw he a thae te, Israel hae kha tuk hae zah abang kha a kyng hae.2Oute Israel hae nynh Bawipaw kalan byakinnaw rae hae zah, “E ccungccaw hae hynh kae kuih kalan nae pya ccaccing zetuh, mih khua hae kha ccapyn kae ropah cih hae,” a ci hae.3Bawipaw nynh Israel hae roi kha ngaepah hae zah Kanaan hae kha mih kuih kalan a pya hae; te minmin nynh Kanaan hae te mih khua hae kha ccapyn a ro hae; tukeiccuze tuh-e hmin tuh Hormah a ci hae.
4Minmin nynh Hor Mua kyate Edom ram kha koihlu khylan Rili Se lang cceihpaw laanpi khate a pou hae; ccungccaw hae tuh laanryng kya mih lungsae khyh.5Ccungccaw hae nynh, “Pawcce kaening hynh ramkaw kya chi khylan Izip ram kyate nae poukhae? Pawccecize looh te tui mah um khyh zah, hynh-e ahoy leipaw looh hynh kae luathua,” cite Pachia te Moses kha rawsete bya a ho hae.6Oute Bawipaw nynh asy umpaw hupaw kha ccungccaw hae kalan sawnua hae zah, ccungccaw hae kha a tuh keiccu hae ze, Israel hae patae a chih hae.7Ccungccaw hae nynh Moses kalan oun cceih hae zah, “Bawipaw te namaw kha rawsete bya kae la hopaw kha phe kae sei vae; kae kyate hupaw hae hynh oun lawpya nawlan, Bawipaw kalan sawsangtua,” a ci hae. Tukeiccuze Moses nynh ccungccaw hae hanlan saw a sang.8Te Bawipaw nynh Moses kha, “Asy umpaw hupaw kha rae lah, tung vawlan khe tawtua; hupaw nynh a tuhpaw ccungccaw miakaw nynh khah-e atawkuhpaw hupaw kha a do hae ze, a hiin cih hae,” a cipya.9Tukeiccuze Moses nynh daw hupaw kha rae zah tung vawlan khe a taw; te hupaw nynh lukhakheit kha a tuh vae ze, daw hupaw kha a do zetuh a hiin. Moab lang Ccianaw
10Israel hae tuh cceih hae zah Oboth kyakhe ryahmin a tahku hae.11Oboth kyate cceih hae zah Moab ram nithua lang umpaw ramkaw kya Iye-abarim kyakhe ryahmin a tahku hae.12Tuin kyate cceih hae zah Zered Vaphae kya ryahmin a tahku hae.13Tuin kyate cceih hae zah Arnon vaw khuraw langkhe ryahmin a tahku hae, tuh-e hmin tuh Amor hae ramri te akyngkuhpaw ramkaw kya a umpaw nynh thua; pawccecize Arnon vaw tuh Moab ramri, Moab ram te Amor hae ram laku umpaw nynh thua.14Tukeiccuze Bawipaw Rhawdounaw Ccauh kyaze,“Sufah kya umpaw Waheb khua te vaphae hae,Arnon vaw te
15Ar khua te kyngkuh zahMoab ramri lang ciahary po a cceihbungpaw vaphae hae,” a ci hae.
16Tuin kyate Beer tuisung kyacia po a cceih hae; tuh-e tuisung tuh Bawipaw nynh Moses kyakhe, “Ccungccaw hae kha pynkheihlan suelua hae lah, tui ka pya cih hae,” cite a hopyapaw tuisung kha nynh thua.17Oute Israel hae nynh,“Pou tuisung, tui yn phyhthung tua! Hlawsahpah oh!
18Cciakhaetu hae nynha thae hae paw tuisung,asung-epaw ccungccaw hae nynhbawi hoitang te hoitang khatetuisung kha a thae hae,”cite hlaw a sah hae. Minmin nynh ramkaw kyate Mattanah lang,19Mattanah kyate Nahaliel lang, Nahaliel kyate Bamoth lang,20te Bamoth kyate Moab ram umpaw accya cia a cceih hae, tuh-e accya tuh Jeshimon khua lang a hawipaw Pisgah mua dung pe a umpaw nynh thua. Siapharan Sihon kha Taenaw (Deu 2.26—3.11)
21Oute Israel hae nynh Amor hae siapharan Sihon kalan zeccuetu saw hae zah,22“Na ram kya po beih oun cciasah; loo lang thuasah, misu khokhu lang thuasah kae cceih lan khyh; tuisung ccangkhakheit kya-e tui mah kae neih lan khyh; na ram kae lia mawlaezung Siapharan Laanpi kyate kae cceih cih,” a cipya hae.23Thuasalama Sihon nynh Israel hae kha a ram lungkhu po ccia lan ua khyh hae. Sihon nynh a ccungccaw hae balyn kha suelua hae zah Israel hae kha dou khylan ramkaw lang a ccianua; Sihon tuh Jahaz kya thua zah Israel hae kha a tuk hae.24Israel hae nynh thaloi te theih hae zah a ram kha Arnon kyate Jabbok cia, Ammon hae a umnaw hae kyacia, a ram hoirumnaw kha a lawpya hae; pawccecize Ammon hae ramri tuh sihkakin.25Israel hae nynh hynh-e khua hae balyn kha lah hae zah, Israel hae tuh Amor hae khua balyn kya, Heshbon khua te a khua taraw hae balyn kyakhe khua a sah hae.26Pawccecize Heshbon tuh Amor hae siapharan Sihon khuapi nynh thua, Sihon tuh langmaw e Moab siapharan kha tuk zah a ram balyn kha Arnon kyacia a la luatupaw nynh thua.27Tukeiccuze hlawsahthya hae paw nynh,“Heshbon khua lang oun cceih oh lah,la raethui oh sih;Sihon khuapi hynh tynsah.28Pawccecize Heshbon kyatemaee yn pou zah,Sihon khuapi kyate maeesoi yn pou.Tuh-e maeesoi nynhMoab hae khuapi Ar kha a u,Arnon kya-e ahangpawbawipaw hae kha a u hae.29Pou Moab, ngaethya lan kou na um!Pou Khemosh a beik hae paw,nanning tuh na zo vae oh!tuh-e pachia nynh a ccapaw hae khaa ccue hae paw lante,a ccanung hae kha a kyng hae paw lanteAmor siapharan Sihon kalan a pya hae.30Tukeiccuze mih ciihan hae khaHeshbon kyate Dibon kyaciakae ro vae hae, Medeba teakyngkuhpaw Nofah ciakae ro vae hae,” a ci hae.
31Tuhcite Israel hae tuh Amor hae ram khe khua a sah hae.32Moses nynh Jazer khua kha dophi khylan saw hae zah, tuh-e khua te a khua taraw hae balyn kha lah hae zah, tuin kya umpaw Amor hae kha a dee hae. Siapharan Og kha Taenaw
33Oute Israel hae tuh maekuh hae zah Bashan lang cceihpaw laanpi kha a zui hae; Bashan siapharan Og tuh amaw ry, a ccungccaw hae ryte Israel hae kha Edrei kya tuk khylan oun ccianua hae.34Thuasalama Bawipaw nynh Moses kyakhe, “Og kha rih nan; amaw te a ccungccaw hae balyn, a ram balyn ryte na kuih kya kae pya vae. Heshbon khua a uktupaw Amor hae siapharan Sihon tungvaw na cyi hawkhate a tungvaw kya na cyih cih,” a cipya.35Tukeiccuze Israel hae nynh amaw, a ccapaw hae te a ccungccaw hae balyn kha a hiinhypaw a um lei lan ciate a chia hae; te a ram kya-e hoirumnaw kha a lawku hae. Balak nynh Balaam A Ko
1Israel hae tuh cceih hae zah Jordan vaw khuraw lang, Jeriko khua te arawsekunaw Moab bialae khe ryahmin a tahku hae.2Israel hae nynh Amor hae tungvaw a cyisahnaw hae balyn kha Zippor ccapaw Balak nynh a muih.3Israel hae tuh myarya alung keiccu hae ze, Moab tuh myarya a rih; Moab nynh Israel ccungccaw hae kha myarya rih zah tuh-e rinaw nynh amaw kha phe a tae.4Te Moab nynh Midian piccan hae kha, “Tangnuapaw nynh loo kya-e lonua kha a bouku hawte, e ccungccaw phupi nynh aening pepan umpaw balyn kha yn ae cih,” a cipya hae. Tuh ccyh lyaze Zippor ccapaw Balak tuh Moab siapharan nynh thua.5Amaw ram e Zufrates vaw pe umpaw Pethor khuapaw Beor ccapaw Balaam kha ko khylan Balak nynh locceihtu hae kha saw hae zah, “Izip ram kyate minphuin phuin kheit yn pou zah laephi vawlan pazaekuh zah, kamaw pe khe khua oun sah hae.6Tukeiccuze yn cciatua, minmin tuh kamaw laeze mih thawsaehua keiccuze e ccungccaw hae tungvaw kamaw hanlan thya yn lawpya tua hae, minmin kha tae khote ram kyate poh ka dee kho hae vema; pawccecize hythua na pyapaw humhung zemah hythuapya thua zah, thya na lawpaw humhung zemah thyalaw athua cipaw ka ny,” a cipya.
7Tukeiccuze Moab piccan hae te Midian piccan hae tuh mih kuih kya thyalawnaw hanlan amee kha ccyngkuh hae; te Balaam kalan cceih hae zah Balak nynh a hopaw bya kha a hopya hae.8Balaam nynh minmin kha, “Atu khuazi hein kya rya oh lah, Bawipaw nynh bya yn hopya thyhte nanning kha kae hopah cih oh,” a cipya hae; tukeiccuze Moab bawi hae tuh Balaam kya a rya hae.9Pachia tuh Balaam kalan yn thua zah, “Na kya um hae paw hynh hung hae mou?” a cipya.10Balaam nynh Pachia kha, “Moab siapharan Zippor ccapaw Balak nynh hynh-e bya hynh yn hosahpya hae:11‘Izip ram kyate minphuin phuin kheit yn pou zah laephi vawlan oun pazaekuh hae; atu yn cceih lah, minmin kha kamaw hanlan thya yn lawpya tua hae; minmin kha ka tuk cih hae zah poh ka dee kho hae vema,’ yn cipya,” cite a hopya.12Pachia nynh Balaam kha, “Minmin ryte na cceih lan khyh; tuh-e ccungccaw hae tuh hythuapya athua hae paw athua keiccu hae ze minmin kha thya na law lan khyh hae,” a cipya.13Tukeiccuze Balaam tuh awkhua khe yn tho zah, Balak nynh a saw hae paw bawi hae kyakhe, “Nanning ryte cciakheih lanpaw kha Bawipaw nynh yn ua khyh keiccuze nae ram lang la cceih ccavae oh,” a cipya hae.14Tukeiccuze Moab bawi hae tuh Balak kalan cceih hae zah, “Balaam nynh kaening ryte cciakheih lan phe a mya,” a cipya hae.
15Balak nynh minmin laeze mih maedo-um huapaw bawi hae kha houh alunghua lan bua a saw hae.16Minmin nynh Balaam kalan oun thua hae zah, “Zippor ccapaw Balak nynh hynhcite a ho: ‘Kamaw kalan ccia lanpaw hynh pawpaw mah khawsakuh nan sah,17pawccecize sawtuanaw alepaw ka pya cih zah yn ngiapaw miakaw kha ka cyipah cih; yn cceih sah lah, e ccungccaw hae hynh kamaw hanlan thya yn lawpah hae sah,’ ae ci,” cite a hopya hae.18Thuasalama Balaam nynh Balak see hae kyakhe, “Sui te ngun phe beihpaw a inn kha Balak nynh yn pya zemah, Bawipaw ka Pachia nynh kaw yn pyapaw laeze azyahua lante thuasah, alunghua lante thuasah cyi khylan ka cceih kho khyh.19Thuasalama Bawipaw nynh yn hopah ung cih paw kha ka ny nawlan, hein kya um hin oh,” a cipya hae.20Tuh-e khuazi khe Pachia tuh Balaam kalan yn thua zah, “Ccungccaw hae tuh nang ko khylan oun thua vae hae zetuh, thokuh lah, minmin kya cceihbua; thuasalama cyi lan kae hopyapaw kyalya kha na cyih cih,” a cipya.21Tukeiccuze Balaam nynh awkhua khe tho zah, a lann kha khungnin a dee koute Moab bawi hae kya a cceihbua. Balaam, Lann te Vaawpaw
22Balaam nynh a ccia keiccuze Pachia thinrianaw tuh maee lang rua zah Bawipaw vaawpaw tuh amaw khawtu lante laanpi kya a thadyn. Balaam tuh lann kha ccikuh zah a see hae lu ning tuh amaw kya a cceihbua hae.23A kuih kya thaloi ccyngkuh zah laanpi kya a thadynpaw Bawipaw vaawpaw kha lann nynh a muih; tukeiccuze lann tuh laante lang maekuh zah loo lungkhu lang a cceih; te Balaam nynh lann kha laanpi lang bua a maeku ccaw cite a bua.24Oute Bawipaw vaawpaw tuh misu khokhu hae laku, voikheit voikheit lang lungrua athungkuhpaw laanpi abypaw kyakhe a thadyn.25Lann nynh Bawipaw vaawpaw kha he a muih tuh, lungrua kalan beekuh zah Balaam ccu kha lungrua kyakhe a tawnaw; tukeiccuze aning nynh lann kha a bua ki.26Oute Bawipaw vaawpaw tuh malang cceih zah voilang ranglang maekunaw hmin a um leinaw, abynaw hmin khe a thadyn.27Lann nynh Bawipaw vaawpaw kha he a muih tuh, Balaam kha baruh a bungkhae; te Balaam thinrianaw tuh maee lang rua zah a hoitang te lann kha a bua.28Oute Bawipaw nynh lann kha bya hosah zah Balaam kyakhe, “Na tungvaw paw ka cyi keiccu mou vae thum cia nae bua?” a cipya.29Balaam nynh lann kha, “Angaeepaw lang nae ria keiccu nynh thua! Thaloi ka la ccyngku ze, atumaw phe kae theih vae cih paw!” a cipya.30Thuasalama lann nynh Balaam kha, “Kae hynh atunin cia na hiin lungkhu balyn nae ccikupaw na lann ka thua khyh tou? Atu hawte na tungvaw kae cyih boi tou?” a cipya. Te Balaam nynh, “Nae cyih boi khyh,” a ci.
31Oute Bawipaw nynh Balaam mit kha awsah zah, a kuih kya thaloi ccyngkuh zah laanpi kya a thadynpaw Bawipaw vaawpaw kha a muih; te aning nynh a lu tebung zah a bakhung.32Bawipaw vaawpaw nynh Balaam kha, “Pawcce na lann kha vae thum cia na bua? Na laanpi tuh ka malang ahme leipaw athua keiccuze kae tuh ae rawsetu lante kae pou vae.33Lann nynh kae kha yn muih zah kamaw kyate vae thum cia a maekuh. Kamaw kyate a maeku khyh lanze, atasy lyakhe nang kha kae theih ccaccing vae cih zah lann kha ka hiin cih,” a cipya.34Oute Balaam nynh Bawipaw vaawpaw kha, “Kae kha rawse khylan laanpi kya na la thadynpaw ka ny khyh keiccuze phe ka sei vae. Tukeiccuze na lung ae hoysah leipaw athua zetuh, atumaw inn lang ka ki cih,” a cipya.35Bawipaw vaawpaw nynh Balaam kha, “Minmin ryte cceihbua; thuasalama ho lan cite kae hopyapaw bya kyalya kha na ho cih,” a cipya. Tukeiccuze Balaam tuh Balak bawi hae ryte a cceihbua.
36Balak nynh Balaam yn cceih vae cipaw he a thae te, Arnon vaw nynh a phiapaw ramri, ramri athangnaw kya umpaw Ar kyakhe tungku khylan a cciadue.37Balak nynh Balaam kha, “Nang ko khylan ccungccaw kae saw khyh tou? Pawcce kamaw kalan nae ccia khyh? Sawtua-hangthungnaw ae pya khopaw ka thua khyh tou?” a cipya.38Balaam nynh Balak kha, “Atu namaw kalan kae thua vae, thuasalama hankhakheit ho khonaw huhan ka hoi zawtou? Ka ho lanpaw tuh Pachia nynh ka mung kya yn nungpyapaw bya kha nynh thua,” a cipya.39Oute Balaam tuh Balak ryte cceih hae zah Kiriath-huzoth kya athua hae.40Balak nynh tangnuapaw hae te tuu hae khate silaw zah Balaam te a kya umpaw bawi hae kalan a pya hae. Balaam kyate Masaty Bya
41Awkhualan khe Balak nynh Balaam kha Bamoth-baal lang a cciakhae; tuin kyate aning nynh Israel ccungccaw abang kha a muih hae.
1Oute Balaam nynh Balak kha, “Hein kya silawhang ccangsari yn raepah lah, tangnuapaw sa sari te tuutepaw sa sari kha kamaw hanlan yn paccynpya tua,” a cipya.2Balaam nynh a ho hawte Balak nynh a cyi; te Balak te Balaam nynh tangnuapaw sa kheit ccite tuutepaw sa kheit cci khate silawhang ccangkheit cci kyakhe si a law hae.3Oute Balaam nynh Balak kha, “Maee-ute si na lawnaw pe hein kyahin la thadyn lah, kae tuh ccanglang ka la cceih hin. Bawipaw tuh kae te tungku khylan poh yn cceih vema. Aning nynh yn muihsahpaw miakaw kha kae hopah cih,” a cipya. Te aning tuh ahangnaw lang a cceihthung.
4Oute Pachia nynh Balaam kha a tungku; te Balaam nynh Pachia kha, “Beikhang ccangsari kha ka paccyn zah, tangnuapaw sa kheit ccite tuutepaw sa kheit cci khate silawhang ccangkheit cci kya si ka law vae,” a cipya.5Bawipaw nynh Balaam mung kyakhe bya nung zah, “Balak kalan ki lah, hynhcite na ho cih,” a cipya.6Tukeiccuze Moab bawi hae balyn ryte maee-ute si a lawnaw pe kya a thadynpaw Balak kalan khe Balaam tuh a ki.7Oute Balaam nynh profehbya lante ho zah: “Balak nynh Aram kyate yn hoei,Moab siapharan nynhnithua lang e mua hae kyate,‘Oun cceih lah, kamaw hanlanJakob kha thya yn lawpya tua;Oun cceih lah,Israel hynh thethyasah tua!’ a ci.8Pachia nynh thya a law leipaw khapawtemou thya ka law kho cih?Bawipaw nynh the a thyasah leipaw khapawtemou the ka thyasah kho cih?9Pawccecize chia dung kyateamaw kha ka muih,mua hae kyate amaw kha ka do;A makhaete a umpaw minphuin tuhhein kya um zah, tuh-e minphuin tuhccangpaw minphuin hae laku kyapykuh bua lan khyh!10Hung nynh mou Jakob laenoi khaa ria kho cih zah,Israel pum pali pum kheit khaa ria kho cih?Miding chinaw hawteka chih sah lah,Ka ccyh thangnaw tuhamaw athangnaw hawtethua sah!” a ci.
11Oute Balak nynh Balaam kha, “Pawcce ka tungvaw hynhte na cyi? Ka rhaw hae kha thyalaw khylan khaw kae cciakhae, thuasalama atu minmin tungvaw pawpaw cyi leite hythua na pya hae,” a cipya.12Balaam nynh, “Bawipaw nynh ka mung kya a nungpaw byaho lanpaw kha pawlangria leite tou ka um cih?” a cipya. Balaam kya-e Vaeningnaw Profehbya
13Tukeiccuze Balak nynh Balaam kha, “Israel hae na muih khonaw hmin ccangpaw kalan kamaw ryte cceihbua; minmin kha pong na muih lan khyh hae zah abang kyalya kha na muih cih hae; oute tuin kyate minmin kha kamaw hanlan thya yn lawpah hae,” a cipya.14Tukeiccuze Balak nynh Balaam kha Pisgah mua dung umpaw Zofim loo lang a cciakhae. Beikhang ccangsari rae zah tangnuapaw sa kheit ccite tuutepaw sa kheit cci khate silawhang ccangkheit cci kyakhe si a law.15Balaam nynh Balak kha, “Kae tuh khuhlang Bawipaw ka la tungku loukaw nang tuh maee-ute si na lawnaw pe hein kyahin la thadyn,” a cipya.16Bawipaw nynh Balaam kha a tungku, te a mung kyakhe bya nung zah, “Balak kalan ki lah, hynhcite la hopya tua,” a cipya.17Balaam nynh Balak kya he athua tuh, Balak tuh maee-ute si a lawnaw pe khe la thadyn zah Moab bawi hae ryte la um hae. Balak nynh Balaam kha, “Bawipaw nynh paw bya mou a ho?” a cipya.18Oute Balaam nynh profehbya te ho zah,“Balak, thokuh lah, ngaetua;Pou Zippor ccapaw,ka bya yn ngaepya tua:19Pachia tuh hynbya a ho hepawccungccaw thua khyh,a thinlung a paleihkuh hepaw,achihthyapaw ccungccaw thua khyh.Bya a kinpyaku vae paw khacyih lan khyh tou?A ho vae paw khaccingsah lan khyh tou?20Dotua, hythua pyanaw kawka mue vae;hythua yn pya vae zah,tuh-e tuh ka roh kho khyh.21Aning nynh Jakob tungvawvethyanaw muih khyh;Israel kya vawsawnaw mahmuih khyh.Bawipaw mih Pachia tuhminmin kya um zah,siapharan roipi tuhminmin laku a um.22Izip ram kyate a poukhaetu hae pawPachia tuh minmin hanlanccungtepaw ki te nynh aloku.23Jakob rawsete mitleihthyanaw tuhthane khyh,Israel rawsete apawepawthyanaw tuh thane khyh,atu tuh Jakob te Israel konglangho athua cih,‘Pachia nynh a cyipaw hynhdotua oh!’24Dotua, e minphuin tuhchindeih pinung hawte thokuh zah,chindeih tepaw hawte a thadyn!A kyngpaw saw khaa ae kou maw tea teipaw chii khaa zu maw tuh rya khyh,” a ci.
25Oute Balak nynh Balaam kha, “Minmin tungvaw kharouh thyalaw nan hae lah, hythua mah kharouh pya nan hae,” a cipya.26Thuasalama Balaam nynh Balak kha, “ ‘Bawipaw nynh a hopaw miakaw kha ka cyi lanpaw nynh thua,’ cite kae hopah khyh tou?” a cipya.
27Tukeiccuze Balak nynh Balaam kha, “Atu yn cciatua, hmin ccanglang kae cciakhae cih; tuin kyate kamaw hanlan minmin kha thya nae lawpya kho nawlan, tuh-e tuh Pachia lungry poh athua vema,” a cipya.28Tukeiccuze Balak nynh Balaam kha Shaddai ram alangnaw Peor mua dung langkhe a cciakhae.29Balaam nynh Balak kha, “Hein kya silawhang ccangsari yn raepah lah, tangnuapaw sa sari te tuutepaw sa sari kha kamaw hanlan yn paccynpya tua,” a cipya.30Tukeiccuze Balaam nynh a hopya thyhte Balak nynh cyih zah tangnuapaw sa kheit ccite tuutepaw sa kheit cci khate silawhang ccangkheit cci kyakhe si a law. Balaam kyate Vaethumnaw Profehbya
1Israel hae hythuapya lanpaw kha Bawipaw nynh a lungryccing cipaw kha Balaam nynh a ny keiccuze langmaw hawte mitleihthya hae paw kalan ccia vae leite, ramkaw langkhe a mae kha a hawi.2Balaam nynh dothung zah Israel hae nynh phin raveihte ryahmin a tahku hae paw kha a muih. Oute Pachia muisaw tuh a tungvaw yn thua zah,3a profehbya kha hynhte a ho:“Beor ccapaw Balaam kyateprofehbya,a mitdaepaw ccungccapaw kyateprofehbya,4Pachia bya a thaepaw kya-eprofehbya,Athunghuapaw kya-evizin kha muih zah,a khuliaku zemaha mit a daepaw bya tuh:5Pou Jakob, na bu hae tuhpawcih baban mou apuithya,Pou Israel, na ryahmin hae tuhpawcih baban mou apuithya!6Aphuphute po zaha pazaekuhpawungcci ku phom hae hawte,vawkhu kin umpawkhokhu hae hawte,Bawipaw nynh a lingpawaloe ku hawte,tui pe e sidar thing hawte nynhathua hae.7A tuipung kyate tui alua cih zah,tui alungnaw kya ccacii accah cih,a siapharan tuh Agag laezea hanghua cih zah,a peenaw tuh hangthung athua cih.8Izip ram kyate a poukhaetupaw Pachia tuh,amaw hanlan ccungtepaw ki te nynh aloku;a rhaw hae athuapaw minphuin hae khaa ae cih hae zahmih ru kha a khya cih hae.A the te a kaw cih hae.9Aning tuh baryhkuh zahchindeih tepaw hawte thuasah,chindeih pinung hawte thuasah a rya,amaw kha hung nynh moua tho ngan cih?Nang hythua ae pyapaw miakaw khahythuapya athua cih zah,nang thya ae lawpaw miakaw khathyalaw athua cih,” a ci.
10Oute Balaam tungvaw kya Balak thinrianaw tuh maee lang a rua, te Balak nynh a kuihlung kha phang lung zah Balaam kyakhe, “Ka rhaw hae kha thyalaw khylan nang kha kae ko, thuasalama minmin kha vae thum cia hythua na pya vae hae.11Tukeiccuze atu na inn lang cceih ccavae! ‘Lasung patae kae pya cih,’ kae cipya, thuasalama Bawipaw nynh lasung miakaw kha ae ua khyh,” a cipya.12Te Balaam nynh Balak kha, “Kamaw kalan nae saw hae paw na locceihtu hae kyakhe,13‘Balak nynh sui te ngun phe beihpaw a inn kha yn pya zemah, athahpaw thuasah, ahoypaw thuasah kamaw rynaw hawte cyi lan Bawipaw bya kha ka ei kho lan khyh; Bawipaw nynh yn hopyapaw kha ka ho cih,’ cite ka hopah khyh hae tou?14Tukeiccuze atu ka ccungccaw hae kalan ka cceih vae cih; malang ccyh kyaze e ccungccaw hae nynh na ccungccaw hae tungvaw a cyi lan hae paw kha kae nysah cih,” a cipya. Balaam kyate Vaepalinaw Profehbya
15Tukeiccuze Balaam nynhprofehbya kha ho zah:“Beor ccapaw Balaam kya-eprofehbya,a mitdaepaw ccungccapaw kyateprofehbya,Pachia bya a thaepaw kya-eprofehbya tuh,16Pachia bya a thaepaw kya-eprofehbya,Ahang Huaccepaw kya-enythyanaw kha nyh zah,Athunghuapaw kya-evizin kha muih zah,a khuliaku zemaha mitdaepaw bya tuh:17Amaw kha ka muih,thuasalama atu ccyh kya thua khyh;amaw kha ka do,thuasalama accyh nae loh khyh,awsi ccangkheit tuh Jakob kyateyn langkuh cih zah,bawi hoitang ccangkheit tuhIsrael kyate yn pou cih;tuh-e nynh Moab ramakin lang cia a tuk cih zah,Seth phin hae balyn khaa roh cih hae.18Israel hae nynh rawthungtea cyi lya hae khe,Edom ram tuh a uccaw langa tang cih,a rhaw hae, Seir kha maha uccaw lang a tang cih,19Jakob kyate yn langkuhpaw nynha uk cih zahKhua kya a hiinhy hae paw khaa roh cih hae,” a ci.
20Oute Amalek langkhe do zahprofehbya a hopaw tuh:“Amalek tuh minphuin hae lakuzeccangkheitnaw nynh thua,thuasalama a thangnaw kya tuhzungzae a roh cih,” a ci.
21Oute Ken hae kalan khe do zah profehbya a hopaw tuh:“Na umnaw hmin tuh atyn cih zah,na bu tuh lungpi kya nung athua;22thuasalama Kain tuh a roh cih.Hohseciamou Asshur nynhkyngte ae cciakhae cih?” a ci.23Profehbya kha bua a hopaw tuh:“Pachia nynh e hynh he a cyih te,hummou a hiin kho cih?24Thuasalama Kittim kyatesanphalung hae oun thua cih hae zahAsshur te Eber khavawsaw yn pya cih hae;minmin kha mah zungzae hanlana roh cih hae,” a ci.
25Oute Balaam tuh thokuh zah a umnaw hmin lang a ki vae, Balak mah a cceih vae. Peor Khozi Baal Beiknaw
1Israel hae tuh Shittim kya a um lya hae khe, ccungccaw hae tuh Moab nopi hae ryte oun ohhuakuh vae hae.2Tuh-e nopi hae nynh mih pachia hae silawnaw kalan khe Israel hae kha a kobua hae, te Israel hae nynh tuh-e tuh ae hae zah nopi hae kya-e pachia hae kha a beik hae.3Tuhcite Israel hae tuh Peor khozi Baal te kyngkute a beik keiccu hae ze, Israel tungvaw Bawipaw thinrianaw tuh maee lang a rua.4Bawipaw nynh Moses kha, “Bawipaw thinrianaw tuh Israel hae kyate a maeku nawlan, Israel lupi hae balyn kha ko hae lah, Bawipaw malang khuaninpaw kyakhe sae hae,” a cipya.5Te Moses nynh Israel byapiatu hae kha, “Nanning lu kheit cci nynh Peor khozi Baal kha a beik vae hae paw nae ccungccaw raveih kha na theih cih oh,” a cipya hae.
6Te Israel zapi balyn nynh tungkunaw bu thuakaw kya a raw cciamang lya hae khe, Moses muihnaw kya te Israel zapi balyn muihnaw kyakhe Israel ccungccaw lu kheit nynh Midian nopinung lu kheit kha a innbyn kalan yn thuakhae.7Tuh-e tuh ranpibawi Aaron ccapaw Eleazar a ccapaw Finehas nynh he a muih tuh, thokuh zah zapi kyate a pou. A kuih kya ccoi ccyngkuh zah,8tuh-e Israel ccungccapaw a nulang khate bu lungkhu langkhe zui zah tuh-e ccungccapaw te nopinung kha lu ning mawte mih vue kyakhe ccoi te a thuing hae. Tukeiccuze Israel ccungccaw hae kya shethya phe adae.9Tuhzemah shethya keiccuze achihpaw tuh thong kuin lae pali acih vae.
10Bawipaw nynh Moses kha,11“Ranpibawi Aaron ccapaw Eleazar a ccapaw Finehas nynh Israel hae kyate ka bungpawnaw kha ccanglang ccaring a mae vae, ka eiungnaw kya Israel hae kha ka maemih khyh nawlan hae, aning nynh minmin laku kya khahcite lungthonaw kha kamaw ccelang a langsahku hae.12Tukeiccuze nang nynh, ‘Aning kha daenaw kya-e ka byakinnaw ka pya.13Tuh-e tuh amaw te amaw koute a ciihan hae hanlan ranpibawi lang zungzae tangnawpaw byakinnaw nynh thua, pawccecize aning tuh a Pachia pankhawte eiungnaw hoi zah Israel hae hanlan seingaethyanaw kha a raepya hae,’ cite la ho,” a cipya.
14Midian nopinung ryte a chiakheih hae paw Israel ccungccapaw min tuh Zimri nynh thua, aning tuh Simeon phin, puizia kyaze lupi lu kheit athuapaw Salu ccapaw nynh thua.15Chia athuapaw Midian nopinung min tuh Kozbi nynh thua, aning tuh Midian phin, puizia kyaze lupi lu kheit athuapaw Zur ccanung nynh thua.
16Bawipaw nynh Moses kha,17“Midian hae kha keisukeilae nung oh lah theih oh;18pawccecize Peor kong te mih ccianung athuapaw Midian cciakhaetu a ccanung konglang ae lingnaw oh kyakhe minmin nynh keisukeilae ae nung oh; aning tuh Peor khozi keiccuze shethya atho lyaze chia athuapaw nynh thua,” a cipya. A Pui Thawpaw Milu Rianaw
1Shethya adae koute Bawipaw nynh Moses te Aaron ccapaw Eleazar kha,2“Israel hae kyaze rhawtuknaw lang a cceih khopaw miakaw, kum kuin te palung lang, mih puizia thyhte Israel zapi balyn kha milu riatua oh,” a cipya hae.3Moses te ranpibawi Eleazar nynh Jeriko te arawsekunaw, Jordan vaw pe, Moab bialae kyakhe minmin kha,4Bawipaw nynh Moses kaw a pya thyhte, “Kum kuin te palung lang ccungccaw hae kha milu riatua oh,” a cipya hae.
Izip ram kyate a pou hae paw Israel hae tuh hynh-e hae nynh thua hae:
5Israel a ccatawccaw tuh Reuben nynh thua. Reuben ciihan hae tuh: Hanok kyate a tho hae paw Hanok phin; Pallu kyate a tho hae paw Pallu phin;6Hezron kyate a tho hae paw Hezron phin; Karmi kyate a tho hae paw Karmi phin nynh thua hae.7Hynh-e hae hynh Reuben phin thua hae zah riapaw milu tuh sung pali thong thum za sari sung thum acih hae.8Pallu ciihan tuh Eliab nynh thua.9Eliab ciihan hae tuh: Nemuel, Dathan te Abiram nynh thua hae. Hynh-e Dathan te Abiram hynh Korah ryte mungkute Bawipaw a rawse lya hae ze, zapi kyate po hae zah Moses te Aaron a rawse hae paw nynh thua hae,10laephi nynh a khalang aw zah minmin kha Korah ryte a due hae, maee nynh ccungccaw za ning sung pangaw he a u hae te, tuh-e ccungccaw phu tuh a chih; te minmin tuh raeringnaw pyanawpaw lang a tang hae.11Thuasalama Korah ccapaw hae tuh chih khyh hae.
12Simeon ciihan hae tuh mih phin hae thyhte: Nemuel kyate a tho hae paw Nuemuel phin; Jamin kyate a tho hae paw Jamin phin; Jakhin kyate a tho hae paw Jakhin phin;13Zerah kyate a tho hae paw Zerah phin; Shaul kyate a tho hae paw Shaul phin nynh thua hae.14E hae hynh Simeon phin hae thua hae zah, thong kuin lae ning za ning acih hae.
15Gad ccaaw hae tuh mih phin thyhte: Zefon kyate a tho hae paw Zefon phin; Haggi kyate a tho hae paw Haggi; Shuni kyate a tho hae paw Shuni phin;16Ozni kyate a tho hae paw Ozni phin; Eri kyate a tho hae paw Eri phin;17Aro kyate a tho hae paw Aro phin; Areli kyate a tho hae paw Areli phin nynh thua hae.18E hae hynh Gad phin hae thua hae zah, riapaw milu tuh thong sung pali za pangaw acih hae.
19Judah ccapaw hae tuh: Er te Onan thua hae zah Er te Onan tuh Kanaan ram kya a chih hae.20Judah ciihan hae tuh mih phin thyhte: Shelah kyate a tho hae paw Shelah phin; Perez kyate a tho hae paw Perez phin; Zerah kyate a tho hae paw Zerah phin nynh thua hae.21Perez ciihan hae tuh: Hezron kyate a tho hae paw Hezron phin; Hamul kyate a tho hae paw Hamul phin nynh thua hae.22E hae hynh Judah phin thua hae zah riapaw milu tuh sung sari thong taruh za pangaw acih hae.
23Issakhar ciihan hae tuh mih phin thyhte: Tola kyate a tho hae paw Tola phin; Puvah kyate a tho hae paw Puvah phin;24Jashub kyate a tho hae paw Jashub phin; Shimron kyate a tho hae paw Shimron phin nynh thua hae.25E hae hynh Esskhar phin hae thua hae zah riapaw milu tuh sung taruh thong pali za thum acih hae.
26Zebulun ciihan hae tuh mih phin thyhte: Sered kyate a tho hae paw Sered phin; Elon kyate a tho hae paw Elon phin; Jahleel kyate a tho hae paw Jahleel phin nynh thua hae.27E hae tuh Zebulun phin hae thua hae zah riapaw milu tuh thong sung taruh za pangaw acih hae.
28Josef ccapaw hae tuh mih phin thyhte: Manasseh te Efraim nynh thua hae.29Manasseh ciihan hae tuh: Makhir kyate a tho hae paw Makhir phin; Makhir tuh Gilead paaw nynh thua; Gilead kyate a tho hae paw Gilead phin nynh thua hae.30E hae tuh Gilead ciihan hae nynh thua: Iezer kyate a tho hae paw Iezer phin; Helek kyate a tho hae paw Helek phin;31te Asriel kyate a tho hae paw Asriel phin; Shekhem kyate a tho hae paw Shekhem phin nynh thua hae.32Shemida kyate a tho hae paw Shemida phin; Hefer kyate a tho hae paw Hefer phin nynh thua hae.33Hefer ccapaw Zelofehad tuh ccapaw saah khyh zah ccanung hae tuh a saah: Zelofehad ccanung hae min tuh Mahlah, Noah, Hoglah, Milkah te Tirzah nynh thua hae.34E hae tuh Manasseh phin hae thua hae zah riapaw milu tuh sung pangaw thong ning za sari acih hae.
35E hae tuh Efraim ciihan hae thua zah mih phin thyhte: Shuthelah kyate a tho hae paw Shuthelah phin; Bekher kyate a tho hae paw Bekher phin; Tahan kyate a tho hae paw Tahan phin nynh thua hae.36Te hynh-e hae tuh Shuthelah ciihan nynh thua hae: Eran kyate a tho hae paw Eran phin nynh thua.37E hae tuh Efraim phin thua hae zah riapaw milu tuh sung thum thong ning za pangaw acih hae. E hae tuh mih phin thyhte Josef ciihan hae nynh thua.
38Benjamin ciihan hae tuh mih phin thyhte: Bela kyate a tho hae paw Bela phin; Ashbel kyate a tho hae paw Ashbel phin; Ahiram kyate a tho hae paw Ahiram phin;39Shefufam kyate a tho hae paw Shefufam phin; Hufam kyate a tho hae paw Hufam phin nynh thua hae.40Te Bela ccapaw hae tuh Ard te Naaman nynh thua hae: Ard kyate a tho hae paw Ard phin; Naaman kyate a tho hae paw Naaman phin nynh thua hae.41E hae tuh mih phin thyhte Benjamin ciihan hae thua zah riapaw milu tuh sung pali thong pangaw za taruh acih hae.
42E hae tuh mih phin thyhte Dan ciihan hae nynh thua: Shuham kyate a tho hae paw Shuham nynh thua hae. E hae tuh mih phin thyhte Dan phin nynh thua hae.43Shuham phin hae balyn tuh sung taruh thong pali za pali acih hae.
44Asher ciihan hae tuh mih innbyn hae thyhte: Imnah kyate a tho hae paw Imnah phin; Ishvi kyate a tho hae paw Ishvi phin; Beriah kyate a tho hae paw Beriah phin nynh thua hae.45Beriah ciihan hae tuh: Heber kyate a tho hae paw Heber phin; Malkhiel kyate a tho hae paw Malkhiel phin nynh thua hae.46Te Asher ccanung min tuh Serah nynh thua.47E hae tuh Asher phin thua hae zah riapaw milu tuh sung pangaw thong thum za pali acih hae.
48Naftali ciihan hae tuh mih phin thyhte: Jahzeel kyate a tho hae paw Jahzeel phin; Guni kyate a tho hae paw Guni phin;49Jezer kyate a tho hae paw Jezer phin; Shillem kyate a tho hae paw Shillem phin nynh thua hae.50E hae tuh mih phin thyhte Naftali phin thua zah riapaw milu tuh sung pali thong pangaw za pali acih hae.
51E tuh Israel hae riapaw milu thua zah thong za taruh thong kheit za sari sung thum acih hae.
52Bawipaw nynh Moses kha hynhte a hopya:53Ram hynh hynh-e hae hanlan mih min alung azya rianaw thyhte rho lang nee athua cih hae.54Alung hae paw phin hanlan rho alung na pya cih zah, a zya hae paw phin hanlan rho azya na pya cih; riapaw milu thyhte phin takyh kalan mih rho kha pya athua cih.55Thuasalama ram kha ccungthydung athua cih zah mih thokeinaw phin min thyhte rho a ccou cih hae.56Mih rho kha ccungthydung thyhte alung huapaw te azya huapaw laku nee athua cih hae.
57E tuh Levi phin hae kha mih phin thyhte rianaw nynh thua: Gershon kyate a tho hae paw Gershon phin; Kohath kyate a tho hae paw Kohath phin; Merari kyate a tho hae paw Merari phin nynh thua hae.58E hae tuh Levi phin nynh thua hae: Libni phin, Hebron phin, Mahli phin, Mushi phin te Korah phin nynh thua. Kohath tuh Amram paaw nynh thua.59Amram zu min tuh Jokhebed cikuh zah Izip ram kya Levi nynh a saahpaw Levi ccanung nynh thua; aning nynh Amram hanlan Aaron, Moses te mih ccianung Miriam kha a saahpya hae.60Aaron nynh Nadab, Abihu, Eleazar te Ithamar kha a saah hae.61Thuasalama Nadab te Abihu tuh Bawipaw malang khe athyaa leipaw maee te si he a law hae tuh, phe chih hae.62Sawpaw sah kheit acihpaw te palung lang pise miakaw riapaw milu tuh thong kuin lae thum acih hae; minmin tuh Israel hae kyaze rho pyabua athua khyh keiccu hae ze, Israel hae kya ccazing lawbua thua khyh hae.
63E hae hynh Jeriko te arawsekunaw Jordan vaw pe, Moab bialae kyaze Israel hae kha a riatu hae paw Moses te ranpibawi Eleazar nynh a ria hae paw milu nynh thua.64Hynh-e hae kyahin Sinai ramkaw kya Israel hae kha a la riatu hae paw Moses te Aaron nynh a ria hae paw lu kheit sanmah um khyh hae.65Pawccecize minmin kong kha Bawipaw nynh, “Minmin tuh ramkaw kya a chih cih hae,” cite a la ho vae. Jefunneh ccapaw Kaleb te Nun ccapaw Joshua holeite minmin laku e lu kheit sanmah hiin vae khyh hae. Zelofehad Ccanung hae
1Oute Josef ccapaw Manasseh, Manasseh phin hae tuh Manasseh ccapaw Makhir, Makhir ccapaw Gilead, Gilead ccapaw Hefer, Hefer ccapaw Zelofehad nynh thua. Zelofehad ccanung hae min tuh: Mahlah, Noah, Hoglah, Milkah, te Tirzah nynh thua hae.2Minmin nynh Moses, ranpibawi Eleazar, cciakhaetu hae te zapi balyn malang tungkunaw bu thuakaw kya thadyn hae zah,3“Kae paaw tuh ramkaw kya a chih vae; aning tuh Bawipaw rawsete pynkheihlan a sueluakuh hae paw Korah phu kya umbua khyh, thuasalama amaw seinaw keiccuze a chih; te ccapaw saah khyh.4Ccapaw a saah khyh keiccuze kae paaw min tuh a phin kyate pawcce vua athua cih? Kae paaw a uno hae ryte ccoupaw uccaw oun pyabua oh,” a ci hae.
5Moses nynh minmin konglang kha Bawipaw malang a thuakhae.6Te Bawipaw nynh Moses kha,7“Zelofehad ccanung hae nynh a ho hae paw tuh ahmepaw nynh thua; mih paaw uno hae ryte rho kha na ccousah bua ccaccing cih hae zah, mih paaw rho kha na pya cih hae.8Israel hae kha mah, ‘Ccapaw a hoi leipaw pise tuh a chi ze, a rho kha a ccanung kalan na pya cih oh.9Ccanung a hoi khyh ze, a rho kha a uno hae kalan na pya cih oh.10Uno a hoi khyh ze, a rho kha a paaw uno hae kalan na pya cih oh.11Te a paaw tuh uno a hoi khyh ze, a rho kha a phin kya-e anaekuh huapaw a puizia kalan na pya cih oh zah, tuh-e paw nynh a ccou cih. Bawipaw nynh Moses kaw a pya thyhte tuh-e tuh Israel hae hanlan phungbya te phungzae athua cih,’ cite na hopah cih hae,” a cipya. Moses Ccelang Joshua Ponaw (Deu 31.1-8)
12Bawipaw nynh Moses kha, “Hynh-e Abarim mua vawlan khuin kaethung lah, Israel hae ka pya hae paw ram khuh dotua.13Khuh-e ram he na muih koute, nang mah na upaw Aaron hawte na ccungccaw hae kalan sueluabua na thua cih,14pawccecize zapi hae nynh Zin ramkaw kya yn ccohnuaku lya hae ze, ka bya kha na dou. Minmin muihnaw kya, tui kyakhe athyaapaw ka thuanaw kha na langsakuh khyh,” a cipya. (E tui tuh Zin ramkaw kya umpaw Meribath-kadesh tui nynh thua.)15Moses nynh Bawipaw kha,16“Bawipaw , pynsaw balyn kya-e muisaw hae Pachia nynh Bawipaw kya-e zapi hae tuh tuurintu a um leipaw tuu hae hawte athua khyh nawlan hae, zapi cciakhaetu lukhakheit, mih malang a cceih cih paw te mih malang a tee cih paw, minmin kha a poukhae cih hae paw te a teekhae cih hae paw kha nungpah hae sah,” a cipya.18Tukeiccuze Bawipaw nynh Moses kha, “A tungvaw kya muisaw umpaw Nun ccapaw Joshua kha ko lah, a tungvaw khe na kuih khangtua;19amaw kha ranpibawi Eleazar te zapi balyn malang khe thadynsah lah, a muihnaw hae khe amaw kha kawhoinaw pyatua.20Israel zapi balyn nynh a kaw a ngae ccaw hae, na kawhoinaw abang kha amaw kalan na pya cih.21Thuasalama ranpibawi Eleazar malang a thadyn cih zah, Eleazar nynh Bawipaw malang Urim byapaenaw thyhte amaw hanlan byakhianaw kha a rae cih; amaw ryte Israel zapi balyn tuh amaw bya thyhte a pou cih hae zah amaw bya thyhte a tee cih hae,” a ci.22Tukeiccuze Bawipaw nynh kaw a pya thyhte Moses nynh a cyi. Joshua kha ko zah ranpibawi Eleazar te zapi balyn malang khe a thadynsah;23Bawipaw nynh Moses a hopya thyhte Moses nynh a kuih kha Joshua tungvaw khang zah kawhoinaw a pya. Nin Takyh Silawnaw (Exo 29.38-46)
1Bawipaw nynh Moses kha hynhte a hopya:2Israel hae kha kawpya hae lah, hynhte hopah hae: Kamaw kya-e silawnawpaw, maee te kamaw kalan silawnawpaw looh, kamaw kya-e mynkhuhpaw kha accyh khyapaw kyakhe kamaw kalan silaw lanpaw kha na raeringkuh cih oh.3Te minmin kyakhe hynhte na hopah cih hae, E hynh Bawipaw kalan si na law lan oh paw maee te silawnaw nynh thua: nin takyhte tyty silawnaw hanlan douccahpaw tuutaw pise kum kheit acihpaw sa ning.4Awkhua kya tuutaw sa kheit khate si na law cih oh zah zetepakaw kya ccangpaw sa kheit khate si na law cih oh;5ccathae silawnaw hanlan kha mah aphongkuhpaw oliv chitui hin kheit kya-e pum pali pum kheit te apykuhpaw vaekhui ephah ccangkheit kya-e pumhaw pumkheit khate si na law cih oh.6E hynh tyty raepaw maee-ute silawnaw thua zah, Sinai Mua kya tynsah athuapaw Bawipaw kalan amynkhuhpaw lante maee te silawnaw nynh thua.7Niapaw silawnaw tuh tuutaw sa kheit cci hanlan misutui hin kheit kya-e pum pali pum kheit athua cih; beikinnthyaa kyakhe niapaw silawnaw kha Bawipaw hanlan na bu cih.8Ccangpaw tuutaw sa kheit khate zetepakaw khe, awkhua e silawnaw hawte ccathae silawnaw te niapaw silawnaw ryte si na law cih; Bawipaw hanlan amynkhuhpaw lante maee te silawnaw kha na rae cih. Sabbath Silawnaw
9Sabbath nin khe douccahpaw tuutaw pise kum kheit acihpaw sa ning te ccathae silawnaw hanlan chitui te pykuhpaw vaekhui ephah ccangkheit kya-e pum haw pum ning, te tuh-e niapaw silawnaw—10tyty raepaw maee-ute silawnaw te niapaw silawnaw apiaze hynh-e hynh sabbath takyh hanlan maee-ute silawnaw nynh thua. Sah Takyh Silawnaw
11Nae sawpaw hae kya-e masaty nin hae kyakhe Bawipaw kalan maee-ute silawnaw kha na rae cih oh: tangnuapaw anopaw sa ning, tuutepaw sa kheit, douccahpaw tuutaw pise kum kheit acihpaw sa sari;12tangnuapaw anopaw sa kheit cci hanlan kha ccathae silawnaw elang chitui te apykuhpaw vaekhui ephah ccangkheit kya-e pum haw pum thum; te tuutepaw sa kheit hanlan kha ccathae silawnaw elang chitui te apykuhpaw vaekhui pum haw pum ning;13te tuutaw sa kheit cci hanlan kha ccathae silawnaw lante chitui pykuhpaw vaekhui pumhaw pumkheit cci; e hynh mynkhuhpaw, maee-ute silawnaw Bawipaw kalan maee te silawnaw nynh thua.14Niapaw silawnaw hae tuh tangnuapaw sa kheit hanlan misutui hin kheit kya-e angankuh, tuutepaw sa kheit hanlan hin kheit kya-e pum thum pum kheit, te tuutaw sa kheit hanlan hin kheit kya-e pum pali pum kheit athua cih; e hynh akum kyaze sawpaw sah takyhte po raepaw maee-ute silawnaw nynh thua.15Te Bawipaw kalan seithyaanaw silawnaw hanlan miaatepaw sa kheit athua cih; tyty raepaw maee-ute silawnaw te niapaw silawnaw apiaze tuh-e tuhte silawnaw kha rae athua cih. Kawtaw Poi kya Silawnaw hae (Lev 23.5-14)
16Masaty sawpaw kya-e nin haw lae palinaw nin khe Bawipaw kalan kawtaw poi silawnaw a um cih.17Te hynh-e sawpaw nin haw lae pangawnaw nin tuh poi nynh thua; nin sari lungkhu ransi phing leipaw sanlou kha ae athua cih.18Masaty nin khe athyaapaw pumkunaw a um cih. Ryalaw kha na lah lan khyh oh.19Bawipaw hanlan maee te silawnaw athuapaw maee-ute silawnaw kha na rae cih oh: tangnua anopaw sa ning, tuutepaw sa kheit te kum kheit acihpaw tuutaw pise sa sari athua cih hae zah, douccahpaw athua nawlan hae hoyte do oh.20Minmin kya-e ccathae silawnaw kha chitui te pykuhpaw vaekhui te rae athua cih: tangnua hanlan ephah ccangkheit kya-e pumhaw pumkheit, tuutepaw hanlan pum haw pum ning;21tuutaw sa sari kya-e sa kheit cci hanlan pumhaw pumkheit cci khate si na law cih oh;22te nae hanlan seingaethyanaw raepya nawlan, seithyaanaw silawnaw kha miaatepaw sa kheit khate na rae cih oh.23Tyty raepaw maee-ute silawnaw te asekuhpaw awkhua kya maee-ute silawnaw apiaze hynh-e hae hynh mah na rae cih oh.24Hynh-e hawte nin sari lungkhu nin takyhte maee te silawnawpaw looh, Bawipaw kalan mynkhuhpaw khate si na law cih oh; tyty raepaw maee-ute silawnaw te niapaw silawnaw apiaze tuh-e tuhte silawnaw kha rae athua cih.25Te nin sarinaw nin khe athyaapaw pumkunaw kha na rae cih oh; ryalaw na lah lan khyh oh. Lonaw Poi kya Silawnaw hae (Lev 23.15-22)
26Thaety nin khe, athawpaw ccathae kya-e ccathae silawnaw kha lonaw hae kya-e nae poi kyakhe Bawipaw kalan he na rae oh te, athyaapaw pumkunaw kha na rae cih oh; ryalaw kha na lah lan khyh oh.27Bawipaw kalan amynkhuhpaw, maee-ute silawnaw kha na rae cih oh: tangnua anopaw sa ning, tuutepaw sa kheit, kum kheit acihpaw tuutaw pise sa sari;28chitui te pykuhpaw vaekhui te raepaw mih ccathae silawnaw, tangnua sa kheit cci hanlan ephah ccangkheit kya-e pumhaw pumkheit cci, tuutepaw sa kheit hanlan pum haw pum ning,29tuutaw sa sari kya-e sa kheit cci hanlan pumhaw pumkheit cci;30nae hanlan seingaethyanaw raepya nawlan, miaatepaw sa kheit khate si na law cih oh.31Tyty raepaw maee-ute silawnaw te ccathae silawnaw apiaze, hynh-e hae ryte mih kya-e niapaw silawnaw kha na rae cih oh. Tuh-e hae tuh douccahpaw athua cih hae. Mungkae Tu Poi Silawnaw hae (Lev 23.23-25)
1Sawpaw sah sarinaw masaty nin khe athyaapaw pumkunaw kha na rae cih oh; ryalaw na lah lan khyh oh. E hynh nanning kalan mungkae tu nin thua zah,2Bawipaw hanlan amynkhuhpaw, maee-ute silawnaw kha: tangnua anopaw sa kheit, tuutepaw sa kheit, douccahpaw tuutaw pise kum kheit acihpaw sa sari khate si na law cih oh.3Minmin kya-e ccathae silawnaw kha chitui te pykuhpaw vaekhui te rae athua cih: tangnuapaw hanlan ephah ccangkheit kya-e pum haw pum thum, tuutepaw hanlan pum haw pum ning;4tuutaw sa sari kya-e sa kheit cci hanlan pumhaw pumkheit cci khate si na law cih oh;5Nanning hanlan seingaethyanaw raepya nawlan, seithyaanaw silawnaw hanlan miaatepaw sa kheit khate si na law cih oh.6E hae hynh, sawpaw sah leihpaw kya raepaw maee-ute silawnaw te a ccathae silawnaw, tyty maee-ute silawnaw te a ccathae silawnaw, minmin kya-e niapaw silawnaw hae, mih phungzae thyhte Bawipaw hanlan amynkhuhpaw, maee te silawnaw apiaze raepaw silawnaw nynh thua hae. Seingaethyanaw Nin kya Silawnaw hae (Lev 23.26-32)
7Hynh-e sawpaw sah sarinaw, nin haw nin khe athyaapaw pumkunaw na rae cih oh zah naemaw te naemaw na sungkuh cih oh; rya na lah lan khyh oh.8Bawipaw kalan amynkhuhpaw, maee-ute silawnaw kha: tangnua anopaw sa kheit, tuutepaw sa kheit, kum kheit acihpaw tuutaw pise sa sari khate na rae cih oh. E hae tuh douccahpaw athua cih hae.9Minmin kya-e ccathae silawnaw kha chitui te pykuhpaw vaekhui te rae athua cih: tangnuapaw hanlan ephah ccangkheit kya-e pum haw pum thum, tuutepaw hanlan pum haw pum ning;10tuutaw sa sari kya-e sa kheit cci hanlan pumhaw pumkheit cci khate si na law cih oh;11seingaethyanaw hanlan seithyaanaw silawnaw, tyty raepaw maee-ute silawnaw te a ccathae silawnaw, minmin kya-e niapaw silawnaw hae apiaze seithyaanaw silawnaw hanlan miaatepaw sa kheit khate silawnaw na rae cih oh. Bu Poi Silawnaw hae (Lev 23.33-44)
12Sawpaw sah sarinaw kya-e nin haw lae pangawnaw nin khe athyaapaw pumkunaw kha na rae cih oh; nae ryalaw hae kha na lah lan khyh oh. Nin sari lungkhu Bawipaw hanlan poi na tua cih oh.13Bawipaw hanlan amynkhuhpaw lang maee te silawnaw athuapaw maee-ute silawnaw kha: tangnuapaw anopaw sa haw lae thum, tuutepaw sa ning te kum kheit acihpaw tuutaw pise sa haw lae pali khate na rae cih oh zah, douccahpaw athua cih hae.14Minmin kya-e ccathae silawnaw kha chitui te pykuhpaw vaekhui te rae athua cih: tangnua sa haw lae thum kya-e sa kheit cci hanlan ephah ccangkheit kya-e pum haw pum thum cci, tuutepaw sa ning kya-e sa kheit cci hanlan pum haw pum ning cci,15tuutaw sa haw lae pali kya-e sa kheit cci hanlan pumhaw pumkheit cci khate si na law cih oh;16tyty raepaw maee-ute silawnaw, a ccathae silawnaw te niapaw silawnaw apiaze seithyaanaw silawnaw hanlan miaatepaw sa kheit khate mah si na law cih oh.
17Nin ningnaw nin khe: tangnua anopaw sa haw lae ning, tuutepaw sa ning, douccahpaw tuutaw pise kum kheit acihpaw sa haw lae pali kha,18tuh-e hae alung azya na synria oh hawte, tangnuapaw hae, tuutepaw hae te tuutaw hae hanlan ccathae silawnaw te niapaw silawnaw hae rykhate silawnaw na rae cih oh;19tyty raepaw maee-ute silawnaw, a ccathae silawnaw te minmin kya-e niapaw silawnaw apiaze seithyaanaw silawnaw hanlan miaatepaw sa kheit khate mah si na law cih oh.
20Nin thumnaw kya: tangnuapaw sa haw lae kheit, tuutepaw sa ning, douccahpaw tuutaw pise kum kheit acihpaw sa haw lae pali kha,21tuh-e hae alung azya na synria oh hawte tangnuapaw hae, tuutepaw hae, tuutaw hae hanlan ccathae silawnaw te niapaw silawnaw hae rykhate silawnaw na rae cih oh;22tyty raepaw maee-ute silawnaw, a ccathae silawnaw te a niapaw silawnaw apiaze seithyaanaw silawnaw hanlan miaatepaw sa kheit khate mah si na law cih oh.
23Nin palinaw nin khe: tangnuapaw sa haw, tuutepaw sa ning, douccahpaw tuutaw pise kum kheit acihpaw sa haw lae pali kha,24tuh-e hae alung azya na synria oh hawte tangnuapaw hae, tuutepaw hae, tuutaw hae hanlan ccathae silawnaw te niapaw silawnaw hae rykhate silawnaw na rae cih oh;25tyty raepaw maee-ute silawnaw, a ccathae silawnaw te a niapaw silawnaw apiaze seithyaanaw silawnaw hanlan miaatepaw sa kheit khate mah si na law cih oh.
26Nin pangawnaw nin khe: tangnuapaw sa takua, tuutepaw sa ning, douccahpaw tuutaw pise kum kheit acihpaw sa haw lae pali kha,27tuh-e hae alung azya na synria oh hawte tangnuapaw hae, tuutepaw hae, tuutaw hae hanlan ccathae silawnaw te niapaw silawnaw hae rykhate silawnaw na rae cih oh;28tyty raepaw maee-ute silawnaw, a ccathae silawnaw te a niapaw silawnaw apiaze seithyaanaw silawnaw hanlan miaatepaw sa kheit khate mah si na law cih oh.
29Nin taruhnaw nin khe: tangnuapaw sa tarya, tuutepaw sa ning, douccahpaw tuutaw pise kum kheit acihpaw sa haw lae pali kha,30tuh-e hae alung azya na synria oh hawte tangnuapaw hae, tuutepaw hae, tuutaw hae hanlan ccathae silawnaw te niapaw silawnaw hae rykhate phungzae thyhte silawnaw na rae cih oh;31tyty raepaw maee-ute silawnaw, a ccathae silawnaw te a niapaw silawnaw apiaze seithyaanaw silawnaw hanlan miaatepaw sa kheit khate mah si na law cih oh.
32Nin sarinaw nin khe: tangnuapaw sa sari, tuutepaw sa ning, douccahpaw tuutaw pise kum kheit acihpaw sa haw lae pali kha,33tuh-e hae alung azya na synria oh hawte tangnuapaw hae, tuutepaw hae, tuutaw hae hanlan ccathae silawnaw te niapaw silawnaw hae rykhate phungzae thyhte silawnaw na rae cih oh;34tyty raepaw maee-ute silawnaw, a ccathae silawnaw te a niapaw silawnaw apiaze seithyaanaw silawnaw hanlan miaatepaw sa kheit khate mah si na law cih oh.
35Nin taryanaw nin khe athyaapaw pumkunaw na rae cih oh zah ryalaw na lah lan khyh oh.36Bawipaw kalan amynkhuhpaw lang maee te silawnaw athuapaw maee-ute te silawnaw kha na rae cih oh: tangnuapaw sa kheit, tuutepaw sa kheit te douccahpaw tuutaw pise kum kheit acihpaw sa sari,37tuh-e hae alung azya thyhte tangnuapaw, tuutepaw, tuutaw hae hanlan ccathae silawnaw te niapaw silawnaw hae rykhate silawnaw na rae cih oh;38tyty raepaw maee-ute silawnaw, a ccathae silawnaw te a niapaw silawnaw apiaze seithyaanaw silawnaw hanlan miaatepaw sa kheit khate mah si na law cih oh.
39Hynh-e hae hynh, nae kya-e maee-ute silawnaw hae, nae ccathae silawnaw hae, nae niapaw silawnaw hae te nae kya-e ccawkunaw silawnaw hae hawte, nae kya-e byakinkute silawnaw hae te nae kya-e lungthote silawnaw hae apiaze nanning kya-e accyh khyapaw poi hae kya Bawipaw kalan silawnaw na rae cih oh.
40Tukeiccuze Bawipaw nynh Moses kya kaw a pya thathyhte Moses nynh Israel hae kha atyn-are a hopya hae. Nopi hae kyate Byakinkunaw
1Oute Moses nynh Israel phin hae kya-e lupi hae kha hynhte a hopya hae: E hynh Bawipaw kawpyapaw nynh thua.2Pise lukhakheit nynh Bawipaw kalan byakinkunaw a rae ze thuasah, tuhkhyhze hankhakheit kha sungku lan thyalawkute bya a kinku ze thuasah a bya kha roh lan khyh; a khalang kyate a pousahpaw balyn thyhte a cyih cih.
3Nopi lukhakheit nynh Bawipaw kalan byakinkunaw a rae ze thuasah, tuhkhyhze ano lya, a paaw inn kya a um lyakhe amaw te amaw kha sungku khylan byakinkunaw khate a heedeku lanze thuasah,4a byakinkunaw khate amaw te amaw sungku khylan byakinkunaw te a heedekupaw kha a paaw nynh phang a thae pite pawpaw mah a hopya khyh zetuh, a byakinkunaw balyn tuh atyn cih zah amaw te amaw heedekute bya a kinkupaw miakaw tuh atyn cih.5Thuasalama tuh-e tuh a paaw nynh thae zah a ccanung kha nawccaw leinaw bya a hopya zetuh, a byakinkunaw te amaw te amaw heedekute bya a kinkupaw tuh tyn lan khyh; a paaw nynh a nawccaw leinaw kha a hopya vae keiccuze, Bawipaw nynh tuh-e nopinung tuh a ngaethya cih.
6Bya a kinku lya lungkhu thuasah, tuase leite a khalang nynh a hopaw khate sungku khylan amaw te amaw kha bya a kinku lya lungkhu thuasah vawpaw a hoi ze,7a vawpaw nynh tuh-e tuh thae zah a thae lyakhe pawpaw mah a hopya khyh ze, nopinung nynh bya a kinkunaw tuh atyn cih zah amaw te amaw sungku lan heedekute bya a kinkupaw tuh mah atyn cih.8Thuasalama a vawpaw nynh tuh-e tuh a thae lyakhe, a nawccaw leinaw kha a langsahpyaku lanze, a vawpaw nynh tuh-e nopinung a byakinkunaw te amaw te amaw sungku lan heedekute bya a kinkupaw kha aroh cih; te Bawipaw nynh nopinung kha a ngaethya cih.9(Thuasalama nomaenung khyhze vawpaw te a mahkuh hae paw nopinung nynh a byakinkunaw miakaw te sungku lan heedekute bya a kinkupaw tuh a tungvaw atyn cih.)10Te nopinung nynh a vawpaw inn kyakhe byakinkunaw a rae ze thuasah, tuhkhyhze hankhakheit kha sungku lan thyalawkute bya a kinku ze thuasah11tuh-e tuh a vawpaw nynh thae zah nopinung kha pawpaw mah hopya leite a nawccaw leinaw kha a langsahpyaku khyh zetuh, nopinung nynh bya a kinkupaw balyn tuh atyn cih zah sungku lan bya a kinkupaw miakaw tuh atyn cih.12Thuasalama a vawpaw nynh thae zah tuh-e hae tuh a ro lanze, nopinung a byakinkunaw hae te asekuhpaw a mung kyate a poupaw pawpaw balyn thuasah, tuhkhyhze amaw te amaw bya a kinkupaw te asekuhpaw tuh thuasah tyn lan khyh. Tuh-e bya a kinku hae paw tuh a vawpaw nynh phe roh vae zah Bawipaw nynh nopinung kha a ngaethya vae cih.13Byakinkunaw a raepaw miakaw kha thuasah, tuhkhyhze sungku khylan bya a kinkupaw miakaw kha thuasah a vawpaw nynh tynsahnaw kaw hoi zah ronaw kaw mah a hoi.14Thuasalama a vawpaw nynh nin kheit koute nin kheit paw sanmah a hopya khyh zetuh, nopinung a byakinkunaw balyn kha thuasah, hankhakheit bya a kinkupaw balyn kha a tynsah vae; a vawpaw nynh a thae ccyh lyakhe pawpaw mah a hopya khyh keiccuze a tynsah vae hae.15Thuasalama a vawpaw nynh a thae ccyh phe alia koute a ro zetuh, a zu hoyleinaw kha amaw nynh a ing cih.
16E hae hynh, zu te vawpaw laku thuasah, a paaw inn kya-e ano ungpaw a ccanung te a paaw laku thuasah Bawipaw nynh Moses kya kaw a pyapaw phungbya hae nynh thua. Midian tungvaw Rhawtuknaw
1Bawipaw nynh Moses kha hynhte a hopya:2“Israel hae hanlan Midian hae tungvaw phulawnaw kha raetua; tukoute na ccungccaw hae kalan sueluabua na thua cih,” a cipya.3Tukeiccuze Moses nynh ccungccaw hae kha, “Midian hae tungvaw Bawipaw phulawnaw kha rae khylan minmin kha ccianua lan, nanning abang nynh rhawtuknaw lanpaw zunghe kha ccyngkuh oh.4Israel phin phinkheit cci kyate ccungccaw thong kheit cci kha rhawtuknaw kalan na saw cih hae,” a cipya.5Tukeiccuze Israel hae athong patae kya-e phin kheit cci kyate ccungccaw thong kheit cci kha po hae zah, ccungccaw thong haw lae ning tuh rhawtuknaw lanpaw zunghe a kyng hae.6Moses nynh phin kheit cci kyate ccungccaw thong kheit cci kha thuasah, ranpibawi Eleazar ccapaw Finehas kha a kuih kya umpaw beikinnthyaa kya-e angphe hae te raeringnaw roi ccaesahnawpaw mungkae hae ryte thuasah rhawtuknaw kalan a saw hae.7Bawipaw nynh Moses kaw a pya thyhte minmin nynh Midian hae kha tuk hae zah pise miakaw kha a chia hae.8A chia hae paw kyatuin Midian siapharan lu pangaw hae: Evi, Rekem, Zur, Hur te Reba kha mah a chiabua hae. Tuh-e a chia hae paw apiaze Beor ccapaw Balaam kha mah tangpaw te phe chia hae.9Israel hae nynh Midian nopi hae te mih imua hae kha a kyng hae; mih vaetua phu balyn, mih tuuphu hae te mih uccaw hae balyn kha a lua hae.10A umnaw hae mih khua hae balyn te mih ryahmin balyn kha maee te a soipya hae,11a kyng hae paw balyn te a luade hae paw balyn, ccungccaw thuasah, sahiinpaw thuasah khaleih a lawku hae.12Tetuh a kyng hae paw, a lua hae paw te a lawde hae paw kha Jeriko khua kya, Jordan vaw kin umpaw Moab bialae mih ryahmin kya um hae paw Moses, ranpibawi Eleazar te Israel zapi hae kalan a thuakhae hae. Rhawtuknaw kyate Kinaw
13Moses, ranpibawi Eleazar te zapi cciakhaetu hae balyn tuh minmin ryte tungku khylan ryahmin atolang a cceih hae.14Moses tuh rhawtuknaw kyate oun thua hae paw rhawbawi hae, milu athong uktu hae te azah uktu hae tungvaw a thinria.15Moses nynh minmin kha, “Nopi hae balyn hynh na hiin oh tou?16E nopi hae nynh Balaam kya-e tuanaw kha lawkute Israel hae kha Peor khozi kya Bawipaw rawsete seinaw a raesah hae, tukeiccuze Bawipaw ccungccaw hae kya shethya nynh a thuanua hae.17Tukeiccuze pise taraw miakaw kha theih oh lah, pise te a ihkheih boi vae paw nopi miakaw kha theih oh.18Thuasalama pise te a ihkheih boi leipaw liaccaw balyn kha tuh naemaw hanlan hiinkuh oh.19Ryahmin atolang khe nin sari um oh; nanning lakuze ccungccaw a theihpaw miakaw te michi rhua a typaw miakaw nynh naemaw te naemaw kha thuasah, na kyng oh paw kha thuasah nin thumnaw nin te nin sarinaw nin khe thyaasah oh.20Boeining miakaw, saphua te raepaw uccaw miakaw, miaa ming te raepaw uccaw miakaw te thing te raepaw uccaw miakaw kha na thyaasah cih oh,” a cipya hae.
21Ranpibawi Eleazar nynh rhawtuk lan a cceihpaw rhawkaw phu hae kha: “E hynh Bawipaw nynh Moses kaw a pyapaw upadi kya-e phungbya nynh thua:22sui, ngun, sohin, sivaw, ccephui, kue—23maee kya a khe khopaw miakaw kha maee lungkhu na phung cih oh zah a thyaa cih hae. Tuhzemah thyaasahnawpaw tui te mah thyaasah athua cih zah maee kya a khe kho leipaw miakaw kha tuh tui kya dung athua cih.24Nin sarinaw nin khe nae boeining kha na sukuh cih oh zah na thyaa cih oh; tukoute ryahmin lungkhu lang na tee cih oh,” a cipya hae. Kyngpaw Ccungccaw hae te Luadepaw hae Phianaw
25Bawipaw nynh Moses kha hynhte a hopya:26“Nang, ranpibawi Eleazar te zapi lungkhu e puizia raveih kya-e lupi hae nynh kyngpaw te luadepaw ccungccaw te sahiinpaw kha asasite ria oh.27Luadepaw uccaw hae kha rhawtuknaw lang a cceih hae paw hanlan te zapi balyn hanlan cite phu ning lang phia oh.28Rhawtuknaw lang a cceih hae paw rhawkaw hae nynh a ccou hae paw kya-e Bawipaw nynh a ccou lanpaw kha ccungccaw thuasah, tangnuapaw thuasah, lann thuasah, tuu thuasah, tuhkhyhze miaa thuasah, za pangaw kyaze sa kheit, ccungccaw athua ze lu kheit kha na phia cih.29Minmin nynh a ccou hae paw angankuhpaw kya-e kha na lah cih oh zah Bawipaw hanlan silawnawpaw lante ranpibawi Eleazar kalan na pya cih oh.30Thuasalama Israel hae nynh a ccou hae paw angankuhpaw kya-e kha ccungccaw thuasah, tangnuapaw thuasah, lann thuasah, tuu thuasah, tuhkhyhze miaa thuasah, sahiinpaw balyn, sung pangaw kyaze lu kheit, sahiin athua ze sa kheit kha na lah cih zah Bawipaw beikbu a do-oihtu Levi phin hae kalan na pya cih hae,” a cipya.
31Bawipaw nynh Moses kaw a pya thyhte, Moses te ranpibawi Eleazar nynh a cyi hae:
32Rhawkaw hae nynh a lua kou hae te, alae ungpaw tuh tuu cciing taruh thong sung sari thong pangaw,33tangnuapaw sung sari thong ning,34lann sung taruh thong kheit,35pise te a ih boi leipaw nopi hae, ccungccaw abalyn tuh sung thum thong ning acih.
36Rhawtuknaw lang a cceih hae paw nynh a ccou hae paw, a luade hae paw kya-e angankuh tuh tuu te miaa cciing thum sung thum thong sari za pangaw thua zah,37Bawipaw nynh a ccou lanpaw tuh tuu te miaa za taruh sung sari sa pangaw acih.38Tangnuapaw hae tuh sung thum thong taruh cih zah, Bawipaw nynh a ccou lanpaw tuh sung sari sa ning acih.39Lann tuh thong sung thum za pangaw cih zah, Bawipaw nynh a ccou lanpaw tuh sung taruh sa kheit acih.40Ccungccaw hae tuh thong haw lae taruh cih zah, Bawipaw nynh a ccou lanpaw tuh sung thum lu ning acih.41Bawipaw nynh Moses kaw a pya thyhte, Moses nynh Bawipaw kalan silawnawpaw kha ranpibawi Eleazar kalan a pya.
42Rhawkaw hae kyate Moses nynh Israel hae hanlan a phiapya hae paw angankuh tuh—43zapi hae nynh a ccou hae paw angankuhpaw kya-e tuu tuh cciing thum sung thum thong sari za pangaw,44tangnuapaw sung thum thong taruh,45lann thong sung thum za pangaw,46te ccungccaw thong haw lae taruh acih.47Israel hae nynh a ccou hae paw angankuhpaw kya-e kha ccungccaw thuasah, sahiinpaw thuasah sung pangaw kyaze lu kheit, sahiin athua ze sa kheit kha Moses nynh lah zah Bawipaw beikbu a do-oih hae paw Levi phin hae kalan a pya hae; tuh-e tuh Bawipaw nynh Moses kaw a pya thyhte nynh thua.
48Oute athong thong te uktupaw rhawbawi hae, athong te uktupaw rhawbawi hae te aza te uktupaw rhawbawi hae nynh Moses kalan oun naekuh hae zah,49Moses kha, “Na see hae kaening nynh kae kuihkaw umpaw rhawkaw hae kha kae ria hae zah lu kheit sanmah zo khyh.50Kaening lu kheit cci nynh kae muepaw Bawipaw kya-e ahlu sui uccaw hae, kuihnaw hae, khawccan hae, tazeih kuihpu hae, nakuahuing hae te si alungmung hae kha Bawipaw malang kaening hanlan seingaethyanaw raepya nawlan kae thuakhae vae,” a cipya hae.51A rae kou vae hae paw sui uccaw balyn kha Moses te ranpibawi Eleazar nynh minmin kyate a law hae.52Rhawkaw athong uktupaw rhawbawi hae te aza uktupaw rhawbawi hae nynh Bawipaw kalan a hlu hae paw silawnawpaw sui tuh shekel thong haw lae taruh za sari sung pangaw acih.53(Rhawkaw hae nynh a lua hae paw balyn kha mimaw lu kheit cci hanlan a lawku hae.)54Te Moses te ranpibawi Eleazar nynh athong uktupaw rhawbawi hae te aza uktupaw rhawbawi hae kyate sui kha lah hae zah, Bawipaw malang Israel hae hanlan syntawnaw lante tungkunaw bu lungkhu lang oun ccyng hae. Jordan Nithua lang Ram Neekunaw (Deu 3.12-22)
1Reuben phin hae te Gad phin hae tuh sahiin-awvaw pataepi a hoi hae. Jazer ram te Gilead ram tuh sahiin-awvaw hanlan myarya hoy cipaw minmin nynh he a muih hae tuh,2Gad phin hae te Reuben phin hae nynh Moses, ranpibawi Eleazar te zapi cciakhaetu hae kalan oun cceih hae zah,3“Ataroth, Dibon, Jazer, Nimrah, Heshbon, Elealeh, Sebam, Nebo, te Beon ram hae,4Bawipaw nynh Israel zapi malang a taepaw tuh-e ram hae tuh sahiin-awvaw hanlan ahoypaw ram nynh thua; te nae see hae kaening nynh sahiin-awvaw kae hoi,” a cipya hae.5Te minmin nynh, “Nae malang maehoynaw kae mue zetuh, e ram hynh nae see hae kaening oun pya oh; kaening hynh Jordan vaw khuraw lang oun zua sah nan oh,” a cipya hae.
6Thuasalama Moses nynh Gad phin te Reuben phin kha, “Nae uno hae nynh rhawtuknaw lang a ccia lya hae khe, nanning tuh hein kya tou na dahung cih oh?7Bawipaw nynh a pya hae paw ram lungkhu lang Israel hae nynh a tee lan hae paw kha pawcce mih lungthaw na zya sah cih oh?8Kadesh-barnea kyate tuh-e ram dosah khylan nae paaw hae kha he ka saw hae tuh, minmin nynh hynhcite a cyi hae.9Eshkol Accya lang kaethung hae zah ram kha he a muih hae tuh, Bawipaw nynh a pya hae paw ram lungkhu lang Israel hae nynh a tee lan hae paw kha minmin nynh mih lungthaw a zyasah hae.10Tuh-e nin khe Bawipaw thinrianaw tuh maee lang rua zah, thyalaw te,11‘Izip ram kyate a poupaw ccungccaw hae, kum kuin te palung lang nynh kamaw kha yn zui ccaccing khyh hae keiccuze, Abraham, Isak te Jakob kya kae pya cih oh cite bya ka kinpyaku hae paw ram kha muih ccaccing lan khyh hae—12Keniz phin Jefunneh ccapaw Kaleb te Nun ccapaw Joshua laelan, minmin nynh Bawipaw kha a zui ccaccing khyh keiccu hae ze muih lan khyh hae,’ a ci.13Te Israel hae tungvaw Bawipaw thinrianaw tuh maee lang rua zah, Bawipaw muihnaw kya hoyleinaw a raepaw ccungccaw hae balyn pong a zo mawlaezung hae, ramkaw kya kum sung pali lungkhu a khiavuisahku hae.14Te atu, misei phu nanning, Israel tungvaw kya Bawipaw thin kha houh riasah khylan, nae paaw hae ccelang nae thokuh vae oh!15Nanning nynh Bawipaw zuinaw kyate ccanglang na maeku oh zetuh, minmin kha ramkaw kya bua a vua cih hae; te hynh-e ccungccaw balyn hynh na roh vae cih oh,” a cipya hae.
16Tetuh minmin nynh Moses kalan oun cceihthung hae zah, “E kyahin kae tuuphu hae hanlan tuukhia te kae imua hae hanlan khua kha kae raepah cih hae,17thuasalama Israel hae kha mih umnaw hmin kya kae thuakhae makhia hae, zunghe ccyngkute minmin malang laan kae maw cih. Tuh ccyh lyatuin, hynh-e ram e ccungccaw hae kyate khyn khylan, kae imua hae tuh akoihkhawkuhpaw khua kya a um cih hae.18Israel hae balyn nynh mih rho kha a ccou mawlaezung hae, kae inn lang kae ki lan khyh.19Kaening nynh minmin ryte Jordan vaw khuhlang raw te akhung lang kha rho lang kae ccoubua lan khyh, pawccecize kaening rho tuh Jordan vaw hynhlang raw, nithua lang nynh athua vae,” a cipya hae.
20Tukeiccuze Moses nynh minmin kha, “E hynh na cyi oh ze—Bawipaw malang rhawtuk lan zunghe ccyngkute na ccia oh ze thuasah,21Bawipaw nynh rhaw hae kha amaw malang te a dee makhia hae, zunghe a ccyngkuhpaw nanning balyn nynh Bawipaw malang khe Jordan vaw kha na zua oh ze thuasah,22tuh-e ram tuh Bawipaw malang tae athua koute na ki cih oh zah Bawipaw kya te Israel hae kya laebah na um vae lan khyh oh, te hynh-e ram hynh Bawipaw malang na hoi oh paw ram lang a tang cih.23thuasalama e hynh na cyi khyh oh zetuh, Bawipaw malang na sei vae oh; te nae seinaw nynh ae ccung cih oh zah ae muih cih oh.24Nae imua hae hanlan khua hae kha rae oh lah, nae tuu hae hanlan tuukhia hae kha rae oh; thuasalama bya na kinku oh paw kha cyih oh,” a cipya hae.
25Oute Gad phin te Reuben phin hae nynh Moses kha, “Ka bawipaw nynh kaw nae pya thyhte, na see hae nynh kae cyih cih.26Kae imua hae, kae zu hae, kae tuu hae te kae sahiin-awvaw hae balyn tuh Gilead ram e khua hae kyakhuin a la um cih hae;27thuasalama zunghe a ccyngpaw na see hae miakaw nynh bawipaw nang nynh kaw nae pya thyhte, Bawipaw hanlan rhawtuk khylan khuhlang raw kae zua cih,” a ci hae.
28Tukeiccuze minmin te asekuh lante Moses nynh ranpibawi Eleazar, Nun ccapaw Joshua te Israel minphuin hae kyaze thokeinaw raveih kya-e lupi hae kha kaw a pya hae.29Te Moses nynh minmin kha, “Gad ciihan te Reuben ciihan hae kyaze Bawipaw malang rhawtuk khylan zunghe a ccyngkuhpaw miakaw tuh nanning ryte Jordan vaw kha na zua cih oh zah, nanning malang khe ram kha tae athua zetuh, Gilead ram kha minmin nynh a hoi hae paw ram lang na pya cih oh;30thuasalama minmin nynh zunghe ccyngkute nanning ryte vaw kha a zua khyh hae zetuh, Kanaan ram kya nanning laku khe ram a hoibua cih hae,” a cipya hae.31Gad ciihan te Reuben ciihan hae nynh, “Bawipaw nynh na see hae kya a ho vae hawte, kaening nynh kae cyih cih.32Bawipaw malang khe zunghe ccyngkute Kanaan ram lungkhu lang po kae cceih cih, thuasalama kae ccou lanpaw kae rho tuh Jordan vaw hynhlang raw athua cih,” a ci hae.
33Moses nynh Gad phin, Reuben phin te Josef ccapaw Manasseh phin angankuh kalan—Amor hae siapharan Sihon peenaw te Bashan siapharan Og ram, hynh-e ram hae kya umpaw khuapi hae te mih pepan e khua hae kha a pya hae.34Te Gad phin hae nynh Dibon, Ataroth, Aroer,35Atroth-shofan, Jazer, Jogbehah,36Beth-nimrah te Beth-haran, akoihkhawkuhpaw khuapi hae te tuu hae hanlan tuukhia hae kha a raethui hae.37Te Reuben phin hae nynh Heshbon, Elealeh, Kiriathaim,38Nebo te Baal-meon abang min hae tuh rulae athua vae, te Sibmah kha a raethui hae; a raethui hae paw khua hae kha min thawpaw a phu hae.39Manasseh ccapaw Makhir phin hae nynh Gilead lang cceih hae zah khah-e khua kha a law hae, tuin kya a la um hae paw Amor hae kha a dee hae;40tukeiccuze Moses nynh Gilead tuh Manasseh ccapaw Makhir kha pya zah tuin kya a um.41Manasseh ccapaw Jair nynh cceih zah mih khua taraw hae kha lah hae zah, Havvoth-jair cite min a phuthui hae.42Te Nobah nynh cceih zah Kenath te a khua taraw hae kha lah hae zah, amaw min kha leete Nobah cite min a phuthui. Izip kyate Israel hae Ccianaw
1Hynh-e hae tuh Izip ram kyate Israel hae kha Moses te Aaron nynh aphuphute a cciakhaenaw hae ryahmin hae nynh thua.2Bawipaw kawpyanaw thyhte, san kheit koute san kheit a thoku takawnaw hae hmin kha Moses nynh a zei; e hae tuh a thoku takawnaw hae hmin thyhte, mih ryahmin hae nynh thua.3Masaty sawpaw kya nin haw lae pangawnaw nin khe Rameses kyate a pou hae; kawtaw poi koute awkhualan khe Israel hae tuh Izip hae balyn a muihnaw hae khe rawthungte a pou hae,4tuh-e ccyh tuh Bawipaw nynh a chia hae paw Izip ccatawccaw balyn kha Izip hae nynh a uu lya hae nynh thua. Bawipaw nynh mih pachia hae kha heize bya a pia hae.
5Tukeiccuze Israel hae tuh Rameses kyate pou hae zah Sukkoth kya ryahmin a tahku hae.6Sukkoth kyate pou hae zah ramkaw akin umpaw Etham kya ryahmin a tahku hae.7Etham kyate pou hae zah Baal-zefon lang a hawipaw Pi-hahiroth langkhe a ki hae; te Migdol malang khe ryahmin a tahku hae.8Pi-hahiroth kyate pou hae zah, rili kha zuate ramkaw lang a tee hae, Etham ramkaw khe nin thum laanccia cceih hae zah Marah kya ryahmin a tahku hae.9Marah kyate pou hae zah Elim kya athua hae; Elim kyatuin tuidy haw lae ning te ungcci ku sung sari um zah tuin kya ryahmin a tahku hae.10Elim kyate pou hae zah Rili Se kin khe ryahmin a tahku hae.11Rili Se kyate pou hae zah Sin ramkaw khe ryahmin a tahku hae.12Sin ramkaw kyate pou hae zah Dofkah kya ryahmin a tahku hae.13Dofkah kyate pou hae zah Alush kya ryahmin a tahku hae.14Alush kyate pou hae zah ccungccaw hae nynh nia lanpaw tui a um leinaw Refidim kya ryahmin a tahku hae.15Refidim kyate pou hae zah Sinai ramkaw kya ryahmin a tahku hae.16Sinai ramkaw kyate pou hae zah Kibroth-hattaavah kya ryahmin a tahku hae.17Kibroth-hattaavah kyate pou hae zah Hazeroth kya ryahmin a tahku hae.18Hazeroth kyate pou hae zah Rithmah kya ryahmin a tahku hae.19Rithmah kyate pou hae zah Rimmon-perez kya ryahmin a tahku hae.20Rimmon-perez kyate pou hae zah Libnah kya ryahmin a tahku hae.21Libnah kyate pou hae zah Rissah kya ryahmin a tahku hae.22Rissah kyate pou hae zah Kehelathah kya ryahmin a tahku hae.23Kehelathah kyate pou hae zah Shefer Mua kya ryahmin a tahku hae.24Shefer Mua kyate pou hae zah Haradah kya ryahmin a tahku hae.25Haradah kyate pou hae zah Makheloth kya ryahmin a tahku hae.26Makhelth kyate pou hae zah Tahath kya ryahmin a tahku hae.27Tahath kyate pou hae zah Terah kya ryahmin a tahku hae.28Terah kyate pou hae zah Mithkah kya ryahmin a tahku hae.29Mithkah kyate pou hae zah Hashmonah kya ryahmin a tahku hae.30Hashmonah kyate pou hae zah Moseroth kya ryahmin a tahku hae.31Moseroth kyate pou hae zah Bene-jaakan kya ryahmin a tahku hae.32Bene-jaakan kyate pou hae zah Hor-haggidgad kya ryahmin a tahku hae.33Hor-haggidgad kyate pou hae zah Jotbathah kya ryahmin a tahku hae.34Jotbathah kyate pou hae zah Abronah kya ryahmin a tahku hae.35Abronah kyate pou hae zah Eziongeber kya ryahmin a tahku hae.36Eziongeber kyate pou hae zah Zin ramkaw kya ryahmin a tahku hae (tuh-e tuh Kadesh nynh thua).37Kadesh kyate pou hae zah Edom ram kin umpaw Hor Mua kya ryahmin a tahku hae.
38Bawipaw kawpyanaw thyhte ranpibawi Aaron tuh Hor Mua lang kaethung zah, tuin kyakhe Izip ram kyate Israel hae a pounaw hae te kum sung palinaw, sawpaw sah pangawnaw, masaty nin khe a chih.39Aaron tuh Hor Mua vawlan a chi lya, za kheit kum kuin lae thum acih.40Kanaan ram Negeb kya umpaw Arad siapharan Kanaan minphuinpaw nynh Israel hae oun ccia hae paw the kha a thae.
41Hor Mua kyate pou hae zah Zalmonah kya ryahmin a tahku hae.42Zalmonah kyate pou hae zah Punon kya ryahmin a tahku hae.43Punon kyate pou hae zah Oboth kya ryahmin a tahku hae.44Oboth kyate pou hae zah Moab ram lungkhu umpaw Iye-abarim kya ryahmin a tahku hae.45Iyim kyate pou hae zah Dibon-gad kya ryahmin a tahku hae.46Dibon-gad kyate pou hae zah Almon-diblathaim kya ryahmin a tahku hae.47Almon-diblathaim kyate pou hae zah Nebo malang umpaw Abarim mua kya ryahmin a tahku hae.48Abarim mua kyate pou hae zah Jeriko pe, Jordan vaw kin, Moab bialae khe ryahmin a tahku hae.49Jordan vaw kin, Beth-jeshimoth kyate Abel-shittim kyacia, Moag bialae khe ryahmin a tahku hae. Kanaan Tae lan Hopyanaw
50Jeriko pe, Jordan vaw kin, Moab bialae khe Bawipaw nynh Moses kha hynhte a hopya:51Israel hae kyakhe hynhte hopah hae: “Nanning nynh Jordan vaw kha na zua oh zah Kanaan ram lungkhu lang he na tee oh te,52tuh-e ram kya a um hae paw balyn kha nae malang kyate na dee cih oh zah pyaararih lan a pyaaku hae paw mih lung balyn kha na ropah cih oh, sivaw tui te a laeeku hae paw mih zohtuh hae balyn kha na ropah cih oh zah ahang lante a raeku hae paw hmin balyn kha na tingpah cih oh.53Ram kha nae ram lang kae pya vae oh keiccuze, ram nynh a hoipaw kha na lawkuh cih oh zah tuh-e ram lungkhu khe khua na sah cih oh.54Nae phin thyhte ram kha ccungthydungte na neekuh cih oh; phin kyaze ccungccaw alungpaw kha rho alung na pya cih oh zah azyapaw kha rho azya na pya cih oh; ccungthydungte muepaw thathyhte rho kha na ccou cih oh; nae thokeinaw phin thyhte rho na ccou cih oh.55Thuasalama ram kya um hae paw kha nae malang kyate na dee khyh oh zetuh, na dee lei oh paw ccungccaw hae tuh nae mit kya phynbang hawte thuasah, nae napang kya hinpaw hawte thuasah athua cih hae; nae umnaw ram kya vawsawnaw ae pya cih oh.56Te minmin tungvaw cyi lan ka tuaku hawte nae tungvaw ka cyih cih,” a ci. Ramri hae
1Bawipaw nynh Moses kha hynhte a hopya:2Israel hae kha kawpya hae lah hynhte hopah hae: Nanning nynh Kanaan ram kya he na tee oh te (e ram tuh ramri ia athuapaw Kanaan ram thua zah rho lang na ccou cih oh paw ram nynh thua),3ram alia lang tuh Zin ramkaw kyate Edom loukaw cia athua cih. Alia lang e nae ramri tuh Rili Chihpaw adianaw nithua lang kyate atho cih;4nae ramri tuh Akrabbim yn kaethungnaw alia langkhe maekute Zin cia athua cih zah, adianaw tuh Kadesh-barnea alia langkhe athua cih; oute Hazar-addar lang a cceih cih zah Azmon cia athua cih;5ramri tuh Azmon kyate Izip Vawkhu lang a maeleihkuh cih zah adianaw tuh Rili kya athua cih.
6Niccaw lang e ramri tuh Rili Lepaw te a kin cia athua cih; e hynh niccaw lang e nae ramri athua cih.
7Palung lang e nae ramri tuh: Rili Lepaw kyate Hor Mua kyacia athua cih;8Hor Mua kyate Lebo-hamath langkhe a cceih cih zah, ramri adianaw tuh Zedad kya athua cih;9oute ramri tuh Zifron kyacia athua cih zah adianaw tuh Hazar-enan kya athua cih; e hynh palung lang e nae ramri athua cih.
10Nithua lang e nae ramri tuh Hazar-enan kyate Shefam kyacia athua cih;11ramri tuh Shefam kyate Ain nithua lang umpaw Riblah cia po a cceihbung cih; te ramri tuh a cceihbung cih zah Khinnereth rili nithua lang raw cia athua cih;12ramri tuh Jordan langkhe a cceihbung cih zah adianaw tuh Rili Chihpaw kya athua cih. E tuh nae ram po voilupaw ramri hae athua cih.
13Moses nynh Israel hae kha hynhte kaw a pya hae: E hynh nanning nynh ccungthydungte na ccou cih oh paw ram, Bawipaw minphuin phin takua te angankuh hanlan pya lan kaw a pya vae paw ram nynh thua;14Pawccecize Reuben phin te Gad phin tuh mih puizia thyhte mih rho kha a lawkuh vae hae, te Manasseh phin angankuh nynh mah rho a lawkuh vae hae;15Phin phinning te angankuh nynh mih rho athuapaw Jordan vaw akhung lang Jeriko nithua lang, khuanin a thuanaw lang kha a lawku vae hae. Phin Cciakhaetu hae
16Bawipaw nynh Moses kha hynhte a hopya:17Ram kha rho lang ae nee cih oh paw ccungccaw hae min tuh ranpibawi Eleazar te Nun ccapaw Joshua nynh thua hae.18Ram kha rho lang neenaw kyaze a bawmtu lang hae, phin takyh kya-e cciakhaetu lu kheit cci kha na ko cih hae.19E hae hynh tuh-e ccungccaw hae min nynh thua: Judah phin kyate Jefunneh ccapaw Kaleb.20Simeon phin kyate Ammihud ccapaw Shemuel.21Benjamin phin kyate Khislon ccapaw Elidad.22Dan phin kyate cciakhaetu lu kheit, Efod ccapaw Hanniel.23Josef phin kya-e Manasseh phin kyate cciakhaetu lu kheit, Efod ccapaw Hanniel,24te Efraim phin kyate cciakhaetu lu kheit, Shiftan ccapaw Kemuel.25Zebulun phin kyate cciakhaetu lu kheit, Parnak ccapaw Elizafan.26Issakhar phin kyate cciakhaetu lu kheit, Azzan ccapaw Paltiel.27Te Asher phin kyate cciakhaetu lu kheit, Shelomi ccapaw Ahihud.28Naftali phin kyate cciakhaetu lu kheit, Ammihud ccapaw Pedahel.29E hae tuh Kanaan ram kya Israel hae kha rho nee lan Bawipaw nynh kawpya hae paw nynh thua hae. Levi Phin hae hanlan Khuapi hae
1Moab bialae, Jordan vaw kin, Jeriko khua khe Bawipaw nynh Moses kha hynhte a hopya:2Israel hae nynh rho lang a ccou hae paw ram kya umpaw khua hae kha Levi phin hae nynh a um nawlan hae pya khylan Israel hae kha kawpya hae; khua hae po avoilupaw sahiin apaenaw ram hae kha mah Levi phin hae kalan na pya cih hae.3Khua hae tuh minmin a um nawlan hae athua cih zah, mih sahiin apaenaw ram hae tuh mih vaetua hae, mih sahiin-awvaw hae te mih sarangpaw hae balyn hanlan athua cih.4Levi phin hae kalan na pya cih hae paw khua hae kya-e sahiin apaenaw ram hae tuh khualungrua kyate atolang dong thong kheit po voilu lan ako cih.5Khua atolang kha na tou cih, nithua lang dong thong ning, alia lang dong thong ning, niccaw lang dong thong ning, palung lang dong thong ning athua cih zah khua tuh angaelung khe a um cih; e hynh mih khua hae hanlan sahiin apaenawpaw mih ram athua cih.
6Levi phin hae kalan na pya hae paw khua hae tuh ccungccaw a theihpaw nynh a ccue nawlan na ua cih paw, khynnaw khuapi khua taruh athua cih hae, tuh-e khuapi hae apiaze khua sung pali khua ning kha na pya cih hae.7Levi phin hae kalan na pya hae paw khua hae tuh mih sahiin apaenaw ram hae ryte, abalynte sung pali khua tarya acih cih.8Te Israel hae nynh a hoi hae paw kyate na pya lan hae paw khua hae tuh, phin kya-e ccungccaw alung huapaw kyate patae na lah cih zah phin adih huapaw kyate azya na lah cih; lu kheit cci nynh a ccou hae paw rho alung azya thyhte mih khua hae kya-e kha Levi phin hae kalan a pya cih hae. Khynnaw Khuapi hae (Deu 19.1-13; Jos 20.1-9)
9Bawipaw nynh Moses kha hynhte a hopya:10Israel hae kha hynhte hopah hae: Nanning nynh Jordan vaw na zua oh zah, Kanaan ram lungkhu lang he na tee oh te,11tuaku ty leite ccungccaw a theihsei hae paw nynh a ccue nawlan hae, nae hanlan khynnaw khuapi hae kha na po cih oh.12Zapi malang byapianaw a um makhia ccungccaw a theihtupaw tuh a chi khyh nawlan, tuh-e khuapi hae tuh nae hanlan liarutu kyate khynnaw athua cih.
13Na pya oh paw khua hae tuh nae hanlan khynnawpaw khuapi khua taruh athua cih hae:14khynnawpaw khuapi hae tuh Jordan vaw nithua lang e khuapi khua thum te Kanaan ram kya umpaw khuapi khua thum athua cih.15E khuapi khua taruh tuh Israel hae hanlan thuasah, minmin kya khuasah hae paw te sohsoh a umpaw ramccang ccungccaw hanlan thuasah rekunaw athua cih, tuaku ty leite ccungccaw a theihseipaw nynh tuh-e khuapi hae kalan a ccue cih. Ccungccaw Chianaw te Phulawnaw
16Thuasalama sivawhaelua te ccungccaw kha bua zah a chisahpaw tuh ccungccaw a theihpaw nynh thua; ccungccaw a theihpaw tuh chia athua cih.17Tuhkhyhze ccungccaw a chisah khopaw a kuih kya-e lung khate ccungccaw kha deih zah a chisahpaw tuh ccungccaw a theihpaw nynh thua; ccungccaw a theihpaw tuh chia athua cih.18Tuhkhyhze ccungccaw a chisah khopaw a kuih kya-e thing te raepaw zunghe khate ccungccaw kha bua zah a chisahpaw tuh ccungccaw a theihpaw nynh thua; ccungccaw a theihpaw tuh chia athua cih.19Chiise phu a lahpaw nynh ccungccaw a theihtupaw kha a theih cih; he a tungkuh hae te, phu a lahpaw nynh a theih cih.20Tuhawte lukhakheit nynh ccungccaw kha a hua keiccuze dou a tu ze thuasah, tuhkhyhze buhkhaw zah ccangkhakheit te a deih ze thuasah, a chi lanze,21tuhkhyhze a hua keiccuze a kuih te thung zah a chi lanze, tuh-e a thungtupaw tuh chia athua cih; aning tuh ccungccaw a theihpaw nynh thua; chiise phu a lahtupaw nynh he a tungkuh hae te, ccungccaw a theihtupaw kha a theih cih.
22Thuasalama huakunaw a um leite lukhakheit nynh ccangpaw ccungccaw kha dou a tu ze thuasah, tuhkhyhze buhkhaw leite ccangkhakheit te a deih ze thuasah,23tuhkhyhze a rhawkuh hae paw thua leite, vaemaw muesah lanpaw mah paccynkunaw a um lei pite, a chisah khopaw lung ccangkhakheit kha ccyngkuh zah, paccynnuakupaw athua leite tuh-e lung nynh ccangpaw ccungccaw kha ccawphusei zah a chi lanze,24a theihtupaw te chiise phu a lahtupaw laku, hynh-e phungzae hae thyhte zapi nynh bya a pia cih hae;25te zapi hae nynh a theihtupaw kha chiise phu a lahtupaw kyate a khum cih hae. Oute zapi hae nynh a theihtupaw kha atakaw lya a khynnaw khuapi kalan bua a saw cih hae. Tuh-e a theihtupaw tuh athyaapaw chitui thuh athuapaw ranpibawi lupi a chi mawlaezung tuh-e khuapi kya a um cih.26Thuasalama a theihtupaw tuh pawpaw ccyh kya zemah atakaw lya a khynnaw khuapi ramri atolang cceih zah,27chiise phu a lahtupaw nynh a khynnaw khuapi ramri atolang khe a theihtupaw kha muih zah a chia zetuh, ccungccaw chianaw mee kha ing lan khyh.28Pawccecize a theihtupaw tuh ranpibawi lupi a chi mawlaezung a khynnaw khuapi kya a um hahe cih; thuasalama ranpibawi lupi a chih koute a theihtupaw tuh amaw inn lang a ki cih.
29E hae hynh nae hanlan nae umnaw miakaw khe nae she takyh kya phungbya te phungzae athua cih.
30Lukhakheit nynh ccungccaw a chia lanze, a muihtu hae kya-e ccaekiakhannaw thyhte a theihtupaw kha chia athua cih; thuasalama a muihtu lu kheit kya-e ccaekiakhannaw tetuh humhung mah chia thua lan khyh.31Tuh apiaze chinaw detahnaw ing lan accanpaw ccungccaw theihpaw a hiinnaw shawkhaw mee kha na lawkuh lan khyh oh; ccungccaw a theihpaw tuh chia athua hahe cih.32Khynnaw khuapi kalan ccue zah ranpibawi lupi a chi mawze amaw ram kya um khylan ki a rypaw ccungccaw hanlan shawkhaw mee kha na lawkuh lan khyh oh.33Tuhcite nae umnaw ram kha na thusah lan khyh oh; pawccecize chiise nynh ram kha a thusah, chiise a luasahtupaw chiise laelan, tuh-e ram hanlan rungkhaw lanpaw paw san um khyh.34Nae umnaw ram kha na thusah lan khyh oh, tuin kya kae mah ka umbua; Bawipaw , kamaw tuh Israel hae laku ka um. Rho Lahpaw Nopi hae te Zuvaw Tangnaw
1Josef phin kya-e Manasseh ccapaw Makhir a ccapaw Gilead ciihan puizia lungkhu e lupi hae nynh oun cceih hae zah Moses te cciakhaetu hae, Israel hae puizia kya-e lupi hae malang khe,2minmin nynh, “Ram hynh ccungthydungte Israel hae kalan rho lang pyasah khylan Bawipaw nynh ka bawipaw nang kha kaw ae pya vae; te kae unopaw Zelofehad rho kha a ccanung hae kalan pya lan Bawipaw nynh kaw ae pya.3Thuasalama minmin nynh ccangpaw Israel phin te zuvaw lang a tang hae ze, mih rho kha kae puizia hae rho kyate law athua cih zah minmin te zuvaw lang a tang hae paw phin kya-e rho lungkhu lang pybia athua cih; tukeiccuze kae neekupaw kae rho hae kyate law athua cih.4Te Israel hae jubilee he yn thua te, mih rho tuh zuvaw lang a tang hae paw phin kya-e rho lungkhu lang pybia athua cih; te mih rho tuh kae thokeinaw phin kya-e rho kyate law athua cih,” a ci hae.
5Oute Moses nynh Bawipaw bya thyhte Israel hae kha, “Josef phin kya-e ciihan hae nynh a ho hae paw tuh ahme.6E hynh Zelofehad ccanung hae te asekuh lante Bawipaw kawpyanaw nynh thua, ‘Ahoyhuacce cite a tua hae paw kha vawpaw lang umkhae hae sah; thuasalama mih paaw hae phin kya-e puizia hae te kyalya zuvaw lang tang hae sah,7tuhteze nynh Israel hae rho tuh phin kheit kyate ccangpaw phin kheit kalan pyaku thua lan khyh; pawccecize Israel hae balyn nynh mih thokeinaw phin raveih kya-e rho kha a tynsah cih hae.8Israel phin phinkhakheit kyaze rho a ccoupaw ccanung miakaw nynh a paaw phin puizia kya-e pise khate zuvaw lang a tang cih hae, tuhteze nynh Israel hae balyn nynh mih thokeinaw rho kha po a hoi cih hae.9rho kha phin kheit kyate ccangpaw phin kheit kalan pyaku thua lan khyh; Israel hae phin kheit cci kya-e rho tuh mimaw phin raveih kyakhe atyn cih,’ ” cite a hopya hae.
10Bawipaw nynh Moses kaw a pya thyhte Zelofehad ccanung hae nynh a cyi hae.11Zelofehad ccanung hae Mahlah, Tirzah, Hoglah, Kalkah te Noah nynh mih paaw a upaw hae te a neitaw hae ccapaw hae khate zuvaw lang a tang hae.12Minmin nynh Josef ccapaw Manasseh phin kya-e ciihan hae khate zuvaw lang a tang hae.
13E tuh Bawipaw nynh Moses kyate Israel hae kalan Moab bialae, Jordan vaw kin, Jeriko kya a pya hae paw kawbya hae te phungzae hae nynh thua.

Bible Society of Myanmar

https://app.library.bible/content/1a340f5ae072b2f4

expand_more
chevron_leftບົດກ່ອນໜ້ານີ້
chevron_rightບົດຕໍ່ໄປ