DEUTERONOMY1

Horeb kya Acyihkuhpaw Hothuinaw

1Hynh-e tuh Moses nynh Israel hae balyn kalan Paran te Tofel, Laban, Hazeroth te Dizahab alaku, Suf te arawsekunaw bialae kya, Jordan vaw akhung lang ramkaw khe a hopya hae paw bya nynh thua.2(Horeb kyate Kadesh-barnea lang tuh Seir Mua laanpi lang te nin haw lae kheit laanccia nynh thua.)3Kum sung palinaw kum, sawpaw sah haw lae kheitnaw kyaze masaty nin khe Bawipaw nynh Moses kya Israel hae hopya khylan kaw a pya thyhte Moses nynh Israel hae kha a hopya hae.4E hynh Heshbon kya umpaw Amor Siapharan Sihon te Ashtaroth te Edrei kya umpaw Bashan Siapharan Og kha Moses nynh a tae kou hae te nynh thua.5Jordan vaw akhung lang, Moab ram khe Moses nynh hynh-e upadi hynh akawlan thyhte a hopya hae:
6Bawipaw ah Pachia nynh Horeb kya aening oun hopyapaw tuh, “E mua kya khaw cia na um vae oh.7Cceih oh lah, mua alungnaw Amor hae ram lungkhu lang te a pepan umpaw ram hae Arabah lang thuasah, mua alungnaw ram lang thuasah, Shefelah lang thuasah, Negeb te rili kin lang thuasah, Kanaan hae ram te Lebanon lang thuasah Zufrates vawpi cia cceih oh.8Dotua oh, ram tuh nae malang ka nung vae; nae minpaaw hae Abraham, Isak te Jakob kalan te minmin koute mih ciihan hae kalan pya lan bya ka kinkupaw ram lungkhu lang tee oh lah, ram nynh a hoipaw kha lawkuh oh,” a ci. Phin Cciakhaetu hae Khangnaw (Exo 18.13-27)
9Tuh ccyh lyaze kae nynh nanning kha, “Ka makhaete tuh nae hanlan ka taening lan khyh.10Bawipaw nae Pachia nynh ae pungthungsah oh zah, atunin nanning tuh vaawlui e awsi zeih na cih vae oh.11Bawipaw athuapaw nae minpaaw hae Pachia nynh bya ae kinpyaku thyh oh te, leit thong kheit ae lungthungsah oh sah lah, hythua ae pya vae oh sah!12Bya na lung oh paw aripaw ryalaw balyn hynh ka makhaete pawtemou ka phu kho cih?13Nanning ae cciakhae lan oh paw, nae phin kyaze a hawpaw, a nyhthyapaw te sawtua lan umpaw lu kheit cci kha pokuh oh,” cite kae hopya oh.14Nanning nynh kae kha, “Na hopaw tuh ahoypaw nynh thua,” nae cipya oh.15Tukeiccuze nae phin kya-e cciakhaetu hae, ahawpaw te sawtua lan umpaw kha ka ko hae zah, athong uktu hae, aza uktu hae, sung pangaw uktu hae, lu haw uktu hae te bawi hae lang nae phin takyh kya ka nung hae.16Tuh ccyh lyaze nae byapiatu hae kha ka khang hae: “Nae phu kya-e ccungccaw hae bya kha hoyte piapah oh lah, ramccungccaw thuasah, ramccang ccungccaw thuasah lu kheit te lu kheit laku ahmete byapia oh.17Maedote bya na pia lan khyh oh: mino te piccan phe lokuh lante bya na piapah cih oh; ccungccaw nynh nangsekunaw kha na rih lan khyh oh, pawccecize byapianaw tuh Pachia kya-e nynh thua. Nanning hanlan myarya rupaw bya tuh ka kalan yn thuakhae oh, kamaw nynh ka pia cih,” a ci.18Tuh ccyh lyaze na cyi lan oh paw atyn-are balyn kha kae hopya oh, a cipya hae. Israel nynh Ram kya Tee lan A Ei (Nam 13.1-33)
19Oute Bawipaw ah Pachia nynh kaw oun pya thyhte, Horeb kyate ah cceih oh zah, na muih vae oh hawte myarya lepaw te ri lan umpaw ramkaw balyn, mua alungnaw Amor hae ram lang cceihpaw laanpi khate Kadesh-barnea kyacia ah thua oh.20Kae nynh nanning kha, “Bawipaw ah Pachia nynh oun pyapaw, mua alungnaw Amor hae ram na thua vae oh.21Dotua oh, Bawipaw nae Pachia nynh nanning kha ram ae pya vae oh; Bawipaw athuapaw nae minpaaw hae Pachia nynh bya ae kinpyaku oh paw ram lang cceihthung oh lah lawkuh oh; rih nan oh lah, nae lungthang nan sah,” kae cipya oh.
22Nanning balyn nynh kamaw kalan nae cceih oh zah, “Aening hanlan ram oun dopah cih paw ccungccaw hae kha saw oh sih lah, ah ccianua cih oh paw khuapi hae te ah cciathung nawlan oh paw laanpi kong kha oun hopah hae sah,” na ci oh.23Tuh-e bya tuh ahoypaw ka losah zah nanning lu haw lae ning kha phin kheit cci kyate lu kheit cci kae po oh.24Minmin nynh cceih hae zah mua alungnaw ram lungkhu lang a cceihthung hae, te Eshkol Vahue kya he a thua hae te, ram kha a dophi hae,25tuh-e ram kya-e apoupaw thingthae abang kha suelua hae zah aening kalan oun cciakhae bung hae. Minmin nynh thongpang oun phupah hae zah, “Bawipaw ah Pachia nynh oun pyapaw ram tuh ahoypaw ram nynh thua,” a ci hae.
26Thuasalama nanning nynh na cceihthung ry khyh oh. Bawipaw nae Pachia kya-e kawpyapaw kha na dou oh;27nae bu kyakhe na ccohkuh oh zah, “Bawipaw nynh aening hynh oun hua keiccuze Amor hae kuih kya pyate ro khylan Izip ram kyate oun poukhae.28Teilangmou ah cceih cih oh? Aening puizia hae nynh, ‘Tuh-e ccungccaw hae tuh aening laeze mih thawsaehua zah a hanghua hae; khuapi hae tuh le hae zah khua athungkhawkuhpaw tuh vaawlui phe adia! Tuin kya Anak ciihan hae kha kae muih ccaccing hae!’ cikuhpaw thongpang khate aening thinlung kha oun tuisah hae,” na ci oh.29Kae nynh nanning kyakhe, “Minmin kha siikuh nan oh lah, rih nan oh.30Nae malang a cceihpaw Bawipaw nae Pachia tuh Izip ram kya na muihnaw oh ccaccei khe ae cyipya oh hawte, e hmin kya na thua mawlaezung oh, na ccianaw oh laanpi balyn kya, lukhakheit nynh imua kha a pua hawte Bawipaw nae Pachia nynh pawtemou ae pua oh cipaw na muihnaw oh, ramkaw kya nae hanlan rhaw ae tukpah cih oh paw nynh thua.32Thuasalama ryahmin na tahkunaw lan oh paw hmin kha ccung khylan, na zui lan oh paw laanpi kha langsahpya khylan, khuazi ze maee te thuasah, khuadae ze maeking te thuasah nae malang ae cciapah oh paw, Bawipaw nae Pachia nynh hynhte ae cyipah oh zahmah amaw kha na zyn khyh oh,” a cipya hae. Israel nynh A Dou keiccu Detahnaw (Nam 14.20-45)
34Bawipaw nynh nae bya kha he a thae tuh, a thinria zah,35“Nae minpaaw hae kha pya lan cite bya ka kinpyaku hae paw ram hoypaw kha hynh-e ahoy leipaw minphuin kya-e lu kheit nynh sanmah muih lan khyh,36Jefunneh ccapaw Kaleb rou nynh khah-e ram kha a muih cih, Bawipaw tungvaw tynkaring lan a lungzi keiccuze a ccu te a synaw ram kha amaw te a ciihan hae kalan ka pya cih hae,” a ci.37Bawipaw tuh nanning keiccuze ka tungvaw heize a thinria zah, “Nang mah tuh-e ram lungkhu lang na tee lan khyh.38Nang ae bawmtupaw Nun ccapaw Joshua tuh ram lungkhu lang a tee cih; aning tuh Israel kha ram a ccousahtupaw athua keiccuze thawzung pyatua.39Rhaw nynh a kyng hae paw lang a tang cih hae cite na tua oh paw nae imua hae, atunin athya ahoy a nyh loh lei hae paw nae ccaaw hae tuh ram lungkhu lang a tee cih hae; ram tuh minmin ka pya cih hae zah minmin nynh ram kha a ccou cih hae.40Thuasalama nanning tuh Rili Se lang cceihpaw laanpi thyhte ramkaw lang kitua oh,” a ci.
41Nanning nynh kae kha, “Bawipaw tungvaw kae sei vae! Bawipaw kae Pachia nynh kaw oun pya thyhte kae cceihthung cih zah kae tuk cih,” nae cipya oh. Nanning balyn nynh nae rhaw zunghe kha kyngte mua alungnaw ram lungkhu lang cciathung lanpaw kha azoi lante na tua oh.42Bawipaw nynh kae kha, “Minmin kyakhe, ‘Cceihthung nan oh lah, tuk nan oh, pawccecize nanning laku ka um khyh; tuhkhyhze tuh nae rhaw hae nynh ae tae cih oh,’ cite hopah hae,” yn cipya.43Kae hopya oh zemah na ngae khyh oh. Bawipaw kawpyapaw kha na dou oh zah mua alungnaw ram lungkhu lang lungkhungte na cciathung oh.44Tuh-e mua alungnaw um hae paw Amor hae nynh ae pounua cih oh zah khoi nynh dee hawte ae dee cih oh zah Seir kyate Hormah kyacia ae tude cih oh.45Nae ki oh zah Bawipaw malang he na rah oh tuh, Bawipaw nynh nae roi kha ngaepya leite pawlang ae riapah vae lan khyh oh. Ramkaw kya Kum hae
46Kadesh kya na la um oh hawte khaw cia bua na um oh.
1Bawipaw nynh yn hopya hawte aening nynh Rili Se lang khate ramkaw lang ah kithui oh zah, Seir Mua kha khaw cia ah voilu oh.2Oute Bawipaw nynh kae kha yn hopah zah:3“Mua alungnaw hynh-e ram hynh khaw cia na voilu vae cih. Palung lang hawite cceih oh lah,4akawlan thyhte ccungccaw hae kha hopah oh: Seir kya umpaw nae puizia Esau ciihan hae ram kya na cceih vae cih oh. Minmin nynh nanning kha ae rih cih oh,5tukeiccuze minmin ryte rhaw na tukku khyh nawlan oh, hoyte raeringkuh oh, pawccecize mih ram kha ccuphe lyh sanmah nanning kae pya khyh oh, Seir Mua kha Esau uccaw lang phe ka pya vae.6Na ae lan oh paw looh kha minmin kyate phua te na rekuh cih oh; na nia lan oh paw tui kha mah phua te minmin kya-e na rekuh cih oh.7Na cyi oh paw miakaw kya Bawipaw nae Pachia nynh hythua ae pya ccaccing vae oh; e ramkaw pi kya na ccia oh paw kha phe a ny. Bawipaw nae Pachia nynh kum sung pali lungkhu ae umkhae oh zah nae hanlan pawpaw mah ahoboupaw um khyh,” yn cipya.8Tukeiccuze aening nynh Seir kya umpaw ah puizia Esau ciihan hae pe khe ah cceih oh zah, Arabah laanpi kha cciatawte, Elath te Eziongeber kha mah cciatawte ah cceih oh. Moab ramkaw lang po a cceihpaw laanpi lang he ah cceih oh te,9Bawipaw nynh kae kha yn hopah zah: “Moab kha vawsaw pya nan oh lah rhawtuk nan oh, pawccecize khah-e ram kha lytaraw sanmah nae ram lang kae pya lan khyh oh, pawccecize Ar ram kha Lot ciihan hae ram lang phe ka pya vae hae,” yn cipya.10(langmaw lyaze tuin ram kya Anak hae hawte hang hae zah ale hae paw te alung hae paw Emin hae nynh a la um hae.11Moab hae nynh minmin kha Emin cite a ko hae zemah Anak hae hawte minmin kha Refa hae lang nynh a ria hae.12Tuhpiaze, langmaw lyaze Hor hae nynh Seir ram kya a la um hae, thuasalama Bawipaw nynh Israel hae a pya hae paw ram kya Israel hae nynh a cyi hae hawte Esau ciihan hae nynh Hor hae kha luadete theih hae zah Hor hae a umnaw hae kyakhe khua a sah hae.)13“Oute atu, Zered Vaw kha zua khylan thokuh oh,” yn cipya.
Tukeiccuze Zered Vaw kha ah zua oh.14Kadesh-barnea kyate ah thokuh oh zah Zered Vaw phe ah zua oh cia, Bawipaw nynh rhawkaw hae konglang thyalawnaw bya kha a ho vae thyhte, tuh-e she e rhawkaw hae tuh ryahmin kyate marya a chih hae cia, sung thum kum tarya aro.15Ryahmin kyate minmin kha maemih khylan pong a chi mawlaezung hae, Bawipaw kuih ccaccei nynh minmin kha a rawse ccaccing hae.
16Ccungccaw hae laku kyate rhawkaw hae balyn he a chih kou takaw hae te,17Bawipaw nynh kae kha yn hopah zah,18“Atunin nanning nynh Moab ramri, Ar kyakhe po na cceih cih oh.19Ammon hae ramri lang he na naekuh oh te, minmin kha vawsaw na pya lan khyh oh zah na tuk lan khyh oh, Ammon hae ram kha Lot ciihan hae kalan phe ka pya vae keiccu hae ze, nanning kha rho lang kae pya vae lan khyh oh,” yn cipya.20(Tuh-e ram mah Rafaim hae ram cite ci athuabua. Ammon hae nynh minmin kha Zamzummim hae cite a ko hae zemah langmaw lyaze tuin ram kya Refa hae nynh la um hae,21Zamzum hae tuh Anak hae hawte hang hae zah athawsaepaw te alung hae paw nynh thua hae. Thuasalama Ammon hae nynh minmin kha dee khylan te mih umnaw kya um khylan Bawipaw nynh minmin kha Ammon hae malang khe a ro hae.22Bawipaw nynh Seir kya umpaw Esau ciihan hae hanlan tuhmaminte a cyipya hae—Esau ciihan hae nynh Hor hae kha luadete ro lan zah mih umnaw hmin kya atunin cia um khylan mih malang khe minmin kha a ro hae.23Gaza pepan khua taraw hae kya a um hae paw Avvim hae kha Kaftor kyate oun thua hae paw Kaftor hae nynh theih hae zah mih umnaw hmin kyakhe a um hae.)24“Thokute cceih oh lah Arnon Vaw kha zua oh. Dotua oh, Amor minphuinpaw Heshbon siapharan Sihon te a ram kha nae kuih kya kae pya vae oh. Amaw kha tuk oh lah, ram kha law khylan tho ccavae oh.25Vaawlui zakaw umpaw ccungccaw hae kyakhe nanning ae ri nawlan oh paw te ae siiku nawlan oh paw kha atunin ka tho vae cih; nae thongpang kha he a thae hae te, nanning keiccuze a thyngkuh cih hae zah lungriathaete a um cih hae,” a ci. Siapharan Sihon kha Taenaw (Nam 21.21-30)
26Tukeiccuze Kedemoth ramkaw kyate Heshbon siapharan Sihon kalan zeccuetu hae kha akawlan e daenaw bya thyhte ka saw hae:27“Na ram kya po ccianaw kaw nae ua zetuh, laanpi kya rou ka cceih cih zah voilang ranglang ka maekuh lan khyh.28Ka ae lanpaw looh kha phua te nae zuapah cih zah ka nia lanpaw tui kha mah phua te nae zuapah cih.29Bawipaw kae Pachia nynh oun pyapaw ram lungkhu langkhe tee khylan Jordan vaw ka zua mawlaezung, Seir kya um hae paw Esau ciihan hae te Ar kya um hae paw Moab hae nynh ka hanlan yn cyipya hae hawte, ccu te po ccianaw kaw kyalya oun ua,” ka cipya.30Thuasalama Heshbon siapharan Sihon nynh aening po ccia lanpaw kha oun ua ry khyh, pawccecize Bawipaw nae Pachia nynh atu a cyi vae hawte, Sihon kha nanning kuih kya pya khylan a lung kha tangsah zah a thinlung kha a khungsah.
31Bawipaw nynh kae kha, “Dotua, Sihon te a ram tuh namaw kalan pya lan ka tho takaw vae. A ram lawku lanpaw kha atu tho ccavae oh,” yn cipya.32Tukeiccuze Sihon te a ccungccaw hae balyn nynh aening kha rhawtuk khylan Jahaz kya he oun pounua hae tuh,33Bawipaw ah Pachia nynh Sihon kha aening kalan oun pya; aening nynh amaw a ciihan hae te a ccungccaw hae balyn kha ah chia oh.34Tuh ccyh lyaze a khua balyn kha ah lah oh zah khua takyh kya umpaw pise hae, nopi hae te imua hae kha marya ah maemih oh. Lu kheit sanmah a hiin te ah cciataw khyh oh.35Ah luade oh paw sahiin-awvaw te ah law oh paw khua kya-e uccaw hae rou kha nynh ahmaw hanlan ah lawku oh.36Arnon accya kin umpaw Aroer khua te accya kya umpaw khua kyate tho zah Gilead kyacia aening hanlan myarya ahangpaw khua khuakheit sanmah um khyh. Bawipaw ah Pachia nynh atyn-are kha oun pya.37Thuasalama Bawipaw ah Pachia nynh a hopaw Ammor hae ram, Jabbok vaw kin palung lang balyn te mua alungnaw e khua hae kha naeku leite ah sibia oh. Siapharan Og kha Taenaw (Nam 21.31-35)
1Aening nynh Bashan laanpi lang he ah cceihthung oh tuh, Bashan siapharan Og te a ccungccaw hae balyn nynh aening kha Edrei kya rhawtuk khylan oun pounua hae.2Bawipaw nynh ka kyakhe, “Amaw kha rih nan, pawccecize amaw ryte a ccungccaw hae te a ram hae kha na kuih kya kae pya vae. Heshbon a uktupaw Amor Siapharan Sihon tungvaw na cyi hawkhate a tungvaw kya cyitua,” yn cipya.3Tukeiccuze Bawipaw ah Pachia nynh Bashan siapharan Og te a ccungccaw hae balyn kha mah ah kuih kya oun pya. Ahiinpaw lu kheit sanmah a um lei lan ciate ah tae oh.4Tuh ccyh lyaze a khua balyn kha ah law oh; aening nynh minmin kyate khua sung taruh, Argob pee marya te Bashan kya umpaw Og peenaw kha ah lah oh zah ah law lei oh paw khua khuakheit sanmah um khyh.5E khua hae balyn tuh myarya lepaw khua hae patae apiaze, ahangpaw lungrua, koikua thyh ning, thingccaw hae te koihlupaw khua hae nynh thua hae.6Heshbon siapharan Sihon tungvaw ah cyi oh hawte, minmin kha marya ah roh oh zah, khua raveih kya umpaw nopi hae, pise hae te imua hae kha khaleih ah chia oh.7Thuasalama sahiin-awvaw balyn te khua hae kya-e ah luade oh paw uccaw hae kha tuh ahmaw hanlan ah nungku oh.
8Tukeiccuze tuh-e ccyh lyaze Amor hae siapharan lu ning kyate Jordan vaw nithua lang e ram, Arnon vaw kin kyate Hermon mua kyacia,9(Sidon hae nynh Hermon kha Sirion cite ko hae zah, Amor hae nynh tuh Senir cite a ko hae),10mua sangpyng hae kya umpaw khua hae balyn, Gilead ram khaleih, Bahsan ram abalyn, Salekah te Edrei kyacia Bashan kya umpaw Og a peenaw e khua hae kha ah law oh.11(Atu tuh Refa hae kya-e Bashan siapharan Og rou nynh a laehy vae. A ikhung, sivaw ikhung kha Amor hae khua Rabbah kya muih kho athua ung. Ccungccaw dong te dong takua sae zah dong pali ako.)12Ram kha ah la law lya oh ze, Arnon Vaw kin umpaw Aroer palung lang, mua alungnaw Gilead ram angankuh te tuin kya-e khua hae kha Reuben phin hae te Gad phin hae kalan ka pya hae,13te Gilead ram alaepaw te Og peenaw Bashan abalyn kha Manasseh phin angankuh kalan ka pya hae. (Argob pee abalyn: Refa hae ram cite leih a ko hae paw Bashan abalyn kha nynh thua;14Manasseh phin athuapaw Jair nynh Argob pee abalyn, Geshur hae te Maakath hae ramri kyacia a lawku, Bashan acikuh hae paw khua hae tuh amaw min kha phu zah, amaw koute atunin cia Havvoth-jair a ci hae.)15Makhir tuh Gilead khua kha ka pya.16Reuben phin hae te Gad phin hae tuh Gilead kyate Arnon vaw kin cia, tuh-e vaw kin angaelung tuh ramri lante, Ammon hae ramri athuapaw Jabbok vaw kin cia ka pya hae.17Arabah kha mah Jordan vaw te a vahue hae ryte, Khinnereth kyate Arabah rili, Rili Chihpaw kyacia, nithua lang umpaw Pisgah mua a nebungnaw balyn rykhate ka pya hae.
18Tuh ccyh lyaze nanning kha akawlan thyhte kae hopya oh: “Bawipaw nae Pachia nynh e ram hynh nanning ccou khylan ae pya vae oh salamah nae rhawkaw hae balyn tuh nae puizia Israel rhawkaw hae hawte zunghe ccyngkute khuraw lang a zua cih hae.19Nae zu hae, nae ccaaw hae te nae sahiin-awvaw hae kha tuh kae pya oh paw khua hae kya a umsya cih hae (sahiin-awvaw patae na hoi oh cipaw ka ny).20Bawipaw nynh nae puizia hae kha nanning hawte haeungnaw pya hae zah, Bawipaw nae Pachia nynh minmin a pya cih hae paw Jordan vaw nithua lang he a ccou hae te, nanning lu kheit cci tuh kae pya vae oh paw ram lang na ki cih oh,” kae cipya oh.21Te tuh ccyh lyaze Joshua kha mah ka hopah zah, “Bawipaw na Pachia nynh hynh-e siapharan lu ning tungvaw a cyipaw atyn-are kha na mit ccaccei te phe na muih vae; tukeiccuze alungkhu kya po na cceih vae cih paw ram balyn kyakhe Bawipaw nynh yn cyih cih.22Minmin kha rih nan hae, pawccecize Bawipaw nae Pachia tuh na hanlan rhaw ae tukpah paw nynh thua,” ka cipya. Moses nynh Kanaan Ram A Do
23Tuh ccyh lyaze Bawipaw kha thawte ka ngiakuh zah,24“Pou Bawipaw Pachia, na lesaenaw te na thungnaw kha na seepaw kya langsahpya lanpaw kha tho kyalya nynh na tho ung; vaawlui kya te laephi vawlan umpaw pawcihawpaw pachia nynh mou nang na raepaw hawte cyisahnaw te thungnaw kha a rae kho?25Jordan vaw khuraw lang e ram hoypaw mua alungnaw ram, ahoypaw te Lebanon kha muih khylan khuraw lang beih yn zuasah,” ka cipya.26Thuasalama nanning konglang te Bawipaw nynh ka tungvaw a thinria zah ka bya kha yn ngaepah khyh. Bawipaw nynh kae kha, “Zawsah! Hynh-e konglang hynh kharouhmaw bua yn hopah nan vae!27Pisgah mua dung langkhe kaethung lah nithua, niccaw, palung lang, alia lang na pepan kha dotua. Hoyte do, pawccecize hynh-e Jordan vaw hynh na zua vae lan khyh.28Thuasalama Joshua kha hopya tua, amaw kha lungtangsah lah thawzung pyatua, pawccecize aning tuh hynh-e ccungccaw hae hynh lupi lante po a cciakhae cih hae zah, na muih cih paw ram te ram kya-e khyndadyh lante a ccousah cih hae paw nynh thua,” yn cipya.29Tukeiccuze Beth-peor te arawsekunaw accya kyakhe ah um oh. Moses kyate Kawpyanaw
1Pou Israel, tukeiccuze atu, Bawipaw , nae minpaaw hae Pachia nynh ae pya cih oh paw ram lungkhu lang teete ccou khylan na hiin ccaw oh, zui lan kae ccangpah cih oh paw phungbya hae te phungzae hae hynh ngaetua oh.2Kae pya oh paw bya kya ccangkheit sanmah na biachih lan khyh oh zah, ccangkheit sanmah na vua lan khyh oh, kae hopya oh paw Bawipaw nae Pachia kawbya hae hynh na tynsah cih oh.3Baalpeor te asekuh lante Bawipaw nynh pawtemou a cyi cipaw, Baalpeor a zuipaw miakaw kha nanning laku kyate Bawipaw nae Pachia nynh pawtemou a ro hae cipaw kha naemaw ccaccei nynh phe na muih vae oh,4Bawipaw nae Pachia kha tynkaring lan na kyngkuh oh paw balyn tuh atunin na hiin oh.
5Dotua oh, Bawipaw ka Pachia nynh yn hopya thyhte, ccou khylan na tee vae cih oh paw ram kya na zui lan oh paw phungzae hae te phungbya hae kha atu kae ccangpya oh.6Hynh-e hae hynh zuakute na zui cih oh, pawccecize hynh-e hynh nynh nae hawnaw te nae nynaw kha ccungccaw hae kya a langsakuh cih zah, minmin nynh hynh-e phungbya balyn hynh he a thae hae te, “E minphuin lepaw hynh a hawpaw te a nyhpaw minphuin ccaccing nynh thua!” cite a ho cih hae.7Pawccecize Bawipaw ah Pachia nynh aening ah ko takyh oh te, oun naenuaku hawte, pawcihawpaw ccangpaw minphuin lepaw mou tuhte a naenuakuh hae paw pachia a hoi?8Atunin nae malang kae nungpya oh paw hynh-e upadi balyn hawte pawcihawpaw ccangpaw minphuin lepaw mou phungbya hae te phungzae hae kha a hoi?
9Nae she balyn kya nae mit nynh a muihpaw uccaw hae kha na ning khyh nawlan oh te nae tuanaw kyate azo khyh nawlan, naemaw te naemaw raeringkute ccykekuh oh; tuh-e hae tuh nae ccaaw hae te nae mintaw hae kha nysah oh—10Bawipaw nynh kae kha, “Laephi vawlan ccungccaw hae nynh a hiin lungkhu hae balyn, kae kha yn rithya nawlan hae te mih ccaaw hae kha mah a ccangpya thya nawlan hae, minmin kha kamaw hanlan pum hae lah, ka bya kha ka thaesah cih hae,” cite he yn hopah tuh, Bawipaw nae Pachia malang Horeb kya nanning nynh na thadyn oh;11nanning nynh mua leihpaw langkhe na naekuh oh zah, mua tuh vaawlui cia maeesoi te ruathung zah marae zipaw maeking nynh phang a bong.12Oute Bawipaw nynh maee kyate bya ae hopya oh. Bya accaepaw kha na thae oh salamah a muinsan kha na muih khyh oh; roi kyalya nynh accae.13Zui lan ae pya oh paw a byakinnaw kha ae thaesah oh, tuh-e tuh kawbya ccanghaw kha nynh thua; te aning nynh tuh-e tuh lungphe phe ning vawlan khe a zei.14Te tuh-e ccyh lyaze nanning nynh ccou khylan na tee vae cih oh paw ram kya na zui lan oh paw phungzae hae te phungbya hae kha nanning ccangpya khylan Bawipaw nynh kae kha kaw yn pya.
15Bawipaw nynh nanning kha Horeb kya maee lungkhu te ae hopya lya oh ze, a muinsan kha na muih khyh keiccu oh ze, naemaw te naemaw hoyte raeringkute ccykekuh oh,16tuhteze nynh hankhakheit muinsan alo lante naemaw hanlan akawlan e zohtuh kha raekute ahoy leipaw ozia kha na zui lan khyh oh, tuh-e hae tuh: ccungccapaw khyhze ccungccanung muinsan,17laephi vawlan umpaw sarangpaw phuinkhakheit muinsan, khivae kya azouthyapaw pavaw phuinkhakheit muinsan,18lae vawlan avawpaw phuinkhakheit muinsan te lae kaw e tui kya umpaw ngasaw phuinkhakheit muinsan nynh thua.19Te vaawlui lang na dothung oh zah, khuanin, sawpaw te awsi, vaawlui umpaw uccaw balyn kha he na muih oh te, vaawlui zakaw pawpaw kya umpaw ccungccaw balyn hanlan Bawipaw nae Pachia nynh a ua hae paw khah-e uccaw hae kha bakhungnuate beiksei nan oh lah, zuisei nan oh.20Thuasalama nanning tuh atunin na um oh hawte, Bawipaw nynh a ccou hae paw a ccungccaw hae ccaccei lang tang khylan nanning kha Izip ram, sivaw tuisah khopaw maeephu kyate ae lah oh zah ae poukhae oh.
21Nanning keiccuze Bawipaw nynh ka tungvaw a thinria zah, Jordan vaw ka zua khyh nawlan te Bawipaw nae Pachia nynh nae rho lang ae pya cih oh paw ram hoypaw lungkhu lang ka tee khyh nawlan bya a kinku.22Kae tuh Jordan vaw zua leite e ram kya ka chih cih, thuasalama nanning tuh ram hoypaw kha ccou khylan khuraw lang na zua cih oh.23Tukeiccuze Bawipaw nae Pachia nynh nanning kya a raepaw byakinnaw kha na ning khyh nawlan oh te Bawipaw nae Pachia nynh ae khee oh paw hankhakheit muinsan alo lante zohtuh na raeku khyh nawlan oh raeringkuh oh.24Pawccecize Bawipaw nae Pachia tuh aruapaw maee, a eiungpaw Pachia nynh thua.
25Tuh-e ram kya ccaaw hae te mintaw hae kha na hoi oh zah nae rynaw he accing te, hankhakheit muinsan lante zohtuh raekute hoyleinaw kha na rae oh zah, Bawipaw nae Pachia mitmuihnaw kya hoyleinaw raete a thin na riasah oh zetuh,26ccou khylan Jordan vaw na zuanua cih oh paw ram kyate aro mawze khaleih na mih cih oh cite atunin nanning rawsete vaaw te lae kha ccaekia lang ka ko hae; tuh-e ram kya nae she sae lan khyh, marya na chih cih oh.27Bawipaw nynh nanning kha ccungccaw hae laku ae phiasakuh cih oh; Bawipaw nynh ae cciakhae cihnaw oh minphuin hae laku kya nanning beihtaraw kyalya na lae cih oh.28Tuin ram kya a muih kho leipaw, nawthae kho leipaw, a ae kho leipaw te amyn a thae kho leipaw, thing te lung hae kyate kuih te raepaw ccangpaw pachia hae kha na beik cih oh.29Tuin kyate Bawipaw nae Pachia kha na ccung cih oh zah, nae thinlung balynte, nae tuanaw balynte na ccung oh ze, amaw kha na muih cih oh.30Nae vawsawnaw kya yn thua cih paw ccyh kya tuh-e vawsawnaw hae balyn nae tungvaw he yn cyihkuh te, Bawipaw nae Pachia kalan na kithui cih oh zah, a bya kha na ngae cih oh.31Bawipaw nae Pachia tuh ngaethyaumsah thyapaw Pachia athua keiccuze nanning kha ae vua lan khyh oh zah ae roh lan khyh oh; nae minpaaw hae kya bya a kinpyaku hae paw byakinnaw kha ning lan khyh.
32Pawccecize Pachia nynh laephi vawlan ccungccaw a rae takaw nin te nanning maw e kum hynhsepi e akonglang balyn kha atu khiatua oh; vaawlui voikheit lang te voikheit lang cia khiatua oh: hynhcih alepaw hankhakheit acyihkuh boi tou, tuhkhyhze hynh tahawpaw kha thae boi athua tou?33Nanning nynh maee lungkhu te a hopaw pachia roi kha na thae oh hawte thae boi zah ahiinpaw hum ccungccaw mou a um?34Tuhkhyhze Bawipaw nae Pachia nynh Izip ram kyaze nae mit ccaccei malang khe nae hanlan ae cyipya oh hawte syntawtuanaw, muihsahnaw te ngaeangnaw, rhawdounaw, athungpaw kuih te kuih dyngnaw, ri lan umpaw huhan langsahnaw liate minphuin phuin kheit kha amaw hanlan ccangpaw minphuin laku kyate law khylan ccianua lan a zuakuh boi paw pachia ccangkhakheit a um boi tou?35Bawipaw tuh Pachia nynh thua cipaw na ny nawlan oh, hynh-e hynh nanning kalan langsahpyaku athua; amaw laelan ccangpaw um khyh.36Nanning ccangpya khylan vaawlang te a roi kha ae thaesah oh: laephi vawlan alesaepaw a maee kha ae langsahpakuh oh zah, maee kyate yn poupaw a bya kha na thae oh.37Te nae minpaaw hae kha a sungsah keiccu hae ze, mimaw nukhute mih ciihan hae kha a po hae. Nanning kha Izip ram kyate amaw malang ccaccei khe alesaepaw huhan khate ae poukhae oh,38Nanning laeze ale huapaw te athawsae huapaw minphuin hae ram kha nanning kalan rho lang pyate a lungkhu lang teekhae khylan, atunin cia acyiku hawte minmin kha nae malang te a dee hae.39Tukeiccuze Bawipaw tuh ahangnaw vaawram te anenaw laephi kyaze Pachia nynh thua cipaw kha atunin nyh oh lah, nae thinlung kya ccykeku tua oh; ccangpaw um khyh.40Naemaw te nae nukhu e nae ciihan hae ngedang lungpawnaw hanlan atunin kaw kae pya cih oh paw a phungbya hae te a kawbya hae kha tynsah oh, tuhteze nynh nanning tuh Bawipaw nae Pachia nynh zungzae hanlan ae pya cih oh paw ram kya nae hiinshe asae cih. Khynnaw Khuapi hae
41Oute Moses nynh khuapi khua thum kha Jordan vaw nithua langkhe ccangte a phia hae,42langmaw ze rhawkunaw a umty leite ccangpaw ccungccaw kha paccynnuaku leite a theihseipaw lukhakheit tuh tuh-e khuapi hae kalan khe a ccue kho; ccungccaw theihpaw nynh tuh-e khua khuakhakheit kalan khe a ccue cih zah a hiin cih;43tuh-e khuapi hae tuh Reuben phin hae kya-e ramkaw accya umpaw Bezer, Gad phin hae kya-e Gilead kya umpaw Ramoth, te Manasseh phin hae kya-e Bashan kya umpaw Golan nynh thua hae.
Vaeningnaw Byahonaw
44E tuh Moses nynh Israel hae kya a nungpya hae paw upadi nynh thua.45E hae tuh Israel hae nynh Izip ram kyate he a pou hae te, Moses nynh Israel hae a hopya hae paw phunglang hae, phungbya hae te phungzae hae nynh thua.46Moses te Israel hae nynh Izip ram kyate he a pou hae te, a tae hae paw Heshbon a uktupaw Amor hae siapharan Sihon ram kya, Jordan vaw nithua lang, Beth-peor te arawsekunaw accya kyakhe a hopya hae.47Minmin nynh Sihon ram te Bashan Siapharan Og ram kha a law hae, tuh-e hae tuh Jordan vaw nithua lang umpaw Amor hae siapharan hae lu ning nynh thua hae.48Arnon Vahue akin lang umpaw Aroer kyate Sirion Mua kyacia, (tuh-e tuh Hermon nynh thua),49tuh-e hae ryte Jordan vaw nithua lang umpaw Arabah abalyn kyate Pisgah mua hary apannaw zakaw umpaw Arabah Rili kyacia a law hae. Kawbya Ccanghaw (Exo 20.1-17)
1Moses nynh Israel hae balyn kha ko hae zah hynhte a hopya hae: Pou Israel, atunin kae hopya oh paw phungbya hae te phungzae hae kha ngaetua oh; khah-e hae kha na ccangkuh cih oh zah hoyte na zui cih oh.2Bawipaw ah Pachia nynh Horeb kya aening ryte byakinnaw a rae.3E byakinnaw hynh Bawipaw nynh aening minpaaw hae ryte rae khyh, thuasalama atunin hein kya ah hiin oh paw aening balyn ryte nynh a rae.4Bawipaw nynh mua kyakhe mae hawiliakute maee lungkhu te bya ae hopya oh.5(Tuh ccyh lyaze kae tuh Bawipaw bya kha nanning kalan thaesah khylan Bawipaw te nanning laku khe ka thadyn; pawccecize nanning tuh maee keiccuze na rih oh zah, mua lang na kaethung khyh oh.) Te Bawipaw nynh:
6Kae tuh Izip ram seetangnaw kyate ae poukhae oh paw Bawipaw nae Pachia nynh ka thua;7kamaw laelan ccangpaw pachia hae kha na hoi lan khyh oh.
8Naemaw hanlan ahangnaw vaawram kya thuasah, anenaw laephi kya thuasah, lae kaw umpaw tui kya thuasah, hankhakheit muinsan alo lante zohtuh kha na raekuh lan khyh oh.9Khah-e zohtuh hae kha bakhungnuate na beik lan khyh oh; pawccecize kae tuh Bawipaw nae Pachia, a eiungpaw Pachia nynh ka thua, kamaw yn vua hae paw kha she thum, she pali cia, nungpaaw hae seinaw hanlan ccaaw hae tungvaw kya de a tah hae paw nynh ka thua,10thuasalama kae kha yn sungsah zah, ka kawbya kha a zui hae paw kyakhe mih she thong kheit cia atynpaw sungsahnaw kha a langsahpakuh hae paw nynh ka thua.
11Bawipaw na Pachia min kha ahme lei lante na mang lan khyh, pawccecize amaw min kha ahme lei lante a mangpaw tuh Bawipaw nynh ngaethya lan khyh.
12Bawipaw na Pachia nynh kaw ae pya thyhte, sabbath nin kha naawsah lah, thyaasah.13Nin taruh lungkhu rya na lah cih zah, na ryalaw balyn kha na lawkuh cih.14Thuasalama nin sarinaw nin tuh Bawipaw na Pachia hanlan sabbath nynh thua, tuh-e nin kya namaw, na ccapaw, na ccanung, na seenung, na seepaw, na vaetua, na lann, na sahiin-awvaw miakaw te na khua kya umpaw mikhia nynh pawpaw rya mah na lah lan khyh oh, tuhteze nynh na seenung te na seepaw hae tuh namaw hawte a haeungbua cih hae.15Izip ram kya see lang na la tangpaw, te Bawipaw na Pachia nynh Izip ram kyate athungpaw kuih te a dyngpaw kuih khate ae poukhaepaw kha ning nan; tukeiccuze Bawipaw na Pachia nynh sabbath naawsah lanpaw kha kaw ae pya.
16Bawipaw na Pachia nynh kaw ae pya thyhte na nung te na paaw kha sawtua, tuhteze nynh Bawipaw na Pachia nynh ae pya cih paw ram kya na hiinshe asae cih zah, ngedang lungpawte na um cih.
17Ccungccaw na theih lan khyh.
18Milae zu kya khyhze milae vawpaw kya na sei lan khyh.
19Na ruh lan khyh.
20Na innpaw kha rawsete ahme leipaw ccaekia lang na tang lan khyh.
21Na innpaw zu kha na duaa lan khyh. Na innpaw kya-e inn, loo, seenung, seepaw, vaetua, lann, na innpaw kya-e hankhakheit kha na duaa lan khyh. Pachia Rynaw Hopiatu Moses
22Bawipaw nynh hynh-e bya hae hynh mua kya na pumkuh oh paw balyn kalan maee, maeking te marae zipaw mohnaw kyate roi accae lante ae hopah oh zah, ccangpaw ae hopah chih vae khyh oh. E bya hae hynh lungphe phe ning vawlan zei zah, kae kha yn pya.23Mua tuh maee lang arua cciamang lyakhe nanning nynh mohnaw kya-e roi kha he na thae oh te, nae phin kya-e lupi hae balyn te nae piccan hae tuh ka kalan oun naekuh hae;24nanning nynh, “Dotua, Bawipaw ah Pachia nynh a phu-enaw te a lesaenaw kha oun langsahpakuh vae zah, maee kyate a roi kha kae thae vae. Pachia te ccungccaw tuh bya a hoku hae zemah, ccungccaw tuh phang ahiin ung cipaw atunin kae muih vae.25Tukeiccuze aening tuh atu pawcce ah chih cih oh? Pawccecize hynh-e myarya lepaw maee nynh aening kha pong oun u cih; Bawipaw ah Pachia roi kha hynhlaeze accyh aro lante bua ah thae oh zetuh ah chih cih oh.26Maee lungkhu te bya yn hopaw ahiinpaw Pachia roi kha aening hawte thae zah a hiin ungpaw hum ccungccaw mou a um?27Namaw ccaccei nynh naekuh lah Bawipaw ah Pachia nynh a ho cih paw bya balyn kha la ngaetua. Oute Bawipaw ah Pachia nynh ae hopyapaw atyn-are kha oun hopah lah, kaening nynh kae ngae cih zah kae cyih cih,” na ci oh.
28Nae hopya oh paw bya kha Bawipaw nynh he a thae te, Bawipaw nynh kae kha, “E ccungccaw hae nynh ae hopya hae paw bya kha phe ka thae vae. Minmin nynh a ho hae paw bya balyn tuh ahme.29Minmin nynh kae kha ri khylan te ka kawbya balyn kha zungzae zui khylan, atu hawte hynhcihawpaw thinlung kha a hoi hae ze rou nynh minmin te mih ccaaw hae tuh ngedang lungpawte zungzae a um cih hae.30La cceih lah minmin kha, ‘Nae bu kalan ki ccavae oh,’ cite hopah hae.31Thuasalama nang tuh ka pe hin thadyn lah minmin kalan na ccangpya lan hae paw kawbya balyn, phungbya hae te phungzae hae kha kae hopah cih, tuhteze nynh rho lang ka pya cih hae paw ram kyakhe minmin nynh khah-e hae kha a zui cih hae,” yn cipya.32Tukeiccuze Bawipaw nae Pachia nynh kaw ae pya oh hawte, hoyte na cyih cih oh, nanning nynh voilang ranglang na maekuh lan khyh oh.33Bawipaw nae Pachia nynh kaw ae pya oh paw laanpi kha asasite na zui cih oh, tuhteze nynh na ccou cih oh paw ram kya ngedang lungpawte na hiin cih oh zah, nae hiinshe asae cih. Kawbya Lepaw
1Hynh-e hae tuh nanning nynh ccou khylan na ccianua oh paw ram kya zui lan cite nanning ccangpya khylan Bawipaw nae Pachia nynh yn hopyapaw kawbya hae—phungbya hae te phungzae hae nynh thua,2tuhteze nynh naemaw te nae ccaaw hae, te nae mintaw hae nynh nae hiinshe balyn kya Bawipaw nae Pachia kha na rih cih oh zah, kaw kae pya oh paw a phunglang hae te a kawbya hae kha na zui cih oh zah nae she asae cih.3Tukeiccuze, pou Israel, nae minpaaw hae Pachia, Bawipaw nynh bya ae kinpyaku thyhte ngedang lungpawte na um nawlan te, mateitui te khoilutui aluanaw ram kya pataepi na pungthung nawlan, kawbya hae hynh ngae lah zuakute zuitua.
4Pou Israel, ngaetua: Bawipaw tuh ah Pachia, ccangkheit kyalyapaw Bawipaw nynh thua.5Bawipaw na Pachia kha na thinlung balyn te, na tuanaw balyn te, na thawzung balyn te na sungsah cih.6Atunin kaw kae pyapaw hynh-e bya hae hynh na thinlung kya ccykekuh.7Hynh-e bya hae hynh na ccaaw hae kya hopah bua hae lah, innvaw na um ze thuasah, laansaw lang na um ze thuasah, na ih ze thuasah, na thoku ze thuasah hynh-e bya hae kong hynh hopah hae.8Hynh-e bya hae hynh muihsahnaw lante na kuih kya khiikuh lah, na terui kyakhe syntawnaw lante khiidekuh,9te na inn thuakaw tung hae kya te na koikua hae kyakhe zei hae. Kawngae leinaw Raeringnaw Pyanaw
10Bawipaw na Pachia nynh na minpaaw hae Abraham, Isak te Jakob kya pya lan bya a kinpyaku hae paw ram tuh—ram hoypaw, nang nynh na sak leipaw khuapi hae nynh thua,11na teekhae leipaw uccaw ahoypaw aphuinphuin te phe beihpaw inn hae, na thae leipaw tuisung hae, na lin leipaw misu khokhu hae te oliv ku hae kalan cciate—na ae zah he na byn te,12Izip ram seetangnaw kyate ae poukhaepaw Bawipaw kha na ning khyh nawlan raeringkuh.13Bawipaw na Pachia kha na rih cih, amaw kha na beik cih zah, amaw min kyalya te bya na kinkuh cih.14Ccangpaw pachia hae, na pepan umpaw ccungccaw hae kya-e pachia hankhakheit kha na zui lan khyh,15pawccecize ae umkhaepaw Bawipaw Pachia tuh a eiungpaw Pachia nynh thua. Bawipaw Pachia thinrianaw nynh maee lang ae ruanua cih zah, laephipi kyate ae rohsei cih.
16Bawipaw na Pachia kha Massah kya na syntawtua hawte, syntaw nan.17Bawipaw na Pachia nynh kaw ae pyapaw a kawbya hae, a phungbya hae te a phunglang hae kha zuakute na zui cih.18Bawipaw mitmuihnaw kyakhe ahmepaw te ahoypaw kha cyitua, tuhteze nynh Bawipaw nynh bya ae kinpyaku thyhte na rhaw hae balyn kha na malang te na dee kho cih hae zah, Bawipaw nynh na minpaaw hae kyaze nanning kha pya lan bya a kinpyaku hae paw ram hoypaw kalan na tee cih, na ccou kho cih zah ngedang lungpawte na um cih.
20Malang ccyh kya na ccaaw hae nynh, “Bawipaw ah Pachia nynh kaw ae pyapaw phunglang hae, phungbya hae te phungzae hae asuilan hynh pawmou athua?” cite he ae khia hae te,21nang nynh na ccaaw hae kha, “Kaening tuh Izip ram kya Faro see lang kae la tang, thuasalama Bawipaw nynh athawsaepaw kuih te Izip ram kyate oun poukhae.22Bawipaw nynh Izip ram, Faro te a innbyn hae balyn kha rawsete, ri lan umpaw muihsahnaw ale hae paw te ngaeangnaw hae kha kaening mitmuihnaw kya a langsahku.23Ah minpaaw hae kyaze aening pya lan bya a kinpyaku hae paw ram lungkhu lang teekhae khylan Izip ram kyate aening hynh oun poukhae.24Atu acyiku hawte, aening hiinnaw thungkhaw khylan te aening zungzae hoynaw hanlan Bawipaw ah Pachia kha ri lanpaw te hynh-e phungzae hae balyn zui lanpaw hynh Bawipaw nynh aening kha kaw oun pya.25Bawipaw ah Pachia nynh kaw oun pya thyhte amaw malang khe hynh-e kawbya balyn hynh zuakute ah zui oh zetuh, adingpaw kya ah um cih oh,” cite na hopah cih hae. Popaw Ccungccaw hae (Exo 34.11-16)
1Nang nynh ccou khylan na tee vae cih paw ram lungkhu langkhe Bawipaw na Pachia nynh ae cciakhae zah, na malang e minphuin patae, Hit hae, Girgash hae, Amor hae, Kanaan hae, Periz hae, Hiv hae te Jebu hae, nanning laeze mih thawsaehua zah alunghua hae paw minphuin phuin sari kha dee hae zah,2Bawipaw na Pachia nynh minmin kha namaw kalan ae pya zah, he na tae te, minmin kha marya na roh cih hae. Minmin ryte byakinnaw na rae lan khyh zah, minmin tungvaw thawccinaw na langsakuh lan khyh.3Minmin ryte zuvaw lang na tang lan khyh oh, na ccanung hae kha mih ccapaw hae kalan na pya lan khyh, na ccapaw hae hanlan mih ccanung hae kha zu lang na dypah lan khyh hae.4Pawccecize na ccaaw hae kha ccangpaw pachia hae beik khylan kamaw zuinaw kyate ccanglang a maesakuhsei cih hae. Tetuh Bawipaw thinrianaw nynh maee lang ae ruanua cih zah, nang kha arangte ae roh cih.5Thuasalama minmin tungvaw hynhte na cyih cih: mih silawhang hae kha na phoupah cih hae, mih lungpum hae kha na ropah cih hae, mih Ashrim thing hae kha na baepah cih hae zah, a raeku hae paw mih khozi zohtuh hae kha maee te na upah cih hae.6Pawccecize nanning tuh Bawipaw nae Pachia hanlan athyaapaw minphuin nynh na thua oh. Bawipaw nae Pachia nynh nanning kha laephi vawlan e ccungccaw balyn kyate a ccungccaw hae lang, asung-epaw a rho lang ae poku vae oh.
7Nanning tuh ccangpaw minphuin laeze na lunghua keiccu oh ze, Bawipaw nynh ae sungsah oh zah, ae poku oh paw thua khyh, nanning tuh mingccang hae laeze azya huaccepaw nynh na thua oh.8Bawipaw nynh nanning kha ae sungsah oh zah, nae minpaaw hae kya bya a la kinkupaw byakinnaw kha a tynsah keiccuze nanning kha Izip siapharan Faro kuih kyate thuasah, seetangnaw kyate thuasah Bawipaw nynh a thawsaepaw kuih te ae poukhae oh zah, ae shawkhaw oh.9Tukeiccuze Bawipaw nae Pachia tuh Pachia thua zah, amaw kha a sungsah hae paw te a kawbya a zui hae paw tungvaw kya she thong kheit cia, byakinnaw te lungzi sungsahkunaw kha a tynsahpaw Pachia nynh thua cipaw nytua oh,10te amaw kha a vua hae paw ccungccaw hae tungvaw kya a liarupaw Pachia nynh thua cipaw kha nytua oh. Amaw kha a vua hae paw kya thysung leite a liaru hae.11Tukeiccuze atunin kaw kae pya oh paw kawbya—phungbya hae te phungzae hae hynh zuakute zui oh. Kawngaenaw te Hythuanaw (Deu 28.1-14)
12E phungzae hae hynh zuakute na zui oh zah na ngae oh zetuh, Bawipaw nae Pachia nynh nae minpaaw hae kya bya a kinpyaku hae paw byakinnaw te lungzi sungsahkunaw kha nae kya a tynsah cih;13Bawipaw nynh ae sungsah cih oh, hythua ae pya cih oh zah ae pungzaesah cih oh, nanning pya khylan nae minpaaw hae kya bya a kinpyaku hae paw ram kya nae ccaaw hae te nae laephi kya-e thingthae-eccang hae, nae looh, nae misutui, nae chitui, nae sahiin pungthungnaw te nae tuuphu ataw hae kha hythua a pya cih.14Nanning tuh minphuin hae kyaze hythua a mue huaccepaw na thua cih oh zah, nanning laku kya thuasah, nae sahiin-awvaw kya thuasah atinpaw um lan khyh.15Bawipaw nynh ccinaw miakaw kha nanning kyate a vua cih, na la ny oh paw Izip ram kya-e ri lan umpaw ccinaw balyn kha nae tungvaw thua sah lan khyh, thuasalama nanning ae hua oh paw tungvaw kya tuh-e ccinaw tuh a thuasah cih.16Bawipaw nae Pachia nynh ae pya cih oh paw ccungccaw balyn kha thawccinaw langsapyaku leite na roh cih oh; mih pachia hae kha na roh cih oh; mih pachia hae kha na beik lan khyh oh, pawccecize nae hanlan tuh-e tuh kaang athua cih.
17“Hynh-e minphuin hae tuh kaening laeze alunghua hae; pawtemou kae luade kho cih hae?” cite nae thinlung kya na tuaku oh ze,18minmin kha rih nan oh. Faro tungvaw te Izip hae balyn tungvaw Bawipaw nae Pachia nynh pawtemou a cyi cipaw kha thuasah,19nae mit nynh a muihpaw alepaw syntawnaw hae kha thuasah, Bawipaw nynh ae poukhaenaw oh paw muihsahnaw hae te ngaeangnaw hae athawsaepaw kuih te a dyngpaw kuihbaw kha thuasah liathui oh. Bawipaw nae Pachia nynh na ripya oh paw ccungccaw balyn tungvaw kyakhe tuhawte a cyih cih.20Tuhpiaze a hiinhy hae paw te a rekuh hae paw kha heize a ro makhia hae, Bawipaw nae Pachia nynh khoingae kha a sawnua cih hae.21Minmin kha rih nan oh, pawccecize ae umkhae oh paw Bawipaw nae Pachia tuh alesaepaw te ri lan umpaw Pachia nynh thua.22Bawipaw nae Pachia nynh khah-e minphuin hae kha nae malang te beihtararaw khate a dee cih hae; minmin kha arangte na thangsah kho lan khyh oh, tuhkhyhze tuh loramsaw hae tuh nae hanlan myaryamaw alungsei cih hae.23Thuasalama Bawipaw nynh minmin kha nanning kalan ae pya cih oh zah, minmin a ro makhia hae, myaryamaw a siisakuh cih hae.24Bawipaw nynh mih siapharan hae kha nae kuih kya ae pya cih oh zah, minmin kha vaawlui zakaw kyate a maemih cih hae; minmin kha na ro makhia oh, lu kheit nynh sanmah rawsete ae thadynnua kho lan khyh oh.25A soii hae paw mih pachia hae kha maee te na u cih oh, tuh-e pachia hae kya umpaw ngun te sui kha duaa nan oh lah, naemaw hanlan lawkuh nan oh, pawccecize tuh-e liate kaang na kae sei cih oh; pawccecize tuh-e tuh Bawipaw nae Pachia hanlan anungsikuhpaw nynh thua.26Anungsikuhpaw uccaw kha nae inn lungkhu lang teekhae nan oh, tuhkhyhze tuh tuh-e uccaw hawte ro khylan phia na thuasei cih oh. Tuh-e tuh myaryamaw na hua cih oh zah anungsikuhpaw lang na ria cih oh, pawccecize ro khylan phia athua. Hoirumnaw kya Raeringnaw Pyanaw
1Nanning nynh na hiin oh zah na pungthung nawlan oh te Bawipaw nynh nae minpaaw hae kya bya a kinpyaku hae paw ram lungkhu lang teete na ccou kho nawlan oh, atunin kaw kae pya oh paw hynh-e kawbya balyn hynh zuakute na zui hahe cih oh.2A kawbya kha na zui oh tou, na zui khyh oh tou cipaw te nae thinlung kya umpaw kha ny nawlan syntawtuate nanning zakawsangsahku thya khylan Bawipaw nae Pachia nynh ramkaw kya kum sung pali lungkhu ae cciakhaenaw oh asawpaw laanpi kha liathui oh.3Ccungccaw hynh looh kyalya te hiinkuh khyh, thuasalama Bawipaw khalang kyate yn poupaw bya miakaw te nynh ahiinku cipaw thaethyasah khylan nae vuelawsahte zakaw ae sangsahku oh, nanning nynh thuasah, nae minpaaw hae nynh thuasah na la ny boi lei oh paw manna sanlou kha ae dang oh.4Hynh-e kum sung pali lungkhu nae boeining pue khyh zah nae ccu mah phin khyh.5Nungpaaw nynh ccaaw kha a thuihei hawte Bawipaw nae Pachia nynh nanning kha ae thuihei oh cipaw kha nae thinlung te nyh oh.6Tukeiccuze amaw laanpi kha zuite, amaw rawrite Bawipaw nae Pachia kawbya kha zui oh.7Pawccecize Bawipaw nae Pachia nynh ahoypaw ram lungkhu lang vaw taraw hae, mua hae kya te accya hae kya a pouthungpaw lae kaw e tui te tuidy aluanaw ram,8chanvuih, barli, misu ku hae, thaeku ku hae te ccalee ku hae alungnaw ram, oliv ku hae te khoitui alungnaw ram,9sanlou akhin lei lante na ae cihnaw oh te pawpaw mah na khin cih leinaw oh ram, a lung hae tuh sivaw lang a tang cihnaw te mua hae kyate sohin na thae kho cihnaw oh ram lang ae cciakhae cih oh.10Phe byn lang na ae cih oh zah Bawipaw nae Pachia nynh ae pya oh paw ram hoypaw hanlan amaw kha the na hoysah cih oh.
11Atunin kaw kae pya oh paw a kawbya hae, a phungzae hae, a phungbya hae kha zui leite Bawipaw nae Pachia kha na ning khyh nawlan oh raeringkuh oh.12Phe byn lang na ae oh zah ahoypaw inn hae kha na sak oh zah tuh-e inn hae kya he na um oh te thuasah,13nae vaetua phu hae te nae tuuphu hae tuh pungthung hae zah nae sui te nae ngun tuh lungthung zah na hoi oh paw balyn tuh he a lungthung te thuasah,14Izip ram seetangnaw kyate ae poukhae oh zah, myarya akopaw te ri lan umpaw ram, sy a hoipaw hupaw te zekang lung zah tui um leinaw ramrou kya ae cciakhae oh paw Bawipaw nae Pachia kha ningte naemaw te naemaw thehoysakuh nan oh. Nanning hanlan rihlung kyate tui luasah zah,16nanning kha zakawsangsahku khylan te syntawtuate athangnaw kya nae hanlan hoynaw raepya khylan nae minpaaw hae nynh a ny lei hae paw manna sanlou khate ramkaw kya ae dang oh.17Naemaw te naemaw kha, “Ka huhan te ka kuih thungnaw nynh hynh-e hoirumnaw hynh yn muesah,” cite tuakuh nan oh.18Bawipaw nae Pachia kha ning nan oh; pawccecize aning tuh atunin a cyi hawte nae minpaaw hae kya bya a kinpyaku hae paw a byakinnaw kha a tynsah nawlan hoirumnaw muenawpaw huhan ae pyatu oh paw nynh thua.19Bawipaw nae Pachia kha na ning oh zah ccangpaw pachia hae kha zuite na beik oh zah rya na lawpya oh zetuh na roh ccaccing cih oh cipaw atunin raeringnaw hoyte kae pya oh.20Bawipaw nae Pachia roi kha na ngae khyh keiccu oh ze, Bawipaw nynh nae malang a ro hae paw minphuin hae hawte na roh cih oh. Pachia Dounaw (Exo 32.1-35)
1Pou Israel, ngaetua, nang laeze ale huapaw te athawsae huapaw minphuin hae kha thuasah, khuapi pi hae te vaawlui phe phah lan cia koihkhawkuhpaw khuapi hae kha thuasah,2na ny hae paw Anak ciihan hae athawsaepaw te ahangpaw ccungccaw hae kha teenuate law khylan atunin Jordan vaw kha na zua vae cih. Minmin nynh, “Hum nynh mou Anak hae kha a thadynnua kho cih hae,” cite a ho hae paw kha na thae vae.3Oute Bawipaw na Pachia tuh aruapaw maee hawte atunin na malang po cceih cih paw nynh thua cipaw nytua; Bawipaw nynh bya ae kinpyaku thyhte minmin kha arangte na dee hae zah na ro kho nawlan hae, Bawipaw nynh minmin kha na malang khe a shungsah cih hae zah a tae cih hae.
4Bawipaw na Pachia nynh minmin kha na malang khe he a dee hae te, namaw te namaw kha, “E tuh ka dingnaw liate Bawipaw nynh hynh-e ram ccou khylan yn cciakhae,” cite tuakuh nan; e tuh hynh-e minphuin hae hoyleinaw keiccuze Bawipaw nynh minmin kha na malang te a dee lan hae paw kha nynh athua hae.5Na dingnaw liate thuasah, na thinlung dingnaw liate thuasah mih ram kha ccou khylan na tee lanpaw thua khyh; thuasalama Bawipaw nynh na minpaaw Abraham, Isak te Jakob kya byakinpyakute a la raepaw byakinnaw kha ccingsah khylan hynh-e minphuin hae hoyleinaw keiccuze Bawipaw na Pachia nynh minmin kha na malang khe a dee lan hae paw nynh thua.
6Oute na dingnaw keiccuze hynh-e ram hoypaw hynh ccou khylan Bawipaw na Pachia nynh ae pya lan khyh cipaw kha nytua; pawccecize nang tuh alungkhungpaw ccungccaw nynh na thua.7Bawipaw na Pachia a thinria nawlan ramkaw kya pawtemou na rae cipaw kha ning nan lah liathuitua; Izip ram atolang na pou nin kyate hynh-e hmin na thua cia Bawipaw kha na dou vae.
8Horeb kya heize Bawipaw kha a thin na riasah keiccuze Bawipaw tuh na tungvaw myaryamaw a thinria zah, nang kha ro lan ciate a paccynkuh.9Bawipaw nynh nanning ryte byakinnaw a raenawpaw lungphe hae kha law khylan mua lang he ka kaethung tuh, mua vawlan nin sung pali te zi sung pali ka um; looh mah ka ae khyh zah tui mah ka neih khyh.10Te Bawipaw kuihdung te zeipaw lungphe phe ning kha Bawipaw nynh yn pya; pumkunaw nin kya mua vawlan maee lungkhu te Bawipaw nynh ae hopya oh paw bya balyn tuh tuh-e lungphe hae vawlan a um.11Nin sung pali te zi sung pali athang te byakinnaw lungphe phe ning kha Bawipaw nynh yn pya.12Oute Bawipaw nynh kae kha, “Thokuh lah, hynh-e kyate arangte cceihbung, pawccecize Izip ram kyate na poukhae hae paw na ccungccaw hae nynh ozia ahoy lei lante a cyi vae hae. Kaw ka pya hae paw laanpi kyate arangte a maekuh vae hae; minmin nynh mimaw hanlan zohtuh kha laeekute a raeku vae hae,” yn cipya.13Tuhpiaze Bawipaw nynh kae kha, “E ccungccaw hae hynh mih lungkhungpaw nynh thua ccaccing hae cipaw ka muih vae.14Minmin kha ka roh hae zah mih min kha vaawlui zakaw kyate ka the ccaw hae, ka makhaete yn umsah; nang kha minmin laeze athunghuapaw te alung huapaw lang kae rae cih,” yn cipya.
15Tukeiccuze mua vawlan maee rua lyakhe ka maeleihkuh zah mua kyate ka cceihbung; byakin lungphe phe ning tuh ka kuih voi ning kya a um hae.16Oute vaetuataw azuh muinsan kha nae hanlan raekute Bawipaw nae Pachia tungvaw na sei ccaccing vae oh cipaw kha ka muih; Bawipaw nynh kaw ae pya oh paw laanpi kyate maeku lan myarya nae thyrang.17Tukeiccuze lungphe phe ning kha ka lah zah, ka kuih voi ning te ka vua zah, nae muihnaw kya ka koi hae.18Oute langmaw hawte Bawipaw malang nin sung pali zi sung pali ka bakhung; Bawipaw mitmuihnaw kya hoyleinaw na rae oh zah amaw kha thinriasahte seinaw na rae oh paw balyn keiccuze looh mah ka ae khyh zah tui mah ka neih khyh.19Pawccecize nanning kha ro lan ciate a thinria keiccuze myarya lepaw Bawipaw thinrianaw kha ka rih. Thuasalama tuh-e ccyh kya mah Bawipaw nynh ka bya kha yn ngaepya.20Bawipaw nynh Aaron tungvaw myarya a thinria zah, Aaron kha ro lan a paccynku, thuasalama tuh ccyh lya mah Aaron hanlan saw ka sangpya.21Oute na rae oh paw aseipaw uccaw athuapaw vaetuataw kha ka lah zah, maee te ka u zah ka tuisah, akhui lang phe tang lan cia ka miaa; tuh-e akhui kha mua kyate a luabungpaw vaw taraw kyakhe ka vua.
22Teberah, Massah kya te Kibroth-hattaavah kyakhe mah Bawipaw kha a thin na riasah oh.23Te Bawipaw nynh Kadesh-barnea kyate ae saw oh zah, “Cceihthung oh lah, kae pya oh paw ram kha lawku tua oh,” cite he ae cipah oh te, Bawipaw nae Pachia nynh kaw ae pya oh paw kha na dou oh, amaw kha na zyn khyh oh zah na zui khyh oh.24Nanning kha kae ny nin oh kyate Bawipaw kha na dou vae oh.
25Bawipaw nynh nanning kha ro lan he a tuakuh te, nin sung pali te zi sung pali lungkhu balyn Bawipaw malang bakhungte,26Bawipaw kalan saw ka sang zah, “Bawipaw Pachia, na lesaenaw te na shawkhaw hae paw, athungpaw na kuih te Izip ram atolang na poukhae hae paw, na ccou ccaccing hae paw ccungccaw hae kha roh nan hae.27Na see hae Abraham, Isak te Jakob kha ning nan hae; hynh-e ccungccaw hae lungkhungnaw, mih hoyleinaw te mih seinaw kha ccuinpah nan hae,28Tuhkhyhze tuh kaening nae poukhaenaw ram nynh, ‘Bawipaw nynh bya a kinpyaku hae paw ram lungkhu lang a cciakhae kho vae khyh keiccu hae ze thuasah, minmin kha a hua keiccu hae ze thuasah, ramkaw kya chisah khylan a poukhae hae,’ cite a hosei cih hae.29Pawccecize minmin tuh alesaepaw na huhan te thuasah, na dyngpaw na kuih te thuasah na poukhae hae paw na ccou ccaccing hae paw ccungccaw hae nynh thua hae,” ka ci. Lungphe Phe Ningnaw (Exo 34.1-10)
1Tuh ccyh lyakhe Bawipaw nynh kae kha, “Langmawlya e lungphe hae hawte lungphe phe ning kha aw lah mua vawlan kamaw kalan yn kaethungtua, te thingkua kha mah raetua.2Na koipaw langmaw e lungphe hae vawlan umpaw bya hae kha nyalang e lungphe hae kya ka zei cih, te tuh-e lungphe hae tuh thingkua lungkhu na nung cih,” yn cipya.3Tukeiccuze eri thing te thingkua ka rae zah langmaw e lungphe hae te alokuhpaw lungphe phe ning kha ka rae, tuh-e lungphe phe ning kha ka kuih kya ccyngte mua lang ka kaethung.4Oute na pumku lya oh ze, maee lungkhu te Bawipaw nynh mua vawlan ae hopya oh paw kawbya ccanghaw, langmawlya e te alokuhpaw bya hae kha lungphe hae vawlan khe Bawipaw nynh zei zah kae kha yn pya.5Te ka maeleihkuh zah mua kyate ka rungbung, te ka raepaw thingkua lungkhu khe lungphe hae kha ka nung; Bawipaw nynh kaw yn pya thyhte tuh-e lungphe hae tuh tuin kya a um hae.
6(Israel hae tuh Beeroth Bene-jaakan kyate Moserah lang a cceih hae. Tuin kyakhe Aaron tuh chih zah a uu hae; a ccapaw Eleazar tuh amaw ccelang ranpibawi lang a tang.7Israel hae tuh tuin kyate Gudgodah, Gudgodah kyate vaw taraw hae a luanaw ram Jotbathah lang a cceih hae.8Tuh ccyh lyaze Bawipaw byakin thingkua puih khylan thuasah, Bawipaw ryalawpya khylan amaw malang thadyn lan thuasah, te amaw min te hythuapya khylan thuasah Bawipaw nynh Levi phin kha laesah zah atunin cia tuhcite a cyi hae.9Tukeiccuze Levi tuh neekupaw thuasah, rho thuasah a uno hae hawte hoi khyh, Bawipaw nae Pachia nynh amaw kha bya a kinpyaku thyhte Bawipaw tuh a rho nynh thua.)
10Masaty lya hawte mua vawlan khe nin sung pali te zi sung pali ka um. Te Bawipaw nynh ka bya kha vaekheit bua yn ngaepya. Bawipaw nynh nanning kha ae roh ry khyh oh.11Bawipaw nynh kae kha, “Thokuh lah, mih minpaaw hae kya kae pya cih oh cite bya ka kinpyaku hae paw ram lungkhu lang tee hae zah a ccou ccaw hae, ccungccaw hae kha lupi lante cciakhae hae,” yn cipya. Pachia nynh A Rypaw
12Pou Israel, tukeiccuze Bawipaw na Pachia nynh atu pawmou ae peki? Bawipaw na Pachia rawri lanpaw, a laanpi balyn kya ccia lanpaw, amaw sungsah lanpaw, Bawipaw na Pachia kha na thinlung balyn te, na tuanaw balyn te ryalawpya lanpaw,13te namaw hoynaw te thanenaw hanlan atunin kaw kae pyapaw Bawipaw na Pachia kawbya hae te a phungbya hae kha zui lanpaw kyalya kha nynh thua.14Vaawlui te vaawram hae kyaze ahang huapaw vaawram thuasah, laephi te laephi kya umpaw balyn thuasah Bawipaw na Pachia kya-e athua zemah,15Bawipaw nynh na minpaaw hae kyalya kha a thinlung te sungsah hae zah, minmin ciihan athuapaw nang kha, atunin acyiku hawte minphuin balyn laku te ae po vae.16Oute nae thinlung vingdung kha awkuh oh lah, nae lungkhung nan vae sah.17Pawccecize Bawipaw nae Pachia tuh pachia hae Pachia te bawipaw hae Bawipaw, alesaepaw Pachia, athungpaw te ri lan umpaw, maedo a mang leipaw te pyaruh a lawkuh leipaw,18ngawraw te nomae hanlan ahmete byapiapah hae paw te mikhia hae kha sungsah hae zah looh te boeining a bawmtupaw Pachia nynh thua.19Mikhia hae kha na sungsah cih oh, pawccecize nanning tuh Izip ram kya mikhia nynh na la thua oh.20Bawipaw na Pachia kha na rih cih, amaw kyalya kha na beik cih; amaw kha tynkaring lan na kyngkuh cih zah amaw min te bya na kinkuh cih.21Aning tuh na thehoynawpaw nynh thua; na mit te na muih vae paw hynh-e alesaepaw te ri lan umpaw uccaw hae kha ae raepahpaw na Pachia nynh thua.22Na minpaaw hae tuh ccungccaw sung sari te Izip ram lang a cceihbung hae; atu vae tuh Bawipaw na Pachia nynh nang kha vaawlui e awsi zeih alung lante ae rae vae. Kawngaenaw hanlan Lasung
1Tukeiccuze Bawipaw na Pachia kha na sungsah cih zah a thuiheinaw bya, a phungbya, a phungzae te a kawbya hae kha zungzae na zui cih.2(Bawipaw na Pachia kya-e ccangpyanaw kha a muih lei hae paw te a nyh lei hae paw) nae ccaaw hae kha ka hopya hae paw thua khyh, thuasalama a lesaenaw, a thungnaw te a dyngpaw a kuih kha thuasah,3Izip ram kyaze Izip siapharan Faro te a ram balyn kya a la cyipaw muihsahnaw hae te a ryalaw hae kha thuasah,4Izip rhawkaw hae tungvaw, mih marang hae te mih marangle hae kya a la cyipaw kha thuasah, minmin nynh ae deehui lya oh ze, Bawipaw nynh minmin kha atunin cia ro khylan Rili Se kya-e tui kha mih tungvaw a luasah thin hae paw kha thuasah,5e hmin kya na thua makhia oh, aning nynh ramkaw kya nae tungvaw a la cyipaw kha thuasah,6te Reuben ccapaw Eliab, Eliab ccapaw hae Dathan te Abiram tungvaw a cyipaw, mih innbyn hae ryte, mih bu hae, mih phu kya umpaw a hysuepaw miakaw kha Israel balyn laku kya pawtemou laephi nynh a khalang aw zah a laang hae cipaw kha thuasah atunin liathuitua oh;7pawccecize Bawipaw nynh a cyipaw ryalaw lepaw miakaw kha nae mit ccaccei nynh a muih vae.
8Tukeiccuze atunin kaw kae pya cih oh paw hynh-e kawbya abalyn hynh zui oh, tuhteze nynh ccou khylan na ccianua cih oh paw ram lungkhu lang tee lan te ccou lan thawzung na hoi cih oh zah,9Bawipaw nynh nae minpaaw hae te mih ciihan hae kha pya lan bya a kinpyaku hae paw ram, mateitui te khoitui aluanaw ram kya nae hiinshe asae cih.10Pawccecize ccou khylan na tee vae cih oh paw ram tuh na pounaw oh Izip ram, enaw-tuiho khokhu hawte nae ccacii na ccou oh zah ccu te tui na bunaw oh ram hawte thua khyh.11Thuasalama ccou khylan na ccianua cih oh paw ram tuh mua hae te accya hae um zah vaawlui kyate khuaatui te bupaw ram,12Bawipaw nae Pachia nynh a do-oihpaw ram nynh thua. Bawipaw nae Pachia mit nynh kum athonaw te athangnaw cia zungzae a dopaw ram nynh thua.
13Atunin kaw kae pya oh paw kawbya miakaw—Bawipaw nae Pachia kha sungsahnaw, nae thinlung balyn te nae tuanaw balyn te amaw hanlan ryalawpyanaw—kha na zui oh zetuh,14nae ram hanlan khuaatui kha amaw accyh kya, masaty e khua te nyalang e khua kha ae pya cih oh, te nae ccathae, nae misutui te nae chitui kha na suelua cih oh;15nae sahiin-awvaw hanlan nae loo hae kya lonua ae posahpah cih oh zah, phe byn lan na ae cih oh.16Raeringkuh oh, tuhkhyhze tuh ahme leipaw laanpi kalan soih na thua cih oh zah, ccangpaw pachia hae kha ryalawpyate na beiksei cih oh,17Tuhte na cyi oh zetuh, Bawipaw thinrianaw nynh maee lang ae ruanua cih oh zah, khuaa akan cih zah, ram nynh athae kha a pousah khyh nawlan vaawlui kha a khawsung cih; tetuh Bawipaw nynh ae pya cih oh paw ram hoypaw kya arangte na roh vae cih oh.
18Hynh-e ka bya hae hynh nae thinlung kya te nae tuanaw kya na nung cih oh, te nae kuih kyakhe muihsahnaw lante na khiidekuh cih oh zah nae terui kya syntawnaw lante na heedekuh cih oh.19E bya hae hynh nae ccaaw hae kha ccangpah oh lah, innvaw na um oh ze thuasah, laansaw lang na um oh ze thuasah, na hueku oh ze thuasah, na thoku oh ze thuasah hynh-e bya hae kong hynh hopah oh.20Nae inn thuakaw tung hae kya te nae koikua hae kya zei oh,21tuhteze nynh Bawipaw nynh nae minpaaw hae pya lan bya a kinpyaku hae paw ram kya, vaawlui tuh laephi luki a um lungkhu balyn, nae hiinshe te nae ccaaw hae hiinshe tuh asae cih.
22Bawipaw nae Pachia kha sungsahte, a laanpi balyn kha zuite, amaw kha tynkaring lan kyngkute, kaw kae pya oh paw hynh-e kawbya balyn hynh zuakute na zui oh zetuh,23Bawipaw nynh hynh-e minphuin hae balyn hynh nae malang te a dee cih hae zah, nanning laeze ale huapaw te athunghuapaw minphuin hae kha na dee cih oh.24Nae ccu nynh a synaw hmin miakaw tuh nae kya-e athua cih; nae ram tuh ramkaw kyate Lebanon cia, Zufrates vaw kyate Niccaw lang e Rili cia athua cih.25Humhung nynh mah nanning rawsete ae thadynnua kho lan khyh oh; Bawipaw nae Pachia nynh bya ae kinpyaku oh hawte, nae ccu nynh a synaw ram balyn kyakhe nanning rhaw kha rinaw te thyngkunaw kha a nung cih.
26Dotua, atunin nanning malang hythuanaw te thyalawnaw kha ka nung:27atunin kaw kae pya oh paw Bawipaw nae Pachia kawbya hae kha na zui oh zetuh, hythuanaw athua cih;28te na ny boi lei oh paw ccangpaw pachia hae kha zui khylan atunin kaw kae pya oh paw laanpi kyate maekute, Bawipaw nae Pachia kawbya hae kha na zui khyh oh zetuh, thyalawnaw athua cih.
29Ccou khylan na teenua cih oh paw ram lungkhu lang Bawipaw nae Pachia nynh he ae teekhae vae oh te, hythuanaw kha Gerizim Mua vawlan na nung cih oh zah, thyalawnaw kha Ebal Mua vawlan na nung cih oh.30Na ny oh hawte, tuh-e mua hae tuh Jordan vaw khuraw lang, niccaw lang te beihtaraw asawnaw, Arabah kya um hae paw Kanaan hae ram kya, Gilgal te arawsekunaw, Moreh kya-e rantah thing hae pe nynh a um hae.
31Bawipaw nae Pachia nynh ae pya cih oh paw ram kha teenuate ccou khylan Jordan vaw kha na zua oh zah, khah-e ram kha ccoute tuin kya khua he na sah oh te,32atunin nae malang ka nungpaw phungbya hae te phungzae hae balyn hynh zuakute na zui hahe cih oh. Beiknaw Hmin San Kheit kyalya
1Hynh-e hae hynh Bawipaw , nae minpaaw hae Pachia nynh laephi vawlan na hiin lungkhu oh balyn ccou lan ae pya oh paw ram kya zuakute na zui lan oh paw phungbya hae te phungzae hae nynh thua hae.
2Nanning nynh na lah vae cih oh paw minphuin hae nynh mua ahang hae paw vawlan, sangpyng hae vawlan te anaw abungpaw thingku kaw miakaw kya a beik hae paw mih pachia hae hmin balyn kha pong na ropah cih oh.3Mih silawhang hae kha phoupah oh, mih lungpum hae kha ropah oh, mih Asherim kha maee te upah oh lah, mih pachia lang a raeku hae paw zohtuh hae kha baepah oh, tuhcite mih umnaw hmin hae kyate mih min kha thee oh.4Bawipaw nae Pachia kha tuhcite na beik lan khyh oh.5Thuasalama Bawipaw nae Pachia nynh a min nung nawlan te a um nawlan nae phin balyn kyate a po cih paw hmin kha na ccung cih oh. Tuh-e hmin kalan na cceih cih oh zah,6nae kya-e maee-ute silawnawpaw hae te silawnawpaw hae, nae kya-e pumhaw pumkheit hae te nae kya-e ahlu hae, byakinkute na pya oh paw nae lasung hae, lungthote na pya oh paw silawnawpaw hae, te nae vaetua phu te nae tuuphu kya-e thanty hae kha tuh-e hmin kalan na thuakhae cih oh.7Te nanning nynh tuin kya Bawipaw nae Pachia malang khe na ae cih oh, Bawipaw nae Pachia nynh hythua ae pya oh zah na cyi oh paw miakaw kya nanning te nae innbyn hae tuh pynkheihlan nae lungtua cih.
8Aening balyn nynh ahmaw rynaw thyhte atunin hein kya ah cyi oh hawte na cyih lan khyh oh,9pawccecize Bawipaw nae Pachia nynh ae pya cih oh paw haeungnaw te rho lungkhu lang na tee loh khyh oh.10Jordan vaw zuate Bawipaw nae Pachia nynh ae nee oh paw ram kya na um oh zah, khyndadyh lan khua na sah oh ccaw cite nae pepan umpaw nae rhaw hae kyate haeungnaw he ae pya oh te,11Bawipaw nae Pachia nynh a min um nawlan a popaw hmin kalan khe kaw kae pya oh paw atyn-are kha na cciakhae cih oh: nae kya-e maee-ute silawnawpaw hae te nae silawnawpaw hae, nae kya-e pumhaw pumkheit hae te nae kya-e ahlu hae, Bawipaw kalan bya na kinku thyh oh te na pya oh paw lasung balyn kha na thuakhae cih oh.12Te Bawipaw nae Pachia malang khe naemaw ryte nae ccanung hae te nae ccapaw hae, nae seenung hae te nae seepaw hae, te neekupaw thuasah, rho thuasah hoi leite nae khua kya a um hae paw Levi hae ryte nae lungtua cih. Hopyapaw Beiknaw Hmin
13Na muih oh paw hmin miakaw kya nae kya-e maee-ute silawnaw kha na rae khyh nawlan oh raeringkuh oh.14Thuasalama nae phin hae kya-e phinkhakheit kya Bawipaw nynh a po cih paw hmin kya kyalya khe nae kya-e maee-ute silawnaw kha na rae cih oh zah kaw kae pya oh paw atyn-are kha tuin kya na cyih cih oh.
15Tuhzemah Bawipaw nae Pachia nynh ae pya oh paw hythuanaw thyhte nae khua khuakhakheit kya na ry takyh oh te, saw kha na chiakuh cih oh zah na ae cih oh; sazuh te sakhi kha leih a ae hae hawte athyaapaw ccungccaw nynh thuasah, athyaa leipaw ccungccaw nynh thuasah tuh-e tuh a ae cih.16Thuasalama chii kha na ae lan khyh oh; tuh-e chii tuh laephi kya tui hawte na lae cih oh.17Nae ccathae, nae misutui te nae chitui pumhaw pumkheit kha thuasah, nae vaetua phu te nae tuuphu kya-e thanty hae kha thuasah, bya na kinku oh paw byakinnaw lasung hae, lungthote na pya oh paw silawnawpaw hae hankhakheit kha thuasah, nae kya-e ahlu hae kha thuasah nae khua lungkhu kya na ae lan khyh oh;18hynh-e hae hynh Bawipaw nae Pachia nynh a popaw hmin kya namaw ryte na ccanung te na ccapaw, na seenung hae te na seepaw hae, te nae khua kya umpaw Levi phin hae ryte Bawipaw nae Pachia malang khe na ae cih oh, na cyi oh paw balyn kya Bawipaw nae Pachia malang nae lungtua cih.19Nae ram kya na um lungkhu oh balyn, Levi phin hae kha pawlangria leite na um khyh nawlan oh raeringkuh oh.
20Bawipaw nae Pachia nynh bya ae kinpyaku oh hawte nae ram kha he ae kosahpah oh te, nanning nynh saw na ae ry keiccu oh ze, “Saw ka ae cih,” na ci oh ze, na ry takyh oh te saw kha na ae cih oh.21Bawipaw nae Pachia nynh a min nung nawlan a popaw hmin tuh nanning kyate myaryamaw asaw lanze, kaw kae pya vae oh hawte Bawipaw nynh ae pya oh paw vaetua phu khyhze tuuphu kya-e sakhakheit kha na theih cih oh zah, na ry takyh oh te, nae khua lungkhu kya na ae cih oh.22Sazuh saw thuasah, sakhi saw thuasah na ae oh hawte na ae cih oh; athyaa leipaw ccungccaw nynh mah, athyaapaw ccungccaw nynh mah a ae cih.23Chii kha papin na ae lan khyh oh; pawccecize chii tuh hiinnaw thua zah, hiinnaw kha asaw ryte na aede lan khyh oh.24Chii kha na ae lan khyh oh zah laekhu langkhe tui hawte na lae cih oh.25Bawipaw mitmuihnaw kya ahmepaw kha na cyi keiccu oh ze naemaw te nae nukhu e nae ccaaw hae tuh ngedang lungpawte na um ccaw oh, chii kha ae nan oh.26Thuasalama na pya lan oh paw athyaapaw ahlu hae te bya na kinku oh thyhte na pya oh paw lasung hae kha Bawipaw nynh a po cih paw hmin kalan khe na thuakhae cih oh.27Maee-ute si na lawnaw oh paw asaw te achii kha Bawipaw nae Pachia silawhang vawlan khe na pya cih oh; ccangpaw si na lawnaw oh paw achii hae kha tuh Bawipaw nae Pachia silawhang pe khe na lae cih oh, thuasalama asaw kha tuh na ae cih oh.
28Bawipaw nae Pachia mitmuihnaw kya ahoypaw te ahmepaw kha na cyih oh zah, naemaw te nae nukhu e nae ccaaw hae tuh ngedang lungpawte zungzae na um ccaw oh, atunin kaw kae pya oh paw hynh-e bya hae hynh hoyte zui oh.
Zohtuh Beiknaw Raeringnaw Pyanaw
29Law lan na teenua vae cih oh paw minphuin hae kha Bawipaw nae Pachia nynh nae malang khe maemih hae zah minmin kha lawte mih ram kya he na um oh te,30minmin kha nae malang khe ro athua kou hae te, minmin kaheih lawkute kaang na kae khyh nawlan oh raeringkuh oh: “E minphuin hae nynh mih pachia hae kha pawtepei a beik hae? Kae mah minmin hawte cyi ka rybua,” cite mih pachia hae te asekuh lante akaw-aleih khia nan oh.31Bawipaw nae Pachia hanlan minmin hawte na cyih lan khyh oh, pawccecize Bawipaw nae Pachia nynh a huapaw anungsikuhpaw uccaw miakaw kha minmin nynh mih pachia hae hanlan a cyipya hae. Minmin nynh mih ccapaw hae te mih ccanung hae kha heize mih pachia hae hanlan maee kya leih a u hae.32Kaw kae pya oh paw atyn-are kha zuakute na zui hahe cih oh; khah-e kyakhe na biachih lan khyh oh zah na lahbang lan khyh oh.
1Nanning laku te profeh hae te maanleihthya hae paw yn langkuh hae zah syntawnaw hae te ngaeangnaw hae kha nanning kya muihsahte,2ae langsahpyaku oh paw muihsahnaw hae te ngaeangnaw hae tuh yn cyihkuh zah, na ny boi lei oh paw “Ccangpaw pachia hae kha zui oh sih lah beik oh sih,” cite ae hopya oh zetuh,3tuh-e profeh hae te maanleihthya hae paw bya kha na ngaepah lan khyh oh; pawccecize Bawipaw nae Pachia kha nae thinlung balyn te nae tuanaw balyn te na sungsah ccaccing oh tou cipaw ny khylan Bawipaw nae Pachia nynh nanning kha ae syntawtua cih oh.4Bawipaw nae Pachia kha na zui cih oh, amaw kyalya kha na rih cih oh, a kawbya hae kha na zui cih oh, a roi kha na ngae cih oh, amaw kha na beik cih oh zah amaw kha tynkaring lan na kyngkuh cih oh.5Thuasalama Izip ram kyate ae poukhae oh zah seetangnaw kyate ae shawkhaw oh paw Bawipaw nae Pachia tungvaw rawsete, Bawipaw nae Pachia nynh zui lan kaw ae pya oh paw laanpi kyate nanning kha maeleihsahku khylan lungzi leinaw bya a ho keiccu hae ze, tuh-e profeh hae te maanleihthya hae paw tuh chia athua cih hae. Tukeiccuze nanning laku kyate hoyleinaw kha na vua cih oh.
6Na uno, na paaw ccapaw khyhze na nung ccapaw, na ccapaw khyhze na ccanung, na pompaw na zu, na naekuh hua oh paw na banpaw nynh heize, namaw nynh thuasah, na minpaaw hae nynh thuasah na ny lei oh paw pachia hae kalan, “Cceih oh sih lah ccangpaw pachia hae kha beik oh sih,” cite ho hae zah,7na pepan anaenaw te asawnaw, laephi voikheit lang te voikheit lang adianaw kyacia a um hae paw ccungccaw hae pachia hankhakheit kha beik khylan aruh lante ae hyy hae ze thuasah,8na nawccawkhae lan khyh zah tuhcihawpaw ccungccaw hae bya kha na ngae lan khyh. Minmin tungvaw thawccinaw te ngaethyaumsahnaw na langsakuh lan khyh zah na pankhaw lan khyh hae.9Thuasalama Minmin kha na theih ccaccing cih hae; minmin chia khylan na kuih tuh masaty na hang cih zah, tukoute ccungccaw balyn nynh mih kuih a hang cih hae.10Izip ram seetangnaw kyate ae poukhae oh paw Bawipaw nae Pachia kyate nanning kha maeleihsahku khylan a zuaku keiccu hae ze, lung te phe chih lan deih oh.11Tetuh Israel balyn nynh a thae cih hae zah a rih cih hae, te tuhcihawpaw hoyleinaw kha kharouh cyih vae lan khyh hae.
12Bawipaw nae Pachia nynh um nawlan ae pya oh paw khua khuakhakheit kyakhe,13ccungccalei hae paw nynh nanning laku kyate cceih hae zah khua kya a um hae paw kyakhe, “Cceih oh sih lah ccangpaw pachia hae kha beik oh sih,” cite na ny lei oh paw pachia hae kong a ho hae paw kha na thae oh zetuh,14nanning nynh akaw-aleih hoyte na khia cih oh. Nanning laku kya tuhcite anungsikuhpaw uccaw hae tuh acyiku ccaccing zetuh,15tuh-e khua kya a um hae paw kha thaloi te na theih cih oh zah, tuh-e khua te a lungkhu umpaw atyn-are, sahiin-awvaw hae kha thaloi te pong na theih cih oh.16Na luade oh paw uccaw balyn kha khualae angaelung khe na ccakhung cih oh; oute khua te khua lungkhu e na luade oh paw balyn kha Bawipaw nae Pachia hanlan abalynte maee-ute silawnaw lante maee te na u cih oh. Tuh-e tuh zungzae arohpaw khua athua vae cih zah, papinmaw raethui thua vae lan khyh.17Bawipaw nynh myarya lepaw a thinrianaw kyate paleihkuh zah nae minpaaw hae kya bya a kinku hawte ngaethya ae umsah oh zah ae pungthung sah nawlan oh, ro athua vae paw uccaw ccangkheit sanmah nae kuih te na ty lan khyh oh,18atunin kaw kae pya oh paw a kawbya balyn kha na zui oh zah Bawipaw nae Pachia roi kha na ngae oh zetuh, Bawipaw nae Pachia mitmuihnaw kya ahmepaw kha cyih oh.1Nanning tuh Bawipaw nae Pachia ccaaw hae nynh na thua oh. Michi hanlan nae ngesaw na awkuh lan khyh oh, nae mitteky laku e nae ming kha na ngokuh lan khyh oh.2Pawccecize nanning tuh Bawipaw nae Pachia hanlan athyaapaw minphuin nynh na thua oh; Bawipaw nynh nanning kha laephi vawlan e ccungccaw balyn kyate a ccungccaw hae lang te aphutepaw lang ae poku vae oh. Athyaapaw te Athyaa leipaw Looh (Lev 11.1-47)
3Anungsikuhpaw miakaw na ae lan khyh oh.4Na ae lan oh paw sarangpaw hae tuh: vaetua, tuu, miaa,5sazuh, sakhi, sathaw, sazaw, saccung, ramkaw vaetua te mua tuu nynh thua hae.6Accumakeih phiakuh zah a ccutin asaepaw sarangpaw miakaw te sarangpaw hae lakuze akhaethuipaw kha na ae cih oh.7Thuasalama akhaethuipaw te accumakeih aphiakuhpaw kyaze na ae lei lan oh paw tuh: kalauh, saveih te sangepavo nynh thua hae, pawccecize hynh-e hae tuh a khaethui hae zemah mih ccumakeih phiakuh khyh zah nae hanlan thyaa khyh hae.8Te voh tuh accumakeih aphiaku zemah a khaethui khyh keiccuze nae hanlan thyaa khyh. A saw kha na ae lan khyh oh, achihpaw kha mah na ty lan khyh oh.
9Tui lungkhu a umpaw balyn kyaze asake te aphaluh a hoipaw miakaw kha na ae cih oh.10Te asake te aphaluh a hoi leipaw miakaw kha na ae lan khyh oh; tuh-e tuh nae hanlan athyaa leipaw nynh thua.
11Athyaapaw pavaw miakaw kha na ae kho oh.12Thuasalama na ae lei lan oh paw tuh: mosi, lantaw, ngasathypaw pavaw,13mosipi, mosi phuin miakaw;14va-aw phuin miakaw;15kalauh pavaw, butharu, rili pavaw, mosi phuin miakaw;16vaphouh, nawniapi, tui-aw17te pelikan pavaw, sathuh aepaw lantaw, tui-pavaw,18kaepaw-pavaw, varaw phuin miakaw; michi pavaw te balaw nynh thua hae.19Te asake a hoipaw ripawhaepaw miakaw tuh nae hanlan thyaa khyh zah na ae lan khyh oh.20Sake hoi zah athyaapaw ahysuepaw miakaw tuh na ae cih oh.
21Amaw chi lan achihpaw miakaw kha na ae lan khyh oh; tuh-e tuh nae khua umpaw ramccang hae nynh a ae ccaw hae na pya kho oh, tuhkhyhze tuh-e tuh ramccang hae kalan na zuapah kho oh. Pawccecize nanning tuh Bawipaw nae Pachia hanlan athyaapaw minphuin nynh na thua oh.
Miaa taraw kha a pi mateitui te na thungde lan khyh oh. Pumhaw Pumkheit Phungzae
22Kum takyh loo kyate apoupaw nae ccacii-emung kyate na mue oh paw looh balyn kya-e pumhaw pumkheit kha ccangte phia oh.23Bawipaw nae Pachia tungvaw rithyanaw kha zungzae na ny nawlan oh, Bawipaw nae Pachia nynh amaw min a um nawlan a po cih paw hmin kyakhe nae ccathae, nae misutui, nae chitui kya-e pumhaw pumkheit te nae vaetua phu te nae tuuphu kya-e thanty kha Bawipaw nae Pachia malang khe na ae cih oh.24Thuasalama Bawipaw nae Pachia nynh hythuanaw he ae pya oh te, Bawipaw nae Pachia nynh amaw min um nawlan a popaw hmin tuh nanning kyate ccialekunaw myaryamaw saw zah pumhaw pumkheit kha na cciakhae kho khyh oh ze,25phua lang na rulae cih oh zah, phua kha nae kuih kya khyndadyh lan ccyngte Bawipaw nae Pachia nynh a popaw hmin kalan na cciakhae cih oh;26tuh-e phua tuh na ry oh paw miakaw kya—vaetua hae, tuu hae, misutui, ruimangpaw niapaw khyhze na ry oh paw miakaw kya na mang cih oh. Te Bawipaw nae Pachia malang khe nae innbyn hae ryte lungpawte pynkheihlan na ae cih oh.
27Nae khua kya umpaw Levi hae kha pawlangria leite na um lan khyh oh, pawccecize minmin tuh nanning kya neekupaw thuasah, rho thuasah hoi khyh hae.
28Kum thumnaw takyh khe tuh-e kum kya na voisah oh paw looh pumhaw pumkheit kha phe ccing lan na thuakhae cih oh zah, nae khua lungkhu khe na ccakhung cih oh;29Bawipaw nae Pachia nynh na law oh paw ryalaw balyn kya hythua ae pya nawlan oh, nanning kya neekupaw thuasah, rho thuasah a hoi lei hae paw Levi phin hae tuh nae khua kya um hae paw ramccang hae, ngawraw hae te nomae hae ryte oun cceih cih hae zah phe byn lan a ae cih hae. Sabbath Kum Upadi hae (Lev 25.1-7)
1Kum sarinaw kum takyh kya laebah ngaethyakunaw na rae cih oh.2Te laebah ngaethyakunaw konglang tuh hynhcite athua cih: laebah a koiisakuhtupaw miakaw nynh a koiitupaw a innpaw kha a ngaethya cih, Bawipaw kya-e ngaethyakunaw tuh thaesahku athua keiccu vae ze, amaw uno athuapaw a innpaw kyate tuh-e laebah tuh ngia lan khyh.3Ramccang ccungccaw kha tuh laebah na ngia kho, thuasalama na uno lukhakheit nynh ae koipaw laebah kha tuh na ngaethya hahe cih.4Tuhzemah nanning laku aryachipaw lu kheit sanmah um lan khyh, pawccecize Bawipaw nae Pachia nynh rho lang ccou khylan ae pya cih oh paw ram kya Bawipaw nynh hythua ae pya ccaccing cih oh,5atunin kaw kae pya oh paw hynh-e kawbya balyn hynh zuakute na zui oh zah Bawipaw kaw kha na ngae oh zetuh, hythua ae pya ccaccing cih oh.6Bawipaw nae Pachia nynh bya ae kinpyaku oh hawte, hythuanaw he ae pya oh te, minphuin patae hae kha na koiisakuh cih oh, thuasalama nanning nynh na koi lan khyh oh; minphuin patae hae kha na uk cih oh, thuasalama minmin nynh nanning kha ae uk lan khyh oh.
7Bawipaw nae Pachia nynh ae pya oh paw ram lungkhu e khua hae kyakhe a ryachipaw nae uno lukhakheit a um lanze, a ryachipaw nae innpaw paw tungvaw kya nae sithah lan khyh zah nae kuihphe kha phang na huh lan khyh oh.8Nae kuihphe kha na daw cih oh zah, pawpaw athua zemah, a ryachipaw hanlan phe azaw lan hysahte na koiisakuh cih oh.9“Kum sarinaw, ngaethyakunaw kum anae vae,” cite tuate aryachipaw na innpaw paw tungvaw eiungnaw hoite pawpaw mah pya leite ahoy leipaw thinlung kha na hoi khyh nawlan raeringkuh; nae innpaw paw nynh nanning rawsete Bawipaw kalan a sia cih zah, seinaw mee kha na teing cih oh.10Amaw kha hysahte pya lah, na pya vae ze, na sithah nan sah, pawccecize hynh-e konglang kyahin Bawipaw na Pachia nynh na ryalaw balyn kya te na cyipaw balyn kya hythua ae pya cih.11Laephi vawlan aryachipaw ccungccaw tuh thang boi lan khyh, tukeiccuze kae nynh nanning kha, “Nae ram kya umpaw a ryachipaw te ahoboupaw nae innpaw hanlan nae kuihphe kha daw oh,” cite kaw kae pya oh.
12Nae uno, Hebru paw thuasah, Hebru nung thuasah nanning kalan zua thua zah kum taruh lungkhu rya ae lawpya ze, kum sarinaw kum kyakhe tuh-e ccungccaw kha na luesah cih.13Te namaw kyate na luesahpaw seepaw lu kheit kha he na saw te, a kuih ccakaete na saw lan khyh.14Na tuuphu kya-e thuasah, na huimin kya-e thuasah, na misu mianaw khu kya-e thuasah hysahte na pya cih, tuhcite Bawipaw na Pachia nynh hythua ae pyapaw thyhte amaw kha pyatua.15Izip ram kya see lang na la tang oh paw te Bawipaw nae Pachia nynh ae shawkhaw oh paw kha liathui oh; tukeiccuze atunin hynh-e kaw hynh nanning kae pya oh.16Thuasalama aning nynh na kya a umpaw kha a sawccah zah nang te na innbyn kha a sungsah keiccuze nang kha, “Na kyate ka pou lan khyh,” ae cipya ze,17sivaw ccungthy kha na lah cih zah thuakaw kyakhe a nakua kha po ua lan na vih cih, te na see lang zungzae a tang vae cih.
Na seenung kha mah tuhcite na cyih cih.
18Na kyate minmin kha luesahte he na saw hae te, tuh-e tuh aru cite tua nan, pawccecize minmin nynh nang kha hohpaw ryalahtu kya-e ryalaw mee te atekuhpaw ryalaw kha kum taruh lungkhu phe ae lawpya vae hae; te Bawipaw na Pachia nynh na cyipaw balyn kya hythua ae pya cih. Sahiin-awvaw Thanty
19Na vaetua phu te na tuuphu kya-e thanty pise miakaw kha Bawipaw na Pachia kalan na thyaasah cih; na vaetua phu kya-e thanty khate rya na lah lan khyh zah na tuuphu kya-e thanty kha a ming na ngo lan khyh.20Tuh-e thanty hae tuh Bawipaw nynh a po cih paw hmin kyakhe nang te na innbyn hae nynh Bawipaw nae Pachia malang khe kum takyh na aekheih cih oh.21Thuasalama tuh-e thanty tuh douccaw leinaw ccangkhakheit—ccu khyanaw, mitmohnaw tahawpaw douccaw leinaw alepaw a hoi lanze, tuh-e tuhte Bawipaw na Pachia kalan si na law lan khyh;22tuh-e tuh nae khua lungkhu khe na ae cih oh, sakhi te sazuh na ae oh hawte athyaapaw te athyaa leipaw ccungccaw nynh pynkheihlan a ae cih hae.23Thuasalama a chii kha na ae lan khyh oh; laekhu langkhe tui hawte na lae cih oh. Kawtaw Poi (Exo 12.1-20)
1Bawipaw nae Pachia hanlan kawtaw poi kha tua oh lah, Abib sawpaw kha naawsah oh, pawccecize Bawipaw nae Pachia nynh nanning kha Izip ram kyate Abib saw, khuazi khe ae poukhae oh.2Bawipaw nynh a min a um nawlan a po cih paw hmin kyakhe tuuphu kya-e te thuasah, vaetua phu kya-e te thuasah Bawipaw nae Pachia kalan kawtaw poi silawnaw kha na rae cih oh.3Tuh-e tuh ransi phingkuhpaw hankhakheit te na ae dee lan khyh oh. Izip ram kyate vawsawnaw te arangte nae pou keiccu oh ze, nin sari lungkhu ransi phing leipaw sanlou, vawsawnaw sanlou khate na ae dee cih oh, tuhteze nynh Izip ram kyate nae toiku nin oh kha nae hiin lungkhu balyn na ning lan khyh oh.4Nae ram balyn kya nin sari lungkhu ransi kha nae kya muih thua lan khyh; masaty nin zete kya na chia oh paw saw kha awkhualan awkhua cia na laesah lan khyh oh.5Bawipaw nae Pachia nynh ae pya cih oh paw nae khua hae lungkhu kya kawtaw poi silawnaw rae lan ua na thua khyh oh.6Bawipaw nae Pachia nynh amaw min a um nawlan a po cih paw hmin kya kyalya khe, Izip ram kyate na pou ccyh oh, khuanin ccaw ccyh zetepakaw khe kawtaw poi silawnaw kha na rae cih oh.7Tuh-e tuh Bawipaw nae Pachia nynh a po cih paw hmin kyakhe ang na hyng cih oh zah na ae cih oh; awkhualan awkhua khe nae bu kalan na ki cih oh.8Nin taruh lungkhu ransi phing leipaw sanlou kha na ae cih oh zah nin sarinaw nin khe Bawipaw nae Pachia hanlan athyaapaw pumkunaw na rae cih oh, tuh-e nin kya rya na lah lan khyh oh. Loohrue Poi (Exo 34.22; Lev 23.15-21)
9Athadynpaw ccathae kha rungkou te he na rue takaw oh te, lonaw naw sari na ria cih oh.10Oute Bawipaw nae Pachia kyate na mue oh paw hythuanaw alung azya thyhte, lungthote silawnawpaw kha thuakhaete, Bawipaw nae Pachia hanlan lonaw poi kha na tua cih oh.11Bawipaw nae Pachia nynh amaw min a um nawlan a po cih paw hmin kyakhe, naemaw, nae ccapaw hae te nae ccanung hae, nae seenung hae te nae seepaw hae, nae khua kya umpaw Levi phin hae, nanning laku e mikhia hae, ngawraw hae te nomae hae nynh Bawipaw nae Pachia malang khe nae lungtua sah.12Izip ram kya see lang na la tang oh paw kha liathui oh lah, hynh-e phungbya hae hynh zuakute zui oh. Bu Poi (Lev 23.33-43)
13Nae huimin te nae misu mianaw khu kyate apoupaw kha he na ccakhung kou oh te, nin sari lungkhu bu poi kha na tua cih oh.14Naemaw, nae ccapaw hae te nae ccanung hae, nae seepaw hae te nae seenung hae, nae khua kya um hae paw Levi phin hae, mikhia hae, ngawraw hae te nomae hae nynh poi na tua lya oh khe nae lungtua sah.15Bawipaw nynh a po cih paw hmin kyakhe nin sari lungkhu Bawipaw nae Pachia hanlan poi na tuapah cih oh; Bawipaw nae Pachia nynh nae looh na voisah oh paw balyn kya te na cyi oh paw balyn kya hythua ae pya cih keiccu oh ze, poi kha na tua ccaccing cih oh.
16Pise balyn nynh ransi phing leipaw sanlou poi, lonaw poi te bu poi kyakhe Bawipaw nae Pachia malang, Bawipaw nynh a po cih paw hmin kyakhe kum kheit ze vae thum a langkuh cih hae. Minmin nynh Bawipaw malang khe kuih ccakaete langkuh lan khyh hae;17Bawipaw nae Pachia nynh ae pya oh paw hythuanaw thyhte ccungccaw balyn nynh mih taeningnaw thyhte a pya cih hae. Byapiatu hae te Uktu hae
18Bawipaw nae Pachia nynh ae pya oh paw nae khua balyn kyakhe byapiatu hae te bawi hae kha nae phin takyh kya na khang cih oh zah minmin nynh ccungccaw hae hanlan ahmepaw byapaenaw kha a raepah cih hae.19Ahme lei lante bya na pia lan khyh; ccungccaw mae na do lan khyh; pyaruh kha na lawkuh lan khyh, pawccecize ahme leipaw lasung nynh ahawpaw mit kha mohsah zah midingpaw bya kha a paleihsahku.20Bawipaw nae Pachia nynh ae pya cih oh paw ram kha ccoute na hiin nawlan oh, byadingpaw kyalya kha na zui cih oh.
21Bawipaw nae Pachia hanlan na rae oh paw silawhang pe khe pawpaw thingku kha mah Asherah zohtuh tung lante na bing lan khyh oh;22te Bawipaw na Pachia nynh a huapaw lungbing kha na bing lan khyh.
1Douccah leipaw te accing leinaw ccangkhakheit a umpaw vaetua khyhze tuu khate Bawipaw nae Pachia kalan silawnaw na rae lan khyh oh; pawccecize tuh-e tuh Bawipaw nae Pachia hanlan anungsikuhpaw nynh thua.
2Bawipaw nae Pachia nynh ae pya cih oh paw nae khua kyakhe nopi khyhze pise nynh Bawipaw nae Pachia mitmuihnaw kya hoyleinaw rae zah, Bawipaw byakinnaw kha zui leite,3kae khee oh paw ccangpaw pachia hae, khuanin thuasah, sawpaw thuasah, vaawlang umpaw ccangkhakheit kha thuasah ryalawpyate a beikpaw kha,4nanning kya hopya athua ze thuasah, na thae oh ze thuasah, akaw-aleih na khia oh zah, Israel hae kya tuhcihawpaw anungsikuhpaw uccaw cyi athua ccaccingpaw kha nanning laku kya muih athua zetuh,5tuh-e hoyleinaw a raepaw nopi khyhze pise tuh nae koikua kalan na poukhae cih oh zah, lung te phe chih lan na deih cih oh.6A nyhtu ccaekia lu ning khyhze lu thum a um ze, chia athua cih; ccaekia lu kheit kyalya a um ze, chia thua lan khyh.7Tuh-e ccungccaw kha chia khylan a nyhtu ccaekia hae nynh masaty mih kuih a hang cih hae, tukoute ccungccaw balyn nynh mih kuih a hang cih hae. Tuhcite hoyleinaw kha nanning laku te ccikan athua cih. Ahmepaw Byapaenaw
8Ccungccaw chiakunaw kong, kaethekunaw kong te ziaku buakunaw kong, tuhcihawpaw byalungnaw ccangkhakheit kha nae khua kya um zah, nae hanlan byapaenaw rae lan myaryamaw aru lanze, Bawipaw nae Pachia nynh a popaw hmin kalan arangte na cceih cih oh zah,9tuh ccyh lyaze byapiatu rya a lahtu te Levi phin ranpibawi hae kalan na thuakhae cih oh zah, minmin nynh tuh-e kong byapaenaw kha ae thaesah cih oh.10Bawipaw nynh a po cih paw hmin kyate nanning kalan ae thaesah oh paw byapaenaw kha hmerarih lan zui oh lah, minmin nynh ae ccangpya oh paw atyn-are kha zuakute zui oh.11Nanning hanlan ae ccaesahpya oh paw upadi te ae hopya oh paw byapaenaw kha phe ccing lan na cyih cih oh; minmin nynh ae thaesah oh paw byapaenaw kyate voilang ranglang maekuh nan oh.12Bawipaw nae Pachia hanlan ryalawpya lan khang athuapaw ranpibawi khyhze byapiatu bya kha ngae leite a cyih nganpaw tuh a chih cih. Tuhcite hoyleinaw kha Israel kyate na ccikan cih oh.13Ccungccaw balyn nynh a thae hae te, a rih cih hae zah bua cyih ngan vae lan khyh hae. Siapharan Kawhoinaw
14Bawipaw nae Pachia nynh ae pya cih oh paw ram lungkhu lang teete na ccou oh zah tuin kya khua na sah oh te, nanning nynh, “Kae pepan umpaw minphuin balyn hawte oun uktu lang siapharan kha kae khangkuh cih,” cite he na ci oh te,15Bawipaw nae Pachia nynh a po cih paw siapharan kha nanning uk khylan na khangkuh ccaccing cih oh. Nae uno hae kya-e lu kheit kha nanning uk khylan siapharan lang na khangkuh cih oh; nae uno athua leipaw ramccangpaw kha nanning uktu lang na khangkuh kho khyh oh.16Tuh-e siapharan nynh amaw hanlan marang patae hoi lan khyh, marang houh lung lan hoi khylan Izip ram lang ccungccaw hae kha kisah lan khyh hae, pawccecize Bawipaw nynh nanning kha, “Tuh-e laanpi kalan kharouh na kithui vae lan khyh oh,” ae cipya vae oh.17Tuh-e siapharan nynh zu patae hoi lan khyh, a thinlung paleihkuh lan khyh; sui te ngun kha mah amaw hanlan pataepi hoi lan khyh.18A peenaw kya-e siapharan haungnaw kya he a haung te, Levi phin ranpibawi hae kya umpaw, amaw hanlan zei athuapaw e upadi hynh a khawpikuh cih.19Bawipaw a Pachia rawrinaw kha a ccangkuh cih zah, hynh-e upadi te phungbya kya-e bya balyn kha zuakute a zui nawlan, tuh-e phungbya tuh amaw kya tyty a um cih zah a lungkhu umpaw kha a hiin lungkhu balyn a ria cih,20amaw te a ciihan hae nynh Israel ram kya a peenaw kha khaw cia a uk nawlan hae, ccangpaw a uno hae tungvaw lysakuh lan khyh zah, kawbya kyate voilang ranglang maekuh lan khyh. Ranpibawi te Levi Phin hae Hanpaw
1Levi phin ranpibawi hae, Levi phin balyn tuh neekupaw uccaw khyhze rho kha Israel laku kya hoi lan khyh hae. Bawipaw hanpaw silawnawpaw hae kha a ae kho hae,2thuasalama mih uno hae laku kya rho kha hoi lan khyh hae; Bawipaw nynh bya a kinpyaku hae thyhte, Bawipaw tuh mih rho nynh thua.
3Hynh-e hynh ccungccaw hae nynh si a lawnaw hae paw vaetua khyhze tuu kyate ranpibawi hae nynh a ccou lan hae paw athua cih: minmin nynh ranpibawi kalan alya, akhaw ccangning te avuepi kha a pya cih hae.4Masaty na rue oh paw nae ccathae, nae misutui, nae chitui te na ngo ty oh paw nae tuuming kha amaw kalan na pya cih oh.5Pawccecize Bawipaw nae Pachia nynh Levi te a ccapaw hae kha Bawipaw min te thadyn khylan te ryalaw khylan nae phin balyn kyate zungzae hanlan a po vae hae.
6Levi phin lukhakheit nynh a la umnaw Israel ram, nae khua khuakhakheit kyate yn pou zah, Bawipaw nynh a po cih paw hmin kalan (thua a ry takyhte yn thua kho zah), he yn thua lanze,7tuh-e hmin kya Bawipaw malang ryalaw khylan a thadyn hae paw a ruiban Levi phin balyn hawte, Bawipaw a Pachia min te rya a lah cih.8aning tuh innbyn rho hae zuanaw kyate a muepaw uccaw a hoi zemah, aning nynh a hanpaw ae lanpaw kha alokuh lante a muebua cih. Ccaaw te Silawnaw
9Bawipaw nae Pachia nynh ae pya cih oh paw ram lungkhu lang he na tee oh te, tuin ram e minphuin hae kya-e anungsikuhpaw cyisahnaw kha thy na dokuh lan khyh oh.10Nanning laku kya a ccapaw khate thuasah, a ccanung khate thuasah maee te si a lawkuhpaw, apawepaw, beidin hothyapaw, kuihdothyapaw, mitleihthyapaw,11naawthyapaw, khozi bahkuhpaw, chihiinleihthyapaw lu kheit sanmah na um lan khyh oh.12Pawccecize hynh-e hae acyihthya hae paw tuh Bawipaw hanlan anungsikuhpaw nynh thua hae; hynhcihaw anungsikuhpaw cyisahnaw keiccuze Bawipaw nae Pachia nynh minmin kha nae malang te a dee cih hae.13Nanning tuh Bawipaw nae Pachia malang lungzi hae paw ccaccing na thua cih oh.14Na dee cih oh paw minphuin hae nynh beidin hothyapaw te apawepaw bya kha a ngae hae zemah, nanning tuh Bawipaw nae Pachia nynh tuhcite cyi lan ae ua khyh oh. Moses te Alokuhpaw Profeh Thawpaw
15Bawipaw nae Pachia nynh kamaw yn lopaw profeh lu kheit kha nae hanlan naemaw minphuin kyate yn pousah cih zah, tuh-e profehbya kha na ngae cih oh.16E hynh Horeb kya na pumku nin oh ze, nanning nynh, “Bawipaw ka Pachia roi kha bua ka thae ung ze thuasah, hynh-e maee lepaw hynh bua ka muih ung ze thuasah ka chih cih,” cite Bawipaw nae Pachia kalan na ngia oh paw kha nynh thua.17Oute Bawipaw nynh kae kha, “Minmin nynh a ho hae paw tuh akyhpaw nynh thua.18Mih uno hae kyate nang ae lopaw profeh lu kheit kha minmin hanlan ka langsakuh cih; ka bya hae kha tuh-e profeh khalang kyakhe ka nung cih zah aning nynh kaw ka pyapaw atyn-are kha minmin kya a hopah cih hae.19Tuh-e profeh nynh ka min te a hopaw bya a ngae leipaw lukhakheit kha kamaw ccaccei nynh bya a ngae khyhnaw kong kha ka ngia cih.20Thuasalama kae nynh ho lan kaw ka pya leipaw bya kha ka min te a hopaw profeh thuasah, ccangpaw pachia hae min te a hopaw profeh lukhakheit thuasah a chih cih,” a ci.21Nanning nynh naemaw te naemaw kha, “Bawipaw nynh a ho leipaw bya tuh pawtemou ah nyh kho cih oh?” cite na hoku oh.22Profeh lu kheit nynh Bawipaw min te ho salamah tuh-e a hopaw tuh acyiku khyhze thuasah, ahme khyhze thuasah tuh-e tuh Bawipaw nynh a ho leipaw bya nynh thua. Profeh nynh a rythyte a hodepaw nynh thua; tuh-e tuh rih nan oh. Khynnaw Khuapi hae Upadi (Nam 35.9-34; Jos 20.1-9)
1Bawipaw nae Pachia nynh ae pya cih oh paw ram kya-e minphuin hae kha Bawipaw nae Pachia nynh maemih hae zah, nanning nynh na dee oh zah mih khua hae kya te mih inn hae kya he na um oh te,2Bawipaw nae Pachia nynh nanning ccou khylan ae pya cih oh paw ram kya-e khuapi khua thum kha na phia cih oh.3Ccungccaw a theihtu nynh tuh-e khua khuakhakheit kalan khe a ccue ccaw cite, Bawipaw nae Pachia nynh nanning ccou khylan ae pya oh paw ram kha ccangthum lang na phia cih oh zah, laanpi kha na paccyn cih oh.
4E hynh tuh-e khua lang ccue zah a umpaw ccungccaw a theihtupaw konglang nynh thua, tuh-e tuh huakunaw a la um lei pite ccangpaw ccungccaw kha tuaku ty leite a theihtupaw nynh thua:5Lukhakheit tuh ccangpaw ccungccaw te thing nge lan ramkaw lang a cceih hae, te (minmin kya-e) lu kheit nynh thingku kha hae te a nge lyakhe, hae tuh haerakoh kyate poh kinsei zah ccangpaw ccungccaw kha a tungsei keiccuze phe a chi lanze, tuh-e a theihtupaw tuh tuh-e khuapi hae kya-e khuakhakheit kalan khe a ccue cih zah a hiin cih.6Tuhkhyhze tuh, minmin lu ning laku kya huakunaw a la um leipaw thua zah a theihtupaw kha chia lan accan lei pite laanpi tuh myaryamaw asaw lanze, chiise phulahtu nynh thinria lungsote a deehui cih zah he a phah te a theihsei cih.7Tukeiccuze khuapi khua thum kha na phia cih oh cite kaw kae pya oh.
8Bawipaw nae Pachia nynh nae minpaaw hae kya bya a kinpyaku hae hawte, nae ram kha kosah zah, nanning pya lan cite nae minpaaw hae bya a kinpyaku hae paw ram balyn kha ae pya cih oh zah,9Bawipaw nae Pachia kha sungsahte thuasah, a laanpi zungzae zuite thuasah atunin kaw kae pya oh paw hynh-e kawbya balyn hynh zuakute na zui oh zetuh, hynh-e khuapi khua thum koute ccangpaw khua thum kha na lungsah chih cih oh,10tuhteze nynh Bawipaw nae Pachia nynh rho lang ae pya cih oh paw ram kya seinaw a hoi leipaw chii kha luasah thua lan khyh, te chiise luasahnaw mee kha nae tungvaw ccah lan khyh.
11Thuasalama lukhakheit nynh ccangpaw ccungccaw kha a hua keiccuze zya buhkhawte bua zah phe a theih koute tuh-e khuapi khuakhakheit kalan a ccue zetuh,12a theihtupaw a umnaw khuapi kya-e piccan hae nynh ccungccaw a saw cih hae zah atheitupaw kha oun thuakhae cih hae, te amaw kha chia khylan chiise phulahtu kuih kalan a pya cih hae.13Ngaethya na umsah lan khyh oh; ngedang lungpawte na um nawlan oh, seinaw a hoi leipaw kya-e chiise mee seinaw kha Israel kyate na ccikan cih oh. Langmaw She e Ramri hae
14Bawipaw nae Pachia nynh nanning ccou khylan ae pya cih oh paw ram kyakhe, nae hanlan neethung athuapaw laephi kya, langmaw she e ccungccaw hae nynh a la bing hae paw nae innpaw kya-e loori kha na nue lan khyh oh. Ccaekia Upadi
15Lukhakheit nynh a la cyipaw hoyleinaw kong te kyngkuh zah, hoyleinaw a cyihseipaw khyhze seinaw a raepaw lukhakheit detah lanpaw tuh ccaekia lu kheit te zaw lan khyh. Ccaekia lu ning khyhze lu thum nynh a ho hae paw bya te rou nynh seibenaw tuh tynsah athua cih.16Huanaw thinlung a hoipaw ccaekia nynh a cyihseipaw lukhakheit kha seibe khylan yn thua lanze,17lu ning maw te Bawipaw malang thuasah, tuh ccyh lyaze rya a lahpaw ranpibawi hae te byapiatu hae malang thuasah a langkuh cih hae,18te byapiatu hae nynh akaw-aleih pong a khia cih hae. Ccaekiakhantu tuh ahme leipaw ccaekia thua zah, ccangpaw ccungccapaw kha rawsete ahme lei lante ccaekia a khanku lanze,19ahme leipaw ccaekia nynh tuh-e ccungccapaw tungvaw cyi lan a tuaku hawte, tuh-e ahme leipaw ccaekia tungvaw khe na cyih cih oh. Tuhcite hoyleinaw kha nanning laku kyate na ccikan cih oh.20Tuhlaepaw ccungccaw hae nynh a thae hae te a rih cih hae zah, tuhcihawpaw hoyleinaw tuh nanning laku kya kharouh rae vae lan khyh hae.21Ngaethyaumsah nan oh: hiinnaw hanlan hiinnaw, mit hanlan mit, haw hanlan haw, kuih hanlan kuih, ccu hanlan ccu athua cih. Rhawtuknaw kya Zui lanpaw Phung
1Nae rhaw hae kha tuk lan na cceih oh zah, marang hae, marangle hae, nanning laeze alung huapaw rhawkaw hae kha he na muih oh te, minmin kha na rih lan khyh oh; pawccecize Izip ram kyate ae poukhae oh paw Bawipaw nae Pachia nynh nanning kha ae umkhae oh.2Rhaw na tuk maw oh khe, ranpibawi nynh malang a cceih cih zah rhawkaw hae kha,3“Pou Israel, thaetua! Atunin nae rhaw hae kha tuk khylan na naekuh vae cih oh. Minmin keiccuze nae lungroh nan sah, rih nan oh, siikuh nan oh lah thyngkuh nan oh;4pawccecize nanning kha taenaw pya khylan te nanning hanlan nae rhaw hae kha tukpya khylan ae cciakhae oh paw tuh Bawipaw nae Pachia nynh thua,” cite a hopah cih hae.5Oute rhawbawi hae nynh rhawkaw hae kha, “Inn thawpaw sak zah Pachia kalan a ap loh leipaw a um tou? Tuh-e ccungccapaw tuh a inn lang kisah, tuhkhyhze tuh rhawtuknaw kya a chihsei cih zah, milae nynh tuh-e inn tuh a thyaasah sei cih.6Misu khokhu kha rae salamah misu thae te a lungtuakhaekuh loh leipaw a um tou? Tuh-e ccungccapaw tuh a inn lang kisah, tuhkhyhze tuh rhawtuknaw kya a chihsei cih zah milae nynh tuh-e misu thae te a lungtuakhaekuh sei cih.7Nopi kha zu lang dy salamah umkhae loh leipaw a um tou? Tuh-e ccungccapaw tuh a inn lang ki sah, tuhkhyhze tuh rhawtuknaw kya a chihsei cih zah, milae nynh tuh-e nopi tuh zu lang a umkhae sei cih,” cite a hopah cih hae.8Tukoute rhawbawi hae nynh rhawkaw hae kha, “A rihpaw khyhze a rawthahpaw a um tou? Tuh-e ccungccapaw tuh a inn lang kisah, tuhkhyhze tuh a ban hae kha amaw hawte mih rawthyasah sei cih hae,” cite a hopah cih hae.9Rhawbawi hae nynh rhawkaw hae kha he a hopah kou hae te, rhawkaw aphuphu cciakhaetu hae kha a khang cih hae.
10Khua khuakheit kha tuk khylan he na naenuakuh oh te, ccawkunaw bya kha na thaesah ty cih oh.11Nae kya-e ccawkunaw bya kha mih nawccah zah mih koikua a hung hae zetuh, tuin khua kya umpaw ccungccaw hae nynh nanning hanlan nangsekupaw ryalaw kha ae lawpah cih oh.12Thuasalama minmin nynh nanning ryte ccawkunaw rae leite rhaw ae tuk oh zetuh, tuh-e khua kha na koihlu cih oh;13te Bawipaw nae Pachia nynh tuh-e khua kha nae kuih lungkhu lang he ae pya oh te, pise balyn kha thaloi te na bae cih oh.14Thuasalama nopi hae, imua hae, sahiin-awvaw te khua kya umpaw atyn-are balyn kha naemaw hanlan luadepaw uccaw lante na lawkuh cih oh. Bawipaw nae Pachia nynh ae pya oh paw nae rhaw hae kya-e luadepaw uccaw kha nae lung atuakhaekuh cih.15Hynh-e kya umpaw minphuin hae kya-e khua hae athua leipaw, nae umnaw te myarya asawkuhpaw khua balyn kha tuhcite na cyih cih oh.16Thuasalama Bawipaw nae Pachia nynh rho lang ae pya cih oh paw hynh-e ccungccaw hae khua kya umpaw ahysuepaw pawpaw mah na hiin lan khyh oh.17Hit hae, Amor hae, Kanaan hae, Periz hae, Hiv hae te Jebus hae kha Bawipaw nae Pachia nynh kaw ae pya oh hawte pong na maemih cih oh,18tuhteze nynh minmin nynh mih pachia hae hanlan a la cyi hae paw anungsikuhpaw uccaw balyn kha cyi khylan ae ccangpah bua lan khyh oh zah Bawipaw nae Pachia tungvaw na sei lan khyh oh.
19Khua khuakheit kha law khylan rhawtukte khaw cia na koihlu oh ze, thingku hae kha hae te ngete na roh lan khyh oh. Thingku hae kyate athae hae kha na loku oh zemah, thingku hae kha na nge lan khyh oh. Nanning nynh thingku hae kha koihlu lan ciate, loo kya umpaw thingku hae tuh ccungccaw zawtou athua hae?20Ae lanpaw athae thae leipaw thingku nynh thua cite na ny oh paw thingku hae kyalya kha na roh cih oh; nanning te rhaw na tukkuh oh paw khua tuh a khuliaku mawlaezung koihlunaw kya mang khylan tuh-e thingku hae kha na nge cih oh. Ccungccaw Chianaw Upadi
1Bawipaw nae Pachia nynh nanning ccou khylan ae pya cih oh paw ram kya, ramkaw huataw kyakhe michi a huekuhpaw muih thua zah, hung nynh a theih cipaw ny athua khyh zetuh,2nae piccan hae te nae byapiatu hae tuh michi rhua te anaekuhpaw khua kha hohsemou asaw cipaw tou khylan oun pou cih hae.3Michi rhua te anaekuh huapaw khua kya-e piccan hae nynh rya a lah boi loh leipaw, taphu mah a khankuh boi loh leipaw vaetua tohlaw kha a lah cih hae;4tuin khua kya-e piccan hae nynh tuh-e tohlaw tuh loo lang pho boi leinaw te ccacii ccou boi leinaw, zungzae tui aluapaw vaw taraw kalan khe a cciakhae bung cih hae zah, tuin kyakhe a nging kha a aw cih hae.5Oute Levi ccapaw hae, ranpibawi hae tuh malang a toikuh cih hae, pawccecize Bawipaw nae Pachia nynh amaw ryalawpya khylan te Bawipaw min te hythuanaw pya khylan minmin kha a po vae hae, minmin byapaenaw khate byalungnaw te ziaku buakunaw balyn kha byapia athua cih.6Michi rhua te anaeku huanaw khua kya-e piccan balyn tuh vaw taraw kya a nging a aw hae paw tohlaw vawlan khe mih kuih a singkuh cih hae zah,7“E chii hynh kae kuih nynh luasah khyh zah, e chii hanlan kaening tuh ccaekia kae thua khyh.8Pou Bawipaw , na shawkhaw hae paw na ccungccaw Israel hae hynh ngaethya hae; seinaw a hoi leipaw chiise luasahpaw seinaw kha na ccungccaw Israel laku kya nung nan,” cite a ho cih hae. Tetuh chii luasahpaw seinaw kyate minmin kha ngaethya athua vae cih hae.9Tuhcite Bawipaw mitmuihnaw kya ahmepaw kha na cyi oh keiccuze, seinaw hoi leipaw chiise luasahpaw seinaw kha nanning laku kyate na thyaasah cih oh, Kyngpaw Nopi hae
10Nae rhaw hae kha dou khylan na cceih oh zah Bawipaw nae Pachia nynh minmin kha nae kuih kya ae pya oh zah, he na kyng oh te,11na kyng oh paw laku e nopi apuithyapaw kha na muih zah zu lang na ry lanze,12tuh-e nopi kha na inn lang na cciakhae cih: tuh-e nopinung nynh a sang a ngokuh cih zah a kuihting a zekuh cih,13na kyngbiapaw a uccaw kha a khahkuh cih, a nung te a paaw hanlan rawkhuite na inn kya sawpaw sah kheit cia a um cih; tukoute amaw kha na ikhae kho vae cih zah a vawpaw lang na tang cih, aning mah na zu lang a tang cih.14Thuasalama amaw kha na ry vae khyh ze, phua lang zua leite alakawte na cciasah cih. Amaw kha a the na thyasah vae keiccuze see hawte na mang lan khyh. Ccatawccaw Thuanaw
15Pise lu kheit nynh zu zuning hoi zah, zu kheit kha sungsah zah zu kheit kha sungsah khyh, te a sungsahpaw zu te a sungsah leipaw zu nynh ccapaw hae kha saahpah hae zah, a sungsah leipaw a zu ccapaw tuh a tawccaw lanze,16aning nynh a rho kha a ccapaw hae kalan he a nee hae te, a sungsahpaw a zu ccapaw kha a sungsah leipaw a zu kya a saahpaw ccatawccaw athuapaw hawte ccatawccaw lang nung lan khyh.17A sungsah leipaw a zu ccapaw kha ccatawccaw nynh thua cipaw a nyh cih zah a hoipaw balyn kya-e a hanpaw leit ning kha a pya cih; pawccecize aning tuh a paaw thawzung masaty nynh thua, ccatawccaw thuanaw tuh amaw kya-e nynh thua. Kawngae leipaw Ccaaw hae
18Lukhakheit nynh a lungkhungpaw te kawngae leipaw ccapaw kha hoi zah, a nung te a paaw bya kha ngae leite a thuihei hae zemah pawlang a ria leipaw ccapaw athua lanze,19a nung te a paaw nynh a kyng cih hae zah khua koikua kya um hae paw mih khua e piccan hae kalan a cciakhae cih hae.20Minmin nynh mih khua e piccan hae kha, “E kae ccapaw hynh a lungkhungpaw te kawngae leipaw thua zah kae bya yn ngae khyh. A zu-aepaw ccungccaw nynh thua,” cite a hopah cih hae.21Tetuh khua kya-e pise balyn nynh amaw kha lung te phe chih lan a deih cih hae. Tuhcite hoyleinaw kha nanning laku kyate na thyaasah cih oh; te Israel hae balyn nynh a thae cih hae zah a rih cih hae. Upadi Aphuinphuin
22Lukhakheit nynh chia lan ciate detah khopaw seinaw kha rae zah amaw kha chiate thingku kya he na sae oh te,23a rhua tuh thingku vawlan khuazi zidae um lan khyh; a rhua kha tuh-e nin mawkhe na uh cih oh, pawccecize thingku kya saepaw ccungccaw tuh Pachia kya-e thyalawnaw a ingpaw nynh thua. Bawipaw nae Pachia nynh rho lang ae pya cih oh paw ram kha na thusah lan khyh oh.
1Na innpaw kya-e vaetua khyhze tuu nynh laanpi a mesei ze, pekipya leite na do huataw lan khyh; a hoitupaw kalan na kikhaepah cih.2A hoitupaw tuh na pe a um khyh ze thuasah, a hoitupaw kha na ny khyh ze thuasah khah-e kha na inn lang na cciakhae cih zah, a hoitupaw nynh ae ngia mawlaezung namaw kya a um cih; oute khah-e kha amaw kalan na pya cih.3Na innpaw kya-e lann kha mah tuhmaminte na cyih cih; na innpaw kya-e boeining kha mah tuhmaminte na cyih cih; te na innpaw nynh zosah zah na muihpaw ccangpaw hankhakheit kha mah tuhmaminte na cyih cih. Bawm leite na um lan khyh.
4Na innpaw kya-e lann khyhze vaetua nynh laanpi kya a khuliaku ze, pekipya leite na do huataw lan khyh; a thoku nawlan na bawm cih.
5Nopi nynh pise uccaw kha lawkuh lan khyh, pise nynh mah nopi uccaw kha lawkuh lan khyh; pawccecize humhung zemah tuhcihawpaw a cyihpaw tuh Bawipaw nae Pachia hanlan anungsikuhpaw nynh thua.
6Thingku kya thuasah, laekhu kya thuasah ataw khyhze atui kha api nynh a rya thinpaw pavaw bu kha na thuanua ze, api kha ataw hae ryte na luade lan khyh.7Ngedang lungpawte na um zah na hiinshe asae nawlan, ataw kyalya kha na lawkuh cih zah api kha tuh na saw cih.
8Inn thawpaw na sak ze, na inn adawkuhpaw athangnaw kyakhe athungkhawkuhpaw kha po voilu lan na rae cih; tuhkhyhze tuh tuin kyate ccungccaw a ccawsei lanze, na inn kya chiise luasahpaw seinaw kha na hoi sei cih.
9Na misu khokhu kya ccacii phuin ning na ccoude lan khyh, tuhkhyhze tuh na tupaw ccacii athae te misu khokhu kyate apoupaw balyn tuh khaleih aroh cih hae.
10Vaetua te lann kha taphu khangkheihte lei na thue lan khyh.
11Tuuming te laphan law pynkheihlan kuadekuhpaw boeining kha na lawkuh lan khyh.
12Na thyku oh paw boei aky kypali kyakhe ccaannawpaw boei ming kha na sae cih oh. Nopi Pise Seinaw Phung
13Pise lukhakheit nynh zu hoi zah a ikhae koute nopinung kha ry vae khyh zah,14“E nopinung hynh zu lang ka umkhae; thuasalama he ka ikhae tuh, liaccady athuanawpaw ccaekia kha ka muih khyh,” cite thethya byahote seinaw a be lanze,15tuh-e liaccanung a nung te a paaw nynh liaccady a thuanawpaw ccaekia kha koikua kya um hae paw khuapi kya-e piccan hae kalan a thuakhae cih hae.16Liaccanung a paaw nynh piccan hae kyakhe: “Ka ccanung kha hynh-e pisepaw kalan zu lang ka pya salamah aning nynh ry vae khyh;17atu aning nynh liaccanung tungvaw seinaw be zah, ‘Na ccanung hynh liaccady a thuanawpaw ccaekia ka muih khyh,’ a ci. Thuasalama hynh-e hynh ka ccanung liaccady athuanawpaw ccaekia nynh thua,” cite a hopah cih hae zah, liaccanung a boeining kha khua piccan hae malang khe a daw cih hae.18Tuh-e khua kya-e piccan hae nynh tuh-e pisepaw kha a ko cih hae zah a bua cih hae;19tuh-e pisepaw nynh Israel liaccady lu kheit kha a thethyasah keiccuze minmin nynh ngunphua shekel za kheit a rungsah cih hae (tuh-e shekel tuh liaccanung a paaw kalan a pya cih hae). Tuh-e nopinung tuh a zu lang a tang cih; pisepaw a hiin lungkhu balyn tuh-e nopinung kha mah lan khyh.
20Thuasalama tuh-e sei a benawpaw tuh kyh zah, tuh-e liaccanung kyakhe liaccady athuanawpaw ccaekia kha muih athua khyh zetuh,21liaccanung kha a paaw inn thuakaw kalan a cciakhae cih hae zah, khua kya umpaw pise hae nynh lung te phe chih lan a deih cih hae, pawccecize aning nynh a paaw inn kyakhe ohhuakute Israel hae kya maethya lan umpaw kha phe a cyi vae. Tuhcite nanning laku kyate hoyleinaw kha na thyaasah cih oh.
22Milae zu te a ihkheih hae paw pisepaw kha muih athua lanze, nopinung a ikhaepaw pisepaw te nopinung tuh, parouh mawte a chih cih hae. Tuhcite hoyleinaw kha nanning laku kyate na thyaasah cih oh.
23Zu lang a dy vae hae paw liaccady kha pisepaw nynh khualae lungkhu thuanua zah a ikhae lanze,24minmin kha parouh mawte tuh-e khua koikua kalan na cciakhae cih oh zah, lung te phe chih lan na deih cih oh, liaccanung tuh khua kya phang a um pite bawmnaw mue khylan a sia khyh keiccu thua zah, pisepaw tuh a innpaw zu kha a kyngde keiccu nynh thua. Tuhcite hoyleinaw kha nanning laku kyate na thyaasah cih oh.
25Thuasalama zu lang a dy vae hae paw liaccanung kha pise lu kheit nynh ramkaw khe thuanua zah, nopinung kha kyngdete a ikhae lanze, nopinung a ikhaetupaw pisepaw kyalya a chih cih.26Liaccanung kha pawpaw mah na cyih lan khyh oh; chinaw ciate detah khonaw lanpaw seinaw kha liaccanung nynh rae khyh, pawccecize hynh-e kong hynh a innpaw kha rawse zah a theihpaw ccungccaw lukhakheit kong te nynh aloku.27Aning nynh zu lang a dy vae hae paw nopinung kha ramkaw khe a kyngde keiccuze tuh-e nopinung nynh bawmnaw mue khylan sia salamah a khum lanpaw lu kheit sanmah um khyh.
28A dy loh lei hae paw liaccady kha pise lu kheit nynh yn thuanua zah, kyngdete a ikhaepaw kha a muihbia hae ze,29a ikhaetupaw pisepaw nynh liaccanung a paaw kha ngunphua shekel sung pangaw a pya cih zah, liaccanung tuh a zu lang a tang cih. Aning nynh liaccanung kha a kyngde keiccuze a hiin lungkhu balyn tuh-e nopinung kha mah lan khyh.
30Pise lukhakheit nynh a paaw zu kha zu lang umkhae lan khyh, a paaw zu kha seikhae lan khyh. Bawipaw Ccungccaw hae kyate Deenaw
1A tin koipaw nynh thuasah, a e aw athuapaw nynh thuasah a pumku hae paw Bawipaw ccungccaw hae kalan teebua lan khyh.
2Ccalah tuh Bawipaw ccungccaw a pumkuh hae paw kalan teebua lan khyh; a ciihan hae she hawnaw kyacia heize a pumkuh hae paw Bawipaw ccungccaw hae kalan tee lan khyh hae.
3Amor ccungccaw nynh thuasah, Moab ccungccaw nynh thuasah a pumkuh hae paw Bawipaw ccungccaw hae kalan tee lan khyh. Mih ciihan hae she haw kyacia heize a pumkuh hae paw Bawipaw ccungccaw hae kalan tee lan khyh hae,4pawccecize Izip ram kyate nae ccia lya oh laanryng khe minmin nynh looh te sanlou khate ae cciadue khyh oh, te nanning thyalawsah khylan Mesopotamia ram e Pethor kyate Beor ccapaw Balaam kha ae hohnuaku oh.5(Tuhzemah Bawipaw nae Pachia nynh Balaam bya kha ngaepah khyh; Bawipaw nae Pachia nynh ae sungsah oh keiccuze, thyalawnaw kha hythuanaw lang Bawipaw nae Pachia nynh ae paleihpya oh.)6Nae hiinshe lungkhu balyn, mih hiin hoynaw khyhze mih hoirumnaw hanlan na ccungpah lan khyh oh.
7Edom hae kha na hua lan khyh oh, pawccecize minmin tuh nae vaeccaw hae nynh thua hae. Izip hae kha na hua lan khyh oh, pawccecize nanning tuh mih ram kya a la um hae paw ramccang hae nynh na thua oh.8A saahku hae paw she thumnaw e mih ccaawno hae tuh a pumkuh hae paw Bawipaw ccungccaw hae kalan teesah kho athua cih hae. Rhawkawphu Ryahmin Thyaasahnaw
9Nae rhaw hae kha rawsete ryahmin he na tahnuaku oh te, ahoy leipaw cyisahnaw miakaw kha na sungkuh cih oh.10Nanning laku e lukhakheit tuh khuazi ccyh kyaze pyn kyate apouthyapaw atui keiccuze athyaa leipaw lang a tang lanze, ryahmin atolang a pou cih; ryahmin lungkhu lang tee lan khyh.11Zete ccyh yn thua te, amaw te amaw kha tui te a singkuh cih zah, khuanin ccah te, ryahmin lungkhu lang a tee cih.
12Ryahmin atolang khe na ia nawlan oh paw hmin san kheit na hoi cih oh.13Nae zunghe lante kawpia kha na hoi cih oh; atolang khe he na eih oh te, tuh-e kawpia khate akhu na karouh cih oh, te na maeleihkuh cih oh zah nae ia kha na thei cih oh.14Pawccecize Bawipaw nae Pachia tuh nanning khum khylan te nae rhaw hae kha nae kuih kya pya khylan nae ryahmin kya a cceih bungthung, tukeiccuze aning nynh nanning laku kya anungsikuhpaw ccangkhakheit kha a muih khyh nawlan te nanning kyate a maeleihku khyh nawlan, nae ryahmin tuh athyaa hahe cih.
15Mih bawi hae kyate nae kalan oun ccue hae paw see hae kha mih bawi hae kalan na pyathui lan khyh oh.16Minmin tuh nae khua khuakhakheit kya a poku hae paw hmin sankhakheit, mih lungrythuanaw kyakhe nae laku kya nanning ryte a um cih hae; minmin kha na tuaa na sah lan khyh oh.
17Israel hae kya-e ccanung hae tuh beikinn ohhuanung lang tang lan khyh hae; Israel hae kya-e ccapaw hae tuh beikinn ohhuapaw lang tang lan khyh hae.18Byakinkunaw ccangkhakheit hanlan pya khylan ohhuanung mee phua khyhze ohhuapaw mee phua kha Bawipaw na Pachia inn lungkhu lang na thuakhae lan khyh, pawccecize tuh-e hae tuh parouh mawte Bawipaw na Pachia hanlan anungsikuh hae paw nynh thua.
19Nae uno Israel ccungccaw tungvaw kyakhe phua thuasah, looh thuasah, koiisahkupaw ccangkhakheit thuasah ato lawkute na koiisakuh lan khyh.20Ramccangpaw na koisahkunaw kya ato na lah kho, thuasalama ccou khylan na tee vae cih paw ram kya na cyipaw balyn kya Bawipaw na Pachia nynh hythua ae pya nawlan, na uno Israel ccungccaw kya ato lante na koiisahku kho khyh.
21Bawipaw na Pachia kya byakinkunaw na rae ze, tuh-e ccingsah lanpaw kha accyh na nue lan khyh; pawccecize Bawipaw na Pachia nynh solei ae ngia cih zah, seinaw mee kha na ingsei cih.22Thuasalama byakinkunaw na rae khyh ze, seinaw mee kha na ing lan khyh.23Bawipaw na Pachia kalan na khalang te lungthote bya na kinku vae hawte, na khalang nynh a ho vae paw kha zuakute na cyih hahe cih.
24Na innpaw kya-e misu khokhu lang na tee ze, misu thae kha na rythyte phe byn lan na ae kho, thuasalama suaa kya ccapyh san na sangkuh lan khyh.
25Na innpaw kya-e athadynpaw ccathae hae laku lang na ccia ze, na kuih te na zuukuh kho, thuasalama na innpaw kya-e athadynpaw ccathae kha rungkou te na awkuh lan khyh. Zuvaw Tangnaw te Myakunaw
1Pise lu kheit nynh zu hoi zah, nopinung tungvaw nawccaw leinaw ccangkhakheit a muih keiccuze a lungccing khyh, tukeiccuze myakunawpaw ccaw zeite nopinung a kuih kya pya zah a inn kyate a cciasah; oute nopinung nynh tuh-e pisepaw inn kha cciataw zah,2ccangpaw pise zu lang a tang.3Oute lu ningnaw pisepaw nynh tuh-e nopinung tuh ry khyh zah, myakunawpaw ccaw zeite a kuih kya pya zah, a inn kyate a cciasah ze thuasah, lu ningnaw pisepaw tuh a chi ze thuasah,4a la cciasahtupaw masaty e a vawpaw nynh a thusah vae paw tuh-e nopinung kha a zu lang dykuh thui vae lan khyh; pawccecize tuh-e tuh Bawipaw malang anungsikuhpaw thua zah, Bawipaw nae Pachia nynh rho lang ae pya cih oh paw ram lungkhu lang seinaw kha na thuakhae lan khyh oh. Upadi Aphuinphuin
5Zu a hoi thawpaw pisepaw tuh rhawtuk lan cceih lan khyh, tuh-e ryalaw te asekuhpaw ccangkhakheit kya mah naw thua lan khyh. A dykupaw a zu ryte lungpawte umkheih khylan kum kheit lungkhu a rythyte innvaw a um cih.
6Humhung nynh mah sungmia-lung thuasah, sungmia-lung avawlan e lung thuasah aamahkhan lante a ponpaw kha kyngpah lan khyh, pawccecize tuh-e tuh ccungccaw hiinnaw kha ponpaw lante kyngpyapaw nynh thua.
7Lukhakheit nynh a uno Israel ccungccaw kha ruh zah, see lang a mang ze thuasah, a zua ze thuasah nybia athua lanze, a ruhtupaw tuh a chih cih. Tuhcite hoyleinaw kha nanning laku kyate na ccikan cih oh.
8Vaethya ccinaw apopaw kha myarya raeringkute thungkhawkuh oh; Levi phin ranpibawi hae kha kaw ka pya hae hawte, minmin nynh ae hopya oh paw miakaw kha hoyte na zui cih oh.
9Izip ram kyate na ccianaw oh laanryng khe Bawipaw nae Pachia nynh Miriam tungvaw a cyipaw kha liathui oh.
10Nae innpaw kya hankhakheit na koiisahku ze, aamahkhan lante ae pyapaw kha lawku khylan a inn lungkhu lang na tee lan khyh.11Na koiisahkupaw ccungccaw nynh aamahkhan lante ae pyapaw uccaw yn poukhae lyakhe atolang khe na ngaw cih.12Tuh-e ccungccapaw tuh a ryachi lanze, aamahkhan lante ae pyapaw boeining kya na ih lan khyh.13Na innpaw tuh a boeining kya ih zah nang kha hythua ae pya ccaw, aamahkhan uccaw kha khuanin a ccaw maw bua na pya cih; tuh-e tuh Bawipaw na Pachia malang na hanlan dingnaw athua cih.
14Nae ram kya-e nae khua khuakhakheit kya umpaw nae uno Israel hae thuasah, ramccang hae thuasah a ryachi hae paw te ahoboupaw ryalahtu hae kya-e mih ryalaw mee kha na ling lan khyh oh.15Mih ryalaw mee kha nin takyhte khuanin ccaw maw na pya cih oh, pawccecize minmin tuh ryachi hae thua hae zah, mih ryalaw mee te nynh mih vue a kuaku hae; tuhkhyhze tuh minmin nynh nanning rawsete Bawipaw kalan a sia cih hae zah, seinaw mee kha na ingsei cih oh.
16Mih ccaaw hae hanlan nungpaaw hae kha chia thua lan khyh hae, nungpaaw hae hanlan ccaaw hae kha mah chia thua lan khyh hae; mimaw seinaw hanlan rou nynh chia athua cih hae.
17Ramccang ccungccaw kya thuasah, ngawraw kya thuasah byadingpaw kha na zosahpah lan khyh; nomaenung boeining kha aamahkhan uccaw lante na lawkuh lan khyh.18Izip ram kya see lang na la tang oh paw te Bawipaw nae Pachia nynh tuin kyate ae shawkhaw oh paw kha liathui oh; tukeiccuze hynh-e hynh zui lan kaw kae pya oh.
19Nae loo kya looh na rue oh zah loo kya na ning oh paw ccavui cce kheit kha law khylan na kinua vae lan khyh oh; tuh-e tuh ramccang ccungccaw, ngawraw te nomaenung hanlan nungsya athua cih, tuhteze nynh Bawipaw nae Pachia nynh na cyi oh paw balyn kya hythua ae pya cih oh.20Nae oliv thae kha he na lo oh te, na me oh paw alaepaw kha lothui nan vae oh; tuh-e tuh ramccang ccungccaw, ngawraw te nomaenung hanlan athua cih.
21Nae misu khokhu kya-e misu thae kha he na lo oh te, ccamua kha lothui nan vae oh; tuh-e tuh ramccang ccungccaw, ngawraw te nomaenung hae hanlan athua cih.22Izip ram kya see lang na la tang oh paw kha liathui oh; tukeiccuze hynh-e hynh zui lan kaw kae pya oh.
1Ccungccaw lu ning tuh byalung hae zah a kaethekuh hae, te byapiatu hae nynh minmin laku byapia hae zah, lu kheit kha dansah hae zah lu kheit kha a seisah hae.2Aseipaw kha bua khylan a phia hae ze, byapiatu nynh tuh-e paw tuh a muihnaw kyakhe a bakhungsah cih zah, a seinaw thyhte bua lan accan zeihte a buasah cih hae.3Vae sung pali cia buasah kho athua, tuh lae alung lan buasah kho thua vae khyh; tuh lae alung lan bua athua lanze nae uno tuh nae muihnaw kya a minpousei cih.
4Ccatan a tin cciamangpaw tangnuapaw mung kha na bucceih lan khyh. Innbyn lungkhu Zuvaw Tangnaw
5Pynkheihlan um hae paw u te neitaw hae kyaze lukhakheit nynh ccaaw hoi leite a chi lanze, achihpaw zu tuh milae zu lang tangsah thua lan khyh. A vawpaw uno nynh a cceih cih zah zu lang a umkhae cih, te tuh-e nopinung hanlan vawpaw ryalaw kha a lawpah cih,6a upaw min tuh Israel phin kyate azo khyh nawlan, masaty a saahpaw ccatawccaw tuh achihpaw a upaw ccelang ria athua cih.7Thuasalama tuh-e pisepaw nynh a upaw kya-e nomaenung kha zu lang a ry khyh ze, a upaw kya-e nomaenung nynh koikua kya um hae paw piccan hae kalan a cceihthung cih zah, “Ka vawpaw neitaw nynh a upaw min kha Israel phin kya zungzae tynsah ry khyh; kamaw hanlan vawpaw te uno ryalaw kha yn lawpah khyh,” cite a hopah cih hae.8Tetuh a khua kya-e piccan hae nynh pisepaw kha a ko cih hae zah a hopah cih hae. Aning nynh, “Amaw kha zu lang ka ry khyh,” cite phe a ei zetuh,9a upaw zu nynh piccan hae malang khe tuh-e pisepaw kha a ccianua cih zah, a ccu kya-e phanah kha a khahpah cih zah, a mae kha a thoi cih, te aning nynh, “E hynh a upaw inn a sakpah ry leipaw pisepaw tungvaw cyipaw nynh thua,” cite a ho cih.10A inn tuh, “A phanah khahpya athuapaw pisepaw inn,” cite Israel hae kya ny athua vae cih. Kawpyanaw Aphuinphuin
11Pise hae lu kheit te lu kheit dyykuh hae zah, lu kheitpaw zu nynh he a phia hae tuh, a dyykuh hae paw nynh ccavyng a kyngpaw a vawpaw kha pankhaw khylan a kuih dyngte tuh-e pisepaw e kha a kyng lanze,12tuh-e nopinung kuih kha thoh na pae cih oh; ngaethya na umsah lan khyh oh.
13Nae sohrae kya adihpaw te alepaw khinlung phuin ning na hoi lan khyh oh.14Nae inn kya adihpaw te alepaw tounawpaw phuin ning na hoi lan khyh oh.15Bawipaw nae Pachia nynh ae pya cih oh paw ram kya nae hiinshe asae nawlan, accingpaw te ahmepaw khinlung kyalya kha na hoi cih oh zah, accingpaw te ahmepaw tounawpaw kyalya kha na hoi cih oh.16Pawccecize tuhcihaw uccaw a cyihpaw balyn, ahme lei lante a cyihpaw balyn kha Bawipaw nae Pachia hanlan anungsikuhpaw nynh thua.
17Izip ram kyate na ccianaw oh laanryng kya Amalek nynh nae tungvaw a cyipaw kha thuasah,18nanning tuh nae thawthang zah he na bang oh te, laanpi kya aebua oh zah, nae nulang nyathyapaw balyn kha pong a chia hae cipaw kha thuasah liathui oh; aning nynh Pachia kha rih khyh.19Tukeiccuze nae rhaw hae balyn kuih kyate Bawipaw nae Pachia nynh rho lang ccou khylan ae pya cih oh paw ram kya Bawipaw nae Pachia nynh haeungnaw he ae pya oh te, Amalek liathuinaw kha vaawlui zakaw kyate phe na thee cih oh; tuh-e tuh la ning nan oh. Thaety te Pumhaw Pumkheit
1Bawipaw nae Pachia nynh rho lang ae pya cih oh paw ram lungkhu lang teete na ccou oh zah, tuin kya he na um oh te,2Bawipaw nae Pachia nynh ae pya cih oh paw ram kyate na rue oh paw laephi athae balyn kya-e thaety aphuinphuin kha na lah cih oh, te suaa lungkhu na sang cih oh zah, Bawipaw nae Pachia nynh a min a um nawlan a po cih paw hmin kalan na cciakhae cih oh.3Tuh ccyh lyaze rya a lahpaw ranpibawi kalan na cceih cih oh zah, amaw kha, “Bawipaw nynh kaening pya lan, kae minpaaw hae kya bya la kinpyaku hae paw ram lungkhu lang atunin kaening kae thua vae cipaw Bawipaw nae Pachia kalan kae thaesah,” cite na hopah cih oh.4Ranpibawi nynh nae kuih kyate suaa kha lah zah, Bawipaw nae Pachia silawhang malang khe he a nya te,5Bawipaw nae Pachia malang khe hynhcite na hopah cih oh: “Ka minpaaw tuh a khiavuikuhpaw Aram minphuinpaw nynh thua, Izip ram lungkhu lang cceihbung zah, tuin kyakhe milu beihtaraw te ramccang ccungccaw lante a la um, te tuin kyakhe athungpaw te milu alungpaw, minphuin lepaw lang a tang.6Izip hae nynh kaening kha ryalaw arupaw lawsahte, oun reih hae zah, riathaenaw he oun pya hae tuh,7kae minpaaw hae Pachia, Bawipaw kalan khe kae sia; Bawipaw nynh kae roi kha thae zah, kae riathaenaw, kae thawbangnaw te oun tuaasahnaw hae paw kha a muih.8Bawipaw nynh kaening kha athungpaw kuih te a dyngpaw kuih khate thuasah, ri lan umpaw huhan te thuasah, muihsahnaw te ngaeangnaw hae te thuasah Izip ram kyate oun poukhae;9te hynh-e hmin kalan oun cciakhae zah mateitui te khoilutui aluanaw ram, hynh-e ram hynh oun pya.10Tukeiccuze atu Bawipaw , nang nynh nae pyapaw laephi athae kya-e thaety hynh atu kae thuakhae,” na cipah cih oh. Bawipaw nae Pachia malang khe sua kha na nya cih oh zah, Bawipaw nae Pachia malang khe na bakhung cih oh.11Oute Bawipaw nae Pachia nynh nanning te nae innbyn hae ae pya oh paw hoynaw balyn khate, nanning te nanning laku a um hae paw Levi phin hae te ramccang hae ryte lungtuanaw kha na raekuh cih oh.
12Pumhaw pumkheit pya kum, kum thumnaw kum khe na pousah oh paw kya-e pumhaw pumkheit balyn kha na pya oh zah, Levi phin hae, ramccang hae, ngawraw hae te nomae hae nynh nae khua lungkhu khe phe byn lan a ae ccaw hae cite he na pya kou oh te,13Bawipaw nae Pachia malang khe hynhte na ho cih oh: “Kaw nae pyapaw na kawbya balyn thyhte, athyaapaw pumhaw pumkheit kha ka inn kyate ka poukhae zah, Levi hae, ramccang hae, ngawraw hae te nomae hae kha ka pya vae hae; na kawbya miakaw kha ka ei khyh zah ka ning khyh.14Chizo lyakhe pumhaw pumkheit kha ka ae khyh; ka thyaa khyh lyakhe khah-e kha ccapyh san ka nue khyh; te michi hanlan mah khah-e kha ccapyh san ka hlu khyh. Kaw nae pya hawte ka cyih vae zah Bawipaw ka Pachia bya kha ka ngae vae.15Athyaapaw na umnaw vaawram te yn dobung lah na ccungccaw Israel hae tungvaw thuasah, kae minpaaw hae kya bya na kinpyaku hae hawte mateitui te khoilutui aluanaw ram, nae pya vae paw laephi hynh thuasah hythuapyatua,” na cipah cih oh. Bawipaw Ccungccaw hae
16Bawipaw nae Pachia nynh atunin ccaccei khe phungbya hae te phungzae hae kha zui lan kaw ae pya oh; tukeiccuze nae thinlung balyn te, nae tuanaw balyn te khah-e hae kha zui oh.17Atunin Bawipaw tuh nae Pachia lang a tang lanpaw kha thuasah, amaw laanpi kya zuite a phungbya hae, a kawbya hae te a phungzae hae kha zui lanpaw te a bya ngae lanpaw kha thuasah nae nawccah vae.18Bawipaw nynh bya ae kinpyaku thyh oh hawte, nanning tuh aphutepaw a ccungccaw hae lang tang khylan te a kawbya hae kha zuisah khylan thuasah,19nanning kha a raepaw minphuin balyn luki, thehoysahnaw, minthaannaw te sawtuanaw kya nung khylan thuasah, bya a kinku thyhte Bawipaw nae Pachia hanlan athyaapaw minphuin lang tang khylan thuasah, Bawipaw nynh atunin ae hopya vae oh. Ebal Mua e Lung hae te Beikhang
1Te Moses te Israel piccan hae nynh ccungccaw balyn kha akawlan thyhte a hopya hae: Atunin kaw kae pya oh paw kawbya balyn hynh zui oh.2Bawipaw nae Pachia nynh ae pya cih oh paw ram lungkhu lang tee khylan Jordan vaw na zua nin oh khe, alepaw lung hae kha na bing cih oh zah, palasta te na naesah cih oh.3Bawipaw nae minpaaw hae Pachia nynh bya ae kinpyaku oh hawte, Bawipaw nae Pachia nynh ae pya cih oh paw ram, mateitui te khoilutui aluanaw ram lang tee khylan vaw kha he na zua kou oh te, hynh-e upadi kya-e bya hae balyn hynh tuh-e lung hae vawlan khe na zei cih oh.4Tuhcite Jordan vaw na zua kou oh te, atunin kaw kae pya oh paw lung hae kha Ebal Mua vawlan khe na bing cih oh zah palasta te na naesah cih oh.5Te tuin kyakhe Bawipaw nae Pachia hanlan sivaw zunghe mang leite lung silawhang ccangkheit kha na rae cih oh.6Bawipaw nae Pachia hanlan aw leipaw lung hae khate silawhang kha na raepah cih oh. Oute Bawipaw nae Pachia hanlan maee-ute silawnaw kha tuh-e silawhang vawlan khe rae oh,7ccawkunaw silawnaw kha rae oh lah, Bawipaw nae Pachia malang lungtuate tuin kyakhe ae oh.8E upadi kya-e bya hae hynh lung hae vawlan khe ccaerarih lan na zei cih oh.
9Oute Moses te Levi phin ranpibawi hae nynh Israel hae balyn kyakhe, “Pou Israel, zya dae oh lah, ngaetua oh! Atunin ccaccei maw Bawipaw nae Pachia ccungccaw lang na tang vae oh.10Tukeiccuze atunin kaw kae pya oh paw a kawbya hae te a phungbya hae kha zuite Bawipaw nae Pachia bya kha ngae oh,” a cipya hae. Thyalawnaw Ccanghaw Lae Ning
11Tuh-e nin khe Moses nynh ccungccaw hae kha akawlan thyhte a hopya hae:12Jordan vaw he na zua kou oh te, ccungccaw hae kha hythuanaw pya khylan Gerizim Mua vawlan a thadyn cih hae paw tuh: Simeon, Levi, Judah, Issakhar, Josef, te Benjamin nynh thua hae.13Te thyalawnaw hanlan Ebal Mua vawlan a thadyn cih hae paw tuh: Reuben, Gad, Asher, Zebulun, Dan, te Naftali nynh thua hae.14Oute Levi phin hae nynh Israel hae balyn kha roi myarya ccae lante hynhte a thaesah cih hae:
15“Bawipaw hanlan anungsikuhpaw zohtuh khyhze laeekute raepaw khozi, kuih te raepaw uccaw kha raekuh zah a thuruhkuhpaw ccungccaw tuh thyalaw thuasah,” cite a thaesah cih hae. Ccungccaw balyn nynh, “Amen!” cite a leihru cih hae.
16“A nung thuasah, a paaw thuasah saw a tua leipaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.
17“A innpaw paw loori lungbing kha a nuepaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.
18“Mitzupaw kha laante lang a cciakhaepaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.
19“Ramccangpaw, ngawraw te nomaenung kha mang ahme pite sei a phusahpaw tuh thyalaw thua sah,” cite a thaesah cih hae. Ccungccaw balyn nynh, “Amen!” a ci cih hae.
20“A paaw zu kha a ikhaepaw tuh thyalaw thuasah, pawccecize a paaw zu kha a kalyngpya vae,” cite a thaesah cih hae. Ccungccaw balyn nynh, “Amen!” a ci cih hae.
21“Sarangpaw phinkhakheit kha a ikhaepaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.
22“A paaw ccanung thuasah, a nung ccanung athuapaw a ccianung kha a ikhaepaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.
23“A zu nung a ikhaepaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.24“A innpaw paw kha aruh lante a buapaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.
25“A sei leipaw ccungccaw chii kha luasah khylan pyaruh kha a lawkuhpaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae.
26“Hynh-e upadi bya hae hynh zui khyh zah a tynsah leipaw tuh thyalaw thuasah,” cite a thaesah cih hae. Ccungccaw balyn nynh, “Amen!” a ci cih hae. Kawngaenaw elang Hythuanaw (Lev 26.3-13; Deu 7.12-24)
1Atunin kaw kae pya oh paw a kawbya balyn kha zuakute na zui oh zah, Bawipaw nae Pachia bya kyalya kha na ngae oh zetuh, Bawipaw nae Pachia nynh laephi vaw e minphuin balyn luki ahangnaw khe ae nung cih oh;2Bawipaw nae Pachia bya kha na ngae oh zetuh, hynh-e hythuanaw balyn hynh nae tungvaw a thua cih zah na ccou cih oh:
3Khua kya hythua na mue cih oh, loo kya hythua na mue cih oh.
4Ccaaw hae te thuasah, nae laephi athae te thuasah, nae sahiin-awvaw ataw hae te thuasah, nae vaetua te nae tuutaw hae pungzaenaw te thuasah hythuapya na thua cih oh.
5Nae sua te nae sanlou nonnawpaw pakekhupaw kha hythuapya athua cih.
6Na tee vae oh ze hythuanaw na mue cih oh zah, na pou vae oh ze hythuanaw na mue cih oh.
7Nanning rawsete ae thonuakuh oh paw nae rhaw hae kha Bawipaw nynh nae malang khe rhaw a shungsah cih hae; nanning rawsete laanpi ccangkheit kyakhate oun thua cih hae zah, nae malang laanpi ccangsari kyakhate a ccue cih hae.8Nae ccung-inn kya te na cyi oh paw balyn kyakhe Bawipaw nynh hythuanaw kha nae tungvaw khe kaw a pya cih; Bawipaw nae Pachia nynh ae pya cih oh paw ram kyakhe hythua ae pya cih oh.9Bawipaw nae Pachia kawbya hae kha na zui oh zah amaw laanpi kya na ccia oh zetuh, bya ae kinpyaku oh thyhte, athyaapaw amaw ccungccaw lante Bawipaw nynh ae tynsah cih oh.10Bawipaw min liate ko na thua oh paw kha laephi ccungccaw balyn nynh a muih cih hae zah nanning kha ae rih cih oh.11Bawipaw nynh nanning pya khylan nae minpaaw hae kya bya a kinpyaku hae paw ram kyakhe sisua thuasah, nae ccaaw hae thuasah, nae sahiin-awvaw te nae laephi athae thuasah pataepi a hoipaw lang ae rae cih oh.12Nae ram kya amaw accyh te khuaarawsah khylan te na cyi oh paw balyn kya hythuapya khylan, Bawipaw nynh ahoirumpaw a sisuainn, vaawlang kha nae hanlan ae hungpah cih oh. Minphuin patae kha na koiisakuh cih oh, thuasalama nanning nynh minmin kya-e kha na koii lan khyh oh.13Atunin kaw kae pya oh paw Bawipaw nae Pachia kawbya hae hynh na ngae oh zah, zuakute na zui oh ze thuasah, te ccangpaw pachia hae kha zuite beik khylan atunin kaw kae pya oh paw bya balyn kyate voilang ranglang na maeku khyh oh ze thuasah Bawipaw nynh nanning kha lu lang ae rae cih oh zah, aleihmae lang ae rae lan khyh oh; ahang huanaw kya rou khe na um cih oh zah, ane huanaw kya na um lan khyh oh. Kawngae leipaw Raeringnaw Pyanaw (Lev 26.14-46)
15Thuasalama atunin kaw kae pya oh paw Bawipaw nae Pachia kawbya hae te phungbya hae kha zuakute zui leite amaw bya kha na ngae khyh oh zetuh, hynh-e thyalawnaw balyn hynh nae tungvaw ae thuanua cih oh:
16Nae khua kya thyalawnaw na tung cih oh, nae loo kya thyalawnaw na tung cih oh.
17Nae sua kya te sanlou nonnawpaw nae pakekhupaw kya thyalaw na thua cih oh.
18Nae ccaaw hae kha thuasah, nae laephi athae kha thuasah, nae vaetua phu te nae tuuphu ataw hae kha thuasah thyalaw athua cih hae.
19Na tee vae oh ze thyalawnaw na tung cih oh, he na pou vae oh ze thyalawnaw na tung cih oh.
20Kamaw kha nae vua oh zah, ahoy leipaw nae cyisahnaw keiccuze, ro na thua oh zah arangte na zo mawlaezung oh, cyi lan na zuaku oh paw atyn-are kyakhe vawsawnaw, bungzounaw, keisukeilae nungkunaw kha Bawipaw nynh nae tungvaw ae sawnua cih oh.21Nanning nynh ccou khylan na tee cih oh paw ram kyate ae maemih mawlaezung oh, Bawipaw nynh akaekuh thyapaw alepaw ccinaw kha ae kaesah cih oh.22Bawipaw nynh nanning kha ngoinaw, ngesaw lingpaw ccinaw, phinnaw khate thuasah, myarya sonaw te khuaakannaw thuasah, te khivae keiccu aku chinaw te aphi pou zah aku chinaw khate thuasah Bawipaw nynh vawsaw ae pya cih oh; tuh-e hae nynh na ro mawlaezung oh ae deehui cih oh.23Nae luki e vaawlui tuh sohin athua cih zah, nae zakaw e laephi tuh sivaw athua cih.24Bawipaw nynh nae ram kya arahpaw khuaa kha laenoi lang a tangsah cih zah, ro na thua mawlaezung oh vaawlui kyate vuiping kyalya kha nae tungvaw khe a ccawsah cih.
25Nae rhaw hae malang khe Bawipaw nynh rhaw kha ae shungsah cih oh; minmin kha rawsete laanpi ccangkheit kyate na ccianua cih oh zah, minmin malang khe laanpi ccangsari kyate na ccue cih oh. Nanning tuh laephi peenaw balyn kya bungzounaw a thuakhaepaw lang na tang cih oh.26Nae rhua tuh khivae kya-e pavaw miakaw te laephi kya-e sarangpaw hae hanlan looh athua cih hae zah, tuh-e hae a deetupaw lu kheit sanmah um lan khyh.27Bawipaw nynh na dansaku kho lei oh paw Izip ram e balyh, ving ccinaw, chii ccinaw te laethah khate vawsaw ae pya cih oh.28Bawipaw nynh ngaeenaw, mitmohnaw, te lungmuanaw khate vawsaw ae pya cih oh;29mitzupaw nynh mohnaw kya azahku hawte, nanning nynh ninthu pi khe na zahkuh cih oh, thuasalama nae laanpi kha na muihkuh kho lan khyh oh; nae laan nae sui ua lan khyh zah, ae bawm lan oh paw humhung sanmah a um lei lante luadenaw kha na tung cih oh.30Zu na dy oh zemah milae nynh ae ikhaepah cih oh. Inn na sakku oh zemah na umnah lan khyh oh. Misu khokhu na raeku oh zemah athae kha na ae lan khyh oh.31Nae vaetua kha nae mitmuihnaw khe a chia hae zemah a saw kha na ae lan khyh oh. Nae lann hae kha nae malang khe luadete a cciakhae cih hae zah, na muethui vae lan khyh oh. Nae tuu hae kha nae rhaw hae kalan pya athua cih hae zah ae bawm lan oh paw humhung sanmah um lan khyh.32Nae ccapaw hae te nae ccanung hae kha phang na do lya oh khe, milae kalan pya athua cih hae; minmin kha nae mit te ninlang na do cih oh, thuasalama ccangkhakheit cyi khonawpaw thawzung na hoi lan khyh oh.33Na ny lei oh paw ccungccaw hae nynh nae laephi kya-e athae te nae ryalaw mee balyn kha a ae cih hae; nanning tuh vawsaw pyanaw te sydenaw kha po na ing cih oh,34nae mit nynh a muih cih paw uccaw keiccuze nae lung amuakhaekuh cih.35Bawipaw nynh nae ccukharu te nae ccu kyakhe dansah kho athua leipaw myarya ccihpaw balyh hae kha ae hoisah cih oh zah, nae ccuphe kyate nae lukhy cia apazaekuh cih.36Nanning kha thuasah, na hangthungku oh paw siapharan kha thuasah nanning te nae minpaaw hae nynh na ny lei oh paw minphuin kalan khe Bawipaw nynh ae cciakhae cih oh zah, tuin kyakhe thing te thuasah, lung te thuasah raepaw ccangpaw pachia hae kha na beik cih oh.37Bawipaw nynh ae cciakhae cihnaw oh ccungccaw hae laku khe nanning tuh ri lan umpaw, tousenaw phungpaw lang, te dothatheihpaw lang na tang cih oh.
38Ccacii patae kha loo lang na cciakhae oh zemah tungkhipaw nynh a ae keiccuze beihtaraw kyalya kha na rue cih oh.39Misu khokhu hae kya misu na ccou cih oh zah na do-oih oh zemah ripaw nynh a ae keiccuze misutui kha na neih lan khyh oh zah athae kha na lokuh lan khyh oh.40Nae ram balyn kya oliv ku kha na hoi oh zemah nae oliv thae tuh akhuaku keiccuze oliv chitui kha na thuhkuh lan khyh oh.41Ccanung hae te ccapaw hae kha na saahku oh zemah rhaw hae nynh a kyng keiccu hae ze, nae kya-e thua lan khyh hae.42Nae thingku balyn te nae laephi athae balyn tuh tarue hae nynh a zoukhae cih hae.43Nanning laku e ramccang hae tuh nanning luki houhouh a hangku thung lya hae khe, nanning tuh houhouh na ccahbung cih oh.44Nanning nynh minmin kha koiisahku leite minmin nynh nanning kha ae koiisakuh cih oh; minmin tuh lu athua cih hae zah nanning tuh aleihmae na thua cih oh.
45Bawipaw nae Pachia nynh kaw ae pya oh paw kawbya hae te phunglang hae kha zuite amaw bya kha na ngae khyh keiccu oh ze, nanning tuh ro na thua mawlaezung oh, hynh-e thyalawnaw balyn nynh nanning kha deehuite ae phah cih oh zah nae tungvaw accah cih.46Tuh-e thyalawnaw hae tuh nanning te nae ciihan hae tungvaw kya muihsahnaw te ngaeangnaw lante zungzae a um cih.
47Atyn-are he na hoi oh te, lungtuanaw thinlung khate Bawipaw nae Pachia kha lungtuate na beik khyh oh,48tukeiccuze Bawipaw nynh ae sawnua cih oh paw nae rhaw hae kha vuelaw tuihaw te, boeining lawku leite, atyn-are ahobou lante rya na lawpah cih oh. Bawipaw nynh nanning kha ae ro mawlaezung oh sivaw taphu kha nae nging kya ae khang cih oh.49Nanning kha mosipi hawte uingnuaku khylan, mih bya na thae lei oh paw, akum tangpaw kha sawtua leite akum nopaw kha mah thaw a ccih leipaw, thinrianaw mitmae a hoipaw minphuin kha Bawipaw nynh asawnaw, laephi adianaw kyate ae konua cih oh.51Nanning na ro mawlaezung oh, tuh-e minphuin nynh nae sahiin-awvaw ataw hae te nae laephi athae kha a ae cih, nanning kha ae ro mawlaezung oh, ccathae, misutui te chitui kha thuasah, nae vaetua pungzaenaw te nae tuu ano hae paw kha thuasah ae cciatawpah lan khyh oh.52Nae ram balyn kya umpaw, na doliaku oh paw, ahangpaw te atynpaw nae lungrua hae kha a ting mawlaezung hae, nae khua balyn kha ae koihlu cih oh; Bawipaw nae Pachia nynh ae pya oh paw ram balyn kya umpaw nae khua balyn kha ae koihlu cih oh.53Nae rhaw hae nynh ae koihlu oh zah vawsawnaw kha he ae pya oh tuh, Bawipaw nae Pachia nynh ae pya oh paw, na saahku oh paw nae ccanung hae te nae ccapaw hae saw kha na ae cih oh.54Nanning laku e ozia anepaw te asung-epaw pise nynh a uno hae, a pompaw a zu te nyathya a hiinhypaw a ccaaw hae tungvaw hysah lan khyh zah,55aning nynh a ae cciamangpaw a ccaaw hae saw kha heize ccapyh san pyabua lan khyh hae, pawccecize nae rhaw hae nynh nae khua balyn kha koihlute vawsaw ae pya cih keiccu oh ze, amaw hanlan pawpaw mah umlae vae khyh.56Nanning lakuze myaryamaw a ozia ne zah a sung-e keiccuze a ccuphe te laephi a sy ngan leipaw, ozia anepaw te asung-epaw nopi nynh a pompaw a vawpaw tungvaw thuasah, a ccanung tungvaw thuasah, a ccapaw tungvaw thuasah looh kha hysah lan khyh zah,57nae khua hae kha rhaw nynh koihlu hae zah, ae lanpaw pawpaw mah a um vae khyh keiccuze a saahpaw a ccaaw hae te a phae te a phae laku kyate a poupaw a lang kha heize aruh lante a ae cih.
58Hynh-e aphu-epaw te ri lan umpaw min, Bawipaw nae Pachia rhaw kha ri leite, hynh-e ccauh kya azeikuhpaw hynh-e upadi kya-e bya hae balyn hynh zuakute na zui khyh oh zetuh,59Bawipaw nynh naemaw te nae ciihan hae tungvaw kya le zah zungzae teingpaw vawsawnaw, le zah zungzae teingpaw ccinaw kha a ccawsah cih.60Na ri oh paw Izip ram e ccinaw balyn kha nae tungvaw bua a thuasah cih zah, tuh-e ccinaw hae nynh nanning kya a bahkuh cih hae.61E upadi ccauh kya azeikuh leipaw ccangpaw ccinaw te vawsawnaw miakaw kha nanning ro na thua mawlaezung oh, Bawipaw nynh nae tungvaw a ccawsah cih.62Vaawlui e awsi zeih na la lung oh zemah, Bawipaw nae Pachia bya kha na ngae khyh keiccu oh ze, beihtaraw kyalya nynh na um vae cih oh.63Te Bawipaw nynh hoynaw ae raepyanaw oh kya te ae pungzaesahnaw oh kya a lungtuakhaeku hawte, nanning rosahnaw kya te zosahnaw kya Bawipaw tuh a lungtuakhaekuh cih; ccou khylan na teenua oh paw ram kyate nanning kha ae maemih cih oh.64Bawipaw nynh nanning kha laephi voikheit lang te voikheit lang cia ccungccaw balyn laku kya ae pazaesakuh cih oh; tuin kyakhe nanning te nae minpaaw hae nynh na la ny boi lei oh paw, thing te thuasah, lung te thuasah raepaw ccangpaw pachia hae kha na beik cih oh.65Tuh-e minphuin hae laku kya nae thawdang lan khyh zah, nae ccuphe hanlan haeungnaw mah um lan khyh. Bawipaw nynh lungriathaenaw, mit thawzyanaw te lungthawthangnaw kha ae pya cih oh.66Nae hiinnaw tuh thinphangnaw te a um zungzae cih; nae hiinnaw tuh aamahkhan um leite khuazi khuadae rikawte na um cih oh.67Nae thinlung nynh a ripaw te nae mit nynh a muihpaw keiccuze, awkhua ccyh vae ze, “Zete myng thua ravo nyn,” na ci cih oh zah, zete ccyh vae ze, “Awkhua myng thua ravo nyn,” na ci cih oh.68Na muihthui vae lan khyh oh cite bya kae kinpyaku oh paw laanpi khate Bawipaw nynh nanning kha Izip ram lang sanphalung te ae kikhae cih oh; tuin kyakhe naemaw te naemaw kha seenung te seepaw lante nae rhaw hae kalan na zuakuh cih oh, thuasalama a retupaw um lan khyh.
1Hynh-e hae hynh Bawipaw nynh Israel hae ryte Horeb kya a raepaw byakinnaw apiaze, Israel hae ryte Moab ram kya byakinnaw rae khylan Bawipaw nynh Moses kalan kaw a pyapaw byakinnaw kya-e bya hae nynh thua. Moab kya Byakinnaw Thawsahnaw
2Moses nynh Israel hae balyn kha pum hae zah hynhte a hopya hae: Bawipaw nynh Izip ram nae mitmuihnaw kya Faro tungvaw thuasah, a see hae balyn kya thuasah, a ram balyn kya thuasah,3nae mit nynh muihpaw myarya lepaw syntawnaw hae, muihsahnaw hae te myarya lepaw ngaeangnaw hae balyn kha phe na muih vae oh.4Thuasalama thaethya nawlan thinlung, muih nawlan mit, thae nawlan nakaring kha Bawipaw nynh atunin ae pya vae khyh oh.5Nanning kha ramkaw kya kum sung pali lungkhu kae cciakhae vae oh. Nae tungvaw e boeining tuh pue khyh zah, nae ccu kya-e phanah mah pue khyh;6Kae tuh Bawipaw nae Pachia nynh ka thua cipaw na ny nawlan oh, sanlou kha na ae khyh oh zah misutui te ruithyapaw niapaw kha mah na neih khyh oh.7Nanning nynh hynh-e hmin kya he na thua oh te, Heshbon siapharan Sihon te Bashan siapharan Og nynh aening kha rhawtuk khylan oun pounua hae zemah aening nynh phe ah tae oh.8Minmin ram kha ah lah oh zah Reuben phin hae, Gad phin hae te Manasseh phin angankuh kalan khe rho lang ah pya oh.9Tukeiccuze na cyi oh paw atyn-are kya nae laan nae sui a ua nawlan, hynh-e byakinnaw kya-e bya hae hynh zuakute zui oh.
10Atunin nanning tuh nae balynte, nae phin cciakhaetu hae, nae piccan hae, nae bawi hae, Israel pise balyn,11nae ccaaw hae, nae nopi hae, nae ryahmin kya umpaw ramccang hae, nae thing a tya hae paw te nae tui a the hae paw tuh Bawipaw nae Pachia malang khe na thadyn oh,12tuh-e na thadyn oh paw tuh Bawipaw nae Pachia nynh nanning ryte atunin bya a kinkupaw, Bawipaw nae Pachia kya-e byakinnaw lungkhu lang tee khylan nynh thua;13oute nanning kya te nae minpaaw hae Abraham, Isak te Jakob kya bya a la kinku hawte, nanning hynh a ccungccaw lang tynsah khylan te amaw hynh nae Pachia lang tang khylan nynh thua.14E byakinnaw hynh Bawipaw ah Pachia malang kaening ryte hein kya atunin na thadyn oh paw nanning kyalya te raepaw thua leite,15atunin aening kya a umbua lei hae paw ryte mah raepaw nynh thua.16Izip ram kya pawtemou ah um oh cipaw te pawtemou minphuin hae laku kya po ah ccia oh cipaw kha na ny oh.17Minmin kya umpaw anungsikuhpaw mih uccaw hae, thing te lung te ngun te sui te raekuhpaw athupaw zohtuh hae kha na muih vae oh.18Hynh-e minphuin hae kya-e pachia hae kha beik khylan Bawipaw ah Pachia kyate a thinlung a maeleihkuh vae paw pise thuasah, nopi thuasah, innbyn thuasah, minphuin thuasah nanning laku a um kho. Nanning laku kya sy a hoipaw te akhahpaw tharui apopaw a um kho.19Hynh-e byakinnaw bya kha a thae hae paw balyn nynh mih thinlung kyakhe, “Ka lungkhung thyhte ka ccia zemah ka khyn mamin,” cite a tuaku hae. (Tuh-e nynh nanning ahoypaw te ahoy leipaw balyn kha ae roh cih oh),20Bawipaw nynh aning kha ngaethya lan khyh, Bawipaw thinrianaw te eiungnaw tuh aning tungvaw maeekhuh hawte akhuh cih. Hynh-e ccauh kya azeikuhpaw thyalawnaw balyn hynh a tungvaw accah cih zah, Bawipaw nynh a min kha vaawlui zakaw kyate a thee cih.21Hynh-e upadi ccauh kya zeikuhpaw byakinnaw kya-e thyalawnaw balyn thyhte, Bawipaw nynh aning kha Israel phin balyn kyate vawsawnaw pya khylan a phia cih.22Malang she kya, nanning nukhute oun pui cih hae paw nae ccaaw hae te asawnaw ram kyate oun thua hae paw ramccang hae nynh hynh-e ram a ronaw te Bawipaw nynh a ingsah hae paw vawsawnaw kha a muih cih hae,23tuh-e ram balyn tuh kemaee te loi te karae u zah ccacii ccou leinaw, athae thae leinaw te aku po leinaw nynh thua; Bawipaw nynh a thinria zah a ropaw Sodom,
Gomorrah, Admah te Zeboiim ronaw hawte nynh thua.24minmin te minphuin balyn nynh, “E ram kya Bawipaw nynh pawcce hynhte a cyi? E myarya lepaw thinrianaw hynh paw keiccu mou?” cite mih ngaeang athua cih.25Tuh-e ccungccaw hae nynh, “Izip ram kyate he a poukhae hae te, mih minpaaw hae Pachia, Bawipaw nynh minmin ryte a la raepaw byakinnaw kha a vua keiccu hae nynh thua.26Minmin nynh maeleihkuh hae zah a la ny lei hae paw te Bawipaw nynh a khee hae paw ccangpaw pachia hae kha a beik hae;27tukeiccuze Bawipaw thinrianaw nynh tuh-e ram kha maee lang ruanua zah, hynh-e ccauh kya azeikuhpaw thyalawnaw miakaw kha tuh-e ram kya a thuasah.28Thinrianaw, thinkhykunaw te myarya lepaw bungpawnaw khate Bawipaw nynh minmin kha mih ram kyate dee hae zah, atu acyiku hawte ccangpaw ram lungkhu lang a vua hae,” cite a ho cih hae.29Thuruhpaw uccaw hae tuh Bawipaw ah Pachia kya-e nynh thua, thuasalama hynh-e upadi kya-e bya hae balyn hynh zui khylan phy athuapaw uccaw hae tuh zungzaete aening te ah ccaaw hae kya-e nynh thua. Pachia kya-e Lungzinaw
1Nae malang ka nungpaw hynh-e uccaw hae balyn, hythuanaw te thyalawnaw hae hynh nae tungvaw he a cyihkuh te, Bawipaw nae Pachia nynh ae deenaw oh minphuin hae laku khe tuh-e tuh na nyhthui oh zah,2Bawipaw nae Pachia kalan maeleihkute, atunin kaw kae pya oh thyhte, nanning te nae ccaaw hae nynh nae thinlung balyn te, nae tuanaw balyn te amaw bya kha na ngae oh zetuh,3Bawipaw nae Pachia nynh hoirumnaw kha pyathuite, thaw ae ccih cih oh zah, Bawipaw nae Pachia nynh ae pazaesahkunaw oh ccungccaw balyn kyate ae sueluathui cih oh.4Laephi adianaw cia dee na thua oh zemah, Bawipaw nae Pachia nynh tuin kyate ae sueluathui cih oh zah, tuin kyate ae kikhae thui cih oh.5Nae minpaaw hae nynh la ccou hae paw ram lungkhu langkhe Bawipaw nae Pachia nynh ae cciakhae cih oh zah, tuh-e ram tuh na ccou cih oh; nae minpaaw hae laeze a hoi huapaw te a lung huapaw lang ae rae cih oh.
6Tuhpiaze, nanning hiin khylan Bawipaw nae Pachia kha nae thinlung balyn te, nae tuanaw balyn te na sungsah oh ccaw cite, Bawipaw nae Pachia nynh nae thinlung te nae ciihan hae thinlung vingdung kha a aw cih.7Bawipaw nae Pachia nynh hynh-e thyalawnaw balyn hynh nae rhaw hae tungvaw te nanning vawsaw ae pya oh paw tungvaw kyakhe a ccawsah cih.8Oute atunin kaw kae pya oh paw a kawbya balyn hynh zuite Bawipaw bya kha na ngaethui cih oh,9te Bawipaw nae Pachia nynh na cyi oh paw balyn kya thuasah, nae ccaaw hae kya thuasah, nae sahiin taw hae kya thuasah, nae laephi athae hae kya thuasah myarya a hoirumpaw lang ae rae cih oh. Nae thinlung balyn te, nae tuanaw balyn te Bawipaw nae Pachia kalan na maeleihkuh oh zah, hynh-e upadi ccauh kya azeikuhpaw a kawbya hae te a phunglang hae hynh zuite Bawipaw nae Pachia bya kha na ngae oh zetuh, Bawipaw nynh nae minpaaw hae hoirumnaw kya a lungrythua hawte, nae hoirumnaw kya a lungrythua cih. Hiinnaw Poku lan Hyynaw
11Atunin kaw kae pya oh paw hynh-e kawbya hynh nae hanlan myaryamaw arupaw te myaryamaw asawkuhpaw thua khyh.12“Kawbya kha ah thae oh zah ah zui nawlan oh, hum nynh mou aening hanlan vaawlui lang a kae cih zah oun lawpah cih?” cite na ho lan oh ciate kawbya tuh vaawlui kya um khyh.13“Kawbya kha ah thae oh zah ah zui nawlan oh, hum nynh mou aening hanlan rili khuraw lang oun zuapah cih zah, oun lawpah cih?” cite na ho lan oh ciate kawbya tuh rili khuraw lang um khyh.14Bya tuh nanning te myarya anaekuh; nanning nynh zui khylan nae mung kya te nae thinlung kya nynh a um.
15Dotua oh, hiinnaw te hoirumnaw, chinaw te vawsawnaw hynh atunin nae malang ka nung vae.16Bawipaw nae Pachia kha sungsahte, amaw laanpi kha na zui oh zah, a kawbya hae, a phunglang hae te a phungzae hae kha zuite atunin kaw kae pya oh paw Bawipaw nae Pachia kawbya hae hynh na zui oh zetuh, na hiin cih oh zah na pungzae cih oh, te ccou khylan na tee cih oh paw ram kya Bawipaw nae Pachia nynh hythua ae pya cih oh.17Thuasalama nae thinlung tuh paleihkute na thae ry khyh oh zah, ccangpaw pachia hae kha bakhungnuate beik khylan ae cciakhaesei oh zetuh,18na roh cih oh cite atunin kae hopya oh; teenuate ccou khylan Jordan vaw na zuanua cih oh paw ram kya nae hiinshe sae lan khyh.19Hiinnaw te chinaw, hythuanaw te thyalawnaw kha nanning malang ka nung vae cipaw atunin ccaekia lang vaaw te lae hynh ka ko hae.20Naemaw te nae ccaaw hae nynh Bawipaw nae Pachia kha sungsahte, a bya na ngae oh zah amaw kha tynkaring lan kyngkute na hiin ccaw oh, hiinnaw kha pokuh oh; pawccecize tuh-e tuh nanning hanlan hiinnaw te hiinshe saenaw nynh thua, tuhteze nynh Bawipaw nynh nae minpaaw hae Abraham, Isak te Jakob kya pya lan bya a kinpyaku hae paw ram kya na hiin cih oh. Moses Ccelang Joshua (Nam 27.12-23)
1Moses nynh e bya hae balyn hynh Israel hae balyn kyakhe he a ho koute,2minmin kha hynhte a hopya hae: “Kae hynh atu za kheit kum kuin ka cih vae. Ka pou kho vae khyh zah ka tee kho vae khyh, Bawipaw nynh kae kha, ‘E Jordan vaw hynh na zua lan khyh,’ yn cipya vae.3Bawipaw nae Pachia ccaccei nynh nae malang a cceih cih. Aning nynh hynh-e minphuin hae hynh nanning malang a roh cih hae zah, mih ram kha na luade cih oh. Bawipaw nynh bya a kinku vae hawte, Joshua nynh mah nae malang a cceih cih.4Bawipaw nynh Amor siapharan hae Sihon te Og thuasah, mih ram thuasah a ro lyaze, mih tungvaw a la cyi hawte minmin tungvaw a cyih cih.5Bawipaw nynh minmin kha nanning kalan ae pya cih oh zah, kae pya oh paw kawbya balyn thyhte mih tungvaw na cyih cih oh.6Nae thawsae sah lah, nae rawthung sah; rih nan oh lah, thyngkuh nan oh, pawccecize nanning ryte a cceihpaw tuh Bawipaw nae Pachia nynh thua; nanning kha ae cciataw lan khyh oh zah ae vua lan khyh oh,” a cipya hae.
7Oute Israel hae balyn nynh a muihnaw hae khe, Moses nynh Joshua kha ko zah hynhte a hopya: “Na thawsae sah lah, na rawthung sah, pawccecize nang tuh Bawipaw nynh hynh-e ccungccaw hae kha pya lan mih minpaaw hae kya bya a kinpyaku hae paw ram lungkhu lang minmin ryte a cceih cih paw nynh na thua; ram tuh minmin kha na ccousah cih hae.8Na malang a cceihpaw tuh Bawipaw nynh thua. Nang kha ae umkhae cih; nang kha ae cciataw lan khyh zah ae vua lan khyh. Rih nan lah, na lungroh nan sah,” a cipya. Kum Sarinaw takyh Upadi Rianaw
9Oute Moses nynh hynh-e upadi hynh zei zah, Bawipaw kya-e byakin thingkua a puihtu hae Levi ccapaw hae ranpibawi hae te Israel piccan hae balyn kha a pya hae.10Moses nynh minmin kha, “Kum sarinaw kum takyh, accyh khyapaw ngaethyakunaw kum, bu poi tua lyakhe,11Bawipaw nae Pachia nynh a po cih paw hmin kyakhe Israel balyn tuh amaw malang langku khylan he a thua hae te, e upadi hynh Israel balyn malang a thaenaw hae khe na riapah cih hae.12Pise hae, nopi hae, imua hae te nae khua hae kya a um hae paw ramccang hae nynh a thae cih hae zah, Bawipaw nae Pachia tungvaw rithyanaw kha a ccangkuh cih hae zah, hynh-e upadi kya-e bya hae balyn hynh zuakute a zui ccaw hae, ccungccaw hae kha pum hae,13tuhteze nynh hynh-e upadi a nyh loh leipaw mih ccaaw hae nynh a thae cih hae zah, ccou khylan Jordan vaw na zuanua cih oh paw ram kya na hiin lungkhu oh balyn, Bawipaw nae Pachia tungvaw rithyanaw kha a ccangkuh cih hae,” cite kaw a pya hae.
14Bawipaw nynh Moses kha, “Na chinaw ccyh anae vae; Joshua kha ryalaw ka pya ccaw, amaw kha ko lah, tungkunaw bu kyakhe um oh,” a cipya. Tukeiccuze Moses te Joshua nynh cceih hae zah tungkunaw bu kya a um hae,15te Bawipaw tuh bu kya maeking tung kyakhe yn langkuh; maeking tung tuh bu thuakaw kya a thadyn.
16Bawipaw nynh Moses kha, “Aro mawze nang tuh na minpaaw hae ryte na ihkheih vae cih oh. Tetuh hynh-e ccungccaw hae nynh a ccianua hae paw ram kya-e pachia hae, minmin laku kya umpaw ramccang hae kya-e pachia hae kyakhe mimaw te mimaw ohhuakunaw kha a tho vae cih hae; minmin ryte ka raepaw ka byakinnaw kha rote kae kha yn vua cih hae.17Tuh-e nin khe minmin tungvaw ka thinrianaw tuh maee lang arua cih. Minmin kha ka vua cih hae zah minmin kyate ka mitmae kha ka retawkuh cih hae; minmin tuh kyng azoipaw saw hae lang a tang cih hae zah, hoyleinaw te vawsawnaw patae tuh minmin tungvaw accah cih. Tuin nin khe minmin nynh, ‘Ah Pachia tuh aening laku kya a um khyh keiccuze hynh-e vawsawnaw hae hynh aening tungvaw accawpaw thua khyh tou?’ cite a hokuh cih hae.18Ccangpaw pachia hae kalan maekute a cyi hae paw hoyleinaw balyn keiccuze ka mitmae kha ka retawkuh ccaccing cih hae.19Tukeiccuze atu hynh-e hlaw hynh zei lah, Israel hae kha ccangpah hae; e hlaw hynh Israel hae konglang te ka ccaekia lang a tang ccaw, mih khalang kya nungpah hae.20Pawccecize mih minpaaw hae kya bya ka kinpyaku hae paw, khoilutui te mateitui aluanaw ram lungkhu lang ka teekhae hae zah, phe byn lan ae hae zah he a tho hae te, kae kha saryate ka byakinnaw kha a roh cih hae zah ccangpaw pachia hae kalan maeleihkute a beik cih hae.21Te ri lan umpaw vawsawnaw patae tuh mih tungvaw he accah te, hlaw tuh mih ciihan hae khalang kyate a zo khyh keiccuze hynh-e hlaw nynh ccaekia lante minmin kha hawiliate a rawse cih hae. Pawccecize bya ka kinpyaku hae paw ram lungkhu lang ka teekhae maw hae, atumaw heize pawmou cyi lan a paccynku hae cipaw phe ka ny,” a cipya.22Tuh nin ccaccei khe Moses nynh hynh-e hlaw hynh zei zah Israel hae kha a ccangpya hae.
23Oute Bawipaw nynh Nun ccapaw Joshua kha ryalaw pya zah, “Na thawsae sah lah, na rawthung sah, bya ka kinpyaku hae paw ram lungkhu lang Israel hae kha na cciakhae cih hae; kae tuh na kya ka um cih,” a cipya.
24Moses nynh hynh-e upadi kya-e bya hae hynh ccauh kya phe thang lan a zei koute,25Moses nynh Bawipaw kya-e byakin thingkua a puihtu hae Levi phin hae kha kawpya hae zah,26“E upadi ccauh hynh lah oh lah, Bawipaw nae Pachia kya-e byakin thingkua pe khe nung oh; nanning konglang te ccaekia lang a um cih.27Pawccecize nanning hynh pawcih baban kawngae lei hae paw te lungkhung hae paw cipaw hoyte ka ny vae. Nanning laku ka hiin lya heize Bawipaw a dou hae paw na thua oh ze, ka chih koute thytuh hohcihmou houh na dou vae cih oh!28Nae phin kya-e piccan balyn te nae bawi hae nynh a thaenaw hae khe hynh-e bya hae hynh ka hopah hae zah, minmin konglangte vaaw te lae kha ccaekia lang ka ko ccaw hae, minmin kha kamaw kalan yn pumtua oh.29Pawccecize ka chih koute kaw kae pya oh paw laanpi kyate ccanglang na maekuh cih oh zah, hoyleinaw kha na rae mamin cih oh cipaw phe ka ny. Malang ccyh kyaze Bawipaw muihnaw kya hoyleinaw kha na rae oh zah, nae kuih ryalawnaw khate Bawipaw kha a thin na riasah keiccu oh ze, vawsawnaw nynh ae thuanua cih oh,” a cipya hae. Moses Hlaw
30Oute Moses nynh hynh-e hlaw kya-e bya hae hynh Israel zapi balyn a thaenaw hae khe hynhte phe thang lan a hopya hae:1Pou vaawlui hae,nae nakaring khaoun tuaku tua oh, bya ka ho cih;laephi nynh ka khalang kya-ebya hae hynh thaesah.2Ka ccangpyanaw tuhkhua hawte rah sah lah,ka bya tuh dangdy hawte ccahsah;lonua vawlan khe khuaaratui hawte,anopaw aku hae vawlan khepharyphary rahpawkhuaa hawte thua vae sah.3Pawccecize Bawipaw min khaa thaesah cih hae;ah Pachia a lesaenaw khathehoysah oh!4Lungpi athuapaw Pachia,a ryalawnaw tuh ccing zah,a laanpi hae balyn tuh akyh.Alungzipaw Pachia,a hyn leipaw, ahmepaw tea dingpaw nynh thua;5tuhzemah arohpaw a ccaaw hae nynha tungvaw ahme lei lante a rae vae hae,laanpi a me hae paw tea thyaruh hae paw minphuin nynhthua hae.6Pou mingaee hae te tuanawhoi leipaw ccungccaw hae,tuhcite tou Bawipaw khana pyaru cih oh?Aning tuh nanning langae tangsah oh paw nae paaw,ae raetu oh paw te ae tynsah oh pawthua khyh tou?7Langmaw e nin hae kha liathuitua,alia vae paw kum hynhsepi kha tuatua;na paaw kha khia lah,nang kha ae nysah cih;na piccan hae kha khia hae lah,ae hopah cih hae.8Ahang Huaccepaw nynhminphuin hae khamih rho nee hae zah,ccungccaw ccapaw hae khahe a phia hae te,Israel hae milu alung azya thyhte,ccungccaw hae ramri kha a ia hae;9Bawipaw nynh a ccoupaw tuhamaw ccungccaw hae kha nynh thua,Jakob tuh amaw nynha ccoupaw rho nynh thua.10Aning nynh Jakob khalaesia ram kya,khivae roi accaenaw ccungkia leipawram kyakhe a muih;Jakob kha a thungkhaw, a do-oih,a mitlungdy hawte phang a rin.11Mosipi nynh a bu kha hy zah,a taw luki khe a zou bungthung;a sake kha daw zah,a taw hae kha lawte,a sake khate ahangnaw kyaa zoukhae hae hawte,12Bawipaw makhae nynhJakob kha a cciakhae; amaw kyaramccang pachia um khyh.13Laephi ahangnawhmin hae kyakhe nung zah,loo kyate apoupaw khateaepaw a dang;Lungpi kya-e khoitui khate thuasah,rihlung kya-e chitui khate thuasahamaw kha a do-oih,14Vaetua phu kya-esamateitui ahaawpaw tetuuphu kya-e mateitui,tuutaw tho te tuutepaw tho,Bashan ram e tangnuapaw hae temiaatepaw hae khaahoypaw chanvuih ryte na ae zah,misu thae chiise kha na nia.15Jakob tuh phe byn lan a ae;Jeshurun tuh yn thobaleih zaha ccu te a sy.Na tho, na ngesaw abeih,na ngesaw anae!Tetuh a raetupaw Pachia kha vua zah,a khumnaw Lungpi khapawlangria khyh.16Minmin nynh ramccangpachia hae khate amaw khaeiungnaw a hoisah hae,anungsikuhpaw uccaw hae khatea thinriasah hae.17Minmin nynh Pachia kalanthua leite, raerangsaro hae kalan,nae minpaaw hae nynha ri lei hae paw,athaw oun thua hae paw,a ny lei hae paw pachia hae kalansi a law hae.18Nang lang ae tangsahpawLungpi kha pawlang na ria khyh;nang ae saahtupawPachia kha na ning.19Tuh-e tuh Bawipaw nynhhe a muih te, a thinria zah,a ccapaw hae te a ccanung hae khaa vua hae.20Aning nynh, “Minmin kyateka mitmae ka retawkuh cih hae,Minmin athangnaw hae tuhpawmou athua cih cipaw ka do cih;pawccecize minmin tuha ccouseikuh hae pawciihan nynh thua hae,zyn lan um leipawccaaw hae nynh thua hae.21Minmin nynh pachiaathua leipaw khateeiungnaw yn hoisah hae,mih zohtuh hae khateka thin yn riasah hae.Tukeiccuze minphuinathua leipaw khateeiungnaw ka hoisah cih hae,angaeepaw minphuin khatemih thin ka riasah cih hae.22Pawccecize ka thinrianaw nynhmaee kha ruasah zah,Akhunaw michi khuaSheol lang cia a u;laephi te laephi nynha pousahpaw kha u zah,mua aleihpaw hae kha a u.23Mih tungvaw kya ronaw khaka pum cih,minmin rawsete ka the hae khaka mangnua cih hae:24Ccakannaw a teing cih hae,asopaw te ukunaw,myarya ccihpaw ccinaw khatea chih cih hae.Sarepaw hae haw kha thuasah,vuiping kya avawpaw sya hoi hae paw kha thuasahka sawnua cih hae.25Laanpi kyaze thaloi nynha chisah cih hae zah,inn lungkhu kyazebungzou thinphangnaw nynha chisah cih hae.pawccecize ccangvae teliaccaw thuasah,matei zu ungpaw imua te taw zaha sang phe paw vae paw thuasaha chih kalang cih hae.26Minmin kha phiariphiarae nung lan teccungccaw hae nynha nynaw hae kyakhatezosah lan ka tuaku;27thuasalama mih rhaw hae nynha lysahku lan hae paw khaka thinphang,pawccecize mih rhaw hae nynha thaesei cih hae zah,‘Aening kuih nynh minmin khaa tae hae;hynh-e balyn a cyihtu tuhBawipaw thua khyh,’ citea ho cih hae,” a ci.28Minmin tuh tuanaw a hoi lei hae pawminphuin nynh thua hae;a nyhthya lei hae paw nynhthua hae.29A haw hae paw athua hae ze,e hynh a nyhthya cih hae;athangnaw ccyh kyapawmou acyihkuh cihcipaw a nyh cih hae.30Mih Lungpi nynh minmin khazua hae zah, Bawipaw nynhrhaw a shungsah khyh hae ze,lu kheit nynh ccungccawthong kheit khapawtemou a dee kho cih hae zah,lu ning nynh thong haw khapawtemou a ccuesah kho cih hae?31Mih lungpi tuh aening Lungpi telokuh ccaccing khyh;aening rhaw hae tuhmingaee hae nynh thua hae.32Minmin kya-e misu akaran hae tuhSodom kya-e misu akaran kyate thuasah,Gomorrah misu khokhu kyate thuasahoun thua hae paw nynh thua;mih misu thae hae tuhsy a hoipaw misu thae hae nynh thua,mih misu ange hae tuhakhah hae;33Mih misutui tuh hupaw sy,myarya ccihpawhuparepaw sy nynh thua.34E hynh kamaw kyaka ccakhung zah,ka sisua bawng kya minkhiatea umpaw thua khyh tou?35Liarunaw te amee sangrunaw tuhkamaw kya-e nynh thua,pawccecize accyh zaw temih ccu tuh athei cih;mih vawsawnaw nin tuh nae vae zah,minmin ronaw tuh arangte yn thua.36Mih huhan tuh thang vae zah,heedepaw ccungccaw tealuepaw ccungccaw um vae khyh haecipaw he a nyh te,Bawipaw nynh a see hae tungvawthawccinaw a hoi cih zah,a ccungccaw hae khathyaa a ccousah ccaccing cih hae.37Oute aning nynh: Mih pachia hae,a khynnaw hae paw lungpi tuhteimou a um hae?38Hum nynh mou si a lawnaw hae pawatho kha ae zah,si a lawnaw hae pawmisutui kha a neih?Tuh-e hae nynh thokuh hae sah lah,ae bawm oh sah,minmin tuh nanning thungkhawtuthua hae sah!
39Atu nytua oh,kamaw rou hynh nynhPachia ka thua;Kamaw laelanccangpaw pachia um khyh.Ka theih zah ka hiinsah;vaemaw ka muesah zahka dansah; ka kuih kyatehumhung nynh mahyn lua kho khyh.40Pawccecize ka kuih khavaawlang ka hangthung zah,hynhcite bya ka kinku:Zungzae hiinpaw ka thua thyhawte,41Dalahdalah akpaw ka thaloi khahe ka taw te, ka kuih nynhbyapianaw kha ccavyng a kyng;Kae yn rhawtu hae paw tungvawliarunaw ka rae cih zah,yn hua hae paw khaka liaru cih hae.42A sang saepaw rhaw lu kyate,chia athua hae paw tekyng athua hae paw chiise khateKa the hae khachiise ka ruisah cih hae zah,ka thaloi nynh saw a ae cih.
43Pou minphuin hae,a ccungccaw hae khathehoysah oh,pachia hae nanning balyn,amaw kha beik oh!Pawccecize a ccaaw haechiise phu kha a lah cih zah,a rhaw hae tungvaw kyaliarunaw a rae cih;amaw a hua hae paw khaa liaru cih hae zah,a ccungccaw hae hanlanram kha a thyaasah cih.
44Moses tuh yn thua zah Nun ccapaw Joshua ryte hynh-e hlaw kya-e bya balyn hynh ccungccaw hae a thaenaw hae kyakhe a hopya hae.45Moses nynh hynh-e bya balyn kha Israel hae balyn kya a hopah kou hae te,46minmin kha, “Atunin nanning te arawsekuhte ccaekia kae khanpyaku oh paw hynh-e bya balyn hynh nae thinlung kya ccykekuh oh; e kawbya kya-e bya balyn hynh nae ccaaw hae nynh zuakute a zui nawlan hae, minmin kha kawbya hawte pya oh.47E hynh nanning hanlan huatawpaw uccaw thua khyh, thuasalama nae hiinnaw ccaccing nynh thua; hynh-e liate ccou khylan Jordan vaw na zuanua cih oh paw ram kya nae she asae cih,” a cipya hae. Moses Chinaw Hotynaw
48Tuh-e nin ccaccei khe Bawipaw nynh Moses kha akawlan e thyhte a hopya:49“Jeriko khua araw lang, Moab ram lungkhu Abarim muazung hae kya umpaw Nebo Mua lang kaethung lah, Israel hae nynh a pee lan hae ka pya cih hae paw Kanaan ram kha dotua;50na upaw Aaron tuh Hor Mua vawlan chih zah a puizia hae kalan sueluabua athua hawte, na kaepaw mua vawlan khe na chih cih zah, na puizia hae kalan sueluabua na thua cih;51pawccecize nanning parouh mawte Zin ramkaw, Meribah-kadesh tui kya Israel hae laku khe ka tungvaw zynnaw kha na rosah zah, Israel hae laku kya athyaapaw lante ka saw nae tua khyh oh.52Israel hae ka pya cih hae paw ram kha asawnaw kyate na muih zemah, khah-e ram lungkhu lang na tee lan khyh,” a cipya. Israel hae Nyathya Moses Hythua Pyanaw
1E hynh Pachia ccungccapaw Moses nynh a chi mawkhe Israel hae hythua a pya hae paw nynh thua.2Moses nynh:“Bawipaw tuh Sinai mua kyateyn thua zah,Seir kyate aening tungvawkhuanin lang yn thua;Paran Mua kyate yn aw.Amaw ryte mithyaathong haw a umbua hae;A ranglang kuih kyaaruapaw maee a ccyng.3A ccungccaw hae khaa sungsah ccaccing hae;a mithyaa hae balyn tuha kuih kya a um hae;tukeiccuze amaw kya-eccangpyanaw kha lawkute,a ccunoh kha a zui hae4Moses nynh upadi khaJakob phin zapi hae khapee lan yn pya.5Ccungccaw cciakhaetu hae ryteIsrael phin balyn tuhpynkheihlan he a sueluakuh hae te,Bawipaw tuh Jeshurun kyasiapharan lang a tang.6Reuben tuh a ccungccaw azya zemah,hiinsah lah, chih nan sah,” a ci.
7Te Judah kong kha:“Pou Bawipaw , Judah roi khangaepya tua,a ccungccaw hae kalancciakhae tua;amaw hanlan a kuih khathawsaesah tua,a rhaw hae dounaw kyabawmtu thuatua,” cite a ho.
8Te Levi kong kha:“Na Thummim te na Urim khaMassah kya na syntawtuapaw,Meribah tui kya na rawsepaw,alungzipaw na ccungccapawLevi kalan pyatua;9tuh-e ccungccapaw nynh,‘Minmin kha pawlangka ria khyh hae,’ citea nung te a paaw kong kha a ho;a puizia hae kha peki khyh zah,a ccaaw hae kha nyh khyh.Pawccecize na bya kha ngae hae zah,na byakinnaw kha a tynsah hae.10Minmin nynh Jakob phin khana phungzae a ccangpah cih hae zah,Israel phin kha na upadia ccangpah cih hae;na malang khemynkhuhpaw kha thuasah,na silawhang kyakhemaee-ute silawnawpawabalyn kha thuasah a nung cih hae.11Pou Bawipaw , a sisua khahythuapya lah,a kuih ryalawnaw khaccoupya tua;amaw a hua hae paw a rhaw hae tuhbua a thoku khyh ccaw hae,mih cce kha khyatua hae,” cite a ho.
12Benjamin kong kha:“Bawipaw nynh a sungsahpaw tuhamaw kyakhe khyndadyh lan a um,Ahangpaw Pachia nynhamaw kha ninlang thungkhaw zah,a raw te a raw laku khea umsah,” cite a ho.
13Te Josef kong kha:“A ram tuh Bawipaw liate,ahangnaw vaawram kya-eahoypaw lasung hae khate thuasah,akhunaw e akawlankouumpaw khate thuasah,14khuanin liate apoupawthae hoypaw tesawpaw liate apoupawahoypaw khate thuasah,15langmawlya te a la umpawmua hae nynh a pousah hae pawahoy huapaw khate thuasah,zungzae tynpaw mua hae kya-eathae hoypaw patae khate thuasah,16laephi kya-e ahoypawlasung hae te laephi nynha pousahpaw aphuinphuin khate thuasah,Sinai mua vawlan a umpawphungbaryh kya-e sungsahthawccinaw khate thuasahhythuanaw muesah.Hynh-e hae hynh a upaw haelaku kya bawi athuapawJosef lu vawlan thua hae sah.17Tangnuapaw thanty tuhlesaenaw hoi zah, a ki hae tuhsaccung ki nynh thua;tuh-e a ki hae khateccungccaw hae khalaephi athangnaw ciaa dia cih hae;tuh-e hae tuh Efraim ccungccawthong haw thua hae zah,tuh-e hae tuh Manasseh ccungccawathong-asan hae nynh thua,” cite a ho.
18Zebulun kong kha:“Pou Zebulun, khua na ccongnaw kyana lungtua sah;Pou Issakhar, na bu lungkhu kyana lungtua sah.19Minmin nynh ccungccaw hae khamua lang ko hae zah,tuin kyakhe ahmepawsilawnaw hae kha a rae hae;pawccecize rili hoirumnaw telaesia kya-e thuruhpawsisua kha minmin nynha ccou hae,” cite a ho.
20Te Gad kong kha:“Gad a pungzaesahtu tuhthehoysah thuasah!Gad tuh chindeih hawte nynh a um;aning nynh kuihbaw telukhy kha a pae.21Aning nynh amaw hanlanahoy huaccepaw kha a poku,pawccecize tuin kyakhecciakhaetu nynh a ccou lanpaw khaamaw hanlan taekhiatenungpya athua; ccungccaw haea cciakhaetu hae kalan yn thua zah,Bawipaw kya-e dingnaw tea phungzae hae khaIsrael hae hanlan a rae,” cite a ho.
22Te Dan kong kha:“Dan tuh Bashan kyateyn thohkuhpawchindeih anopawnynh thua,” cite a ho.
23Te Naftali kong kha:“Pou Naftali,sungsah thawccinaw khatelungryccing khaekuh lah,Bawipaw kya-e hythuanaw tephe beihpaw niccaw lang tealia lang kha ccoutua,” cite a ho.
24Te Asher kong kha hynhte a ho:Asher tuh ccapaw hae kyazehythuanaw a ccou huaccepawnynh thua, a uno hae nynha sungsahua hae paw thuasah lah,a ccu tuh chitui lungkhu dung sah.25Na pangccaw hae tuhsivaw te sohin thua hae zah,Na hiin lungkhu na thawzung um sah.26Pou Jeshurun, nang bawm khylan,lesaenaw te phe beih zahvaawlui a ccikuhpawPachia tahawpaw um khyh.27Zungzae hiinpaw Pachia tuhna umnaw hmin nynh thua,nang bawm khylanzungzae tynpaw kuihbaw a um.Te na rhaw hae kha na malang tesakhia hae zah, “Roh oh!” a ci.28Tukeiccuze Israel tuhkhyndadyh lan a um,vaawlui nynh vuiraw a ccawsahnaw,ccathae te misutui alungnawram kya umpaw Jakob a umnaw tuhvawsawnaw um khyh.29Pou Israel, nang tuhlungtuapaw nynh na thua!Bawipaw nynh nang hawtea khumpaw ccungccawhummou a um?Aning tuh nang ae bawmtukhawriaphua thua zah,na taenawpaw thaloi nynh thua!Na rhaw hae tuh maemuihtangtena kalan oun thua cih hae zah,mih ke kha na syde cih hae.Moses Chinaw
1Oute Moses tuh Moab bialae kyate Jeriko khua arawlang umpaw Nebo Mua, Pisgah mua dung langkhe a cceihthung, te Bawipaw nynh ram balyn kha a muihsah: Gilead ram kha Dan kyacia,2Naftali abalyn, Efraim te Manasseh ram, Judah ram balyn kha Niccaw lang e Rili kyacia,3Negeb ram, te Bialae athuapaw ungcci ku khua cikuhpaw Jeriko khua kya-e accya te Zoar kyacia.4Bawipaw nynh Moses kha, “E ram hynh Abraham, Isak te Jakob kya, ‘Nae ciihan hae kalan ka pya cih hae,’ cite bya ka kinpyaku hae paw ram nynh thua; Na mit te kae muihsah vae, thuasalama khuhlang raw na zua lan khyh,” a cipya.5Tetuh Bawipaw seepaw Moses tuh Bawipaw nynh kaw a pyanaw Moab ram khe a chih.6Moses tuh Beth-peor araw lang, Moab ram accya khe a uu hae, thuasalama a uunaw hae hmin kha atunin cia hum nynh sanmah nyh khyh.7Moses tuh za kheit kum kuin a cih te a chih; a mitmoh khyh zah a thawzung mah zyabung khyh.8Israel hae tuh Moses hanlan Moab bialae kya nin sung thum rawkhuite a um hae; oute Moses hanlan rawkhuinaw ccyh tuh athang.
9Moses nynh a kuih kha Nun ccapaw Joshua tungvaw a la khang vae keiccuze, Joshua tuh hawnaw muisaw te phe a beih; Israel hae nynh Joshua bya kha ngae hae zah, Bawipaw nynh Moses kaw a la pya hawte a cyi hae.
10Bawipaw nynh mitmae hawiliakute a nypaw Moses tahawpaw profeh tuh Israel hae kya kharouh langkuh boi khyh.11Bawipaw nynh Moses kha saw zah, Izip ram kya um hae paw Faro te a see hae balyn te a ram kya-e ccungccaw balyn kyakhe muihsahnaw te ngaeangnaw balyn kha a rae hawte ccangpaw profeh nynh rae boi khyh.12Moses nynh Israel hae balyn mitmuihnaw kya a cyipaw athawsaepaw huhan te le zah ri lan umpaw cyisahnaw hae balyn hawte a cyih khopaw ccangpaw profeh um boi khyh.

Bible Society of Myanmar

https://app.library.bible/content/1a340f5ae072b2f4

expand_more
chevron_left前の章
chevron_right次の章