Read LEVITIKAS 1

LEVITIKAS1

Maee-ute Silawnaw

¹Bawipaw nynh Moses kha ko zah tungkunaw bu kyate hynhte a hopya:²Israel ccungccaw hae kha hynhte hopah hae: Nanning lukhakheit nynh sahiin-awvaw pyapaw kha Bawipaw kalan a cciakhae ze, a pyapaw tuh vaetua phu kya-e khyhze tuuphu, miaa phu kya-e kha a cciakhae cih.

³Pyapaw tuh vaetua phu kya-e maee-ute silawnaw athua lanze, douccahpaw tangnuapaw kha a pya cih; Bawipaw malang khe tuh-e tangnuapaw kha amaw ccelang a ccoupya ccaw cite, tungkunaw bu thuakaw kalan a cciakhae cih.⁴Maee-ute silawnawpaw a lu vawlan khe a kuih kha a khang cih, te tuh-e tangnuapaw tuh amaw ccelang ccoupya athua cih zah, amaw hanlan sei ngaethyanawpaw athua vae cih.⁵Tangnuapaw kha Bawipaw malang khe chia athua cih; te ranpibawi athuapaw Aaron ccapaw hae nynh a chii kha a pya cih hae, tungkunaw bu thuakaw kya umpaw silawhang kha po voilu lan chii kha a hei cih hae.⁶Maee-ute silawnawpaw kha a phua lae athua cih zah a saw kha be athua cih.⁷Ranpibawi Aaron ccapaw hae nynh silawhang vawlan khe maee a tua cih hae zah maee vawlan khe maeething kha a paccyn cih hae.⁸Aaron ccapaw hae, ranpibawi hae nynh saw abekuhpaw kha alu, atho ryte silawhang vawlan umpaw maee vawlan e maeething kyakhe a nung cih hae;⁹thuasalama aring hae te accu hae kha tuh tui te a sing cih hae. Oute ranpibawi hae nynh abalynte silawhang vawlan khe maee-ute silawnaw lante a u cih hae, Bawipaw hanlan maee te silawnaw, amynthuapaw athua cih.

¹⁰Maee-ute silawnaw hanlan pyapaw tuh tuuphu khyhze miaa phu kya-e athua lanze, a pyapaw tuh douccahpaw pise athua cih.¹¹Tuh-e tuh silawhang palung lang, Bawipaw malang khe chia athua cih, te Aaron ccapaw hae, ranpibawi hae nynh a chii kha silawhang po voilu lan a hei cih hae.¹²Tuh-e tuh alu, atho ryte be athua cih, te ranpibawi nynh silawhang vawlan umpaw maee vawlan e maeething kyakhe a nung cih;¹³thuasalama aring hae te accu hae kha tuh tui te sing athua cih hae. Oute ranpibawi nynh abalynte silawhang vawlan khe maee te a u cih; tuh-e tuh maee-ute silawnaw nynh thua, Bawipaw kalan maee te silawnaw amynthuapaw athua cih.

¹⁴Bawipaw kalan pyapaw tuh maee-ute silawnawpaw pavaw athua lanze, valaele hae khyhze vahu hae kya-e kha a po cih.¹⁵Ranpibawi nynh tuh-e tuh silawhang kalan a cciakhae cih zah a lu kha thoh pae lan a mae cih, te silawhang vawlan khe maee te a u cih; silawhang pe khe a chii kha ccawsah athua cih.¹⁶A lohsapua te a lungkhu umpaw kha a lah cih zah silawhang nithua lang, buhhaw nungnaw kyakhe a vua cih.¹⁷A sake kha thoh pae leite a pyn kha thoh a bua cih. Oute ranpibawi nynh silawhang vawlan umpaw maee vawlan e maeething kyakhe a khang cih; tuh-e tuh maee-ute silawnaw nynh thua, Bawipaw kalan maee te silawnaw amynthuapaw nynh thua. Ccathae Silawnaw

¹Lukhakheit nynh Bawipaw kalan ccathae silawnaw kha a rae ry ze, a pyapaw tuh ahoypaw vaekhui athua cih; a beiktu nynh chitui kha vaekhui vawlan a bu cih zah frankinsen kha vaekhui vawlan a nung cih,²tuh-e tuh ranpibawi athua hae paw Aaron ccapaw hae kalan a thuakhae cih. Ranpibawi nynh kuihphe te huukhinpaw vaekhui ahoypaw, chitui te frankinsen balyn kha a lah cih zah, silawhang vawlan khe maee te a u cih, Bawipaw kalan maee te silawnaw amynthuapaw nynh thua.³Ccathae silawnaw kyaze alaepaw tuh Aaron te a ccapaw hae hanlan athua cih, tuh-e tuh maee-ute Bawipaw kalan pyapaw hae kyaze athyaa huaccepaw athua cih.

⁴Talyng-ang te thoupaw ccathae silawnaw kha na rae ry ze, ahoypaw vaekhui athua cih: ransi phing leipaw sanlou, chitui te pydepaw athua cih, tuhkhyhze ransi phing leipaw sanlou apahpaw, chitui thuhkuhpaw athua cih.⁵Na pyapaw sanlou tuh talyng-ang te thoupaw ccathae silawnaw athua ze, ransi phingkuh leipaw vaekhui ahoypaw, chitui pydepaw athua cih;⁶tuh-e sanlou tuh na eih cih zah chitui na bu cih; tuh-e tuh ccathae silawnaw nynh thua.⁷Na pyapaw tuh talyng-ang kya roupaw sanlou athua ze, chitui pydepaw vaekhui ahoypaw te raepaw athua cih.⁸Tuhcite aphuinphuin te na paccynpaw ccathae silawnaw kha Bawipaw kalan na cciakhae cih; te tuh-e tuh ranpibawi kalan he na pya te, aning nynh tuh-e tuh silawhang kalan a cciakhae cih.⁹Ranpibawi nynh ccathae silawnaw kyate abang kha a phia cih zah silawhang vawlan khe maee te a u cih, Bawipaw kalan maee te silawnaw, amynthuapaw nynh thua.¹⁰Te ccathae silawnaw kya-e alaepaw kha Aaron te a ccapaw hae hanlan athua cih, tuh-e tuh maee-ute Bawipaw kalan pyapaw hae kyaze athyaa huaccepaw athua cih.

¹¹Bawipaw kalan na pya oh paw ccathae silawnaw tuh ransi te raepaw thua lan khyh, pawccecize ransi thuasah, khoilutui thuasah maee-ute silawnaw lante Bawipaw hanlan maee te na u lan khyh oh.¹²Thaety pyapaw kha Bawipaw kalan na thuakhae cih oh, tuhzemah khah-e hae kha silawhang vawlan khe amynthuapaw hanlan maee te na u lan khyh oh.¹³Ccathae silawnaw balyn kya loi na phing cih; na Pachia ryte byakinku nawpaw loi kha na ccathae silawnawpaw hae kya phing leite na um lan khyh; na pyapaw balyn ryte loi kha na pyabia cih.¹⁴Thaety hae kya-e ccathae silawnaw kha Bawipaw kalan na thuakhae ze, thaety pyapaw hanlan ccathae athawpaw kya-e lawpaw, maee te rousahpaw ccathae kha na thuakhae cih.¹⁵Avawlan khe chitui na bu cih zah frankinsen kha mah avawlan khe na nung cih; tuh-e tuh ccathae silawnaw nynh thua.¹⁶Te maee te rousahpaw ccathae abang, chitui te frankinsen balyn kha ranpibawi nynh maee te a u cih; tuh-e tuh Bawipaw kalan maee te silawnaw nynh thua. Ccawkunaw Silawnaw

¹Lukhakheit nynh a pyapaw tuh ccawkunaw silawnaw athua ze vaetua phu kya-e sahiin, nopi thuasah, pise thuasah na pya lanze, douccahpaw kha Bawipaw malang na pya cih.²Silawnawpaw a lu vawlan khe na kuih kha na khang cih zah tungkunaw bu thuakaw kyakhe na theih cih; te ranpibawi athua hae paw Aaron ccapaw hae nynh a chii kha silawhang po voilu lan a hei cih hae.³Ccawkunaw silawnawpaw a lungkhu e kha Bawipaw kalan maee te silawnaw hae lante aring hae kha phang a bongpaw atho, aring pepan umpaw atho balyn;⁴akia lungkhu lang te umpaw akin ccangning te tuh-e hae vawlan abahkuhpaw atho, akin ryte a lawde cih paw athin kya abahkuhpaw arui-arae hae kha na pya cih.⁵Oute Aaron nynh tuh-e hae tuh silawhang vawlan umpaw maee vawlan e maeething kya umpaw maee-ute silawnawpaw ryte a u cih hae, tuh-e tuh Bawipaw kalan maee te silawnaw, amynthuapaw nynh thua.

⁶Bawipaw kalan ccawkunaw silawnaw hanlan na pyapaw tuh tuuphu, miaa phu kya-e athua ze, douccahpaw nopi khyhze pise sa kheit kha na pya cih.⁷Tuu kha silawnaw lante na pya lanze, Bawipaw malang na thuakhae cih zah⁸na kuih kha silawnawpaw alu vawlan khe na khang cih. Tuh-e tuu tuh tungkunaw bu malang khe chia athua cih, te Aaron ccapaw hae nynh a chii kha silawhang po voilu lan a hei cih hae.⁹Ccawkunaw silawnawpaw kya-e atho kha Bawipaw kalan maee te silawnaw lante na pya cih: azungru pe te thoh paepaw aleihmae abalyn, aring phang abongpaw atho, aring pepan umpaw atho balyn;¹⁰akia lungkhu lang te umpaw akin ccangning te khah-e hae kha phang a bongpaw atho, akin hae ryte na lawdepaw athin kya bahkuhpaw arui-arae hae kha na pya cih.¹¹Oute ranpibawi nynh khah-e hae kha silawhang vawlan khe Bawipaw kalan maee te looh silawnaw lante maee te a u cih.

¹²Si na lawnawpaw kha miaa athua lanze, Bawipaw malang na thuakhae cih zah¹³na kuih kha a lu vawlan na khang cih; tuh-e tuh tungkunaw bu malang khe chia athua cih; te Aaron ccapaw hae nynh a chii kha silawhang po voilu lan a hei cih hae.¹⁴Bawipaw kalan maee te silawnaw hanlan tuh-e miaa lungkhu e aring a bongpaw atho, aring pepan umpaw atho balyn;¹⁵akia lungkhu lang te umpaw akin ccangning te khah-e hae vawlan abahkuhpaw atho, akin hae ryte na lawdepaw athin kya bahkuhpaw arui-arae hae kha na pya cih.¹⁶Oute ranpibawi nynh khah-e hae kha silawhang vawlan khe maee te a u cih, amynthuapaw lante maee te silawnawpaw looh nynh thua. Atho balyn tuh Bawipaw kya-e nynh thua.¹⁷Atho thuasah, achii thuasah na ae lan khyh oh; tuh-e tuh nae she takyh kya, nae umnaw balyn kya, zungzae tynpaw phunglang athua cih. Seithyaanaw Silawnaw hae

¹Bawipaw nynh Moses kha,²Israel hae kyakhe hynhte hopah hae a cipya: Lukhakheit nynh tuaku ty leite Bawipaw kawbya hae kyaze cyi lan accan leipaw ccangkhakheit kha phe cyihsei zah a cyipaw kya:

³Chitui thuh a thuapaw ranpibawi nynh sei zah ccungccaw hae tungvaw seimenaw a thuakhae lanze, tuh-e seinaw hanlan douccahpaw vaetua phu kya-e anopaw tangnuapaw kha Bawipaw kalan seithyaanaw silawnaw lante a pya cih.⁴Anopaw tangnuapaw kha tungkunaw bu thuakaw kalan, Bawipaw malang a thuakhae cih zah a kuih kha tuh-e tangnuapaw a lu vawlan khe a khang cih; tuh-e anopaw tangnuapaw tuh Bawipaw malang chia athua cih.⁵Chitui thuh a thuapaw ranpibawi nynh anopaw tangnuapaw chii abang kha a lah cih zah tungkunaw bu lungkhu lang a thuakhae cih.⁶Ranpibawi nynh a kuihdung kha tuh-e chii lungkhu a dung cih zah chii abang khate beikinnthyaa kya zokhawpaw boei malang Bawipaw malang khe vae sari a hei cih.⁷Ranpibawi nynh a chii abang kha tungkunaw bu lungkhu Bawipaw malang umpaw amynkhuhpaw silawhang a ki hae kyakhe a thuh cih; anopaw tangnuapaw chii alaepaw kha tungkunaw bu thuakaw kya umpaw maee-ute silawnawpaw ccaboi aleihpaw kyakhe a bu cih.⁸Seishawnaw silawnawpaw tangnuapaw atho balyn: aring phang abongpaw atho te aring pepan umpaw atho balyn;⁹akia lungkhu lang te umpaw akin ccangning te khah-e hae vawlan abahkuhpaw atho; akin hae ryte a lawdepaw athin kya bahkuhpaw arui-arae hae,¹⁰ccawkunaw silawnawpaw tangnuapaw kya-e law a thuapaw hawkhate a lah cih. Ranpibawi nynh maee-ute silawnawpaw ccaboi vawlan khe maee te a u cih.¹¹Thuasalama tangnuapaw aphua te asaw balyn ryte alu, accu, aring te a-ia hae, te¹²tuhlaepaw tangnuapaw a pyn balyn kha ryahmin atolang umpaw athyaanaw hmin, buhhaw laenaw langkhe a cciakhae cih zah maeething vawlan khe a u cih; buhhaw laenaw hmin kyakhe maee te u athua cih.

¹³Israel zapi balyn nynh tuaku ty leite, zapi nynh nythya leite, Bawipaw kawbya hae kya-e cyi lan accan leipaw ccangkhakheit kha cyih hae zah a sei hae lanze;¹⁴tuh-e a la rae hae paw seinaw tuh he a langkuh te, zapi nynh seithyaanaw silawnaw hanlan vaetua phu kya-e tangnuapaw anopaw sa kheit khate si a law cih hae zah tungkunaw bu malang a thuakhae cih hae.¹⁵Ccungccaw zapi kya-e piccan hae nynh tangnuapaw lu kyakhe Bawipaw malang mih kuih a khang cih hae, te tangnuapaw tuh Bawipaw malang chia athua cih.¹⁶Chitui thuh a thuapaw ranpibawi nynh tangnuapaw chii abang kha tungkunaw bu lungkhu lang a teekhae cih,¹⁷te ranpibawi nynh a kuihdung kha chii lungkhu khe a dung cih zah zokhawpaw boei malang, Bawipaw malang khe vae sari a hei cih.¹⁸Chii abang khate tungkunaw bu kya, Bawipaw malang umpaw silawhang a ki hae kha a thuh cih; te alaepaw chii kha tungkunaw bu thuakaw kya umpaw maee-ute silawnawpaw silawhang aleihpaw kyakhe a bu cih.¹⁹Atho balyn kha a lah cih zah silawhang vawlan khe maee te a u cih.²⁰Seishawnaw silawnawpaw tangnuapaw a cyi hawkhate tangnuapaw kha a cyih cih; phe lokuh lante a cyih cih. Ranpibawi nynh minmin hanlan seingaethyanaw kha a rae cih zah minmin tuh ngaethya athua vae cih hae.²¹Te tangnuapaw kha ryahmin atolang cciakhae zah masaty e tangnuapaw hawkhate a u; tuh-e tuh zapi elang seithyaanaw silawnaw nynh thua.

²²Uktu lukhakheit nynh Bawipaw a Pachia kawbya balyn kya-e cyi lan accan leipaw ccangkhakheit kha tuaku ty leite cyih zah a sei lanze,²³tuh-e a raepaw seinaw kha he a nyhkuh te, douccahpaw miaatepaw sa kheit kha silaw nawlan a cciakhae cih.²⁴Miaa lu vawlan khe a kuih a khang cih zah Bawipaw malang maee-ute silawnawpaw chianaw kyakhe chia athua cih; tuh-e tuh seithyaanaw silawnaw nynh thua.²⁵Ranpibawi nynh seishawnaw silawnawpaw a chii abang kha a kuihdung te a lah cih zah maee-ute silawnawpaw silawhang a ki hae kha a thuh cih, chii alaepaw kha maee-ute silawnawpaw silawhang aleihpaw kyakhe a bu cih.²⁶Ccawkunaw silawnawpaw atho hawkhate a tho balyn kha silawhang vawlan khe a u cih. Ou tuhte ranpibawi nynh a seinaw hanlan seingaethyanaw a raepah cih zah ngaethya athua cih.

²⁷Nanning laku e ccungccaw huataw lukhakheit nynh Bawipaw kawbya kya-e cyi lan accan leipaw ccangkhakheit kha tuaku ty leite cyite sei zah seimenaw a hoi lanze,²⁸seinaw a la raepaw kha he a nyhkuh te, a la cyiseipaw seinaw hanlan silaw nawlan douccahpaw miaapinung sa kheit kha a thuakhae cih.²⁹Seishawnaw silawnawpaw alu vawlan khe a kuih kha a khang cih; te seithyaanaw silawnaw kha maee-ute silawnaw hmin khe chia athua cih.³⁰Ranpibawi nynh a chii abang kha a kuihdung te a lah cih zah maee-ute silawnawpaw silawhang a ki hae kyakhe a thuh cih hae, te a chii alaepaw kha silawhang aleihpaw khe a bu cih.³¹Ccawkunaw silawnaw kya-e atho kha law athua hawte tuh-e atho balyn tuh law athua cih zah, Bawipaw kalan amynthuapaw lante silawhang vawlan khe a u cih. Ou tuhte ranpibawi nynh seingaethyanaw a raepah cih zah, tuh-e ccungccaw tuh ngaethya athua cih.

³²Seithyaanaw silawnaw hanlan a thuakhaepaw tuh tuu athua lanze, douccahpaw tuupinung athua cih.³³A kuih kha seishawnaw silawnawpaw alu vawlan a khang cih; tuh-e tuh maee-ute silawnawpaw chianaw hmin kyakhe seithyaanaw silawnaw lante chia athua cih.³⁴Ranpibawi nynh seishawnaw silawnawpaw a chii abang kha a kuihdung te a lah cih zah maee-ute silawnawpaw silawhang a ki hae kyakhe a thuh cih, te alaepaw chii abang kha silawhang aleihpaw kyakhe a bu cih.³⁵Ccawkunaw silawnawpaw kya-e tuu atho kha law athua hawte atho balyn kha a lah cih, te ranpibawi nynh Bawipaw kalan maee te silawnaw ryte silawhang vawlan khe a u cih. Tukeiccuze tuh-e ccungccaw nynh a cyiseipaw seinaw hanlan ranpibawi nynh seingaethyanaw kha a raepah cih zah ngaethya athua cih.

¹Lukhakheit nynh acyihkuhpaw a muihpaw kya thuasah, a nypaw kya thuasah, zapi malang thyalawsahkupaw bya kha thae zah ccaekia mang a khankuh kho pite a ho khyh lanze, detahnaw a ing cih.²Lukhakheit nynh athyaa leipaw uccaw, athyaa leipaw sarepaw achihpaw kha thuasah, athyaa leipaw sahiin-awvaw achihpaw kha thuasah, athyaa leipaw avawthyapaw achihpaw kha thuasah, ny leite a tysei lanze, athyaa leipaw lang tang zah a sei vae.³Lukhakheit nynh ccungccaw thyaa leinaw, athyaa leipaw lang a tangsah khopaw thyaa leinaw ccangkhakheit kha ny leite tysei zah he a nyhkuh te, a seipaw athua cih.⁴Lukhakheit nynh ahoypaw eenaw hanlan thuasah, ahoy leipaw hanlan thuasah cyi lanpaw kong kha hoyte thaethya leite thyalawnaw a rae zetuh he a nyhkuh te, tuh-e thyalawnaw ccangkhakheit kya a seipaw athua cih.⁵Tuh-e hae ccangkhakheit kya a seimenaw kha he a thaethya te, seinaw a raepaw kha a phykuh cih.⁶A la raepaw seinaw hanlan tuu sa kheit khyhze miaapinung kha seithyaanaw silawnaw lante Bawipaw kalan a thuakhae cih; te ranpibawi nynh a seinaw hanlan seingaethyanaw kha a raepah cih.

⁷Thuasalama tuu sa kheit kha a taening khyh lanze, a raepaw seinaw hanlan valaele sa ning khyhze vahu sa ning kha, seithyaanaw silawnaw hanlan sa kheit, maee-ute silawnaw hanlan sa kheit, Bawipaw kalan a thuakhae cih.⁸Tuh-e hae tuh ranpibawi kalan a cciakhae cih zah ranpibawi nynh seithyaanaw silawnaw kya masaty a rae cih, alu kha thoh pae lei lante a nging kha a mae cih.⁹Seishawnaw silawnawpaw a chii abang kha silawhang atelang khe a hei cih, a chii alaepaw kha silawhang aleihpaw kyakhe a bu cih, tuh-e tuh seithyaanaw silawnaw nynh thua.¹⁰Te sa ningnaw kha aphung thyhte maee-ute silawnaw kha a rae cih. Ou tuhte seinaw a la raepaw hanlan ranpibawi nynh seingaethyanaw a raepah cih zah ngaethya athua cih.

¹¹Thuasalama valaele sa ning khyhze vahu sa ning kha a taening khyh lanze, a raepaw seinaw hanlan vaekhui ephah pum haw pum kheit kha seithyaanaw silawnaw hanlan a ccyng cih; vaekhui vawlan khe chitui bu lan khyh, frankinsen mah pyde lan khyh, pawccecize tuh-e tuh seithyaanaw silawnaw nynh thua.¹²Tuh-e tuh ranpibawi kalan a cciakhae cih zah ranpibawi nynh Bawipaw kalan abalynte pyapaw nynh thua cipaw langsaku nawlan, kuihphe hu kheit kha a lah cih zah Bawipaw kalan maee te silawnaw ryte silawhang vawlan khe a u cih; tuh-e tuh seithyaanaw silawnaw nynh thua.¹³Ou tuhte ranpibawi nynh a la raepaw seinaw ccangkhakheit hanlan seingaethyanaw kha a raepah cih zah amaw kha ngaethya athua vae cih. Alaepaw kha tuh ccathae silawnaw hawkhate ranpibawi hanlan athua cih. Pyarupaw Silawnaw

¹⁴Bawipaw nynh Moses kha hynhte a hopya:¹⁵Lukhakheit nynh phung kha ny leite, Bawipaw kya-e uccaw athyaapaw ccangkhakheit kyakhe tuaku ty leite a sei lanze, Bawipaw kalan cyiseinaw silawnaw lante tuuphu kya-e douccahpaw tuutepaw sa kheit kha a thuakhae cih, beikinnthyaa kya-e shekel khate ngun hohzeih cipaw na tou cih; tuh-e tuh cyiseinaw silawnaw nynh thua.¹⁶Te a la cyiseipaw athyaapaw uccaw hanlan pyarunaw kha a rae cih, te pum pangaw pum kheit a biachih cih zah ranpibawi kalan a pya cih. Ranpibawi nynh tuh-e ccungccaw hanlan cyiseinaw silawnaw kha tuutepaw khate seingaethyanaw a raepah cih zah aning tuh ngaethya athua vae cih.

¹⁷Lukhakheit nynh cyi lan accan leipaw Bawipaw kawbya ccangkhakheit kha ny leite cyih zah a sei lanze, aning tuh cyiseinaw kha a rae keiccuze detahnaw kha a ing cih.¹⁸Aning nynh sahiin phu kya-e douccahpaw tuutepaw sa kheit khyhze amee alokuhpaw kha cyiseinaw silawnaw lante ranpibawi kalan a thuakhae cih; te tuaku ty leite a cyipaw tuh-e cyiseinaw hanlan ranpibawi nynh seingaethyanaw a raepah cih zah, aning tuh ngaethya athua cih.¹⁹Tuh-e tuh cyiseinaw silawnaw nynh thua; aning nynh Bawipaw malang phe a sei.

¹Bawipaw nynh Moses kha hynhte a hopya:²Lukhakheit nynh a innpaw kha uccaw ccypyanaw hanlan aamahkhan lante nungpaw uccaw kong a hynpya ze thuasah, milae uccaw a luade ze thuasah, a innpaw kha a ling ze thuasah,³azopaw uccaw a muihnaw kong kha hyn zah ahme lei lante thya a lawku ze thuasah, tuhcihawpaw cyiseinaw kha raete Bawipaw tungvaw sei zah,⁴a cyiseinaw kha he a nyhkuh te, luadete a lawpaw uccaw kha thuasah, a hynpyapaw kha thuasah, aamahkhan lan a nungpaw uccaw thuasah, azopaw uccaw a muihpaw kha thuasah,⁵ahme lei lante thya a lawnua kupaw uccaw kha thuasah, a lawpaw uccaw zeihte a pyathui cih zah tuh-e uccaw pum pangaw pum kheit kha a biapah chih cih. A cyiseinaw kha he a thaethya te, tuh-e tuh a hoitu kalan a pyathui cih.⁶Te tuuphu kya-e douccahpaw tuutepaw sa kheit khyhze amee phe lokuhpaw kha Bawipaw kalan cyiseinaw silawnaw lante ranpibawi kalan khe a cciakhae cih.⁷Aning elang ranpibawi nynh Bawipaw malang khe seingaethyanaw kha a raepah cih, te a cyiseinaw miakaw kha ngaethya athua vae cih. Silawnawpaw Phungbya

⁸Bawipaw nynh Moses kha hynhte a hopya:⁹Aaron te a ccapaw hae kha hynhte kawpya hae: E hynh maee-ute silawnaw phungzae nynh thua. Maee-ute silawnawpaw kha silawhang vawlan angaelung khe khuazi zidae awkhua cia nung athua cih zah silawhang vawlan e maee tuh po arua cih.¹⁰Ranpibawi nynh akaw nawkupaw ccuhoih kha a lawkuh koute a boeining kha a lawkuh cih; te silawhang vawlan maee nynh a upaw maee-ute silawnaw buhhaw kha a lah cih zah silawhang pe khe a nung cih.¹¹Oute a boeining kha a khahku cih zah ccangpaw boeining kha a lawkuh cih, te buhhaw kha ryahmin atolang athyaapaw hmin langkhe a cciakhae cih.¹²Beikhang vawlan e maee tuh po arua cih zah chih lan khyh. Ranpibawi nynh awkhua takyh maeething kha a ccong chih cih zah maeething vawlan khe maee-ute silawnaw kha a khang cih, ccawkunaw silawnaw atho kha tuh-e silawhang vawlan khe maee te a u cih.¹³Beikhang vawlan khe maee tuh po arua cih zah chih lan khyh.

¹⁴E hynh ccathae silawnaw phungzae athua cih. Aaron ccapaw hae nynh silawhang a malang, Bawipaw malang khe tuh-e tuh a pya cih hae.¹⁵Minmin nynh kuihphe te hu khinpaw vaekhui kha thuasah, ccathae silawnaw kya-e chitui te pyapaw vawlan umpaw frankinsen balyn kha thuasah a lah cih hae zah, tyty ny nawlan Bawipaw kalan amynthuapaw lante silawhang vawlan khe maee te a u cih hae.¹⁶Alaepaw kha Aaron te a ccapaw hae nynh a ae cih hae; hminthyaa kyakhe ransi phing leite a ae cih hae; tungkunaw bu voidu lungkhu khe a ae cih hae.¹⁷Ransi ryte thoude thua lan khyh. Maee te kamaw kalan pyapaw hae kya-e kha minmin ccou khylan ka pya vae hae; tuh-e tuh seithyaanaw silawnaw te cyiseinaw silawnaw hawte athyaa huaccepaw nynh thua.¹⁸Aaron ciihan pise miakaw nynh a ae cih hae, maee te Bawipaw kalan pyapaw hae kyaze nae she balyn kya zungzae a cyi lan hae paw nynh thua; tuh-e pyapaw kha a typaw miakaw tuh athyaapaw lang a tang cih.

¹⁹Bawipaw nynh Moses kha hynhte a hopya:²⁰E tuh chitui thuh athua nin khe Aaron te a ccapaw hae nynh Bawipaw kalan a pya hae paw nynh thua: palei a la pya hae paw vaekhui ephah ccangkheit, pum haw pum kheit kya-e angankuh kha awkhua ccyh kya, angankuh kha zete ccyh kya a pya cih hae.²¹Talyng-ang lungkhu khe chitui te thou athua cih; tuh-e tuh hoyte ciasahte, ccathae silawnaw kya-e thoupaw sanlou a eihpaw hawte na ccyng cih, amynthuapaw lante Bawipaw kalan na pya cih.²²Te Aaron ciihan kya-e Aaron ccelang chitui thuh a thuapaw ranpibawi nynh tuh-e silawnawpaw tuh a paccyn cih; tuh-e tuh Bawipaw hanlan zungzae cyi lanpaw thua zah, abalynte maee te u lanpaw nynh thua.²³Ranpibawi kya-e ccathae silawnaw miakaw kha abalynte u athua cih; ae thua lan khyh.

²⁴Bawipaw nynh Moses kha hynhte a hopya:²⁵Aaron te a ccapaw hae kyakhe hynhte hopah hae: E hynh seithyaanaw silawnaw phungzae nynh thua. Seishawnaw silawnawpaw kha Bawipaw malang maee-ute silawnawpaw chia a thuanaw hmin kyakhe chia athua cih; tuh-e tuh athyaa huaccepaw nynh thua.²⁶Seithyaanaw silawnaw a raepaw ranpibawi nynh tuh-e tuh a ae cih; tungkunaw bu voidu lungkhu, hmin thyaapaw kyakhe ae athua cih.²⁷Tuh-e a saw kha a typaw miakaw tuh athyaapaw lang a tang cih; te a chii abang kha boeining kya a beku zetuh, abekuhpaw boeining kha hmin thyaapaw kyakhe na suh cih.²⁸Saw thungnawpaw laephi ang kha koi athua cih; thuasalama sohin ang te thung athua zetuh nuih lan zah tui te sing athua cih.²⁹Ranpibawi pise miakaw nynh tuh-e tuh a ae cih hae; tuh-e tuh athyaa huaccepaw nynh thua.³⁰Thuasalama hmin thyaapaw kya seingaethyanaw hanlan tungkunaw bu lungkhu lang teekhae a thuapaw seishawnaw silawnawpaw pawpaw chii mah ae thua lan khyh; tuh-e tuh maee te u athua cih.

¹E hynh cyiseinaw silawnaw phungzae nynh thua. Tuh-e tuh athyaa huaccepaw nynh thua;²maee-ute silawnawpaw chianaw hmin kyakhe cyiseinaw silawnawpaw kha a theih cih hae, te a chii kha silawhang po voilu lan a hei cih hae.³A tho balyn kha pya athua cih: aleihmae asae thyhte, aring abongpaw atho,⁴akia lungkhu lang te umpaw akin ccangning te tuh-e hae vawlan abahkuhpaw atho, akin hae ryte lawde a thuapaw athin kya abahkuhpaw arui-arae hae kha a pya cih.⁵Ranpibawi nynh tuh-e hae tuh silawhang vawlan khe Bawipaw kalan maee te silawnaw hawkhate a u cih; tuh-e tuh cyiseinaw silawnaw nynh thua.⁶Ranpibawi pise miakaw nynh tuh-e tuh a ae cih hae; hmin thyaapaw kyakhe ae athua cih; tuh-e tuh athyaa huaccepaw nynh thua.

⁷Cyiseinaw silawnaw tuh seithyaanaw silawnaw hawte thua zah hynh-e hae hanlan phungzae phe lokuh; seingaethyanaw a raepaw ranpibawi nynh saw kha a lawkuh cih.⁸Lukhakheit kya-e maee-ute silawnaw kha a raepahpaw ranpibawi nynh maee-ute silawnaw a raenawpaw saphua kha a lawkuh cih.⁹Te talyng-ang kya thoupaw ccathae silawnaw miakaw, thounawpaw talyng-ang khyhze ohkan te thoupaw balyn kha a pyatu ranpibawi nynh a lawkuh cih.¹⁰Thuasalama ccangpaw ccathae silawnaw miakaw, chitui te pydepaw thuasah, aroupaw thuasah Aaron ccapaw hae balyn nynh phe ngankuh lante a lawkuh cih hae. Tuhlaepaw Phunglang

¹¹E tuh lukhakheit nynh Bawipaw kalan a pya lanpaw ccawkunaw silawnaw kha pyanaw phungzae nynh thua.¹²Lungtuanaw hanlan pya athua vae ze, lungtuanaw silawnawpaw ryte ransi phing leipaw sanlou chitui te pydepaw, ransi phing leipaw sanlou apahpaw chitui thuhpaw te chitui kya hoyte ciasahpaw vaekhui ahoypaw kha a pya cih.¹³Ccawkunaw silawnaw te asekuhpaw lungtuanaw hanlan pyapaw ryte ransi phingpaw sanlou kha a pyabia cih.¹⁴Silawnaw phuin kheit cci kya-e sanlou phe kheit cci kha Bawipaw kalan lasung lante a pya cih; tuh-e sanlou tuh ccawkunaw silawnawpaw a chii kha a heitupaw ranpibawi nynh a lawkuh cih.¹⁵Te lungtuanaw hanlan ccawkunaw silawnawpaw saw kha pya nin khe ae athua cih; awkhualan cia ccapyh san nung thua lan khyh.¹⁶Thuasalama a pyapaw silawnaw lanpaw tuh byakinkute a pyapaw athua ze thuasah, lungthote silawnaw athua ze thuasah silawnaw a rae nin khe ae athua cih, te alaepaw kha awkhualan khe ae athua cih;¹⁷thuasalama silawnawpaw kya-e alaepaw saw kha nin thumnaw nin khe maee te u athua cih.¹⁸Ccawkunaw silawnaw saw kha nin thumnaw nin khe ae athua lanze, ccoupya thua lan khyh, a pyatupaw kha a pya cite riapya thua lan khyh; tuh-e tuh anungsikuhpaw athua cih zah a aetupaw tuh a tungvaw seinaw accah cih.

¹⁹Athyaa leipaw uccaw te a tungkuh hae paw saw kha ae thua lan khyh; maee te u athua cih. Athyaa hae paw balyn nynh silawnawpaw saw kha a ae cih hae.²⁰Thuasalama mih tungvaw kya thyaa leinaw phang a um lyakhe Bawipaw kya-e ccawkunaw silawnawpaw saw kha a ae hae paw tuh mih puizia kyate vua athua cih hae.²¹Lukhakheit nynh athyaa leipaw ccangkhakheit, athyaa leipaw ccungccaw kha thuasah, athyaa leipaw sarangpaw kha thuasah, athyaa leipaw ahysuepaw kha thuasah ty zah Bawipaw kya-e ccawkunaw silawnaw saw kha a ae lanze, a puizia kyate vua athua cih.

²²Bawipaw nynh Moses kha hynhte a hopya:²³Israel hae kyakhe hynhte hopah hae: Nanning nynh tangnuapaw tho, tuu tho te miaa tho kha na ae lan khyh oh.²⁴Amaw chi lan achihpaw sarangpaw atho kha thuasah, sarepaw nynh a teipaw atho kha thuasah ccangkhakheit kya na mang kho oh, thuasalama tuh-e atho kha na ae lan khyh oh.²⁵Lukhakheit nynh Bawipaw kalan maee te silawnawpaw kya-e sarangpaw atho kha a ae lanze, a aetupaw tuh a puizia kyate vua athua cih.²⁶Pavaw chii thuasah, sarangpaw chii thuasah, pawpaw chii mah na umnaw oh miakaw kya na ae lan khyh oh.²⁷Pawpaw chii zemah a aepaw lukhakheit tuh a puizia kyate vua athua cih.

²⁸Bawipaw nynh Moses kha hynhte a hopya:²⁹Israel hae kyakhe hynhte hopah hae: Bawipaw kalan ccawkunaw silawnaw a raepaw lukhakheit nynh tuh-e tuh Bawipaw kalan amaw ccaccei nynh a thuakhae cih.³⁰Maee te pyapaw Bawipaw kya-e kha namaw na kuih te na ccyng cih; Bawipaw malang hangthung-hebiate silawnaw lante aby kha hangthung athua nawlan, atho kha aby ryte na thuakhae cih.³¹Ranpibawi nynh atho kha silawhang vawlan khe maee te a u cih, thuasalama aby kha tuh Aaron te a ccapaw hae nynh a lawku cih hae.³²Te ccawkunaw silawnawpaw kya-e a ranglang phae kha silawnawpaw lante ranpibawi kalan na pya cih;³³ccawkunaw silawnaw kya-e atho te achii a pyatupaw Aaron ccapaw hae laku e lu kheit nynh a ranglang phae kha a ccou cih.³⁴Pawccecize Israel hae nynh a pya hae paw ccawkunaw silawnawpaw kya-e aphae, hangthung-hebiate silawnaw kya-e aby kha ka lah zah silawtu Aaron te a ccapaw hae kalan ka pya vae hae, tuh-e tuh Israel ccungccaw hae kyate zungzae a ccou lan hae paw nynh thua.³⁵Tuh-e tuh Aaron te a ccapaw hae nynh Bawipaw hanlan ranpibawi rya kha lawpya lan khang athua nin hae khe, Bawipaw kalan maee te raepaw silawnaw kya-e minmin nynh a ccou lan hae paw nynh thua;³⁶Minmin kha chitui thuh athua nin hae khe, Israel hae nynh minmin kha tuh-e tuh pya khylan Bawipaw nynh kaw a pya hae, Israel hae nynh mih she balyn kya zungzae a pya lan hae paw nynh thua.

³⁷E hynh maee-ute silawnaw, ccathae silawnaw, seithyaanaw silawnaw, cyiseinaw silawnaw, thyaasahnaw silawnaw te ccawkunaw silawnaw phungzae nynh thua,³⁸hynh-e phungzae hae tuh Israel ccungccaw hae nynh Bawipaw kalan silaw lanpaw kha ramkaw kya kaw a pya lya hae ze, Bawipaw nynh Moses kha Sinai Mua vawlan kaw a pyapaw nynh thua. Thyaasahnaw Phungzae (Exo 29.1-37)

¹Bawipaw nynh Moses kha,²“Aaron te a ccapaw hae kha cciakhae hae lah boeining, thuhkupaw chitui, seishawnaw silawnawpaw tangnuapaw, tuutepaw sa ning te ransi phing leipaw sanlou bawng kha mah cciakhae bia;³te ccungccaw zapi balyn kha tungkunaw thuakaw kyakhe pum hae,” a cipya.⁴Te Bawipaw nynh kaw a pya thyhte Moses nynh a cyi. Zapi kha tungkunaw bu thuakaw kya he a pumsakuh hae te,⁵Moses nynh zapi kha, “E hynh Bawipaw nynh cyi lan kaw oun pyapaw nynh thua,” a cipya hae.

⁶Oute Moses nynh Aaron te a ccapaw hae kha cciakhae hae zah mih ccu kha tui te a singpya hae.⁷Te Aaron kha angkile kisahku zah taeccia a cciasaku, angkiccua kha kisahku zah ranpibawi angki kha a kisaku. Te accaankuhpaw ranpibawi angki arui khate a cce kyakhe a khiideku.⁸Bybe kha besahku zah tuh-e bybe kyakhe Urim te Thummim kha a nung hae.⁹Te a lu kyakhe pungde kha a khungsahku, pungde vawlan a malang kyakhe ccaankunawpaw sui, athyaapaw bawilukhung kha a beedepya, Bawipaw nynh kaw a pya thyhte Moses nynh a cyi.

¹⁰Oute Moses nynh thuhkupaw chitui kha lah zah beikbu te a lungkhu umpaw balyn kha thuh zah a thyaasah.¹¹Chitui abang khate silawhang vawlan khe vae sari a hei, te silawhang te a uccaw balyn kha thuasah, pakekhupaw te a ccusy hae kha thuasah thyaasah khylan chitui a thuh.¹²Aaron kha thyaasah khylan thuhkupaw chitui abang kha a lu kya bu zah a thuh.¹³Te Moses nynh Aaron ccapaw hae kha cciakhae hae zah angki a kisahku hae, taeccia cciasaku hae zah lukhung kha a khungsahku hae, Bawipaw nynh kaw a pya thyhte Moses nynh a cyi.

¹⁴Seishawnaw silawnawpaw tangnuapaw kha cciakhae zah Aaron te a ccapaw hae nynh mih kuih kha tuh-e seishawnaw silawnawpaw tangnuapaw a lu vawlan khe a khang hae,¹⁵te tangnuapaw kha a chia. Moses nynh a chii kha lah zah a kuihdung te silawhang a ki hae kyakhe thuh zah silawhang kha a thyaasah; oute silawhang a ccusy kyakhe a chii kha a bu. Tuhcite silawhang vawlan seingaethyanaw rae khylan silawhang kha a thyaasah.¹⁶Moses nynh aring kya bahkuhpaw atho balyn, athin kya abahkuhpaw arui-arae hae, te atho ryte akin ccangning kha silawhang vawlan maee te a u.¹⁷Thuasalama tangnuapaw kha aphua, asaw te a-ia ryte ryahmin atolang khe maee te a u, Bawipaw nynh kaw a pya thyhte Moses nynh a cyi.

¹⁸Oute maee-ute silawnawpaw tuutepaw kha a cciakhae. Aaron te a ccapaw hae nynh mih kuih kha tuutepaw a lu vawlan a khang hae,¹⁹te tuutepaw kha a chia. Moses nynh a chii kha silawhang po voilu lan a hei.²⁰Moses nynh tuutepaw kha pong tya zah alu, asaw te atho kha maee te a u.²¹Te alungkhu e hae te accu hae kha tui te a sing koute Moses nynh tuutepaw apyn balyn kha silawhang vawlan maee te a u; tuh-e tuh Bawipaw kalan maee te silawnaw, amynthuapaw thua zah, maee-ute silawnaw nynh thua, tuh-e tuh Bawipaw nynh Moses kha kaw a pya thyhte nynh thua.

²²Tukoute thyaasahnawpaw tuutepaw sa ningnaw kha a cciakhae. Aaron te a ccapaw hae nynh mih kuih kha tuutepaw alu vawlan a khang hae,²³te tuutepaw kha a chia. Moses nynh a chii abang kha lah zah Aaron a ranglang nakua alia lang, a ranglang kuihpi te a ranglang ccupi kyakhe a thuh.²⁴Aaron ccapaw hae kha a cciakhae kou hae te, Moses nynh chii abang kha mih ranglang nakua alia lang, mih ranglang kuihpi te mih ranglang ccupi kyakhe a thuh hae; te Moses nynh alaepaw chii khate silawhang po voilu lan a hei.²⁵Te atho hae, aleihmae abalyn, aring hae abongpaw atho balyn, athin kya abahkuhpaw, akin ccangning te atho, te a ranglang phae kha a law.²⁶Bawipaw malang umpaw ransi phing leipaw sanlou bawng a lungkhu kya-e ransi phing leipaw sanlou phe kheit, chitui te thoupaw sanlou phe kheit, apahpaw sanlou phe kheit kha lah zah atho vawlan te a ranglang phae vawlan khe a nung.²⁷Tuh-e hae balyn kha Aaron kuih kya te a ccapaw hae kuih kyakhe a nung, te Bawipaw malang hangthung-hebiate silawnaw lante a hangthung.²⁸Oute Moses nynh tuh-e sanlou hae kha mih kuih kyate lah zah, silawhang vawlan khe maee-ute silawnawpaw ryte maee te a u. Tuh-e tuh Bawipaw kalan amynthuapaw lante maee te pya athuapaw thyaasahnaw silawnaw nynh thua.²⁹Moses nynh aby kha lah zah hangthung-hebiate silawnaw lante Bawipaw malang khe a hangthung; tuh-e aby tuh thyaasahnawpaw tuutepaw kya-e Moses nynh a ccoupaw nynh thua, tuh-e tuh Bawipaw nynh Moses kha kaw a pya thyhte nynh thua.

³⁰Oute silawhang vawlan umpaw thuhkupaw chitui abang te chii abang kha Moses nynh lah zah Aaron te a boeining hae kya te a ccapaw hae te mih boeining hae kyakhe a hei hae. Tuhcite Aaron te a boeining hae kha thuasah, a ccapaw hae te mih boeining hae kha mah thuasah Moses nynh a thyaasahpya hae.

³¹Te Moses nynh Aaron te a ccapaw hae kha hynhte a hopya hae: “ ‘Aaron te a ccapaw hae nynh tuh-e saw kha a ae cih hae,’ cite Bawipaw nynh kamaw kha kaw yn pya thyhte, tungkunaw bu thuakaw kyakhe saw kha thung oh lah, thyaasahnaw silawnaw bawng kya umpaw sanlou ryte tuin kyakhe ae oh;³²alaepaw saw te sanlou kha maee te na u cih oh.³³Nanning thyaasahnaw nin accing mawlaezung, nin sari lungkhu tungkunaw bu atolang na cceih lan khyh oh. Pawccecize nanning thyaasahnaw tuh nin sari aro cih;³⁴atunin rae athua thyhte, nae hanlan seingaethyanaw raepya lan Bawipaw nynh kaw a tho vae.³⁵Nanning na chi khyh nawlan oh, Bawipaw nynh rya ae naw oh paw kha lawte, tungkunaw bu thuakaw kyakhe khuazi khuadae nin sari lungkhu na um cih oh; pawccecize tuhcite kamaw kha kawpya ka thua,” a ci.³⁶Bawipaw nynh Moses kyate kaw a pya thyhte Aaron te a ccapaw hae nynh pawpaw balyn kha pong a cyi hae. Aaron Ranpibawi Thuanaw

¹Nin taryanaw nin khe Moses nynh Aaron te a ccapaw hae te Israel piccan hae kha a pum hae.²Moses nynh Aaron kha, “Seithyaanaw silawnaw hanlan douccahpaw tangnua anopaw sa kheit, maee-ute silawnaw hanlan douccahpaw tuutepaw sa kheit kha cciakhae lah Bawipaw malang khe pyatua.³Te Israel ccungccaw hae kha, ‘Seithyaanaw silawnaw hanlan miaatepaw sa kheit, maee-ute silawnaw hanlan douccahpaw, kum kheit accing vae paw vaetuataw sa kheit te tuutaw sa kheit;⁴Bawipaw malang silawnaw lanpaw, ccawkunaw silawnaw hanlan tangnuapaw sa kheit te tuutepaw sa kheit, te chitui te pydepaw ccathae silawnaw kha oun thuakhae oh. Pawccecize Bawipaw tuh nae kalan atunin yn langkuh cih,’ cite hopah hae,” a cipya.⁵Moses nynh kaw a pya hae paw kha minmin nynh tungkunaw bu malang a thuakhae hae; te ccungccaw zapi balyn tuh naekuh hae zah Bawipaw malang a thadyn hae.⁶Te Moses nynh, “Bawipaw phu-enaw kha nanning kya alangku nawlan, e hynh Bawipaw nynh cyi lan kaw ae pya oh paw nynh thua,” a ci.⁷Oute Moses nynh Aaron kha, “Beikhang kalan naekuh lah seithyaanaw silawnaw te maee-ute silawnaw khate silawtua, namaw te ccungccaw hae hanlan seingaethyanaw kha raetua; te ccungccaw hae nynh oun ccyng hae paw ahlu khate silaw lah minmin hanlan seingaethyanaw kha raetua; Bawipaw nynh kawpya thyhte cyitua,” a cipya.

⁸Aaron nynh silawhang kalan naekuh zah seishawnaw silawnawpaw vaetuataw kha a chia, tuh-e tuh amaw hanlan nynh thua.⁹Aaron ccapaw hae nynh achii kha amaw kalan a pya hae, te a kuihdung kha chii lungkhu dung zah silawhang a ki hae kyakhe a thuh; te achii alaepaw kha silawhang accusy kyakhe a lae.¹⁰Thuasalama seithyaanaw silawnaw kya-e atho, akin hae te athin kya abahkuhpaw arui-arae kha silawhang vawlan maee te a u, Bawipaw nynh Moses kya kaw a pya thyhte a cyi;¹¹asaw te aphua kha ryahmin atolang khe maee te a u.

¹²Oute maee-ute silawnawpaw kha a chia. Aaron ccapaw hae nynh achii kha amaw kalan cciakhae hae zah silawhang po voilu lan a hei.¹³Te minmin nynh maee-ute silawnawpaw saw kha angengete alu ryte amaw kalan oun cciakhae hae zah aning nynh silawhang vawlan khe maee te a u.¹⁴Alungkhu e hae te accu hae kha sing zah maee-ute silawnawpaw ryte silawhang vawlan khe maee te a u.

¹⁵Tukoute Aaron nynh ccungccaw hae kya-e ahlu kha a pya. Ccungccaw hae hanlan seishawnaw silawnawpaw miaa kha lah zah a chia, tuh-e tuh masaty e hawte seithyaanaw silawnaw lante a pya.¹⁶Maee-ute silawnaw kha rae zah aphung thyhte si a law.¹⁷Awkhua ccyh kya maee-ute silawnaw kyalya thua leite ccathae silawnaw kha mah kuih te hu khin khate lah zah silawhang vawlan khe maee te a u.

¹⁸Ccungccaw hae hanlan ccawkunaw silawnawpaw lante tangnuapaw te tuutepaw kha a chia. Aaron ccapaw hae nynh a chii kha amaw kalan pya hae zah Aaron nynh silawhang po voilu lan a hei,¹⁹te tangnuapaw tho te tuutepaw tho, aleihmae asae thathyhte, aring kya abahkuhpaw atho, akin ccangning te tuh-e hae vawlan umpaw atho, te athin kya abahkuhpaw arui-arae hae kha a pya hae.²⁰Minmin nynh aby hae vawlan khe atho hae kha masaty khang hae zah Aaron nynh silawhang vawlan khe maee te a u;²¹te Moses nynh kaw a pya thyhte, aby hae te a ranglang phae kha Aaron nynh Bawipaw malang khe hangthung-hebiate silawnaw lante a hangthung.

²²Aaron nynh a kuih kha ccungccaw hae kalan khe hang zah hythua a pya hae; te seithyaanaw silawnaw, maee-ute pyanaw te ccawkunaw silawnaw kha silawnaw a rae koute a rungbung.²³Moses te Aaron tuh tungkunaw bu lungkhu lang a tee hae, tukoute oun pou hae zah ccungccaw hae kha hythua a pya hae; te Bawipaw phu-enaw tuh ccungccaw balyn kya a langkuh.²⁴Bawipaw kyate maee yn pou zah maee-ute silawnawpaw te silawhang vawlan umpaw atho kha phe thang lan a u, ccungccaw balyn nynh tuh-e tuh he a muih hae tuh, sia hae zah mih lu a bakhung hae. Nadab te Abihu

¹Aaron ccapaw hae Nadab te Abihu nynh pakephepaw kha mawmawte lawkuh hae zah, tuin kya maee kha a nung hae, a vawlan khe mynkhuhpaw kha a khang hae; te minmin nynh athyaa leipaw maee kha Bawipaw malang a pya hae, tuhcite Bawipaw nynh minmin kha kawpya khyh hae.²Te Bawipaw malang te maee tuh yn pou zah minmin kha marya a u hae, te Bawipaw malang khe a chih hae.³Oute Moses nynh Aaron kha, “Bawipaw nynh,‘Kamaw kya a naekuh hae paw kyakhatekae tuh ka thyaa cipaw ka langsakuh cih,te ccungccaw balyn malangphu-esah ka thua cih,’ citea hopaw asuilan tuhhynh-e nynh thua,” a cipya.Te Aaron tuh daebabi lan a um.

⁴Moses nynh Aaron a paaw neitaw Uzziel a ccapaw hae Mishael te Elzafan kha ko hae zah, “Malang oun cceih oh, nae uno hae kha beikinnthyaa malang kyate ryahmin atolang khe toikhaekuh oh,” a cipya hae.⁵Moses nynh kaw a pya hae thyhte, minmin nynh malang cceih hae zah mih puizia hae kha mih angkile khate hang hae zah ryahmin atolang a toikhaeku hae.⁶Te Moses nynh Aaron te a ccapaw hae Eleazar te Ithamar kha, “Nae sang kha phuasalae lan nung nan oh, nae boeining kha sei nan oh, tuhkhyhze tuh na chih cih oh zah thinrianaw kha ccungccaw zapi balyn tungvaw a ccah cih; thuasalama nae uno hae, Israel ccungccaw balyn nynh Bawipaw nynh a ruasahpaw maeeruanaw kha rawkhui hae sah.⁷Tungkunaw bu thuakaw atolang na cceih lan khyh oh, tuhkhyhze tuh na chih cih oh; pawccecize Bawipaw kya-e thuhkupaw chitui tuh nae tungvaw kya a um,” a cipya hae. Te Moses nynh kaw a pya hae thyhte minmin nynh a cyi hae.

⁸Bawipaw nynh Aaron kha,⁹“Namaw thuasah, na ccapaw hae thuasah tungkunaw bu lungkhu lang he na tee vae oh ze, na chi khyh nawlan oh, misutui thuasah, ruimangpaw niapaw thuasah na neih lan khyh oh; tuh-e tuh nae she balyn kya zungzae hanlan phungbya nynh thua.¹⁰Athyaapaw te huatawpaw, athyaa leipaw te athyaapaw kha na laesah cih oh;¹¹te Bawipaw nynh Moses kyate Israel ccungccaw hae kalan a hopaw phungbya balyn kha na ccangpah cih oh,” a cipya.

¹²Moses nynh Aaron te tuhlaepaw a ccapaw hae Eleazar te Ithamar kha, “Bawipaw kya-e maee te silawnaw hae lungkhu e alaepaw ccathae silawnaw kha lah oh lah, silawhang pe khe ransi phing leite ae oh, pawccecize tuh-e tuh athyaa huaccepaw nynh thua;¹³tuh-e tuh Bawipaw kalan maee te silawnaw hae lungkhu e kha namaw te na ccapaw hae nynh na ccou lan oh paw athua keiccuze hmin thyaapaw kyakhe na ae cih oh, pawccecize tuhcite kamaw kha kawpya ka thua.¹⁴Thuasalama hangthungte hebia a thuapaw aby te hangthung a thuapaw aphae kha namaw, na ccapaw hae te na ccanung hae nynh athyaapaw hmin sankhakheit kya na ae cih oh; pawccecize Israel ccungccaw hae nynh a pya hae paw ccawkunaw silawnaw hae lungkhu e tuh-e hae tuh nang te na ccaaw hae kalan pya na thua vae oh.¹⁵Hangthung athuapaw aphae te hangthungte hebia athuapaw aby kha maee-ute silawnawpaw atho ryte, Bawipaw malang khe hangthung-hebiate silawnaw lante hangthung khylan nanning nynh nae thuakhae cih oh; tuh-e hae tuh Bawipaw kawpyanaw thyhte, namaw te na ccaaw hae nynh zungzae na ccou lan oh paw nae hangpaw athua cih,” a cipya hae.

¹⁶Oute Moses nynh seithyaanaw silawnaw kya-e miaa kong kha hoyte a khia hae tuh, maee te phe u vae hae cipaw a ny! Tuhlaepaw Aaron ccapaw hae Eleazar te Ithamar tungvaw a thinria zah,¹⁷“Pawcce seithyaanaw silawnaw kha athyaapaw hmin kya na ae khyh oh? Pawccecize ccungccaw zapi cyiseinaw kha na vuapya ccaw oh cite, minmin ccelang Bawipaw malang seingaethyanaw rae khylan, Pachia nynh tuh-e tuh nanning kalan ae pya vae oh.¹⁸A chii kha beikinnthyaa lungkhu lang na teekhae lan oh paw thua khyh. Kaw kae pya thyh oh te, tuh-e tuh beikinnthyaa lungkhu kya na ae ccaccing lan oh paw nynh thua,” a cipya hae.¹⁹Te Aaron nynh Moses kha, “Dotua, atunin minmin nynh seithyaanaw silawnaw te maee-ute silawnaw kha Bawipaw malang a pya hae; tuhzemah tuhcihawpaw uccaw hae nynh ka tungvaw yn ccawphu vae! Atunin seithyaanaw silawnaw kha phe ka la ae vae lanze, tuh-e tuh Bawipaw malang nawccawpaw athua ung cih tou?” a cipya.²⁰Moses nynh tuh-e bya tuh he a thae te, a lung accing. Athyaapaw te Athyaa leipaw Looh (Deu 14.3-21)

¹Bawipaw nynh Moses te Aaron kha,²Israel ccungccaw hae kyakhe hynhte hopah oh:
Laephi vawlan e sarangpaw balyn lakuze na ae lan oh paw ahysuepaw hae tuh hynh-e hae nynh thua hae.³Accumakeih aphiakuhpaw te looh akhaethuipaw sarangpaw kha na ae cih oh.⁴Thuasalama looh akhaethuipaw accumakeih aphiakuhpaw lakuze akawlan e hae hynh na ae lan khyh oh: kalauh tuh looh akhaethui zemah accumakeih aphiakuh leipaw athua keiccuze nanning elang athyaa leipaw nynh thua.⁵Sangepavo tuh looh akhaethui zemah accumakeih phiakuh khyh zah nanning elang thyaa khyh.⁶Saveih tuh looh akhaethui zemah accumakeih phiakuh khyh zah nae hanlan thyaa khyh.⁷Voh tuh accumakeih aphiaku zemah looh khaethui khyh zah nae hanlan thyaa khyh.⁸E hae saw kha na ae lan khyh oh zah achihpaw kha mah na ty lan khyh oh; nae hanlan athyaa leipaw nynh thua hae.

⁹Tui kya umpaw hynh-e hae hynh na ae cih oh. Rili kya te vawkhu kya um zah asake te akaleih umpaw tui lungkhu e pawpaw balyn kha na ae cih oh.¹⁰Thuasalama rili kya te vawkhu kya um zah asake te akaleih um leipaw miakaw, tui lungkhu e tui azeihthyapaw ahysuepaw hae te tui lungkhu e ahiinpaw ahysuepaw hae tuh nae hanlan anungsikuhpaw thua hae zah,¹¹tuh-e hae tuh nae hanlan anungsikuhpaw athua cih hae. Tuh-e hae saw kha na ae lan khyh oh zah achihpaw mih pyn kha mah anungsikuhpaw lante na tua cih oh.¹²Asake te akaleih um leipaw tui lungkhu e pawpaw balyn tuh nae hanlan anungsikuhpaw nynh thua.

¹³Pavaw hae lakuze hynh-e hae hynh nae hanlan anungsikuhpaw cite na tua cih oh. Na ae lei lan oh paw anungsikuhpaw pavaw hae tuh: mosipi, lantaw, ngasathypaw pavaw,¹⁴mocco, mosikalia phin miakaw,¹⁵va-aw phin miakaw,¹⁶kalauh pavaw, basakah, rili-pavaw, mosi phin miakaw,¹⁷nawnia adihpaw, tui-pavaw, nawniapi,¹⁸tui-aw, pelikan-pavaw, lantaw,¹⁹kaepaw-pavaw, heron pavaw phuin miakaw, michi-awlukhungpaw te balaw nynh thua.

²⁰Sake hoi zah accu ccu pali te avawpaw sarangpaw hae tuh nae hanlan anungsikuhpaw nynh thua.²¹Thuasalama sake hoi zah ccu pali te avawpaw sarangpaw hae lakuze laephi vawlan thohku nawpaw accu lae asaepaw ccu a hoipaw sarangpaw hae kha tuh na ae cih oh.²²Tuh-e hae kyaze: tungkhipaw phin, lungnaw phin te pynthu phin kha na ae kho oh.²³Thuasalama accu ccu pali te avawpaw ccangpaw sake hoipaw balyn kha tuh nae hanlan anungsikuh. Athyaa leipaw Sarangpaw hae

²⁴Hynh-e sarangpaw hae liate athyaa leipaw lang na tang cih oh; hynh-e hae kya-e achihpaw kha a typaw humhung zemah zete cia athyaa leipaw athua cih,²⁵te hynh-e hae kya-e achihpaw apyn kya-e hankhakheit kha a lahpaw humhung zemah a uccaw kha a sukuh cih zah zete cia athyaa leipaw athua cih.²⁶Accumakeih aphiakuh leipaw, looh akhaethui leipaw sarangpaw miakaw nae hanlan thyaa khyh; hynh-e hae kyaze sahkhakheit kha a typaw miakaw tuh athyaa leipaw athua cih.²⁷Ccu pali te cceihpaw sarangpaw hae lakuze a ccutin te cceihpaw balyn tuh nae hanlan thyaa khyh; achihpaw hynh-e hae kya-e ccangkhakheit kha a typaw humhung zemah zete cia athyaa leipaw athua cih,²⁸te achihpaw kha a phupaw tuh a uccaw kha a sukuh cih zah zete cia athyaa leipaw athua cih; hynh-e hae tuh nae hanlan athyaa leipaw nynh thua hae.

²⁹Laephi kya avawpaw ahysuepaw hae lakuze hynh-e hae hynh nae hanlan thyaa khyh: theihmung, pazu, innkyngpaw alepaw phin,³⁰tawhte, tang, innkyngpaw, laesia kya umpaw laeding te chihkua.³¹Avawpaw balyn lakuze hynh-e hae hynh nae hanlan thyaa khyh hae; hynh-e hae achihpaw ccangkhakheit kha a typaw humhung zemah zete cia athyaa leipaw athua cih.³²Te hynh-e hae achihpaw ccangkhakheit nynh a ccawphupaw ccangkhakheit, thing te raepaw uccaw, boeining, saphua, sungkua te mangpaw uccaw ccangkhakheit tuh a thu cih; tui lungkhu khe dung athua cih zah zete cia athyaa leipaw athua cih, tukoute athyaa cih.³³Te hynh-e hae lakuze ccangkhakheit nynh laephi ang lungkhu lang a ccaw lanze, a lungkhu umpaw balyn tuh thyaa vae khyh, te tuh-e laephi ang kha na koi cih.³⁴Tuh-e ang lungkhu e tui nynh a ccawphupaw aepaw looh ccangkhakheit tuh athyaa leipaw athua vae cih; tuhcihawpaw ang ccangkhakheit lungkhu a umpaw niapaw atui miakaw tuh athyaa leipaw athua cih.³⁵Tuh-e achihpaw apyn kya-e ccangkhakheit nynh a ccawphupaw pawpaw balyn tuh athyaa leipaw athua cih; takuamaee thuasah, maeephu thuasah ro athua cih; tuh-e hae tuh thyaa khyh hae zah nae hanlan athyaa leipaw athua cih hae.³⁶Thuasalama tuidy thuasah, tui tungnawpaw tuikua thuasah athyaa cih, tuhzemah tuh-e alungkhu umpaw achihpaw kha a typaw pawpaw zemah athyaa leipaw athua cih.³⁷Tuh-e achihpaw apyn kya-e ccangkhakheit nynh tuu lan cite nungpaw ccacii vawlan khe a ccawphu zemah, tuh-e ccacii tuh athyaa.³⁸thuasalama tui kya dung athuapaw ccacii vawlan khe achihpaw apyn kya-e ccangkhakheit nynh a ccawphu lanze, tuh-e tuh nae hanlan thyaa khyh.

³⁹Na la ae oh paw phin sarangpaw nynh a chi lanze, tuh-e achihpaw kha a typaw tuh zete cia athyaa leipaw athua cih.⁴⁰Tuh-e achihpaw kha a ae hae paw tuh mih boeining kha a sukuh cih hae zah zete cia athyaa leipaw athua cih hae; te achihpaw kha a phu hae paw tuh mih boeining kha a sukuh cih hae zah zete cia athyaa leipaw athua cih hae.

⁴¹Laephi kya avawpaw ahysuepaw balyn tuh anungsikuh hae; tuh-e hae tuh ae lanpaw thua khyh hae.⁴²A vue te a vawpaw pawpaw zemah thuasah, accu ccu pali te avawpaw pawpaw zemah thuasah, ccu patae a hoipaw pawpaw zemah thuasah, laephi kya avawpaw ahysuepaw balyn thuasah na ae lan khyh oh; pawccecize tuh-e hae tuh a nungsikuh hae.⁴³Avawpaw ahysuepaw ccangkhakheit keiccuze naemaw nynh naemaw kha anungsikuhpaw lang na raekuh lan khyh oh; hynh-e hae hynhte naemaw nynh naemaw kha na thusakuh lan khyh oh, athyaa leipaw lang na tangsei cih oh.⁴⁴Pawccecize kae tuh nae Pachia Bawipaw nynh ka thua; tukeiccu naemaw te naemaw kha thyaasakuh oh. Kae tuh ka thyaa keiccuze nanning mah thyaa oh. Laephi vawlan ahysuepaw avawpaw ccangkhakheit keiccuze naemaw te naemaw kha na thusakuh lan khyh oh.⁴⁵Pawccecize kae tuh nae Pachia thua khylan Izip ram kyate ae poukhae oh paw Bawipaw nynh ka thua; nanning tuh na thyaa cih oh, pawccecize kae tuh ka thyaa, a cipya hae.

⁴⁶E hynh sarangpaw, pavaw te tui kya a zeihthyapaw ahiinpaw ahysuepaw miakaw te laephi vawlan a vawthyapaw ahysuepaw miakaw te asekuhpaw upadi,⁴⁷athyaapaw te athyaa leipaw laku, ae lanpaw ahiinpaw ahysuepaw te ae lei lanpaw ahiinpaw ahysuepaw laku laesahnawpaw kawbya nynh thua. Ccaaw Pui koute Nopi hae Thyaasahnaw

¹Bawipaw nynh Moses kha,²Israel ccungccaw hae kyakhe hynhte hopah hae:
Nopinung nynh ccaawpoi zah ccapaw a saah lanze, nin sari lungkhu athyaa leipaw athua cih; nopiny a ny ccyh lya hawte athyaa leipaw athua cih.³Nin taryanaw nin khe ccapaw a vingdung kha aw athua cih.⁴Tuh-e nopinung chii athyaanaw ccyh tuh sung thum nin thum athua cih; athyaanaw nin accing mawlaezung athyaapaw ccangkhakheit kha ty lan khyh, beikinnthyaa lungkhu lang mah cceih lan khyh.⁵Tuh-e nopinung nynh ccanung kha a saah lanze, nopiny a ny lya hawte lonaw naw ning lungkhu athyaa leipaw athua cih; tuh-e nopinung chii athyaanaw ccyh tuh sung taruh nin taruh athua cih.

⁶Ccapaw hanlan thuasah, ccanung hanlan thuasah, tuh-e nopinung a thyaanaw nin he accing te, maee-ute silawnaw hanlan kum kheit acihpaw tuutaw sa kheit kha thuasah, seithyaanaw silawnaw hanlan valaele sa kheit khyhze vahu anopaw sa kheit kha thuasah tungkunaw bu thuakaw kya ranpibawi kalan a thuakhae cih.⁷Ranpibawi nynh tuh-e tuh Bawipaw malang a pya cih zah nopinung ccelang seingaethyanaw a raepah cih; oute a chii luanaw kyate a thyaa cih. E hynh ccapaw thuasah, ccanung thuasah ccaaw a saahpaw nopi hanlan upadi athua cih.⁸Nopinung nynh tuu sa kheit kha a taening khyh ze, vahu anopaw sa ning khyhze valaele sa ning kha, maee-ute silawnaw lang sa kheit, seithyaanaw silawnaw lang sa kheit a ccyng cih; te ranpibawi nynh nopinung ccelang seingaethyanaw a raepah cih zah, tuh-e nung tuh a thyaa cih, a cipya. Vaethya Ccinaw Aphuinphuin

¹Bawipaw nynh Moses te Aaron kha,

²Lukhakheit nynh a pyn kya-e a ving kya phinnaw thuasah, phawnaw thuasah, ccapoh rawnaw thuasah ccangkhakheit hoi zah vaethya ccinaw lang he a tang te, ranpibawi Aaron kalan khyhze ranpibawi athuapaw a ccapaw hae lukhakheit kalan cciakhae athua cih.³Ranpibawi nynh a pyn kya-e ccinaw kha a dopah cih, tuh-e ccinaw kya umpaw a ming tuh arawpaw lang tang zah a ccinaw tuh a pyn kya-e a ving laeze akhu huapaw alo lanze, tuh-e tuh vaethya ccinaw nynh thua; ranpibawi nynh a do koute aning tuh athyaa leipaw nynh thua cite a ho cih.⁴Thuasalama a pyn kya-e ccapoh arawpaw tuh raw zah a ving laeze khuhua khyh zah a ving kya umpaw a ming tuh araw khyh lanze, ranpibawi nynh ccinaw hoipaw kha nin sari lungkhu phang a khung cih.⁵Ranpibawi nynh nin sarinaw nin khe a do cih, te ccinaw tuh amaw maminte um zah a ving kya a pazaeku khyh lanze, ranpibawi nynh nin sari bua a khung ung cih.⁶Ranpibawi nynh nin sarinaw nin khe bua a do cih, te ccinaw tuh danhua zah a ving kya a pazaeku khyh lanze, ranpibawi nynh aning tuh athyaa cite a ho cih; tuh-e tuh aphaw huatawpaw nynh thua; te a boeining kha a sukuh cih zah a thyaa cih.⁷Thuasalama a thyaanaw hanlan ranpibawi kalan a dosaku koute aphawpaw tuh a ving kya a pazaeku lanze, ranpibawi kalan bua a dosakuh cih.⁸Ranpibawi nynh a do cih zah aphawpaw tuh a ving kya a pazaeku lanze, ranpibawi nynh aning tuh thyaa khyh cite a ho cih; tuh-e tuh vaethya ccinaw nynh thua.

⁹Lukhakheit tuh vaethya ccinaw a kae lanze, ranpibawi kalan thuakhae athua cih.¹⁰Ranpibawi nynh a do cih, te a ving kya umpaw arawpaw ming lang a tang vae paw arawpaw tuh um zah a phinnaw kya-e ngesaw tuh acia lanze,¹¹tuh-e tuh a pyn kya umpaw vaethya arynpaw nynh thua. Ranpibawi nynh aning tuh thyaa khyh cite a ho cih zah phang khung lan khyh, pawccecize aning tuh a thyaa leipaw nynh thua.¹²Thuasalama ccinaw tuh a ving kya langkuh zah ranpibawi nynh phe a muih kho lan ciate a lu kyate a ccu kyacia ccinaw a hoitupaw a pyn balyn kya phe alekuh vae lanze,¹³ranpibawi nynh a do cih zah ccinaw nynh a pyn balyn kya pong alekuh vae zetuh, ranpibawi nynh aning tuh ccinaw kyate athyaa cite a ho cih; a pyn balyn phe araw vae keiccuze aning tuh athyaa.¹⁴Thuasalama a tungvaw kya aciapaw ngesaw a langku zetuh aning tuh thyaa khyh;¹⁵ranpibawi nynh aciapaw ngesaw kha a do cih zah aning tuh thyaa khyh cite a ho cih. Aciapaw ngesaw tuh thyaa khyh, pawccecize tuh-e tuh vaethya ccinaw nynh thua.¹⁶Thuasalama aciapaw ngesaw tuh arawpaw lang bua a tang zetuh ranpibawi kalan a cceih cih;¹⁷ranpibawi nynh a do cih zah tuh-e ccinaw tuh arawpaw lang a tang vae ze, ranpibawi nynh ccinaw hoitupaw kha athyaa cite a ho cih. Aning tuh athyaa.

¹⁸Lukhakheit a pyn kyakhe balyh um zah phe ahoy koute,¹⁹tuh-e balyh a umnaw kyakhe arawpaw aphinpaw thuasah, se zah arawpaw lante ccapoh rawpaw thuasah, he a langku ze, tuh-e tuh ranpibawi kalan a dosakuh cih.²⁰Ranpibawi nynh he a do te, tuh-e tuh a ving laeze khuhua zah, a ming tuh arawpaw lang a tang vae ze, ranpibawi nynh aning tuh thyaa khyh cite a ho cih, hynh-e tuh balyh kyate a poupaw vaethya ccinaw nynh thua.²¹Thuasalama ranpibawi nynh do zah avawlan umpaw a ming tuh raw leite a ving laeze khuhua khyh zah a danthung lanze, ranpibawi nynh nin sari lungkhu phang a khung cih.²²Tuh-e tuh a ving kya a pazaeku lanze, ranpibawi nynh aning tuh thyaa khyh cite a ho cih; tuh-e tuh ccinaw nynh thua.²³Thuasalama ccapoh rawpaw tuh san kheit kya kyalya um zah a pazaeku khyh lanze, tuh-e tuh balyh adaelaepaw nynh thua; ranpibawi nynh aning tuh a thyaa cite a ho cih.

²⁴Tuhkhyhze, a ving kha maee nynh u zah, tuh-e maee-unaw kya-e aciapaw ngesaw tuh ccapoh rawpaw lang tang zah sedaduh lante araw ze thuasah, phe araw ze thuasah²⁵ranpibawi nynh tuh-e tuh a do cih. Ccapoh rawpaw kya umpaw a ming tuh raw zah a ving laeze akhu huapaw lante a langku lanze, tuh-e tuh vaethya ccinaw thua zah maee a unaw kya a langkuhpaw nynh thua, ranpibawi nynh aning tuh thyaa khyh cite a ho cih. E tuh vaethya ccinaw nynh thua.²⁶Thuasalama ranpibawi nynh do zah ccapoh rawpaw kya-e aming tuh raw zah a ving laeze khuhua leite azyabung lanze, ranpibawi nynh amaw kha nin sari lungkhu phang a khung cih.²⁷Ranpibawi nynh nin sarinaw nin kya a do cih; a ving kya a pazaeku lanze, ranpibawi nynh aning tuh thyaa khyh cite a ho cih. E tuh vaethya ccinaw nynh thua.²⁸Thuasalama ccapoh rawpaw tuh san kheit kya um zah a ving kya pazaeku leite azyabung lanze, tuh-e tuh maee-unaw kyate aphinpaw thua zah ranpibawi nynh aning tuh athyaa cite a ho cih; pawccecize tuh-e tuh maee-unaw adaelaepaw nynh thua.

²⁹Pise khyhze nopi lukhakheit tuh a lu vawlan khyhze a khawming kya ccinaw a hoi lanze,³⁰ranpibawi nynh ccinaw kha a do cih. Tuh-e tuh a ving laeze akhuhua lante langkuh zah, tuin kya umpaw a ming tuh pahsadya lante amepaw zong lang a tang ze, ranpibawi nynh aning tuh thyaa khyh cite a ho cih; tuh-e tuh a lu khyhze a khawming kya-e athahpaw vaethya ccinaw nynh thua.³¹Ranpibawi nynh laethah ccinaw kha do zah a ving laeze akhuhua lante langku leite tuin kya amanpaw ming a um khyh lanze, ranpibawi nynh laethah ccinaw a hoitupaw kha nin sari lungkhu phang a khung cih.³²Nin sarinaw nin khe ranpibawi nynh laethah kha a do cih; laethah tuh pazaekuh khyh zah tuin kya ming amepaw um leite, laethah tuh a ving laeze akhuhua lante a langku khyh lanze,³³aning nynh a ming kha a ngokuh cih, thuasalama laethah a umnaw e a ming kha tuh ngo lan khyh. Ranpibawi nynh laethah a kaepaw ccungccaw kha nin sari lungkhu phang a khung cih.³⁴Nin sarinaw nin khe ranpibawi nynh laethah kha a do cih; laethah tuh a ving kya pazaekuh khyh zah a ving laeze akhuhua lante alangku khyh lanze, ranpibawi nynh aning tuh athyaa cite a ho cih. A boeining kha a sukuh cih zah a thyaa cih.³⁵Thuasalama aning tuh athyaa cite ho athua koute laethah tuh a ving kya a pazaeku lanze,³⁶ranpibawi nynh amaw kha a do cih. Laethah tuh a ving kya phe a pazaeku vae ze, ranpibawi nynh ming amepaw kha ccung ho vae khyh; aning tuh thyaa khyh.³⁷Thuasalama laethah tuh a mit kya pazaekuh lae khyh zah ming amanpaw tuh tuin kya asae vae ze, laethah tuh hoy vae zah, aning tuh athyaa vae; te ranpibawi nynh aning tuh athyaa vae cite a ho cih.

³⁸Pise khyhze nopi lukhakheit tuh a pyn kya ccapoh rawpaw, arawpaw a um lanze,³⁹ranpibawi nynh a do cih zah a pyn kya-e ccapoh rawpaw tuh raw phaphuhpaw athua lanze, tuh-e tuh a ving kyate alangkuhpaw nia nynh thua; aning tuh athyaa.

⁴⁰Lukhakheit tuh a lu kya-e a sang akuing lanze, aning tuh a lu anae, thuasalama aning tuh athyaa.⁴¹Aning tuh a terui te a nakalia kya-e a sang akuing lanze, a terui-o salamah a thyaa.⁴²Thuasalama a lu anaenaw kya khyhze a te-onaw kyakhe asepaw te arawpaw ccinaw ccapoh rawpaw kha a um lanze, tuh-e tuh a lunaenaw kya khyhze a terui-onaw kyakhate apoupaw vaethya ccinaw nynh thua.⁴³Ranpibawi nynh amaw kha a do cih; a lunaenaw kya khyhze a terui-onaw kyakhe aphinpaw ccinaw tuh asepaw lante raw zah a pyn kya vaethya ccinaw a poupaw alo lanze,⁴⁴aning tuh vaethya ccinaw a hoipaw thua zah thyaa khyh. Ranpibawi nynh aning tuh thyaa khyh cite a ho cih; a lu vawlan ccinaw a um.

⁴⁵Vaethya ccinaw a hoipaw tuh aseiikuhpaw boeining kha a lawkuh cih zah a sang tuh phuasalae lante a nung cih; te palung lang mung kha phang a huhkuh cih zah, “Thyaa khyh, thyaa khyh,” cite a sia cih.⁴⁶Aning tuh ccinaw a hoi lungkhu balyn athyaa leipaw athua cih; aning tuh thyaa khyh. Ryahmin atolang khe a makhaete a um cih.

⁴⁷Boeining te sekuh zah: vaethya ccinaw tuh boeining kya, saming boei kya thuasah, law te kuakuhpaw boeining kya thuasah,⁴⁸akuakuhpaw kya thuasah, tuuming te kuakuhpaw kya thuasah, tuuming kya thuasah, saphua kya thuasah, saphua te raepaw ccangkhakheit kya thuasah he a langkuh tuh,⁴⁹akuakuhpaw khyhze law kya thuasah, saphua kya thuasah, saphua te raepaw ccangkhakheit kya thuasah, ccinaw nynh boeining kyakhe ahinpaw khyhze asepaw lante a langkuh lanze, tuh-e tuh vaethya ccinaw thua zah ranpibawi kalan dosah athua cih.⁵⁰Ranpibawi nynh ccinaw kha a do cih zah ccinaw a umpaw boeining kha nin sari lungkhu phang a khung cih.⁵¹Nin sarinaw nin khe ccinaw kha a do cih. Ccinaw tuh boeining kya thuasah, akuakuhpaw kya thuasah, tuuming law kya thuasah, saphua kya thuasah, saphua kya mangpaw pawpaw kya zemah thuasah, pong a pazaeku vae zetuh, tuh-e tuh apazaekuh thyapaw vaethya ccinaw nynh thua, tuh-e tuh thyaa khyh.⁵²Ranpibawi nynh boeining ccinaw akaekuhpaw akuakuhpaw khyhze tuuming law kha thuasah, tuuming boei khyhze law te kuakuhpaw boeining kha thuasah, saphua kya-e ccangkhakheit kha thuasah maee te a u cih, pawccecize tuh-e tuh apazaekuh thyapaw vaethya ccinaw nynh thua; tuh-e tuh maee kya u athua cih.

⁵³Ranpibawi nynh do zah ccinaw tuh boeining kya, akuakuhpaw khyhze tuuming law kya thuasah, saphua kya-e ccangkhakheit kya thuasah, a pazaeku khyh lanze,⁵⁴ranpibawi nynh ccinaw alangkuhpaw uccaw kha su lan kaw a pya cih hae, te ranpibawi nynh tuh-e uccaw tuh nin sari lungkhu bua a khung ung cih.⁵⁵Ccinaw akaekuhpaw uccaw kha a suh kou hae te, ranpibawi nynh ccinaw kha a do cih. Ccinaw tuh a pazaeku khyh zemah ccinaw kaekuhpaw ccapoh rawpaw tuh azong a paleihku khyh zetuh ccinaw a pazaeku khyh zemah, tuh-e tuh thyaa khyh; tuh-e tuh maee kya na u cih, ccinaw akaekuhpaw ccapoh rawpaw tuh alungkhu kya thuasah, atolang kya thuasah, teitei a um zemah maee kya na u cih.

⁵⁶Ranpibawi nynh do zah tuh-e boeining tuh su koute ccinaw tuh a danthung zetuh, aning nynh boeining kya-e ccapoh rawpaw kya thuasah, akuakuhpaw kya thuasah, tuuming law kya thuasah, saphua kya thuasah abekuhpaw ccinaw kha thoh a seibia cih.⁵⁷Tuh-e tuh boeining kya thuasah, akuakuhpaw khyhze tuuming law kya thuasah, saphua ccangkhakheit kya thuasah bua alangku lanze, tuh-e tuh apazaekuhpaw nynh thua; ccinaw alangkunaw kha maee te na u cih.⁵⁸Thuasalama he na suh koute boeining, akuakuhpaw khyhze tuuming law, saphua ccangkhakheit kyate ccinaw kha a langku vae khyh zetuh, vaeningnaw bua na suh cih zah, tuh-e tuh athyaa vae cih.

⁵⁹E tuh tuuming te khyhze law te kuakuhpaw boeining kya thuasah, akuakuhpaw khyhze tuuming law kya thuasah, saphua te raepaw boeining kya thuasah a umpaw vaethya ccinaw tuh athyaa, thyaa khyh cipaw byapaenaw lanpaw phungzae nynh thua. Vaethya Ccinaw te Inn Thyaasahnaw

¹Bawipaw nynh Moses kha hynhte a hopya:²E hynh vaethya akaepaw nynh a thyaa ccyh kya a zui lanpaw phungzae athua cih:
Amaw kha ranpibawi kalan cciakhae athua cih;³ranpibawi nynh ryahmin atolang a cceih cih zah a do cih. Vaethya akaepaw ccungccaw tuh a ccinaw a dan vae lanze,⁴thyaasah athua cih paw ccungccaw hanlan hiin zah a thyaapaw pavaw sa ning, sidar thing te law asepaw te hyssop thing ange kha law lan ranpibawi nynh kaw a pya cih hae.⁵Ranpibawi nynh vadungtui a ruinkuhpaw laephi ang a vawlan khe pavaw sa kheit kha chia lan kaw a pya cih hae.⁶A hiinpaw pavaw kha sidar thing, law asepaw te hyssop thing ryte a lah cih zah, vadungtui vawlan chia a thuapaw pavaw chii kyakhe tuh-e hae tuh ahiinpaw pavaw ryte moh a dung cih.⁷thyaasah athua cih paw vaethya ccinaw akaepaw ccungccaw tungvaw khe tuh-e tuh vae sari a hei cih; tukoute ranpibawi nynh aning tuh a thyaa vae cite a ho cih zah ahiinpaw pavaw kha atolang po a zousah cih.⁸Thyaasah athua cih paw ccungccaw nynh a boeining kha a sukuh cih zah a ming balyn kha a ngokuh cih, te tui a singkuh cih zah athyaapaw athua vae cih. Tukoute ryahmin lungkhu lang a cceih cih, thuasalama a bu atolang khe nin sari a um cih.⁹Nin sarinaw nin khe a ming balyn: a sang, a khawming te a mitming kha a ngokuh cih; a ming balyn kha a ngokuh cih. Oute a boeining hae kha a sukuh cih zah a pyn kha a singkuh cih, te aning tuh a thyaa cih.

¹⁰Nin taryanaw nin khe douccahpaw tuutaw pise sa ning te douccahpaw tuutaw nopi sa kheit kum kheit acih vae paw kha thuasah, ccathae silawnaw hanlan chitui pykuhpaw vaekhui ahoypaw ephah pum haw pum thum te chitui lita pum thum pum kheit kha a lah cih.¹¹A thyaasahtu ranpibawi nynh a thyaasah cih paw ccungccaw kha hynh-e uccaw hae ryte Bawipaw kalan tungkunaw bu thuakaw kyakhe a nung cih.¹²Ranpibawi nynh tuutaw pise hae kyaze sa kheit kha a lah cih zah chitui lita pum thum pum kheit ryte cyiseinaw silawnaw lante a pya cih, te tuh-e hae tuh Bawipaw malang khe hangthung-hebiate silawnaw lante a hangthung cih.¹³Aning nynh seishawnaw silawnawpaw te maee-ute silawnawpaw kha chia a thuanaw hae, hminthyaa kyakhe tuh-e tuutaw kha a theih cih; pawccecize cyiseinaw silawnaw tuh seithyaanaw silawnaw hawte ranpibawi kya-e nynh thua: tuh-e tuh athyaa huapaw nynh thua.¹⁴Ranpibawi nynh cyiseinaw silawnaw kya-e chii abang kha a lah cih zah thyaasah athua cih paw ccungccaw a ranglang nakua alia lang, a ranglang kuihpi te a ranglang ccupi kyakhe a noi cih.¹⁵Ranpibawi nynh chitui abang kha a lah cih zah amaw a voilang kuihphe kyakhe a bu cih,¹⁶te a ranglang kuihdung kha a voilang kuih kya umpaw chitui kyakhe a dung cih a kuihdung khate chitui abang kha Bawipaw malang khe vae sari a hei cih.¹⁷Ranpibawi nynh a kuih kya alaepaw chitui abang kha thyaasah athua cih paw ccungccaw a ranglang nakua alia lang, a ranglang kuihpi te a ranglang ccupi kya noikuhpaw cyiseinaw silawnaw achii vawlan khe a noichih cih.¹⁸Ranpibawi nynh a kuih kya alaepaw chitui kha thyaasah athua cih paw ccungccaw a lu vawlan khe a thuh cih. Oute aning nynh tuh-e ccungccaw hanlan seingaethyanaw kha Bawipaw malang a raepah cih:¹⁹a thyaa khyhnaw kyate thyaasah athua cih paw ccungccaw hanlan seingaethyanaw kha raepya khylan ranpibawi nynh seithyaanaw silawnaw kha a rae cih. Tukoute maee-ute silawnawpaw kha a theih cih;²⁰te ranpibawi nynh silawhang vawlan khe maee-ute silawnaw te ccathae silawnaw kha a rae cih. Ou tuhte ranpibawi nynh tuh-e ccungccaw hanlan seingaethyanaw kha a raepah cih zah aning tuh a thyaa cih.

²¹Thuasalama a ryachi zah, tuhcih alung lan a taening khyh ze, cyiseinaw silawnaw hanlan tuutaw pise sa kheit kha thuasah, ccathae silawnaw hanlan chitui te pydepaw vaekhui ephah pumhaw pumkheit te chitui lita pum thum pum kheit kha thuasah a cciakhae cih. Cyiseinaw silawnaw tuh hangthungte pya athua cih, ou tuhte tuh-e ccungccaw ccelang seingaethyanaw kha raepya athua cih;²²a taening thyhte, vahu anopaw sa ning khyhze valaele sa ning kha, seithyaanaw silawnaw hanlan sa kheit, maee-ute silawnaw hanlan sa kheit a ccyng cih.²³Nin taryanaw nin khe tuh-e hae tuh a thyaanaw hanlan ranpibawi kalan, tungkunaw bu thuakaw pe, Bawipaw malang a thuakhae cih;²⁴te ranpibawi nynh cyiseinaw silawnaw tuutaw te chitui lita pum thum pum kheit kha a lah cih zah Bawipaw malang khe hangthung-hebiate silawnaw lante a hangthung cih.²⁵Ranpibawi nynh cyiseinaw silawnaw tuutaw kha a theih cih zah achii abang kha a lah cih, te thyaasah athua cih paw ccungccaw a ranglang nakua alia lang, a ranglang kuihpi te a ranglang ccupi kyakhe a noi cih.²⁶Ranpibawi nynh chitui abang kha amaw a voilang kuihphe kya a bu cih,²⁷te a voilang kuih kya umpaw chitui abang kha a ranglang kuihdung khate Bawipaw malang khe vae sari a hei cih.²⁸Ranpibawi nynh a kuih kya umpaw chitui abang kha thyaasah athua cih paw ccungccaw a ranglang nakua alia lang, a ranglang kuihpi te a ranglang ccupi, cyiseinaw silawnaw chii noi a thuanaw kyakhe a noi cih.²⁹Ranpibawi nynh thyaasah athua cih paw ccungccaw ccelang seingaethyanaw kha Bawipaw malang raepya khylan a kuih kya alaepaw chitui kha a lu vawlan khe a thuh cih.³⁰Te a taening thyhte, vahu anopaw khyhze valaele kha,³¹seithyaanaw silawnaw hanlan sa kheit, maee-ute silawnaw hanlan sa kheit, ccathae silawnaw ryte a pya cih; te ranpibawi nynh thyaasah a thuapaw ccungccaw ccelang Bawipaw malang khe seingaethyanaw kha a raepah cih.³²E tuh vaethya ccinaw hoi zah amaw a thyaanaw elang a taening leipaw ccungccaw hanlan phungzae nynh thua.

³³Bawipaw nynh Moses te Aaron kha hynhte a hopya hae:

³⁴Nanning ccou khylan kae pya oh paw Kanaan ram lungkhu he na thua oh te, na ccou oh paw ram kya umpaw innkhakheit kyakhe vaethya ccinaw ka thuasah lanze,³⁵inn a hoitu nynh ranpibawi kalan a cceih cih zah, “Ka inn kya ccinaw phinkhakheit a umpaw nynh lo,” cite a hopah cih.³⁶Ranpibawi nynh ccinaw do khylan a ccia mawkhe, inn kha ccawngsah han khylan kaw a pya cih hae, tuhkhyhze tuh inn kya umpaw balyn tuh athyaa leipaw lang a tang cih; tukoute ranpibawi nynh inn do khylan a tee cih.³⁷Aning nynh ccinaw kha a do cih; ccinaw tuh inn kya-e pang hae kyakhe ahin lante khyhze ase lante um zah, ccangpaw kya laeze akhuhua lante a langku lanze,³⁸ranpibawi tuh inn thuakaw atolang a pou cih zah inn kha nin sari lungkhu a khaw cih.³⁹Nin sarinaw nin khe ranpibawi tuh bua yn thua cih zah inn kha a do cih; ccinaw tuh inn kya-e pang hae kya a pazaeku vae ze,⁴⁰ccinaw alangkunaw lung hae kha poukhaete khua atolang umpaw athyaa leipaw hmin san kheit kyakhe vua oh cite ranpibawi nynh kaw a pya cih.⁴¹Tuh-e inn alungkhu e anglae rynpaw balyn kha a khawsah cih hae, te a khawnaw hae paw anglae kha khua atolang umpaw athyaa leipaw hmin kya a lae cih hae.⁴²Ccangpaw lung hae kha a lah cih hae zah atakaw e lung hae a umnaw kyakhe a nungru cih hae, te ccangpaw anglae kha a lah cih hae zah inn kha a be cih hae.

⁴³Aning nynh lung hae kha lah zah inn kya-e anglae rynpaw kha phe khawte bua a bethui koute, inn kya ccinaw bua alangku lanze,⁴⁴ranpibawi nynh a cceih cih zah a do cih; ccinaw tuh inn kya phe a pazaeku vae ze, tuh-e tuh inn kya umpaw apazaekuh thyapaw vaethya ccinaw nynh thua; tuh-e tuh thyaa khyh.⁴⁵Inn kha a phou cih, inn kya-e lung hae, thing hae te benawpaw anglae balyn kha khua atolang umpaw athyaa leipaw hmin kalan khe a cciakhae cih.⁴⁶Tuh-e inn kha phang khaw athua lyakhe, a lungkhu lang a teepaw balyn tuh zete cia thyaa lan khyh;⁴⁷te inn lungkhu a ih hae paw balyn nynh mih boeining kha a sukuh cih hae; te inn lungkhu a ae hae paw balyn nynh mih boeining kha a sukuh cih hae.

⁴⁸Inn kha anglae bethui athua koute ranpibawi nynh do zah inn kya ccinaw tuh a pazaeku vae khyh ze, ranpibawi nynh inn tuh athyaa cite a ho cih; ccinaw tuh dansah athua vae.⁴⁹Tuh-e inn athyaanaw hanlan pavaw sa ning kha sidar thing, asepaw laawrui, hyssop ryte a lah cih,⁵⁰te pavaw sa kheit kha laephi ang a lungkhu kya accaekuhpaw vadungtui vawlan khe a theih cih,⁵¹te sidar thing, hyssop, asepaw laawrui ryte ahiinpaw pavaw kha a lah cih zah, chia a thuapaw pavaw chii kya te vadungtui kyakhe a dung cih, te inn kha vaesari a hei cih.⁵²Tuhcite aning nynh inn kha pavaw chii, vadungtui, ahiinpaw pavaw, sidar thing, hyssop, asepaw laawrui khate a thyaasah cih;⁵³te ahiinpaw pavaw kha khua atolang ramkaw langkhe a zousah cih; tuhcite inn hanlan seingaethyanaw kha a raepah cih zah inn tuh a thyaa cih.

⁵⁴E hynh vaethya ccinaw aphuinphuin hanlan phungzae nynh thua; laethah hanlan thuasah,⁵⁵inn hae kya te boeining kya umpaw vaethya ccinaw hae hanlan thuasah,⁵⁶aphinpaw, aphawpaw te ccapoh rawpaw hanlan thuasah,⁵⁷hohtuhmou thyaa khyh zah, hohtuhmou athyaa cipaw riasah nawlan nynh thua. E hynh vaethya ccinaw hae hanlan phungzae nynh thua. Pyn kyate Apoupaw Anae

¹Bawipaw nynh Moses te Aaron kha,²Israel hae kyakhe hynhte hopah oh:
Pise lukhakheit nynh a ngesaw kyate anae apou lanze, tuh-e anae tuh nynh amaw kha athyaa leipaw lang a tangsah.³Tuh-e anae a hoitupaw kya-e thyaa leinaw tuh hynh-e nynh thua: a pyn kyate apoupaw anae tuh a pou lanze thuasah, phe a kang vae ze thuasah, tuh-e tuh a tungvaw thyaa leinaw nynh thua.⁴Anae a hoitupaw nynh a inaw ikhung miakaw tuh thyaa khyh; te a haungnawpaw pawpaw balyn mah thyaa lan khyh.⁵A ikhung a typaw miakaw tuh a uccaw kha a sukuh cih zah tui a singkuh cih, te aning tuh zete cia thyaa lan khyh.⁶Anae a hoitupaw nynh a haungnaw ccangkhakheit kya a haung hae paw balyn tuh mih boeining a sukuh cih hae zah tui a singkuh cih hae, te zete cia thyaa lan khyh hae.⁷Anae a poutupaw pyn kha a typaw balyn tuh mih boeining a sukuh cih hae zah, tui a singkuh cih hae, te zete cia thyaa lan khyh hae.⁸Anae a hoitupaw nynh athyaa hae paw kha a thoisei hae ze, mih boeining a sukuh cih hae zah tui a singkuh cih hae, te zete cia thyaa lan khyh hae.⁹Anae a hoitupaw nynh a ccikunawpaw khungnin miakaw tuh thyaa lan khyh.¹⁰Amaw akaw kya umpaw ccangkhakheit kha a typaw balyn tuh zete cia thyaa lan khyh, te tuhcihawpaw uccaw kha a phupaw balyn tuh boeining a sukuh cih hae zah tui a singkuh cih hae, te zete cia thyaa lan khyh hae.¹¹Anae a hoitupaw nynh a singku leipaw a kuih khate a hae paw ccungccaw balyn tuh mih boeining a sukuh cih hae zah tui a singkuh cih hae, te zete cia thyaa lan khyh hae.¹²Anae a hoitupaw nynh a typaw laephi ang miakaw kha koi athua cih; te thing angphe miakaw kha tui te sing athua cih.

¹³Anae a hoitupaw nynh tuh-e anae he athyaa koute a thyaanaw hanlan nin sari a ngaw cih; te a boeining kha vadungtui te a sukuh cih zah a pyn kha a singkuh cih, te aning tuh athyaa cih.¹⁴Nin taryanaw nin khe vahu anopaw sa ning khyhze valaele sa ning kha a lah cih zah Bawipaw malang tungkunaw bu thuakaw kalan cciate ranpibawi kha a pya cih.¹⁵Ranpibawi nynh sa kheit tuh seithyaanaw silawnaw hanlan, ccangpaw sa kheit tuh maee-ute silawnaw hanlan a mang cih; te ranpibawi nynh Bawipaw malang khe anae a hoipaw hanlan seingaethyanaw kha a raepah cih.

¹⁶Pise nynh a buatui apou lanze, a pyn balyn kha tui a singkuh cih zah zete cia thyaa lan khyh.¹⁷Buatui nynh a ccawphupaw boeining te raepaw thuasah, saving te raepaw thuasah pawpaw balyn kha tui te su athua cih, te zete cia thyaa lan khyh.¹⁸Pise nynh nopi te ihkheih hae zah buatui a pou lanze, parouhte tui a singkuh cih hae, te zete cia thyaa lan khyh hae.

¹⁹Nopi nynh nopiny a ny vae ze, nin sari lungkhu thyaa lan khyh, te tuh-e nopi kha a typaw humhung zemah zete cia thyaa lan khyh.²⁰A thyaa khyh lyaze a inawpaw pawpaw balyn mah thyaa lan khyh; a dahungnawpaw pawpaw balyn zemah thyaa lan khyh.²¹Tuh-e nopinung a ikhung kha a typaw humhung zemah a boeining a sukuh cih zah tui a singkuh cih, te zete cia thyaa lan khyh.²²A dahungnawpaw miakaw kha a typaw humhung zemah a boeining kha a sukuh cih zah tui a singkuh cih, te zete cia thyaa lan khyh;²³ikhung kha thuasah, a dahungnawpaw ccangkhakheit kha thuasah a ty lanze, tuh-e ccungccapaw tuh zete cia thyaa lan khyh.²⁴Pise lukhakheit nynh tuh-e nopinung te ihkheih hae zah nopi a thyaa leinaw tuh pise tungvaw accaw lanze, pise tuh nin sari lungkhu thyaa lan khyh; te pise nynh a inawpaw ikhung tuh thyaa lan khyh.

²⁵Nopi nynh nopiny a ny ccyh thua leite, nin patae a chii apou ze thuasah, nopiny a nyh koute a chii apou ze thuasah a chii apou nin balyn tuh po thyaa lan khyh; nopiny a ny nin lya hawmawte thyaa lan khyh.²⁶A chii apou nin balyn kya a inawpaw ikhung miakaw tuh nopiny a ny lya-e ikhung hawte tua athua cih; te a dahungnawpaw balyn tuh nopiny a ny lyaze a thyaa khyh hawte thyaa lan khyh.²⁷E uccaw hae a typaw humhung zemah thyaa lan khyh, a boeining a sukuh cih zah tui a singkuh cih, te zete cia thyaa lan khyh.²⁸A chii apoupaw kha athyaa koute nin sari he acih te, aning tuh athyaa cih.²⁹Nin taryanaw nin khe vahu anopaw sa ning khyhze valaele sa ning kha a lah cih zah tungkunaw bu thuakaw kya ranpibawi kalan a ccyng cih.³⁰Ranpibawi nynh sa kheit kha seithyaanaw silawnaw hanlan, ccangpaw sa kheit kha maee-ute silawnaw hanlan a mang cih; te ranpibawi nynh Bawipaw malang khe athyaa leipaw apoupaw tuh-e ccungccanung hanlan seingaethyanaw kha a raepah cih.

³¹Tuhcite Israel ccungccaw hae nynh minmin laku umpaw beikbu kha thusahte mih thyaa leinaw kya a chi khyh nawlan hae, mih thyaa leinaw kyakhate na phia cih hae.

³²E hynh anae a hoi hae paw hanlan phungzae nynh thua: a buatui pou zah tuh-e buatui liate a thyaa leipaw hanlan thuasah,³³nopiny a nyhpaw hanlan thuasah, humhung zemah nopi thuasah pise thuasah anae a hoipaw hanlan thuasah, athyaa leipaw nopi te a ihkheih paw pise hanlan thuasah phungzae nynh thua. Seingaethyanaw Nin

¹Aaron ccapaw hae lu ning nynh Bawipaw malang naekuh hae zah he a chih kou hae te, Bawipaw nynh Moses kha a hopya.²Bawipaw nynh Moses kha hynhte a hopya:
Na upaw Aaron nynh beikinnthyaa lungkhu lang, zokhawpaw boei a lungkhu lang, byakin thingkua vawlan umpaw ahu malang khe hohtuh ccyh zemah a tee khyh nawlan hopah, tuhkhyhze tuh a chih cih; pawccecize ahu vawlan maeking kyakhe ka langkuh cih.³Aaron nynh seithyaanaw silawnaw hanlan tangnuapaw anopaw sa kheit te maee-ute silawnaw hanlan tuutepaw sa kheit kha a thuakhae ze rou nynh hminthyaa lungkhu lang a tee cih.⁴Athyaapaw law te kuapaw angkile kha a kikuh cih, law te kuapaw langpatung kha a tungkuh cih, law te kuapaw taeccia kha a cciakuh cih zah law te kuapaw pungde kha a khungkuh cih; e hae hynh athyaapaw boeining nynh thua hae. A pyn kha tui a singkuh koute tuh-e boeining hae kha a lawkuh cih.⁵Seithyaanaw silawnaw hanlan miaatepaw sa ning te maee-ute silawnaw hanlan tuutepaw sa kheit kha Israel ccungccaw zapi kyate a lah cih.

⁶Aaron nynh amaw hanlan tangnuapaw khate seithyaanaw silawnaw a rae cih, te amaw te a innbyn hanlan seingaethyanaw kha a rae cih.⁷Miaa sa ning kha a cciakhae cih zah tungkunaw bu thuakaw kya Bawipaw malang khe a nung cih;⁸te Aaron nynh tuh-e miaa sa ning tuh Bawipaw hanlan sa kheit, Azazel hanlan sa kheit ccungthy a dung cih.⁹Ccungthydung zah Bawipaw hanlan accanpaw miaa kha a thuakhae cih zah silawnaw lante a pya cih;¹⁰thuasalama ccungthydung zah Azazel hanlan accanpaw miaa kha tuh a tungvaw seingaethyanaw rae khylan ahiin pite Bawipaw malang thuakhae athua cih, ramkaw e Azazel kalan saw athua cih.

¹¹Aaron nynh amaw hanlan seingaethyanaw rae nawlan tangnuapaw kha a thuakhae cih zah amaw hanlan te a innbyn hanlan seingaethyanaw kha a rae cih; amaw hanlan seithyaanaw silawnaw lante tangnuapaw kha a theih cih.¹²Bawipaw malang umpaw silawhang kyate maee-e phe beihpaw pakekhupaw kha a la cih zah, mynkhuh akhuipaw kha a kuihphe kaw ning phe beih lante ccyngte zokhawpaw boei alungkhu lang a teekhae cih.¹³mynkhuh kya-e akhuhpaw ahu nynh byakin thingkua vawlan umpaw ahu kha phang a bong ccaw cite, mynkhuh kha Bawipaw malang umpaw maee kyakhe a phung cih, tuhkhyhze tuh aning tuh a chih cih.¹⁴Tangnuapaw chii abang kha a lah cih zah a kuihdung te thingkua ahu vawlan khe a malang sang khate a hei cih, te thingkua ahu a malang khe mah a kuihdung te chii kha vae sari a hei cih.

¹⁵Ccungccaw hae hanlan athuapaw seishawnaw silawnawpaw miaa kha a theih cih zah a chii kha zokhawpaw boei alungkhu langkhe a teekhae cih, te tangnuapaw chii khate a la cyi hawte tuh-e miaa a chii khate thingkua ahu vawlan te a malang khe a hei cih.¹⁶Israel ccungccaw hae kya-e thyaa leinaw keiccu thuasah, mih cyiseimenaw keiccu thuasah, mih seinaw balyn keiccu thuasah beikinnthyaa hanlan seingaethyanaw kha a rae cih; Tuhcite mih thyaa leinaw laku kya minmin ryte phang a umkheih hae paw tungkunaw bu hanlan a rae cih.¹⁷Athyaapaw hmin kya seingaethyanaw rae khylan tee zah amaw hanlan, a innbyn hanlan te Israel zapi balyn hanlan seingaethyanaw a rae koute yn pou mawlaezung tungkunaw bu kya lu kheit sanmah um lan khyh.¹⁸Oute Bawipaw malang umpaw silawhang kalan a pou cih zah tuh-e silawhang hanlan seingaethyanaw kha a raepah cih, te tangnuapaw chii abang te miaa chii abang kha a lah cih zah silawhang a ki hae kha pong a thuh cih hae.¹⁹A kuihdung te chii abang kha silawhang vawlan vae sari a hei cih zah Israel ccungccaw hae kya-e thyaa leinaw kha ccirarihpaw lang a tangsah cih zah a thyaasah cih.

²⁰Athyaapaw hmin hanlan, tungkunaw bu hanlan te silawhang hanlan seingaethyanaw a raepaw kha he a thangsah te, ahiinpaw miaa kha a pya cih.²¹Oute Aaron nynh a kuih voi ning kha ahiinpaw miaa lu vawlan khe a khang cih, Israel ccungccaw hae kya-e cyiseimenaw balyn, kaw-einaw balyn te mih seinaw balyn kha a phy cih zah khah-e balyn kha miaa a lu vawlan khe a nung cih, te ramkaw lang cciakhae khylan naaw a thuapaw lukhakheit nynh a cciakhae cih.²²Tuh-e miaa nynh mih cyiseimenaw balyn kha ramkaw lang a phu cih; te miaa tuh ramkaw kya pazae saw athua cih.

²³Oute Aaron nynh tungkunaw bu lungkhu lang a tee cih, te hminthyaa lungkhu lang a ccia lyaze a lawkupaw law te kuakuhpaw boeining kha a khahkuh cih zah tuin kya a nungsya cih.²⁴Hminthyaa kya a pyn kha tui te a singkuh cih zah a boeining kha a lawkuh cih; oute yn pou cih zah amaw kya-e maee-ute silawnaw te ccungccaw hae kya-e maee-ute silawnaw kha a rae cih zah, amaw hanlan te ccungccaw hae hanlan seingaethyanaw kha a rae cih.²⁵Seishawnaw silawnawpaw kya-e atho kha silawhang vawlan khe maee te a u cih.²⁶Azazel hanlan accanpaw miaa kha a sawtupaw nynh a boeining kha tui te a sukuh cih zah, a pyn kha tui a singkuh cih, tukoute ryahmin lungkhu lang a tee kho cih.²⁷Hminthyaa kya seingaethyanaw rae nawlan cite mih chii kha teekhae athua hae paw seishawnaw silawnawpaw tangnuapaw te seishawnaw silawnawpaw miaa kha ryahmin atolang poukhae athua cih; te mih ving, mih saw te mih ia kha maee te u athua cih hae.²⁸Tuh-e hae kha maee te a utupaw tuh a boeining kha a sukuh cih zah a pyn kha tui te a singkuh cih, tukoute nynh ryahmin lungkhu lang a tee kho cih. Seingaethyanaw Nin Zuinaw

²⁹E hynh nanning elang zungzae hanlan phungbya athua cih: Sawpaw sah sarinaw kyaze nin hawnaw nin khe looh-ae na sung cih oh zah, ramccungccaw thuasah, nanning laku umpaw ramccang ccungccaw thuasah ryalaw na lah lan khyh oh.³⁰Pawccecize hynh-e nin khe nanning thyaasah khylan seingaethyanaw kha raepya na thua cih oh; nae seinaw balyn kyate Bawipaw malang na thyaa cih oh.³¹E hynh nae hanlan daebabi lan haeungnaw sabbath thua zah, looh-ae na sung cih oh; e tuh zungzae hanlan phungbya nynh thua.³²A paaw ryalawnaw kya ranpibawi lante ryalaw khylan chitui thuh a thuapaw te thyaasah a thuapaw ranpibawi nynh athyaapaw boeining, law te kuapaw boeining kha lawkute seingaethyanaw kha a rae cih.³³Beikinnthyaa hanlan seingaethyanaw a rae cih, tungkunaw bu hanlan te silawhang hanlan seingaethyanaw a rae cih, te ranpibawi hae hanlan te a pumkuh hae paw ccungccaw balyn hanlan seingaethyanaw a rae cih.³⁴E hynh nae hanlan zungzae tynpaw phungbya athua cih, Israel ccungccaw hae mih seinaw balyn hanlan kum kheit ze vaekheit seingaethyanaw rae athua cih. Te Bawipaw nynh kaw a pya thyhte Moses nynh a cyi. Sarangpaw hae Chianaw

¹Bawipaw nynh Moses kha hynhte a hopya:

²Aaron te a ccapaw hae te Israel ccungccaw balyn kha hynhte hopah hae: E hynh Bawipaw kya-e kawpyapaw nynh thua.³Israel ccungccaw lukhakheit nynh tangnuapaw thuasah, tuutaw thuasah, miaa thuasah ryahmin kya khyhze ryahmin atolang khe theih zah,⁴Bawipaw beikbu malang khe Bawipaw kalan tuh-e tuh ahlu lang pya khylan tungkunaw bu thuakaw kalan a thuakhae khyh lanze, tuh-e paw tuh chii luanaw hanlan seinaw a hoitu cite tua athua cih; aning nynh chii a luasah vae keiccuze a minphuin kyate vua athua cih.⁵E hynh Israel ccungccaw hae nynh ramkaw kyakhe mih pyapaw hae kha tungkunaw bu thuakaw kya umpaw ranpibawi kalan, Bawipaw kalan thuakhae hae zah, ccawkunaw silawnaw lante Bawipaw kalan a pya ccaw hae cipaw nynh thua.⁶Ranpibawi nynh tuh-e chii khate tungkunaw bu thuakaw kya umpaw Bawipaw kya-e silawhang kha a hei cih, te atho kha Bawipaw hanlan amynthuapaw lante maee te a u cih,⁷Tuhcite minmin nynh mimaw te mimaw a la ohhuakunaw hae miaa-khozi hae kalan khe si a lawnaw hae paw kha pya vae lan khyh hae. E hynh minmin mih she takyh kya zungzae hanlan phungbya athua cih.

⁸Te minmin kha hynhte hopah hin hae: Israel ccungccaw lukhakheit nynh thuasah, minmin laku umpaw ramccang ccungccaw lukhakheit nynh thuasah maee-ute silawnaw khyhze silawnaw kha rae zah,⁹Bawipaw kalan silaw khylan tungkunaw bu thuakaw kalan a thuakhae leipaw tuh a minphuin kyate vua athua cih. Kheepaw Chii Aenaw

¹⁰Israel ccungccaw lukhakheit nynh thuasah, minmin laku umpaw ramccang ccungccaw lukhakheit nynh thuasah pawpaw chii zemah a ae lanze, chii a aetupaw kyate ka maeleihtawkuh cih zah tuh-e ccungccaw kha a minphuin kyate ka vua cih.¹¹Pawccecize pynsaw hiinnaw tuh chii kya nynh a um; te nae hiinnaw hanlan silawhang vawlan khe seingaethyanaw rae nawlan chii kha kae pya vae oh; pawccecize chii tuh hiinnaw hanlan seingaethyanaw a raepaw chii nynh thua.¹²Tukeiccu Israel ccungccaw hae kalan ka hopya hae paw tuh: Nanning laku e humhung mah chii kha na ae lan khyh oh, nanning laku umpaw ramccang ccungccaw nynh mah chii kha ae lan khyh.¹³Te Israel ccungccaw lukhakheit nynh thuasah, nanning laku umpaw ramccang ccungccaw lukhakheit nynh thuasah sawde zah ae lanpaw sarangpaw khyhze pavaw kha a kaw zetuh a chii kha a lae cih zah laephi te a theithin cih.

¹⁴Pawccecize ahysuepaw miakaw hanlan a chii tuh a hiinnaw nynh thua; tukeiccu Israel ccungccaw hae kha hynhcite phe ka hopya vae hae: ahysuepaw pawpaw chii zemah na ae lan khyh oh, pawccecize ahysuepaw miakaw hiinnaw tuh a chii nynh thua; chii a aepaw humhung zemah vua athua cih.¹⁵Amaw chi lan a chihpaw saw kha thuasah, sarepaw nynh a teipaw saw kha thuasah, a aepaw ccungccaw balyn, ramccungccaw hae thuasah, ramccang ccungccaw hae thuasah, mih boeining kha a sukuh cih hae zah tui te a singkuh cih hae, zete cia thyaa lan khyh hae, tukoute a thyaa cih hae.¹⁶Thuasalama mih boeining kha sukuh khyh hae zah mih pyn kha mah a singku khyh hae zetuh mih cyiseinaw mee kha mimaw nynh a phu cih hae. Nopi Pise Seinaw te Asekuhpaw hae

¹Bawipaw nynh Moses kha hynhte a hopya:

²Israel ccungccaw hae kha hynhte hopah hae: Kae tuh Bawipaw nae Pachia nynh ka thua.³Na la umnaw oh Izip ram kya minmin nynh a cyi hae hawte na cyih lan khyh oh, te kae cciakhae cihnaw oh Kanaan ram kya minmin nynh a cyi hae hawte mah na cyih lan khyh oh. Mih phungbya kha na zui lan khyh oh.⁴Ka phungzae hae kha na zui cih oh zah ka phungbya hae kha na tynsah cih oh zah na zui cih oh: kae tuh Bawipaw nae Pachia nynh ka thua.⁵Ka phungbya hae te ka phungzae hae kha na zui cih oh; tuhcite cyi liate ccungccaw tuh a hiin cih: Kae tuh Bawipaw nynh ka thua.

⁶Nanning laku e humhung nynh mah amaw te anaekuhpaw uno lukhakheit ryte naekute nopi pise seinaw rae lan khyh: Kae tuh Bawipaw nynh ka thua.⁷Na nung te nopi pise seinaw raete na paaw kha thethyasah nan. Aning tuh na nung thua zah aning te nopi pise seinaw na rae lan khyh.⁸Na paaw zu te nopi pise seinaw na rae lan khyh; tuh-e raenaw nynh na paaw kha the a thyasah cih.⁹Innbyn bynkheit lungkhu a puipaw thuasah, ccanglang a puipaw thuasah, na ccianung athuapaw na paaw ccanung khyhze na nung ccanung te nopi pise seinaw na rae lan khyh.¹⁰Na ccapaw a ccanung khyhze na ccanung a ccanung te nopi pise seinaw na rae lan khyh, pawccecize tuh-e nynh nang kha the ae thyasah cih.¹¹Na paaw zu a ccanung, athuapaw na paaw nynh a saahpaw tuh na ccianung athua keiccuze aning te nopi pise seinaw na rae lan khyh.¹²Na paaw a ccianung te nopi pise seinaw na rae lan khyh; aning tuh na paaw te chiisaw anaekuh hae paw nynh thua.¹³Na nung a neitawnung te nopi pise seinaw na rae lan khyh, pawccecize aning tuh na nung te chiisaw anaekuh hae paw nynh thua.¹⁴Na paaw a upaw zu te thuasah, a neitawpaw zu te thuasah nopi pise seinaw na rae lan khyh, aning tuh na nung lanpaw nynh thua.¹⁵Na monung te nopi pise seinaw na rae lan khyh: aning tuh na ccapaw zu nynh thua; aning te nopi pise seinaw na rae lan khyh.¹⁶Na upaw zu te thuasah, na neitawpaw zu te thuasah nopi pise seinaw na rae lan khyh; tuh-e nynh na upaw khyhze na neitawpaw kha the a thyasah cih.¹⁷Nopinung te thuasah, a ccanung te thuasah, nopinung a ccapaw ccanung te khyhze nopinung a ccanung te thuasah nopi pise seinaw na rae lan khyh; minmin tuh nang te chiisaw na naekuh oh paw nynh thua hae; tuh-e tuh hoyleinaw nynh thua.¹⁸Te na zu phang a hiin lungkhu kya na zu te khungtaeku khylan a unung kha thuasah, a neitawnung kha thuasah zu lang na umkhae lan khyh.

¹⁹Nopinung nynh nopiny nyh zah a thyaa khyh lyakhe ikhae khylan na naenuakuh lan khyh.²⁰Na unopaw zu te nopi pise seinaw na rae lan khyh, tuh-e nopinung te namaw te namaw kha na thusakuh lan khyh.²¹Na ccaaw hae lukhakheit kha Molek pachia kalan silaw nawlan na pya lan khyh, tuhcite na Pachia min kha na thusah lan khyh: kae tuh Bawipaw nynh ka thua.²²Nopi te ihkheih hawte pise te pise na ihkheih lan khyh oh; tuh-e tuh anungsikupaw nynh thua.²³Sarangpaw sakhakheit te ihkheih te namaw te namaw kha thusakuh nan, nopi lukhakheit nynh mah sarangpaw te ihkheih khylan amaw te amaw kha pyakuh lan khyh: tuh-e tuh aphung thua leipaw ikheihnaw nynh thua.

²⁴Hynh-e hae ccangkhakheit cyite namaw te namaw kha thusakuh nan, pawccecize nae malang kyate ka dee cih hae paw minphuin hae nynh hynh-e cyisahnaw hae balyn hynhte mimaw te mimaw kha a thusahku hae.²⁵Tuhcite ram tuh a thu vae; ram tuh ahoy khyh keiccuze de ka tah zah ram nynh tuin kya um hae paw kha moh a lua hae.²⁶Thuasalama ka phungbya hae te ka phungzae hae kha na zui cih oh zah anungsikupaw kha ramccungccaw nynh thuasah, nanning laku umpaw ramccang ccungccaw nynh thuasah na rae lan khyh oh,²⁷(pawccecize nanning mawze ram kya a la um hae paw nynh hynh-e anungsikupaw balyn kha rae hae zah ram tuh a thu vae);²⁸tuhkhyhze tuh nanning mawze a la um hae paw kha ram nynh moh a la lua hae hawte, ram kha na thusah oh keiccuze ram nynh moh ae lohsei cih oh.²⁹Pawccecize humhung zemah hynh-e anungsikuhpaw ccangkhakheit kha a raepaw tuh a ccungccaw hae kyate vua athua cih hae.³⁰Tukeiccu nae malang rae a la thuapaw hynh-e anungsikuhpaw ccangkhakheit kha na rae khyh nawlan oh te tuh-e hae khate naemaw te naemaw kha na thusahku khyh nawlan oh, kaw kae pya oh paw kha na zui cih oh: kae tuh Bawipaw nae Pachia nynh ka thua. Phungzae, Ozia te Asekuhpaw Thyaanaw hae

¹Bawipaw nynh Moses kha hynhte a hopya:

²Israel ccungccaw zapi balyn kyakhe hynhte hopah hae: Nanning tuh na thyaa cih oh, pawccecize Bawipaw nae Pachia kae tuh ka thyaa.³Nanning balyn nynh nae nung te nae paaw kha saw na tua cih oh, ka sabbath hae kha na naawsah cih oh: kae tuh Bawipaw nae Pachia nynh ka thua.⁴Zohtuh hae kalan maeleihkuh nan oh, laeekupaw pachia hae kha naemaw elang raekuh nan oh: kae tuh Bawipaw nae Pachia nynh ka thua.

⁵Ccawkunaw silawnaw kha Bawipaw kalan he na rae oh ze, naemaw ccelang ccoupya athua lante pya oh.⁶Na pya nin oh khyhze awkhualan khe tuh-e tuh ae athua cih; nin thumnaw nin cia alaepaw miakaw kha maee te u athua cih.⁷Tuh-e tuh nin thumnaw nin khe ae athua lanze, tuh-e tuh anungsikuhpaw thua zah ccoupya thua lan khyh.⁸Tuh-e a aepaw balyn tuh Bawipaw kya-e athyaapaw kha phe a thusah vae keiccuze detahnaw a ing cih, tuhcihawpaw ccungccaw miakaw kha a ccungccaw hae kyate vua athua cih.

⁹Nae loo kya-e looh kha he na rue vae oh ze, nae loo akin-akae lang cia na rue lan khyh oh, looh na rue kou oh te, ccamua kha na suelua vae lan khyh oh.¹⁰Nae misu khokhu kya-e kha pong thang lan na lo lan khyh oh, nae misu khokhu e misu thae akhuakuhpaw kha pong na khuin lan khyh oh; khah-e hae kha ryachi hae te ramccang hae elang na cciatawpah cih oh: kae tuh Bawipaw nae Pachia nynh ka thua.

¹¹Na ruh lan khyh, ccungccaw na ling lan khyh; lu kheit te lu kheit na hynpakuh lan khyh oh.¹²Ka min phyate ahme lei lante thya na lawkuh lan khyh, na Pachia min kha na thusah lan khyh: Kae tuh Bawipaw nynh ka thua.

¹³Na innpaw uccaw kha lingte na lawkuh lan khyh, na ruh lan khyh; ryalahtu kya-e a ryalaw mee kha awkhua cia na nungkuh lan khyh.¹⁴A nawpanpaw kha na ruin na sang lan khyh, a mitmohpaw malang khe thykupawku lanpaw kha na nungkhaw lan khyh; na Pachia kha na rih cih: Kae tuh Bawipaw nynh ka thua.

¹⁵Ahme leipaw byapianaw kha na rae lan khyh; a ryachipaw kha na pankhae lan khyh zah alesaepaw kha mah a mae na do lan khyh: na innpaw kha dingnaw te bya na pia cih.¹⁶Milae thethya a hotu lante na ccungccaw hae laku na khiavuikuh lan khyh, na innpaw a hiinnaw kha rawsete thadyn nan.

¹⁷Na uno lukhakheit kha na thinlung kya na hua lan khyh; na innpaw nynh a cyiseinaw kha ahme thathyhte na hopah cih, tuhkhyhze tuh namaw te namaw kha seinaw na hoisaku cih.¹⁸Na ccungccaw lukhakheit kha na liaru lan khyh zah lung-ung na tungpah lan khyh, thuasalama na innpaw kha namaw hawkhate na sungsah cih: Kae tuh Bawipaw nynh ka thua.

¹⁹Ka phungbya hae kha na zui cih. Na sarangpaw hae kha aphuin lokuh leipaw te sahpawdesahkute ataw na thansah lan khyh hae; na loo kya ccacii phuin ning kha na ccoude lan khyh; aphuin lokuh leipaw uccaw phuin ning te raedepaw boeining kha na lawkuh lan khyh.

²⁰Ccangpaw pise hanlan haaw thua vae salamah luenaw pya athua loh leipaw te shawkhaw athua loh leipaw seenung lu kheit tuh pise lu kheit te nopi pise seinaw a rae hae ze, minmin tuh detahnaw a ing cih hae. Seenung tuh a lue loh leipaw athua keiccuze minmin tuh chia thua lan khyh hae;²¹thuasalama pisepaw nynh amaw elang tuutepaw sa kheit kha cyiseinaw silawnaw lante tungkunaw bu thuakaw kyakhe Bawipaw kalan a ccyng cih.²²Te tuh-e pisepaw a seinaw hanlan ranpibawi nynh cyiseinaw silawnawpaw tuutepaw khate Bawipaw malang khe seingaethyanaw kha a raepah cih; te tuh-e pisepaw a seinaw kha ngaethya athua cih.

²³Nanning nynh ram lungkhu lang na tee oh zah thingku aphuinphuin kha looh lang he na ling oh te, mih thingthae kha kheepaw thingthae lante na ria cih oh; tuh-e thingthae tuh nae hanlan kum thum lungkhu khee athua cih zah na ae lan khyh oh.²⁴Kum palinaw kum khe mih thingthae balyn tuh athyaa cih zah Bawipaw thehoysahnawpaw ahlu athua cih.²⁵Thuasalama kum pangawnaw kum khe mih thingthae tuh nanning elang houh alung lante a thae nawlan, mih thingthae kha na ae cih oh: Kae tuh Bawipaw nae Pachia nynh ka thua.

²⁶Pawpaw saw mah achii ryte na ae lan khyh oh. Kuihdokupaw beidin te naawthyanaw kha na mang lan khyh oh.²⁷Nae nakalia e nae sang kha na ngokuh lan khyh oh, nae khawming adung kha mah na ngokuh lan khyh oh.²⁸Achihpaw keiccuze na ngesaw kha na awkuh lan khyh, nae pyn kya apyaa na pyaakuh lan khyh: Kae tuh Bawipaw nynh ka thua.

²⁹Ram tuh a ohhuakuhpaw lang a tang khyh nawlan te ozia hoyleinaw te phe abia khyh nawlan, na ccanung kha ohhuanung lang tangsahte pawlangria leite um nan.³⁰Ka sabbath hae kha na sung cih zah ka beikinnthyaa kha saw na tua cih: Kae tuh Bawipaw nynh ka thua.

³¹Chihiinleihthya hae paw, apawe hae paw te mitleihthya hae paw kha doliakuh nan oh; minmin keiccuze na nungsiku khyh nawlan oh, minmin kha ccung nan oh: Kae tuh Bawipaw nae Pachia nynh ka thua.

³²Ataw vae paw malang khe na thadyn cih zah a kum tangpaw kha saw na tua cih; na Pachia kha na rih cih: Kae tuh Bawipaw nynh ka thua.

³³Nae ram kya ramccang ccungccaw nynh a umbua ze, tuh-e ccungccaw kha na theihrya lan khyh oh.³⁴Nae kya a um buapaw ramccang ccungccaw tuh nanning laku e ramccungccaw hawte athua cih; khah-e ramccang ccungccaw kha namaw toulou hawte na sungsah cih, pawccecize nanning tuh Izip ram kya ramccang hae nynh na thua oh: Kae tuh Bawipaw nae Pachia nynh ka thua.

³⁵Asaepaw, aripaw te alung-azyapaw tounaw kya na hyn lan khyh.³⁶Ahmepaw khinlung, ahmepaw zawccu, ahmepaw ephah, ahmepaw hin kha na mang cih oh: Kae tuh Izip ram kyate ae poukhae oh paw Bawipaw nae Pachia nynh ka thua.³⁷Ka phungbya balyn te ka phungzae balyn kha na zui cih oh zah na cyih cih oh: Kae tuh Bawipaw nynh ka thua. Athyaapaw Einaw keiccu Detahnaw hae

¹Bawipaw nynh Moses kha hynhte a hopya:²Israel ccungccaw hae kha hynhte bua hopah hin hae: Israel ccungccaw thuasah, Israel hae kya a um buapaw ramccang ccungccaw thuasah a ccaaw kha Molek pachia kalan a pyapaw tuh chia athua cih; ram kya-e ccungccaw hae nynh amaw kha lung te phe chih lan a deih cih hae.³Kamaw ccaccei nynh minmin kha ka maeleihtawkuh cih hae zah mih ccungccaw hae kyate ka vua cih hae, pawccecize ka beikinnthyaa kha thusah hae zah athyaapaw ka min kha thethyasahte mih ccaaw hae kha Molek pachia kalan a pya vae hae.⁴Te ram kya-e ccungccaw hae nynh Molek kalan mih ccaaw a pyatupaw kha mih mit phe masi hae zah khah-e paw kha a chia khyh hae zetuh,⁵kamaw ccaccei nynh minmin te mih innbyn hae kha ka maeleihtawkuh cih hae zah Molek kalan ohhuakunaw kya amaw te amaw kya a zuikuh hae paw balyn kha mih ccungccaw hae kyate ka vua cih hae.

⁶Lukhakheit nynh chihiinleihthyapaw apawepaw te mitleihthyapaw kalan cceih zah tuanaw a ngiaku hae zetuh, ka maeleihtawkuh cih zah a ccungccaw hae kyate ka vua cih.⁷Tukeiccu naemaw te naemaw kha thyaasakuh oh. Kae tuh Bawipaw nae Pachia ka thua keiccuze nanning tuh thyaa oh.⁸Ka phungbya hae kha tynsah oh lah zui oh; kae tuh Bawipaw nynh ka thua; nanning kha kae thyaasah oh.⁹A nung thuasah, a paaw thuasah thya a lawpaw balyn tuh chia athua cih hae; nung te paaw kha thya phe a law vae hae, mih chiise tuh mih tungvaw nynh a um.

¹⁰Pise lukhakheit nynh a innpaw zu te seinaw a rae hae ze, seinaw a rae hae paw parouh mawte chia athua cih hae.¹¹A paaw zu te a sei hae paw pise tuh a paaw kha maethya a lahpaw nynh thua; mih lu ning te chia athua cih hae; mih chiise tuh mih tungvaw nynh a um.¹²Pise lu kheit nynh a monung te a sei lan hae ze, mih lu ning te chia athua cih hae; minmin nynh aphung thua leite phe a sei vae hae, mih chiise tuh mih tungvaw nynh a um.¹³Pise lu kheit nynh pise kha nopi hawkhate a seikhae lanze, mih lu ning te anungsikupaw kha phe a rae vae hae; minmin tuh chia athua cih hae; mih chiise tuh mih tungvaw nynh a um.¹⁴Pise lu kheit nynh zu hoi zah a zu nung kha mah zu lang a umkhae lanze, tuh-e tuh hoyleinaw nynh thua. Nanning laku tuhcihawpaw hoyleinaw a um khyh nawlan, tuh-e lu thum hae kha phe chih lan maee te u athua cih hae.¹⁵Pise lukhakheit nynh sarangpaw kha ikhae zah a seikhae zetuh, amaw kha chia athua cih; tuh-e sarangpaw kha mah na theih cih oh.¹⁶Nopi lu kheit nynh sarangpaw sakhakheit kha naenuakuh zah ikhae zah a seikhae zetuh, tuh-e nopinung te sarangpaw kha na theih cih oh; minmin kha chia athua cih hae; mih chiise tuh mih tungvaw nynh a um.

¹⁷Pise lu kheit nynh amaw a ccianung athuapaw, a paaw ccanung khyhze a nung ccanung kha zu lang umkhae zah a ikhae lanze, tuh-e tuh maethya lan umpaw thua zah, minmin kha mih ccungccaw hae muihnaw kyate vua athua cih hae; tuh-e paw nynh a ccianung kha phe a ikhae vae keiccuze detahnaw a mue cih.¹⁸Pise lu kheit nynh nopiny a nyh cciamangpaw nopi te a ikheih hae ze, tuh-e paw nynh nopinung chii a luanaw kha langsah zah, nopinung nynh mah amaw a chii luanaw kha phe a langsah vae; mih lu ning te mih ccungccaw hae kyate vua athua cih hae.¹⁹Na nung a neitawnung khyhze a unung kha thuasah, na paaw ccianung kha thuasah na ikhae lan khyh, pawccecize tuh-e tuh ahmaw te anaekuhpaw puizia kha ikhaepaw nynh thua; a ihkheih hae paw tuh detahnaw a mue cih hae.²⁰Pise lu kheit nynh a paaw a upaw zu khyhze a neitaw zu kha a ikhae zetuh, a paaw a uno kha the a thyasahtu nynh thua. Minmin tuh detahnaw a ing cih hae; ccaawsaah leite a chih cih hae.²¹Pise lukhakheit nynh a upaw zu khyhze a neitawpaw zu kha zu lang a umkhae lanze, tuh-e tuh athyaa leipaw nynh thua; a upaw zu khyhze a neitawpaw zu kha a seikhae vae keiccuze minmin tuh ccaawsaah lan khyh hae.

²²Ka phungbya balyn te ka phungzae balyn kha na tynsah cih oh zah na zui cih oh, Tuhcite nynh nanning umnaw khylan kae cciakhaenaw oh, ram nynh nanning kha moh ae loh lan khyh oh.²³Nae malang kyate ka dee cih hae paw minphuin hae mih phung kha na zui lan khyh oh. Minmin nynh khah-e phung hae balyn a zui keiccu hae ze, ka hua hae.²⁴Mateitui te khoilutui a luanaw ram kha nae ram lang kae pya cih oh zah nanning nynh mih ram kha rho lang na ccou cih oh cite phe kae hopya vae oh. Kae tuh Bawipaw nae Pachia nynh ka thua; tuh-e ccungccaw hae kyate nanning kha phe kae phia vae oh.²⁵Tukeiccu nanning nynh sarangpaw athyaapaw te athyaa leipaw thuasah, pavaw athyaapaw te athyaa leipaw thuasah laesahnaw na rae cih oh; nae hanlan thyaa khyh cite laesahnaw ka rae vae paw sarangpaw, pavaw te laephi vawlan avawpaw ccangkhakheit khate naemaw te naemaw kha na nungsisakuh lan khyh oh.²⁶Nanning tuh kamaw elang na thyaa cih oh; pawccecize kamaw, Bawipaw tuh ka thyaa zah, nanning kha kamaw elang mingccang hae kyate phe kae phia vae oh.

²⁷Pise thuasah, nopi thuasah chihiinleihthyapaw apawepaw te mitleihthyapaw tuh chia athua cih; minmin kha lung te phe chih lan deih athua cih hae, mih chiise tuh mih tungvaw nynh a um. Ranpibawi hae Thyaanaw

¹Bawipaw nynh Moses kha hynhte a hopya: Ranpibawi hae Aaron ccapaw hae kha hynhte hopah hae: Humhung nynh mah a puizia hae laku e michi hanlan amaw te amaw kha thusakuh lan khyh,²amaw te anaekuh huapaw a vaeccaw hae: a nung, a paaw, a ccapaw, a ccanung, a u te a neitaw;³tuhawte vawpaw a hoi leipaw a ccianung liaccaw hanlan kha tuh a thusakuh kho.⁴Thuasalama a ccungccaw hae laku kya zuvaw umkheihnaw te asekuhpaw kya amaw te amaw kha thusakuh lan khyh.⁵Minmin nynh mih lu kha okuh lan khyh hae, mih khawming adung kha mah ngokuh lan khyh hae, mih ngesaw kha pawpaw kya mah awkuh lan khyh hae.⁶Minmin tuh mih Pachia hanlan a thyaa cih hae zah mih Pachia min kha thethyasah lan khyh hae; pawccecize minmin nynh maee te silawnaw Bawipaw kya-e ahlu, mih Pachia looh kha a pya keiccu hae ze, a thyaa cih hae.⁷Ohhuanung kha thuasah, thusah athua vae paw nopi kha thuasah zu lang hoi lan khyh hae, a vawpaw te a mahkuh hae paw nopi kha mah zu lang hoi lan khyh hae. Pawccecize minmin tuh mih Pachia elang athyaa hae paw nynh thua hae.⁸Nae Pachia kha looh a pyatu thua hae zah minmin kha athyaa hae paw lante na ccuepe cih oh; minmin tuh nanning elang a thyaa hae paw athua cih hae, pawccecize nanning ae thyaasahtu oh paw Bawipaw , kae tuh ka thyaa.⁹Ranpibawi ccanung nynh ohhuakunaw khate amaw te amaw kha a thethyasahku lanze, a paaw kha a thethyasah vae; amaw kha maee te phe chih lan u athua cih.

¹⁰A uno hae laeze hangthung thua zah a lu vawlan chitui thuh athua vae paw te boeining lawsahku khylan thyaasah athua vae paw ranpibawi tuh a sang kha phuasalae lan nung lan khyh, a boeining kha thoh sei lan khyh.¹¹Michi rhua a umnaw lang cceih lan khyh; a nung, a paaw elang heize amaw te amaw kha thusakuh lan khyh.¹²Beikinnthyaa atolang pou lan khyh zah a Pachia kya-e beikinnthyaa kha thethyasah lan khyh; pawccecize a Pachia kya-e thuhkupaw chitui athyaapaw tuh a tungvaw a um vae: Kae tuh Bawipaw nynh ka thua.¹³Liaccady athuapaw nopi kyalya kha zu lang a hoi cih.¹⁴Nomaenung, vawpaw te a phiakuh hae paw nopi, thusah athua vae paw nopi, ohhuanung, hynh-e hae lukhakheit kha zu lang hoi lan khyh. Amaw a phin kya-e liaccady kha zu lang a hoi cih,¹⁵A ccaaw hae kha a ccungccaw hae laku kya thethyasah lan khyh hae; pawccecize kae tuh Bawipaw nynh ka thua; kae nynh amaw kha ka thyaasah.

¹⁶Bawipaw nynh Moses kha hynhte a hopya:¹⁷Aaron kha hynhte hopah: Na ciihan hae mih she takyh kya ccaenaw a umpaw nynh a Pachia looh kha pya lan naekuh nan sah.¹⁸Pawccecize ccaenaw a umpaw, a mitmohpaw, a ccukhoupaw, a maesue arohpaw, a kuihccu myaryamaw asaepaw,¹⁹a ccu khyapaw, a kuih khyapaw,²⁰a kekypaw, ccungccaw anepaw a mit kya ccaenaw umpaw, thyapaw ccinaw a hoipaw, laethah a kaepaw, a tiin rohpaw nynh naekuh lan khyh.²¹Aaron ciihan kya-e ranpibawi ccaenaw umpaw nynh maee te silawnaw Bawipaw kya-e ahlu kha pya khylan naekuh lan khyh; aning tuh ccaenaw a um keiccuze a Pachia looh kha pya lan naekuh lan khyh.²²Aning nynh a Pachia looh athyaa kha thuasah, athyaa huapaw kha thuasah a ae cih.²³Thuasalama aning tuh ccaenaw a um keiccuze aning nynh ka beikinnthyaa hae kha a thethyasah khyh nawlan, zokhawpaw boei kalan te silawhang kalan naeku lan khyh. Pawccecize kae tuh Bawipaw nynh ka thua; kae nynh minmin kha ka thyaasah hae.²⁴Tuhcite Moses nynh Aaron te a ccapaw hae te Israel ccungccaw balyn kalan a hopya hae. Athyaapaw Ahlu hae Mangnaw

¹Bawipaw nynh Moses kha hynhte a hopya:²Aaron te a ccapaw hae nynh athyaapaw ka min kha the oun thyasah khyh nawlan hae, Israel ccungccaw hae nynh kamaw yn pya hae paw athyaapaw ahlu hae kha hoyte mang khylan hopah hae; kae tuh Bawipaw nynh ka thua.³Minmin kha hynhte hopah hae: Nae she takyh kya-e nae ciihan lukhakheit nynh, athyaa khyh ccyh lyakhe, Israel ccungccaw hae nynh Bawipaw kalan a pya hae paw athyaapaw ahlu pe lang a naeku lanze, amaw kha ka umnaw kyate vua athua cih: Kae tuh Bawipaw nynh ka thua.⁴Vaethya ccinaw khyhze vaenae a hoipaw Aaron ciihan lukhakheit nynh a ccinaw athyaa mawlaezung athyaapaw ahlu kha ae lan khyh. Humhung zemah michi keiccuze athyaa leipaw ccangkhakheit a typaw thuasah, a buatui apoupaw thuasah,⁵humhung zemah amaw kha a thusah khopaw avawpaw sarangpaw sakhakheit kha a typaw thuasah, amaw kha athyaa leipaw lang a tangsahpaw ccungccaw lukhakheit kha thuasah, athyaa leipaw ccangkhakheit keiccuze athupaw ccungccaw kha a typaw te, pawpaw tahawpaw thyaa khyhnaw keiccuze mah athyaa leipaw kha a typaw thuasah,⁶tuhcihawpaw lukhakheit kha a typaw ccungccaw tuh zete cia thyaa lan khyh zah a pyn kha tui te a singku khyh zetuh athyaapaw ahlu kha ae lan khyh.⁷Khuanin he accah te aning tuh athyaa cih; tukoute athyaapaw ahlu kha a ae cih, pawccecize tuh-e hae tuh amaw a looh nynh thua.⁸Amaw chi lan achihpaw saw khyhze sarepaw nynh a teipaw saw kha ae lan khyh, tuh-e saw liate athyaa leipaw lang a tangsei cih: Kae tuh Bawipaw nynh ka thua.⁹Minmin nynh seinaw kya a ccaw khyh nawlan hae, te beikinnthyaa kha a thethyasah keiccu hae ze, tuin kya a chi khyh nawlan hae, kaw ka pya hae paw kha a zui cih hae: Kae tuh Bawipaw nynh ka thua; kae nynh minmin kha ka thyaasah hae.

¹⁰Ccungccaw huataw nynh athyaapaw ahlu kha ae lan khyh. Ranpibawi a mikhia khyhze a hohpaw ccungccaw nynh mah athyaapaw ahlu kha ae lan khyh;¹¹thuasalama ranpibawi nynh a repaw lukhakheit nynh tuh khah-e hae kha a ae cih; te a inn kya a pui hae paw nynh mah a looh kha a ae cih hae.¹²Ranpibawi a ccanung nynh pise huataw te zuvaw lang a tang hae ze, athyaapaw ahlu kya-e pyapaw kha ae lan khyh;¹³thuasalama ranpibawi ccanung tuh phe a nomae ze thuasah, a vawpaw te a myaku hae ze thuasah, ccaawsaah leite, a liaccaw lya hawte a paaw inn lang bua yn ki zetuh, a paaw looh kha a ae cih. Ccungccaw huataw nynh tuh-e tuh ae lan khyh.¹⁴Lukhakheit nynh athyaapaw ahlu kha tuaku ty leite a aesei lanze, tuh-e ahlu mee pum pangaw pum kheit kha a biachih cih zah tuh-e athyaapaw ahlu kha ranpibawi kalan a pya cih.¹⁵Bawipaw kalan a pya hae paw Israel ccungccaw hae kya-e athyaapaw ahlu kha humhung nynh mah thusah lan khyh,¹⁶minmin kya-e athyaapaw ahlu kha a aesei keiccu hae ze, cyiseinaw silawnaw rae lan ciate mih tungvaw seinaw a hoi hae, pawccecize kae tuh Bawipaw nynh ka thua; kae nynh minmin kha ka thyaasah hae. Ccoupyapaw Ahlu

¹⁷Bawipaw nynh Moses kha hynhte a hopya:¹⁸Aaron te a ccapaw hae te Israel ccungccaw balyn kha hynhte hopah hae: Israel ccungccaw lukhakheit nynh thuasah, Israel hae kya a um buapaw ramccang ccungccaw lukhakheit nynh thuasah byakinkute a pyapaw ahlu khyhze amaw a lungtho thyhte Bawipaw kalan maee-u te a pyapaw ahlu kha he a pya vae ze,¹⁹amaw hanpaw lante ccoupya athua nawlan, douccahpaw tangnuapaw khyhze tuutepaw khyhze miaatepaw kha a pya cih.²⁰Ccaenaw umpaw kha na pya lan khyh, pawccecize tuh-e tuh namaw hanpaw lante ccoupya thua lan khyh.

²¹Lukhakheit nynh byakinkupaw ccingsahnaw kya thuasah, lungthote silawnaw kha thuasah, Bawipaw kalan ccawkunaw silawnaw kha vaetua phu kya-e khyhze, tuuphu kya-e khate he a rae vae ze, ccoupya athua nawlan, tuh-e tuh accingpaw athua cih; a pyn kya ccaenaw um lan khyh.²²A mitmohpaw, vaemaw muepaw, kuihccu accing leipaw, vaenae a hoipaw, laethah, aphawpaw, tuhcihawpaw sahiin-awvaw kha Bawipaw kalan na pya lan khyh, Bawipaw kalan maee te silawnaw ahlu lante silawhang vawlan na khang lan khyh.²³A ccu myaryamaw asaepaw khyhze myaryamaw adynpaw tangnuapaw khyhze tuutepaw kha lungtho thyhte pyapaw ahlu lang na pya cih; thuasalama tuh-e tuh byakinkupaw ahlu lang ccoupya thua lan khyh.²⁴A bualua aduinpaw, akoipaw, apeipaw, a vaemaw umpaw sahiin-awvaw kha Bawipaw kalan na pya lan khyh; tuhcihawpaw pyanaw kha nae ram lungkhu na rae lan khyh oh,²⁵ramccang ccungccaw kyate na mue oh paw tuhcihaw sahiin-awvaw kha Bawipaw nae Pachia looh lang na pya lan khyh oh; tuh-e hae tuh a pyn kya ccing khyh zah ccaenaw a um keiccuze nanning hanpaw lante ccoupya thua lan khyh hae.

²⁶Bawipaw nynh Moses kha hynhte a hopya:²⁷Tangnuapaw thuasah, tuu thuasah, miaa thuasah a pi nynh he a thang vae ze, a pi te nin sari a umkheih cih hae, nin taryanaw nin kyate vae tuh maee te silawnaw Bawipaw kya-e ahlu lante ccoupya athua vae cih.²⁸Thuasalama vaetua thuasah, tuu, miaa thuasah api te ataw parouhte nin kheit lungkhu kya na theih lan khyh oh.²⁹Bawipaw kalan lungtuanaw silawnaw kha he na rae vae oh ze, naemaw ccelang tuh-e tuh ccoupya athua nawlan, tuhcite si na lawkuh cih oh.³⁰Tuh-e nin khe ae athua cih; awkhualan awkhua cia ccapyh sanmah na laesah lan khyh oh: kae tuh Bawipaw nynh ka thua.

³¹Ou tuhte ka kawbya hae kha na tynsah cih oh zah na zui cih oh: kae tuh Bawipaw nynh ka thua.³²Israel ccungccaw hae laku kamaw kha thyaasah ka thua nawlan, athyaapaw ka min kha the na thyasah lan khyh oh: kae tuh Bawipaw nynh ka thua; kae nynh nanning kha kae thyaasah oh,³³kae tuh nae Pachia lang tang khylan Izip ram kyate ae poukhae oh paw nynh ka thua: kae tuh Bawipaw nynh ka thua. Accyh Khyapaw Poi hae

¹Bawipaw nynh Moses kha hynhte a hopya:²Israel ccungccaw hae kha hynhte hopah hae: E hae hynh athyaapaw pumkunaw lante na thaesah cih oh paw Bawipaw kya-e accyh khyapaw ka poi hae nynh thua hae. Sabbath, Kawtaw Poi, Ransi Phing leipaw Sanlou Poi

³Nin taruh lungkhu ryalaw law athua cih; thuasalama nin sarinaw nin tuh daebabi lan haeungpaw sabbath nin, athyaapaw pumkunaw nin athua cih; ryalaw na lah lan khyh oh; e nin tuh nae umnaw takyh kya Bawipaw hanlan sabbath nin nynh thua.

⁴E hae hynh khyapaw accyh kya minmin hanlan poi na tua lan oh paw Bawipaw hanlan ccyh khyapaw poi hae, athyaapaw pumkunaw nynh thua hae.⁵Masaty sawpaw nin haw lae pali nin, zetepakaw ccyh tuh Bawipaw kya-e kawtaw poi athua cih,⁶te tuh-e sawpaw nin haw lae pangaw nin tuh Bawipaw elang ransi phing leipaw sanlou poi athua cih; nin sari lungkhu ransi phing leipaw sanlou kha na ae cih oh.⁷Masaty nin khe athyaapaw pumkunaw kha na rae cih oh; nae ryalaw kha na lah lan khyh oh.⁸Nin sari lungkhu Bawipaw kalan maee te silawnaw kha na rae cih oh; nin sarinaw nin khe athyaapaw pumkunaw kha na rae cih oh; nae ryalaw kha na lah lan khyh oh. Thaety Silawnaw

⁹Bawipaw nynh Moses kha hynhte a hopya:¹⁰Israel ccungccaw hae kha hynhte hopah hae: Kae pya cih oh paw ram lungkhu lang na tee oh zah, looh he na rue oh te, na rue oh paw masaty ccavui kya-e ccathae kha ranpibawi kalan na cciakhae cih oh.¹¹Tuh-e ccathae tuh ccoupya na thua nawlan oh, ranpibawi nynh Bawipaw malang hangthungte a hebia cih; sabbath nin koute awkhualan khe ranpibawi nynh khah-e kha hangthungte a hebia cih.¹²Ccathae kha hangthungte na hebia nin oh khe, douccahpaw tuutaw kum kheit acihpaw khate Bawipaw kalan maee-ute silawnaw kha na rae cih oh.¹³Te tuh-e silawnaw te asekuhpaw ccathae silawnaw tuh chitui te pykuhpaw ahoypaw vaekhui ephah ccangkheit kya-e pum haw pum ning athua cih zah tuh-e tuh Bawipaw elang amynthuapaw, maee te silawnaw nynh thua; tuh-e silawnawpaw ryte pydepaw niapaw silawnaw tuh misutui hin ccangkheit kya-e pum pali pum kheit athua cih.¹⁴Nae Pachia kalan silawnawpaw na cciakhae nin oh athua makhia tuh sanlou thuasah, thoupaw ccathae thuasah, hinlalyhpaw thingthae-eccang thuasah na ae lan khyh oh: e tuh nae umnaw balyn kyaze nae she takyh kya zungzae hanlan phungbya nynh thua. Lonaw Poi (Nam 28.26-31)

¹⁵Te sabbath nin koute awkhualan, hangthung-hebiate silawnawpaw ccathae na cciakhae nin oh kyate lonaw naw sari phe ccing lan na ria cih oh.¹⁶Vaesarinaw sabbath nin koute awkhualan cia, nin sung pangaw kyacia na ria cih oh; oute athawpaw ccathae silawnaw kha Bawipaw kalan na pya cih oh.¹⁷Nae umnaw kyate ephah ccangkheit kya-e pum haw pum ning ccite, raepaw sanlou phe ning kha hangthung-hebiate silawnaw lante na cciakhae cih oh; tuh-e vaekhui te raepaw athua cih hae zah ransi te ruadepaw athua cih hae, Bawipaw elang thaety lante silawnawpaw athua cih.¹⁸Sanlou ryte douccahpaw tuutaw kum kheit acihpaw sa sari, anopaw tangnua sa kheit te tuutepaw sa ning kha na pya cih; tuh-e hae tuh minmin kya-e ccathae silawnaw, niapaw silawnaw ryte Bawipaw elang amynthuapaw, maee te silawnaw athua cih.¹⁹Seithyaanaw silawnaw hanlan miaatepaw sa kheit kha thuasah, ccawkunaw silawnaw hanlan kum kheit acihpaw tuutaw pise sa ning kha mah thuasah na pya cih oh.²⁰Ranpibawi nynh thaety sanlou kha tuutaw sa ning rykhate Bawipaw malang hangthung-hebiate silawnaw lante a hebia cih; tuh-e hae tuh ranpibawi elang Bawipaw malang athyaapaw athua cih hae.²¹Tuh-e nin khe thaesahkunaw na rae cih oh; athyaapaw pumkunaw kha na rae cih oh; nae ryalaw kha na lah lan khyh oh. E hynh nae umnaw balyn kyakhe nae she takyh kya zungzae hanlan phungbya athua cih.

²²Nae laephi kya-e looh kha he na rue vae oh ze, nae loo akin-akae cia na rue lan khyh oh, looh na rue kou oh te, ccamua kha na suelua vae lan khyh oh; khah-e hae kha ryachi hae te ramccang hae elang na cciatawpah cih oh: kae tuh Bawipaw nae Pachia nynh ka thua. Mungkae Tu Poi (Nam 29.1-6)

²³Bawipaw nynh Moses kha hynhte a hopya:²⁴Israel ccungccaw hae kha hynhte hopah hae: Sawpaw sah sarinaw, masaty nin khe daebabi lan na haeung cih oh, ning lei nawlan mungkae tu te athyaapaw pumkunaw kha na rae cih oh,²⁵Nae ryalaw kha na lah lan khyh oh; Bawipaw kalan maee te silawnaw kha na rae cih oh. Seingaethya Nin (Nam 29.7-11)

²⁶Bawipaw nynh Moses kha hynhte a hopya:²⁷Hynh-e sawpaw sah sarinaw, nin haw nin hynh seingaethya nin nynh thua; e hynh nanning elang athyaapaw pumkunaw nynh thua: naemaw te naemaw na taekuh cih oh zah Bawipaw kalan maee te silawnaw kha na rae cih oh.²⁸tuh-e nin kya rya na lah lan khyh oh; pawccecize tuh-e nin tuh Bawipaw nae Pachia malang nae hanlan seingaethyanaw rae nin nynh thua.²⁹Tuh-e nin kya amaw te amaw a taekuh leipaw miakaw tuh a ccungccaw hae kyate vua athua cih.³⁰Te tuh-e nin kya ryalaw ccangkhakheit kha a lahpaw miakaw tuh a ccungccaw hae laku kyate ka roh cih.³¹Pawpaw ryalaw mah na lah lan khyh oh: e tuh nae umnaw takyh kyakhe nae she takyh kya zungzae hanlan phungbya nynh thua.³²Tuh-e nin tuh daebabi lan haeung nin sabbath athua cih zah, naemaw te naemaw na taekuh cih oh; tuh-e sawpaw, nin takua nin, zetepakaw kyate awkhualan zetepakaw cia nae sabbath nin kha na naawsah cih oh. Bu Poi (Nam 29.12-40)

³³Bawipaw nynh Moses kha hynhte a hopya:³⁴Israel ccungccaw hae kha hynhte hopah hae: Hynh-e sawpaw sah sarinaw, nin haw lae pangaw nin kyate nin sari kyacia tuh Bawipaw hanlan bu poi athua cih.³⁵Masaty nin tuh athyaapaw pumku nin nynh thua; nae ryalaw kha na lah lan khyh oh.³⁶Nin sari lungkhu Bawipaw kalan maee te silawnaw kha na rae cih oh; nin taryanaw nin khe athyaapaw pumkunaw kha na rae cih oh zah, Bawipaw kalan maee te silawnaw kha na rae cih oh; e hynh aphutepaw pumkunaw nynh thua; nae ryalaw kha na lah lan khyh oh.

³⁷E poi hae tuh Bawipaw sabbath hae, na pyapaw lasung hae, Bawipaw kalan na pyapaw byakinnaw ahlu hae balyn te lungthote raepaw silawnaw hae, tuh-e hae balyn kha holeite, khyapaw accyh kyaze Bawipaw kalan maee te silawnaw ahlu hae—maee-ute silawnaw hae te ccathae silawnaw hae, silawnawpaw hae te niapaw silawnaw hae kha rae khylan athyaapaw pumkunaw rae lanpaw, accyh khyapaw Bawipaw poi hae nynh athua hae.

³⁹Ram lungkhu te apoupaw kha he na suelua kou oh te, sawpaw sah sarinaw, nin haw lae pangaw nin kyate Bawipaw poi kha nin sari lungkhu na tua cih oh; masaty nin khe daebabi lan na haeung cih oh zah, nin taryanaw nin mah daebabi lan na haeung cih oh.⁴⁰Masaty nin khe apuithyapaw thingku athae hae te suinpaluin ku ange hae te anaw abungthyapaw thingku ange hae te vawkhu kin apopaw aku kya-e anaw kha na lah cih oh zah Bawipaw nae Pachia malang nin sari lungkhu lungpawnaw na rae cih oh.⁴¹E poi hynh Bawipaw elang poi lante kum kheit ze nin sari na naawsah cih oh; nae she takyh kya zungzae elang phungbya athua cih, e poi hynh sawpaw sah sarinaw khe na tua cih oh.⁴²bu lungkhu nin sari na um cih oh; Israel ramccungccaw athuapaw balyn nynh bu lungkhu a um cih hae,⁴³tuh-e tuh Izip ram kyate he ka poukhae hae tuh, Israel hae kha bu kya ka umsah hae cipaw kha nae ciihan hae nynh a ny nawlan hae nynh thua: kae tuh Bawipaw nae Pachia nynh ka thua.

⁴⁴Ou tuhte accyh khya athuapaw Bawipaw poi hae kong kha Moses nynh Israel ccungccaw hae kyakhe a thaesah hae. Maeekhua (Exo 27.20-21)

¹Bawipaw nynh Moses kha hynhte a hopya:²Maee tyty a aw ccaw cite, maeekhua hanlan aphongkuhpaw oliv chitui athyaapaw kha kamaw kalan oun ccyng oh cite Israel ccungccaw hae kha kawpya hae.³Tungkunaw bu kya byakin thingkua zokhawpaw boei atolang, Bawipaw malang khe awkhua te zete cia maee tyty a rua nawlan Aaron nynh a paccyn cih; tuh-e tuh nae she takyh kya zungzae hanlan kawpya athua cih.⁴Aaron nynh sui ccite raekuhpaw maeekhuatung vawlan umpaw maeekhua hae kha Bawipaw malang khe tyty a paccyn cih. Boei Beikbu elang Sanlou

⁵Ahoypaw vaekhui kha na lah cih zah sanlou phe haw lae ning kha na thou cih; tuh-e sanlou phe kheit cci tuh ephah ccangkheit kya-e pum haw pum ning athua cih.⁶Tuh-e sanlou hae kha sui ccite raekuhpaw ccaboi vawlan khe ring kheit kyaze phe taruh ccite, ring ning lang na nung cih.⁷Tuh-e ring kheit cci kyakhe athyaapaw frankinsen kha na nung cih, tuh-e tuh Bawipaw kalan maee te silawnaw lante sanlou hanpaw liathui silawnaw athua cih.⁸Aaron nynh tuh-e sanlou kha sabbath nin takyh kya Bawipaw malang khe zungzae hanlan byakinnaw lante, Israel ccungccaw hae nynh a rae hae paw lante tyty a nung cih.⁹Tuh-e sanlou hae tuh hmin thyaapaw kya a ae cih hae paw Aaron te a ciihan elang athua cih, pawccecize tuh-e sanlou tuh Bawipaw kalan maee te silawnawpaw hae kyaze minmin nynh a ccou hae paw athyaa huaccepaw nynh thua, tuh-e tuh zungzae tynpaw phungbya nynh thua. Pachia Sarya Byahonaw te Detahnaw

¹⁰A paaw tuh Izip ccungccaw thua zah a nung tuh Israel ccungccaw a thuapaw pisepaw tuh Israel ccungccaw hae laku khe a cceihbua; tuh-e Israel nopinung a ccapaw te Israel ccungccapaw tuh ryahmin kyakhe a pekuh hae.¹¹Israel nopinung a ccapaw nynh thya a lawnaw kyakhe Pachia Min kha the a thyasah. Te amaw kha Moses kalan a cciakhae hae, a nung min tuh Shelomith, Dan phin kya-e Dibri ccanung nynh thua.¹²Bawipaw kya-e byapaenaw kha minmin kalan thaesah athua makhia tuh tuh-e paw kha phang a khung hae.

¹³Bawipaw nynh Moses kha hynhte a hopya:¹⁴Bawipaw Min sarya bya a hopaw kha ryahmin atolang poukhae; a bya a thae hae paw balyn nynh a lu vawlan khe mih kuih khang hae sah, te zapi balyn nynh amaw kha lung te deih hae sah.¹⁵Te Israel ccungccaw hae kha hynhte hopah hae: Pachia kha thya a lawpaw miakaw tuh a seinaw mee kha a ing cih.¹⁶Bawipaw min kha saryanaw bya a hopaw tuh chia athua cih; zapi balyn nynh tuh-e saryanaw bya a hopaw kha lung te a deih cih hae. Ramccungccaw thuasah, ramccang ccungccaw thuasah Bawipaw Min kha sarya bya a hopaw tuh chia athua cih.¹⁷Ccungccaw a theihpaw tuh chia athua cih.¹⁸Sarangpaw a theihpaw nynh tuh-e a chiapaw hanlan, hiinnaw hanpaw hiinnaw kha a pyaru cih.¹⁹Lukhakheit nynh milaepaw a pyn kya-e hankhakheit kha a rosah ze, tuh-e thyhte a teing ru cih:²⁰ru khyanaw hanlan ru khyanaw thuasah, mit hanpaw mit thuasah, haw hanpaw haw thuasah teing ru athua cih; ming hae kha vaemaw a muesah paw tuh amaw tungvaw mah vaemaw muesah ru athua cih.²¹Sarangpaw a theihpaw nynh tuh-e a chiapaw hanlan a pyaru cih; thuasalama ccungccaw a theihpaw tuh chia athua cih.²²Ramccang ccungccaw hanlan te ramccungccaw hanlan upadi ccangkheit kyalya na hoi cih oh; pawccecize kae tuh Bawipaw nae Pachia nynh ka thua.²³Moses nynh Israel ccungccaw hae kha tuhcite a hopya hae; te minmin nynh Pachia saryanaw bya a hopaw kha ryahmin atolang sue hae zah lung te phe chih lan a deih hae. Bawipaw nynh Moses kha kaw a pya thyhte Israel ccungccaw hae nynh a cyi hae. Sabbath Kum (Deu 15.1-11)

¹Bawipaw nynh Moses kha Sinai Mua vawlan khe hynhte a hopya:²Israel ccungccaw hae kyakhe hynhte hopah hae: Kae pya cih oh paw ram lungkhu lang he na tee oh te, tuh-e ram nynh Bawipaw elang sabbath a naawsah cih.³Kum taruh lungkhu nae loo kya na ccou cih oh zah kum taruh lungkhu nae misu khokhu kya-e akaran kha na baepah cih oh zah athae kha na suelua cih oh;⁴thuasalama kum sarinaw kum kya tuh ram hanlan daebabi lan haeungpaw sabbath, Bawipaw hanlan sabbath athua cih: nae loo kya na ccou lan khyh oh zah nae misu khokhu kya-e akaran hae kha mah na cciccae lan khyh oh.⁵Amaw po lan apopaw kya-e kha na rue lan khyh oh zah akaran na cciccae lei oh paw kya-e misu thae mah na suelua lan khyh oh: tuh-e kum tuh ram hanlan daebabi lan haeung kum athua cih.⁶Ram sabbath lungkhu kya ram nynh a pousahpaw kha namaw, na seenung hae te na seepaw hae, na hoh hae paw te naemaw kya a um hae paw ramccang hae nynh na ae cih oh;⁷ram nynh a pousahpaw balyn tuh nae sahiin-awvaw hanlan te nae ram kya umpaw loramsaw hanlan looh athua cih. Jubilee Kum

⁸Sabbath vaesarinaw hae kum aro ccyh tuh sung pali kum takua athua nawlan, sabbath kum kha vaesari leit sari na ria cih oh.⁹Oute mungkae kha myarya ccae lan na tu cih oh; sawpaw sah sarinaw nin haw nin kya seingaethyanaw rae nin khe nae ram balyn kya phe lekuh lan mungkae kha na tu cih oh.¹⁰Te kum sung pangawnaw kum kha taekhiate na thyaasah cih oh zah ram lungkhu um hae paw balyn kyakhe luenaw kha na thaesah cih oh. Tuh-e tuh nanning elang jubilee athua cih: nanning lu kheit cci nynh na hoi oh paw kha bua na mue cih oh zah, nae innbyn raveih lang na ki cih oh.¹¹Tuh-e sung pangawnaw kum tuh nanning elang jubilee athua cih; ccacii na ccou lan khyh oh, amaw po lan a popaw kha na rue lan khyh oh, akaran na cciccae lei oh paw kya-e misu thae kha na rue lan khyh oh.¹²Pawccecize jubilee nynh thua; jubilee tuh nanning elang athyaapaw athua cih: loo kyate apoupaw kyalya kha na ae cih oh.

¹³Jubilee kum kyahin, nanning lu kheit cci nynh na hoi oh paw kha a hoitupaw kalan na kii cih oh.¹⁴Na innpaw kalan na zua ze thuasah, na innpaw kyate na re ze thuasah lu kheit te lu kheit na lingkuh lan khyh oh.¹⁵Na innpaw kyate na re lanze, jubilee kum koute riapaw kum hae elang kyalya amee na pya cih; a zuatu nynh bua yn thua cih paw jubilee azaw maw loohrue kum hae hanlan kyalya ae zuapah cih.¹⁶Kum alung lanze a mee tuh aru cih zah, kum azya lanze a mee azoi cih, pawccecize loohrue kum alung azya thyhte ae zuapyapaw nynh thua.¹⁷Lu kheit te lu kheit na lingkuh lan khyh oh zah nae Pachia kha na rih cih oh; pawccecize kae tuh Bawipaw nae Pachia nynh ka thua.

¹⁸Ka phungbya hae kha na zui cih oh zah ka phungzae hae kha tynkaring lan na zui cih oh. Tuhteze tuh ram lungkhu khyndadyh lan na um cih oh.¹⁹Ram nynh thingthae-rohthae a pousah cih, te nae vue phe so lan na ae cih oh zah, ram lungkhu khyndadyh lan na um cih oh.²⁰Nanning nynh, “Ccacii ah ccoukuh khyh oh zah, looh ah ccakhungku khyh keiccu oh ze, kum sarinaw kum kya pawmou ah ae cih oh?” cite na khiakuh cih oh tou?²¹Kum taruhnaw khe nanning elang ka hythuanaw kha kaw ka pya cih zah, tuh-e kum khe kum thum hanlan looh avoi cih.²²Kum taryanaw kum kya ccacii he na ccou oh kyate kum takuanaw kum looh he na rue oh kyacia, looh arynpaw kha na ae cih oh.²³Loram kha zungzae hanlan na zua lan khyh oh. Pawccecize loram tuh kamaw uccaw nynh thua; nanning tuh kamaw kya mikhia hae te a hohkuhtu hae nynh na thua oh.²⁴Na hoi oh paw loram balyn kya loram kha shaw thui khonaw na ua cih oh.

²⁵Nae uno lukhakheit nynh vawsaw tung zah a hoipaw abang kha a zua lanze, anaekuhpaw uno nynh a ccianua cih zah a puiziapaw nynh a la zuapaw kha a shaw cih.²⁶A shawtu lanpaw puizia a hoi khyh lanze, amaw tuh yn hoirum zah shawkunaw lanpaw phe zaw lante yn hoi lanze,²⁷a la zuapya lya te aropaw kum kha riasah lah pya lan accanpaw a mee kha a la zuapyapaw ccungccaw kalan a kiithui cih.²⁸Thuasalama shawnaw lanpaw kha phe zaw lan a hoi khyh zetuh, a la zuapaw uccaw tuh a retu kya jubilee kum cia a um cih; jubilee kyakhe tuh-e uccaw tuh luesah athua cih zah, langmaw a hoitupaw kalan kiithui athua cih.

²⁹Lukhakheit nynh koihlupaw khuapi kya umpaw inn innkheit kha a zua lanze, a zua koute kum kheit lungkhu shaw kho athua cih; shawnaw kaw uapaw ccyh tuh kum kheit athua cih.³⁰Tuh-e inn tuh kum kheit ccing zah accyh athang maw a shaw vae khyh zetuh, tuh-e koihlupaw khuapi kya umpaw inn tuh a retu te a ciihan hae balyn inn lang zungzae a tang vae cih, tuh-e inn tuh jubilee kya zemah kii thua lan khyh.³¹Thuasalama koihlu leipaw khua taraw kya-e inn hae tuh ramkaw e loo hae hawte ria athua cih; tuh-e hae tuh shaw kho athua cih hae zah jubilee kya vae ze kii athua cih hae.³²Levi hae khuapi kya tuh mih khua e mih inn hae kha minmin nynh shawnaw kaw zungzae a hoi cih hae.³³Levi hae khuapi kya zua a thuapaw inn hae te jubilee kya kii athua cih paw inn hae kha tuh Levi hae kyate shaw kho athua cih; pawccecize Levi hae khuapi kya umpaw inn hae tuh Israel ccungccaw hae lakuze Levi hae nynh a hoi hae paw nynh thua.³⁴Thuasalama Levi hae mih khuapi pepan umpaw loo hae kha zua kho thua khyh; pawccecize tuh-e tuh minmin nynh zungzae hanlan a hoi hae paw nynh thua.

³⁵Nae uno lukhakheit tuh vawsaw tung zah nanning kya a reihpekuhpaw lang a tang lanze, amaw kha na bawm cih; aning tuh ramccang ccungccaw a um buapaw hawte nae kya a umbua cih.³⁶Aning kyate ato thuasah, amia thuasah na lah lan khyh, na Pachia kha ritua; aning tuh namaw kya umbua sah.³⁷Aning kha ato te phua na koiisakuh lan khyh zah looh kha ccahpaw lante na bawm lan khyh.³⁸Kae tuh Izip ram te ae poukhae oh paw, Kanaan ram ae pya cih oh paw te nae Pachia athua cih paw Bawipaw nae Pachia nynh ka thua.

³⁹Nang ae reihpekuhpaw lukhakheit tuh myarya ryachi zah amaw te amaw kha na kya a zuaku lanze, see hawte na mang lan khyh.⁴⁰Hohpaw ccungccaw hawte thuasah, mikhia hawte thuasah na umkheih cih oh. Jubilee kum athua makhia rya ae lawpah cih.⁴¹Oute amaw te a ccaaw hae tuh na uknaw kaw kyate a lue cih hae; mih innbyn hae kalan te mih minpaaw hae laephi kalan a ki cih hae.⁴²Pawccecize minmin tuh Izip ram kyate ka poukhae hae paw ka rya yn lawpahtu hae nynh thua hae; see hae kha zua hawte minmin kha zua thua lan khyh hae.⁴³Minmin kha myarya ccih lante na uk lan khyh hae, na Pachia kha na rih cih.⁴⁴Na hoi lanpaw seenung hae te seepaw hae tuh na pepan umpaw minphuin hae kyate na re cih.⁴⁵Nanning laku um hae paw ramccang hae kyate thuasah, nae ram kya pui hae paw mih innbyn hae kyate mah thuasah minmin kha na re kho oh; minmin tuh na hoi oh paw athua cih hae.⁴⁶Minmin kha naemaw nukhute nae ccaaw hae nynh po a lawkuh cih hae zah rho lang a ccou cih hae paw uccaw hawte athua cih hae. Minmin kha see lang na mang cih oh, thuasalama nae uno Israel hae kha tuh, naemaw te naemaw myarya ccih lante na ukkuh lan khyh oh.

⁴⁷Nanning laku umpaw ramccang ccungccaw tuh yn hoirum zah, nae puizia lukhakheit tuh tuh-e ramccang ccungccaw kya vawsaw tung zah amaw te amaw kha tuh-e paw kya phe a zuaku lanze, tuhkhyhze ramccang ccungccaw innbyn kya-e lukhakheit kya a zuaku lanze,⁴⁸amaw te amaw a zuakuh koute shawkunaw kaw a hoi cih; a uno lukhakheit nynh a shawkhaw kho,⁴⁹tuhkhyhze a paaw uno nynh thuasah, tuhkhyhze a paaw uno ccapaw nynh thuasah, tuhkhyhze chiisaw naekuhpaw a innbyn kya-e lukhakheit nynh thuasah a shaw cih; tuhkhyhze yn hoirum lanze amaw te amaw a shawkuh cih.⁵⁰Amaw te amaw kha ramccangpaw kalan a zuakunaw kum kyate jubilee kum cia, kum abalyn kha amaw te a retupaw nynh a ria cih hae; zuanaw mee kha kum alung azya thyhte tuaa athua cih: a retu kya a umpaw accyh kha ryalahtu hohnaw accyh thyhte tuaa athua cih.⁵¹Kum patae abou ung zetuh, shawkunaw mee hanlan a la renaw mee kha a kii bang cih;⁵²te jubilee azaw maw, kum tuh beihtaraw kyalya abou vae zetuh, minmin nynh a tuaa cih hae: kum alung azya thyhte a tuaa cih hae zah shawkunaw mee kha a pya cih.⁵³Aning tuh ramccangpaw kawhoinaw zakaw khe kum kheit koute kum kheit hohpaw ccungccaw hawte a um cih, nae mitmuihnaw kya myarya ccih lante uk lan khyh.⁵⁴Te tuhcihawpaw phinkhakheit te shawkhaw athua vae khyh zetuh, amaw te a ccaaw hae tuh jubilee kum kya a lue cih hae.⁵⁵Pawccecize Israel ccungccaw hae tuh kamaw rya a lahtu hae nynh thua hae; minmin tuh Izip ram kyate ka poukhae hae paw ka rya a lahtu hae nynh thua hae: kae tuh Bawipaw nae Pachia nynh ka thua. Kawngaenaw elang Hythuanaw (Deu 7.12-24, 28.1-14)

¹Naemaw hanlan zohtuh hae kha na raekuh lan khyh oh zah, beik lanpaw maeccang thuasah, tung thuasah na bingkuh lan khyh oh, te nae ram kya asoikuhpaw lung hae kha na nung lan khyh oh; pawccecize kae tuh Bawipaw nae Pachia nynh ka thua.²Ka sabbath hae kha na naawsah cih oh zah ka beikinnthyaa kha saw na tua cih oh: kae tuh Bawipaw nynh ka thua.

³Ka phungbya hae te ka kawbya hae kha na tynsah cih oh zah lungzite na zui oh zetuh,⁴accyh azaw khe nae hanlan khua ka rawsah cih zah laephi nynh looh kha a pousah cih, loo kya-e thingku hae nynh thae kha a thae cih hae.⁵Ccathae rue ccyh nynh misu thae lo ccyh kha a phah cih zah misu thae lo ccyh nynh ccacii ccou ccyh phe a phah cih; nae looh kha phe byn lan na ae cih oh zah nae ram kya khyndadyh lan na um cih oh.⁶Te nae ram kya daenaw ka umsah cih zah, na ih oh ze, hum nynh sanmah thinphangnaw ae pya lan khyh oh; sarepaw hae kha nae ram kyate ka dee cih zah nae ram balyn tuh thaloi kyate a lue cih.⁷Nae rhaw hae kha na deehui cih oh zah nae malang khe thaloi liate a khuliakuh cih hae.⁸Nanning lu pangaw nynh za kheit kha na dee cih oh zah, nanning za kheit nynh thong haw kha na dee cih oh; nae rhaw hae tuh nae malang khe thaloi keiccuze a khuliakuh cih hae.⁹Nanning kha maehoynaw kae pya cih oh zah kae pungthungsah cih oh zah kae lungthung sah cih oh; ka byakinnaw kha nae kya ka tynsah cih.¹⁰Khaw cia ccakhungkuhpaw looh arynpaw kha na ae cih oh zah, athawpaw ccakhungnaw hanlan arynpaw kha na phua cih oh.¹¹Nanning ryte ka um cih zah, nanning kha kae hua lan khyh oh.¹²Te nanning laku ka cceih cih, nae Pachia ka thua cih zah nanning tuh ka ccungccaw hae na thua cih oh.¹³Kae tuh Izip hae see lang na tang vae khyh oh ccaw cite Izip ram kyate ae poukhae oh paw Bawipaw nae Pachia nynh ka thua; nae nangrui hae kha phe ka pae vae zah nanning kha lawbabin lan kae cciasah vae oh. Kaw-einaw hanlan Detahnaw (Deu 28.15-68)

¹⁴Thuasalama ka bya kha na ngae khyh oh zah hynh-e kawbya balyn hynh na zui khyh oh ze thuasah,¹⁵ka phunglang hae kha pawlangria leite, ka phungzae hae kha na hua oh zah, tuhcite ka kawbya balyn kha zui leite ka byakinnaw kha na ro oh ze thuasah,¹⁶kae nynh zemah hynh-e hynh nae tungvaw ka cyihru cih: myarya lepaw rinaw, mit rosah khylan te hiinnaw pawhaesah khylan ri lan umpaw ccinaw te zuukunaw kha nae tungvaw ka thuasah cih. Nae ccacii kha alakaw lan na ccou hang cih oh, pawccecize nae rhaw hae nynh khah-e kha a ae cih hae.¹⁷Ka mae kae hawinua cih oh zah nae rhaw hae khate tuk na thua cih oh; nae rhaw hae nynh ae tae cih oh zah lu kheit nynh sanmah ae deehui khyh oh zemah na ccue cih oh.¹⁸Te hynh-e koute, ka bya kha na ngaelae khyh oh zetuh, nae seinaw keiccuze leit sari de kae tah cih oh.¹⁹Na lysahkunaw oh paw huhan kha ka roh cih zah nae vaawlui kha sivaw hawte thuasah, nae laephi kha sohin hawte thuasah ka rae cih.²⁰Nae thawzung tuh eenaw um leipaw lang mang athua cih: nae laephi nynh looh kha pousah lan khyh zah laephi kya-e thing hae nynh thae kha thae lan khyh hae.

²¹Nanning nynh kae kha po nae rawse oh zah ka bya kha na ngae khyh oh zetuh, nae seinaw hanlan shethya leit sari kha nae tungvaw ka thuasah cih.²²Sarepaw kha kae sawnua cih oh zah nae ccaaw hae te nae sahiin-awvaw hae kha ae ropah cih oh; tuh-e hae nynh nae milu kha ae zyasah bung cih oh zah nae laanpi hae kya ccungccaw ae daesahpah cih oh.

²³E detahnaw hae na ing oh salamah kamaw kalan maeleihku leite nae rawse ung oh zetuh,²⁴kae nynh zemah po kae rawse cih oh: kamaw ccaccei nynh nae seinaw hanlan leit sari te de kae tah cih oh.²⁵Ka byakinnaw elang liarunaw kha raete nanning detah khylan thaloi kae thuakhae cih; nae khua lungkhu na sueluaku oh ze, nae laku khe ri lan umpaw ccinaw kha ka saw cih zah nae rhaw hae kuih kya pya na thua cih oh.²⁶Kae bawm oh paw nae looh kha he kae pya khyh oh tetuh, nopi lu haw nynh nae sanlou kha talyng-ang ccangkheit kyakhe a thou cih hae zah khah-e kha akhin saete ae nee cih oh; te na ae oh zemah na byn lan khyh oh.

²⁷Thuasalama hynhcite vawsawnaw mang na ing oh pite ka bya kha ngae leite nae rawse ung oh zetuh,²⁸kae nynh zemah thinriate kae rawse ung cih oh; kamaw ccaccei nynh nae seinaw hanlan leit sari te de kae tah ung cih oh.²⁹Nae ccapaw hae saw kha na ae cih oh zah nae ccanung hae saw kha na ae cih oh.³⁰Na hangsah oh paw hmin hae kha ka roh cih zah nae kya-e mynkhuhpaw silawhang hae kha pong ka bae cih; nae rhua kha nae zohtuh hae mih rhua vawlan khe ka pum cih hae. Nanning kha kae hua cih oh.³¹Nae khuapi hae kha marya ka roh cih zah nae beikinnthyaa hae kha ccungccaw ka daesah cih zah nae kya-e amynkhuhpaw kha ka myng lan khyh.³²Ram kha marya ka roh cih, tuhteze nynh tuin ram kya khuasah lan oun cceih hae paw nae rhaw hae tuh mih rikaw athua cih.³³Te nanning kha minphuin hae laku phiariphiarae kae nung cih oh zah nanning rawsete nae nulang te thaloi kae thuaanuakuh cih oh; nae ram tuh ccungccaw adae cih zah nae khuapi hae tuh pong aroh cih.

³⁴Nanning tuh nae rhaw hae ram kya na um oh zah ram kya ccungccaw adae lya balyn tuh ram tuh a sabbath kum hae kyakhe a lungpawkhaekuh cih.³⁵Ram kya ccungccaw adae lungkhu balyn tuh ram tuh a haeung cih, ram kya na um lya oh tuh nae sabbath hae kya ram tuh haeung khyh.³⁶Te nae rhaw hae ram kya na hiinhy oh paw nae thinlung kya lungthaw kae zyasah cih oh; thingnaw ahypaw roi nynh ae ccuesah cih oh zah, thaloi kyate a ccuepaw hawte na ccue cih oh, lu kheit nynh san ae deehui lei oh pite na khuliakuh cih oh.³⁷Lu kheit nynh san ae deehui lei oh pite thaloi kyate lue khylan a ccuepaw hawte lu kheit vawlan lu kheit na sydekuh cih oh; nae rhaw hae kha rawsete thadynnuanaw lanpaw huhan na hoi vae lan khyh oh.³⁸Minphuin hae laku na chih cih oh zah nae rhaw hae ram nynh ae laang cih oh.³⁹Nanning lakuze na hiinhy oh paw tuh nae rhaw hae ram kya mih hoyleinaw keiccuze nae thaw azyabung cih; mih tawpaaw hae seinaw keiccuze mah mih thawzyabung cih.

⁴⁰Thuasalama ka tungvaw lungzinaw a hoi khyh hae apiaze kamaw kha palei yn rawse hae paw mih hoyleinaw te mih tawpaaw hae hoyleinaw kha a phyku hae ze thuasah,⁴¹minmin kha liarute po ka rawse hae zah mih rhaw hae ram lungkhu lang ka cciakhae hae paw kha a phyku hae ze thuasah, tukoute vingdungawkuh leipaw mih thinlung kha nesakuh hae zah mih hoyleinaw kha a raeku thui hae ze thuasah,⁴²Jakob kya ka raepaw ka byakinnaw kha thuasah, Isak kya ka raepaw ka byakinnaw te Abraham kya ka raepaw ka byakinnaw kha thuasah, tuh-e ram kha mah thuasah ka liathui cih.⁴³Ram tuh a cciataw cih hae zah ram kya minmin a um khyh keiccu hae ze, sabbath kum hae kya ram tuh a lungpaw cih; ka phungzae hae kha ei ngan hae zah ka phungbya kha a hua keiccu hae ze minmin nynh mih hoyleinaw kha a raekuh thui cih hae.⁴⁴Tuhzemah tuh-e hae balyn keiccuze minmin nynh mih rhaw hae ram kya he a um hae tuh, minmin kha ka vua lan khyh hae, minmin kha marya ro khylan te minmin kya ka raepaw ka byakinnaw kha phe ro lan ciate ka hua lan khyh hae; pawccecize kae tuh Bawipaw mih Pachia nynh ka thua;⁴⁵Mih Pachia lang tang khylan minphuin hae mitmuihnaw kya Izip ram atolang ka poukhae hae paw mih minpaaw hae kya ka la raepaw ka byakinnaw kha minmin elang ka liathui cih: kae tuh Bawipaw nynh ka thua.

⁴⁶Hynh-e hae tuh Bawipaw nynh amaw ccaccei te Israel ccungccaw hae laku kya Sinai Mua vawlan Moses kyakhate a tynsahpaw phungbya hae, phungzae hae te upadi hae nynh athua hae. Byakinkute Silawnawpaw hae

¹Bawipaw nynh Moses kha hynhte a hopya:²Israel ccungccaw hae kyakhe hynhte hopah hae: Lukhakheit nynh Bawipaw kalan a raepaw byakinnaw keiccuze ccungccaw lu kheit phu hanlan atekuhpaw amee kha Bawipaw kalan a pya lanze,³pise lu kheit elang atekuhpaw amee tuh: kum kuin te kum sung taruh laku hanlan atekuhpaw amee tuh beikinnthyaa e shekel thyhte ngun shekel sung pangaw athua cih.⁴Nopi athua lanze, atekuhpaw amee tuh sung thum athua cih.⁵Kum pangaw te kum kuin laku hanlan atekuhpaw amee tuh, pise hanlan shekel ccangkuin athua cih zah nopi hanlan shekel ahaw athua cih.⁶Sawpaw sah kheit te kum pangaw laku hanlan atekuhpaw amee tuh, pise lu kheit hanlan ngun shekel pangaw athua cih zah nopi hanlan ngun shekel ccangthum athua cih.⁷Te kum sung taruh te palung lang hanlan atekuhpaw amee tuh shekel haw lae pangaw athua cih zah nopi hanlan shekel ahaw athua cih.⁸Lukhakheit nynh atekuhpaw amee kha a taening khyh ze, ranpibawi malang thuakhae athua cih zah ranpibawi nynh amee a khya cih; lu kheit cci nynh byakinnaw a raeku kho thyhte, ranpibawi nynh amee a khya cih.

⁹Sarangpaw kha Bawipaw kalan ahlu lang pya athua lanze, tuhcite Bawipaw hanlan pya athuapaw miakaw tuh athyaa cih.¹⁰Athahpaw hanpaw ahoypaw kha thuasah, ahoypaw hanpaw athahpaw kha thuasah tuh-e sarangpaw hanpaw lante ccangpaw kha rulae thua lan khyh; te sarangpaw sa kheit kha ccangpaw hanpaw lante rulae athua lanze, rulaepaw te rulaenawpaw tuh sa ning maw te athyaa kalang cih hae.¹¹Bawipaw kalan ahlu lang pya kho athua leipaw, athyaa leipaw sarangpaw athua lanze, tuh-e sarangpaw kha ranpibawi malang thuakhae athua cih.¹²Ranpibawi nynh tuh-e sarangpaw kha amee a khya cih: sarangpaw anyaa ahoy thyhte ranpibawi nynh amee a khya cih zah, amee tuh tuhcite athua cih.¹³Thuasalama tuh-e tuh a pyatu nynh a shaw ry lanze, amee khyapaw vawlan khe pum pangaw pum kheit kha biachih athua cih.

¹⁴Lukhakheit nynh a inn kha Bawipaw kalan thyaasahte a pya lanze, ranpibawi nynh amee a khya cih: ranpibawi nynh inn kha anyaa ahoy thyhte amee a khya cih zah, amee tuh tuhcite athua cih.¹⁵Te inn a pyatupaw nynh inn kha a shaw ry lanze, amee pum pangaw pum kheit kha amee khyapaw vawlan khe a biachih cih zah, inn tuh a hoitupaw kalan kii athua cih.

¹⁶Lukhakheit nynh rho lang a ccoupaw ram ramkhakheit kha Bawipaw hanlan a pya lanze, amee khyanaw tuh alungkhu ccacii ccou athua zeihte khya athua cih: barli amung kha homer ccangkheit ccounaw tuh ngun shekel sung pangaw te khya athua cih.¹⁷Lukhakheit nynh a loo kha jubilee kum khe thyaasahte a pya lanze, amee khya thyhte athua cih;¹⁸thuasalama loo kha jubilee koute thyaasah athua lanze, ranpibawi nynh nyalang e jubilee kum cia alae ungpaw kum thyhte amee kha a tuaa cih zah amee a khyapaw kha sohpya bang athua cih.¹⁹Te loo kha thyaasahte a pyapaw nynh a loo kha a shaw ry lanze, amee pum pangaw pum kheit kha amee khyapaw vawlan a biachih cih zah loo tuh a hoitupaw kalan kii athua cih.²⁰thuasalama loo kha shaw vae khyh zah, tuh-e loo tuh ccangpaw lukhakheit kalan zua athua vae lanze, tuh-e loo tuh shaw kho thua vae lan khyh.²¹Thuasalama tuh-e loo tuh jubilee kya kii he athua te, tuh-e loo tuh thyaasahte pyapaw loo lante Bawipaw elang athyaa cih; ranpibawi uccaw lang a tang cih.²²Lukhakheit nynh rho lante a ccoupaw thua leite a repaw loo kha Bawipaw hanlan a thyaasah lanze,²³ranpibawi nynh jubilee kum cia amee kha a tuaa cih zah amee akhyapaw kha Bawipaw elang athyaapaw ahlu lante tuh-e nin khe a pya cih.²⁴Jubilee kum khe loo kha atakaw a la zuatupaw kalan kii athua cih.²⁵Amee khyapaw balyn tuh beikinnthyaa e shekel thyhte athua cih: shekel ccangkheit ze kerah ccangkuin nynh thua.

²⁶Sahiin-awvaw thanty tuh Bawipaw uccaw athua keiccuze hum nynh sanmah Pachia kalan pyathui ho vae khyh; tangnuapaw thuasah, tuu thuasah Bawipaw uccaw nynh thua.²⁷Tuh-e tuh athyaa leipaw sahiin-awvaw athua lanze, amee khyanaw kyakhe pum pangaw pum kheit biachih te shaw athua cih; tuh-e tuh shaw athua khyh lanze, amee khyanaw thyhte zua athua cih.

²⁸Bawipaw kalan thyalawkute pyapaw ccungccaw thuasah, sahiin-awvaw thuasah, rho lan ccoupaw loo thuasah zua kho thua khyh zah shaw kho mah thua khyh; thyaasahte pyapaw uccaw miakaw tuh Bawipaw elang athyaa huaccepaw nynh thua.²⁹Thyalawkute pyapaw ccungccaw kha shaw kho thua khyh; chia athua cih.

³⁰Laephi kya-e acii-amung thuasah, aku kya-e athae thuasah laephi kya-e pumhaw pumkheit balyn tuh Bawipaw uccaw nynh thua; Bawipaw hanlan athyaapaw nynh thua.³¹Lukhakheit nynh amaw a nungpaw pumhaw pumkheit kya-e hankhakheit kha shaw a ry lanze, pum pangaw pum kheit kha amee vawlan a biachih cih.³²Vaetua phu kya-e thuasah, tuuphu kya-e thuasah a rintu hoitang zakaw kya a cceihpaw pumhaw pumkheit miakaw tuh Bawipaw elang athyaapaw athua cih.³³Humhung nynh mah tuh-e tuh ahoy hoy khyh cipaw khia nan sah lah, tuh-e hanpaw rulae nan sah, lukhakheit nynh tuh-e hanpaw a rulae zetuh, tuh-e te a rulaenawpaw tuh parouhte athyaa cih hae zah shawkhaw kho thua vae lan khyh.

³⁴Hynh-e hae tuh Israel ccungccaw hae hanlan Sinai Mua kya Bawipaw nynh Moses a pyapaw kawbya hae nynh thua.

Bible Society of Myanmar

https://app.library.bible/content/1a340f5ae072b2f4