Heremíasi5
Lifigoun Herusalén
1Lariñahare Aburemei: «Éibuga huméi lémeri Herusalén, ariha humá buidu, háluaha burí párükerugu, anhaün adarira aban gürigia le adügüti le úaraguabei, le harumabei, anhein hadarira, feruduna nubéi Herusalén.2Añahein áfiñurutiña luagu liri Aburemei, gama lumoun iyeeni háfiñurun».3Aburemei, gürigia furangutiña báluahabaña. Bei bumutiña, ani masandi hamuti ligari, gadei bumutiña ani máhatiña hafurendeirun. Mabuchahatiña, deretiña sügǘ lau dübü, máhatiña hagiribudun lidoun lubuidun üma.4Haritaguatina yebe: Gudemetiñarügüñanu lan óusera kei ibidiougua tau, lugundun ibidiñeti houn ka lan labusenrubei Aburemei, le lariñagubei Habungiute lun ladügǘniwa.5Nadimurehaba houn gürigia ha íñugutimabaña, aná hagía, hasubudirubei le labusenrúbei Aburemei le Habungiute. Gama lumoun sun hagía, iñuraguaaña houngua luagun Aburemei, máhatiña haganbuni le lubeibei.6Ligía hachülaaguba lubéi liñún áraabugiñe, ábame háfaraguniña, hamurusuhabaña ounli áraabuna ha lídanbaña fulasu mageirawati, háfaragubaña géigusi lurugabu haburugute ábame hamurusuhaniña danme le háfuridun; lugundun gíbeeli figóu hadüga.7Lariñahare Aburemei: «Ida luba feruduna nani sun le bun? Ígira hamaadinagu birahüñü, ñéingiñe fiñutiña hawagu búngiugu ha mama Bungiu. Rútina éigini gíbeti houn, gama lumoun magunfuliruntiña numa, aba híchaagun houngua lun ahoruhani.8Kei gabayu ha hóugüdawatiña buidu ha busenguaaña houngua, ítara liña hafuudun tuagu lúmari haduhe.9Lunti funagia mabeichun nubaña lan luéigiñe burí katei le? Lunti funagia michu nubéi lan le hadünabei gürigia ítaratiña houn?10Belú hamá háganiñu, baraguagüda haméi beibei-agei, íbini magünrinchagun hamani sunsuinagubei! Hulá haméi burí lilimun lugundun mámaali nubeibein-agei!11Garabaguaali Ísüraeli luma Hudá nuagun. Au, le Aburemei ariñagubalin».Lariñawagúniwa luagu labeichúba lan Ísüraeli
12Yéeguali Ísüraeli luma Hudá lau Aburemei; ariñagaaña: «Mabahüdǘnti Aburemei, masuseredunbei ni kata wuribati woun, mawuribuhanbadiwa, malamachun wagíame».13Ítara haña profetagu kei garabali, ladüga úati lererun Bungiu hadan.Anihán lubeiti lariñagubei Aburemei Suntigabafu nun: «Ladüga hariñaguni katei le anihán le lunbei lasuseredun houn: Nadüga lun lítaradun nererun biyumulugu kei watu gemeti, lun ítara hamá lílana fulasu kei watu, lun lagumuchaguagüdüniña watu gemeti ligía».15Lariñahare Aburemei: «Ísüraeli, nanüga gürigia dísegiñetiña buagun, binadu gürigia ha héretiña. Ibidiñeti hererun bun, ua ligía gunfurandabani le hariñagubei.16Wuriburuguna ganigitiña sun hagía, óunweni tílabei hárumate.17Héigibei balubahan, beigan fein, hou hamañame birahüñü. Héigibaña bilügüniña mudún, bilügüniña bágasu, binadürigu beibei, binadürigu igu. Tau burí hárumate hagünrinchagubei giñe uburugu burí baríeiruati le uágubei bemenigida».18Lariñahare Aburemei:
—Lau sun lira, magünrinchagun nubaña sunsuinagubei lidan dan ligía.19Danme le hálügüdünibu: «Ka san uagu ladügei Aburemei le Wabungiute katei le woun?» Bariñagame houn: «Ítara kei hígiruni Aburemei, lun heseriwidun houn búngiugu terencha hageira, ítara luba giñe heseriwidun houn gürigia terencha lidan hageira amu».
Leweridirúniwa Ísüraeli
20«Wisá huméi sun Ísüraeli, ariñaga huguyame lun Hudá:21“Aganba huméi le, gürigia ibidiougua tau, ha gágubaña ani marihintiña, ha garigeirugubaña ani maganbuntiña.22Nariñahare au, le Aburemei: Manufudetün san nuéi? Madadagaruntün san nigibugiñe? Au íchugubalin beya kei lébeha barana, siñati lásügürün barana ñéingiñe. Iñurahati lugudi barana, abounha ligía gama lumoun siñati lásügürün.23Huguya, anuhein aban anigi huagu deretu ani mabuchahatu, aba hígirunina aba hidin.24Masaminaruntün, mariñagun huguya: Inebelá Wabureme le Wabungiute woun, le íchugubalin huya woun lidan lidaani ru ligía dan lun gayaraabei lan walubahan.25Gama lumoun sánsiguala hifigoun sun katei, siñaali habagariduni sun meha katei buiti ligía.26Lugundun añahein gürigia wuribatiña nageira, ha agaradahatiña kei agaliruhatiña dunuru, ha esetihabaña sádara lun hábürügüdüniña ha híbiri.27Buíngüda hamutu burí haban lau ílagu le híweruhan, kei tabuinchun haban dunuru hau dunuru. Ítara liña gabafu hamá ani risi hagía.28Aba hadibunedun ladüga hóutiña buidu, mébehati hariban, michu hamuti haricha méteñuhaña houn, maha hagía lun híchuguni haricha gudemetiña houn.29Lunti mabeichun nubaña lan luéigiñe sun katei le? Michunéimeti le hadünabei gürigia ítaratiña houn? Au le Aburemei ariñagubalin.30“Lasusereduña katei hanarimeti le hanufunehabuti lidan ageiraü le.31Iyeeni le hariñagubei profetagu; hagumadihaña fádirigu kei líchaahouniwa houn. Ani ítara liña habusenruni numutuniña! Gama lumoun kaba san hadüga danme lachülürün lagumuhóun dan?” »Bible Society of Honduras