Heremíasi4
Agunbirahóuni lun asakürihani
1Lariñahare Bungiu: «Ísüraeli anhein busén bubéi bagiribudun, lunti nunlá bagiribuda. Ánhaña bígira hagübüri bubungiutegu, madisedun buguyame nuéi,2gayaraabei báfiñurun lidan niri lau inarüni, irichaü luma ísuruni. Lébunabei abiniruni luma eremuhani niri houn néchanigu».3Lariñahare Aburemei houn lílana Hudá luma Herusalén: «Bunagua humá lidan múa le mábunawagungili ñein, hebé hábunagun labadinagua hiiyu.4Lílana Hudá luma Herusalén, richagua humá lidan daradu le hadügübei numa subudi humana keisi Aburemei, ru huméi liseinin daradu tidoun hanigi, durungualiñein nigañi kei watu gemeti ladüga luriban hóuserun, ábame ladurangun úouga gayaraati léñeguchuni.Lasiadiruniwa Hudá lun lásiurawaguniwa
5«Ariñaaha huméi katei le uburugu Herusalén luma Hudá, subudigüda huméi lidan sun fulasu, wagua huméi here: “Lun héibaagun lidoun burí uburugu le baríeiruati!”6Arufuda huméi lémeri Sión; aramudagua humá, mararamagua humá! Lugundun nanüga lamiselu luma günringuaü nóruterugugiñe.7Furihali liñún lídangiñe laramudaguagüle, aniteeli le agünrinchagubalin burí néchani, furihali lageiragiñe lun lagünrinchaguni bageira, lun lagumuchaguagüdüni burí buburugute.8Daügua humá lubeiti daüguaü súsutu, hayahuaha lau igarigu, lugundun madireirúngili lanarime ligañi Aburemei wawéi».9Lariñahare Aburemei: «Danme lachülürün weyu ligía, ladadagaruba urúei hama ábutigu lau anufudei, hasandiruba fádirigu anufudei, halouchuba profetagu».10Aba nariñagun: «Aburemei yéedaba lílana Herusalén! Füramasetibu darangilaü houn, gama lumoun guentó anuhán aban gusiñu luagu hagiina».11Danme lachülürün oura ligía, lariñawagúba houn lílana Herusalén: «Láfuhaña aban garabali süti luéigiñe fulasu mageirawati luagun nageira. Mama garabali le buídubei lun lewenihóun türigu;12garabali le lunbei nóunahani, héreyabei lun lira, lugundun guentó, nasiadiráaña».Hegeyedaguni áganiñu Ísüraeli
13Anitén ágani awansereina kei aban dúeri, ítara tiña burí likarün to lánina wuribu kamá herigini, furesetiña ligabayun sügǘ hau ágila. Fugiabugu wagía, féridihadiwa!14Herusalén, gidabei wuribani tídangiñe banigi, ítara luba besefurun. Ídaba lásura bagarabahan lagübüri saminaü bichügüwagu?15Chülüti uganu wuribati lúmagiñe Dan luma luéigiñe burí luwübüri Éfürain:16Wisá humaña néchanigu luma Herusalén añate lan áganiñu lídangiñe aban ageiraü díseti, agúaraheina agúarahani le lánina wuribu, kóntüra burí luburugute Hudá.17Hegeyedagubei Hudá, kei ha óunigirutiña ichari, ladüga liñuragun lungua luagun Aburemei. Au le Aburemei ariñagubalin.18«Bóuserun luma le badügübei lébunabei le asuseredubei bun; líchugun buriban in gífiti le bun lun líbaagunu banigi».Ligarigu Heremíasi luagu lageira
19Nagarabahaña lau gáriti! Hanarimeti tádühan nanigi! Mederaguagüdüntina, siñati námanichun! Aganbaadina aban tamuri fidu, aban agúarahani le lánina wuribu.20Lachülühaña burí uganu luagu lamiselu; günrinwagua sun wageira. Günrinwagua burí waban sódini, ani furesegueina aba haheirihanu tikorutinan waban.21Ídaba lásura narihini fanidira iñurañu, luma naganbahan tíñaahouniwa fidu?22«Ibidiouguati hau numutuniña, ibidiñetina houn —liña Aburemei—. Ítara haña kei isaanigu ha úati gunfuranda hamá. Chuti hau lun hadügüni le wuribabei gama lumoun madügaditiña lun le buídubei».Larihini Heremíasi agünrinchawaguni le lunbei liabin
23Aba narihini ubóu, ítara liña kei fulasu mageirawati, le múaragunti, arihanéi sielu, úati larugounga ñein.24Aba narihini burí wübü, ladadagaruña, sun burí wübü layudeihaña.25Aba narihin, úaali ni aban gürigia, ani anurahouga buga sun dunuru.26Aba narihini burí fuluri-agei, saligua lan fulasume mageirawati, ani sun burí uburugu günrinwaguaali. Lanarime ligañi Aburemei adügübalin sun le.27Lariñahare Aburemei: «Lerederuba sun múa málouga, gama lumoun magünrinchagun nubéi sunsuinagubei.28Labuinchuba múa lau íruni, lamuiseruba sielu. Adimurehaadina ani masakürihanbadina; merede ligíame nadügüni.29Anurahatiña sun gürigia dan haganbuni hagúarahan ha gabayuagubaña hama ha tábubaña gimara, aba héibaagun sun mutu aramudagua lidan burí búbugati, o hawarirun lan burí luagun dübü íñuti. Rédeiti sun burí uburugu málouga; úaaña kaba lan aganawa ñein.30Buguya uburugu günrinwaguaali, ka uagu badaüragua daüguaü funatu? Ka uagu badaüragua golu buougua? Ka uagu befeindihei bagu lau wuriti? Málati baranseragun bungua, ladüga fui hamaadibu bubúaligu, bounwen háluahabei.31Aganbatina agúarahani le lánina igari, kei tagúarahan aban würi to agaridutu lau furumiñeti tiráü; Sión agúarahabei, lamumehati tuleñu larüna ariñageina: “Fugiabu nuguya, háfaraadina gáfarahatiña!” »Bible Society of Honduras