Heremíasi6
Legeyedaguni ágani Herusalén
1Gürigia lóubawaguna Benhamín, áluaha humá haramudagun anuraha humá Herusaléngiñe! Win humóun fidu Tekóa, iñura humá aban seini Betü-Akeremü, lugundun anitén aban lamiselu luéigiñe nórute.2Herusalén uburugu magadiñeti ani hínsiñeguti, yarafaali barihin weyu;3Hemeraaguba urúeigu ñein hau hasudaranigu, hararamagüdüba hakianpun geyegua bau, kada aban lidan fulasu le labusenrun.4Hariñaga háganiñu: «Aranse humá lun hageindagun luma! Higougu ábürüha wamá luagun amidirugu! Gama lumoun, siñá! Dárühali, búrigaali.5Ábürüha wamaagubei luagun áriebu, günringua waméi luayelesin!»6Wabureme le Súntibeigabafu íchugubalin lúrudu le: «Chaün humá wewe adüga humá aban burichi lun hábürühan luagun Herusalén! Siádiwaali lun labeichún lugundun buin liña lau wuribani.7Ésehati wuribani Herusaléngiñe kei lésehan duna lídangiñe aban fusu. Wuribanirügüñein luma anarimeni aganbúa ñein; wóunurügüñein luma gáriti nariha ñein.8Furendeibá Herusalén, lugundun anhein madügün ban, nadiñuruba buéi laume magundani, ábame nígirunibu kei aban fulasu mageirawati, nígirubadibu málouga».Lichugúniwa ñunsu luagu abeichúni
9Lariñahare Aburemei Suntigabafu: «Hame Ísüraelina erederutiña, hénrengubei hadarirúniwa gama lumoun háluahouba kei aban lin beibei laganagua sun limu, darime madari hamá ni aban».10Aba nóunabun: «Kábagia uma nayanuha? Ánhana hamuga adimureha, kábagia aganbana? Darú hamuti harigeirugu, luéi haganbun; mabusenrúntiña haganbuni bererun adügarügütiña bula lau.11Buin niña lau bigañi, Nabureme, siñá naali ágüdaha».Lariñaga Wabureme nun: «Ígiragüdabei hawagun nibureinhaña ǘmadarugu, hawagun nibureinhaña ha adaagubaña salufuri ǘmadarugu. Hanügǘba wügüriña hama hámarigu adaürǘwa, hadaürawaguba giñe wéiyaaña mutu.12Haban, hachari hama hámarigu, hásügürüba lumoun amu. Lugundun niñuraali núhabu lun nabeichuniña ha aganóubaña lidan fulasu le. Au le Aburemei ariñagubalin.13«Súngubei, wéinamuhaña hama ñǘbürigiña luágunrügüñein íweruhani haritagua; dandu profetagu kei fádirigu, íweruhatiña lau eyeeraguni.14Ligibuagugiñe hagumein numutuniña hagaraniha houn; hariñaga luagu lídanñein lan dan sun katei lau sun wuriba lan.15Lunti hamuga nibusigari hamá hadügüni burí katei le aubei magundan nan! Gama lumoun masanditiña busiganu, ibidiñegubeihali ka lan busiganubei houn. Ligía danme lubéi nabeichuniña, hachugeraguba ábame héiguadun kei ha híbiri. Au, le Aburemei ariñagubalin».
Mabuchaha lan Ísüraeli
16Lariñahare Aburemei houn lumutuniña: «Rárama humá luagu burí üma, ariha humá, hálügüdaha luagu binadu üma, hagéi lan üma le buídubei; falá huméi, ábame hadarirun emeraaguni». Aba hariñagun: «Uá, mabusenrúntiwa wafalaruni üma ligía».17Ruti Aburemei óunigihatiña, aba lariñagun houn gürigia: «Ru humá arigei lun tumalali fidu». Gama lumoun hariñaga: «Mabusenrúntiwa wadügün gasu lau».18Ligía lariñagunbei Aburemei: «Aganba humá néchanigu, subudi huméi le lunbei lasuseredun houn numutuniña.19Aganbabá múa: Nanüga aban lamiselu hawagun gürigia ha ladüga hariban, lugundun madügün hamá gasu lau nererun, máhatiña lun haganbuni narufudahan.20Kame hanüga kupali nun uburugugiñe Sabá luma burí sagadi hémeti lídangiñe ageiraü díseti? Magundantina lau hadagaragüdün le gudawarügüti ni lau líbiri hadagaragüdün».21Ligía lariñagunbei Aburemei: «Nadüga lun hachugeragun gürigia ha, lun héiguadun. Dandu agübürigu kei isaanigu, besinagu, umadagu, sun hagía hóunweguba».Hayabin áganiñu nóruterugugiñe
22Lariñahare Aburemei: «Laranseruña aban néchani héreti luéigiñe nórute.23Anuhein gimara tuma eféin hama; fásitiña, magudemenihabutiña; ítara liña hagúarahan kei liréin barana, wariñu haña hawagu gabayu. Aranseña lun hawuribuhan luma Sión».24Hariñagati Gürigia uburugu Herusalén: «Aganba wamaali uganu, méreediwa ladüga wanufude; sanditiwa íruni luma igari kei aban würi agaridutu.25Midin humá áraabu, méibuga humá ǘmadarugu! Lugundun gárumateti ágani; anihein óunwenbu anufudei fulasurugu!»26Numutuniña, daü humá daüguaü súsutu arufudei higarigu; habalabahóua lidan baligi, hamuisera, hayahua kei dan le lounwen aban isaani le ábanrügüti, lugundun aniteeli le lunbei lagünrinchaguniwa.27Lariñahare Aburemei nun: «Hóuchaguabaña numutuniña. Arihabáña ida liña lan hóuserun».28Aburemei, sun hagía mabuchahatiña, gürigia marasualugutiña hagía, wuribatiña; ítara haña kei buronse luma gürabu.29Dan le láfurun láfugüle garabali lau sun lere aba larürüdaguagüdüni watu gemeti balu. Málati hafinuhóun marumadunbaña, magumuchaguntiña wuribatiña.30Lunti lariñawagún hawagu: «Pülata le lunti lagurúniwa, ladüga fui laña Aburemei».Bible Society of Honduras