ROM 1 ಓದಿ

ROM1

¹Jesu Khri seepaw, Pachia thehoypaw hanlan thoh phia thua zah locceihtu lang ko athuapaw kae, Paul nynh ccaw kae ky oh.²Tuh-e thehoypaw tuh a profeh hae liate athyaapaw Ccathyaa hae kyakhe langmawpi te bya phe la kinty vae paw nynh thua.³Tuh-e thehoypaw tuh Pachia Ccapaw, ah Bawipaw Jesu Khri konglang thua zah pynsaw lante David ciihan kyate yn puipaw nynh thua.⁴Thyaanaw kya-e muisaw lante ho lanze, chinaw kyate a thoothuinaw liate Pachia Ccapaw athuanaw kha athungpaw huhan te phy athua vae.⁵Zenta hae balyn kya amaw min hanlan zynnaw te asekuhpaw kawngaenaw a um nawlan thawccinaw te locceihtu thuanaw kha amaw liate kae mue vae.⁶Tuh-e hae laku kya nanning mah Jesu Khri kya-e thua khylan kopaw nynh na thuabua oh.

⁷Pachia nynh sungsah hae zah mithyaa hae lang ko na thua oh paw, Rom khuaccaaw hae nae balyn tungvaw kyakhe ah Paaw Pachia te Bawipaw Jesu Khri kyate oun thuapaw thawccinaw te daenaw tuh la um vae sah. Lungtua Sawsangnaw

⁸Nae zynnaw tuh laephi pynpi kya siakhae athua keiccuze nae balyn hanlan Jesu Khri liate ka Pachia kha masaty ka luung.⁹A Ccapaw kya-e thehoypaw kha hote ka thinlung balyn te rya ka lawpyapaw Pachia tuh ka sawsangnaw kya nanning kha zungzae kae lia oh cipaw a nyhtu ka ccaekia nynh thua.¹⁰Pachia nynh a ry zetuh ccyhkhakheit kya pawpawte thua zemah nae kalan khuaccong lan saw ka sangkuh.¹¹Pawccecize nae thawzung tynsahnaw lanpaw muisaw lasung abang kha neethung khylan myarya kae muih ry oh.¹²Tuh-e tuh nanning te kae nynh zynnaw raveih khate thawzung ah pyaku kalang ccaw oh cipaw nynh thua.¹³Uteno hae, ccangpaw Zenta hae laku kya athae abang ka mue hawte nanning laku kya mah athae abang mue khylan nae kalan ccia lan palei ka noukuh cipaw nysah kae ry oh, thuasalama atu cia yn khawpaw palei a um.¹⁴Kae tuh Grik hae te apuathopaw ccungccaw hae kya thuasah, a hawpaw te a ngaeepaw kya thuasah parouh mawte laebah umtu nynh ka thua.¹⁵Tukeiccuze Rom khua kya na um oh paw kalan mah thehoypaw phy lan lungthote ka um. Thehoypaw A Thungnaw

¹⁶Pawccecize kae tuh thehoypaw hanlan ka maethah khyh; pawccecize thehoypaw tuh a zynpaw ccungccaw miakaw hanlan khumnaw mue nawlan Pachia thungnaw nynh thua, masaty lan Judah hae hanlan thua zah tukoute Grik hae hanlan mah athuabua.¹⁷Pawccecize, “Adingpaw ccungccaw tuh zynnaw liate nynh a hiin cih,” cite azeiku hawte, tuh-e zynnaw kya nynh Pachia kya-e dingnaw tuh zynnaw kyate zynnaw kalan langsahpya athua vae. Ccungccaw hae Seimenaw

¹⁸Pachia thinrianaw tuh vaawlang te yn langkuh zah, byading a khawtu hae paw kya-e dingleinaw te Pachia pawlangria leinaw balyn kha a rawse.¹⁹Pawccecize Pachia konglang ny khonaw kha Pachia nynh minmin kya a langsah vae keiccuze tuh-e tuh minmin kya phe a langkuh vae.²⁰Laephi raenaw kyate tho zah Pachia kya-e muih kho leipaw zungzae atynpaw thungnaw te Pachia thuanaw kha a raepaw uccaw hae liate thaethya thua vae zah muih kho athua vae, tukeiccuze minmin tuh ngaethya kho thua lan khyh hae;²¹pawccecize minmin nynh Pachia phang nyh hae pite, Pachia kha sawtua lan accan thyhte sawtua khyh hae, luung mah luung khyh hae, mih tuakunaw tuh accakaepaw lang tang zah tuanaw hoi leipaw mih thinlung tuh mohnaw te phe abeih.²²Minmin nynh kae haw cikuh hae zah mingaee lang nynh a tang hae;²³arohthya leipaw Pachia phu-enaw kha arohthyapaw ccungccaw, pavaw, ccupali saepaw loramsaw te avawpaw loramsaw muinsan lang raepaw zohtuh hae te a rulae hae.

²⁴Tukeiccuze Pachia nynh mah minmin kha mimaw te mimaw laku kya mih pyn kha thethyasah khylan mih thinlung kya-e duaanaw thyhte anungsikuhpaw kalan a ap hae.²⁵Minmin nynh Pachia byaccing kha hynbya lang a paleih hae, Raetu Pachia laeze raepaw uccaw kha beik hae zah rya a lawpya hae. Tuh-e Raetu Bawipaw tuh zungzae thehoysah athua! Amen.

²⁶Hynh-e keiccuze Pachia nynh minmin kha maethya lan umpaw chiisaw rynaw kalan a ap hae, pawccecize mih nopi hae nynh aphung thyhte ikheihnaw kha vua hae zah aphung thua leipaw ikheihnaw kha a mang hae;²⁷tuhawte pise hae nynh mah nopi te aphung thyhte ikheihnaw kha vua hae zah, pise te pise mih chiisaw rynaw tuh maee lang arua. Pise te pise nynh maethya lan umpaw kha a cyi hae keiccuze mih cyiseinaw thyhte detahnaw kha a mue hae.

²⁸Minmin nynh Pachia kha a ny ry khyh hae keiccuze Pachia nynh athahpaw thinlung kalan ap hae zah minmin nynh angaekuh leipaw uccaw hae kha a cyi hae.²⁹Minmin tuh hoyleinaw aphuinphuin, athahpaw, karankunaw, othyanaw, eiungnaw, ccungccaw chianaw, pekumaekunaw, lingkunaw, thyaruhnaw, thanhonaw te phe abeih hae,³⁰thethya hotu hae, Pachia a huatu hae, a bunglepaw, a tansakuh hae paw, a pookuh hae paw, ahoy leipaw uccaw raetu hae, nungpaaw kawngae lei hae paw,³¹a ngaee hae paw, lungzi lei hae paw, thawccinaw hoi lei hae paw, rysawthah hae paw nynh thua hae.³²Hynhcihawpaw uccaw hae a cyih hae paw tuh chi lan accan hae cipaw Pachia byapianaw kha phang a nyh hae pite hynh-e uccaw hae hynh a cyi hae apiaze hynhcihawpaw a cyih hae paw kha thaw a pya hae. Pachia Byapianaw Adingpaw

¹Tukeiccuze nang tuh humhung na thua zemah milae kha bya na pia ze, ngaethya kho na thua lan khyh; pawccecize bya na pianawpaw uccaw ccaccei maw kha na cyibua keiccuze milae bya na pianaw kya namaw toulou kha sei na bekuhpaw nynh na thua.²Pachia nynh tuhcihawpaw uccaw a raetu hae kha byaccing thyhte bya a pia hae cipaw ah ny oh.³Tuhcihawpaw uccaw a cyihtupaw kha bya na pia zah namaw nynh tuh-e uccaw tuh na cyibua ze, Pachia byapianaw kyate ka lue cih cite na tuakuh tou?⁴Tuhkhyhze myarya lepaw a thawccinaw, a ngaesangnaw te a lungsaenaw kha pawlangria leite tou na ung? Pachia thawccinaw nynh nang kha ngaesikunaw kalan ae cciakhae cipaw na nyh khyh tou?⁵Thuasalama na lungkhungnaw te ngaesiku ry leinaw thinlung keiccuze Pachia kya-e adingpaw byapianaw langsapyaku nin, thinrianaw nin kya namaw hanlan thinrianaw kha na ccyku.⁶Pachia nynh ccungccaw miakaw kha a cyisahnaw thyhte amee a pya cih.⁷Ahoypaw rya kha lungsaete lah zah phu-enaw, sawtuanaw te chi kho leinaw a ccung hae paw tuh Pachia nynh zungzae hiinnaw kha a pya cih hae.⁸Thuasalama mimaw hanlan kyalya tua hae zah byaccing kaw kha ngae leite hoyleinaw kaw a ngae hae paw tungvaw kya Pachia bungpawnaw te thinrianaw a um cih.⁹Masaty lan Judah hae, tukoute Zenta hae mah hoyleinaw a raepaw miakaw tuh vawsawnaw te lungriathaenaw kha a tung cih hae.¹⁰Thuasalama masaty lan Judah hae, tukoute Zenta hae mah hoynaw a raepaw miakaw tuh Pachia nynh phu-enaw, sawtuanaw te daenaw kha a pya cih hae.¹¹Pawccecize Pachia tuh mirymihuapo khyh.

¹²Pawccecize Kawbya ny leite a sei hae paw balyn tuh Kawbya leite a roh cih hae; Kawbya mang a nyh hae pite a sei hae paw balyn mah Kawbya thyhte byapia athua cih hae.¹³Pawccecize Kawbya a thae hae paw hynh Pachia malang a ding hae paw thua khyh, thuasalama Kawbya a zui hae paw kha nynh ading cite ci athua cih hae.¹⁴Pawccecize Kawbya hoi lei hae paw Zenta hae nynh kawbya a hoi lei hae pite kawbya kya umpaw uccaw hae kha aphung lante he a zui hae tuh, tuh-e tuh mih hanlan Kawbya lang yn tang.¹⁵Minmin nynh mih thinlung kya azeikuhpaw Kawbya kya-e bya hae kha a langsah hae, mimaw nykunaw thinlung nynh mah ccaekia a khan; pawccecize mih tuanaw nynh mimaw kha vaekhakheit seibe zah, vaekhakheit a ngaethya.¹⁶Kae nynh ka hopaw thehoypaw thyhte Pachia nynh Jesu Khri liate ccungccaw balyn nynh aruh lante a tuaku hae paw kha byapianaw nin kya bya a pia cih. Judah hae te Kawbya

¹⁷Nang nynh Judah paw na cikuh zah Kawbya kha doliakute Pachia te na kyngkunaw oh kyakhe na pooku.¹⁸Pachia rynaw kha na nyh zah Kawbya te thuihei na thua keiccuze ahoy huapaw uccaw hae kha na phiathya zah,¹⁹nang tuh mitmoh hae kha laanpi cciakhaetu te mohnaw kya um hae paw kha awnaw muihsahtu nynh ka thua,²⁰mingaee hae kha a thuiheitu, imua hae kha a ccangpahtu, Kawbya kya umpaw byaccing te nynaw a hoipaw nynh ka thua cite na zynku ze,²¹mingccang hae kha na ccangpah hae zah namaw te namaw so na ccangpakuh khyh tou? Ruh nan oh cite phung na ho zah namaw so na ruh tou?²²Milae zu seikhae nan oh cite na ho zah namaw so milae zu na seikhae tou? Zohtuh kha luathua-ae-uipaw lang na ria zah namaw so zohtuh beikinn uccaw kha na luade tou?²³Kawbya kya na pookuh zah kawbya ronaw liate Pachia kha the na thyaasah tou?²⁴Pawccecize Ccathyaa kyaze, “Nanning keiccuze Pachia min tuh Zenta hae laku kya thethya ccousah athua,” cite azeikuh.

²⁵Nang nynh Kawbya kha na zui ze, vingdungawkupaw tuh athane ccaccing; thuasalama nang tuh Kawbya kha na ro ze, na vingdungawkupaw tuh vingdungawku leipaw lang nynh phe a tang.²⁶Tukeiccuze vingdungawkuh leipaw nynh Kawbya kya-e bya hae kha a zui lanze, a vingdungawku leinaw tuh vingdungawkunaw lang riapya thua lan khyh tou?²⁷Pynsaw lante vingdung a awku khyh zemah Kawbya a zuipaw ccungccaw nynh Kawbya azeikuhpaw na hoi zah vingdung mang na awkuh pite kawbya na zui leipaw nang kha sei ae be cih.²⁸Pawccecize atolang te kyalya Judah athuapaw tuh Judah ccungccaw ccaccing thua khyh; ngesaw kya atolang te kyalya vingdungawkunaw mah vingdungawkunaw ccaccing thua khyh.²⁹Alungkhu langte Judah athuapaw nynh Judah ccungccaw ccaccing athua; ahmepaw vingdungawkunaw tuh thinlung te asekuhpaw nynh thua—tuh-e tuh zeipaw kawbya keiccu thua leite muisaw liate nynh thua. Tuhcihawpaw ccungccaw nynh a ccoupaw thehoynaw tuh ccungccaw hae kyate thua leite Pachia kyate nynh athua.

¹Tuhteze, Judah ccungccaw thuanaw hynh pawmou athane? Tuhkhyhze vingdungawkunaw hynh amee um tou?²Aphuinphuin te thanenaw patae a um. Masaty lan Judah hae nynh Pachia kya-e bya kha a mue hae.³Minmin abang nynh mih lungzi khyh ze pawtemou athua cih? Mih lungzi leinaw nynh Pachia kya-e lungzinaw kha a roh kho cih tou?⁴Roh kho lan khyh! Ccathyaa kyaze,“Na hopaw bya tuh hme zahbya ae pia vae hae zenang tuh na tae,”cite azeiku hawte, ccungccaw miakaw tuh ahynpaw thua hae salamah Pachia tuh ahmepaw nynh thua.⁵Thuasalama aening ah dingleinaw oh nynh Pachia dingnaw kha a langsaku lanze, pawtemou ah ho cih oh? Pachia nynh aening tungvaw a thinria zah de oun tah vae ze, aning tuh ding khyh tou? (Ccungccaw phung te nynh ka ho.)⁶Tuhte thua khyh! Tuhte athua lanze Pachia nynh laephi hynh pawtemou bya a pia kho cih?⁷Pawccecize kae ka hynnaw liate Pachia byaccing nynh a phu-enaw kha houh a langsah ze, kae kha miseipaw lante pawccemou bya yn pia hae?⁸Pawccemou, “Ahoypaw a langku nawlan ahoy leipaw kha cyih oh sih,” cite ah ho khyh oh? Ccungccaw abang nynh kaening kha thethya oun ccousah ry hae pawte, tuhte na ho oh oun ci hae. Tuhte a hotu hae tuh seibe lan accan hae! Adingpaw Hum Sanmah Um Khyh

⁹Tuhteze pawtemou? Aening Judah hae tuh minmin laeze ah hoyhua oh tou? Ccapyh sanmah ah hoyhua khyh oh; pawccecize Judah hae te Zenta hae balyn tuh seinaw huhan zakaw nynh ah um oh cite langmaw phe kae langsaku vae.¹⁰Ccathyaa kyaze,“Adingpaw hum san um khyh,lu kheit sanmah um khyh,¹¹A thaethyapaw hum san um khyh,Pachia kha a ccungpawhum san um khyh.¹²Ccungccaw balyn tuhlaanpi pong me vae hae,mih balyn mawteccungkia vae khyh hae,ahoypaw a cyihpawhum san um khyh,lu kheit san um khyh.¹³Mih lotharue tuhahungkuhpaw shaw nynh thua,mih lae kha hyn nawlana mang hae, mih munglae kyakhehuparepaw sy a um.¹⁴Mih khalang tuhthyalawnaw bya tebya khahpaw te nynh phe abia,¹⁵Mih ccu tuh chii luasah lana thyrang;¹⁶Mih ccianaw laanpi kyaronaw te riathaenaw a um;¹⁷daenaw laanpi kha nyh khyh hae.

¹⁸Mih mit kyaPachia rawrinaw cipawkharouh um khyh,”cite azeikuh.

¹⁹Kawbya nynh a hopaw miakaw tuh Kawbya zakaw a um hae paw hanlan nynh a ho cipaw ah ny oh, tuh-e tuh khalang miakaw nynh bya a ho ngan khyh nawlan te laephi pynpi hynh Pachia byapianaw malang a thadyn lanpaw nynh thua cipaw alangku nawlan nynh thua.²⁰Tukeiccuze Kawbya zuinaw liate hum sanmah Pachia malang thyaaccou kho lan khyh; pawccecize Kawbya liate nynh seinaw kha nyku athua. Zynnaw liate Dingnaw

²¹Thuasalama atu tuh Kawbya te asekuh leipaw Pachia kya-e dingnaw kha yn langkuh vae; tuh-e kong tuh Kawbya te Profeh hae bya nynh ccaekia a khan hae.²²Tuh-e tuh Jesu Khri zynnaw liate a zynpaw balyn elang Pachia kya-e dingnaw nynh thua; laesahkunaw um vae khyh,²³pawccecize ccungccaw balyn tuh phe sei vae hae zah Pachia phu-enaw te a sawkuh vae hae;²⁴minmin tuh Khri Jesu shawkhawnaw liate Pachia thawccinaw keiccuze alakawte thyaaccousah athua vae hae.²⁵Pachia nynh Khri kha a chiise liate seingaethyanaw elang silawnawpaw lang a tangsah, tuh-e Khri tuh zynnaw liate seingaethyanaw mue athua, tuhcite Pachia nynh a dingnaw kha a langsaku; pawccecize Pachia nynh a ngaesangnaw liate langmawlya e raepaw ccungccaw seinaw kha a ngaethya,²⁶atu vae tuh Pachia nynh amaw a dingnaw kha langsaku khylan te Jesu a zynpaw miakaw tuh thyaaccousah athuanaw kong kha langsaku khylan tuhcite a cyi.

²⁷Tuhteze pookunaw tuh pawlangmou a tang? Pookunaw tuh vua athua. Paw kawbya te mou vua athua? Cyisahnaw kawbya liate tou? Thua khyh, zynnaw kawbya liate nynh vua athua.²⁸Pawccecize ccungccaw tuh Kawbya cyisahnaw um leite zynnaw liate nynh thyaaccou athua cipaw ah ny oh.²⁹Pachia tuh Judah hae Pachia kyalya tou? Zenta hae Pachia so thuabua khyh tou? Athuabua, Zenta hae Pachia mah athuabua.³⁰Vingdung a awkuhpaw te vingdung a awkuh leipaw parouh mawte zynnaw liate thyaa a ccousah cih hae paw tuh Pachia ccangkheit rou nynh a um.³¹Tuhteze aening nynh zynnaw liate Kawbya tuh ah vua oh tou? Ah vua khyh oh, Kawbya kha ah tynsah oh paw nynh thua. Abraham Tousenaw

¹Tuhteze pynsaw lante ah minpaaw athuapaw Abraham kong hynh pawtemou ah ho cih oh?²Abraham tuh cyisahnaw liate thyaaccousah athua ze, pooku lanpaw a hoi, thuasalama Pachia malang pooku lanpaw hoi khyh.³Pawccecize Ccathyaa nynh pawtemou a ho? “Abraham nynh Pachia kha zyn zah, tuh-e a zynnaw tuh dingnaw lang riapya athua,” a ci.⁴Ryalahpaw ccungccaw nynh a muepaw ryalaw mee kha lasung lang riapya thua khyh, tuh-e tuh atekuhpaw ryalaw mee nynh thua.⁵Rya mah lah khyh zah Pachia mah a nyh leipaw ccungccaw kha thyaa a ccousahtupaw Pachia kha a zynpaw tuh, tuh-e a zynnaw kha dingnaw lang riapya athua.⁶Tuhawte cyisahnaw um leite Pachia nynh miding lante a tuapaw ccungccapaw kya-e lungtuanaw kong kha David nynh a hopaw tuh:⁷“Mih hoyleinaw khangaethya athua hae paw temih seinaw kha bongpyaathua hae paw tuhlungtua hae paw nynh thua.⁸Bawipaw nynh sei a beleipaw ccungccaw tuhlungtuapaw nynh thua,” a ci.

⁹Tuhteze, hynh-e lungtuanaw tuh vingdung a awkuh hae paw hanlan kyalya tou athua? Tuhkhyhze vingdung a awkuh lei hae paw hanlan so thuabua khyh tou? Pawccecize Abraham hanlan zynnaw kha dingnaw lang riapya athua cite ah ho oh.¹⁰Tuhteze tuh-e tuh aning elang pawtemou riapya athua? Vingdung a awku maw tou, vingdung a awkuh koute tou? A awkuh koute riapyapaw thua khyh, a awku maw riapyapaw nynh thua.¹¹Abraham nynh vingdung a awku mawze zynnaw liate a muepaw dingnaw tazeih athuapaw vingdungawkupaw syntawnaw kha a mue. Tuh-e tuh vingdungawku leite a zynpaw ccungccaw hae kha dingnaw lang riapya nawlan te Abraham tuh a zynpaw ccungccaw balyn paaw lang tang nawlan nynh thua.¹²Tuhpiaze Abraham tuh vingdung a awkuh hae paw paaw lang tang khylan te vingdungawku kyalya thua leite ah minpaaw Abraham nynh vingdung a awku mawze a hoipaw zynnaw ccunoh a zui hae paw, vingdung a awkuh lei hae paw paaw lang mah tang khylan nynh thua. Zynnaw liate Byakinpyakupaw Ccounaw

¹³Pawccecize aning tuh laephi rhoccoutu athua cih cite Abraham kya te a ciihan hae kya yn thuapaw byakinpyakunaw tuh Kawbya liate thua khyh, zynnaw kya-e dingnaw liate nynh athua.¹⁴Pawccecize Kawbya a zui hae paw tuh rhoccoutu athua hae ze, zynnaw tuh alakaw vae, byakinpyakupaw mah ccungkia vae khyh.¹⁵Pawccecize Kawbya nynh tuh thinrianaw kha a thuakhae; thuasalama kawbya um leinaw kya tuh cyiseinaw mah um khyh.

¹⁶Tukeiccuze Pachia byakinpyakunaw tuh thawccinaw liate thua zah Abraham ciihan hae balyn hanlan aamahkhankute zynnaw kya a thadynpaw nynh thua; tuh-e byakinpyakunaw tuh Kawbya a zui hae paw hanlan kyalya thua leite, aening ah balyn paaw athuapaw Abraham hawte zynnaw a hoi hae paw hanlan mah athuabua.¹⁷Ccathyaa kyaze, “Nang kha minphuin patae paaw lang kae rae vae,” cite azeiku hawte, Abaraham tuh amaw nynh a zynpaw Pachia, a chih hae paw kha hiinsah hae zah a um loh leipaw uccaw hae kha um lan kaw a pya khopaw tuh-e Pachia malang khe aening ah balyn paaw nynh thua.¹⁸“Na ciihan hae tuh myarya a lung cih hae,” cite a hopyapaw bya thyhawte Abraham nynh kae tuh “minphuin patae paaw” lang ka tang cih cite ngaehoi lan accan lei pite zyn zah a ngaehoi.¹⁹Aning tuh kum za kheit loukaw a ci vae zemah a pyn tuh michi hawte tuaku leite, a zu Sarah vue mah a tiin vae cite tua leite zynnaw kya a thawzya khyh.²⁰Pachia nynh bya a kinpyakupaw kha lunghiinnaw hoi leite, a zynnaw mah zyabung khyh, a zynnaw kya a thawsae zah Pachia kha phu-enaw a pya.²¹Pachia nynh bya a kinkupaw kha a ccingsah kho cite varyng a zyn.²²Tukeiccuze a zynnaw kha dingnaw lang riapya athua.²³Tuhte “riapya athua” cite Ccathyaa kya azeikuhpaw hynh Abraham elang kyalya thua khyh,²⁴aening hanlan mah azeikuhpaw nynh thua. Ah Bawipaw Jesu kha chinaw kyate a thoosahtupaw Pachia kha aening nynh ah zyn oh ze tuh-e zynnaw tuh aening dingnaw lang riapya athua cih.²⁵Bawipaw Jesu tuh aening seinaw keiccuze ccungccaw hae kalan ap hae zah, aening thyaaccounaw hanlan thoosahthui athua. Thyaaccounaw kyate Muepaw

¹Tukeiccuze zynnaw liate thyaaccousah ah thua vae oh zah, ah Bawipaw Jesu Khri liate aening tuh Pachia te ah ccawkuh vae oh.²Aening ah thadynnaw oh hynh-e thawccinaw lungkhu lang amaw zynnaw liate nynh aening naeku khonaw ah hoi oh; Pachia phu-enaw kha neethungku lan ah ngaehoi oh zah ah lungtua.³Hynh-e kya kyalya thua khyh, aening ah teingnaw oh kya mah ah lungtua; pawccecize teingnaw nynh ngaesangnaw kha a thuakhae cipaw ah ny oh;⁴ngaesangnaw nynh Pachia lungtungnaw kha a thuakhae, tuh-e lungtungnaw nynh ngaehoinaw kha a thuakhae;⁵ngaehoinaw nynh lungronaw kha oun pya khyh, pawccecize Pachia nynh aening oun pyapaw Thyaa Muisaw liate a sungsahnaw kha ah thinlung kya oun bu vae.

⁶Pawccecize aening ah thawzya ccyh lyakhe Khri tuh accyh zawte Pachia nyh lei hae paw hanlan a chih.⁷Adingpaw ccungccaw hanlan a chipah cih paw ccungccaw kou akhin cih, tuhzemah ccungccaw hoypaw hanlan a chih nganpaw poh um ccamah ny lei.⁸Thuasalama aening tuh misei hae ah thua cciamang lya oh khe, Khri nynh aening hanlan oun chipyapaw tuh Pachia nynh aening kha pawcih nynh oun sungsah cipaw a langsakunawpaw nynh thua.⁹Tukeiccuze atu tuh a chiise liate thyaaccousah ah thua vae oh zah, amaw liate Pachia thinrianaw kyate khum ah thua vae cih oh.¹⁰Pawccecize aening tuh Pachia rhaw hae ah thua lya oh khe, a Ccapaw chinaw liate Pachia te ah ccawkuthui vae oh, tuhte ccawkuthuinaw ah mue vae oh paw aening tuh a hiinnaw liate khum ah thua vae cih oh.¹¹Tuh kyalya thua leite, ah Bawipaw Jesu Khri liate aening tuh ccawkuthuinaw atu ah mue vae oh zah, amaw liate Pachia kya ah lungtua. Adam te Jesu

¹²Pawccemacize ccungccaw lu kheit keiccuze seinaw tuh laephi kalan yn thua zah, seinaw liate chinaw tuh yn thua, tukeiccuze ccungccaw balyn tuh marya ah sei vae oh keiccuze chinaw nynh pong oun thuanua vae.¹³Kawbya pya athua mawze laephi kya seinaw phe a um vae; thuasalama kawbya a um maw e seinaw tuh riapya thua loh khyh.¹⁴Tuhzemah Adam she kyate Moses she kyacia chinaw nynh phe a uk vae; Adam nynh a raepaw seinaw te alokuh leipaw seinaw a rae hae paw kha mah chinaw nynh phe a uk hae, tuh-e Adam tuh nyalang yn thua cih paw kya-e langsahkupaw muinsan nynh athua.

¹⁵Thuasalama alakawte muepaw lasung te seinaw tuh lokuh khyh. Pawccecize ccungccaw lu kheit seinaw keiccuze ccungccaw patae tuh a chi hae ze, Pachia thawccinaw te ccungccaw lu kheit athuapaw Jesu Khri thawccinaw liate alakawte muepaw lasung tuh ccungccaw patae hanlan houh alehua.¹⁶Ccungccaw lu kheit seinaw liate yn thuapaw te alakawte muepaw lasung tuh lokuh khyh, pawccecize seinaw ccangkheit nulang a zuikuhpaw byapianaw nynh seibenaw kha yn thuakhae, thuasalama seinaw patae nulang a zuikuhpaw alakawte muepaw lasung tuh thyaaccounaw nynh thua.¹⁷Ccungccaw lu kheit seinaw liate, tuh-e paw keiccuze chinaw nynh a uk; thawccinaw phe beih lan a ccou hae paw te alakawte muepaw dingnaw lasung a ccou hae paw tuh lukheitpaw, Jesu Khri liate zungzae hiinnaw a hoi cih hae.

¹⁸Tukeiccuze ccungccaw lu kheit seinaw nynh ccungccaw balyn kha byapianaw kalan oun thuakhae hawte, ccungccaw lu kheit dingnaw nynh ccungccaw balyn kha hiinnaw te asekuhpaw thyaaccounaw kalan oun thuakhae.¹⁹Pawccecize ccungccaw lu kheit nynh kawngae khyh keiccuze ccungccaw patae tuh misei lang tangsah athua hae hawte, ccungccaw lu kheit nynh kaw a ngaenaw liate ccungccaw patae tuh miding lang tangsah athua cih hae.²⁰Seinaw lungsah khylan Kawbya tuh yn thua; thuasalama seinaw alungnaw kya thawccinaw houh alunghua.²¹Tuh-e tuh seinaw nynh chinaw kya a uk hawte, thawccinaw nynh mah ah Bawipaw Jesu Khri liate zungzae hiinnaw mue khylan thyaaccounaw liate a uk nawlan nynh thua. Jesu ryte Chikheih Thookheih

¹Tuhteze pawcihte ah ho cih oh? Thawccinaw houh alung ccaw cite seinaw tou palei ah rae cih oh?²Tuhte thua khyh! Seinaw kya ah chih vae oh paw aening tuh pawtemou seinaw lungkhu ah hiin ung cih oh?³Jesu Khri kya baptisma ah in vae oh paw aening balyn tuh a chinaw kya baptisma phe ah in vae oh cipaw na nyh khyh oh tou?⁴Tukeiccuze a chinaw kya baptisma ah in oh liate aening tuh amaw ryte uukheih ah thuabua vae oh. Tuhcite Khri tuh Paaw phu-enaw liate chinaw kyate thoosahthui athua hawte, aening mah hiinnaw thawpaw kya ah hiin cih oh.

⁵Pawccecize aening tuh a chinaw kyakhe amaw ryte ah chikheih oh athua ze, a thoothuinaw kya mah amaw ryte ah thookheih cih oh.⁶Aening ah ccungccaw rynpaw kha Khri ryte vaelantung kya khiade athua vae cipaw ah ny oh. Tuh-e tuh seinaw te asekuhpaw pyn hynh ro khylan te seinaw rya ah law vae khyh nawlan oh nynh thua.⁷Pawccecize a chih vae paw ccungccaw tuh seinaw kyate phe a lue vae.⁸Aening tuh Khri ryte ah chikheih vae oh athua ze, amaw ryte ah hiinkheih vae cih oh cite mah ah zyn oh.⁹Pawccecize Khri tuh a chih hae paw kyate thoosah thua vae zah, bua chih vae lan khyh; chinaw nynh amaw kha uk vae khyh cipaw ah ny oh.¹⁰Pawccecize Khri nynh a chipaw tuh seinaw hanlan chih zah zungzae hanlan vaekheit rou nynh a chi, thuasalama a hiinpaw tuh Pachia hanlan nynh a hiin.¹¹Tuhawte nanning mah seinaw kya phe kae chih vae cite tuakuh oh lah, ah Bawipaw Jesu Khri liate Pachia kya kae hiin cite tuakuh oh.

¹²Tukeiccuze nae pynsaw rynaw kha zui khylan seinaw nynh a chihthyapaw nae pyn kha uk nan vae sah.¹³Nae pyn kya-e hae mah seinaw rae nawlan hoyleinaw zunghe lante la pyakuh nan oh; thuasalama chinaw kyate thoothui zah a hiin hae paw hawte Pachia kalan pyakuh oh lah, nae pyn kya-e hae kha mah dingnaw zunghe lante Pachia kalan pyakuh oh.¹⁴Pawccecize nanning tuh Kawbya zakaw um vae leite, thawccinaw zakaw kya na um vae oh keiccuze seinaw nynh ae uk vae lan khyh oh. Dingnaw See hae

¹⁵Tuhteze pawtemou? Aening tuh Kawbya zakaw um leite thawccinaw zakaw kya ah um vae oh keiccuze seinaw ah rae cih oh tou? Tuhte thua khyh!¹⁶Nanning nynh naemaw te naemaw kha lukhakheit kalan khe kaw a ngaepaw see lang na pyaku oh lan athua ze, nanning tuh a kaw na ngae oh paw tuh-e paw see nynh kae thua cipaw na nyhkuh khyh oh tou? Chinaw kalan a thuakhaepaw seinaw kalan na pyaku oh ze thuasah, dingnaw kalan a thuakhaepaw kawngaenaw kalan na pyaku oh ze thuasah, nanning tuh tuh-e hae see nynh na thua oh.¹⁷Thuasalama nanning tuh vaekheit lyaze seinaw see hae na la thua oh zemah, atu tuh na mue oh paw ccangpyanaw kha nae thinlung te phe na lawku vae oh keiccuze Pachia kya thehoynaw um sah.¹⁸Seinaw kyate luesah na thua vae oh zah, dingnaw see lang nynh na tang vae oh.¹⁹Nae pynsaw lante na ccing khyh oh keiccuze ccungccaw bya huataw te kae hopya oh; pawccecize langmawlya tuh nae pyn kya-e hae kha ahoy leipaw rae nawlan anungsikuhpaw te ahoy leipaw see lang na la pyaku oh hawte, atu mah nae pyn kya-e hae kha athyaapaw rae nawlan dingnaw see lang pyakuh oh.

²⁰Pawccecize nanning tuh seinaw see hae na la thua lya oh kha dingnaw kyate na la lue oh.²¹Atu nae maethyakhaekupaw tuh-e uccaw hae kyate thanenaw pawmou na mue oh? Tuh-e uccaw hae athangnaw tuh chinaw nynh thua.²²Thuasalama atu tuh seinaw kyate luesah na thua vae oh zah, Pachia see lang na tang vae oh keiccuze thyaanaw hanlan thanenaw kha na mue oh, te athangnaw lan zungzae hiinnaw kha na mue cih oh.²³Pawccecize seinaw mee tuh chinaw nynh thua; thuasalama Pachia kya-e lasung tuh ah Bawipaw Jesu Khri liate zungzae hiinnaw nynh thua. Zudykunaw kyate Tousenaw

¹Kawbya a nyh hae paw uno hae, nae kalan kae hopya oh. Kawbya nynh ccungccaw lu kheit kha a hiin lungkhu kyalya nynh a uk cipaw na nyh khyh oh tou?²Pawccecize tungtuh vae paw nopinung tuh a vawpaw a hiin lungkhu balyn kawbya liate a vawpaw kya heede athua; thuasalama a vawpaw tuh a chi lanze a vawpaw te asekuhpaw kawbya kyate aning tuh a lue.³Tukeiccuze a vawpaw phang a hiin lyakhe ccangpaw pise te a umkheih hae ze, aning tuh vawpaw tungvaw a ohhuakuhnung cite ko athua cih; thuasalama a vawpaw tuh a chi ze, aning tuh tuh-e kawbya kyate a lue, tukeiccuze pise ccangpaw te a umkheih hae zemah vawpaw tungvaw ohhuakuhnung thua vae khyh.

⁴Tuhawte ka uno hae, nanning mah Khri pyn liate Kawbya kya na chih vae oh; tuh-e tuh chinaw kyate a thoothuipaw, mingccangpaw Khri te a sekuh hae paw na thua oh zah Pachia hanlan athae ah thae nawlan oh nynh thua.⁵Pawccecize pynsaw kya ah hiin lya oh tuh, Kawbya keiccu yn langkuhpaw sei rynaw thinlung nynh chinaw hanlan athae poukhae khylan aening ah pyn kya-e hae kyakhe rya a law.⁶Thuasalama atu tuh aening oun khiipaw Kawbya kya ah chih vae oh zah tuh-e Kawbya kyate ah lue vae oh; tukeiccuze azeikuhpaw Kawbya rynpaw kya thua leite, Muisaw kya-e hiinnaw thawpaw kya rya ah lah cih oh. Kawbya te Seinaw

⁷Tuhteze pawte ah ho cih oh? Kawbya tuh a sei tou? Tuhte thua khyh! Kawbya a la um khyh ze, seinaw hynh ka nyh lan khyh. Pawccecize Kawbya nynh, “Na duaa lan khyh,” cite a la ho khyh ze, kae tuh duaanaw kong hynh ka la nyh lan khyh.⁸Thuasalama seinaw nynh kawbya liate ccyhhoy mue zah ka lungkhu kya duaanaw aphuinphuin balyn kha a poukhae; pawccecize Kawbya a um khyh ze seinaw tuh a chih.⁹Langmawlya tuh Kawbya leite nynh ka la hiin, thuasalama kawbya he yn thua te, seinaw tuh yn hiin zah kae tuh ka chih.¹⁰Hiinnaw pya lan bya yn kinpakuhpaw Kawbya nynh ka hanlan chinaw yn thuakhaepaw kha ka muih.¹¹Pawccecize seinaw tuh Kawbya liate ccyhhoy mue zah kae kha yn ling, te tuh-e Kawbya liate kae kha yn chia.¹²Tukeiccuze Kawbya tuh athyaa, phungbya mah athyaa, ding zah ahoy.

¹³Tuhteze ahoypaw nynh kae kha chinaw tou yn thuakhaepya? Tuhte thua khyh! Ka kalan chinaw yn thuakhaepaw tuh seinaw thua zah, seinaw nynh seinaw athuanaw zia kha langsaku khylan ahoypaw uccaw kha a mang; tuhcite seinaw tuh Kawbya liate myaryamaw seinaw alungpaw lang a tang. Thinlung kya Lungriathaenaw

¹⁴Pawccecize Kawbya tuh muisaw lante asekuhpaw nynh thua cipaw ah ny oh; thuasalama kae tuh pynsaw ccungccaw ka thua zah, seinaw see lang zuapaw nynh ka thua.¹⁵Ka cyipaw kha ka thaethya khyh. Ka cyi rypaw kha ka cyih khyh, ka huapaw kha nynh ka cyi.¹⁶Tuhte ka ry leipaw kha ka cyi ze, Kawbya tuh ahoy cite ka nawccawkhae.¹⁷Tuhteze atu tuh-e a cyihpaw tuh kamaw ka thua vae khyh, ka lungkhu kya umpaw seinaw nynh a cyih.¹⁸Pawccecize ka lungkhu, ka chiisaw kya ahoypaw kharouh um khyh cipaw ka ny; pawccecize ahmepaw cyi rynaw thinlung tuh ka lungkhu kya um salamah tuh-e tuh ka cyih kho khyh.¹⁹Pawccecize ka cyi rypaw ahoypaw kha ka cyih khyh, ka cyi ry leipaw ahoy leipaw kha nynh ka cyi.²⁰Ka cyi ry leipaw kha atu ka cyi lan athua ze, tuh-e a cyihpaw tuh kamaw ka thua vae khyh, ka lungkhu umpaw seinaw nynh a cyih.

²¹Tuhte ahoypaw ka cyi ry lyakhe ahoy leipaw tuh ka pe kya a um cite kawbya ccangkheit ka muih.²²Kae tuh ka thinlung kya Pachia Kawbya kyakhe ka lungrythua.²³Thuasalama ka pyn kya-e hae kya ccangpaw kawbya kha ka muih, tuh-e kawbya nynh ka thinlung kya-e kawbya kha rawse zah, ka pyn kya-e hae kya umpaw seinaw kawbya kalan khe yn kyng zah yn cciakhae.²⁴Kae hynh pawcih ngaethya lan umpaw ccungccaw mou ka thua! Hynh-e chinaw pyn kyate hum nynh mou yn luesah cih?²⁵Ah Bawipaw Jesu Khri liate yn luesahtupaw Pachia kya thehoynaw um sah!
Tukeiccuze ka thinlung tetuh Pachia Kawbya kha ka zui, thuasalama ka pynsaw lante tuh seinaw kawbya kha nynh ka zui. Muisaw kya Hiin

¹Tukeiccuze atu Khri Jesu kya a um hae paw tuh seibenaw um vae khyh.²Pawccecize Khri Jesu kya umpaw hiinnaw kha yn pyatupaw Muisaw kawbya nynh seinaw kawbya kyate thuasah, chinaw kawbya kyate thuasah kae kha phe yn luesah vae.³Pawccecize pynsaw keiccuze a thawzyapaw Kawbya nynh a cyi kho leipaw kha Pachia nynh a cyi. A seipaw pynsaw muinsan lante seinaw hanlan a Ccapaw kha yn saw zah, pynsaw kya umpaw seinaw kha sei a be.⁴Tuhte pynsaw rynaw thyhte hiin vae leite Muisaw rynaw thyhte a hiin hae paw aening kya Kawbya kya-e bya hae tuh accing nawlan nynh thua.⁵Pawccecize pynsaw rynaw thyhte a hiin hae paw nynh tuh pynsaw te asekuhpaw uccaw hae kha nynh a tua hae; thuasalama Muisaw rynaw thyhte a hiin hae paw nynh tuh Muisaw te asekuhpaw uccaw hae kha nynh a tua hae.⁶Pynsaw te asekuhpaw tuanaw tuh chinaw nynh thua, thuasalama Muisaw te asekuhpaw tuanaw tuh hiinnaw te daenaw nynh thua.⁷Pawccecize pynsaw te asekuhpaw tuanaw tuh Pachia te arawsekuh, pawccecize tuh-e tuanaw tuh Pachia Kawbya kha zui khyh, zui mah zui kho khyh.⁸Tukeiccuze pynsaw rynaw kya um hae paw nynh tuh Pachia lungtung kho khyh hae.

⁹Thuasalama nanning tuh pynsaw rynaw kya na um khyh oh; Pachia Muisaw tuh nae kya a um ccaccing ze, nanning tuh Muisaw kya nynh na um oh. Khri Muisaw a hoi leipaw tuh Khri te sekuh khyh.¹⁰Khri tuh nae kya a um lanze, pyn tuh seinaw keiccu chih salamah muisaw tuh dingnaw keiccu a hiin.¹¹Jesu kha chinaw kyate a thoosahtupaw Pachia Muisaw tuh nae kya a um lanze, Khri kha chinaw kyate a thoosahtupaw Pachia nynh nae kya a umpaw amaw Muisaw liate a chihthyapaw nae pyn kha ae hiinsah cih oh.

¹²Tukeiccuze uteno hae, aening tuh pynsaw rynaw thyhte hiin khylan pynsaw kya laebah ah hoi vae khyh oh.¹³Pawccecize pynsaw rynaw thyhte na hiin oh ze na chih cih oh; thuasalama Muisaw liate pyn a cyisahnaw kha na chisah oh ze na hiin cih oh.¹⁴Pawccecize Pachia Muisaw nynh a cciakhae hae paw balyn tuh Pachia ccaaw hae nynh thua hae.¹⁵Pawccecize nanning nynh bua a rihthyapaw see thinlung kha Pachia kyate mue leite, ccaaw thinlung kha nynh na mue oh. “Ka Paaw! Ka Paaw!” cite aening nynh ah sia vae oh ze,¹⁶aening tuh Pachia ccaaw hae nynh ah thua oh cipaw Muisaw amaw ccaccei nynh aening muisaw ryte ccaekia a khan.¹⁷Ccaaw hae ah thua oh ze rhoccoutu hae nynh ah thua vae oh, Pachia rho a ccoutu hae te Khri ryte rho a ccoukheih hae paw nynh ah thua oh; Khri ryte ah teingkheih oh ze, amaw ryte phu-enaw kha mah ah ccoubua cih oh.

¹⁸Pawccecize atu lya ah teing oh paw hynh aening kya yn langkuh cih paw phu-enaw te khinkhia lanze hosyn um khyh cite ka tua.¹⁹Pawccecize raepaw uccaw hae nynh Pachia ccaaw hae oun langku lan hae paw kha myarya ngaehoite a ngawdae hae.²⁰Pawccecize raepaw uccaw hae tuh accakaepaw lang rae athua hae; mimaw nynh tuhte raeku a ry hae paw thua leite, a raetupaw rynaw thyhte thua zah,²¹raepaw uccaw hae maw mah ronaw seetangnaw kyate a lue cih hae zah, Pachia ccaaw hae kya-e aphu-epaw luenaw kha a ccoubua cih hae cite ngaehoinaw a um keiccu nynh thua.²²Pawccecize raepaw uccaw hae balyn tuh atu cia neitangia accihpaw hawte a hawkhaekuh hae cipaw ah ny oh.²³Raepaw uccaw hae kyalya thua leite, Muisaw kya-e masaty athae a mue hae paw aening kha mah ccaaw thuanaw athuapaw ah pyn shawkhawnaw kha ngaehoi biate ahmaw lungkhu kya ah hawkhaekuh oh.²⁴Pawccecize aening tuh ngaehoinaw liate khum ah thua oh; thuasalama phe muih vae paw ngaehoinaw tuh ngaehoinaw thua vae khyh; pawccecize lukhakheit nynh phe a muih vae paw uccaw kha pawccemou a ngaehoi ung cih?²⁵Thuasalama aening nynh ah muih lei oh paw kha ah ngaehoi oh ze, tuh-e tuh lungsaete ah ngaw oh.

²⁶Tuhawte aening ah thawzyanaw kya Muisaw nynh oun bawm; pawccecize aening nynh pawtemou sawsang lan accan cipaw kha ah nyh khyh oh; thuasalama bya te ho kho leipaw hawkhaekunaw khate Muisaw amaw ccaccei nynh aening hanlan oun ngiapya.²⁷Thinlung a ccungtupaw Pachia nynh tuh Muisaw tuanaw kha a ny; pawccecize Muisaw nynh mithyaa hae hanlan Pachia rynaw thyhte a ngiapya hae.

²⁸Pachia kha sungsah hae zah amaw a eenaw thyhte ko athua hae paw hanlan tuh Pachia nynh pawpaw balyn kha ahoy lante cci nynh pynkheihlan rya a law cipaw ah ny oh.²⁹Pawccecize Pachia nynh a Ccapaw kha uno hae patae laku kya ccatawccaw lang a tang ccaw cite Pachia nynh a ny typaw ccungccaw hae kha a Ccapaw muinsan te losaku khylan ccangte a nung hae.³⁰Tuhte ccangte a nung hae paw kha ko mah a ko hae; te a ko hae paw kha thyaa a ccousah hae; thyaa a ccousah hae paw kha phu-enaw a ccousah bua hae. Jesu Khri kya Pachia Sungsahnaw

³¹Tuhteze hynh-e uccaw hae kong hynh pawtemou ah ho cih oh? Pachia tuh aening kalan a pan ze, hum nynh mou oun rawse kho cih?³²A Ccapaw heize haang leite aening balyn hanlan oun pyatupaw Pachia nynh Ccapaw ryte pawpaw balyn kha alakawte oun pya lan khyh tou?³³Pachia nynh a po hae paw kha hum nynh mou sei a be cih hae? Thyaaccousahtupaw tuh Pachia nynh thua.³⁴Seibetupaw tuh hummou? Chih zah a chi kyalya thua leite thoothui zah Pachia ranglang a umpaw, aening hanlan oun ngiapahtupaw tuh Jesu Khri nynh thua.³⁵Khri sungsahnaw kyate hum nynh mou oun phia kho cih? Vawsawnaw nynh tou? Riathaenaw nynh tou? Tuaasahkunaw nynh tou? Ccakannaw nynh tou? Ccakaete umnaw nynh tou? Rinaw nynh tou? Zunghe nynh tou oun phia kho cih?³⁶“Nang keiccuze kaening tuhanin ninlang oun chia hae;chia lanpaw tuu lang nynhoun ria hae,”cite Ccathyaa kya azeiku hawte nynh thua.³⁷Oun phia kho lanpaw um khyh. Aening oun sungsahtupaw amaw liate, aening tuh hynh-e uccaw hae balyn kya taetu hae pasing nynh ah thua oh.³⁸Pawccecize chinaw thuasah, hiinnaw thuasah, vaaw hae thuasah, uktu hae thuasah, atu a umpaw uccaw hae thuasah, oun um cih paw uccaw hae thuasah, thungnaw huhan thuasah,³⁹ahangnaw thuasah, akhunaw thuasah, raepaw uccaw hae balyn kya-e pawpaw uccaw nynh mah thuasah, ah Bawipaw Jesu Khri kya umpaw Pachia sungsakunaw kyate aening kha oun phia kho lan khyh cipaw ccaerarih lan ka ny. Pachia te Israel hae

¹Khri kya byaccing nynh ka ho, ka hyn khyh. Kamaw nykunawpaw thinlung nynh Thyaa Muisaw liate kamaw kalan te ccaekia a khanpaw tuh:²Kae tuh myarya ka ngaethah zah ka thinlung kya lungriathaenaw thang boi khyh.³Pawccecize pynsaw lante ka minphuin hae athua hae paw ka vaeccaw hae hanlan kamaw te kamaw hynh Khri te thoh phiaku lan zah thyalawnaw ccou lan cia heize ka ry.⁴Tuh-e hae tuh Israel hae thua hae zah, ccaaw thuanaw, phu-enaw, byakinnaw hae, kawbya pyanaw, Pachia beiknaw, byakinpyakupaw hae te a sekuh hae paw nynh thua.⁵Minmin tuh minpaaw hae te mah sekuh hae zah, pynsaw lante Messiah tuh minmin kyate nynh yn thua. Aning tuh tynre balyn kya kawhoitu thua zah zungzae hythuapyatu Pachia nynh thua. Amen.

⁶Pachia bya tuh tyn khyh cite ka ho rypaw thua khyh. Pawccecize Israel hae balyn hynh Israel ccaccing marya thua khyh hae.⁷Abraham ciihan balyn mah Abraham ccaaw hae ccaccing marya thua khyh hae; pawccecize, “Isak kya rou nynh na ciihan atyn cih,” acikuh.⁸Tuh-e asuilan tuh pynsaw ccaaw hae tuh Pachia ccaaw hae thua khyh hae; byakinpyakupaw kya-e ccaaw hae kha nynh ciihan lang ria athua hae.⁹Byakinpyakupaw kya-e bya tuh hynhte acikuh: “Atu ccyh yn thua te, bua kae thua cih zah Sarah nynh ccapaw lu kheit a saah cih,” a ci.¹⁰Tuh-e kyalya thua khyh, Rebeka nynh ah minpaaw Isak lu kheit liate ccaaw lu ning a poi lya mah tuh-e hawte acyihkuh.¹¹Tuh-e ccaaw hae a pui maw hae, ahoypaw te athahpaw mah a rae maw hae khe, ponaw te asekuhpaw Pachia paccynnaw tuh ryalawnaw liate thua leite, amaw nynh a konaw thyhte athua nawlan,¹²Rebeka kyakhe, “Atawccapaw nynh asoipaw kha rya a lawpah cih,” cite a hopya.¹³Ccathyaa kyaze,“Jakob tuh ka sungsah,Esau tuh ka hua,”cite azeiku thyhte nynh thua.

¹⁴Tuhteze pawcihte ah ho cih oh? Pachia tuh ding khyh tou? Tuhte thua khyh.¹⁵Pawccecize Pachia nynh Moses kyakhe, “Ngaethya ka umsah rypaw kha ngaethya ka umsah cih zah thaw ka cci rypaw kha thaw ka ccih cih,” cite a hopya.

¹⁶Tukeiccuze Pachia ponaw tuh ccungccaw rynaw liate thuasah, ryalawnaw liate thuasah thua leite, ngaethyaumsahnaw a langsakuhpaw Pachia liate nynh thua.¹⁷Pawccecize Ccathyaa kyaze Faro kalan a hopaw tuh: “Nang kae hangthungnawpaw hynh nang na kya ka thungnaw langsaku khylan te ka min hynh laephi vaw balyn po thaansah khylan nynh thua,” a cipya.¹⁸Tukeiccuze Pachia nynh ngaethyaumsah rypaw kha ngaethyaumsah zah lungkhungsah rypaw kha a lungkhungsah.

¹⁹Tuhteze, “Pawccemou Pachia nynh ccungccaw hynh sei oun be? Hum nynh mou a rynaw kha a khee kho cih?” cite kae hynh nae khia cih oh.²⁰Thuasalama, pou ccungccapaw, Pachia kha rawsete byakhung lan ciate nang tuh hummou na thua? Raepaw uccaw nynh a raetupaw kha, “Pawccemou hynhcite nae rae?” cite a hopah cih tou?²¹Ang raetupaw nynh anglae pum kheit mawkhate ang hoypaw lang te ang hoyleipaw lang raenaw kaw hoi khyh tou?²²Pachia nynh amaw thinrianaw kha langsaku lan te a thungnaw kha nysah lan hae mang a ry pite, ro lan a paccyn vae paw a thinrianuapaw ang hae kya lungsaenaw pipi te phang a ngaesang lanze pawmou ho lan ung?²³Pachia nynh phu-enaw hanlan a paccyn ty vae paw, ngaethyaumsahnaw a ccou hae paw ang hae tungvaw kya a phu-enaw kya-e hoirumnaw kha langsaku khylan phe a cyi vae zeso pawmou ho lan ung?²⁴Tuh-e ang hae kyatuin Pachia nynh oun kopaw aening mah ah umbua oh; Pachia nynh Judah hae kyate kyalya ko leite Zenta hae kyate mah oun ko.²⁵Hosea kya mah Pachia nynh,“Ka ccungccaw athualei hae paw kha,‘ka ccungccaw hae’ citeka ko cih hae zahka sungsah athua leipaw kha‘ka sungsah’ cite ka ko cih.²⁶‘Nanning tuh ka ccungccaw haena thua khyh oh,’ cite hopyaathuanaw hae hmin kyakheminmin kha ahiinpawPachia ccaaw hae citehopya athua cih hae,” a ci.

²⁷Israel hae te asekuh lante Isaiah nynh, “Israel hae milu tuh rili kya-e laesia zeih cih hae salamah a laehy hae paw rou nynh khum athua cih hae.²⁸Pawccecize Bawipaw nynh laephi vawlan hin arangte bya a pia cih,” cite a sia.²⁹Tukoute Isaiah nynh,“Vaaw Bawipaw nynhaening elang ciihan abang khaoun la haangpya khyh ze,aening tuh Sodom khua hawteah thua cih oh zahGomorrah khua teah lokuh vae cih oh,”cite a ho.

³⁰Tuhteze pawcihte ah ho cih oh? Dingnaw mue lan a zuakuh lei hae paw Zenta hae nynh dingnaw kha a mue vae hae, tuh-e tuh zynnaw liate muepaw dingnaw nynh thua.³¹Thuasalama kawbya te asekuhpaw dingnaw kha mue lan a zuakuh hae paw Israel hae tuh tuh-e dingnaw kha mue khyh hae.³²Pawccemou a mue khyh hae? Pawccecize dingnaw kha zynnaw liate thua leite, cyisahnaw liate mue khopaw hawte a zuaku hae keiccu nynh thua. Minmin tuh tuh-e thykunawpaw lung kya phe a thykuh hae.³³Ccathyaa kyaze,“Dotua oh! Ccungccaw haea thyku nawlan hae pawlung te a khuliaku nawlan hae pawlung kha Zion mua kya ka nung;humhung zemahamaw a zynpaw tuhmaethyanaw ccou vae lan khyh,”cite azeikuh hawte nynh thua.

¹Uteno hae, Israel hae hanlan ka thinlung kya ka rynaw te Pachia kalan ka sawsangnaw tuh minmin nynh khumnaw a ccou nawlan hae nynh thua.²Minmin tuh Pachia hanlan lungthawsaenaw a hoi hae cite ccaekia ka khan kho; thuasalama tuh-e lungthawsaenaw tuh ahmepaw nythyanaw thyhte thua khyh.³Pawccecize minmin tuh Pachia kyate yn thuapaw dingnaw kha ny leite, mimaw dingnaw kha tynsah khylan a zuaku hae keiccuze Pachia dingnaw kalan mimaw te mimaw kha pyakuh vae khyh hae.⁴Pawccecize a zynpaw ccungccaw miakaw hanlan Khri tuh dingnaw mue nawlan kawbya accingnaw nynh thua. Ccungccaw balyn elang Khumnaw

⁵Moses nynh Kawbya te asekuhpaw dingnaw kong kha zei zah, “Hynh-e hae a zuipaw ccungccaw tuh hynh-e hae liate a hiin cih,” a ci.⁶Thuasalama zynnaw te asekuhpaw dingnaw kong tuh hynhte nynh a ho: “ ‘Hummou vaawlang a kae cih?’ cite na thinlung kya ho nan,” (tuh-e tuh Khri kha vaawlang te sawbung lan, cinawpaw nynh thua)⁷“tuhkhyhze, ‘Hummou akhunaw lang a rungbung cih?’ cite mah na thinlung kya ho nan,” (tuh-e tuh Khri kha chinaw kyate thoosah lan, cinawpaw nynh thua) a ci.⁸Thuasalama pawmou bua a ho?“Bya tuh nanning te anaekuh,nae mung kya tenae thinlung kya nynh a um,”a ci. Tuh-e tuh kaening nynh kae hopaw zynnaw bya hynh nynh thua.⁹Pawccecize Jesu tuh Bawipaw nynh thua cite na mung te ccaekia na khan zah Pachia nynh amaw kha chinaw kyate a thoosah cite na thinlung kya na zyn ze, khum na thua cih.¹⁰Pawccecize ccungccaw nynh a thinlung te a zyn liate thyaaccousah thua zah, a mung te ccaekia a khan liate khum athua.¹¹Ccathyaa nynh, “Amaw a zynpaw tuh maethyanaw ccou lan khyh,” a ci.¹²Pawccecize Judah minphuin te Grik minphuin laku laesahnaw um vae khyh, Bawipaw tuh ccungccaw balyn Bawipaw thua zah, amaw a kopaw balyn kha hythuanaw patae a pya hae.¹³Pawccecize Ccathyaa nynh, “Bawipaw min a kopaw miakaw tuh khum athua cih,” a ci.

¹⁴Thuasalama minmin nynh a zyn khyh hae ze pawtemou a ko kho cih hae? A thae khyh hae ze pawtemou a zyn kho cih hae? Phunghotu a um khyh ze pawtemou a thae kho cih hae?¹⁵Minmin kha a saw khyh hae ze pawtemou phung a ho cih hae? Ccathyaa kyaze, “Thehoypaw a hotu hae ccu tuh pawcih baban apuithya!” cite azeikuh.¹⁶Thuasalama ccungccaw hae balyn nynh thehoypaw kha zui khyh hae; pawccecize Isaiah nynh, “Bawipaw, kae hopaw bya kha hum nynh mou a zyn?” cite a ho.¹⁷Tukeiccuze zynnaw tuh thaenaw kyate nynh yn thua, thaenaw tuh Khri kong honaw kyate nynh yn thua.

¹⁸Thuasalama bya ka khia rypaw tuh, minmin nynh la thae loh khyh hae tou? Phe a thae ccaccing vae hae; pawccecize,“Mih roi tuh laephi pynpi kyapo zeihkuh vae zah,mih bya tuh laephi athangnaw ciaphe a thua,” a ci.

¹⁹Thuasalama bua ka khia rypaw tuh, Israel hae nynh nyh khyh hae tou? Masaty lan Moses nynh,“Minphuin athua lei hae paw khateeiungnaw kae hoisah cih oh zah,angaeepaw minphuin khatenae thin kae riasah cih oh,”cite a la ho.²⁰Isaiah nynh myarya rawhoyte ho zah,“Kae yn ccung lei hae paw nynhphe yn muih vae hae;ka konglang yn khia lei hae paw kyaphe ka langpakuh vae hae,” a ci.

²¹Thuasalama Israel hae konglang Isaiah nynh ho zah, “Kawngae leipaw te eitalaepaw minphuin kalan khe anin ninlang ka kuih ka dyngpya,” a ci. Israel tungvaw Ngaethyaumsahnaw

¹Tuhteze bya ka khia rypaw tuh, Pachia nynh a ccungccaw hae kha a vua vae hae tou? Vua khyh hae! Pawccecize kae mah Israel ccungccaw, Abraham ciihan, Benjamin phin nynh ka thua.²Pachia nynh a nyty vae paw a ccungccaw hae kha ccaring vua khyh hae. Elijah konglang Ccathyaa nynh a hopaw kha na nyh khyh oh tou? Aning nynh Israel hae te arawsekuh lante Pachia kalan ngia zah,³“Bawipaw, minmin nynh na profeh hae kha theih hae zah na silawhang hae kha a ro vae hae, ka makhae nynh ka laehy vae, ka hiinnaw kha yn ccung hae,” a cipya.⁴Thuasalama Pachia nynh bya a khungpaw tuh: “Baal pachia malang ccukharutung lei hae paw ccungccaw thong sari kha kamaw hanlan phang ka haangkuh ung hae,” a cipya.⁵Tuhawte atu ccyh lya mah thawccinaw liate po athua hae paw a laehy ung hae.⁶Thawccinaw liate athua ze, cyisahnaw liate kharouh thua vae khyh; tuhkhyhze tuh thawccinaw tuh thawccinaw thua vae lan khyh.

⁷Tuhteze pawtemou? Israel hae nynh a ccung hae paw kha mue khyh hae. Po hae paw nynh tuh-e tuh a mue hae; tuhlaepaw hae tuh mih lungkhung.⁸Ccathyaa kyaze,“Pachia nynh minmin kharutatupaw thinlung,ngawmuih kho leipawmit te nawthae kho leipawnakaring kha atunin ciaa pya hae,”cite azeiku hawte nynh thua.⁹David nynh, “Mih ccaboi tuh mih hanlan kaang lang te taphung lang tang sah, thykupawkunaw lang te liarunaw lang tang sah.¹⁰Mih mit tuh ngawmuihkho lei lan moh sah lah,mih ke tuh zungzae ky sah,” a ci.Zenta hae Khumnaw

¹¹Tuhteze Israel hae tuh phe khuliaku lan ciate a thy a pawkuh hae tou? cite ka khia. Khuliakuh khyh hae! Thuasalama Israel hae kha eiungnaw hoisah khylan mih cyiseinaw keiccuze khumnaw tuh Zenta hae kalan a thua vae.¹²Atu Israel hae cyiseinaw tuh laephi hoirumnaw lang yn tang zah mih nyaabungnaw tuh Zenta hae hoirumnaw lang a tang ze, mih balynte phe ccing lan la panbua hae sah lah, pawcihmou hoirumnaw houh alung cih!

¹³Zenta hae nanning kha atu kae hopya oh. Kae tuh Zenta hae elang locceihtu ka thua thyhawte, ka ryalaw kha ka hothung,¹⁴tuh-e tuh ka minphuin hae kha eiungnaw hoisah khylan te minmin abang kha khumnaw ccousah khylan nynh thua.¹⁵Pawccecize minmin kha vuanaw tuh laephi ccungccaw hae ccawkuthuinaw lang a tang ze, minmin kha lehkhannaw tuh chinaw kyate hiinthuinaw thua lan khyh tou?¹⁶Thaety hawte pyapaw masaty e vaepoi alynkuhpaw kya-e beihtaraw kha athyaa ze sanlou tuh abalyn mawte athyaa cih; atharui tuh athyaa ze aran hae mah athyaa cih.

¹⁷Aran hae abang kha khya hae zah ramkaw e oliv thingku athuapaw nang kha minmin kya ae piade hae zah aran hae ryte pynkheihlan oliv thingku kya-e atharui te athotui kha na ccoubua lanze,¹⁸a khya hae paw aran hae tungvaw la poonuakuh nan; na pooku ze nang nynh atharui kha na bawm khyh, atharui nynh nang kha ae bawm cipaw la ning nan.¹⁹Tuhteze nang nynh, “Kae kha piade khylan nynh aran hae tuh khya athua hae,” na ci cih.²⁰Tuh-e tuh ahme. A zyn khyh hae keiccuze minmin tuh khya thua hae zah, nang tuh zynnaw liate kyalya nynh na thadyn. Lysakuh nan, rinaw palia kha hoi.²¹Pawccecize Pachia nynh a um typaw aran hae kha heize a haang khyh ze, nang mah ae haanglae lan khyh.²²Tukeiccuze Pachia a thawccinaw te phe ccihtheihpaw a byapianaw kha tuatua; a khuliakuh hae paw tungvaw kya phe ccihtheih lang bya a pia hae, thuasalama nang tuh Pachia thawccinaw kya po na tyn ze, aning nynh thaw ae ccih cih; tuhzemah a thawccinaw kya na tyn khyh ze, nang mah thoh bae na thua cih.²³Israel hae mah zyn leinaw kya po atyn khyh hae ze, piade bua athua cih hae; pawccecize Pachia tuh minmin bua piade nawlan thungnaw a hoi.²⁴Pawccecize amaw po lan popaw oliv ku kyate nang kha thoh ae bae hae zah linpaw oliv ku kyakhe accawkuh lei pite piade na thua lanze, a um typaw aran hae athuapaw minmin kha mimaw oliv ku kya piadepaw tuh myarya azoihua vae cih. Israel hae balyn Khumnaw

²⁵Uteno hae, naemaw na thuanaw oh laeze na hawsaku khyh nawlan oh, hynh-e byakhupaw hynh nysah kae ry oh: Zenta hae nynh khumnaw kalan phe ccing lan a tee makhia hae, Israel hae abang kya lungkhungnaw a um ung cih.²⁶Israel hae balyn tuh khum athua cih hae; Ccathyaa kyaze,“Zion mua kyate Khumtuyn thua cih zah, aning nynhPachia pawlangria leinaw khaJakob ciihan hae kyate a vua cih.”²⁷“Mih seinaw hae khahe ka lawpah hae te,hynh-e hynh minmin ryteka raepaw ka byakinnaw nynh thua,”cite azeiku hawte nynh thua.²⁸Thehoypaw te asekuh lante nanning keiccuze minmin tuh Pachia rhaw hae nynh thua hae; thuasalama ponaw te asekuh lante tuh minpaaw hae liate minmin tuh sungsah hae paw nynh thua hae.²⁹Pawccecize Pachia lasung hae te Pachia konaw tuh rulae kho leipaw nynh thua.³⁰Pawccecize langmawlya nanning tuh Pachia kaw a ngae lei hae paw na la thua oh salamah atu tuh minmin nynh kaw a ngae khyh hae keiccuze ngaethyaumsahnaw kha na mue oh hawte,³¹nanning nynh na mue oh paw ngaethyaumsahnaw liate minmin mah ngaethyaumsahnaw kha a muebua nawlan hae, minmin mah atu hynh kawngae khyh hae.³²Pawccecize Pachia nynh ccungccaw balyn tungvaw kya ngaethyaumsahnaw kha a langsaku thya nawlan, mih balynte kawngae leinaw kya thong a saw hae.

³³Pachia hawnaw te nynaw tuh myarya ko zah akhu raria! A byapianaw hae tuh thaethya kho um khyh zah a laanpi hae tuh ny kho um khyh ccarei!³⁴Pawccecize Bawipaw tuanaw khahummou a nyh?Tuhkhyhze hummou amaw khatuanaw a pya boi?³⁵Tuhkhyhze Pachia nynhbua a pyaru nawlan,hummou amaw khalasung a pyaty boi?

³⁶Pawccecize pawpaw tynre balyn tuh amaw kyate, amaw liate, amaw hanlan nynh thua. Amaw kya phu-enaw zungzae um sah. Amen. Jesu kya Hiinnaw Thawpaw

¹Tukeiccuze uteno hae, Pachia kya-e ngaethyaumsahnaw liate kae ngia ry oh paw tuh, nae pyn kha athyaapaw te Pachia kalan douccahpaw ahiinpaw silawkunawpaw lante pyakuh oh; tuh-e tuh na cyi lan oh paw muisaw te asekuhpaw beiknaw nynh thua.²Nanning nynh hynh-e laephi muinsanke nan oh, thuasalama ahoypaw uccaw, ry lan umpaw uccaw te accingpaw uccaw cikuh hae paw—Pachia rynaw tuh pawmou athua cipaw na thaethya nawlan oh, nae thinlung kha thawsakute muinsan rulaekuh oh.

³Pawccecize kae yn pyapaw thawccinaw liate nanning lu kheit cci kha kae hopya oh; nanning nynh naemaw te naemaw kha tuaku lan accanpaw laeze ahang lante la tuakuh nan oh, thuasalama Pachia nynh milu raveih oun pyapaw zynnaw tounawpaw thyhte angaekuh lante tuakuh oh.⁴Pawccecize aening nynh pyn pynkheit kya pyn kya-e hae patae ah hoi oh zah, tuh-e hae balyn tuh alokuhpaw ryalaw a hoi khyh hae hawte,⁵patae ah cih oh paw aening mah Khri kya pyn pynkheit ah thua oh zah, lu raveihte pyn kya-e hae nynh ah thua oh.⁶Tuhte aening oun pyapaw thawccinaw thyhte alokuh leipaw lasung hae kha ah mue oh zah, profehbya honaw a muepaw nynh a zynnaw zeihte profehbya ho sah.⁷Beiknaw rya a lahtu nynh beiknaw rya kha lah sah; a ccangpahtu nynh ccangpyanaw rya kha lah sah;⁸A hyytupaw nynh hyynaw rya kha lah sah, a pyatupaw nynh hysahnaw te pya sah; a uktupaw nynh zuakunaw te uk sah; ngaethyaumsahnaw a langsahtupaw nynh lungpawkaleihte langsah sah. Khriccaaw Hiinzia

⁹Sungsakunaw kya thyaruhnaw um nan sah. Ahoy leipaw kha hua oh lah, ahoypaw kha kyngkuh oh;¹⁰u te neitaw ccaccing hawte lu kheit te lu kheit sungsakuh oh; sawtuakunaw kya lu kheit te lu kheit sawtuakuh kalang oh.¹¹Thawzung thuanaw kya thawnaw leite thinlung ccaccingte Bawipaw rya kha lah oh.¹²Ngaehoinaw kya nae lungpaw sah; vawsawnaw kya nae lungsae sah, sawsangnaw kya tyty tyn oh.¹³Mithyaa hae kha mih hobounaw kya la bawmbua oh; mikhia hae kha kou hoy lan la do-oih oh.

¹⁴Vawsawnaw ae pya oh paw kha hythuapya oh; minmin kha hythuapya oh lah thyalaw nan oh.¹⁵Lungtua hae paw ryte lungtuabua oh lah, a rah hae paw ryte la rahbua oh.¹⁶Lu kheit te lu kheit lunglokute la um oh. Lysaku nan oh, a nyaa hae paw ryte vaeccawtang oh. Ka haw cite tuakuh nan oh.¹⁷Humhung sanmah athahpaw hanlan athahpaw te liaru nan oh, ccungccaw balyn muihnaw kya ahoypaw uccaw tuanaw hoi oh.¹⁸Athua kho ze, ccungccaw hae balyn ryte ccawkute la um oh.¹⁹Sungsah hae paw, naemaw nynh kharouh liaru nan oh, Pachia thinrianaw kalan pya oh, pawccecize Ccathyaa kyaze, “Liarunaw tuh kamaw kya-e nynh thua, kamaw nynh ka liaru cih, cite Bawipaw nynh a ci,” cite azeikuh.²⁰Tukeiccuze, “Na rhawpaw kha a vuelaw ze looh la dang; a tuihaw ze nia lanpaw kha la pya; pawccecize tuhte na cyinaw liate nang nynh tuh-e paw lu vawlan maee-e hae kha na pumpah cih,” a ci.²¹Athahpaw kha la taesakuh nan oh, athahpaw kha ahoypaw te la tae oh. Kawhoinaw kha Sawtua

¹Ccungccaw miakaw nynh uktu hae kaw kha ngae hae sah; pawccecize Pachia kyate laelan kawhoinaw um khyh, atu kawhoitu hae paw hynh mah Pachia liate khangpaw nynh thua hae.²Tukeiccuze humhung zemah kawhoipaw a rawsepaw tuh Pachia nynh a khangpaw kha a rawsepaw nynh thua, tuhte a rawse hae paw tuh byapianaw a ing cih hae.³Pawccecize uktu hae tuh ahoypaw ryalah hae paw nynh ri lanpaw thua khyh, thuasalama athahpaw ryalah hae paw nynh a ri lan hae paw nynh thua. Kawhoipaw kha ri leite na um ry tou? Ahoypaw rya kha lah lah, aning nynh nang kha ae thehoysah cih.⁴Pawccecize aning tuh nang na hoynaw hanlan Pachia ryalahtu nynh thua. Thuasalama ahoy leipaw rya na law ze la rih, pawccecize aning tuh thaloi kha alakaw lan ccyng khyh! Aning tuh athahpaw rya a lahpaw tungvaw kya thinrianaw thuakhae zah detahtupaw Pachia ryalahtu nynh thua.⁵Tukeiccuze Pachia thinrianaw keiccu kyalya kawngae lanpaw thua leite, ahmaw te ahmaw nykunaw thinlung keiccu mah kawngae lanpaw nynh thua.⁶Hynh-e keiccuze nanning mah ngunto pya oh, pawccecize uktu hae tuh Pachia ryalahtu hae thua hae zah, tuh-e rya tuh hoyte a law hae.⁷Tukeiccuze ccungccaw miakaw kha mue lan a ccan hae thyhte la pya oh—ngunto pya lan a ccanpaw kha ngunto pya oh; ngunto pya lan a ccanpaw kha ngunto pya oh, rawri lan a ccanpaw kha a rawrih oh; sawtua lan a ccanpaw kha sawtua oh. Lu Kheit te Lu Kheit Sungsakunaw

⁸Lu kheit te lu kheit sungsaku lanpaw laelan hum kya sanmah laebah um nan oh; pawccecize mingccangpaw a sungsahpaw ccungccaw tuh kawbya kha phe a ccingsah vae.⁹Pawccecize, “Milae zu kya khyhze milae vawpaw kya na sei lan khyh, ccungccaw na theih lan khyh, na ruh lan khyh, milae uccaw na duaa lan khyh,” cikuhpaw kawbya hae te ccangpaw kawbya hae tuh, “Na innpaw kha namaw na sungsaku hawte la sungsah,” cikuhpaw kawbya kyakhe marya a ccakhungkuh hae. ¹⁰Sungsakunaw nynh tuh a innpaw kya ahoy leipaw rae boi khyh. Tukeiccuze sungsakunaw tuh kawbya ccingnaw nynh thua.

¹¹Tuhpiaze atu ccyh hynh paw ccyh mou athua cipaw na ny oh, nanning hanlan inaw kyate thaeku ccyh athua vae; pawccecize aening ah zyn takaw lya oh laeze atu lya hynh khumnaw tuh aening te anaekuh hua vae.¹²Khuazi tuh vyavya thang zah khuadae thua lan cih vae, tukeiccuze aening nynh mohnaw ryalaw hae kha vua ccavae oh sih lah, awnaw rhaw uccaw kha lawkuh ccavae oh sih.¹³Poituakunaw te zu-aenaw, ruinaw, ccouseikunaw, ohhuaku rynaw, ziaku buakunaw te eiungkunaw kyakhe um leite, ninthu ccyh kya um hae paw hawte kou ngaekuh lante hiin oh sih.¹⁴Bawipaw Jesu Khri kha boeining hawte lawkuh oh lah, pynsaw rynaw kha ccingsah lan paccynkuh nan oh. Milae kha Byapia Nan

¹Zynnaw kya a thawzyapaw kha lehkhan oh, thuasalama zynsei lan umpaw eikunaw kha raekhae nan oh.²Pawccecize ccungccaw abang nynh aepaw miakaw tuh ae lan accan cite a zyn hae, thuasalama a thawzyapaw nynh tuh enaw-rohnaw rou kha nynh a ae.³Pawpaw balyn a aepaw nynh a ae leipaw kha dothatheih nan sah, te a ae leipaw nynh a aepaw kha byapia nan sah, pawccecize Pachia nynh tuh-e paw tuh lehkhan vae paw nynh thua.⁴Ming hae rya a lahtupaw kha bya a piapaw nang tuh hummou na thua? Aning tuh a thadyn zemah, a khuliaku zemah amaw a bawipaw te nynh aseku. Aning tuh thadynsah athua cih, pawccecize Bawipaw nynh aning kha a thadynsah kho.

⁵Ccungccaw abang nynh nin kheit tuh ccangpaw nin laeze asunghua cite a tua, mingccangpaw nynh nin miakaw tuh phe lokuh lante a tua. Ccungccaw balyn nynh mih thinlung kya tynkaring lan zynkuh hae sah.⁶Ninsaw kha a sungpaw ccungccaw tuh Bawipaw sawtuanaw te nynh a sung, ninsaw kha a sung leipaw ccungccaw mah Bawipaw sawtuanaw te nynh a sung khyh; a aepaw ccungccaw mah Bawipaw sawtuanaw te nynh a ae, pawccecize Pachia kalan lungtuabya a ho; te a ae leipaw ccungccaw mah Bawipaw sawtuanaw te ae khyh zah Pachia kalan lungtuabya a ho.

⁷Aening tuh hum sanmah ahmaw hanlan ah hiin khyh oh, hum sanmah ahmaw hanlan ah chih khyh oh.⁸Pawccecize aening tuh ah hiin oh zemah Bawipaw hanlan nynh ah hiin oh; ah chi oh zemah Bawipaw hanlan nynh ah chi oh; tukeiccuze ah hiin oh zemah, ah chi oh zemah Bawipaw kya-e nynh ah thua oh.⁹Pawccecize Khri tuh a chihpaw te a hiinpaw parouh kya-e Bawipaw lang tang khylan chih zah a thoothui.

¹⁰Pawccemou nang nynh na uno kha bya na pia? Pawccemou na uno kha pawlangria leite na um? Pawccecize aening balyn tuh Pachia a byapianaw tungkhung malang khe ah thadyn cih oh paw nynh thua.¹¹Pawccecize Ccathyaa kyaze,“Bawipaw nynh,‘Kae tuh ka hiin thyhawte,ccungccaw miakaw nynhka malang ccukharu a tung cih hae,mih munglae raveihtePachia kha the a hoysah cih hae,’a ci,” cite azeikuh.

¹²Tukeiccuze aening lu raveih nynh ahmaw konglang ccazing kha Pachia kalan ah pya cih oh. Milae kha Khuliasakuh Nan

¹³Tukeiccuze aening lu kheit te lu kheit byapiakuh nan vae oh sih; uno lu kheit nynh a ccianaw kya thykunawpaw tuhkhyhze khuliakunawpaw kha papin nungkhaw lei lante byapae ccavae oh sih.¹⁴Pawpaw looh sanmah amaw thu lang thu khyh cipaw Bawipaw Jesu liate ccaerarih lan ka ny; thuasalama hankhakheit kha thyaa khyh cite a tuapaw ccungccaw elang tuh tuh-e tuh a hanlan thyaa khyh.¹⁵Na aepaw keiccuze na uno tuh a thinlungcci lanze nang tuh sungsakunaw kya na hiin khyh. Khri nynh a hanlan a chipyapaw ccungccaw kha na aepaw te la roh nan.¹⁶Nae kya-e ahoypaw kha athahpaw hawte thethya la hosah nan oh.¹⁷Pawccecize Pachia peenaw tuh aepaw te niapaw hynh thua leite, Thyaa Muisaw kya dingnaw, daenaw te lungpawnaw nynh thua.¹⁸Pawccecize hynhcite Khri rya a lahpaw tuh Pachia malang nawccaw lan umpaw thua zah ccungccaw hae nynh mah the a hoysah hae.¹⁹Tukeiccuze daenaw a thuakhaepaw uccaw hae te lu kheit te lu kheit laku thawzung lang a tangsahpaw uccaw hae kha deehui oh sih.²⁰Pachia ryalaw kha looh keiccuze roh nan. Looh miakaw tuh athyaa ccaccing; thuasalama nang nynh na aepaw keiccuze ming hae khuliasaku nawlan a tang lanze nang tuh na sei vae.²¹Na uno a khuliasakuhpaw saw aepaw te misutui niapaw kha ae lei, nia leite, pawpaw san cyi leipaw tuh ahmepaw nynh thua.²²Na hoipaw zynnaw tuh Pachia malang namaw hanlan hoi; amaw nynh a nawccawpaw hanlan amaw te amaw seibekuh leipaw ccungccaw tuh lungtuapaw nynh thua.²³Thuasalama lunghiinnaw a hoipaw ccungccaw tuh a ae ze, zynnaw leite a ae keiccu seibe athua; pawccecize zynnaw leite cyipaw miakaw tuh seinaw nynh thua. Ming hae kha Lungtuasah

¹Thawsae hae paw aening nynh thawzya hae paw kya-e thawzyanaw kha ngaesang aho; ahmaw rynaw kha ccungku lanpaw thua khyh.²Aening lu raveih nynh ah innpaw paw elang hoynaw kha tuate zynnaw kya a lethung nawlan a rynaw kha ccungpah oh sih.³Pawccecize Khri nynh heize amaw a rynaw kha ccungkuh khyh. Ccathyaa kyaze, “Nang ae saryatu hae nynh ae saryanaw hae paw bya tuh ka tungvaw accah vae,” cite azeiku hawte nynh athua.⁴Pawccecize Ccathyaa kya a umpaw ngaesangnaw te thawpyanaw liate aening nynh ngaehoinaw ah hoi nawlan oh, Ccathyaa kya langmawlya e azeikuhpaw miakaw tuh aening thuiheinaw elang nynh zei athua.⁵Ngaesangnaw te thawpyanaw Pachia nynh Khri Jesu rynaw thyhte lu kheit te lu kheit lunglokute na um nawlan oh ae bawm vae oh sah.⁶Tuhteze nynh ah Bawipaw Jesu Khri a Paaw athuapaw Pachia kha nanning nynh lunglokute pynkheihlan roisawte na thehoysah cih oh. Judah hae te Zenta hae elang Thehoypaw

⁷Tukeiccuze Khri nynh nanning kha leh ae khan oh hawte nanning mah Pachia phu-enaw hanlan lu kheit te lu kheit lehkhankuh oh.⁸Pawccecize kae hopya ry oh paw tuh: Jesu Khri tuh minpaaw hae kalan pya athuapaw byakinpyakupaw hae kha ccingsah khylan Pachia byaccing kha langsaku lan vingdungawkuh hae paw kya-e ryalahtu lang a tang vae;⁹tuhpiaze Zenta hae nynh Pachia kha a ngaethyaumsahnaw hanlan phu-enaw a pya nawlan hae nynh thua. Ccathyaa kyaze,“Tukeiccuze Zenta hae laku kyakae thehoysah cih zahna min thehoysahnaw hlaw khaka sah cih,” citeazeiku hawte nynh thua.¹⁰“Pou Zenta hae,a ccungccaw hae rytelungtuakheih oh,” cite bua a ho.¹¹“Zenta hae balyn,Bawipaw kha thehoysah oh;ccungccaw hae balyn,amaw kha thehoysah oh,” bua a ci.¹²Isaiah nynh,“Jessi tharui tuh yn pou cih,aning tuh Zenta hae uk khylanyn langkuh cih paw nynh thua;Zenta hae nynh amaw khaa ngaehoikuh cih hae,” bua a ci.

¹³Nanning tuh Thyaa Muisaw thungnaw liate ngaehoinaw te phe na bia nawlan oh, ngaehoinaw Pachia nynh zynnaw kyate yn thuapaw lungtuanaw te daenaw phuinccing khate ae la biasah vae oh sah. Paul nynh Rawhoyte Ccaw Kynaw

¹⁴Ka uno hae, nanning tuh hoynaw te nynaw balyn khate phe na beih oh zah, lu kheit te lu kheit na thuiheikuh kho oh cipaw nanning konglang phe ka ny.¹⁵Tuhzemah nanning nynh bua na tuathui ccaw oh cite Pachia nynh yn pyapaw thawccinaw liate abang akonglang kyakhe rawhoyte nae kalan ccaw kae zei;¹⁶tuh-e a thawccinaw tuh kae hynh Pachia thehoypaw a hopaw ranpibawi ryalaw kya Zenta hae hanlan Jesu Khri a ryalahtu ka thuapaw hynh nynh thua; tuhteze nynh Zenta hae kya-e silawkunaw tuh Thyaa Muisaw liate athyaa cih zah douccahpaw athua cih.¹⁷Tukeiccuze Pachia hanlan rya ka lawnaw kya Jesu Khri liate ka pookunaw lanpaw a um.¹⁸Pawccecize Zenta hae nynh kaw a ngae nawlan hae, bya te cyisahnaw liate thuasah,¹⁹muihsahnaw hae te ngaeangnaw hae kya-e thungnaw liate thuasah, Pachia Muisaw thungnaw liate thuasah Khri nynh kae kha yn mang zah a cyipaw laelan, pawsang mah ka ho ngan khyh; tuhcite kae nynh Jerusalem kyate tho zah Ilyrikam ram pepan kyacia Khri thehoypaw kha phe ccing lan ka ho.²⁰Ccangpaw ccungccaw nynh a bingpaw aleihpaw vawlan khe kae nynh ka sak khyh nawlan, Khri min a phy boi leinaw hae hmin kyakhe thehoypaw ho lan thawte ka zuaku.²¹Ccathyaa kyaze,“Amaw konglang a hopyalei hae paw nynh a muih cih hae zah,amaw konglanga thae boi lei hae paw nynha thaethya cih hae,”cite azeiku hawte nynh thua. Rom lang Paebua lan Paul Paccynkunaw

²²Hynh-e keiccuze nae kalan ccia lan yn khawpaw patae a um.²³Thuasalama atu tuh hynh-e ram hae kya ryalawnaw hmin ka hoi vae khyh zah nae kalan ccia lan ka rynaw mah kum patae aro vae hawte,²⁴Spain ram lang he ka cceih te, nae kalan kae cceih cih. Pawccecize khua ka ccongnaw kya nanning ryte muihku lan zah, lungpawte sosoh ah umkheih kou oh te, nanning nynh tuh-e ram lang bua nae saw cih oh cite ka ngaehoi.²⁵Thuasalama atu tuh mithyaa hae bawmnawpaw uccaw hae ryte Jerusalem lang ka la cceih ung cih.²⁶Pawccecize Mesidonia ram e ccungccaw hae te Akhai ram e ccungccaw hae hynh Jerusalem kya um hae paw mithyaa hae laku e ryachi hae kha neethungbua hae zah mih lungrythuakhaekuh.²⁷Tuhte a cyi hae paw kya mih lungrythua, minmin tuh Judah hae kya laebah a um ccaccing hae; pawccecize Zenta hae nynh Judah hae kya-e muisaw hythuanaw hae kha a ccoubua hae ze, pynsaw hythuanaw hae kya mah minmin nynh Judah hae kha a neethungbua hae aho.²⁸Tukeiccuze hynh-e rya hynh ka thangsah zah, a hlu hae paw hynh mih kalan ka ap kou hae te, Spain ram lang ka cceih cih zah nae kya kae teepaw cih.²⁹Nae kya he kae thua te, Khri hythuanaw phe ccingpaw te kae thua cih cipaw ka ny.

³⁰Uteno hae, ah Bawipaw Jesu Khri te Thyaa Muisaw sungsahnaw liate nanning nynh kamaw ryte sawsangnaw kya na zuakuh oh zah, Pachia kalan ka hanlan saw nae sangpya nawlan oh kae ngia oh;³¹Judea ram kya-e zynleitu hae kuih kyate ka lue nawlan te Jerusalem khua hanlan rya ka lawpaw hynh mithyaa hae nynh yn lawpyaku nawlan hae saw yn la sangpah oh;³²tuhteze nynh Pachia rynaw thyhte nae kalan lungpawte kae thua cih zah nanning liate thawzung thawpaw ka mue cih.³³Daenaw Pachia tuh nanning balyn ryte la um sah. Amen. Lu Raveih Beihlangkunaw

¹Kenkhrea khua kya a umpaw khriccaawbuu kya ryalahtu athuapaw ah ccianung Fibi hynh nae kya nysah kae ry oh.²Mithyaa hae nynh cyi lan accan thyhte nanning nynh amaw kha Bawipaw min te leh la khan oh lah, bawm ahonaw miakaw kya la bawmbua oh; pawccecize aning tuh ccungccaw patae a bawmtu te kamaw mah yn bawmtu nynh thua.

³Khri Jesu kya kae te rya kae lahkheih hae paw Prisilla te Akuila kha la beih oh,⁴minmin tuh ka hiinnaw hanlan a chih ngan hae paw nynh thua; kae kyalya nynh thua leite Zenta khriccaawbuu hae balyn nynh mah minmin tungvaw kya mih lungtua.⁵Mih inn kya a pumkuh hae paw khriccaawbuu kha mah la beih oh. Asia ram kyaze Khri hanlan masaty zyntu athuapaw, ka sungsahpaw Epainetan kha la beih oh.⁶Nanning elang ryalaw myarya a zuakuhpaw Mary kha la beih oh.⁷Kae te thong kae ccahkheih hae paw, ka vaeccaw hae Andronikan te Junia kha la beih oh; minmin tuh locceihtu hae kyaze minthaan hae paw thua hae zah, kamaw laeze Khri kya a umty hae paw nynh thua.⁸Bawipaw kya ka sungsahpaw Ampliatas kha la beih oh.⁹Khri kya rya kae lahkheihtu Urbanas te ka sungsahpaw Stakhus kha la beih oh.¹⁰Khri kya a lungzipaw Apelen kha la beihlang oh. Aristobulas innbyn hae kha la beih oh.¹¹Ka vaeccaw athuapaw Herodion kha la beih oh. Bawipaw kya um hae paw Narkissu innbyn hae kha la beih oh.¹²Bawipaw kya ryalahtu athua hae paw Trifana te Trifosa kha la beih oh. Bawipaw kya thawte ryalahpaw, sungsahpaw Persis kha la beih oh.¹³Bawipaw kya popaw Rufas te ka nung hawte athuapaw a nung kha la beih oh.¹⁴Asinkritas, Flegon, Hermes, Patrobas, Hermas te minmin ryte a umkheih hae paw uteno hae kha la beih oh.¹⁵Filologas te Julia, Nereas te a ccianung, te Olimpas te minmin ryte a umkheih hae paw mithyaa hae balyn kha la beih oh.¹⁶Athyaapaw myngkunaw te lu kheit te lu kheit la beihkuh oh. Khri kya-e khriccaawbuu hae balyn nynh nanning kha ae beihlang oh. Nyathya Byatawnaw

¹⁷Uteno hae, na ccangku vae oh paw ccangpyakunaw te arawsekuhpaw buu phianaw te cyiseinaw a pousahtu hae kha na raeringku nawlan oh kae ngia oh; minmin kha la sibia oh.¹⁸Pawccecize khahcihawpaw ccungccaw hae tuh ah Bawipaw Khri rya kha law leite mimaw vue hanlan nynh rya a lawku hae; ahoypaw bya te nawpalaepaw bya hae khate ccungccaw hoy hae paw thinlung kha leih a ling hae.¹⁹Pawccecize ccungccaw balyn nynh kaw na ngaenaw oh kha a ny vae hae keiccuze nae tungvaw ka lungtua; ahoypaw kya hawnaw na hoi nawlan oh te ahoy leipaw kya seinaw na hoi khyh nawlan oh ka ry.²⁰Daenaw Pachia nynh aro mawze Satan kha nae ccu kaw kya yn miade cih. Ah Bawipaw Jesu Khri thawccinaw tuh nae kya la um sah. Amen.

²¹Kae te rya kae lahkheihpaw Timote te ka vaeccaw hae Lusias, Jason te Sosipater nynh nanning kha ae beihlang oh.

²²E ccaky a zeitupaw kae, Terti nynh Bawipaw kya nanning kha kae beihlang oh.

²³Kae te khriccaawbuu balyn kha innccong oun ua zah oun do-oihtu Kaias nynh nanning kha ae beihlang oh. Khuapi suaccytu Erastas te nae uno Kuartas nynh ae beihlang oh.²⁴Ah Bawipaw Jesu Khri thawccinaw tuh nae balyn kya la um sah. Amen. Athangnaw Sawsang

²⁵Ka hopaw thehoypaw te Jesu Khri kong phunghonaw thyhte thuasah, langmaw she lungkhu balyn thuruh thua salamah atu lya phy athua vae paw, byakhupaw kya-e byaphy thyhte thuasah, Pachia nynh nanning kha zynnaw kya thawzung ae tynsah kho oh,²⁶thuasalama atu tuh zynnaw te asekuhpaw kawngaenaw a um nawlan, zungzae tynpaw Pachia kya-e kawpyanaw thyhte, profeh hae nynh a zei hae paw Ccathyaa hae liate, tuh-e byakhupaw tuh Zenta hae balyn kalan nysah athua vae;²⁷amaw kyalya ahawpaw Pachia tuh Jesu Khri liate zungzae a phu-e sah. Amen.

Bible Society of Myanmar

https://app.library.bible/content/1a340f5ae072b2f4