Read 1 KORIN 1

1 KORIN1

Beihlangnaw

¹Pachia rynaw liate Jesu Khri locceihtu lang ko athuapaw kae, Paul te kae unopaw Sosthenes nynh,

²Khri Jesu kya thyaasah thua hae zah mithyaa hae cite ko athua hae paw, Korin khua kya umpaw Pachia khriccaawbuu kalan, minmin te aening Bawipaw athuapaw ah Bawipaw Jesu Khri min a ko hae paw hmin takyh kya a um hae paw balyn kalan ccaw kae ky oh.

³Ah Paaw Pachia te Bawipaw Jesu Khri kyate thawccinaw te daenaw tuh nae tungvaw la um vae sah.

⁴Jesu Khri liate nanning pya athuapaw Pachia thawccinaw keiccuze nanning hanlan ka Pachia kha zungzae ka luung.⁵Khri kong ccaekia tuh nae kya tynsah athua thyhawte, nanning tuh amaw liate pawpaw kya balyn, ho khonaw kya balyn, nynaw kya balyn hoirumsah na thua oh.⁷Ah Bawipaw Jesu Khri yn langku lanpaw na ngaehoi lya oh khe, muisaw lasung na shung oh paw ccangkheit san um khyh.⁸Ah Bawipaw Jesu Khri nin kya nanning tuh ccaenaw na hoi khyh nawlan oh aning nynh athangnaw cia ae tynsah cih oh.⁹A Ccapaw, ah Bawipaw Jesu Khri kya-e vaeccawkunaw kalan nanning ae ko oh paw Pachia tuh a lungzipaw nynh thua. Khriccaawbuu kya Phiakunaw

¹⁰Uteno hae, nae kya phiakunaw um leite nanning balyn nynh lunglokunaw na hoi oh zah, alokuhpaw tuanaw te alokuhpaw eenaw kya lungngingnaw na hoi nawlan oh, ah Bawipaw Jesu Khri min te kae ngia oh.¹¹Pawccecize, ka uno hae, nae laku kya eikunaw a um cite Khalawi innbyn hae nynh nae konglang kha phe yn thaesah vae hae.¹²Ka ho rypaw tuh, nanning lu raveih nynh, “Kae tuh Paul zuitu nynh ka thua,” “Kae tuh Apollos zuitu nynh ka thua,” “Kae tuh Sefas zuitu nynh ka thua,” “Kae tuh Khri zuitu nynh ka thua,” cite na ho oh paw hynh nynh thua.

¹³Khri tuh phia athua vae tou? Paul tuh nae hanlan vaelantung kya khiade athua tou? Tuhkhyhze Paul min te baptisma na in oh tou?¹⁴Nanning laku kya Krispas te Kaias laelan hum sanmah baptisma kae la pya khyh oh keiccuze Pachia kha ka luung.¹⁵Tukeiccuze nanning tuh Paul min te baptisma na in oh cite hum nynh sanmah ho kho vae khyh.¹⁶(Stefanas innbyn hae kha mah baptisma ka pya hae; tuhlaepaw hum sanmah baptisma ka pyapaw ka nyh khyh.)¹⁷Pawccecize Khri nynh kae hynh baptisma pya khylan yn saw khyh, thehoypaw ho khylan nynh yn saw. Tuhzemah Khri a vaelantung tuh a thungnaw azo khyh nawlan, hawnaw bya te yn hosah khyh. Khri tuh Pachia Thungnaw te Hawnaw

¹⁸Pawccecize vaelantung kong phunghopaw hynh ronaw kya a um hae paw hanlan ngaeenaw bya nynh thua, thuasalama khum athua hae paw aening hanlan tuh Pachia thungnaw nynh thua.¹⁹Pawccecize Ccathyaa kyaze,“A haw hae paw hawnaw tuhka roh cih zah,a nyhthya hae paw kya-enythyanaw tuh accakaepaw langka tangsah cih,”cite azeikuh.²⁰A hawpaw tuh pawkyamou a um? Kawbya sazae tuh pawkyamou a um? Hynh-e she kyaze byaeiku a thyapaw tuh pawkyamou a um? Pachia nynh laephi hawnaw kha ngaeenaw lang rae khyh tou?²¹Pawccecize laephi ccungccaw hae nynh mih hawnaw liate Pachia a ny khyh hae paw kha Pachia nynh a hawnaw te a raepaw nynh thua, tukeiccuze kaening nynh kae hopaw ngaeenaw bya liate a zynpaw ccungccaw hae tuh khumnaw a mue nawlan hae Pachia nynh a paccyn.²²Pawccecize Judah hae nynh muihsahnaw hae kha a ngia hae, Grik hae nynh hawnaw kha a ccung hae.²³Thuasalama kaening nynh tuh vaelantung kya a khiade hae paw Khri kong kha nynh kae ho, tuh-e tuh Judah hae hanlan thykunaw thua zah Zenta hae hanlan ngaeenaw nynh thua.²⁴Thuasalama ko hae paw Judah hae te Grik hae parouh hanlan Khri tuh Pachia thungnaw te Pachia hawnaw nynh thua.²⁵Pawccecize Pachia kya-e ngaeenaw tuh ccungccaw hae hawnaw laeze a hawhua, Pachia kya-e nyaanaw tuh ccungccaw hae thawsaenaw laeze a thawsaehua.

²⁶Uteno hae, nanning konawpaw konglang hynh tuaku tua oh; pynsaw lante a hawpaw patae, a thungpaw patae te sawtua hae paw patae tuh ko thuabua khyh hae.²⁷Thuasalama Pachia nynh a haw hae paw maethyasah khylan laephi kyaze a ngaee hae paw kha a po hae, te Pachia nynh athungpaw maethyasah khylan laephi kyaze a nyaa hae paw kha a po hae.²⁸Abyapipaw ccungccaw hae kha accakaepaw lang tangsah khylan, laephi kyaze a nyaa hae paw, a dothatheih hae paw te pawlang a ria lei hae paw kha Pachia nynh a po hae.²⁹Tuhteze nynh hum nynh sanmah Pachia malang pookuh kho lan khyh.³⁰Khri Jesu kya atynpaw nae hiinnaw a thotakawnaw tuh Pachia nynh thua. Khri tuh aening hanlan hawnaw, dingnaw, thyaapapingnaw te shawkhawnaw lang Pachia nynh a rae vae.³¹Tukeiccuze Ccathyaa kyaze, “A pookuhpaw ccungccaw tuh Bawipaw kyakhe pookuh sah,” cite azeiku hawte nynh thua. Khri Khiadenaw Kong Phunghonaw

¹Uteno hae, nae kalan kae thua lyaze Pachia byakhupaw kha myarya byahothyanaw te hawnaw khate kae hopah khyh oh.²Pawccecize Jesu Khri te vaelantung kya a khiadenaw hae kong laelan, nanning kya pawsang mah ny lei lante bya ka paeku vae.³Nae kalan kae thua lya kha nyaanaw, rinaw te thyngkunaw te nynh kae thua.⁴Bya ka hopaw te phung ka hopaw kha ccungccaw hawnaw te asekuhpaw soihnawpaw bya thua leite, Muisaw te thungnaw langsakunaw nynh thua;⁵tuhteze nynh nae zynnaw tuh ccungccaw hawnaw kya tyn leite, Pachia thungnaw kya atyn cih. Pachia Hawnaw

⁶Tuhzemah piccan athua vae hae paw kya tuh hawnaw bya kha kae ho; thuasalama hynh-e she e hawnaw kha thua khyh, a zo cih hae paw hynh-e she e uktu hae hawnaw kha mah thua khyh.⁷Thuasalama Pachia hawnaw byakhupaw kha nynh kae ho, tuh-e tuh laephi a um mawze Pachia nynh aening phu-enaw hanlan a paccyn ty vae paw thuruh athuapaw hawnaw kha nynh thua.⁸Hynh-e she e uktu hae hum nynh sanmah tuh-e hawnaw tuh nyh khyh hae; a la ny hae ze, a phu-epaw Bawipaw kha vaelantung kya a khiade cih lei hae paw.⁹Thuasalama Ccathyaa kyaze,“Pachia nynh amaw a sungsahhae paw hanlan a paccynpawuccaw hae kha mit nynhmuih boi khyh,nakaring nynh thae boi khyh,ccungccaw thinlung nynh mahtua boi khyh,”cite azeiku hawte nynh thua.¹⁰Thuasalama Pachia nynh tuh-e hae tuh Muisaw liate aening kalan phe oun phypya vae, pawccecize Muisaw nynh tuh pawpaw balyn kha marya a zah, Pachia kya-e akhupaw uccaw kha heize phe a zah.¹¹Pawccecize ccungccaw uccaw hae kha ccungccaw lungkhu umpaw ccungccaw muisaw laelan hum nynh mou a nyh? Tuhawte Pachia uccaw hae kha Pachia Muisaw laelan hum nynh san nyh khyh.¹²Atu aening nynh laephi muisaw kha ah mue khyh oh, Pachia nynh aening oun pyapaw lasung hae kha ah thaethya nawlan oh, Pachia kyate yn thuapaw Muisaw kha nynh ah mue oh.¹³E uccaw hae konglang hynh ccungccaw hawnaw nynh ccangpyapaw bya te kae ho khyh, Thyaa Muisaw nynh ccangpyapaw bya te kae ho zah, Muisaw a hoipaw ccungccaw hae kyakhe muisaw te asekuhpaw byaccing hae kha nynh kae ccaesahpya hae.

¹⁴Muisaw a hoi leipaw ccungccaw nynh tuh Pachia Muisaw kya-e lasung hae kha mue khyh, pawccecize tuh-e lasung hae tuh aning hanlan ngaeenaw nynh thua. Tuh-e lasung hae tuh muisaw lante kyalya nythya athua keiccuze aning nynh nyh kho khyh.¹⁵Muisaw a hoipaw ccungccaw nynh tuh pawpaw balyn kha pong a nythya, tuhzemah hum nynh sanmah amaw kha akaw-aleih byakhia kho khyh.¹⁶Ccathyaa nynh,“Bawipaw kha thuihei kho nawlan,Bawipaw thinlung khahummou a nyh?” a ci.Thuasalama aening tuh Khri thinlung kha ah hoi oh. Korin Khriccaawbuu kya Phiakunaw

¹Uteno hae, nanning kha muisaw ccungccaw hae hawte kae hopah kho khyh oh, pynsaw ccungccaw hae hawte, Khri kya nosi hae hawte nynh kae hopya oh.²Nanning kha samatei te nynh kae kua oh, looh tangpaw kha kae dang khyh oh; pawccecize looh tangpaw kha na ae kho loh khyh oh. Atu cia na ae kho loh khyh oh.³Pawccecize nanning tuh pynsaw ccungccaw hae nynh na thua ung oh. Pawccecize nanning laku eiungkunaw, pekunaw te phiakunaw phang a um lungkhu tuh pynsaw ccungccaw hae na thua khyh oh tou? Huatawpaw ccungccaw hae hawte na um khyh oh tou?⁴Pawccecize lu kheit nynh, “Kae tuh Paul zuitu nynh ka thua,” ci zah mingccangpaw nynh, “Kae tuh Apollos zuitu nynh ka thua,” a ci; tuhte na ci oh paw tuh pynsaw ccungccaw hae na thua khyh oh tou?

⁵Paul tuh hummou athua? Apollos tuh hummou athua? Bawipaw nynh ccungccaw miakaw kha a pya thyhte, kaening tuh zynnaw kalan ae thuakhae oh paw Pachia ryalahtu hae nynh kae thua.⁶Kae nynh ka lin, Apollos nynh tui bu, thuasalama a lesahthungtu tuh Pachia nynh thua.⁷Tukeiccuze a lintupaw hynh pawsang thua khyh, tuibupaw mah pawsang thua khyh, a lesahthungtupaw Pachia rou nynh abyapi athua.⁸Atu a lintupaw te tuibupaw tuh pynkheihpaw nynh thua, milu raveih nynh amaw a ryalawnaw thyhte a ryalaw mee kha a mue cih.⁹Pawccecize kaening tuh Pachia rya a lahkheihtu hae nynh kae thua, nanning tuh Pachia loo, Pachia inn nynh na thua oh.

¹⁰Pachia nynh yn pyapaw a thawccinaw thyhte, inn myarya sakthyapaw hawte kae nynh aleihpaw kha ka bing zah mingccangpaw nynh tuh-e vawlan khe a sak. Inn saktupaw miakaw nynh tuh-e vawlan pawtemou sak lan cipaw kha raeringkuh sah.¹¹Pawccecize Jesu Khri athuapaw phe bingkuh vae paw aleihpaw laelan ccangpaw aleihpaw kha hum nynh sanmah bing kho vae khyh.¹²Atu lukhakheit nynh tuh-e aleihpaw vawlan khe sui te, phua te, aphutepaw lung hae te, thing te, lonua ku te, ccatanphue te a sak lanze—¹³inn saktu milu raveih ryalaw tuh ccaerarih lan alangkuh cih; pawccecize Nin nynh tuh-e tuh pong a langsakuh cih. Pawccecize tuh-e tuh maee te langsaku athua cih, milu raveih ryalaw kha pawcihawpaw ryalaw nynh thua cipaw maee nynh a syntawtua cih.¹⁴Lukhakheit nynh tuh-e aleihpaw vawlan a sakpaw a ryalaw tuh atyn lanze, aning tuh ryalaw mee a mue cih.¹⁵Lukhakheit ryalaw kha maee nynh phe a u lanze, aning tuh a shung cih; thuasalama maee kyate lue hawte amaw tuh khum athua cih.

¹⁶Nanning tuh Pachia beikinn na thua oh paw te Pachia Muisaw nae kya a umpaw kha na nyh khyh oh tou?¹⁷Lukhakheit nynh Pachia beikinn kha a ro lanze, Pachia nynh amaw kha a roh cih. Pawccecize Pachia beikinn tuh athyaa; nanning tuh tuh-e beikinn nynh na thua oh.

¹⁸Nanning nynh naemaw toulou kha lingkuh nan oh. Hynh-e she kya ka haw cite na tuaku oh ze, a hawpaw lang na tang nawlan oh, a ngaeepaw lang tangty oh.¹⁹Pawccecize hynh-e laephi hawnaw tuh Pachia malang ngaeenaw nynh thua. Pawccecize Ccathyaa kyaze,“Pachia nynh mihaw hae khamimaw thyaruhnaw khatea kyng hae,”cite azeikuh.²⁰Tukoute Ccathyaa kyaze,“Mihaw hae tuanaw tuhaccakaepaw nynh thua cipawBawipaw nynh a ny,”cite bua azeikuh.²¹Tukeiccuze hum nynh sanmah ccungccaw hae kong kya pookuh nan sah. Pawccecize pawpaw balyn tuh naemaw kya-e nynh thua.²²Paul thuasah, Apollos thuasah, Sefas thuasah, laephi thuasah, hiinnaw thuasah, chinaw thuasah, atu she thuasah, malang she thuasah abalyn mawte naemaw kya-e nynh thua.²³Nanning tuh Khri kya-e nynh na thua oh; Khri tuh Pachia kya-e nynh thua. Locceihtu hae Ryalawnaw

¹Ccungccaw hae nynh kaening hynh Khri rya a lawpatu hae te Pachia byakhupaw hae kha a synriatu hae lante oun tua hae sah.²Tuhpiaze synriatu tuh zyn lan umpaw athua cih.³Thuasalama nanning nynh thuasah, ccungccaw hae kya-e byapianaw zung nynh thuasah bya nae pia lan oh paw hynh ka hanlan myarya adihpaw uccaw nynh thua. Kamaw te kamaw heize bya ka piakuh khyh.⁴Pawccecize kamaw te kamaw ka thawthaekupaw pawsang um khyh, thuasalama kae tuh tuh-e liate ka daanglae khyh; ka tungvaw bya yn piatupaw tuh Bawipaw nynh thua.⁵Tukeiccuze atu lya mohnaw kya thuruhpaw uccaw hae kha awnaw kalan a thuakhae cih paw te thinlung kya-e paccynkunaw hae a langsakuh cih paw Bawipaw yn thua mawlaezung, accyh azaw maw tuh pawsang byapia nan oh. Ccungccaw miakaw nynh Pachia kyate thehoysahnaw kha a ccou cih hae.

⁶Uteno hae, nanning hoynaw elang hynh-e balyn hynh kamaw te Apollos kha tousenaw lang mangte kae hopya oh. Tuh-e tuh nanning nynh Ccathyaa kya azeikuhpaw kha alawe lante na cyi khyh nawlan oh, kaening lu ning kong kyate na ccangku nawlan oh te nanning humhung nynh mah ccungccaw lu kheit kha thehoysahhua te ccangpaw lu kheit kha na rawse khyh nawlan oh nynh thua.⁷Pawccecize na tungvaw kya alaenaw hankhakheit kha hum nynh mou a muih? Mue leite namaw hoi lan na hoipaw pawmou a um? Na mue lan thua ze, tuh-e tuh lasung athua leipaw o-ang lante pawccemou na pooku?

⁸Na ry oh paw balyn kha na mue vae oh! Na hoirum vae oh! Kaening umbua leite siapharan lang na tang vae oh! Kaening mah nanning ryte siapharan lang kae tangbua nawlan, siapharan lang la tang ccaccing oh lah ci ka ry.⁹Pawccecize Pachia nynh kaening locceihtu hae hynh ming hae nulang nyathyakou kya oun nung zah chia lan seibe hae paw ccungccaw hae hawte oun langsaku cite nynh ka tua, pawccecize kaening tuh laephi hanlan, vaaw hae hanlan te ccungccaw hae hanlan nuinthua lan umpaw dopaw nynh kae thua.¹⁰Kaening tuh Khri keiccuze mingaee hae nynh kae thua, thuasalama nanning tuh Khri kya mihaw hae nynh na thua oh. Kaening tuh minyaa hae nynh kae thua, thuasalama nanning tuh nae thawsae. Nanning tuh sawtua lan umpaw nynh na thua oh, thuasalama kaening tuh dothatheihpaw nynh kae thua.¹¹Atu ccyh cia kaening tuh kae vuelaw, kae tuihaw, kae boeining apue, oun zia oun bua hae zah inn leite nynh kae um.¹²Kae kuih te thawte rya kae lawkuh. Thya oun law hae ze hythua kae pya hae; vawsawnaw oun pya hae ze phang kae ngaesang.¹³Thethya oun ho hae ze byanepaw te kae beih hae. Kaening tuh atunin cia laephi kya-e athu-anangpaw hawte kae thua zah pawpaw balyn kya-e athupaw hae hawte mah kae thua. Paaw hawte Paul nynh Do-oihnaw

¹⁴Hynh-e hae hynh nanning maethyasah khylan ka zei khyh, thuasalama ka sungsahpaw ka ccaaw hae hawte raeringkunaw nynh kae pya oh.¹⁵Pawccecize Khri kya ccangpahtu hae thong haw na hoi oh zemah paaw hae patae na hoi khyh oh; pawccecize thehoypaw liate Khri Jesu kya kae tuh nae paaw lang ka tang vae.¹⁶Tukeiccuze kae hynh oun dosuinkuh oh cite kae ngia oh.¹⁷Hynh-e keiccuze Bawipaw kya a lungzipaw, ka sungsahpaw ka ccapaw Timote kha nae kalan kae saw. Hmin takyh kya umpaw khriccaawbuu miakaw kya ka ccangpya hae hawte, Khri Jesu kya ka hiinzia kha aning nynh ae la liathuisah cih oh.¹⁸Ccungccaw abang nynh kae tuh nae kalan kae thua tali vae lan khyh cite tua hae zah a tansaku hae.¹⁹Thuasalama Bawipaw nynh a ry ze, nae kalan taloi kae thua cih. A tansakuh hae paw bya kha do leite mih thungnaw kha nynh ka do cih.²⁰Pawccecize Pachia peenaw tuh bya kya um khyh, thungnaw kya nynh a um.²¹Pawmou na ry oh? Tungbang tetou nae kalan kae thua cih? Tuhkhyhze sungsakunaw te, nebaleihpaw thinlung tetou kae thua cih? Ohhuakunaw nynh Khriccaawbuu Thusah

¹Nanning laku ohhuakunaw a um cite ka thae, tuhcihawpaw ohhuakunaw tuh lawki hae kya heize thae boi lan um khyh; ccungccaw lu kheit nynh a paaw zu kha palei a ikhae cite ka thae.²Nanning tuh na tansakuh oh! Khate a cyihpaw ccungccaw kha nae kyate ccaring dee athua nawlan nanning tuh rawkhui lan ccan khyh tou?

³Pawccecize kae tuh pynsaw lante nanning ryte ka um khyh zemah muisaw lante ka um; nae kya ka um buapaw hawte tuhcihawpaw a cyihpaw ccungccaw kha ah Bawipaw Jesu min te bya phe ka pia vae.⁴Na pumku vae oh ze, ah Bawipaw Jesu thungnaw liate ka muisaw tuh nae kya umbua zah,⁵tuh-e paw a muisaw tuh Bawipaw Jesu Nin kya khum a thua nawlan, a pynsaw kha ro khylan amaw tuh Satan kalan na ap cih oh.

⁶Nanning na pooku oh paw tuh hoy khyh. Ccapyhtaripaw ransi nynh vaepoi khaleih kha a thosah cipaw na nyh khyh oh tou?⁷Nanning tuh ransi phing leipaw na thua oh hawte, athawpaw vaepoi na thua nawlan oh, arynpaw ransi kha marya cciccae oh. Pawccecize aening Kawtaw Poi tuutaw athuapaw Khri tuh aening hanlan silawnawpaw lang chia athua vae.⁸Tukeiccuze arynpaw ransi, thyaruhnaw te hoyleinaw ransi khate thua leite, ransi phing leipaw sanlou athuapaw thinlung athyaapaw te byaccing khate poi kha tua oh sih. Ohhuakunaw kha Byapia Thua Cih

⁹A ohhuakuh hae paw ryte na mungku khyh nawlan oh, ka ccaky kya nae kalan phe kae zei vae.¹⁰Tuhzemah hynh-e laephi kya-e a ohhuakuh hae paw, a karankuh hae paw, ccungccaw a luade hae paw te zohtuh beik hae paw ryte kharouh mungkuh nan oh cite ka ho rypaw thua khyh; tuhte ka ho lanze nanning tuh laephi kyate na pou oh aho vae cih.¹¹Thuasalama uno cite ko athua pite a ohhuakuhpaw, a karankuhpaw, zohtuh beikpaw, ccungccaw thethya hopaw, aruipaw, ccungccaw a luadepaw ryte mungkuh nan oh, ae mah aekheih nan oh cite atu nae kalan ccaw kae zei.¹²Atolang e ccungccaw hae kha byapia lanpaw tuh kae nynh pawmou ka se? Alungkhu e ccungccaw hae kha nanning nynh byapia lanpaw thua khyh tou?¹³Atolang e ccungccaw hae kha Pachia nynh bya a pia cih hae. Ccathyaa nynh, “Ccungccaw hoyleipaw kha nae kyate ccaring dee oh,” a ci. Uno kha Kaethe Nan

¹Nanning lu kheit te lu kheit byathan na hoi vae oh ze mithyaa hae malang thuakhaeku leite ading lei hae paw malang byapiazung lang na thuakhae ngan oh tou?²Laephi hynh mithyaa hae nynh byapia cih hae cipaw na nyh khyh oh tou? Nanning nynh laephi hynh bya na pia lan oh athua ze, adih huapaw byathan hae kha bya na pia kho khyh oh tou?³Vaawccungccaw hae kha aening nynh byapia lan cipaw na nyh khyh oh tou? Hynh-e hiinnaw te asekuhpaw byathan hae kha bya houh pia lanpaw nynh thua!⁴Tukeiccuze tuhcihawpaw byathan hae kha na hoi oh ze, khriccaawbuu kya a um lei hae paw kha byapiatu lang na khang oh tou?⁵Nae maethya ccaw cite nynh tuhte ka ho. Nanning kya zyntu lu kheit te lu kheit laku byapae kho lanpaw ahawpaw ccungccaw lu kheit san um khyh tou?⁶Thuasalama zyntu lu kheit nynh zyntu lu kheit kha kaethe zah zynleitu hae malang a thuakhae.

⁷Tukeiccuze lu kheit te lu kheit na kaetheku oh paw tuh naemaw hanlan shungnaw nynh thua. Kaetheku laeze nae tungvaw ae cyisei oh paw kha hoyhua khyh tou? Pawccemou hynpyakunaw kha na teing paleih khyh oh?⁸Tuhte thua leite naemaw ccaccei nynh zyntu hae tungvaw kya na sei oh zah lingte uccaw na luade oh.

⁹Hoyleinaw a raetu hae tuh Pachia peenaw kha ccou lan khyh hae cipaw na nyh khyh oh tou? Lingsakuh nan oh! A ohhuakuh hae paw, zohtuh beik hae paw, milae zu milae vawpaw a seikhae hae paw, nopi te nopi, pise te pise a sei hae paw,¹⁰miruh hae, a karankuh hae paw, a rui hae paw, ccungccaw thethya ho hae paw, ccungccaw a luade hae paw mah Pachia peenaw ccou lan khyh hae.¹¹Nanning kyaze abang tuh khahcihaw hae paw nynh na la thua oh. Thuasalama Bawipaw Jesu Khri min liate thuasah, ah Pachia Muisaw liate thuasah nanning tuh singpya na thua vae oh, thyaasah na thua vae oh zah thyaaccousah na thua vae oh. Pachia Phu-esah Oh

¹²Pawpaw balyn tuh ka hanlan cyi kho athua, thuasalama pawpaw balyn tuh athanepaw thua khyh. Pawpaw balyn tuh ka hanlan cyi kho athua, thuasalama pawpaw nynh mah kae hynh yn uk lan khyh.¹³Looh tuh vue hanlan thua zah vue tuh looh hanlan nynh thua. Thuasalama Pachia nynh tuh-e hae tuh parouh mawte a roh cih. Pyn tuh ohhuakunaw hanlan thua khyh, Bawipaw hanlan nynh thua, Bawipaw tuh pyn hanlan nynh thua.¹⁴Pachia nynh Bawipaw kha a thoosah, aening hynh mah a thungnaw liate oun thoosah bua cih.¹⁵Nae pyn tuh Khri pyn kya-e hae nynh thua cipaw na nyh khyh oh tou? Tukeiccuze Khri pyn kya-e hae kha ka lah cih zah ohhuanung pyn kya-e hae lang ka rae cih tou? Ka rae cceisoh!¹⁶Ohhuanung te a kyngkuhpaw tuh tuh-e nung te pyn pynkheit nynh athua hae cipaw na nyh khyh oh tou? Pawccecize Pachia nynh, “Minmin lu ning tuh ngesaw kheit lang a tang cih hae,” a ci.¹⁷Thuasalama Bawipaw te a kyngkuhpaw tuh amaw te muisaw ccangkheit nynh athua hae.¹⁸Ohhuakunaw kha sibia oh! Ccungccaw nynh a raepaw seinaw miakaw tuh pyn atolang nynh a um; thuasalama ohhuakunaw a raepaw tuh amaw a pyn kya a sei vae.¹⁹Nae pyn tuh Pachia kyate na mue oh paw, nae lungkhu a umpaw Thyaa Muisaw beikinn nynh thua cipaw te nanning tuh naemaw kya-e na thua khyh oh cipaw kha na nyh khyh oh tou?²⁰Pawccecize nanning tuh amee te repaw nynh na thua oh; tukeiccuze Pachia phu-esah nawlan nae pyn kha mang oh. Zuvaw Tangnaw

¹Atu nanning nynh ka kalan nae zei oh paw te asekuh lante: “Pise nynh zudy leite a um ze ahoy,” na ci oh.²Thuasalama ohhuakunaw kha sibia khylan pise miakaw nynh amaw a zu hoi sah lah, nopi miakaw nynh amaw a vawpaw hoi sah.³Pise nynh vawpaw athuanawpaw a rya kha ccingsah sah lah, nopi nynh mah zu athuanawpaw a rya kha ccingsah sah; mih lu ning te mih rynaw kha lungryachikhaekuh kalang hae sah.⁴Zu nynh amaw a pyn kya kaw hoi khyh, vawpaw nynh a hoi. Tuhawte vawpaw nynh mah amaw a pyn kya kaw hoi khyh, a zu nynh a hoi.⁵Sawsangnaw rae khylan accyh sosoh na khyakuh oh zah nawccawkheih te na sibia oh paw laelan, lu kheit te lu kheit nae rynaw kha myapakuh nan oh; tuh-e ccyh he athang te, bua umkheih oh, tuhteze nynh na sungku kho khyh oh keiccuze Satan nynh ae tuhou lan khyh oh.⁶Thuasalama hynhte ka hopaw hynh kawbya kae pya oh paw thua leite, kae ua oh paw nynh thua.⁷Ccungccaw hae balyn tuh kamaw hawte thua hae sah ci ka ry. Thuasalama ccungccaw miakaw nynh Pachia kyate muepaw lasung alokuh leipaw kha ccarou a hoi hae. Lu kheit nynh phuin kheit hoi zah mingccangpaw nynh ccangpaw phuin kheit kha a hoi.

⁸Tukeiccuze zu a hoi leipaw, vawpaw a hoi leipaw te nomae hae kalan ka hopaw tuh: Minmin nynh kamaw hawte a um hae zetuh mih hanlan ahoy.⁹Thuasalama minmin nynh a sungku kho khyh hae ze zu, vawpaw hoi hae sah; pawccecize chiisaw rynaw kha sungku kho khyh ze zu, vawpaw hoi tuh ahoyhua.

¹⁰Zu, vawpaw a hoi hae paw kha kae nynh kaw ka pya hae, thuasalama tuh-e tuh kamaw kyate thua khyh, Bawipaw kyate yn thuapaw nynh thua: Zu nynh a vawpaw kha mah nan sah.¹¹A mya ze vawpaw hoi leite um sah, tuhkhyhze a vawpaw te bua ccawkuhthui hae sah. Vawpaw nynh a zu kha mah nan sah.

¹²Tuhlaepaw mingccang hae kalan, Bawipaw nynh thua leite, kae nynh ka hopaw tuh: zyntu lukhakheit nynh zynleitu athuanung kha zu lang hoi zah, tuh-e a zu nynh a vawpaw ryte umkheih lan a nawccaw ze, a zu kha mah nan sah.¹³Tuhawte nopi lukhakheit nynh zynleitu athuapaw vawpaw kha hoi zah tuh-e a vawpaw nynh a zu ryte umkheih lan a nawccaw ze, a vawpaw kha mah nan sah.¹⁴Pawccecize a zyn leipaw vawpaw tuh a zu liate thyaasah thua zah, a zyn leipaw zu tuh a vawpaw liate thyaasah athua. Tukhyhze nae ccaaw hae tuh thyaa lan khyh hae, thuasalama atu minmin tuh athyaa hae.¹⁵Thuasalama a zyn leipaw nynh a mya ze, mah ccaleih sah. Zyntu raee thuasah, ccia thuasah tuhcihawpaw byathan kya heedeku lanpaw thua khyh. Pachia nynh nanning kha daenaw te um khylan nynh ae ko oh.¹⁶Pou zu, na vawpaw kha na khum kho lanpaw te na khum kho lei lanpaw tuh pawtemou na ny? Pou vawpaw, na zu kha na khum kho lanpaw te na khum kho lei lanpaw tuh pawtemou na ny? Konaw thyhte Hiin Oh

¹⁷Pachia nynh nanning ae ko lya oh ze, Bawipaw nynh ae khyapya oh paw hiinnaw thyhte nanning lu raveih nynh hiin oh. E hynh khriccaawbuu hae balyn kya ka ccangpya hae paw nynh thua.¹⁸Pachia nynh a ko lya vingdungawkuh vae paw a um tou? Vingdung a awkunaw adaelaepaw kha zosah lan zuakuh nan sah. Pachia nynh a ko lya vingdungawkuh leipaw a um tou? Vingdungawku lan zuakuh nan sah.¹⁹Vingdungawkupaw tuh paw ccungkia khyh zah vingdungawku leipaw mah paw ccungkia khyh; thuasalama Pachia kawbya hae zuipaw nynh abyapi athua.²⁰Pachia nynh ae ko lya oh hawte nanning lu raveih nynh po hiin oh.

²¹Pachia nynh ae ko lya kha see na thua tou? Tuh-e kong tuh na thinphang nan sah. Thuasalama nang nynh luenaw na mue kho ze, tuh-e ccyhhoy tuh mangkuh.²²Pawccecize see athua lyakhe Bawipaw nynh a kopaw ccungccaw tuh Bawipaw ccungccaw a luepaw nynh thua. Tuhawte ko athua lyakhe a luepaw ccungccaw mah Khri see nynh thua.²³Nanning tuh amee te repaw nynh na thua oh; ccungccaw hae see lang tang nan oh.²⁴Uteno hae, Pachia nynh ae ko lya oh ze na thuanaw oh thyhte Pachia ryte po um oh. Zu, Vawpaw Hoi leipaw te Nomae hae

²⁵Atu zu, vawpaw a hoi lei hae paw te asekuh lante Bawipaw kawbya ka hoi khyh; tuhzemah kae tuh Bawipaw a ngaethyaumsahnaw kya zyn lan umpaw lu kheit ka thua hawte tuanaw kae pya oh.²⁶Tuhte atu lya-e lungriathaenaw keiccuze pise lu kheit nynh tuhmawte po a um ze ahoy cite ka tua.²⁷Nang tuh zu te heede na thua tou? Lue lan zuakuh nan. Nang tuh zu dyku leite a luepaw na thua tou? Zu dyku lan zuakuh nan vae.²⁸Thuasalama nang tuh zu na hoi ze, na sei khyh; liaccady nynh vawpaw a hoi ze, aning tuh sei khyh. Tuhzemah zu, vawpaw a hoipaw tuh hynh-e hiinnaw kya vawsawnaw a tung cih hae, nanning kha tuh-e vawsawnaw kyate kae luesah ry oh.²⁹Thuasalama uteno hae, ka ho rypaw tuh, accyh adyn vae; tukeiccuze atu te vae tuh zu a hoi hae paw nynh zu a hoi lei hae paw hawte um hae sah;³⁰a rah hae paw nynh a rah lei hae paw hawte, lungtua hae paw nynh lungtua lei hae paw hawte, uccaw a re hae paw nynh uccaw a hoi lei hae paw hawte,³¹hynh-e laephi uccaw te a ccuepekuh hae paw nynh tuh-e uccaw te a ccuepekuh lei hae paw hawte um hae sah; pawccecize hynh-e laephi muinsan tuh azo cih.

³²Nanning kha lungriathaenaw kyate kae luesah ry oh. Zu hoi leipaw nynh tuh pawtemou Bawipaw kha a lungry ka tung cih cite Bawipaw ryalaw kong kha nynh a lungriathae.³³Thuasalama zu hoipaw nynh tuh pawtemou ka zu lungry ka tung cih cite laephi uccaw kong kha nynh a lungriathae.³⁴Vawpaw a hoipaw te liaccady laku mah alaenaw a um. Vawpaw a hoi leipaw nopi nynh tuh a pyn kya te a muisaw kya athyaa nawlan Bawipaw kya-e uccaw hae kha nynh a tua. Thuasalama vawpaw a hoipaw nopi nynh tuh pawtemou ka vawpaw lungry ka tung cih cite laephi uccaw hae kong kha nynh a tua.³⁵Hynhte ka hopaw tuh, nae hanlan athane nawlan nynh thua, nanning kha khee khylan thua leite, nanning nynh kou angaekuh lante na um nawlan oh te Bawipaw kha lungronaw um leite rya na lawpya nawlan oh nynh thua.

³⁶Thuasalama pise lukhakheit nynh a haaw vae paw a liaccanung tungvaw dohoy lei lante nynh ka um cite a tuaku ze thuasah, a chiisaw rynaw eih le zah umkheih lan accanthya vae ze thuasah a ry hawte zuvaw lang tang hae sah; tuh-e tuh seinaw thua khyh. Minmin tuh zuvaw lang tang hae sah.³⁷Thuasalama tynkaring lan tuakuh zah, nangseku leite a rynaw kha a sungku kho keiccuze tuh-e nopinung tuh a liaccanung lante kyalya po nung lan cite a thinlung kya bya a paekuhpaw tuh uccaw hoypaw nynh a rae.³⁸Tukeiccuze a haaw vae paw a liaccanung kha zu lang a hoikuhpaw tuh uccaw hoypaw hynh a rae; thuasalama zu a hoi leipaw ccungccaw tuh houh hoypaw uccaw kha a rae.

³⁹Zu tuh a vawpaw a hiin lungkhu balyn heede athua. Thuasalama a vawpaw tuh a chi lanze, a rypaw pise zu lang tang khylan, Bawipaw kya kyalya nynh aning tuh a lue.⁴⁰Thuasalama kae nynh bya ka paenaw tetuh, aning nynh vawpaw hoi leite khamawte a um lanze a lungtuahua cih. Kae mah Pachia Muisaw ka hoi cite ka tuakuh. Zohtuh hae kalan Looh Pyanaw

¹Atu zohtuh hae kalan pyapaw looh konglang ho lanze: “aening balyn tuh nynaw ah hoi oh” cipaw ah ny oh. Nynaw tuh a lysakuh, thuasalama sungsakunaw nynh tuh thawzung kha a tynsah.²Lukhakheit nynh ccangkhakheit ka nyh cite a tuaku lanze, ny lan accan zeih kha nyh loh khyh.³Thuasalama Pachia a sungsahpaw ccungccaw kha Pachia nynh a ny.

⁴Tukeiccuze zohtuh kalan a pya hae paw looh aenaw konglang ho lanze, laephi kya zohtuh um ccaccing khyh cipaw te Pachia ccangkheit laelan ccangpaw um vae khyh cipaw kha ah ny oh.⁵Pawccecize “pachia hae” patae te “bawi hae” patae a um a ci hae hawte, vaawlang kya thuasah, laephi vawlan thuasah pachia hae a ci hae paw kha a la um hae zemah,⁶aening hanlan tuh Paaw, Pachia ccangkheit rou nynh a um, pawpaw balyn tuh amaw kyate oun um zah, aening tuh amaw hanlan nynh ah hiin oh. Bawipaw lu kheit, Jesu Khri rou nynh a um. Pawpaw balyn tuh amaw liate um zah, aening mah amaw liate nynh ah um oh.

⁷Tuhzemah tuh-e nynaw tuh ccungccaw miakaw kya um khyh. Abang ccungccaw tuh atu cia zohtuh beiknaw kya a ciaku hae keiccuze zohtuh kalan pyapaw looh kha a ae hae ze, zohtuh looh nynh thua cite a tua hae; mimaw te mimaw nykunawpaw thinlung tuh a thawzya keiccuze tuh-e looh nynh oun thusah cite a tua hae.⁸Looh nynh aening hynh Pachia kalan oun naesakuh hua lan khyh. Ah ae khyh oh zemah ah shunghua lae khyh oh, ah ae oh zemah ah miahua lae khyh oh.⁹Thuasalama nae kya-e hynh-e luenaw hynh thawzya hae paw hanlan thyku nawlan a tang khyh nawlan raeringkuh oh.¹⁰Pawccecize nynaw na hoi oh paw nanning nynh zohtuh beikinn kya looh na ae oh paw kha mingccang hae nynh ae muih oh ze, mimaw nykunawpaw thinlung thawzya hae paw nynh zohtuh hae kalan pyapaw looh kha ae lan mih rawthung lan khyh tou?¹¹Tukeiccuze nae kya-e nynaw keiccuze, Khri nynh mih hanlan a chipya hae paw, thawzyapaw zyntu hae tuh arohhang cih hae tou?¹²Tuhcite nae uno hae tungvaw na sei oh zah mimaw nykunawpaw thinlung a thawzya ccyh lyakhe vaemaw he na muesah oh tuh, Khri tungvaw na sei vae oh.¹³Tukeiccuze looh nynh ka uno kha a khuliasaku lanze, ka uno kha ka khuliasaku khyh nawlan, saw kha kharouh ka ae vae lan khyh. Locceihtu A Rya te A Ccou lanpaw

¹Kae tuh a luepaw ka thua khyh tou? Locceihtu ka thua khyh tou? Ah Bawipaw Jesu Khri kha kae nyn ka muih boi khyh tou? Nanning tuh Bawipaw kya ka lawpaw ka ryalaw na thua khyh oh tou?²Kae tuh mingccang hae hanlan locceihtu ka thua khyh zemah, nanning hanlan tuh locceihtu nynh ka thua; pawccecize nanning tuh Bawipaw kya locceihtu ka thuanawpaw tazeih nynh na thua oh.

³Akaw-aleih bya yn khiatu hae kya ka daangsahku nawpaw bya tuh hynhte nynh thua:⁴Kaening tuh aenaw kaw te nianaw kaw kae hoi khyh tou?⁵Ccangpaw locceihtu hae hawte, Bawipaw a neitaw hae te Sefas hawte, kaening so khua kae ccongnaw kya a zynpaw zu lu kheit kha hoeibuanaw kaw kae hoibua khyh tou?⁶Tuhkhyhze Barnabas te kae kyalya tou vuekuakunaw hanlan ryalaw lawku leite um lan kaw kae hoibua khyh?⁷Hummou amaw a phua kha mangte rhawkaw rya a lah? Hummou misu khokhu kya ccoukuh zah misu thae ae leite a um? Tuhkhyhze hummou tuuphu kha rin zah tuu matei kha nia leite a um?

⁸E bya hynh ccungccaw muihnaw tetou hung ka ho? Kawbya nynh mah hynhte hobua khyh tou?⁹Pawccecize Moses Kawbya kyaze, “Ccatan a tin cciamangpaw tangnuapaw mung kha na bucceih lan khyh,” cite azeikuh. Pachia nynh tangnuapaw hanlan tou a peki?¹⁰Tuhkhyhze tuh-e tuh aening hanlan kyalya ho khyh tou? Aening hanlan nynh tuhte azeiku; pawccecize leithuetupaw nynh ngaehoinaw te thue lan ccan zah, ccatan a tintupaw nynh a muebua lanpaw ccathae kha ngaehoinaw te tin lan accan.¹¹Kaening nynh nae kyakhe muisaw ccacii kae tu zah nae kya-e pynsaw uccaw hae kha kae rue ze, myaryamaw alung tou?¹²Mingccang hae nynh nanning kya tuh-e kaw tuh a mue hae ze, kaening tuh houh muehua lan kae ccan khyh tou?
Tuhzemah kaening nynh tuh-e kaw tuh kae mang khyh; Khri thehoypaw hynh khawtu a umsei khyh nawlan pawpaw balyn kha phang kae ngaesang.¹³Beikinn kya ryalah hae paw tuh beikinn kyate looh a mue hae cipaw te silawhang kya ryalah hae paw tuh silawhang vawlan e silawnawpaw kha a ccoubua hae cipaw kha na nyh khyh oh tou?¹⁴Tuhawte thehoypaw a phytu hae tuh thehoypaw liate mih vuekuakuh cih hae cite Bawipaw nynh kaw a pya vae.

¹⁵Thuasalama hynh-e hae hynh kharouh ka mang khyh, tuhte nae cyipya oh ccaw cite mah hynh-e ccaw hynh ka zei khyh. Pawccecize ka pookunawpaw hynh lukhakheit nynh accakaepaw lang a tangsah lae tuh ka chi ze ahoyhua.¹⁶Thehoypaw ka ho zemah pooku lanpaw ka hoi khyh, pawccecize ho lanpaw rya ka hoi. Thehoypaw ka ho khyh lanze, kae tuh pawcih ngaethya lan umpaw pei ka thua cih!¹⁷Pawccecize e rya hynh lungthote ka law ze, ryalaw mee ka mue cih; thuasalama kamaw rynaw kha rawsete ka law lanze, kae kha yn zyn zah yn nawtupaw ryalaw nynh thua.¹⁸Tuhteze ka ryalaw mee tuh pawmou? Ka ryalaw mee tuh, thehoypaw ka ho vae ze, ka hoipaw kaw kha alawe lante mang leite, thehoypaw kha amee hoku leite ka hopaw kha nynh thua.

¹⁹Pawccecize kae tuh ccungccaw balyn kyate ka lue zemah ccungccaw hae kha houh lung lan mue khylan, ccungccaw balyn hanlan kamaw te kamaw kha see lang nynh ka tansaku.²⁰Judah hae kha mue khylan kae tuh Judah hae kya Judah paw lang nynh ka tang; Kawbya zakaw um hae paw kha mue khylan kae tuh Kawbya zakaw um hae paw kya Kawbya zakaw umpaw lang nynh ka tang.²¹(Kae tuh Pachia kawbya kyate a lue leipaw, Khri kawbya zakaw a umpaw ka thua zemah), Kawbya atolang um hae paw kha mue khylan kae tuh Kawbya atolang a umpaw lang nynh ka tang.²²Thawzya hae paw kha mue khylan kae tuh thawzyapaw lang nynh ka tang. Ccungccaw abang kha aphuinphuin te khum khylan kae tuh ccungccaw balyn hanlan atyn-are lang nynh ka tang.²³Kae tuh thehoypaw a hythuanaw kha ka ccoubua nawlan, thehoypaw keiccuze hynh-e hae balyn hynh ka cyi.

²⁴Ccuetaekunaw kya a ccue hae paw tuh mih balynte ccue hae salamah lu kheit kyalya nynh lasung a mue cipaw na nyh khyh oh tou? Tukeiccuze lasung na mue ccaw oh tuhcite ccue oh.²⁵Khungtaekunaw kya a taekuh buapaw miakaw nynh tuh tynre balyn kya amaw te amaw a sungku; anaan-arohthyapaw haetapaw lukhung mue khylan nynh tuhte a cyi hae; thuasalama aening tuh anaan-arohthya leipaw lukhung mue khylan nynh thua.²⁶Tukeiccuze kae tuh eenaw a um leite ka ccue khyh; thungku a thyapaw nynh khivae kha a thung hawte ka thung khyh.²⁷Thuasalama ming hae kha ka hopah kou hae te, kamaw tuh a shungpaw lang ka tangsei khyh nawlan, ka pyn hynh ka kia zah ka uk.
Zohtuh kha Raeringkuh Oh

¹Uteno hae, ah minpaaw hae kya acyihkuhpaw kha ny leite na um lan oh paw ka ry khyh; ah minpaaw hae balyn tuh maeking kaw la um hae zah mih balynte rili kha po la zua hae,²maeking kya te rili kyakhe mih balynte Moses kya baptisma a in hae,³mih balynte phuin kheitpaw muisaw looh kha la ae hae zah,⁴mih balynte phuin kheitpaw muisaw tui kha a la neih hae. Pawccecize mih nulang te azuikuhpaw muisaw lungpi kyate a poupaw muisaw tui kha nynh a nia hae, tuh-e lungpi tuh Khri nynh thua.⁵Thuasalama minmin kyaze alunghua tungvaw kya Pachia a lungrythua khyh, tukeiccuze minmin tuh ramkaw kya a chih hae.

⁶Minmin nynh ahoy leipaw uccaw hae kha a duaa hae hawte aening nynh ah duaa khyh nawlan oh, atu hynh-e hae tuh aening hanlan dosuinku lanpaw nynh thua hae.⁷Ccathyaa kyaze, “Ccungccaw hae tuh ae khylan te nia khylan dahung hae zah zue khylan bua a thokuh hae,” cite azeiku hawte, nanning tuh minmin abang hawte zohtuh beiktu hae thua nan oh.⁸Minmin abang tuh ohhuakunaw rae hae zah nin kheit lungkhu thong kuin thong thum a chi hae hawte, aening tuh ohhuakunaw rae nan oh sih.⁹Minmin abang nynh Pachia kha syntawtua hae zah hupaw nynh a ro hae hawte, aening tuh Khri kha syntawtua nan oh sih.¹⁰Minmin abang nynh ccohkuh hae zah a rohtupaw nynh a ro hae hawte, nanning tuh ccohkuh bua nan oh.¹¹Hynh-e hae balyn hynh dosuinkupaw lang a tang nawlan minmin kya acyikuh. She athangnaw nynh a thuanuapaw aening thuiheinaw hanlan nynh tuh-e hae tuh zei athua.¹²Tukeiccuze ka thadyn cite a tuakuhpaw nynh tuh a khuliaku khyh nawlan raeringkuh sah.¹³Ccungccaw miakaw nynh a tung hae paw syntawnaw rou kha nynh na tung oh. Pachia tuh a lungzipaw thua zah, na taening lei oh paw syntawnaw kha nae kya thuasah lan khyh; syntawnaw kha na teing kho nawlan oh, syntawnaw ryte luenawpaw laanpi kha mah ae raepah cih oh.

¹⁴Tukeiccuze ka sungsah hae, zohtuh beiknaw kha ccuetaw oh.¹⁵Ahawpaw ccungccaw hae kya ho hawte nynh kae hopya oh; ka hopaw hynh nanning nynh la tuasekuh oh.¹⁶Hythua ah pya oh paw hythuanaw banang tuh Khri chiise kha ah neethungku oh paw thua khyh tou? Ah iathungku oh paw sanlou tuh Khri pyn kha ah neethungku oh paw thua khyh tou?¹⁷Sanlou phe kheit kyalya athua keiccuze aening tuh patae ah ci oh zemah pyn pynkheit nynh ah thua oh; pawccecize aening balyn tuh tuh-e sanlou phe kheitpaw kha nynh ah mangkheih oh.¹⁸Israel hae kha dotua oh; silawnaw hae paw a ae hae paw tuh silawhang kya ryalahbua hae paw thua khyh hae tou?¹⁹Tuhteze ka ho rypaw tuh pawmou? Zohtuh hae kalan silawnawpaw looh thuasah, tuh-e zohtuh thuasah abyapipaw nynh thua ka ci tou?²⁰Thuasalama lawki hae nynh silawnaw hae paw tuh Pachia kalan thua leite, raerangsaro hae kalan nynh si a law hae. Raerangsaro hae ryte vaeccawtang hae paw lang kae tangsah ry khyh oh.²¹Bawipaw banang te raerangsaro hae banang kha na neihkheih kho khyh oh; Bawipaw ccaboi te raerangsaro hae ccaboi kha na mangkheih kho khyh oh.²²Aening nynh Bawipaw kha eiungnaw ah hoisah cih oh tou? Aening tuh aning laeze ah thawsaehua tou? Pachia Phu-e nawlan Cyih

²³“Pawpaw balyn kae cyi kho,” a ci hae, thuasalama pawpaw balyn hynh marya athanepaw thua khyh. “Pawpaw balyn kae cyi kho,” a ci hae, thuasalama pawpaw balyn hynh bawmtu thua khyh hae.²⁴Namaw hanlan thanenaw kha ccungkuh nan; ming hae hanlan thanenaw kha ccungtua.²⁵Ahmaw nykunaw thinlung keiccu byakhia leite, saw zuanaw kya a zua hae paw miakaw kha ae oh;²⁶pawccecize, Ccathyaa nynh, “laephi te a lungkhu umpaw balyn tuh Bawipaw kya-e nynh thua,” a ci.²⁷A zyn leipaw lukhakheit nynh aepaw ae kopah oh zah ccia lan na ry oh ze, ahmaw nykunaw thinlung keiccu byakhia leite, nae malang ae nyapya hae paw miakaw kha ae oh.²⁸Thuasalama lukhakheit nynh, “E tuh zohtuh hae kalan pyapaw nynh thua,” cite ae hopya oh ze, khate ae hopahpaw keiccu thuasah, ahmaw nykunaw thinlung keiccu thuasah tuh-e tuh ae nan oh.²⁹Ahmaw nykunaw thinlung ka cipaw hynh namaw thinlung kha thua leite, mingccang hae thinlung kha nynh ka ho ry. Pawccemou mingccangpaw kya-e nykunaw thinlung nynh kae ka luenaw kha bya yn pia lanpaw tuh?³⁰Lungtuabya hote ka ae lanze, lungtuabya hote ka aepaw tuh-e looh keiccuze pawccemou kae tuh thethya yn ho hae?

³¹Tukeiccuze na ae oh zemah thuasah, na nia oh zemah thuasah, pawpaw na cyi oh zemah, pawpaw balyn tuh Pachia phu-enaw hanlan cyih oh.³²Judah hae, Grik hae te Pachia khriccaawbuu kha vawsawnaw pya nan oh.³³Ccungccaw hae nynh khumnaw a muebua hae ccaw cite, kamaw elang thanenaw ccungku leite, ccungccaw patae elang thanenaw ka ccung zah, ka cyipaw miakaw kya ccungccaw balyn kha lunghoysah khylan ka zuaku hawte nanning mah cyihbua oh.

¹Kae nynh Khri kha ka dosuinku hawte nanning mah kae hynh oun dosuinkuh oh. Lu Bongkunaw

²Uteno hae, nanning nynh pawpaw kya balyn kae kha nae liathui oh zah, nae kalan kae ap oh phungzae hae thyhte na zui oh keiccuze kae thehoysah oh.³Thuasalama Khri tuh pise miakaw lu thua zah, vawpaw tuh a zu lu nynh thua cipaw te Pachia tuh Khri lu nynh thua cipaw kha kae nysah ry oh.⁴Pise lu kheit nynh a lu bongkute sawsang ze thuasah, profehbya a ho ze thuasah amaw a lu kha thethyasahpaw nynh thua.⁵Thuasalama nopi lu kheit nynh a lu bongku leite sawsang ze thuasah, profehbya a ho ze thuasah, amaw a lu kha thethyasahpaw nynh thua; pawccecize tuhte a cyi ze, a lu-opaw te nynh aloku.⁶Pawccecize nopi nynh a lu kha a bongku khyh ze, a sang ngokuh sah; nopi lu kheit hanlan sang ngokupaw, lu-okupaw tuh maethya lan um ze, a lu kha bongkuh sah.⁷Pise tuh Pachia muinsan te a phu-enaw athua keiccuze a lu bongku lan ccan khyh. Thuasalama nopi tuh pise phu-enaw nynh thua.⁸Pawccecize pise tuh nopi kyate raepaw thua khyh, nopi tuh pise kyate raepaw nynh thua.⁹Pise tuh nopi hanlan raepaw thua khyh, nopi tuh pise hanlan raepaw nynh thua.¹⁰Tukeiccuze vaaw hae keiccuze nopi nynh a lu vawlan kawhoinaw syntawnaw a hoi aho.¹¹Tuhzemah Bawipaw kya nopi leite pise um khyh, pise leite nopi mah um khyh.¹²Pawccecize nopi tuh pise kyate yn thua hawte, pise mah nopi liate nynh yn thua; thuasalama pawpaw balyn tuh Pachia kyate nynh oun thua hae.¹³Naemaw te naemaw byapiatua oh: nopi nynh lu bongku leite Pachia kalan sawsangpaw tuh angaekuh tou, ngaekuh khyh tou?¹⁴Pise nynh a sang kha myarya sae lan a hangku ze, amaw hanlan maethyaum cipaw laephi phung nynh ae ccangpah khyh oh tou?¹⁵Thuasalama nopi nynh a sang kha myarya sae lan a hangku ze, amaw hanlan phu-enaw nynh thua. Pawccecize a sang tuh amaw bongku nawlan pyapaw nynh thua.¹⁶Thuasalama lukhakheit nynh a ei ry ze, tuhcihawpaw phung ah hoi khyh oh, Pachia khriccaawbuu hae mah hoi khyh hae. Bawipaw Zerya (Mat 26.26-29; Mar 14.22-25; Luk 22.14-23)

¹⁷Akawlan e thuiheinaw kya nanning kha kae thehoysah khyh oh, pawccecize nanning nynh na sueluaku vae oh ze, ahoypaw hanlan thua leite athahpaw hanlan nynh athuahua.¹⁸Pawccecize masaty lanze, khriccaawbuu buukheit lante na sueluaku vae oh ze, nae laku phiakunaw a um cite ka thae; tuh-e tuh abang-asung ka zyn.¹⁹Pawccecize nanning kya ahmepaw ccungccaw hae kha langsaku khylan, nae kya buu phiakunaw mah a um cih.²⁰Nanning nynh he na sueluaku vae oh ze, tuh-e tuh Bawipaw zerya mang khylan na sueluaku oh paw thua ccaccing khyh.²¹Pawccecize ae ccyh he thua te, nanning lu raveih nynh naemaw looh kha lawkute na ae oh keiccuze lu kheit tuh a vuelaw zah mingccangpaw tuh a rui.²²Pawmou na cyi oh? Aenaw lanpaw te nianaw lanpaw inn na hoi khyh oh tou? Tuhkhyhze Pachia khriccaawbuu kha na dothatheih oh zah ryachi hae kha maethya na bong oh tou? Pawte kae hopah cih oh? Hynh-e kya kae thehoysah cih oh tou? Kae thehoysah lan khyh oh.

²³Pawccecize nae kalan kae ccangpya oh paw hynh Bawipaw kyate ka muepaw nynh thua: Bawipaw Jesu nynh amaw a phee khuazi hae khe sanlou kha lah zah,²⁴lungtuabya a ho koute, sanlou kha eih zah, “Hynh-e hynh ka pyn nynh thua, nanning hanlan nynh thua. Kamaw liathui nawlan ae oh,” a ci.²⁵Tuhawte zerya a mang kou hae te, banang kha mah lah zah, “Hynh-e banang tuh ka chii kya atynpaw byakin thawpaw nynh thua. E hynh na nia takyh oh te, kamaw liathui nawlan neih oh,” a ci.²⁶Pawccecize nanning nynh hynh-e sanlou na ae takyh oh te hynh-e banang na nia takyh vae oh ze, Bawipaw a chinaw kong kha amaw yn thua mawlaezung na phy oh paw nynh thua.

²⁷Tukeiccuze humhung zemah Bawipaw sanlou te banang kha angaekuh lei lante ae zah a neihpaw miakaw tuh Bawipaw a pyn te a chii kya seinaw a raepaw nynh thua.²⁸Tukeiccuze naemaw te naemaw hoyte tuakuh ty oh, tukoute sanlou kha ae oh lah banang kha neih oh.²⁹Pawccecize Bawipaw pyn asuilan kha nythya leite, ae zah a neihpaw miakaw tuh a tungvaw byapiaku khylan ae zah a neihpaw nynh thua.³⁰Hynh-e keiccuze nanning lakuze ccungccaw patae tuh mih thawzya zah a ccih hae, abang tuh a chih hae.³¹Pawccecize ahmaw te ahmaw kha bya ah piaku oh ze, aening kha bya oun pia vae lan khyh hae.³²Thuasalama Bawipaw nynh aening kha bya he oun pia te, aening tuh laephi ccungccaw hae ryte seibe ah thua khyh nawlan oh, oun thuiheipaw nynh thua.

³³Tukeiccuze ka uteno hae, ae lan na sueluaku vae oh ze, lu kheit te lu kheit la ngawkuh bua oh.³⁴Nae vuelaw ze innvaw kya aesya oh, tuhteze nynh he na pumkuh oh te, byapianaw na ing lan khyh oh. Ccangpaw konglang tuh kamaw kae thua te, kae ccangpah cih oh. Muisaw Lasung hae

¹Uteno hae, nanning nynh muisaw lasung hae konglang ny leite na um lan oh paw ka ry khyh.²Lawki lang na tang lya oh tuh, nanning kha ae la soih oh zah byahothya leipaw zohtuh hae kalan ae la thuakhae sei oh paw kha na ny oh.³Tukeiccuze Pachia Muisaw liate a hopaw ccungccaw nynh tuh, “Jesu tuh thyalawnaw tung sah!” cite ho boi khyh, te Thyaa Muisaw liate holeite hum nynh sanmah, “Jesu tuh Bawipaw nynh thua,” cite ho kho khyh cipaw kha thaethya oh ci ka ry.

⁴Lasung tuh aphuinphuin a um zemah Muisaw ccangkheit rou nynh a um.⁵Pachia ryalawnaw tuh aphuinphuin a um zemah Bawipaw lu kheit rou nynh a um.⁶Ryalawpaw tuh aphuinphuin a um zemah ccungccaw miakaw kya atyn-are ryalahpaw Pachia lu kheit rou nynh a um.⁷Ccungccaw balyn hoynaw hanlan milu raveih kya Muisaw langkunaw kaw kha pya athua.⁸Muisaw liate ccungccaw lu kheit kha hawnaw byahothyanaw pya zah, tuh-e Muisaw liate mingccangpaw kha nynaw byakhupaw hothyanaw kha a pya.⁹Tuh-e Muisaw liate mingccangpaw kha zynnaw pya zah, tuh-e Muisaw liate mingccangpaw kha ngeccih dansahnaw lasung kha a pya.¹⁰Mingccangpaw kha ngaeangnaw rae khonaw pya zah, mingccangpaw kha profehbya ho khonaw a pya, mingccangpaw kha muisaw hae phiathyanaw a pya; mingccangpaw kha bya hae aphuinphuin hothyanaw a pya, mingccangpaw kha bya hae asuilan ccaesah thyanaw a pya.¹¹Hynh-e hae balyn hynh tuh-e Muisaw ccangkheit nynh ryalawpaw thua zah, a ry hawte milu raveih kha ccarou a neethung hae. Pyn kya-e hae

¹²Pyn pynkheit kyakhe pyn kya-e hae patae um hae zah, pyn kya-e hae balyn tuh alung hae zemah pyn pynkheit athua hae hawte, Khri mah tuhawte nynh athua.¹³Pawccecize Judah thuasah, Grik thuasah, see thuasah, aluepaw ccungccaw thuasah, aening balyn tuh Muisaw ccangkheit liate pyn pynkheit lungkhu lang baptisma insah ah thua oh; ah balynte Muisaw ccangkheit kha nia lan pya ah thua oh.

¹⁴Pawccecize pyn tuh pyn kya-e ccangkheit kyalya um leite, aranphei patae a um.¹⁵Ccu nynh, “Kae tuh kuih ka thua khyh keiccuze pyn te kae sekuh khyh,” a ci lanze, tuhte a cinaw nynh pyn kya-e athuanaw kha zyasah lae lan khyh.¹⁶Nakua nynh, “Kae tuh mit ka thua khyh keiccuze pyn te kae sekuh khyh,” a ci lanze, tuhte a cinaw nynh pyn kya-e athuanaw kha zyasah lae lan khyh.¹⁷Pyn abalyn mawte mit a la thua lanze, pawkyamou thaenaw tuh a um vae cih? Pyn abalyn mawte nakua a la thua lanze, paw kyate mou amyn tuh a thae vae cih?¹⁸Thuasalama atu tuh Pachia nynh amaw a lungry hawte pyn kya-e hae miakaw kha mih umnaw raveih kyakhe pong a nung hae.¹⁹Minmin balyn tuh pyn kya-e ccangkheit kyalya a la thua hae ze, pyn tuh pawkyamou a um vae cih?²⁰Atu tuh pyn kya-e hae tuh patae a um hae zemah pyn tuh pynkheit rou nynh a um.²¹Mit nynh kuih kha, “Nang tuh kae peki khyh,” ci kho lan khyh. Tuhawte lu nynh ccu kha, “Nang tuh kae peki khyh,” ci kho lan khyh.²²Thanccingte ho lanze, thawzya huapaw alopaw pyn kya-e hae tuh houh ahoboupaw nynh thua hae.²³Pyn kyaze sawtua lan eih um khyh cite ah tua oh paw aranphei kha sawtuanaw houh ah pya oh; ah pyn kyaze dohoy leipaw kha houh puithya lan ah ccaan oh.²⁴Ah pyn kyaze dohoypaw kha tuh ccaan ho vae khyh. Thuasalama pyn kyaze sawtuanaw aboupaw aranphei kha sawtuanaw alehua pyate Pachia nynh pyn kha a rae;²⁵pyn lungkhu kya phiakunaw um leite, aranphei hae nynh ccangkheit te ccangkheit alokuhpaw do-oihkunaw a hoi nawlan hae nynh tuhte a rae.²⁶Pyn kya-e ccangkheit nynh a teing ze, mih balyn mawte a teingbua hae; pyn kya-e ccangkheit tuh sawtuanaw a ccou ze, mih balyn mawte mih lungtuabua.

²⁷Atu nanning tuh Khri pyn na thua oh zah, lu raveihte tuh-e pyn kya-e hae nynh na thua oh.²⁸Pachia nynh masaty locceihtu hae, ccangningnaw profeh hae, ccangthumnaw ccangpahtu hae, tukoute ngaeangnaw a rae hae paw, tukoute ngeccih dansahnaw lasung a mue hae paw, ming hae a bawm hae paw, ming hae a ukthya hae paw, bya aphuinphuin a hothya hae paw kha khriccaawbuu kya ryalaw a pya hae.²⁹Mih balynte locceihtu athua hae tou? Mih balynte profeh athua hae tou? Mih balynte ccangpahtu athua hae tou? Mih balynte ngaeangnaw a rae hae tou?³⁰Mih balynte ngeccih dansahnaw lasung a mue hae tou? Mih balynte bya aphuinphuin a ho hae tou? Mih balynte bya a leih hae tou?³¹Thuasalama ahoy huapaw lasung hae kha mue lan zuakuh oh. Te ahoy huaccepaw laanpi kha kae muihsah ung cih oh. Sungsakunaw

¹Ccungccaw hae bya te vaaw hae bya kha ka hothya salamah sungsakunaw ka hoi khyh ze, kae tuh dawkhua tupaw roi te lanchi khuapaw roi hawte nynh ka thua.²Kae nynh profehbya ho khonaw thungnaw ka hoi zah byakhupaw balyn te nynaw balyn kha ka thaethya zemah thuasah, mua hae nuesaku khonaw zynnaw balyn ka hoi zemah thuasah, sungsakunaw ka hoi khyh ze, kae tuh accakaepaw nynh ka thua.³Ka hoipaw balyn kha ming hae ka pya hae zemah thuasah, ka pyn hynh maee te uku lan ciate ka pyaku zemah thuasah sungsakunaw ka hoi khyh ze, tuh-e nynh ka hanlan pawsang thane khyh.

⁴Sungsakunaw tuh a lungsae zah thawccinaw a hoi; sungsakunaw tuh eiungnaw hoi khyh; sungsakunaw tuh pookuh khyh, lysakuh khyh,⁵a othah khyh. Amaw thanenaw hanlan ccungkuh khyh, a thinriathya khyh, cyiseinaw kha phang ccyke khyh;⁶hoyleinaw kya a lungtua khyh, thuasalama byaccing kya a lungtua;⁷sungsakunaw tuh pawpaw balyn kha a ngaesang kho, pawpaw balyn kha a zyn, pawpaw balyn kha a ngaehoi, pawpaw balyn kha phang a ngaesang.

⁸Sungsakunaw tuh thang boi khyh. Thuasalama profehbya ho khonaw a um zemah a zo cih; bya aphuinphuin hothyanaw a um zemah adae cih; nynaw a um zemah a zo cih.⁹Pawccecize aening tuh abang-asung nynh ah ny oh, abang-asung nynh profehbya ah ho oh.¹⁰Thuasalama accingpaw he yn thua vae tetuh, abang-asungpaw kha tuh a zo cih hae.¹¹Ka imua lya tuh imua hawte nynh bya ka ho, imua hawte ka nyh zah imua hawte nynh ka tua; thuasalama piccan ka thua tetuh imua uccaw hae kha pong ka vua vae.¹²Pawccecize atu aening tuh muinsado kya valyvaly te nynh ah muih oh; thuasalama tuin ccyh vae tuh mitmae hawiliakute muih lan vae. Atu kae tuh abang-asung nynh ka ny, thuasalama tuin ccyh vae tuh Pachia nynh kae hynh phe ccing lan yn ny hawte kae mah phe ccing lan ka nyh vae cih.¹³Atu tuh zynnaw, ngaehoinaw te sungsakunaw, hynh-e hae ccangthum hynh atyn; hynh-e hae kyaze abyapi huaccepaw tuh sungsakunaw nynh thua. Profehbya Hopaw

¹Sungsakunaw kha deehui oh lah, muisaw lasung hae kha mue lan peki oh, abyapi lante profehbya na ho kho nawlan oh peki oh.²Pawccecize thae leipaw bya a hopaw tuh ccungccaw hae kalan ho khyh, Pachia kalan nynh a ho. Pawccecize a hopaw bya kha hum nynh sanmah thaethya khyh; Muisaw liate byakhupaw hae kha nynh a ho.³Profehbya a hopaw tuh ccungccaw hae kha thawzung tynsahnaw, hyynawpaw te ngaengansahnaw bya kha nynh a hopya hae.⁴Thae leipaw bya a hopaw tuh amaw kyalya kha nynh thawzung a tynsaku. Thuasalama profehbya a hopaw tuh khriccaawbuu kha thawzung a tynsah.⁵Nae balynte thae leipaw bya kha ho oh ci ka ry, thuasalama profehbya na ho nawlan oh houh ka ryhua. Pawccecize thae leipaw bya a hopaw nynh khriccaawbuu kha thawzung tynsah nawlan asuilan kha ccaerarih lan a leih khyh ze, aning laeze profehbya a hopaw tuh aphutehua.

⁶Uteno hae, atu nae kalan kae thua zah thae leipaw bya te ka ho zemah byaphy liate thuasah, nynaw liate thuasah, profehbya honaw liate thuasah, ccangpyakunaw liate thuasah kae hopya khyh oh ze nae hanlan pawmou athane cih?⁷Hiinnaw hoi leite a ccaethya hae paw phyly thuasah, tintang thuasah a roi kha ccaerarih lan accae khyhze, phyly tou a tu hae, tintang tou a khua hae cipaw kha pawtemou ny kho a um cih?⁸Mungkae nynh ccaerarih lan roi accae khyh ze, hum nynh mou rhawtuk lan a paccynkuh cih?⁹Tuhawte nanning mah thaethya lan azoipaw bya hae khate na ho khyh oh ze, na ho oh paw kha pawtemou a nyh cih hae? Khivae kalan nynh hung na hohan cih oh.¹⁰Laephi vawlan bya aphuin patae a um, asuilan a hoi leipaw bya phuin kheit san um khyh.¹¹Tukeiccuze bya asuilan kha kae nynh ka ny khyh ze, tuh-e bya a hopaw hanlan kae tuh ramccangpaw nynh ka thua vae cih, a hotupaw mah kae ka hanlan ramccangpaw nynh athua cih.¹²Tuhawte nanning mah muisaw lasung hae myarya a pekipaw na thua oh keiccuze, khriccaawbuu thawzung tynsahnaw elang tuh-e lasung kha phe ccing lan hoi lan zuakuh oh.

¹³Tukeiccuze thae leipaw bya a hopaw nynh tuh-e tuh asuilan aleih kho nawlan sawsangkuh sah.¹⁴Pawccecize kae nynh thae leipaw bya te saw ka sang ze, ka muisaw nynh saw a sang, thuasalama ka thinlung tuh tuin kya panbua khyh.¹⁵Tuhteze pawte ka cyih cih? Kae tuh muisaw te saw ka sang cih zah thinlung te mah saw ka sang cih; muisaw te hlaw ka sah cih zah thinlung te mah hlaw ka sah cih.¹⁶Tukhyhze nang nynh muisaw kyalya te the na hoysah ze, a um buapaw ccungccaw huataw nynh lungtuabya na hopaw kha a thaethya khyh ze pawtemou “Amen” a cithya cih?¹⁷Pawccecize nang nynh tuh ahoyte lungtuabya na ho ccaccing, thuasalama mingccangpaw tuh thawzung tynsah thuabua khyh.¹⁸Nanning balyn laeze kae tuh thae leipaw bya ka ho keiccuze ka Pachia kha kou ka luung.¹⁹Thuasalama khriccaawbuu kya thae leipaw bya te bya thong haw ka ho laeze, mingccang hae kha ccangpya khylan ka thinlung te bya kaw pangaw ho kha ka ryhua.

²⁰Uteno hae, nae tuanaw kya imua hae thua nan oh; ahoy leipaw kya tuh nosi hae thua oh, thuasalama tuanaw kya tuh piccan hae thua oh.²¹Kawbya kyaze:“Bawipaw nynh,‘Ccangpaw bya te thuasah,ramccang hae munglae te thuasahhynh-e ccungccaw hae kyabya ka ho cih,tuhzemah minmin nynhka bya hynh ngaelae lan khyh hae,’ a ci,”cite azeikuh.²²Tukeiccuze thae leipaw bya tuh a zyn hae paw hanlan thua leite, a zyn lei hae paw hanlan muihsahnaw nynh thua; thuasalama profehbya a hopaw tuh a zyn lei hae paw hanlan thua leite, a zyn hae paw hanlan nynh thua.

²³Tukeiccuze khriccaawbuu balyn nynh san kheit kya na thuakheih oh zah nae balynte thae leipaw bya na ho oh ze, atolang e ccungccaw hae, tuhkhyhze a zyn lei hae paw nynh oun teebua hae ze, nanning kha a ngaee vae hae ae ci lan khyh oh tou?

²⁴Thuasalama nae balynte profehbya na ho oh ze, a zyn leipaw, atolang e lu kheit nynh yn teebua ze, nae balynte a seinaw na muihsakuh oh zah aning kha na zynsah bua oh.

²⁵A zyn leipaw nynh a lungkaw te a tuakupaw balyn kha alangkuh vae cih; te aning nynh Pachia malang bakhungte a beik cih zah, “Pachia tuh nae kya a um ccaccing,” cite a ho vae cih. Pachia Beiknaw kya Zui lanpaw

²⁶Uteno hae, tuhteze pawte cyi lan? Na pumku vae oh ze, nanning lu raveih nynh Sam hlawsahnaw, ccangpyanaw, byaphy honaw, thae leipaw byahonaw, asuilan leihthyanaw kha na cyi kalang oh. Pawpaw balyn tuh thawzung tynsah nawlan cyi thua sah.²⁷Lukhakheit nynh thae leipaw bya a ho ze, lu ning khyhze alunghua lu thum um hae sah lah, lu kheit koute lu kheit ho hae sah; te lu kheit nynh asuilan leih sah.²⁸Thuasalama asuilan a leihtu a um khyh lanze tuh-e paw tuh khriccaawbuu kya daebabi lan um sah lah, amaw te Pachia kalan kyalya ho sah.²⁹Profeh hae lu ning khyhze lu thum nynh ho hae sah lah, mingccang hae nynh hoyte tuase hae sah.³⁰A pe dahungpaw lukhakheit nynh Pachia kyate byaphy lanpaw a mue ze, masaty a hopaw ccungccaw kha daebabi lan um hin sah.³¹Pawccecize nae balynte na ccangku nawlan oh te nae balynte thawzung pya na thua nawlan oh, nanning balyn nynh lu kheit koute lu kheit profehbya na ho kho oh.³²Profeh hae kya-e muisaw hae nynh profeh hae kaw a ngae hae.³³Pawccecize Pachia tuh keisukeilaepaw a umsahpaw thua leite daenaw a umsahpaw Pachia nynh thua.
(Mithyaa hae kya-e khriccaawbuu balyn kya a um hae hawte,³⁴nae nopi hae tuh khriccaawbuu hae kya daetedae lan um hae sah. Pawccecize minmin tuh byaho lan kaw-ua thua khyh hae, Kawbya nynh mah a ho hawte zakaw a sangsakuh cih hae.³⁵Minmin nynh ccangkhakheit a ny ry hae ze, innvaw kya mih vawpaw hae kha khiakuh hae sah. Pawccecize nopi nynh khriccaawbuu kya byaho lanpaw tuh maethya lan a um.³⁶Pachia bya hynh nanning kyate tou yn tho? Tuhkhyhze nae kalan kyalya tou yn thua?)

³⁷Lukhakheit nynh amaw te amaw kha profeh lu kheit nynh ka thua, tuhkhyhze muisaw thungnaw a hoipaw nynh ka thua cite a tuaku ze, nae kalan ka zeipaw hynh Bawipaw kawbya nynh thua cipaw la nyh sah.³⁸E hynh pawlang a ria leipaw tuh amaw kha mah pawlangria thua lan khyh.³⁹Tukeiccuze uteno hae, profehbya ho lanpaw hynh myarya ry oh lah, thae leipaw byaho kha la khee nan oh.⁴⁰Pawpaw balyn tuh kou ngaekuh lante, ccynmamyh lante cyi lanpaw nynh thua. Jesu Thoothuipaw

¹Uteno hae, phe kae hopya vae oh paw thehoypaw kha atu kya nysah thui kae ry oh; tuh-e thehoypaw tuh na lawkuh oh zah tuh-e kya na thadyn oh;²kae hopya oh paw bya kha nanning nynh accakaepaw kya zyn leite, varyng na kyngku oh ze, tuh-e thehoypaw liate khum na thua oh.

³Pawccecize ka muepaw abyapi huapaw kha nae kalan kae hopya pathy oh, tuh-e tuh: Ccathyaa kya azeiku thyhte Khri tuh aening seinaw hanlan a chih,⁴aning tuh uh hae zah Ccathyaa kya azeiku thyhte nin thumnaw kya thoothuisah athua,⁵te Peter kya a langkuh koute a zuitu hae lu haw lae ning kya a langkuh cipaw kha nynh thua.⁶Tukoute uno hae za pangaw lae kyakhe ccyh kheit kya a langkuh. Tuh-e hae kyaze alunghua tuh a hiin ung hae, abang tuh a chih vae hae.⁷Tukoute James kya a langkuh, tukoute locceihtu hae balyn kya a langkuh.⁸Nyathyakou, ninsaw ccing leite a puipaw hawte athuapaw kamaw kya mah a langkuh.⁹Pawccecize kae tuh Pachia khriccaawbuu kha a tuaa a sahpaw ka thua keiccuze locceihtu cite ko lan angaekuh bua leipaw, locceihtu hae lakuze anyaa huapaw nynh ka thua.¹⁰Thuasalama Pachia thawccinaw liate kae tuh atu hawte ka thua kho zah, kae yn pyapaw a thawccinaw tuh alakawpaw lang tang khyh. ccangpaw locceihtu hae laeze ryalaw ka lahhua, tuhzemah kamaw ka lah khyh, ka kya a umpaw Pachia thawccinaw nynh thawte rya a lah.¹¹Tukeiccuze kae thuasah, minmin thuasah tuhte phung kae ho zah nanning nynh na zyn oh. A Chih hae paw Thoothuinaw

¹²Atu lya Khri tuh chinaw kyate a thoothui cite ho athua ze, nanning lakuze abang nynh a chih hae paw tuh thoothuinaw um khyh cite pawtemou na ho kho oh?¹³A chih hae paw tuh thoothuinaw a um khyh lanze, Khri tuh thoothui khyh cinawpaw nynh thua;¹⁴Khri tuh a thoothui khyh lanze, kaening nynh phung kae hopaw tuh accakaepaw thua zah, nanning zynnaw mah accakaepaw nynh thua vae.¹⁵Kaening tuh Pachia kya-e ahme leipaw ccaekia hae lang nynh oun muih vae hae; pawccecize Pachia nynh Khri kha a thoosah vae cite kaening nynh Pachia kong ccaekia kae khan; a chih hae paw thoothui khyh hae cipaw tuh ahme lanze, Pachia nynh Khri kha thoosah khyh cinawpaw nynh thua.¹⁶Pawccecize a chih hae paw tuh a thoothui khyh hae ze, Khri tuh thoothui khyh.¹⁷Khri tuh a thoothui khyh ze, nae zynnaw tuh accakaepaw thua zah, nanning tuh nae seinaw kya nynh na um ung oh.¹⁸Khri kya a ih vae hae paw mah arohhang vae hae.¹⁹Aening nynh Khri kya ngaehoinaw ah hoi oh paw hynh hynh-e hiinnaw hanlan kyalya athua lanze, aening tuh ccungccaw hae balyn kyaze ngaethyaum huacce hae paw nynh ah thua cih oh.

²⁰Thuasalama Khri tuh chinaw kyate thoothui zah a chih vae hae paw kyaze masaty athae lang a tang vae.²¹Pawccecize ccungccaw lu kheit liate chinaw tuh yn thua hawte, a chih hae paw thoothuinaw mah ccungccaw lu kheit liate nynh yn thua.²²Adam keiccu ccungccaw balyn a chi hae hawte, Khri liate ccungccaw balyn hiinsah athua cih hae.²³Thuasalama ccungccaw miakaw mawmaw ccyh kya thoosahthui athua cih hae; Khri tuh masaty athae nynh thua, tukoute Khri he yn thua te, Khri a ccungccaw hae tuh a thoothui cih hae.²⁴Tukoute laephi she athangnaw ccyh yn thua cih; Khri nynh uktu miakaw, kawhoitu hae te huhan hoitu miakaw kha a roh kou hae te, peenaw kha Paaw Pachia kalan a ap cih.²⁵Pawccecize Pachia nynh rhaw hae balyn kha a ccuphe kaw a nung kou hae cia, Khri nynh a uk cih.²⁶Ro athua cih paw nyathyakou rhaw tuh chinaw nynh thua.²⁷Pawccecize Ccathyaa kyaze, “Pachia nynh pawpaw balyn kha Khri ccuphe kaw a nung vae,” cite a um. Thuasalama, “Pawpaw balyn kha amaw zakaw a nung,” cite a hopaw kya, pawpaw balyn amaw zakaw a nungtupaw Pachia tuh pabua khyh cipaw alang.²⁸Pawpaw balyn tuh Khri zakaw kya nung he athua te, pawpaw balyn kha amaw zakaw a nungtupaw Pachia tuh tynre balyn kya tynre athua nawlan, Ccapaw amaw mah Paaw zakaw kya nung athuabua cih.

²⁹Tuhkhyh lanze, a chih hae paw ccelang baptisma a in hae paw tuh pawte cyih vae cih hae? A chih hae paw tuh a thoothui khyh hae ze, pawccemou minmin nynh a chih hae paw ccelang baptisma a in hae?

³⁰Pawccemou aening so accyh takyhte rinaw kya palei ah um oh?³¹Uteno hae, kae tuh nin takyhte ka chih! Nanning hanlan ah Bawipaw Khri Jesu kya ka pookunaw liate kae nynh hynhte ka honawpaw athua.³²Ccungccaw cyisahnaw lante Efesa khua kyakhe sarepaw hae ryte kae douku zeso, ka hanlan pawmou athane cih? A chih hae paw tuh a thoothui khyh hae ze, byaphung kya a um hawte,“Ae oh sih lah neih oh sih,pawccecize awkhualan ah chih cih oh.”

³³La lingsakuh nan oh:“Ahoy leipaw ryte mungkupaw nynhahoypaw ziazae kha a rosah.”

³⁴Nae lungkyhsakuh ccavae oh lah, sei nan vae oh; pawccecize abang ccungccaw tuh Pachia na nyh khyh oh. E hynh nae maethya ccaw cite nynh ka ho. Pyn Thoothuinaw

³⁵Thuasalama lukhakheit nynh, “A chih hae paw tuh pawtemou a thoothui cih hae? Pawcihawpaw pyn te mou oun langkuh cih hae?” cite a khia cih.³⁶Mingaeepaw! Na tupaw ccacii tuh a chi khyh ze, hiin lan khyh.³⁷Ccacii na tu vae ze, yn um lanpaw a pyn kha na tu khyh; chanvuih thuasah, ccangpaw ccacii thuasah ccacii maw kha nynh na tu.³⁸Thuasalama Pachia nynh a ry hawte pyn kha a pya, ccacii miakaw kha amaw aphuin thyhte pyn kha a pya.³⁹Ngesaw balyn tuh alokuhpaw ngesaw cci thua khyh; ccungccaw ngesaw tuh phuin kheit, sarangpaw hae ngesaw tuh phuin ccangpaw, ngasaw hae ngesaw tuh phuin ccangpaw, te pavaw hae ngesaw tuh phuin ccangpaw nynh thua.⁴⁰Vaawlang te asekuhpaw pyn hae um zah laephi te asekuhpaw pyn hae mah a um; thuasalama vaawlang te asekuhpaw phu-enaw tuh phuin kheit thua zah laephi te asekuhpaw phu-enaw tuh phuin ccangpaw nynh thua.⁴¹Khuanin phu-enaw tuh phuin kheit, sawpaw phu-enaw tuh ccangpaw thua zah, awsi hae phu-enaw mah ccangpaw nynh thua; pawccecize awsi ccangkheit te ccangkheit mih phu-enaw tuh alae.

⁴²Tuh-e hawte nynh a chih hae paw thoothuinaw mah athua. Uu athuapaw pyn tuh rohthya zah a thoothuipaw pyn tuh rohthya vae khyh.⁴³Uu athua lya tuh a thethah zah, he a thoothui tuh sawtuanaw a ccou. Uu athua lya tuh nyaa zah, he a thoothui tuh thungnaw te a beih.⁴⁴Puikhaepaw pyn tuh uu athua, muisaw pyn tuh thosathui athua; puikhaepaw pyn um zah muisaw pyn a um.⁴⁵Tukeiccuze Ccathyaa kyaze, “Masaty ccungccaw Adam tuh ahiinpaw ccungccaw lang yn tang,” cite azeikuh; nyathyakou Adam tuh hiinnaw a pyapaw muisaw nynh thua.⁴⁶Tuhzemah muisaw pyn hynh masaty thua khyh, puikhaepaw pyn nynh a umty, tukoute nynh muisaw pyn tuh a um.⁴⁷Masaty ccungccaw tuh laephi kyate thua zah laenoi te raepaw nynh thua; lu ningnaw ccungccaw tuh vaawlang te yn thuapaw nynh thua.⁴⁸Laenoi ccungccaw hae tuh laenoi te raepaw ccungccapaw hawte nynh thua hae; vaawlang e ccungccaw hae mah vaawlang te yn thuapaw ccungccapaw hawte nynh thua hae.⁴⁹Aening tuh laenoi te raepaw ccungccapaw muinsan ah ke oh hawte, vaawlang te yn thuapaw ccungccapaw muinsan mah ah ke cih oh.

⁵⁰Uteno hae, e hynh kae hopya oh: chii te saw nynh tuh Pachia peenaw kha ccou kho lan khyh; aroh khopaw nynh aroh kho leipaw kha ccou kho lan khyh.⁵¹Ngaetua oh, byakhupaw ccangkheit kae hopah oh! Aening ah balynte marya chi lei lan, thuasalama aening balyn tuh⁵²nyathyakou mungkae yn ccae te, sosohtari kya, mitsiphalah kya marya rulae ah thua cih oh. Pawccecize mungkae roi yn ccae cih zah a chih hae paw kha aroh kho leipaw lante thosathui athua cih hae zah aening tuh rulae ah thua cih oh.⁵³Pawccecize hynh-e aroh khopaw pyn nynh aroh kho leipaw khate a ccaanku hahe ho zah, hynh-e a chih khopaw pyn nynh a chih kho leipaw khate a ccaanku hahe aho.⁵⁴Tukeiccuze hynh-e aroh khopaw nynh aroh kho leipaw khate ccaankuh zah hynh-e a chih khopaw nynh a chih kho leipaw khate he a ccaankuh te,“Chinaw tuh taenaw nynhpo a laang vae,”cite azeikuhpaw Ccathyaa tuh accing vae cih.⁵⁵“Pou chinaw, na taenaw tuhteimou a um?Pou chinaw, na zunghe tuhteimou a um?”

⁵⁶Chinaw a zunghe tuh seinaw thua zah, seinaw a thungnaw tuh kawbya nynh thua.⁵⁷Thuasalama ah Bawipaw Jesu Khri liate aening taenaw oun pyatupaw Pachia kya thehoynaw um sah.

⁵⁸Tukeiccuze ka sungsahpaw uteno hae, Bawipaw kya nae ryalaw tuh alakawpaw thua khyh cipaw na ny oh keiccuze tynkaring lan, nue kho um lei lante um oh lah, Bawipaw rya kha zungzae lah oh.
Mithyaa hae hanlan Ahlu Khoipyapaw

¹Atu mithyaa hae hanlan ahlu khoipyapaw kong lante, Galatia ram e khriccaawbuu hae kya kaw ka pya hae hawte nanning mah la cyihbua oh.²He kae thua te, ahlu khoi aho vae khyh ccaw, lonaw takyh kyaze masaty nin khe nanning milu raveih nynh na mue oh paw thyhte ccangte la nung oh lah la ccy oh.³He kae thua te, ka ccaw te nae lasung kha Jerusalem lang cciakhae khylan nae nawccawpaw ccungccaw hae kha ka saw cih hae.⁴Kamaw ccia lan accan ze, minmin tuh ka kya a cceihbua cih hae. Khuaccong lan Paccynkunaw

⁵Atu Mesidonia ram kya po ka cceih koute nae kalan kae thua cih, pawccecize Mesidonia ram kya po ccia lan ka paccynkuh.⁶Teitei lang ka ccia zemah, khua ka ccongnaw kya nae cciakhae ccaw oh, athua kho ze nae kya sosoh ka umbua kho, khuaccihsaw heize nae kya po ka um kho.⁷Pawccecize nae kalan cciapawte hung muihku kyalya te ka ry khyh; Bawipaw nynh yn ua ze, nanning ryte khaw umkheih lan ka ngaehoi.⁸Thuasalama Efesa khua kya Pentekos poi nin cia kae um ung cih.⁹Pawccecize athanepaw ryalaw elang akopaw thuakaw kha ka hanlan hungpya athua, rawsetu hae mah patae a um hae.

¹⁰Nae kalan Timote yn thua ze, ri leite nae kya a umbua nawlan pe la ki oh; pawccecize aning tuh kamaw hawte Bawipaw rya a lahpaw nynh thua.¹¹Tukeiccuze hum nynh sanmah amaw kha dothatheih nan sah. Aning nynh ka kalan yn thua nawlan, khua a ccongnaw kya daebabi lan yn saw oh; pawccecize aning yn thua lanpaw kha kae te uno hae nynh phang kae ngaw.

¹²Kae unopaw Apollos konglang tuh, uno hae ryte nae kalan yn cciabua nawlan thawte ka hopah zahmah, atu lya tuh kharouh cceihbua ry khyh; tuhzemah accyh yn ccanthya te yn cceih cih. Nyathya Hyynaw Bya

¹³Raeringkute lungkyhrarih lan um oh, zynnaw kya tynkaring lan thadyn oh, nae rawthung sah, nae thawsae sah.¹⁴Nanning nynh pawpaw balyn kha sungsakunaw te cyih oh.

¹⁵Uteno hae, Stefanas a innbyn hae tuh Akhai ram kyaze masaty Khriccaaw hae thua hae zah, minmin tuh mithyaa hae ryalaw khylan mimaw te mimaw a pyakuh hae cipaw na ny oh.¹⁶Khahcihawpaw ccungccaw hae te minmin ryte thawte rya a lahkheih hae paw miakaw kalan naemaw te naemaw kha na pyaku nawlan oh thawte kae ngia oh.¹⁷Stefanas, Fortunatas te Akhaikus oun thua hae paw kong ka lungtua; pawccecize nanning na um khyh lya oh kae kha yn bawm hae.¹⁸Pawccecize minmin nynh nae thaw ae muinsah oh hawte ka thaw yn muinsah bua hae. Tukeiccuze khahcihawpaw ccungccaw hae kha la luung oh.

¹⁹Asia ram e khriccaawbuu hae nynh nanning kha ae beihlang oh. Akuila te Prisilla nynh mih inn kya apumkuhpaw khriccaawbuu ryte nanning kha Bawipaw kya thinlung ccaccingte ae beihlang oh.²⁰Uteno hae balyn nynh nanning kha ae beihlang oh. Lu kheit te lu kheit athyaapaw myngkunaw te byabeihkuh oh.

²¹Kae, Paul nynh hynh-e beihlangnaw bya hynh kamaw ka kuih te nynh ka zei.²²Humhung zemah Bawipaw a sungsah leipaw tuh thyalaw thua sah. Kae Bawipaw, yn thua ccavae!²³Bawipaw Jesu thawccinaw tuh nae kya la um sah.²⁴Khri Jesu kya kae sungsahnaw oh paw tuh nae balyn tungvaw kya la um vae sah. Amen.

Bible Society of Myanmar

https://app.library.bible/content/1a340f5ae072b2f4