Read LOCCEIHTU 1

LOCCEIHTU1

Thyaa Muisaw Byakinpyakupaw

¹Ka sungsahpaw Theofilas, masaty ka ccauh kyakhe Jesu nynh ryalaw a thotakawnaw kyate vaawlang lawthung athua nin cia,²a cyipaw te a ccangpyapaw balyn kha ka zei. Vaawlang a kae mawze a po hae paw locceihtu hae kha Thyaa Muisaw liate a ccangpya hae.³A chih koute locceihtu hae kalan khe a sei kho leipaw ccaekia hae patae te a hiinnawpaw kong kha nin sung pali lungkhu a langsahpya hae; amaw kha muih hae zah aning nynh Pachia peenaw kong kha a hopya hae.⁴Locceihtu hae ryte a umkheih lya hae khe minmin kha hynhte kaw a pya hae: “Jerusalem kyate pou nan oh; kae hopya vae oh paw Paaw kya-e byakinpyakunaw kha la ngaw oh.⁵Johan nynh tuh tui te baptisma ae pya oh, thuasalama nin patae aro maw Thyaa Muisaw te baptisma pya na thua cih oh,” a cipya hae. Jesu Vaawlang Kaenaw

⁶Locceihtu hae tuh Jesu ryte tungkuh hae zah minmin nynh, “Bawipaw, atu lyahin peenaw kha Israel hae kalan na pyathui cih hae tou?” cite a khia hae.⁷Jesu nynh minmin kha, “Ka Paaw nynh amaw kawhoinaw te a khyapaw ccyh te ninsaw tuh nanning nynh ny ho khyh.⁸Thuasalama nae tungvaw Thyaa Muisaw he yn thua te, thungnaw huhan kha nae mue cih oh zah, Jerusalem khua, Judea ram balyn, Samaria ram te laephi adianaw kyacia ka ccaekia na thua cih oh,” a cipya hae.⁹E bya a ho koute minmin nynh a do cciamang lya hae khe Jesu tuh lawthung thua zah maeking nynh mih muihnaw kyate amaw kha zya a law.¹⁰Tuhte lawthung athuapaw Jesu kha locceihtu hae nynh vaawlang riri a do cciamang lya hae khe ccungccaw lu ning tuh boeining rawpaw kha lawkute mih pe khe oun thadyn hae.¹¹Tuh-e hae nynh, “Galilee ccungccaw hae, pawccemou vaawlang na dothung oh? Nae kyate vaawlang lawthung athuapaw Jesu tuh vaawlang a kaepaw na muih thyh oh hawte bua yn thua cih,” a cipya hae. Judas hanpaw Matthias Ponaw

¹²Tukoute minmin tuh Oliv mua kyate Jerusalem lang a ki hae, Oliv mua tuh Jerusalem te naekuh zah sabbath nin ninkheit lungkhu uapaw laanccia se asaw.¹³Khuapi lungkhu lang he a thua hae tuh Peter, Johan, James, Andru, Filip, Thomas, Bartholomew, Matthai, Alfeas ccapaw James, Zealot a ci hae paw Simon, te James neitaw Judas tuh a thuanaw hae inn palung khaan langkhe a kaethung hae.¹⁴E hae balyn tuh Jesu a nung Mary te a neitaw hae ry, nopi hae ryte lunglokute apaekuh lei lan saw a sang hae.

¹⁵Nin sosoh aro koute milu lante za kheit lu kuin loukaw acih hae paw zuitu hae laku kya Peter nynh thadyn zah,¹⁶“Uteno hae, Jesu a kyngtu hae a cciakhae hae paw Judas konglang Thyaa Muisaw nynh David munglae kyate a hotypaw Ccathyaa hynh accing aho.¹⁷Pawccecize Judas tuh kaening kya riabua thua zah hynh-e Pachia ryalaw hynh a muebua,” a ci.¹⁸(Atu tuh-e paw nynh ahoy leipaw rya a lawnaw mee phua te laekua kua kheit a re; te a lutabing lante ccahbung zah a vue ngaelung te phae paw zah a ring balyn pong toikuh.¹⁹Tuh-e kong tuh Jerusalem kya a um hae paw balyn nynh pong a ny hae keiccuze mih bya te tuh-e laekua kha, ‘Akeldama’ a ci hae, asuilan tuh, ‘Chiise Laekua’ cipaw nynh thua.)²⁰“Pawccecize Sam ccauh kyaze,‘A inn tuh ccungccaw dae sah lah,a lungkhu kyahum sanmah um nan sah;a ryalaw kha mingccangpaw nynhlawkuh sah,’cite azeikuh.²¹Tukeiccuze Bawipaw Jesu thoothuinaw kong ccaekia lang lukhakheit nynh oun pankhae aho. Aning tuh Bawi Jesu nynh kaening ryte khua a ccong lungkhu balyn kae kya mungkuh bua zah, Johan nynh baptisma pyanaw kong a honaw kyate tho zah Jesu tuh kaening kyate vaawlang a kae nin cia, kae kya po a mungkuh buapaw athua cih,” a ci.²³Minmin nynh ccungccaw lu ning min kha a pya hae: tuh-e hae tuh Barsabbas a ci hae paw, Jastas cite mah a ko hae paw Josef te Matthias nynh athua hae.²⁴Te sawsang hae zah, “Bawipaw, nang tuh ccungccaw thinlung kha marya na ny.²⁵Judas nynh amaw te angaekuhpaw hmin kalan ccia khylan a poutawpaw rya, locceihtu hae rya hynh law khylan hynh-e lu ning hae kya hynh hummou na po cipaw oun langsapyaku tua,” a ci hae.²⁶Minmin nynh ccungthydung hae zah Matthias nynh a mue; Matthias tuh locceihtu lu haw lae kheit kya riabua athua vae. Thyaa Muisaw Rungbungnaw

¹Pentekos nin yn thua tuh minmin balyn tuh ahmin san kheit kya pong a um hae.²Myarya arupaw khise thopaw hawte roi tuh vaawlang te vaekheihmawte yn ccae zah minmin a dahungnaw hae inn kyakhe phe abeih.³Te maeesoi a lopaw lae hae tuh minmin kya oun langkuh zah milu raveih tungvaw kya accah.⁴Minmin balyn tuh Thyaa Muisaw te beih hae zah Muisaw nynh ho khonaw a pya hae thyhte minmin nynh ccangpaw bya te a ho hae.

⁵Tuh ccyh lyakhe vaawlui zakaw umpaw ram takyh kyate beiknaw lang a zuakuh hae paw Judah hae tuh Jerusalem kya oun thua hae.⁶Tuh-e roi he accae te ccungccaw zapi tuh oun sueluakuh hae; zuitu hae nynh a ho hae paw kha mimaw bya raveihte a thae hae keiccuze mih ngaeangthua.⁷Minmin tuh ngaeangthuate mih khuaruaru zah, “Hynhte bya a ho hae paw balyn hynh Galilee hae thua khyh hae tou?⁸Pawtemou ahmaw ah thokeinaw bya raveihte ah thae oh?⁹Aening tuh Parthia hae, Media hae, Elam ram te Mesopotamia ram, Judea ram, Kappadosia ram, Pontas ram, Asia ram,¹⁰Frikia ram, Pamfilia ram, Izip ram te Libia ram kya-e Sirin pepan kya um hae paw te Rom ram kyate oun thuapaw mikhia hae, Judah hae te Judah beiknaw kalan a tee thaw hae paw,¹¹Kretan hae te Arab hae nynh ah thua oh, thuasalama hynh-e hae nynh a ho hae paw ngaeangthua lan umpaw Pachia ryalaw kong kha aening nynh ahmaw bya raveihte ah thae oh,” cite a hoku hae.¹²Minmin balyn tuh ngaeangthua thinphangte, “Hynh-e hynh paw suilan mou?” cite lu kheit te lu kheit a hokuh hae.¹³Thuasalama ccungccaw abang nynh, “E hae tuh misutui thawpaw nynh a rui hae,” cite sarisarya lante a ci hae. Peter Phunghopaw

¹⁴Thuasalama Peter nynh lu haw lae kheit hae ryte thadyn zah a roi phe ccae lante minmin a hopya hae paw tuh: “Judah ccungccaw hae, nanning te Jerusalem kya na um oh paw nae balynte hynh-e hynh nyh oh lah ka bya hynh yn ngaepya tua oh.¹⁵Pawccecize hynh-e ccungccaw hae tuh nanning nynh na tua oh hawte rui khyh hae, pawccecize atu tuh awkhua suimilan ccangtakua khaw acih ung.¹⁶E tuh profeh Joel nynh a la hosyapaw nynh thua:¹⁷‘Pachia nynh a hopaw tuh,nyathya nin kya hynhte yn cyihkuh cih.Ccungccaw balyn tungvaw kyaka Muisaw ka bu cih;nae ccapaw hae tenae ccanung hae nynhprofehbya a ho cih hae,nae paawpi hae nynhmaan a sah cih hae.¹⁸Tuin nin kya vae tuh,ka seenung hae teka seepaw hae kya heizeka Muisaw kha ka bu cih zahprofehbya a ho cih hae.¹⁹Luki lang vaawlui kyangaeangnaw hae kha ka langsah cih zahakaw lang laephi vawlan chii,maee te maeekhuh muihsahnaw haeka langsah cih.²⁰Bawipaw kya-e alesaepaw teaphu-epaw nin a thua mawkhekhuanin tuh amoh cih zahsawpaw tuh chiise lang yn tang cih.²¹Tetuh Bawipaw mina kopaw miakaw tuhkhum athua cih,’ a ci.

²²Israel ccungccaw hae, ka bya hynh ngaetua oh: naemaw nynh mah na ny oh hawte, Nazareth khuapaw Jesu tuh nanning laku kya Pachia nynh nawccawkhaepaw ccungccaw nynh thua, Pachia nynh amaw liate nanning laku kya ngaeang lan umpaw ryalaw hae, khuaruarunaw hae te muihsahnaw hae kha a langsaku.²³Pachia kya-e nytynaw te paccyn typaw khuakhannaw thyhte Jesu tuh nae kuih kalan pya athua, nanning nynh na kyng oh zah kawbya zui lei hae paw kuih te vaelantung kya na khiade oh zah phe na chia oh.²⁴Thuasalama Pachia nynh chinaw kyate thoosah zah chinaw kyate a luesah vae, pawccecize amaw tuh chinaw huhan nynh kyngde kho khyh.²⁵Pawccecize amaw konglang te David nynh a hopaw tuh:‘Bawipaw tuh ka mitmaevaw kyatyty a um; aning tuhka ranglang khe a um keiccuzepawpaw nynh mahyn piasah kho lan khyh.²⁶Tukeiccuze ka thinlung tuha lungpaw zah ka lae tuha lungtua; tuhpiaze ka pyn tuhngaehoinaw kya a hiin cih.²⁷Pawccecize ka muisaw khamichi khua kyana vuasya lan khyh zah,namaw kya-e Athyaapaw kha mahna thuhsah lan khyh.²⁸Hiinnaw laanpi kha nae nysah vae;na umnaw kyakhe kae khalungtuanaw te phe nae biasah cih,’ a ci.

²⁹“Uteno hae, aening ah minpaaw David kong hynh ccaerarih lan kae hopya tua oh. David tuh chih zah uu athua; a shawku tuh aening kya atunin cia a um.³⁰Aning tuh profeh athua keiccuze a ciihan lu kheit kha a bawitungkhung vawlan dahungsah lan Pachia nynh amaw kya bya a kinpaw kha phe a ny.³¹Hynh-e hynh muihty te, David nynh Messiah thoothuinaw kong kha,‘Aning tuh michi khua kyavuasya thua khyh,a ngesaw mah thuh khyh,’cite a ho.³²Hynh-e Jesu hynh Pachia nynh phe thoosah vae, hynh-e konglang kaening balyn tuh ccaekia hae nynh kae thua.³³Tukeiccuze aning tuh Pachia ranglang khe hangthung thua vae zah, byakinpyakupaw Thyaa Muisaw kha Paaw kyate a mue vae; atu na muih oh zah na thae oh paw hynh-e Thyaa Muisaw hynh ah tungvaw kya phe oun bu vae.³⁴Pawccecize David tuh vaawlang kae khyh; thuasalama‘Bawipaw nynh ka Bawipaw kha,“Na rhaw hae kha na ccusy langka raepya makhia tuh,ka ranglang khe dahung,”a cipya,’cite David nynh a ci.³⁶Tukeiccuze vaelantung kya na khiade oh paw Jesu ccaccei kha Pachia nynh Bawi lang te Messiah lang phe a rae vae cipaw kha Israel minphuin balyn nynh ccaerarih lan nyh oh,” cite Peter nynh a ci. Masaty Zyntu hae

³⁷Hynh-e bya hynh he a thae hae tuh, mih thinlung myarya tung zah Peter te ccangpaw locceihtu hae kha, “Uteno hae, pawmou kae cyih cih?” cite a khia hae.³⁸Peter nynh minmin kha, “Nae seinaw ngethya athua nawlan ngaesikuh oh lah, nae balyn te Jesu Khri min te baptisma in oh; tetuh Thyaa Muisaw lasung kha na mue cih oh.³⁹Pawccecize Pachia byakin tuh nanning hanlan, nae ccaaw hae hanlan te ah Bawipaw Pachia nynh a ko hae paw laansaw lang um hae paw balyn hanlan nynh thua,” a cipya hae.⁴⁰Peter nynh ccangpaw bya patae te ccaekiakhan zah, “E ahoy leipaw ciihan kyate khumnaw muetua oh,” cite thawte a hyy hae.⁴¹A bya kha a lawkuhpaw ccungccaw hae tuh baptisma a in hae; tuin nin kya ccungccaw thong thum loukaw a lungchih hae.⁴²Minmin tuh locceihtu hae ccangpyanaw kha ngae hae zah vaeccawkunaw, sanlou mangkheihnaw te sawsangnaw kha po a rae hae. Zyntu hae Hiinzia

⁴³Locceihtu hae nynh ngaeangnaw patae te muihsahnaw hae kha a rae hae keiccuze ccungccaw miakaw tuh rawri sawtuanaw a hoi hae.⁴⁴Zyntu hae balyn tuh pynkheihlan um hae zah pawpaw balyn kha a hoikheih hae.⁴⁵Mih hoipaw te mih uccaw hae kha zua hae zah ccungccaw miakaw kalan ahobou thyhte a nee hae.⁴⁶Minmin tuh beikinn kya nin takyh tungkuh hae zah mih inn kyakhe sanlou iathungkute lungtuate hysahnaw thinlung te mih looh kha leih a aekheih hae.⁴⁷Pachia kha thehoysah hae zah ccungccaw hae balyn malang maehoynaw a mue hae. Bawipaw nynh khumnaw a mue hae paw kha nin takyhte milu a lungsah chih. Ccukhoupaw Dansahnaw

¹Nin kheit tuh Peter te Johan tuh zete suimilan ccangthum sawsang ccyh lyakhe beikinn lang a cceihthung hae.²A pui takaw te a ccukhoupaw lu kheit kha oun puih hae; beikinn lungkhu lang a tee hae paw kha phua ngiaku khylan ‘Puithya’ a ci hae paw sakoih pe khe tuh-e paw tuh nin takyh leih a nung hae.³Beikinn lungkhu lang tee lan a cih vae hae paw Peter te Johan kha tuh-e paw nynh he a muih hae tuh, ‘Yn pyabua oh,’ cite a ngiaku hae.⁴Peter te Johan nynh tuh-e paw tuh riri do hae zah, “Kaening hynh oun dotua,” a cipya.⁵Aning nynh minmin kyate ccangkhakheit ka mue vae cih cite ngaehoite minmin kha a do hae.⁶Peter nynh, “Phua te sui ka hoi khyh; thuasalama ka hoipaw kha kae pya; Nazareth khuapaw Jesu Khri min te thokuh lah cceih,” a cipya.⁷A ranglang kuih te kyng zah a tho; te vaekheihmawte a ccu te a ccumali hae tuh thawzung a mue hae.⁸Aning tuh thohkuh zah a thadyn, te cceih zah minmin ryte beikinn lungkhu lang a tee hae; laanpi cciate, thohkute Pachia kha the a hoysah.⁹Tuhte ccia biate Pachia thehoysah te a umpaw kha ccungccaw balyn nynh a muih hae.¹⁰Minmin nynh aning tuh beikinn kya-e Puithya Sakoihzung khe phua ngiaku lan leih a dahungpaw nynh thua cipaw a ny hae, a tungvaw kya acyikuhpaw kong kha mih khuaruaru zah mih ngaeangthua.

¹¹Tuh-e paw nynh Peter te Johan kyakhe phang a bekuh tuh ccungccaw balyn nynh myarya mih ngaeangthua zah minmin a umnaw hae Solomon Maepaw a ci hae paw maepaw langkhe a ccue hae.¹²Tuh-e tuh Peter nynh he a muih tuh ccungccaw hae kha, “Israel hae, pawccemou hynh-e hynh nae ngaeangthua? Hynh-e paw hynh kaemaw thungnaw te, Pachia phe kae zyn keiccuze kae cciasah khopaw hawte pawccemou mitvoh leite nae do oh?¹³Abraham, Isak te Jakob Pachia, ah minpaaw hae Pachia nynh a Ccapaw Jesu kha a phu-esah vae; nanning nynh tuh-e Jesu tuh Pilat kuih kalan na pya oh zah, Pilat nynh luesah lan he a noukuh tuh nanning nynh luesah lan phe na ei oh.¹⁴Nanning nynh Athyaapaw te Adingpaw kha na vua oh zah ccungccaw theihpaw kha nae kalan sawpya lan na ngiaku oh.¹⁵Pachia nynh chinaw kyate a thoosahpaw hiinnaw Bawipaw kha na chia oh. Tuh-e konglang te kaening tuh ccaekia hae nynh kae thua.¹⁶Jesu min zynnaw liate tuh-e Jesu min nynh na muih oh zah na ny oh paw hynh-e paw hynh a thawsaesah. Jesu zynnaw nynh hynh-e paw hynh nae balyn malang accingpaw dannaw kha a pya.

¹⁷“Uteno hae, na ny khyh oh keiccuze nae uktu hae nynh a cyi hae hawte hynhte na cyibua oh cipaw ka ny.¹⁸Thuasalama langmaw lyaze Pachia nynh Messiah tuh a teing cih cite a profeh hae balyn kyate a hoty vae paw kha hynhte a ccingsahpaw nynh thua.¹⁹Tukeiccuze nae seinaw kha ngaethya athua nawlan ngaesikuh oh lah Pachia kalan paleihkuh oh;²⁰tuhteze nynh Bawipaw kyate thawzung thawsahnaw ccyh yn thua cih zah nanning hanlan a poty vae paw Jesu Khri kha nae kalan yn saw cih.²¹Laephi thotakaw te Pachia nynh athyaapaw a profeh hae munglae kyate a ho vae paw uccaw balyn kha athaw lante raenaw ccyh athua mawlaezung Jesu tuh vaawlang khua kya a um cih.²²Pawccecize Moses nynh ah minpaaw hae kyakhe, ‘Bawipaw nae Pachia nynh kamaw yn lopaw profeh lu kheit kha naemaw minphuin kyate nae hanlan yn pousah cih; aning nynh ae hopya oh paw miakaw kha na la ngae cih oh.²³Tuh-e profehbya a ngae leipaw miakaw tuh Pachia minphuin kyate vua athua cih,’ a cipya hae.²⁴Profeh Samuel kyate tho zah amaw koute oun thua hae paw profeh hae balyn nynh mah hynh-e nin hae kong hynh a hoty hae.²⁵Nanning tuh profeh hae ciihan nynh na thua oh, Pachia nynh Abraham kha, ‘Na ciihan liate laephi vaw e minphuin balyn tuh hythuanaw a ccou cih hae,’ cite hopah zah, nae minpaaw hae kya a la raepaw byakinnaw te asekuh hae paw nynh na thua oh.²⁶Nanning milu raveih nynh nae hoyleinaw kyate na paleihkuh oh zah hythuanaw na ccou nawlan oh, Pachia nynh a Ccapaw Jesu kha thoosah zah masaty nae kalan yn saw,” cite Peter nynh a hopya hae. Peter te Johan Thongsaw hae

¹Peter te Johan nynh ccungccaw hae kya a hopya lya hae khe ranpibawi hae, beikinn ngawtu bawi te Sadusi hae tuh oun thua hae,²locceihtu hae nynh ccungccaw hae kha ccangpah hae zah Jesu kong a honaw hae kyakhe chinaw kyate thoothuinaw kong a ho hae keiccuze tuh-e hae tuh myarya mih lungvawsaw.³Tukeiccuze locceihtu hae kha kyng hae zah khua azi vae keiccuze awkhualan cia thong a saw hae.⁴Tuhzemah mih phunghopaw a thaepaw ccungccaw patae nynh a zyn hae; tuhte a zyn hae paw tuh milu lante thong pangaw loukaw acih hae.

⁵Awkhualan khe uktu hae, piccan hae, kawbya sazae hae,⁶ranpibawi lupi Annas, Kaiafas, Johan, Alexanda te ranpibawi ciihan hae balyn tuh Jerusalem kya a tungkuh hae.⁷Minmin nynh Peter te Johan kha angaelung kya nung hae zah, “Paw thungnaw te mou, tuhkhyhze hum min liate mou hynh-e hynh na cyi oh?” cite a khia hae.⁸Peter tuh Thyaa Muisaw te phe beih zah minmin kha, “Ccungccaw uktu hae te piccan hae,⁹a ccukhoupaw ccungccapaw hanlan kae raepaw ahoypaw ryalaw keiccu thuasah, aning tuh pawtemou a dan cipaw keiccu thuasah atunin akaw-aleih bya nae khia oh athua ze,¹⁰nanning nynh vaelantung kya na khiade oh zah Pachia nynh chinaw kyate a thoosahpaw Nazareth khuapaw Jesu Khri min liate hynh-e ccungccapaw tuh nanning malang ngedante a thadyn cipaw hynh nanning balyn te Israel hae balyn nynh nyh oh.¹¹Jesu kong kha Ccathyaa nynh,‘Inn saktu hae nanning nynhna nuee oh paw lung tuhapaki lang e abyapi huapawlung lang yn tang,’ a ci.

¹²Mingccangpaw kya khumnaw um khyh; pawccecize vaawlui zakaw e ccungccaw hae kya aening oun khum kho lanpaw ccangpaw min um khyh,” cite a hopya hae.

¹³Minmin nynh Peter te Johan kya-e rawthungnaw kha muih hae zah minmin tuh ccawthya lei hae paw, ccungccaw huataw hae cipaw kha he a nyh hae tuh mih ngaeangthua. Minmin lu ning tuh Jesu ban hae cipaw kha bua a nythui hae.¹⁴Dansah athuapaw ccungccapaw nynh mih pe kya phang a thadynpaw kha a muih hae tuh, rawsenaw byaho ngan vae khyh hae.¹⁵Tukeiccuze locceihtu hae kha kungsi zung kyate pousah hae zah mimaw lalouhte bya a hokuh hae.¹⁶“E ccungccaw hae hynh pawte ah cyih cih oh? Minmin nynh raerae alangkuhpaw muihsahnaw kha a rae hae cipaw tuh Jerusalem kya um hae paw balyn nynh ccaerarih lan a ny vae hae; aening nynh tuh-e tuh ah ei kho vae khyh oh.¹⁷Thuasalama tuh-e tuh ccungccaw hae laku kya houh a pazaeku khyh nawlan, hynh-e min te hum sanmah a hopya vae khyh ccaw hae thawte khee oh sih,” cite a hoku hae.¹⁸Minmin nynh locceihtu hae kha ko hae zah Jesu min te kharouh a ho khyh nawlan hae te a ccangpya khyh nawlan hae kaw a pya hae.¹⁹Thuasalama Peter te Johan nynh, “Pachia kawngae laeze nanning kawngae hua lanpaw tuh Pachia malang akyh cih tou, kyh lan khyh tou cipaw naemaw nynh byapia oh;²⁰pawccecize kaening tuh kae muihpaw te kae thaepaw kong kha ho leite kae um kho khyh,” cite a khung hae.²¹Minmin nynh locceihtu hae tungvaw detahnaw lanpaw pawsang a muih khyh hae keiccuze huraw hae zah a cciasah hae. Pawccecize tuh-e acyikuhpaw hanlan ccungccaw balyn nynh Pachia kha the a hoysah hae keiccu nynh thua.²²Hynh-e dannaw muihsahnaw a raepya hae paw ccungccapaw tuh kum sung pali lae acih vae. Zyntu hae Sawsangnaw

²³Peter te Johan tuh a lue kou hae te, mih ban hae kalan cceih hae zah ranpibawi lepaw hae te piccan hae nynh a hopya hae paw balyn kha a thaesah hae.²⁴Minmin nynh tuh-e bya he a thae hae te, Pachia kalan pynkheihlan roisaw hae zah, “Bawipaw, nang tuh vaaw te laephi te rili te tuh-e hae kya umpaw miakaw a raetupaw nynh na thua.²⁵Thyaa Muisaw kha mangte na ryalahtu kae minpaaw David kyate bya na ho zah:‘Pawccemou minphuin hae nynhmih bungpaw zahccungccaw hae nynhaccakaepaw kha a paccyn hae?²⁶Laephi siapharan hae nynhthadyn hae zah uktu hae nynhBawipaw te a Messiah kharawsete a pumnuaku hae,’ na ci.

²⁷Pawccecize Herod, Pontias Pilat, Zenta hae te Israel hae nynh chitui na thuh vae paw Athyaapaw na Ccapaw Jesu kha dou khylan hynh-e khua kya a pumnuaku hae,²⁸na kuih te cyi lan na paccyn vae paw te na la khyaty vae paw miakaw kha ccingsah khylan tuhte a cyi hae paw nynh thua.²⁹Pou Bawipaw, atu minmin kya-e hurawnaw hynh dotua. Na ryalahtu hae nynh na bya hynh rawhoyte kae ho kho nawlan rawthungnaw oun pyatua.³⁰Ccinaw dansah khylan na kuih yn dyngtua, athyaapaw na Ccapaw Jesu min te muihsahnaw hae te ngaeangnaw hae kha rae khonaw beih oun pyatua,” cite saw a sang hae.³¹Saw a sang kou hae te, a sueluakunaw hae inn tuh ahy; te minmin balyn tuh Thyaa Muisaw te beih hae zah Pachia bya kha rawhoyte a ho hae. Zyntu hae Uccaw Hoikheihnaw

³²Zyntu hae balyn tuh thinlung ccangkheit te tuanaw ccangkheit kyalya hoi hae zah hum nynh sanmah a uccaw hankhakheit kha ka uccaw nynh thua ci vae khyh; a hoi hae paw uccaw miakaw kha a mangkheih hae.³³Locceihtu hae nynh Bawipaw Jesu thoothuinaw kong kha myarya lepaw thungnaw huhan te ccaekiakhan hae zah myarya lepaw thawccinaw tuh mih balyn tungvaw kya a um.³⁴Minmin kya ahoboupaw ccungccaw lu kheit san um khyh; pawccecize laephi hoi hae paw te inn hoi hae paw nynh tuh-e hae tuh zua hae zah, a zuanaw hae mee phua kha oun ccyng hae zah,³⁵locceihtu hae cculeihpaw khe a pum hae; te lukhakheit hanlan ahobou thyhte ccungccaw miakaw kha a nee hae.³⁶Locceihtu hae nynh Barnabas cite minphu hae paw, Saipras ram e Levi ciihan athuapaw Josef nynh³⁷a hoipaw laephi kha zua zah a zuanaw mee phua tuh yn ccyng zah locceihtu hae cculeihpaw khe a nung. (Barnabas cipaw tuh ‘Thawzung pyanaw ccapaw’ cipaw nynh thua.) Ananias te Safira

¹Thuasalama Ananias a ci hae paw ccungccapaw te a zu Safira nynh a hoi hae paw uccaw kha zua hae zah²amee abang kha a zu mah a nyhbua lante a nungku, te abang kha yn ccyng zah locceihtu hae cculeihpaw khe a nung.³Peter nynh, “Ananias, pawccemou na thinlung kha Satan na uksakuh zah laephi na zuanaw mee phua abang kha nungkute Thyaa Muisaw tuh na ling?⁴Tuh-e laephi tuh na zua maw lya namaw kya-e thua khyh tou? Na zua koute mah namaw kaw khya khyh tou? Pawccemou hynhte cyi lanpaw hynh na thinlung kya na tuaku? Ccungccaw na lingpaw thua leite Pachia na lingpaw nynh thua!” a cipya.⁵Ananias nynh hynh-e bya he a thae tuh khuliakuh zah a chih; hynh-e kong a thae hae paw ccungccaw balyn tuh myarya a rih hae.⁶Ccangvae hae nynh thokuh hae zah a rhua kha a lung kou hae te poukhae hae zah a uu hae.

⁷Suimilan ccangthum loukaw aro koute a zu tuh pawte nynh acyiku cipaw ny leite yn tee.⁸Peter nynh, “Nae zuvaw te laephi kha hynhzeih mawte tou na zua oh? Yn hopya tua,” a cipya. Aning nynh, “Athua, hynhzeih mawte nynh kae zua,” a ci.⁹Peter nynh, “Bawipaw Muisaw kha syntawtua khylan pawtemou hynhte nae lung aloku? Dotua, na vawpaw a uh hae paw mih ccu tuh thuakawzung nynh a um ung, nang kha mah ae puihbua cih hae,” a cipya.¹⁰Safira tuh Peter cculeihpaw khe vaekheihmawte khuliakuh zah a chih; te ccangvae hae nynh oun tee hae zah a chipaw kha he a muih hae tuh cciakhae hae zah a vawpaw pe khe a uubua hae.¹¹Khriccaawbuu balyn te hynh-e kong a thae hae paw balyn tuh myarya a rih hae. Patae A Dansah hae

¹²Locceihtu hae nynh ccungccaw hae kya muihsahnaw te ngaeangnaw patae kha a langsaku hae. Minmin balyn tuh Solomon Maepaw kya a sueluakuh hae.¹³Tuhlaepaw hum ccungccaw sanmah minmin kalan pykuh bua ngan khyh hae; thuasalama ccungccaw hae nynh minmin kha myarya saw a tua hae.¹⁴Tuhzemah Bawipaw a zynpaw nopi, pise hae tuh patae oun lungchih hae.¹⁵Peter nynh po yn ccia vae ze a mynlyh nynh ngeccih hae abang sankaw kha a khaw ccaw hae cite ngeccih hae kha laanpi lang oun cciakhae hae zah ikhung te iphae vawlan a nung hae.¹⁶Jerusalem pepan e khua hae kyate ccungccaw zapi mah oun sueluakuh hae zah ngeccih hae te athyaa leipaw muisaw hae nynh vawsaw pya hae paw kha oun thuakhae hae zah, mih balynte marya a dan hae. Locceihtu hae A Tuaa A Sah hae

¹⁷Ranpibawi lupi te amaw ryte a umkheih hae paw Sadusi hae balyn tuh myarya mih eiung keiccuze thokuh hae zah,¹⁸locceihtu hae kha kyng hae zah ranzae thonginn kya a saw hae.¹⁹Thuasalama khuazi khe Bawipaw vaawpaw nynh thonginn thuakaw hae kha hung zah minmin kha poukhae hae zah,²⁰“Cceih oh, beikinn kya thadyn oh lah hynh-e hiinnaw bya balyn hynh ccungccaw hae kya la hopah oh,” a cipya hae.²¹Minmin nynh tuh-e bya he a thae hae te, awkhua takaw khe beikinn lungkhu lang tee hae zah a ccangpya hae. Ranpibawi lupi te amaw ryte a umkheih hae paw nynh oun thua hae zah kungsi hae te Israel piccan hae balyn kha a ko hae; te locceihtu hae kha mih kalan cciakhae khylan ccungccaw hae kha thonginn lang a saw hae.

²²Thuasalama beikinn ngawtu hae nynh thonginn kya he a thua hae tuh locceihtu hae kha muih vae khyh hae; tukeiccuze ki hae zah,²³“Thonginn tuh khyndadyh lan toh khawkuh zah thonginn a ngawtu hae mah thuakaw kya a thadyn hae paw kha kae muih; thuasalama thuakaw he kae hung tuh a lungkhu kya hum sanmah kae muih khyh,” cite a hopya hae.²⁴Atu ranpibawi lupi, beikinn ngawtu lupi te ranpibawi lepaw hae nynh tuh-e kong he a thae hae tuh, pawvema yn cyihkuh cih cite mih ngaeangthua.²⁵Ccungccaw lu kheit yn thua zah, “Dotua oh, nanning nynh thonginn kya na saw oh paw ccungccaw hae tuh beikinn kya thadyn hae zah ccungccaw hae kha a ccangpya hae!” cite a hopya hae.²⁶Tetuh beikinn ngawtu lupi tuh beikinn ngawtu hae ryte cceih hae zah locceihtu hae kha reih-i-reih-ae nung leite a cciakhae hae; pawccecize ccungccaw hae nynh lung te oun deihsei cih hae cite a rih hae.

²⁷Minmin kha cciakhae hae zah kungsi hae malang khe a thadynsah hae. Te ranpibawi lupi nynh,²⁸“Hynh-e paw min te na ccangpah lan khyh oh cite tynkaring lan kaw kae pya khyh oh tou? Thuasalama nae ccangpyanaw kha Jerusalem kya phe na biasah oh zah hynh-e ccungccapaw chii hynh kae tungvaw kya thuasah lan na paccynku oh!” a cipya hae.²⁹Peter te ccangpaw locceihtu hae nynh, “Ccungccaw bya laeze Pachia bya hynh kae ngaehua cih.³⁰Nanning nynh thing vawlan na sae oh zah na chia oh paw Jesu kha aening ah minpaaw hae Pachia nynh phe thoosah vae.³¹Israel hae kha ngaesikunaw te seingaethyanaw pya khylan Pachia nynh amaw kha Cciakhaetu te Khumtu lang khang zah a ranglang khe phe a hangthung vae.³²Kaening tuh hynh-e uccaw hae konglang a ccaekia hae nynh kae thua; Pachia nynh amaw kaw a ngaepaw ccungccaw hae kalan a pya hae paw Thyaa Muisaw mah ccaekia nynh athuabua,” a cipya hae.

³³Tuh-e bya a thae hae tuh, mih bungpaw zah minmin kha chia lan a ry hae.³⁴Ccungccaw hae balyn nynh sawtua hae paw, kawbya sazae, Gamaliel a ci hae paw Farasipaw nynh kungsi kya thadyn zah locceihtu hae kha atolang sosoh pousah lan kaw a pya hae.³⁵Ccungccaw hae kha, “Israel hae, hynh-e ccungccaw hae tungvaw cyi lan na paccyn oh paw hynh hoyte tuakuh oh.³⁶Pawccecize anulang lya Theudas a ci hae paw nynh yn langkuh zah amaw te amaw kha ccungccaw huataw ka thua khyh cite hokuh zah ccungccaw za pali loukaw nynh a zui hae. Amaw kha theih hae zah a zuitu hae balyn tuh pong phiakuh hae zah phe zo hae.³⁷Tuh-e paw koute milu ccazing law ccyh lyakhe Judas a ci hae paw Galilee paw tuh yn langkuh zah ccungccaw patae kha a nulang a zuisahku hae, aning mah phe chih zah amaw a zui hae paw balyn mah pong phiakuh hae.³⁸Tukeiccuze atu nanning kha kae hopya oh, hynh-e ccungccaw hae hynh sibia oh lah, mimaw um lan um hae sah; pawccecize hynh-e khuakhannaw te hynh-e ryalawnaw hynh ccungccaw hae kya-e athua ze azo cih.³⁹Thuasalama Pachia kya-e athua zetuh na roh kho lan khyh oh; naemaw kha Pachia a rawsetu hae lang poh nae tangsei oh zya!” a cipya hae. Minmin nynh Gamaliel bya tuh mih nawccah.

⁴⁰Minmin nynh locceihtu hae kha ko hae zah a bua kou hae te, Jesu min te phung na ho vae lan khyh oh cite kawpya hae zah a cciasah hae.⁴¹Locceihtu hae tuh Jesu min hanlan maethyanaw teing lan angaekuh hae cite oun tua hae cikuh hae zah kungsi hae kyate lungtuate a pou hae.⁴²Beikinn kya te inn hae kyakhe nin takyh apaekuh lei lan ccangpah hae zah Jesu tuh Messiah nynh thua cite a ho hae. Lu Sari A Po hae

¹Tuh ccyh lyakhe zuitu hae he oun lungthung hae tuh, Grik bya a hopaw Judah hae nynh Judah bya a hopaw Judah hae kha a ccohnuaku hae; pawccecize Grik bya a hopaw Judah hae kya-e nomae hae kha nin takyh looh pyanaw kya pyabua khyh hae cite a ccohnuaku hae.²Locceihtu lu haw lae ning nynh zuitu hae balyn kha ko hae zah, “Kaening nynh Pachia bya hynh cciataw te ccaboi kya loohdangpaw rya hynh kae law lan ccan khyh.³Tukeiccuze uteno hae, thehoy ccou zah Thyaa Muisaw te hawnaw te a beihpaw ccungccaw lu sari kha po oh lah, hynh-e ryalaw lan ah khang cih oh.⁴Thuasalama kaening tuh sawsangnaw te Pachia bya hopaw rya hynh po kae lah cih,” a cipya hae.⁵Tuh-e bya tuh ccungccaw zapi balyn nynh mih lungrythua zah, zynnaw te Thyaa Muisaw te a beihpaw Stefen, Filip, Prokhoras, Nikanor, Timon, Parmenas te Antiok khuapaw Judah beiknaw kalan a paleihkuhpaw Nikolas kha a po hae.⁶Minmin kha locceihtu hae malang khe a nung hae, te locceihtu hae nynh sawsangpah hae zah mih kuih kha tuh-e hae tungvaw a khang hae.

⁷Pachia bya tuh houhouh pazaekuh zah zuitu hae tuh Jerusalem kya myarya a lungthung hae; ranpibawi hae patae nynh tuh-e zynnaw tuh a pombua hae. Stefen A Kyng hae

⁸Stefen tuh zynnaw te thungnaw te phe a beihpaw thua zah myarya lepaw ngaeangnaw te muihsahnaw kha ccungccaw hae kya a langsaku.⁹‘A lue hae paw kya-e Sinakok’ a ci hae paw kya-e Sairin hae, Alexandria hae, Silisia ram te Asia ram e ccungccaw hae abang tuh Stefen ryte bya a eikuh hae.¹⁰Tuhzemah Muisaw nynh Stefen kha hawnaw a pya keiccuze a hopaw kha minmin nynh ei kho khyh hae.¹¹Tetuh, “Hynh-e paw nynh Moses te Pachia saryanaw bya a hopaw kha kae thae,” cite a ho lanpaw ccungccaw abang kha minmin nynh aruh lante a soih hae.¹²Minmin nynh ccungccaw hae, piccan hae te kawbya sazae hae kha a tuhou hae; tetuh Stefen kha kyng hae zah kungsi malang a thuakhae hae.¹³Minmin nynh ahme leipaw ccaekia hae kha konua hae zah tuh-e hae nynh, “Hynh-e paw nynh hynh-e athyaapaw hmin te Kawbya saryanaw bya kha palei a ho;¹⁴pawccecize, ‘Nazareth khuapaw hynh-e Jesu nynh hynh-e hmin hynh yn roh cih zah Moses nynh aening oun pyapaw phungbya kha yn rulae cih,’ cite hynh-e paw nynh a hopaw kha phe kae thae,” a ci hae.¹⁵Kungsi zung kya a dahung hae paw balyn nynh Stefen kha riri do hae zah a maesue tuh vaawpaw maesue hawte a muih hae. Stefen Byaliarunaw

¹Ranpibawi lupi nynh, “Tuh-e bya tuh tuhte athua tou?” cite a khia.²Stefen nynh khung zah:
“Uteno hae te paaw hae, la ngaetua oh: Ah minpaaw Abraham nynh Haran kya a um maw, Mesopotamia ram kya a um lyaze phu-enaw Pachia nynh a kya yn langkuh zah,³‘Na umnaw ram te na puizia hae kha cciataw hae lah kae muihsah cih paw ram langkhe cceih,’ a cipya.⁴Abraham nynh Kaldia ram kha cciataw zah Haran kya a um; a paaw a chih koute atu nanning na umnaw oh hynh-e ram kalan hin Pachia nynh a nuesaku.⁵E ram kya ccuphe lyh sanmah Pachia nynh amaw kha rho lang pya khyh; tuhzemah ccaaw lu kheit san a saah mawze amaw te a ciihan hae hanlan e ram hynh rho lang kae pya cih cite Pachia nynh bya a kinpyaku vae.⁶Pachia nynh hynhte a ho: A ciihan hae tuh ramccang lang a um cih hae, te minmin tuh seetangnaw kalan cciakhae athua cih hae zah kum za pali lungkhu a tuaasah cih hae.⁷‘Minmin nynh rya a lawpya hae paw minphuin kha bya ka pia cih; tukoute tuin ram kyate a pou cih hae zah hynh-e hmin kya kamaw kha yn beik cih hae,’ cite Pachia nynh a ho.⁸Pachia nynh vingdungawkunaw te asekuhpaw byakinnaw kha Abraham kalan a pya. Tukeiccuze Abraham nynh Isak kha saah zah nin taryanaw nin kya vingdung a awpya; te Isak nynh Jakob a saah, Jakob nynh ciihan kyaze paaw hae lu haw lae ning kha a saah.

⁹“Ciihan kyaze paaw hae nynh eiungnaw hoi hae zah Josef kha Izip ram lang a zua hae; thuasalama Pachia tuh Josef kya um zah,¹⁰a vawsawnaw balyn kyate luesah zah Izip siapharan Faro malang maehoynaw te hawnaw kha a pya; Faro nynh Izip ram uktu lang te a innbyn balyn a uktu lang Josef kha a khang.¹¹Izip ram balyn te Kanaan ram balyn kya ccakannaw te myarya lepaw vawsawnaw um zah, ah minpaaw hae tuh looh muekuh kho vae khyh hae.¹²Thuasalama Jakob nynh Izip ram kya looh a um cipaw he a thae tuh, ah minpaaw hae kha masaty a saw hae.¹³Vaeningnaw kya Josef nynh a u hae kha a nysaku hae; Faro nynh mah Josef a puizia hae kha a ny hae.¹⁴Josef nynh a paaw Jakob kha byataw zah a puizia hae balyn sung sari lu pangaw kha amaw kalan a kobua hae.¹⁵Jakob tuh Izip ram lang a cceihbung. Tuin kyakhe Jakob te ah minpaaw hae tuh a chih hae.¹⁶Minmin kha Shekhem khua lang cciakhae hae zah Shekhem kya umpaw Hamor a ccaaw hae kya-e Abraham nynh phua te a repaw shawku kyakhe a uu hae.

¹⁷“Thuasalama Pachia nynh Abraham kya bya a kinpyakupaw accingnaw ccyh he anae tuh tuh-e ccungccaw hae tuh Izip ram kya pungthung hae zah,¹⁸Josef kha a nyh leipaw ccangpaw siapharan alangkuh cia a lungthung hae.¹⁹Tuh-e paw nynh aening ah minphuin hae kya thyaruhnaw hoi zah mih ccaaw taraw hae kha a chi ccaw hae cite ccaring vua lan ah minpaaw hae kha a nangse hae.²⁰Tuh ccyh lyatuin myarya puithyapaw Moses tuh pui zah a paaw inn kya sah thum cia a kua hae.²¹Aning kha he a vua hae te, Faro ccanung nynh khuinkuh zah a ccapaw lang a kuaku.²²Moses tuh Izip ccungccaw hae kya-e hawnaw balyn kha marya ccangkuh zah byahonaw kya te ryalawnaw kya a thungpaw nynh thua.

²³“Moses tuh kum sung pali he accing te, Israel ccungccaw hae a uno hae kalan pae rynaw thinlung yn hoi.²⁴A unopaw lu kheit kha Izip paw nynh a tuaa a sahpaw kha he a muih tuh, pankhaw zah a hanlan phulawpya te Izip paw kha phe a buatheih.²⁵Pachia nynh amaw kha mangte minmin kha oun luesah cih hae cipaw tuh a uno hae nynh mang a thaethya cih hae cite Moses nynh a tuaku; thuasalama minmin nynh thaethya khyh hae.²⁶Awkhualan mimaw te mimaw a pekuh hae paw kalan khe cceih zah, ‘Uteno hae, nanning tuh uteno khaw na thua oh, pawccemou naemaw te naemaw na peku oh?’ cite a ccawku nawlan hae a hopia hae.²⁷Thuasalama a innpaw paw kha atazae leite a cyihtupaw nynh Moses kha ccaring tu zah, ‘Hum nynh mou nang hynh kaening tungvaw uktu lang te byapiatu lang ae nung?²⁸Inkhawnin Izip paw na chia hawte kae hynh chia lan tou nae ry?’ a cipya.²⁹Tuh-e bya tuh Moses nynh he a thae te, ccue zah Midian ram kyakhe mikhiapaw lang a tang, tuin kya ccapaw lu ning a saah.

³⁰“Kum sung pali he aro tuh Sinai mua kin ramkaw e thabu kya aruapaw maeesoi kyakhe Bawipaw vaawpaw tuh Moses kalan yn langkuh.³¹Tuh-e tuh Moses nynh he a muih tuh, a ngaeangthua zah a pe langte do lan cite he a naekuh tuh Bawipaw kyate roi nynh a kalan yn ccae zah,³²‘Kae tuh na minpaaw hae Pachia, Abraham Pachia, Isak Pachia te Jakob Pachia nynh ka thua,’ a cipya. Moses tuh thyngkuh zah do ngan vae khyh.³³Bawipaw nynh, ‘Na phanah kha na ccu kyate khahkuh, pawccecize na thadynnaw hmin tuh athyaapaw laephi nynh thua.³⁴Izip ram e ka ccungccaw hae riathaenaw kha phe ka muih ccaccing vae, mih siaruanaw roi kha ka thae zah minmin kha luesah khylan nynh kae rungbung; atu rang lah nang kha Izip ram lang kae saw cih,’ a cipya.

³⁵“ ‘Hum nynh mou nang hynh uktu lang te byapiatu lang ae nung,’ cite minmin nynh a vua hae paw tuh-e Moses ccaccei kha Pachia nynh thabu kya yn langkuhpaw vaawpaw liate uktu lang te luesahtu lang a sawpaw nynh thua.³⁶Aning nynh Israel ccungccaw hae kha poukhae hae zah Izip ram, Rili Se te ramkaw kyakhe kum sung pali lungkhu ngaeangnaw te muihsahnaw kha a langsahpya hae.³⁷‘Pachia nynh nae uno hae kyate kamaw alopaw Profeh lu kheit kha nae hanlan yn pousah cih, amaw bya kha na ngae cih oh,’ cite Israel hae kya a hotupaw tuh hynh-e Moses nynh thua.³⁸Aning tuh ramkaw kya a sueluakuh hae paw Israel hae kya thuasah, Sinai mua kya amaw kalan bya a hopahpaw vaawpaw ryte thuasah, aening ah minpaaw hae ryte thuasah a la umkheih hae paw nynh thua; aning tuh aening kalan pya lanpaw ahiinpaw bya kha a muepaw nynh thua.³⁹A bya kha ah minpaaw hae nynh la ngae ry khyh hae; amaw kha vua hae zah mih thinlung kyate Izip ram lang bua a ki ry hae,⁴⁰Aaron kyakhe, ‘Kae malang a cceih lanpaw pachia hae kha oun raepah; Izip ram kyate oun cciakhaepaw hynh-e Moses tungvaw kya pawmou acyikuh cipaw kae nyh vae khyh,’ cite a hopya hae.⁴¹Tuh ccyh lyakhe minmin nynh vaetuataw kha raekuh hae zah tuh-e zohtuh kalan khe silawkunaw a rae hae. Mimaw mih kuih te a raeku hae paw kyakhe mih lungpaw.⁴²Pachia nynh minmin kha maetawkuh hae zah vaawlang e uccaw hae kha beik khylan a vua vae hae. Profeh hae ccauh kyaze,‘Pou Israel hae, nanning nynhramkaw kya kum sung pali lungkhuna chia oh paw sahiin hae tesilawnawpaw hae khakamaw kalan nae pya oh zawtou?⁴³Moloh pachia bu tenae pachia Refan kya-e awsi,beik lan na raeku oh pawzohtuh hae kha na phuku oh;tukeiccuze kae mah nanning khaBabilon khuapi khunglangkae nue cih oh,’cite azeiku hawte nynh athua.

⁴⁴“Aening ah minpaaw hae nynh ramkaw kya a um lya hae khe, Pachia tuh kae kya a um cinawpaw ccaekia lang beikbu a la hoi hae; tuh-e beikbu tuh Pachia nynh Moses a hopya hawte, Moses nynh a muihpaw pungsan thyhte a sakpaw nynh thua.⁴⁵Pachia nynh mih malang te a deepya hae paw ccangpaw minphuin hae ram kha ah minpaaw hae nynh he a ccou hae te, tuh-e beikbu tuh Joshua ryte a teekhae hae. Tuh-e beikbu tuh David she kyacia tuin kya po a um.⁴⁶David tuh Pachia kya-e maehoynaw kha mue zah Jakob Pachia a umnaw lanpaw inn saknaw kaw kha Pachia kalan a ngia.⁴⁷Thuasalama Solomon nynh Pachia hanlan beikinn kha a sak.⁴⁸Tuhzemah Ahang Huaccepaw Pachia tuh kuih te raepaw beikinn kya um khyh;⁴⁹‘Vaawlang tuhka bawitungkhung thua zahlaephi tuh ka ccu synaw nynh thua;pawcihawpaw inn mounae sakpah cih oh?Bawipaw nynh a ci.Tuhkhyhze ka haeungnaw hmin tuhpawcihawpaw mou athua?⁵⁰E hae balyn tuh ka kuih teka raepaw thua khyh tou? a ci,’cite profeh nynh a ho hawte nynh thua.

⁵¹“Nae lungkhung zah thinlung kya te nakaring kya vingdungawkuh lei hae paw ccungccaw hae, Thyaa Muisaw kha palei na rawse oh; nae minpaaw hae nynh a cyi hae hawte na cyibua oh.⁵²Nae minpaaw hae nynh profeh hum kha mou tuaasah leite a nung hae? Adingpaw Ccungccapaw yn thuanaw lanpaw kong a hopah ty hae paw kha minmin nynh a chia hae; atu nanning tuh tuh-e Adingpaw a pheetu hae te a theihtu hae nynh na thua oh.⁵³Nanning tuh vaaw hae paccynpyanaw liate kawbya kha na mue oh zemah na zui khyh oh,” a ci. Stefen kha Lung te Deihnaw

⁵⁴Minmin nynh hynh-e bya kha he a thae hae tuh, mih bungpaw zah Stefen kha mih hawzynua hae.⁵⁵Thuasalama Stefen tuh Thyaa Muisaw te phe beih zah vaawlang khe riri dothung zah Pachia phu-enaw te Pachia ranglang a thadynpaw Jesu kha a muih.⁵⁶Stefen nynh, “Dotua oh, vaawlang ahungkuhpaw te Ccungccaw Ccapaw nynh Pachia ranglang a thadynpaw kha ka muih!” a ci.⁵⁷Minmin nynh mih nakaring kha mih kuih te huhkuh hae zah thawte sia hae zah Stefen kha a ccuenua hae.⁵⁸Khuapi atolang khe sue hae zah lung te a deih hae; ccaekia hae nynh mih boeining hae kha Saul a ci hae paw ccangvaepaw cculeihpaw khe a pum hae.⁵⁹Lung te a deih lya hae khe Stefen nynh sawsang zah, “Bawipaw Jesu, ka muisaw hynh yn lawpah,” a ci.⁶⁰A ccukharutung zah, “Bawipaw, mih seinaw hynh beih ccuinpah nan hae,” cite thawte a sia. Tuhte a ho koute a chih. Saul nynh Khriccaawbuu A Tuaasah

¹Stefen a chianaw hae kya Saul mah a nawccahbua. Tuin nin kya Jerusalem a umpaw khriccaawbuu tuh myarya ccihpaw tuaasahnaw kha a teing; locceihtu hae holeite zyntu hae balyn tuh Judea ram te Samaria ram kya phiariphiarae pong a um hae.²Beiknaw lang a zuakuh hae paw nynh Stefen kha uh hae zah a hanlan thawmawte a rah hae.³Saul nynh khriccaawbuu kha a ro, inn takyh kalan teenua hae zah nopi pise ci leite sue hae zah thonginn kya a saw hae. Samaria kya Thehoypaw Ho hae

⁴Phiariphiarae um hae paw nynh hmin takyh lang cceih hae zah Pachia bya kha a ho hae.⁵Filip tuh Samaria khuapi lang cceihbung zah Messiah kong kha a hopya hae.⁶Ccungccaw zapi nynh thae hae zah Filip nynh a langsakupaw muihsahnaw hae kha he a muih hae tuh, a hopaw bya kha hoyte a ngae hae.⁷Pawccecize athyaa leipaw muisaw bahkuhpaw ccungccaw patae lungkhu kyate athyaa leipaw muisaw hae tuh raerae sia hae zah a pou hae; kuihccu chihpaw patae te ccukhou hae patae tuh a dan hae.⁸Tuh-e khuapi kya myarya lepaw lungtuanaw a um.

⁹Simon ci hae paw ccungccapaw lu kheit nynh tuh-e khuapi kya langmawlya mitleih la pia he zah amaw tuh alesaepaw ccungccaw nynh ka thua la cikuh zah Samaria khuapi kya-e ccungccaw hae kha mih ngaeang la thuasah hae.¹⁰Adih huapaw kyate ale huapaw kyacia mih balyn te, “E ccungccapaw tuh Pachia kya-e thungnaw lepaw nynh thua,” ci hae zah a bya kha hoyte a ngaepya hae.¹¹Mitleih te minmin kha khaw cia mih ngaeang a thuasah vae hae keiccuze a bya kha hoyte a ngaepya hae.¹²Thuasalama Filip nynh Pachia peenaw kong te Jesu Khri min kong a hopaw kha minmin nynh he a zyn hae tuh, nopi pise baptisma a in hae.¹³Simon heize a zynbua vae; baptisma a in koute Filip kya zuikuh bua zah muihsahnaw hae te myarya khuaruaru lan umpaw ryalaw hae kha muih zah a ngaeang myarya thua.

¹⁴Jerusalem kya umpaw locceihtu hae nynh Pachia bya kha Samaria hae nynh a ccoubua vae hae cipaw kha he a thae hae tuh, Peter te Johan kha mih kalan a saw hae.¹⁵Minmin he a thua hae te, Samaria hae nynh Thyaa Muisaw a ccoubua ccaw hae cite saw a sangpya hae.¹⁶Pawccecize minmin kyaze hum tungvaw kya sanmah Thyaa Muisaw ccah boi loh khyh; Bawipaw Jesu min kyalya te nynh baptisma a in ung hae.¹⁷Peter te Johan nynh mih kuih kha mih tungvaw khang hae zah minmin nynh Thyaa Muisaw kha a mue hae.¹⁸Locceihtu hae kuih khangnaw liate Thyaa Muisaw tuh mue athua cipaw kha Simon nynh he a muih tuh, minmin kha phua pya hae zah,¹⁹“A tungvaw kya ka kuih ka khangpaw miakaw nynh Thyaa Muisaw a ccoubua nawlan hae kae mah hynh-e thungnaw huhan hynh yn pyabua oh,” a cipya hae.²⁰Thuasalama Peter nynh, “Pachia lasung tuh phua te re kho lan cite na tuaku keiccuze na phua tuh namaw ryte roh sah!²¹Na thinlung tuh Pachia muihnaw kya ahme khyh keiccuze nang tuh hynh-e kya na sekuh bua khyh.²²Tukeiccuze hynh-e na hoyleinaw hynh ngaesikuh lah, na thinlung kya-e na eenaw kha ngaethya na thua nawlan Pachia kalan sawsangkuh.²³Pawccecize nang tuh myarya khahpaw sanyngkhaw kya te hoyleinaw thonginn kya nynh na um cipaw ka ny,” a cipya.²⁴Simon nynh, “Na hopaw hynh ka tungvaw kya ccangkheit san acyiku khyh nawlan Bawipaw kalan saw yn sangpah bua oh,” cite a khung.

²⁵Peter te Johan nynh Bawipaw bya kha ccaekiakhan hae zah a ho kou hae te, Jerusalem lang ki hae zah Samaria hae khua patae kya thehoypaw kha a ho hae. Filip te Ethiopia paw

²⁶Bawipaw vaawpaw nynh Filip kha, “Thokuh lah Jerusalem kyate Gaza lang a cceihbungpaw ramkaw laanpi khate alia langkhe cceihbung,” cite a hopya. (E laanpi hynh mang vae khyh hae).²⁷Filip tuh thokuh zah a cceih. Tuh ccyh lyakhe Ethiopia siapharannung Kandas kuihkaw e bawi lepaw, siapharannung sisua balyn a do-oihtu tinreihkuhpaw Ethiopia paw tuh Pachia beik lan cite Jerusalem lang cceih zah,²⁸a ki lyakhe a marangle kya dahung zah profeh Isaiah ccauh kha a ria.²⁹Thyaa Muisaw nynh Filip kha, “Khuh-e marangle kalan cceih lah, naeku tua,” a cipya.³⁰Filip nynh marangle kalan ccue zah, tuh-e paw nynh profeh Isaiah ccauh a riapaw kha he a thae tuh, “Na riapaw kha na thaethya tou?” cite a khia.³¹Aning nynh, “Lukhakheit nynh yn hopah leite pawtemou ka thaethya kho cih?” a ci. Aning nynh Filip kha marangle kalan kaebua lan te a pe dahungbua lan a ko.³²Tuh-e paw nynh a riapaw Ccathyaa tuh:“Saw theihtupaw kalana cciakhae hae paw tuu hawteamaw kha cciakhae hae zah,tuutaw nynh a ming ngotupaw malangsia leite a um hawteaning tuh a mung kha a myh.³³Maethya a teingnaw kyaamaw kha atazae lei lantebya a pia hae; a hiinnaw khalaephi kyate lawpya athua keiccuzehum nynh mou a ciihan hae khaa thaesah vae cih?”a cikuh.

³⁴Tuh-e tinreihkuhpaw nynh Filip kha, “E hynh profeh nynh hummou a honuathe? Amaw maw tou? Tuhkhyhze mingccangpaw tou a honuathe? Beih yn hopah,” cite a khia.³⁵Filip nynh tuh-e Ccathyaa kyate tho zah Jesu kong kha a hopya.³⁶Tuhte laanpi kya a ccia lya hae khe, tui umnaw san kheit kya thua hae zah tinreihkuhpaw nynh, “Dotua, hein kya tui mang um! Baptisma in lanpaw hynh paw nynh mou yn khaw?” a cipya.³⁷Filip nynh, “Na thinlung balyn te na zyn zetuh baptisma na in kho,” a cipya. Aning nynh, “Jesu Khri tuh Pachia Ccapaw nynh thua cipaw ka zyn,” cite a khung.³⁸Marangle kha thadynsah lan kawpya zah Filip te tinreihkuhpaw tuh parouhte tui lungkhu lang cceihbung hae zah Filip nynh tuh-e paw tuh baptisma a pya.³⁹Minmin nynh tui kyate he oun pou hae tuh, Bawipaw Muisaw nynh Filip kha po lah zah tinreihkuhpaw nynh muih vae khyh; te aning tuh a ccianaw laanpi kya lungtuate a cceih.⁴⁰Filip tuh Azotas khua kya langkuh zah tuin kyate Sisaria khua kyacia khua takyh lang cciate thehoypaw kha a ho.
Saul A Lungpaleihkunaw (Loc 22.6-16, 26.12-18)

¹Saul tuh Bawipaw zuitu hae kha hurawte chia lanpaw kha hy lang a sue, te ranpibawi lupi kalan cceih zah,²Bawipaw Laanpi a zuipaw ka muih ze, nopi pise ci leite ka kyng cih zah Jerusalem lang ka cciakhae ccaw cite Damaskas khua e sinakok uktu hae kalan pya lanpaw ccaw kha a ngiaku.³Saul tuh cceih zah Damaskas khua a thuadyn khe, vaekheihmawte vaawlang te awnaw nynh a pepan balyn khe phaephae a ak.⁴Saul tuh laekhu kya a khuliakuh; te, “Saul, Saul, pawccemou kae hynh nae tuaa nae sah?” cite a hopahpaw roi ccangkheit kha a thae.⁵Saul nynh, “Bawipaw, nang tuh hummou?” cite a khung. Tuh-e roi nynh, “Kae tuh na tuaa na sahpaw Jesu nynh ka thua.⁶Thokuh lah khualae lungkhu lang cceih lah, na cyi lanpaw kha hopya na thua cih,” a cipya.⁷Amaw ryte khuaccongkheih hae paw tuh yccae leite a thadyn hae, roi kha a thae hae zemah hum sanmah muih khyh hae.⁸Saul tuh laekhu kyate thokuh zah a mit he dae tuh, pawpaw mah muih kho vae khyh; tukeiccuze a kuih te kyng hae zah Damaskas khua lungkhu lang a cciakhae hae.⁹Saul tuh nin thum cia ngawmuih khyh, looh mah ae khyh zah tui mah neih khyh.

¹⁰Damaskas khua kya Ananias a ci hae paw zuitu lu kheit a um; Bawipaw nynh tuh-e paw tuh vizin kyate, “Ananias” cite a ko. Aning nynh, “Bawipaw, hein kya mang ka um,” a cipya.¹¹Bawipaw nynh, “Thokuh lah Laan Ding a ci hae paw laanpi langkhe cceih lah, Judas inn kyakhe Tarsas khuapaw Saul a ci hae paw kha la ccung, aning tuh saw a sang cciamang.¹²Ananias a ci hae paw nynh yn tee zah a mit ngaw a muih nawlan a tungvaw kya a kuih khangpaw kha vizin kyate a muih vae,” a cipya.¹³Ananias nynh, “Bawipaw, tuh-e paw nynh Jerusalem kya na mithyaa hae tungvaw kya hoyleinaw kha pawcih nynh a rae cipaw kha ccungccaw patae nynh a ho hae paw ka thae.¹⁴Hein kya mah na min a kopaw balyn kha kyng kho nawlan kawhoinaw kha ranpibawi lepaw hae kyate a mue,” cite a khung.¹⁵Thuasalama Bawipaw nynh, “La cceih, pawccecize aning tuh Zenta hae, siapharan hae te Israel hae kalan ka min cciakhae nawlan ka po vae paw uccaw nynh thua.¹⁶Pawccecize aning tuh ka min keiccuze pawcih nynh vawsaw a teing cih cipaw kha ka muihsah cih,” a cipya.¹⁷Tukeiccuze Ananias tuh cceih zah inn lungkhu lang a tee; a kuih kha Saul tungvaw khang zah, “Ka neitaw Saul, hynhlang nae ccia lya laanpi kya na kalan yn langkuhpaw Bawipaw Jesu nynh, nang ngaw na muih nawlan te Thyaa Muisaw te phe na bia nawlan kae hynh yn saw,” a cipya.¹⁸Vaekheihmawte Saul mit kyate ngasawphaluh alopaw tuh yn ccah zah ngaw a muih vae. Te thokuh zah baptisma a in.¹⁹Aning tuh looh ae zah a thaw yn sae vae. Saul tuh Damaskas khua kya umpaw zuitu hae ryte nin beihtaraw a umkheih hae.

²⁰Paul nynh sinakok kyakhe, “Jesu tuh Pachia Ccapaw nynh thua,” cite Jesu kong kha palou a ho kangmaw vae.²¹A hopaw kha a thaepaw balyn nynh mih ngaeangthua zah, “E paw hynh Jerusalem kya Bawipaw min te sawsang hae paw kha a rohtu thua khyh tou? Te minmin kha kyng lan hae zah ranpibawi lepaw hae kalan cciakhae lan hae cite hynhlang yn thuapaw thua khyh tou?” a ci hae.²²Thuasalama Saul tuh a thaw houhouh sae zah, Jesu tuh Messiah nynh thua cite he a ccaesah tuh, Damaskas khua kya umpaw Judah hae kha mih ngaeang a thuasah hae. Saul Jerusalem lang A Ccue

²³Nin patae aro koute Judah hae nynh Saul kha chia lan cite aruh lante khua a khanku hae.²⁴Thuasalama tuh-e mih khuakhannaw tuh Saul nynh phe a ny. Saul kha kae chia ccaw cite koikua kha khuazi khuadae a ngaw hae.²⁵Tukeiccuze zuitu hae nynh khuazi khe Saul kha cciakhae hae zah shua lungkhu sang hae zah khualungrua vawlan te a sawbung hae.

²⁶Saul nynh Jerusalem lang he a thua tuh, zuitu hae kya mungku bua lan a zuakuh; thuasalama aning tuh zuitu nynh thua cipaw a zyn khyh hae keiccuze zuitu hae balyn nynh amaw kha a rih hae.²⁷Thuasalama Barnabas nynh amaw kha hoei zah locceihtu hae kalan a cciakhae; te Barnabas nynh minmin kyakhe, Saul nynh Bawipaw kha laanpi kya pawcihte nynh a muih cipaw, Bawipaw nynh a kalan bya a hopyapaw te aning nynh Damaskas kya Jesu min te rawhoyte phung a ho cipaw kha a hopya hae.²⁸Tukeiccuze Saul tuh Jerusalem kya locceihtu hae ryte teekheih poukheih hae zah Bawipaw min te rawhoyte phung a ho vae.²⁹Grik bya a ho hae paw Judah hae ryte bya a eikuh hae; minmin nynh Saul kha chia lan a zuaku hae.³⁰Tuh-e tuh zyntu uno hae nynh he thae hae tuh, Saul kha Sisaria khua lang cciakhae bung hae zah Tarsas khua lang a saw hae.

³¹Judea ram, Galilee ram te Samaria ram balyn kya khriccaawbuu hae tuh daenaw hoi hae zah thawzung tynsah athua hae; Bawipaw rawrinaw kya te Thyaa Muisaw ngaengansahnaw kyakhe um hae zah a pungthung hae. Aenias Dansahnaw

³²Peter tuh khyzaw khuaccong zah Lidda khua kya a umpaw mithyaa hae kalan po a thua.³³Tuin kyakhe a kuihccuchih zah kum tarya cia a iphae kya a huekuhpaw Aenias a ci hae paw ccungccapaw kha a muih.³⁴Peter nynh, “Aenias, Jesu Khri nynh ae dansah vae, thokuh lah na iphae kha kuekuh!” a cipya. Aning tuh vaekheihmawte po a thokuh.³⁵Lidda khua te Saron khua kya um hae paw balyn nynh tuh-e paw tuh muih hae zah Bawipaw kalan a paleihkuh hae. Lidda te Joppa kya Peter

³⁶Joppa khua kya nopinung Tabitha a ci hae paw zuitu lu kheit a um. (a min tuh Grik bya te Dorkas cipaw nynh thua.) Tuh-e nopinung tuh a ccyh balyn kha ahoypaw ryalaw te ryachi bawmnaw kyakhe a mang.³⁷Tuh ccyh lyakhe aning tuh ccih zah a chih; tui he a sing kou hae te, palung khaan khe a nung hae.³⁸Lidda khua tuh Joppa khua te anaeku keiccuze Lidda khua kya Peter a um cipaw kha Joppa khua e zuitu hae nynh he a thae hae tuh, ccungccaw lu ning saw hae zah, “Kae kalan arangte beih yn cceih,” cite bya a taw hae.³⁹Tukeiccuze Peter tuh thokuh zah minmin ryte a cceihkheih hae; he a thua te, palung khaan lang a kaekhae hae. Nomae hae balyn tuh Peter pe khe thadyn hae zah a rah lalia lan hae te, minmin ryte a umkheih lya hae ze Dorkas nynh a kuapaw angki te boeilakhua hae kha a muihsah hae.⁴⁰Peter nynh mih balynte atolang a pousah kou hae te, a ccukharutung zah saw a sang. Dorkas a rhua kalan khe hawi zah, “Tabitha, thokuh,” a ci. Tetuh tuh-e nung tuh a mit yn dae zah Peter kha he a muih te, thokuh zah a dahung.⁴¹Peter nynh a kuih kha dyngpah zah a tho; te mithyaa hae te nomae hae kha ko hae zah a hiin vae paw tuh-e nung tuh a muihsah hae.⁴²Tuh-e kong tuh Joppa khua kya pong nyh hae zah ccungccaw patae nynh Bawipaw kha a zyn hae.⁴³Peter tuh Joppa khua kya saphua uccaw a raepaw Simon a ci hae paw ryte nin patae a umkheih hae. Kornelias Vizin A Muih

¹Sisaria khua kya Italy rhawkawphu acikuhpaw kyaze rhawkaw za kheit uktu rhawbawipaw Kornelias a ci hae paw lu kheit a um.²Tuh-e paw tuh beiknaw lang a zuakuhpaw thua zah a inn kya um hae paw balyn ryte Pachia raw a rih hae paw nynh thua; aning tuh ccungccaw hae kha hysahte patae bawm hae zah Pachia kalan tyty saw a sangpaw nynh thua.³Nin kheit tuh zete suimilan ccangthum loukaw khe Pachia vaawpaw nynh a kalan yn cceih zah, “Kornelias!” cite a kopaw kha a vizin kya ccaerarih lan a muih.⁴Vaawpaw kha riri he a do tuh rih zah, “Bawipaw, pawmou?” cite a khia. Vaawpaw nynh, “Na sawsangnaw te ryachi hae na bawmnaw tuh Pachia malang khe liathuinaw lante phe a thua vae.⁵Atu Joppa khua lang ccungccaw hae kha saw lah Peter a ci hae paw Simon kha kokuh.⁶Aning tuh saphua uccaw a raepaw Simon inn kya nynh a thua, a inn tuh rili kin nynh a um,” a cipya.⁷Bya a hopahpaw vaawpaw he a pou koute, Kornelias nynh a see hae lu ning te amaw rya a lawpah hae paw kyaze beiknaw lang a zuakuhpaw rhawkawpaw kha a ko hae.⁸Tuh-e konglang balyn kha a hopah kou hae te, Joppa khua lang a saw hae. Peter Vizin A Muih

⁹Awkhualan kya minmin tuh cceih hae zah Joppa khua a thuadyn hae khe, Peter tuh sawsang khylan ninthuccynglyn loukaw khe inn tungvaw lang a kae.¹⁰Peter tuh a vuelaw zah hankhakheit a ae ry; aepaw a dopya lya hae khe Peter nynh mangccang lante muih zah,¹¹vaawlang yn hungkuh zah myarya lepaw boei te alokuhpaw uccaw ccangkheit tuh aki ki pali te laekhu lang yn sawbung hae paw kha a muih.¹²Tuh-e uccaw lungkhu khe ccupali asaepaw sarangpaw phuin, avawpaw sarangpaw phuin te azouthyapaw pavaw hae phuin a um.¹³Roi ccangkheit nynh a kyakhe, “Peter, thokuh, theih lah ae,” a cipya.¹⁴Thuasalama Peter nynh, “Bawipaw, thua kho lan khyh; pawccecize anungsikuhpaw te athyaa leipaw tuh ka ae boi khyh,” a ci.¹⁵Vaeningnaw roi nynh, “Pachia nynh phe a thyaasah vae paw kha nang nynh anungsikuhpaw ci nan,” a cipya.¹⁶Hynhcite vae thum cia acyikuh koute tuh-e uccaw tuh vaawlang bua lawthung athua.

¹⁷Peter nynh a muihpaw vizin hynh paw suilan vema athua cite a tuaku cciamang lyakhe, Kornelias nynh yn saw hae paw ccungccaw hae tuh Simon inn kha oun zahbia hae zah sakoih malang khe a thadyn hae.¹⁸Peter a ci hae paw Simon kha hein kya a thua tou cite khia khylan a ko hae.¹⁹Peter nynh vizin kong a tua cciamang lyakhe, Thyaa Muisaw nynh, “Dotua, ccungccaw lu thum nynh nang kha ae ccung hae.²⁰Tukeiccuze thokuh lah rungbung, rarymamaw um leite minmin ryte cceihbua; pawccecize kamaw nynh kae saw hae paw nynh thua,” a cipya.²¹Tukeiccuze Peter tuh minmin kalan yn rungbung zah, “Na ccung oh paw tuh kae hynh nynh ka thua, paw konglang mou nae thua oh?” cite a khia hae.²²Minmin nynh, “Pachia rawrih zah adingpaw, Judah minphuin balyn kya thehoy a ccoupaw, rhawbawipaw Kornelias tuh nang kha a inn lang kosah lan zah na bya thae khylan Pachia nynh athyaapaw vaawpaw kyate a hopya vae,” a cipya hae.²³Peter nynh minmin kha inn lungkhu lang ko hae zah tuin kya a thuasah hae.
Awkhualan khe Peter tuh minmin ryte cceih hae zah Joppa khua e uno hae abang mah a zuikuh bua hae.²⁴Sarukheih khe minmin tuh Sisaria khua lang a tee hae. Kornelias nynh minmin kha la ngaw hae zah a vaeccaw hae te a ruiban hae kha a kobua hae.²⁵Peter he yn tee tuh Kornelias nynh cciadue zah a cculeihpaw khe bakhung zah a beik.²⁶Thuasalama Peter nynh aning kha tho zah, “Thadyn, kae mah ccungccaw nynh ka thua,” a cipya.²⁷Kornelias ryte byahokuh hae zah he a tee tuh, a sueluakuh hae paw ccungccaw patae kha a muih.²⁸Peter nynh, “Judah ccungccaw lu kheit nynh Zentapaw kalan paebua lanpaw te vaeccawku lanpaw tuh aphung thua khyh cipaw na ny oh; thuasalama hum ccungccaw kha sanmah anungsikuhpaw te athyaa leipaw cite ka ci vae khyh nawlan Pachia nynh yn muihsah vae.²⁹Tukeiccuze kae kha he yn ko hae tuh, mya leite kae cceih; tukeiccuze pawccemou kae hynh nae kosah oh cipaw kae khiatua ry oh?” a cipya hae.

³⁰Kornelias nynh, “Nin pali aro vae, atu ccyh, zete suimilan ccangthum ccyh lyakhe ka inn kya saw ka sang, vaekheihmawte boeining phaephae akpaw a lawkuhpaw ccungccapaw nynh ka malang yn thadyn zah,³¹‘Kornelias, na sawsangnaw tuh thaepya thua zah ryachi hae na bawmnawpaw tuh Pachia malang nypya athua vae.³²Tukeiccuze Joppa khua lang ccungccaw saw lah Peter a ci hae paw Simon kha kokuh; aning tuh rili kin kya saphua uccaw a raetupaw Simon inn kya nynh a thua,’ yn cipya.³³Tukeiccuze kae nynh na kalan arangte kae saw hae zah, nang nynh mah thaw nae ccih zah nae thua. Tukeiccuze Pachia nynh ho lan kaw ae pyapaw balyn kha ngae khylan kaening balyn tuh atu Pachia malang hein kya kae um vae,” a cipya. Zenta hae Thehoypaw Thaenaw

³⁴Peter nynh a khalang kha aw zah, “Pachia tuh ccungccaw maedo khyh cipaw ka ny ccaccing.³⁵Minphuin takyh kya Pachia rawrih zah ahmepaw rya a lahpaw miakaw tuh Pachia nynh leh a khan.³⁶Ccungccaw balyn Bawipaw athuapaw Jesu Khri liate daenaw thehoypaw tuh Pachia nynh Israel hae kya a pya hae cipaw kha na ny oh.³⁷Johan nynh a hopaw baptisma koute Galilee ram kyate tho zah Judea ram balyn kya po azeihkuhpaw kong kha na ny oh.³⁸Tuh-e tuh: Pachia nynh Thyaa Muisaw te thuasah, thungnaw te thuasah Nazareth khuapaw Jesu kha chitui a thuh; Pachia nynh a umkhae keiccuze aning tuh ahoypaw rya kha lah zah, Satan nynh vawsaw a pya hae paw balyn kha dansah te khua a ccong cipaw na ny oh.³⁹Judea ram kya te Jerusalem kya Jesu nynh a cyipaw miakaw elang kaening tuh ccaekia hae nynh kae thua; amaw kha thing vawlan sae hae zah a chia hae.⁴⁰Thuasalama Pachia nynh amaw kha nin thumnaw kya thoosah zah a langsaku;⁴¹ccungccaw balyn kya langsakuh khyh, thuasalama Pachia nynh ccaekia lang oun popaw kaening kya nynh a langku; chinaw kyate a thoothui koute amaw ryte kae aekheih zah kae neihkheih.⁴²Ccungccaw hae kha phunghopya khylan te Pachia nynh amaw kha a hiin hae paw te a chih hae paw kya byapiatu lang a nung cipaw kha ccaekiakhan khylan aning nynh kaening hynh kaw oun pya.⁴³Humhung zemah amaw a zynpaw tuh a min liate seingaethyanaw a mue cih cite profeh hae balyn nynh amaw kong kha ccaekia a khan hae,” a ci. Zenta hae Thyaa Muisaw Muenaw

⁴⁴Peter nynh bya a ho cciamang lyakhe tuh-e bya a thaepaw ccungccaw hae balyn tungvaw kya Thyaa Muisaw accah.⁴⁵Zenta hae kya mah Thyaa Muisaw lasung tuh bu athuabua keiccuze Peter ryte oun cceihkheih hae paw vingdungawkuh hae paw zyntu hae tuh mih ngaeangthua.⁴⁶Pawccecize tuh-e hae nynh bya ccangpaw te ho hae zah Pachia the a hoysah hae paw kha a thae hae.⁴⁷Peter nynh, “Aening hawte Thyaa Muisaw a muebua hae paw hynh-e ccungccaw hae nynh baptisma a in khyh nawlan hae hum nynh mou tui kha a khee kho cih?” a ci.⁴⁸Tukeiccuze Jesu Khri min te baptisma in lan minmin kha kaw a pya hae. Minmin nynh Peter kha nin sosoh um hin lan a kangku hae. Peter te Jerusalem Khriccaawbuu

¹Judea ram kya um hae paw locceihtu hae te zyntu hae nynh Zenta hae mah Pachia bya a lawkuh bua vae hae cipaw a thae hae.²Peter tuh Jerusalem kya he yn thua tuh, vingdungawkuh hae paw nynh,³“Nang tuh vingdungawkuh leipaw ccungccaw hae kalan na cceih zah minmin ryte na aekheih oh,” cite a seisah hae.⁴Thuasalama Peter nynh tuh-e konglang tuh athonaw te athangnaw cia hynhte a hopya hae:⁵“Joppa khua kya saw ka sang lyakhe mangccang lante vizin ka muih. Myarya lepaw boei te alokuhpaw uccaw ccangkheit tuh aki ki pali kyate vaawlang te oun sahbung hae zah ka pe khe yn thua.⁶Tuh-e tuh hoyte ka do tuh, ccupali asaepaw sarangpaw hae, sarepaw hae, avawpaw sarangpaw hae te azouthyapaw pavaw hae kha ka muih.⁷Roi ccangkheit ka thae zah tuh-e roi nynh, ‘Peter, thokuh, theih lah ae,’ yn cipya.⁸Thuasalama kae nynh, ‘Bawipaw, thua kho lan khyh; pawccecize anungsikuhpaw te athyaa leipaw uccaw tuh ka khalang lungkhu lang tee boi khyh,’ ka cipya.⁹Thuasalama vaawlang te roi nynh, ‘Pachia nynh a thyaasah vae paw kha nang nynh anungsikuh ci nan,’ cite bua yn khung.¹⁰Tuhcite vae thum cia acyikuh koute tuh-e hae balyn tuh vaawlang bua lawthung athua.¹¹Tuh ccyh lyakhe Sisaria khua kyate ka kalan oun saw hae paw ccungccaw hae lu thum tuh ka umnaw inn kya oun thua hae.¹²Muisaw nynh kae kha rarymamaw um leite minmin ryte cciakheih lan yn hopya. E uno hae lu taruh mah ka kya cceihbua hae zah Kornelias inn kya kae tee.¹³Vaawpaw nynh a inn kya thadyn zah Kawnelia kha, ‘Joppa khua lang ccungccaw hae saw lah, Peter a ci hae paw Simon kha kosah hae.¹⁴Tuh-e Peter nynh ae hopya oh paw bya liate nang te na inn kya um hae paw balyn tuh khum na thua cih oh,’ cite a hopyapaw kha aning nynh bua oun hopya.¹⁵Kae nynh phungho he ka tho tuh, atakaw lya aening tungvaw a ccaw hawte Thyaa Muisaw tuh mih tungvaw kya a ccahbua.¹⁶Bawipaw nynh, ‘Johan nynh tuh tui te baptisma a pya hae, thuasalama nanning tuh Thyaa Muisaw te baptisma pya na thua cih oh,’ cite a hopaw bya kha ka liathui vae.¹⁷Bawipaw Jesu Khri kha ah zyn oh zah Pachia nynh lasung oun pya hawte minmin kha mah a pyabua hae ze, kae tahawpaw nynh Pachia kha ka khee kho cih zawtou?” cite Peter nynh a ci.¹⁸Minmin nynh hynh-e bya he a thae hae tuh zya dae hae zah, “Pachia nynh Zenta hae kha mah hiinnaw muesah bua lan ngaesikunaw a pyabua vae hae,” ci hae zah Pachia kha the a hoysah hae.

¹⁹Stefen konglang te athopaw tuaasahnaw keiccuze phiariphiarae a um hae paw ccungccaw hae tuh Foenisia, Saipras te Antiok khua kyacia thua hae zah thehoypaw kha hum kya sanmah ho leite, Judah hae kya rou nynh a ho hae.²⁰Tuh-e hae kyaze abang tuh Saipras ram te Sairin khua e ccungccaw hae thua hae zah Antiok khua kya he a thua hae te, Grik bya a ho hae paw kha Bawipaw Jesu kong a hopya hae.²¹Bawipaw kuih tuh minmin ryte um zah ccungccaw patae nynh zyn hae zah Bawipaw kalan a paleihkuh hae.²²Tuh-e thongpang tuh Jerusalem kya umpaw khriccaawbuu nynh thae zah, minmin nynh Barnabas kha Antiok khua lang a saw hae.²³Tuin kya thua zah Pachia thawccinaw kha he a muih tuh a lungtua; zynnaw thinlung te Bawipaw tungvaw kya lungzinaw po a hoi nawlan hae minmin balyn kha thawzung a pya hae;²⁴pawccecize Barnabas tuh ccungccaw hoypaw thua zah Thyaa Muisaw te thuasah, zynnaw te thuasah phe beihpaw nynh thua. Ccungccaw patae kha Bawipaw kalan a thuakhae hae.²⁵Te Barnabas tuh Saul kha ccung khylan Tarsas khua lang a cceih;²⁶Saul kha he a muih te, Antiok khua lang a cciakhae. Minmin tuh khriccaawbuu ryte kum kheit lungkhu umkheih hae zah ccungccaw patae kha leih a ccangpya hae. Antiok khua kyakhe zuitu hae kha Khriccaaw hae cite masaty ko athua hae.

²⁷Tuh ccyh lyakhe profeh hae abang tuh Jerusalem kyate Antiok khua lang oun thua hae.²⁸Minmin lakuze lu kheit, Akabus a ci hae paw nynh thadyn zah, “Laephi vaw balyn kya myarya lepaw ccakannaw yn thua cih,” cite Muisaw liate a hodae; tuh-e ccakannaw tuh Sizar siapharan Klaudias ccyh lya nynh a thua.²⁹Zuitu hae nynh mawmaw lu raveih taeningnaw thyhte Judea ram kya um hae paw zyntu hae kalan bawmnaw kybua lan hae cite bya a paeku hae.³⁰Tuhcite cyih hae zah, tuh-e bawmnaw tuh Barnabas te Saul kyate Khriccaaw piccan hae kalan a ky hae. James Chianaw te Peter Thongsawnaw

¹Tuh ccyh loukaw khe Herod siapharan nynh khriccaawbuu kya-e abang kha vawsawnaw a pya hae.²Aning nynh Johan a upaw James kha thaloi te a chia.³Tuh-e nynh Judah hae kha mih lungry a thuasah cipaw he a muih tuh, Peter kha mah ranoih a kyngsah hae. (Tuh lya tuh Ransi phing leipaw Sanlou poi nin nynh thua.)⁴Peter kha kyngsah hae zah Kawtaw Poi koute ccungccaw hae kalan thuakhae lan cite tuakuh zah Peter kha a ngawtu rhawkaw lu haw lae taruh kuih kya pya hae zah thonginn kya a saw.⁵Tukeiccuze Peter tuh thonginn kya a um; khriccaawbuu nynh amaw hanlan Pachia kalan thawte saw a sangpya hae.

⁶Herod nynh Peter kha zapi malang poukhae lan a ci dyn khuazi khe Peter tuh sivawrui ccangning te khii hae zah rhawkaw hae lu ning laku a ih; a ngawtu hae nynh thonginn kha thuakaw malang te phang a ngaw hae.⁷Tualeipite Bawipaw vaawpaw tuh yn langkuh zah thonginn kya phaephae yn aw; te Peter a napang kha phah bia zah, “Arangte tho,” cipah zah Peter kha a tho. Sivawrui hae tuh Peter kuih kyate pong accah.⁸Vaawpaw nynh Peter kha, “Taeccia cciakuh lah na phanah kha nawkuh,” cite hopah zah a hopya hawte Peter nynh a cyi. Te vaawpaw nynh, “Na boei kha zingkuh lah kamaw hynh yn zui,” a cipya.⁹Peter nynh cceih zah amaw kha a zui; vaawpaw nynh a cyipaw tuh thanccingpaw nynh thua cipaw nyh khyh, vizin nynh ka muih cite a tuaku.¹⁰Minmin nynh ccangkheitnaw te ccangningnaw a ngawtu hae kha lawe hae zah, khualae lang a teepaw sivaw koikua kya he a thua hae tuh, tuh-e koikua tuh amaw hung lan ahungkuh; te minmin tuh pou hae zah laanpi ccangkheit kya a ccia lya hae khe vaawpaw nynh vaekheihmawte Peter kha a cciataw.¹¹Peter nynh he yn nyhkuh te, “Atu hynh Bawipaw nynh a vaaw ccungccapaw yn saw zah Herod kuih kyate thuasah, Judah hae balyn mih ngaehoinaw kyate thuasah kae hynh yn luesah vae cipaw ccaerarih lan ka ny,” a ciku.

¹²Tuh-e konglang he a nyhthya te, ccungccaw patae nynh sueluakuh hae zah saw a sangnaw hae, Marka a ci hae paw Johan a nung Mary inn lang a cceih.¹³Peter nynh atolang e thuakaw kha he a khua tuh, Rhoda a ci hae paw nopinung taraw tuh thuakaw hung lan yn cceih.¹⁴Peter roi cipaw he a nyh tuh, a lungtua pawte thuakaw kha hung vae leite ccue kangmaw zah, “Thuakaw kya Peter phang thadyn,” cite a hopya hae.¹⁵Minmin nynh, “Na ngaee vae tou!” a cipya hae. Thuasalama aning nynh, “Thanccingpaw nynh thua,” cite thawte a ho. Minmin nynh, “Peter a vaaw ccungccapaw nynh athua cih,” a ci hae.¹⁶Tuh lyatuin Peter nynh palei khua zah minmin nynh thuakaw kha he a hung hae tuh, Peter kha muih hae zah mih ngaeang pong thua.¹⁷Peter nynh minmin kha zya a dae ccaw hae cite a kuih te tangpah hae zah Bawipaw nynh thonginn kyate a poukhaenaw kong kha a hopya hae. Peter nynh, “Cceih oh lah hynh-e kong hynh James te zyntu hae kha la hopah oh,” a ci. Tukoute toikuh zah ccanglang a cceih.

¹⁸Khua yn dae tuh, Peter kya acyikuhpaw konglang te rhawkaw hae tuh mih lungvaw myarya sawkhaekuh.¹⁹Herod nynh Peter kha ccung zah he a muih khyh tuh, a ngawtu hae kha akaw-aleih byakhia hae zah minmin tuh chia lan accan cite kaw a tho. Herod tuh Judea ram kyate Sisaria khua lang cceihbung zah tuin kya a um. Herod Chinaw

²⁰Herod tuh Tair khua te Sidon khua e ccungccaw hae elang myarya a thinria; tukeiccuze minmin nynh amaw kalan lungngingte oun cceih hae zah, siapharanpaw inn a uktu Blastas kha hyykuh hae zah a lungdae nawlan a ngia hae; pawccecize mih ram tuh siapharanpaw ram nynh looh a bawm buapaw nynh thua.²¹A khya hae paw nin kyakhe Herod tuh siapharan boeining te ccaankuh zah a bawitungkhung vawlan dahungte minmin kha bya a hopya hae.²²Ccungccaw hae nynh, “E roi tuh ccungccaw roi thua khyh, pachia roi nynh thua!” cite a sia hae.²³Pachia kha phu-enaw a pya khyh keiccuze Bawipaw vaawpaw nynh Herod kha vaekheihmawte a bua; te aning tuh zanpaw hae nynh ae hae zah a chih.

²⁴Thuasalama Pachia bya tuh pazaekuh zah a lethung.²⁵Barnabas te Saul tuh mih ryalaw a thangsah kou hae te, Jerusalem kyate ki hae zah Marka a ci hae paw Johan kha mah a hoeibua hae. Barnabas te Saul Ponaw

¹Antiok khua kya a umpaw khriccaawbuu kya profeh hae te ccangpahtu hae a um hae. Tuh-e hae tuh: Barnabas, Nika a ci hae paw Simeon, Sairin khuapaw Lusias, uktu Herod ryte a lethungkheih hae paw Manaen te Saul nynh thua hae.²Minmin nynh Bawipaw kha beik hae zah looh-ae a sung lya hae khe, Thyaa Muisaw nynh, “Ka konua hae paw rya kha law khylan Barnabas te Saul kha kamaw hanlan ccangte yn phiapah oh,” a ci.³Looh-ae sung hae zah saw a sang kou hae te, tuh-e hae tungvaw kya mih kuih khang hae zah a saw hae. Saipras kya Phungho hae

⁴Tuhte minmin tuh Thyaa Muisaw nynh a saw hae thyhte Seleusia khua lang a cceih hae; tuin kyate Saipras tuikoih kalan sanphalung te a cceih hae.⁵Salamis khua kya a thua hae te, Judah hae kya-e sinakok hae kyakhe Pachia bya a ho hae; minmin bawmtu lang Johan kha mah a hoeibua hae.⁶Saipras tuikoih kya po lekuh lan cceih hae zah Pafos khua he a thua hae tuh, mitleihthyapaw ahme leipaw profeh, Bar-Jesu a ci hae paw Judah paw lu kheit te a tungkuh hae.⁷Tuh-e paw tuh ram uktupaw, myarya ahawpaw mangki bawi Serkias Paulas ryte a umkheih hae; Paulas nynh Pachia bya kha thae a ry keiccuze Barnabas te Saul kha a koku hae.⁸Thuasalama mitleihthyapaw Elimas (tuh-e tuh a min kha Grik bya te leihpaw nynh thua) nynh locceihtu hae kha rawse hae zah mangki bawipaw kha zynnaw kyate paleihsaku lan a zuaku.⁹Paul cite mah a ko hae paw Saul tuh Thyaa Muisaw te phe beih zah tuh-e paw tuh riri do zah,¹⁰“Satan ccapaw, dingnaw hae balyn a rhawtupaw, thyaruhnaw te hynhunaw balyn te phe beihpaw nang tuh Bawipaw kya-e adingpaw laanpi kha kousah leite na um kho khyh tou?¹¹Atumaw, Bawipaw kuih tuh na tungvaw a ccah cih, na mitmoh cih zah ccyh sosoh khuanin na muih lan khyh,” a cipya. Vaekheihmawte a mit pong zi zah a tungvaw mohnaw a thua; a kuih te a suebua lanpaw ccungccaw kha zahkute maemae a khiakuh.¹²Mangki bawi nynh tuh-e acyikuhpaw tuh he a muih te a zyn; pawccecize Bawipaw konglang a ccangpya hae paw kha a ngaeangthua. Antiok kya Paul te Barnabas

¹³Paul te a ban hae tuh Pafos khua kyate sanphalung te cceih hae zah Pamfilia ram Perka khua a thua hae. Johan nynh minmin kha cciataw hae zah Jerusalem lang a ki.¹⁴Perka khua kyate cceih hae zah Pisidia ram Antiok khua kya a thua hae, te sabbath nin kya sinakok lungkhu lang tee hae zah a dahung hae.¹⁵Kawbya te Profeh hae ccauh kha a ria kou hae te, sinakok uktu hae nynh ccungccaw saw hae zah, “Uteno hae, nanning nynh ccungccaw hae thawzung pya lanpaw bya na hoi oh ze, hopah oh,” cite a hosahpya hae.¹⁶Paul nynh thadyn zah a kuih te tangpah hae zah,
“Israel ccungccaw hae te Pachia rawrih hae paw mingccangpaw hae, ngaetua oh:¹⁷Hynh-e Israel hae Pachia nynh aening ah minpaaw hae kha po hae zah Izip ram kya a la um lya hae ze minphuin lepaw lang a la rae hae, te athungpaw a kuih te minmin kha tuin ram kyate a poukhae hae.¹⁸Kum sung pali loukaw cia ramkaw kya a ngaesangpya hae.¹⁹Kanaan ram kya-e minphuin phuin sari kha a ropah kou hae te, tuh-e hae ram kha kum za pali sung pangaw loukaw cia rho lang a pya hae.²⁰Tukoute profeh Samuel she kyacia byapiatu hae kha a nungpya hae.²¹Tukoute minmin nynh siapharan ngiakuh hae zah Pachia nynh Kish ccapaw Saul, Benjamin ciihanpaw kha minmin hanlan kum sung pali cia a pya hae.²²Saul kha a phoh koute David kha mih siapharan lang a khangpya hae. David konglang te Pachia nynh ccaekiakhan zah a hopaw tuh: ‘Ka rynaw balyn a ccingsah cih paw, ka thinlung yn tungpaw ccungccapaw, Jessi ccapaw David kha ka muih vae,’ a ci.²³Pachia nynh bya a kinku thyhte hynh-e ccungccapaw ciihan kyate Khumtu Jesu kha Israel hae hanlan a langsaku vae.²⁴Jesu yn thua mawkhe, Johan nynh ngaesikunaw te asekuhpaw baptisma kong kha Israel ccungccaw balyn kalan a hoty vae.²⁵Johan nynh a ryalaw a lyn dyn khe, ‘Kae hynh hum cite mou nae tua oh? Kae tuh tuh-e paw ka thua khyh. Thuasalama dotua oh, ka nulang te yn thua cih paw lu kheit a um; kae tuh tuh-e paw a phanah rui phoupya lan sanmah ka ngaekuh khyh,’ cite a ho.

²⁶“Uteno hae, Abraham ciihan athua hae paw te Pachia rawrih hae paw mingccangpaw hae, hynh-e khumnaw bya hynh aening kalan thaesah athua.²⁷Pawccecize Jerusalem kya um hae paw te mih uktu hae nynh Jesu kha thuasah, sabbath nin takyh kya a ria hae paw profeh hae bya kha thuasah a ny khyh hae keiccuze, Jesu kha seibenaw khate profeh hae bya kha a ccingsah hae.²⁸Jesu kya chi lan accan lan ciate seinaw ccangkheit san a muih lei hae pite, Pilat nynh a chia nawlan minmin nynh a ngia hae.²⁹Ccathyaa kya amaw konglang azeikuhpaw balyn kha a ccingsah kou hae te, a rhua kha vaelantung kyate sahbung hae zah shaw lungkhu a ccy hae.³⁰Thuasalama Pachia nynh amaw kha a chih hae paw kyate a thoosah;³¹aning tuh Galilee ram kyate Jerusalem lang a cceihkheih hae paw kya nin patae cia a langkuh, atu lya tuh-e hae tuh ccungccaw hae malang amaw ccaekia hae nynh thua hae.³²Pachia nynh ah minpaaw hae kya bya a kinkupaw thehoypaw bya kha nae kalan kae phupya oh.³³Sam ccangningnaw kya,‘Nang tuh ka Ccapaw nynh na thua,atunin nang kha kae saah vae,’cite azeiku hawte, Pachia nynh Jesu kha a thoosahnaw liate ah minpaaw hae kya bya a kinkupaw kha mih ccaaw hae aening elang a ccingsah vae.³⁴Jesu kha chinaw kyate thoosah zah bua thuh boi vae lan khyh cipaw kha hynhte bua a ho;‘David kya bya a kinpyakupawathyaapaw te phe ariapawhythuanaw kha kae pya cih oh,’ a ci.

³⁵Tukeiccuze ccangpaw Sam kya mah,‘Na kya-e Athyaapaw Ccungccapaw tuh thuh vae lan khyh,’cite bua a ho.³⁶David tuh a she lungkhu Pachia rynaw kha a rae koute, chih zah a minpaaw hae kya a uubua hae keiccuze thuhnaw kha a ing.³⁷Thuasalama Pachia nynh bua a thoosahpaw aning tuh thuhnaw kha ing vae khyh.³⁸Tukeiccuze uteno hae, tuh-e Jesu liate seingaethyanaw kong kha nae kya ho athua cipaw te³⁹tuh-e Jesu a zynpaw miakaw tuh Moses Kawbya liate lue kho athua leipaw seinaw balyn kyate luesah athua cipaw kha nyh oh.⁴⁰Tukeiccuze profeh hae nynh a la ho hae paw kha nae tungvaw acyiku khyh nawlan raeringkuh oh:⁴¹‘Dotua oh, ccungccawa sarya hae paw nanning,nae ngaeangthua sah lah, roh oh!Pawccecize lukhakheit nynhae hopya oh zemah,kharouh na zyn lei lan oh pawryalaw ccangkheit khanae she kya ka lah cih,’ acikuh,”cite Paul nynh a hopya hae.

⁴²Paul te Barnabas tuh sinakok kyate a pou lya hae khe, ccungccaw hae nynh tuh-e kong tuh malang sabbath nin kya bua nae hopah cih oh cite a ngia hae.⁴³Pumkunaw he athang te, Judah hae patae te Judah beiknaw kalan a tee thaw hae paw nynh Paul te Barnabas kha a zui hae; Paul te Barnabas nynh minmin kha Pachia thawccinaw kya atyn nawlan hae hopah hae zah a hyy hae.

⁴⁴Malang sabbath nin kya tuh Bawipaw bya kha ngae khylan khualae hae balyn vya ccing lan oun sueluakuh hae.⁴⁵Thuasalama Judah hae nynh ccungccaw zapi kha he a muih hae tuh, myarya mih eiung; Paul nynh a hopaw kha ei hae zah a sarya hae.⁴⁶Paul te Barnabas nynh rawhoyte houh ho hae zah, “Pachia bya hynh nanning kha masaty hopya lan accanpaw nynh thua; thuasalama nanning nynh tuh-e bya tuh na vua oh zah zungzae hiinnaw tuh kae ngaekuh khyh cite bya na piaku oh keiccuze kaening tuh atu Zenta hae kalan kae maekuh vae cih.⁴⁷Pawccecize Bawipaw nynh,‘Laephi adianaw cia khumnaw khana thuakhae nawlan oh,nanning kha Zenta hae hanlanawnaw lang phe kae khang vae oh,’cite kaening kha kaw phe oun pya vae,” cite rawhoyte a ho hae.

⁴⁸Tuh-e bya tuh Zenta hae nynh he a thae hae te, mih lungtua zah Bawipaw bya kha a phu-esah hae; zungzae hiinnaw hanlan po athua hae paw miakaw tuh zyntu lang oun tang hae.⁴⁹Bawipaw bya tuh tuin ram balyn kya a pazaekuh.⁵⁰Thuasalama beiknaw lang zuakuh hae zah sawtua lan umpaw nopi hae te khualae e piccan hae kha Judah hae nynh tuhou hae zah Paul te Barnabas tungvaw vawsawnaw pyate mih ram kyate a dee hae.⁵¹Paul te Barnabas nynh mih ccu kya-e vuiping kha khuanua sya hae zah Ikonium khua lang a cceih hae.⁵²Zuitu hae tuh lungtuanaw te Thyaa Muisaw te phe a beih hae. Ikonium kya Paul te Barnabas

¹Ikonium khua kya minmin lu ning tuh parouhte Judah hae sinakok lungkhu lang tee hae zah phung a ho hae; Judah hae te Grik hae patae tuh zyntu lang a tang hae.²Thuasalama a zyn leipaw Judah hae nynh Zenta hae kha tuhou hae zah uno hae kha rawsete a huasah hae.³Tukeiccuze locceihtu hae tuh khaw cia um hae zah Bawipaw hanlan rawhoyte bya a ho hae, Bawipaw nynh a thawccinaw bya hanlan ccaekia pya hae zah, muihsahnaw hae te ngaeangnaw hae kha minmin kyate a langsaku.⁴Khualae e ccungccaw hae tuh thoh phiakuh hae, abang tuh Judah hae kalan pan hae zah abang tuh locceihtu hae kalan a pan hae.⁵Zenta hae te Judah hae nynh mih uktu hae ryte locceihtu hae kha zia lan te lung te deih lan a zuaku hae,⁶tuh-e tuh locceihtu hae nynh nyh hae zah Likaonia ram kya umpaw Lystra khua, Derbe khua te tuin pepan e khua hae kalan a ccue hae.⁷Tuin kya thehoypaw kha a ho hae. Lystra kya Paul A Deih hae

⁸Lystra khua kyakhe a pui takaw te a ccukhoupaw, laanpi kharouh cceih boi leipaw lu kheit tuh a la dahung.⁹Paul nynh a hopaw bya kha aning nynh a ngae. Paul nynh tuh-e paw tuh riri do zah, phe a dan lan ciate zynnaw a hoi cipaw he a nyh tuh,¹⁰“Thokuh lah lawbabin lan thadyn,” cite roi accae lante a hopya. Tetuh tuh-e paw tuh thokuh zah laanpi a cceih.¹¹Paul nynh a cyipaw kha ccungccaw hae nynh he a muih hae tuh, mimaw Likaonia bya te, “Ccungccaw muinsan hawte pachia hae nynh aening kalan oun rungbung hae!” cite a sia hae.¹²Minmin nynh Barnabas kha Zeus cite ko hae zah Paul tuh phunghotu lupi athua keiccuze Hermes cite a ko hae.¹³Tuh-e khua atolang umpaw beikinn a hoitu Zeus a ranpibawi nynh tangnuapaw hae te haetapawsi hae kha koikua kalan yn cciakhae; pawccecize aning te ccungccaw zapi nynh locceihtu hae kalan silawkunaw rae lan a ry hae.¹⁴Tuh-e tuh locceihtu hae Barnabas te Paul nynh he a thae hae tuh, mih boeining kha seii hae zah ccungccaw hae laku lang ccue hae zah,¹⁵“Ruiban hae, pawccemou hynhte na cyi oh? Kaening tuh naemaw hawte ccungccaw hae nynh kae thua, nanning nynh hynh-e accakaepaw uccaw hae kyate vaaw te lae te rili te tuh-e hae kya a umpaw balyn a raetu, a hiinpaw Pachia kalan na paleihku oh ccaw cite nae kalan thehoypaw kae hopaw nynh kae thua.¹⁶Langmawlya tuh Pachia nynh minphuin hae balyn kha mih rythyte um lan a la ua hae.¹⁷Tuhzemah ahoypaw a raenaw kyakhe amaw a um cipaw kha ccaekia langsaku leite um khyh, nanning elang vaawlang te khuaarawsah zah thingthae-eccang a pousahpaw kumvaelori kha ae pya oh, looh ae bynsah oh zah nae thinlung kha lungtuanaw te ae biasah oh,” cite thawmawte a sia hae.¹⁸Tuh-e bya tuhte locceihtu hae nynh mimaw kalan silawnaw a rae khyh nawlan hae ccungccaw zapi kha kou ru lante a khee kho hae.

¹⁹Antiok te Ikonium khua hae kyate Judah hae abang tuh tuhlang oun thua hae zah ccungccaw zapi kha mih kalan a pansah kho hae. Paul kha lung te a deih hae, a chih vae cite tua hae zah khua atolang khe a sue hae.²⁰Thuasalama zuitu hae nynh phang a koihlu lya hae khe, Paul tuh thokuh zah khualae lang bua a tee. Awkhualan tuh Barnabas ryte Derbe khua lang a cceih hae. Antiok Khua lang Kinaw

²¹Paul te Barnabas nynh tuin khua kya thehoypaw ho hae zah ccungccaw patae kha zuitu lang a tangsah hae, minmin tuh Lystra khua, Ikonium khua te Antiok khua lang a ki hae.²²Zuitu hae thinlung kha thawzung pyate, zynnaw kya po atyn nawlan hae hyy hae zah, “Aening tuh tuaasahnaw patae tung biate nynh Pachia peenaw lungkhu lang ah tee cih oh,” cite a hopya hae.²³Khriccaawbuu takyh kya piccan hae kha khang hae zah looh-ae sungte saw a sang kou hae te, a zyn hae paw Bawipaw kalan khe tuh-e piccan hae tuh a ap hae.²⁴Minmin nynh Pisidia ram kha po a lesakuh kou hae te, Pamfilia ram lang a thua hae.²⁵Perga khua kya Bawipaw bya a ho kou hae te, Attalia khua lang a cceihbung hae.²⁶Tuin kyate Antiok khua lang sanphalung te a ki hae; Antiok khua tuh a lyn vae hae paw ryalaw hanlan Pachia thawccinaw kalan a apnaw hae khua nynh thua.²⁷Antiok khua a thua hae te, khriccaawbuu hae kha suelua hae zah Pachia nynh minmin ryte rya a lawpaw balyn kha thuasah, Zenta hae elang zynnaw thuakaw a hungpya hae paw kong kha thuasah a hopya hae.²⁸Minmin tuh zuitu hae ryte tuin kya khaw cia a umkheih hae. Jerusalem Kungsi

¹Judea ram kyate Antiok khua lang oun thua hae paw ccungccaw abang nynh zyntu uno hae kha, “Moses phungbya thyhte vingdungaw na thua khyh oh ze, khum na thua kho lan khyh oh,” cite a ccangpya hae.²Tukeiccuze Paul te Barnabas tuh tuh-e hae ryte myarya lepaw lungloku leinaw hoi hae zah a eikuh hae, tukeiccuze Paul, Barnabas te ccangpaw ccungccaw abang kha Jerusalem lang cciasah lan hae zah tuh-e konglang tuh locceihtu hae te piccan hae ryte hotua lan bya a pae hae.³Khriccaawbuu nynh saw hae zah Foenisia te Samaria ram kya po a ccia lya hae khe, Zenta hae mih lungpaleihkunaw kong kha a hopya hae; zyntu hae balyn kha myarya mih lungtuasah hae.⁴Jerusalem he a thua hae te, locceihtu hae, piccan hae te khriccaawbuu nynh minmin kha a cciadue hae, te Pachia nynh minmin mangte rya a lawpaw balyn kha a hopya hae.⁵Thuasalama Farasi hae phu kya-e zyntu hae abang nynh thadyn hae zah, “Zenta hae tuh vingdungawku ho zah Moses Kawbya zui lan ccangpya hae aho,” cite a ho hae.

⁶Locceihtu hae te piccan hae tuh tuh-e kong tuakheih lan a sueluakuh hae.⁷Eikunaw patae a um koute Peter nynh thadyn zah, “Uteno hae, Zenta hae nynh thehoypaw a thae nawlan hae te a zyn nawlan hae, anulang lyakhe nanning laku kyate Pachia nynh kae kha yn po cipaw na ny oh.⁸Thinlung a nyhpaw Pachia nynh Thyaa Muisaw kha aening oun pya hawte minmin kha mah pya hae zah minmin hanlan ccaekia a langsah.⁹Zynnaw liate Pachia nynh mih thinlung kha thyaasah hae zah, aening te minmin laku laesahnaw umsah khyh.¹⁰Tukeiccuze atu ah minpaaw hae te aening nynh ah phu kho lei oh paw phupaw kha zuitu hae raw vawlan khangte pawccemou Pachia kha na syntawtua oh?¹¹Thuasalama Bawipaw Jesu Khri thawccinaw liate minmin tuh khum athua hae hawte aening mah khum ah thua cih oh cite ah zyn oh,” a cipya hae.

¹²Te ccungccaw zapi balyn tuh daebabi lan um hae zah, Barnabas te Paul nynh mimaw kha Pachia nynh mangte Zenta hae laku kya muihsahnaw hae te ngaeangnaw hae a langsahkupaw kong a ho hae paw kha a ngae hae.¹³Minmin nynh bya a ho kou hae te, James nynh tho zah, “Uteno hae, ka bya hynh yn ngaepya tua oh:¹⁴Pachia nynh amaw min hanlan Zenta hae kyate ccungccaw abang kha po khylan Zenta hae kalan masaty a paebuanaw kong kha Simeon nynh phe a ho vae.¹⁵Tuh-e bya te profeh hae bya tuh phe lokuh; Ccathyaa kyaze:¹⁶‘Hynh-e koute ka ki cih zahphe a pu vae paw David bu khaka sakthui cih, tuh-e aronahpaw khaka sakthui cih zahbua ka thadynsah cih,¹⁷tuhteze nynh ccangpawminphuin hae balyn teka min te ko athua hae pawZenta hae balyn nynhBawipaw kha a ccung cih hae.

¹⁸Laephi thotakaw te hynh-e bya oun nysahtu Bawipaw nynh a ci,’ cite azeikuh.

¹⁹Tukeiccuze ka ho rypaw tuh, Pachia kalan oun paleihkuh hae paw Zenta hae kha vawsaw pya nan oh sih.²⁰Thuasalama zohtuh hae kalan pyapaw looh anungsikuhpaw kha thuasah, nopi pise seinaw kha thuasah, nging-ote a chia hae paw kha thuasah, chii kha thuasah minmin nynh a sung nawlan hae aening nynh ccaw ky oh sih.²¹Pawccecize langmawlya mawte Moses kawbya kha khua takyh kya ho thua zah, sinakok hae kyakhe sabbath nin takyh a kawbya tuh ria athua,” a ci. Zenta Zyntu hae kalan Ccaky

²²Te locceihtu hae, piccan hae te khriccaawbuu pynpi nynh mih memba hae lungkhu e pise hae kha po hae zah Paul te Barnabas ryte Antiok khua lang saw lan bya a pae hae. Uno hae lakuze cciakhaetu athua hae paw Barsabbas a ci hae paw Judas te Silas kha²³akawlan e ccaw hynh phusahte a saw hae: “Nae uno hae kae thuapaw kaening locceihtu hae te piccan hae nynh Antiok khua, Siria ram te Silisia ram kya na um oh paw thokeinaw lante Zenta na thua oh paw zyntu hae kha kae beihlang oh!²⁴Kaw kae pya lei hae te kae kyate oun cceih hae paw ccungccaw abang nynh mih bya te vawsawnaw ae pya oh zah nae lungria ae thaesah oh cite kae thae. ²⁵Tukeiccuze locceihtu hae kha po lan zah tuh-e hae tuh kae sungsah hae paw Paul te Barnabas ryte nae kalan saw lan hae cite kae balynte bya kae pae.²⁶Minmin tuh ah Bawipaw Jesu Khri min hanlan mih hiinnaw a pyakuh ngan hae paw nynh athua hae.²⁷Tukeiccuze Judas te Silas kha nae kalan kae saw hae, minmin nynh ccaw kya kae zeipaw konglang kha mih mung te ae la hopah cih oh.²⁸Akawlan e ahoboupaw phung hae laelan ccangpaw phupaw kha nae tungvaw khang lanpaw tuh Thyaa Muisaw te kaening nynh kae ry vae khyh.²⁹Tuh-e ahoboupaw phung hae tuh: zohtuh hae kalan silawnaw hae paw looh thuasah, chii thuasah, nging-ote a chia hae paw saw thuasah, nopi pise seinaw thuasah nanning nynh la sungkuh oh. Tuh-e hae tuh na sungku oh ze, kou ahoypaw nynh thua. Ngedante,” cite a zei hae.

³⁰Tuhte minmin kha saw hae zah Antiok khua a thua hae; ccungccaw zapi kha suelua hae zah ccaky kha a pya hae.³¹Tuh-e ccaw he a ria hae tuh, thawzung pyanawpaw bya athua keiccuze mih lungtua.³²Judas te Silas tuh profeh hae athua hae keiccuze zyntu hae kha bya patae hopyate thawzung pya hae zah mih lungthaw a saesah hae.³³Minmin tuh tuin kya ccyh khuekheih a um kou hae te, zyntu hae nynh a sawtu hae kalan ngaengante a kisah hae.³⁴Tuhzemah Silas tuh tuin kya a umhy. ³⁵Paul te Barnabas tuh Antiok khua kya um hae zah mingccang hae patae ryte Bawipaw bya kha ccangpah hae zah a hopya hae. Paul te Barnabas Phiakunaw

³⁶Nin beihtaraw aro koute Paul nynh Barnabas kha, “Bawipaw bya ah honaw khua takyh kya um hae paw zyntu hae nynh pawtemou a um hae cipaw dotua khylan bua cceih sih lah paebua sih,” a cipya.³⁷Barnabas nynh Marka a ci hae paw Johan kha mih kya hoeibua lan a ry.³⁸Thuasalama Pamfilia ram kya minmin kha kitaw hae zah ryalawnaw kalan mih kya a cceihbua vae leipaw Marka kha hoeibua lan ccan khyh cite Paul nynh a tua.³⁹Tuhte minmin laku lungloku leinaw tuh myarya le zah phe a phiakuh hae; Barnabas nynh Marka kha hoeikuh zah Saipras tuikoih kalan sanphalung te a cceih hae.⁴⁰Paul nynh Silas kha pokuh zah zyntu hae nynh Paul kha Bawipaw thawccinaw kalan a ap kou hae te, a cceih hae.⁴¹Paul tuh Siria ram te Silisia ram lang po cceih zah khriccaawbuu hae kha thawzung a pya hae. Paul te Silas kya Timote Cceihbua

¹Paul tuh cceih zah Derbe khua te Lystra khua kya a thua; tuin kyakhe Timote a ci hae paw zuitu lu kheit a la um, a nung tuh Judahnung thua zah zyntu nynh thua, a paaw tuh Grikpaw nynh thua.²Timote tuh Lystra khua te Ikonium khua kya umpaw zyntu hae kyaze thehoy a ccoupaw nynh thua.³Paul nynh Timote kha a kya cciasah bua lan a ry; a paaw tuh Grikpaw nynh thua cipaw kha tuin ram e Judah hae balyn nynh a ny hae keiccuze Timote kha hoei zah vingdung a awpya.⁴Minmin nynh khua kheit koute khua kheit cceih hae zah Jerusalem e locceihtu hae te piccan hae nynh byapae hae paw phung kha a zui ccaw hae cite po a neebia hae.⁵Tukeiccuze khriccaawbuu hae tuh zynnaw kya tynsah thua hae zah nin takyhte milu alungthung. Mesidonia lang Konaw

⁶Asia ram kya Pachia byaho lanpaw kha Thyaa Muisaw nynh a khee hae keiccuze Frikia te Galatia ram lang po a cceih hae.⁷Misia ramri he a thua hae te, Bithynia ram lang ccia lan a zuaku hae, thuasalama Thyaa Muisaw nynh ua khyh hae,⁸tukeiccuze Misia ram te po sulue hae zah Troas khua lang a cceihbung hae.⁹Khuazi khe Paul nynh vizin a muih: Mesidonia paw lu kheit nynh thadyn zah, “Mesidonia ram lang yn cceih lah kaening hynh oun bawm,” cite a ngia.¹⁰Paul nynh vizin a muih koute, Mesidonia ram lang ccia lan palou kae paccynkuh vae; minmin kalan thehoypaw ho khylan Pachia nynh oun ko cite kae tuaku. Lidia Lungpaleihkunaw

¹¹Tukeiccuze Troas khua kyate sanphalung te kae thokuh zah Samothrasia tuikoih kalan lawbabin lan kae cceih zah awkhualan tuh Neapolis khua kae thua.¹²Tuin kyate Mesidonia ram kyaze abyapi huapaw khuapi Filipi khua kya kae thua, tuh-e khua tuh Rom uknaw zakaw a umpaw nynh thua; tuin khua kya nin patae kae um.¹³Sabbath nin kyakhe khua koikua khunglang kae pou zah sawsangnaw leih a raenaw hae cite kae tuanaw vawkhu kin langkhe kae cceih; tuin kya kae dahung zah oun sueluakuh hae paw nopi hae kha kae hopya hae.¹⁴Thiatira khua e Lidia a ci hae paw nopinung lu kheit, boei sepaw a zuanung tuh Pachia a beikpaw thua zah kae bya kha a ngaebua; Paul nynh a hopaw bya kha hoyte ngae khylan Bawipaw nynh tuh-e nung thinlung kha a hungpya.¹⁵Tuh-e nung te a innbyn hae tuh baptisma a in kou hae te, aning nynh, “Kae hynh Bawipaw a zynnung cite nae tua oh ze, ka inn lang oun cceih oh lah um hin oh,” cite oun ngia. Kaening kha thawte oun kang. Thonginn kya Paul te Silas

¹⁶Nin kheit tuh kaening nynh sawsangnaw kalan kae ccia lyakhe, muisaw bahkuh zah malang e konglang a hodaethyapaw seenung taraw lu kheit te kae tungkuh. Malang yn cyihkuh lanpaw kong a hodaenaw liate a bawi a zua hae kha phua patae a muepya hae.¹⁷Tuh-e nung nynh Paul te kaening kha oun zui zah, “E ccungccaw hae tuh Ahang Huaccepaw Pachia see hae thua hae zah khumnaw laanpi kong ae hopah oh paw nynh athua hae,” cite thawte a sia.¹⁸Aning nynh tuhcite nin patae cia a cyi. Paul nynh myarya thinsote nulang hawi zah muisaw kha, “Hynh-e nung lungkhu te pou, Jesu Khri min te kaw kae pya,” a cipya. Tuh ccyh lya mawtuin muisaw tuh po a pou.

¹⁹Tuh-e nung a bawi hae nynh phua muenaw elang ngaehoinaw um vae khyh cipaw kha he nyh hae tuh, Paul te Silas kha kyng hae zah kungkunaw hmin kalan kawhoitu hae malang a thuakhae hae.²⁰Minmin kha bawi hae kalan cciakhae hae zah, “E ccungccaw hae tuh Judah hae thua hae zah ah khua kha vawsawnaw oun pya hae.²¹Aening Rom hae nynh lawku lan accan leipaw te zui lan accan leipaw phung hae kha oun ccangpya hae,” cite a hopya hae.²²Ccungccaw zapi hae tuh minmin a rawsetu hae kalan a panbua hae, te bawi hae nynh mih boeining kha seii hae zah tungbang te bua lan kaw a pya hae.²³Avae patae a bua kou hae te, thonginn kya sah hae zah thong uktupaw kha hoyte rin lan kaw a pya hae.²⁴Tuhte kaw a pya hae thyhte, thong uktupaw nynh minmin kha alungkhu e thong kyakhe nung hae zah mih ccu kha thingtung te lua a saw hae.

²⁵Ziraccyng khe Paul te Silas tuh sawsang hae zah Pachia thehoysahnaw hlaw a sah hae; te thongccah hae nynh a ngae hae.²⁶Tualeipite innry thawte yn suekuh zah thonginn leihpaw tuh pong ahy; vaekheihmawte thuakaw hae balyn pong oun hungkuh zah thongccah hae miakaw kya-e sivawrui tuh pong akhahkuh.²⁷Thong uktupaw tuh a inaw kyate yn thaekuh zah thonginn thuakaw hae pong ahungkuhpaw kha he a muih tuh, thongccah hae pong ccue vae cih hae cite tua zah amaw te amaw chiaku lan cite a thaloi kha a thuaaku.²⁸Thuasalama Paul nynh thawte sia zah, “Namaw te namaw vawsaw pyakuh nan, pawccecize kae balynte hein kya pong kae um,” a cipya.²⁹Thong uktu nynh maee kha kokhae hae zah arangte tee zah Paul te Silas malang thyngku biate a bakhung.³⁰Tukoute minmin kha poukhae hae zah, “Sazae oh, khumnaw mue khylan pawmou ka cyih cih?” cite a khia hae.³¹Minmin nynh, “Bawipaw Jesu Khri kha zyn lah nang tuh khum na thua cih, te na innbyn hae mah khum athua cih hae,” a cipya hae.³²Minmin nynh tuh-e paw te a inn kya um hae paw balyn kha Bawipaw bya a hopya hae.³³Aning nynh Paul te Silas kha tuh-e khuazi, tuh-e ccyh kya mawtuin cciakhae hae zah mih vaemaw kha a singpya hae; te aning te a innbyn hae balyn tuh baptisma palou a in hae.³⁴Aning nynh minmin kha a inn lang hoei hae zah looh a dang hae; aning tuh Pachia zyntu lang tang zah a innbyn hae balyn ryte myarya mih lungtua.

³⁵Khua yn dae tuh bawi hae nynh palih bawi hae kha saw hae zah, “Tuh-e ccungccaw hae tuh cceih hae sah,” a cipya hae.³⁶Thong uktu nynh tuh-e bya tuh Paul kalan hopah zah, “Bawi hae nynh ccungccaw oun saw hae zah nanning kha cciasah lan bya oun taw hae, tukeiccuze atu toikuh oh lah daebabi lan la cceih ccavae oh,” a cipya.³⁷Thuasalama Paul nynh, “Rom accozah kya-e ramccungccaw kae thuapaw kaening hynh akaw-aleih byakhia leite zapi malang oun bua hae zah thonginn kya oun saw hae; atu aruh lante tou hung oun saw cih hae? Tuhte thua khyh! Mimaw ccaccei oun cceih hae sah lah kaening hynh oun pousah hae sah,” cite a khung hae.³⁸Palih bawi hae nynh tuh-e bya tuh bawi hae kalan a hopya hae. Paul te Silas tuh Rom accozah kya-e ramccungccaw hae nynh athua hae cipaw he a nyh hae tuh a rih vae hae.³⁹Tukeiccuze bawi hae tuh oun cceih hae zah minmin kha thawte a bohku hae; te thonginn kyate pousah hae zah, tuin khua kyate a toiku nawlan hae a ngia hae.⁴⁰Paul te Silas tuh thonginn kyate pou hae zah Lidia inn lang a cceih hae; minmin nynh uno hae kha muih hae zah thawpyanaw bya a hopah kou hae te, a pou hae. Thesalonika kya Paul te Silas

¹Paul te Silas tuh Amfipolis khua te Apollonia khua kya po cceih hae zah Thesalonika khua lang a thua hae, tuin kya Judah hae sinakok ccangkheit a um.²Paul tuh leih a cyimae hawte, sinakok kalan teebua zah sabbath nin ninthum cia minmin ryte Ccathyaa kya-e kha a hokuh hae.³Messiah tuh chinaw a ing cih zah chinaw kyate a thoothui aho cite ccaesahpah hae zah a langsahpya hae. Paul nynh, “Nae kya kae hopya oh paw Jesu hynh Messiah nynh thua,” a cipya hae.⁴Tuh-e hae kyaze abang tuh zyn hae zah Paul te Silas kya a mungkuh bua hae; te beiknaw lang a zuakuh hae paw Grik ccungccaw patae te cciakhaetu nopi hae patae mah zyn hae zah a mungkuh bua hae.⁵Thuasalama Judah hae nynh mih eiung zah kungkunaw hmin kya umpaw ccungccaw hoylei hae abang kya-e bawmnaw liate a khiavuikuh hae paw kha suelua hae zah khualae balyn kha siarisiarae a umsah hae; Jason a inn kha koih hae zah Paul te Silas kha ccungccaw hae malang poukhae lan a ccung hae.⁶Minmin kha he a muih khyh hae tuh, Jason te zyntu hae abang kha khua uktu hae kalan sue hae zah, “Laephi a buleih hae paw hynh-e ccungccaw hae tuh hynhlang mah oun thua hae zah,⁷Jason nynh minmin kha a inn kya a thuasah hae. Minmin balyn nynh, ‘Jesu a ci hae paw ccangpaw siapharan a um,’ ci hae zah Sizar siapharan phung hae kha a rawse hae,” cite thawte a sia hae.⁸Ccungccaw hae te khua uktu hae nynh tuh-e bya a thae hae tuh, mih lungvawsaw.⁹Kawhoitu hae nynh Jason te mingccang hae kha aamahkhan pyanawpaw phua a nungsah kou hae te, a cciasah hae. Berea Khua kya Paul te Silas

¹⁰Tuh-e khuazi khe zyntu hae nynh Paul te Silas kha Berea khua lang a saw hae; tuin khua kya he a thua hae te, Judah hae sinakok lang a cceih hae.¹¹Berea khuaccaaw hae tuh Thesalonika khuaccaaw hae hawte mih lungping khyh, thehoypaw kha pekite ngae hae zah, tuh-e bya tuh akyh kyh khyh cipaw ny nawlan nin takyhte Ccathyaa te a dokhia hae.¹²Tukeiccuze tuh-e hae patae nynh a zyn hae; sawtua lan umpaw Grik nopi hae te pise hae patae nynh mah a zyn hae.¹³Thuasalama Thesalonika khua kya-e Judah hae nynh Berea khua kya Paul nynh Pachia bya a ho cipaw he a nyh hae tuh, tuhlang tuin cceih hae zah ccungccaw hae kha a tuhou hae.¹⁴Tetuh zyntu hae nynh Paul kha rili kin langkhe palou a saw hae; thuasalama Silas te Timote tuh tuin kya a umhy hae.¹⁵Paul a saw hae paw nynh Athen khua kyacia a saw hae; Silas te Timote kha ka kalan arangte oun cceih hae sah cite Paul nynh bya a taw kou hae te, minmin tuh a ki hae. Athen Khua kya Paul

¹⁶Paul nynh Silas te Timote kha Athen khua kya a ngaw lya hae khe, tuin khua kya zohtuh hae phe abiapaw kha a muih tuh a lungvawsaw.¹⁷Tukeiccuze sinakok kyakhe Judah hae te beiknaw lang a zuakuh hae paw kha thuasah, kungkunaw hmin kya leih a tungkuh hae paw kha thuasah nin takyh bya a hokhae hae.¹⁸Epikurian sazae hae abang te Stoik filosofa hae abang tuh Paul te a eikuh hae. Abang nynh, “E paw nynh katuakatua a ccohkupaw hynh pawmou a ho ry?” a ci hae. Mingccang hae nynh, “Aning tuh ramccang pachia hae kong a hotupaw nynh alo,” a ci hae. Pawccecize Paul nynh Jesu kong te thoothuinaw kong kha a hopya hae keiccu nynh thua.¹⁹Minmin nynh Paul kha hoei hae zah Areopagas lang cciakhae hae zah, “Na hopaw hynh-e ccangpyanaw athawpaw hynh ny kae ry.²⁰Pawccecize na hopaw hynh kae la thae boi leipaw nynh thua; tukeiccuze hynh-e hynh asuilan pawmou athua cipaw ny kae ry,” a cipya hae.²¹Pawccecize Athen khuaccaaw hae balyn te tuin kya um hae paw mipe hae tuh athawpaw thongpang honaw te thaenaw kyakhe mih ccyh kha leih a mang hae. Mars Mua kya Paul

²²Paul tuh Areopakas zung malang khe thadyn zah, “Athen khuaccaaw hae, nanning tuh beiknaw kha aphuinphuin te myarya nae peki cipaw ka ny.²³Pawccecize khualae khe po ka cceih zah na beik oh paw uccaw hae kha hoyte ka do zah, tuh-e hae laku kya, ‘Ny leipaw pachia kalan,’ cite ccaw atawkuhpaw silawhang ccangkheit kha ka muih. Tukeiccuze nanning nynh ny leite na beik oh paw tuh-e Pachia kong kha nynh kae hopya oh.²⁴Laephi te tuin kya umpaw atyn-are a raetu Pachia tuh vaaw te lae Bawipaw thua zah, ccungccaw kuih te raepaw beikinn kya um khyh.²⁵Pachia tuh ccungccaw balyn kha hiinnaw, hy te atyn-are oun pyatu athua keiccuze, a hanlan pawsang mah ho khyh zah ccungccaw hae kuih te lawpya mah ho khyh.²⁶Aning nynh ccungccaw lu kheit kyate minphuin miakaw kha rae zah laephi pynpi kya a umsah hae; mih hiinnaw ccyh te mih umnaw ramri kha a khyapya hae.²⁷Tuhte a khyapya hae paw tuh, ccungccaw hae nynh Pachia kha ccung hae zah a muih nawlan hae nynh thua, thuasalama Pachia tuh aening lu raveih te ah sawkuh khyh oh.²⁸Pawccecize ‘Aening tuh amaw kya nynh ah hiin oh, ah pia oh zah ah um oh’; nanning laku e byarui a phuatu hae abang nynh,‘Aening mah amaw ciihannynh ah thua oh,’cite a phua hae hawte nynh thua.²⁹Aening tuh Pachia ciihan ah thua oh keiccuze ccungccaw thyanaw te tuanaw liate raepaw sui zohtuh, phua zohtuh, lung zohtuh te nynh Pachia tuh aloku cite ah tua lan oh paw thua khyh.³⁰Ccungccaw hae nynh Pachia a la ny khyh lya hae tuh Pachia nynh a muih leipaw o-ang lante a umpya hae, thuasalama atu tuh hmin takyh kya umpaw ccungccaw hae balyn kha ngaesiku lan kaw a pya hae.³¹Pawccecize Pachia nynh a po vae paw ccungccapaw liate laephi hynh dingnaw te bya a pia cih nin kha phe a khyade vae. Tuh-e paw kha chinaw kyate a thoosahnaw liate ccungccaw balyn hanlan atynpaw ccaekia kha a langsah vae,” cite Paul nynh a ho.

³²Minmin nynh chinaw kyate thoothuinaw kong kha he a thae hae tuh, abang nynh a sarya hae; thuasalama mingccang hae nynh, “E kong hynh bua kae thae ry ung,” a ci hae.³³Te Paul tuh minmin kyate phe a pou vae.³⁴Tuhzemah ccungccaw abang tuh Paul kalan pan hae zah a zyn hae; tuh-e hae kyatuin Areopagas zung kya-e bawi Dionisias, Damaris a ci hae paw nopinung te mingccang hae mah a panbua hae. Korin te Efesa kya Paul

¹Tukoute Paul tuh Athen khua kyate cceih zah Korin khua kya a thua.²Tuin kyakhe Pontas ram kya a puipaw Akuila a ci hae paw Judah paw te a tungkuh hae; tuh-e Akuila tuh a zu Prisilla ryte Italy ram kyate a la thuanaw hae asaw loh leipaw nynh thua, pawccecize Judah hae balyn tuh Rom khua kyate marya a pou cih hae cite Klaudias siapharanpaw nynh kaw a la tho; Paul tuh minmin te tungku khylan cceih zah,³mih ryalaw aloku keiccuze mih kya umbua zah rya a lahkheih hae; minmin tuh anuekuh thyapaw bu a raetu hae nynh thua.⁴Sabbath nin takyh Paul nynh sinakok kya bya hokhae hae zah Judah hae te Grik hae kha a hyy hae.

⁵Silas te Timote nynh Mesidonia ram kyate he oun thua hae tuh, Paul nynh a ccyh balyn kha phungho nawlan mang zah, Jesu tuh Messiah nynh thua cite Judah hae kalan ccaekia a khan.⁶Judah hae nynh Paul kha rawse hae zah a thethyasah hae keiccuze, Paul nynh a boeining kya-e vuiping kha thyngnua hae zah, “Nae chii tuh naemaw lu vawlan thua vae sah! Kae tuh ka thyaa; atu te Zenta hae kalan nynh ka cceih vae cih,” a cipya hae.⁷Paul tuh sinakok kyate pou zah Pachia a beikpaw, Titias Jastas a ci hae paw ccungccapaw inn lang a tee; tuh-e paw inn tuh sinakok te phang abekuh.⁸Sinakok uktupaw Krispas tuh a innbyn hae balyn ryte Bawipaw kha a zyn hae; te Paul bya a thaepaw Korin khuaccaaw hae patae mah zyn hae zah baptisma a in hae.⁹Khuazi khe Bawipaw nynh Paul kha vizin te bya hopah zah, “Rih nan, ho ccaleih lah umtaw nan;¹⁰pawccecize na kya ka um zah vaemaw muesah lan hum nynh san ae zia lan khyh; pawccecize hynh-e khua kya ccungccaw patae ka hoi,” a cipya.¹¹Tuin kyakhe Paul tuh kum kheit sah taruh cia um zah Pachia bya kha a ccangpya hae.

¹²Kalio nynh Akhai ram kya mangki bawi lang a tang lyakhe Judah hae nynh lungngingte Paul kha kyng hae zah byapianaw zung lang thuakhae hae zah,¹³“E paw nynh Kawbya te arawsekuh lante Pachia kha beik lan ccungccaw hae kha a soih hae,” cite a ho hae.¹⁴Paul nynh byaho lan he a cih tuh, Kalio nynh Judah hae kha, “Pou Judah hae, tuh-e tuh aseipaw uccaw te ahoy leipaw uccaw athua lanze, kae nynh nae byathan kha lehkhan lan accan.¹⁵Thuasalama tuh-e tuh bya konglang, min konglang te nae kawbya konglang te asekuhpaw byakhianaw athua zetuh naemaw te naemaw bya la piakuh oh; pawccecize tuhcihawpaw konglang tuh bya kae pia ry khyh oh,” a cipya hae.¹⁶Minmin kha byapianaw zung kyate pong a dee hae.¹⁷Grik hae balyn nynh sinakok uktupaw Sosthenes kha kyng hae zah byapianaw zung malang khe a bua hae. Thuasalama Kalio nynh tuh-e tuh pawlangria khyh.

¹⁸Paul tuh tuin kya khaw cia a um koute, zyntu hae kha beihsya hae zah Siria ram lang Prisilla te Akuila ryte sanphalung te a cceih hae. Byakinkunaw a rae vae keiccuze Kenkhrea khua kyakhe a sang a ngoku sya.¹⁹Efesa khua a thua hae tuh, Paul nynh minmin kha tuin kya a cciataw hae; amaw tuh sinakok lang tee zah Judah hae ryte bya a hokuh hae.²⁰Minmin nynh Paul kha khaw cia umkheih lan ngia hae zah Paul nynh a nawccah khyh.²¹Minmin kyate a ccia mawkhe beihsya hae zah, “Pachia rynaw athua zetuh nae kalan bua kae ki cih,” a cipya hae. Tukoute Efesa khua kyate sanphalung te a cceih.

²²Paul nynh Sisaria khua he a thua te, Jerusalem lang kaethung zah khriccaawbuu kha a beih hae, tukoute Antiok lang a cceihbung.²³Tuin kya azawlya a um koute Paul tuh cceih zah Galatia ram kyate Frikia ram kya po khuaccong zah zuitu hae balyn kha thawzung a pya hae. Apollos Ryalawnaw

²⁴Alexandria khua kya pui zah byaho kou apuakuhpaw te Ccathyaa kou nyhpaw Apollos a ci hae paw Judah paw lu kheit tuh Efesa khua lang yn thua.²⁵Tuh-e paw tuh Bawipaw Laanpi konglang hoyte a ccangkuhpaw nynh thua; Jesu konglang kha lungthote ho zah hmerarih lan a ccangpya hae; tuhzemah Johan baptisma kong rou nynh a ny.²⁶Aning nynh sinakok kyakhe rawhoyte phunghonaw kha a tho vae; Akuila te Prisilla nynh a hopaw kha he a thae hae tuh, amaw kha ccanglang hoei hae zah Pachia Laanpi kha houh ahme lante a ccaesahpya hae.²⁷Apollos nynh Akhai ram lang he a cceih ry tuh, zyntu hae nynh amaw kha thawzung pya hae zah leh a khan ccaw hae cite zuitu hae kalan ccaw a zeipya hae; aning nynh he a thua tuh, Pachia thawccinaw liate zyntu lang a tang hae paw kha patae a bawm hae;²⁸Pawccecize Jesu tuh Messiah nynh thua cipaw kha Ccathyaa kya-e langsapyate ccungccaw zapi malang Judah hae kha rawhoyte a ei kho hae. Efesa Khua kya Paul

¹Apollos tuh Korin khua kya a um lyakhe, Paul tuh tuin ram lungkhu kya khua po ccong zah Efesa khua kya a thua, tuin kyakhe zuitu hae abang kha muih hae zah,²“Zyntu lang he na tang oh te, Thyaa Muisaw na mue vae oh tou?” cite a khia hae. Minmin nynh, “Thyaa Muisaw a um cipaw sanmah kae thae boi khyh,” cite a khung hae.³Paul nynh, “Tuhteze pawcihawpaw baptisma mou na in oh?” cite a khia hae. Minmin nynh, “Johan kya-e baptisma,” a ci hae.⁴Paul nynh, “Johan nynh tuh ngaesikunaw te asekuhpaw baptisma kha pya hae zah amaw koute yn thua cih paw kha a zyn nawlan hae ccungccaw hae kha a hopya hae, tuh-e paw tuh Jesu nynh thua,” a cipya hae.⁵Tuh-e bya he a thae hae te, Bawipaw Jesu min te baptisma a in hae.⁶Paul nynh minmin tungvaw a kuih he a khang tuh, mih tungvaw kya Thyaa Muisaw yn thua; te minmin tuh bya ccangpaw te ho hae zah profehbya a ho hae.⁷Tuh-e hae tuh mih balynte lu haw lae ning loukaw acih hae.

⁸Paul tuh sinakok kalan tee zah sawpaw sah thum cia rawhoyte a hopya hae, Pachia peenaw kong kha hokhae hae zah a hyy hae.⁹Thuasalama ccungccaw abang tuh mih lungkhung zah zyn khyh hae, minmin nynh ccungccaw zapi malang khe Bawipaw Laanpi kong kha thethya he a ho hae tuh, Paul nynh minmin kha cciataw hae zah zuitu hae kha a hoeibua hae, te Tirannas a ci hae paw siainn kyakhe nin takyh a ccangpya hae.¹⁰Tuhcite kum ning lungkhu a cyi keiccuze Asia ram a um hae paw Judah hae te Grik hae balyn nynh Bawipaw bya kha a thae hae.

¹¹Pachia nynh Paul kha mangte acyihkuh boi leipaw ngaeangnaw hae kha a rae.¹²Paul a pyn kya-e pavua hae tuhkhyhze taeccia uccaw kha ngeccih hae kalan ccyngpah hae zah mih ccinaw tuh a dan hae, te ahoy leipaw muisaw hae mah a toikuh hae.¹³Ahoy leipaw muisaw hae a deethya hae paw, a khiavuikuh hae paw Judah hae abang nynh, “Paul nynh a hopaw Jesu liate nanning kha kae dee oh,” cite ahoy leipaw muisaw hae nynh a ccungnua hae paw tungvaw khe Bawipaw Jesu min kha mang lan a zuaku hae.¹⁴Judah ranpibawi lupi Skeva cikuhpaw a ccaaw hae lu sari nynh tuhte a cyihbua hae.¹⁵Ahoy leipaw muisaw nynh, “Jesu tuh ka nyh, Paul mah ka nyh; thuasalama nanning tuh hum hae mou na thua oh?” cite a khung hae.¹⁶Ahoy leipaw muisaw bahkuhpaw ccungccapaw nynh minmin tungvaw thohnuakuh hae zah phe a tae hae keiccuze tuh-e inn kyate mih sasete ccue hae zah vaemaw a muebia hae.¹⁷Tuh-e kong tuh Efesa kya um hae paw Judah hae te Grik hae balyn nynh he a thae hae tuh, rih hae zah Bawipaw Jesu min kha the a hoysah hae.¹⁸Zyntu hae patae oun thua hae zah mih cyisahnaw kha langsakute a phyku hae.¹⁹Mitleihthya hae paw patae nynh mih ccauh hae kha suelua hae zah zapi malang khe maee te a soi hae; tuh-e ccauh hae mee tuh tuaa hae zah ngunphua thong sung pangaw mee acih cipaw a muih hae.²⁰Tuhcite Pachia bya tuh a thaw houhouh sae zah taenaw a mue.

²¹Hynh-e hae acyikuh koute, Paul nynh Mesidonia ram te Akhai ram lang khua po ka ccong koute Jerusalem lang ka sulue cih cite a noukuh. Aning nynh, “Tuhlang ka cceih koute Rom khua mah ka muih hahe aho,” a ci.²²Tukeiccuze amaw a bawmtu hae lu ning, Timote te Erastas kha Mesidonia ram lang saw hae zah, amaw tuh Asia ram kya sosoh a umhy ung. Efesa Khua kya Byalungnaw

²³Tuh ccyh lyakhe Bawipaw Laanpi konglang te myarya lepaw byalungnaw a um.²⁴Pawccecize Demetrias a ci hae paw phualaeetupaw lu kheit nynh Artemis khozinung kya-e beikinn zohtuh hae kha rae zah phualaeetu hae kha patae leih a muesah hae.²⁵Tuh-e paw nynh phualaeetu hae te tuhcihawpaw rya a lah hae paw kha ko hae zah, “Uteno hae, hynh-e ryalaw kyate nynh sisua ah mue oh cipaw na ny oh.²⁶Hynh-e Paul nynh, ‘Kuih te raepaw tuh pachia thua khyh,’ cite ho zah Efesa khua kya kyalya thua leite Asia ram balyn mah ccungccaw patae kha soih hae zah a paleihsaku hae paw kha mah na muih oh zah na thae oh.²⁷Tukeiccuze aening ryalaw hynh a min yn thu cih cipaw kyalya thua leite, alesaepaw khozinung Artemis kya-e beikinn mah pawlang oun ria vae lan khyh hae zah Asia ram balynte laephi nynh a beik hae paw khozinung a lesaenaw mah yn zo vae cih cipaw mah thinphang lan a um,” cite a hopya hae.

²⁸Minmin nynh tuh-e bya he a thae hae tuh, myarya mih bungpaw zah, “Efesa hae kya-e Artemis tuh myarya alesae!” cite a sia hae.²⁹Khualae balyn tuh byalungnaw te phe abeih; ccungccaw hae nynh Paul ryte khua a ccongkheih hae paw Mesidonia ccungccaw hae Kaias te Aristarkhas kha kyng hae zah poi donaw inn lungkhu langkhe po a teekhae hae.³⁰Paul nynh zapi hae kalan teebua lan ry salamah zuitu hae nynh ua khyh hae;³¹Asia ram kyaze uktu bawi athua hae paw, Paul a ruiban hae abang nynh poi donaw inn lungkhu lang a phungkuh bua khyh nawlan Paul kalan ccungccaw saw hae zah a soihbia sah hae.³²Ccungccaw a sueluakuh hae paw tuh keisukeilae pong a um keiccuze abang nynh ccangte sia hae zah, abang nynh phuinccangte a sia hae; ccungccaw alunghua tuh paw keiccu nynh kae sueluaku cipaw mah nyh tutae khyh hae.³³Judah hae nynh Alexanda kha malang a toisaku hae keiccuze ccungccaw abang nynh hynh-e byalungnaw a pousahtu hynh Alexanda nynh athua cih cite a tua hae. Te Alexanda nynh zya a dae nawlan hae a kuih te tangpah hae zah ccungccaw hae malang khe amaw athua khyhnaw kong ho lan a zuaku.³⁴Thuasalama minmin nynh aning tuh Judah paw cipaw he a nyh hae tuh, mih balynte, “Efesa hae kya-e Artemis tuh myarya alesae!” cite suimilan ccangning loukaw cia ngingtenging lan a sia hae.³⁵Khua ccazipaw nynh ccungccaw hae kha a daesah kou hae te, “Efesa khuaccaaw hae, Efesa khua tuh alesaepaw Artemis khozinung a beikinn te vaawlang te yn ccahpaw zohtuh a rintupaw khua nynh thua cipaw a nyh leipaw hummou a um?³⁶E konglang hynh ei kho leipaw athua keiccuze daebabi lan um oh lah, tuaty leite pawsang mah cyih nan oh.³⁷Pawccecize beikinn uccaw mah lawde khyh hae zah nae khozinung mah thethya a ho lei hae pite hynh-e ccungccaw hae hynh hynhlang nae thuakhae oh.³⁸Tukeiccuze Demetrias te a umkheih hae paw phualaeetu hae nynh lukhakheit tungvaw byalungnaw a hoi hae ze, byapianaw zung um zah mangki bawi hae mah a um hae; mimaw te mimaw tuh-e zung kya kaethekuh hae sah.³⁹Thuasalama ccangpaw kong na ho ry oh paw a um ze, aphung thyhte khuaccaaw hae pumkunaw kya byapae lanpaw nynh thua.⁴⁰Pawccecize atunin e byalungnaw keiccuze aening hynh oun kaethe cih hae cipaw ri lan a um, pawccecize hynh-e siaruanaw kyahin aening hanlan daangsaku khonaw laanpi um khyh,” a ci.⁴¹Tuhte a ho koute a pumkuh hae paw kha a pousah hae. Mesidonia te Grik lang Paul A Cceih

¹Tuh-e byalungnaw adae koute Paul nynh zuitu hae kha ko hae zah thawpyanaw bya hopyate a beihsya kou hae te, Mesidonia ram lang a cceih.²Tuin ram hae kya khua po ccong zah zyntu hae kha thawzung pyanaw bya patae a hopah kou hae te, Grik ram kya a thua,³tuin kya sawpaw sah thum a um. Siria ram lang sanphalung te ccia lan vae cite a nouku lyakhe Judah hae nynh aruh lante phee lan a paccynnuaku hae, tukeiccuze Mesidonia ram langte ki lan a tuakuh.⁴Berea khuapaw Pirras ccapaw Sopater, Thesalonika khuapaw Aristarkhas te Sekundus, Derbe khuapaw Kaias te Timote, te Asia ram e Taikhikas te Trofimas tuh Paul kya Asia ram lang a cceihbua hae.⁵Minmin tuh malang la cceih ty hae zah Troas khua kya kaening kha oun la ngaw hae.⁶Ransi phing leipaw Sanlou Poi athang koute kaening tuh Filipi khua kyate sanphalung te kae cceih zah nin pangaw cihte minmin umnaw hae Troas khua kya kae thua, tuin kya nin sari kae um. Troas Khua kya Paul

⁷Lonaw kyaze masaty nin kyakhe kaening tuh zerya mangkheih khylan kae sueluakuh; Paul tuh awkhualan thoku lan a nouku vae keiccuze minmin kha ziraccyng cia phung hopah hae zah a ccangpah hae.⁸Palung khaan kae pumkunaw kya maeekhua patae a aw hae.⁹Utikhas a ci hae paw ccangvaepaw tuh thanlan-aw kin kya dahung zah, Paul nynh khaw cia phung he a ho tuh a ngawphukuh; te marya a itheih keiccuze khang thumnaw kyate laekhu lang ccah zah a chihpaw kha a khuin hae.¹⁰Paul nynh rungbung zah tuh-e paw tuh a bakhung thin koute varyng pom zah, “Nae bungzou nan sah, mang a hiin,” a ci.¹¹Paul tuh palung khaan lang kaethung zah sanlou kha eih zah a ae hae, khua phe dae lang khaw cia bya a ho koute a pou.¹²Tuh-e ccangvaepaw tuh a hiin te cciakhae hae zah myarya mih ngaengan. Miletas lang Paul Khuaccong

¹³Kaening tuh sanphalung kalan kae cceih lalo zah Assos khua lang sanphalung te kae cceih, tuin khua kya-e Paul kha kopaw lan cite kae noukuh; pawccecize aning tuh mua langte ccia lan a tuaku vae keiccuze tuhcite a paccynpaw nynh thua.¹⁴Assos khua kya aning ryte he kae tungkuh te, sanphalung kalan kae hoeibua zah Mitylen khua lang kae cceih.¹⁵Tuin kyate sanphalung te kae cceih zah awkhualan tuh Khios tuikoih te arawsekunaw kya kae thua. Sarukheih tuh Samos tuikoih kya kae thua, te ccangpaw nin kya Miletas khua kae thua.¹⁶Paul nynh Asia ram kya khaw aro ry khyh pawte Efesa khua kha po sulue lante a tuaku. Athuathya ze Pentekos Nin tuh Jerusalem kya thua lan a ry. Efesa Piccan hae Byatawnaw

¹⁷Paul nynh Miletas khua kyate Efesa khua lang ccungccaw saw zah khriccaawbuu kya-e piccan hae kha a kosah hae.¹⁸Minmin nynh a kalan he oun thua hae tuh, Paul nynh, “Asia ram lungkhu lang kae thua takaw nin kyate nae kya ka um lungkhu balyn pawtemou ka um cipaw na ny oh,¹⁹myarya zakawsangsakute, mitphi luate, Judah hae nynh yn phee hae keiccu ka tungvaw yn thuapaw syntawnaw patae kha teing biate Bawipaw rya ka lawpaw kha na ny oh.²⁰Nae hanlan athane lanpaw kha pawsang mah ka thuruh bang khyh, ccungccaw zapi kya thuasah, inn kheit koute inn kheit thuasah kae hopah oh zah kae ccangpya oh.²¹Pachia kalan ngaesikunaw kong te ah Bawipaw Jesu kya zynnaw kong kha Judah hae kalan te Grik hae kalan ccaekia ka khanpaw kha na ny oh.²²Atu lya kae tuh Muisaw cciakhaenaw kha zuite Jerusalem lang ka cceih cih, tuin kya ka tungvaw paw nynh yn cyihkuh cih cipaw ka nyh khyh.²³Thongccawnaw te tuaasahnaw nynh kae kha phang yn ngaw cite Thyaa Muisaw nynh khua takyh kya raeringnaw yn pyapaw rou nynh ka ny.²⁴Thuasalama Pachia thawccinaw te asekuhpaw thehoypaw kha ccaekiakhan khylan Bawipaw Jesu kyate ka muepaw ka ryalaw kha ka lyn kho nawlan ka hiinnaw mah ka duakuh vae khyh.

²⁵“Atu ka cceih bungthung zah Pachia peenaw kong kae hopya oh paw nanning balyn nynh ka mae hynh nae muih vae lan khyh oh cipaw ka ny.²⁶Tukeiccuze kae tuh ccungccaw balyn chii kyate ka thyaa cipaw atunin nae kya ccaerarih lan kae thaesah oh.²⁷Pawccecize Pachia paccynnaw balyn kha nae kalan phy lan ka synkuh khyh.²⁸Tukeiccuze naemaw te naemaw kha raeringkute do-oihkuh oh lah, Pachia nynh a Ccapaw chii te a repaw Pachia khriccaawbuu kha do-oih khylan Thyaa Muisaw nynh nanning kha do-oihtu lang ae khangnua oh paw tuuphu hae balyn kha mah raeringte do-oih oh.²⁹Pawccecize ka cceih koute arepaw suizaw hae nynh tuuphu hae kha ngaethyaumsah leite nae laku lang oun tee cih hae cipaw kha ka ny.³⁰Zuitu hae kha mih kalan soih khylan hynbya a hopaw ccungccaw abang kha naemaw kyate heize oun langkuh cih hae.³¹Tukeiccuze raeringkuh oh lah, kum thum lungkhu khuazi khuadae mitphi ryte ccungccaw miakaw raeringnaw pya khylan ka dae khyhpaw kha la liathui oh.³²Uteno hae, atu nanning kha Pachia kalan te a thawccinaw bya kalan kae ap vae oh; tuh-e bya nynh nanning kha ae lethungsah kho oh zah thyaasah athua vae hae paw balyn ryte rho kha ae pya kho oh.³³Kae tuh milae kya-e phua, sui te boeining mah ka duaa khyh.³⁴Kamaw ka kuih te rya ka lah zah kamaw te ka ban hae elang ahoboupaw kha ka poukhae cipaw tuh naemaw ccaccei nynh na ny oh.³⁵Tuhcite atyn-are kya thawte ryalaw lan zah anyaa hae paw kha bawm lan hae cipaw tuh marya kae muihsah vae oh; Bawi Jesu nynh, ‘Muenaw kya laeze pyanaw kya hythuanaw a umhua,’ a cipaw bya kha la liathui oh,” cite a hopya hae.

³⁶Paul nynh tuhte a ho koute a ccukharutung zah minmin balyn ryte saw a sang hae.³⁷Minmin balyn tuh thawmawte a rah hae; Paul kha pom hae zah a myng hae.³⁸Kae hynh nae muih vae lan khyh oh, cite a hopaw bya keiccuze mih ngae houh athah. Te Paul kha sanphalung kyacia a dohaw hae. Jerusalem lang Paul A Cceih

¹Minmin ryte kae phiakuh koute sanphalung te kae cceih, lawbabin lan kae cceih zah Kos tuikoih kya kae thua, awkhualan tuh Rhodes tuikoih kya kae thua, te tuin kyate Patara khua kya kae thua.²Foenisia ram lang a cceih cih paw sanphalung kha kae muih zah kae ccikuh bua zah kae cceihbua.³Saipras tuikoih kha he kae muih tuh, ranglang khe kae maekuh zah Siria ram lang po kae cceih, te sanphalung nynh a phupaw uccaw kha Tair khua kya saw khylan sanphalung tuh tuin khua kya a thadyn.⁴Zuitu hae kha kae muih hae zah tuin kya nin sari kae um; Jerusalem lang a cciathung khyh nawlan minmin nynh Paul kha Muisaw liate a hopya hae.⁵Nin sari he aro te, kae pou zah kae cceih; minmin balyn nynh mih zu mih ccaaw hae ryte khua khunglang cia oun dohaw hae. Rili kin kya ccukharutungte saw kae sang.⁶Lu kheit te lu kheit kae beihkuh sya zah kaening tuh sanphalung vawlan kae kae, te minmin tuh inn lang a ki hae.

⁷Tair khua kyate kae tho zah rili kyate cciapaw khuaccongnaw kha he kae thangsah te, Ptolemai khua kya kae thua, tuin kya-e zyntu hae kha kae beih hae zah nin kheit kae umkheih.⁸Awkhualan tuh kae pou zah Sisaria khua kae thua; evangelist lu sari kyaze lu kheit athuapaw Filip inn kya kae thua.⁹Tuh-e paw nynh profehbya ho hae paw, tungtuh loh lei hae paw ccanung lu pali a hoi.¹⁰Tuin kya nin patae kae um koute Akabus a ci hae paw profeh lu kheit tuh Judea ram kyate yn thua.¹¹Kae kalan he yn thua tuh, Paul kya-e taeccia kha lawkuh zah a kuih te a ccu kha heekuh zah, “Thyaa Muisaw nynh hynhte a ho: Hynh-e taeccia a hoipaw ccungccapaw hynh Jerusalem kya Judah hae nynh hynhcite a he cih hae zah Zenta hae kuih kalan a ap cih hae,” a ci.¹²Tuh-e bya he kae thae tuh, tuin kya um hae paw te kaening nynh Jerusalem lang a ccia khyh nawlan Paul kha kae soihbia.¹³Paul nynh, “Pawccemou na rah oh zah ka thinlung nae koisah oh? Bawipaw Jesu min hanlan Jerusalem kya khiiku lanpaw kyalya thua leite chi lan heize paccynkute ka um,” a ci.¹⁴Hopya kho a um vae khyh keiccuze, “Bawipaw rynaw thyhte thua vae sah,” kae ci zah zya kae dae vae.

¹⁵Tuin kya sosoh kae um koute kae paccynkuh zah Jerusalem lang kae cceihthung.¹⁶Sisaria khua e zuitu hae abang mah kae kya a cceihbua hae, minmin nynh kaening kae thua cihnaw Mnason inn langkhe oun cciakhae hae, Mnason tuh Saipras paw thua zah a kum tang vae paw zuitu nynh thua. Paul nynh James A Paebua

¹⁷Jerusalem kya he kae thua tuh, zyntu hae nynh lungpawte oun cciadue hae.¹⁸Awkhualan tuh James kalan paebua lan Paul ryte kae cceih zah Khriccaaw piccan hae balyn a la um hae.¹⁹Paul nynh minmin kha bya a beih kou hae te, a ryalawnaw liate Pachia nynh Zenta hae laku kya a cyipaw kha ccangkheit koute ccangkheit marya a hopya hae.²⁰Minmin nynh tuh-e bya a thae hae tuh, Pachia kha the a hoysah hae. Tukoute Paul kha, “Kae neitaw, Judah hae laku kya zyntu hae thong hohzeih nynh a um hae cipaw kha na ny, minmin balyn tuh Kawbya kha lungthote a thadynkhae hae paw nynh thua hae.²¹Zenta hae kya umbua hae paw Judah hae balyn kyakhe mih ccaaw hae kha vingdungaw ho vae khyh, Judah phung mah zui ho vae khyh cite Moses kawbya vua lan na ccangpya hae cipaw kong kha minmin nynh a thae vae hae.²²Tukeiccuze pawte cyi lan? Na thua vae cipaw kha minmin nynh solei a thae cih hae.²³Tukeiccuze kaening nynh kae hopya thyhte cyitua. Byakinkunaw a rae vae hae paw ccungccaw lu pali kae hoi.²⁴Minmin kha cciakhae hae lah, minmin ryte ccikankunaw rae oh, mih sang a ngoku ccaw hae amee kha la pyapah hae; tuhte na cyi zetuh ccungccaw balyn nynh na konglang a thae hae paw kha accakaepaw nynh thua cipaw a nyh cih hae zah, namaw mah kawbya na zui zah kawbya thyhte na um cipaw a nyh cih hae.²⁵Thuasalama zyntu lang a tang vae hae paw Zenta hae konglang tuh, zohtuh hae kalan silawnaw hae paw looh thuasah, chii thuasah, nging-ote a chia hae paw saw thuasah, nopi pise seinaw thuasah minmin nynh a sungku nawlan hae byapaenaw kae rae zah ccaw kae ky vae hae,” cite a hopya hae.²⁶Paul nynh tuh-e lu pali hae tuh a cciakhae hae, te awkhualan khe minmin ryte ccikankunaw kha a raekuh hae, tukoute beikinn lungkhu lang tee zah ccikankunaw ccyh athang cih nin kha thuasah, minmin lu raveih hanlan silawkunaw nin kha thuasah ranpibawi kalan a thaesah. Beikinn kya Paul A Kyng hae

²⁷Nin sari vyavya he accing te, Asia ram kyate oun thua hae paw Judah hae nynh Paul kha beikinn kya he a muih hae tuh, ccungccaw hae balyn kha hyy hae zah Paul kha a kyng hae.²⁸Minmin nynh, “Israel ccungccaw hae, oun bawm oh! E paw tuh hmin takyh kalan cceih zah ah ccungccaw hae kha thuasah, ah Kawbya kha thuasah, hynh-e hmin hynh thuasah rawsete ccungccaw balyn kha a ccangpahpaw nynh thua, tuhpiaze Grik hae kha mah beikinn lungkhu lang teekhae hae zah hynh-e athyaapaw hmin hynh a thusah vae,” cite a sia hae.²⁹(Pawccecize anulang lyakhe Efesa khuapaw Trofimas kha Paul ryte khualae lungkhu muih hae zah, Paul nynh tuh-e paw tuh beikinn lungkhu lang a teekhae cite a tua hae keiccu nynh thua).³⁰Khualae balyn ngaluin-ngaluin accae, ccungccaw hae nynh oun ccue hae zah Paul kha kyng hae zah beikinn atolang khe a sue hae, vaekheihmawte beikinn thuakaw hae kha a khaw hae.³¹Minmin nynh Paul kha chia lan cite a nounuaku lya hae khe, Jerusalem tuh akhuapi mawte byalungnaw a um cipaw kha rhawkaw thong kheit uktupaw rhawbawipaw nynh a thae.³²Tetuh rhawkaw hae te rhawkaw za kheit uktupaw rhawbawi hae kha arangte ko hae zah zapi hae kha a ccuenua bung hae; minmin nynh rhawbawipaw te rhawkaw hae kha he muih hae tuh, Paul kha bua vae khyh hae.³³Rhawbawipaw nynh Paul kha ccianua zah a kyng koute sivawrui ccangning te khii lan kaw a pya hae. Tukoute, “Aning tuh hummou? Paw seinaw mou a rae?” cite a khia hae.³⁴Ccungccaw zapi laku khe abang nynh ccangte sia hae zah abang nynh ccanglang te a sia hae keiccuze rhawbawipaw nynh ahmepaw ccaccing kha a ny kho khyh keiccuze Paul kha rhawkaw-inn kalan cciakhae lan kaw a pya hae.³⁵Ccungccaw zapi hae tuh myarya a puatho hae keiccuze nawkui kya he a thua te, rhawkaw hae nynh Paul kha hang hae zah a cciakhae hae.³⁶Pawccecize ccungccaw zapi nynh, “Theih oh!” cite sia hae zah a zuibia hae. Paul nynh A Hoku

³⁷Paul kha rhawkaw-inn kalan a teekhae dyn hae khe Paul nynh rhawbawipaw kha, “Bya kae hopya tua ze?” a cipya. Rhawbawipaw nynh, “Grik bya na hothya tou?³⁸Nang hynh anulang lyaze rhaw thosah zah damiah thong pali kha ramkaw lang a cciakhaepaw Izip paw kha na thua khyh tou?” cite a khia.³⁹Paul nynh, “Kae tuh Silisia ram, Tarsas khua kya a puipaw Judah paw nynh ka thua, a minthaanpaw khuapi kya umpaw nynh ka thua, e ccungccaw hae kalan byahonaw kaw yn pyabua, kae ngiaku,” a cipya.⁴⁰Rhawbawipaw nynh kawpya zah Paul tuh nawkui vawlan thadyn zah ccungccaw hae kha a dae nawlan hae a kuih te a tangpya hae. “Daebabi lan khaw cia a um hae te, Paul nynh Hebru bya te ho zah:

¹“Uteno hae te nungpaaw hae, nae malang ka daangsahku nawpaw bya hynh yn ngaepya tua oh,” a ci.

²Hebru bya te a hopaw kha he a thae hae tuh, daebabi lan houh a um hae. Paul nynh,

³“Kae tuh Silisia ram Tarsas khua kya a puipaw Judah paw nynh ka thua, thuasalama Jerusalem khua kya ka lethung zah, ah minpaaw hae kawbya thyhte Kamaliel kuihkaw kya phe ccing lan a ccangkuhpaw te atunin nanning balyn hawte Pachia kalan myarya a zuakuhpaw nynh ka thua.⁴Hynh-e Laanpi a zui hae paw kha phe a chih lan hae cia vawsaw riathaenaw ka pya hae zah, pise mah nopi mah ka he hae zah thong ka saw hae.⁵Tuh-e konglang tuh ranpibawi lupi te kungsi piccan hae balyn mah ka ccaekia lang a tang kho hae; minmin nynh Damaskas khua kya um hae paw Judah uno hae kalan a ky hae paw ccaw kha ka ccyng zah, tuin kya um hae paw tuh-e beiknaw a beik hae paw kha kyngte sivawrui te he lan hae zah Jerusalem lang cciakhae lan hae cite Damaskas lang ka cceih. Paul A Lungpaleihkunaw A Ho (Loc 9.1-19, 26.12-18)

⁶“Tuhte khua ka ccong zah Damaskas khua ka thuadyn, ninthuccynglyn loukaw khe, vaawlang te myarya lepaw awnaw tuh vaekheihmawte ka pepan khe phae yn aw.⁷Kae tuh laekhu kya ka khuliakuh zah, ‘Saul, Saul, pawccemou kae hynh nae tuaa nae sah?’ cite yn hopahpaw roi ccangkheit kha ka thae.⁸Kae nynh, ‘Bawipaw, nang tuh hummou?’ cite ka khung. Aning nynh, ‘Kae tuh na tuaa na sahpaw Nazareth paw Jesu nynh ka thua,’ yn cipya.⁹Kae umkheih hae paw nynh awnaw kha muih hae salamah bya yn hopahpaw roi kha thae khyh hae.¹⁰Kae nynh, ‘Bawipaw, pawmou ka cyih cih?’ ka ci. Bawipaw nynh, ‘Thokuh lah Damaskas khua langkhe cceih, tuin kya ryalaw lan ae nawpaw balyn kha ae hopah cih,’ yn cipya.¹¹Tuh-e awnaw tuh eih a aw keiccuze ngaw ka muih kho vae khyh zah, kae umkheih hae paw nynh ka kuih te yn sue hae zah Damaskas khua lang yn cciakhae hae.

¹²“Tuin khua kya um hae paw Judah hae balyn nynh thehoy a ho hae paw, Kawbya thyhte beiknaw lang kou a zuakuhpaw Ananias nynh,¹³ka kya yn thua zah ka pe thadyn zah, ‘Ka neitaw Saul, ngawmuih ccavae!’ yn cipya. Tuh-e ccyh ccaccei khe ngaw ka muihthui zah amaw kha ka muih.¹⁴Aning nynh, ‘Ah minpaaw hae Pachia nynh a rynaw na ny nawlan, Midingpaw kha na muih nawlan te amaw roi kha na thae nawlan phe ae po vae.¹⁵Pawccecize na muihpaw te na thaepaw kha ccungccaw hae balyn kalan ho khylan amaw ccaekia na thua cih.¹⁶Atu pawccemou phang na ngaw? Thokuh lah baptisma in, Bawipaw min kha kote na seinaw balyn kha singkuh,’ yn cipya. Zenta hae kalan Paul Sawnaw

¹⁷“Tukoute Jerusalem lang bua ka ki zah beikinn voidu lungkhu kya saw ka sang cciamang lyakhe vizin ka muih.¹⁸Tuh-e vizin kya ka muihpaw Jesu nynh kae kha, ‘Rangsakuh lah Jerusalem kyate arangte pou; pawccecize kamaw konglang ccaekia na khanpaw kha minmin nynh lehkhan lan khyh hae,’ yn cipya.¹⁹Kae nynh, ‘Bawipaw, nang ae zyn hae paw kha sinakok miakaw kya ka bua hae zah thong ka saw hae cipaw kha minmin nynh a ny hae.²⁰Na ccaekia athuapaw Stefen a chia lya hae kha kae mah a pe ka thadynbua zah a chia hae paw kha ka nawccahbua, te a theihtu hae paw boeining kha a ngawpah hae paw nynh ka thua,’ ka cipya.²¹Te aning nynh, ‘Cceih, nang kha laansaw lang e Zenta hae kalan kae saw cih,’ yn cipya,” cite a ho. Paul te Rom Rhawbawipaw

²²Minmin nynh a bya kha tuin kyacia a ngaepah kou hae te, mih roisaw hae zah, “Tuhcihawpaw ccungccaw tuh laephi kyate ccaring vua oh! Pawccecize aning tuh hiin lan ngaekuh khyh,” a ci hae.²³Tuhcite minmin nynh sia hae zah, mih boeining kha dawte vuiping kha vaaw lang a heithung lya hae khe,²⁴rhawbawi lepaw nynh pawccemou Paul kha tuhte a sianua hae cipaw ny khylan, rhawkaw-inn lang cciakhae oh lah ziabia te byakhia oh cite kaw a pya hae.²⁵Minmin nynh saphuarui te he a he hae tuh, Paul nynh a pe thadynpaw rhawbawipaw kha, “Rom ccungccaw athuapaw kha byapia leite na zia ze aphung thua cih tou?” a cipya.²⁶Tuh-e tuh rhawbawipaw nynh he a thae tuh, cceih zah rhawbawi lepaw kha, “Pawtemou na cyih cih? Hynh-e paw tuh Rom ccungccaw nynh athua,” a cipya.²⁷Rhawbawi lepaw nynh yn cceih zah Paul kha, “Nang hynh Rom ccungccaw na thua tou? Oun hopah,” a cipya. Paul nynh, “Ka thua,” a ci.²⁸Rhawbawi lepaw nynh, “Phua patae pyate nynh kae tuh Rom ccungccaw thuanaw hynh ka mue,” a ci. Paul nynh, “Kae tuh Rom ccungccaw lang mawte ka puipaw nynh thua,” a ci.²⁹Paul kha byakhia lan acih hae paw tuh nulang a sihkuh vae hae; rhawbawi lepaw mah a rih vae; pawccecize Paul tuh Rom ccungccaw nynh thua cipaw kha thuasah, amaw kha ka khiisei vae cipaw kha thuasah rhawbawi lepaw nynh a nyku vae.

³⁰Judah hae nynh pawccemou Paul kha sei a be hae cipaw a ny ry keiccuze awkhualan khe rhawbawi lepaw nynh Paul kha supah zah ranpibawi lepaw hae te kungsi hae balyn kha tungku lan kaw a pya hae. Aning nynh Paul kha cciakhae bung zah mih malang khe a nung. Kungsi hae malang Paul

¹Paul nynh kungsi hae kha riri do hae zah, “Uteno hae, kae tuh atunin cia Pachia malang thinlung athyaapaw te nynh ka hiin,” a ci.²Ranpibawi lupi Ananias nynh Paul a mung kha bua oh cite a pe thadyn hae paw kha kaw a pya hae.³Paul nynh, “Asi rawpaw a thuh hae paw lungrua, Pachia nynh nang kha ae bua vae cih! Pawccecize kae hynh Kawbya thyhte byapia lan khaw khe kya na dahung; Kawbya te arawsekuh lante kae hynh bua lan kaw na pya hae tou?” a ci.⁴Paul pe a thadyn hae paw nynh, “Pachia kya-e ranpibawi lupi kha na theihrya tou?” a ci hae.⁵Paul nynh, “Uteno hae, aning tuh ranpibawi lupi cipaw ka nyh khyh; pawccecize Ccathyaa kyaze, ‘Na ccungccaw hae a uktupaw kha a thethya na ho lan khyh,’ cite azeikuh,” a ci.

⁶Thuasalama tuh-e hae kyaze phu kheit tuh Sadusi hae thua hae zah ccangpaw phu tuh Farasi hae nynh thua hae cipaw kha Paul nynh he a nyh tuh, “Uteno hae, kae tuh Farasipaw nynh ka thua, Farasipaw ccapaw nynh ka thua. A chih hae paw a thoothui cih hae cite ngaehoinaw kong keiccu nynh kae tuh byapia ka thua,” cite kungsi hae kyakhe thawte a sia.⁷Tuhte he a ho tuh, Farasi hae te Sadusi hae laku bya-eikunaw yn um zah ccungccaw zapi tuh phe phiakuh hae.⁸Pawccecize Sadusi hae nynh tuh thoothuinaw um khyh, vaawccungccaw um khyh, muisaw mah um khyh a ci hae; thuasalama Farasi hae nynh tuh ccangthum mawte a um a ci hae.⁹Siaruanaw tuh myarya yn ccae, Farasi hae kalan a pan hae paw kawbya sazae hae nynh thokuh hae zah thawte a ei hae: “Hynh-e paw hynh a seinaw kharouh kae muih khyh. Muisaw nynh thuasah, vaawpaw nynh thuasah amaw hynh bya a hopyapaw athua kho,” a ci hae.¹⁰Thawmawte he a eikuh hae tuh, minmin nynh Paul kha oun sue cih hae zah thoh oun paethungkuh cih hae cite rhawbawi lepaw nynh a thinphang keiccuze rhawkaw hae kha cciabung lan te minmin laku kyate Paul kha suede lan zah rhawkaw-inn kalan teekhae lan kaw a pya hae.

¹¹Awkhualan khuazi khe Bawipaw nynh Paul pe khe thadyn zah, “Paul, na rawthung sah! Pawccecize Jerusalem kya kamaw kong ccaekia na khan hawte Rom khuapi kya mah ccaekia na khan ung cih,” a cipya. Paul Chia lan Pheenaw

¹²Awkhualan awkhua khe Judah hae tuh tungkuh hae zah, “Paul kha ah chia mawlaezung oh tuh, looh mah ae lei lan zah tui mah nia lei lan,” cite thyalawkute bya a kinku hae.¹³Tuhte pheenaw kong khua a khan hae paw tuh milu sung pali lae acih hae.¹⁴Minmin nynh ranpibawi lepaw hae te piccan hae kalan cceih hae zah, “Paul kha kae chia makhia pawsang mah ae lei lan cite thyalawkute bya kae kinku vae.¹⁵Tukeiccuze atu nanning te kungsi hae nynh Paul a byathan kong kha houh aria lante byakhia lan a ry hae paw hawte umsakuh oh lah, Paul kha nae kalan cciakhae bung lan rhawbawi lepaw kha thaesah oh. Te Paul tuh nae kalan yn thua mawkhe chia lante kaening tuh paccynkute kae um vae,” cite a hopya hae.

¹⁶Tuhte a buh hae paw kong kha Paul a ccianung ccapaw nynh he a thae tuh, cceih zah rhawkaw-inn kalan tee zah Paul kha a hopya.¹⁷Paul nynh rhawbawi lu kheit kha ko zah, “E ccangvaepaw hynh rhawbawi lepaw kalan la cciakhae tua, pawccecize a hopya lanpaw hankhakheit a hoi,” a cipya.¹⁸Tukeiccuze rhawbawipaw nynh tuh-e ccangvaepaw kha rhawbawi lepaw kalan cciakhae zah, “Thongccahpaw Paul nynh kae kha yn ko zah, namaw kalan hankhakheit hopya lanpaw a hoipaw e ccangvaepaw hynh na kalan cciakhae lan yn naw,” a cipya.¹⁹Rhawbawi lepaw nynh ccangvaepaw tuh a kuih te kyng zah a makhaete zya cciakhae zah, “Pawmou hopya lan nae rypaw tuh?” cite a khia.²⁰Aning nynh, “Judah hae nynh Paul a byathan kong kha houh aria lante byakhia lan a ry hae paw hawte umsaku lan zah Paul kha awkhualan kungsi hae kalan na cciakhae nawlan na kalan ngia lan cite mih naw phe ccah vae.²¹Thuasalama nang nynh minmin kha ngaepah nan hae; pawccecize mih ccungccaw hae sung pali lae nynh Paul kha phang a buh vae hae. Minmin nynh Paul kha ah chia mawlaezung oh tuh, looh mah ae lei lan zah tui mah nia lei lan cite thyalawkute bya a kinku vae hae; bya na pae lanpaw kha ngaw hae zah atu paccynkute a um vae hae,” a cipya.²²Tukeiccuze rhawbawi lepaw nynh ccangvaepaw kha pousah zah, “E nae hopyapaw bya hynh hum sanmah la hopah nan,” cite bya a tawsya. Felik kalan Paul A Ky hae

²³Rhawbawi lepaw nynh rhawbawi hae lu ning kha ko hae zah, “Sisaria khua lang ccia lan rhawkaw za ning, marang rhawkaw sung sari te ccoi rhawkaw za ning kha atu khuazi suimilan ccangtakua kya pou lan paccyn oh.²⁴Paul a cciku lanpaw marang kha paccyn oh lah, ram uktu Felik kalan khyndadyh lan cciakhae oh,” a cipya hae.²⁵Aning nynh hynhcite ccaw ccangkheit a zei:

²⁶“Klaudias Lysias nynh ram uktu Felik kha sawtuanaw te kae beihlang.²⁷E ccungccapaw hynh Judah hae nynh kyng hae zah a chiadyn hae khe, aning tuh Rom ccungccaw nynh thua cipaw ka ny pawte rhawkaw hae ryte kae ccianua zah kae luesah.²⁸Judah hae nynh pawkeiccumou amaw hynh sei a be hae cipaw ka ny ry pawte kungsi hae kalan ka thuakhae.²⁹Chi lan accanpaw seinaw, thongsaw lan accanpaw seinaw keiccu sei a be hae paw thua leite, mimaw kawbya te asekuhpaw byakhianaw keiccu nynh thua cipaw kha ka ny.³⁰Judah hae nynh e paw hynh phang a buh hae cipaw kha he yn hopah hae tuh, na kalan palou kae ky zah amaw seibetu hae kha mah paw kong nynh seibe hae cipaw na malang a la ho nawlan hae kaw ka pya hae. Ngedante,” cite ccaw a ky.

³¹Rhawkaw hae tuh kawpya athua hawte Paul kha hoei hae zah khuazi khe Antipatris khua lang a cciakhae hae.³²Awkhualan khe marang rhawkaw hae kha Paul ryte po cciasah hae zah, mimaw tuh rhawkaw-inn lang a ki hae.³³Marang rhawkaw hae nynh Sisaria khua he a thua hae te, ram uktu kalan ccaky kha pya hae zah Paul kha mah a malang khe a ap hae.³⁴Ram uktu nynh ccaky kha he a ria koute, paw pee kya-e mou na thua cite Paul kha a khia. Paul tuh Silisia pee kya-e nynh thua cipaw he a nyh tuh,³⁵“Sei ae betu hae paw oun thua hae te, na bya tuh kae piapah cih,” a cipya. Tukoute Paul kha Herod kya-e siapharan inn kyakhe rin lan aning nynh kaw a pya hae. Felik malang Paul

¹Nin pangaw acih koute ranpibawi lupi Ananias tuh piccan hae te Tertullas cikuhpaw sihneipaw ryte Sisaria khua lang cceihbung hae zah, Paul tungvaw sei a benaw hae paw kha ram uktu Felik kya a hopya hae.

²Paul kha a ko kou hae te, Tertullas nynh Paul kha hynhte sei a be: “Bawihaepaw Felik, namaw liate kaening tuh daenaw kha ccyh saepi kae mue zah malang elang na muih khonaw liate hynh-e minphuin elang ahoboupaw raethuinaw patae a um vae.³E ryalawnaw hynh hmin takyh kya lungtuabya hote zungzae kae cciadue.⁴Na ccyh kha khaw cia kae lawpya khyh nawlan adynnawte kae ho cih paw bya hynh lungsaete nae la ngaepya nawlan kae ngiaku.⁵Pawccecize Nazareth hae beiknaw phu kya cciakhaetu lang tang zah laephi vaw e Judah hae balyn kya byalungnaw rae lan a hyytupaw hynh-e ccungccaw hoyleipaw hynh kaening nynh kae muih.⁶Aning tuh beikinn thethyasah lan a zuaku keiccuze kae kyng. (Kaemaw kawbya thyhte byapia lan kae ry.⁷Thuasalama rhawbawi lepaw Lysias nynh yn thua zah kae kuih kyate po cciakhaede zah,⁸amaw seibetu hae kha na kalan ccia lan kaw oun pya.) Amaw hynh akaw-aleih bya nae khia zetuh, a tungvaw sei kae benawpaw balyn kha marya na nyh kho cih,” a cipya.

⁹Judah hae nynh mah tuh-e bya tuh thanccingpaw nynh thua cite mih nawccawkhae.

¹⁰Ram uktu nynh Paul kha byaho lan a kuih te a tangpah koute Paul nynh: “Nang tuh hynh-e minphuin kya kum patae cia byapiatu lang na tang vae cipaw ka ny pawte, kamaw daangsahkunaw bya hynh lungpawte ka ho.¹¹Pachia beik khylan Jerusalem lang ka cciathungnaw hynh nin haw lae ning lae lung loh khyh cipaw na nyh mamin cih.¹²Beikinn lungkhu kya hum te sanmah bya kae eikupaw minmin nynh yn muih khyh hae, sinakok kya thuasah, khualae lungkhu thuasah ccungccaw hae keisukeilae um lan ka tuhou hae paw mah yn muih khyh hae.¹³Atu minmin nynh sei yn be hae paw mah ccaekia langsakuh kho lan khyh hae.¹⁴Thuasalama minmin nynh ahme leipaw ccangpyakunaw a ci hae paw Laanpi thyhte kae paaw hae Pachia kha ka beik cipaw na malang ho ka ry. Kawbya kya azeikuhpaw te Profeh hae ccauh kya azeikuhpaw balyn kha ka zyn.¹⁵Miding te misei parouh mawte chinaw kyate thoothuinaw a um cih cite minmin nynh a ngaehoi hae hawte kae mah Pachia kya ngaehoinaw ka hoi.¹⁶Tukeiccuze Pachia malang thuasah, ccungccaw hae balyn malang thuasah mawtemaw nykunaw thinlung athyaapaw kha ka hoi kho nawlan thawmawte zungzae ka zuakuh.¹⁷Kum patae aro koute, atu ka minphuin hae kha bawmnawpaw pya khylan te Pachia kalan ahlu pya khylan Jerusalem lang ka cceih.¹⁸Tuh lyaze beikinn lungkhu kya ka ccikankupaw kha minmin nynh phe yn muih hae, tuh lya tuh ccungccaw zapi mah um khyh, byalungnaw mah um khyh.¹⁹Thuasalama Asia ram kyate oun thua hae paw abang ccungccaw hae tuh tuin kya a um hae. Minmin nynh ka tungvaw seibe lanpaw a hoi hae ze, mimaw ccaccei nynh hein kya na malang hin sei yn be lan hae paw nynh thua.²⁰Tuhkhyhze kae nynh kungsi hae malang ka thadyn lyaze ka tungvaw kya paw seinaw mou a muih hae atu hein kya a um hae paw nynh hotua hae sah.²¹Minmin laku ka thadyn zah, ‘A chih hae paw thoothuinaw kong keiccu nynh kae hynh atunin nae malang byakhia ka thua,’ cite bya kaw kheit rou nynh ka sia,” cite a ho.

²²Felik tuh tuh-e Laanpi kong kha ccaerarih lan a nyhpaw athua keiccuze tuh-e byathan tuh haeungtaw zah, “Rhawbawi lepaw Lysias yn thua te nynh nae bya hynh kae pia cih oh,” a cipya hae.²³Paul kha reih-i-reih-ae nung leite kheccungte a nung nawlan thuasah, ahoboupaw a cyipah hae paw a ruiban hae kha a khee khyh nawlan thuasah rhawbawipaw kha kaw a pya.

²⁴Nin beihtaraw aro koute, Felik tuh Judah nopinung athuapaw a zu Drusilla ryte oun thua hae zah Paul kha a kosah hae, te Paul nynh Khri Jesu zynnaw konglang a hopaw kha a ngae.²⁵Paul nynh dingnaw kong, mawtemaw sungkunaw kong te yn thua cih paw byapianaw kong kha he a hopah hae tuh, Felik tuh rih zah, “Atu tuh la ki hin, nyalang ccyhhoy kae mue te, bua kae ko cih,” cite Paul kha a cipya.²⁶Paul nynh phua yn pya cih cite a ngaehoi keiccuze Paul kha atu te atu leih kosah hae zah bya leih a hokhae.

²⁷Thuasalama kum ning acih koute, Porsias Festas nynh Felik hanpaw rya a lah vae; te Felik nynh Judah hae lunghoynaw a rae ry pawte Paul kha thong a sawsya. Festas malang Paul

¹Festas tuh tuin ram kya he a thua te, nin thum acih koute Sisaria kyate Jerusalem lang a cceihthung.²Ranpibawi lepaw hae te Judah piccan hae nynh Paul tungvaw sei a benaw hae paw bya kha a hopya hae.³Paul kha laanryng kya buhkhawte chia a ry hae pawte, Festas nynh Paul kha Jerusalem lang a nue nawlan bawmnaw a ngia hae.⁴Thuasalama Festas nynh, “Paul tuh Sisaria khua thonginn kya nynh a um, kamaw mah aro mawze tuhlang ka cceih vae cih.⁵Tukeiccuze nanning lakuze kaw a hoi hae paw nynh kamaw ryte cceihbua oh lah, Paul kya seinaw a um lanze sei na be cih oh,” cite a khung hae.

⁶Festas tuh minmin kya nin tarya khyhze nin haw he a um koute Sisaria lang a cceihbung; awkhualan tuh byapianaw zung kya dahung zah Paul kha oun cciakhae hae sah cite kaw a pya hae.⁷Paul he yn thua tuh, Jerusalem kyate oun thua hae paw Judah hae nynh a pe khe po thadynlu hae zah Paul kha seinaw lepaw patae a be hae zemah ccaekia langsakuh kho khyh hae.⁸Paul nynh daangsahkunaw byaho zah, “Kae tuh Judah hae kawbya kya mah ka sei khyh, beikinn lungkhu kya mah ka sei khyh, Sizar siapharan kya mah ka sei khyh, pawpaw kya sanmah ka sei khyh,” a ci.⁹Thuasalama Festas nynh Judah hae lunghoynaw a rae ry pawte, Paul kha, “Jerusalem lang cciathung lan zah tuin kya hynh-e ae kaethe hae paw kong hynh ka malang byapiaku lan na ry tou?” cite a khia.¹⁰Paul nynh, “Kae tuh Sizar kya-e byapianaw zung malang nynh ka thadyn, tuin kya nynh byapia lan mah ka ccan; namaw nynh hoyte phe na ny thyhawte Judah hae kya ka cyiseinaw pawsang um khyh.¹¹Kae tuh ka sei zah chi lan ccanpaw seinaw ccangkhakheit ka rae lanze, chinaw kyate lue lan ka zuakuh lan khyh; thuasalama hynh-e hae nynh sei yn be hae paw tuh akyh khyh lanze, hum nynh sanmah minmin kalan yn ap kho khyh hae. Siapharan kalan azu ka khan,” a ci.¹²Festas nynh kungsi hae ryte phe a hokuh kou hae te, “Nang tuh siapharan kalan azu na khan zah siapharan kalan na la cceih cih,” a cipya. Akrippa malang Paul

¹³Nin sosoh aro koute, Siapharan Akrippa te a zu Bernis tuh Festas kha beih khylan Sisaria khua lang oun thua hae.¹⁴Minmin tuh tuin kya khaw um kou hae te, Festas nynh Paul konglang kha siapharan kya hopah zah: “Felik nynh thong a sawsyapaw ccungccapaw lu kheit a um;¹⁵Jerusalem kya ka um lyaze ranpibawi lepaw hae te Judah piccan hae nynh tuh-e paw kong kha oun hopah hae zah amaw kha rawsete byapia lan yn ngia hae,” a cipya.¹⁶Kae nynh, “Seibe hae paw ccungccaw tuh seibetu hae ryte hawiliakute tungkuh hae zah a tungvaw seibe hae paw konglang a daangnaw kong a ho maw tuh humhung zemah mih kalan ap thua lan khyh cite Rom hae phung a um,” cite ka khung hae.¹⁷Tukeiccuze minmin nynh hynhlang he oun thua hae te, ccyh aro lei lante awkhualan khe byapianaw zung kya ka dahung zah tuh-e paw tuh thuakhae lan kaw ka pya hae.¹⁸Seibetu hae nynh thadyn hae zah kae nynh ka tuapaw seibenaw kha ccangkheit san thuakhae khyh hae.¹⁹Mimaw beiknaw kong te Jesu a ci hae paw tuh a chih koute bua a hiinthui cite Paul nynh a hopaw kong kha a eikuh hae.²⁰Tuh-e bya-eikunaw kong kha kae nynh ka nythya khyh keiccuze, Jerusalem lang ccia lan zah hynh-e kong hynh byapiaku lan na ry tou na ry khyh tou cite Paul kha ka khia.²¹Thuasalama Aukastas nynh bya a pae nawlan Paul nynh azukhan keiccuze, siapharan kalan amaw kha ka ky mawlaezung balyn tuh thong lungkhu nung lante kaw ka pya hae,” a cipya.²²Akrippa nynh Festas kha, “Kae mah tuh-e paw bya tuh thaebua lan ka ry,” a cipya. Felik nynh, “Awkhualan na thae cih,” a cipya.

²³Awkhualan Akrippa te Bernis tuh lyccaccu lante oun thua hae zah rhawbawi lepaw hae te khua kya-e mih minthaan hae paw ryte pumkunaw khaan lang oun tee hae. Tukoute Festas nynh kawpya hae zah Paul kha oun teekhae hae.²⁴Festas nynh, “Siapharanpaw Akrippa te hein kya kaening ryte na um oh paw balyn, e ccungccapaw hynh na muih oh, Jerusalem kya thuasah, hein khua kya thuasah Judah hae zapi balyn nynh hynh-e paw kong hynh thawte yn ngia hae zah aning tuh hiin lan ccan khyh cite a sia hae.²⁵Thuasalama kae nynh chi lan accanpaw seinaw pawsang mah rae khyh cipaw he ka muih tuh, amaw ccaccei nynh mah Aukastas kalan azu a khan keiccuze a kalan ky lan bya ka pae.²⁶Siapharan kalan a konglang zei lanpaw tutae ka hoi khyh. Tukeiccu nynh amaw hynh nae balyn malang kae poukhae, abyapi lante Siapharanpaw Akrippa, namaw malang kae poukhae; tuhteze nynh akaw-aleih bya ah khia kou oh te, zei lanpaw ka hoi cih.²⁷Pawccecize sei a benaw hae paw kha langsaku leite thongccahpaw lu kheit kha ky lanpaw tuh ngaekuh khyh cite ka tua,” a ci. Akrippa malang Paul

¹Akrippa nynh Paul kha, “Namaw hanlan hokunaw kaw na hoi,” a cipya. Paul nynh a kuih kha dyng zah amaw a daangnaw kong kha hynhte a ho:

²“Siapharanpaw Akrippa, Judah hae nynh sei yn be hae paw balyn hynh atunin na malang ze kamaw ka daangnaw kong byahonaw kaw ka mue keiccuze ka vehoy cite ka tuaku.³Nang tuh Judah hae phung te byalungnaw balyn kha hoyte a nyhtu nynh na thua. Tukeiccuze lungsaete nae la ngaepya nawlan kae ngiaku.

⁴“Atakaw lya mawte Jerusalem kya ka minphuin hae laku ka um zah, Judah hae balyn nynh ka di lyate ka hiinnaw ozia kha pong yn ny hae.⁵Kae beiknaw kyaze a sihmamia huapaw Farasi phu kya-e lu kheit ka thuapaw kha minmin nynh atakaw lya mawte yn ny hae paw thua zah tuh-e tuh ccaekia a khan ry hae ze a khan kho hae.⁶Pachia nynh kae minpaaw hae kya a raepaw byakinpyakunaw kha ka ngaehoi keiccu nynh atu byapianaw kya ka thadyn.⁷Tuh-e byakinpyakunaw kha mue lan cite ngaehoi hae zah kae minphuin phin haw lae ning nynh Pachia kha khuazi khuadae a beik hae. Siapharanpaw Akrippa, tuh-e ngaehoinaw kong keiccu nynh kae tuh Judah hae nynh sei oun be hae!⁸Pachia nynh a chih hae paw kha a thoosah hae cipaw tuh pawccemou zyn kho um leipaw lante na tua oh?

⁹“Nazareth paw Jesu min rawsenawpaw hynh patae ka cyi aho cite ka la tuaku ccaccing.¹⁰Tuh-e tuh Jerusalem kya ka la cyi; ranpibawi lepaw hae kyate kawhoinaw kha ka mue zah mithyaa hae patae kha thong ka saw hae; minmin kha chia lan bya a pae hae ze, ka nawccahbua.¹¹Pachia thethya a ho ccaw hae cite ka nangse hae zah sinakok takyh kya avae patae de ka tah hae; mih tungvaw kya myarya ka thinria zah ramccang lang e khua hae kyacia heize ka ccianua hae. Paul A Puithuinaw Kong A Ho

¹²“Tuhte ranpibawi lepaw hae kya-e kawhoinaw te kaw-uanaw kha lawkute Damaskas khua lang ka ccia lyakhe,¹³pou siapharanpaw, ninthuccynglyn lya laanpi kyakhe khuanin laeze a aw huapaw vaawlang e awnaw tuh kae te kae cceihkheih hae paw pepan kya phaephae a awpaw kha ka muih.¹⁴Kae balynte laekhu kya kae khuliaku lyakhe, Hebru bya te kae yn hopahpaw roi ccangkheit ka thae zah, ‘Saul, Saul, pawccemou kae hynh nae tuaa nae sah? Ccunghepo kha na sy ze namaw nynh vaemaw na mue cih,’ cite yn hopya.¹⁵Kae nynh, ‘Bawipaw, nang tuh hummou?’ ka ci. Aning nynh, ‘Kae tuh na tuaa na sahpaw Jesu nynh ka thua.¹⁶Thokuh lah na ccu te thadyntua; nang kha ka ryalahtu lang po khylan, te kae nae muihpaw konglang te na kalan kae langsakuh cih paw uccaw hae kong kha ccaekia a khantu lang rae khylan nynh na kalan kae langku.¹⁷Nang kha kae saw cihnaw Judah hae kuih kyate thuasah, Zenta hae kuih kyate thuasah kae luesah cih.¹⁸Minmin kha mohnaw kyate awnaw kalan, Satan kawhoinaw kyate Pachia kalan paleihsaku khylan thuasah, seingaethyanaw muebua hae zah kae oun zynnaw hae liate thyaasah athua hae paw kya umnaw hmin a muebua nawlan hae thuasah mih mit awsah khylan nang kha kae saw,’ yn cipya.

¹⁹“Tukeiccuze siapharanpaw Akrippa, vaawlang te yn thuapaw tuh-e vizin ka muihpaw tuh ka ei kho khyh.²⁰Damaskas khua um hae paw kya masaty ka hopya hae, tukoute Jerusalem kya, tukoute Judea ram balyn te Zenta hae kyakhe mah ngaesikuh hae zah Pachia kalan a paleihku nawlan hae, ngaesikunaw te angaekuhpaw ryalaw a law nawlan hae ka hopya hae.²¹Hynh-e kong keiccuze Judah hae nynh beikinn kya yn kyng hae zah chia lan yn nounuaku hae.²²Thuasalama atunin cia Pachia kyate bawmnaw ka mue keiccuze hein kya ka thadyn zah, adih ale ci leite ccungccaw hae kalan ccaekiakhante, profeh hae te Moses nynh oun cyihkuh cih cite a ho hae paw laelan ccangpaw ka ho khyh:²³Messiah nynh a teing lanpaw kha thuasah, a chih hae paw kyate masaty a thoothui cih zah Judah hae te Zenta hae kalan awnaw bya a thaesah lan hae paw kha thuasah minmin nynh a ho hae,” cite a ho.

²⁴Tuhte Paul nynh amaw a daangnaw kong a ho cciamang lyakhe Festas nynh roi accae lante, “Paul, na lungkyh vae khyh! Patae na ccangkupaw nynh phe ae ngaeesah vae!” a cipya.²⁵Thuasalama Paul nynh, “Bawihaepaw Festas, ka ngaee khyh; lungkyhrarih lante byaccing nynh ka ho.²⁶Pawccecize siapharan nynh e konglang hynh phe a nypaw nynh thua, amaw malang khe kae nynh rawhoyte ka ho; hynh-e hae hynh ccangkheit sanmah a ny leipaw um lan khyh cite ka tua, pawccecize e tuh akin-akae kya cyipaw thua khyh.²⁷Siapharan Akrippa, profeh hae kha na zyn hae tou? Na zyn hae cipaw ka ny,” a ci.²⁸Akrippa nynh Paul kha, “Ccyh sosoh taraw kya Khriccaaw lang tang lan nae soih vae,” a cipya.²⁹Paul nynh, “Ccyh sosoh kya thuasah, ccyh asaepi kya thuasah namaw kyalya thua leite atunin ka bya a ngae hae paw balyn nynh mah hynh-e sivawrui te khiikunaw holeite, kamaw hawte na thua nawlan oh Pachia kalan saw ka sang,” a cipya.

³⁰Tukoute siapharanpaw, ram uktupaw, Bernis te minmin ryte a dahungkheih hae paw tuh thokuh hae zah,³¹ccanglang he a pou hae te, “E ccungccapaw hynh chi lan accanpaw, tuhkhyhze thongccaw lan accanpaw pawsang a cyipaw um khyh,” cite lu kheit te lu kheit a hoku hae.³²Akrippa nynh Festas kha, “E ccungccapaw hynh Sizar siapharan kalan azu a khan khyh ze, phe luesah kho lanpaw,” cite a hopya. Rom lang Paul A Cceih

¹Kaening tuh Italy ram lang sanphalung te cciakhae lan cite bya he a pae hae tuh, minmin nynh Paul te ccangpaw thongccah hae kha Aukastas rhawkawphu kyaze rhawbawipaw Julias kalan khe a ap hae.²Adramyttium sanphalung lungkhu lang kae tee zah Asia ram rili kin lang po ccia lan vae cite eenaw te kae thokuh. Mesidonia ram e Thesalonika khuapaw Aristarkhas tuh kaening ryte a cceihbua.³Awkhualan tuh Sidon khua kya kae thua; Julias nynh Paul kha thawccih zah a ban hae kalan ccianaw kaw te tuh-e hae nynh do-oihnaw kaw kha a ua.⁴Tuin kyate kae thokuh zah khisan nynh arawsekuh lante azaw keiccuze Saipras tuikoih kya-e khisan a khawnaw langte sanphalung te kae cceih.⁵Silisia ram te Pamfilia ram e rili kya po kae cceih zah Lysia ram e Myra khua kya kae thua.⁶Tuin kya rhawbawipaw nynh Alexandria kyate Italy ram lang yn cceihpaw sanphalung kha muih zah, tuin kya oun ccisaku.⁷Byabyate nin patae kae cceih koute vawsawte Kanidas khua pe kae thua, khisan nynh oun khaw keiccuze Salmone khua te arawsekuhpaw Krete tuikoih kya-e khisan akhawnaw kalan te kae cceih.⁸Tuh-e tuh vawsawte kae lue koute, Lasia khuapi pe, ‘Puithya Haeungnaw’ a ci hae paw hmin kya kae thua.

⁹Ccyh khaw aro te, Loohsung nin tuh phe athang vae keiccuze atu sanphalung te khuaccong tuh ri lan a um vae, tukeiccuze Paul nynh tuanaw pya hae zah,¹⁰“Uteno hae, atu hynh-e khuaccongnaw tuh sanphalung te uccaw hae kyalya thua leite, ah hiinnaw azo lanpaw cia ri lan a um cipaw ka ny,” a cipya hae.¹¹Tuhzemah rhawbawipaw nynh Paul bya laeze pilot te sanphalung hoitu bya kha a zynhua.¹²Tuh-e sanphalung haeungnaw tuh khuaccihsaw hanlan accanthya khyh keiccuze Foenisia lang phya kho ze phya lan zah, tuin kya khuaccihsaw lungkhu um lan cite ccungccaw alunghua nynh a ry hae. Foenisia tuh Krete tuikoih kya umpaw sanphalung haeungnaw thua zah niccaw-deilang te niccaw-thahlang nynh a hawi. Khise Atho

¹³Alia lang e khisan nynh byabyate he yn zaw tuh, mih eenaw kha kae mue vae cite tuakuh hae zah, sanphalung kha supah hae zah Krete tuikoih pe varang langte anaekunaw te a cciasah hae.¹⁴Thuasalama khaw aro mawze “Thahlang-nithua khise” a ci hae paw khise myarya rupaw tuh Krete tuikoih kalan te yn tho vae.¹⁵Sanphalung nynh khisan kha taening kho vae khyh zah khisan nynh po he a cciakhae tuh kaening mah khisan zawnaw lang yn mungbia vae.¹⁶Kauda a ci hae paw tuikoih taraw kya-e khisan akhawnaw kya he kae thua tuh, kohlung kha a ro khyh nawlan myarya thawbangte kae khynsah.¹⁷Tuh-e kohlung tuh sanphalung kalan a khang kou hae te, sanphalung atyn nawlan liarue hae te a khiide hae; Syrtis tuideinaw kya yn khangkuh sei cih cite a ri hae pawte sanphalung boeidaw kha khah hae zah khisan nynh hung a mungbia vae.¹⁸Khise nynh myarya oun hebia pawte awkhualan tuh sanphalung kya-e phupaw hae kha a vuaban hae.¹⁹Nin thumnaw kya sanphalung uccaw hae kha mih kuih te a vua hae.²⁰Nin patae cia khuanin te awsi hae langkuh vae khyh hae zah, khise zawpaw tuh adaehua khyh keiccuze kae lue cih cite kae ngaehoinaw balyn kha nyathya tuh pong azo vae.

²¹Looh ae leite khaw a um kou hae te, Paul nynh mih ngaelaku khe thadyn zah, “Uteno hae, nanning nynh ka bya kha na la ngae oh zah Krete kyate ah ccia khyh oh ze, hynh-e ronaw te shungnaw kyate phe ah lue cih oh paw.²²Atu zemah nae rawthung sah; pawccecize sanphalung holeite hum sanmah a hiinnaw a shungpaw um lan khyh.²³Pawccecize kae yn hoitupaw te kae nynh ka beikpaw Pachia vaawpaw nynh atazi khe ka pe yn thadyn zah,²⁴‘Paul, rih nan; nang tuh Sizar siapharan malang na thadyn cih; nang ryte sanphalung kya na cceihkheih oh paw balyn kha Pachia nynh khynnaw ae pya cih oh,’ cite yn hopya.²⁵Tukeiccuze uno hae, nae rawthung sah; pawccecize kae yn hopya thyhte yn cyihkuh cih cite Pachia kha ka zyn.²⁶Tuhzemah aening hynh tuikoih ccangkhakheit kyakhe oun vua mamin cih,” cite a hopya hae.

²⁷Thuasalama zi haw lae palinaw he yn thua tuh, Mediterranean rili kya oun loubia lyakhe ziraccyng loukaw tuh sanphalung ryalahtu hae nynh laerou kalan kae naekuh vae cite a tua hae.²⁸Tui kha he a toutua hae tuh, lang kuin akhupaw kha a muih hae; takyh asawnaw lang he a cceih hae te, bua toutua hae zah lang haw lae pangaw akhupaw kha a muih hae.²⁹Lungpi kha kae diasei cih cite rih hae zah sanphalung nulang te sivawhinpi ccangpali kha tui lungkhu lang a saw hae, te khua adae nawlan saw a sang hae.³⁰Sanphalung ryalahtu hae nynh sanphalung kyate zya ccue lan zuakuh hae zah sanphalung malang te sivawhinpi hae a sah hae paw o-ang lante umsakuh hae zah kohlung kha rili kalan a sawbung lya hae khe,³¹Paul nynh rhawbawipaw te rhawkaw hae kha, “E sanphalung ryalahtu hae nynh sanphalung kya a um khyh hae ze, nanning na lue kho lan khyh oh,” cite a hopya hae.³²Rhawkaw hae nynh kohlung rui hae kha phya bae hae zah kohlung tuh tui a lousah hae.

³³Khua vyavya yn dae tuh, Paul nynh ccungccaw hae balyn kha looh ae lan thawte hopah hae zah, “Nanning tuh nae bungzou zah looh leite, pawsang ae leite atunin cia nin haw lae pali na um vae oh.³⁴Tukeiccuze looh ae ccavae oh cite kae ngia oh, pawccecize looh tuh nae hiinnaw hanlan nynh thua; nanning laku hum sanmah a sangrua ccangkheit san khuakuh lan khyh,” a cipya hae.³⁵Tuhte he a ho koute Paul nynh sanlou kha lawkuh zah mih balyn malang khe Pachia kalan lungtuabya hote sanlou kha eih zah a ae.³⁶Minmin balyn mah mih lungngaengan zah looh a aebua vae hae.³⁷Tuh-e sanphalung kya kae umpaw tuh kae balynte za ning sung sari lu taruh kae cih.³⁸Minmin nynh phe byn lan a ae kou hae te, sanphalung tuh a phupaw azaw ccaw cite chanvuihphaw kha rili lungkhu lang a vua hae. Sanphalung Aroh

³⁹Khua he yn dae tuh, tuh-e ram tuh nyh khyh hae; thuasalama akouleihnaw san kheit kya varang lang kha muih hae zah athua kho ze tuhlang tuin sanphalung kha cciasah lan cite a paccyn hae.⁴⁰Sivawhinpi hae kha supah hae zah rili lungkhu lang a saw hae, te zawnawpaw khiidenawpaw liarue hae kha phou hae zah malang e boeidaw kha a dawpya hae, te varang langkhe khisan a mungsah bia hae.⁴¹Thuasalama sanphalung tuh laesia adohpaw kha dia zah a thadyn vae, te sanphalung malang tuh laesia kya a bingku keiccuze pia kho vae khyh; thuasalama anulang tuh rili tuileih eih aru keiccuze phe a khya.⁴²Thongccah hae nynh tuizeihkute a ccue khyh nawlan hae, rhawkaw hae nynh minmin kha chia lan a paccynku hae⁴³thuasalama rhawbawipaw nynh Paul kha a luesah ry pawte mih paccynkunaw kha khee zah, tui a zeihthya hae paw nynh masaty toikuh hae sah lah varang lang zua hae sah;⁴⁴te tuhlaepaw nynh thingphe hae te sanphalung akhyanahpaw thing hae te zua hae sah cite kaw a pya hae. Tuhcite minmin balyn tuh khyndadyh lan laerou kalan pong a zua hae. Malta Tuikoih kya Paul

¹Laerou kya khyndadyh lan kae thua koute, tuh-e tuikoih tuh Malta tuikoih nynh thua cipaw kae ny.²Tuin kya-e ccungccaw hae tuh kae tungvaw thawccinaw myarya a hoi hae; pawccecize tuh lya tuh khuaarah zah eih akyaa keiccuze maee oun tuapah hae zah kae balynte hoyte oun do-oih hae.³Paul nynh ccungpareih cce kheit khui zah maee vawlan he a phungbia tuh maee aso keiccuze hupaw sa kheit yn pou zah Paul kuih kya phang vekuh.⁴Tuin kya-e ccungccaw hae nynh Paul kuih kya phang vekuhpaw hupaw kha he a muih hae tuh, “E ccungccapaw hynh ccungccaw a theihpaw nynh athua cih; rili kyate a lue zemah dingnaw nynh hiin lan ua vae khyh,” cite mimaw te mimaw a hoku hae.⁵Tuhzemah Paul nynh hupaw kha maee lungkhu lang valah he zah ccapyh sanmah vaemaw mue khyh.⁶Tuhzemah aning tuh pong yn phin vae cih, tuhkhyhze vaekheihmawte yn khuliakuh cih zah phe yn chih cih cite phang a do hae; thuasalama khaw cia do hae zah Paul tuh pawtua a um khyhpaw kha he a muih hae tuh, mih lungpaleihkuh zah, “Aning tuh pachia nynh thua,” a ci hae.

⁷Tuh-e hmin pe khe Publias a ci hae paw tuikoih kya-e khuabawipaw loram a um; tuh-e khuabawipaw nynh a mikhia lang oun thuasah zah nin thum cia hoyte oun do-oih.⁸Tuh lyatuin Publias a paaw tuh a lu ccih zah chii te toikupaw ccinaw te a la ikhaekuh; Paul nynh a kalan tee zah a tungvaw a kuih khangte sawsangpah zah a dan.⁹Tuhte acyihkuh koute tuikoih kya-e ccinaw hoi hae paw mingccang hae mah oun thua hae zah a dan hae.¹⁰Minmin nynh lasung patae oun pya hae, sanphalung te he kae thokuh tuh, kae hanlan ahoboupaw vaelooh miakaw kha sanphalung kya oun nungpya hae. Rom Khua Paul A Thua

¹¹Sawpaw sah thum koute khuaccihsaw lungkhu tuh-e tuikoih kya po a umpaw Apheipaw Uno hae muinsan akepaw Alexandria sanphalung te bua kae thokuh.¹²Sirakus khua kya kae thua zah tuin kya nin thum kae um.¹³Tuin kyate po kae voi zah Rekium khua kya kae thua; nin kheit kae um koute deilang e khisan yn zaw zah nin ningnaw kya Puteoli khua kae thua.¹⁴Tuin kya zyntu hae kha kae muih hae zah minmin nynh nin sari um lan oun ngia hae. Te tuin kyate Rom khua kya kae thua.¹⁵Rom khua e zyntu hae nynh kaening the kha he a thae hae tuh, kaening kha cciadue khylan Appius Kungkunaw te Khycce ryabu Buthum kyacia oun cceih hae; Paul nynh he a muih hae tuh, Pachia kha thehoysah zah a thawmuin.

¹⁶Rom khuapi kya he kae thua tuh rhawbawipaw nynh thongccah hae kha a ngawtupaw lupipaw kalan a ap hae, thuasalama Paul tuh a makhaete amaw a ngawtupaw rhawkawpaw ryte um lan a ua. Rom kya Paul te Judah Piccan hae

¹⁷Nin thum acih koute Paul nynh Judah piccan hae kha tungku lan ko hae zah he oun thua hae te, Paul nynh minmin kha, “Uteno hae, ah minphuin kha thuasah, ah minpaaw hae phung kha thuasah rawsete pawsang ka cyih lei pite Jerusalem kya yn kyng hae zah Rom hae kuih kalan yn ap hae.¹⁸Rom hae nynh akaw-aleih bya yn khia hae zah, ka tungvaw kya chinaw aphahpaw seinaw a um khyh keiccuze luesah lan yn ry hae.¹⁹Thuasalama Judah hae nynh tuh-e tuh a ei hae keiccuze Sizar kalan azukhan leite thuathya vae khyh; tuh-e tuh ka minphuin hae tungvaw seibe lanpaw ka hoi keiccu thua khyh.²⁰E kong keiccuze nanning ryte muihkute byahoku lan ka ry zah kae ko oh; hynh-e sivawrui te khii ka thuanawpaw hynh Israel hae mih ngaehoinaw keiccu nynh thua,” a ci.

²¹Minmin nynh, “Nang na konglang Judea ram kyate oun ky hae paw ccaw kae mue khyh, hynhlang oun thua hae paw uno hae nynh mah nang na konglang ahoy leipaw pawpaw mah ho khyh hae, thae mah oun thaesah khyh hae.²²Thuasalama na tuanaw kha thaetua kae ry; pawccecize hynh-e beiknaw rawsenawpaw bya hynh hmin takyh kya a ho hae cipaw kae ny,” cite a khung hae.

²³Minmin nynh Paul te tungkunaw nin kha khya hae zah, tuin nin khe ccungccaw patae tuh Paul a ryanaw kalan oun thua hae. Paul nynh awkhua te zete cia Pachia peenaw kong kha ccaekiakhanpah hae zah, Jesu konglang kha minmin nynh a thaethya nawlan hae, Moses Kawbya ccauh kya-e te Profeh hae ccauh kya-e kha a hopya hae.²⁴Abang nynh tuh-e a hopaw bya tuh thaethya hae zah abang nynh tuh zyn khyh hae.

²⁵Tukeiccuze mimaw te mimaw laku mih lunglokuh khyh zah, a ki lya hae khe Paul nynh bya kaw kheit a hopya hae paw tuh: “Thyaa Muisaw nynh ah minpaaw hae kya profeh Isaiah kyate hmerarih lan a hopaw tuh:²⁶‘E ccungccaw hae kalan cceih lah,Ngae tuh na ngae cih oh zahna thaethya lan khyh oh;do tuh na do cih oh zahna muih lan khyh oh.²⁷Pawccecize hynh-e ccungccaw haethinlung tuh phe aping,mih nakaring tuh phe apang,mih mit tuh phang masi hae;tuhkhyhze tuh mih mit nynha muih cih,mih nakaring nynh a thae cih,mih lung nynh a nyhthya cih,te ka kalan oun maekuh cih hae zahminmin kha pheka dansah cih hae paw,cite hopah hae,’ a ci.

²⁸Pachia khumnaw bya tuh Zenta hae kalan ky thua vae zah minmin nynh a thae vae cih hae cipaw hynh nyh ccavae oh,” cite Paul nynh a ci.²⁹Tuh-e bya a ho koute Judah hae tuh pou hae zah mimaw te mimaw laku thawte a eikuh hae.

³⁰Paul tuh a hohkupaw inn kya kum ning phe ccing lan um zah a kalan oun cceih hae paw balyn kha a thuasah hae.³¹Pachia peenaw kong kha ho zah Bawipaw Jesu Khri kong kha rawhoyte a kheetu um leite a ccangpya hae.

Bible Society of Myanmar

https://app.library.bible/content/1a340f5ae072b2f4