লুক18
1আকো নোইতা ইশুহা য়োংতোংবিহিং হাত্রং জিংদো পাচাইকো আসা লোচোপেংঙেংপা মাজিংকো তামসা এপা জিংওয়া মিংচি ল্যায়ে,2“ইচো শহরতা সেংজাসো মোচ্ছুংওয়া আসা দিংঙাবিহিংনে আদর মোজোওয়া ইচো ন্যায় জোওয়া ন্যায়ধীশ নিমি।3আসা আকু শহরতাহা ইচো মুরিংমুরে নিমি। আকুহা নেকো নেত্তা ন্যায়ধীশকোতা হোমসা ‘কাহিংপা স্যাসুওয়া দিংঙাহিংপা কুং ন্যায় জোপি’ তামসা জাংচাংমি।4“সায়ু নিহয়ু চোইপা আকু ন্যায়ধীশহা মুরিংকো জাংওয়া নুওয়াংহা মাহিংতো, আদো নোইতাহা আকুহা তুংসিংতা নোয়ে, ‘কা সেংজাসোরে মাচ্ছুংমগা আসা দিংঙাবিহিংনে আদর মোজোমগা!5আদো ই মুরিংমুহা কাহিং নেকো নেত্তা নুওয়াং নাংপুক্যইপা সুজাওয়াকো সোতা কা ইহিংয়া ন্যায় জোপিরোওয়া। মোকোনাহা ইহা নেকো-নেত্তারাং ওয়াংমসা কাহিং নুওয়াং নাংপারোওয়া’।”6আসা প্রভুহা য়োংতোংবিহিং জাংয়ে, “আকু মেংতাওয়া ন্যায়ধীশকো নুওয়াং হিং।7এপারাং জেইসুং লিসুং সেংজাহিং পাচাইওয়া আপনি দিংঙাবিহিংয়া আকুহা মেংতাওয়াসো য়োইমসা মেএকোগা? আসা আকুহা আপনিকো দিংঙাবিহিংয়া ন্যায় জোকো গোইপাকোগা?8আকো সোতা কা নাবিহিংয়া জাংরোওয়া, আকুহা আপনিকো দিংঙাবিহিংয়া সেন্নেপা মেংতাওয়াসো বাচাইরোওয়া। আদো দিংঙাকো চেংওয়া লেনুওয়া আকুহা বাসিমতিতা দেংওয়াবিহিং দোসুকোগাসা?”9আপনিহিং মেংচে তাংজি নিওয়া নোমসা দোসরাহিংয়া মেংতাপা নোওয়া দিংঙাহিংয়া ইশুহা এপাজিংওয়া মিংচি হিংপায়ে।10“ইচো ফরিসি আসা তোংক্যা জুওয়া দিংঙা য়হুদিবিকো দেমসাতা পাচাইয়াকো হোয়ে।11ফরিসিহা জামসা তুংসিং নাপোসোরাং এপা জাংমসা পাচাইয়ে, ‘ও সেংজা, কা নাতিহিংয়া গারানি তারোওয়া, হাংপাতানাহা কা দোসরা দিংঙাবি ত্যাবাপা বাংওয়া আসা মেংতাওয়া দিংঙা মোকো। কাহা মুনুংনাংসুয়াংতো, আসা কা ই তোংক্যা জুওয়া দিংঙা বেপারে মোতো।12কা ইয়্যাতা নিহকোই উপাস য়ুংমগা আসা মুংচাওয়া তাংসাকো দশাংশ নাতিহিং পিচামগা।’13“আদো তোংক্যা জুওয়া দিংঙাহা তানাং জামসা লোডিংবাতারে ন্যইমক্যইপা আপনিকো তুংসিং ত্যামসা জাংয়ে, ‘ও সেংজা, কা বেওয়া পাপি দিংঙাকো তোইতা লামতুপি।’14“কা নাবিহিংয়া জাংরোওয়া, আকু ফরিসিবেপা মোকো, আদো আকু তোংক্যা জুওয়া দিংঙাহা সেংজাকো নাগাইতা এনতাওয়া দিংঙা জিংমসা সাতা লাকায়ে, হাংপাতানাহা আপনি টেবো জিংকো কেংওয়াবিহা আত্যইচিংপা জিংরোওয়া, আদো আপনিহিং আত্যইচিংপা নোওয়াবিহা টেবো জিংরোওয়া।”15ইশুহা আপনিকো খুই ওইমসা আশিষ পিচাকো তামসা দিংঙাবিহা আপনি আপনিকো চেংচুংবিহিং আকোতা পারায়ে। ই তিংমসা য়োংতোংবিহা আবিহিং য়েংয়ে,16আদো ইশুহা আবিহিং মোউমসা জাংয়ে, “চেংবিহিং কুংতা ওয়াংকো পিচা, আবিহিং মোয়োই, হাংপাতানাহা সেংজাকো রাজ্যহা এপা জিংওয়াবিকোরাংগা।17আজিপ্পা কা নাবিহিং জাংরোওয়া, হাংসু আপেবিকো তুংসিংবেপা জিংমসা সেংজাকো রাজ্যহিং মায়ুচা, আবিহা আকো নাপোতা হোকো মোচুরোওয়া।”18ইচো য়হুদিবিকো মাটা দিংঙাহা ইশুহিং উইয়ে, “ও আসল উটকেওয়া, হাত্রংরে মিসিওয়া সাদি মুংচাকো কাহা হাং জোনেকোগা?”19ইশুহা আকুহিংয়া জাংয়ে, “নাতিহা কাহিংয়া হাংপা আসল তামগা? সেংজাহিং ল্যামসা হাংসুরে আসল মোতো।20সেংজাকো লিংপাংতা জোনেওয়াবিহা নাতিহা গেদিংয়ো, ‘মোনুংনাংকো, দিংঙাহিং মাস্যাকো, মুকুইকো, প্যায়োং মোয়্যইকো আসা আপনিকো আয়ুসো আপাহিং আদর জোকো।’”21আকুহা জাংয়ে, “ই তাংসা লিংপাংবিহা কাহা আপেচিনুসোরাং জোমসা ওয়াংমি নিনা।”22আসা ই হিংমসা ইশুহা আকুহিংয়া জাংয়ে, “নাতিহা ন্যাসারাং ইচো কাম জোকো নিও। নাতিহা হোমসা নাতিহিংপা নিওয়া তাংসা পুংজি পিইচামসা জোরোংবিহিং পোপি, আসা নাতিহা লোডিংবাকো পুংজি মুংচারোওয়া। নাতি লেই, আসা কুং নুনুই হুই।”23আদো ই হিংমসা আকু পুপুউ দিংঙাহা মাসাংমিরিংপা জিংপুমসা হোপুয়ে, হাংপাতানাহা আকোতা উইসে পুংজি নিমি।24আসা আকুহিং মাসাংমিরিংপা জিংমসা হোপুওয়া তিংনুওয়া ইশুহা আউতা নিওয়া দিংঙাবিহিং জাংয়ে, “তিংগা, পুপুউ দিংঙাবিহিংয়া সেংজাকো রাজ্যতা হোকো হাসেকো মুচুম্যান্যাপা নিমমে!25ল্যাইকো হোংবোইসো ত্যাইরম্যা হোকো মুচুমি ত্যাবাপা, পুপুউ দিংঙাবিরে সেংজাকো রাজ্যতা হোকো মোচুমগা।”26ই নুওয়াং হিংমবিহা আকুহিং উইয়ে, “এপা বেনাহা হাংসু মুক্তি মুংচাকোগা?”27ইশুহা আবিহিংয়া জাংয়ে, “ইহা দিংঙাবিসোহা মাতুওয়া নুওয়াংগা, আদো সেংজাসোহা তুমগা।”28আত্রংহা পত্রসহা জাংয়ে, “কাং, কাবিহা সাবি হুইতেমসা নাতিহিংপা হুইমি নিও।”29ইশুহা আবিহিংয়া জাংয়ে, “কা আজিপ্পারাং নাবিহিং জাংরোওয়া, সেংজাকো রাজ্যকো সোতা আপনিকো সা, ডুওয়া এবি, আয়ু, আপা, আসা মে, চেংওয়া চেমেবিহিং হুইতেমবিহা30নেরাং আকুরোমা সিওপা মুংচারোওয়া আসা দেপাওয়া সময়তা হাত্রংরে মিসিওয়া সাদি মুংচারোওয়া।”31ইশুহা বার্চো য়োংতোংবিহিং ইদ্যাতা মোউমসা জাংয়ে, “হিং, য়াংবিহা য়রুশালেম হোদাংয়ে। অগমবক্তাবিকো দিংঙাকো চেংওয়াকো তোইতা লাওয়া তাংসা নুওয়াংহা আউতা পুরা জিংরোওয়া।32আকুহিংয়া প্যইমসা দোসরা জ্যাকো খুইতা স্যইপুরোওয়া। আবিহা আকুহিংয়া য়েংপারোওয়া, লেফেপারোওয়া, আসা তোতি তোতোরোওয়া,33সাটাসো ডুরোওয়া, আসা স্যারোওয়া। আদো সাসুংয়ুকো নোইতাহা আকুহা ন্যাসারাং ঙারোরোওয়া।”34আদো য়োংতোংবিহা ই নুওয়াংহা ইচোরে মোকোইতো। আবিকো সোতাহা ই নুওয়াংহা ম্যইপুমি নিমি, আসা আকুহা হাং ল্যাদিংমে আবিহা হাইরে মোকোইতো।35ইশু য়রিহো শহরতা দেকাদাংনুওয়া ইচো মিচো মিতিওয়া দিংঙা ন্যাতাতা গামসা য়াদিংমি।36উইসে দিংঙাবি হোদাংওয়া সিদা চ্যইমসা মিচো মিতিংওয়া দিংঙাহা উইয়ে, “ইতা হাং জিংদিংগা?”37দিংঙাবিহা আকুহিংয়া জাংয়ে, “নাসরতকো ইশু ইসো হোদাংনা।”38ই হিংমসা আকু মিচো মিতিংওয়া দিংঙাহা ঙামসা জাংয়ে, “ও ইশু, দাউদ জাইপুকো চেংওয়া, কুং তোইতা লামতুপি।”39নাগাই নাগাই হোদিংবিহা আকুহিং চেকেপা য়ুংকো তামসা য়েংয়ে। আদো আকুহা ন্যাসারাং সিওপা ঙামসা জাংয়ে, “ও দাউদ জাইপুকো চেংওয়া, কুং তোইতা লামতুপি”40তেইদিংওয়া কোকোইত্তা জামসা ইশুহা “আকুহিং ইতা পারা” তামসা জাংয়ে। আকু মিচো মিতিংওয়া দিংঙাহা ওয়াংয়ে, আসা ইশুহা আকুহিংয়া উইয়ে,41“নাকো সোতা কা হাং জোকোগা?”
আকুহা জাংচায়ে, “উটকেওয়া, কা মিচো তিংকো ছুকো।”42ইশুহা আকুহিংয়া জাংয়ে, “নাতিহা তিংকো ছুকো, হাংপাতানাহা নাকো দেংওয়াসো নাতিহা সাংচপুয়ো।”43আত্রংতারাং আকুহা তিংকো ছুয়ে, আসা সেংজাহিং তাচামসা ইশুকো নুনুই হুইপুয়ে। ই তিংমসা তাংসা দিংঙাবিরে সেংজাহিং তাচায়ে।
আকুহা জাংচায়ে, “উটকেওয়া, কা মিচো তিংকো ছুকো।”42ইশুহা আকুহিংয়া জাংয়ে, “নাতিহা তিংকো ছুকো, হাংপাতানাহা নাকো দেংওয়াসো নাতিহা সাংচপুয়ো।”43আত্রংতারাং আকুহা তিংকো ছুয়ে, আসা সেংজাহিং তাচামসা ইশুকো নুনুই হুইপুয়ে। ই তিংমসা তাংসা দিংঙাবিরে সেংজাহিং তাচায়ে।
The Seed Company