লুক17
1ইশুহা আপনিকো য়োংতোংবিহিং জাংয়ে, “আজিপ্পারাং দিংঙাহিংয়া পাপ জোপাওয়া সময়বি দেয়োংরোওয়া। আদো আকু নুওয়াং পারাওয়াকোতাহা টেবো দুঃখ ওয়াংকো, হাংসু পাপতা পুরামমে।2হাংসু ইচো আপেহিং পাপ জোপাওয়াতা পুরা, আকো সোতাহা আকুহিংয়া নেটোংতা ওয়াংটা থ্যইমসা ঝাহাদিতা বাডোইপুওয়া সেইগা।3আকো সোতা হোশিয়ার য়ুং। দোসরা সেংজাতা দেংওয়ামি নাকো তোইতা পাপ জোনাহা আকুহিং ঙামসা য়েং, আসা আকুমি আপনিকো পাপহিং হুইতেমসা ওয়াংনাহা আকুহিং মাপ পিচা।4নাকো এবিমি নাকো তোইতা সাইয়ুতা নীকোই চোইপা পাপ জোমসা নীকোই চোইপারাং নাকোতা মাপ য়ায়োংনাহা আকুহিং মাপ পিচা।”5জেংওয়া পোইংবিহা প্রভুহিংয়া জাংয়ে, “প্রভু, কাবিকো দেংওয়াহিং সিওপা জোপি।”6প্রভু ইশুহা আবিহিংয়া জাংয়ে, “নাবিকোতাহা তৌরিকো অংসে বেপা দেংওয়া নিনাহা ই কোটোসেকো সিংতেংহিং ওইচপুমসা ‘নাতিহা ঝাহাদিতা বাডোইচপু’ তামসা জাংনাহা আকুহা বাডোইচপুরোওয়া।7“নাবিহা হাংসু আপনিকো ডেইয়া লুংনিংসো কাম জোমসা, মোকোনাহা লুকা ল্যাচোইমসা সাতা লায়োংনুওয়া ‘সেন্নেপা ওয়াংমসা আমা চাকো গা’ তামসা জাংকোগা?8আকুহা এপা মাজাংকোগা? ‘কুং সোতা আমা লেইয়াতু, আসা মিংতেনুওয়া কাহিং চাকো পিচা, আকো নোইতা মেংচে নাতি চা।’9আপনিকো জাংওয়া কাম জোমকো সোতা আকু গিরিওয়াহা ডেইয়াহিংয়া গারানি তামসা জাংকোগাসা?10এপারাং নাবিহিং খুইওয়া তাংসা কাম জোপুনতেনুওয়া নাবিরে এপা জাং, ‘কাবিহা ডেইয়া মেংচেগা, আপনিকো জোনেওয়া কামবিহা জোদিংয়ো’।”11ইশু য়রুশালেম হোদিংনুওয়া, সামরিয়া আসা গালীল জায়গাকো লুংবি লুংবি জিংপুমসা হোয়ে।12আকুহা ইচো লোইতা দেকাদাংনুওয়া ত্যাচো য্যা চাপুওয়া দিংঙাবিহিংপা দোসুয়ে। আবিহা বার্গাংসো জামসা এপা জাসুয়ে,13“ও প্রভু ইশু, কাবিকো তোইতা লামতুপা জোমসা কাবিহিং সাংপাপি!”14ইশুহা আবিহিং তিংমসা জাংয়ে, “নাবিহা পাউবিকোতা হোমসা আপনিহিং তিংপাতু।” আবিহা হাদিংওয়া কোকোইত্তা আবিকো য্যা চাপুওয়াহা ন্যাতাতারাং সাংপুয়ে।15আবিকো প্যাকোতাহা ইচোহা আপনিহিং সাংচাপুওয়া সিদা চ্যইয়ে আসা ঙামসা সেংজাহিং তাচামসা ইশুকোতা লায়োংয়ে।16আসা ইশুকো নাগাইতা চুনুইমসা গারানি তায়ে, আকু লায়োংওয়াহা সামরি জ্যাকো দিংঙা নিমি।17আসা ইশুহা জাংয়ে, “সাংওয়াহা ত্যাচো দিংঙা মোকোতা? লেরা কুচো দিংঙাহা হাংতা হ্যাপুংগাসা?18ই সামরি জ্যা ল্যামসা লেরাহা হাংপা সেংজাহিং তাচাকো মোওয়াংমগা?”19আকো নোইতাহা ইশুহা আকু সামরিহিংয়া জাংয়ে, “লোমসা হোপুই, নাকো দেংওয়াকো সোতারাং নাতিহা সাংচপুয়ে।”20সাইয়ুহা সেংজাকো রাজ্য হাত্রং দেরেকোমে তামসা ফরিসিবিহা ইশুহিং উইয়ে, ইশুহা আবিহিংয়া জাংয়ে, “সেংজাকো রাজ্যহা তিংপা মেলেরোওয়া।21‘কাং, হাংসুরে সেংজাকো রাজ্যহা ইতা নিও! আসা উতা নিও!’ তামসা জাংমক্যইরোওয়া, হাংপাতানাহা সেংজাকো রাজ্যহা নাবিকো প্যাকোতারাং নিও।”22আকো নোইতা ইশুহা আপনিকো য়োংতোংবিহিং জাংয়ে, “এপা জিংওয়া সময়রে ওয়াংরোওয়া, নাবিহা দিংঙাকো চেংওয়াহিংয়া ‘ইকোই ন্যইচা মুংদো তুকোগা’ তামসা জাংরোওয়া, আদো ন্যইচা মোমুং।23দিংঙাবিহা নাবিহিংয়া জাংরোওয়া, ‘ইতা কাং’ মোকোনাহা ‘উতা কাং’ তারোওয়া, আদো নাবিহা আবিকো নুনুই মুহুই,24হাংপাতানাহা ডিংবাতা তাত্রাইনু ইদ্যাসোহা ইদ্যা চোইপা তিংমি ত্যাবাপা কা দিংঙাকো চেংওয়াহিংনে এপারাং তিংরোওয়া,25আদো এপা জিংওয়ারোমা নাগাই কাহা কোইচ্যানেরোওয়া আসা ই সময়কো দিংঙাবিহা কাহিংয়া মোঘ্যইরো তামসা জাংরোওয়া।26নোহাকো সময়তা জিংপুমি ত্যাবাপা কা দিংঙাকো চেংওয়াকো সময়তারে জিংরোওয়া।27নোহা জাহাজকো নাপোতা মোহোয়াংনু চোইপা দিংঙাবিহা চাসু-আংসুদিংমগা, আসা বিয়ৌবি জোসুদিংমগা। আত্রংরাং বান্যা লেমসা তাংসাহিং দাংপাপুয়ে।28লুতকো সময়তারে এপারাং জিংপুমি নিমগা। দিংঙাবিহা চাসু-আংসুদিংমগা, চোইসুদিংমগা, পিইচাদিংমগা, তিংসুদিংমগা, আসা সাবি বানাইসুদিংমগা।29লুতকো সদম লোইহিং হুইতেমসা হ্যাপুনুরাং লোডিংবাসো মেহ আসা গন্দক হুইমসা তাংসাহিং দাংপাপুয়ে।30কা দিংঙাকো চেংওয়ারে বাসিমতিতা লেনুওয়া এপারাং জিংরোওয়া।31আত্রংকো দিনহা সাকো তোইতা নিওয়া দিংঙাবিহা হাইক্রি লাংরেকো নাপোতা মোহোকো, এপারাং লুংনিংতা নিমবিরে সাতা মালায়োংকো।32লুতকো মেকো নীকো হুটিং জিংপুওয়া নুওয়াংবি প্যারাপা!33হাংসু আপনিকো সাদিহিং বাচাইকো কেং, আবিহা য়াংপারোওয়া, আদো সাদি য়াংপামবিহা আপনিকো সাদিহিং বাচাইরোওয়া।34কা নাবিহিং জাংরোওয়া, আত্রংকো লিসুংহা ইচো ন্যাগুতা নিহসো দিংঙা জিংওয়া নিরোওয়া, ইচোহিংয়া পুরাচারোওয়া, আসা ইচোহিংয়া হুইতেরোওয়া।35এপারাং চিত্তা ওয়াংটা হুইদিংওয়া নিহসো মেমেবিতাহা, ইচোহিংয়া পুরাচারোওয়া আসা ইচোহিংয়া হুতেরোওয়া।36[এপারাং লুংনিংতা কাংপামবি নিহসো দিংঙা নিরোওয়া, ইচোহিংয়া পুরাচারোওয়া ইচোহিংয়া হুইতেরোওয়া।]”37আত্রংহা য়োংতোংবিহা ইশুহিং উইয়ে, “প্রভু, ইহা হাংতা জিংকোগা?”
ইশুহা আবিহিং জাংয়ে, “হাংতা অ্যাহপুওয়া নি, আউতা সিগুংবি পুংসুমি ত্যাবাপা ই চিহ্নসোহা নোইস্যাকো দিনবি দেপানতেয়ো তামসা গেরোওয়া।”
ইশুহা আবিহিং জাংয়ে, “হাংতা অ্যাহপুওয়া নি, আউতা সিগুংবি পুংসুমি ত্যাবাপা ই চিহ্নসোহা নোইস্যাকো দিনবি দেপানতেয়ো তামসা গেরোওয়া।”
The Seed Company