লুক19
1ইশুহা য়রিহো শহর জিংমসা হোদিংমি।2আকু শহরতাহা জোক্কোই মিং নিওয়া ইচো পুপুউ দিংঙা তোংক্যা জুমবিকো মাটা নিমি।3আকুহা ইশুহিং কাংকো কেংদিংমি, আদো আকুহা বেটেওয়া দিংঙা নিমি, আকো সোতা উইসে দিংঙাবি নিমকো সোতা আকুহা ইশুহিং মিতিংতো।4আকো সোতা আকুহা ইশুহিং কাংকো নাগাই ঠুউইপুমসা হোয়ে, আসা ইতেং মুইরাসেকো সিংতেংতা ল্যহকায়ে, হাংপাতানাহা ইশুহা আকু ন্যাতা জিংমসারাং দেপাদাংমি নিমি।5আকু জায়গাতা দেয়োংনুওয়া ইশুহা তোইতা ন্যইমসা আকুহিং মোউমসা জাংয়ে, “ও জোক্কোই, সেন্নেপা লিতা উইপামসা লেই! কা হিনিহা নাকো সাতা য়ুংরো।”6জোক্কোইহা সেন্নেপা লিতা উইমসা ইশুহিং য়াংতামসা সাতা পুরায়ে।7ই তিংমসা তাংসা দিংঙাবিহা এপা জাংমসা নেক্যা-নুকুপা য়্যইসুয়ে, “ই দিংঙাহা পাপি দিংঙাকো সাতা সাজিংয়াকো হোদাংতা!”8আদো জোক্কোইহা প্রভুকো নাগাই জামসা জাংয়ে, “প্রভু, কাং, কা নেহা কুংতা নিওয়া পুংজিকো উওয়্যা ভাগহা জোরোংবিহিং পিচপুরোওয়া, আসা দোসরাহিং ল্যইপামসা কা সিওপা য়ুচামি নিনাহা আকুরোমা দিদ্যা সিওপা লাপিরোওয়া।”9ইশুহা আকুহিংয়া জাংয়ে, “হিনিহা ই সাহা উদ্ধার মুংচামি নিও, হাংপাতানাহা জোক্কোইরে অব্রাহামকো চেংওয়ারাংগা।10কা দিংঙাকো চেংওয়াহা য়াংপুমবিহিং মোরেকো আসা বাচাইকো তামসারাং লেমগা।”11ই নুওয়াং হিংমসা ইশুহা দোসরা মিংচি হিংপায়ে, হাংপাতানাহা আবিহা য়রুশালেমকো আবেইতা দেরেমি নিমি আসা লেরাহা সেংজাকো রাজ্যহা সেন্নেপা দেরেরো তামসা নোদিংমি।12“ইচো মাটা দিংঙাহা তানাংকো লোইতা হোমসা আপনিকো লোইকো জাইপু জিংমসা লারেরো তাওয়া নোয়ে।13তানাং হ্যাওয়ারোমা নাগাইহা আকুহা আপনিকো ত্যাচো কাম জোমবিহিং মোউয়ে, আসা তাংসাহিং ইচো-ইচোতি সুনকো টাংকা পিচামসা জাংয়ে, ‘কা মালায়োংনু চোইপা ইসোরাং কামাই জো।’14“আদো আকু লোইকো দিংঙাবিহা আকুহিংয়া মোসুংপা জোচাংমি। আকো সোতা আকু হ্যাপুনতেনুওয়া আবিহা আকো নুনুই ইচো নিহসো পোইংবিহিং এপা জাংমসা নিংপুয়ে, ‘ই দিংঙাহা জাইপু জিংওয়া কাবিহা মেকেং।’15“আদো আকু দিংঙাহা জাইপু জিংমসারাং লায়োংয়ে, আসা লায়োংতানি আকুহা আকু কাম জোমবিহিং মোউমসা সুনকো টাংকাসো হাসে কামাইমমে, তামসা আবিহিং উইয়ে।16“নাগাইহা ইচো দিংঙাহা লেমসা জাংয়ে, ‘উটকেওয়া, নাকো পিচাওয়া ইচো সুনকো টাংকাসোহা কাহা ত্যাচো টাংকা কামাইমসা পায়ে।’17“জাইপুহা আকুহিংয়া জাংয়ে, ‘এনতাপারাং জিংয়ে ও কুং ডেইয়া, নাতিহা এনতাপারাং জোয়ো! নাতিহা ত্যাচো শহরকো তোইতা কাংওয়া জিংরোওয়া। নাতিহা এনতাওয়া কাম জোওয়া ডেইয়াগা! হাংপাতানাহা নাতিহা আত্যইচওয়া নুওয়াংতারে ইমানদার নিও।’18“দোসরা কাম জোওয়া ডেইয়াহা লেমসা জাংয়ে, ‘উটকেওয়া, নাকো পিচাওয়া ইচো টাংকাসোহা কা ঙাচো টাংকা কামাইয়ে।’19“জাইপুহা আকুহিং জাংয়ে, ‘নাতিরে ঙাচো শহরকো কাইজি জিংরোওয়া।’20“ন্যাসারাং দোসরা ইচো কাম জোওয়া ডেইয়াহা জাংয়ে, ‘উটকেওয়া, কাং, কা নাকো পিচাওয়া টাংকাহা নাতি হেপা পিচা এপারাং তোরাতা চংমসা এমি নিও।21কা নাকোসো চুসুংমি, হাংপাতানাহা নাতিহা লুংটুই বেওয়া দিংঙাগা। হাংতা মেএ আউতারে লাংচামগা, আসা হাংতা মিমি আউতারে নাতিহা চ্যামগা।’22“জাইপুহা আকুহিংয়া জাংয়ে, ‘ও মেংতাওয়া ডেইয়া, নাকো জাংওয়া নুওয়াংসোরাং কা নাতিংহিংয়া দোষ তিংপারোওয়া। কা লুংটুই বেওয়া দিংঙাগা আসা আপনি হাংতা মেএ আউতা য়ুচামগা আসা হাংতা মিমি আউতারে চ্যামগা তামসা নাতিহা গেমিরাং নিও।23আদো নাতিহা হাংপাসা কুং ন্যাস্যাহা ব্যাঙ্কতা মেএমগা? ব্যাঙ্কতামি এনাহা কা ওয়াংনুওয়া আকু ন্যাস্যাকো চেংবে মুংচাকো!’24“আত্রংহা আকু জাইপুহা আবেইতা জাদিংওয়া ডেইয়াবিহিং জাংয়ে, ‘আকোসো আকু ইচো টাংকা গিংমসা ত্যাচো টাংকা নিওয়াহিং পিচাপুই।’25“আবিহা আকুহিংয়া জাংয়ে, ‘উটকেওয়া, আকোতাহা ত্যাচো টাংকারাং নিদিংসা?’26“জাইপুহা জাংয়ে, ‘কা নাবিহিং জাংরোওয়া, হাংসুহিংপানি, আকুহিংয়া ন্যাসারাং পিচারোওয়া। আদো হাংসুহিংপা মোতো, আকোতা এংসি নিওয়ারে গিংচাপুরোওয়া।27নেহা কাহিং জাইপু জিংওয়া মেকেংমবিহিংয়া ইতা পারা, আসা আবিহিংয়া কুং দোংনাংতারাং স্যা’।”28ই নুওয়াং জাংপুনতেনুকো নোইতাহা ইশুহা আবিকো নাগাই নাগাই জিংমসা য়রুশালেমকো ন্যাতা হোয়ে।29হাত্রং আকু বেথফাগে আসা বেথানিয়া লোইকো আবেইকো জেইতুন য়্যাগ্যইতা দেয়োং, আত্রংহা ইশুহা নিহসো য়োংতোংবিহিং এপা জাংমসা নিংপুয়ে,30“আকু আবেইকো লোইতা হোতু, আউতা হোনতানি নাবিহা হাংসুরে নেচোইপা মাবাইয়াংওয়া ইপু গধাকো চেংবেহিং তাইদিংওয়া দোসুরোওয়া, আকুহিং সিপামসা ইতা পারা।31দিংঙাবিমি আকুহিং ‘হাংপা ল্যাদাংমগা’ তামসা উইনাহা, ‘প্রভুহিং ইহা ঘ্যইরো’ তামসা জাং।”32আকু নিহসো য়োংতোংবিহা হোয়ে, আসা ইশুকো জাংমবেপারাং গধাহিং দোসুয়ে।33আকুহিং সিদাংনুওয়া গধাকো গিরিবিহা আবিহিং উইয়ে, “হাংপা সিদাংমগা?”34আত্রংহা আবিহা জাংয়ে, “ইহা প্রভুহিং ঘ্যইরো।”35আসা আবি নিহসোহা আকু গধাহিং পারায়ে, আসা আবিকো আংদুংবি গধাকো জুপাতা ন্যায়ে, আসা আকো তোইতা আবিহা ইশুহিং বাইপায়ে।36ইশু বাইমসা নাগাই হোনুওয়া দিংঙাবিহা আবিকো আংদুংবি লুমসা ন্যাতাতা ন্যায়ে।37ইশুহা য়রুশালেমকো আবেইতা জেইতুন য়াগ্যইকো উইদুতা দেয়োংয়ে। আত্রংহা ইশুকো আআংপেপেচপুওয়া নাগাইকো কাম জোওয়াবি তিংমসা চেলোউ-মেলোউপা তাংসা য়োংতোংবিহা য়াংতাসুমসা সেংজাহিং তাচামসা ঙাসুমসা জাংয়ে,38“প্রভুসেংজাকো মিংতা লেওয়া টেবো জাইপুহা আশিষিতগা!লোডিংবাতা তিমেপা জিংকো! সেংজাকো প্রশংসা জিংকো!”39দিংঙাবিকো প্যাকোসো লেরা ফরিসিবিহা জাংসুয়ে, “উটকেওয়া, নাকো য়োংতোংবিহিং চেকেপা য়ুংকো জাং।”40ইশুহা জাংয়ে, “কা নাবিহিংয়া জাংরোওয়া, আবিবেমি চেকেপা য়ুংনাহা লুংটুইবি ঙাসুরোওয়া।”41য়রুশালেমকো আবেইতা দেওয়াংনুওয়া শহরহিং আপনিকো নাগাই তিংমসা ইশুহা কাইয়ে,42আসা জাংয়ে, “নাতিহা হিনিহা তিমেওয়াকো সোতা হাং ঘ্যইকোগা তামসা গেনাহা তুকোগা। আদো ইহা নাকো মিচোসোহা তুংচপুমি নিও!43নেহা এপা জিংওয়া সময় দেয়োংরোওয়া, নাতিহিং মেংতাপা জোওয়া দিংঙাবিহা নাতিহিং হুরাপা য়োইসুরোওয়া আসা তাংসা জায়গাসো নাতিহিংয়া মেইমসা এরোওয়া।44আবিহা নাতি আসা নাকো চেংবিহিংনে দাংপারোওয়া। আবিহা আত্রংহা ইরুং লুুংটুইসোহা দোসরা লুুংটুইহিংনে মেএরোওয়া, হাংপাতানাহা সেংজাহা নাতিহিং বাচাইকো লেনুকো সময়তাহা নাতিহা মানাইতো।”45আকো নোইতা ইশুহা দেমসাতা হোয়ে, আসা আকুহা দেমসাতা হাইক্রি পিইচাওয়া আসা চোইচাওয়াবিহিং46এপা জাংমসা ঘিইপুয়ে, “তাংজিকো হিগাতা এপা লাওয়া নিও: ‘কুং সাহা পাচাইওয়া সা জিংনেরোওয়া’ আদো নাবিহা ইহিংয়া কুইমবিকো গুংচাওয়া হোরোংবা বানাইয়ে।”47আকো নোইতা ইশুহা সদাইবিরি য়হুদিবিকো দেমসাতা ওয়াংমসা ঝিপাচাংমি। মাটা পাউবি, তাংজিকো উটকেওয়াবি আসা দোসরা দিংঙাবি হুইসুমসা ইশুহিং স্যাকো কেংয়ে,48আদো আবিহা ইশুহিংয়া স্যাকো ন্যাতারাং মোমুংতো, হাংপাতানা তাংসা দিংঙাবিহা আকো ঝিপাওয়াহা হিংতাপা জোচাংমি।
The Seed Company