Koreeg nà moog‑e39

1Gəl Yusifə e warê Isməiliigi eg wəjjíigǐ deena é Məsir. Fotifar ná Məsiri, moraa ná faan gona moraag nà paa Firuun‑i, e maar Yusif gar é Isməiliig.2Məi Tel tallǎn èg Yusifi e lee dum moog. E kaama teyag maa seen iinin ná Məsiri.3É gara seen iinin tursǐ Məi Tel təllǐ èg deene o liinǐ dumuun moog é jeg kay nà jisə̌n‑i,4Yusif gəmsí cuwəd gar é seen iinin, seen iinin e təli e ada jen ná e paa jeg inəgin‑i, e gəfí ĩnə məŋid é maaga e bijin ẽ goddo jega kay nà bilǐ.5É mun ná gəwsǐ ĩnə məŋid é maag iinin è jeg nà bilə̌nǐ kay‑e, Məi Tel e əild maag é Fotifara iiŋgə é kor é Yusif. Məi Tel əildí jeg iiŋgə nà é Fotifara nà teyag‑e èg nà gafa‑eelgee‑ne.6E bij jeg nà bilǐ kay‑e é Yusif ë aas, Fotifara 'təlldə̌n ë bono é jeem ná dhaan‑e ta wa, namees ná nəəmǐ‑in jo. Yusif boyǎn e kayaar əndəg.
7Gəl é gara wag man kuyjǐ, od é Fotifara ë eelg e ɲaw Yusifə, e bii'ĩnə: “Lee ũ nəgə èg daane!”8Gəl Yusif e maa e bii'ĩnə: “Seen əənə bijjə̃n jeg nà teyag te kay‑e dä aas, seen əənə bur 'təlldə̂n ë bon taw é jeg nà teyag taan wa é kora a aně teyag te‑e.9Jen man te ná gon məŋid bəid aan‑e wa. Seen əən bijjə̃n jeg kay dä aas, oono jo é kora u təəǐ od iini‑i. Â gar ã jisə jisə ná ən nii isi é Tel muu?”10E dhaar Yusifə naag kay, gəl Yusif e maǎn ná ẽ awda èg deene o ẽ nəgdí èg deene.
11É naanda man Yusifə e bad teyag ẽ kaamda kazaam iinin, war dhəm man taǎn teyaga wa.12Odo e bəgin é goog e bii'ĩnə: “Lee ũ nəgə èg daane!” Gəl Yusif e galaga tuu teyaga e bijí ĩnə googo dë aas.13É gara odo tursǐ Yusifə gəldí bijjí goog dë aas‑e,14e tarb dhəmg é maag inəgin e bii'ĩgən: “Turdu Ibrani nii ä jid bəí ẽ ceeddaaga, dharsa ẽ nagda èg daane é guurd, gəl a kosso taw.15É gara tursǐ a kossé ẽ wəddə̂naan‑e, e bij goog inəgin te‑e e gal tuu teyaga.”
16E bij goog é Yusifə èg deene ləŋ seen iinin e addé teyag.17Aneenda e filí ĩnə e bii'ĩnə: “Dhəm uun Ibrani nii u wərǐ ə̃gən te dharsa ẽ ceeddaan.18Gəl é gara a kossě jaam ẽ wəddan‑e e bij goog inəgin te e gal tui teyaga.”
19É gara seen iinin fiŋəssǐ kora od kursǐ ĩnə dhəm iinin jissǐ ĩnə‑i, e bagê rayne əndəg.20Seen e bag Yusifə e gəgin é fol, fol ná məlig gəssǐ jag nà jissə jam‑e. Yusif e nag een é fol.21Məi Tel tallǎn èg Yusifi e jisí ĩnə jisə ná weeda ləŋ jen ná gon jaga é fol‑e ë bon e cuu‑i diiŋə.22Jen ná gon jag nà é fol‑e, e gaf məŋid Yusifən ẽ denda jag kay nà é fol‑e è jisig iyəgini.23Jen ná gon jag nà é fol‑e bur 'təlldə̌n ë bon taw é jeg nà gəwsí Yusifən‑i wa, é kora Məi Tel təllə̌ní èg Yusifi o liində̌ni dum moog é jeg kay nà jisə̌n‑i.

Pioneer Bible Translators

https://app.library.bible/content/a230cccfbf4362be