𐴔𐴡𐴃𐴞 7を読んでください。

𐴔𐴡𐴃𐴞7

𐴈𐴡𐴏𐴟𐴥𐴌𐴞 𐴃𐴟𐴖𐴝𐴌 𐴁𐴝𐴦𐴁𐴟𐴃𐴠

¹”𐴈𐴡𐴏𐴟𐴥𐴌𐴞 𐴕𐴡 𐴊𐴡𐴙𐴅𐴧𐴡, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴌 𐴈𐴡𐴏𐴟𐴥𐴌𐴞 𐴘𐴡𐴥 𐴊𐴡𐴥𐴌𐴝 𐴕𐴡 𐴎𐴝𐴘𐴁𐴡.²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴕𐴊𐴞𐴓𐴧𐴝 𐴒𐴡𐴌𐴞 𐴃𐴟𐴣𐴀𐴝𐴥𐴌𐴝 𐴈𐴡𐴏𐴟𐴥𐴌𐴞 𐴊𐴡𐴥𐴌𐴡, 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴃𐴟𐴣𐴀𐴝𐴥𐴌𐴝𐴌 𐴈𐴡𐴏𐴟𐴥𐴌𐴞 𐴘𐴡𐴥 𐴊𐴡𐴥𐴌𐴝 𐴎𐴝𐴘𐴁𐴡; 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴎𐴠 𐴔𐴝𐴉𐴠 𐴊𐴞𐴦𐴁𐴝, 𐴃𐴟𐴣𐴀𐴝𐴥𐴌𐴝𐴌𐴠 𐴘𐴡𐴥 𐴇𐴠𐴥 𐴔𐴝𐴉𐴠 𐴊𐴞𐴦𐴘𐴝 𐴎𐴝𐴘𐴁𐴡.

³”𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘𐴡𐴌 𐴏𐴟𐴑𐴡𐴃𐴢 𐴀𐴝𐴏𐴠𐴤 𐴊𐴠 𐴇𐴝𐴥𐴓𐴢 𐴓𐴝𐴕 𐴑𐴞𐴘𐴝𐴥 𐴊𐴠𐴑𐴡𐴥𐴌, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴣𐴌 𐴕𐴞𐴎𐴡𐴌 𐴏𐴟𐴑𐴡𐴃𐴢 𐴀𐴝𐴏𐴠𐴤 𐴊𐴠 𐴇𐴡𐴊𐴧𐴝 𐴒𐴝𐴥𐴕 𐴀𐴡𐴥𐴃𐴢 𐴕𐴡 𐴒𐴡𐴌𐴡𐴤𐴌؟⁴𐴕𐴞𐴎𐴡𐴌 𐴏𐴟𐴑𐴡𐴃𐴢 𐴇𐴡𐴊𐴧𐴝 𐴃𐴝𐴥𐴑𐴞 𐴁𐴝𐴦𐴊𐴠 𐴃𐴟𐴀𐴛 𐴑𐴠𐴀𐴕𐴒𐴡𐴌𐴞 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘𐴡𐴌𐴠 𐴈𐴡𐴀𐴌, ’𐴀𐴝𐴘𐴧𐴡𐴤, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴏𐴟𐴑𐴡𐴃𐴧𐴟 𐴇𐴝𐴥𐴓𐴢 𐴓𐴝𐴕 𐴕𐴠𐴦𐴓𐴝𐴘𐴉𐴠𐴥𐴓𐴝𐴘‘؟⁵𐴀𐴡𐴥 𐴔𐴟𐴕𐴝𐴉𐴠𐴥𐴑! 𐴀𐴝𐴒𐴠 𐴃𐴟𐴣𐴀𐴝𐴥𐴣𐴌 𐴕𐴞𐴎𐴡𐴌 𐴏𐴟𐴑𐴡𐴃𐴧𐴟 𐴇𐴡𐴊𐴧𐴝 𐴒𐴝𐴥𐴕 𐴕𐴠𐴦𐴓𐴝𐴘𐴉𐴠𐴥𐴓𐴡, 𐴁𐴝𐴦𐴊𐴠 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘𐴡𐴌 𐴏𐴟𐴑𐴡𐴃𐴧𐴟 𐴇𐴝𐴥𐴓𐴢 𐴓𐴝𐴕 𐴕𐴠𐴦𐴓𐴝𐴘 𐴁𐴡𐴓𐴧𐴝 𐴏𐴝𐴥𐴉𐴢 𐴒𐴡𐴥𐴌𐴞 𐴊𐴠𐴑𐴞𐴥𐴁𐴝.

⁶”𐴑𐴟𐴣𐴙𐴌𐴡𐴌𐴠 𐴇𐴡𐴕𐴡𐴤 𐴂𐴝𐴑 𐴅𐴞𐴕𐴞𐴥𐴐𐴢 𐴕𐴡 𐴊𐴞𐴦𐴘𐴡, 𐴀𐴝𐴦𐴌 𐴐𐴟𐴥𐴖𐴡𐴌 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴃𐴟𐴣𐴀𐴝𐴥𐴌𐴝𐴌 𐴔𐴟𐴑𐴃𐴝 𐴕𐴡 𐴉𐴠𐴥𐴓𐴝𐴘𐴧𐴡, 𐴀𐴝𐴌𐴕𐴡𐴥𐴘𐴓𐴠 𐴇𐴞𐴥𐴀𐴕𐴠 𐴇𐴞𐴥𐴀𐴕𐴡𐴌𐴠 𐴄𐴠𐴥𐴚𐴠 𐴀𐴟𐴥𐴣𐴌𐴝𐴕 𐴔𐴝𐴌𐴞𐴁𐴡𐴥, 𐴀𐴝𐴦𐴌 𐴉𐴞𐴥𐴌𐴞 𐴀𐴝𐴀𐴘𐴧𐴡𐴌𐴠 𐴃𐴟𐴣𐴀𐴝𐴥𐴌𐴝𐴌𐴠 𐴇𐴝𐴥𐴕-𐴇𐴝𐴥𐴕 𐴒𐴡𐴌𐴞𐴥𐴉𐴠𐴓𐴝𐴘𐴁𐴡.

𐴔𐴝𐴒𐴡, 𐴃𐴟𐴖𐴡 𐴀𐴠𐴊𐴧𐴠 𐴊𐴟𐴖𐴝𐴌 𐴁𐴝𐴙𐴅𐴧𐴡

⁷”𐴔𐴝𐴒𐴡, 𐴃𐴟𐴣𐴀𐴝𐴥𐴌𐴝𐴌𐴠 𐴊𐴞𐴦𐴘𐴝 𐴎𐴝𐴘𐴁𐴡; 𐴃𐴟𐴖𐴡, 𐴃𐴟𐴣𐴀𐴝𐴥𐴌𐴝 𐴉𐴝𐴘𐴁𐴝; 𐴊𐴟𐴖𐴝𐴌 𐴁𐴝𐴙𐴅𐴧𐴡, 𐴃𐴟𐴣𐴀𐴝𐴥𐴌𐴝𐴓𐴧𐴝 𐴊𐴟𐴖𐴝𐴌 𐴑𐴟𐴥𐴓𐴝 𐴎𐴝𐴥𐴘𐴁𐴡.⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴔𐴝𐴒𐴠, 𐴀𐴞𐴥𐴃𐴠 𐴉𐴝𐴦; 𐴎𐴠𐴦𐴕𐴞𐴑𐴞 𐴃𐴟𐴖𐴝, 𐴀𐴞𐴥𐴃𐴠 𐴃𐴟𐴖𐴝𐴘 𐴉𐴝𐴦; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴊𐴟𐴖𐴝𐴌 𐴁𐴝𐴙𐴅𐴧𐴝, 𐴀𐴞𐴥𐴃𐴝𐴌 𐴓𐴧𐴝 𐴑𐴟𐴥𐴓𐴝 𐴎𐴝𐴘𐴁𐴡.

⁹”𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴢 𐴇𐴡𐴕 𐴀𐴝𐴏𐴠𐴤, 𐴕𐴞𐴎𐴡𐴌 𐴉𐴟𐴖𐴝𐴘𐴠 𐴌𐴟𐴄𐴞 𐴔𐴝𐴒𐴞𐴓𐴠𐴥 𐴉𐴝𐴃𐴧𐴡𐴥𐴌 𐴊𐴞𐴦𐴁𐴡 𐴊𐴠𐴥؟¹⁰𐴘𐴝𐴥𐴃𐴡 𐴔𐴝𐴏𐴢 𐴔𐴝𐴒𐴞𐴓𐴠𐴥 𐴇𐴝𐴥𐴉𐴢 𐴊𐴞𐴦𐴁𐴡 𐴊𐴠𐴥؟¹¹𐴇𐴠𐴥 𐴀𐴞𐴥𐴏𐴝𐴉𐴠, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴈𐴡𐴥𐴌𐴝𐴉𐴢 𐴀𐴡𐴥𐴘 𐴁𐴝𐴦𐴊𐴠 𐴀𐴟𐴥𐴊𐴧𐴗𐴝 𐴃𐴟𐴣𐴀𐴝𐴥𐴌𐴝𐴌 𐴉𐴟𐴀𐴝𐴙𐴕 𐴊𐴡𐴌𐴠 𐴒𐴡𐴔-𐴒𐴡𐴔 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴊𐴞𐴦 𐴎𐴝𐴕𐴡, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴠 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴃𐴧𐴟 𐴔𐴝𐴒𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴌𐴡𐴤 𐴇𐴡𐴃𐴡𐴥 𐴒𐴡𐴔 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴊𐴞𐴦𐴁𐴡 𐴉𐴝𐴥𐴣𐴓𐴧𐴝𐴌!

𐴐𐴟𐴥𐴕𐴝𐴓𐴞 𐴑𐴝𐴦𐴕𐴟𐴕

¹²”𐴇𐴠𐴥𐴃𐴡𐴓𐴧𐴝, 𐴇𐴝𐴥𐴀𐴌 𐴑𐴠𐴏𐴧𐴟𐴥𐴃𐴢 𐴀𐴡𐴙𐴕𐴧𐴡 𐴎𐴡𐴕𐴡𐴌𐴠 𐴀𐴟𐴀𐴙𐴕 𐴒𐴡𐴌𐴡𐴤 𐴎𐴞𐴀𐴕 𐴃𐴟𐴣𐴀𐴝𐴥𐴌𐴝 𐴏𐴡𐴀 𐴊𐴠 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴒𐴡𐴌𐴡𐴥𐴗𐴑, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕 𐴀𐴡𐴥𐴙𐴓𐴊𐴠 𐴁𐴠 𐴃𐴡𐴌𐴝𐴃𐴡𐴌 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴐𐴞𐴥𐴑𐴧𐴝.

𐴏𐴞𐴘𐴡𐴕 𐴀𐴠𐴊𐴧𐴠 𐴐𐴡𐴍𐴝 𐴊𐴡𐴌𐴡𐴎𐴝

¹³”𐴏𐴞𐴘𐴡𐴕 𐴊𐴡𐴌𐴡𐴎𐴝 𐴁𐴝𐴥𐴘 𐴒𐴡𐴥𐴓𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴡𐴌𐴁𐴝𐴊𐴞𐴌 𐴀𐴟𐴎𐴟 𐴓𐴡𐴘𐴎𐴝 𐴊𐴠 𐴌𐴝𐴏𐴃𐴝 𐴉𐴝𐴥𐴌𐴡𐴃𐴢 𐴀𐴝𐴦𐴌 𐴇𐴞𐴥𐴘𐴝𐴕𐴡𐴌 𐴊𐴡𐴌𐴡𐴎𐴝 𐴐𐴡𐴍𐴝; 𐴇𐴞𐴥𐴘𐴝𐴕 𐴁𐴝𐴥𐴘 𐴒𐴡𐴥𐴓𐴡𐴘𐴝 𐴁𐴞𐴐𐴞𐴤 𐴀𐴝𐴏𐴠𐴤.¹⁴𐴔𐴡𐴕𐴃𐴡𐴌 𐴎𐴞𐴕𐴊𐴞𐴒𐴞𐴌 𐴀𐴟𐴎𐴟 𐴓𐴡𐴘𐴎𐴝 𐴊𐴠 𐴌𐴝𐴏𐴃𐴝 𐴑𐴟𐴃𐴝𐴇𐴝𐴙𐴄𐴧𐴝 𐴀𐴝𐴦𐴌 𐴇𐴞𐴥𐴘𐴝𐴕𐴡𐴌 𐴊𐴡𐴌𐴡𐴎𐴝 𐴏𐴞𐴘𐴡𐴕, 𐴇𐴞𐴥𐴘𐴝𐴕𐴡𐴌𐴠 𐴉𐴡𐴦𐴘𐴝 𐴈𐴡𐴔.

𐴒𐴝𐴏𐴢 𐴏𐴞𐴕𐴝𐴥 𐴎𐴝 𐴊𐴠 𐴒𐴟𐴓𐴝𐴘𐴠

¹⁵”𐴔𐴞𐴏𐴝𐴥 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴟𐴥𐴣𐴐𐴞𐴘𐴝𐴌 𐴃𐴝𐴥𐴙𐴑𐴧𐴡, 𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴌 𐴇𐴝𐴣𐴏𐴠 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴏𐴡𐴥𐴕𐴧𐴝 𐴊𐴡𐴥𐴌𐴞 𐴀𐴝𐴘𐴧𐴠𐴤, 𐴔𐴡𐴕𐴃𐴡𐴌 𐴁𐴟𐴥𐴃𐴡𐴌𐴠 𐴀𐴞𐴥𐴃𐴝𐴌𐴝 𐴁𐴟𐴥𐴑𐴝 𐴌𐴝𐴚𐴑𐴟𐴣𐴙𐴌𐴡𐴌 𐴋𐴡𐴥𐴙𐴓𐴧𐴝.¹⁶𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴃𐴝𐴌𐴝𐴌 𐴒𐴟𐴓𐴝𐴒𐴝𐴓𐴝𐴘𐴠 𐴏𐴞𐴕𐴞𐴥𐴁𐴝. 𐴔𐴝𐴙𐴕𐴐𐴠𐴥 𐴑𐴞𐴥 𐴑𐴠𐴣𐴍𐴝𐴁𐴡𐴕𐴡𐴃𐴧𐴟 𐴀𐴝𐴚𐴒𐴟𐴌 𐴀𐴝𐴦𐴌 𐴑𐴠𐴣𐴍𐴝𐴌 𐴎𐴝𐴥𐴋𐴧𐴗𐴝𐴃𐴧𐴟 𐴋𐴟𐴣𐴙𐴌 𐴒𐴟𐴓𐴝 𐴉𐴝𐴌𐴠؟¹⁷𐴁𐴡𐴌𐴝𐴁𐴡𐴌 𐴇𐴠𐴥𐴕𐴊𐴞𐴓𐴧𐴝, 𐴒𐴡𐴔 𐴒𐴝𐴏𐴡𐴃𐴢 𐴒𐴡𐴔 𐴒𐴟𐴓𐴝 𐴊𐴡𐴥𐴌𐴠, 𐴀𐴝𐴦𐴌 𐴈𐴡𐴥𐴌𐴝𐴉𐴢 𐴒𐴝𐴏𐴡𐴃𐴢 𐴈𐴡𐴥𐴌𐴝𐴉𐴢 𐴒𐴟𐴓𐴝 𐴊𐴡𐴥𐴌𐴠.¹⁸𐴒𐴡𐴔 𐴒𐴝𐴏𐴡𐴃𐴢 𐴃𐴡 𐴈𐴡𐴥𐴌𐴝𐴉𐴢 𐴒𐴟𐴓𐴝 𐴊𐴡𐴥𐴌𐴞 𐴕𐴡 𐴉𐴝𐴌𐴠, 𐴀𐴝𐴦𐴌 𐴈𐴡𐴥𐴌𐴝𐴉𐴢 𐴒𐴝𐴏𐴡𐴃𐴢 𐴒𐴡𐴔 𐴒𐴟𐴓𐴝 𐴊𐴡𐴥𐴌𐴞 𐴕𐴡 𐴉𐴝𐴌𐴠.¹⁹𐴎𐴠 𐴒𐴝𐴏𐴡𐴃𐴢 𐴒𐴡𐴔 𐴒𐴟𐴓𐴝 𐴕𐴡 𐴊𐴡𐴥𐴌𐴠, 𐴘𐴞𐴥𐴁𐴝𐴌𐴠 𐴃𐴡 𐴈𐴝𐴍𐴞 𐴀𐴡𐴦𐴙𐴕𐴡𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝.²⁰𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴃𐴝𐴌𐴝𐴌 𐴒𐴟𐴓𐴝𐴒𐴝𐴓𐴝𐴘𐴠 𐴏𐴞𐴕𐴞𐴥 𐴉𐴝𐴌𐴞𐴁𐴝𐴥.

𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴇𐴡𐴕𐴡𐴤 𐴀𐴡𐴑𐴃𐴡𐴥𐴃𐴢 𐴕𐴡 𐴏𐴞𐴕𐴞𐴥𐴃𐴝𐴔

²¹”𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴠𐴥, ’𐴔𐴝𐴓𐴞𐴑, 𐴔𐴝𐴓𐴞𐴑‘ 𐴋𐴝𐴑𐴠, 𐴀𐴞𐴥𐴃𐴝𐴌𐴝 𐴇𐴝𐴥𐴀𐴌 𐴀𐴠𐴑𐴎𐴡𐴕 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴒𐴡𐴥𐴓𐴞 𐴉𐴝𐴌𐴞𐴁𐴡𐴥 𐴊𐴠 𐴇𐴠𐴥𐴀𐴕 𐴕𐴡, 𐴔𐴡𐴕𐴃𐴡𐴌 𐴏𐴞𐴌𐴞𐴥𐴉𐴢 𐴀𐴟𐴘𐴃𐴠 𐴉𐴝𐴌𐴞𐴁𐴡𐴥 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴀𐴝𐴏𐴔𐴝𐴕𐴞 𐴁𐴝𐴉𐴡𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴌𐴠𐴥.²²𐴇𐴠𐴥 𐴊𐴞𐴕 𐴀𐴝𐴣𐴀𐴌𐴠𐴥 𐴁𐴡𐴀𐴗𐴃𐴢 𐴑𐴞𐴘𐴠𐴥 𐴈𐴡𐴘𐴁𐴡𐴤 𐴊𐴠, ’𐴔𐴝𐴓𐴞𐴑, 𐴀𐴡𐴥 𐴔𐴝𐴓𐴞𐴑, 𐴀𐴝𐴣𐴀𐴌𐴝 𐴃𐴟𐴣𐴀𐴝𐴥𐴣𐴌 𐴕𐴝𐴔𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴁𐴡𐴘𐴧𐴝𐴕 𐴒𐴡𐴙𐴅𐴧𐴞𐴥𐴓𐴝𐴔 𐴊𐴠 𐴕𐴡 𐴕𐴠𐴥؟ 𐴃𐴟𐴣𐴀𐴝𐴥𐴣𐴌 𐴕𐴝𐴔𐴠 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴊𐴝𐴥𐴉𐴝𐴘𐴓𐴝𐴔 𐴊𐴠 𐴕𐴡 𐴕𐴠𐴥؟ 𐴀𐴝𐴦𐴌 𐴃𐴟𐴣𐴀𐴝𐴥𐴣𐴌 𐴕𐴝𐴔𐴠 𐴁𐴡𐴀𐴗𐴃𐴢 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴒𐴡𐴙𐴅𐴧𐴞𐴥𐴓𐴝𐴔 𐴊𐴠 𐴕𐴡 𐴕𐴠𐴥؟‘²³𐴇𐴠𐴥𐴣𐴃𐴧𐴠 𐴀𐴝𐴀𐴛 𐴀𐴞𐴥𐴃𐴝𐴌𐴝𐴌𐴠 𐴏𐴝𐴥𐴉𐴢-𐴏𐴝𐴥𐴉𐴢 𐴒𐴡𐴥𐴌𐴞 𐴈𐴡𐴘𐴧𐴟𐴥𐴔 𐴊𐴠, ’𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴇𐴡𐴕𐴡𐴤 𐴀𐴡𐴑𐴃𐴡𐴥𐴃𐴢 𐴕𐴡 𐴏𐴞𐴕𐴞𐴥𐴃𐴝𐴔; 𐴑𐴟𐴈𐴝𐴔-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴢, 𐴀𐴝𐴣𐴀𐴌 𐴈𐴠𐴥𐴕𐴃𐴟 𐴊𐴟𐴌 𐴀𐴡𐴥.‘

𐴊𐴟𐴘 𐴎𐴡𐴕 𐴒𐴡𐴥𐴌 𐴁𐴝𐴕𐴡𐴘𐴝

²⁴”𐴇𐴠𐴥𐴃𐴡𐴓𐴧𐴝, 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴁𐴡𐴘𐴧𐴝𐴕 𐴀𐴞𐴀𐴕 𐴉𐴟𐴥𐴕𐴞 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴀𐴠𐴕𐴊𐴞𐴓𐴧𐴝 𐴀𐴠𐴎𐴧𐴡𐴕 𐴁𐴟𐴊𐴧𐴞𐴥𐴔𐴝𐴕 𐴔𐴝𐴕𐴟𐴥𐴙𐴐𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴁𐴡, 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴒𐴡𐴥𐴌 𐴉𐴝𐴃𐴧𐴡𐴥𐴌𐴡𐴌 𐴖𐴡𐴌𐴠 𐴁𐴝𐴕𐴝𐴘𐴧𐴠𐴥.²⁵𐴁𐴝𐴦𐴊𐴠 𐴎𐴡𐴥𐴌 𐴀𐴝𐴙𐴐𐴧𐴠𐴥, 𐴉𐴝𐴕𐴞𐴥𐴁𐴝𐴕 𐴀𐴡𐴥𐴘𐴧𐴠, 𐴀𐴝𐴦𐴌 𐴁𐴡𐴘𐴧𐴝𐴌 𐴁𐴝𐴀𐴘𐴢 𐴇𐴠𐴥 𐴒𐴡𐴥𐴌 𐴒𐴝𐴥𐴕𐴡𐴃𐴢 𐴊𐴡𐴥𐴏𐴝𐴊𐴞𐴘𐴠; 𐴃𐴡𐴀 𐴇𐴞𐴥𐴘𐴝𐴕 𐴉𐴡𐴌𐴞 𐴕𐴡𐴥 𐴎𐴝𐴒𐴡𐴥𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕𐴡𐴌 𐴁𐴟𐴕𐴞𐴘𐴝𐴊𐴞 𐴃𐴡 𐴉𐴝𐴃𐴧𐴡𐴥𐴌𐴡𐴃𐴢 𐴋𐴝𐴥𐴓𐴝 𐴒𐴞𐴥𐴘𐴠.²⁶𐴔𐴡𐴕𐴃𐴡𐴌 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴁𐴡𐴘𐴧𐴝𐴕 𐴀𐴞𐴀𐴕 𐴉𐴟𐴥𐴕𐴞 𐴀𐴝𐴔𐴡𐴥𐴓𐴢 𐴕𐴡 𐴒𐴡𐴌𐴠𐴥, 𐴀𐴞𐴥𐴃𐴠 𐴀𐴠𐴀𐴕 𐴀𐴠𐴥𐴎𐴧𐴡𐴕 𐴁𐴠𐴑𐴟𐴉𐴢 𐴔𐴝𐴕𐴟𐴥𐴙𐴐𐴡𐴌 𐴋𐴡𐴥𐴙𐴓𐴧𐴝 𐴀𐴡𐴥𐴘𐴁𐴡, 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴒𐴡𐴥𐴌 𐴁𐴝𐴓𐴟𐴌 𐴖𐴡𐴌𐴠 𐴁𐴝𐴕𐴝𐴘𐴧𐴠𐴥.²⁷𐴁𐴝𐴦𐴊𐴠 𐴎𐴡𐴥𐴌 𐴀𐴝𐴙𐴐𐴧𐴠𐴥, 𐴉𐴝𐴕𐴞𐴥𐴁𐴝𐴕 𐴀𐴡𐴥𐴘𐴧𐴠, 𐴀𐴝𐴦𐴌 𐴁𐴡𐴘𐴧𐴝𐴌 𐴁𐴝𐴀𐴘𐴢 𐴇𐴠𐴥 𐴒𐴡𐴥𐴌 𐴒𐴝𐴥𐴕𐴡𐴃𐴢 𐴊𐴡𐴥𐴏𐴝𐴊𐴞𐴘𐴠; 𐴇𐴠𐴥𐴃𐴟𐴕𐴡𐴃𐴢 𐴇𐴞𐴥𐴘𐴝𐴕 𐴉𐴡𐴌𐴞 𐴀𐴠𐴁𐴧𐴠 𐴕𐴝𐴐𐴢 𐴀𐴡𐴥𐴘𐴒𐴞𐴘𐴡𐴘.“

²⁸𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴃𐴧𐴟 𐴈𐴡𐴃𐴝𐴤 𐴇𐴞𐴥𐴀𐴕 𐴈𐴡𐴘𐴧𐴝𐴤 𐴀𐴡𐴥𐴘𐴧𐴠, 𐴀𐴞𐴥𐴁𐴝𐴌 𐴇𐴠𐴥 𐴃𐴝𐴦𐴓𐴞𐴔 𐴉𐴟𐴥𐴕𐴞 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴝𐴔𐴧𐴟𐴥𐴑 𐴀𐴡𐴥𐴘𐴒𐴞𐴘𐴡𐴘,²⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴃𐴝𐴌𐴝𐴌 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴕𐴡 𐴁𐴡𐴥𐴓𐴑𐴠 𐴀𐴠𐴎𐴧𐴡𐴕 𐴀𐴝𐴊𐴞𐴥𐴑𐴝𐴌 𐴀𐴡𐴓𐴝𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴃𐴝𐴦𐴓𐴞𐴔 𐴊𐴞𐴃𐴡.

The Word for the World International

https://app.library.bible/content/87faca8b51c22590