Read 𐴔𐴡𐴃𐴞 6

𐴔𐴡𐴃𐴞6

𐴏𐴡𐴥𐴃𐴑𐴝 𐴊𐴞𐴦𐴘𐴝𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

¹”𐴇𐴡𐴥𐴁𐴡𐴌𐴡𐴊𐴧𐴝𐴌, 𐴃𐴟𐴣𐴀𐴝𐴥𐴌𐴝𐴌 𐴉𐴡𐴌𐴇𐴠𐴥𐴏𐴒𐴝𐴌𐴞 𐴈𐴝𐴔 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴀𐴞𐴥𐴃𐴝𐴌𐴝𐴌𐴠 𐴊𐴝𐴈𐴝𐴤𐴘 𐴁𐴡𐴓𐴧𐴝 𐴕𐴡 𐴒𐴡𐴙𐴅𐴧𐴡𐴥; 𐴀𐴝𐴌𐴕𐴡𐴥𐴘𐴓𐴠 𐴃𐴟𐴣𐴀𐴝𐴥𐴌𐴝 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴡𐴃𐴧𐴟 𐴇𐴡𐴕𐴡𐴤 𐴁𐴡𐴐𐴧𐴞𐴥𐴐𐴢 𐴕𐴡 𐴉𐴝𐴘𐴁𐴝.

²”𐴇𐴠𐴥𐴃𐴡𐴓𐴧𐴝 𐴎𐴠𐴣𐴃𐴧𐴠𐴥 𐴃𐴟𐴀𐴛 𐴏𐴡𐴥𐴃𐴑𐴝 𐴒𐴡𐴌𐴡𐴤, 𐴇𐴠𐴥𐴣𐴃𐴧𐴠 𐴐𐴞𐴥𐴛𐴝 𐴔𐴝𐴃𐴝𐴘 𐴀𐴠𐴓𐴝𐴕 𐴕𐴡 𐴒𐴡𐴙𐴅𐴧𐴡𐴥, 𐴎𐴠𐴕𐴊𐴞𐴓𐴧𐴝 𐴔𐴟𐴕𐴝𐴉𐴠𐴥𐴑 𐴀𐴡𐴥𐴑𐴧𐴡𐴓𐴠 𐴔𐴝𐴙𐴕𐴐𐴡𐴥𐴃𐴧𐴟 𐴃𐴝𐴦𐴌𐴞𐴉𐴢 𐴉𐴝𐴘 𐴁𐴡𐴓𐴧𐴝 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴠𐴊𐴧𐴠 𐴌𐴝𐴏𐴃𐴝-𐴌𐴝𐴏𐴃𐴝 𐴒𐴡𐴌𐴠𐴥. 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴞𐴥𐴃𐴝𐴌𐴝 𐴀𐴞𐴥𐴃𐴝𐴌𐴝𐴌 𐴁𐴡𐴐𐴧𐴞𐴥𐴐𐴢 𐴉𐴟𐴌𐴝𐴉𐴟𐴌𐴞 𐴉𐴝𐴘𐴉𐴠𐴥𐴓𐴝𐴘𐴧𐴠.³𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴃𐴟𐴀𐴛 𐴏𐴡𐴥𐴃𐴑𐴝 𐴒𐴡𐴌𐴡𐴤, 𐴇𐴠𐴥𐴣𐴃𐴧𐴠 𐴃𐴟𐴣𐴀𐴝𐴥𐴣𐴌 𐴊𐴠𐴕 𐴀𐴝𐴥𐴃𐴠 𐴑𐴞𐴦 𐴒𐴡𐴌𐴠𐴥𐴌 𐴊𐴠 𐴇𐴞𐴥𐴘𐴝𐴕 𐴃𐴟𐴣𐴀𐴝𐴥𐴣𐴌 𐴁𐴝𐴕 𐴀𐴝𐴥𐴃𐴡𐴌𐴠 𐴎𐴝𐴙𐴕𐴃𐴡 𐴕𐴡 𐴊𐴞𐴘𐴡𐴥,⁴𐴎𐴠𐴀𐴕𐴠 𐴃𐴟𐴣𐴀𐴝𐴥𐴣𐴌 𐴏𐴡𐴥𐴃𐴑𐴝 𐴒𐴡𐴌𐴝𐴥 𐴀𐴝𐴙𐴊𐴧𐴡𐴕𐴠 𐴀𐴡𐴥. 𐴃𐴡𐴥𐴘 𐴃𐴟𐴣𐴀𐴝𐴥𐴣𐴌 𐴁𐴝𐴉𐴢, 𐴎𐴞𐴁𐴝𐴤𐴘𐴠 𐴀𐴝𐴙𐴊𐴧𐴡𐴕𐴡𐴃𐴢 𐴊𐴠𐴑𐴠𐴥, 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴣𐴌𐴠 𐴁𐴡𐴐𐴧𐴞𐴥𐴐𐴢 𐴊𐴞𐴦𐴁𐴡.

𐴊𐴟𐴖𐴝 𐴒𐴡𐴌𐴝𐴥𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

⁵”𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴊𐴟𐴖𐴝 𐴒𐴡𐴌𐴡𐴤, 𐴔𐴟𐴕𐴝𐴉𐴠𐴥𐴑 𐴀𐴡𐴥𐴑𐴧𐴡𐴓𐴡𐴌 𐴋𐴡𐴥𐴙𐴓𐴧𐴝 𐴕𐴡 𐴀𐴡𐴥𐴘𐴧𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴔𐴝𐴙𐴕𐴐𐴡𐴥𐴌𐴠 𐴊𐴝𐴈𐴝𐴤𐴘 𐴁𐴡𐴓𐴧𐴝 𐴁𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴀𐴡𐴥𐴑𐴧𐴡𐴓𐴡𐴃𐴢 𐴀𐴠𐴊𐴧𐴠 𐴌𐴝𐴏𐴃𐴝𐴌 𐴑𐴟𐴕𐴝-𐴑𐴟𐴕𐴝 𐴃𐴞𐴥𐴘𐴝𐴘𐴧𐴡𐴌𐴠 𐴊𐴟𐴖𐴝 𐴒𐴡𐴌𐴝𐴥 𐴉𐴡𐴏𐴡𐴥𐴕 𐴒𐴡𐴌𐴠𐴥. 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴞𐴥𐴃𐴝𐴌𐴝 𐴀𐴞𐴥𐴃𐴝𐴌𐴝𐴌 𐴁𐴡𐴐𐴧𐴞𐴥𐴐𐴢 𐴉𐴟𐴌𐴝𐴉𐴟𐴌𐴞 𐴉𐴝𐴘𐴉𐴠𐴥𐴓𐴝𐴘𐴧𐴠.⁶𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴃𐴟𐴀𐴛 𐴊𐴟𐴖𐴝 𐴒𐴡𐴌𐴡𐴤, 𐴃𐴟𐴣𐴀𐴝𐴥𐴣𐴌 𐴑𐴝𐴔𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴒𐴡𐴥𐴓𐴞, 𐴊𐴟𐴖𐴝𐴌 𐴁𐴝𐴣𐴊𐴞𐴥𐴉𐴠𐴓𐴝𐴘 𐴃𐴟𐴣𐴀𐴝𐴥𐴣𐴌 𐴁𐴝𐴉𐴡𐴌 𐴇𐴝𐴣𐴏𐴠 𐴊𐴟𐴖𐴝 𐴒𐴡𐴌𐴞𐴥𐴘𐴡, 𐴎𐴞𐴁𐴝𐴤 𐴀𐴝𐴙𐴊𐴧𐴡𐴕𐴠 𐴀𐴝𐴏𐴠𐴤. 𐴃𐴡𐴥𐴘 𐴃𐴟𐴣𐴀𐴝𐴥𐴣𐴌 𐴁𐴝𐴉𐴢, 𐴎𐴞𐴁𐴝𐴤𐴘𐴠 𐴀𐴝𐴙𐴊𐴧𐴡𐴕𐴡𐴃𐴢 𐴊𐴠𐴑𐴠𐴥, 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴣𐴌𐴠 𐴁𐴡𐴐𐴧𐴞𐴥𐴐𐴢 𐴊𐴞𐴦𐴁𐴡.⁷𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴊𐴟𐴖𐴝 𐴒𐴡𐴌𐴡𐴤, 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴋𐴡𐴥𐴙𐴓𐴧𐴝 𐴁𐴠𐴇𐴝𐴎𐴡𐴌 𐴈𐴡𐴃𐴝𐴤 𐴀𐴡𐴥𐴑𐴧𐴡𐴓𐴢 𐴕𐴡 𐴊𐴟𐴖𐴝𐴌𐴝𐴥𐴘𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴄𐴝𐴥𐴀𐴌𐴠 𐴊𐴠, 𐴀𐴞𐴥𐴃𐴝𐴌𐴝𐴌 𐴁𐴞𐴐𐴞𐴤 𐴈𐴡𐴃𐴝𐴤𐴌 𐴎𐴡𐴌𐴞𐴘𐴝 𐴀𐴞𐴥𐴃𐴝𐴌𐴝𐴌 𐴊𐴟𐴖𐴝 𐴑𐴡𐴁𐴟𐴓𐴢 𐴀𐴡𐴥𐴘𐴁𐴡.⁸𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, 𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌𐴝𐴌 𐴋𐴡𐴥𐴙𐴓𐴧𐴝 𐴕𐴡 𐴀𐴡𐴥𐴘𐴧𐴡; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴠 𐴃𐴡 𐴀𐴞𐴥𐴁𐴝𐴃𐴧𐴟 𐴔𐴝𐴒𐴞𐴁𐴝𐴥𐴌 𐴀𐴝𐴒𐴠 𐴓𐴡𐴥𐴃𐴞 𐴃𐴟𐴣𐴀𐴝𐴥𐴌𐴝𐴌 𐴎𐴡𐴌𐴟𐴌𐴡𐴃𐴢 𐴎𐴝𐴕𐴠.⁹𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴀𐴠𐴕𐴊𐴞𐴓𐴧𐴝 𐴊𐴟𐴖𐴝 𐴒𐴡𐴙𐴅𐴧𐴡𐴥:’𐴀𐴡𐴥 𐴀𐴝𐴣𐴀𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴢,𐴃𐴟𐴣𐴀𐴝𐴥𐴣𐴌 𐴕𐴝𐴔 𐴂𐴝𐴑 𐴔𐴝𐴕𐴝 𐴎𐴡𐴑.¹⁰𐴃𐴟𐴣𐴀𐴝𐴥𐴣𐴌 𐴌𐴝𐴙𐴅𐴧𐴡 𐴀𐴝𐴘𐴧𐴡𐴤𐴑.𐴃𐴟𐴣𐴀𐴝𐴥𐴣𐴌 𐴔𐴡𐴕𐴐𐴝𐴥 𐴎𐴠𐴕𐴊𐴞𐴓𐴧𐴝 𐴀𐴝𐴏𐴔𐴝𐴕𐴡𐴃𐴢 𐴉𐴟𐴌𐴝 𐴀𐴡𐴥,𐴇𐴠𐴥𐴕𐴊𐴞𐴓𐴧𐴝 𐴊𐴟𐴕𐴞𐴘𐴝𐴙𐴃𐴢 𐴀𐴡𐴥 𐴉𐴟𐴌𐴝 𐴀𐴡𐴥𐴗𐴑.¹¹𐴀𐴝𐴙𐴅𐴧𐴝𐴌 𐴈𐴝𐴥𐴕𐴝 𐴀𐴝𐴣𐴀𐴌𐴝𐴌𐴠 𐴀𐴝𐴙𐴅𐴧𐴝 𐴊𐴡𐴦.¹²𐴀𐴝𐴣𐴀𐴌𐴝𐴌 𐴈𐴡𐴏𐴟𐴥𐴌𐴞 𐴔𐴝𐴉𐴢 𐴒𐴡𐴌𐴡𐴤,𐴎𐴠𐴕𐴊𐴞𐴓𐴧𐴝 𐴎𐴠𐴃𐴝𐴌𐴝𐴤 𐴀𐴝𐴣𐴀𐴌𐴝 𐴓𐴧𐴡𐴥𐴘 𐴈𐴡𐴏𐴟𐴥𐴌𐴞 𐴒𐴡𐴙𐴅𐴧𐴠𐴥, 𐴀𐴞𐴥𐴃𐴝𐴌𐴝𐴌𐴠 𐴀𐴝𐴣𐴀𐴌𐴝 𐴘𐴡𐴥 𐴔𐴝𐴉𐴢 𐴒𐴡𐴙𐴅𐴧𐴞𐴥.¹³𐴀𐴝𐴣𐴀𐴌𐴝𐴌𐴠 𐴀𐴠𐴕𐴃𐴝𐴥𐴕𐴡𐴃𐴢 𐴉𐴡𐴙𐴃𐴧𐴡 𐴕𐴡 𐴊𐴞𐴘𐴡𐴥,𐴁𐴡𐴥𐴓𐴑𐴠 𐴀𐴞𐴁𐴞𐴓𐴞𐴥𐴐𐴡𐴃𐴧𐴟 𐴁𐴝𐴏𐴝𐴘 𐴌𐴝𐴑𐴡𐴥. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴌𐴝𐴙𐴅𐴧𐴡, 𐴃𐴝𐴦𐴑𐴡𐴃𐴢 𐴀𐴝𐴦𐴌 𐴔𐴡𐴈𐴞𐴥𐴔𐴝 𐴃𐴡 𐴇𐴝𐴥𐴔𐴞𐴐𐴝 𐴃𐴟𐴣𐴀𐴝𐴥𐴣𐴌.‘

¹⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴈𐴡𐴏𐴟𐴥𐴌𐴞 𐴔𐴝𐴉𐴢 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌𐴠 𐴔𐴝𐴉𐴢 𐴒𐴡𐴌𐴞𐴥𐴊𐴞𐴁𐴡.¹⁵𐴔𐴡𐴕𐴃𐴡𐴌 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴈𐴡𐴏𐴟𐴥𐴌𐴞 𐴔𐴝𐴉𐴢 𐴕𐴡 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴠 𐴘𐴡𐴥 𐴃𐴟𐴣𐴀𐴝𐴥𐴌𐴝𐴌 𐴈𐴡𐴏𐴟𐴥𐴌𐴞 𐴔𐴝𐴉𐴢 𐴕𐴡 𐴒𐴡𐴌𐴞𐴥𐴁𐴡.

𐴌𐴟𐴎𐴝𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

¹⁶”𐴃𐴟𐴣𐴀𐴝𐴥𐴌𐴝 𐴌𐴟𐴎𐴝 𐴌𐴝𐴑𐴡𐴥 𐴊𐴠 𐴀𐴡𐴑𐴃𐴡𐴥𐴃𐴢 𐴕𐴝𐴑𐴔𐴟𐴑 𐴇𐴝𐴓𐴝 𐴕𐴡 𐴒𐴡𐴙𐴅𐴧𐴡𐴥, 𐴎𐴠𐴕𐴊𐴞𐴓𐴧𐴝 𐴔𐴟𐴕𐴝𐴉𐴠𐴥𐴑 𐴀𐴡𐴥𐴑𐴧𐴡𐴓𐴠 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴏𐴞𐴘𐴝𐴥𐴌𐴝 𐴁𐴡𐴊𐴡𐴓𐴠 𐴊𐴠 𐴃𐴡 𐴌𐴟𐴎𐴝 𐴌𐴝𐴙𐴑𐴧𐴠𐴥 𐴊𐴠 𐴇𐴞𐴥𐴘𐴝𐴕 𐴔𐴝𐴙𐴕𐴐𐴡𐴥𐴌𐴠 𐴊𐴝𐴈𐴝𐴤𐴘 𐴁𐴡𐴓𐴧𐴝. 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴞𐴥𐴃𐴝𐴌𐴝 𐴀𐴞𐴥𐴃𐴝𐴌𐴝𐴌 𐴁𐴡𐴐𐴧𐴞𐴥𐴐𐴢 𐴉𐴟𐴌𐴝𐴉𐴟𐴌𐴞 𐴉𐴝𐴘𐴉𐴠𐴥𐴓𐴝𐴘𐴧𐴠.¹⁷𐴔𐴡𐴕𐴃𐴡𐴌 𐴃𐴟𐴀𐴛 𐴎𐴠𐴣𐴃𐴧𐴠𐴥 𐴌𐴟𐴎𐴝 𐴌𐴝𐴑𐴡𐴥, 𐴔𐴝𐴃𐴝𐴥𐴃𐴢 𐴃𐴠𐴓𐴢 𐴊𐴞𐴘𐴡, 𐴀𐴝𐴦𐴌 𐴔𐴟𐴑 𐴊𐴟𐴥𐴘𐴧𐴡,¹⁸𐴎𐴠𐴀𐴕𐴠 𐴃𐴟𐴀𐴛 𐴌𐴟𐴎𐴝 𐴌𐴝𐴙𐴑𐴧𐴡𐴥 𐴊𐴠 𐴇𐴞𐴥𐴘𐴝𐴕 𐴔𐴝𐴙𐴕𐴐𐴠𐴥 𐴕𐴡, 𐴁𐴡𐴥𐴓𐴑𐴠 𐴃𐴟𐴣𐴀𐴝𐴥𐴣𐴌 𐴁𐴝𐴉𐴠 𐴎𐴝𐴕𐴠, 𐴎𐴞𐴁𐴝𐴤 𐴀𐴝𐴙𐴊𐴧𐴡𐴕𐴡𐴃𐴢 𐴀𐴝𐴏𐴠𐴤. 𐴃𐴡𐴥𐴘 𐴃𐴟𐴣𐴀𐴝𐴥𐴣𐴌 𐴁𐴝𐴉𐴢, 𐴎𐴞𐴁𐴝𐴤𐴘𐴠 𐴀𐴝𐴙𐴊𐴧𐴡𐴕𐴡𐴃𐴢 𐴊𐴠𐴑𐴠𐴥, 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴣𐴌𐴠 𐴁𐴡𐴐𐴧𐴞𐴥𐴐𐴢 𐴊𐴞𐴦𐴁𐴡.

𐴀𐴝𐴏𐴔𐴝𐴕𐴡𐴃𐴢 𐴊𐴡𐴥𐴕 𐴎𐴡𐴔𐴝 𐴒𐴡𐴌𐴝𐴥

¹⁹”𐴕𐴞𐴎𐴡𐴌 𐴓𐴧𐴝 𐴊𐴡𐴥𐴕-𐴐𐴡𐴥𐴔𐴁𐴡𐴃𐴧𐴞 𐴊𐴟𐴕𐴞𐴘𐴝𐴙𐴃𐴢 𐴎𐴡𐴔𐴝 𐴕𐴡 𐴒𐴡𐴙𐴅𐴧𐴡𐴥, 𐴎𐴠𐴍𐴠𐴥 𐴉𐴟𐴑𐴠 𐴀𐴠𐴊𐴧𐴠 𐴎𐴡𐴦𐴣𐴌𐴠 𐴁𐴡𐴌𐴁𐴝𐴊𐴢 𐴊𐴞𐴉𐴠𐴥𐴓𐴠, 𐴀𐴝𐴦𐴌 𐴎𐴠𐴍𐴠𐴥 𐴏𐴟𐴌 𐴀𐴡𐴥𐴑𐴧𐴡𐴓𐴠 𐴁𐴠𐴌𐴝𐴤 𐴈𐴝𐴍𐴞 𐴏𐴟𐴌 𐴒𐴡𐴌𐴞𐴥𐴉𐴠𐴓𐴠.²⁰𐴁𐴡𐴥𐴓𐴑𐴠 𐴕𐴞𐴎𐴡𐴌 𐴓𐴧𐴝 𐴊𐴡𐴥𐴕-𐴐𐴡𐴥𐴔𐴁𐴡𐴃𐴧𐴞 𐴀𐴝𐴏𐴔𐴝𐴕𐴡𐴃𐴢 𐴎𐴡𐴔𐴝 𐴒𐴡𐴌𐴡𐴤, 𐴎𐴠𐴍𐴠𐴥 𐴕𐴡 𐴉𐴟𐴑𐴠 𐴀𐴝𐴦𐴌 𐴕𐴡 𐴎𐴡𐴦𐴣𐴌𐴠 𐴕𐴝𐴐𐴢 𐴒𐴡𐴌𐴠𐴥, 𐴀𐴝𐴦𐴌 𐴎𐴠𐴍𐴠𐴥 𐴏𐴟𐴌 𐴀𐴡𐴥𐴑𐴧𐴡𐴓𐴠 𐴁𐴠𐴌𐴝𐴤 𐴈𐴝𐴍𐴞 𐴏𐴟𐴌 𐴕𐴡 𐴒𐴡𐴌𐴠𐴥.²¹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴊𐴡𐴥𐴕-𐴐𐴡𐴥𐴔𐴁𐴡𐴃𐴧𐴞 𐴎𐴠𐴍𐴠𐴥, 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴃𐴝𐴥𐴑𐴞𐴁𐴡 𐴊𐴠 𐴘𐴡𐴥 𐴇𐴠𐴥𐴍𐴠.

𐴒𐴝𐴦𐴌 𐴉𐴡𐴀𐴌

²²”𐴒𐴝𐴦𐴌 𐴏𐴠𐴌𐴝𐴑 𐴀𐴡𐴥𐴙𐴓𐴊𐴠 𐴏𐴟𐴑; 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴣𐴌 𐴏𐴟𐴑 𐴒𐴡𐴔 𐴀𐴝𐴏𐴠𐴤 𐴊𐴠 𐴀𐴡𐴥𐴘𐴓𐴠, 𐴃𐴟𐴣𐴀𐴝𐴥𐴣𐴌 𐴒𐴟𐴣𐴍𐴝 𐴒𐴝𐴦 𐴉𐴡𐴀𐴌𐴠 𐴉𐴟𐴌𐴝𐴘𐴧𐴝 𐴀𐴡𐴥𐴘𐴁𐴡.²³𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴣𐴌 𐴏𐴟𐴑 𐴈𐴡𐴥𐴌𐴝𐴉𐴢 𐴊𐴠 𐴀𐴡𐴥𐴘𐴓𐴠, 𐴃𐴟𐴣𐴀𐴝𐴥𐴣𐴌 𐴒𐴟𐴣𐴍𐴝 𐴒𐴝𐴦 𐴀𐴝𐴕𐴊𐴝𐴤𐴌𐴠 𐴉𐴟𐴌𐴝𐴘𐴧𐴝 𐴀𐴡𐴥𐴘𐴁𐴡. 𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴣𐴌 𐴁𐴟𐴥𐴃𐴡𐴌𐴠 𐴎𐴠 𐴉𐴡𐴀𐴌 𐴀𐴝𐴏𐴠𐴤 𐴇𐴞𐴥𐴘𐴝𐴕 𐴎𐴡𐴊𐴞 𐴀𐴝𐴕𐴊𐴝𐴤𐴌 𐴊𐴠 𐴀𐴡𐴥𐴘𐴓𐴠, 𐴃𐴡𐴥𐴀𐴘𐴓𐴠 𐴇𐴠𐴥 𐴀𐴝𐴕𐴊𐴝𐴤𐴌 𐴇𐴡𐴃𐴡𐴥 𐴒𐴟𐴄𐴒𐴟𐴙𐴄𐴧𐴝 𐴀𐴡𐴥𐴘𐴁𐴡 𐴉𐴝𐴥𐴣𐴓𐴧𐴝𐴌!

𐴀𐴝𐴓𐴧𐴝 𐴀𐴠𐴊𐴧𐴠 𐴐𐴡𐴥𐴔𐴁𐴡𐴃𐴧𐴞

²⁴”𐴇𐴡𐴕𐴡𐴤𐴑𐴞𐴘𐴠 𐴊𐴟𐴘 𐴒𐴞𐴌𐴡𐴥𐴏𐴡𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴠; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴀𐴠𐴎𐴧𐴡𐴕𐴡𐴌𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴞𐴥𐴁𐴡 𐴀𐴝𐴦𐴌 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴁𐴡; 𐴘𐴝𐴥𐴃𐴡 𐴀𐴠𐴎𐴧𐴡𐴕 𐴓𐴡𐴘 𐴄𐴞𐴥𐴑 𐴃𐴝𐴥𐴑𐴞𐴁𐴡 𐴀𐴝𐴦𐴌 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴇𐴠𐴥𐴑𐴝𐴌𐴡𐴃𐴢 𐴒𐴡𐴌𐴞𐴥𐴁𐴡. 𐴃𐴟𐴣𐴀𐴝𐴥𐴌𐴝 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴊𐴡𐴥𐴕-𐴊𐴡𐴓𐴡𐴃𐴡𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴞𐴁𐴝𐴥.

𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥

²⁵”𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴑𐴞𐴦 𐴈𐴝𐴥𐴘𐴧𐴟𐴔 𐴘𐴝𐴥 𐴑𐴞𐴦 𐴉𐴞𐴀𐴘𐴟𐴔 𐴇𐴡𐴘 𐴎𐴞𐴕𐴊𐴞𐴒𐴞𐴓𐴧𐴝 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥; 𐴀𐴝𐴦𐴌 𐴑𐴞𐴦 𐴉𐴞𐴣𐴊𐴞𐴥𐴘𐴟𐴔 𐴇𐴡𐴘 𐴒𐴝𐴦 𐴓𐴧𐴝 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥. 𐴎𐴞𐴕𐴊𐴞𐴒𐴞 𐴑𐴞 𐴈𐴝𐴥𐴕𐴝𐴌 𐴃𐴟𐴥𐴖𐴝𐴌𐴡 𐴑𐴞𐴔𐴡𐴃𐴞 𐴕𐴡 𐴕𐴠𐴥, 𐴀𐴝𐴦𐴌 𐴒𐴝𐴦 𐴑𐴞 𐴇𐴡𐴦𐴌𐴏𐴟𐴖𐴡𐴌𐴡𐴌 𐴃𐴟𐴥𐴖𐴝𐴌𐴡 𐴑𐴞𐴔𐴡𐴃𐴞 𐴕𐴡 𐴕𐴠𐴥؟²⁶𐴀𐴝𐴏𐴔𐴝𐴕𐴡𐴌 𐴉𐴝𐴙𐴑 𐴀𐴡𐴥𐴑𐴧𐴡𐴓𐴡𐴌 𐴁𐴝𐴦𐴁𐴟𐴃𐴠 𐴁𐴝𐴥𐴉𐴞𐴏𐴡; 𐴇𐴞𐴥𐴀𐴕𐴠 𐴃𐴡 𐴕𐴡 𐴐𐴞𐴥𐴣𐴍𐴠, 𐴕𐴡 𐴊𐴝𐴦, 𐴀𐴝𐴦𐴌 𐴕𐴡 𐴒𐴟𐴊𐴝𐴔𐴡𐴃𐴢 𐴎𐴡𐴔𐴝 𐴒𐴡𐴌𐴠𐴥, 𐴃𐴡𐴀 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴠 𐴇𐴞𐴥𐴀𐴕𐴡𐴌𐴠 𐴈𐴝𐴥𐴀𐴁𐴝. 𐴃𐴟𐴣𐴀𐴝𐴥𐴌𐴝 𐴑𐴞𐴥 𐴇𐴞𐴥𐴀𐴕𐴡𐴌 𐴃𐴟𐴥𐴖𐴝𐴌𐴡 𐴑𐴞𐴔𐴡𐴃𐴞 𐴕𐴡 𐴕𐴠𐴥؟²⁷𐴃𐴟𐴣𐴀𐴝𐴥𐴌𐴝 𐴇𐴡𐴕𐴠 𐴏𐴞𐴕𐴃𐴝 𐴒𐴡𐴌𐴞𐴥 𐴕𐴞𐴎𐴡𐴌 𐴇𐴡𐴥𐴘𐴧𐴝𐴃𐴡𐴌𐴠 𐴀𐴠𐴑 𐴒𐴡𐴥𐴕𐴋𐴝 𐴁𐴝𐴌𐴝𐴤𐴘 𐴉𐴝𐴌𐴞𐴁𐴝𐴥 𐴊𐴠 𐴀𐴝𐴏𐴡𐴤؟

²⁸”𐴇𐴡𐴦𐴌𐴏𐴟𐴖𐴡𐴌𐴡𐴓𐴧𐴝 𐴑𐴞𐴘𐴝𐴥 𐴏𐴞𐴕𐴃𐴝 𐴒𐴡𐴌𐴡𐴤؟ 𐴁𐴝𐴥𐴉𐴞𐴏𐴡, 𐴔𐴡𐴘𐴊𐴝𐴕𐴡𐴌 𐴉𐴟𐴥𐴓𐴢 𐴀𐴡𐴥𐴑𐴧𐴡𐴓𐴢 𐴑𐴠𐴀𐴕𐴒𐴡𐴌𐴞 𐴁𐴝𐴌𐴞𐴥 𐴀𐴟𐴍𐴠𐴤; 𐴇𐴞𐴥𐴀𐴕𐴠 𐴃𐴡 𐴕𐴡 𐴔𐴠𐴀𐴕𐴧𐴡𐴃𐴢 𐴒𐴡𐴌𐴠𐴥 𐴀𐴝𐴦𐴌 𐴕𐴡 𐴉𐴟𐴥𐴣𐴃𐴝 𐴈𐴝𐴍𐴠.²⁹𐴔𐴡𐴕𐴃𐴡𐴌 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴁𐴝𐴀𐴣𐴐𐴧𐴝 𐴏𐴡𐴥𐴓𐴡𐴔𐴝𐴕𐴠 𐴀𐴟𐴥𐴊𐴧𐴗𐴝 𐴘𐴡𐴥𐴒𐴧𐴗𐴝𐴌 𐴃𐴝𐴔𐴝𐴥𐴔 𐴊𐴡𐴥𐴕-𐴊𐴡𐴓𐴡𐴃𐴢 𐴓𐴡𐴥𐴘 𐴇𐴞𐴥𐴀𐴕 𐴀𐴠𐴑𐴒𐴗𐴝𐴥𐴌 𐴋𐴡𐴥𐴙𐴓𐴧𐴝 𐴕𐴞𐴎𐴡𐴌𐴠𐴥 𐴇𐴝𐴥𐴣𐴎𐴝𐴘 𐴉𐴝𐴙𐴅𐴧𐴠𐴥 𐴊𐴠 𐴕𐴝𐴥𐴘.³⁰𐴇𐴠𐴥𐴃𐴡𐴓𐴧𐴝, 𐴎𐴡𐴊𐴞 𐴀𐴝𐴓𐴧𐴝𐴘𐴠 𐴔𐴡𐴘𐴊𐴝𐴕𐴡𐴌 𐴑𐴠𐴥𐴌𐴡𐴌𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴥𐴌𐴞 𐴇𐴝𐴥𐴣𐴎𐴝, 𐴎𐴞𐴀𐴕 𐴀𐴝𐴙𐴅𐴧𐴝 𐴀𐴝𐴏𐴠𐴤 𐴀𐴝𐴦𐴌 𐴇𐴝𐴙𐴓𐴧𐴝 𐴀𐴡𐴦𐴙𐴕𐴡𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝; 𐴃𐴡𐴥𐴀𐴘𐴓𐴠 𐴀𐴡𐴥 𐴈𐴡𐴔 𐴁𐴞𐴐𐴧𐴝𐴥𐴐𐴢 𐴀𐴡𐴓𐴝 𐴀𐴡𐴥𐴑𐴧𐴡𐴓𐴢, 𐴀𐴞𐴥𐴁𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴌𐴡𐴤 𐴁𐴞𐴐𐴞𐴤 𐴕𐴡 𐴇𐴝𐴥𐴣𐴎𐴝𐴘𐴁𐴡 𐴕𐴠𐴥؟³¹𐴇𐴠𐴥𐴃𐴡𐴓𐴧𐴝 𐴈𐴡𐴀𐴙𐴌, ’𐴀𐴝𐴣𐴀𐴌𐴝 𐴑𐴞𐴦 𐴈𐴝𐴥𐴘𐴧𐴟𐴔؟ 𐴑𐴞𐴦 𐴉𐴞𐴀𐴘𐴟𐴔؟‘ 𐴘𐴝𐴥 ’𐴑𐴞𐴦 𐴉𐴞𐴣𐴊𐴞𐴥𐴘𐴟𐴔؟‘ 𐴈𐴡𐴀𐴘𐴢 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥.³²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴠𐴥𐴕𐴝 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴉𐴞𐴏𐴠𐴤 𐴓𐴝𐴒𐴞 𐴃𐴝𐴥𐴑𐴠. 𐴃𐴟𐴣𐴀𐴝𐴥𐴌𐴝𐴌 𐴀𐴝𐴏𐴔𐴝𐴕𐴞 𐴁𐴝𐴉𐴠 𐴃𐴡 𐴎𐴝𐴕𐴠, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴓𐴝𐴒𐴠𐴌 𐴊𐴠.³³𐴀𐴝𐴒𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴏𐴡𐴓𐴞𐴁𐴝𐴥𐴌 𐴃𐴝𐴓𐴝𐴐𐴡𐴃𐴢 𐴃𐴝𐴥𐴑𐴡, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴌𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴀𐴡𐴥 𐴊𐴞𐴦𐴘𐴝 𐴎𐴝𐴘𐴁𐴡.

³⁴”𐴇𐴠𐴥𐴃𐴡𐴓𐴧𐴝, 𐴇𐴝𐴙𐴓𐴧𐴝𐴓𐴧𐴝 𐴏𐴞𐴕𐴃𐴝 𐴕𐴡 𐴒𐴡𐴙𐴅𐴧𐴡𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴝𐴙𐴓𐴧𐴝𐴌 𐴊𐴞𐴕𐴠 𐴇𐴝𐴙𐴓𐴧𐴝𐴓𐴧𐴝 𐴏𐴞𐴕𐴃𐴝 𐴒𐴡𐴌𐴞𐴥𐴁𐴡. 𐴊𐴞𐴕𐴡𐴌 𐴊𐴟𐴑 𐴊𐴞𐴕𐴡𐴓𐴧𐴝 𐴑𐴝𐴉𐴞𐴥.

The Word for the World International

https://app.library.bible/content/87faca8b51c22590