Read 𐴔𐴡𐴃𐴞 8

𐴔𐴡𐴃𐴞8

𐴀𐴠𐴎𐴧𐴡𐴕 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴧𐴠

¹𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴉𐴝𐴀𐴌𐴡𐴌 𐴖𐴡𐴃𐴧𐴟𐴥 𐴓𐴝𐴙𐴔𐴧𐴠𐴥𐴒𐴝𐴘, 𐴁𐴠𐴐𐴝𐴤𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴙𐴅𐴧𐴠.²𐴇𐴠𐴥 𐴀𐴡𐴑𐴃𐴡𐴥𐴃𐴢 𐴀𐴠𐴎𐴧𐴡𐴕 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝𐴘𐴠 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴏𐴡𐴥𐴘𐴊𐴝 𐴒𐴡𐴌𐴞𐴥 𐴈𐴡𐴀𐴌 𐴊𐴠, ”𐴀𐴡𐴥 𐴔𐴝𐴓𐴞𐴑, 𐴃𐴟𐴀𐴛 𐴏𐴝𐴘𐴓𐴠𐴥 𐴀𐴝𐴣𐴀𐴌𐴠𐴥 𐴂𐴝𐴑-𐴏𐴝𐴥𐴉𐴢 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥.“

³𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴀𐴝𐴥𐴃𐴢 𐴁𐴝𐴌𐴝𐴤𐴘 𐴘𐴡𐴥𐴒𐴧𐴗𐴝𐴌𐴠 𐴊𐴡𐴥𐴌𐴞 𐴈𐴡𐴀𐴌 𐴊𐴠, ”𐴀𐴝𐴀𐴛 𐴏𐴝𐴀𐴘𐴢; 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴎𐴡𐴒𐴡𐴘.“𐴃𐴡𐴥𐴘 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴘𐴡𐴥𐴒𐴧𐴗𐴝 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴔𐴡𐴃𐴧𐴟 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴒𐴞𐴘𐴡𐴘.⁴𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴏𐴝𐴘𐴧𐴡𐴥, 𐴘𐴝𐴀𐴕 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴡 𐴈𐴡𐴘𐴧𐴡𐴥; 𐴁𐴡𐴥𐴓𐴑𐴠 𐴎𐴡𐴦, 𐴕𐴞𐴎𐴡𐴌𐴠𐴥 𐴀𐴞𐴔𐴝𐴔𐴡𐴌 𐴇𐴝𐴣𐴏𐴠 𐴊𐴝𐴈𐴡𐴥𐴒𐴡𐴘, 𐴀𐴝𐴦𐴌 𐴔𐴝𐴙𐴕𐴐𐴡𐴥𐴌 𐴇𐴝𐴣𐴏𐴠 𐴒𐴡𐴁𐴝𐴤 𐴀𐴡𐴥 𐴉𐴝𐴕, 𐴔𐴟𐴀𐴏𐴝𐴘𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠 𐴇𐴠𐴥 𐴑𐴟𐴌𐴁𐴝𐴕𐴞 𐴊𐴡𐴒𐴡𐴥𐴘.“

𐴀𐴠𐴑 𐴌𐴡𐴔𐴞 𐴐𐴝𐴥𐴀𐴂𐴡𐴌 𐴒𐴟𐴓𐴝𐴔𐴡𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

⁵𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴑𐴝𐴂𐴝𐴌𐴕𐴝𐴈𐴟𐴥𐴔 𐴐𐴡𐴥𐴀𐴌𐴡𐴃𐴢 𐴒𐴡𐴥𐴙𐴓𐴧𐴠, 𐴇𐴠𐴥𐴃𐴟𐴕𐴡𐴃𐴢 𐴀𐴠𐴎𐴧𐴡𐴕 𐴐𐴝𐴥𐴀𐴂𐴢, 𐴎𐴞𐴁𐴝𐴤 𐴀𐴠𐴑 𐴐𐴡𐴥𐴃𐴢 𐴉𐴡𐴥𐴗𐴏𐴡𐴌 𐴏𐴡𐴥𐴊𐴧𐴝𐴌, 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴠𐴥𐴌 𐴊𐴠,⁶”𐴔𐴝𐴓𐴞𐴑, 𐴀𐴝𐴣𐴀𐴌 𐴒𐴟𐴓𐴝𐴔 𐴀𐴝𐴣𐴃𐴟𐴌 𐴀𐴡𐴥𐴘 𐴒𐴡𐴥𐴌𐴡𐴃𐴢 𐴉𐴡𐴌𐴞 𐴃𐴝𐴥𐴙𐴑𐴧𐴠; 𐴀𐴞𐴥𐴃𐴠 𐴑𐴟𐴥𐴁𐴢 𐴊𐴟𐴑 𐴉𐴝𐴦𐴌.“

⁷𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴀𐴝𐴀𐴘𐴢 𐴀𐴞𐴥𐴃𐴝𐴌𐴠 𐴒𐴡𐴔 𐴒𐴡𐴙𐴅𐴧𐴟𐴥𐴔.“

⁸𐴔𐴡𐴕𐴃𐴡𐴌 𐴐𐴝𐴥𐴀𐴂𐴢 𐴂𐴗𐴝𐴥𐴘𐴠 𐴈𐴡𐴀𐴌 𐴊𐴠, ”𐴀𐴡𐴥 𐴔𐴝𐴓𐴞𐴑, 𐴃𐴟𐴀𐴛 𐴀𐴝𐴣𐴀𐴌 𐴒𐴡𐴥𐴌𐴡𐴌 𐴏𐴝𐴓𐴡𐴌 𐴕𐴞𐴏𐴠 𐴀𐴝𐴘𐴁𐴝𐴤𐴌 𐴀𐴝𐴀𐴛 𐴓𐴝𐴦𐴘𐴠𐴑 𐴕𐴡. 𐴏𐴞𐴌𐴞𐴥𐴉𐴢 𐴔𐴟𐴑𐴠𐴥 𐴈𐴡𐴀, 𐴃𐴡𐴥𐴘 𐴀𐴝𐴣𐴀𐴌 𐴒𐴟𐴓𐴝𐴔 𐴒𐴡𐴔 𐴀𐴡𐴥𐴘𐴎𐴝𐴘𐴁𐴡𐴘.⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴕𐴞𐴎𐴠 𐴘𐴡𐴥 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴇𐴡𐴥𐴑𐴟𐴔𐴡𐴃𐴡𐴌 𐴃𐴡𐴓𐴠 𐴀𐴝𐴏𐴞𐴤, 𐴀𐴝𐴦𐴌 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴢 𐴀𐴝𐴣𐴀𐴌 𐴕𐴞𐴏𐴠 𐴀𐴝𐴏𐴠𐴤. 𐴀𐴝𐴀𐴛 𐴀𐴠𐴎𐴧𐴡𐴕𐴡𐴌𐴠 ’𐴎𐴝𐴦‘ 𐴈𐴡𐴘𐴓𐴠𐴥, 𐴀𐴞𐴥𐴃𐴠 𐴎𐴝𐴦, 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 ’𐴀𐴝𐴘‘ 𐴈𐴡𐴘𐴓𐴠𐴥, 𐴀𐴞𐴥𐴃𐴠 𐴀𐴝𐴘𐴧𐴠𐴤, 𐴀𐴝𐴦𐴌 𐴀𐴝𐴣𐴀𐴌 𐴒𐴟𐴓𐴝𐴔𐴡𐴌𐴠 ’𐴘𐴝𐴀𐴕 𐴒𐴡𐴌‘ 𐴈𐴡𐴘𐴓𐴠𐴥, 𐴀𐴞𐴥𐴃𐴠 𐴇𐴞𐴥𐴘𐴝𐴕 𐴒𐴡𐴌𐴠𐴥.“

¹⁰𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴏𐴝𐴤 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴌𐴞 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴝𐴀𐴛 𐴀𐴠𐴃𐴧𐴡𐴥𐴌 𐴋𐴡𐴣𐴀𐴌 𐴀𐴞𐴔𐴝𐴕 𐴀𐴞𐴏𐴌𐴝𐴥𐴙𐴓𐴞 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴀𐴟𐴥𐴊𐴧𐴗𐴝 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴓𐴡𐴦𐴃𐴢 𐴕𐴡𐴥 𐴉𐴝𐴘.¹¹𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴉𐴟𐴑 𐴀𐴠𐴊𐴧𐴠 𐴉𐴡𐴏𐴞𐴥𐴔𐴡𐴃𐴧𐴟 𐴁𐴡𐴀𐴗𐴃𐴢 𐴎𐴡𐴕 𐴀𐴝𐴘𐴁𐴡𐴤, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴞𐴁𐴌𐴝𐴇𐴞𐴥𐴔, 𐴀𐴞𐴏𐴝𐴈𐴝𐴥𐴑, 𐴀𐴠𐴊𐴧𐴠 𐴘𐴝𐴑𐴟𐴁𐴡𐴌 𐴉𐴟𐴥𐴖𐴝𐴣𐴃𐴞 𐴀𐴝𐴏𐴔𐴝𐴕𐴞 𐴌𐴝𐴙𐴅𐴧𐴡𐴃𐴢 𐴈𐴝𐴥𐴘𐴃𐴡 𐴁𐴡𐴘𐴁𐴡𐴥.¹²𐴔𐴡𐴕𐴃𐴡𐴌 𐴎𐴠𐴃𐴝𐴌𐴝𐴤 𐴌𐴝𐴙𐴅𐴧𐴡𐴃𐴢 𐴃𐴝𐴥𐴑𐴡𐴕 𐴀𐴝𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝𐴌𐴠 𐴁𐴝𐴀𐴌𐴠 𐴀𐴝𐴕𐴊𐴝𐴤𐴌𐴡𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝𐴘𐴁𐴡; 𐴇𐴠𐴥𐴍𐴠 𐴈𐴝𐴣𐴊𐴝𐴈𐴝𐴍𐴞 𐴀𐴠𐴊𐴧𐴠 𐴊𐴝𐴃𐴠 𐴊𐴝𐴃𐴢 𐴑𐴞𐴌𐴑𐴞𐴌𐴝𐴕𐴞 𐴀𐴡𐴥𐴘𐴁𐴡.“

¹³𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴐𐴝𐴥𐴀𐴂𐴢 𐴂𐴗𐴝𐴥𐴌𐴠 𐴈𐴡𐴀𐴌 𐴊𐴠, ”𐴎𐴡𐴦𐴒𐴡𐴥𐴘; 𐴃𐴟𐴀𐴛 𐴎𐴠𐴀𐴕 𐴀𐴡𐴥𐴘𐴁𐴡 𐴁𐴡𐴥𐴓𐴞 𐴁𐴞𐴐𐴧𐴝𐴥𐴐𐴢 𐴒𐴡𐴙𐴅𐴧𐴡𐴥, 𐴇𐴠𐴥𐴀𐴕 𐴃𐴟𐴣𐴀𐴝𐴥𐴣𐴌 𐴓𐴧𐴝 𐴀𐴡𐴥𐴗𐴑.“𐴁𐴡𐴌𐴝𐴁𐴡𐴌 𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝𐴌 𐴒𐴟𐴓𐴝𐴔𐴧𐴗𐴝 𐴒𐴡𐴔 𐴀𐴡𐴥𐴘𐴒𐴞𐴘𐴡𐴘.

𐴁𐴡𐴀𐴗𐴃𐴢 𐴁𐴞𐴘𐴝𐴌𐴝𐴙𐴔𐴧𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

¹⁴𐴘𐴝𐴥𐴌𐴁𐴝𐴦𐴊𐴠 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴉𐴞𐴃𐴡𐴌𐴡𐴌 𐴒𐴡𐴥𐴌𐴡𐴃𐴢 𐴀𐴝𐴙𐴐𐴧𐴠𐴥, 𐴀𐴞𐴥𐴁𐴝𐴘𐴠 𐴊𐴠𐴑𐴠𐴥𐴌 𐴊𐴠, 𐴉𐴞𐴃𐴡𐴌𐴡𐴌 𐴇𐴡𐴥𐴖𐴌𐴞 𐴒𐴝𐴦𐴃𐴎𐴡𐴌𐴠 𐴁𐴞𐴏𐴝𐴥𐴕𐴝𐴃𐴢 𐴉𐴡𐴌𐴞 𐴃𐴝𐴥𐴙𐴑𐴧𐴠.¹⁵𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌 𐴀𐴝𐴥𐴃𐴢 𐴊𐴡𐴥𐴙𐴅𐴧𐴠 𐴌𐴝𐴥𐴌 𐴘𐴡𐴥𐴒𐴧𐴗𐴝𐴃𐴧𐴟 𐴒𐴝𐴦𐴃𐴎𐴡𐴌 𐴒𐴞𐴦𐴘𐴠𐴥𐴒𐴡𐴘; 𐴁𐴝𐴦𐴊𐴠 𐴘𐴡𐴥𐴒𐴧𐴗𐴝 𐴀𐴟𐴍𐴞𐴤 𐴀𐴞𐴥𐴁𐴝𐴌𐴠 𐴔𐴠𐴀𐴔𐴝𐴕𐴊𐴝𐴌𐴞 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.

¹⁶𐴇𐴝𐴥𐴣𐴎𐴢 𐴀𐴡𐴥𐴘𐴧𐴠 𐴌𐴝𐴥𐴌, 𐴔𐴝𐴙𐴕𐴐𐴠𐴥 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴁𐴟𐴥𐴃𐴠-𐴉𐴝𐴘𐴧𐴝 𐴁𐴡𐴀𐴗𐴃𐴢 𐴎𐴡𐴕𐴡𐴌𐴠 𐴀𐴝𐴙𐴕𐴧𐴞𐴤𐴓𐴢. 𐴀𐴞𐴥𐴁𐴝𐴘𐴠 𐴅𐴞𐴕 𐴀𐴡𐴥𐴑𐴧𐴡𐴓𐴡𐴌𐴠 𐴔𐴟𐴑 𐴎𐴡𐴁𐴝𐴕𐴠 𐴊𐴝𐴥𐴉𐴝𐴘𐴧𐴠, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴁𐴞𐴘𐴝𐴌𐴝𐴙𐴔𐴧𐴝 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥.¹⁷𐴇𐴞𐴥𐴘𐴝𐴕 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴕𐴡𐴁𐴞 𐴘𐴠𐴏𐴝𐴥𐴘𐴝𐴌 𐴊𐴟𐴖𐴝𐴌𐴝 𐴈𐴡𐴀𐴙𐴓𐴢 𐴊𐴠 𐴘𐴝𐴀𐴕 𐴉𐴟𐴌𐴝 𐴀𐴡𐴥,”𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴝𐴌 𐴑𐴡𐴔𐴎𐴟𐴌𐴞 𐴀𐴡𐴥𐴑𐴧𐴡𐴓𐴢 𐴓𐴡𐴘𐴉𐴠𐴥𐴓𐴝𐴘𐴧𐴠,𐴀𐴝𐴦𐴌 𐴀𐴝𐴣𐴀𐴌𐴝𐴌 𐴁𐴞𐴘𐴝𐴌𐴝𐴔 𐴀𐴡𐴥𐴑𐴧𐴡𐴓𐴢 𐴊𐴟𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.“

𐴀𐴟𐴔𐴧𐴡𐴃𐴢 𐴀𐴡𐴥𐴘𐴁𐴝𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

¹⁸𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴘𐴠 𐴀𐴞𐴥𐴁𐴝𐴌 𐴏𐴝𐴘𐴌𐴡𐴥𐴑𐴟𐴓𐴃𐴟 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴊𐴠𐴙𐴑𐴧𐴠𐴥, 𐴀𐴞𐴥𐴁𐴝𐴘𐴠 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴋𐴞𐴀𐴌 𐴀𐴡 𐴇𐴝𐴣𐴏𐴝𐴃𐴢 𐴎𐴝𐴘 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴊𐴞𐴥𐴘𐴠.¹⁹𐴇𐴠𐴥𐴃𐴟𐴕𐴡𐴃𐴢 𐴀𐴠𐴎𐴧𐴡𐴕 𐴀𐴝𐴓𐴠𐴔 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴃𐴟𐴀𐴛 𐴎𐴠𐴍𐴠𐴥 𐴎𐴝𐴘𐴁𐴝 𐴀𐴝𐴀𐴛 𐴘𐴡𐴥 𐴇𐴠𐴥𐴍𐴠 𐴃𐴟𐴣𐴀𐴝𐴥𐴣𐴌 𐴉𐴞𐴏𐴝𐴥𐴓𐴞 𐴎𐴝𐴘𐴧𐴟𐴔.“

²⁰𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠 ”𐴐𐴞𐴥𐴘𐴝𐴓𐴢 𐴀𐴡𐴥𐴑𐴧𐴡𐴓𐴡𐴃𐴧𐴟 𐴒𐴝𐴣𐴃𐴢 𐴀𐴝𐴏𐴠𐴤 𐴀𐴝𐴦𐴌 𐴉𐴝𐴙𐴑 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴝𐴇𐴝𐴤 𐴀𐴝𐴏𐴠𐴤, 𐴔𐴡𐴕𐴃𐴡𐴌 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴃𐴧𐴟 𐴕𐴞𐴎𐴡𐴌 𐴔𐴝𐴃𐴝𐴥 𐴌𐴝𐴑𐴞𐴥 𐴁𐴡𐴓𐴧𐴝 𐴀𐴟𐴥𐴊𐴧𐴗𐴝 𐴇𐴡𐴕𐴡𐴤 𐴔𐴞𐴑𐴧𐴝𐴥 𐴎𐴝𐴒𐴝 𐴕𐴝𐴥𐴘.“

²¹𐴀𐴝𐴌 𐴀𐴠𐴎𐴧𐴡𐴕 𐴀𐴟𐴔𐴧𐴡𐴃𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴀𐴝𐴒𐴠 𐴀𐴝𐴀𐴛 𐴎𐴝𐴘 𐴀𐴝𐴣𐴀𐴌 𐴁𐴝𐴉𐴡𐴌𐴠 𐴊𐴡𐴇𐴡𐴥𐴕 𐴒𐴡𐴌𐴞𐴥 𐴀𐴝𐴘𐴧𐴞𐴤.“

²²𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴉𐴞𐴏𐴝𐴥𐴓𐴞 𐴀𐴝𐴘𐴧𐴡𐴤, 𐴔𐴟𐴌𐴟𐴊𐴝 𐴀𐴡𐴥𐴑𐴧𐴡𐴓𐴠 𐴀𐴞𐴥𐴃𐴝𐴌𐴝𐴌 𐴕𐴞𐴎𐴡𐴌 𐴔𐴟𐴌𐴟𐴊𐴝𐴌𐴠 𐴊𐴡𐴇𐴡𐴥𐴕 𐴒𐴡𐴌𐴡𐴥𐴗𐴑𐴒𐴡𐴘.“

𐴀𐴞𐴏𐴝𐴤𐴘𐴠 𐴃𐴟𐴖𐴝𐴥𐴕 𐴃𐴝𐴥𐴔𐴝𐴘𐴧𐴠

²³𐴁𐴝𐴦𐴊𐴠 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴀𐴠𐴑𐴧𐴝𐴥𐴕 𐴕𐴡𐴦𐴃𐴢 𐴀𐴟𐴙𐴄𐴧𐴠𐴥, 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴙𐴅𐴧𐴠.²⁴𐴀𐴝𐴃𐴞𐴥𐴑𐴧𐴝 𐴋𐴞𐴀𐴃𐴢 𐴀𐴠𐴒𐴧𐴗𐴝𐴤 𐴀𐴠𐴀𐴕 𐴋𐴡𐴣𐴀𐴌 𐴃𐴟𐴖𐴝𐴥𐴕 𐴐𐴟𐴥𐴌𐴟 𐴀𐴡𐴥𐴘𐴧𐴠, 𐴎𐴠𐴀𐴕 𐴕𐴞𐴥𐴑𐴞 𐴕𐴡𐴦 𐴒𐴝𐴥𐴕 𐴒𐴡𐴙𐴌𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴓𐴞𐴎𐴝𐴌𐴒𐴡𐴘. 𐴔𐴡𐴕𐴃𐴡𐴌 𐴀𐴞𐴏𐴝𐴤 𐴒𐴟𐴥𐴔𐴡𐴃𐴢 𐴀𐴝𐴐𐴧𐴞𐴥𐴓𐴢.²⁵𐴀𐴟𐴔𐴧𐴡𐴃𐴧𐴟𐴕𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴃𐴟𐴓𐴞𐴤𐴊𐴞 𐴈𐴡𐴀𐴌 𐴊𐴠, ”𐴀𐴡𐴥 𐴔𐴝𐴓𐴞𐴑, 𐴀𐴝𐴣𐴀𐴌𐴝𐴌𐴠 𐴁𐴝𐴏𐴡! 𐴀𐴝𐴣𐴀𐴌𐴝 𐴔𐴡𐴌𐴞𐴎𐴝𐴙𐴌𐴒𐴡𐴥𐴘!“

²⁶𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴡𐴥 𐴈𐴡𐴔 𐴁𐴞𐴐𐴧𐴝𐴥𐴐𐴢 𐴀𐴡𐴓𐴝 𐴀𐴡𐴥𐴑𐴧𐴡𐴓𐴢, 𐴃𐴟𐴣𐴀𐴝𐴥𐴌𐴝 𐴋𐴡𐴦𐴌𐴡𐴥𐴌 𐴑𐴞𐴘𐴝𐴥؟“𐴃𐴡𐴥𐴘 𐴀𐴞𐴥𐴁𐴝 𐴀𐴟𐴍𐴞𐴤 𐴁𐴡𐴘𐴧𐴝𐴌 𐴀𐴠𐴊𐴧𐴠 𐴒𐴡𐴙𐴌𐴡𐴌𐴠 𐴊𐴡𐴥𐴀𐴣𐴑 𐴊𐴞𐴥𐴘𐴠 𐴌𐴝𐴥𐴌, 𐴉𐴟𐴌𐴝𐴉𐴟𐴌𐴞 𐴃𐴝𐴥𐴔𐴝𐴘𐴒𐴞𐴘𐴡𐴘.

²⁷𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝 𐴃𐴝𐴦𐴅𐴟𐴂𐴢 𐴀𐴡𐴥𐴘 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴇𐴡𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐؟ 𐴁𐴡𐴘𐴧𐴝𐴌𐴠 𐴀𐴠𐴊𐴧𐴠 𐴉𐴝𐴕𐴞𐴥𐴘𐴠 𐴀𐴟𐴥𐴊𐴧𐴗𐴝 𐴊𐴠 𐴀𐴞𐴁𐴝𐴤𐴌 𐴈𐴡𐴃𐴝𐴤 𐴔𐴝𐴕𐴠!“

𐴊𐴟𐴘 𐴎𐴡𐴕 𐴁𐴟𐴥𐴃𐴠-𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴢 𐴒𐴡𐴔 𐴒𐴡𐴙𐴅𐴧𐴠𐴥

²⁸𐴁𐴝𐴦𐴊𐴠 𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴋𐴞𐴀𐴌 𐴀𐴡𐴑𐴟𐴓𐴠 𐴒𐴝𐴊𐴝𐴌𐴞𐴕𐴞𐴀𐴡𐴥𐴓𐴡𐴌 𐴔𐴟𐴓𐴧𐴟𐴑𐴡𐴃𐴢 𐴉𐴡𐴀𐴣𐴙𐴐𐴧𐴠, 𐴊𐴟𐴘 𐴎𐴡𐴕 𐴁𐴟𐴥𐴃𐴠-𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴢 𐴈𐴡𐴁𐴡𐴌𐴡𐴃𐴧𐴟 𐴕𐴠𐴦𐴓𐴞𐴀𐴝𐴘𐴃𐴠𐴥 𐴀𐴞𐴥𐴁𐴝 𐴓𐴧𐴡𐴥𐴘 𐴊𐴡𐴓𐴝 𐴀𐴡𐴥𐴘𐴧𐴠. 𐴀𐴞𐴥𐴃𐴝𐴌𐴝 𐴀𐴠𐴀𐴕 𐴇𐴡𐴥𐴃𐴝𐴌𐴝 𐴀𐴝𐴐𐴧𐴞𐴥𐴓𐴢, 𐴎𐴠𐴀𐴕 𐴕𐴞𐴥𐴑𐴞 𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴢 𐴇𐴠𐴥 𐴉𐴡𐴣𐴃𐴢 𐴁𐴝𐴥𐴘 𐴎𐴝𐴘 𐴕𐴡 𐴉𐴝𐴙𐴃𐴧𐴡.²⁹𐴀𐴝𐴃𐴞𐴥𐴑𐴧𐴝 𐴀𐴞𐴥𐴃𐴝𐴌𐴝 𐴒𐴟𐴎𐴡𐴌𐴞-𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴀𐴡𐴥 𐴀𐴝𐴓𐴧𐴝𐴌 𐴉𐴟𐴖𐴝, 𐴃𐴟𐴣𐴀𐴝𐴥𐴣𐴃𐴧𐴟 𐴀𐴝𐴣𐴀𐴌𐴝 𐴓𐴧𐴡𐴥𐴘 𐴑𐴞𐴦 𐴈𐴝𐴔 𐴀𐴝𐴏𐴠𐴤؟ 𐴀𐴡𐴑𐴃𐴡𐴥 𐴕𐴡𐴥 𐴀𐴡𐴥𐴘𐴃𐴠 𐴃𐴟𐴀𐴛 𐴇𐴡𐴥𐴕𐴡 𐴀𐴠𐴍𐴠𐴥 𐴀𐴝𐴣𐴀𐴌𐴝𐴌𐴠 𐴃𐴡𐴎𐴞𐴘𐴝 𐴊𐴞𐴃𐴡 𐴀𐴝𐴙𐴐𐴧𐴡𐴥 𐴊𐴠 𐴕𐴠𐴥؟“

³⁰𐴇𐴠𐴥𐴍𐴠 𐴀𐴞𐴥𐴃𐴝𐴌𐴝𐴌 𐴈𐴠𐴥𐴕𐴃𐴟 𐴇𐴡𐴊𐴧𐴟𐴥𐴌 𐴊𐴟𐴌𐴠𐴥 𐴋𐴡𐴣𐴀𐴌 𐴀𐴠𐴑 𐴎𐴝𐴥𐴑 𐴐𐴟𐴥𐴖𐴡𐴌 𐴏𐴡𐴌𐴠𐴌 𐴊𐴠 𐴀𐴝𐴐𐴧𐴞𐴥𐴓𐴢.³¹𐴁𐴟𐴥𐴃𐴧𐴟𐴕𐴠 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴠𐴥𐴌 𐴊𐴠, ”𐴎𐴡𐴊𐴞 𐴃𐴟𐴀𐴛 𐴀𐴝𐴣𐴀𐴌𐴝𐴌𐴠 𐴕𐴠𐴦𐴓𐴝𐴘𐴉𐴠𐴥𐴓𐴡, 𐴃𐴡𐴥𐴀𐴘𐴓𐴠 𐴀𐴡 𐴐𐴟𐴥𐴖𐴡𐴌𐴡𐴌 𐴎𐴝𐴥𐴑𐴧𐴗𐴝𐴌 𐴁𐴟𐴥𐴃𐴡𐴌𐴠 𐴊𐴟𐴣𐴌𐴝𐴘𐴊𐴡.“

³²𐴀𐴞𐴥𐴁𐴝𐴘𐴠 𐴇𐴞𐴥𐴀𐴕𐴡𐴌𐴠 𐴈𐴡𐴀𐴌 𐴊𐴠, ”𐴎𐴡𐴦𐴒𐴡𐴥𐴘.“𐴇𐴠𐴥𐴃𐴟𐴕𐴡𐴃𐴢 𐴇𐴞𐴥𐴀𐴕 𐴕𐴠𐴦𐴓𐴞 𐴀𐴝𐴀𐴘𐴢 𐴐𐴟𐴥𐴖𐴡𐴌 𐴒𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴧𐴠𐴒𐴡𐴘; 𐴃𐴡𐴥𐴘 𐴒𐴟𐴣𐴍𐴝 𐴎𐴝𐴥𐴑𐴧𐴗𐴝 𐴉𐴝𐴀𐴌𐴡𐴌 𐴇𐴝𐴙𐴕𐴊𐴝𐴤 𐴁𐴝𐴥𐴘 𐴎𐴟𐴌𐴠 𐴋𐴞𐴀𐴃𐴢 𐴊𐴟𐴣𐴌𐴞 𐴒𐴞𐴦𐴘𐴠𐴥 𐴀𐴝𐴦𐴌 𐴉𐴝𐴕𐴞𐴥𐴃𐴢 𐴋𐴟𐴉𐴞𐴥 𐴔𐴡𐴌𐴞𐴒𐴞𐴘𐴡𐴥𐴘.³³𐴏𐴡𐴌𐴡𐴘𐴝 𐴒𐴟𐴥𐴕 𐴊𐴟𐴣𐴌𐴊𐴞𐴘𐴠𐴥, 𐴀𐴝𐴦𐴌 𐴐𐴡𐴥𐴀𐴌𐴡𐴃𐴢 𐴎𐴝𐴘 𐴁𐴠𐴒𐴧𐴟𐴥𐴕 𐴈𐴡𐴥𐴁𐴡𐴌 𐴊𐴞𐴥𐴘𐴠, 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴁𐴟𐴥𐴃𐴠-𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌 𐴖𐴡𐴌𐴠 𐴑𐴞𐴦 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴘𐴝𐴕 𐴀𐴡𐴥 𐴈𐴡𐴘𐴧𐴠𐴥.³⁴𐴃𐴡𐴥𐴘 𐴃𐴝𐴔𐴝𐴥𐴔 𐴐𐴡𐴥𐴀𐴌𐴡𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴞𐴏𐴝𐴤 𐴓𐴧𐴡𐴥𐴘 𐴔𐴞𐴓𐴃𐴡 𐴕𐴠𐴦𐴙𐴓𐴧𐴠𐴥. 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴊𐴠𐴙𐴑𐴧𐴠𐴥 𐴌𐴝𐴥𐴌, 𐴀𐴞𐴥𐴃𐴝𐴌𐴝𐴌 𐴀𐴠𐴓𐴝𐴑𐴝𐴃𐴧𐴟 𐴎𐴝𐴘𐴃𐴡𐴒𐴡𐴥𐴘 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴙𐴅𐴧𐴠𐴥.

The Word for the World International

https://app.library.bible/content/87faca8b51c22590