𐴓𐴟𐴑𐴝𐴥𐴏𐴢 7を読んでください。

𐴓𐴟𐴑𐴝𐴥𐴏𐴢7

𐴀𐴠𐴑 𐴌𐴡𐴔𐴞 𐴐𐴝𐴥𐴀𐴂𐴡𐴌 𐴒𐴟𐴓𐴝𐴔𐴡𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

¹𐴎𐴠𐴣𐴃𐴧𐴠𐴥 𐴀𐴞𐴏𐴝𐴤𐴃𐴧𐴟 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴁𐴡𐴘𐴧𐴝𐴕 𐴒𐴡𐴙𐴅𐴧𐴝𐴥 𐴀𐴡𐴥𐴘𐴧𐴠, 𐴀𐴞𐴥𐴁𐴝 𐴑𐴝𐴂𐴝𐴌𐴕𐴝𐴈𐴟𐴥𐴔 𐴐𐴡𐴥𐴀𐴌𐴡𐴃𐴢 𐴒𐴞𐴦𐴘𐴠𐴥.

²𐴇𐴠𐴥𐴍𐴠 𐴀𐴠𐴥𐴎𐴧𐴡𐴕 𐴀𐴠𐴑 𐴐𐴡𐴥𐴃𐴢 𐴉𐴡𐴥𐴗𐴏𐴡𐴌 𐴐𐴝𐴥𐴀𐴂𐴡𐴌 𐴁𐴞𐴐𐴞𐴤 𐴀𐴝𐴊𐴡𐴙𐴅𐴧𐴝 𐴒𐴟𐴓𐴝𐴔 𐴁𐴞𐴘𐴝𐴌𐴝𐴔𐴠 𐴔𐴡𐴌𐴡𐴕-𐴔𐴡𐴌𐴡𐴕 𐴀𐴡𐴥𐴘𐴧𐴠.³𐴇𐴠𐴥 𐴐𐴝𐴥𐴀𐴂𐴢 𐴂𐴗𐴝𐴥𐴘𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴉𐴟𐴥𐴙𐴕𐴧𐴠 𐴌𐴝𐴥𐴌, 𐴘𐴡𐴇𐴟𐴥𐴊𐴞𐴌 𐴇𐴡𐴦𐴎𐴧𐴡𐴕 𐴔𐴟𐴌𐴟𐴁𐴧𐴞𐴌𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴊𐴞𐴉𐴠𐴍𐴝𐴥𐴘 𐴀𐴞𐴥𐴁𐴝𐴌𐴠 𐴀𐴝𐴌𐴡𐴏𐴢 𐴒𐴡𐴙𐴅𐴧𐴠𐴥 𐴊𐴠, 𐴀𐴝𐴀𐴘𐴢 𐴘𐴡𐴥𐴒𐴧𐴗𐴝𐴌 𐴒𐴟𐴓𐴝𐴔𐴧𐴗𐴝𐴌𐴠 𐴒𐴡𐴔 𐴒𐴡𐴙𐴃𐴧𐴡𐴥.⁴𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴁𐴠𐴐𐴝𐴤𐴁𐴞𐴐𐴞𐴤 𐴉𐴡𐴥𐴌𐴞𐴘𐴝𐴃𐴢 𐴒𐴡𐴙𐴅𐴧𐴠𐴥, 𐴀𐴠𐴀𐴕 𐴈𐴡𐴀𐴘𐴢, ”𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝 𐴃𐴟𐴣𐴀𐴝𐴥𐴣𐴌 𐴀𐴠 𐴔𐴡𐴊𐴡𐴃𐴢 𐴃𐴝𐴥𐴕𐴡𐴌 𐴓𐴝𐴦𐴘𐴠𐴑;⁵𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴀𐴝𐴣𐴀𐴌𐴝𐴌 𐴑𐴡𐴗𐴔𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥, 𐴀𐴝𐴦𐴌 𐴀𐴝𐴣𐴀𐴌𐴝𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝 𐴒𐴝𐴥𐴕 𐴘𐴡𐴥𐴒𐴧𐴗𐴝𐴘𐴠 𐴁𐴠 𐴁𐴝𐴕𐴝𐴘𐴊𐴞𐴘𐴠𐴥.“

⁶𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴎𐴝𐴦𐴃𐴢 𐴊𐴡𐴙𐴅𐴧𐴠, 𐴓𐴠𐴑𐴞𐴕 𐴀𐴞𐴥𐴁𐴝 𐴎𐴠𐴣𐴃𐴧𐴠𐴥 𐴒𐴡𐴥𐴌𐴡𐴌 𐴇𐴝𐴣𐴏𐴝𐴥𐴇𐴝𐴣𐴏𐴞 𐴉𐴡𐴀𐴣𐴙𐴐𐴧𐴠, 𐴐𐴝𐴥𐴀𐴂𐴢 𐴂𐴗𐴝𐴥𐴘𐴠 𐴇𐴡𐴦𐴎𐴧𐴡𐴕 𐴊𐴟𐴏𐴃𐴡𐴥 𐴊𐴞𐴉𐴠𐴍𐴝𐴥𐴘 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴕𐴞𐴎𐴡𐴌𐴠𐴥 𐴀𐴝𐴌 𐴊𐴟𐴑 𐴕𐴡 𐴊𐴞𐴘𐴡𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴀𐴛 𐴀𐴝𐴣𐴀𐴌 𐴒𐴡𐴥𐴌𐴡𐴌 𐴏𐴝𐴓𐴡𐴌 𐴕𐴞𐴏𐴠 𐴀𐴝𐴘𐴁𐴝𐴤𐴌 𐴀𐴝𐴀𐴛 𐴓𐴝𐴦𐴘𐴠𐴑 𐴕𐴡;⁷𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴕𐴞𐴎𐴡𐴌𐴠𐴥 𐴃𐴟𐴣𐴀𐴝𐴥𐴣𐴌 𐴇𐴝𐴣𐴏𐴠 𐴀𐴝𐴘𐴁𐴝𐴤𐴌 𐴓𐴝𐴦𐴘𐴠𐴑 𐴁𐴡𐴓𐴞 𐴕𐴡𐴥 𐴁𐴝𐴥𐴉𐴞. 𐴏𐴞𐴌𐴞𐴥𐴉𐴢 𐴔𐴟𐴑𐴠𐴥 𐴈𐴡𐴀, 𐴃𐴡𐴥𐴘 𐴀𐴝𐴣𐴀𐴌 𐴒𐴟𐴓𐴝𐴔 𐴒𐴡𐴔 𐴀𐴡𐴥𐴘𐴎𐴝𐴘𐴁𐴡𐴘.⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴕𐴞𐴎𐴠 𐴘𐴡𐴥 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴇𐴡𐴥𐴑𐴟𐴔𐴡𐴃𐴡𐴌 𐴃𐴡𐴓𐴠 𐴀𐴝𐴏𐴞𐴤, 𐴀𐴝𐴦𐴌 𐴉𐴡𐴥𐴗𐴏𐴢 𐴀𐴡𐴥𐴑𐴧𐴡𐴓𐴢 𐴀𐴝𐴣𐴀𐴌 𐴕𐴞𐴏𐴠 𐴀𐴝𐴏𐴠𐴤. 𐴀𐴝𐴀𐴛 𐴀𐴠𐴎𐴧𐴡𐴕 𐴀𐴡𐴌𐴠, ’𐴎𐴝𐴦‘ 𐴈𐴡𐴘𐴓𐴠𐴥, 𐴀𐴞𐴥𐴃𐴠 𐴎𐴝𐴦, 𐴀𐴝𐴌 𐴀𐴠𐴎𐴧𐴡𐴕 𐴀𐴡𐴌𐴠, ’𐴀𐴝𐴘‘ 𐴈𐴡𐴘𐴓𐴠𐴥, 𐴀𐴞𐴥𐴃𐴠 𐴀𐴝𐴘𐴧𐴠𐴤, 𐴀𐴝𐴦𐴌 𐴀𐴝𐴣𐴀𐴌 𐴒𐴟𐴓𐴝𐴔 𐴀𐴡𐴌𐴠, ’𐴘𐴝𐴀𐴕 𐴒𐴡𐴌‘ 𐴈𐴡𐴘𐴓𐴠𐴥, 𐴀𐴞𐴥𐴃𐴠 𐴇𐴞𐴥𐴘𐴝𐴕 𐴒𐴡𐴌𐴠𐴥.“

⁹𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴏𐴝𐴤 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴘, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴉𐴞𐴏𐴝𐴥 𐴊𐴡𐴌𐴞 𐴀𐴝𐴐𐴧𐴞𐴥𐴓𐴢 𐴀𐴞𐴥𐴃𐴝𐴌𐴝𐴌 𐴇𐴞𐴥𐴑𐴧𐴝 𐴉𐴞𐴥𐴌𐴞 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴀𐴝𐴀𐴛 𐴀𐴠𐴃𐴧𐴡𐴥𐴌 𐴋𐴡𐴣𐴀𐴌 𐴀𐴞𐴔𐴝𐴕 𐴀𐴞𐴏𐴌𐴝𐴥𐴙𐴓𐴞 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴀𐴟𐴥𐴊𐴧𐴗𐴝 𐴓𐴡𐴦𐴃𐴢 𐴕𐴡𐴥 𐴉𐴝𐴘.“¹⁰𐴎𐴠𐴃𐴝𐴌𐴝𐴤𐴌𐴠 𐴊𐴞𐴉𐴠𐴍𐴝𐴥 𐴒𐴞𐴥𐴀𐴓𐴢 𐴀𐴞𐴥𐴃𐴝𐴌𐴝 𐴒𐴡𐴥𐴌𐴡𐴃𐴢 𐴖𐴝𐴦𐴉𐴠𐴏𐴢 𐴀𐴝𐴀𐴘𐴢, 𐴒𐴟𐴓𐴝𐴔𐴧𐴗𐴝𐴌𐴠 𐴒𐴡𐴔 𐴀𐴡𐴥𐴘𐴧𐴝 𐴓𐴡𐴦𐴃𐴢 𐴉𐴝𐴘𐴧𐴠𐴥.

𐴀𐴠𐴑 𐴌𐴝𐴌𐴞𐴌 𐴉𐴟𐴖𐴝𐴌𐴠 𐴎𐴞𐴕𐴊𐴝 𐴒𐴡𐴙𐴅𐴧𐴠𐴥

¹¹𐴁𐴝𐴦𐴊𐴠 𐴀𐴠𐴀𐴕 𐴀𐴡𐴥𐴘𐴧𐴠, 𐴘𐴝𐴥𐴌𐴁𐴝𐴦𐴊𐴠 𐴀𐴞𐴏𐴝𐴤 𐴕𐴝𐴙𐴕 𐴕𐴝𐴔𐴡𐴌 𐴀𐴠𐴑𐴧𐴝𐴥𐴕 𐴉𐴝𐴌𐴝𐴃𐴢 𐴒𐴞𐴦𐴘𐴠𐴥, 𐴉𐴟𐴥𐴖𐴝𐴣𐴃𐴞 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴢 𐴀𐴠𐴊𐴧𐴠 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥 𐴒𐴞𐴀𐴓𐴢.¹²𐴀𐴞𐴥𐴁𐴝 𐴐𐴡𐴥𐴀𐴌𐴡𐴌 𐴒𐴠𐴘𐴍𐴡𐴌 𐴋𐴝𐴥𐴑𐴠 𐴉𐴡𐴀𐴣𐴙𐴐𐴧𐴠 𐴊𐴠 𐴀𐴡𐴑𐴃𐴡𐴥𐴃𐴢, 𐴔𐴝𐴙𐴕𐴐𐴠𐴥 𐴀𐴠𐴒𐴧𐴗𐴝𐴤 𐴔𐴟𐴌𐴟𐴊𐴝 𐴁𐴝𐴀𐴌𐴠 𐴓𐴡𐴘𐴎𐴝𐴌, 𐴀𐴞𐴥𐴃𐴠 𐴀𐴡𐴥𐴙𐴓𐴊𐴠 𐴀𐴞𐴥𐴃𐴝𐴌 𐴔𐴝𐴦𐴌 𐴓𐴠𐴇𐴝𐴥𐴌 𐴀𐴠𐴑 𐴉𐴟𐴖𐴝, 𐴀𐴝𐴦𐴌 𐴔𐴝𐴦 𐴖𐴝 𐴀𐴝𐴐𐴧𐴞𐴥𐴓𐴢 𐴌𐴝𐴌𐴞. 𐴐𐴡𐴥𐴀𐴌𐴡𐴃𐴧𐴟 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴇𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢.¹³𐴔𐴝𐴓𐴞𐴑𐴡𐴃𐴧𐴟 𐴇𐴞𐴥𐴁𐴝𐴌𐴠 𐴊𐴠𐴑𐴞𐴥, 𐴇𐴞𐴥𐴁𐴝𐴓𐴧𐴝 𐴉𐴠𐴄𐴉𐴟𐴙𐴅𐴧𐴠𐴥, 𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴕𐴡 𐴈𐴝𐴣𐴊𐴞𐴘𐴡𐴥.“

¹⁴𐴁𐴝𐴦𐴊𐴠 𐴀𐴞𐴥𐴁𐴝 𐴋𐴝𐴥𐴑𐴠 𐴀𐴝𐴀𐴘𐴢 𐴃𐴝𐴁𐴟𐴃𐴧𐴗𐴝 𐴏𐴟𐴥𐴘𐴧𐴠, 𐴀𐴝𐴦𐴌 𐴔𐴟𐴌𐴟𐴊𐴝 𐴁𐴡𐴀𐴘𐴢 𐴓𐴡𐴘𐴎𐴝𐴌 𐴊𐴠 𐴀𐴞𐴥𐴃𐴝𐴌𐴝 𐴃𐴞𐴥𐴘𐴝𐴘𐴒𐴞𐴘𐴡𐴘. 𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠 ”𐴀𐴡𐴥 𐴕𐴡𐴅𐴟𐴖𐴝𐴕, 𐴀𐴝𐴀𐴛 𐴃𐴡𐴌𐴠𐴥 𐴈𐴡𐴀𐴙𐴌, 𐴀𐴟𐴄𐴢!“¹⁵𐴇𐴠𐴥𐴃𐴟𐴕𐴡𐴃𐴢 𐴔𐴟𐴌𐴟𐴊𐴝 𐴖𐴝 𐴀𐴟𐴍𐴞𐴤 𐴁𐴡𐴙𐴐𐴧𐴠𐴥 𐴀𐴝𐴦𐴌 𐴈𐴡𐴃𐴝𐴤 𐴈𐴡𐴖𐴝𐴤𐴃𐴢 𐴊𐴡𐴙𐴅𐴧𐴠. 𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴠 𐴀𐴞𐴥𐴃𐴝𐴌 𐴔𐴝𐴦𐴌 𐴇𐴝𐴣𐴏𐴠 𐴖𐴝𐴦𐴉𐴠𐴏𐴢 𐴊𐴞𐴦𐴉𐴠𐴥𐴓𐴝𐴘𐴧𐴠.

¹⁶𐴇𐴞𐴥𐴘𐴝𐴕𐴠 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴋𐴡𐴦𐴌 𐴒𐴡𐴥𐴓𐴞𐴒𐴞𐴘𐴡𐴘, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, 𐴀𐴠𐴀𐴕 𐴈𐴡𐴀𐴘𐴢, ”𐴀𐴝𐴣𐴀𐴌𐴝𐴌 𐴁𐴟𐴥𐴃𐴡𐴌𐴠 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴕𐴡𐴁𐴞 𐴀𐴟𐴙𐴄𐴧𐴠𐴥. 𐴀𐴝𐴓𐴧𐴝𐴘𐴠 𐴕𐴞𐴎𐴡𐴌 𐴁𐴡𐴕𐴊𐴝 𐴀𐴡𐴥𐴑𐴧𐴡𐴓𐴡𐴌𐴠 𐴔𐴡𐴊𐴡𐴃𐴢 𐴒𐴡𐴙𐴃𐴧𐴡𐴥 𐴀𐴝𐴙𐴐𐴧𐴠𐴥.“¹⁷𐴀𐴞𐴥𐴁𐴝𐴌 𐴇𐴠𐴥 𐴈𐴡𐴥𐴁𐴡𐴌 𐴇𐴞𐴥𐴘𐴝𐴕 𐴘𐴡𐴇𐴟𐴥𐴊𐴞𐴘𐴝 𐴀𐴝𐴒𐴝𐴒𐴟𐴌𐴝𐴃𐴢 𐴀𐴠𐴊𐴧𐴠 𐴏𐴝𐴘𐴌𐴡𐴥 𐴋𐴝𐴥𐴑𐴡𐴌 𐴀𐴠𐴓𐴝𐴑𐴝 𐴁𐴠𐴒𐴧𐴟𐴥𐴕𐴡𐴃𐴢 𐴉𐴡𐴥𐴓𐴞𐴒𐴞𐴘𐴡𐴘.

𐴘𐴝𐴇𐴝𐴥𐴘𐴝𐴌 𐴃𐴡𐴌𐴉𐴡𐴥𐴃𐴧𐴟 𐴈𐴡𐴥𐴁𐴡𐴌𐴒𐴗𐴝 𐴀𐴡𐴥𐴑𐴧𐴡𐴓𐴢

¹⁸𐴘𐴝𐴇𐴝𐴥𐴘𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴘𐴡𐴥𐴒𐴧𐴗𐴝𐴌𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕𐴡𐴌 𐴁𐴝𐴦𐴁𐴟𐴃𐴠 𐴎𐴝𐴕𐴝𐴘𐴧𐴠𐴥.¹⁹𐴃𐴡𐴥𐴘 𐴘𐴝𐴇𐴝𐴥𐴘𐴝𐴘𐴠 𐴕𐴞𐴎𐴡𐴌 𐴊𐴟𐴖𐴝𐴥 𐴀𐴟𐴔𐴧𐴡𐴃𐴡𐴌𐴠 𐴔𐴝𐴃𐴝𐴘, 𐴀𐴞𐴥𐴃𐴝𐴌𐴝𐴌𐴠 𐴔𐴝𐴓𐴞𐴑𐴡𐴌 𐴇𐴝𐴣𐴏𐴠 𐴘𐴝𐴀𐴕 𐴉𐴟𐴏𐴝𐴥𐴌 𐴒𐴡𐴙𐴃𐴧𐴡𐴥 𐴊𐴞𐴉𐴠𐴍𐴝𐴥𐴘𐴧𐴠, ”𐴃𐴟𐴀𐴛 𐴀𐴝𐴘𐴁𐴝𐴤𐴌 𐴈𐴡𐴃𐴝𐴤 𐴀𐴝𐴏𐴠𐴤 𐴊𐴠 𐴀𐴞𐴥𐴁𐴝 𐴕𐴠𐴥, 𐴀𐴝𐴦𐴌 𐴕𐴝𐴥𐴑𐴞 𐴀𐴝𐴣𐴀𐴌𐴝 𐴀𐴝𐴌 𐴀𐴠𐴎𐴧𐴡𐴕𐴡𐴓𐴧𐴝 𐴀𐴠𐴕𐴃𐴠𐴎𐴝𐴌 𐴒𐴡𐴙𐴃𐴧𐴝𐴥𐴔؟“

²⁰𐴎𐴠𐴣𐴃𐴧𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴉𐴡𐴀𐴣𐴙𐴐𐴧𐴠, 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴌𐴠 𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝𐴘𐴠 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠, 𐴃𐴟𐴣𐴀𐴝𐴥𐴣𐴃𐴧𐴟 𐴘𐴝𐴀𐴕 𐴉𐴟𐴏𐴝𐴥𐴌 𐴒𐴡𐴙𐴃𐴧𐴡𐴥, ’𐴃𐴟𐴀𐴛 𐴀𐴝𐴘𐴁𐴝𐴤𐴌 𐴈𐴡𐴃𐴝𐴤 𐴀𐴝𐴏𐴠𐴤 𐴊𐴠 𐴀𐴞𐴥𐴁𐴝 𐴕𐴠𐴥, 𐴀𐴝𐴦𐴌 𐴕𐴝𐴥𐴑𐴞 𐴀𐴝𐴣𐴀𐴌𐴝 𐴀𐴝𐴌 𐴀𐴠𐴎𐴧𐴡𐴕𐴡𐴓𐴧𐴝 𐴀𐴠𐴕𐴃𐴠𐴎𐴝𐴌 𐴒𐴡𐴙𐴃𐴧𐴝𐴥𐴔؟‘ “

²¹𐴇𐴠𐴥 𐴀𐴡𐴑𐴃𐴡𐴥𐴃𐴢 𐴀𐴞𐴥𐴁𐴝𐴘𐴠 𐴁𐴡𐴀𐴗𐴃𐴢 𐴎𐴡𐴕𐴡𐴌𐴠 𐴁𐴞𐴘𐴝𐴌𐴝𐴔, 𐴀𐴝𐴉𐴡𐴃𐴢, 𐴀𐴠𐴊𐴧𐴠 𐴈𐴡𐴥𐴌𐴝𐴉𐴢 𐴅𐴞𐴕𐴡𐴃𐴧𐴟 𐴁𐴝𐴏𐴝𐴘𐴧𐴠𐴥; 𐴀𐴞𐴥𐴁𐴝𐴘𐴠 𐴁𐴡𐴀𐴗𐴃𐴢 𐴎𐴡𐴕 𐴀𐴝𐴣𐴊𐴝𐴤𐴌𐴠 𐴘𐴡𐴥 𐴊𐴠𐴑𐴞𐴥𐴁𐴝𐴌 𐴃𐴡𐴖𐴉𐴞𐴥𐴑 𐴊𐴞𐴦𐴘𐴠𐴥.²²𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴎𐴡𐴦, 𐴃𐴟𐴣𐴀𐴝𐴥𐴌𐴝 𐴎𐴞𐴀𐴕 𐴊𐴠𐴙𐴑𐴧𐴡𐴥 𐴀𐴠𐴊𐴧𐴠 𐴉𐴟𐴥𐴙𐴕𐴧𐴡 𐴇𐴞𐴥𐴀𐴕 𐴘𐴝𐴇𐴝𐴥𐴘𐴝𐴌𐴠 𐴎𐴝𐴕𐴡𐴒𐴡𐴥𐴘, 𐴑𐴞 𐴈𐴡𐴘𐴓𐴠𐴥, 𐴀𐴝𐴣𐴊𐴝𐴤𐴘𐴠 𐴊𐴠𐴑𐴠𐴥𐴌, 𐴓𐴠𐴚𐴠 𐴀𐴝𐴥𐴣𐴍𐴠𐴌, 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴌, 𐴕𐴝𐴥𐴉𐴝𐴚𐴠 𐴉𐴟𐴥𐴕𐴠𐴌, 𐴔𐴟𐴌𐴟𐴊𐴝 𐴎𐴞𐴕𐴊𐴝 𐴀𐴡𐴥𐴌, 𐴀𐴠𐴊𐴧𐴠 𐴒𐴡𐴌𐴞𐴉𐴢 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴎𐴝𐴌.²³𐴔𐴟𐴁𐴝𐴌𐴠𐴑 𐴀𐴟𐴁𐴝𐴤, 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴀𐴝𐴕𐴊𐴝𐴐𐴝𐴤 𐴕𐴡 𐴒𐴡𐴌𐴠𐴥.“

²⁴𐴎𐴠𐴣𐴃𐴧𐴠𐴥 𐴘𐴝𐴇𐴝𐴥𐴘𐴝𐴌 𐴈𐴡𐴥𐴁𐴡𐴌𐴒𐴗𐴝 𐴒𐴟𐴥𐴕 𐴁𐴝𐴐𐴝𐴥 𐴓𐴡𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴔𐴝𐴕𐴟𐴥𐴙𐴐𐴧𐴟𐴥𐴕𐴡𐴌𐴠 𐴘𐴝𐴇𐴝𐴥𐴘𐴝𐴌 𐴁𐴝𐴦𐴁𐴟𐴃𐴠 𐴈𐴡𐴖𐴝𐴤𐴃𐴢 𐴊𐴡𐴙𐴅𐴧𐴠 𐴊𐴠, ”𐴃𐴟𐴣𐴀𐴝𐴥𐴌𐴝 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴑𐴞𐴦 𐴏𐴝𐴘𐴃𐴡𐴥 𐴒𐴞𐴀𐴓𐴝 𐴊𐴠𐴥؟ 𐴁𐴡𐴘𐴧𐴝𐴌𐴠 𐴓𐴡𐴌𐴠 𐴊𐴠 𐴇𐴡𐴥𐴙𐴌 𐴕𐴠𐴥؟²⁵𐴀𐴝𐴌𐴕𐴡𐴥𐴘𐴓𐴠 𐴃𐴟𐴣𐴀𐴝𐴥𐴌𐴝 𐴑𐴞𐴦 𐴏𐴝𐴘𐴃𐴡𐴥 𐴒𐴞𐴀𐴓𐴝 𐴊𐴠𐴥؟ 𐴁𐴝𐴌𐴞𐴥𐴑 𐴇𐴡𐴦𐴌 𐴉𐴞𐴕𐴊𐴝𐴤 𐴔𐴝𐴕𐴟𐴥𐴙𐴐𐴢 𐴕𐴠𐴥؟ 𐴎𐴠𐴃𐴝𐴌𐴝𐴤 𐴊𐴝𐴔𐴞-𐴊𐴝𐴔𐴞 𐴇𐴡𐴦𐴌 𐴉𐴞𐴣𐴊𐴞𐴥 𐴌𐴡𐴚𐴎𐴟𐴙𐴚𐴒𐴝 𐴒𐴡𐴌𐴞𐴥 𐴏𐴡𐴓𐴠, 𐴀𐴞𐴥𐴃𐴝𐴌𐴝 𐴃𐴡 𐴌𐴝𐴎𐴔𐴡𐴇𐴡𐴥𐴓𐴡𐴃𐴢 𐴀𐴠𐴥𐴕𐴝.²⁶𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝 𐴑𐴞𐴦 𐴏𐴝𐴘𐴃𐴡𐴥 𐴒𐴞𐴀𐴓𐴝 𐴊𐴠𐴥؟ 𐴇𐴡𐴕𐴡𐴤 𐴕𐴡𐴁𐴞 𐴕𐴠𐴥؟ 𐴀𐴡𐴥𐴘, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴕𐴡𐴁𐴞𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴀𐴠𐴥𐴎𐴧𐴡𐴕 𐴀𐴡𐴌𐴠.²⁷𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴀𐴟𐴁𐴝𐴤, 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴂𐴝𐴑-𐴑𐴝𐴓𐴝𐴔𐴡𐴃𐴢 𐴀𐴠𐴕𐴊𐴞𐴓𐴧𐴝 𐴀𐴝𐴏𐴠𐴤,’𐴏𐴡𐴀, 𐴀𐴝𐴀𐴛 𐴀𐴝𐴣𐴀𐴌 𐴈𐴡𐴥𐴁𐴡𐴌𐴒𐴗𐴝𐴌𐴠 𐴃𐴟𐴣𐴀𐴝𐴥𐴣𐴌 𐴀𐴝𐴒𐴠 𐴊𐴞𐴉𐴠𐴍𐴝𐴥𐴙𐴌,𐴎𐴞𐴁𐴝𐴤𐴘𐴠 𐴃𐴟𐴣𐴀𐴝𐴥𐴣𐴌 𐴀𐴝𐴒𐴠 𐴃𐴟𐴣𐴀𐴝𐴥𐴣𐴌 𐴉𐴡𐴣𐴃𐴢 𐴃𐴡𐴘𐴧𐴝𐴌 𐴒𐴡𐴌𐴞𐴥𐴁𐴡.‘

²⁸𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴔𐴝𐴘𐴝𐴉𐴟𐴀𐴝𐴙𐴕 𐴊𐴡𐴃𐴧𐴟 𐴎𐴡𐴌𐴔𐴡 𐴀𐴡𐴥𐴘𐴧𐴠 𐴊𐴠 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴇𐴡𐴕𐴡𐴤𐴑𐴞𐴘𐴠 𐴕𐴝𐴥𐴘; 𐴔𐴡𐴕𐴃𐴡𐴌 𐴃𐴡𐴀 𐴀𐴟𐴥𐴊𐴧𐴗𐴝 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴃𐴢 𐴎𐴠𐴦𐴕𐴞𐴑𐴞 𐴀𐴠𐴁𐴧𐴠 𐴐𐴡𐴥𐴣𐴍𐴡, 𐴀𐴞𐴥𐴃𐴠 𐴘𐴡𐴥𐴒𐴧𐴗𐴝𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌.“

²⁹𐴎𐴠𐴣𐴃𐴧𐴠𐴥 𐴃𐴝𐴔𐴝𐴥𐴔 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴡𐴥𐴑𐴧𐴡𐴓𐴠 𐴇𐴞𐴥𐴘𐴝𐴕 𐴉𐴟𐴥𐴙𐴕𐴧𐴠, 𐴀𐴞𐴥𐴃𐴝𐴌𐴝 𐴘𐴝𐴇𐴝𐴥𐴘𐴝𐴌 𐴇𐴝𐴣𐴏𐴡𐴥𐴃𐴧𐴟 𐴁𐴝𐴥𐴂𐴄𐴞𐴏𐴔𐴝 𐴓𐴡𐴘, 𐴀𐴝𐴓𐴧𐴝 𐴀𐴞𐴕𐴏𐴝𐴥𐴉𐴖𐴝𐴓𐴝 𐴊𐴠 𐴔𐴝𐴕𐴞𐴓𐴡𐴘𐴧𐴠𐴥.³⁰𐴔𐴡𐴕𐴃𐴡𐴌 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴐𐴡𐴥𐴌𐴞𐴘𐴡𐴃𐴡𐴌 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴘𐴝𐴇𐴝𐴥𐴘𐴝𐴌 𐴇𐴝𐴣𐴏𐴡𐴥𐴃𐴧𐴟 𐴁𐴝𐴥𐴂𐴄𐴞𐴏𐴔𐴝 𐴕𐴡 𐴓𐴡𐴘, 𐴀𐴝𐴓𐴧𐴝𐴃𐴧𐴟 𐴀𐴞𐴥𐴃𐴝𐴌𐴝𐴓𐴧𐴝 𐴀𐴝𐴐𐴧𐴞𐴥𐴓𐴢 𐴊𐴠 𐴔𐴡𐴑𐴏𐴡𐴥𐴃𐴡𐴌𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥𐴊𐴞𐴘𐴠.

³¹𐴀𐴞𐴏𐴝𐴤𐴘𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴀𐴝𐴀𐴛 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴙𐴕𐴐𐴡𐴥𐴌𐴠 𐴑𐴞𐴦 𐴓𐴡𐴘 𐴉𐴟𐴥𐴖𐴝𐴕 𐴒𐴡𐴙𐴃𐴧𐴝𐴥𐴔؟ 𐴀𐴞𐴥𐴃𐴝𐴌𐴝 𐴑𐴞𐴘𐴡𐴥𐴌 𐴋𐴡𐴥𐴙𐴓𐴧𐴝؟³²𐴀𐴞𐴥𐴃𐴝𐴌𐴝 𐴀𐴟𐴕𐴊𐴞𐴓𐴧𐴝 𐴉𐴟𐴀𐴝𐴙𐴕 𐴊𐴡𐴌 𐴋𐴡𐴥𐴙𐴓𐴧𐴝, 𐴎𐴠𐴃𐴝𐴌𐴝𐴤 𐴁𐴝𐴎𐴝𐴌𐴡𐴃𐴢 𐴁𐴡𐴀𐴘𐴢 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴔𐴝𐴃𐴝𐴘 𐴈𐴡𐴀 𐴊𐴠,’𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴣𐴀𐴌𐴝 𐴁𐴝𐴐𐴞𐴤 𐴁𐴝𐴎𐴝𐴘𐴧𐴞𐴥,𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴕𐴡𐴥 𐴕𐴝𐴏𐴡;𐴃𐴟𐴣𐴀𐴝𐴥𐴌𐴝𐴓𐴧𐴝 𐴀𐴝𐴣𐴀𐴌𐴝 𐴁𐴞𐴓𐴝𐴑𐴡𐴌 𐴎𐴝𐴌𐴞 𐴒𐴝𐴘𐴧𐴞𐴥,𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴕𐴡𐴥 𐴈𐴝𐴣𐴊𐴡.‘

³³𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴁𐴝𐴥𐴂𐴄𐴞𐴏𐴔𐴝𐴊𐴡𐴘𐴝 𐴘𐴝𐴇𐴝𐴥𐴘𐴝 𐴀𐴝𐴀𐴘𐴢 𐴎𐴠𐴃𐴧𐴡𐴥𐴃𐴢 𐴇𐴡𐴕𐴡𐴤 𐴌𐴟𐴄𐴞 𐴀𐴠𐴊𐴧𐴠 𐴀𐴝𐴚𐴒𐴟𐴌𐴡𐴌 𐴌𐴡𐴐𐴢 𐴕𐴝𐴥 𐴈𐴝𐴥𐴀, 𐴃𐴟𐴣𐴀𐴝𐴥𐴌𐴝 𐴈𐴡𐴀 𐴊𐴠, ’𐴀𐴞𐴥𐴁𐴝𐴌𐴠 𐴁𐴟𐴥𐴃𐴠 𐴉𐴝𐴘𐴧𐴠𐴥.‘³⁴𐴀𐴝𐴦𐴌 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴝𐴀𐴘𐴢 𐴎𐴠𐴃𐴧𐴡𐴥𐴃𐴢 𐴈𐴝𐴥𐴀𐴉𐴞𐴘𐴝 𐴒𐴡𐴌𐴠𐴥𐴌, 𐴃𐴟𐴣𐴀𐴝𐴥𐴌𐴝 𐴈𐴡𐴀𐴌 𐴊𐴠, ’𐴏𐴡𐴀, 𐴀𐴠𐴎𐴧𐴡𐴕 𐴉𐴞𐴃𐴝𐴥𐴐𐴢 𐴀𐴠𐴊𐴧𐴠 𐴐𐴡𐴥𐴌𐴝𐴁𐴑𐴟𐴌, 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴌 𐴊𐴟𐴏𐴃𐴡𐴥.‘³⁵𐴓𐴠𐴑𐴞𐴕 𐴒𐴞𐴘𐴝𐴕 𐴏𐴡𐴥𐴘𐴧𐴞 𐴊𐴠 𐴇𐴞𐴥𐴘𐴝𐴕 𐴒𐴞𐴘𐴝𐴕𐴠 𐴏𐴡𐴓𐴡𐴘𐴝 𐴁𐴠𐴒𐴧𐴟𐴥𐴕𐴠 𐴏𐴝𐴥𐴁𐴟𐴃𐴢 𐴒𐴡𐴙𐴅𐴧𐴠𐴥.“

𐴀𐴠𐴑𐴒𐴗𐴝𐴥 𐴒𐴟𐴕𐴝𐴤𐴒𐴝𐴌 𐴔𐴝𐴘𐴝𐴉𐴟𐴖𐴝𐴌𐴠 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴠

³⁶𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴠𐴎𐴧𐴡𐴕𐴠 𐴀𐴞𐴏𐴝𐴤𐴌𐴠 𐴕𐴞𐴎𐴡𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴊𐴝𐴖𐴡𐴃𐴢 𐴊𐴞𐴘𐴠𐴥, 𐴃𐴡𐴥𐴘 𐴀𐴞𐴥𐴁𐴝 𐴇𐴠𐴥 𐴉𐴠𐴥𐴌𐴡𐴐𐴞 𐴖𐴝𐴌 𐴒𐴡𐴥𐴌𐴡𐴃𐴢 𐴎𐴝𐴘 𐴈𐴝𐴥𐴘𐴃𐴡 𐴁𐴡𐴙𐴐𐴧𐴠𐴥.³⁷𐴇𐴠𐴥 𐴐𐴡𐴥𐴀𐴌 𐴒𐴝𐴥𐴕𐴡𐴃𐴢 𐴀𐴠𐴒𐴧𐴗𐴝𐴤 𐴈𐴡𐴥𐴌𐴝𐴉𐴢 𐴔𐴝𐴘𐴝𐴉𐴟𐴖𐴝 𐴀𐴝𐴐𐴧𐴞𐴥𐴓𐴢; 𐴀𐴞𐴏𐴝𐴤 𐴉𐴠𐴥𐴌𐴡𐴐𐴞 𐴖𐴝𐴌 𐴒𐴡𐴥𐴌𐴡𐴃𐴢 𐴈𐴝𐴥𐴕𐴝 𐴈𐴝𐴥𐴀𐴌 𐴊𐴠 𐴇𐴞𐴥𐴘𐴝𐴕 𐴇𐴞𐴥𐴁𐴝𐴘𐴠 𐴎𐴝𐴕𐴞 𐴉𐴝𐴙𐴅𐴧𐴠𐴥 𐴌𐴝𐴥𐴌, 𐴇𐴞𐴥𐴁𐴝𐴘𐴠 𐴉𐴟𐴥𐴖𐴝𐴣𐴃𐴞 𐴉𐴝𐴃𐴧𐴡𐴥𐴌𐴡𐴌 𐴇𐴝𐴥𐴣𐴌𐴞𐴃𐴢 𐴒𐴡𐴥𐴌𐴞 𐴀𐴝𐴣𐴃𐴡𐴌 𐴀𐴝𐴙𐴕𐴧𐴠𐴤,³⁸𐴀𐴝𐴦𐴌 𐴀𐴞𐴥𐴁𐴝𐴌 𐴉𐴞𐴏𐴡𐴃𐴧𐴟 𐴄𐴠𐴥𐴚𐴡𐴌 𐴋𐴝𐴥𐴑𐴠 𐴃𐴞𐴥𐴘𐴝𐴘, 𐴈𐴝𐴣𐴊𐴞-𐴈𐴝𐴣𐴊𐴞 𐴀𐴞𐴥𐴁𐴝𐴌 𐴄𐴠𐴥𐴚𐴡𐴌𐴠 𐴕𐴞𐴎𐴡𐴌 𐴏𐴟𐴑𐴡𐴌 𐴉𐴝𐴕𐴞𐴥 𐴓𐴡𐴥𐴘 𐴁𐴞𐴥𐴎𐴝𐴃𐴢 𐴊𐴡𐴙𐴅𐴧𐴠, 𐴁𐴝𐴦𐴊𐴠 𐴕𐴞𐴎𐴡𐴌 𐴔𐴝𐴃𐴝𐴥𐴌 𐴏𐴟𐴓𐴢 𐴓𐴡𐴘 𐴇𐴞𐴥𐴀𐴕 𐴉𐴟𐴣𐴏𐴞𐴥𐴊𐴞𐴘𐴠 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴄𐴠𐴥𐴚𐴡𐴃𐴢 𐴀𐴝𐴂𐴧𐴝𐴤 𐴊𐴞𐴥 𐴀𐴝𐴣𐴃𐴡𐴌 𐴒𐴟𐴥𐴕 𐴋𐴝𐴥𐴓𐴞𐴊𐴞𐴘𐴠.

³⁹𐴀𐴞𐴥𐴁𐴝𐴌𐴠 𐴊𐴝𐴖𐴡𐴃𐴢 𐴊𐴞𐴘𐴠𐴥 𐴊𐴠 𐴉𐴠𐴥𐴌𐴡𐴐𐴞 𐴖𐴝𐴘𐴠 𐴇𐴞𐴥𐴘𐴝𐴕 𐴊𐴠𐴙𐴑𐴧𐴠𐴥 𐴌𐴝𐴥𐴌, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴕𐴡𐴁𐴞 𐴀𐴡𐴥𐴘𐴃𐴡, 𐴃𐴡𐴥𐴀𐴘𐴓𐴠 𐴃𐴡 𐴀𐴞𐴁𐴝𐴤𐴘𐴠 𐴎𐴝𐴙𐴕𐴃𐴡, 𐴕𐴞𐴎𐴡𐴌𐴠𐴥 𐴇𐴡𐴕𐴠 𐴀𐴠𐴊𐴧𐴠 𐴇𐴡𐴕𐴊𐴞𐴓𐴧𐴝 𐴔𐴝𐴘𐴝𐴉𐴟𐴖𐴝𐴘𐴠 𐴊𐴡𐴥𐴌𐴠𐴌 𐴊𐴠; 𐴔𐴝𐴘𐴝𐴉𐴟𐴖𐴝 𐴖𐴝 𐴃𐴡 𐴈𐴡𐴥𐴌𐴝𐴉𐴢.“

⁴⁰𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴏𐴝𐴥𐴘𐴔𐴡𐴕, 𐴀𐴝𐴣𐴀𐴃𐴧𐴟 𐴃𐴟𐴣𐴀𐴝𐴥𐴣𐴌𐴠 𐴑𐴠𐴏𐴧𐴟𐴥 𐴈𐴡𐴘𐴁𐴝𐴥𐴌 𐴀𐴝𐴏𐴠𐴤.“
𐴏𐴝𐴥𐴘𐴔𐴡𐴕𐴠 𐴈𐴡𐴀𐴌 𐴊𐴠, ” 𐴀𐴟𐴏𐴃𐴝𐴃𐴢, 𐴈𐴡𐴀𐴘𐴢 𐴉𐴝𐴌𐴞𐴁𐴝𐴥.“

⁴¹”𐴀𐴠𐴎𐴧𐴡𐴕 𐴇𐴡𐴎𐴧𐴡-𐴊𐴡𐴦𐴘𐴝𐴃𐴧𐴟 𐴊𐴟𐴘 𐴎𐴡𐴕 𐴇𐴡𐴎𐴧𐴡𐴊𐴝𐴥𐴌 𐴀𐴝𐴏𐴠𐴤: 𐴀𐴠𐴑𐴎𐴡𐴕𐴠 𐴓𐴡𐴘𐴧𐴠𐴥 𐴉𐴝𐴣𐴏𐴢 𐴐𐴡𐴥𐴃𐴢 𐴊𐴞𐴕𐴝𐴥𐴌, 𐴀𐴝𐴌 𐴀𐴠𐴑𐴎𐴡𐴕𐴠 𐴓𐴡𐴘𐴧𐴠𐴥 𐴉𐴡𐴕𐴎𐴝𐴙𐴐𐴢 𐴊𐴞𐴕𐴝𐴥𐴌.⁴²𐴀𐴞𐴥𐴃𐴝𐴌𐴝 𐴎𐴠𐴃𐴧𐴡𐴥𐴃𐴢 𐴇𐴞𐴥𐴀𐴕 𐴉𐴟𐴥𐴣𐴎𐴞 𐴕𐴡 𐴉𐴝𐴌𐴠𐴌, 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝 𐴊𐴟𐴕𐴞𐴥 𐴎𐴡𐴕𐴡𐴌 𐴇𐴡𐴎𐴧𐴡 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴠. 𐴃𐴡𐴥𐴀𐴘𐴓𐴠 𐴀𐴞𐴥𐴃𐴝𐴌𐴝𐴃𐴧𐴟 𐴘𐴡𐴥𐴒𐴧𐴗𐴝𐴌𐴠 𐴇𐴡𐴕𐴠 𐴁𐴞𐴐𐴞𐴤 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴁𐴡؟“

⁴³𐴏𐴝𐴥𐴘𐴔𐴡𐴕𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌 𐴑𐴞𐴥𐴘𐴝𐴓𐴢 𐴔𐴡𐴎𐴞𐴕، 𐴎𐴝𐴌 𐴕𐴞𐴑𐴞 𐴁𐴞𐴐𐴞𐴤 𐴇𐴡𐴎𐴧𐴡 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠 𐴀𐴞𐴥𐴃𐴠.“
𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠 ”𐴃𐴟𐴀𐴛 𐴏𐴡𐴥𐴘𐴧𐴞 𐴑𐴞𐴥𐴘𐴝𐴓𐴢 𐴒𐴡𐴙𐴅𐴧𐴡𐴥.“

⁴⁴𐴁𐴝𐴦𐴊𐴠 𐴔𐴝𐴘𐴝𐴉𐴟𐴖𐴝 𐴖𐴝𐴌 𐴇𐴞𐴥𐴑𐴧𐴝 𐴉𐴞𐴥𐴌𐴞 𐴀𐴞𐴥𐴁𐴝𐴘𐴠 𐴏𐴝𐴥𐴘𐴔𐴡𐴕𐴡𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴀𐴠 𐴔𐴝𐴘𐴝𐴉𐴟𐴖𐴝 𐴖𐴝𐴌𐴠 𐴊𐴠𐴑𐴡𐴥𐴌 𐴕𐴠𐴥؟ 𐴀𐴝𐴀𐴛 𐴃𐴡 𐴃𐴟𐴣𐴀𐴝𐴥𐴣𐴌 𐴒𐴡𐴥𐴌𐴡𐴃𐴢 𐴀𐴝𐴘𐴓𐴝𐴤𐴔; 𐴃𐴟𐴀𐴛 𐴀𐴝𐴣𐴀𐴌𐴠𐴥 𐴉𐴡𐴦 𐴊𐴟𐴥𐴘 𐴁𐴡𐴓𐴧𐴝 𐴉𐴝𐴕𐴞𐴥 𐴕𐴡𐴥 𐴊𐴡𐴦, 𐴔𐴡𐴕𐴃𐴡𐴌 𐴀𐴞𐴁𐴝𐴤𐴘𐴠 𐴕𐴞𐴎𐴡𐴌 𐴏𐴟𐴑𐴡𐴌 𐴉𐴝𐴕𐴞𐴥 𐴓𐴡𐴥𐴘 𐴀𐴝𐴣𐴀𐴌 𐴉𐴡𐴦 𐴁𐴞𐴥𐴎𐴝𐴘 𐴕𐴞𐴎𐴡𐴌 𐴏𐴟𐴓𐴢 𐴓𐴡𐴘 𐴉𐴟𐴣𐴏𐴞𐴥𐴊𐴞𐴘𐴠.⁴⁵𐴃𐴟𐴀𐴛 𐴃𐴡 𐴀𐴝𐴣𐴀𐴌𐴠𐴥 𐴀𐴝𐴂𐴧𐴝𐴤 𐴕𐴡𐴥 𐴊𐴡, 𐴔𐴡𐴕𐴃𐴡𐴌 𐴀𐴝𐴀𐴛 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴧𐴞 𐴓𐴡𐴥𐴃𐴞 𐴀𐴞𐴁𐴝𐴤𐴘𐴠 𐴀𐴝𐴣𐴀𐴌 𐴉𐴡𐴦𐴃𐴢 𐴀𐴝𐴂𐴧𐴝𐴤 𐴊𐴞𐴥𐴘𐴝 𐴁𐴡𐴕 𐴕𐴡𐴥 𐴒𐴡𐴌𐴠𐴥.⁴⁶𐴃𐴟𐴀𐴛 𐴀𐴝𐴣𐴀𐴌 𐴔𐴝𐴃𐴝𐴥𐴃𐴢 𐴃𐴠𐴓𐴢 𐴕𐴡𐴥 𐴊𐴡, 𐴔𐴡𐴕𐴃𐴡𐴌 𐴀𐴞𐴁𐴝𐴤𐴘𐴠 𐴀𐴝𐴣𐴀𐴌 𐴉𐴡𐴦𐴃𐴢 𐴀𐴝𐴣𐴃𐴡𐴌 𐴋𐴝𐴥𐴓𐴞𐴊𐴞𐴘𐴠.⁴⁷𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴈𐴡𐴀𐴙𐴌, 𐴀𐴞𐴁𐴝𐴤𐴃𐴧𐴟 𐴁𐴞𐴐𐴞𐴤 𐴒𐴟𐴕𐴝𐴤 𐴃𐴝𐴥𐴑𐴞𐴓𐴠 𐴘𐴡, 𐴀𐴞𐴁𐴝𐴤𐴌 𐴇𐴠𐴥 𐴒𐴟𐴕𐴝𐴤 𐴇𐴞𐴥𐴀𐴕 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴁𐴝𐴤𐴘𐴠 𐴁𐴞𐴐𐴞𐴤 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴠𐴥. 𐴔𐴡𐴕𐴃𐴡𐴌 𐴎𐴝𐴌𐴠𐴥 𐴈𐴡𐴔 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠, 𐴘𐴡𐴥𐴒𐴧𐴗𐴝𐴘𐴠 𐴈𐴡𐴔 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥.“

⁴⁸𐴁𐴝𐴦𐴊𐴠 𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴒𐴟𐴕𐴝𐴤 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴒𐴞𐴥𐴘𐴠.“

⁴⁹𐴇𐴠𐴥𐴃𐴟𐴕𐴡𐴃𐴢 𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴈𐴝𐴥𐴘𐴃𐴡 𐴁𐴡𐴙𐴐𐴧𐴞𐴥𐴓𐴢, 𐴀𐴞𐴥𐴃𐴝𐴌𐴝 𐴀𐴝𐴉𐴡𐴤𐴏𐴡𐴃𐴢 𐴈𐴡𐴖𐴝𐴤𐴇𐴡𐴘 𐴒𐴡𐴌𐴠𐴥𐴌 𐴊𐴠, ”𐴀𐴞𐴁𐴝𐴤 𐴇𐴡𐴕, 𐴎𐴞𐴁𐴝𐴤𐴘𐴠 𐴒𐴟𐴕𐴝𐴤 𐴀𐴟𐴥𐴊𐴧𐴗𐴝 𐴔𐴝𐴉𐴢 𐴒𐴡𐴌𐴠𐴥؟“

⁵⁰𐴓𐴠𐴑𐴞𐴕 𐴀𐴞𐴥𐴁𐴝𐴘𐴠 𐴔𐴝𐴘𐴝𐴉𐴟𐴖𐴝 𐴖𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴀𐴞𐴔𐴝𐴕𐴠 𐴃𐴟𐴣𐴀𐴝𐴥𐴣𐴌𐴠 𐴁𐴝𐴏𐴝𐴘𐴧𐴠𐴥; 𐴐𐴝𐴥𐴕𐴃𐴞𐴌 𐴏𐴝𐴥𐴀𐴣𐴃𐴠 𐴎𐴡𐴦𐴒𐴡𐴥𐴘.“

The Word for the World International

https://app.library.bible/content/87faca8b51c22590