Read 𐴓𐴟𐴑𐴝𐴥𐴏𐴢 8

𐴓𐴟𐴑𐴝𐴥𐴏𐴢8

𐴇𐴡𐴊𐴟𐴥𐴕 𐴁𐴠𐴍𐴞𐴘𐴝𐴥𐴙𐴕 𐴊𐴠 𐴀𐴞𐴏𐴝𐴤𐴌 𐴏𐴝𐴥𐴀𐴣𐴃𐴊𐴞𐴘𐴠

¹𐴘𐴝𐴥𐴌𐴁𐴝𐴦𐴊𐴠, 𐴀𐴞𐴏𐴝𐴤 𐴐𐴡𐴥𐴀𐴌𐴠-𐴐𐴡𐴥𐴀𐴌𐴠 𐴀𐴠𐴊𐴧𐴠 𐴉𐴝𐴌𐴝-𐴉𐴝𐴌𐴝 𐴎𐴝𐴘 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴁𐴝𐴦𐴁𐴟𐴃𐴠 𐴑𐴟𐴥𐴐𐴈𐴡𐴥𐴁𐴡𐴌 𐴁𐴡𐴘𐴧𐴝𐴕 𐴒𐴡𐴌𐴝𐴥𐴃𐴢 𐴀𐴠𐴊𐴧𐴠 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠. 𐴁𐴝𐴌𐴡𐴥 𐴎𐴡𐴕 𐴕𐴟𐴥𐴕 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢,²𐴇𐴡𐴊𐴟𐴥𐴕 𐴁𐴠𐴍𐴞𐴘𐴝𐴥𐴙𐴕 𐴀𐴡𐴥 𐴀𐴝𐴐𐴧𐴞𐴥𐴓𐴢 𐴎𐴠𐴃𐴝𐴌𐴝𐴤𐴌𐴠 𐴈𐴡𐴥𐴌𐴝𐴉𐴢 𐴅𐴞𐴕 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴠𐴊𐴧𐴠 𐴀𐴡𐴐𐴟𐴥𐴑 𐴀𐴡𐴥𐴑𐴧𐴡𐴓𐴡𐴃𐴧𐴟 𐴒𐴡𐴔 𐴒𐴡𐴌𐴝𐴥 𐴒𐴞𐴥𐴀𐴓𐴢; 𐴃𐴝𐴌𐴝𐴥 𐴀𐴡𐴥𐴙𐴓𐴊𐴠: 𐴔𐴡𐴌𐴞𐴘𐴝𐴔, 𐴎𐴞𐴁𐴝𐴤𐴌𐴠 𐴔𐴝𐴑𐴊𐴝𐴥𐴓𐴞𐴕𐴞 𐴋𐴝𐴑𐴠, 𐴎𐴞𐴁𐴝𐴤𐴌 𐴁𐴟𐴥𐴃𐴡𐴃𐴧𐴟 𐴇𐴝𐴥𐴣𐴃𐴧𐴗𐴝 𐴁𐴟𐴥𐴃𐴢 𐴕𐴠𐴦𐴙𐴓𐴧𐴞𐴥𐴓𐴢;³𐴅𐴡𐴀𐴝𐴕𐴧𐴝, 𐴎𐴞𐴁𐴝𐴤 𐴈𐴠𐴥𐴌𐴟𐴊𐴡𐴌 𐴀𐴟𐴎𐴞𐴌 𐴑𐴟𐴎𐴝𐴌𐴡𐴌 𐴁𐴡𐴖𐴢; 𐴏𐴡𐴏𐴝𐴥𐴕𐴧𐴝 𐴀𐴠𐴊𐴧𐴠 𐴀𐴝𐴌𐴡𐴤 𐴁𐴡𐴀𐴗𐴃𐴢 𐴁𐴠𐴍𐴞𐴘𐴝𐴥𐴙𐴕 𐴀𐴡𐴥𐴑𐴧𐴡𐴓𐴢. 𐴃𐴝𐴌𐴝𐴥 𐴕𐴞𐴎𐴡𐴌 𐴐𐴡𐴥𐴔𐴁𐴡𐴃𐴧𐴞 𐴓𐴡𐴥𐴘 𐴀𐴞𐴥𐴃𐴝𐴌𐴝𐴌 𐴇𐴠𐴥𐴊𐴔𐴡𐴃𐴢 𐴒𐴡𐴙𐴃𐴧𐴡𐴥.

𐴁𐴞𐴏𐴢 𐴐𐴞𐴥𐴣𐴍𐴡𐴘𐴝𐴌 𐴔𐴠𐴀𐴏𐴝𐴓𐴢

⁴𐴀𐴠𐴑 𐴊𐴞𐴕 𐴎𐴠𐴣𐴃𐴧𐴠𐴥 𐴉𐴡𐴃𐴧𐴞𐴥 𐴐𐴡𐴥𐴀𐴌𐴡𐴃𐴧𐴟 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴔𐴝𐴕𐴟𐴥𐴙𐴐𐴢 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴎𐴡𐴔𐴝 𐴀𐴡𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠 𐴔𐴠𐴀𐴏𐴝𐴓𐴢 𐴓𐴝𐴕 𐴈𐴡𐴘𐴧𐴠𐴥:⁵”𐴀𐴠𐴎𐴧𐴡𐴕 𐴁𐴞𐴏𐴢 𐴐𐴞𐴥𐴣𐴍𐴡𐴘𐴝 𐴁𐴞𐴏𐴢 𐴐𐴞𐴥𐴣𐴄𐴧𐴡 𐴕𐴠𐴦𐴙𐴓𐴧𐴠𐴥. 𐴘𐴡𐴥𐴒𐴧𐴗𐴝𐴘𐴠 𐴐𐴞𐴥𐴣𐴍𐴠𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴇𐴡𐴊𐴟𐴥𐴕 𐴁𐴞𐴏𐴢 𐴌𐴝𐴏𐴃𐴝𐴌 𐴇𐴝𐴣𐴏𐴝𐴃𐴢 𐴉𐴡𐴙𐴅𐴧𐴞𐴥𐴓𐴢; 𐴇𐴞𐴥𐴀𐴕𐴡𐴌 𐴖𐴡𐴌𐴠 𐴀𐴟𐴥𐴣𐴌𐴝𐴕 𐴉𐴡𐴙𐴅𐴧𐴞𐴥𐴓𐴢, 𐴀𐴝𐴦𐴌 𐴉𐴝𐴙𐴑 𐴀𐴡𐴥𐴑𐴧𐴡𐴓𐴠 𐴇𐴞𐴥𐴀𐴕 𐴈𐴝𐴥𐴘𐴉𐴠𐴓𐴝𐴘𐴧𐴠.⁶𐴇𐴡𐴊𐴟𐴥𐴕 𐴁𐴞𐴏𐴢 𐴐𐴞𐴥𐴓𐴡𐴌 𐴖𐴡𐴌𐴠 𐴉𐴡𐴙𐴅𐴧𐴞𐴥𐴓𐴢, 𐴇𐴞𐴥𐴀𐴕𐴠 𐴃𐴡𐴐𐴝𐴤 𐴕𐴡𐴥 𐴉𐴝𐴦 𐴀𐴞𐴥𐴏𐴝𐴉𐴠 𐴁𐴝𐴌𐴞𐴥 𐴀𐴟𐴍𐴝𐴥𐴌 𐴉𐴟𐴥𐴖𐴝𐴣𐴃𐴞-𐴉𐴟𐴥𐴖𐴝𐴣𐴃𐴞 𐴉𐴟𐴥𐴖𐴝𐴘𐴒𐴞𐴘𐴡𐴘.⁷𐴇𐴡𐴊𐴟𐴥𐴕 𐴁𐴞𐴏𐴢 𐴑𐴠𐴣𐴍𐴝𐴁𐴡𐴕𐴡𐴃𐴢 𐴉𐴡𐴙𐴅𐴧𐴞𐴥𐴓𐴢, 𐴉𐴟𐴥𐴖𐴝𐴣𐴃𐴞 𐴑𐴠𐴣𐴍𐴝𐴁𐴡𐴕 𐴁𐴝𐴌𐴞𐴥 𐴀𐴟𐴍𐴞𐴤 𐴇𐴞𐴥𐴀𐴕𐴡𐴌𐴠 𐴏𐴞𐴁𐴞 𐴌𐴝𐴙𐴑𐴧𐴠𐴥.⁸𐴓𐴠𐴑𐴞𐴕 𐴀𐴝𐴌 𐴇𐴡𐴊𐴟𐴥𐴕 𐴁𐴞𐴏𐴢 𐴒𐴡𐴔 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴞𐴥𐴓𐴢; 𐴇𐴞𐴥𐴀𐴕 𐴁𐴝𐴌𐴞𐴥 𐴀𐴟𐴙𐴄𐴧𐴠𐴥, 𐴀𐴝𐴦𐴌 𐴀𐴠𐴑 𐴐𐴡𐴥𐴃𐴢 𐴒𐴟𐴕 𐴉𐴡𐴥𐴏𐴡𐴓𐴢 𐴊𐴡𐴥𐴙𐴅𐴧𐴠.“
𐴀𐴞𐴏𐴝𐴤𐴘𐴠 𐴇𐴞𐴥𐴀𐴕 𐴈𐴡𐴀𐴘𐴢 𐴁𐴝𐴦𐴊𐴠 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴎𐴝𐴃𐴧𐴟 𐴉𐴟𐴥𐴕𐴞𐴁𐴝𐴌 𐴈𐴝𐴕 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴘𐴠 𐴉𐴟𐴥𐴕𐴡.“

𐴔𐴠𐴀𐴏𐴝𐴓𐴡𐴌 𐴔𐴡𐴑𐴏𐴡𐴥𐴃𐴢

⁹𐴀𐴞𐴏𐴝𐴤𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴠 𐴔𐴠𐴀𐴏𐴝𐴓𐴢 𐴓𐴝𐴕𐴡𐴌 𐴔𐴝𐴀𐴕𐴞 𐴑𐴞𐴦؟“¹⁰𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴒𐴟𐴉𐴡𐴕𐴞𐴌𐴠 𐴎𐴝𐴙𐴕𐴃𐴡 𐴃𐴟𐴣𐴀𐴝𐴥𐴌𐴝𐴌𐴠 𐴁𐴠 𐴊𐴞𐴘𐴝 𐴒𐴞𐴘𐴠𐴥, 𐴔𐴡𐴕𐴃𐴡𐴌 𐴀𐴡𐴙𐴕𐴧𐴡 𐴑𐴞𐴘𐴡𐴥𐴌𐴠 𐴔𐴠𐴀𐴏𐴝𐴓𐴢 𐴊𐴞𐴥 𐴀𐴠𐴃𐴡𐴓𐴧𐴝𐴤 𐴈𐴡𐴖𐴝𐴤 𐴎𐴝, 𐴎𐴠𐴀𐴕𐴠’𐴀𐴞𐴥𐴃𐴝𐴌𐴝 𐴏𐴝𐴘𐴓𐴠𐴥 𐴘𐴡 𐴕𐴡 𐴊𐴠𐴑𐴠𐴥,𐴀𐴝𐴦𐴌 𐴉𐴟𐴥𐴕𐴞𐴓𐴠 𐴘𐴡 𐴕𐴡 𐴁𐴟𐴎𐴠𐴥.‘

𐴁𐴞𐴏𐴢 𐴐𐴞𐴥𐴣𐴍𐴡𐴘𐴝𐴌 𐴔𐴠𐴀𐴏𐴝𐴓𐴡𐴌 𐴔𐴝𐴀𐴕𐴞 𐴁𐴟𐴎𐴝𐴥𐴘𐴊𐴞𐴘𐴠

¹¹”𐴔𐴠𐴀𐴏𐴝𐴓𐴢 𐴓𐴝𐴕𐴡𐴌 𐴔𐴝𐴀𐴕𐴞 𐴀𐴡𐴥𐴙𐴓𐴊𐴠 𐴘𐴝𐴀𐴕: 𐴁𐴞𐴏𐴢 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝𐴌 𐴑𐴝𐴓𐴝𐴔.¹²𐴌𐴝𐴏𐴃𐴝𐴌 𐴇𐴝𐴣𐴏𐴝𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴀𐴟𐴘𐴃𐴝𐴌𐴝𐴤 𐴎𐴠𐴃𐴝𐴌𐴝𐴤 𐴉𐴟𐴥𐴕𐴠, 𐴔𐴡𐴕𐴃𐴡𐴌 𐴀𐴞𐴁𐴞𐴓𐴞𐴥𐴐𐴠 𐴀𐴝𐴀𐴘𐴢 𐴀𐴞𐴥𐴃𐴝𐴌𐴝𐴌 𐴊𐴞𐴓𐴡𐴃𐴧𐴟 𐴑𐴝𐴓𐴝𐴔 𐴓𐴡𐴘𐴎𐴝𐴒𐴡𐴥𐴘, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴀𐴞𐴔𐴝𐴕 𐴕𐴟 𐴀𐴝𐴕𐴠𐴤 𐴀𐴝𐴦𐴌 𐴕𐴠𐴅𐴝𐴃𐴢 𐴕𐴡 𐴉𐴝𐴦.¹³𐴐𐴞𐴥𐴓𐴢 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴠𐴥 𐴊𐴠 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴑𐴝𐴓𐴝𐴔 𐴉𐴟𐴥𐴕𐴞𐴓𐴠 𐴑𐴟𐴥𐴐𐴞𐴌 𐴏𐴝𐴥𐴀𐴣𐴃𐴠 𐴑𐴡𐴁𐴟𐴓𐴢 𐴒𐴡𐴌𐴠𐴥; 𐴀𐴝𐴦𐴌 𐴔𐴡𐴎𐴁𐴟𐴃𐴢 𐴐𐴞𐴥𐴛𐴡𐴌 𐴕𐴡𐴥 𐴒𐴝𐴏𐴝𐴤 𐴊𐴠 𐴇𐴠𐴥𐴃𐴡𐴓𐴧𐴝 𐴑𐴠𐴏𐴧𐴟𐴥 𐴀𐴡𐴑𐴃𐴡𐴥 𐴓𐴧𐴝 𐴁𐴠 𐴀𐴞𐴔𐴝𐴕 𐴌𐴝𐴑𐴠𐴥, 𐴔𐴡𐴕𐴃𐴡𐴌 𐴀𐴠𐴕𐴃𐴝𐴥𐴕𐴡𐴃𐴢 𐴉𐴡𐴌𐴠 𐴊𐴠 𐴀𐴡𐴑𐴃𐴡𐴥𐴃𐴢 𐴉𐴞𐴏𐴧𐴝𐴥 𐴔𐴝𐴌𐴠.¹⁴𐴎𐴠 𐴁𐴞𐴏𐴢 𐴑𐴠𐴣𐴍𐴝𐴁𐴡𐴕𐴡𐴃𐴢 𐴉𐴡𐴙𐴅𐴧𐴠𐴥 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴑𐴝𐴓𐴝𐴔 𐴉𐴟𐴥𐴕𐴠, 𐴔𐴡𐴕𐴃𐴡𐴌 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘𐴃𐴠𐴥-𐴈𐴝𐴍𐴝𐴘𐴃𐴠𐴥 𐴏𐴞𐴕𐴃𐴝𐴁𐴝𐴥𐴉𐴝𐴕𐴞𐴘𐴠, 𐴊𐴡𐴥𐴕-𐴊𐴡𐴓𐴡𐴃𐴠, 𐴀𐴠𐴊𐴧𐴠 𐴀𐴠 𐴎𐴞𐴕𐴊𐴞𐴒𐴞𐴌 𐴀𐴝𐴘𐴝𐴐𐴞-𐴑𐴟𐴥𐴐𐴞𐴘𐴠 𐴀𐴞𐴥𐴃𐴝𐴌𐴝𐴌𐴠 𐴏𐴞𐴁𐴞 𐴌𐴝𐴑𐴠𐴥, 𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝𐴌 𐴒𐴟𐴓𐴝 𐴉𐴝𐴒𐴞 𐴕𐴡 𐴃𐴡𐴦𐴣𐴌𐴠.¹⁵𐴓𐴠𐴑𐴞𐴕 𐴎𐴠 𐴁𐴞𐴏𐴢 𐴒𐴡𐴔 𐴎𐴡𐴁𐴞𐴕𐴡𐴃𐴢 𐴉𐴡𐴙𐴅𐴧𐴠𐴥 𐴇𐴞𐴥𐴀𐴕 𐴀𐴡𐴥𐴙𐴓𐴊𐴠 𐴀𐴟𐴘𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴐𐴟𐴥𐴕𐴊𐴡𐴌𐴒𐴡𐴌𐴞 𐴀𐴠𐴊𐴧𐴠 𐴒𐴡𐴔 𐴊𐴞𐴓𐴠 𐴑𐴝𐴓𐴝𐴔 𐴉𐴟𐴥𐴕𐴠, 𐴇𐴞𐴥𐴀𐴕𐴡𐴌𐴠 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴊𐴡𐴥𐴌𐴞 𐴌𐴝𐴑𐴠𐴥, 𐴀𐴠𐴊𐴧𐴠 𐴏𐴡𐴁𐴡𐴥𐴌𐴡𐴌 𐴏𐴝𐴥𐴀𐴣𐴃𐴠 𐴒𐴟𐴓𐴝 𐴊𐴡𐴥𐴌𐴝.

𐴏𐴠𐴌𐴝𐴑𐴡𐴌 𐴔𐴠𐴀𐴏𐴝𐴓𐴢

¹⁶”𐴇𐴡𐴕𐴡𐴤𐴑𐴞𐴘𐴠 𐴃𐴡 𐴏𐴠𐴌𐴝𐴑 𐴊𐴡𐴥𐴌𐴝𐴘 𐴃𐴝𐴥𐴌𐴝 𐴓𐴡𐴥𐴘 𐴎𐴝𐴥𐴉𐴝𐴘 𐴕𐴡 𐴌𐴝𐴑𐴠𐴥, 𐴘𐴝𐴥 𐴉𐴝𐴓𐴡𐴚𐴡𐴌 𐴃𐴡𐴓𐴠 𐴘𐴡𐴥 𐴕𐴡 𐴌𐴝𐴑𐴠𐴥, 𐴁𐴡𐴥𐴓𐴑𐴠 𐴁𐴡𐴘𐴍𐴡𐴥𐴕𐴞𐴌 𐴖𐴡𐴌𐴠 𐴀𐴠𐴥𐴕𐴝 𐴌𐴝𐴑𐴠𐴥, 𐴎𐴠𐴀𐴕𐴠 𐴁𐴟𐴥𐴃𐴡𐴌𐴠 𐴀𐴝𐴘𐴧𐴠𐴤 𐴊𐴠 𐴀𐴞𐴥𐴃𐴝𐴌𐴝 𐴉𐴡𐴀𐴌 𐴊𐴠𐴑𐴠𐴥.¹⁷𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠𐴕𐴊𐴞𐴓𐴧𐴝 𐴏𐴟𐴌𐴇𐴝 𐴑𐴠𐴏𐴧𐴟𐴥 𐴕𐴝𐴥𐴘 𐴎𐴞𐴀𐴕 𐴎𐴝𐴇𐴠𐴥𐴌 𐴕𐴡 𐴀𐴡𐴥𐴘𐴁𐴡, 𐴀𐴝𐴦𐴌 𐴀𐴠𐴕𐴊𐴞𐴓𐴧𐴝 𐴓𐴟𐴑𐴝𐴘𐴧𐴝 𐴘𐴡𐴥 𐴑𐴠𐴏𐴧𐴟𐴥 𐴕𐴝𐴥𐴘 𐴎𐴞𐴀𐴕 𐴎𐴝𐴕𐴝 𐴕𐴡 𐴎𐴝𐴘𐴁𐴡 𐴀𐴝𐴦𐴌 𐴑𐴟𐴥𐴓𐴝𐴇𐴝𐴓𐴝 𐴕𐴡 𐴀𐴡𐴥𐴘𐴁𐴡.¹⁸𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴇𐴡𐴕𐴊𐴞𐴓𐴧𐴝 𐴒𐴡𐴌𐴞 𐴉𐴟𐴥𐴕𐴡𐴌 𐴀𐴟𐴥𐴣𐴐𐴞𐴘𐴝𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴝𐴃𐴧𐴟 𐴕𐴞𐴑𐴞 𐴀𐴝𐴏𐴠𐴤, 𐴘𐴡𐴥𐴒𐴧𐴗𐴝𐴌𐴠 𐴀𐴝𐴌𐴡𐴤 𐴊𐴞𐴦𐴘𐴝 𐴎𐴝𐴘𐴁𐴡; 𐴔𐴡𐴕𐴃𐴡𐴌 𐴎𐴝𐴃𐴧𐴟 𐴕𐴞𐴑𐴞 𐴕𐴝𐴥𐴘, 𐴘𐴡𐴥𐴒𐴧𐴗𐴝𐴘𐴠 𐴕𐴞𐴎𐴡𐴃𐴧𐴟 𐴎𐴞𐴀𐴕 𐴀𐴝𐴏𐴠𐴤 𐴁𐴡𐴥𐴓𐴞 𐴁𐴝𐴥𐴉𐴠 𐴇𐴞𐴥𐴀𐴕 𐴀𐴟𐴥𐴊𐴧𐴗𐴝 𐴓𐴡𐴘𐴉𐴠𐴥𐴓𐴝 𐴎𐴝𐴘𐴁𐴡.“

𐴀𐴞𐴏𐴝𐴤𐴌 𐴔𐴝𐴦 𐴀𐴠𐴊𐴧𐴠 𐴁𐴝𐴥𐴘𐴧𐴝𐴙𐴕

¹⁹𐴘𐴝𐴥𐴌𐴁𐴝𐴦𐴊𐴠 𐴀𐴞𐴏𐴝𐴤𐴌 𐴔𐴝𐴦 𐴀𐴠𐴊𐴧𐴠 𐴁𐴝𐴥𐴘𐴧𐴝𐴙𐴕 𐴀𐴞𐴥𐴁𐴝𐴌 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥, 𐴔𐴡𐴕𐴃𐴡𐴌 𐴔𐴝𐴙𐴕𐴐𐴡𐴥𐴌 𐴎𐴝𐴔𐴡𐴓𐴧𐴝 𐴁𐴡𐴥𐴓𐴞 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴀𐴞𐴥𐴣𐴘𐴡𐴃𐴢 𐴉𐴡𐴀𐴣𐴏𐴞 𐴕𐴡 𐴉𐴝𐴌𐴠𐴌.²⁰𐴀𐴠𐴎𐴧𐴡𐴕𐴠 𐴀𐴞𐴥𐴁𐴝𐴌𐴠 𐴈𐴡𐴥𐴁𐴡𐴌 𐴊𐴞𐴥𐴘𐴠 𐴊𐴠, ”𐴃𐴟𐴣𐴀𐴝𐴥𐴣𐴌 𐴔𐴝𐴦 𐴀𐴠𐴊𐴧𐴠 𐴁𐴝𐴥𐴘𐴧𐴝𐴙𐴕 𐴁𐴝𐴀𐴌𐴠 𐴃𐴞𐴥𐴘𐴝𐴘 𐴃𐴝𐴥𐴙𐴑𐴧𐴠, 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴣𐴌 𐴓𐴧𐴡𐴥𐴘 𐴔𐴞𐴓𐴃𐴡 𐴏𐴝𐴌.“

²¹𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴞𐴘𐴠𐴥 𐴊𐴠, ”𐴀𐴝𐴣𐴀𐴌 𐴔𐴝𐴦 𐴀𐴠𐴊𐴧𐴠 𐴁𐴝𐴥𐴘𐴧𐴝𐴙𐴕 𐴀𐴡𐴥𐴙𐴓𐴊𐴠 𐴀𐴞𐴃𐴝𐴌𐴝𐴤, 𐴎𐴠𐴃𐴝𐴌𐴝𐴤 𐴀𐴝𐴓𐴧𐴝𐴌 𐴑𐴝𐴓𐴝𐴔 𐴉𐴟𐴥𐴕𐴠 𐴀𐴠𐴊𐴧𐴠 𐴇𐴞𐴥𐴀𐴕 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥.“

𐴀𐴞𐴏𐴝𐴤𐴘𐴠 𐴃𐴟𐴖𐴝𐴥𐴕 𐴃𐴝𐴥𐴔𐴝𐴘𐴧𐴠

²²𐴀𐴠𐴑 𐴊𐴞𐴕 𐴀𐴞𐴏𐴝𐴤 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕 𐴀𐴠𐴑𐴧𐴝𐴥𐴕 𐴕𐴡𐴦𐴃𐴢 𐴀𐴟𐴙𐴄𐴧𐴠𐴥, 𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴘𐴧𐴡𐴤, 𐴀𐴝𐴣𐴀𐴌𐴝 𐴋𐴞𐴀𐴌 𐴀𐴡 𐴇𐴝𐴣𐴏𐴝𐴃𐴢 𐴉𐴝𐴌𐴝𐴤𐴘.“𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴁𐴝𐴐𐴝𐴥 𐴓𐴡𐴥𐴘𐴧𐴠.²³𐴎𐴝𐴘𐴃𐴠-𐴎𐴝𐴘𐴃𐴠 𐴀𐴞𐴏𐴝𐴤 𐴒𐴟𐴥𐴔𐴡𐴃𐴢 𐴉𐴡𐴌𐴞𐴒𐴞𐴘𐴡𐴥𐴘. 𐴀𐴝𐴦𐴌 𐴋𐴞𐴀𐴃𐴢 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴃𐴟𐴖𐴝𐴥𐴕 𐴀𐴝𐴙𐴐𐴧𐴠𐴥, 𐴇𐴠𐴥𐴃𐴡𐴓𐴧𐴝 𐴕𐴡𐴦 𐴒𐴝𐴥𐴕 𐴉𐴝𐴕𐴞𐴥 𐴓𐴡𐴥𐴘 𐴁𐴡𐴥𐴌𐴞𐴎𐴝𐴌𐴒𐴡𐴘, 𐴀𐴝𐴦𐴌 𐴀𐴞𐴥𐴃𐴝𐴌𐴝 𐴇𐴡𐴥𐴃𐴡𐴌𐴝𐴃𐴢 𐴉𐴡𐴙𐴅𐴧𐴞𐴥𐴓𐴢.

²⁴𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴀𐴞𐴥𐴁𐴝𐴌𐴠 𐴃𐴟𐴓𐴞𐴤𐴊𐴞 𐴈𐴡𐴀𐴌 𐴊𐴠, ”𐴀𐴟𐴏𐴃𐴝𐴃𐴢, 𐴀𐴡𐴥 𐴀𐴟𐴏𐴃𐴝𐴃𐴢, 𐴀𐴝𐴣𐴀𐴌𐴝 𐴔𐴡𐴌𐴞𐴎𐴝𐴙𐴌𐴒𐴡𐴥𐴘!“
𐴃𐴡𐴥𐴘 𐴀𐴞𐴥𐴁𐴝 𐴀𐴟𐴍𐴞𐴤 𐴁𐴡𐴘𐴧𐴝𐴌 𐴀𐴠𐴊𐴧𐴠 𐴉𐴝𐴕𐴞𐴥𐴌 𐴒𐴡𐴙𐴌𐴡𐴌𐴠 𐴊𐴡𐴥𐴀𐴣𐴑 𐴊𐴞𐴘𐴠𐴥, 𐴁𐴝𐴦𐴊𐴠 𐴇𐴞𐴥𐴀𐴕 𐴁𐴡𐴕 𐴀𐴡𐴥𐴘 𐴃𐴝𐴥𐴔𐴝𐴘𐴒𐴞𐴘𐴡𐴘.²⁵𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴌 𐴀𐴞𐴔𐴝𐴕 𐴇𐴡𐴍𐴠𐴥؟“
𐴀𐴞𐴥𐴃𐴝𐴌𐴝 𐴋𐴡𐴦𐴌𐴝𐴘𐴒𐴞𐴘𐴡𐴥𐴘 𐴀𐴝𐴦𐴌 𐴃𐴝𐴦𐴅𐴟𐴂𐴢 𐴀𐴡𐴥𐴘 𐴀𐴠𐴎𐴧𐴡𐴕𐴡𐴌𐴠 𐴀𐴠𐴎𐴧𐴡𐴕𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴇𐴡𐴕؟ 𐴀𐴞𐴁𐴝𐴤𐴘𐴠 𐴊𐴠 𐴁𐴡𐴘𐴧𐴝𐴌 𐴀𐴠𐴊𐴧𐴠 𐴉𐴝𐴕𐴞𐴥𐴌𐴠 𐴀𐴟𐴥𐴊𐴧𐴗𐴝 𐴇𐴡𐴥𐴑𐴟𐴔 𐴊𐴞𐴥𐴓𐴠 𐴇𐴞𐴥𐴀𐴕𐴠 𐴀𐴞𐴁𐴝𐴤𐴌 𐴈𐴡𐴃𐴝𐴤 𐴔𐴝𐴕𐴠!“

𐴀𐴞𐴏𐴝𐴤𐴘𐴠 𐴀𐴠𐴎𐴧𐴡𐴕 𐴁𐴟𐴥𐴃𐴠-𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴢 𐴒𐴡𐴔 𐴒𐴡𐴙𐴅𐴧𐴠𐴥

²⁶𐴘𐴝𐴥𐴌𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴒𐴠𐴌𐴝𐴏𐴠𐴥𐴕𐴞𐴀𐴡𐴥𐴓𐴡𐴌 𐴔𐴟𐴓𐴧𐴟𐴑𐴡𐴃𐴢 𐴉𐴡𐴀𐴣𐴙𐴐𐴧𐴠, 𐴎𐴞𐴘𐴝𐴥𐴕 𐴒𐴝𐴓𐴞𐴓𐴢 𐴋𐴞𐴀𐴌 𐴔𐴟𐴀𐴕𐴃𐴟.²⁷𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴑𐴟𐴓𐴡𐴌 𐴖𐴡𐴌𐴠 𐴓𐴝𐴙𐴔𐴧𐴠𐴥, 𐴇𐴠𐴥 𐴐𐴡𐴥𐴀𐴌𐴡𐴌 𐴀𐴠𐴎𐴧𐴡𐴕 𐴁𐴟𐴥𐴃𐴠-𐴉𐴝𐴘𐴧𐴝 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝 𐴓𐴧𐴡𐴥𐴘 𐴊𐴡𐴓𐴝 𐴀𐴡𐴥𐴘𐴧𐴠. 𐴘𐴡𐴥𐴒𐴧𐴗𐴝𐴘𐴠 𐴇𐴡𐴦𐴌𐴏𐴟𐴖𐴡𐴌 𐴕𐴡 𐴉𐴞𐴣𐴊𐴠𐴤𐴌 𐴊𐴠 𐴁𐴞𐴐𐴞𐴤 𐴊𐴠𐴌𐴞 𐴓𐴡𐴥𐴃𐴞, 𐴀𐴝𐴦𐴌 𐴘𐴡𐴥𐴒𐴧𐴗𐴝 𐴒𐴡𐴥𐴌𐴡𐴃𐴢 𐴕𐴡 𐴃𐴝𐴥𐴑𐴞 𐴈𐴡𐴁𐴡𐴌 𐴀𐴡𐴥𐴑𐴧𐴡𐴓𐴡𐴃𐴢 𐴃𐴝𐴥𐴑𐴞𐴃𐴡.²⁸𐴎𐴠𐴣𐴃𐴧𐴠𐴥 𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤𐴌𐴠 𐴊𐴠𐴙𐴑𐴧𐴠𐴥, 𐴒𐴟𐴎𐴡𐴌𐴞 𐴀𐴞𐴥𐴁𐴝𐴌 𐴔𐴟𐴀𐴕𐴃𐴟 𐴀𐴟𐴣𐴀𐴘𐴃𐴡𐴘 𐴉𐴡𐴌𐴞𐴒𐴞𐴘𐴡𐴥𐴘, 𐴀𐴝𐴦𐴌 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴀𐴝𐴁𐴝𐴏𐴠 𐴈𐴡𐴀𐴌 𐴊𐴠, ”𐴀𐴡𐴥 𐴀𐴞𐴏𐴝𐴤, 𐴀𐴝𐴓𐴧𐴝 𐴃𐴝𐴥𐴓𐴝𐴌 𐴉𐴟𐴖𐴝, 𐴃𐴟𐴣𐴀𐴝𐴥𐴣𐴃𐴧𐴟 𐴀𐴝𐴣𐴀𐴌 𐴓𐴧𐴡𐴥𐴘 𐴑𐴞𐴦 𐴈𐴝𐴔 𐴀𐴝𐴏𐴠𐴤؟ 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴁𐴞𐴐𐴞𐴤 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴞𐴥𐴌, 𐴀𐴝𐴣𐴀𐴌𐴠𐴥 𐴃𐴡𐴎𐴞𐴘𐴝 𐴕𐴡 𐴊𐴞𐴘𐴡𐴥.“²⁹𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴏𐴝𐴤𐴘𐴠 𐴇𐴠𐴥 𐴈𐴡𐴥𐴌𐴝𐴉𐴢 𐴅𐴞𐴕 𐴕𐴗𐴝𐴥𐴌𐴠 𐴘𐴡𐴥𐴒𐴧𐴗𐴝𐴌 𐴁𐴟𐴥𐴃𐴡𐴃𐴧𐴟 𐴕𐴠𐴦𐴓𐴞𐴀𐴝𐴘 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴊𐴞𐴥𐴉𐴠𐴓𐴝𐴘𐴧𐴠. 𐴇𐴠𐴥 𐴅𐴞𐴕𐴠 𐴘𐴡𐴥𐴒𐴧𐴗𐴝𐴌𐴠 𐴁𐴞𐴐𐴞𐴤 𐴉𐴝𐴘𐴃𐴡; 𐴀𐴝𐴦𐴌 𐴘𐴡𐴥𐴒𐴧𐴗𐴝𐴌𐴠 𐴏𐴞𐴥𐴘𐴡𐴓𐴢 𐴀𐴠𐴊𐴧𐴠 𐴁𐴠𐴌𐴞𐴥 𐴓𐴡𐴥𐴘 𐴁𐴝𐴣𐴊𐴞𐴥 𐴉𐴝𐴀𐴌𐴝 𐴊𐴞𐴥 𐴌𐴝𐴑𐴝𐴤 𐴎𐴝𐴘𐴃𐴡, 𐴔𐴡𐴕𐴃𐴡𐴌 𐴇𐴞𐴥𐴀𐴕 𐴏𐴞𐴥𐴌𐴞𐴉𐴠𐴓𐴝𐴘𐴃𐴡, 𐴀𐴝𐴦𐴌 𐴁𐴟𐴥𐴃𐴠 𐴘𐴡𐴥𐴒𐴧𐴗𐴝𐴌𐴠 𐴔𐴡𐴘𐴊𐴝𐴕 𐴎𐴝𐴒𐴝𐴃𐴢 𐴓𐴡𐴘𐴎𐴝𐴘𐴃𐴡𐴥𐴘.

³⁰𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴡𐴌 𐴕𐴝𐴔 𐴑𐴞𐴦؟“
𐴘𐴡𐴥𐴒𐴧𐴗𐴝𐴘𐴠 𐴈𐴡𐴀𐴌 𐴊𐴠, ”𐴎𐴝𐴥𐴑“ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴌 𐴁𐴟𐴥𐴃𐴡𐴌𐴠 𐴁𐴡𐴗𐴀𐴃𐴧𐴗𐴝 𐴁𐴟𐴥𐴃𐴢 𐴒𐴡𐴥𐴓𐴞 𐴃𐴝𐴥𐴙𐴑𐴧𐴠.³¹𐴇𐴞𐴥𐴀𐴕𐴠 𐴀𐴞𐴏𐴝𐴤𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠 𐴊𐴠, 𐴇𐴞𐴥𐴀𐴕𐴡𐴌𐴠 𐴀𐴡𐴄𐴝𐴥𐴘 𐴒𐴝𐴣𐴃𐴡𐴃𐴢 𐴎𐴝𐴘𐴃𐴡 𐴇𐴡𐴥𐴑𐴟𐴔 𐴕𐴡 𐴊𐴞 𐴁𐴡𐴓𐴧𐴝.

³²𐴇𐴠𐴥𐴍𐴠 𐴉𐴝𐴀𐴌𐴡𐴌 𐴖𐴡𐴌𐴠 𐴋𐴡𐴣𐴀𐴌 𐴀𐴠𐴑 𐴎𐴝𐴥𐴑 𐴐𐴟𐴥𐴖𐴡𐴌 𐴏𐴡𐴌𐴠𐴌 𐴊𐴠 𐴀𐴝𐴐𐴧𐴞𐴥𐴓𐴢. 𐴁𐴟𐴥𐴃𐴧𐴟𐴕𐴠 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴠𐴥𐴌 𐴊𐴠, 𐴇𐴞𐴥𐴀𐴕𐴡𐴌𐴠 𐴇𐴠𐴥 𐴐𐴟𐴥𐴖𐴡𐴌 𐴒𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴃𐴡𐴘 𐴀𐴠𐴎𐴝𐴎𐴡𐴃𐴢 𐴊𐴞 𐴁𐴡𐴓𐴧𐴝. 𐴃𐴡𐴥𐴘 𐴀𐴞𐴥𐴁𐴝𐴘𐴠 𐴇𐴞𐴥𐴀𐴕𐴡𐴌𐴠 𐴀𐴠𐴎𐴝𐴎𐴡𐴃𐴢 𐴊𐴞𐴘𐴠𐴥.³³𐴇𐴠𐴥𐴃𐴟𐴕𐴡𐴃𐴢 𐴇𐴠𐴥 𐴁𐴟𐴥𐴃𐴧𐴟𐴕 𐴔𐴝𐴕𐴟𐴥𐴙𐴐𐴧𐴗𐴝𐴃𐴧𐴟 𐴕𐴠𐴦𐴓𐴞 𐴀𐴝𐴀𐴘𐴢 𐴐𐴟𐴥𐴖𐴡𐴌 𐴒𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴧𐴠𐴒𐴡𐴘, 𐴃𐴡𐴥𐴘 𐴐𐴟𐴥𐴖𐴡𐴌𐴡𐴌 𐴎𐴝𐴥𐴑𐴧𐴗𐴝 𐴉𐴝𐴀𐴌𐴡𐴌 𐴇𐴝𐴙𐴕𐴊𐴝𐴤 𐴁𐴝𐴥𐴘 𐴎𐴟𐴌𐴠 𐴋𐴞𐴀𐴃𐴢 𐴊𐴟𐴣𐴌𐴊𐴞𐴘𐴠𐴥 𐴀𐴝𐴦𐴌 𐴋𐴟𐴉𐴞𐴥 𐴔𐴡𐴌𐴞𐴒𐴞𐴘𐴡𐴥𐴘.

³⁴𐴐𐴟𐴥𐴖𐴡𐴌 𐴏𐴡𐴌𐴡𐴘𐴝 𐴒𐴟𐴥𐴕𐴠 𐴎𐴠𐴣𐴃𐴧𐴠𐴥 𐴑𐴞𐴦 𐴀𐴡𐴥𐴘𐴧𐴠 𐴊𐴠 𐴊𐴠𐴙𐴑𐴧𐴠𐴥, 𐴀𐴞𐴥𐴃𐴝𐴌𐴝 𐴊𐴟𐴣𐴌𐴊𐴞𐴘𐴠𐴥 𐴀𐴝𐴦𐴌 𐴐𐴡𐴥𐴀𐴌𐴡𐴃𐴢 𐴀𐴠𐴊𐴧𐴠 𐴒𐴝𐴚 𐴎𐴝𐴒𐴝𐴃𐴢 𐴇𐴞𐴥𐴘𐴝𐴕 𐴈𐴡𐴥𐴁𐴡𐴌 𐴊𐴞𐴥𐴘𐴠.³⁵𐴁𐴝𐴦𐴊𐴠 𐴑𐴞𐴦 𐴀𐴡𐴥𐴘𐴧𐴠 𐴊𐴠 𐴏𐴝𐴘 𐴁𐴡𐴓𐴧𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴕𐴠𐴦𐴙𐴓𐴧𐴠𐴥. 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌 𐴇𐴠𐴥𐴍𐴠 𐴀𐴝𐴀𐴘𐴢 𐴓𐴡𐴦𐴃𐴢 𐴉𐴝𐴘𐴧𐴠𐴥 𐴊𐴠, 𐴎𐴠 𐴔𐴝𐴕𐴟𐴥𐴙𐴐𐴧𐴗𐴝𐴃𐴧𐴟 𐴁𐴟𐴥𐴃𐴢 𐴕𐴠𐴦𐴙𐴓𐴧𐴠𐴥 𐴘𐴡𐴥𐴒𐴧𐴗𐴝 𐴇𐴡𐴦𐴌 𐴉𐴞𐴕𐴊𐴞𐴥 𐴀𐴠𐴊𐴧𐴠 𐴏𐴡𐴥𐴘𐴧𐴞 𐴀𐴟𐴥𐴣𐴐𐴠 𐴀𐴞𐴏𐴝𐴤𐴌 𐴄𐴠𐴥𐴚𐴡𐴌 𐴋𐴝𐴥𐴑𐴠 𐴁𐴡𐴘𐴍𐴝𐴤 𐴀𐴝𐴏𐴠𐴤; 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴋𐴡𐴦𐴌𐴝𐴘𐴒𐴞𐴘𐴡𐴥𐴘.³⁶𐴎𐴠𐴃𐴝𐴌𐴝𐴤 𐴇𐴠𐴥 𐴔𐴝𐴦𐴔𐴠𐴓𐴝 𐴒𐴝𐴥𐴕 𐴊𐴠𐴙𐴑𐴧𐴠𐴥 𐴀𐴞𐴥𐴃𐴝𐴌𐴝 𐴁𐴟𐴥𐴃𐴠-𐴉𐴝𐴀𐴙𐴓𐴢 𐴊𐴠 𐴔𐴝𐴕𐴟𐴥𐴙𐴐𐴧𐴗𐴝 𐴑𐴠𐴀𐴕𐴒𐴡𐴌𐴞 𐴒𐴡𐴔 𐴀𐴡𐴥𐴘𐴒𐴞𐴘𐴡𐴘 𐴊𐴠 𐴇𐴞𐴥𐴘𐴝𐴕 𐴇𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝𐴌𐴠 𐴎𐴝𐴕𐴝𐴘𐴧𐴠𐴥.³⁷𐴇𐴠𐴥𐴃𐴡𐴓𐴧𐴝 𐴒𐴠𐴌𐴝𐴏𐴠𐴥𐴕𐴞𐴀𐴡𐴥𐴓𐴡𐴌 𐴏𐴝𐴘𐴌𐴡𐴥 𐴋𐴝𐴥𐴑𐴡𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴀𐴞𐴏𐴝𐴤𐴌𐴠 𐴀𐴞𐴥𐴃𐴝𐴌𐴝𐴌 𐴈𐴠𐴥𐴕𐴃𐴟 𐴎𐴝𐴘𐴃𐴡𐴒𐴡𐴥𐴘 𐴈𐴡𐴘𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝𐴃𐴧𐴟 𐴁𐴞𐴐𐴞𐴤 𐴋𐴡𐴦𐴌 𐴓𐴝𐴙𐴒𐴧𐴠𐴥; 𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝 𐴕𐴡𐴦𐴃𐴢 𐴀𐴟𐴍𐴞𐴤 𐴖𐴝𐴦𐴉𐴠𐴏𐴢 𐴀𐴝𐴀𐴘𐴒𐴞𐴘𐴡𐴘.

³⁸𐴎𐴠 𐴔𐴝𐴕𐴟𐴥𐴙𐴐𐴧𐴗𐴝𐴃𐴧𐴟 𐴁𐴟𐴥𐴃𐴢 𐴀𐴡𐴥𐴑𐴧𐴡𐴓𐴢 𐴕𐴠𐴦𐴙𐴓𐴧𐴞𐴥𐴓𐴢, 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴎𐴝𐴘 𐴁𐴡𐴓𐴧𐴝 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴙𐴅𐴧𐴞𐴥𐴓𐴢, 𐴓𐴠𐴑𐴞𐴕 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴀𐴠𐴀𐴕 𐴈𐴡𐴀𐴘𐴢 𐴊𐴟𐴣𐴌𐴝𐴘𐴊𐴞𐴘𐴠𐴥,³⁹”𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴒𐴡𐴥𐴌𐴡𐴃𐴢 𐴖𐴝𐴦𐴉𐴠𐴏𐴢 𐴎𐴡𐴦𐴒𐴡𐴥𐴘, 𐴀𐴝𐴦𐴌 𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴣𐴌 𐴓𐴧𐴝 𐴎𐴠 𐴋𐴡𐴣𐴀𐴌 𐴈𐴝𐴔 𐴒𐴡𐴙𐴅𐴧𐴠𐴥 𐴇𐴞𐴥𐴀𐴕 𐴁𐴡𐴘𐴧𐴝𐴕 𐴒𐴡𐴌𐴡𐴤𐴒𐴡𐴘.“𐴁𐴝𐴦𐴊𐴠 𐴘𐴡𐴥𐴒𐴧𐴗𐴝 𐴒𐴞𐴦𐴘𐴠𐴥𐴒𐴡𐴘, 𐴀𐴝𐴦𐴌 𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴓𐴧𐴝 𐴎𐴠 𐴋𐴡𐴣𐴀𐴌 𐴈𐴝𐴔 𐴒𐴡𐴙𐴅𐴧𐴠𐴥 𐴇𐴞𐴥𐴀𐴕 𐴐𐴡𐴥𐴀𐴌𐴡𐴌 𐴀𐴝𐴒𐴝𐴒𐴟𐴌𐴝 𐴈𐴡𐴖𐴝𐴤𐴃𐴢 𐴊𐴡𐴙𐴅𐴧𐴠.

𐴎𐴝𐴥𐴘𐴌𐴝𐴏𐴡𐴌 𐴎𐴠𐴥𐴌𐴉𐴟𐴖𐴝 𐴀𐴠𐴊𐴧𐴠 𐴀𐴞𐴏𐴝𐴤𐴌 𐴇𐴡𐴦𐴌 𐴏𐴟𐴥𐴘𐴧𐴠 𐴊𐴠 𐴔𐴝𐴘𐴝𐴉𐴟𐴖𐴝

⁴⁰𐴎𐴠𐴣𐴃𐴧𐴠𐴥 𐴀𐴞𐴏𐴝𐴤 𐴖𐴝𐴦𐴉𐴠𐴏𐴢 𐴀𐴝𐴙𐴐𐴧𐴠𐴥, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴀𐴠𐴏𐴃𐴠𐴑𐴁𐴝𐴓𐴢 𐴒𐴡𐴙𐴅𐴧𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴀𐴞𐴥𐴁𐴝𐴓𐴧𐴝 𐴏𐴡𐴦𐴛 𐴃𐴝𐴥𐴙𐴑𐴧𐴞𐴓𐴢.⁴¹𐴇𐴠𐴥𐴃𐴟𐴕𐴡𐴃𐴢 𐴎𐴝𐴥𐴘𐴌𐴝𐴏𐴢 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴔𐴝𐴕𐴟𐴥𐴙𐴐𐴢 𐴇𐴠𐴥𐴍𐴠 𐴀𐴝𐴙𐴐𐴧𐴠𐴥, 𐴎𐴞𐴁𐴝𐴤 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴌 𐴀𐴠𐴥𐴎𐴧𐴡𐴕 𐴏𐴡𐴥𐴊𐴧𐴝𐴌; 𐴘𐴡𐴥𐴒𐴧𐴗𐴝𐴘𐴠 𐴀𐴞𐴏𐴝𐴤𐴌 𐴉𐴡𐴦𐴃𐴢 𐴉𐴡𐴌𐴞 𐴀𐴞𐴥𐴁𐴝𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴠𐴥𐴌 𐴊𐴠, 𐴘𐴡𐴥𐴒𐴧𐴗𐴝𐴌 𐴒𐴡𐴥𐴌𐴡𐴃𐴢 𐴀𐴝𐴘 𐴁𐴡𐴓𐴧𐴝;⁴²𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴃𐴧𐴟 𐴏𐴞𐴌𐴞𐴥𐴉𐴢 𐴀𐴠𐴒𐴧𐴗𐴝𐴤 𐴁𐴝𐴌𐴡𐴥 𐴁𐴡𐴏𐴡𐴥𐴌𐴅𐴝 𐴎𐴠𐴥𐴌𐴉𐴟𐴖𐴝 𐴀𐴝𐴐𐴧𐴞𐴥𐴓𐴢 𐴊𐴠, 𐴀𐴝𐴦𐴌 𐴇𐴞𐴥𐴁𐴝 𐴔𐴡𐴌𐴞𐴎𐴝𐴌𐴒𐴡𐴥𐴘.
𐴀𐴞𐴥𐴁𐴝 𐴎𐴝𐴦𐴌 𐴊𐴠 𐴀𐴡𐴑𐴃𐴡𐴥𐴃𐴢, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴄𐴠𐴥𐴓𐴝𐴄𐴠𐴓𐴞 𐴒𐴡𐴌𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.⁴³𐴇𐴠𐴥𐴍𐴠 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴃𐴧𐴟 𐴑𐴟𐴥𐴕𐴎𐴝𐴌𐴞 𐴎𐴝𐴥𐴌 𐴊𐴠 𐴁𐴝𐴌𐴡𐴥 𐴁𐴡𐴏𐴡𐴥𐴌 𐴀𐴡𐴥𐴘𐴧𐴠, 𐴎𐴞𐴁𐴝𐴤𐴘𐴠 𐴕𐴞𐴎𐴡𐴃𐴧𐴟 𐴀𐴝𐴐𐴧𐴞𐴥𐴓𐴢 𐴊𐴠 𐴁𐴠𐴒𐴧𐴟𐴥𐴕 𐴋𐴝𐴑𐴄𐴡𐴌 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴇𐴡𐴥𐴏𐴧𐴝 𐴒𐴡𐴌𐴞𐴥𐴉𐴠𐴓𐴝𐴘 𐴁𐴝𐴦𐴊𐴠 𐴘𐴡 𐴇𐴡𐴕𐴡𐴤𐴑𐴞𐴘𐴡𐴌 𐴀𐴝𐴥𐴃𐴡𐴃𐴢 𐴒𐴡𐴔 𐴀𐴡𐴥𐴘 𐴕𐴡𐴥 𐴉𐴝𐴌𐴠;⁴⁴𐴇𐴞𐴥𐴁𐴝 𐴀𐴞𐴏𐴝𐴤𐴌 𐴉𐴞𐴏𐴡𐴥𐴃𐴧𐴟 𐴀𐴝𐴀𐴘𐴢 𐴀𐴞𐴥𐴁𐴝𐴌 𐴇𐴡𐴦𐴌𐴡𐴌 𐴇𐴝𐴣𐴌𐴝 𐴏𐴟𐴥𐴘𐴧𐴠, 𐴃𐴡𐴥𐴘 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴇𐴞𐴥𐴁𐴝𐴌 𐴑𐴟𐴥𐴕𐴎𐴝𐴌𐴞 𐴁𐴡𐴕 𐴀𐴡𐴥𐴘𐴒𐴞𐴘𐴡𐴘.

⁴⁵𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴠𐴥 𐴇𐴡𐴕𐴠 𐴏𐴟𐴥𐴘𐴧𐴠؟“
𐴁𐴠𐴒𐴧𐴟𐴥𐴕𐴠 𐴀𐴞𐴕𐴑𐴝𐴌 𐴒𐴡𐴌𐴞𐴥 𐴁𐴝𐴦𐴊𐴠 𐴉𐴞𐴃𐴡𐴌𐴠 𐴈𐴡𐴀𐴌 𐴊𐴠, ”𐴀𐴟𐴥𐴎𐴟𐴌, 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴊𐴠 𐴎𐴝𐴔 𐴒𐴡𐴌𐴞𐴥 𐴃𐴟𐴣𐴀𐴝𐴥𐴣𐴌𐴠 𐴏𐴝𐴘𐴌𐴡𐴥 𐴋𐴝𐴥𐴑𐴡𐴃𐴧𐴟 𐴄𐴠𐴥𐴓𐴝𐴄𐴠𐴓𐴞 𐴒𐴡𐴌𐴠𐴥𐴌.“

⁴⁶𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴇𐴡𐴕𐴧𐴗𐴝𐴤𐴒𐴧𐴗𐴝𐴘𐴠 𐴀𐴝𐴣𐴀𐴌𐴠𐴥 𐴏𐴟𐴥𐴘𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴃𐴧𐴟 𐴑𐴟𐴊𐴟𐴌𐴟𐴃𐴢 𐴕𐴠𐴦𐴓𐴞 𐴒𐴞𐴦𐴘𐴠𐴥 𐴊𐴠 𐴀𐴝𐴀𐴛 𐴇𐴡𐴘 𐴉𐴝𐴙𐴅𐴧𐴞𐴥.“

⁴⁷𐴇𐴠𐴥 𐴔𐴝𐴘𐴝𐴉𐴟𐴖𐴝 𐴖𐴝𐴘𐴠 𐴎𐴠𐴃𐴧𐴡𐴥𐴃𐴢 𐴇𐴞𐴥𐴁𐴝 𐴇𐴝𐴥𐴌𐴞 𐴕𐴡𐴥 𐴉𐴝𐴌𐴠 𐴊𐴠 𐴊𐴠𐴙𐴑𐴧𐴠𐴥, 𐴇𐴞𐴥𐴁𐴝 𐴇𐴝𐴉𐴞-𐴇𐴝𐴉𐴞 𐴀𐴝𐴀𐴘𐴢 𐴀𐴞𐴥𐴁𐴝𐴌 𐴔𐴟𐴀𐴕𐴃𐴟 𐴀𐴟𐴣𐴀𐴘𐴃𐴡𐴘 𐴉𐴡𐴙𐴅𐴧𐴠𐴥, 𐴀𐴝𐴦𐴌 𐴇𐴞𐴥𐴁𐴝𐴘𐴠 𐴑𐴞𐴘𐴡𐴥𐴓𐴧𐴝 𐴀𐴞𐴥𐴁𐴝𐴌𐴠 𐴏𐴟𐴥𐴘𐴧𐴠, 𐴀𐴠𐴊𐴧𐴠 𐴇𐴞𐴥𐴁𐴝 𐴑𐴠𐴀𐴕𐴒𐴡𐴌𐴞 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴒𐴡𐴔 𐴀𐴡𐴥𐴘𐴒𐴞𐴘𐴡𐴘, 𐴇𐴞𐴥𐴀𐴕 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌 𐴔𐴟𐴀𐴕𐴃𐴟 𐴁𐴡𐴘𐴧𐴝𐴕 𐴒𐴡𐴙𐴅𐴧𐴠𐴥.⁴⁸𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴡 𐴎𐴞𐴥𐴀, 𐴃𐴡𐴌 𐴀𐴞𐴔𐴝𐴕𐴠 𐴃𐴡𐴌𐴠𐴥 𐴒𐴡𐴔 𐴒𐴡𐴙𐴅𐴧𐴠𐴥; 𐴐𐴝𐴥𐴕𐴃𐴞𐴌 𐴏𐴝𐴥𐴀𐴣𐴃𐴠 𐴎𐴝𐴦𐴒𐴡𐴥𐴘.“

⁴⁹𐴀𐴞𐴥𐴁𐴝 𐴈𐴡𐴃𐴝𐴤 𐴈𐴡𐴖𐴝𐴤𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴀𐴡𐴑𐴃𐴡𐴥𐴃𐴢, 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴌 𐴏𐴡𐴥𐴊𐴧𐴝𐴌 𐴒𐴗𐴝𐴌 𐴒𐴡𐴥𐴌𐴡𐴃𐴧𐴟 𐴀𐴠𐴎𐴧𐴡𐴕𐴠 𐴀𐴝𐴀𐴘𐴢 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴎𐴞𐴥𐴀 𐴎𐴟𐴌𐴝𐴘𐴒𐴞𐴘𐴡𐴥𐴘; 𐴀𐴟𐴏𐴃𐴝𐴃𐴡𐴌𐴠 𐴀𐴝𐴌 𐴉𐴠𐴌𐴠𐴐𐴝𐴕 𐴕𐴡 𐴒𐴡𐴙𐴅𐴧𐴡𐴥.“

⁵⁰𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴇𐴞𐴥𐴘𐴝𐴕 𐴉𐴟𐴥𐴕𐴞 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴕𐴡 𐴋𐴡𐴦𐴌𐴝𐴘𐴧𐴡𐴥, 𐴏𐴞𐴌𐴞𐴥𐴉𐴢 𐴁𐴞𐴐𐴧𐴝𐴥𐴐𐴢 𐴒𐴡𐴌𐴡𐴤, 𐴇𐴞𐴥𐴁𐴝 𐴒𐴡𐴔 𐴀𐴡𐴥𐴘𐴎𐴝𐴘𐴁𐴡𐴘.“

⁵¹𐴀𐴞𐴥𐴁𐴝 𐴒𐴡𐴥𐴌𐴡𐴃𐴢 𐴉𐴡𐴀𐴣𐴏𐴞, 𐴉𐴞𐴃𐴡𐴌, 𐴘𐴡𐴇𐴝𐴥𐴕𐴧𐴝, 𐴘𐴝𐴑𐴟𐴁𐴢, 𐴀𐴠𐴊𐴧𐴠 𐴔𐴝𐴘𐴝𐴉𐴟𐴖𐴝𐴌 𐴁𐴝𐴉𐴔𐴝𐴦𐴌𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴡𐴌𐴠 𐴀𐴞𐴥𐴁𐴝𐴌 𐴉𐴟𐴥𐴖𐴝𐴣𐴃𐴞 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴃𐴡 𐴕𐴡𐴥 𐴊𐴠.⁵²𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴇𐴞𐴥𐴁𐴝𐴓𐴧𐴝 𐴈𐴝𐴣𐴊𐴝𐴈𐴝𐴍𐴞 𐴒𐴡𐴌𐴝𐴥𐴃𐴢 𐴀𐴠𐴊𐴧𐴠 𐴁𐴟𐴑 𐴑𐴞𐴓𐴝𐴃𐴢 𐴀𐴝𐴐𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴕𐴡 𐴈𐴝𐴣𐴊𐴞𐴘𐴡𐴥, 𐴀𐴞𐴁𐴝𐴤 𐴔𐴡𐴙𐴅𐴧𐴠𐴥 𐴊𐴠 𐴕𐴡, 𐴁𐴡𐴥𐴓𐴑𐴠 𐴒𐴟𐴥𐴔 𐴎𐴝𐴌 𐴊𐴠.“

⁵³𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴓𐴡𐴥𐴘 𐴀𐴝𐴥𐴣𐴐𐴝𐴃𐴢 𐴊𐴡𐴙𐴅𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴇𐴡𐴘 𐴉𐴝𐴌𐴠 𐴊𐴠 𐴑𐴞 𐴇𐴞𐴥𐴁𐴝 𐴔𐴡𐴌𐴞𐴒𐴞𐴘𐴡𐴥𐴘.⁵⁴𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴇𐴞𐴥𐴁𐴝𐴌 𐴀𐴝𐴥𐴃𐴢 𐴊𐴡𐴥𐴌𐴞 𐴋𐴝𐴑 𐴔𐴝𐴌𐴞 𐴈𐴡𐴀𐴌 𐴊𐴠, ”𐴀𐴡 𐴎𐴞𐴥𐴀, 𐴀𐴟𐴄𐴢.“⁵⁵𐴇𐴠𐴥𐴃𐴟𐴕𐴡𐴃𐴢 𐴇𐴞𐴥𐴁𐴝𐴌 𐴉𐴡𐴌𐴝𐴕 𐴖𐴝𐴦𐴉𐴠𐴏𐴢 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴇𐴞𐴥𐴁𐴝 𐴀𐴠𐴥𐴇𐴡𐴕 𐴀𐴟𐴍𐴞𐴤 𐴃𐴞𐴥𐴘𐴝𐴘𐴧𐴠. 𐴁𐴝𐴦𐴊𐴠 𐴈𐴝𐴥𐴘𐴃𐴡 𐴇𐴞𐴥𐴁𐴝𐴌𐴠 𐴑𐴠𐴏𐴧𐴟𐴥 𐴊𐴞𐴦 𐴁𐴡𐴓𐴧𐴝 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠.⁵⁶𐴇𐴞𐴥𐴁𐴝𐴌 𐴁𐴝𐴉𐴔𐴝𐴦 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴓𐴒𐴡𐴘; 𐴔𐴡𐴕𐴃𐴡𐴌 𐴎𐴞𐴘𐴝𐴥𐴕 𐴀𐴡𐴥𐴘𐴧𐴠 𐴇𐴞𐴥𐴘𐴝𐴕 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴡 𐴇𐴡𐴘 𐴁𐴡𐴓𐴧𐴝 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴕𐴞𐴐𐴡𐴥𐴃𐴢 𐴒𐴡𐴙𐴅𐴧𐴠𐴥.

The Word for the World International

https://app.library.bible/content/87faca8b51c22590