ອ່ານ 𐴓𐴟𐴑𐴝𐴥𐴏𐴢 6

𐴓𐴟𐴑𐴝𐴥𐴏𐴢6

𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴒𐴞𐴣𐴘𐴟𐴌 𐴃𐴟𐴥𐴌 𐴃𐴟𐴓𐴝𐴤

¹𐴀𐴠𐴑𐴁𐴝𐴌 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴞𐴏𐴝𐴤 𐴒𐴞𐴣𐴘𐴟𐴌 𐴑𐴟𐴣𐴍𐴝𐴤 𐴁𐴝𐴥𐴘 𐴎𐴝𐴦𐴌, 𐴀𐴝𐴦𐴌 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴒𐴞𐴣𐴘𐴟𐴌 𐴃𐴟𐴥𐴌 𐴀𐴡𐴥𐴑𐴧𐴡𐴓𐴢 𐴃𐴟𐴓𐴞𐴤 𐴀𐴝𐴥𐴃𐴠 𐴋𐴡𐴓𐴞-𐴋𐴡𐴓𐴞 𐴈𐴝𐴥𐴀𐴃𐴢 𐴊𐴡𐴙𐴅𐴧𐴠.²𐴔𐴡𐴕𐴃𐴡𐴌 𐴇𐴡𐴊𐴟𐴥𐴕 𐴉𐴠𐴥𐴌𐴡𐴐𐴞𐴘𐴠 𐴈𐴡𐴀𐴌 𐴊𐴠, ”𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴎𐴞𐴘𐴝𐴥𐴕 𐴒𐴡𐴌𐴞𐴥𐴁𐴝𐴌 𐴔𐴝𐴕𐴝𐴥, 𐴃𐴟𐴣𐴀𐴝𐴥𐴌𐴝 𐴇𐴞𐴥𐴘𐴝𐴕 𐴑𐴞𐴘𐴝𐴥 𐴒𐴡𐴌𐴡𐴤𐴌؟“

³𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴑𐴞𐴥 𐴘𐴝𐴀𐴕 𐴀𐴟𐴥𐴊𐴧𐴗𐴝 𐴕𐴡𐴥 𐴉𐴡𐴌𐴡𐴥, 𐴎𐴠𐴣𐴃𐴧𐴠𐴥 𐴊𐴝𐴖𐴟𐴊𐴢 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴡𐴃𐴧𐴟 𐴁𐴟𐴥𐴑 𐴓𐴝𐴙𐴒𐴧𐴞𐴥𐴓𐴢, 𐴇𐴠𐴥𐴣𐴃𐴧𐴠 𐴀𐴞𐴥𐴁𐴝𐴘𐴠 𐴑𐴞𐴦 𐴒𐴡𐴙𐴅𐴧𐴞𐴥𐴓𐴢 𐴊𐴠𐴥؟⁴𐴀𐴞𐴥𐴁𐴝𐴘𐴠 𐴃𐴡 𐴀𐴝𐴓𐴧𐴝𐴌 𐴒𐴡𐴥𐴌𐴡𐴃𐴢 𐴒𐴡𐴥𐴙𐴓𐴧𐴠𐴒𐴡𐴘, 𐴀𐴝𐴦𐴌 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴂𐴠𐴦𐴐𐴢 𐴒𐴡𐴙𐴅𐴧𐴝𐴥 𐴌𐴟𐴄𐴞 𐴓𐴡𐴦𐴘𐴢 𐴈𐴝𐴥𐴀𐴙𐴓𐴢, 𐴎𐴞𐴀𐴕 𐴏𐴞𐴌𐴞𐴥𐴉𐴢 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴈𐴝𐴥𐴘𐴁𐴝𐴌 𐴀𐴠𐴎𐴝𐴎𐴡𐴃𐴢 𐴕𐴝𐴥𐴘. 𐴀𐴞𐴥𐴁𐴝𐴘𐴠 𐴇𐴞𐴥𐴀𐴕 𐴕𐴞𐴎𐴡𐴌 𐴏𐴝𐴥𐴀𐴣𐴃𐴞 𐴀𐴡𐴥𐴑𐴧𐴡𐴓𐴡𐴌𐴠 𐴘𐴡𐴥 𐴊𐴞𐴀𐴓𐴢.“⁵𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴡𐴥𐴙𐴓𐴊𐴠 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕𐴡𐴌 𐴔𐴝𐴓𐴞𐴑.“

𐴀𐴠𐴎𐴧𐴡𐴕 𐴉𐴟𐴥𐴖𐴝𐴕𐴝 𐴀𐴝𐴥𐴃𐴢 𐴀𐴡𐴓𐴝 𐴔𐴝𐴕𐴟𐴥𐴙𐴐𐴢

⁶𐴀𐴝𐴌𐴡𐴤 𐴀𐴠𐴥𐴒𐴧𐴗𐴝 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴞𐴏𐴝𐴤 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴢 𐴒𐴡𐴥𐴓𐴞 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠; 𐴇𐴠𐴥𐴍𐴠 𐴀𐴠𐴥𐴎𐴧𐴡𐴕 𐴀𐴠𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢, 𐴎𐴝𐴌 𐴊𐴠𐴕 𐴀𐴝𐴥𐴃𐴧𐴝𐴕 𐴉𐴟𐴥𐴖𐴝𐴘𐴒𐴞𐴘𐴡𐴘.⁷𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴘𐴠 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴒𐴡𐴔 𐴒𐴡𐴌𐴠𐴥 𐴕𐴠𐴥 𐴈𐴝𐴥𐴀𐴏𐴢 𐴕𐴡𐴎𐴡𐴌 𐴊𐴞 𐴏𐴝𐴀𐴘𐴢 𐴃𐴝𐴥𐴙𐴑𐴧𐴠, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴠𐴓𐴎𐴝𐴔 𐴓𐴝𐴒𐴝𐴘𐴁𐴝𐴥𐴌 𐴔𐴡𐴑𐴝 𐴉𐴝𐴦.⁸𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌 𐴁𐴝𐴥𐴉𐴝𐴕𐴞𐴌𐴠 𐴎𐴝𐴕𐴞, 𐴀𐴝𐴥𐴃𐴢 𐴉𐴟𐴥𐴖𐴝𐴕𐴝 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴟𐴍𐴡𐴥, 𐴀𐴠𐴍𐴠𐴥 𐴔𐴝𐴎𐴠𐴥 𐴃𐴞𐴥𐴘𐴡𐴒𐴝𐴘.“𐴃𐴡𐴥𐴘 𐴘𐴡𐴥𐴒𐴧𐴗𐴝 𐴀𐴟𐴍𐴞𐴤 𐴃𐴞𐴥𐴘𐴝𐴘𐴧𐴠.

⁹𐴃𐴝𐴌𐴉𐴡𐴌𐴠 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴀𐴠𐴑𐴧𐴝𐴥𐴕 𐴏𐴟𐴥𐴖𐴝𐴓𐴢 𐴒𐴡𐴌𐴞𐴥, 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴒𐴡𐴔 𐴈𐴝𐴔 𐴒𐴡𐴌𐴞𐴥𐴁𐴝𐴌 𐴎𐴝𐴘𐴠𐴏𐴢 𐴀𐴝𐴏𐴠𐴤 𐴕𐴠𐴥 𐴕𐴝𐴥𐴑𐴞 𐴈𐴡𐴥𐴌𐴝𐴉𐴢 𐴒𐴡𐴌𐴞𐴥𐴁𐴝𐴌؟ 𐴉𐴡𐴌𐴝𐴕 𐴁𐴝𐴏𐴝𐴘𐴁𐴝𐴥𐴌 𐴕𐴠𐴥 𐴕𐴝𐴥𐴑𐴞 𐴇𐴝𐴥𐴓𐴝𐴑 𐴒𐴡𐴌𐴞𐴥𐴁𐴝𐴌؟“

¹⁰𐴀𐴞𐴥𐴁𐴝𐴘𐴠 𐴏𐴝𐴘𐴌𐴡𐴥𐴔𐴞𐴑𐴧𐴝 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌 𐴀𐴟𐴎𐴟 𐴏𐴝𐴀𐴘𐴢, 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴀𐴝𐴥𐴃𐴧𐴝𐴕 𐴁𐴝𐴌𐴡𐴥.“𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴙𐴅𐴧𐴠𐴥, 𐴇𐴠𐴥𐴃𐴟𐴕𐴡𐴃𐴢 𐴘𐴡𐴥𐴒𐴧𐴗𐴝𐴌 𐴀𐴝𐴥𐴃𐴧𐴝𐴕 𐴀𐴝𐴒𐴡𐴌 𐴋𐴡𐴥𐴙𐴓𐴧𐴝 𐴒𐴡𐴔 𐴀𐴡𐴥𐴘𐴒𐴞𐴘𐴡𐴘.¹¹𐴔𐴡𐴕𐴃𐴡𐴌 𐴀𐴞𐴥𐴃𐴝𐴌𐴝𐴃𐴧𐴟 𐴁𐴞𐴐𐴞𐴤 𐴒𐴟𐴐𐴧𐴝𐴤 𐴀𐴟𐴍𐴞𐴤𐴒𐴞𐴘𐴡𐴘, 𐴀𐴝𐴦𐴌 𐴀𐴠𐴎𐴧𐴡𐴕 𐴓𐴡𐴘 𐴀𐴠𐴎𐴧𐴡𐴕𐴠 𐴁𐴞𐴘𐴝𐴏𐴝𐴕𐴝 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠𐴒𐴡𐴘 𐴊𐴠, 𐴀𐴞𐴥𐴃𐴝𐴌𐴝𐴃𐴧𐴟 𐴀𐴞𐴏𐴝𐴤𐴌𐴠 𐴑𐴞𐴦 𐴒𐴡𐴌𐴝𐴥 𐴉𐴡𐴌𐴞𐴁𐴡𐴥.

𐴁𐴝𐴌𐴡𐴥 𐴎𐴡𐴕 𐴏𐴝𐴥𐴇𐴝𐴁𐴞 𐴁𐴝𐴏𐴞𐴥𐴓𐴡𐴘𐴧𐴠

¹²𐴇𐴠𐴥 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴀𐴠𐴑 𐴊𐴞𐴕، 𐴀𐴞𐴏𐴝𐴤 𐴊𐴟𐴖𐴝 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴠𐴒𐴧𐴗𐴝𐴤 𐴉𐴝𐴀𐴌𐴡𐴌 𐴖𐴡𐴌𐴠 𐴀𐴟𐴙𐴄𐴧𐴠𐴥𐴒𐴡𐴘, 𐴀𐴝𐴦𐴌 𐴉𐴟𐴌𐴝 𐴌𐴝𐴙𐴃𐴢 𐴀𐴝𐴓𐴧𐴝𐴌 𐴇𐴝𐴣𐴏𐴠 𐴊𐴟𐴖𐴝 𐴒𐴡𐴌𐴝𐴥𐴃𐴢 𐴈𐴝𐴍𐴝𐴘𐴧𐴠𐴥.¹³𐴎𐴠𐴣𐴃𐴧𐴠𐴥 𐴊𐴞𐴕 𐴀𐴡𐴥𐴘𐴧𐴠, 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴃𐴝𐴘 𐴀𐴞𐴥𐴃𐴝𐴌𐴝𐴃𐴧𐴟 𐴁𐴝𐴌𐴡𐴥 𐴎𐴡𐴕 𐴁𐴝𐴏𐴞𐴥𐴓𐴡𐴘𐴧𐴠, 𐴎𐴠𐴃𐴝𐴌𐴝𐴤𐴌𐴠 𐴀𐴞𐴥𐴁𐴝𐴘𐴠 𐴏𐴝𐴥𐴇𐴝𐴁𐴞 𐴇𐴡𐴘 𐴓𐴡𐴑𐴡𐴥𐴁𐴢 𐴊𐴞𐴘𐴠𐴥.¹⁴𐴀𐴞𐴥𐴃𐴝𐴌𐴝 𐴀𐴡𐴥𐴙𐴓𐴊𐴠: 𐴏𐴝𐴥𐴘𐴔𐴡𐴕 𐴎𐴝𐴌𐴠𐴥 𐴀𐴞𐴥𐴁𐴝𐴘𐴠 𐴉𐴞𐴃𐴡𐴌 𐴕𐴝𐴔 𐴊𐴞𐴘𐴠𐴥, 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴁𐴝𐴥𐴘 𐴀𐴠𐴕𐴊𐴠𐴌𐴞𐴘𐴝𐴏𐴢; 𐴀𐴝𐴦𐴌 𐴘𐴝𐴑𐴟𐴁𐴢, 𐴘𐴡𐴇𐴝𐴥𐴕𐴧𐴝, 𐴉𐴞𐴓𐴞𐴥𐴂𐴢, 𐴁𐴝𐴌𐴃𐴡𐴥𐴓𐴡𐴔𐴞𐴘𐴡,¹⁵𐴔𐴡𐴃𐴞, 𐴃𐴡𐴥𐴔𐴝𐴏𐴢, 𐴀𐴝𐴓𐴉𐴝𐴥𐴘𐴧𐴝𐴏𐴡𐴌 𐴉𐴟𐴖𐴝 𐴘𐴝𐴑𐴟𐴁𐴢, 𐴏𐴝𐴥𐴘𐴔𐴡𐴕 𐴎𐴞𐴁𐴝𐴤𐴌𐴠 𐴎𐴠𐴥𐴓𐴡𐴃𐴢 𐴈𐴡𐴀,¹⁶𐴘𐴝𐴑𐴟𐴁𐴡𐴌 𐴉𐴟𐴖𐴝 𐴘𐴡𐴇𐴟𐴥𐴊𐴝, 𐴀𐴠𐴊𐴧𐴠 𐴘𐴡𐴇𐴟𐴥𐴊𐴝 𐴀𐴞𐴏𐴑𐴝𐴥𐴌𐴞𐴘𐴠𐴃𐴢 𐴎𐴞𐴁𐴝𐴤 𐴊𐴡𐴥𐴌𐴞𐴊𐴡𐴘𐴝 𐴀𐴡𐴥𐴀𐴙𐴓𐴢.

𐴀𐴞𐴏𐴝𐴤𐴌 𐴃𐴝𐴦𐴓𐴞𐴔 𐴀𐴠𐴊𐴧𐴠 𐴁𐴞𐴘𐴝𐴌𐴝𐴔 𐴒𐴡𐴔 𐴒𐴡𐴌𐴝𐴥

¹⁷𐴀𐴞𐴏𐴝𐴤 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴓𐴝𐴔𐴞 𐴀𐴝𐴀𐴘𐴢 𐴀𐴠𐴑𐴧𐴝𐴥𐴕 𐴉𐴟𐴥𐴀𐴝𐴙𐴕𐴧𐴝 𐴎𐴝𐴒𐴝𐴃𐴢 𐴃𐴞𐴥𐴘𐴝𐴘𐴧𐴠; 𐴇𐴠𐴥𐴍𐴠 𐴀𐴞𐴥𐴁𐴝𐴌 𐴋𐴡𐴣𐴀𐴌 𐴀𐴠𐴑 𐴊𐴡𐴓𐴢 𐴀𐴟𐴔𐴧𐴡𐴃𐴢 𐴀𐴝𐴐𐴧𐴞𐴥𐴓𐴢, 𐴉𐴟𐴥𐴖𐴝𐴣𐴃𐴞 𐴀𐴝𐴌𐴡𐴤 𐴁𐴠𐴐𐴝𐴤𐴁𐴞𐴐𐴞𐴤 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴀𐴝𐴐𐴧𐴞𐴥𐴓𐴢 𐴎𐴠𐴃𐴝𐴌𐴝𐴤 𐴀𐴡𐴥𐴙𐴓𐴊𐴠 𐴘𐴡𐴇𐴟𐴥𐴊𐴞𐴘𐴝𐴌, 𐴅𐴠𐴌𐴟𐴥𐴏𐴝𐴓𐴠𐴔 𐴀𐴡𐴌, 𐴄𐴝𐴘𐴝𐴥𐴌 𐴀𐴡𐴌, 𐴀𐴠𐴊𐴧𐴠 𐴏𐴞𐴥𐴊𐴡𐴕𐴡𐴌 𐴊𐴡𐴙𐴅𐴧𐴝𐴌 𐴇𐴝𐴣𐴏𐴝𐴌,¹⁸𐴎𐴠𐴃𐴝𐴌𐴝𐴤 𐴀𐴞𐴥𐴁𐴝𐴌 𐴁𐴡𐴘𐴧𐴝𐴕 𐴉𐴟𐴥𐴕𐴞 𐴁𐴡𐴓𐴧𐴝 𐴀𐴠𐴊𐴧𐴠 𐴀𐴞𐴥𐴃𐴝𐴌𐴝𐴌 𐴁𐴞𐴘𐴝𐴌𐴝𐴔𐴡𐴃𐴧𐴟 𐴒𐴡𐴔 𐴀𐴡𐴥𐴘 𐴁𐴡𐴓𐴧𐴝 𐴁𐴠 𐴀𐴝𐴙𐴐𐴧𐴠𐴥. 𐴀𐴝𐴦𐴌 𐴎𐴠𐴃𐴝𐴌𐴝𐴤𐴌𐴠 𐴈𐴡𐴥𐴌𐴝𐴉𐴢 𐴅𐴞𐴕𐴠 𐴊𐴟𐴑 𐴊𐴠𐴌, 𐴀𐴞𐴥𐴃𐴝𐴌𐴝𐴌𐴠 𐴒𐴡𐴔 𐴒𐴡𐴌𐴝𐴥 𐴒𐴞𐴥𐴘𐴠.¹⁹𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴀𐴞𐴥𐴁𐴝𐴌𐴠 𐴏𐴟𐴥𐴘𐴁𐴝𐴌 𐴑𐴟𐴐𐴞𐴥𐴐𐴢 𐴒𐴡𐴙𐴅𐴧𐴞𐴥𐴓𐴢, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴃𐴧𐴟 𐴃𐴝𐴦𐴑𐴡𐴃𐴢 𐴕𐴠𐴦𐴓𐴞 𐴎𐴝𐴘 𐴁𐴠𐴒𐴧𐴟𐴥𐴕𐴡𐴌𐴠 𐴒𐴡𐴔 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.

𐴔𐴟𐴁𐴝𐴌𐴠𐴑 𐴀𐴠𐴊𐴧𐴠 𐴀𐴝𐴉𐴏𐴟𐴥𐴏𐴢

²⁰𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌 𐴀𐴟𐴎𐴟 𐴏𐴝𐴀𐴘𐴢 𐴈𐴡𐴀𐴌 𐴊𐴠:”𐴔𐴟𐴁𐴝𐴌𐴠𐴑 𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴒𐴡𐴌𐴞𐴉𐴢,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴃𐴡 𐴃𐴟𐴣𐴀𐴝𐴥𐴌𐴝𐴌.²¹𐴔𐴟𐴁𐴝𐴌𐴠𐴑 𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴀𐴠𐴇𐴡𐴥𐴕 𐴁𐴟𐴥𐴑𐴝,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴁𐴡𐴥𐴌𐴝𐴘𐴊𐴞𐴘𐴝 𐴎𐴝𐴘𐴁𐴡.𐴔𐴟𐴁𐴝𐴌𐴠𐴑 𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴀𐴠𐴇𐴡𐴥𐴕 𐴈𐴝𐴣𐴊𐴡𐴀𐴌,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴀𐴝𐴥𐴣𐴐𐴞𐴁𐴝.²²𐴔𐴟𐴁𐴝𐴌𐴠𐴑 𐴃𐴟𐴣𐴀𐴝𐴥𐴌𐴝 𐴎𐴠𐴣𐴃𐴧𐴠𐴥 𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝 𐴌𐴠𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴎𐴡𐴌𐴞𐴘𐴝 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴠𐴥,𐴔𐴝𐴀𐴌𐴟𐴔 𐴒𐴡𐴌𐴠𐴥, 𐴀𐴞𐴥𐴕𐴐𐴝 𐴒𐴡𐴌𐴠𐴥, 𐴀𐴠𐴊𐴧𐴠 𐴁𐴡𐴊𐴕𐴝𐴔 𐴒𐴡𐴌𐴠𐴥.

²³”𐴇𐴠𐴥 𐴊𐴞𐴕 𐴑𐴟𐴥𐴐𐴞 𐴒𐴡𐴙𐴅𐴧𐴡𐴥, 𐴀𐴠𐴊𐴧𐴠 𐴑𐴟𐴥𐴐𐴞𐴘𐴠 𐴉𐴝𐴥𐴓𐴢 𐴔𐴝𐴙𐴅𐴧𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴉𐴟𐴥𐴕𐴡, 𐴀𐴝𐴏𐴔𐴝𐴕𐴡𐴃𐴢 𐴃𐴟𐴣𐴀𐴝𐴥𐴌𐴝𐴓𐴧𐴝 𐴋𐴡𐴣𐴀𐴌 𐴁𐴡𐴐𐴧𐴞𐴥𐴐𐴢 𐴀𐴝𐴏𐴠𐴤. 𐴇𐴠𐴥𐴕𐴊𐴞𐴓𐴧𐴝 𐴃𐴡 𐴀𐴞𐴥𐴃𐴝𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌𐴠 𐴘𐴡𐴥 𐴒𐴡𐴙𐴃𐴧𐴡𐴥.²⁴𐴔𐴡𐴕𐴃𐴡𐴌 𐴀𐴝𐴉𐴏𐴟𐴥𐴏𐴢 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴎𐴠𐴃𐴝𐴌𐴝𐴤 𐴃𐴟𐴖𐴝𐴚𐴒𐴡𐴌,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴐𐴟𐴥𐴑 𐴁𐴠𐴒𐴧𐴟𐴥𐴕 𐴀𐴠𐴍𐴠𐴥 𐴉𐴝𐴘𐴉𐴠𐴓𐴝𐴘𐴧𐴡.²⁵𐴀𐴝𐴉𐴏𐴟𐴥𐴏𐴢 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴎𐴠𐴃𐴝𐴌𐴝𐴤 𐴘𐴝𐴓𐴝 𐴉𐴠𐴄𐴢 𐴁𐴡𐴥𐴌𐴝𐴘 𐴉𐴝𐴌𐴡𐴀𐴌,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴁𐴟𐴥𐴑𐴝 𐴀𐴡𐴥𐴘𐴁𐴝.𐴀𐴝𐴉𐴏𐴟𐴥𐴏𐴢 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴎𐴠𐴃𐴝𐴌𐴝𐴤 𐴘𐴝𐴓𐴝 𐴀𐴝𐴥𐴣𐴐𐴡𐴌,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴉𐴠𐴌𐴠𐴐𐴝𐴕 𐴀𐴡𐴥𐴘𐴁𐴝 𐴀𐴠𐴊𐴧𐴠 𐴈𐴝𐴣𐴊𐴝𐴈𐴝𐴍𐴞 𐴒𐴡𐴌𐴞𐴥𐴁𐴝.²⁶𐴀𐴝𐴉𐴏𐴟𐴥𐴏𐴢 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴎𐴠𐴣𐴃𐴧𐴠𐴥 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴠 𐴃𐴟𐴣𐴀𐴝𐴥𐴌𐴝𐴌 𐴕𐴝𐴔 𐴒𐴡𐴌𐴠𐴥,𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴠𐴥𐴕𐴊𐴞𐴓𐴧𐴝 𐴃𐴡 𐴀𐴞𐴥𐴃𐴝𐴌𐴝𐴌 𐴁𐴝𐴉𐴊𐴝𐴊𐴝 𐴀𐴡𐴥𐴑𐴧𐴡𐴓𐴠 𐴔𐴞𐴏𐴝𐴥 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌𐴠 𐴘𐴡𐴥 𐴒𐴡𐴙𐴃𐴧𐴡𐴥.

𐴊𐴟𐴐𐴧𐴡𐴕𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤

²⁷”𐴓𐴠𐴑𐴞𐴕 𐴃𐴟𐴣𐴀𐴝𐴥𐴌𐴝 𐴎𐴠𐴃𐴝𐴌𐴝𐴤 𐴉𐴟𐴥𐴕𐴡𐴌, 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌: 𐴕𐴞𐴎𐴡𐴌 𐴊𐴟𐴐𐴧𐴡𐴕𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴅𐴧𐴡𐴥; 𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴌𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝𐴌𐴠 𐴁𐴝𐴥𐴓𐴝𐴘 𐴒𐴡𐴙𐴅𐴧𐴡𐴥;²⁸𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴌 𐴖𐴡𐴌𐴠 𐴒𐴡𐴎𐴧𐴡𐴁𐴢 𐴊𐴠, 𐴀𐴞𐴥𐴃𐴝𐴌𐴝𐴌𐴠 𐴁𐴡𐴌𐴈𐴡𐴃𐴢 𐴊𐴞𐴘𐴡; 𐴎𐴠𐴃𐴝𐴌𐴝𐴤 𐴃𐴟𐴣𐴀𐴝𐴥𐴌𐴝𐴌𐴠 𐴁𐴡𐴊𐴏𐴡𐴥𐴓𐴧𐴟𐴑 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴝𐴓𐴧𐴝 𐴊𐴟𐴖𐴝 𐴒𐴡𐴙𐴅𐴧𐴡𐴥.²⁹𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴣𐴌𐴠 𐴀𐴠𐴑 𐴒𐴝𐴓𐴏𐴝𐴁𐴝 𐴏𐴝𐴥𐴘 𐴏𐴟𐴖𐴝𐴌 𐴔𐴝𐴌𐴠, 𐴀𐴞𐴥𐴃𐴝𐴌𐴠 𐴀𐴡 𐴋𐴝𐴥𐴑 𐴀𐴡𐴥 𐴉𐴞𐴥𐴌𐴝𐴘𐴊𐴞𐴘𐴡; 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴣𐴌 𐴏𐴝𐴊𐴧𐴡𐴌 𐴓𐴡𐴘𐴎𐴝𐴒𐴡𐴥𐴘, 𐴀𐴞𐴥𐴃𐴝𐴌𐴠 𐴃𐴟𐴣𐴀𐴝𐴥𐴣𐴌 𐴑𐴟𐴌𐴟𐴃𐴝 𐴘𐴡𐴥 𐴓𐴡𐴘𐴎𐴝𐴘𐴃𐴡𐴥 𐴔𐴝𐴕𐴝𐴥 𐴕𐴡 𐴒𐴡𐴙𐴅𐴧𐴡𐴥.³⁰𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴣𐴃𐴧𐴟 𐴔𐴝𐴒𐴠, 𐴀𐴞𐴥𐴃𐴝𐴌𐴠 𐴊𐴞𐴦𐴘𐴡; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴣𐴌 𐴅𐴞𐴕𐴞𐴥𐴐𐴢 𐴓𐴡𐴘𐴎𐴝𐴒𐴡𐴥𐴘, 𐴀𐴞𐴥𐴃𐴝𐴃𐴧𐴟 𐴉𐴞𐴥𐴌𐴝𐴘 𐴕𐴡 𐴔𐴝𐴒𐴞𐴘𐴡𐴥.³¹𐴔𐴝𐴙𐴕𐴐𐴡𐴥𐴌𐴠 𐴀𐴟𐴕𐴊𐴞𐴓𐴧𐴝 𐴒𐴡𐴌𐴡𐴤 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴏𐴡𐴀 𐴊𐴠, 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴣𐴌𐴠 𐴒𐴡𐴌𐴡𐴥𐴗𐴑.

³²”𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴐𐴟𐴥𐴊𐴟 𐴃𐴟𐴣𐴀𐴝𐴥𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴏𐴟𐴥𐴖𐴝𐴁𐴢 𐴑𐴞𐴘𐴡𐴥𐴓𐴧𐴝 𐴉𐴝𐴘𐴁𐴝؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴠 𐴀𐴟𐴥𐴊𐴧𐴗𐴝 𐴃𐴡 𐴕𐴞𐴎𐴡𐴌𐴠𐴥 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴠𐴥.³³𐴀𐴝𐴦𐴌 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴐𐴟𐴥𐴊𐴟 𐴃𐴟𐴣𐴀𐴝𐴥𐴌𐴝𐴌𐴠 𐴁𐴝𐴥𐴓𐴝𐴘 𐴒𐴡𐴌𐴠𐴥 𐴊𐴠 𐴀𐴞𐴥𐴃𐴝𐴌𐴝𐴌𐴠 𐴁𐴝𐴥𐴓𐴝𐴘 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴏𐴟𐴥𐴖𐴝𐴁𐴢 𐴑𐴞𐴘𐴡𐴥𐴓𐴧𐴝 𐴉𐴝𐴘𐴁𐴝؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴠 𐴀𐴟𐴥𐴊𐴧𐴗𐴝 𐴃𐴡 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴠𐴥.³⁴𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴉𐴞𐴥𐴌𐴝𐴘 𐴉𐴝𐴘𐴁𐴝𐴌 𐴀𐴝𐴐𐴝𐴤 𐴒𐴡𐴌𐴡𐴤 𐴊𐴠 𐴇𐴠𐴥 𐴔𐴝𐴕𐴟𐴥𐴙𐴐𐴢 𐴀𐴞𐴥𐴃𐴝𐴌𐴝𐴌𐴠 𐴁𐴠 𐴀𐴟𐴊𐴝𐴥𐴌 𐴊𐴡𐴥, 𐴃𐴡𐴥𐴀𐴘𐴓𐴠 𐴏𐴟𐴥𐴖𐴝𐴁𐴢 𐴑𐴞𐴘𐴡𐴥𐴓𐴧𐴝 𐴉𐴝𐴘𐴁𐴝؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴠 𐴀𐴟𐴥𐴊𐴧𐴗𐴝 𐴃𐴡 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴌𐴠 𐴀𐴟𐴊𐴝𐴥𐴌 𐴊𐴠𐴥, 𐴎𐴠𐴀𐴕𐴠 𐴁𐴠𐴒𐴧𐴟𐴥𐴕 𐴉𐴞𐴥𐴌𐴝𐴘 𐴉𐴝𐴦.³⁵𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌 𐴊𐴟𐴐𐴧𐴡𐴕𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴡𐴤, 𐴀𐴞𐴥𐴃𐴝𐴌𐴝𐴌 𐴁𐴝𐴥𐴓𐴝𐴘 𐴒𐴡𐴌𐴡𐴤, 𐴀𐴝𐴦𐴌 𐴑𐴠𐴏𐴧𐴟𐴥 𐴉𐴞𐴥𐴌𐴝𐴘 𐴉𐴝𐴘𐴁𐴝𐴌 𐴀𐴝𐴐𐴝𐴤 𐴕𐴡 𐴒𐴡𐴌𐴞𐴥 𐴀𐴟𐴊𐴝𐴥𐴌 𐴊𐴡𐴥; 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴓𐴧𐴝 𐴁𐴡𐴐𐴧𐴞𐴥𐴐𐴢 𐴋𐴡𐴣𐴀𐴌 𐴃𐴝𐴥𐴑𐴞𐴁𐴡, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝 𐴃𐴝𐴥𐴓𐴝𐴌 𐴉𐴟𐴀𐴝𐴙𐴕 𐴄𐴡𐴥𐴀𐴌𐴞𐴁𐴝, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝 𐴕𐴞𐴎𐴠 𐴘𐴡𐴥 𐴃𐴡 𐴕𐴝𐴐𐴟𐴥𐴑𐴟𐴌 𐴀𐴠𐴊𐴧𐴠 𐴈𐴡𐴥𐴌𐴝𐴉𐴢 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴌𐴠𐴥.³⁶𐴌𐴝𐴇𐴝𐴥𐴔 𐴊𐴞𐴓𐴢 𐴀𐴡𐴓𐴝 𐴀𐴡𐴥, 𐴎𐴠𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴢 𐴀𐴡𐴥 𐴌𐴝𐴇𐴝𐴥𐴔 𐴊𐴞𐴓𐴢 𐴀𐴡𐴓𐴝.

𐴀𐴝𐴌 𐴀𐴠𐴎𐴧𐴡𐴕𐴡𐴌 𐴁𐴞𐴏𐴝𐴌 𐴕𐴡 𐴒𐴡𐴙𐴅𐴧𐴡𐴥

³⁷”𐴀𐴝𐴌 𐴀𐴠𐴎𐴧𐴡𐴕𐴡𐴌 𐴈𐴡𐴏𐴟𐴥𐴌𐴞 𐴕𐴡 𐴊𐴡𐴙𐴅𐴧𐴡, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴌 𐴈𐴡𐴏𐴟𐴥𐴌𐴞 𐴘𐴡𐴥 𐴊𐴡𐴥𐴌𐴝 𐴕𐴡 𐴎𐴝𐴘𐴁𐴡. 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴈𐴡𐴏𐴟𐴥𐴌𐴁𐴡𐴕 𐴕𐴡 𐴄𐴡𐴥𐴀𐴌𐴝𐴘𐴧𐴡, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴌𐴠 𐴘𐴡 𐴈𐴡𐴏𐴟𐴥𐴌𐴁𐴡𐴕 𐴄𐴡𐴥𐴀𐴌𐴝 𐴕𐴡 𐴎𐴝𐴘𐴁𐴡. 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴡, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴌𐴠 𐴘𐴡𐴥 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴝 𐴎𐴝𐴘𐴁𐴡.³⁸𐴊𐴞𐴦𐴘𐴡, 𐴃𐴡𐴥𐴘 𐴃𐴟𐴣𐴀𐴝𐴥𐴌𐴝𐴌𐴠 𐴘𐴡𐴥 𐴊𐴞𐴦𐴘𐴝 𐴎𐴝𐴘𐴁𐴡. 𐴏𐴞𐴁𐴞-𐴏𐴞𐴁𐴞 𐴀𐴠𐴊𐴧𐴠 𐴓𐴝𐴌𐴞-𐴓𐴝𐴌𐴞 𐴁𐴝𐴀𐴘𐴢 𐴉𐴡𐴌𐴠 𐴉𐴝𐴥𐴚𐴒𐴡𐴌𐴞 𐴒𐴡𐴔 𐴔𐴝𐴉𐴠 𐴃𐴟𐴣𐴀𐴝𐴥𐴌𐴝𐴌 𐴑𐴟𐴏𐴧𐴝𐴥𐴃𐴢 𐴋𐴝𐴥𐴓𐴞𐴊𐴞𐴘𐴝 𐴎𐴝𐴘𐴁𐴡. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴎𐴠 𐴔𐴝𐴉𐴠 𐴊𐴡𐴦, 𐴃𐴟𐴣𐴀𐴝𐴥𐴌𐴝𐴌𐴠 𐴘𐴡𐴥 𐴇𐴠𐴥 𐴔𐴝𐴉𐴠 𐴁𐴠 𐴊𐴞𐴦𐴘𐴝 𐴎𐴝𐴘𐴁𐴡.“

³⁹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠 𐴔𐴠𐴀𐴏𐴝𐴓𐴢 𐴓𐴝𐴕 𐴀𐴡𐴥 𐴊𐴞𐴘𐴠𐴥, ”𐴀𐴠𐴑 𐴀𐴝𐴣𐴊𐴝𐴤𐴘𐴠 𐴑𐴞𐴥 𐴀𐴝𐴌𐴀𐴠𐴑 𐴀𐴝𐴣𐴊𐴝𐴤𐴌𐴠 𐴉𐴡𐴣𐴃𐴢 𐴊𐴝𐴈𐴝𐴤𐴘 𐴉𐴝𐴌𐴠؟ 𐴃𐴝𐴌𐴝𐴥 𐴊𐴟𐴕𐴞𐴥 𐴎𐴡𐴕 𐴑𐴞𐴥 𐴒𐴝𐴣𐴃𐴡𐴃𐴢 𐴕𐴡 𐴉𐴡𐴌𐴞𐴁𐴡𐴥 𐴕𐴠𐴥؟⁴⁰𐴐𐴝𐴥𐴌𐴞𐴃𐴢 𐴃𐴡 𐴕𐴞𐴎𐴡𐴌 𐴀𐴟𐴏𐴃𐴝𐴃𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌 𐴕𐴡, 𐴓𐴠𐴑𐴞𐴕 𐴎𐴝𐴃𐴧𐴟 𐴕𐴞𐴑𐴞 𐴉𐴟𐴌𐴝𐴉𐴟𐴌𐴞 𐴐𐴞𐴥𐴑𐴧𐴝 𐴀𐴡𐴥𐴘𐴎𐴝𐴒𐴡𐴘, 𐴀𐴞𐴥𐴃𐴠 𐴕𐴞𐴎𐴡𐴌 𐴀𐴟𐴏𐴃𐴝𐴃𐴡𐴌 𐴋𐴡𐴥𐴙𐴓𐴧𐴝 𐴁𐴠 𐴀𐴡𐴥𐴘𐴁𐴡.

⁴¹”𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘𐴡𐴌 𐴏𐴟𐴑𐴡𐴃𐴢 𐴀𐴝𐴏𐴠𐴤 𐴊𐴠 𐴇𐴝𐴥𐴓𐴢 𐴓𐴝𐴕 𐴑𐴞𐴘𐴝𐴥 𐴊𐴠𐴑𐴡𐴥𐴌, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴣𐴌 𐴕𐴞𐴎𐴡𐴌 𐴏𐴟𐴑𐴡𐴃𐴢 𐴀𐴝𐴏𐴠𐴤 𐴊𐴠 𐴇𐴡𐴊𐴧𐴝 𐴒𐴝𐴥𐴕 𐴃𐴡 𐴀𐴡𐴥𐴃𐴢 𐴕𐴡 𐴒𐴡𐴌𐴡𐴤𐴌؟⁴²𐴃𐴟𐴀𐴛 𐴎𐴠𐴃𐴧𐴡𐴥𐴃𐴢 𐴃𐴟𐴣𐴀𐴝𐴥𐴣𐴌 𐴏𐴟𐴑𐴡𐴃𐴢 𐴀𐴝𐴏𐴠𐴤 𐴊𐴠 𐴇𐴡𐴊𐴧𐴝 𐴒𐴝𐴥𐴕 𐴕𐴡 𐴊𐴠𐴑𐴡𐴥𐴌, 𐴃𐴡𐴥𐴘 𐴃𐴟𐴀𐴛 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘𐴡𐴌𐴠 𐴑𐴠𐴀𐴕𐴒𐴡𐴌𐴞 𐴈𐴡𐴀𐴌 𐴊𐴠, ’𐴁𐴝𐴥𐴘, 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴏𐴟𐴑𐴡𐴃𐴧𐴟 𐴇𐴝𐴥𐴓𐴢 𐴓𐴝𐴕 𐴕𐴠𐴦𐴓𐴝𐴘𐴉𐴠𐴥𐴓𐴝𐴘؟‘ 𐴀𐴡𐴥 𐴔𐴟𐴕𐴝𐴉𐴠𐴥𐴑! 𐴀𐴝𐴒𐴠 𐴃𐴟𐴣𐴀𐴝𐴥𐴣𐴌 𐴕𐴞𐴎𐴡𐴌 𐴏𐴟𐴑𐴡𐴃𐴧𐴟 𐴇𐴡𐴊𐴧𐴝 𐴒𐴝𐴥𐴕 𐴕𐴠𐴦𐴓𐴝𐴘𐴉𐴠𐴥𐴓𐴡, 𐴁𐴝𐴦𐴊𐴠 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘𐴡𐴌 𐴏𐴟𐴑𐴡𐴃𐴢 𐴀𐴝𐴏𐴠𐴤 𐴊𐴠 𐴇𐴝𐴥𐴓𐴢 𐴓𐴝𐴕 𐴕𐴠𐴦𐴓𐴝𐴘 𐴁𐴡𐴓𐴧𐴝 𐴏𐴝𐴥𐴉𐴢 𐴒𐴡𐴥𐴌𐴞 𐴊𐴠𐴑𐴞𐴥𐴁𐴝.

𐴒𐴝𐴏𐴢 𐴏𐴞𐴕𐴝𐴥 𐴎𐴝 𐴊𐴠 𐴒𐴟𐴓𐴝𐴘𐴠

⁴³”𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴒𐴡𐴔 𐴒𐴝𐴏𐴡𐴃𐴢 𐴃𐴡 𐴈𐴡𐴥𐴌𐴝𐴉𐴢 𐴒𐴟𐴓𐴝 𐴊𐴡𐴥𐴌𐴠 𐴊𐴠 𐴕𐴝𐴥𐴘, 𐴀𐴝𐴦𐴌 𐴈𐴡𐴥𐴌𐴝𐴉𐴢 𐴒𐴝𐴏𐴡𐴃𐴢 𐴒𐴡𐴔 𐴒𐴟𐴓𐴝 𐴊𐴡𐴥𐴌𐴠 𐴊𐴠 𐴕𐴝𐴥𐴘.⁴⁴𐴎𐴠 𐴇𐴡𐴕𐴡𐴤 𐴒𐴝𐴏𐴡𐴌𐴠 𐴘𐴞𐴥𐴁𐴝𐴌 𐴒𐴟𐴓𐴝𐴘𐴠 𐴁𐴠 𐴏𐴞𐴕𐴝𐴥 𐴎𐴝. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴔𐴝𐴙𐴕𐴐𐴠𐴥 𐴃𐴡 𐴑𐴠𐴣𐴍𐴝𐴁𐴡𐴕𐴡𐴃𐴧𐴟 𐴋𐴟𐴣𐴙𐴌 𐴒𐴟𐴓𐴝 𐴕𐴡 𐴉𐴝𐴌𐴠, 𐴘𐴝𐴥 𐴑𐴠𐴣𐴍𐴝𐴌 𐴎𐴝𐴥𐴓𐴞𐴃𐴧𐴟 𐴀𐴝𐴚𐴒𐴟𐴌 𐴕𐴡 𐴉𐴝𐴌𐴠.⁴⁵𐴒𐴡𐴔 𐴔𐴝𐴕𐴟𐴥𐴙𐴐𐴠 𐴕𐴞𐴎𐴡𐴌 𐴊𐴞𐴓𐴡𐴌 𐴒𐴡𐴔 𐴎𐴡𐴔𐴝𐴘𐴧𐴝𐴃𐴧𐴟 𐴒𐴡𐴔 𐴔𐴟𐴥𐴕 𐴕𐴠𐴦𐴓𐴝; 𐴀𐴝𐴦𐴌 𐴈𐴡𐴥𐴌𐴝𐴉𐴢 𐴔𐴝𐴕𐴟𐴥𐴙𐴐𐴠 𐴕𐴞𐴎𐴡𐴌 𐴊𐴞𐴓𐴡𐴌 𐴈𐴡𐴥𐴌𐴝𐴉𐴢 𐴎𐴡𐴔𐴝𐴘𐴧𐴝𐴃𐴧𐴟 𐴈𐴡𐴥𐴌𐴝𐴉𐴢 𐴉𐴟𐴕 𐴕𐴠𐴦𐴓𐴝. 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴝𐴌 𐴊𐴞𐴓𐴢 𐴎𐴞𐴀𐴕𐴠 𐴉𐴟𐴌𐴝𐴘𐴧𐴝, 𐴕𐴞𐴎𐴡𐴌 𐴔𐴟𐴑𐴠𐴥 𐴇𐴞𐴥𐴀𐴕 𐴁𐴠 𐴈𐴡𐴀.

𐴊𐴟𐴘 𐴎𐴡𐴕 𐴒𐴡𐴥𐴌 𐴁𐴝𐴕𐴡𐴘𐴝

⁴⁶”𐴃𐴟𐴣𐴀𐴝𐴥𐴌𐴝 𐴎𐴠𐴃𐴧𐴡𐴥𐴃𐴢 𐴀𐴝𐴀𐴛 𐴎𐴞𐴀𐴕 𐴈𐴡𐴀𐴘𐴢 𐴇𐴞𐴥𐴀𐴕 𐴀𐴝𐴔𐴡𐴥𐴓𐴢 𐴕𐴡 𐴒𐴡𐴌𐴡𐴤, 𐴃𐴡𐴥𐴘 𐴀𐴝𐴣𐴀𐴌𐴠𐴥 𐴑𐴞𐴘𐴡𐴥𐴓𐴧𐴝, ’𐴔𐴝𐴓𐴞𐴑, 𐴔𐴝𐴓𐴞𐴑‘ 𐴋𐴝𐴑𐴡؟⁴⁷𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴘𐴧𐴠𐴤 𐴀𐴝𐴦𐴌 𐴀𐴝𐴣𐴀𐴌 𐴁𐴡𐴘𐴧𐴝𐴕 𐴉𐴟𐴥𐴕𐴞 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴇𐴝𐴌 𐴋𐴡𐴥𐴙𐴓𐴧𐴝 𐴊𐴠 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴊𐴝𐴈𐴝𐴤𐴙𐴌:⁴⁸𐴀𐴞𐴥𐴃𐴠 𐴀𐴡𐴥𐴙𐴓𐴊𐴠 𐴀𐴠𐴕𐴊𐴞𐴓𐴧𐴝 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴡𐴌 𐴋𐴡𐴥𐴙𐴓𐴧𐴝, 𐴎𐴠𐴦𐴕𐴞𐴑𐴞 𐴒𐴡𐴥𐴌 𐴁𐴝𐴕𐴝𐴘𐴁𐴝𐴥𐴐𐴧𐴡𐴃𐴢 𐴔𐴟𐴌 𐴒𐴡𐴌𐴞 𐴔𐴠𐴍𐴞 𐴑𐴟𐴌𐴞𐴥 𐴐𐴞𐴥𐴓𐴡𐴃𐴢 𐴔𐴝𐴎𐴠𐴥 𐴁𐴟𐴕𐴞𐴘𐴝𐴊𐴞 𐴋𐴝𐴥𐴙𐴓𐴧𐴠. 𐴎𐴠𐴣𐴃𐴧𐴠𐴥 𐴉𐴝𐴕𐴞𐴥𐴁𐴝𐴕 𐴀𐴝𐴀𐴘𐴢 𐴇𐴠𐴥 𐴒𐴡𐴥𐴌 𐴒𐴝𐴥𐴕𐴡𐴃𐴢 𐴊𐴡𐴥𐴏𐴝𐴊𐴞𐴘𐴠 𐴇𐴞𐴥𐴘𐴝𐴕𐴡𐴌𐴠 𐴓𐴝𐴌𐴞 𐴕𐴡𐴥 𐴉𐴝𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴇𐴞𐴥𐴘𐴝𐴕 𐴃𐴡 𐴔𐴡𐴎𐴁𐴟𐴃𐴢 𐴒𐴡𐴌𐴞 𐴁𐴝𐴕𐴝 𐴒𐴞𐴘𐴠𐴥.⁴⁹𐴓𐴠𐴑𐴞𐴕 𐴎𐴠𐴦𐴕𐴞𐴑𐴞 𐴉𐴟𐴥𐴕𐴞 𐴀𐴝𐴔𐴡𐴥𐴓𐴢 𐴕𐴡 𐴒𐴡𐴌𐴠𐴥, 𐴀𐴞𐴥𐴃𐴠 𐴀𐴡𐴥𐴙𐴓𐴊𐴠 𐴀𐴠𐴕𐴊𐴞𐴓𐴧𐴝 𐴀𐴠𐴎𐴧𐴡𐴕 𐴔𐴝𐴕𐴟𐴥𐴙𐴐𐴡𐴌 𐴋𐴡𐴥𐴙𐴓𐴧𐴝, 𐴎𐴠𐴦𐴕𐴞𐴑𐴞 𐴇𐴡𐴕𐴡𐴤 𐴁𐴟𐴕𐴞𐴘𐴝𐴊𐴞 𐴕𐴡 𐴋𐴝𐴥𐴓𐴞 𐴔𐴠𐴍𐴞𐴌 𐴖𐴡𐴌𐴠 𐴀𐴠𐴑𐴧𐴝𐴥𐴕 𐴒𐴡𐴥𐴌 𐴁𐴝𐴕𐴝𐴘𐴧𐴠𐴥. 𐴃𐴡𐴥𐴘 𐴎𐴠𐴣𐴃𐴧𐴠𐴥 𐴉𐴝𐴕𐴞𐴥𐴁𐴝𐴕 𐴀𐴝𐴀𐴘𐴢 𐴇𐴠𐴥 𐴒𐴡𐴥𐴌 𐴒𐴝𐴥𐴕𐴡𐴃𐴢 𐴊𐴡𐴥𐴏𐴝𐴊𐴞𐴘𐴠, 𐴇𐴞𐴥𐴘𐴝𐴕 𐴀𐴠𐴥𐴇𐴡𐴕𐴡𐴌 𐴁𐴟𐴥𐴃𐴡𐴌𐴠 𐴉𐴡𐴌𐴞 𐴀𐴠𐴁𐴧𐴠 𐴕𐴝𐴐𐴢 𐴀𐴡𐴥𐴘𐴒𐴞𐴘𐴡𐴘.“

The Word for the World International

https://app.library.bible/content/87faca8b51c22590