𐴓𐴟𐴑𐴝𐴥𐴏𐴢 16を読んでください。

𐴓𐴟𐴑𐴝𐴥𐴏𐴢16

𐴁𐴠𐴘𐴔𐴝𐴕 𐴎𐴞𐴔𐴧𐴝𐴊𐴝𐴌𐴡𐴌 𐴔𐴠𐴀𐴏𐴝𐴓𐴢

¹𐴀𐴞𐴏𐴝𐴤𐴘𐴠 𐴐𐴝𐴥𐴌𐴞𐴃𐴧𐴟𐴕𐴡𐴌𐴠 𐴘𐴡𐴥 𐴈𐴡𐴀𐴌 𐴊𐴠, ”𐴀𐴠𐴎𐴧𐴡𐴕 𐴃𐴟𐴖𐴝𐴚𐴒𐴡𐴌 𐴔𐴝𐴕𐴟𐴥𐴙𐴐𐴡𐴃𐴧𐴟 𐴀𐴠𐴒𐴧𐴗𐴝𐴤 𐴎𐴞𐴔𐴧𐴝𐴊𐴝𐴌 𐴀𐴝𐴐𐴧𐴞𐴥𐴓𐴢, 𐴇𐴠𐴥 𐴎𐴞𐴔𐴧𐴝𐴊𐴝𐴌𐴒𐴗𐴝𐴥𐴘𐴠 𐴘𐴡𐴥𐴒𐴧𐴗𐴝𐴌 𐴊𐴡𐴥𐴕-𐴐𐴡𐴥𐴔𐴁𐴡𐴃𐴧𐴞 𐴏𐴝𐴥𐴌𐴇𐴝𐴌 𐴒𐴡𐴌𐴞𐴥𐴉𐴠𐴓𐴠𐴌 𐴈𐴡𐴀𐴘𐴢 𐴘𐴡𐴥𐴒𐴧𐴗𐴝𐴌 𐴇𐴝𐴣𐴏𐴠 𐴈𐴡𐴥𐴁𐴡𐴌 𐴉𐴡𐴀𐴣𐴙𐴐𐴧𐴠.²𐴃𐴡𐴥𐴘 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴠 𐴔𐴝𐴃𐴝𐴘 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ’𐴀𐴝𐴀𐴛 𐴃𐴡𐴌 𐴁𐴝𐴦𐴁𐴟𐴃𐴠 𐴀𐴞𐴀𐴕 𐴑𐴞𐴦 𐴉𐴟𐴥𐴕𐴞𐴌؟ 𐴃𐴡𐴌 𐴎𐴞𐴔𐴧𐴝𐴊𐴝𐴌𐴞 𐴈𐴝𐴔𐴡𐴌 𐴀𐴞𐴥𐴏𐴝𐴉𐴢 𐴊𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴘 𐴀𐴝𐴌 𐴎𐴞𐴔𐴧𐴝𐴊𐴝𐴌 𐴃𐴝𐴥𐴑𐴞 𐴕𐴡 𐴉𐴝𐴌𐴞𐴁𐴞𐴥.‘

³”𐴇𐴠𐴥𐴃𐴟𐴕𐴡𐴃𐴢 𐴎𐴞𐴔𐴧𐴝𐴊𐴝𐴌𐴒𐴗𐴝𐴥𐴘𐴠 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴈𐴡𐴀𐴌 𐴊𐴠, ’𐴘𐴝𐴦 𐴀𐴝𐴀𐴛 𐴑𐴞𐴦 𐴒𐴡𐴙𐴃𐴧𐴝𐴥𐴔؟ 𐴀𐴝𐴣𐴀𐴌 𐴒𐴞𐴌𐴡𐴥𐴏𐴠 𐴊𐴠 𐴀𐴝𐴣𐴀𐴃𐴧𐴟 𐴎𐴞𐴔𐴧𐴝𐴊𐴝𐴌𐴞 𐴈𐴝𐴔 𐴓𐴡𐴘𐴉𐴠𐴓𐴠𐴌. 𐴀𐴝𐴣𐴀𐴃𐴧𐴟 𐴊𐴠 𐴔𐴠𐴍𐴞 𐴈𐴝𐴍𐴞𐴃𐴡𐴥 𐴁𐴡𐴓𐴢 𐴕𐴝𐴥𐴘, 𐴀𐴝𐴦𐴌 𐴇𐴡𐴥𐴌𐴝𐴃𐴢 𐴔𐴝𐴒𐴞𐴃𐴠𐴥 𐴘𐴡𐴥 𐴐𐴡𐴥𐴌𐴡𐴔 𐴓𐴝𐴒𐴠.⁴𐴀𐴝𐴀𐴛 𐴑𐴞𐴦 𐴒𐴡𐴙𐴅𐴧𐴟𐴥𐴔 𐴊𐴠 𐴎𐴝𐴕𐴞 𐴉𐴝𐴙𐴅𐴧𐴞𐴥, 𐴎𐴠𐴀𐴕𐴠 𐴎𐴠𐴣𐴃𐴧𐴠𐴥 𐴀𐴝𐴣𐴀𐴃𐴧𐴟 𐴎𐴞𐴔𐴧𐴝𐴊𐴝𐴌𐴞 𐴈𐴝𐴔 𐴓𐴡𐴘𐴉𐴠𐴥𐴓𐴠, 𐴔𐴝𐴙𐴕𐴐𐴠𐴥 𐴀𐴝𐴣𐴀𐴌𐴠𐴥 𐴀𐴞𐴥𐴃𐴝𐴌𐴝𐴌 𐴒𐴡𐴥𐴌𐴡𐴃𐴢 𐴎𐴝𐴒𐴝 𐴊𐴠𐴦.‘

⁵”𐴃𐴡𐴥𐴘 𐴀𐴞𐴥𐴃𐴠 𐴎𐴡𐴕-𐴎𐴡𐴕 𐴒𐴡𐴌𐴞 𐴒𐴞𐴌𐴡𐴥𐴏𐴡𐴌 𐴉𐴡𐴦𐴃𐴞𐴊𐴝𐴥𐴌 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴃𐴝𐴘𐴧𐴠𐴥, 𐴔𐴝𐴃𐴝𐴘 𐴉𐴡𐴀𐴘𐴓𐴝 𐴖𐴝𐴌𐴠 𐴈𐴡𐴀𐴌 𐴊𐴠, ’𐴀𐴝𐴣𐴀𐴌 𐴒𐴞𐴌𐴡𐴥𐴏𐴠 𐴃𐴟𐴣𐴀𐴝𐴥𐴣𐴃𐴧𐴟 𐴉𐴡𐴦𐴃𐴞 𐴇𐴡𐴊𐴟𐴥𐴕 𐴉𐴝𐴦𐴌؟‘

⁶”𐴃𐴠𐴦 𐴈𐴡𐴀𐴌 𐴊𐴠, ’𐴕𐴡𐴖 𐴐𐴡𐴥𐴃𐴢 𐴒𐴠𐴓𐴡𐴥𐴔 𐴎𐴝𐴘𐴃𐴟𐴕 𐴃𐴠𐴓𐴢.‘
”𐴀𐴞𐴥𐴃𐴠 𐴈𐴡𐴀𐴌 𐴊𐴠, ’𐴃𐴟𐴣𐴀𐴝𐴥𐴣𐴌 𐴁𐴞𐴓𐴢 𐴓𐴝𐴥𐴕 𐴓𐴡𐴦, 𐴃𐴡𐴌𐴝𐴃𐴡𐴌𐴞 𐴁𐴡𐴀𐴘𐴢 𐴏𐴝𐴙𐴌-𐴐𐴡𐴥 𐴉𐴡𐴕𐴎𐴝𐴙𐴐𐴢 𐴒𐴠𐴓𐴡𐴥𐴔 𐴓𐴠𐴑𐴞𐴥𐴊𐴡.‘

⁷”𐴃𐴝𐴌𐴉𐴡𐴌𐴠 𐴀𐴞𐴥𐴃𐴠 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴈𐴡𐴀𐴌 𐴊𐴠, ’𐴃𐴟𐴣𐴀𐴝𐴥𐴣𐴃𐴧𐴟 𐴇𐴡𐴊𐴟𐴥𐴕 𐴉𐴝𐴦𐴌؟‘
”𐴃𐴠𐴦 𐴈𐴡𐴀𐴌 𐴊𐴠, ’𐴉𐴡𐴕𐴎𐴝𐴙𐴐𐴢 𐴔𐴡𐴕 𐴒𐴞𐴣𐴘𐴟.‘
”𐴀𐴞𐴥𐴃𐴠 𐴃𐴝𐴌𐴠𐴥 𐴈𐴡𐴀𐴌 𐴊𐴠, ’𐴃𐴟𐴣𐴀𐴝𐴥𐴣𐴌 𐴁𐴞𐴓𐴢 𐴓𐴝𐴥𐴕 𐴓𐴡𐴦, 𐴓𐴡𐴦𐴘𐴢 𐴏𐴝𐴓𐴞𐴐𐴢 𐴔𐴡𐴕 𐴓𐴠𐴑𐴞𐴥𐴊𐴡.‘

⁸”𐴒𐴞𐴌𐴡𐴥𐴏𐴠 𐴇𐴠𐴥 𐴁𐴠𐴘𐴔𐴝𐴕 𐴎𐴞𐴔𐴧𐴝𐴊𐴝𐴌𐴡𐴌 𐴏𐴝𐴓𐴝𐴥𐴑𐴞 𐴈𐴝𐴔 𐴊𐴠𐴑𐴞𐴥 𐴃𐴝𐴦𐴌𐴞𐴉𐴢 𐴒𐴡𐴙𐴅𐴧𐴠𐴥; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴠 𐴊𐴟𐴕𐴞𐴘𐴝𐴙𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴕𐴞𐴎𐴡𐴌 𐴋𐴡𐴥𐴙𐴓𐴧𐴝 𐴔𐴝𐴕𐴟𐴥𐴙𐴐𐴢 𐴓𐴡𐴥𐴘 𐴏𐴡𐴓𐴝𐴉𐴞𐴥𐴌𐴝 𐴒𐴡𐴌𐴝𐴥𐴃𐴢, 𐴕𐴟𐴌𐴡𐴌 𐴔𐴝𐴕𐴟𐴥𐴙𐴐𐴡𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴏𐴝𐴓𐴝𐴥𐴑.⁹𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴊𐴟𐴕𐴞𐴘𐴝𐴘𐴁𐴞 𐴊𐴡𐴥𐴕-𐴊𐴡𐴓𐴡𐴃𐴢 𐴓𐴡𐴥𐴘 𐴕𐴞𐴎𐴡𐴌 𐴓𐴧𐴝 𐴊𐴟𐴏𐴃𐴡𐴥 𐴁𐴝𐴕𐴡; 𐴎𐴠𐴀𐴕𐴠 𐴎𐴠𐴣𐴃𐴧𐴠𐴥 𐴇𐴞𐴥𐴀𐴕 𐴉𐴟𐴥𐴌𐴝𐴘𐴎𐴝𐴒𐴡𐴘, 𐴀𐴞𐴥𐴃𐴝𐴌𐴝 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴞 𐴎𐴝𐴒𐴝𐴃𐴢 𐴑𐴡𐴁𐴟𐴓𐴢 𐴒𐴡𐴌𐴠𐴥.

¹⁰”𐴎𐴠𐴦𐴕𐴞𐴑𐴞 𐴈𐴡𐴔𐴡𐴃𐴢 𐴀𐴞𐴔𐴝𐴕𐴊𐴝𐴌𐴞 𐴃𐴝𐴥𐴑𐴠, 𐴘𐴡𐴥𐴒𐴧𐴗𐴝𐴘𐴠 𐴁𐴞𐴐𐴞𐴤𐴃𐴢 𐴀𐴡𐴥 𐴀𐴞𐴔𐴝𐴕𐴊𐴝𐴌𐴞 𐴃𐴝𐴥𐴑𐴠; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴈𐴡𐴔𐴡𐴃𐴢 𐴁𐴠𐴘𐴔𐴝𐴕𐴞 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴘𐴠 𐴁𐴞𐴐𐴞𐴤𐴃𐴢 𐴀𐴡𐴥 𐴁𐴠𐴘𐴔𐴝𐴕𐴞 𐴒𐴡𐴌𐴠𐴥.¹¹𐴇𐴠𐴥 𐴀𐴞𐴥𐴏𐴝𐴉𐴠, 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴊𐴟𐴕𐴞𐴘𐴝𐴘𐴁𐴞 𐴊𐴡𐴥𐴕-𐴊𐴡𐴓𐴡𐴃𐴡𐴃𐴢 𐴀𐴞𐴔𐴝𐴕𐴊𐴝𐴌𐴞 𐴕𐴡 𐴃𐴝𐴥𐴑𐴡, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌𐴠 𐴁𐴡𐴥𐴌𐴝𐴐𐴝 𐴒𐴡𐴌𐴞𐴥 𐴀𐴝𐴏𐴡𐴥𐴓𐴢 𐴊𐴡𐴥𐴕 𐴇𐴡𐴕𐴠 𐴊𐴞𐴦𐴁𐴡؟¹²𐴀𐴝𐴦𐴌 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴝𐴌 𐴀𐴠𐴎𐴧𐴡𐴕𐴡𐴌 𐴒𐴟𐴥𐴕𐴡𐴃𐴢 𐴀𐴞𐴔𐴝𐴕𐴊𐴝𐴌𐴞 𐴕𐴡 𐴃𐴝𐴥𐴑𐴡, 𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴌𐴝𐴌 𐴒𐴟𐴥𐴕 𐴃𐴟𐴣𐴀𐴝𐴥𐴌𐴝𐴌𐴠 𐴇𐴡𐴕𐴠 𐴊𐴞𐴦𐴁𐴡؟

¹³”𐴇𐴡𐴕𐴡𐴤 𐴒𐴟𐴓𐴝𐴔𐴠 𐴊𐴟𐴘 𐴒𐴞𐴌𐴡𐴥𐴏𐴡𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴠; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴀𐴠𐴎𐴧𐴡𐴕𐴡𐴌𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴞𐴥𐴁𐴡 𐴀𐴝𐴦𐴌 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴌𐴞𐴥𐴁𐴡; 𐴘𐴝𐴥𐴃𐴡 𐴀𐴠𐴎𐴧𐴡𐴕 𐴓𐴡𐴘 𐴄𐴞𐴥𐴑 𐴃𐴝𐴥𐴑𐴞𐴁𐴡 𐴀𐴝𐴦𐴌 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴇𐴠𐴥𐴑𐴝𐴌𐴡𐴃𐴢 𐴒𐴡𐴌𐴞𐴥𐴁𐴡. 𐴃𐴟𐴣𐴀𐴝𐴥𐴌𐴝 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴊𐴡𐴥𐴕-𐴊𐴡𐴓𐴡𐴃𐴡𐴌 𐴇𐴠𐴥𐴊𐴔𐴡𐴃𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴞𐴁𐴝𐴥.“

𐴐𐴡𐴥𐴌𐴞𐴘𐴡𐴃𐴢 𐴀𐴠𐴊𐴧𐴠 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡

¹⁴𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴉𐴟𐴥𐴕𐴞 𐴀𐴞𐴏𐴝𐴤𐴌𐴠 𐴃𐴠𐴥𐴐𐴠𐴌𐴝𐴃𐴢 𐴊𐴡𐴙𐴅𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌𐴝 𐴄𐴞𐴛𐴝𐴌 𐴓𐴝𐴓𐴡𐴥𐴏𐴁𐴡𐴕 𐴀𐴝𐴐𐴧𐴞𐴥𐴓𐴢.¹⁵𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴡𐴥𐴘𐴓𐴝𐴊𐴠 𐴀𐴟𐴘𐴃𐴝𐴌𐴝𐴤 𐴎𐴠𐴃𐴝𐴌𐴝𐴤 𐴔𐴝𐴙𐴕𐴐𐴡𐴥𐴌 𐴔𐴟𐴀𐴕𐴃𐴟 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴉𐴡𐴌𐴇𐴠𐴥𐴏𐴒𐴝𐴌 𐴑𐴟𐴥𐴖𐴝𐴓𐴡, 𐴔𐴡𐴕𐴃𐴡𐴌 𐴀𐴝𐴓𐴧𐴝𐴘𐴠 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴢 𐴎𐴝𐴕𐴠. 𐴎𐴞𐴘𐴝𐴥𐴕 𐴔𐴝𐴙𐴕𐴐𐴡𐴥𐴌 𐴕𐴡𐴎𐴡𐴌𐴡𐴃𐴢 𐴁𐴞𐴐𐴞𐴤 𐴑𐴞𐴔𐴡𐴃𐴞 𐴇𐴞𐴥𐴘𐴝𐴕 𐴀𐴝𐴓𐴧𐴝𐴌 𐴕𐴡𐴎𐴡𐴌𐴡𐴃𐴢 𐴇𐴡𐴕𐴡𐴤 𐴑𐴞𐴔𐴡𐴃𐴢 𐴕𐴝𐴥𐴘.

¹⁶”𐴃𐴡𐴌𐴝𐴃𐴢 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴃𐴝𐴁𐴢, 𐴘𐴝𐴇𐴝𐴥𐴘𐴝 𐴉𐴡𐴙𐴅𐴧𐴡𐴕𐴃𐴡 𐴏𐴡𐴙𐴓𐴧𐴞𐴥𐴓𐴢; 𐴘𐴝𐴥𐴌𐴁𐴝𐴦𐴊𐴠 𐴓𐴡𐴥𐴃𐴞 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡𐴌 𐴑𐴟𐴥𐴐𐴈𐴡𐴥𐴁𐴡𐴌 𐴃𐴡𐴁𐴡𐴓𐴞𐴑 𐴒𐴡𐴌𐴝𐴥 𐴎𐴝𐴌, 𐴀𐴝𐴦𐴌 𐴉𐴡𐴃𐴧𐴞𐴥𐴑𐴞𐴘𐴠 𐴎𐴟𐴌𐴠𐴏𐴟𐴥𐴌𐴠 𐴇𐴞𐴥𐴘𐴝𐴕𐴡𐴃𐴢 𐴒𐴡𐴥𐴓𐴝𐴃𐴢 𐴀𐴝𐴏𐴠𐴤.¹⁷𐴓𐴠𐴑𐴞𐴕 𐴃𐴡𐴌𐴝𐴃𐴢 𐴐𐴡𐴥𐴌𐴞𐴉𐴡𐴌 𐴀𐴠𐴑𐴒𐴗𐴝𐴥 𐴕𐴡𐴑𐴃𐴝𐴤 𐴁𐴟𐴥𐴎𐴞 𐴎𐴝𐴌 𐴃𐴟𐴥𐴖𐴝𐴌𐴡, 𐴀𐴝𐴏𐴔𐴝𐴕 𐴎𐴡𐴁𐴞𐴕 𐴀𐴡𐴉𐴝𐴥𐴃𐴢 𐴀𐴡𐴥𐴖𐴝 𐴀𐴝𐴌𐴡𐴤 𐴀𐴝𐴏𐴝𐴤𐴕.

¹⁸”𐴎𐴠𐴦 𐴑𐴞𐴘𐴠𐴥 𐴕𐴞𐴎𐴡𐴌 𐴁𐴡𐴖𐴢 𐴖𐴡𐴥𐴌𐴠 𐴏𐴝𐴥𐴌𐴞𐴉𐴠𐴓𐴝𐴘 𐴀𐴝𐴌 𐴀𐴠𐴒𐴧𐴗𐴝𐴤𐴌𐴠 𐴁𐴞𐴘𐴝𐴥 𐴒𐴡𐴌𐴠𐴥, 𐴀𐴞𐴥𐴃𐴠 𐴎𐴠𐴕𐴝𐴤 𐴒𐴡𐴌𐴠𐴥𐴌 𐴊𐴠; 𐴀𐴝𐴦𐴌 𐴎𐴠𐴦 𐴑𐴞𐴘𐴠𐴥 𐴎𐴝𐴔𐴝𐴙𐴌 𐴏𐴝𐴥𐴌𐴞𐴉𐴠𐴓𐴝𐴘𐴧𐴝 𐴔𐴝𐴘𐴝𐴉𐴟𐴖𐴝𐴌𐴠 𐴁𐴞𐴘𐴝𐴥 𐴒𐴡𐴌𐴠𐴥, 𐴀𐴞𐴥𐴃𐴠 𐴘𐴡𐴥 𐴎𐴠𐴕𐴝𐴤 𐴒𐴡𐴌𐴠𐴥𐴌 𐴊𐴠.

𐴃𐴟𐴖𐴝𐴚𐴒𐴡𐴌 𐴔𐴝𐴕𐴟𐴥𐴙𐴐𐴢 𐴀𐴠𐴊𐴧𐴠 𐴓𐴝𐴏𐴝𐴥𐴌

¹⁹”𐴀𐴠𐴎𐴧𐴡𐴕 𐴀𐴠𐴕𐴊𐴞𐴓𐴧𐴝 𐴃𐴟𐴖𐴝𐴚𐴒𐴡𐴌 𐴔𐴝𐴕𐴟𐴥𐴙𐴐𐴢 𐴀𐴝𐴐𐴧𐴞𐴥𐴓𐴢, 𐴎𐴞𐴁𐴝𐴤𐴘𐴠 𐴁𐴝𐴘𐴡𐴙𐴕𐴧𐴝 𐴌𐴡𐴚𐴡𐴌 𐴀𐴠𐴊𐴧𐴠 𐴊𐴝𐴔𐴞-𐴊𐴝𐴔𐴞 𐴇𐴡𐴦𐴌 𐴉𐴞𐴣𐴊𐴞𐴥𐴃𐴡, 𐴀𐴝𐴦𐴌 𐴉𐴡𐴃𐴧𐴞𐴥 𐴊𐴞𐴕 𐴀𐴝𐴘𐴝𐴐𐴞-𐴑𐴟𐴥𐴐𐴞 𐴒𐴡𐴌𐴞𐴥 𐴃𐴝𐴥𐴑𐴞𐴃𐴡.²⁰𐴀𐴞𐴥𐴃𐴝𐴌 𐴒𐴠𐴘𐴍𐴡𐴃𐴢 𐴓𐴝𐴏𐴝𐴥𐴌 𐴕𐴝𐴔𐴡𐴌 𐴀𐴠𐴥𐴎𐴧𐴡𐴕 𐴇𐴡𐴥𐴌𐴝𐴃𐴢-𐴔𐴝𐴒𐴡𐴘𐴝𐴌𐴠 𐴌𐴝𐴑𐴝𐴤 𐴎𐴝𐴥𐴘𐴃𐴡, 𐴘𐴡𐴥𐴒𐴧𐴗𐴝 𐴒𐴝𐴥𐴀𐴘𐴠 𐴉𐴟𐴌𐴝𐴘𐴧𐴝 𐴀𐴝𐴐𐴧𐴞𐴥𐴓𐴢.²¹𐴘𐴡𐴥𐴒𐴧𐴗𐴝𐴃𐴧𐴟 𐴃𐴟𐴖𐴝𐴚𐴒𐴡𐴌 𐴔𐴝𐴕𐴟𐴥𐴙𐴐𐴧𐴗𐴝𐴌 𐴔𐴠𐴏𐴡𐴃𐴧𐴟 𐴉𐴡𐴌𐴞𐴎𐴝𐴘𐴃𐴡𐴥𐴘 𐴊𐴠 𐴈𐴝𐴥𐴕𐴝 𐴓𐴡𐴥𐴘 𐴉𐴠𐴄𐴢 𐴁𐴡𐴥𐴌𐴝𐴘𐴃𐴡 𐴔𐴡𐴕𐴠𐴈𐴡𐴘𐴃𐴡𐴥. 𐴀𐴝𐴦𐴌 𐴑𐴟𐴣𐴙𐴌 𐴀𐴡𐴥𐴑𐴧𐴡𐴓𐴠 𐴀𐴝𐴀𐴘𐴢 𐴘𐴡𐴥𐴒𐴧𐴗𐴝𐴌 𐴒𐴝𐴥𐴀 𐴀𐴡𐴥𐴑𐴧𐴡𐴓𐴢 𐴓𐴠𐴑𐴞𐴥𐴃𐴡.

²²”𐴉𐴡𐴌𐴠 𐴀𐴠𐴀𐴕 𐴀𐴡𐴥𐴘𐴧𐴠, 𐴇𐴠𐴥 𐴒𐴡𐴌𐴞𐴉𐴢 𐴔𐴝𐴕𐴟𐴥𐴙𐴐𐴧𐴗𐴝 𐴔𐴡𐴌𐴞𐴒𐴞𐴘𐴡𐴥𐴘 𐴀𐴝𐴦𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴠 𐴘𐴡𐴥𐴒𐴧𐴗𐴝𐴌𐴠 𐴀𐴞𐴁𐴌𐴝𐴇𐴞𐴥𐴔𐴡𐴌 𐴇𐴠𐴥𐴍𐴠 𐴓𐴡𐴘𐴒𐴞𐴘𐴡𐴥𐴘. 𐴀𐴠𐴑 𐴊𐴞𐴕 𐴃𐴟𐴖𐴝𐴚𐴒𐴡𐴌 𐴔𐴝𐴕𐴟𐴥𐴙𐴐𐴧𐴗𐴝 𐴘𐴡𐴥 𐴔𐴡𐴌𐴞𐴒𐴞𐴘𐴡𐴥𐴘 𐴀𐴝𐴦𐴌 𐴊𐴡𐴇𐴡𐴥𐴕 𐴒𐴡𐴌𐴝𐴥 𐴒𐴞𐴥𐴘𐴠.²³𐴀𐴞𐴥𐴃𐴠 𐴎𐴟𐴎𐴟𐴑𐴡𐴃𐴢 𐴀𐴝𐴎𐴝𐴁𐴢 𐴉𐴝𐴦𐴌 𐴊𐴠 𐴈𐴠𐴥𐴕𐴃𐴟 𐴖𐴡𐴌𐴔𐴞𐴑𐴧𐴝𐴥 𐴏𐴝𐴘𐴧𐴠𐴥 𐴌𐴝𐴥𐴌, 𐴊𐴟𐴌𐴠𐴥 𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴋𐴝𐴥𐴑𐴡𐴃𐴧𐴟 𐴓𐴝𐴏𐴝𐴥𐴌𐴡𐴌𐴠 𐴊𐴠𐴙𐴑𐴧𐴠𐴥.²⁴𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴠 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ’𐴀𐴡𐴥 𐴁𐴝𐴉𐴢 𐴀𐴞𐴁𐴌𐴝𐴇𐴞𐴥𐴔, 𐴀𐴝𐴣𐴀𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴌𐴞𐴥 𐴓𐴝𐴏𐴝𐴥𐴌𐴡𐴌𐴠 𐴀𐴝𐴣𐴀𐴌 𐴇𐴠𐴥𐴍𐴠 𐴊𐴞𐴉𐴠𐴍𐴡𐴥, 𐴎𐴠𐴀𐴕𐴠 𐴘𐴡𐴥𐴒𐴧𐴗𐴝𐴘𐴠 𐴉𐴝𐴕𐴞𐴥𐴃𐴢 𐴔𐴝𐴎𐴠𐴥 𐴕𐴞𐴎𐴡𐴌 𐴀𐴡𐴦𐴣𐴓𐴡𐴌 𐴔𐴝𐴃𐴝𐴥 𐴁𐴟𐴌𐴝𐴘 𐴀𐴝𐴣𐴀𐴌 𐴎𐴞𐴌 𐴄𐴝𐴥𐴕𐴋𐴝 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴀𐴠 𐴀𐴡𐴦𐴙𐴕𐴡𐴃𐴢 𐴁𐴞𐴐𐴞𐴤 𐴃𐴡𐴎𐴞𐴘𐴝 𐴉𐴝𐴙𐴌.‘

²⁵”𐴔𐴡𐴕𐴃𐴡𐴌 𐴀𐴞𐴁𐴌𐴝𐴇𐴞𐴥𐴔𐴠 𐴈𐴡𐴀𐴌 𐴊𐴠, ’𐴀𐴡 𐴉𐴟𐴃𐴢, 𐴄𐴝𐴥𐴀𐴌 𐴒𐴡𐴌𐴞𐴥 𐴏𐴝𐴀, 𐴃𐴟𐴘 𐴃𐴡𐴌 𐴎𐴞𐴕𐴊𐴞𐴒𐴞𐴃𐴢 𐴒𐴡𐴔-𐴒𐴡𐴔 𐴅𐴞𐴕𐴞𐴥𐴐𐴢 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴇𐴡𐴃𐴡𐴥 𐴐𐴟𐴥𐴑 𐴒𐴡𐴙𐴅𐴧𐴞𐴥𐴓𐴞, 𐴀𐴝𐴦𐴌 𐴓𐴝𐴏𐴝𐴥𐴌𐴠 𐴇𐴡𐴃𐴡𐴥 𐴊𐴟𐴑 𐴉𐴝𐴀𐴙𐴓𐴢; 𐴔𐴡𐴕𐴃𐴡𐴌 𐴘𐴝𐴓𐴝 𐴘𐴡𐴥𐴒𐴧𐴗𐴝 𐴀𐴠𐴍𐴠𐴥 𐴐𐴝𐴥𐴕𐴃𐴞 𐴉𐴝𐴦𐴌, 𐴀𐴝𐴦𐴌 𐴃𐴟𐴘 𐴃𐴡𐴎𐴞𐴘𐴝 𐴉𐴡𐴀𐴌.²⁶𐴀𐴞𐴀𐴕 𐴁𐴠𐴒𐴧𐴟𐴥𐴕 𐴁𐴝𐴦𐴊𐴠, 𐴃𐴡𐴌 𐴀𐴠𐴊𐴧𐴠 𐴀𐴝𐴣𐴀𐴌𐴝𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴋𐴡𐴣𐴀𐴌 𐴊𐴟𐴔𐴁𐴟𐴌𐴟 𐴀𐴝𐴏𐴠𐴤, 𐴎𐴠𐴀𐴕𐴠 𐴀𐴠𐴕𐴃𐴟𐴥 𐴃𐴡𐴌 𐴇𐴠𐴥𐴍𐴠 𐴎𐴝𐴘𐴃𐴡 𐴔𐴡𐴕𐴠𐴈𐴡𐴀 𐴊𐴠 𐴀𐴞𐴥𐴃𐴝𐴌𐴝 𐴎𐴝𐴘 𐴕𐴡 𐴉𐴝𐴌𐴠 𐴀𐴝𐴦𐴌 𐴈𐴠𐴥𐴕𐴃𐴟 𐴀𐴝𐴣𐴀𐴌𐴝𐴌 𐴇𐴠𐴥𐴍𐴠 𐴀𐴝𐴘𐴃𐴡𐴤 𐴔𐴡𐴕𐴠𐴈𐴡𐴀 𐴊𐴠 𐴀𐴞𐴥𐴃𐴝𐴌𐴝 𐴀𐴝𐴀𐴘𐴢 𐴕𐴡 𐴉𐴝𐴌𐴠.‘

²⁷”𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴠 𐴈𐴡𐴀𐴌 𐴊𐴠, ’𐴀𐴡𐴥 𐴁𐴝𐴉𐴢, 𐴇𐴠𐴥𐴀𐴕 𐴀𐴡𐴥𐴘𐴓𐴠 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌𐴠 𐴉𐴡𐴥𐴌𐴞𐴘𐴝𐴃𐴢 𐴒𐴡𐴌𐴞𐴥𐴌, 𐴓𐴝𐴏𐴝𐴥𐴌𐴡𐴌𐴠 𐴀𐴝𐴣𐴀𐴌 𐴁𐴝𐴉𐴡𐴌 𐴒𐴡𐴥𐴌𐴡𐴃𐴢 𐴊𐴞𐴉𐴠𐴍𐴡𐴥;²⁸𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴃𐴧𐴟 𐴉𐴝𐴣𐴏𐴢 𐴏𐴗𐴝𐴥 𐴁𐴝𐴥𐴘 𐴀𐴝𐴏𐴠𐴤. 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴟𐴥𐴣𐴐𐴞𐴘𐴝𐴌𐴞 𐴊𐴡𐴑, 𐴀𐴝𐴌𐴕𐴡𐴥𐴘𐴓𐴠 𐴀𐴞𐴥𐴃𐴝𐴌𐴝 𐴘𐴡𐴥 𐴀𐴠 𐴀𐴝𐴎𐴝𐴁𐴡𐴌 𐴎𐴝𐴒𐴝𐴃𐴢 𐴉𐴡𐴀𐴣𐴏𐴞𐴁𐴝𐴘.‘

²⁹”𐴔𐴡𐴕𐴃𐴡𐴌 𐴀𐴞𐴁𐴌𐴝𐴇𐴞𐴥𐴔𐴠 𐴈𐴡𐴀𐴌 𐴊𐴠, ’𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴔𐴟𐴀𐴏𐴝𐴌 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴑𐴞𐴃𐴝𐴁𐴢 𐴀𐴝𐴏𐴠𐴤. 𐴀𐴞𐴥𐴃𐴝𐴌𐴝 𐴇𐴞𐴥𐴀𐴕𐴡𐴌 𐴈𐴡𐴃𐴝𐴤 𐴉𐴟𐴥𐴕𐴡𐴗𐴑.‘

³⁰”𐴀𐴞𐴥𐴃𐴠 𐴈𐴡𐴀𐴌 𐴊𐴠, ’𐴕𐴡, 𐴕𐴡, 𐴀𐴡𐴥 𐴁𐴝𐴉𐴢 𐴀𐴞𐴁𐴌𐴝𐴇𐴞𐴥𐴔, 𐴎𐴡𐴊𐴞 𐴔𐴡𐴌𐴝 𐴀𐴡𐴥𐴑𐴧𐴡𐴓𐴡𐴃𐴧𐴟 𐴑𐴞𐴘𐴠𐴥 𐴀𐴞𐴥𐴃𐴝𐴌𐴝𐴌 𐴇𐴠𐴥𐴍𐴠 𐴎𐴝𐴦, 𐴀𐴞𐴥𐴃𐴝𐴌𐴝 𐴃𐴡𐴖𐴝𐴥 𐴒𐴡𐴌𐴞𐴥𐴁𐴡.‘

³¹”𐴔𐴡𐴕𐴃𐴡𐴌 𐴀𐴞𐴁𐴌𐴝𐴇𐴞𐴥𐴔𐴠 𐴀𐴞𐴥𐴃𐴝𐴌𐴠 𐴈𐴡𐴀𐴌 𐴊𐴠, ’𐴎𐴡𐴊𐴞 𐴀𐴞𐴥𐴃𐴝𐴌𐴝 𐴔𐴟𐴀𐴏𐴝𐴌 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴡𐴌 𐴈𐴡𐴃𐴝𐴤 𐴕𐴡 𐴉𐴟𐴥𐴕𐴠, 𐴃𐴡𐴥𐴀𐴘𐴓𐴠 𐴔𐴡𐴌𐴝𐴃𐴧𐴟 𐴇𐴡𐴕𐴡𐴤𐴑𐴞𐴘𐴠 𐴎𐴞𐴕𐴊𐴝 𐴀𐴡𐴥𐴘 𐴎𐴝𐴘𐴓𐴠𐴥 𐴘𐴡 𐴀𐴞𐴥𐴃𐴝𐴌𐴝 𐴕𐴡 𐴔𐴝𐴕𐴞𐴁𐴡𐴥.‘ “

The Word for the World International

https://app.library.bible/content/87faca8b51c22590