Read 𐴓𐴟𐴑𐴝𐴥𐴏𐴢 15

𐴓𐴟𐴑𐴝𐴥𐴏𐴢15

𐴀𐴝𐴥𐴣𐴎𐴞𐴒𐴞𐴘𐴡𐴘 𐴊𐴠 𐴁𐴠𐴥𐴌𐴝𐴏𐴡𐴥𐴀𐴓𐴡𐴌 𐴔𐴠𐴀𐴏𐴝𐴓𐴢

¹𐴃𐴝𐴔𐴝𐴥𐴔 𐴇𐴝𐴥𐴎𐴝𐴕𐴝-𐴃𐴟𐴓𐴡𐴥𐴘𐴝 𐴀𐴠𐴊𐴧𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴢 𐴀𐴞𐴏𐴝𐴤𐴌 𐴈𐴡𐴃𐴝𐴤 𐴉𐴟𐴥𐴕𐴞 𐴁𐴡𐴓𐴧𐴝 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴀𐴝𐴘𐴃𐴡𐴤.²𐴔𐴡𐴕𐴃𐴡𐴌 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴀𐴠𐴕𐴊𐴞𐴓𐴧𐴝 𐴈𐴡𐴀𐴘𐴢 𐴐𐴠𐴥𐴑𐴝𐴘𐴡𐴃𐴢 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴔𐴞𐴛𐴝𐴥, 𐴀𐴝𐴦𐴌 𐴀𐴞𐴥𐴃𐴝𐴌𐴝𐴌 𐴉𐴟𐴥𐴖𐴝𐴣𐴃𐴞 𐴈𐴝𐴥𐴕𐴝 𐴈𐴝𐴥𐴀.“

³𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴠 𐴔𐴠𐴀𐴏𐴝𐴓𐴢 𐴓𐴝𐴕 𐴈𐴡𐴘𐴧𐴠𐴥:⁴”𐴊𐴡𐴥𐴌𐴡 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤 𐴀𐴠𐴎𐴧𐴡𐴕𐴡𐴃𐴧𐴟 𐴀𐴠𐴑 𐴐𐴡𐴥𐴃𐴢 𐴁𐴠𐴥𐴌𐴝𐴏𐴡𐴥𐴀𐴓𐴢 𐴀𐴝𐴏𐴠𐴤, 𐴎𐴡𐴊𐴞 𐴈𐴠𐴥𐴕𐴃𐴟 𐴀𐴠𐴒𐴧𐴗𐴝𐴤 𐴀𐴝𐴥𐴣𐴎𐴞𐴎𐴝𐴒𐴡𐴘, 𐴃𐴡𐴥𐴀𐴘𐴓𐴠 𐴀𐴞𐴥𐴃𐴠 𐴑𐴞𐴥 𐴕𐴡𐴁𐴧𐴡𐴘-𐴕𐴡𐴖 𐴖𐴝𐴌𐴠 𐴑𐴞𐴥𐴓𐴝𐴃𐴢 𐴀𐴠𐴌𐴞, 𐴀𐴝𐴥𐴣𐴎𐴞𐴒𐴞𐴘𐴡𐴘 𐴊𐴠 𐴘𐴞𐴥𐴁𐴝𐴌𐴠 𐴃𐴟𐴖𐴝𐴘 𐴕𐴡𐴥 𐴉𐴝𐴦 𐴉𐴡𐴙𐴅𐴧𐴡𐴕𐴃𐴡 𐴕𐴡 𐴃𐴟𐴖𐴝𐴘𐴁𐴡𐴥 𐴕𐴠𐴥؟⁵𐴀𐴞𐴥𐴃𐴠 𐴃𐴟𐴖𐴝𐴘 𐴉𐴝𐴘𐴓𐴠 𐴃𐴡 𐴑𐴟𐴥𐴐𐴞𐴘𐴠 𐴘𐴞𐴥𐴁𐴝𐴌𐴠 𐴈𐴝𐴣𐴊𐴡𐴥𐴃𐴢 𐴓𐴡𐴘𐴁𐴡,⁶𐴀𐴝𐴦𐴌 𐴒𐴡𐴥𐴌𐴡𐴃𐴢 𐴀𐴝𐴀𐴘𐴢 𐴀𐴞𐴥𐴃𐴝𐴌 𐴉𐴟𐴥𐴖𐴝𐴣𐴙𐴅𐴧𐴝 𐴀𐴠𐴊𐴧𐴠 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴃𐴝𐴘 𐴈𐴡𐴘𐴁𐴡𐴤 𐴊𐴠, ’𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴑𐴟𐴥𐴐𐴞 𐴒𐴡𐴌𐴡𐴤𐴒𐴝𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴀𐴝𐴣𐴀𐴌 𐴀𐴝𐴥𐴣𐴎𐴞𐴒𐴞𐴘𐴡𐴘 𐴊𐴠 𐴁𐴠𐴥𐴌𐴝𐴏𐴡𐴥𐴀𐴓𐴢 𐴓𐴗𐴝𐴥 𐴃𐴟𐴖𐴝𐴘 𐴉𐴝𐴘𐴧𐴞𐴥.‘⁷𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴄𐴞𐴥𐴑 𐴇𐴠𐴥𐴕𐴊𐴞𐴓𐴧𐴝, 𐴃𐴡𐴖𐴝𐴥 𐴒𐴡𐴌𐴝𐴥 𐴕𐴡 𐴉𐴡𐴌𐴠 𐴊𐴠 𐴕𐴡𐴁𐴧𐴡𐴘-𐴕𐴡𐴖 𐴎𐴡𐴕 𐴉𐴡𐴌𐴇𐴠𐴥𐴏𐴒𐴝𐴌𐴡𐴌 𐴃𐴟𐴥𐴖𐴝𐴌𐴡 𐴀𐴠𐴎𐴧𐴡𐴕 𐴒𐴟𐴕𐴝𐴤𐴒𐴝𐴌 𐴃𐴡𐴖𐴝𐴥 𐴒𐴡𐴙𐴓𐴧𐴠𐴥 𐴀𐴝𐴏𐴔𐴝𐴕𐴡𐴃𐴢 𐴀𐴝𐴌𐴡𐴤 𐴁𐴞𐴐𐴞𐴤 𐴑𐴟𐴥𐴐𐴞 𐴀𐴡𐴥𐴘𐴁𐴡.“

𐴀𐴝𐴥𐴣𐴎𐴞𐴒𐴞𐴘𐴡𐴘 𐴊𐴠 𐴉𐴡𐴘𐴐𐴝𐴤𐴌 𐴔𐴠𐴀𐴏𐴝𐴓𐴢

⁸”𐴘𐴝𐴥, 𐴊𐴡𐴥𐴌𐴡 𐴀𐴠𐴒𐴧𐴗𐴝𐴤 𐴔𐴝𐴘𐴝𐴉𐴟𐴖𐴝𐴃𐴧𐴟 𐴊𐴡𐴐𐴢 𐴐𐴝𐴥𐴕 𐴌𐴟𐴉𐴝𐴌 𐴉𐴡𐴘𐴐𐴝𐴤 𐴀𐴝𐴏𐴠𐴤, 𐴎𐴡𐴊𐴞 𐴈𐴠𐴥𐴕𐴃𐴟 𐴀𐴠𐴑𐴧𐴝𐴥𐴕 𐴉𐴡𐴘𐴐𐴝𐴤 𐴀𐴝𐴥𐴣𐴎𐴞𐴎𐴝𐴒𐴡𐴘, 𐴃𐴡𐴥𐴀𐴘𐴓𐴠 𐴇𐴞𐴥𐴁𐴝𐴘𐴠 𐴑𐴞𐴥 𐴏𐴠𐴌𐴝𐴑 𐴊𐴡𐴥𐴌𐴝𐴘 𐴒𐴡𐴥𐴌 𐴑𐴟𐴦𐴣𐴏𐴝𐴘 𐴇𐴞𐴥𐴘𐴝𐴕𐴡𐴌𐴠 𐴃𐴟𐴖𐴝𐴘 𐴕𐴡𐴥 𐴉𐴝𐴦 𐴉𐴡𐴙𐴅𐴧𐴡𐴕𐴃𐴡 𐴐𐴟𐴥𐴕𐴊𐴡𐴌𐴒𐴡𐴌𐴞 𐴕𐴡 𐴃𐴟𐴖𐴝𐴘𐴁𐴡𐴥 𐴕𐴠𐴥؟⁹𐴇𐴞𐴥𐴁𐴝𐴘𐴠 𐴃𐴟𐴖𐴝𐴘 𐴉𐴝𐴘𐴓𐴠 𐴃𐴡 𐴕𐴞𐴎𐴡𐴌 𐴉𐴟𐴥𐴖𐴝𐴣𐴙𐴅𐴧𐴝𐴕𐴞 𐴀𐴠𐴊𐴧𐴠 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌𐴠 𐴔𐴝𐴃𐴝𐴘 𐴀𐴠𐴕𐴊𐴞𐴓𐴧𐴝 𐴈𐴡𐴘𐴁𐴡𐴤, ’𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴑𐴟𐴥𐴐𐴞 𐴒𐴡𐴌𐴡𐴤𐴒𐴝𐴘, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴀𐴝𐴣𐴀𐴌 𐴀𐴝𐴥𐴣𐴎𐴞𐴒𐴞𐴘𐴡𐴘 𐴊𐴠 𐴉𐴡𐴘𐴐𐴝𐴤 𐴒𐴝𐴥𐴕 𐴃𐴟𐴖𐴝𐴘 𐴉𐴝𐴘𐴧𐴞𐴥.‘¹⁰𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴄𐴞𐴥𐴑 𐴇𐴠𐴥𐴕𐴊𐴞𐴓𐴧𐴝, 𐴀𐴠𐴎𐴧𐴡𐴕 𐴒𐴟𐴕𐴝𐴤𐴒𐴝𐴌 𐴃𐴡𐴖𐴝𐴥 𐴒𐴡𐴙𐴓𐴧𐴠𐴥 𐴀𐴝𐴓𐴧𐴝𐴌 𐴉𐴞𐴥𐴌𐴞𐴏𐴃𐴝 𐴀𐴡𐴥𐴑𐴧𐴡𐴓𐴡𐴌 𐴔𐴟𐴀𐴕𐴃𐴟 𐴑𐴟𐴥𐴐𐴞 𐴀𐴡𐴥.“

𐴀𐴝𐴥𐴣𐴎𐴞𐴒𐴞𐴘𐴡𐴘 𐴊𐴠 𐴉𐴟𐴖𐴝𐴌 𐴔𐴠𐴀𐴏𐴝𐴓𐴢

¹¹𐴀𐴞𐴏𐴝𐴤𐴘𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴀𐴠𐴒𐴧𐴗𐴝𐴤 𐴔𐴝𐴙𐴕𐴐𐴡𐴥𐴃𐴧𐴟 𐴊𐴟𐴖𐴝𐴥 𐴉𐴟𐴖𐴝 𐴀𐴝𐴐𐴧𐴞𐴥𐴓𐴢.¹²𐴀𐴞𐴥𐴃𐴝𐴌𐴝𐴃𐴧𐴟 𐴐𐴡𐴥𐴣𐴍𐴡 𐴖𐴝𐴘𐴠 𐴁𐴝𐴉𐴡𐴌𐴠 𐴈𐴡𐴀𐴌 𐴊𐴠, ’𐴀𐴝𐴁𐴝𐴤, 𐴀𐴝𐴣𐴀𐴌 𐴁𐴡𐴌𐴝𐴃𐴡𐴃𐴢 𐴉𐴡𐴌𐴠 𐴊𐴠 𐴐𐴡𐴥𐴔𐴁𐴡𐴃𐴧𐴞 𐴀𐴝𐴣𐴀𐴌𐴠𐴥 𐴊𐴞𐴦𐴉𐴠𐴥𐴓𐴡.‘ 𐴃𐴡𐴥𐴘 𐴁𐴝𐴉𐴠 𐴕𐴞𐴎𐴡𐴌 𐴐𐴡𐴥𐴔𐴁𐴡𐴃𐴧𐴞 𐴀𐴞𐴥𐴃𐴝𐴌𐴝𐴌𐴠 𐴁𐴡𐴌𐴝𐴃𐴢 𐴒𐴡𐴌𐴞𐴥𐴊𐴞𐴘𐴠.

¹³”𐴇𐴡𐴦𐴊𐴧𐴞𐴕 𐴁𐴝𐴦𐴊𐴠, 𐴉𐴟𐴖𐴝 𐴐𐴡𐴥𐴣𐴍𐴡 𐴖𐴝𐴘𐴠 𐴕𐴞𐴎𐴡𐴌 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴊𐴡𐴓𐴝 𐴒𐴡𐴌𐴞𐴥 𐴓𐴡𐴦𐴘𐴢 𐴀𐴠𐴑𐴧𐴝𐴥𐴕 𐴊𐴟𐴌𐴡𐴥𐴌 𐴔𐴟𐴓𐴧𐴟𐴑𐴡𐴃𐴢 𐴒𐴞𐴦𐴘𐴠𐴥𐴒𐴡𐴘, 𐴀𐴝𐴦𐴌 𐴇𐴠𐴥𐴍𐴠 𐴀𐴞𐴥𐴃𐴠 𐴔𐴡𐴕𐴎𐴝𐴑𐴧𐴝𐴥 𐴏𐴡𐴓𐴞 𐴕𐴞𐴎𐴡𐴌 𐴐𐴡𐴥𐴔𐴁𐴡𐴃𐴧𐴞 𐴏𐴝𐴥𐴌𐴇𐴝𐴌 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.¹⁴𐴎𐴠𐴣𐴃𐴧𐴠𐴥 𐴀𐴞𐴥𐴃𐴝𐴃𐴧𐴟 𐴇𐴝𐴥𐴀𐴌 𐴑𐴠𐴏𐴧𐴟𐴥 𐴇𐴡𐴥𐴌𐴡𐴏𐴢 𐴒𐴡𐴌𐴞𐴥𐴉𐴠𐴓𐴝𐴘𐴝 𐴀𐴡𐴥𐴘𐴧𐴠, 𐴇𐴠𐴥 𐴔𐴟𐴓𐴧𐴟𐴑𐴡𐴃𐴢 𐴀𐴠𐴒𐴧𐴗𐴝𐴤 𐴋𐴡𐴣𐴀𐴌 𐴌𐴝𐴄𐴢 𐴀𐴡𐴥𐴘𐴧𐴠, 𐴀𐴝𐴦𐴌 𐴀𐴞𐴥𐴃𐴠 𐴔𐴟𐴀𐴃𐴝𐴐𐴡𐴃𐴢 𐴉𐴡𐴌𐴝𐴃𐴢 𐴊𐴡𐴙𐴅𐴧𐴠.¹⁵𐴃𐴡𐴥𐴘 𐴀𐴞𐴥𐴃𐴠 𐴎𐴝𐴘 𐴇𐴠𐴥 𐴔𐴟𐴓𐴧𐴟𐴑𐴡𐴌 𐴀𐴠𐴎𐴧𐴡𐴕 𐴁𐴝𐴥𐴐𐴞𐴕𐴊𐴝𐴃𐴧𐴟 𐴈𐴝𐴔 𐴏𐴝𐴘𐴧𐴠𐴥𐴒𐴡𐴘, 𐴀𐴝𐴦𐴌 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴠 𐴐𐴟𐴥𐴖𐴡𐴌 𐴏𐴡𐴌𐴝𐴘 𐴁𐴡𐴓𐴧𐴝 𐴕𐴞𐴎𐴡𐴌 𐴑𐴞𐴥𐴓𐴝𐴃𐴢 𐴊𐴞𐴉𐴠𐴍𐴝𐴥𐴘𐴧𐴠.¹⁶𐴐𐴟𐴥𐴖𐴡𐴌 𐴒𐴟𐴥𐴕𐴠 𐴎𐴠 𐴒𐴝𐴏𐴡𐴌 𐴏𐴡𐴥𐴛 𐴀𐴡𐴥𐴑𐴧𐴡𐴓𐴢 𐴈𐴝𐴥𐴘𐴃𐴡, 𐴀𐴞𐴥𐴃𐴝𐴃𐴧𐴟 𐴇𐴞𐴥𐴀𐴕 𐴇𐴝𐴥𐴘 𐴉𐴠𐴄𐴢 𐴁𐴡𐴥𐴌𐴝𐴘𐴃𐴡 𐴔𐴡𐴕𐴠𐴈𐴡𐴘𐴃𐴡𐴥, 𐴔𐴡𐴕𐴃𐴡𐴌 𐴇𐴡𐴕𐴡𐴤𐴑𐴞𐴘𐴠 𐴀𐴞𐴥𐴃𐴝𐴌𐴠 𐴕𐴡 𐴊𐴞𐴦𐴃𐴡.

¹⁷”𐴉𐴡𐴌𐴠 𐴀𐴞𐴥𐴃𐴠 𐴁𐴟𐴎𐴡𐴥𐴕𐴡𐴃𐴢 𐴀𐴝𐴀𐴘𐴢 𐴈𐴡𐴀𐴌 𐴊𐴠, ’𐴀𐴝𐴣𐴀𐴌 𐴁𐴝𐴉𐴡𐴌 𐴀𐴠𐴊𐴟𐴥𐴕 𐴔𐴟𐴎𐴟𐴌 𐴀𐴡𐴥𐴑𐴧𐴡𐴓𐴠 𐴈𐴝𐴥𐴘𐴃𐴡 𐴁𐴠𐴐𐴝𐴤𐴁𐴞𐴐𐴞𐴤 𐴈𐴝𐴥𐴕𐴝 𐴉𐴝𐴦𐴌, 𐴀𐴝𐴦𐴌 𐴀𐴝𐴀𐴛 𐴃𐴡 𐴀𐴠𐴍𐴠𐴥 𐴁𐴟𐴥𐴑𐴧𐴠 𐴔𐴡𐴌𐴞𐴌!¹⁸𐴀𐴝𐴀𐴛 𐴀𐴟𐴍𐴞𐴤 𐴀𐴝𐴣𐴀𐴌 𐴁𐴝𐴉𐴡𐴌 𐴇𐴠𐴥𐴍𐴠 𐴎𐴝𐴘𐴧𐴟𐴔𐴁𐴡𐴥𐴘, 𐴎𐴝𐴘 𐴀𐴞𐴥𐴁𐴝𐴌𐴠 𐴈𐴡𐴘𐴧𐴟𐴥𐴔 𐴊𐴠: 𐴀𐴝𐴁𐴝𐴤, 𐴀𐴝𐴀𐴛 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴃𐴟𐴣𐴀𐴝𐴥𐴣𐴌 𐴀𐴟𐴓𐴋𐴝 𐴈𐴡𐴏𐴟𐴥𐴌𐴞 𐴒𐴡𐴙𐴅𐴧𐴞𐴥.¹⁹𐴀𐴝𐴣𐴀𐴌𐴠𐴥 𐴀𐴝𐴌 𐴃𐴟𐴣𐴀𐴝𐴥𐴣𐴌 𐴉𐴟𐴖𐴝 𐴈𐴡𐴘𐴁𐴝𐴥𐴌 𐴓𐴝𐴦𐴘𐴠𐴑 𐴕𐴡; 𐴀𐴝𐴣𐴀𐴌𐴠𐴥 𐴃𐴟𐴣𐴀𐴝𐴥𐴣𐴌 𐴀𐴠𐴒𐴧𐴗𐴝𐴤 𐴔𐴟𐴎𐴟𐴌𐴡𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴌𐴝𐴑𐴡𐴥.‘²⁰𐴃𐴡𐴥𐴘 𐴀𐴞𐴥𐴃𐴠 𐴀𐴟𐴍𐴞𐴤 𐴁𐴝𐴉𐴡𐴌 𐴇𐴠𐴥𐴍𐴠 𐴒𐴞𐴦𐴘𐴠𐴥.
”𐴀𐴞𐴥𐴃𐴠 𐴊𐴟𐴌𐴠𐴥 𐴃𐴝𐴥𐴘𐴃𐴠 𐴀𐴞𐴥𐴃𐴝𐴌𐴠 𐴊𐴠𐴑𐴞𐴥 𐴁𐴝𐴉𐴡𐴃𐴧𐴟 𐴉𐴠𐴄𐴉𐴟𐴙𐴅𐴧𐴠𐴥, 𐴀𐴝𐴦𐴌 𐴊𐴟𐴣𐴌𐴞 𐴎𐴝𐴘 𐴀𐴞𐴥𐴃𐴝𐴌𐴠 𐴀𐴝𐴣𐴎𐴝 𐴔𐴝𐴌𐴞 𐴀𐴝𐴂𐴧𐴝𐴤 𐴊𐴞𐴥𐴘𐴠.

²¹”𐴉𐴟𐴖𐴝𐴘𐴠 𐴁𐴝𐴉𐴡𐴌𐴠 𐴈𐴡𐴀𐴌 𐴊𐴠, ’𐴀𐴝𐴁𐴝𐴤, 𐴀𐴝𐴀𐴛 𐴀𐴝𐴓𐴧𐴝𐴌 𐴀𐴠𐴊𐴧𐴠 𐴃𐴟𐴣𐴀𐴝𐴥𐴣𐴌 𐴀𐴟𐴓𐴋𐴝 𐴈𐴡𐴏𐴟𐴥𐴌𐴞 𐴒𐴡𐴙𐴅𐴧𐴞𐴥, 𐴀𐴝𐴣𐴀𐴌𐴠𐴥 𐴀𐴝𐴌 𐴃𐴟𐴣𐴀𐴝𐴥𐴣𐴌 𐴉𐴟𐴖𐴝 𐴈𐴡𐴘𐴁𐴝𐴥𐴌 𐴓𐴝𐴦𐴘𐴠𐴑 𐴕𐴡.‘

²²”𐴔𐴡𐴕𐴃𐴡𐴌 𐴁𐴝𐴉𐴠 𐴕𐴞𐴎𐴡𐴌 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ’𐴃𐴡𐴌𐴝𐴃𐴡𐴌𐴞 𐴀𐴠𐴁𐴧𐴠 𐴁𐴝𐴌𐴞𐴥𐴑 𐴎𐴟𐴁𐴧𐴝 𐴀𐴝𐴕𐴞𐴤 𐴀𐴞𐴃𐴝𐴌𐴠𐴤 𐴉𐴞𐴣𐴊𐴝𐴥𐴘𐴊𐴡; 𐴀𐴞𐴃𐴝𐴌 𐴀𐴝𐴥𐴃𐴡𐴃𐴢 𐴀𐴡𐴀𐴣𐴍𐴞 𐴊𐴞𐴘𐴝𐴘𐴊𐴡 𐴀𐴝𐴦𐴌 𐴄𐴠𐴥𐴚𐴡𐴃𐴢 𐴐𐴠𐴕𐴄𐴝𐴥𐴌 𐴉𐴞𐴣𐴊𐴝𐴥𐴘𐴊𐴡.²³𐴒𐴡𐴌𐴟 𐴁𐴡𐴓𐴞 𐴖𐴝 𐴀𐴝𐴕𐴞𐴤 𐴎𐴡𐴦𐴌𐴡𐴥. 𐴀𐴝𐴣𐴀𐴌𐴝 𐴇𐴝𐴥𐴘 𐴑𐴟𐴥𐴐𐴞-𐴀𐴝𐴥𐴐𐴞 𐴒𐴡𐴌𐴞𐴥.²⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴀𐴠 𐴉𐴟𐴖𐴝 𐴖𐴝 𐴔𐴡𐴌𐴝 𐴀𐴝𐴐𐴧𐴞𐴥𐴓𐴢, 𐴔𐴡𐴕𐴃𐴡𐴌 𐴀𐴝𐴁𐴝𐴌 𐴎𐴞𐴕𐴊𐴝 𐴀𐴡𐴥𐴘𐴧𐴠; 𐴀𐴞𐴃𐴠 𐴀𐴝𐴥𐴣𐴎𐴞𐴒𐴞𐴓𐴒𐴡𐴘, 𐴔𐴡𐴕𐴃𐴡𐴌 𐴘𐴝𐴓𐴝 𐴉𐴝𐴦 𐴒𐴞𐴘𐴠𐴥.‘ 𐴃𐴝𐴌𐴉𐴡𐴌𐴠 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴠 𐴑𐴟𐴥𐴐𐴞 𐴒𐴡𐴌𐴝𐴥𐴃𐴢 𐴊𐴡𐴙𐴅𐴧𐴠.

²⁵”𐴇𐴠𐴥𐴣𐴃𐴧𐴠 𐴘𐴡𐴥𐴒𐴧𐴗𐴝𐴌 𐴉𐴟𐴖𐴝 𐴋𐴡𐴣𐴀𐴌𐴒𐴗𐴝𐴥 𐴑𐴠𐴥𐴃𐴞𐴃𐴢 𐴀𐴝𐴐𐴧𐴞𐴥𐴓𐴢; 𐴀𐴞𐴥𐴃𐴠 𐴒𐴡𐴥𐴌𐴡𐴌 𐴋𐴝𐴥𐴑𐴠 𐴉𐴡𐴀𐴣𐴙𐴐𐴧𐴠 𐴌𐴝𐴥𐴌, 𐴃𐴝𐴓𐴁𐴝𐴎𐴝𐴕𐴝𐴌 𐴀𐴠𐴊𐴧𐴠 𐴕𐴝𐴏𐴡𐴌 𐴀𐴝𐴁𐴝𐴏𐴢 𐴉𐴟𐴥𐴙𐴕𐴧𐴠.²⁶𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴠 𐴀𐴠𐴒𐴧𐴗𐴝𐴤 𐴒𐴡𐴗𐴀𐴌𐴡𐴌𐴠 𐴔𐴝𐴃𐴝𐴘, 𐴀𐴠𐴍𐴠𐴥 𐴑𐴞𐴦 𐴀𐴡𐴥𐴌 𐴊𐴠 𐴉𐴟𐴏𐴝𐴥𐴌 𐴒𐴡𐴙𐴅𐴧𐴠𐴥.²⁷𐴃𐴠𐴦 𐴀𐴞𐴥𐴃𐴝𐴌𐴠 𐴈𐴡𐴀𐴌 𐴊𐴠, ’𐴃𐴟𐴣𐴀𐴝𐴥𐴣𐴌 𐴁𐴝𐴥𐴘 𐴖𐴝𐴦𐴉𐴠𐴏𐴢 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴃𐴟𐴣𐴀𐴝𐴥𐴣𐴌 𐴁𐴝𐴉𐴠 𐴒𐴡𐴌𐴟 𐴁𐴡𐴓𐴞 𐴖𐴝 𐴎𐴡𐴦𐴌𐴝𐴥𐴘𐴧𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴓𐴝𐴔𐴡𐴃𐴠 𐴉𐴞𐴥𐴌𐴝𐴘 𐴉𐴝𐴘𐴧𐴠𐴥.‘

²⁸”𐴇𐴞𐴥𐴘𐴝𐴕 𐴉𐴟𐴥𐴕𐴞 𐴀𐴞𐴥𐴃𐴠 𐴒𐴟𐴐𐴧𐴝𐴤 𐴀𐴡𐴥𐴘𐴒𐴞𐴘𐴡𐴘 𐴀𐴝𐴦𐴌 𐴁𐴟𐴥𐴃𐴡𐴌𐴠 𐴒𐴡𐴥𐴙𐴓𐴃𐴡 𐴕𐴡 𐴏𐴝𐴌. 𐴔𐴡𐴕𐴃𐴡𐴌 𐴁𐴝𐴉𐴢 𐴁𐴝𐴀𐴌𐴠 𐴀𐴝𐴀𐴘𐴢, 𐴀𐴞𐴥𐴃𐴝𐴌𐴠 𐴔𐴝𐴕𐴝𐴃𐴢 𐴊𐴡𐴙𐴅𐴧𐴠.²⁹𐴓𐴠𐴑𐴞𐴕 𐴀𐴞𐴥𐴃𐴠 𐴁𐴝𐴉𐴡𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ’𐴏𐴡𐴀, 𐴀𐴠𐴃𐴡𐴥 𐴁𐴡𐴏𐴡𐴥𐴌 𐴉𐴝𐴥𐴕 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴒𐴟𐴓𐴝𐴔𐴞 𐴒𐴡𐴌𐴞𐴥-𐴒𐴡𐴌𐴞𐴥 𐴀𐴝𐴘𐴧𐴞𐴤𐴌, 𐴀𐴝𐴦𐴌 𐴀𐴝𐴀𐴛 𐴃𐴟𐴣𐴀𐴝𐴥𐴣𐴌 𐴇𐴡𐴥𐴑𐴟𐴔 𐴇𐴡𐴕𐴡𐴤𐴊𐴞𐴕 𐴕𐴡 𐴔𐴝𐴕𐴞 𐴕𐴡𐴥 𐴃𐴝𐴥𐴑𐴞; 𐴃𐴡𐴀 𐴃𐴟𐴀𐴛 𐴀𐴝𐴣𐴀𐴌𐴠𐴥 𐴀𐴝𐴣𐴀𐴌 𐴊𐴟𐴏𐴃𐴡𐴥 𐴀𐴡𐴥𐴑𐴧𐴡𐴓𐴡𐴌 𐴉𐴟𐴥𐴖𐴝𐴣𐴃𐴞 𐴑𐴟𐴥𐴐𐴞-𐴀𐴝𐴥𐴐𐴞 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴠𐴒𐴧𐴗𐴝𐴤 𐴏𐴡𐴥𐴀𐴓𐴡𐴌 𐴏𐴡𐴥𐴀 𐴀𐴟𐴥𐴊𐴧𐴗𐴝 𐴇𐴡𐴕𐴡𐴤𐴊𐴞𐴕 𐴊𐴞𐴦𐴘𐴡𐴥 𐴊𐴠 𐴕𐴝𐴥𐴘.³⁰𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴣𐴌 𐴉𐴟𐴖𐴝 𐴀𐴞𐴃𐴠 𐴎𐴠𐴣𐴃𐴧𐴠𐴥 𐴀𐴝𐴙𐴐𐴧𐴠𐴥, 𐴎𐴠𐴦𐴕𐴞𐴑𐴞 𐴃𐴟𐴣𐴀𐴝𐴥𐴣𐴌 𐴐𐴡𐴥𐴔𐴁𐴡𐴃𐴧𐴞 𐴔𐴝𐴒𐴞 𐴀𐴡𐴥𐴑𐴧𐴡𐴓𐴢 𐴓𐴡𐴥𐴘 𐴉𐴟𐴥𐴌𐴝𐴘𐴉𐴠𐴓𐴝𐴘𐴧𐴠, 𐴃𐴟𐴀𐴛 𐴀𐴞𐴥𐴃𐴝𐴌 𐴓𐴧𐴝 𐴒𐴡𐴌𐴟 𐴁𐴡𐴓𐴞 𐴖𐴝 𐴎𐴡𐴦𐴌𐴝𐴥𐴘𐴧𐴡.‘

³¹”𐴇𐴠𐴥𐴃𐴟𐴕𐴡𐴃𐴢 𐴁𐴝𐴉𐴠 𐴀𐴞𐴥𐴃𐴝𐴌𐴠 𐴈𐴡𐴀𐴌 𐴊𐴠, ’𐴀𐴡 𐴉𐴟𐴃𐴢, 𐴃𐴟𐴘 𐴃𐴡 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴇𐴝𐴥𐴔𐴞𐴐𐴝 𐴀𐴝𐴏𐴡𐴤𐴏𐴢, 𐴀𐴝𐴦𐴌 𐴀𐴝𐴣𐴀𐴃𐴧𐴟 𐴎𐴞𐴀𐴕 𐴀𐴝𐴏𐴠𐴤 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴊𐴠 𐴃𐴡𐴌.³²𐴔𐴡𐴕𐴃𐴡𐴌 𐴀𐴝𐴣𐴀𐴌𐴝𐴃𐴧𐴟 𐴘𐴝𐴓𐴝 𐴑𐴟𐴥𐴐𐴞-𐴀𐴝𐴥𐴐𐴞 𐴀𐴠𐴊𐴧𐴠 𐴔𐴠𐴓𐴝 𐴒𐴡𐴌𐴝𐴥𐴌 𐴎𐴡𐴌𐴟𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴡𐴌 𐴁𐴝𐴥𐴘 𐴀𐴞𐴁𐴝𐴤 𐴔𐴡𐴌𐴝 𐴀𐴝𐴐𐴧𐴞𐴥𐴓𐴢, 𐴀𐴝𐴦𐴌 𐴀𐴝𐴁𐴝𐴌 𐴎𐴞𐴕𐴊𐴝 𐴀𐴡𐴥𐴘𐴧𐴠; 𐴀𐴝𐴥𐴣𐴎𐴞𐴒𐴞𐴓𐴒𐴡𐴘, 𐴘𐴝𐴓𐴝 𐴉𐴝𐴦 𐴒𐴞𐴘𐴠𐴥.‘ “

The Word for the World International

https://app.library.bible/content/87faca8b51c22590