Read 𐴓𐴟𐴑𐴝𐴥𐴏𐴢 17

𐴓𐴟𐴑𐴝𐴥𐴏𐴢17

𐴒𐴟𐴕𐴝𐴤𐴃𐴢 𐴉𐴡𐴌𐴝𐴁𐴝𐴌 𐴀𐴠𐴕𐴃𐴝𐴥𐴕

¹𐴀𐴞𐴏𐴝𐴤𐴘𐴠 𐴕𐴞𐴎𐴡𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴒𐴟𐴕𐴝𐴤𐴌 𐴀𐴟𐴎𐴟 𐴄𐴝𐴕𐴠 𐴊𐴠 𐴇𐴞𐴥𐴀𐴕 𐴃𐴡 𐴕𐴟 𐴀𐴝𐴀𐴘𐴢 𐴕𐴡 𐴃𐴝𐴥𐴑𐴞𐴁𐴡; 𐴔𐴡𐴕𐴃𐴡𐴌 𐴀𐴟𐴘𐴃𐴝𐴌 𐴖𐴡𐴌𐴠 𐴀𐴝𐴉𐴏𐴟𐴥𐴏𐴢, 𐴎𐴝𐴌 𐴊𐴟𐴖𐴝𐴌𐴝 𐴕𐴞𐴑𐴞 𐴇𐴞𐴥𐴀𐴕 𐴀𐴝𐴘𐴧𐴠𐴤.²𐴀𐴞𐴥𐴃𐴝𐴌 𐴓𐴧𐴝 𐴁𐴠𐴀𐴃𐴡𐴌 𐴀𐴡𐴥𐴙𐴓𐴊𐴠, 𐴀𐴞𐴥𐴃𐴝𐴌 𐴒𐴡𐴓𐴝𐴃𐴢 𐴀𐴠𐴒𐴧𐴗𐴝𐴤 𐴐𐴞𐴥𐴓𐴡𐴌 𐴏𐴝𐴑𐴧𐴞 𐴁𐴝𐴣𐴊𐴞𐴥 𐴊𐴡𐴙𐴅𐴧𐴝𐴃𐴢 𐴉𐴠𐴥𐴓𐴝𐴘𐴊𐴞𐴘𐴝 𐴎𐴝, 𐴎𐴡𐴊𐴞 𐴀𐴞𐴥𐴃𐴠 𐴀𐴠 𐴐𐴡𐴥𐴣𐴍𐴡 𐴀𐴡𐴥𐴑𐴧𐴡𐴓𐴡𐴃𐴧𐴟 𐴇𐴡𐴕𐴡𐴤𐴑𐴞𐴘𐴡𐴌𐴠 𐴒𐴟𐴕𐴝𐴤 𐴒𐴡𐴌𐴝𐴥𐴁𐴝.³𐴕𐴞𐴎𐴡𐴌𐴠𐴥 𐴕𐴞𐴎𐴠 𐴀𐴟𐴥𐴣𐴐𐴞𐴘𐴝𐴌. 𐴎𐴡𐴊𐴞 𐴃𐴟𐴣𐴀𐴝𐴥𐴣𐴌 𐴁𐴝𐴥𐴘𐴧𐴠 𐴈𐴡𐴏𐴟𐴥𐴌𐴞 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴁𐴡𐴥𐴄𐴁𐴡𐴍𐴝𐴥𐴘𐴧𐴡; 𐴎𐴡𐴊𐴞 𐴘𐴡𐴥𐴒𐴧𐴗𐴝𐴘𐴠 𐴃𐴡𐴖𐴝𐴥 𐴒𐴡𐴌𐴠𐴥, 𐴘𐴡𐴥𐴒𐴧𐴗𐴝𐴌𐴠 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴡.

⁴”𐴎𐴡𐴊𐴞 𐴘𐴡𐴥𐴒𐴧𐴗𐴝𐴘𐴠 𐴃𐴟𐴣𐴀𐴝𐴥𐴣𐴌 𐴀𐴟𐴓𐴋𐴝 𐴀𐴠𐴑 𐴊𐴞𐴕𐴠 𐴇𐴝𐴥𐴣𐴃𐴢 𐴁𐴝𐴌 𐴈𐴡𐴏𐴟𐴥𐴌𐴞 𐴒𐴡𐴌𐴠𐴥, 𐴀𐴝𐴦𐴌 𐴇𐴝𐴥𐴣𐴃𐴢 𐴀𐴡𐴥 𐴁𐴝𐴌 𐴃𐴟𐴣𐴀𐴝𐴥𐴣𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴈𐴡𐴀, ’𐴀𐴝𐴀𐴛 𐴃𐴡𐴖𐴝𐴥 𐴒𐴡𐴙𐴅𐴧𐴞𐴥,‘ 𐴃𐴡𐴥𐴀𐴘𐴓𐴠 𐴘𐴡𐴥𐴒𐴧𐴗𐴝𐴌𐴠 𐴔𐴝𐴉𐴢 𐴒𐴡𐴌𐴞𐴥𐴊𐴞𐴘𐴡.“

𐴀𐴞𐴔𐴝𐴕

⁵𐴏𐴝𐴥𐴇𐴝𐴁𐴞 𐴒𐴟𐴥𐴕𐴠 𐴔𐴝𐴓𐴞𐴑𐴡𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴌 𐴀𐴞𐴔𐴝𐴕 𐴁𐴝𐴌𐴝𐴤𐴘𐴊𐴡.“

⁶𐴔𐴝𐴓𐴞𐴑𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴡𐴥𐴌𐴡𐴙𐴌 𐴊𐴝𐴕𐴝𐴌 𐴇𐴠𐴥𐴃𐴧𐴞𐴌𐴞𐴕 𐴀𐴞𐴔𐴝𐴕 𐴃𐴝𐴥𐴑𐴠, 𐴃𐴟𐴣𐴀𐴝𐴥𐴌𐴝 𐴀𐴠 𐴃𐴟𐴃𐴢-𐴒𐴝𐴏𐴢 𐴏𐴗𐴝𐴥𐴌𐴠 𐴀𐴠𐴀𐴕 𐴈𐴡𐴀𐴘𐴢 𐴉𐴝𐴌𐴞𐴁𐴝𐴥, ’𐴇𐴝𐴥𐴣𐴌𐴞 𐴎𐴝𐴘 𐴊𐴡𐴙𐴅𐴧𐴝𐴃𐴢 𐴉𐴟𐴥𐴄𐴒𐴡𐴘,‘ 𐴒𐴝𐴏𐴢 𐴏𐴗𐴝𐴥𐴘𐴠 𐴃𐴟𐴣𐴀𐴝𐴥𐴌𐴝𐴌 𐴈𐴡𐴃𐴝𐴤 𐴔𐴝𐴕𐴞𐴁𐴡𐴥.

𐴒𐴡𐴗𐴀𐴌𐴡𐴌 𐴎𐴞𐴔𐴧𐴝

⁷”𐴊𐴡𐴥𐴌𐴡 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴡𐴃𐴧𐴟 𐴀𐴝𐴥𐴓𐴢 𐴏𐴡𐴘𐴁𐴡𐴥 𐴓𐴧𐴝 𐴘𐴝𐴥 𐴏𐴡𐴥𐴀𐴓𐴢 𐴏𐴡𐴌𐴝𐴘 𐴁𐴡𐴓𐴧𐴝 𐴀𐴠𐴒𐴧𐴗𐴝𐴤 𐴒𐴡𐴗𐴀𐴌 𐴀𐴝𐴏𐴠𐴤. 𐴘𐴡𐴥𐴒𐴧𐴗𐴝𐴘𐴠 𐴑𐴞𐴥 𐴒𐴡𐴗𐴀𐴌𐴒𐴗𐴝𐴥 𐴁𐴞𐴓𐴡𐴃𐴧𐴟 𐴀𐴝𐴘𐴓𐴠𐴤 𐴀𐴞𐴥𐴃𐴝𐴌𐴠 𐴀𐴠𐴕𐴊𐴞𐴓𐴧𐴝 𐴈𐴡𐴘𐴁𐴡𐴤, ’𐴇𐴝𐴥𐴌𐴝 𐴀𐴝𐴀𐴘𐴢, 𐴈𐴝𐴥𐴘𐴃𐴡 𐴁𐴡𐴒𐴝𐴥𐴘؟‘⁸𐴁𐴡𐴥𐴓𐴑𐴠 𐴘𐴡𐴥𐴒𐴧𐴗𐴝𐴘𐴠 𐴑𐴞𐴥 𐴀𐴞𐴥𐴃𐴝𐴌𐴠 𐴀𐴠𐴕𐴊𐴞𐴓𐴧𐴝 𐴕𐴡 𐴈𐴡𐴘𐴁𐴡𐴤 𐴕𐴠𐴥, ’𐴀𐴝𐴣𐴀𐴌 𐴓𐴧𐴝 𐴈𐴝𐴥𐴕𐴝 𐴃𐴡𐴘𐴧𐴝𐴌 𐴒𐴡𐴌, 𐴀𐴝𐴦𐴌 𐴕𐴞𐴎𐴡𐴌 𐴑𐴠𐴣𐴙𐴓𐴢 𐴁𐴝𐴣𐴊𐴞𐴥 𐴀𐴝𐴣𐴀𐴃𐴧𐴟 𐴈𐴝𐴥𐴕𐴝-𐴉𐴞𐴕𐴝 𐴈𐴝𐴥𐴘𐴧𐴝 𐴕𐴡𐴥 𐴀𐴡𐴥𐴘𐴧𐴡 𐴉𐴡𐴙𐴅𐴧𐴡𐴕𐴃𐴡 𐴀𐴝𐴣𐴀𐴌𐴠𐴥 𐴇𐴠𐴥𐴊𐴔𐴡𐴃𐴢 𐴒𐴡𐴥𐴌, 𐴁𐴝𐴦𐴊𐴠 𐴃𐴟𐴘 𐴈𐴝𐴥𐴕𐴝-𐴉𐴞𐴕𐴝 𐴇𐴝𐴥𐴘 𐴉𐴝𐴌𐴞𐴁𐴞𐴥‘؟⁹𐴘𐴡𐴥𐴒𐴧𐴗𐴝𐴘𐴠 𐴑𐴞𐴥 𐴒𐴡𐴗𐴀𐴌𐴒𐴗𐴝𐴥𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴌𐴞𐴥𐴁𐴡, 𐴀𐴞𐴥𐴃𐴝𐴌𐴠 𐴎𐴞𐴘𐴝𐴥𐴕 𐴇𐴡𐴥𐴑𐴟𐴔 𐴒𐴡𐴙𐴅𐴧𐴠𐴥 𐴇𐴞𐴥𐴘𐴝𐴕 𐴒𐴡𐴙𐴅𐴧𐴠𐴥 𐴊𐴠 𐴇𐴠𐴥𐴃𐴡𐴓𐴧𐴝؟ 𐴁𐴞𐴓𐴑𐴟𐴥𐴓𐴢 𐴕𐴡 𐴒𐴡𐴌𐴞𐴥𐴁𐴡.¹⁰𐴇𐴠𐴥𐴕𐴊𐴞𐴓𐴧𐴝 𐴃𐴟𐴣𐴀𐴝𐴥𐴌𐴝 𐴘𐴡𐴥, 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝𐴃𐴧𐴟 𐴃𐴟𐴣𐴀𐴝𐴥𐴌𐴝𐴌𐴠 𐴇𐴡𐴥𐴑𐴟𐴔 𐴒𐴡𐴌𐴝𐴥 𐴒𐴞𐴥𐴘𐴠 𐴊𐴠 𐴇𐴞𐴥𐴀𐴕 𐴁𐴠𐴒𐴧𐴟𐴥𐴕 𐴒𐴡𐴙𐴅𐴧𐴝𐴥 𐴀𐴡𐴥, 𐴈𐴡𐴘𐴁𐴝𐴤 𐴊𐴠, ’𐴀𐴝𐴣𐴀𐴌𐴝 𐴁𐴠𐴇𐴝𐴎𐴡𐴌 𐴒𐴡𐴗𐴀𐴌 𐴀𐴡𐴥𐴑𐴧𐴡𐴓𐴢; 𐴀𐴝𐴣𐴀𐴌𐴝 𐴁𐴝𐴕𐴝𐴤 𐴀𐴝𐴣𐴀𐴌𐴝𐴌 𐴉𐴡𐴥𐴌𐴡𐴏𐴢 𐴀𐴝𐴊𐴝𐴘 𐴒𐴡𐴙𐴅𐴧𐴞𐴥 𐴊𐴠.‘ “

𐴊𐴡𐴐𐴢 𐴎𐴡𐴕 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

¹¹𐴁𐴝𐴦𐴊𐴠 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴞𐴏𐴝𐴤 𐴅𐴠𐴌𐴟𐴥𐴏𐴝𐴓𐴠𐴔𐴡𐴃𐴢 𐴎𐴝𐴘𐴃𐴠 𐴏𐴝𐴔𐴝𐴥𐴌𐴞𐴘𐴝𐴌 𐴀𐴠𐴊𐴧𐴠 𐴒𐴝𐴓𐴞𐴓𐴡𐴌 𐴔𐴝𐴎𐴡𐴃𐴧𐴟 𐴎𐴝𐴦𐴌.¹²𐴀𐴞𐴥𐴁𐴝 𐴀𐴠𐴑𐴧𐴝𐴥𐴕 𐴉𐴝𐴌𐴝𐴃𐴢 𐴒𐴡𐴥𐴓𐴞𐴁𐴝𐴐𐴧𐴡𐴃𐴢, 𐴊𐴡𐴐𐴢 𐴎𐴡𐴕 𐴑𐴟𐴌𐴟𐴏𐴢 𐴁𐴞𐴘𐴝𐴌𐴝𐴙𐴔𐴧𐴝 𐴀𐴞𐴥𐴁𐴝 𐴓𐴧𐴡𐴥𐴘 𐴊𐴡𐴓𐴝 𐴀𐴡𐴥𐴘𐴧𐴠. 𐴀𐴞𐴥𐴃𐴝𐴌𐴝 𐴊𐴟𐴌𐴠𐴥 𐴃𐴞𐴥𐴘𐴝𐴘𐴧𐴝 𐴀𐴝𐴐𐴧𐴞𐴥𐴓𐴢,¹³𐴀𐴝𐴦𐴌 𐴒𐴟𐴎𐴡𐴌𐴝𐴕 𐴔𐴝𐴌𐴞 𐴈𐴡𐴀𐴌 𐴊𐴠, ”𐴀𐴞𐴏𐴝𐴤, 𐴀𐴡𐴥 𐴀𐴟𐴏𐴃𐴝𐴃𐴢, 𐴀𐴝𐴣𐴀𐴌𐴝𐴌 𐴖𐴡𐴌𐴠 𐴌𐴝𐴇𐴝𐴥𐴔 𐴒𐴡𐴌𐴡𐴤!“

¹⁴𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴊𐴠𐴑𐴞𐴥 𐴈𐴡𐴀𐴌 𐴊𐴠, ”𐴎𐴡𐴦, 𐴕𐴞𐴎𐴡𐴌𐴠𐴥 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴊𐴝𐴈𐴡𐴥𐴒𐴡𐴘.“𐴀𐴝𐴦𐴌 𐴀𐴠𐴀𐴕 𐴀𐴡𐴥𐴘𐴧𐴠, 𐴀𐴞𐴥𐴃𐴝𐴌𐴝 𐴎𐴝𐴘𐴃𐴠-𐴎𐴝𐴘𐴃𐴠 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴒𐴞𐴘𐴡𐴘.

¹⁵𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴎𐴧𐴡𐴕𐴠 𐴎𐴠𐴣𐴃𐴧𐴠𐴥 𐴕𐴞𐴎𐴠 𐴒𐴡𐴔 𐴀𐴡𐴥𐴘𐴒𐴞𐴘𐴡𐴘 𐴊𐴠 𐴊𐴠𐴙𐴑𐴧𐴠𐴥, 𐴘𐴡𐴥𐴒𐴧𐴗𐴝 𐴋𐴡𐴣𐴀𐴌 𐴀𐴝𐴁𐴝𐴏𐴠 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴞𐴥-𐴒𐴡𐴌𐴞𐴥 𐴉𐴞𐴥𐴌𐴞 𐴀𐴝𐴙𐴐𐴧𐴠𐴥,¹⁶𐴀𐴝𐴦𐴌 𐴀𐴞𐴏𐴝𐴤𐴌 𐴉𐴡𐴦𐴃𐴢 𐴀𐴟𐴣𐴀𐴘𐴃𐴡𐴘 𐴉𐴡𐴌𐴞 𐴀𐴞𐴥𐴁𐴝𐴌𐴠 𐴐𐴟𐴥𐴑𐴟𐴌𐴞𐴘𐴝 𐴒𐴡𐴙𐴅𐴧𐴠𐴥. 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴀𐴠𐴥𐴎𐴧𐴡𐴕 𐴏𐴝𐴔𐴝𐴥𐴌𐴞.

¹⁷𐴇𐴠𐴥𐴃𐴟𐴕𐴡𐴃𐴢 𐴀𐴞𐴏𐴝𐴤𐴘𐴠 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴊𐴡𐴐𐴢 𐴎𐴡𐴕 𐴁𐴠𐴒𐴧𐴟𐴥𐴕 𐴂𐴝𐴑-𐴏𐴝𐴥𐴉𐴢 𐴀𐴡𐴥𐴘𐴧𐴠 𐴊𐴠 𐴕𐴡 𐴕𐴠𐴥؟ 𐴀𐴝𐴌 𐴕𐴡𐴖 𐴎𐴡𐴕 𐴇𐴡𐴍𐴠𐴥؟¹⁸𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴠 𐴁𐴞𐴊𐴠𐴐𐴡𐴥𐴙𐴃𐴧𐴝 𐴖𐴝 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴠 𐴉𐴞𐴥𐴌𐴞 𐴕𐴟𐴥 𐴀𐴝𐴘𐴧𐴠𐴤 𐴊𐴠 𐴕𐴞𐴥𐴑𐴞؟“¹⁹𐴁𐴝𐴦𐴊𐴠 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴀𐴟𐴍𐴡𐴥, 𐴎𐴡𐴦𐴒𐴡𐴥𐴘; 𐴃𐴟𐴣𐴀𐴝𐴥𐴣𐴌 𐴀𐴞𐴔𐴝𐴕𐴠 𐴃𐴟𐴣𐴀𐴝𐴥𐴣𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥.“

𐴌𐴝𐴙𐴅𐴧𐴡 𐴀𐴝𐴀𐴌 𐴁𐴝𐴦𐴁𐴟𐴃𐴠 𐴐𐴞𐴥𐴑𐴧𐴝

²⁰𐴀𐴠𐴑𐴁𐴝𐴌, 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴃𐴧𐴟 𐴉𐴟𐴏𐴝𐴥𐴌 𐴒𐴡𐴙𐴅𐴧𐴠𐴥 𐴊𐴠, 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴇𐴡𐴣𐴃𐴧𐴠𐴥 𐴀𐴝𐴘𐴁𐴡𐴤؟ 𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴘𐴧𐴠𐴥 𐴊𐴠, ”𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴀𐴝𐴘𐴃𐴠𐴤 𐴊𐴝𐴈𐴝𐴤 𐴎𐴝 𐴉𐴝𐴥𐴚𐴒𐴡𐴌𐴞 𐴕𐴟 𐴀𐴝𐴘𐴁𐴡𐴤,²¹𐴀𐴝𐴦𐴌 𐴔𐴝𐴙𐴕𐴐𐴠𐴥 𐴘𐴡𐴥 𐴕𐴡 𐴈𐴡𐴘𐴁𐴡𐴤 𐴊𐴠 𐴑𐴞, ’𐴏𐴡𐴀, 𐴇𐴞𐴥𐴘𐴝𐴕 𐴀𐴠𐴍𐴠𐴥 𐴀𐴝𐴏𐴠𐴤,‘ 𐴘𐴝𐴥𐴃𐴡, ’𐴀𐴟𐴍𐴠𐴤 𐴀𐴝𐴏𐴠𐴤,‘ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴓𐴧𐴝𐴌 𐴌𐴝𐴙𐴅𐴧𐴡 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴔𐴝𐴎𐴠𐴥 𐴀𐴝𐴏𐴠𐴤.“

²²𐴃𐴝𐴌𐴉𐴡𐴌𐴠 𐴀𐴞𐴥𐴁𐴝𐴘𐴠 𐴕𐴞𐴎𐴡𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴡𐴌𐴠 𐴈𐴡𐴀𐴌 𐴊𐴠, ”𐴀𐴠𐴀𐴕 𐴊𐴞𐴕 𐴀𐴝𐴘𐴁𐴡𐴤 𐴎𐴠𐴣𐴃𐴧𐴠𐴥 𐴃𐴟𐴣𐴀𐴝𐴥𐴌𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴧𐴟 𐴀𐴠𐴑 𐴊𐴞𐴕 𐴀𐴡𐴥𐴘𐴓𐴠 𐴏𐴝𐴘 𐴁𐴡𐴓𐴧𐴝 𐴀𐴝𐴎𐴧𐴟 𐴒𐴡𐴌𐴞𐴥𐴁𐴝, 𐴔𐴡𐴕𐴃𐴡𐴌 𐴕𐴡 𐴊𐴠𐴑𐴞𐴥𐴁𐴝.²³𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴘𐴁𐴡𐴤 𐴊𐴠, ’𐴀𐴠𐴍𐴠𐴥 𐴏𐴡𐴀,‘ 𐴘𐴝𐴥𐴃𐴡 ’𐴀𐴟𐴍𐴠𐴤 𐴏𐴡𐴀.‘ 𐴔𐴡𐴕𐴃𐴡𐴌 𐴕𐴡 𐴎𐴝𐴘𐴧𐴡, 𐴀𐴞𐴥𐴃𐴝𐴌𐴝𐴌 𐴉𐴞𐴏𐴝𐴥 𐴕𐴡 𐴊𐴡𐴥𐴙𐴅𐴧𐴡.²⁴𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴕𐴊𐴞𐴓𐴧𐴝 𐴀𐴝𐴏𐴔𐴝𐴕𐴡𐴌 𐴀𐴠𐴑 𐴋𐴝𐴥𐴑𐴡𐴃𐴧𐴟 𐴁𐴞𐴅𐴞𐴓𐴞 𐴏𐴡𐴔𐴑𐴞𐴓𐴠𐴥 𐴀𐴝𐴌𐴀𐴠𐴑 𐴋𐴝𐴥𐴑𐴡𐴃𐴢 𐴀𐴡𐴥 𐴉𐴡𐴦𐴌 𐴎𐴝𐴦, 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴀𐴝𐴘𐴁𐴡𐴤 𐴊𐴠 𐴇𐴞𐴥𐴘𐴝𐴓𐴝 𐴘𐴡𐴥 𐴇𐴠𐴥𐴕𐴊𐴞𐴓𐴧𐴝 𐴁𐴠 𐴀𐴡𐴥𐴘𐴁𐴡.²⁵𐴓𐴠𐴑𐴞𐴕 𐴀𐴝𐴒𐴠 𐴀𐴞𐴥𐴁𐴝𐴃𐴧𐴟 𐴁𐴡𐴀𐴗𐴃𐴢 𐴑𐴠𐴏𐴧𐴟𐴥 𐴊𐴟𐴑 𐴉𐴝𐴦 𐴉𐴡𐴌𐴞𐴁𐴡𐴥, 𐴀𐴝𐴦𐴌 𐴀𐴠 𐴎𐴡𐴁𐴝𐴕𐴝𐴌 𐴔𐴝𐴕𐴟𐴥𐴙𐴐𐴡𐴃𐴧𐴟 𐴀𐴞𐴕𐴑𐴝𐴌 𐴇𐴝𐴥 𐴉𐴡𐴌𐴞𐴁𐴡𐴥.

²⁶”𐴕𐴡𐴁𐴞 𐴕𐴟𐴌 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴎𐴠𐴕𐴊𐴞𐴓𐴧𐴝 𐴀𐴡𐴥𐴀𐴙𐴓𐴢, 𐴇𐴠𐴥𐴕𐴊𐴞𐴓𐴧𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴀𐴡𐴥 𐴀𐴡𐴥𐴘𐴁𐴡.²⁷𐴎𐴠𐴃𐴡𐴥 𐴊𐴞𐴕 𐴕𐴟 𐴑𐴞𐴐𐴄𐴞𐴃𐴢 𐴕𐴡𐴥 𐴀𐴟𐴍𐴠𐴤 𐴀𐴝𐴦𐴌 𐴃𐴟𐴖𐴝𐴥𐴕 𐴀𐴝𐴀𐴘𐴢 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕𐴡𐴌𐴠 𐴇𐴝𐴥𐴓𐴝𐴑 𐴕𐴡𐴥 𐴒𐴡𐴌𐴠𐴥, 𐴇𐴠𐴥𐴃𐴡𐴊𐴞𐴕 𐴉𐴡𐴙𐴅𐴧𐴡𐴕𐴃𐴡 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴈𐴝𐴥𐴀𐴉𐴞𐴘𐴝 𐴒𐴡𐴌𐴝𐴥𐴃𐴢, 𐴁𐴞𐴘𐴝𐴥 𐴒𐴡𐴌𐴝𐴥𐴃𐴢, 𐴀𐴠𐴊𐴧𐴠 𐴁𐴞𐴘𐴝𐴥 𐴊𐴞𐴘𐴝𐴃𐴢 𐴀𐴝𐴐𐴧𐴞𐴥𐴓𐴢.

²⁸”𐴓𐴟𐴀𐴃𐴡𐴌 𐴊𐴞𐴕 𐴀𐴡𐴥𐴑𐴧𐴡𐴓𐴡𐴃𐴢 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝 𐴀𐴡𐴥𐴀𐴙𐴓𐴢; 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴢 𐴈𐴝𐴥𐴀𐴉𐴞𐴘𐴝𐴃𐴢, 𐴁𐴠𐴏𐴝 𐴑𐴞𐴕𐴝𐴃𐴢, 𐴑𐴠𐴥𐴃𐴞 𐴒𐴡𐴌𐴝𐴥𐴃𐴢, 𐴀𐴠𐴊𐴧𐴠 𐴒𐴡𐴥𐴌 𐴁𐴝𐴕𐴝𐴃𐴢 𐴀𐴝𐴐𐴧𐴞𐴥𐴓𐴢;²⁹𐴔𐴡𐴕𐴃𐴡𐴌 𐴎𐴠 𐴊𐴞𐴕 𐴓𐴟𐴀𐴃𐴢 𐴏𐴡𐴥𐴊𐴡𐴔𐴡𐴃𐴧𐴟 𐴕𐴠𐴦𐴓𐴞 𐴀𐴝𐴀𐴘𐴒𐴞𐴘𐴡𐴘, 𐴀𐴝𐴏𐴔𐴝𐴕𐴡𐴃𐴧𐴟 𐴀𐴡𐴦𐴙𐴕 𐴀𐴠𐴊𐴧𐴠 𐴒𐴡𐴥𐴕𐴋𐴡𐴑 𐴎𐴡𐴥𐴌 𐴉𐴡𐴌𐴠 𐴉𐴝𐴥𐴕 𐴉𐴡𐴌𐴞 𐴀𐴞𐴥𐴃𐴝𐴌𐴝 𐴁𐴠𐴒𐴧𐴟𐴥𐴕𐴡𐴌𐴠 𐴇𐴝𐴥𐴓𐴝𐴑 𐴒𐴡𐴌𐴞𐴥𐴉𐴠𐴓𐴝𐴘𐴧𐴠.

³⁰”𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝 𐴎𐴝𐴇𐴠𐴥𐴌 𐴀𐴡𐴥𐴘𐴁𐴡 𐴊𐴠 𐴇𐴠𐴥 𐴊𐴞𐴕 𐴀𐴡𐴥 𐴇𐴠𐴥𐴕𐴊𐴞𐴓𐴧𐴝 𐴁𐴠 𐴀𐴡𐴥𐴘𐴁𐴡.³¹𐴇𐴠𐴥 𐴊𐴞𐴕 𐴎𐴠𐴦𐴕𐴞𐴑𐴞 𐴒𐴡𐴥𐴌𐴡𐴌 𐴏𐴝𐴥𐴊𐴡𐴌 𐴖𐴡𐴌𐴠 𐴊𐴠 𐴀𐴡𐴥𐴘𐴁𐴡 𐴀𐴝𐴦𐴌 𐴕𐴞𐴎𐴡𐴌 𐴔𐴝𐴓𐴢-𐴏𐴝𐴥𐴔𐴝𐴕 𐴒𐴡𐴥𐴌𐴡𐴌 𐴁𐴟𐴥𐴃𐴡𐴌𐴠 𐴀𐴡𐴥𐴘𐴁𐴡 𐴊𐴠 𐴃𐴝𐴥𐴑𐴞𐴁𐴡, 𐴀𐴞𐴥𐴃𐴝𐴃𐴧𐴟 𐴇𐴞𐴥𐴀𐴕 𐴓𐴡𐴦𐴘𐴢 𐴁𐴡𐴓𐴧𐴝 𐴓𐴝𐴔𐴝𐴃𐴢 𐴕𐴡 𐴓𐴝𐴔𐴝 𐴉𐴡𐴌𐴞𐴁𐴡𐴥; 𐴇𐴠𐴥𐴕𐴊𐴞𐴓𐴧𐴝 𐴎𐴠𐴦𐴕𐴞𐴑𐴞 𐴑𐴠𐴥𐴃𐴞𐴃𐴢 𐴀𐴡𐴥𐴘𐴁𐴡, 𐴀𐴞𐴥𐴃𐴝𐴃𐴧𐴟 𐴖𐴝𐴦𐴉𐴠𐴏𐴢 𐴕𐴟 𐴀𐴝𐴀 𐴉𐴡𐴌𐴞𐴁𐴡𐴥.³²𐴓𐴟𐴀𐴃𐴡𐴌 𐴁𐴡𐴖𐴢 𐴖𐴡𐴥𐴌 𐴇𐴝𐴥𐴓𐴡𐴃𐴢 𐴘𐴝𐴦𐴊𐴢 𐴌𐴝𐴙𐴑𐴧𐴡𐴥.³³𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴎𐴝𐴕 𐴁𐴝𐴏𐴝𐴘𐴃𐴡𐴥 𐴏𐴝𐴀, 𐴀𐴞𐴥𐴃𐴠 𐴇𐴞𐴥𐴘𐴝𐴕 𐴇𐴝𐴥𐴌𐴝𐴘𐴉𐴠𐴓𐴝𐴘𐴁𐴡; 𐴀𐴝𐴦𐴌 𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴎𐴝𐴕 𐴇𐴝𐴥𐴌𐴝𐴘𐴉𐴠𐴓𐴠, 𐴀𐴞𐴥𐴃𐴠 𐴇𐴞𐴥𐴘𐴝𐴕 𐴁𐴝𐴏𐴝𐴘 𐴌𐴝𐴑𐴞𐴥𐴁𐴡.³⁴𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴙𐴌, 𐴇𐴠𐴥 𐴌𐴝𐴙𐴃𐴧𐴝 𐴊𐴟𐴘 𐴎𐴡𐴕 𐴔𐴝𐴕𐴟𐴥𐴙𐴐𐴢 𐴀𐴠𐴑 𐴁𐴞𐴏𐴝𐴥𐴕𐴝𐴃𐴢 𐴀𐴡𐴥𐴘𐴁𐴡 𐴊𐴠 𐴃𐴝𐴥𐴑𐴞𐴁𐴡; 𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴎𐴧𐴡𐴕𐴡𐴌𐴠 𐴓𐴡𐴘𐴎𐴝 𐴎𐴝𐴘𐴁𐴡, 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴁𐴝𐴊𐴢 𐴊𐴞𐴘𐴝 𐴎𐴝𐴘𐴁𐴡.³⁵𐴊𐴟𐴖𐴝𐴥 𐴔𐴝𐴘𐴝𐴉𐴟𐴖𐴝𐴘𐴠 𐴀𐴠𐴑𐴧𐴟 𐴉𐴟𐴥𐴖𐴝𐴣𐴃𐴞 𐴏𐴝𐴑𐴧𐴞 𐴒𐴟𐴥𐴌𐴝𐴘𐴁𐴡 𐴊𐴠 𐴃𐴝𐴥𐴑𐴞𐴁𐴡; 𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴎𐴧𐴡𐴕𐴡𐴌𐴠 𐴓𐴡𐴘𐴎𐴝 𐴎𐴝𐴘𐴁𐴡, 𐴀𐴝𐴌 𐴀𐴠𐴑𐴎𐴡𐴕𐴡𐴌𐴠 𐴁𐴝𐴊𐴢 𐴊𐴞𐴘𐴝 𐴎𐴝𐴘𐴁𐴡.³⁶𐴊𐴟𐴘 𐴎𐴡𐴕 𐴔𐴝𐴕𐴟𐴥𐴙𐴐𐴢 𐴁𐴞𐴓𐴡𐴃𐴢 𐴀𐴡𐴥𐴘𐴁𐴡 𐴊𐴠 𐴃𐴝𐴥𐴑𐴞𐴁𐴡; 𐴀𐴞𐴥𐴃𐴝𐴌𐴝𐴃𐴧𐴟 𐴀𐴠𐴎𐴧𐴡𐴕𐴡𐴌𐴠 𐴓𐴡𐴘𐴎𐴝 𐴎𐴝𐴘𐴁𐴡, 𐴀𐴝𐴌 𐴀𐴠𐴎𐴧𐴡𐴕𐴡𐴌𐴠 𐴁𐴝𐴊𐴢 𐴊𐴞𐴘𐴝 𐴎𐴝𐴘𐴁𐴡.“³⁷𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴔𐴝𐴓𐴞𐴑, 𐴀𐴞𐴀𐴕 𐴇𐴡𐴍𐴠𐴥 𐴀𐴡𐴥𐴘𐴁𐴡 𐴊𐴠𐴥؟“
𐴀𐴞𐴥𐴁𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴔𐴡𐴌𐴝 𐴓𐴝𐴐𐴢 𐴎𐴠𐴍𐴠𐴥, 𐴇𐴠𐴥𐴍𐴠 𐴃𐴡 𐴇𐴡𐴥𐴖𐴕 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴎𐴡𐴔𐴝 𐴀𐴡𐴥𐴘𐴁𐴡.“

The Word for the World International

https://app.library.bible/content/87faca8b51c22590