𐴘𐴡𐴇𐴝𐴥𐴕𐴧𐴝 8を読んでください。

𐴘𐴡𐴇𐴝𐴥𐴕𐴧𐴝8

𐴎𐴠𐴕𐴝𐴤 𐴒𐴡𐴙𐴅𐴧𐴠𐴥 𐴊𐴠 𐴔𐴝𐴘𐴝𐴉𐴟𐴖𐴝𐴌 𐴁𐴞𐴏𐴝𐴌

¹𐴔𐴡𐴕𐴃𐴡𐴌 𐴀𐴞𐴏𐴝𐴤 𐴎𐴝𐴘𐴃𐴟𐴕 𐴉𐴝𐴀𐴌𐴡𐴃𐴢 𐴒𐴞𐴦𐴘𐴠𐴥.

²𐴃𐴝𐴌𐴉𐴡𐴌 𐴊𐴞𐴕 𐴁𐴞𐴀𐴕𐴧𐴝 𐴏𐴡𐴥𐴀𐴌𐴠 𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴀𐴝𐴁𐴝𐴌 𐴀𐴝𐴙𐴐𐴧𐴠𐴥, 𐴀𐴝𐴦𐴌 𐴔𐴝𐴕𐴟𐴥𐴙𐴐𐴢 𐴁𐴠𐴒𐴧𐴟𐴥𐴕 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴎𐴡𐴔𐴝 𐴀𐴡𐴥𐴘𐴧𐴠. 𐴁𐴝𐴦𐴊𐴠 𐴀𐴞𐴥𐴁𐴝 𐴁𐴡𐴀𐴘𐴢 𐴀𐴞𐴥𐴃𐴝𐴌𐴝𐴌𐴠 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠.³𐴇𐴠𐴥𐴣𐴃𐴧𐴠 𐴀𐴝𐴓𐴠𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴠𐴑 𐴔𐴝𐴘𐴝𐴉𐴟𐴖𐴝𐴌𐴠 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴀𐴝𐴙𐴕𐴧𐴠𐴤, 𐴎𐴞𐴁𐴝𐴤 𐴎𐴠𐴕𐴝𐴤 𐴒𐴡𐴌𐴝𐴥𐴃𐴢 𐴊𐴡𐴥𐴌𐴝 𐴇𐴝𐴥𐴘𐴧𐴠. 𐴁𐴝𐴦𐴊𐴠 𐴇𐴞𐴥𐴁𐴝𐴌𐴠 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴔𐴝𐴎𐴠𐴥 𐴃𐴞𐴥𐴘𐴝𐴒𐴝𐴌𐴝𐴘𐴧𐴠.⁴𐴃𐴡𐴥𐴘 𐴀𐴞𐴥𐴃𐴝𐴌𐴝 𐴀𐴞𐴏𐴝𐴤𐴌𐴠 𐴈𐴡𐴀𐴌 𐴊𐴠, ”𐴀𐴟𐴥𐴎𐴟𐴌, 𐴀𐴠 𐴔𐴝𐴘𐴝𐴉𐴟𐴖𐴝 𐴖𐴝 𐴎𐴠𐴕𐴝𐴤 𐴒𐴡𐴌𐴝𐴥𐴃𐴢 𐴊𐴡𐴥𐴌𐴝 𐴇𐴝𐴥𐴘𐴧𐴠.⁵𐴐𐴡𐴥𐴌𐴞𐴘𐴡𐴃𐴡𐴃𐴢 𐴔𐴟𐴀𐴏𐴝𐴘𐴠 𐴀𐴝𐴣𐴀𐴌𐴝𐴌𐴠 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠, 𐴀𐴠𐴕𐴊𐴞𐴓𐴧𐴝 𐴔𐴝𐴘𐴝𐴉𐴟𐴀𐴝𐴙𐴕 𐴊𐴡𐴌𐴠 𐴐𐴞𐴥𐴓𐴡𐴌 𐴊𐴡𐴓𐴝 𐴔𐴝𐴌𐴞 𐴔𐴝𐴌𐴞𐴉𐴠𐴥𐴓𐴝𐴘𐴃𐴡, 𐴔𐴡𐴕𐴃𐴡𐴌 𐴃𐴟𐴀𐴛 𐴑𐴞𐴦 𐴈𐴡𐴀؟“

⁶𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴇𐴠𐴥 𐴏𐴟𐴥𐴖𐴝𐴓𐴢 𐴓𐴝𐴕 𐴀𐴠𐴕𐴃𐴝𐴥𐴕 𐴒𐴡𐴌𐴞𐴥 𐴁𐴡𐴓𐴧𐴝 𐴒𐴡𐴙𐴅𐴧𐴠𐴥 𐴊𐴠, 𐴎𐴠𐴀𐴕𐴠 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴀𐴠𐴓𐴎𐴝𐴔 𐴊𐴞𐴁𐴝𐴌 𐴔𐴡𐴑𐴝 𐴉𐴝𐴦.
𐴔𐴡𐴕𐴃𐴡𐴌 𐴀𐴞𐴏𐴝𐴤 𐴀𐴟𐴣𐴌𐴞 𐴁𐴡𐴀𐴘𐴢 𐴀𐴡𐴦𐴣𐴓𐴠 𐴔𐴠𐴍𐴞𐴃𐴢 𐴓𐴠𐴑𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.⁷𐴀𐴞𐴥𐴃𐴝𐴌𐴝 𐴎𐴠𐴃𐴧𐴡𐴥𐴃𐴢 𐴀𐴞𐴥𐴁𐴝𐴃𐴧𐴟 𐴖𐴝𐴌𐴝𐴖𐴡𐴌𐴞 𐴉𐴟𐴏𐴝𐴥𐴌 𐴒𐴡𐴌𐴝𐴥𐴃𐴢 𐴀𐴝𐴏𐴠𐴤, 𐴀𐴞𐴥𐴁𐴝 𐴀𐴟𐴍𐴞𐴤 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴌 𐴁𐴟𐴥𐴃𐴡𐴌𐴠 𐴎𐴠𐴦𐴕𐴞𐴑𐴞 𐴒𐴟𐴕𐴝𐴤 𐴏𐴝𐴥𐴌𐴝 𐴀𐴝𐴏𐴡𐴤, 𐴔𐴝𐴘𐴝𐴉𐴟𐴖𐴝 𐴖𐴝𐴌𐴠 𐴐𐴞𐴥𐴓𐴡𐴌 𐴊𐴡𐴓𐴝 𐴀𐴞𐴥𐴃𐴠 𐴀𐴝𐴒𐴠 𐴔𐴝𐴌𐴡.“⁸𐴁𐴝𐴦𐴊𐴠 𐴀𐴞𐴏𐴝𐴤 𐴀𐴝𐴁𐴝𐴌 𐴀𐴟𐴣𐴌𐴞 𐴁𐴡𐴀𐴘𐴢 𐴔𐴠𐴍𐴞𐴃𐴢 𐴓𐴠𐴑𐴝𐴥𐴃𐴢 𐴀𐴝𐴐𐴧𐴞𐴥𐴓𐴢.

⁹𐴇𐴠𐴥 𐴈𐴡𐴃𐴝𐴤 𐴉𐴟𐴥𐴕𐴞, 𐴀𐴞𐴥𐴃𐴝𐴌𐴝 𐴁𐴟𐴌𐴝𐴤𐴃𐴧𐴟 𐴓𐴡𐴥𐴃𐴞 𐴐𐴟𐴥𐴌𐴟 𐴒𐴡𐴌𐴞𐴥 𐴎𐴡𐴕-𐴎𐴡𐴕 𐴕𐴠𐴦𐴓𐴞𐴒𐴞𐴘𐴡𐴥𐴘, 𐴔𐴡𐴕𐴃𐴡𐴌 𐴀𐴞𐴏𐴝𐴤 𐴀𐴠𐴎𐴧𐴡𐴕 𐴃𐴝𐴥𐴘𐴒𐴞𐴘𐴡𐴘, 𐴔𐴝𐴘𐴝𐴉𐴟𐴖𐴝 𐴖𐴝 𐴘𐴡𐴥 𐴔𐴝𐴎𐴠𐴥 𐴃𐴞𐴥𐴘𐴝𐴘 𐴀𐴝𐴐𐴧𐴞𐴥𐴓𐴢.¹⁰𐴀𐴞𐴏𐴝𐴤 𐴀𐴟𐴍𐴞𐴤 𐴎𐴠𐴣𐴃𐴧𐴠𐴥 𐴔𐴝𐴘𐴝𐴉𐴟𐴖𐴝 𐴖𐴝 𐴁𐴝𐴊𐴠 𐴀𐴝𐴌 𐴇𐴡𐴕𐴡𐴤𐴑𐴞𐴘𐴡𐴌𐴠 𐴕𐴡𐴥 𐴊𐴠𐴑𐴠𐴥, 𐴀𐴞𐴏𐴝𐴤𐴘𐴠 𐴇𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴔𐴝𐴘𐴝𐴉𐴟𐴖𐴝, 𐴀𐴟𐴘𐴃𐴝𐴌𐴝𐴤 𐴇𐴡𐴍𐴠𐴥؟ 𐴇𐴡𐴕𐴡𐴤𐴑𐴞𐴘𐴠 𐴃𐴡𐴌 𐴈𐴡𐴏𐴟𐴥𐴌𐴞 𐴕𐴡𐴥 𐴊𐴡𐴥𐴌𐴠 𐴕𐴞𐴥𐴑𐴞؟“

¹¹𐴇𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴇𐴡𐴕𐴡𐴤𐴑𐴞𐴘𐴠 𐴕𐴡𐴥 𐴊𐴡𐴥𐴌𐴠.“
𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴘𐴡𐴥 𐴃𐴡𐴌 𐴈𐴡𐴏𐴟𐴥𐴌𐴞 𐴕𐴡 𐴊𐴡𐴥𐴌𐴞. 𐴎𐴝𐴦, 𐴒𐴟𐴕𐴝𐴤 𐴕𐴡 𐴒𐴡𐴌𐴞𐴥𐴐𐴢.“

𐴀𐴞𐴏𐴝𐴤 𐴔𐴡𐴀𐴏𐴞𐴤 𐴀𐴡𐴥𐴙𐴓𐴊𐴠 𐴊𐴟𐴕𐴞𐴘𐴝𐴙𐴌 𐴕𐴟𐴌

¹²𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴁𐴝𐴌 𐴈𐴡𐴀𐴌 𐴊𐴠, ”𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴊𐴟𐴕𐴞𐴘𐴝𐴙𐴌 𐴕𐴟𐴌, 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴉𐴞𐴏𐴝𐴥 𐴊𐴡𐴌𐴠, 𐴀𐴞𐴥𐴃𐴠 𐴀𐴝𐴕𐴊𐴝𐴤𐴌𐴡𐴃𐴢 𐴕𐴟 𐴀𐴝𐴥𐴣𐴍𐴞𐴁𐴡, 𐴁𐴡𐴥𐴓𐴑𐴠 𐴎𐴞𐴕𐴊𐴞𐴒𐴞𐴌 𐴕𐴟𐴌 𐴉𐴝𐴘𐴁𐴡.“

¹³𐴇𐴠𐴥𐴃𐴡𐴓𐴧𐴝 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴃𐴡 𐴕𐴞𐴎𐴡𐴌 𐴒𐴡𐴁𐴝𐴤 𐴕𐴞𐴎𐴠 𐴀𐴠𐴥𐴕𐴝 𐴊𐴡𐴌; 𐴃𐴟𐴣𐴀𐴝𐴥𐴣𐴌 𐴒𐴡𐴁𐴝𐴤 𐴏𐴡𐴥𐴘𐴧𐴞 𐴕𐴡.“

¹⁴𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴕𐴞𐴎𐴡𐴌 𐴒𐴡𐴁𐴝𐴤 𐴕𐴞𐴎𐴠 𐴊𐴞𐴓𐴠𐴥 𐴘𐴡, 𐴀𐴝𐴣𐴀𐴌 𐴒𐴡𐴁𐴝𐴤 𐴏𐴡𐴥𐴘𐴧𐴞, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴇𐴡𐴕𐴃𐴟𐴤 𐴀𐴝𐴙𐴐𐴧𐴞𐴤 𐴀𐴠𐴊𐴧𐴠 𐴇𐴡𐴍𐴠𐴥 𐴎𐴝𐴙𐴌𐴒𐴡𐴥𐴘 𐴀𐴝𐴀𐴛 𐴎𐴝𐴕𐴞. 𐴔𐴡𐴕𐴃𐴡𐴌 𐴀𐴝𐴀𐴛 𐴇𐴡𐴕𐴃𐴟𐴤 𐴀𐴝𐴙𐴐𐴧𐴞𐴤 𐴀𐴝𐴦𐴌 𐴇𐴡𐴍𐴠𐴥 𐴎𐴝𐴙𐴌𐴒𐴡𐴥𐴘 𐴇𐴞𐴥𐴘𐴝𐴕 𐴃𐴟𐴣𐴀𐴝𐴥𐴌𐴝 𐴕𐴡 𐴎𐴝𐴕𐴡.¹⁵𐴃𐴟𐴣𐴀𐴝𐴥𐴌𐴝 𐴃𐴡 𐴀𐴞𐴕𐴏𐴝𐴥𐴕𐴡𐴌 𐴕𐴞𐴘𐴡𐴔 𐴔𐴡𐴎𐴞𐴕 𐴁𐴞𐴏𐴝𐴌 𐴒𐴡𐴌𐴡𐴤, 𐴔𐴡𐴕𐴃𐴡𐴌 𐴀𐴝𐴀𐴛 𐴇𐴡𐴕𐴡𐴤𐴑𐴞𐴘𐴡𐴌 𐴁𐴞𐴏𐴝𐴌 𐴕𐴡 𐴒𐴡𐴌𐴞𐴥.¹⁶𐴀𐴝𐴀𐴛 𐴎𐴡𐴊𐴞 𐴁𐴞𐴏𐴝𐴌 𐴒𐴡𐴌𐴞𐴥 𐴘𐴡, 𐴀𐴝𐴣𐴀𐴌 𐴁𐴞𐴏𐴝𐴌 𐴇𐴡𐴥𐴑, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴀𐴠𐴑𐴠𐴥𐴓𐴝 𐴕𐴡, 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴇𐴠𐴥 𐴁𐴝𐴉𐴢 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴀𐴝𐴏𐴠𐴤.¹⁷𐴃𐴟𐴣𐴀𐴝𐴥𐴌𐴝𐴌 𐴐𐴡𐴥𐴌𐴞𐴘𐴡𐴃𐴡𐴃𐴢 𐴀𐴡𐴥 𐴓𐴠𐴙𐴑𐴧𐴝𐴥 𐴀𐴝𐴏𐴠𐴤 𐴊𐴠 𐴑𐴞, 𐴊𐴟𐴘 𐴎𐴡𐴕𐴠 𐴀𐴠𐴑 𐴋𐴡𐴙𐴓𐴧𐴝 𐴒𐴡𐴁𐴝𐴤 𐴊𐴠𐴥 𐴊𐴠 𐴀𐴡𐴥𐴘𐴓𐴠 𐴇𐴠𐴥 𐴒𐴡𐴁𐴝𐴤 𐴏𐴡𐴥𐴘𐴧𐴞.¹⁸𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴀𐴝𐴀𐴛 𐴕𐴞𐴎𐴠 𐴘𐴡𐴥 𐴒𐴡𐴁𐴝𐴤 𐴊𐴞𐴥, 𐴀𐴝𐴦𐴌 𐴀𐴝𐴣𐴀𐴌 𐴁𐴝𐴦𐴁𐴟𐴃𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴇𐴠𐴥 𐴁𐴝𐴉𐴠 𐴘𐴡𐴥 𐴒𐴡𐴁𐴝𐴤 𐴊𐴠𐴥.“

¹⁹𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴁𐴝𐴉𐴢 𐴇𐴡𐴍𐴠𐴥؟“
𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴕𐴡 𐴀𐴝𐴣𐴀𐴌𐴠𐴥 𐴏𐴞𐴕𐴡𐴥, 𐴀𐴝𐴦𐴌 𐴕𐴡 𐴀𐴝𐴣𐴀𐴌 𐴁𐴝𐴉𐴡𐴌𐴠 𐴏𐴞𐴕𐴡𐴥. 𐴃𐴟𐴣𐴀𐴝𐴥𐴌𐴝 𐴎𐴡𐴊𐴞 𐴀𐴝𐴣𐴀𐴌𐴠𐴥 𐴏𐴞𐴕𐴞𐴥𐴃𐴝, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌 𐴁𐴝𐴉𐴡𐴌𐴠 𐴘𐴡𐴥 𐴏𐴞𐴕𐴞𐴥𐴃𐴝.“²⁰𐴀𐴞𐴏𐴝𐴤𐴘𐴠 𐴈𐴡𐴃𐴝𐴤 𐴇𐴞𐴥𐴀𐴕 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴀𐴟𐴍𐴝𐴥𐴕𐴡𐴃𐴢 𐴊𐴝𐴕-𐴁𐴝𐴐𐴧𐴟𐴤𐴌 𐴋𐴝𐴥𐴑𐴠 𐴃𐴝𐴦𐴓𐴞𐴔 𐴊𐴞𐴁𐴝𐴐𐴧𐴡𐴥𐴃𐴢 𐴁𐴠 𐴈𐴡𐴘𐴧𐴠𐴥. 𐴃𐴡𐴀 𐴇𐴡𐴕𐴡𐴤𐴑𐴞𐴘𐴠 𐴀𐴞𐴥𐴁𐴝𐴌𐴠 𐴒𐴠𐴌𐴠𐴉𐴃𐴝𐴌 𐴕𐴡𐴥 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴌 𐴀𐴡𐴑𐴃𐴡𐴥 𐴀𐴝𐴙𐴅𐴧𐴡𐴤 𐴕𐴟𐴥 𐴀𐴝𐴘𐴧𐴠𐴤.

𐴀𐴝𐴀𐴛 𐴎𐴠𐴍𐴠𐴥 𐴎𐴝𐴙𐴌𐴒𐴡𐴥𐴘 𐴇𐴠𐴥𐴍𐴠 𐴃𐴟𐴣𐴀𐴝𐴥𐴌𐴝 𐴀𐴝𐴀𐴘𐴢 𐴕𐴡 𐴉𐴝𐴌𐴞𐴁𐴝𐴥

²¹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴀𐴝𐴁𐴝𐴌 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴡 𐴎𐴝𐴙𐴌𐴒𐴡𐴥𐴘; 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴃𐴝𐴓𐴝𐴐𐴢 𐴒𐴡𐴌𐴞𐴥𐴁𐴝, 𐴀𐴝𐴦𐴌 𐴕𐴞𐴎𐴡𐴌 𐴒𐴟𐴕𐴝𐴤𐴃𐴢 𐴕𐴞𐴎𐴠 𐴔𐴡𐴌𐴞𐴁𐴝𐴥. 𐴀𐴝𐴀𐴛 𐴎𐴠𐴍𐴠𐴥 𐴎𐴝𐴙𐴌𐴒𐴡𐴥𐴘 𐴇𐴠𐴥𐴍𐴠 𐴃𐴟𐴣𐴀𐴝𐴥𐴌𐴝 𐴀𐴝𐴀𐴘𐴢 𐴕𐴡 𐴉𐴝𐴌𐴞𐴁𐴝𐴥.“

²²𐴇𐴠𐴥𐴃𐴡𐴓𐴧𐴝 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴈𐴡𐴀𐴌 𐴊𐴠, ”𐴀𐴞𐴥𐴁𐴝𐴘𐴠 𐴇𐴡𐴥𐴕𐴡 𐴕𐴞𐴎𐴡𐴌𐴠𐴥 𐴔𐴝𐴌𐴞𐴉𐴠𐴥𐴓𐴝𐴘𐴁𐴡 𐴕𐴠𐴥؟ 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴈𐴡𐴘𐴧𐴠𐴥 𐴊𐴠, ’𐴀𐴝𐴀𐴛 𐴎𐴠𐴍𐴠𐴥 𐴎𐴝𐴙𐴌𐴒𐴡𐴥𐴘 𐴇𐴠𐴥𐴍𐴠 𐴃𐴟𐴣𐴀𐴝𐴥𐴌𐴝 𐴀𐴝𐴀𐴘𐴢 𐴕𐴡 𐴉𐴝𐴌𐴞𐴁𐴝𐴥.‘ “

²³𐴀𐴞𐴏𐴝𐴤𐴘𐴠 𐴀𐴝𐴌𐴡𐴤 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴕𐴞𐴏𐴡𐴌 𐴃𐴧𐴟, 𐴀𐴝𐴦𐴌 𐴀𐴝𐴀𐴛 𐴖𐴡𐴃𐴧𐴟𐴥. 𐴃𐴟𐴣𐴀𐴝𐴥𐴌𐴝 𐴀𐴠 𐴊𐴟𐴕𐴞𐴘𐴝𐴙𐴌; 𐴀𐴝𐴀𐴛 𐴃𐴡 𐴀𐴠 𐴊𐴟𐴕𐴞𐴘𐴝𐴙𐴌 𐴕𐴡.²⁴𐴇𐴠𐴥𐴃𐴡𐴓𐴧𐴝 𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴘𐴧𐴞𐴥 𐴊𐴠, 𐴃𐴟𐴣𐴀𐴝𐴥𐴌𐴝 𐴕𐴞𐴎𐴡𐴌 𐴒𐴟𐴕𐴝𐴤𐴃𐴢 𐴕𐴞𐴎𐴠 𐴔𐴡𐴌𐴞𐴁𐴝𐴥. 𐴃𐴟𐴣𐴀𐴝𐴥𐴌𐴝 𐴎𐴡𐴊𐴞 𐴀𐴝𐴀𐴛 𐴀𐴞𐴥𐴁𐴝 𐴊𐴠 𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴌𐴡𐴤, 𐴃𐴡𐴥𐴀𐴘𐴓𐴠 𐴕𐴞𐴎𐴡𐴌 𐴒𐴟𐴕𐴝𐴤𐴃𐴢 𐴕𐴞𐴎𐴠 𐴔𐴡𐴌𐴞𐴁𐴝𐴥.“

²⁵𐴃𐴡𐴥𐴘 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴀𐴛 𐴇𐴡𐴕؟“
𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴟𐴁𐴝𐴤 𐴎𐴞𐴁𐴝𐴤𐴌 𐴁𐴝𐴦𐴁𐴟𐴃𐴠 𐴀𐴝𐴀𐴛 𐴉𐴡𐴀𐴘𐴓𐴝 𐴐𐴟𐴥𐴌𐴟𐴃𐴢 𐴓𐴡𐴥𐴃𐴞 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴘𐴢-𐴈𐴡𐴀𐴘𐴢 𐴀𐴝𐴘𐴧𐴞𐴤𐴌.²⁶𐴃𐴟𐴣𐴀𐴝𐴥𐴌𐴝𐴌 𐴁𐴝𐴦𐴁𐴟𐴃𐴠 𐴈𐴡𐴘𐴁𐴝𐴥𐴌 𐴀𐴠𐴊𐴧𐴠 𐴁𐴞𐴏𐴝𐴌 𐴒𐴡𐴌𐴞𐴥𐴁𐴝𐴌 𐴀𐴝𐴣𐴀𐴃𐴧𐴟 𐴁𐴡𐴀𐴗𐴃𐴢 𐴑𐴠𐴏𐴧𐴟𐴥 𐴀𐴝𐴏𐴠𐴤, 𐴓𐴠𐴑𐴞𐴕 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴀𐴞𐴥𐴁𐴝 𐴏𐴡𐴥𐴘𐴧𐴞. 𐴀𐴝𐴀𐴛 𐴊𐴟𐴕𐴞𐴘𐴝𐴘𐴌𐴠 𐴏𐴞𐴌𐴞𐴥𐴉𐴢 𐴀𐴟𐴀𐴙𐴕 𐴈𐴡𐴀𐴘𐴢 𐴎𐴞𐴀𐴕 𐴀𐴞𐴥𐴁𐴝𐴌 𐴃𐴡𐴌𐴉𐴡𐴥𐴃𐴧𐴟 𐴉𐴟𐴥𐴙𐴕𐴧𐴞.“

²⁷𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴁𐴝𐴉𐴡𐴌 𐴁𐴝𐴦𐴁𐴟𐴃𐴠 𐴈𐴡𐴀𐴌 𐴊𐴠 𐴇𐴞𐴥𐴘𐴝𐴕 𐴀𐴞𐴥𐴃𐴝𐴌𐴝 𐴕𐴡𐴥 𐴁𐴟𐴎𐴠𐴥.²⁸𐴇𐴠𐴥𐴃𐴡𐴓𐴧𐴝 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌𐴠 𐴎𐴠𐴣𐴃𐴧𐴠𐴥 𐴖𐴡𐴌𐴠 𐴃𐴟𐴓𐴞𐴤𐴁𐴝, 𐴇𐴠𐴥𐴣𐴃𐴧𐴠 𐴎𐴝𐴕𐴞𐴁𐴝𐴥 𐴊𐴠, 𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴀𐴞𐴥𐴁𐴝, 𐴀𐴝𐴦𐴌 𐴀𐴝𐴀𐴛 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴑𐴠𐴏𐴧𐴟𐴥 𐴕𐴡 𐴒𐴡𐴌𐴞𐴥, 𐴁𐴡𐴥𐴓𐴑𐴠 𐴀𐴝𐴀𐴛 𐴀𐴟𐴀𐴙𐴕 𐴁𐴠 𐴈𐴡𐴀𐴘𐴢 𐴎𐴞𐴀𐴕 𐴁𐴝𐴉𐴠 𐴀𐴝𐴣𐴀𐴌𐴠𐴥 𐴐𐴞𐴥𐴑𐴝𐴘𐴧𐴠.²⁹𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴀𐴞𐴥𐴁𐴝 𐴀𐴝𐴣𐴀𐴌 𐴉𐴟𐴥𐴖𐴝𐴣𐴃𐴞 𐴀𐴝𐴏𐴠𐴤. 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌𐴠𐴥 𐴀𐴠𐴑𐴠𐴥𐴓𐴝 𐴕𐴡𐴥 𐴀𐴠𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴇𐴝𐴥𐴔𐴞𐴐𐴝 𐴈𐴝𐴔 𐴀𐴟𐴀𐴙𐴕 𐴒𐴡𐴌𐴞𐴥 𐴎𐴞𐴀𐴕 𐴓𐴡𐴥𐴘 𐴀𐴞𐴥𐴁𐴝 𐴑𐴟𐴥𐴐𐴞 𐴀𐴡𐴥.“³⁰𐴀𐴞𐴏𐴝𐴤𐴌 𐴈𐴡𐴃𐴝𐴤 𐴇𐴞𐴥𐴀𐴕 𐴉𐴟𐴥𐴕𐴞 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤.

𐴏𐴡𐴥𐴘𐴧𐴞𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴎𐴝𐴊𐴢 𐴒𐴡𐴌𐴞𐴥𐴁𐴡

³¹𐴎𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤, 𐴀𐴞𐴥𐴃𐴝𐴌𐴝𐴌𐴠 𐴀𐴞𐴥𐴁𐴝𐴘𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴈𐴡𐴃𐴝𐴤𐴃𐴢 𐴓𐴝𐴒𐴞 𐴃𐴝𐴥𐴑𐴡, 𐴃𐴡𐴥𐴀𐴘𐴓𐴠 𐴏𐴡𐴥𐴘𐴧𐴞 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴀𐴟𐴔𐴧𐴡𐴃𐴢,³²𐴁𐴝𐴦𐴊𐴠 𐴃𐴟𐴣𐴀𐴝𐴥𐴌𐴝 𐴏𐴡𐴥𐴘𐴧𐴞𐴌𐴠 𐴎𐴝𐴕𐴞𐴁𐴝𐴥, 𐴀𐴝𐴦𐴌 𐴇𐴠𐴥 𐴏𐴡𐴥𐴘𐴧𐴞𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴎𐴝𐴊𐴢 𐴒𐴡𐴌𐴞𐴥𐴁𐴡.“

³³𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴀𐴡𐴥𐴘𐴓𐴝𐴔 𐴊𐴠 𐴀𐴞𐴁𐴌𐴝𐴇𐴞𐴥𐴔𐴡𐴌 𐴕𐴡𐴏𐴡𐴥𐴓𐴢, 𐴀𐴝𐴣𐴀𐴌𐴝 𐴇𐴡𐴕𐴡𐴤𐴊𐴞𐴕 𐴇𐴡𐴕𐴡𐴤𐴑𐴞𐴘𐴡𐴌 𐴒𐴟𐴓𐴝𐴔 𐴀𐴡𐴥𐴘𐴧𐴞 𐴊𐴠 𐴕𐴝𐴥𐴘. 𐴃𐴡𐴥𐴘 𐴃𐴟𐴀𐴛 𐴑𐴠𐴀𐴕𐴒𐴡𐴌𐴞 𐴈𐴡𐴀𐴌 𐴊𐴠, ’𐴃𐴟𐴣𐴀𐴝𐴥𐴌𐴝 𐴀𐴝𐴎𐴝𐴊𐴢 𐴉𐴝𐴘𐴁𐴝؟‘“

³⁴𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴠𐴃𐴝𐴌𐴝𐴤 𐴒𐴟𐴕𐴝𐴤 𐴒𐴡𐴌𐴝𐴥𐴃𐴢 𐴃𐴝𐴥𐴑𐴠 𐴀𐴞𐴥𐴃𐴝𐴌𐴝 𐴒𐴟𐴕𐴝𐴤𐴌 𐴒𐴟𐴓𐴝𐴔.³⁵𐴒𐴟𐴓𐴝𐴔 𐴃𐴡 𐴒𐴡𐴥𐴌𐴡𐴃𐴢 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴕𐴡 𐴃𐴝𐴥𐴑𐴠, 𐴁𐴡𐴥𐴓𐴑𐴠 𐴉𐴟𐴖𐴝 𐴁𐴠 𐴀𐴝𐴁𐴝𐴊𐴟𐴓𐴀𐴝𐴁𐴝𐴊𐴢 𐴃𐴝𐴥𐴑𐴠.³⁶𐴇𐴠𐴥𐴃𐴡𐴓𐴧𐴝 𐴉𐴟𐴖𐴝𐴘𐴠 𐴎𐴡𐴊𐴞 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴎𐴝𐴊𐴢 𐴒𐴡𐴌𐴠𐴥, 𐴃𐴟𐴣𐴀𐴝𐴥𐴌𐴝 𐴈𐴝𐴥𐴔𐴝𐴈𐴝 𐴀𐴝𐴎𐴝𐴊𐴢 𐴀𐴡𐴥𐴘𐴁𐴝.³⁷𐴀𐴝𐴀𐴛 𐴎𐴝𐴕𐴞, 𐴃𐴟𐴣𐴀𐴝𐴥𐴌𐴝 𐴀𐴞𐴁𐴌𐴝𐴇𐴞𐴥𐴔𐴡𐴌 𐴕𐴡𐴏𐴡𐴥𐴓𐴢, 𐴃𐴡𐴀 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴏𐴡𐴀𐴌, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝𐴌 𐴊𐴞𐴓𐴡𐴃𐴢 𐴃𐴡 𐴀𐴝𐴣𐴀𐴌 𐴈𐴡𐴃𐴝𐴤 𐴓𐴧𐴝 𐴇𐴡𐴕𐴡𐴤 𐴎𐴝𐴒𐴝 𐴕𐴝𐴥𐴘.³⁸𐴀𐴝𐴀𐴛 𐴀𐴟𐴀𐴙𐴕 𐴈𐴡𐴀𐴘𐴢 𐴎𐴞𐴀𐴕 𐴀𐴝𐴀𐴛 𐴀𐴝𐴣𐴀𐴌 𐴁𐴝𐴉𐴡𐴌 𐴇𐴝𐴣𐴏𐴠 𐴊𐴠𐴙𐴑𐴧𐴞𐴥, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴀𐴟𐴀𐴙𐴕 𐴒𐴡𐴌𐴡𐴤 𐴎𐴞𐴀𐴕 𐴃𐴟𐴣𐴀𐴝𐴥𐴌𐴝 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴡𐴃𐴧𐴟 𐴉𐴟𐴥𐴙𐴕𐴧𐴡.“

³⁹𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝𐴌 𐴁𐴝𐴉𐴢 𐴀𐴡𐴥𐴙𐴓𐴊𐴠 𐴀𐴞𐴁𐴌𐴝𐴇𐴞𐴥𐴔.“
𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴞𐴁𐴌𐴝𐴇𐴞𐴥𐴔𐴡𐴌 𐴉𐴟𐴀𐴝𐴙𐴕 𐴀𐴡𐴥𐴘𐴃𐴝 𐴁𐴡𐴥𐴓𐴞, 𐴃𐴟𐴣𐴀𐴝𐴥𐴌𐴝 𐴀𐴞𐴁𐴌𐴝𐴇𐴞𐴥𐴔𐴡𐴌 𐴋𐴡𐴥𐴙𐴓𐴧𐴝 𐴈𐴝𐴔 𐴒𐴡𐴙𐴃𐴧𐴝𐴥.⁴⁰𐴀𐴝𐴀𐴛 𐴃𐴡 𐴀𐴝𐴓𐴧𐴝𐴃𐴧𐴟 𐴎𐴠 𐴏𐴡𐴥𐴘𐴧𐴞 𐴒𐴝𐴥𐴕 𐴉𐴟𐴥𐴙𐴕𐴧𐴞, 𐴇𐴞𐴥𐴘𐴝𐴕 𐴀𐴠𐴥𐴕𐴝 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴘𐴧𐴞𐴥, 𐴀𐴝𐴦𐴌 𐴃𐴡𐴀 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴏𐴡𐴀𐴌. 𐴀𐴞𐴁𐴌𐴝𐴇𐴞𐴥𐴔𐴠 𐴊𐴠 𐴇𐴠𐴥𐴕𐴊𐴞𐴓𐴧𐴝 𐴕𐴡𐴥 𐴒𐴡𐴌𐴠𐴥.⁴¹𐴃𐴟𐴣𐴀𐴝𐴥𐴌𐴝 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴡𐴌 𐴒𐴟𐴥𐴕 𐴒𐴡𐴌𐴡𐴤𐴌 𐴊𐴠.“
𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴃𐴡 𐴎𐴡𐴌𐴝 𐴉𐴟𐴀𐴝𐴙𐴕 𐴕𐴡; 𐴀𐴝𐴣𐴀𐴌𐴝𐴃𐴧𐴟 𐴁𐴝𐴉𐴢 𐴀𐴠𐴑𐴒𐴗𐴝𐴥 𐴀𐴝𐴏𐴠𐴤 𐴊𐴠, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴀𐴝𐴓𐴧𐴝.“

⁴²𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴏𐴡𐴥𐴘𐴧𐴞 𐴎𐴡𐴊𐴞 𐴀𐴝𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴢 𐴀𐴡𐴥𐴘𐴃𐴡, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴔𐴟𐴇𐴝𐴥𐴁𐴧𐴡𐴃𐴢 𐴒𐴡𐴙𐴃𐴧𐴝𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴀𐴠𐴍𐴠𐴥 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴠𐴥𐴕𐴝 𐴀𐴝𐴙𐴐𐴧𐴞𐴤. 𐴀𐴝𐴀𐴛 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴀𐴝𐴙𐴐𐴧𐴞𐴤 𐴊𐴠 𐴕𐴡, 𐴁𐴡𐴥𐴓𐴑𐴠 𐴀𐴝𐴣𐴀𐴌𐴠𐴥 𐴀𐴞𐴥𐴁𐴝𐴘𐴠 𐴁𐴠 𐴊𐴞𐴉𐴠𐴍𐴝𐴥𐴘𐴧𐴠.⁴³𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴈𐴡𐴃𐴝𐴤 𐴑𐴞𐴘𐴝𐴥 𐴕𐴡 𐴁𐴟𐴎𐴡𐴥𐴌؟ 𐴇𐴞𐴥𐴘𐴝𐴕 𐴀𐴠𐴃𐴡𐴓𐴧𐴝𐴤, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴈𐴡𐴃𐴝𐴤𐴌𐴠 𐴁𐴡𐴌𐴊𐴝𐴐𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴡𐴀𐴌.⁴⁴𐴃𐴟𐴣𐴀𐴝𐴥𐴌𐴝 𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴢 𐴀𐴞𐴁𐴞𐴓𐴞𐴥𐴐𐴢 𐴀𐴡𐴌, 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴀𐴞𐴥𐴃𐴝𐴌 𐴔𐴡𐴕𐴐𐴝𐴥 𐴀𐴡𐴥𐴑𐴧𐴡𐴓𐴢 𐴉𐴟𐴌𐴝 𐴒𐴡𐴙𐴃𐴧𐴡𐴥 𐴏𐴡𐴀. 𐴀𐴞𐴥𐴃𐴠 𐴃𐴡 𐴉𐴡𐴀𐴘𐴓𐴝 𐴐𐴟𐴥𐴌𐴟𐴃𐴧𐴟 𐴓𐴡𐴥𐴃𐴞 𐴑𐴟𐴥𐴕𐴞, 𐴀𐴝𐴦𐴌 𐴇𐴡𐴕𐴡𐴤𐴊𐴞𐴕 𐴏𐴡𐴥𐴘𐴧𐴞𐴃𐴢 𐴕𐴡 𐴃𐴝𐴥𐴑𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴝𐴌 𐴁𐴟𐴥𐴃𐴡𐴌𐴠 𐴇𐴡𐴕𐴡𐴤 𐴏𐴡𐴥𐴘𐴧𐴞 𐴕𐴝𐴥𐴘. 𐴀𐴞𐴥𐴃𐴠 𐴎𐴠𐴣𐴃𐴧𐴠𐴥 𐴔𐴞𐴏𐴝𐴥 𐴈𐴡𐴃𐴝𐴤 𐴈𐴡𐴀, 𐴕𐴞𐴎𐴡𐴌 𐴁𐴟𐴥𐴃𐴡𐴃𐴧𐴟 𐴈𐴡𐴀, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴃𐴠 𐴀𐴡𐴥𐴙𐴓𐴊𐴠 𐴔𐴞𐴏𐴝𐴥𐴑𐴟𐴌 𐴀𐴝𐴦𐴌 𐴔𐴞𐴏𐴝𐴥𐴌 𐴁𐴝𐴉𐴢.⁴⁵𐴓𐴠𐴑𐴞𐴕 𐴀𐴝𐴀𐴛 𐴃𐴡 𐴇𐴡𐴥𐴑 𐴈𐴡𐴃𐴝𐴤 𐴈𐴡𐴀𐴘𐴢, 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴁𐴞𐴐𐴧𐴝𐴥𐴐𐴢 𐴕𐴡 𐴒𐴡𐴌𐴡𐴤.⁴⁶𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴡𐴕𐴠 𐴀𐴝𐴀𐴛 𐴒𐴟𐴕𐴝𐴤𐴒𐴝𐴌 𐴁𐴡𐴥𐴓𐴞 𐴏𐴝𐴥𐴁𐴟𐴃𐴢 𐴒𐴡𐴌𐴞𐴥 𐴉𐴝𐴌𐴞𐴁𐴝𐴥؟ 𐴎𐴡𐴊𐴞 𐴀𐴝𐴀𐴛 𐴏𐴡𐴥𐴘𐴧𐴞 𐴈𐴡𐴃𐴝𐴤 𐴈𐴡𐴀𐴙𐴌 𐴊𐴠 𐴀𐴡𐴥𐴘𐴓𐴠, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴁𐴞𐴐𐴧𐴝𐴥𐴐𐴢 𐴑𐴞𐴘𐴝𐴥 𐴕𐴡 𐴒𐴡𐴌𐴡𐴤؟⁴⁷𐴎𐴠 𐴔𐴝𐴕𐴟𐴥𐴙𐴐𐴢 𐴀𐴝𐴓𐴧𐴝𐴌, 𐴀𐴞𐴥𐴃𐴠 𐴀𐴝𐴓𐴧𐴝𐴌 𐴈𐴡𐴃𐴝𐴤 𐴉𐴟𐴥𐴕𐴠. 𐴃𐴟𐴣𐴀𐴝𐴥𐴌𐴝 𐴇𐴞𐴥𐴀𐴕 𐴀𐴠𐴃𐴡𐴓𐴧𐴝𐴤 𐴕𐴡 𐴉𐴟𐴥𐴕𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴃𐴟𐴣𐴀𐴝𐴥𐴌𐴝 𐴀𐴝𐴓𐴧𐴝𐴌 𐴕𐴡.“

𐴀𐴞𐴁𐴌𐴝𐴇𐴞𐴥𐴔 𐴎𐴡𐴌𐴔𐴡 𐴀𐴡𐴥𐴘𐴁𐴝𐴌 𐴀𐴝𐴒𐴠 𐴓𐴡𐴥𐴃𐴞 𐴀𐴝𐴀𐴛 𐴀𐴝𐴏𐴞𐴤

⁴⁸𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴑𐴞𐴥 𐴏𐴡𐴥𐴘𐴧𐴞 𐴕𐴡𐴥 𐴈𐴡𐴀𐴘𐴢 𐴕𐴠𐴥, 𐴃𐴟𐴀𐴛 𐴀𐴠𐴥𐴎𐴧𐴡𐴕 𐴏𐴝𐴔𐴝𐴥𐴌𐴞, 𐴀𐴝𐴦𐴌 𐴃𐴟𐴣𐴀𐴝𐴥𐴣𐴌𐴠 𐴁𐴟𐴥𐴃𐴠 𐴉𐴝𐴘𐴧𐴠𐴥؟“

⁴⁹𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴣𐴀𐴌𐴠𐴥 𐴁𐴟𐴥𐴃𐴠 𐴕𐴡𐴥 𐴉𐴝𐴦. 𐴀𐴝𐴀𐴛 𐴀𐴝𐴣𐴀𐴌 𐴁𐴝𐴉𐴡𐴌𐴠 𐴀𐴞𐴎𐴧𐴡𐴃𐴢 𐴒𐴡𐴌𐴞𐴥, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴁𐴠𐴀𐴞𐴎𐴧𐴡𐴃𐴞 𐴒𐴡𐴌𐴡𐴤.⁵⁰𐴀𐴝𐴀𐴛 𐴀𐴝𐴣𐴀𐴌 𐴀𐴞𐴎𐴧𐴡𐴃𐴢 𐴃𐴟𐴖𐴝𐴙𐴌 𐴊𐴠 𐴕𐴡. 𐴓𐴠𐴑𐴞𐴕 𐴀𐴠𐴑𐴎𐴡𐴕 𐴀𐴝𐴏𐴠𐴤 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌 𐴀𐴞𐴎𐴧𐴡𐴃𐴡𐴌 𐴑𐴞𐴥𐴘𐴝𐴓𐴢 𐴌𐴝𐴑𐴠𐴥 𐴀𐴝𐴦𐴌 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴁𐴞𐴏𐴝𐴌𐴇𐴝𐴌.⁵¹𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴈𐴡𐴃𐴝𐴤 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴇𐴡𐴕𐴡𐴤𐴊𐴞𐴕 𐴕𐴡 𐴔𐴡𐴌𐴞𐴁𐴡𐴥.“

⁵²𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴀𐴠𐴇𐴡𐴥𐴕 𐴀𐴝𐴣𐴀𐴌𐴝 𐴉𐴝𐴑𐴧𐴝𐴒𐴡𐴌𐴞 𐴎𐴝𐴕𐴞 𐴉𐴝𐴙𐴅𐴧𐴞𐴥, 𐴃𐴟𐴣𐴀𐴝𐴥𐴣𐴌𐴠 𐴁𐴟𐴥𐴃𐴠 𐴉𐴝𐴘𐴧𐴠𐴥. 𐴀𐴞𐴁𐴌𐴝𐴇𐴞𐴥𐴔 𐴀𐴠𐴊𐴧𐴠 𐴕𐴡𐴁𐴞 𐴀𐴡𐴥𐴑𐴧𐴡𐴓𐴢 𐴃𐴡 𐴔𐴡𐴌𐴞𐴒𐴞𐴘𐴡𐴥𐴘, 𐴃𐴡𐴀 𐴃𐴟𐴀𐴛 𐴈𐴡𐴀𐴌 𐴊𐴠, ’𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴈𐴡𐴃𐴝𐴤 𐴀𐴝𐴔𐴡𐴥𐴓𐴢 𐴒𐴡𐴌𐴠𐴥, 𐴀𐴞𐴥𐴃𐴠 𐴇𐴡𐴕𐴡𐴤𐴊𐴞𐴕 𐴕𐴡 𐴔𐴡𐴌𐴞𐴁𐴡𐴥.‘⁵³𐴃𐴟𐴀𐴛 𐴑𐴞𐴥 𐴀𐴝𐴣𐴀𐴌𐴝𐴌 𐴁𐴝𐴉𐴢 𐴀𐴞𐴁𐴌𐴝𐴇𐴞𐴥𐴔𐴡𐴌 𐴃𐴟𐴥𐴖𐴝𐴌𐴡 𐴋𐴡𐴣𐴀𐴌؟ 𐴀𐴞𐴥𐴁𐴝 𐴃𐴡 𐴔𐴡𐴌𐴞𐴒𐴞𐴘𐴡𐴥𐴘, 𐴀𐴝𐴦𐴌 𐴕𐴡𐴁𐴞 𐴀𐴡𐴥𐴑𐴧𐴡𐴓𐴢 𐴀𐴡𐴥 𐴔𐴡𐴌𐴞𐴒𐴞𐴘𐴡𐴥𐴘. 𐴃𐴟𐴀𐴛 𐴕𐴞𐴎𐴡𐴌𐴠𐴥 𐴕𐴞𐴎𐴠 𐴑𐴞𐴦 𐴁𐴡𐴓𐴞 𐴄𐴝𐴥𐴀𐴌𐴡؟“

⁵⁴𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴎𐴡𐴊𐴞 𐴀𐴝𐴀𐴛 𐴕𐴞𐴎𐴡𐴌 𐴃𐴝𐴦𐴌𐴞𐴉𐴢 𐴕𐴞𐴎𐴠 𐴒𐴡𐴌𐴞𐴥, 𐴃𐴡𐴥𐴀𐴘𐴓𐴠 𐴀𐴝𐴣𐴀𐴌 𐴃𐴝𐴦𐴌𐴞𐴉𐴡𐴌 𐴇𐴡𐴕𐴡𐴤 𐴊𐴝𐴔 𐴕𐴝𐴥𐴘. 𐴀𐴝𐴣𐴀𐴌𐴠𐴥 𐴀𐴞𐴎𐴧𐴡𐴃𐴢 𐴀𐴝𐴣𐴀𐴌 𐴁𐴝𐴉𐴠 𐴀𐴠𐴥𐴕𐴝 𐴒𐴡𐴌𐴠𐴥, 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝 𐴃𐴟𐴣𐴀𐴝𐴥𐴌𐴝𐴌 𐴀𐴝𐴓𐴧𐴝 𐴁𐴡𐴓𐴞 𐴊𐴝𐴁𐴞 𐴒𐴡𐴌𐴡𐴤.⁵⁵𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌𐴠 𐴕𐴡 𐴏𐴞𐴕𐴡𐴥, 𐴓𐴠𐴑𐴞𐴕 𐴀𐴝𐴀𐴛 𐴀𐴞𐴥𐴁𐴝𐴌𐴠 𐴏𐴞𐴕𐴞𐴥. 𐴎𐴡𐴊𐴞 𐴀𐴝𐴀𐴛 𐴈𐴡𐴀𐴘𐴢, ’𐴀𐴝𐴀𐴛 𐴀𐴞𐴥𐴁𐴝𐴌𐴠 𐴕𐴡 𐴏𐴞𐴕𐴞𐴥,‘ 𐴃𐴡𐴥𐴀𐴘𐴓𐴠 𐴀𐴝𐴀𐴛 𐴘𐴡𐴥 𐴃𐴡 𐴃𐴟𐴣𐴀𐴝𐴥𐴌𐴝𐴌 𐴋𐴡𐴥𐴙𐴓𐴧𐴝 𐴔𐴞𐴏𐴝𐴥𐴑𐴟𐴌 𐴄𐴡𐴥𐴀𐴌𐴞𐴘𐴟𐴔, 𐴓𐴠𐴑𐴞𐴕 𐴀𐴝𐴀𐴛 𐴀𐴞𐴥𐴁𐴝𐴌𐴠 𐴏𐴞𐴕𐴞𐴥, 𐴀𐴝𐴦𐴌 𐴀𐴞𐴥𐴁𐴝𐴌 𐴈𐴡𐴃𐴝𐴤 𐴀𐴝𐴔𐴡𐴥𐴓𐴢 𐴒𐴡𐴌𐴞𐴥.⁵⁶𐴃𐴟𐴣𐴀𐴝𐴥𐴌𐴝𐴌 𐴁𐴝𐴉𐴢 𐴀𐴞𐴁𐴌𐴝𐴇𐴞𐴥𐴔𐴠 𐴀𐴝𐴣𐴀𐴌 𐴊𐴞𐴕 𐴊𐴠𐴑𐴞𐴥𐴁𐴝𐴌 𐴀𐴝𐴐𐴝𐴤𐴘𐴠 𐴑𐴟𐴥𐴐𐴞 𐴒𐴡𐴙𐴅𐴧𐴞𐴥𐴓𐴢. 𐴀𐴞𐴥𐴁𐴝𐴘𐴠 𐴊𐴠𐴙𐴑𐴧𐴞𐴥𐴓𐴢 𐴀𐴝𐴦𐴌 𐴑𐴟𐴥𐴐𐴞 𐴀𐴡𐴥𐴀𐴙𐴓𐴢.“

⁵⁷𐴃𐴡𐴥𐴘 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴣𐴌 𐴁𐴡𐴐𐴢 𐴃𐴡 𐴀𐴝𐴙𐴅𐴧𐴡𐴤 𐴉𐴡𐴕𐴎𐴝𐴙𐴐𐴢 𐴁𐴡𐴏𐴡𐴥𐴌 𐴀𐴟𐴥𐴊𐴧𐴗𐴝 𐴕𐴡𐴥 𐴀𐴡𐴥𐴘𐴧𐴡, 𐴀𐴝𐴦𐴌 𐴃𐴟𐴀𐴛 𐴀𐴞𐴁𐴌𐴝𐴇𐴞𐴥𐴔𐴡𐴌𐴠 𐴊𐴠𐴙𐴑𐴧𐴡𐴥 𐴊𐴠𐴥؟“

⁵⁸𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴏𐴡𐴥𐴘𐴧𐴞-𐴏𐴡𐴥𐴘𐴧𐴞 𐴈𐴡𐴀𐴙𐴌, 𐴀𐴞𐴁𐴌𐴝𐴇𐴞𐴥𐴔 𐴎𐴡𐴌𐴔𐴡 𐴀𐴡𐴥𐴘𐴁𐴝𐴌 𐴀𐴝𐴒𐴠 𐴓𐴡𐴥𐴃𐴞 𐴀𐴝𐴀𐴛 𐴀𐴝𐴏𐴞𐴤.“⁵⁹𐴇𐴠𐴥 𐴈𐴡𐴃𐴝𐴤 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴔𐴝𐴌𐴞 𐴁𐴡𐴓𐴧𐴝 𐴐𐴞𐴥𐴓𐴡𐴌 𐴊𐴡𐴓𐴝 𐴉𐴠𐴣𐴍𐴝𐴘 𐴓𐴡𐴘𐴧𐴠𐴥, 𐴔𐴡𐴕𐴃𐴡𐴌 𐴀𐴞𐴏𐴝𐴤 𐴕𐴞𐴎𐴡𐴌𐴠𐴥 𐴀𐴝𐴌𐴒𐴗𐴝𐴓𐴢 𐴒𐴡𐴌𐴞𐴥 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴧𐴟 𐴕𐴠𐴦𐴓𐴞𐴒𐴞𐴘𐴡𐴥𐴘.

The Word for the World International

https://app.library.bible/content/87faca8b51c22590