Read 𐴘𐴡𐴇𐴝𐴥𐴕𐴧𐴝 9

𐴘𐴡𐴇𐴝𐴥𐴕𐴧𐴝9

𐴀𐴠𐴑 𐴎𐴡𐴌𐴔𐴡𐴃𐴧𐴟 𐴓𐴡𐴥𐴃𐴞 𐴀𐴝𐴣𐴊𐴝𐴤𐴌𐴠 𐴒𐴡𐴔 𐴒𐴡𐴙𐴅𐴧𐴠𐴥

¹𐴀𐴞𐴏𐴝𐴤 𐴌𐴝𐴏𐴃𐴝 𐴁𐴝𐴥𐴘 𐴎𐴝𐴘𐴃𐴠-𐴎𐴝𐴘𐴃𐴠, 𐴀𐴞𐴥𐴁𐴝𐴘𐴠 𐴀𐴠𐴒𐴧𐴗𐴝𐴤 𐴔𐴝𐴕𐴟𐴥𐴙𐴐𐴢 𐴊𐴠𐴙𐴑𐴧𐴠𐴥, 𐴎𐴞𐴁𐴝𐴤 𐴎𐴡𐴌𐴔𐴡𐴃𐴧𐴟 𐴓𐴡𐴥𐴃𐴞 𐴀𐴝𐴣𐴊𐴝𐴤.²𐴀𐴞𐴥𐴁𐴝𐴌 𐴐𐴝𐴥𐴌𐴞𐴃𐴧𐴟𐴕𐴠 𐴀𐴞𐴥𐴁𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴌𐴝𐴁𐴧𐴞𐴥, 𐴇𐴝𐴌 𐴒𐴟𐴕𐴝𐴤𐴌 𐴎𐴡𐴌𐴞𐴘𐴝 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴎𐴡𐴌𐴔𐴡𐴃𐴧𐴟 𐴓𐴡𐴥𐴃𐴞 𐴀𐴝𐴣𐴊𐴝𐴤 𐴀𐴡𐴥𐴘𐴧𐴠 𐴊𐴠𐴥؟ 𐴑𐴞 𐴕𐴞𐴎𐴡𐴌 𐴀𐴝𐴦𐴌 𐴕𐴝𐴥𐴑𐴞 𐴘𐴡𐴥𐴒𐴧𐴗𐴝𐴌 𐴁𐴝𐴉𐴔𐴝𐴦𐴌؟“

³𐴀𐴞𐴏𐴝𐴤𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴇𐴠𐴥𐴕𐴊𐴞𐴓𐴧𐴝 𐴕𐴡 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴌 𐴒𐴟𐴕𐴝𐴤𐴌 𐴎𐴡𐴌𐴞𐴘𐴝 𐴀𐴡𐴥𐴘𐴧𐴠, 𐴀𐴝𐴦𐴌 𐴕𐴡 𐴘𐴡𐴒𐴧𐴗𐴝𐴥𐴌 𐴁𐴝𐴉𐴔𐴝𐴦𐴌 𐴒𐴟𐴕𐴝𐴤𐴌 𐴎𐴡𐴌𐴞𐴘𐴝 𐴀𐴡𐴥𐴘𐴧𐴠, 𐴁𐴡𐴥𐴓𐴑𐴠 𐴀𐴠𐴃𐴡𐴓𐴧𐴝𐴤 𐴀𐴡𐴥𐴘𐴧𐴠, 𐴎𐴠𐴀𐴕𐴠 𐴘𐴡𐴒𐴧𐴗𐴝𐴥𐴌 𐴎𐴞𐴕𐴊𐴞𐴒𐴞𐴃𐴢 𐴀𐴝𐴓𐴧𐴝𐴌 𐴈𐴝𐴔 𐴎𐴝𐴇𐴠𐴥𐴌 𐴀𐴡𐴥.⁴𐴊𐴞𐴕 𐴃𐴝𐴥𐴑𐴞𐴃𐴠 𐴀𐴝𐴣𐴀𐴌𐴝𐴃𐴧𐴟 𐴀𐴟𐴁𐴝𐴤𐴌 𐴈𐴝𐴔 𐴒𐴡𐴌𐴞𐴥𐴉𐴠𐴓𐴝 𐴉𐴡𐴌𐴞𐴁𐴡𐴥 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠. 𐴌𐴝𐴙𐴃𐴢 𐴀𐴝𐴘𐴧𐴠𐴤𐴌 𐴎𐴠𐴣𐴃𐴧𐴠𐴥 𐴇𐴡𐴕𐴡𐴤𐴑𐴞𐴘𐴠 𐴈𐴝𐴔 𐴒𐴡𐴌𐴞𐴥 𐴕𐴡 𐴉𐴝𐴌𐴞𐴁𐴡𐴥.⁵𐴎𐴠𐴃𐴡𐴥 𐴊𐴞𐴕 𐴀𐴝𐴀𐴛 𐴊𐴟𐴕𐴞𐴘𐴝𐴙𐴃𐴢 𐴀𐴝𐴏𐴞𐴤, 𐴀𐴝𐴀𐴛 𐴀𐴡𐴥𐴘𐴓𐴝𐴔 𐴊𐴠 𐴊𐴟𐴕𐴞𐴘𐴝𐴙𐴌 𐴕𐴟𐴌.“

⁶𐴇𐴞𐴥𐴀𐴕 𐴈𐴡𐴀𐴘𐴢 𐴁𐴝𐴦𐴊𐴠, 𐴀𐴞𐴥𐴁𐴝𐴘𐴠 𐴔𐴠𐴍𐴞𐴃𐴢 𐴏𐴠𐴥𐴂𐴢 𐴉𐴠𐴥𐴓𐴝𐴘𐴧𐴡𐴌𐴠 𐴉𐴟𐴥𐴣𐴄𐴢 𐴁𐴝𐴕𐴝𐴘𐴧𐴠𐴥, 𐴀𐴝𐴦𐴌 𐴇𐴠𐴥 𐴉𐴟𐴥𐴣𐴄𐴢 𐴓𐴡𐴦𐴘𐴢 𐴀𐴝𐴣𐴊𐴝𐴤 𐴔𐴝𐴕𐴟𐴥𐴙𐴐𐴧𐴗𐴝𐴌 𐴏𐴟𐴑𐴡𐴃𐴢 𐴁𐴡𐴥𐴌𐴝𐴘𐴊𐴞𐴘𐴠.⁷𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴎𐴡𐴦, 𐴎𐴝𐴘 𐴏𐴞𐴥𐴓𐴡𐴔 𐴉𐴡𐴀𐴙𐴌𐴒𐴗𐴝𐴥𐴃𐴧𐴟 𐴊𐴟𐴥𐴘𐴉𐴠𐴓𐴡𐴒𐴡𐴘“(𐴏𐴞𐴥𐴓𐴡𐴔𐴡𐴌 𐴃𐴡𐴌𐴅𐴟𐴔𐴝 𐴀𐴡𐴥𐴙𐴓𐴊𐴠, ”𐴊𐴞𐴉𐴠𐴍𐴝𐴥𐴘𐴧𐴠“). 𐴃𐴡𐴥𐴘 𐴘𐴡𐴥𐴒𐴧𐴗𐴝 𐴎𐴝𐴘 𐴊𐴟𐴥𐴘𐴉𐴠𐴓𐴝𐴘𐴧𐴠, 𐴁𐴝𐴦𐴊𐴠 𐴏𐴟𐴑𐴠𐴤 𐴊𐴠𐴑𐴞𐴥 𐴖𐴝𐴦𐴉𐴠𐴏𐴢 𐴉𐴞𐴥𐴌𐴞 𐴀𐴝𐴙𐴐𐴧𐴠𐴥.

⁸𐴇𐴠𐴥𐴃𐴡𐴓𐴧𐴝 𐴘𐴡𐴥𐴒𐴧𐴗𐴝𐴌 𐴀𐴝𐴃𐴠𐴇𐴝𐴣𐴏𐴡𐴥𐴌 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴀𐴝𐴒𐴠 𐴎𐴠𐴃𐴝𐴌𐴝𐴤 𐴘𐴡𐴥𐴒𐴧𐴗𐴝𐴌𐴠 𐴇𐴡𐴥𐴌𐴝𐴃𐴢 𐴔𐴝𐴒𐴞𐴃𐴡𐴥 𐴊𐴠 𐴊𐴠𐴙𐴑𐴧𐴞𐴥𐴓𐴢 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴔𐴝𐴕𐴟𐴥𐴙𐴐𐴢 𐴀𐴞𐴁𐴝𐴤 𐴀𐴟𐴁𐴝𐴤 𐴕𐴡 𐴕𐴠𐴥 𐴎𐴞𐴁𐴝𐴤𐴘𐴠 𐴁𐴡𐴀𐴘𐴢-𐴁𐴡𐴀𐴘𐴢 𐴇𐴡𐴥𐴌𐴝𐴃𐴢 𐴔𐴝𐴒𐴞𐴃𐴡𐴥؟“

⁹𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴡𐴥𐴘, 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝 𐴘𐴡𐴥𐴒𐴧𐴗𐴝.“
𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴕𐴡, 𐴔𐴡𐴕𐴃𐴡𐴌 𐴀𐴞𐴃𐴠 𐴘𐴡𐴥𐴒𐴧𐴗𐴝𐴌 𐴋𐴡𐴥𐴙𐴓𐴧𐴝 𐴊𐴠.“
𐴓𐴠𐴑𐴞𐴕 𐴘𐴡𐴥𐴒𐴧𐴗𐴝 𐴘𐴠, ”𐴀𐴝𐴀𐴛 𐴀𐴞𐴥𐴁𐴝,“ 𐴁𐴡𐴥𐴓𐴞 𐴈𐴡𐴖𐴝𐴤𐴃𐴢 𐴀𐴝𐴐𐴧𐴞𐴥𐴓𐴢.

¹⁰𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴡𐴥𐴀𐴘𐴓𐴠 𐴃𐴟𐴣𐴀𐴝𐴥𐴣𐴌 𐴏𐴟𐴑 𐴑𐴠𐴀𐴕𐴒𐴡𐴌𐴞 𐴑𐴟𐴥𐴓𐴞𐴒𐴞𐴘𐴡𐴘؟“¹¹𐴘𐴡𐴥𐴒𐴧𐴗𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴞𐴏𐴝𐴤 𐴈𐴡𐴀 𐴊𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴔𐴠𐴍𐴞𐴌𐴠 𐴉𐴟𐴥𐴣𐴄𐴢 𐴁𐴝𐴕𐴝𐴘 𐴀𐴝𐴣𐴀𐴌 𐴏𐴟𐴑𐴡𐴃𐴢 𐴁𐴡𐴥𐴌𐴝𐴘𐴊𐴞𐴘𐴠, 𐴀𐴝𐴦𐴌 𐴀𐴝𐴣𐴀𐴌𐴠𐴥 𐴈𐴡𐴘𐴧𐴠𐴥 𐴊𐴠, ’𐴎𐴝𐴘 𐴏𐴞𐴥𐴓𐴡𐴔 𐴉𐴡𐴀𐴙𐴌𐴒𐴗𐴝𐴥𐴃𐴧𐴟 𐴊𐴟𐴥𐴘𐴉𐴠𐴓𐴡𐴒𐴡𐴘.‘𐴀𐴝𐴀𐴛 𐴎𐴝𐴘 𐴊𐴟𐴥𐴘𐴉𐴠𐴓𐴝𐴘𐴧𐴞 𐴌𐴝𐴥𐴌 𐴏𐴟𐴑𐴠𐴤 𐴊𐴠𐴑𐴞𐴥 𐴉𐴝𐴌𐴞𐴌.“

¹²𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝 𐴇𐴡𐴍𐴠𐴥؟“ 𐴘𐴡𐴥𐴒𐴧𐴗𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴇𐴡𐴘 𐴕𐴡 𐴉𐴝𐴌𐴞.“

𐴀𐴝𐴣𐴊𐴝𐴤 𐴖𐴝𐴌𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴧𐴟 𐴕𐴠𐴦𐴓𐴝𐴘𐴊𐴞𐴘𐴠

¹³𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴀𐴝𐴣𐴊𐴝𐴤 𐴀𐴝𐴐𐴧𐴞𐴥𐴓𐴢 𐴊𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴓𐴡𐴘𐴒𐴞𐴘𐴠𐴥.¹⁴𐴎𐴠 𐴊𐴞𐴕 𐴀𐴞𐴏𐴝𐴤𐴘𐴠 𐴔𐴠𐴍𐴞𐴌𐴠 𐴉𐴟𐴥𐴣𐴄𐴢 𐴁𐴝𐴕𐴝𐴘 𐴘𐴡𐴥𐴒𐴧𐴗𐴝𐴌 𐴏𐴟𐴑 𐴑𐴟𐴥𐴙𐴓𐴧𐴞𐴓𐴢, 𐴇𐴠𐴥 𐴊𐴞𐴕 𐴀𐴝𐴐𐴧𐴞𐴥𐴓𐴢 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕.¹⁵𐴇𐴠𐴥𐴃𐴡𐴓𐴧𐴝 𐴁𐴡𐴥𐴓𐴞 𐴘𐴡𐴥𐴒𐴧𐴗𐴝𐴌 𐴏𐴟𐴑 𐴑𐴠𐴀𐴕𐴒𐴡𐴌𐴞 𐴒𐴡𐴔 𐴀𐴡𐴥𐴘𐴧𐴠 𐴊𐴠 𐴇𐴞𐴥𐴘𐴝𐴕 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴘𐴡𐴥𐴒𐴧𐴗𐴝𐴃𐴧𐴟 𐴀𐴝𐴁𐴝𐴌 𐴉𐴟𐴏𐴝𐴥𐴌 𐴒𐴡𐴙𐴅𐴧𐴠𐴥. 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴞𐴥𐴁𐴝𐴘𐴠 𐴀𐴝𐴣𐴀𐴌 𐴏𐴟𐴑𐴡𐴃𐴢 𐴉𐴟𐴥𐴣𐴄𐴢 𐴁𐴡𐴥𐴌𐴝𐴘𐴊𐴞𐴘𐴠, 𐴁𐴝𐴦𐴊𐴠 𐴀𐴝𐴀𐴛 𐴊𐴟𐴥𐴘𐴧𐴞 𐴌𐴝𐴥𐴌 𐴊𐴠𐴑𐴞𐴥 𐴉𐴝𐴙𐴅𐴧𐴞𐴥.“

¹⁶𐴇𐴠𐴥𐴃𐴡𐴓𐴧𐴝 𐴇𐴡𐴊𐴟𐴥𐴕 𐴉𐴠𐴥𐴌𐴡𐴐𐴞𐴘𐴠 𐴈𐴡𐴀𐴌 𐴊𐴠, ”𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴕𐴡, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴥𐴁𐴝𐴘𐴠 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴕𐴡 𐴔𐴝𐴕𐴠.“
𐴔𐴡𐴕𐴃𐴡𐴌 𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴠𐴎𐴧𐴡𐴕 𐴒𐴟𐴕𐴝𐴤𐴒𐴝𐴌 𐴔𐴝𐴕𐴟𐴥𐴙𐴐𐴠 𐴑𐴠𐴀𐴕𐴒𐴡𐴌𐴞 𐴀𐴠𐴕𐴊𐴞𐴓𐴧𐴝 𐴑𐴠𐴌𐴝𐴔𐴡𐴃𐴢 𐴒𐴡𐴌𐴞𐴥 𐴉𐴝𐴌𐴠؟“ 𐴇𐴠𐴥𐴕𐴊𐴞𐴓𐴧𐴝 𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴌𐴠 𐴉𐴝𐴀𐴄𐴝-𐴉𐴝𐴀𐴄𐴞 𐴉𐴡𐴘𐴊𐴝 𐴀𐴡𐴥𐴘𐴒𐴞𐴘𐴡𐴘.

¹⁷𐴇𐴠𐴥𐴃𐴟𐴕𐴡𐴃𐴢 𐴀𐴞𐴥𐴃𐴝𐴌𐴝 𐴀𐴝𐴣𐴊𐴝𐴤 𐴀𐴝𐴐𐴧𐴞𐴥𐴓𐴢 𐴊𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴀𐴝𐴁𐴝𐴌 𐴈𐴡𐴀𐴌 𐴊𐴠, ”𐴀𐴞𐴥𐴁𐴝𐴘𐴠 𐴃𐴡𐴌 𐴏𐴟𐴑 𐴑𐴟𐴥𐴙𐴓𐴧𐴠 𐴊𐴠 𐴇𐴞𐴥𐴘𐴝𐴕𐴡𐴓𐴧𐴝 𐴃𐴟𐴘 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴑𐴞𐴦 𐴈𐴡𐴀𐴏؟“
𐴘𐴡𐴥𐴒𐴧𐴗𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴞𐴥𐴁𐴝 𐴀𐴠𐴒𐴧𐴗𐴝𐴤 𐴕𐴡𐴁𐴞.“

¹⁸𐴓𐴠𐴑𐴞𐴕 𐴘𐴡𐴥𐴒𐴧𐴗𐴝 𐴀𐴝𐴒𐴠 𐴀𐴝𐴣𐴊𐴝𐴤 𐴀𐴝𐴐𐴧𐴞𐴥𐴓𐴢 𐴀𐴝𐴦𐴌 𐴀𐴠𐴇𐴡𐴥𐴕 𐴊𐴠𐴑𐴞𐴥 𐴉𐴝𐴌𐴠𐴌 𐴊𐴠 𐴇𐴞𐴥𐴘𐴝𐴕 𐴘𐴡𐴥𐴒𐴧𐴗𐴝𐴌 𐴁𐴝𐴉𐴔𐴝𐴦𐴌𐴠 𐴔𐴝𐴃𐴝𐴘 𐴉𐴟𐴏𐴝𐴥𐴌 𐴕𐴡𐴥 𐴓𐴡𐴖𐴢 𐴉𐴡𐴙𐴅𐴧𐴡𐴕𐴃𐴡 𐴘𐴡𐴇𐴟𐴥𐴊𐴞 𐴀𐴞𐴥𐴃𐴝𐴌𐴝 𐴁𐴞𐴐𐴧𐴝𐴥𐴐𐴢 𐴕𐴡𐴥 𐴒𐴡𐴌𐴠𐴥.¹⁹𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌 𐴁𐴝𐴉𐴔𐴝𐴦𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴞𐴁𐴝𐴤 𐴃𐴟𐴣𐴀𐴝𐴥𐴌𐴝𐴌 𐴉𐴟𐴖𐴝 𐴀𐴟𐴁𐴝𐴤 𐴕𐴠𐴥, 𐴎𐴞𐴁𐴝𐴤𐴌𐴠 𐴃𐴟𐴣𐴀𐴝𐴥𐴌𐴝 𐴎𐴡𐴌𐴔𐴡𐴃𐴧𐴟 𐴓𐴡𐴥𐴃𐴞 𐴀𐴝𐴣𐴊𐴝𐴤 𐴈𐴡𐴀𐴘𐴓𐴝؟ 𐴇𐴠𐴥𐴀𐴕 𐴀𐴡𐴥𐴘𐴓𐴠 𐴘𐴝𐴓𐴝 𐴀𐴞𐴃𐴠 𐴑𐴠𐴀𐴕𐴒𐴡𐴌𐴞 𐴊𐴠𐴑𐴞𐴥 𐴉𐴝𐴌𐴠𐴌؟“

²⁰𐴘𐴡𐴥𐴒𐴧𐴗𐴝𐴌 𐴁𐴝𐴉𐴔𐴝𐴦𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴀𐴝𐴣𐴀𐴌𐴝 𐴎𐴝𐴕𐴞 𐴀𐴞𐴁𐴝𐴤 𐴀𐴝𐴣𐴀𐴌𐴝𐴌 𐴉𐴟𐴖𐴝, 𐴀𐴝𐴦𐴌 𐴀𐴞𐴃𐴠 𐴀𐴝𐴣𐴊𐴝𐴤 𐴎𐴡𐴌𐴔𐴡 𐴀𐴡𐴥𐴀𐴙𐴓𐴢;²¹𐴔𐴡𐴕𐴃𐴡𐴌 𐴘𐴝𐴓𐴝 𐴀𐴞𐴃𐴠 𐴑𐴠𐴀𐴕𐴒𐴡𐴌𐴞 𐴊𐴠𐴑𐴞𐴥 𐴉𐴝𐴌𐴠𐴌 𐴀𐴝𐴣𐴀𐴌𐴝 𐴕𐴡 𐴎𐴝𐴕𐴞; 𐴀𐴞𐴃𐴝𐴌 𐴏𐴟𐴑 𐴇𐴡𐴕𐴠 𐴑𐴟𐴥𐴙𐴓𐴧𐴠 𐴘𐴡𐴥 𐴀𐴝𐴣𐴀𐴌𐴝 𐴕𐴡 𐴎𐴝𐴕𐴞. 𐴀𐴞𐴃𐴝𐴃𐴧𐴟 𐴁𐴡𐴐𐴢 𐴀𐴡𐴥𐴘𐴧𐴠, 𐴃𐴟𐴣𐴀𐴝𐴥𐴌𐴝 𐴀𐴞𐴃𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴡𐴤. 𐴀𐴞𐴃𐴠 𐴕𐴞𐴎𐴡𐴌 𐴁𐴝𐴦𐴁𐴟𐴃𐴠 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴘𐴁𐴡𐴤.“²²𐴘𐴡𐴥𐴒𐴧𐴗𐴝𐴌 𐴁𐴝𐴉𐴔𐴝𐴦𐴘𐴠 𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴙𐴓𐴢 𐴊𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴋𐴡𐴦𐴌𐴠, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴝𐴒𐴠 𐴓𐴡𐴥𐴃𐴞 𐴉𐴝𐴥𐴘𐴏𐴠𐴓𐴝 𐴒𐴡𐴙𐴅𐴧𐴞𐴥𐴓𐴢 𐴊𐴠, 𐴎𐴠𐴦𐴕𐴞𐴑𐴞 𐴀𐴞𐴏𐴝𐴤𐴌𐴠 𐴔𐴡𐴀𐴏𐴞𐴤 𐴁𐴡𐴥𐴓𐴞 𐴐𐴞𐴥𐴑𐴝𐴌 𐴒𐴡𐴌𐴠𐴥, 𐴀𐴞𐴥𐴃𐴝𐴌𐴠 𐴀𐴞𐴥𐴃𐴝𐴌𐴝𐴌 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴧𐴟 𐴕𐴠𐴦𐴓𐴝𐴘𐴊𐴞𐴘𐴝 𐴎𐴝𐴘𐴁𐴡.²³𐴇𐴞𐴥𐴘𐴝𐴕𐴡𐴓𐴧𐴝 𐴁𐴡𐴥𐴓𐴞 𐴘𐴡𐴥𐴒𐴧𐴗𐴝𐴌 𐴁𐴝𐴉𐴔𐴝𐴦𐴘𐴠 𐴈𐴡𐴀𐴙𐴓𐴢 𐴊𐴠, ”𐴀𐴞𐴃𐴝𐴃𐴧𐴟 𐴁𐴡𐴐𐴢 𐴀𐴡𐴥𐴘𐴧𐴠; 𐴃𐴟𐴣𐴀𐴝𐴥𐴌𐴝 𐴀𐴞𐴃𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴡𐴤.“

²⁴𐴇𐴠𐴥𐴃𐴡𐴓𐴧𐴝 𐴀𐴞𐴥𐴃𐴝𐴌𐴝 𐴀𐴝𐴒𐴠 𐴀𐴝𐴣𐴊𐴝𐴤 𐴀𐴝𐴐𐴧𐴞𐴥𐴓𐴢 𐴊𐴠 𐴔𐴝𐴕𐴟𐴥𐴙𐴐𐴧𐴗𐴝𐴌𐴠 𐴀𐴝𐴁𐴝𐴌 𐴔𐴝𐴃𐴝𐴘 𐴈𐴡𐴀𐴌 𐴊𐴠, ”𐴇𐴡𐴥𐴑 𐴈𐴡𐴃𐴝𐴤 𐴈𐴡𐴀𐴘𐴢 𐴀𐴝𐴓𐴧𐴝𐴌 𐴃𐴝𐴦𐴌𐴞𐴉𐴢 𐴒𐴡𐴌. 𐴀𐴝𐴣𐴀𐴌𐴝 𐴎𐴝𐴕𐴞 𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝 𐴀𐴠𐴥𐴎𐴧𐴡𐴕 𐴒𐴟𐴕𐴝𐴤𐴒𐴝𐴌.“

²⁵𐴘𐴡𐴥𐴒𐴧𐴗𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴞𐴥𐴁𐴝 𐴒𐴟𐴕𐴝𐴤𐴒𐴝𐴌 𐴀𐴡𐴥𐴘 𐴕𐴠 𐴕𐴡 𐴀𐴝𐴀𐴛 𐴕𐴡 𐴎𐴝𐴕𐴞. 𐴓𐴠𐴑𐴞𐴕 𐴀𐴝𐴀𐴛 𐴘𐴝𐴀𐴕 𐴀𐴠𐴑𐴧𐴝𐴥𐴕 𐴎𐴝𐴕𐴞, 𐴀𐴝𐴀𐴛 𐴀𐴝𐴒𐴠 𐴀𐴝𐴣𐴊𐴝𐴤 𐴀𐴝𐴐𐴧𐴞𐴥𐴓𐴝𐴔 𐴀𐴝𐴦𐴌 𐴘𐴝𐴓𐴝 𐴏𐴟𐴑𐴠𐴤 𐴊𐴠𐴑𐴞𐴥𐴌.“

²⁶𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴞𐴥𐴁𐴝𐴘𐴠 𐴃𐴡𐴌𐴠𐴥 𐴑𐴞𐴦 𐴒𐴡𐴙𐴅𐴧𐴠𐴥؟ 𐴀𐴞𐴥𐴁𐴝𐴘𐴠 𐴃𐴡𐴌 𐴏𐴟𐴑 𐴑𐴠𐴀𐴕𐴒𐴡𐴌𐴞 𐴑𐴟𐴥𐴓𐴞𐴊𐴞𐴘𐴠؟“

²⁷𐴘𐴡𐴥𐴒𐴧𐴗𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌𐴠 𐴈𐴡𐴀𐴘𐴉𐴠𐴓𐴝𐴘𐴧𐴞, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴃𐴡 𐴕𐴡𐴥 𐴉𐴟𐴥𐴕𐴡. 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴞𐴥𐴘𐴝𐴕 𐴀𐴝𐴁𐴝𐴌 𐴑𐴞𐴘𐴝𐴥 𐴉𐴟𐴥𐴙𐴕𐴃𐴡 𐴔𐴡𐴕𐴠𐴈𐴡𐴀𐴌؟ 𐴃𐴟𐴣𐴀𐴝𐴥𐴌𐴝𐴃𐴧𐴟 𐴘𐴡𐴥 𐴇𐴡𐴥𐴕𐴡 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢 𐴀𐴡𐴥𐴘𐴃𐴡 𐴔𐴡𐴕𐴠𐴈𐴡𐴀𐴌؟“

²⁸𐴁𐴝𐴦𐴊𐴠 𐴀𐴞𐴥𐴃𐴝𐴌𐴝 𐴒𐴝𐴙𐴓𐴢 𐴊𐴞 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴘 𐴔𐴝𐴕𐴟𐴥𐴙𐴐𐴢 𐴀𐴞𐴥𐴁𐴝𐴌 𐴀𐴟𐴔𐴧𐴡𐴃𐴢, 𐴓𐴠𐴑𐴞𐴕 𐴀𐴝𐴣𐴀𐴌𐴝 𐴊𐴠 𐴔𐴟𐴀𐴏𐴝𐴌 𐴀𐴟𐴔𐴧𐴡𐴃𐴢.²⁹𐴀𐴝𐴣𐴀𐴌𐴝 𐴎𐴝𐴕𐴞 𐴀𐴝𐴓𐴧𐴝𐴘𐴠 𐴔𐴟𐴀𐴏𐴝 𐴓𐴧𐴡𐴥𐴘 𐴈𐴡𐴃𐴝𐴤 𐴈𐴡𐴘𐴧𐴠𐴥, 𐴔𐴡𐴕𐴃𐴡𐴌 𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝 𐴇𐴡𐴕𐴃𐴟𐴤 𐴀𐴝𐴙𐴐𐴧𐴠𐴥 𐴇𐴞𐴥𐴘𐴝𐴕 𐴃𐴡 𐴀𐴝𐴣𐴀𐴌𐴝 𐴕𐴡 𐴎𐴝𐴕𐴞.“

³⁰𐴇𐴠𐴥𐴃𐴟𐴕𐴡𐴃𐴢 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴑𐴞 𐴃𐴝𐴦𐴅𐴟𐴙𐴂𐴧𐴝 𐴈𐴡𐴃𐴝𐴤! 𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝 𐴇𐴡𐴕𐴃𐴟𐴤 𐴀𐴝𐴙𐴐𐴧𐴠𐴥 𐴕𐴡 𐴎𐴝𐴕𐴡, 𐴀𐴝𐴦𐴌 𐴃𐴡𐴀 𐴀𐴞𐴥𐴁𐴝𐴘𐴠 𐴀𐴝𐴣𐴀𐴌 𐴏𐴟𐴑 𐴑𐴟𐴥𐴓𐴞𐴊𐴞𐴘𐴠.³¹𐴀𐴝𐴣𐴀𐴌𐴝 𐴎𐴝𐴕𐴞 𐴀𐴝𐴓𐴧𐴝𐴘𐴠 𐴒𐴟𐴕𐴝𐴤𐴒𐴝𐴌 𐴀𐴡𐴥𐴑𐴧𐴡𐴓𐴡𐴌 𐴈𐴡𐴃𐴝𐴤 𐴕𐴡 𐴉𐴟𐴥𐴕𐴠, 𐴔𐴡𐴕𐴃𐴡𐴌 𐴀𐴞𐴥𐴁𐴝𐴘𐴠 𐴀𐴟𐴁𐴝𐴤𐴌 𐴈𐴡𐴃𐴝𐴤 𐴉𐴟𐴥𐴕𐴠 𐴎𐴠𐴦𐴕𐴞𐴑𐴞 𐴀𐴞𐴥𐴁𐴝𐴌 𐴀𐴠𐴁𐴝𐴦𐴊𐴡𐴃𐴒𐴝𐴥𐴌 𐴀𐴠𐴊𐴧𐴠 𐴀𐴞𐴥𐴁𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴌𐴠𐴥.³²𐴇𐴡𐴕𐴡𐴤𐴑𐴞𐴘𐴠 𐴀𐴠𐴎𐴧𐴡𐴕 𐴎𐴡𐴌𐴔𐴡𐴃𐴧𐴟 𐴓𐴡𐴥𐴃𐴞 𐴀𐴝𐴣𐴊𐴝𐴤 𐴀𐴡𐴥𐴘𐴧𐴠 𐴊𐴠 𐴔𐴝𐴕𐴟𐴥𐴙𐴐𐴡𐴌 𐴏𐴟𐴑 𐴑𐴟𐴥𐴓𐴞𐴊𐴞𐴘𐴠 𐴊𐴠 𐴃𐴡 𐴊𐴟𐴕𐴞𐴘𐴝𐴘 𐴐𐴟𐴥𐴌𐴟 𐴀𐴡𐴥𐴘𐴧𐴠 𐴓𐴡𐴥𐴃𐴞 𐴇𐴡𐴕𐴡𐴤𐴊𐴞𐴕 𐴉𐴟𐴥𐴕𐴝 𐴕𐴡𐴥 𐴎𐴝.³³𐴎𐴡𐴊𐴞 𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝 𐴀𐴝𐴓𐴧𐴝𐴌 𐴃𐴡𐴌𐴉𐴡𐴥𐴃𐴧𐴟 𐴕𐴡 𐴊𐴠 𐴀𐴡𐴥𐴘𐴃𐴡, 𐴀𐴞𐴥𐴁𐴝𐴘𐴠 𐴃𐴡 𐴑𐴠𐴏𐴧𐴟𐴥 𐴒𐴡𐴌𐴞𐴥 𐴕𐴡 𐴉𐴝𐴙𐴃𐴧𐴡.“

³⁴𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴃𐴟𐴘 𐴃𐴡 𐴉𐴟𐴌𐴝𐴉𐴟𐴌𐴞 𐴒𐴟𐴕𐴝𐴤𐴃𐴢 𐴎𐴡𐴌𐴔𐴡 𐴀𐴡𐴥𐴘𐴧𐴡𐴏𐴢, 𐴀𐴝𐴦𐴌 𐴃𐴟𐴘 𐴀𐴝𐴣𐴀𐴌𐴝𐴌𐴠 𐴐𐴞𐴥𐴑𐴧𐴝 𐴊𐴡𐴌 𐴊𐴠𐴥؟“ 𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴘𐴢 𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴔𐴟𐴅𐴞𐴓𐴞𐴥𐴐𐴢-𐴈𐴝𐴥𐴕𐴝𐴃𐴧𐴟 𐴕𐴠𐴦𐴓𐴝𐴘𐴊𐴞𐴘𐴠.

𐴌𐴟𐴀𐴈𐴝𐴥𐴕𐴞𐴌 𐴀𐴝𐴣𐴊𐴝𐴤

³⁵𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴕𐴠𐴦𐴓𐴝𐴘𐴊𐴞𐴘𐴠 𐴊𐴠 𐴇𐴞𐴥𐴘𐴝𐴕 𐴀𐴞𐴏𐴝𐴤𐴘𐴠 𐴉𐴟𐴥𐴙𐴕𐴧𐴠. 𐴀𐴞𐴥𐴁𐴝𐴘𐴠 𐴘𐴡𐴥𐴒𐴧𐴗𐴝𐴌𐴠 𐴓𐴡𐴦𐴃𐴢 𐴉𐴝𐴘 𐴈𐴡𐴀𐴌 𐴊𐴠, ”𐴃𐴟𐴀𐴛 𐴔𐴝𐴕𐴟𐴥𐴙𐴐𐴡𐴌 𐴉𐴟𐴖𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴡𐴤 𐴕𐴠𐴥؟“

³⁶𐴘𐴡𐴥𐴒𐴧𐴗𐴝𐴘𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴟𐴏𐴃𐴝𐴃𐴢, 𐴀𐴞𐴥𐴁𐴝 𐴇𐴡𐴕 𐴀𐴝𐴣𐴀𐴌𐴠𐴥 𐴈𐴡𐴀, 𐴎𐴠𐴀𐴕𐴠 𐴀𐴝𐴀𐴛 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴞𐴤 𐴉𐴝𐴌𐴞.“

³⁷𐴀𐴞𐴏𐴝𐴤𐴘𐴠 𐴘𐴡𐴥𐴒𐴧𐴗𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴀𐴞𐴥𐴁𐴝𐴌𐴠 𐴊𐴠𐴙𐴑𐴧𐴡𐴥; 𐴃𐴟𐴣𐴀𐴝𐴥𐴣𐴌 𐴓𐴧𐴡𐴥𐴘 𐴈𐴡𐴃𐴝𐴤 𐴈𐴡𐴀𐴌 𐴊𐴠 𐴘𐴡𐴥𐴒𐴧𐴗𐴝 𐴀𐴡𐴥𐴙𐴓𐴊𐴠 𐴀𐴞𐴥𐴁𐴝.“

³⁸𐴁𐴝𐴦𐴊𐴠 𐴘𐴡𐴥𐴒𐴧𐴗𐴝𐴘𐴠 𐴈𐴡𐴀𐴌 𐴊𐴠, ”𐴔𐴝𐴓𐴞𐴑, 𐴀𐴝𐴀𐴛 𐴀𐴞𐴔𐴝𐴕 𐴀𐴝𐴙𐴕𐴧𐴞𐴤.“ 𐴇𐴠𐴥𐴕𐴊𐴞𐴓𐴧𐴝 𐴈𐴡𐴀𐴘𐴢 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴁𐴝𐴌𐴠 𐴏𐴡𐴥𐴘𐴊𐴝 𐴒𐴡𐴙𐴅𐴧𐴠𐴥.

³⁹𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴀𐴠 𐴊𐴟𐴕𐴞𐴘𐴝𐴙𐴃𐴢 𐴁𐴞𐴏𐴝𐴌 𐴒𐴡𐴌𐴞𐴥 𐴁𐴡𐴓𐴧𐴝 𐴀𐴝𐴙𐴐𐴧𐴞𐴤 𐴊𐴠, 𐴎𐴠𐴀𐴕𐴠 𐴎𐴠𐴃𐴝𐴌𐴝𐴤 𐴕𐴡 𐴊𐴠𐴑𐴠𐴥 𐴀𐴞𐴥𐴃𐴝𐴌𐴝 𐴊𐴠𐴑𐴞𐴥 𐴉𐴝𐴌𐴠, 𐴀𐴝𐴦𐴌 𐴎𐴠𐴃𐴝𐴌𐴝𐴤 𐴊𐴠𐴑𐴠𐴥 𐴀𐴞𐴥𐴃𐴝𐴌𐴝 𐴀𐴝𐴣𐴊𐴝𐴤 𐴀𐴡𐴥𐴘𐴎𐴝𐴒𐴡𐴘.“

⁴⁰𐴀𐴞𐴏𐴝𐴤𐴌 𐴉𐴟𐴥𐴖𐴝𐴣𐴃𐴞 𐴀𐴝𐴐𐴧𐴞𐴥𐴓𐴢 𐴊𐴠 𐴇𐴡𐴊𐴟𐴥𐴕 𐴉𐴠𐴥𐴌𐴡𐴐𐴞𐴘𐴠 𐴇𐴞𐴥𐴀𐴕 𐴉𐴟𐴥𐴕𐴞 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴡𐴥𐴀𐴘𐴓𐴠 𐴀𐴝𐴣𐴀𐴌𐴝 𐴘𐴡𐴥 𐴀𐴝𐴣𐴊𐴝𐴤 𐴕𐴞𐴑𐴞؟“

⁴¹𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴎𐴡𐴊𐴞 𐴃𐴟𐴣𐴀𐴝𐴥𐴌𐴝 𐴀𐴝𐴣𐴊𐴝𐴤 𐴀𐴡𐴥𐴘𐴃𐴝, 𐴃𐴟𐴣𐴀𐴝𐴥𐴌𐴝𐴃𐴧𐴟 𐴇𐴡𐴕𐴡𐴤 𐴒𐴟𐴕𐴝𐴤 𐴕𐴡 𐴃𐴝𐴥𐴑𐴞𐴃𐴡; 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴎𐴠𐴃𐴧𐴡𐴥𐴃𐴢 𐴈𐴡𐴀𐴌, ’𐴀𐴝𐴣𐴀𐴌𐴝 𐴊𐴠𐴑𐴞𐴥,‘ 𐴇𐴠𐴥𐴃𐴡𐴓𐴧𐴝 𐴃𐴟𐴣𐴀𐴝𐴥𐴌𐴝𐴌 𐴒𐴟𐴕𐴝𐴤 𐴃𐴝𐴥𐴘𐴎𐴝𐴒𐴡𐴘.“

The Word for the World International

https://app.library.bible/content/87faca8b51c22590