𐴘𐴡𐴇𐴝𐴥𐴕𐴧𐴝7
𐴀𐴞𐴏𐴝𐴤𐴌 𐴁𐴝𐴥𐴘𐴧𐴝𐴙𐴕 𐴊𐴡𐴌 𐴕𐴝𐴁𐴞𐴐𐴧𐴝𐴥𐴐𐴢
1𐴘𐴝𐴥𐴌𐴁𐴝𐴦𐴊𐴠, 𐴀𐴞𐴏𐴝𐴤 𐴒𐴝𐴓𐴞𐴓𐴡𐴃𐴢 𐴏𐴡𐴓𐴝𐴉𐴞𐴥𐴌𐴝 𐴒𐴡𐴌𐴠𐴥𐴌; 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴔𐴝𐴌𐴞𐴉𐴠𐴥𐴓𐴝𐴘𐴁𐴝𐴌 𐴑𐴟𐴐𐴞𐴥𐴐𐴡𐴃𐴢 𐴀𐴝𐴐𐴧𐴞𐴥𐴓𐴢 𐴊𐴠 𐴇𐴠𐴥𐴃𐴡𐴓𐴧𐴝 𐴀𐴞𐴥𐴁𐴝𐴃𐴧𐴟 𐴘𐴡𐴇𐴟𐴥𐴊𐴞𐴘𐴝𐴃𐴢 𐴏𐴡𐴓𐴝𐴉𐴞𐴥𐴌𐴝 𐴒𐴡𐴙𐴃𐴧𐴡𐴥 𐴔𐴡𐴕𐴠 𐴕𐴡 𐴈𐴡𐴀𐴌.2𐴇𐴠𐴥𐴣𐴃𐴧𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴝𐴣𐴐𐴝𐴤𐴌-𐴀𐴞𐴊𐴡𐴌 𐴀𐴡𐴑𐴃𐴡𐴥 𐴋𐴝𐴥𐴑𐴠 𐴀𐴝𐴙𐴐𐴧𐴠𐴥.3𐴇𐴠𐴥𐴃𐴡𐴓𐴧𐴝 𐴀𐴞𐴏𐴝𐴤𐴌 𐴁𐴝𐴥𐴘𐴧𐴝𐴙𐴕 𐴊𐴠 𐴀𐴞𐴥𐴁𐴝𐴌𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴀𐴠𐴕𐴃𐴟𐴥 𐴘𐴡𐴇𐴟𐴥𐴊𐴞𐴘𐴝𐴃𐴢 𐴎𐴡𐴦𐴒𐴡𐴥𐴘, 𐴎𐴠𐴀𐴕𐴠 𐴃𐴟𐴀𐴛 𐴒𐴡𐴌𐴡𐴤 𐴊𐴠 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴃𐴟𐴣𐴀𐴝𐴥𐴣𐴌 𐴀𐴟𐴔𐴧𐴡𐴃𐴢 𐴀𐴡𐴥𐴑𐴧𐴡𐴓𐴠 𐴘𐴡𐴥 𐴊𐴠𐴑𐴠𐴥.4𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴎𐴠𐴦𐴕𐴞𐴑𐴞 𐴔𐴡𐴐𐴟𐴥𐴌 𐴀𐴡𐴥𐴘𐴃𐴡 𐴏𐴝𐴀, 𐴀𐴞𐴥𐴃𐴠 𐴃𐴡 𐴓𐴟𐴑𐴝𐴘 𐴇𐴡𐴕𐴡𐴤 𐴑𐴠𐴏𐴧𐴟𐴥 𐴕𐴡 𐴒𐴡𐴌𐴠𐴥. 𐴃𐴟𐴀𐴛 𐴎𐴠𐴃𐴧𐴡𐴥𐴃𐴢 𐴀𐴠 𐴈𐴝𐴔 𐴀𐴞𐴀𐴕 𐴒𐴡𐴌𐴡𐴤𐴌, 𐴃𐴡𐴥𐴘 𐴕𐴞𐴎𐴡𐴌𐴠𐴥 𐴊𐴟𐴕𐴞𐴘𐴝𐴙𐴌 𐴇𐴝𐴣𐴏𐴠 𐴎𐴝𐴇𐴠𐴥𐴌 𐴒𐴡𐴌𐴡𐴤.“5𐴀𐴝𐴏𐴡𐴥𐴓𐴠 𐴀𐴞𐴥𐴁𐴝𐴌 𐴁𐴝𐴥𐴘𐴧𐴝𐴙𐴕 𐴊𐴠 𐴀𐴟𐴥𐴊𐴧𐴗𐴝 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴕𐴟𐴥 𐴀𐴝𐴕𐴠𐴤.6𐴃𐴡𐴥𐴘 𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴎𐴝𐴘𐴁𐴝𐴌 𐴀𐴡𐴑𐴃𐴡𐴥 𐴀𐴝𐴙𐴅𐴧𐴡𐴤 𐴕𐴟𐴥 𐴀𐴝𐴘𐴧𐴠𐴤, 𐴔𐴡𐴕𐴃𐴡𐴌 𐴃𐴟𐴣𐴀𐴝𐴥𐴌𐴝 𐴎𐴠 𐴇𐴡𐴕𐴡𐴤 𐴀𐴡𐴑𐴃𐴡𐴥𐴃𐴢 𐴎𐴝𐴘 𐴉𐴝𐴌𐴞𐴁𐴝𐴥.7𐴊𐴟𐴕𐴞𐴘𐴝𐴙𐴌 𐴔𐴝𐴙𐴕𐴐𐴠𐴥 𐴃𐴟𐴣𐴀𐴝𐴥𐴌𐴝𐴌𐴠 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴞𐴥 𐴕𐴡 𐴉𐴝𐴌𐴠, 𐴓𐴠𐴑𐴞𐴕 𐴀𐴝𐴣𐴀𐴌𐴠𐴥 𐴕𐴝𐴉𐴡𐴥𐴌𐴡𐴃𐴢 𐴒𐴡𐴌𐴠𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴃𐴡 𐴀𐴞𐴥𐴃𐴝𐴌𐴝𐴌 𐴈𐴝𐴔 𐴀𐴡𐴥𐴑𐴧𐴡𐴓𐴢 𐴈𐴡𐴥𐴌𐴝𐴉𐴢 𐴁𐴡𐴥𐴓𐴞 𐴒𐴡𐴁𐴝𐴤 𐴊𐴞𐴥.8𐴃𐴟𐴣𐴀𐴝𐴥𐴌𐴝 𐴇𐴠𐴥 𐴀𐴞𐴊𐴡𐴃𐴢 𐴎𐴡𐴦. 𐴀𐴝𐴀𐴛 𐴀𐴞𐴊𐴢 𐴇𐴞𐴥𐴘𐴝𐴕𐴡𐴃𐴢 𐴀𐴠𐴇𐴡𐴥𐴕 𐴕𐴡 𐴎𐴝𐴘𐴧𐴟𐴔, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴣𐴀𐴌 𐴀𐴡𐴑𐴃𐴡𐴥 𐴀𐴝𐴙𐴅𐴧𐴡𐴤 𐴉𐴟𐴌𐴝𐴉𐴟𐴌𐴞 𐴕𐴟𐴥 𐴀𐴝𐴘𐴧𐴠𐴤.“9𐴀𐴞𐴥𐴃𐴝𐴌𐴝𐴌𐴠 𐴇𐴞𐴥𐴀𐴕 𐴈𐴡𐴀𐴘𐴢 𐴁𐴝𐴦𐴊𐴠, 𐴀𐴞𐴥𐴁𐴝 𐴒𐴝𐴓𐴞𐴓𐴡𐴃𐴢 𐴃𐴝𐴥𐴘𐴒𐴞𐴘𐴡𐴘.𐴀𐴞𐴏𐴝𐴤 𐴀𐴠𐴊𐴧𐴠 𐴁𐴝𐴣𐴐𐴝𐴤𐴌-𐴀𐴞𐴊𐴢
10𐴓𐴠𐴑𐴞𐴕 𐴀𐴞𐴥𐴁𐴝𐴌 𐴁𐴝𐴥𐴘𐴧𐴝𐴙𐴕 𐴀𐴡𐴥𐴑𐴧𐴡𐴓𐴢 𐴀𐴞𐴊𐴡𐴃𐴢 𐴎𐴝𐴘𐴒𐴡𐴥𐴘 𐴁𐴝𐴦𐴊𐴠, 𐴀𐴞𐴥𐴁𐴝 𐴕𐴞𐴎𐴠 𐴘𐴡𐴥 𐴒𐴞𐴦𐴘𐴠𐴥; 𐴑𐴟𐴥𐴓𐴝𐴔𐴠𐴓𐴝 𐴒𐴡𐴥𐴌𐴞 𐴕𐴡𐴥, 𐴁𐴡𐴥𐴓𐴑𐴠 𐴓𐴟𐴑𐴝𐴘𐴡𐴌𐴠 𐴒𐴞𐴦𐴘𐴠𐴥.11𐴀𐴞𐴊𐴡𐴃𐴢 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌 𐴃𐴝𐴓𐴝𐴐𐴢 𐴒𐴡𐴌𐴞𐴥-𐴒𐴡𐴌𐴞𐴥 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴀𐴞𐴥𐴁𐴝 𐴇𐴡𐴍𐴠𐴥؟“12𐴔𐴝𐴕𐴟𐴥𐴙𐴐𐴡𐴌 𐴋𐴝𐴀𐴘𐴡𐴌 𐴁𐴟𐴥𐴃𐴡𐴌𐴠 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴏𐴟𐴂𐴧𐴠-𐴏𐴟𐴂𐴧𐴠 𐴁𐴞𐴐𐴞𐴤 𐴉𐴟𐴍𐴝𐴉𐴟𐴍𐴞 𐴀𐴡𐴥𐴘𐴧𐴠. 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴞𐴥𐴁𐴝 𐴒𐴡𐴔 𐴔𐴝𐴕𐴟𐴥𐴙𐴐𐴢.“𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴕𐴡, 𐴕𐴡, 𐴀𐴞𐴥𐴁𐴝𐴘𐴠 𐴔𐴝𐴙𐴕𐴐𐴡𐴥𐴌𐴠 𐴒𐴡𐴓𐴧𐴡𐴃𐴡𐴃𐴢 𐴓𐴡𐴘𐴎𐴝𐴌𐴒𐴡𐴥𐴘.“13𐴔𐴡𐴕𐴃𐴡𐴌 𐴃𐴡𐴀 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴋𐴡𐴦𐴌𐴠 𐴇𐴡𐴕𐴡𐴤𐴑𐴞𐴘𐴠 𐴀𐴞𐴥𐴁𐴝𐴌 𐴁𐴝𐴦𐴁𐴟𐴃𐴠 𐴑𐴟𐴥𐴓𐴝𐴔𐴠𐴓𐴝 𐴒𐴡𐴥𐴌𐴞 𐴕𐴡𐴥 𐴈𐴡𐴀.14𐴀𐴞𐴊𐴢 𐴀𐴠𐴑𐴊𐴡𐴥𐴑 𐴀𐴝𐴥𐴕𐴞𐴑 𐴀𐴡𐴥𐴘𐴧𐴠 𐴌𐴝𐴥𐴌, 𐴀𐴞𐴏𐴝𐴤 𐴖𐴡𐴌𐴠 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴌 𐴀𐴟𐴍𐴝𐴥𐴕𐴡𐴃𐴢 𐴎𐴝𐴘 𐴃𐴝𐴦𐴓𐴞𐴔 𐴊𐴞𐴘𐴝𐴃𐴢 𐴊𐴡𐴙𐴅𐴧𐴠.15𐴀𐴝𐴦𐴌 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴃𐴝𐴦𐴅𐴟𐴂𐴢 𐴀𐴡𐴥𐴘 𐴈𐴡𐴀𐴌 𐴊𐴠, ”𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴇𐴡𐴕𐴡𐴤 𐴔𐴞𐴑𐴧𐴝𐴥𐴃𐴧𐴟 𐴃𐴝𐴦𐴓𐴞𐴔 𐴇𐴝𐴥𐴏𐴞𐴓𐴢 𐴕𐴡 𐴒𐴡𐴌𐴞𐴥 𐴀𐴞𐴀𐴕 𐴑𐴠𐴀𐴕𐴒𐴡𐴌𐴞 𐴎𐴝𐴕𐴠؟“16𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴎𐴞𐴀𐴕 𐴃𐴝𐴦𐴓𐴞𐴔 𐴊𐴞 𐴇𐴞𐴥𐴀𐴕 𐴀𐴝𐴣𐴀𐴌 𐴕𐴞𐴎𐴡𐴌 𐴕𐴡, 𐴁𐴡𐴥𐴓𐴑𐴠 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴀𐴞𐴥𐴁𐴝𐴌.17𐴎𐴝𐴃𐴧𐴟 𐴀𐴝𐴓𐴧𐴝𐴌 𐴔𐴡𐴕𐴐𐴝𐴥 𐴔𐴡𐴎𐴞𐴕 𐴒𐴡𐴙𐴃𐴧𐴡𐴥 𐴔𐴡𐴕𐴠𐴈𐴡𐴀, 𐴀𐴞𐴥𐴃𐴠 𐴎𐴝𐴕𐴞𐴁𐴡𐴥, 𐴀𐴠 𐴃𐴝𐴦𐴓𐴞𐴔 𐴀𐴞𐴀𐴕 𐴑𐴞𐴥 𐴀𐴝𐴓𐴧𐴝𐴌 𐴀𐴝𐴦𐴌 𐴕𐴝𐴥𐴑𐴞 𐴀𐴝𐴣𐴀𐴌𐴒𐴝𐴤 𐴀𐴝𐴀𐴛 𐴈𐴡𐴀𐴙𐴌 𐴊𐴠.18𐴎𐴠𐴦𐴕𐴞𐴑𐴞 𐴕𐴞𐴎𐴡𐴌 𐴃𐴡𐴌𐴉𐴡𐴥𐴃𐴧𐴟 𐴈𐴡𐴀, 𐴀𐴞𐴥𐴃𐴠 𐴕𐴞𐴎𐴡𐴌 𐴀𐴞𐴎𐴧𐴡𐴃𐴢 𐴃𐴟𐴖𐴝. 𐴓𐴠𐴑𐴞𐴕 𐴎𐴞𐴁𐴝𐴤𐴘𐴠 𐴊𐴞𐴉𐴠𐴍𐴡𐴥𐴘𐴧𐴝𐴌 𐴀𐴞𐴎𐴧𐴡𐴃𐴢 𐴃𐴟𐴖𐴝, 𐴀𐴞𐴥𐴁𐴝 𐴀𐴡𐴥𐴙𐴓𐴊𐴠 𐴏𐴡𐴥𐴘𐴧𐴞, 𐴀𐴝𐴦𐴌 𐴀𐴞𐴥𐴁𐴝𐴌 𐴁𐴟𐴥𐴃𐴡𐴌𐴠 𐴇𐴡𐴕𐴡𐴤 𐴊𐴟𐴥𐴑𐴝𐴁𐴝𐴎𐴞 𐴕𐴝𐴥𐴘.19𐴔𐴟𐴀𐴏𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴐𐴡𐴥𐴌𐴞𐴘𐴡𐴃𐴢 𐴊𐴞𐴦𐴘𐴠𐴥 𐴊𐴠 𐴕𐴡 𐴕𐴠𐴥؟ 𐴔𐴡𐴕𐴃𐴡𐴌 𐴃𐴡𐴀 𐴊𐴠 𐴃𐴟𐴣𐴀𐴝𐴥𐴌𐴝 𐴇𐴡𐴕𐴡𐴤𐴑𐴞𐴘𐴠 𐴇𐴠𐴥 𐴐𐴡𐴥𐴌𐴞𐴘𐴡𐴃𐴢 𐴀𐴝𐴔𐴡𐴥𐴓𐴢 𐴕𐴡 𐴒𐴡𐴌𐴡𐴤. 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴑𐴞𐴘𐴡𐴥𐴓𐴧𐴝 𐴔𐴝𐴌𐴞𐴉𐴠𐴥𐴓𐴝𐴘 𐴁𐴡𐴓𐴧𐴝 𐴏𐴡𐴀𐴌؟“20𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴃𐴟𐴣𐴀𐴝𐴥𐴣𐴌𐴠 𐴁𐴟𐴥𐴃𐴠 𐴉𐴝𐴘𐴧𐴠𐴥. 𐴃𐴟𐴣𐴀𐴝𐴥𐴣𐴌𐴠 𐴇𐴡𐴕𐴠 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴏𐴝𐴥𐴌 𐴊𐴠𐴥؟“21𐴀𐴞𐴏𐴝𐴤𐴘𐴠 𐴀𐴞𐴥𐴃𐴝𐴌𐴝𐴌𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴀𐴝𐴀𐴛 𐴀𐴠𐴑𐴧𐴝𐴥𐴕 𐴈𐴝𐴔 𐴒𐴡𐴙𐴅𐴧𐴞𐴥, 𐴀𐴝𐴦𐴌 𐴃𐴟𐴣𐴀𐴝𐴥𐴌𐴝 𐴁𐴠𐴒𐴧𐴟𐴥𐴕 𐴃𐴝𐴦𐴅𐴟𐴂𐴢 𐴀𐴡𐴥𐴘𐴒𐴞𐴘𐴡𐴒𐴡𐴘.22𐴔𐴟𐴀𐴏𐴝𐴘𐴠 𐴃𐴟𐴣𐴀𐴝𐴥𐴌𐴝𐴌𐴠 𐴀𐴝𐴥𐴎𐴡𐴔𐴞 𐴒𐴡𐴌𐴞𐴥 𐴁𐴡𐴓𐴧𐴝 𐴇𐴡𐴥𐴑𐴟𐴔 𐴊𐴞𐴥𐴘𐴠 𐴊𐴠 𐴇𐴠𐴥𐴃𐴡𐴓𐴧𐴝, 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴟𐴥𐴊𐴧𐴗𐴝 𐴔𐴝𐴕𐴟𐴥𐴙𐴐𐴡𐴌𐴠 𐴀𐴝𐴥𐴎𐴡𐴔𐴞 𐴒𐴡𐴌𐴡𐴤. 𐴇𐴝𐴥𐴓𐴠𐴑𐴠 𐴇𐴠𐴥𐴕𐴊𐴞𐴓𐴧𐴝 𐴒𐴡𐴌𐴝𐴥 𐴔𐴟𐴀𐴏𐴝 𐴓𐴡𐴥𐴃𐴞 𐴐𐴟𐴥𐴌𐴟 𐴀𐴡𐴥𐴘𐴧𐴠 𐴊𐴠 𐴕𐴡, 𐴁𐴡𐴥𐴓𐴑𐴠 𐴁𐴝𐴉𐴊𐴝𐴊𐴝 𐴒𐴟𐴥𐴕𐴡𐴃𐴧𐴟 𐴓𐴡𐴥𐴃𐴞.23𐴔𐴟𐴀𐴏𐴝𐴌 𐴐𐴡𐴥𐴌𐴞𐴘𐴡𐴃𐴢 𐴕𐴡 𐴁𐴝𐴥𐴚𐴒𐴞 𐴁𐴡𐴓𐴧𐴝 𐴎𐴡𐴊𐴞 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴔𐴝𐴕𐴟𐴥𐴙𐴐𐴢 𐴀𐴠𐴒𐴧𐴗𐴝𐴤𐴌𐴠 𐴀𐴝𐴥𐴎𐴡𐴔𐴞 𐴒𐴡𐴌𐴝𐴥 𐴎𐴝, 𐴃𐴡𐴥𐴀𐴘𐴓𐴠 𐴀𐴠𐴁𐴝𐴦𐴊𐴡𐴃𐴢-𐴀𐴡𐴌-𐴊𐴞𐴕 𐴀𐴝𐴀𐴛 𐴀𐴠𐴒𐴧𐴗𐴝𐴤 𐴔𐴝𐴕𐴟𐴥𐴙𐴐𐴡𐴌𐴠 𐴉𐴟𐴌𐴝𐴉𐴟𐴌𐴞 𐴒𐴡𐴔 𐴒𐴡𐴙𐴅𐴧𐴞𐴥 𐴊𐴠 𐴇𐴠𐴥𐴃𐴡𐴓𐴧𐴝 𐴑𐴞𐴘𐴝𐴥 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴓𐴡𐴥𐴘 𐴒𐴟𐴐𐴧𐴝𐴤 𐴀𐴡𐴥𐴘𐴧𐴡؟24𐴖𐴡𐴌𐴃𐴟𐴥 𐴏𐴝𐴀𐴘𐴢 𐴁𐴞𐴏𐴝𐴌 𐴕𐴡 𐴒𐴡𐴙𐴅𐴧𐴡𐴥, 𐴀𐴞𐴕𐴏𐴝𐴥𐴉𐴢 𐴁𐴞𐴏𐴝𐴌 𐴒𐴡𐴙𐴅𐴧𐴡𐴥.“
𐴀𐴞𐴁𐴝𐴤 𐴔𐴡𐴀𐴏𐴞𐴤 𐴕𐴠𐴥؟
25𐴇𐴠𐴥𐴃𐴟𐴕𐴡𐴃𐴢 𐴅𐴠𐴌𐴟𐴥𐴏𐴝𐴓𐴠𐴔𐴡𐴌 𐴑𐴠𐴏𐴧𐴟𐴥 𐴔𐴝𐴙𐴕𐴐𐴠𐴥 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴑𐴞𐴥 𐴀𐴟𐴁𐴝𐴤 𐴕𐴡 𐴎𐴞𐴁𐴝𐴤𐴌𐴠 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴔𐴝𐴌𐴞𐴉𐴠𐴥𐴓𐴝𐴘𐴃𐴡 𐴏𐴝𐴥𐴌؟26𐴓𐴠𐴑𐴞𐴕 𐴏𐴡𐴀, 𐴀𐴞𐴁𐴝𐴤𐴘𐴠 𐴃𐴡 𐴑𐴟𐴥𐴓𐴝𐴔𐴠𐴓𐴝 𐴒𐴡𐴥𐴌𐴞 𐴈𐴡𐴃𐴝𐴤 𐴈𐴡𐴀𐴌, 𐴃𐴡𐴀 𐴀𐴟𐴥𐴊𐴧𐴗𐴝 𐴀𐴞𐴥𐴃𐴝𐴌𐴝 𐴀𐴞𐴁𐴝𐴤𐴌𐴠 𐴑𐴠𐴏𐴧𐴟𐴥 𐴕𐴡 𐴈𐴡𐴀𐴌. 𐴇𐴡𐴥𐴑𐴟𐴔𐴡𐴃𐴢-𐴒𐴡𐴌𐴡𐴤𐴘𐴝 𐴀𐴡𐴥𐴑𐴧𐴡𐴓𐴠 𐴇𐴡𐴥𐴕𐴡 𐴀𐴞𐴁𐴝𐴤 𐴔𐴡𐴀𐴏𐴞𐴤 𐴊𐴠 𐴇𐴞𐴥𐴘𐴝𐴕 𐴏𐴡𐴥𐴘𐴧𐴞𐴒𐴡𐴌𐴞 𐴎𐴝𐴕𐴞 𐴉𐴝𐴙𐴅𐴧𐴠𐴥 𐴕𐴠𐴥؟27𐴎𐴠𐴀𐴕 𐴀𐴡𐴥𐴘𐴁𐴡 𐴀𐴡𐴥𐴑, 𐴀𐴝𐴣𐴀𐴌𐴝 𐴃𐴡 𐴎𐴝𐴕𐴞, 𐴀𐴞𐴁𐴝𐴤 𐴇𐴡𐴕𐴃𐴟𐴤 𐴀𐴝𐴙𐴐𐴧𐴠𐴥, 𐴔𐴡𐴕𐴃𐴡𐴌 𐴎𐴠𐴣𐴃𐴧𐴠𐴥 𐴔𐴡𐴀𐴏𐴞𐴤 𐴀𐴝𐴘𐴁𐴡𐴤, 𐴀𐴞𐴥𐴁𐴝 𐴇𐴡𐴕𐴃𐴟𐴤 𐴀𐴝𐴙𐴐𐴧𐴠𐴥 𐴇𐴡𐴕𐴡𐴤𐴑𐴞𐴘𐴠 𐴕𐴡 𐴎𐴝𐴕𐴞𐴁𐴡𐴥.“28𐴀𐴞𐴏𐴝𐴤 𐴁𐴝𐴘𐴃𐴟𐴓𐴢-𐴔𐴟𐴑𐴝𐴊𐴧𐴡𐴏𐴡𐴃𐴢 𐴃𐴝𐴦𐴓𐴞𐴔 𐴊𐴞𐴁𐴝𐴐𐴧𐴡𐴥𐴃𐴢 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴀𐴡𐴥𐴘, 𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌𐴠𐴥 𐴏𐴞𐴕𐴡𐴥, 𐴀𐴝𐴦𐴌 𐴀𐴝𐴀𐴛 𐴇𐴡𐴕𐴃𐴟𐴤 𐴀𐴝𐴙𐴐𐴧𐴞𐴤 𐴘𐴡𐴥 𐴎𐴝𐴕𐴡. 𐴔𐴡𐴕𐴃𐴡𐴌 𐴀𐴝𐴀𐴛 𐴕𐴞𐴎𐴡𐴌𐴒𐴝𐴤 𐴕𐴞𐴎𐴠 𐴀𐴝𐴙𐴐𐴧𐴞𐴤 𐴊𐴠 𐴕𐴡, 𐴎𐴞𐴁𐴝𐴤𐴘𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴀𐴞𐴥𐴁𐴝 𐴏𐴡𐴥𐴘𐴧𐴞. 𐴃𐴟𐴣𐴀𐴝𐴥𐴌𐴝 𐴃𐴡 𐴀𐴞𐴥𐴁𐴝𐴌𐴠 𐴕𐴡 𐴏𐴞𐴕𐴡𐴥.29𐴓𐴠𐴑𐴞𐴕 𐴀𐴝𐴀𐴛 𐴀𐴞𐴥𐴁𐴝𐴌𐴠 𐴏𐴞𐴕𐴞𐴥, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴝𐴀𐴛 𐴀𐴞𐴥𐴁𐴝𐴌 𐴃𐴡𐴌𐴉𐴡𐴥𐴃𐴧𐴟 𐴀𐴝𐴙𐴐𐴧𐴞𐴤, 𐴀𐴝𐴣𐴀𐴌𐴠𐴥 𐴀𐴞𐴥𐴁𐴝𐴘𐴠 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠.“30𐴇𐴞𐴥𐴀𐴕 𐴉𐴟𐴥𐴕𐴞 𐴀𐴞𐴥𐴃𐴝𐴌𐴝 𐴀𐴞𐴥𐴁𐴝𐴌𐴠 𐴒𐴠𐴌𐴠𐴉𐴃𐴝𐴌 𐴒𐴡𐴌𐴞𐴥 𐴁𐴡𐴓𐴧𐴝 𐴏𐴝𐴘𐴧𐴠𐴥, 𐴔𐴡𐴕𐴃𐴡𐴌 𐴀𐴞𐴥𐴁𐴝𐴌 𐴀𐴡𐴑𐴃𐴡𐴥 𐴕𐴟𐴥 𐴀𐴝𐴘𐴧𐴠𐴤 𐴊𐴠 𐴇𐴠𐴥𐴃𐴡𐴓𐴧𐴝 𐴇𐴡𐴕𐴡𐴤𐴑𐴞𐴘𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴝𐴥𐴃𐴢 𐴕𐴡𐴥 𐴓𐴝𐴒𐴝.31𐴃𐴡𐴀 𐴔𐴝𐴕𐴟𐴥𐴙𐴐𐴡𐴌 𐴊𐴡𐴓𐴡𐴃𐴧𐴟 𐴁𐴡𐴀𐴗𐴃𐴢 𐴎𐴡𐴕𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤. 𐴀𐴞𐴥𐴃𐴝𐴌𐴝 𐴈𐴡𐴀𐴌 𐴊𐴠, ”𐴔𐴡𐴀𐴏𐴞𐴤 𐴎𐴠𐴣𐴃𐴧𐴠𐴥 𐴀𐴝𐴘𐴁𐴡𐴤, 𐴀𐴞𐴥𐴁𐴝𐴘𐴠 𐴑𐴞𐴥 𐴀𐴠 𐴔𐴝𐴕𐴟𐴥𐴙𐴐𐴧𐴗𐴝𐴘𐴠 𐴒𐴡𐴙𐴅𐴧𐴠𐴥 𐴊𐴠 𐴘𐴝𐴥𐴌 𐴃𐴟𐴥𐴖𐴝𐴌𐴡 𐴁𐴞𐴐𐴞𐴤 𐴑𐴠𐴌𐴝𐴔𐴡𐴃𐴢 𐴀𐴡𐴥𐴑𐴧𐴡𐴓𐴢 𐴊𐴝𐴈𐴝𐴤𐴘𐴁𐴡؟“𐴀𐴞𐴏𐴝𐴤𐴌𐴠 𐴊𐴡𐴥𐴌𐴞 𐴁𐴡𐴓𐴧𐴝 𐴉𐴝𐴀𐴌𐴝𐴊𐴝𐴌 𐴊𐴞𐴉𐴠𐴍𐴝𐴥𐴘𐴧𐴠
32𐴔𐴝𐴕𐴟𐴥𐴙𐴐𐴡𐴌 𐴋𐴝𐴀𐴘𐴧𐴠 𐴀𐴞𐴏𐴝𐴤𐴌 𐴁𐴝𐴦𐴁𐴟𐴃𐴠 𐴉𐴟𐴥𐴐𐴉𐴟𐴐𐴝𐴌 𐴊𐴠 𐴇𐴞𐴥𐴘𐴝𐴕 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴉𐴟𐴥𐴙𐴕𐴧𐴠. 𐴇𐴠𐴥𐴃𐴡𐴓𐴧𐴝 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴡𐴥𐴑𐴧𐴡𐴓𐴠 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴠 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞 𐴀𐴝𐴙𐴕𐴃𐴡𐴤 𐴇𐴡𐴊𐴟𐴥𐴕 𐴉𐴝𐴀𐴌𐴝𐴊𐴝𐴌 𐴊𐴞𐴉𐴠𐴍𐴝𐴥𐴘𐴧𐴠.33𐴀𐴞𐴏𐴝𐴤𐴘𐴠 𐴈𐴡𐴀𐴌 𐴊𐴠, ”𐴀𐴝𐴀𐴛 𐴃𐴟𐴣𐴀𐴝𐴥𐴌𐴝𐴌 𐴉𐴟𐴥𐴖𐴝𐴣𐴃𐴞 𐴀𐴝𐴌 𐴁𐴞𐴐𐴞𐴤 𐴊𐴞𐴕 𐴕𐴝𐴥𐴘, 𐴁𐴝𐴦𐴊𐴠 𐴀𐴝𐴣𐴀𐴌𐴠𐴥 𐴊𐴞𐴉𐴠𐴍𐴝𐴥𐴘𐴧𐴠 𐴊𐴠 𐴀𐴞𐴥𐴁𐴝𐴌 𐴇𐴝𐴣𐴏𐴠 𐴎𐴝𐴘𐴧𐴟𐴔𐴁𐴡𐴥𐴘.34𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴃𐴝𐴓𐴝𐴐𐴢 𐴒𐴡𐴌𐴞𐴥𐴁𐴝, 𐴔𐴡𐴕𐴃𐴡𐴌 𐴀𐴝𐴣𐴀𐴌𐴠𐴥 𐴓𐴡𐴦𐴃𐴢 𐴕𐴡 𐴉𐴝𐴘𐴁𐴝, 𐴀𐴝𐴦𐴌 𐴎𐴠𐴍𐴠𐴥 𐴀𐴝𐴀𐴛 𐴃𐴝𐴥𐴑𐴞𐴘𐴟𐴔, 𐴇𐴠𐴥𐴍𐴠 𐴃𐴟𐴣𐴀𐴝𐴥𐴌𐴝 𐴀𐴝𐴀𐴘𐴢 𐴕𐴡 𐴉𐴝𐴌𐴞𐴁𐴝𐴥.“35𐴃𐴡𐴥𐴘 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴠 𐴀𐴝𐴉𐴡𐴤𐴏𐴡𐴃𐴢 𐴈𐴡𐴀𐴌 𐴊𐴠, ”𐴀𐴞𐴁𐴝𐴤𐴌𐴠 𐴀𐴝𐴣𐴀𐴌𐴝 𐴃𐴟𐴖𐴝𐴘 𐴕𐴡 𐴉𐴝𐴘 𐴉𐴝𐴥𐴕 𐴀𐴞𐴁𐴝𐴤 𐴇𐴡𐴍𐴠𐴥 𐴎𐴝𐴘𐴃𐴡 𐴕𐴞𐴘𐴡𐴃𐴢 𐴒𐴡𐴌𐴠𐴥𐴌 𐴊𐴠𐴥؟ 𐴎𐴠 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴀𐴝𐴣𐴀𐴌𐴝𐴌 𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴢 𐴐𐴞𐴥𐴣𐴍𐴝𐴐𐴞𐴄𐴧𐴝𐴤 𐴀𐴡𐴥𐴘𐴒𐴞𐴘𐴡𐴘, 𐴀𐴞𐴁𐴝𐴤𐴘𐴠 𐴇𐴡𐴥𐴕𐴡 𐴇𐴠𐴥𐴍𐴠 𐴎𐴝𐴘 𐴇𐴠𐴥 𐴁𐴠𐴘𐴡𐴇𐴟𐴥𐴊𐴞 𐴀𐴡𐴥𐴑𐴧𐴡𐴓𐴡𐴌𐴠 𐴃𐴝𐴦𐴓𐴞𐴔 𐴊𐴞𐴁𐴡 𐴊𐴠 𐴕𐴠𐴥؟36𐴀𐴞𐴁𐴝𐴤𐴘𐴠 𐴀𐴠 𐴈𐴡𐴃𐴝𐴤 𐴓𐴡𐴥𐴘 𐴑𐴞𐴦 𐴈𐴡𐴘𐴃𐴡𐴤 𐴏𐴝𐴥𐴌 𐴊𐴠, ’𐴃𐴟𐴣𐴀𐴝𐴥𐴌𐴝 𐴀𐴝𐴣𐴀𐴌 𐴃𐴝𐴓𐴝𐴐𐴢 𐴒𐴡𐴌𐴞𐴥𐴁𐴝, 𐴔𐴡𐴕𐴃𐴡𐴌 𐴀𐴝𐴣𐴀𐴌𐴠𐴥 𐴓𐴡𐴦𐴃𐴢 𐴕𐴡 𐴉𐴝𐴘𐴁𐴝,‘𐴀𐴝𐴦𐴌 ’𐴎𐴠𐴍𐴠𐴥 𐴀𐴝𐴀𐴛 𐴃𐴝𐴥𐴑𐴞𐴘𐴟𐴔, 𐴇𐴠𐴥𐴍𐴠 𐴃𐴟𐴣𐴀𐴝𐴥𐴌𐴝 𐴀𐴝𐴀𐴘𐴢 𐴕𐴡 𐴉𐴝𐴌𐴞𐴁𐴝𐴥؟‘ “𐴎𐴞𐴕𐴊𐴞𐴒𐴞 𐴊𐴠𐴦 𐴊𐴠 𐴉𐴝𐴕𐴞𐴥
37𐴁𐴝𐴦𐴊𐴠 𐴀𐴞𐴊𐴡𐴌 𐴀𐴝𐴇𐴠𐴥𐴌𐴞 𐴊𐴞𐴕𐴡𐴌 𐴊𐴞𐴕، 𐴘𐴝𐴥𐴕𐴞 𐴀𐴞𐴊𐴡𐴌 𐴀𐴠𐴁𐴧𐴠 𐴋𐴡𐴣𐴀𐴌 𐴊𐴞𐴕 𐴀𐴡𐴃𐴢, 𐴀𐴞𐴏𐴝𐴤 𐴃𐴞𐴥𐴘𐴝𐴘𐴧𐴡𐴌𐴠 𐴒𐴟𐴎𐴡𐴌𐴞 𐴈𐴡𐴀𐴌 𐴊𐴠, ”𐴎𐴠𐴦𐴕𐴞𐴑𐴞 𐴃𐴞𐴌𐴝𐴥𐴐𐴞 𐴀𐴝𐴏𐴡𐴤, 𐴀𐴞𐴥𐴃𐴠 𐴀𐴝𐴣𐴀𐴌 𐴇𐴝𐴣𐴏𐴠 𐴀𐴝𐴀𐴘𐴢 𐴉𐴝𐴕𐴞𐴥 𐴈𐴡𐴥𐴀𐴒𐴝𐴘.38𐴎𐴠𐴦𐴕𐴞𐴑𐴞 𐴀𐴝𐴣𐴀𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴕𐴠𐴤, 𐴂𐴝𐴑-𐴑𐴝𐴓𐴝𐴔 𐴔𐴡𐴎𐴞𐴕، ’𐴀𐴞𐴥𐴃𐴝𐴌 𐴁𐴟𐴥𐴃𐴡𐴃𐴧𐴟 𐴎𐴞𐴕𐴊𐴞𐴒𐴞 𐴊𐴠𐴦 𐴊𐴠 𐴉𐴝𐴕𐴞𐴥 𐴀𐴟𐴍𐴝𐴥𐴃𐴢 𐴃𐴝𐴥𐴑𐴞𐴁𐴡.‘ “39𐴀𐴞𐴏𐴝𐴤𐴘𐴠 𐴇𐴞𐴥𐴘𐴝𐴕 𐴂𐴝𐴑-𐴌𐴟𐴀𐴌 𐴁𐴝𐴦𐴁𐴟𐴃𐴠 𐴈𐴡𐴘𐴧𐴠𐴥 𐴊𐴠, 𐴎𐴞𐴁𐴝𐴤𐴌𐴠 𐴎𐴠𐴃𐴝𐴌𐴝𐴤 𐴀𐴞𐴏𐴝𐴤𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤 𐴀𐴞𐴥𐴃𐴝𐴌𐴝 𐴉𐴝𐴘 𐴎𐴝𐴘𐴁𐴡. 𐴂𐴝𐴑-𐴌𐴟𐴀 𐴇𐴠𐴥𐴃𐴟𐴕 𐴉𐴡𐴙𐴅𐴧𐴡𐴕𐴃𐴡 𐴊𐴞𐴦𐴘𐴝 𐴕𐴡𐴥 𐴎𐴝, 𐴑𐴞𐴘𐴡𐴥𐴓𐴧𐴝-𐴈𐴡𐴘𐴓𐴠𐴥 𐴀𐴞𐴏𐴝𐴤𐴌 𐴔𐴡𐴈𐴞𐴥𐴔𐴝 𐴇𐴠𐴥𐴃𐴟𐴕 𐴉𐴡𐴙𐴅𐴧𐴡𐴕𐴃𐴡 𐴎𐴝𐴇𐴠𐴥𐴌 𐴒𐴡𐴌𐴝𐴥 𐴕𐴡𐴥 𐴎𐴝.𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴉𐴝𐴀𐴄𐴝-𐴉𐴝𐴀𐴄𐴞 𐴀𐴡𐴥𐴘𐴧𐴠
40𐴇𐴞𐴥𐴀𐴕 𐴉𐴟𐴥𐴕𐴞 𐴁𐴝𐴦𐴊𐴠 𐴑𐴠𐴏𐴧𐴟𐴥 𐴔𐴝𐴙𐴕𐴐𐴠𐴥 𐴈𐴡𐴀𐴌 𐴊𐴠, ”𐴁𐴠𐴐𐴡𐴥𐴑, 𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴇𐴠𐴥 𐴕𐴡𐴁𐴞.“41𐴀𐴝𐴌 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴀𐴞𐴁𐴝𐴤 𐴀𐴡𐴥𐴙𐴓𐴊𐴠 𐴔𐴡𐴀𐴏𐴞𐴤.“𐴀𐴝𐴌𐴡𐴤 𐴇𐴡𐴊𐴟𐴥𐴕𐴠 𐴈𐴡𐴀𐴌 𐴊𐴠, ”𐴔𐴡𐴀𐴏𐴞𐴤 𐴑𐴞𐴥 𐴒𐴝𐴓𐴞𐴓𐴡𐴃𐴧𐴟 𐴀𐴝𐴘𐴁𐴡𐴤 𐴕𐴠𐴥؟42𐴂𐴝𐴑-𐴑𐴝𐴓𐴝𐴔𐴡𐴃𐴢 𐴑𐴞 𐴀𐴠𐴕𐴊𐴞𐴓𐴧𐴝 𐴕𐴝𐴥𐴘, 𐴔𐴡𐴀𐴏𐴞𐴤 𐴊𐴝𐴖𐴟𐴊𐴡𐴌 𐴕𐴡𐴏𐴡𐴥𐴓𐴡𐴃𐴧𐴟 𐴀𐴠𐴊𐴧𐴠 𐴊𐴝𐴖𐴟𐴊𐴢 𐴃𐴝𐴥𐴑𐴠 𐴊𐴠 𐴁𐴠𐴃𐴠𐴥𐴓𐴈𐴠𐴔 𐴉𐴝𐴌𐴝𐴃𐴧𐴟 𐴀𐴝𐴘𐴁𐴡𐴤 𐴁𐴡𐴥𐴓𐴞؟“43𐴇𐴠𐴥𐴕𐴊𐴞𐴓𐴧𐴝, 𐴀𐴞𐴏𐴝𐴤𐴌 𐴎𐴡𐴌𐴞𐴘𐴝 𐴔𐴝𐴕𐴟𐴥𐴙𐴐𐴢 𐴀𐴡𐴥𐴑𐴧𐴡𐴓𐴡𐴌 𐴁𐴟𐴥𐴃𐴡𐴌𐴠 𐴉𐴝𐴀𐴄𐴝-𐴉𐴝𐴀𐴄𐴞 𐴉𐴡𐴘𐴊𐴝 𐴀𐴡𐴥𐴘𐴒𐴞𐴘𐴡𐴘.44𐴀𐴞𐴥𐴃𐴝𐴌𐴝𐴌 𐴁𐴟𐴥𐴃𐴡𐴃𐴧𐴟 𐴇𐴡𐴊𐴟𐴥𐴕𐴠 𐴀𐴞𐴥𐴁𐴝𐴌𐴠 𐴊𐴡𐴥𐴌𐴞 𐴁𐴡𐴓𐴧𐴝 𐴏𐴝𐴘𐴧𐴠𐴥, 𐴔𐴡𐴕𐴃𐴡𐴌 𐴇𐴡𐴕𐴡𐴤𐴑𐴞𐴘𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴝𐴥𐴃𐴢 𐴕𐴡𐴥 𐴓𐴝𐴒𐴝.
𐴘𐴡𐴇𐴟𐴥𐴊𐴞𐴌 𐴕𐴠𐴃𐴝 𐴀𐴡𐴥𐴑𐴧𐴡𐴓𐴡𐴌 𐴕𐴝𐴁𐴞𐴐𐴧𐴝𐴥𐴐𐴢
45𐴃𐴝𐴌𐴉𐴡𐴌𐴠 𐴉𐴝𐴀𐴌𐴝𐴊𐴝𐴌 𐴒𐴟𐴥𐴕 𐴋𐴡𐴣𐴀𐴌 𐴀𐴞𐴔𐴝𐴔 𐴀𐴠𐴊𐴧𐴠 𐴉𐴠𐴥𐴌𐴡𐴐𐴞 𐴀𐴡𐴥𐴑𐴧𐴡𐴓𐴡𐴌 𐴇𐴝𐴣𐴏𐴠 𐴖𐴝𐴦𐴉𐴠𐴏𐴢 𐴀𐴝𐴙𐴐𐴧𐴠𐴥. 𐴃𐴝𐴌𐴝𐴥 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠, ”𐴃𐴟𐴣𐴀𐴝𐴥𐴌𐴝 𐴀𐴞𐴥𐴁𐴝𐴌𐴠 𐴕𐴡𐴥 𐴑𐴞𐴘𐴝𐴥 𐴀𐴝𐴕𐴡𐴤؟“46𐴉𐴝𐴀𐴌𐴝𐴊𐴝𐴌 𐴒𐴟𐴥𐴕𐴠 𐴎𐴟𐴖𐴝𐴁𐴢 𐴊𐴠𐴌 𐴊𐴠, ”𐴇𐴠𐴥 𐴔𐴝𐴕𐴟𐴥𐴙𐴐𐴧𐴗𐴝𐴌 𐴋𐴡𐴥𐴙𐴓𐴧𐴝 𐴒𐴡𐴥𐴌𐴞 𐴇𐴡𐴕𐴡𐴤𐴑𐴞𐴘𐴠 𐴇𐴡𐴕𐴡𐴤 𐴀𐴡𐴑𐴃𐴡𐴥𐴃𐴢 𐴈𐴡𐴃𐴝𐴤 𐴈𐴡𐴘𐴧𐴠𐴥 𐴊𐴠 𐴕𐴝𐴥𐴘.“47𐴉𐴠𐴥𐴌𐴡𐴐𐴞 𐴒𐴟𐴥𐴕𐴠 𐴈𐴡𐴀𐴌 𐴊𐴠, ”𐴃𐴟𐴣𐴀𐴝𐴥𐴌𐴝𐴌𐴠 𐴘𐴡𐴥 𐴇𐴡𐴥𐴕𐴡 𐴒𐴡𐴓𐴧𐴡𐴃𐴡𐴃𐴢 𐴓𐴡𐴘𐴒𐴞𐴘𐴡𐴥𐴘 𐴕𐴠𐴥؟48𐴇𐴡𐴕𐴡𐴤 𐴏𐴡𐴥𐴊𐴧𐴝𐴌𐴠 𐴘𐴝𐴥 𐴉𐴠𐴥𐴌𐴡𐴐𐴞𐴘𐴠 𐴀𐴞𐴥𐴁𐴝𐴌 𐴖𐴡𐴌𐴠 𐴀𐴞𐴔𐴝𐴕 𐴀𐴝𐴙𐴕𐴧𐴠𐴤 𐴊𐴠 𐴀𐴝𐴏𐴠𐴤 𐴕𐴠𐴥؟49𐴔𐴡𐴕𐴃𐴡𐴌 𐴇𐴠𐴥 𐴀𐴝𐴖𐴝𐴔 𐴀𐴡𐴥𐴑𐴧𐴡𐴓𐴠 𐴃𐴡 𐴐𐴡𐴥𐴌𐴞𐴘𐴡𐴃𐴢 𐴕𐴡 𐴎𐴝𐴕𐴠. 𐴀𐴞𐴥𐴃𐴝𐴌𐴝𐴌 𐴖𐴡𐴌𐴠 𐴓𐴝𐴀𐴕𐴡𐴃𐴢 𐴀𐴝𐴏𐴠𐴤.“50𐴇𐴠𐴥 𐴉𐴠𐴥𐴌𐴡𐴐𐴞 𐴒𐴟𐴥𐴕𐴡𐴌 𐴁𐴟𐴥𐴃𐴡𐴌𐴠 𐴕𐴞𐴑𐴡𐴥𐴊𐴠𐴔𐴝𐴏𐴢 𐴀𐴡𐴥 𐴀𐴝𐴏𐴠𐴤, 𐴎𐴞𐴁𐴝𐴤 𐴘𐴝𐴥𐴌 𐴀𐴝𐴒𐴠 𐴀𐴞𐴏𐴝𐴤𐴌 𐴇𐴝𐴣𐴏𐴠 𐴒𐴞𐴀𐴓𐴢. 𐴘𐴡𐴥𐴒𐴧𐴗𐴝𐴘𐴠 𐴀𐴞𐴥𐴃𐴝𐴌𐴝𐴃𐴧𐴟 𐴉𐴟𐴏𐴝𐴥𐴌 𐴒𐴡𐴌𐴠𐴥𐴌 𐴊𐴠,51”𐴇𐴡𐴕𐴡𐴤 𐴔𐴝𐴕𐴟𐴥𐴙𐴐𐴡𐴌 𐴔𐴟𐴑𐴡𐴃𐴧𐴟 𐴕𐴡𐴥 𐴉𐴟𐴥𐴙𐴕𐴃𐴠 𐴀𐴝𐴦𐴌 𐴀𐴞𐴥𐴃𐴠 𐴑𐴞𐴦 𐴒𐴡𐴙𐴅𐴧𐴠𐴥 𐴊𐴠 𐴇𐴞𐴥𐴘𐴝𐴕 𐴕𐴡𐴥 𐴎𐴝𐴙𐴕𐴃𐴠, 𐴀𐴞𐴥𐴃𐴝𐴌 𐴈𐴡𐴏𐴟𐴥𐴌 𐴊𐴡𐴥𐴌𐴞 𐴁𐴡𐴓𐴧𐴝 𐴑𐴞𐴥 𐴀𐴝𐴣𐴀𐴌𐴝𐴌 𐴐𐴡𐴥𐴌𐴞𐴘𐴡𐴃𐴡𐴃𐴢 𐴀𐴝𐴏𐴠𐴤؟“52𐴀𐴞𐴥𐴃𐴝𐴌𐴝 𐴘𐴡𐴥𐴒𐴧𐴗𐴝𐴌𐴠 𐴎𐴟𐴖𐴝𐴁𐴠 𐴈𐴡𐴀𐴌 𐴊𐴠, ”𐴃𐴟𐴀𐴛 𐴘𐴡𐴥 𐴑𐴞𐴥 𐴒𐴝𐴓𐴞𐴓𐴡𐴌 𐴔𐴝𐴕𐴟𐴥𐴙𐴐؟ 𐴂𐴝𐴑-𐴑𐴝𐴓𐴝𐴔 𐴃𐴝𐴇𐴝𐴥𐴑𐴞𐴃𐴢 𐴒𐴡𐴌𐴞𐴥 𐴏𐴡𐴀, 𐴒𐴝𐴓𐴞𐴓𐴡𐴃𐴧𐴟 𐴇𐴡𐴕𐴡𐴤 𐴕𐴡𐴁𐴞 𐴕𐴟𐴥 𐴀𐴝𐴘𐴧𐴠𐴤.“53𐴁𐴝𐴦𐴊𐴠 𐴉𐴡𐴃𐴧𐴞𐴥 𐴎𐴡𐴕 𐴎𐴝𐴌-𐴎𐴝𐴌 𐴒𐴡𐴥𐴌𐴡𐴃𐴢 𐴃𐴠𐴦-𐴃𐴠𐴦 𐴒𐴞𐴦𐴘𐴡𐴥𐴘.The Word for the World International