Engungwel6
Onyiɔɔn b'ãbwel ãsɛɛn m'ɛ̃kwel
1Ke mbee oŋɔ̃, mɛ̃ mwɛn k'enyiɔɔn Muaan-emɛmɛɛ̃ bwel li ɛ̃kwel onse ãbwel ãnge-nsiaan. Mɛ̃ bu ngyoo eluɔ ki ɛ̃kwel onse eluɔ bvi mwiĩ enge-enã eyɛɛn me nkii yi kokɔ onge nzyel ndiri: «Ya!»2Mɛ̃ bu mwɛn Swebval wa fuu. Wu ánɔɔn nkal a ndɛ ásiin ndaan. Awi ndɛ ekɔrɔ ki awa wu obvel mpɛn. Ndɛ bu ayɛn me ndɔɔ yɛn ndɛ obvel mpɛn, bvool me ndɔɔ yi abvel mpɛn bvool.3Ŋ'enyiɔɔn ndɛ bwel li mbuaal, mɛ̃ ngyoo eluɔ ki mwiĩ ki bviaal eyɛɛn ndiri: «Ya!»4Swebval ɔ̃kyam wa bɛ onge mbaa bu apal. Awi wu ánɔɔn nkal a ndɛ okwɛn b'ambaal opi me nsie, kwɛn baal atiɛɛn bakyɛ ãbwel. Awi ndɛ epwel kyam ki enɛn.5Ŋ'enyiɔɔn ndɛ bwel li ãtyel, mɛ̃ ngyoo eluɔ ki mwiĩ ki etyel eyɛɛn ndiri: «Ya!» Mɛ̃ bu mwɛn swebval wa pi. Wu ánɔɔn nkal a ndɛ ásiin eluɔ ki akie olyam onse kuɔɔl.6Mɛ̃ ngyoo eluɔ kyɛn onge nkii eyɛɛn kal-a-kal eluɔ bvi mwiĩ enge-enã ndiri: «Kilo ngɔmɔ̃ wa bele me ndɔɔ a furu li ɔ̃sal wa tsoo ngelemɔ̃, akilo atyel ba ɔɔdze me ndɔɔ a furu li ɔ̃sal wa tsoo ngelemɔ̃. Me b'otal mbaal ye mbal ã bvine, oyɛɛ ke biil mɔ̃ wɛ.»7Ŋ'enyiɔɔn ndɛ bwel li ãnã, mɛ̃ ngyoo nkii a eluɔ ki mwiĩ ki enã eyɛɛn ndiri: «Ya!»8Mɛ̃ bu mwɛn swebval wɛn onge ãdza ã ngakuo. Wu ánɔɔn nkal a ndɛ, nkuun Epfu. Ola o b'ákwi-ákwi ókenɔɔn a ndɛ. Awi bɔ omfam nkal etswi e nsie ngemɔ̃ onse etswi enã bvi ɔ̃kiri a nsie, me ndɔɔ yi abam baal m'epwel, m'ɔ̃lɔɔ, m'ãluu m'ãbi-ãbi, bvool m'anyam a mpuru ba nsie.9Ŋ'enyiɔɔn ndɛ bwel li ãtaan, ke nsɛn a nkiin yi awa Nziã ãkab, mɛ̃ mwɛn ɛ̃fel ɛ̃ b'áwi nsoo me ndɔɔ Endɔɔ e Nziã bvool me ndɔɔ otsweel b'étsweel bɔ.10Bɔ abiool kokɔ ndiri: «Mfam wu ɔ̃nsensal bvool wa taa-taa, yɛ akiaal tiil mpuanki m'otsiil b'ãndɔɔ ã baal a nsie, bvool awa etumbu m'ãkel ã bee m'étsal bɔ?»11Awi ngɔmɔ̃-ngɔmɔ̃ onse bɔ ɔ̃nkuru wa fuu, bvool ayɛɛn bɔ ndiri awuun kɛn ãlio ke kwɛ, tiil ye k'ekoo ɔ̃bvɛn a b'ali andoo a bɔ b'ɔ̃sal ye baan-ngoo a bɔ b'akieel abam onge b'ábam bɔ.12Etal me mwɛn mɛ̃ ŋ'enyiɔɔn ndɛ bwel li ãsɛɛn: Nsie enziool yam kokɔ. Tal eyii pii kob onge ekɔ e mpiri, bvool nswii wueel oyii bɛ onge ãkel.13Angam-a-ngam afi ywel ayiool me nsie, onge b'etsuaal ɔ̃ti a fig afig ŋ'enziool mfel wa kokɔ ndɛ.14Ywel edzuru nzuru onge ɔ̃kaan wu afuru m'ofuru, bvool ambaal ãnkio mbueel y'esanga k'ãmboo ã mɔ̃.15Akwɛn b'ɔ̃kiri, baal b'anɛn, ambiri b'ambwel-mbwel, apfel, awaan, baal b'asiil bueel, ankyal wuo baal ba ndii, ayedziɔɔn onse ãywɛn m'onse ãnkɔɔn bvool onse ãnkɔɔn m'ãnɛn m'onse ãnkio.16Bɔ ákeliaal ãnkio y'ãnkɔɔn m'ãnɛn ndiri: «Ebva nkal a bee, ekwɛɛ bee lala ye wu obvi nsɛn nkal a kiri li okwɛn, bvool lala ye mpuru a Muaan-emɛmɛɛ̃.17Ngwanyã, tsoo li nɛn li mpuru a bɔ emeekoo, wɛn ol'otɛɛn ɔ̃kiri nã?»Wycliffe Bible Translators, Inc.