Read Engungwel 5

Engungwel5

Ɔ̃nkaan wu atsɔɔn ãbwel bwɛn a Muaan a emɛmɛɛ̃

¹Mɛ̃ mwɛn ɔ̃nkaan onse kuɔɔl ki elam e wu áli me nsɛn nkal a kiri li okwɛn. Ɔ̃nkaan ondɛ ákel onse mwiĩ y'onkwel-a-nzi, bvool átsɔɔn ndɛ ãbwel nsiaan.²Mɛ̃ mwɛn hɛ̃ ãnzwel ngãmɔ̃ mã ye waan m'ã́kebiool me nkii yi kokɔ ndiri: «Wu obvaan m'onyiɔɔn b'ãbwel y'odzweel b'ɔ̃nkaan nã?»³Kɛn a mbuul si ngɔmɔ̃, ekal ke ywel, ekal me nsie, ekal ke nsɛn a nsie, k'akoo k'adzweel ɔ̃nkaan wɛ, onkyam k'atal ndɛ.⁴Mɛ̃ bu bvi olel bibi, me ndɔɔ yɛn mbuul si ngɔmɔ̃ wu ábvaan m'odzweel o ndɛ, onkyam m'otal o ndɛ, k'adzuul wɛ.⁵Kɛn a ngɔmɔ̃ onse ekukwel olieel mɛ̃ bubu: «Bee olel. Tal, eli ye wu obvel mpɛn. Ndɛ ondɛ ebob ki yam li Yuda, wa yam li ɔ̃kwɛn David. Ndɛ wu obvaan m'onyiɔɔn b'ãbwel ãnge-nsiaan y'odzweel b'ɔ̃nkaan.»⁶Mɛ̃ bu mwɛn muaan-emɛmɛɛ̃ tɛ, kal-a-kal a kiri li okwɛn. Eluɔ bvi mwiĩ enge-enã y'ekukwel edzii ndɛ. Ndɛ áli onge wu áwi kab. Ndɛ áli y'ãnsiɛɛn nsiaan, ye mviil hɛ̃ nsiaan, m'ãli ɛ̃fel nsiaan mi Nziã mi áyuɔɔl me nsie yueel.⁷Muaan-Emɛmɛɛ̃ okyɛ oyewal ɔ̃nkaan me kuɔɔl ki elam e wu áli me nsɛn nkal a kiri li okwɛn.⁸Ŋ'ewel Muaan-emɛmɛɛ̃ ɔ̃nkaan, eluɔ bvi mwiĩ enge-enã y'ekukwel ãku-mbuaal y'enã (24) ebvi ãbuo ke nkwel a ndɛ. Ngemɔ̃-ngemɔ̃ onse bvɛ esiin nguɔ̃ y'asaan ba me ɔɔl, b'ãluul m'ɔ̃ywiri, wu oli ãbuɛɛn ã ba ngel.⁹Bvɛ eyam nziĩ yi nyiɔɔn ndiri:«Yɛ bvaan m'owal b'ɔ̃nkaan, bvool m'onyiɔɔn o ndɛ ãbwel.Ke ngwel wɛ, áwi yɛ onge kab. Obobɔ, yɛ ásuun ãyam mbueel, y'ɛ̃nywã mvieel, ye baal b'ãyam mbueel, y'ɛ̃kiri mvieel.Yɛ ásuun bɔ m'ãkel a yɛ, me ndɔɔ a Nziã.¹⁰
Yɛ si kwɛn bɔ akal baal b'okwɛn o Nziã, akal angaa-a-Nziã b'asal me ndɔɔ a Nziã a bia-byɛ,bvool bɔ akal y'okwɛn nkal ɔ̃kiri.»

¹¹Mɛ̃ ntal, bvool ngyoo nkii a ãnzwel bibi m'ãdzii kiri li okwɛn, ye yi eluɔ bvi mwiĩ, ye yi ekukwel. Ɔ̃bvɛn a bɔ áli amiil bibi.¹²Bɔ ákeyam bam kokɔ ndiri:«Muaan-emɛmɛɛ̃ wu áwi kab obvaan kwɛn awa ndɛwaan, opfel, ãyal,mpɛn, dzuun, lweel, y'ãtuɛɛn.»

¹³Mɛ̃ ngyoo eluɔ bvieel bvi ési Nziã bvi ke ywel, bvi me nsie, bvi ke nsɛn a nsie, bvi nkal ãdza m'ɔ̃ngwa ye bvi onse mɔ̃, bvɛ ékeyam bubu:«Yɔɔl kwɛn ãtuɛɛn, dzuun, lweel, y'omfam,ekal ɔ̃bu,ola wu oli me nsɛn nkal a kiri li okwɛn, bvool ola Muaan-emɛmɛɛ̃!»

¹⁴Oŋɔ̃ eluɔ bvi mwiĩ enge-enã eyɛɛn ndiri: «Amɛn!» Oŋɔ̃ ekukwel ebvi ãbuo m'obuɛɛn.

Wycliffe Bible Translators, Inc.

https://app.library.bible/content/3840a1950e7b8532