Read Engungwel 7

Engungwel7

Asi baal a Nziã eliĩ

¹Ke mbee oŋɔ̃, mɛ̃ mwɛn ãnzwel ãnã m'ɔ̃kiri k'ɛ̃soo ɛ̃ nsie ɛ̃nge-ɛ̃nã mi ɔ̃kiri a nsie. Mɔ̃ ãkekuru amfel anã b'ɔ̃kiri a nsie, kwɛn mfel si ngɔmɔ̃ abee opob, ekal me nsie, ekal m'ãdza m'ɔ̃ngwa, ekal nkal ɔ̃ti onkyam ngɔmɔ̃.²Mɛ̃ mwɛn hɛ̃ ãnzwel ngãmɔ̃ ãkyam ã́fi k'etswi ki epal tal, bvool ã́siin eliĩ e Nziã wa mwiĩ. Mɔ̃ ãbiool me nkii yi kokɔ ol'ãnzwel ãnã m'áwi waan li asa nsie y'ãdza m'ɔ̃ngwa obi me nkii, ndiri:³«Ebee nsie obi osa, ekal ãdza m'ɔ̃ngwa, ekal ɛ̃ti, tiil ye k'esa bia-byɛ eliĩ m'ãmbwii m'asal a Nziã a bia-byɛ.»⁴Mɛ̃ hɛ̃ ngyoo ɔ̃bvɛn a baal b'ési ãnzwel eliĩ. Bɔ áli amiil ɔ̃nkam y'ãku-ãnã y'anã (144.000) m'ãyam mbueel m'Afi-Isalayel.⁵Baal ba yam li Yuda áli amiil kuun ye buaal (12.000) bɛn ási bɔ eliĩ. Ba yam li Lubɛn áli amiil kuun ye buaal (12.000). Ba yam li Gad áli amiil kuun ye buaal (12.000).⁶Ba yam li Asɛɛl áli amiil kuun ye buaal (12.000). Ba yam li Nefitali áli amiil kuun ye buaal (12.000). Ba yam li Manase áli amiil kuun ye buaal (12.000).⁷Ba yam li Simehɔ̃ áli amiil kuun ye buaal (12.000). Ba yam li Lebvi áli amiil kuun ye buaal (12.000). Ba yam li Isakaal áli amiil kuun ye buaal (12.000).⁸Ba yam li Dzabulɔ̃ áli amiil kuun ye buaal (12.000). Ba yam li Dzedzef áli amiil kuun ye buaal (12.000). Ba yam li Bɛnzamɛ̃ áli amiil kuun ye buaal (12.000). Ási bɔ bueel eliĩ.

Embuul kyɛn k'akoo k'atsiɔ wɛ ke nkwel a kiri li okwɛn

⁹Ke mbee a ãndɔɔ omɔ̃, mɛ̃ mwɛn embuul e baal ki kokɔ kyɛn mbuul si ngɔmɔ̃ k'akoo m'otsiɔ wɛ. Éli embuul ki ɔ̃kiri wueel, ki ãyam ã baal mbueel, ki ãsel mbueel, ye ki ɛ̃nywã mvieel. Bɔ áli ke nkwel a kiri li okwɛn bvool ke nkwel a Muaan-emɛmɛɛ̃. Bɔ álaal ɛ̃nkuru mi afuu-fuu, ásiin nsuɛɛn yi ãba me mviɔɔl.¹⁰Bɔ ákebiool kokɔ ndiri:«Obvuul oli me Nziã a bia-byɛ wu bvi nsɛn nkal a kiri li okwɛn, bvool me Muaan-emɛmɛɛ̃!»

¹¹Ãnzwel mbueel ã́dzii kiri li okwɛn, y'ekukwel y'eluɔ bvi mwiĩ enge-enã. Bɔ abvi ãbuo mbwii me nsie ke nkwel a kiri li okwɛn, ãlweel Nziã.¹²Bɔ ayɛɛn bubu:«Amɛn! Yɔɔl kwɛn ãtuɛɛn, lweel, ãyal, obveel b'ãtuɛɛn, dzuun, waan, ye mpɛn, ekal bvi Nziã a bia-byɛ ɔ̃bu! Amɛn!»

¹³Obobɔ, ngɔmɔ̃ onse ekukwel ofuul mɛ̃ ndiri: «Baal b'alaal ɛ̃nkuru mi afuu-fuu ba, anã ali? Bɔ kwɛn afi?»¹⁴Mɛ̃ mveel ndɛ wɛn: «Mfam a mɛ̃, yam mbuul wu yɛɛ!» Ndɛ bu alieel mɛ̃ ndiri: «Eli baal b'apal onse fool li bibi. Bɔ asuɔɔl ɛ̃nkuru ɛ̃ bɔ, asuul myɛ̃ eyii fuu m'ãkel ã Muaan-emɛmɛɛ̃.¹⁵Obɔ otsɛn b'eli bɔ ke nkwel a kiri li okwɛn e Nziã, me ndɔɔ yi asal me ndɔɔ a ndɛ tsia mwiĩ, onse Nzɔ a ndɛ. Wu oli me nsɛn nkal a kiri li okwɛn akieel akwɛɛ bɔ onse Nzɔ a ndɛ.¹⁶Bɔ kieel k'ayoo nzal bvool wɛ, k'ayoo nzuaal bvool wɛ. Obal o mwiĩ y'otsuru o mbaa kieel k'obetuaal bɔ fool bvool wɛ.¹⁷Ke ngwel wɛ, Muaan-emɛmɛɛ̃ wu oli kal-a-kal a kiri li okwɛn akieel akal ɔ̃mbuaal a bɔ, bvool abiri bɔ k'ɛ̃tswɛ mi amvieel b'elaã, bvool Nziã akieel akiɔɔn ãnsia mbueel me mviil ã bɔ.»

Wycliffe Bible Translators, Inc.

https://app.library.bible/content/3840a1950e7b8532