Uown Thawp44
Tai bia tama mih
1Nami kung kowi aia kowh kim mingkhet mih kowi Josef peah ana mih, “Amatni ia kur mowr chi sala kowi chua pe chakkham diah, now amatni chowlowkkow kowh tangka amatni kowh sala mowr kowi krawi phangta pe diah.2Now lang sawi mih sala mowr kowi dow ang kowh tai bia hai aia ranla chakkham mih tangka paw krawi phang pe diah,” pakhai. Nami kim mingkhet mih dow Josef tek pe iawng chang khai.3Auai rau dow murpa atainau-uüa kowi kawrngaramchük hown amatni pren prakowi chinta khai bowt.4Now atainau-uüa marow hownia lawt kowh cham ting sangrumchow taih tak khe aia kowh kim mingkhet mih kowi Josef tek pe mih, “Alenma kowbüah kowi kowkowi krawi diah. Kowbüah kowi en kowkrum khe maiawng kowtek pe diah, ‘Chang enni aiung mih takcha tawngplawng kowchow enni tuk changla angak khai?5Nami bia dow ang kowh kim iah khamla reng mih hai müla hawra reng mih lownow. Naiawng mih lup enni chang mih dow lainowmma enni chang angak mih chekhai,’ pape diah,” pakhai.6Nami kim mingkhet mih kowbüah kowi tiama rawng kowi kowkrumta hanow nami laiklow dow kowtek pe khai.7Nachenganchepaw kowbüah tek pe mih, “Chakramang, tawng naiawng mih laiklow en tuk tek anging khai chow? En kowh naruüa naiawng mih lup mapaw chang dowi chekhai.8Sünta diah, uang rik uang khe kowh anging kowh sala mowr kowi kaah mih tangka khowm padow Kanan pren hownia anging uang plan pawla khai. Now tawngplawng kowchow en kowh kim iah kim hownia anging nauang kula kuh tai chow?9En kowh naruüa pungmadawng kowi amia iawng mih tut-e chow nami bia ka khai, nami maru kowi pacham kowngta lah, nahanow anging paw en nar iawng hai natawi uowi kown towbowt,” pakhai.10Nami kim mingkhet mih tek pe mih, “Lainowmma iung, enni tek iawng ang chang enni kown taih. Nachenganchepaw amia iawng mih tut-e chow nami bia ka khai nami maru chowtaih ang kowh nar nachowng kown. Akeng miuüa dow nami aprek tawi ka dowi tham,” pape khai.11Nahanow amatni dow amatni chowlowkkow kowh sala alenma krawng kowi iu kla büah hanow lat büah khai.12Nami kim mingkhet mih dow ata mih kowh sala hownia uownah hanow asawi mih kowh sala mowr krawi cham khai. Now Benjamin kowh sala kowi nami bia kata khai.13Nami khita hanow ataimowuüa mih saktuak piak kowh amatni kowh kowrmow sekta büah khai. Nahanow amatni dow amatni chowlowkkow kowh sala kawrngaramchük luk kowi tangla büah now marow prakowi plan kowi büah khai.14Juda hai atainau-uüa Josef kim kowi kowting mih khin khe Josef mih kim kowi hawt uowi reng tak chekhai. Now amatni dow krawng kowi tabawkah krawm se Josef kowi kowchupah khai.15Nakhowk khe Josef tek pe atainau-uüa mih, “Tawngplawng kowchow naiawng mih lup enni tuk chang khai? Ang iawng mih maru tuk mü hawra ching pami enni tuk dowi bow?” pakhai.16Juda tek pe mih, “Chakramang, tawng chow anging tek en bowt kown chow? Tawng iawng chow anging klang en bowt kown chow? Anging achi anawmma pami paw tawng iawng chow anging tüng en bowt kown chow? En kowh naruüa kowh aprek dow Thurai uang tüng pe khai bowt. Naiawng rakowi ka pe bia mih maru hailawm anging bowkbowk nachowng en kowh nar kown towbowt,” pakhai.17Nachenganchepaw Josef tek pe mih, “Naiawng mih lup dow mapaw ang ia chang dowi. Amia tut-e chow nami bia ka mih nami chowtaih ang kowh nar nachowng kown. Tawkche enni dow thaulangma hown enni kowh pa tut-e kowplan büa diah,” pakhai.18Nakhowk khe Josef tut-e kowtatawnah hanow Juda tek pe mih, “Chakramang, sakrauma hai en hown pe taklang ang diah. En kowh arah dow Faraw kowh arah hown tale. Nachenganchepaw mami en kowh nar luk kowi hauang kunmarau diah.19Chakramang, anging uang rik uang khe en lünta anging mih, ‘Enni kowh pa sing uowi sak uowi reng tak bow? Enni taichow nauchow uowi ne tak bow?’ pakhai.20Nakhowk khe anging tek en mih, ‘Anging kowh pa lawngtang sing uowi sak uowi reng tak, now lawngtang pra kowh aia kaah mih chapa paw uowi lowk ia. Ataimow dow kowng khai bowt, now amatchi amachak kowi ta sing mih dow aia malowkchow towbowt. Naiawng rakowi apa mih aia kowi lainowmma sakrauah khai,’ pakhai.21“Nakhowk khe en tek anging mih, ‘Aia kowi ang tut-e uang pawla büa diah; aia kowi khi kown ang nau,’ pakhai.22Now anging tek en mih, ‘Aia dow a-pa kowi towla hanow uang ia tawi dowi tham. Aia che uang tawi now a-pa mih ta kowng kown towbowt,’ pakhai.23Nachenganchepaw en tek anging mih, ‘Enni kowh naumow kowi enni uang pawla dowi now ang pur kowi hauang büah tham bowt,’ pakhai.24Naiawng rakowi anging kowmang now en kowh nar apa kowi en kowh laiklow maten anging kowlawp pe khai.25“Nami kung kowi anging kowh pa tek anging mih, ‘Kowplan kowi büah hanow kowran a-i chakkham büah ne iawk diah,’ pakhai.26Nakhowk khe anging tek pe mih, ‘Anging kowh naumow anging hown tawi khe chiang anging kowkowi kown. Naiawng nadowi now anging kowia kowi dowi bowt tham. Anging kowh naumow anging hown tawi dowi now nami maru pur kowi anging kowia kowi dowi bowt,’ pakhai.27“Nakhowk khe en kowh nar anging kowh pa tek anging mih, ‘Ang masi Rahel penla ang chapa pre iachow taih mih enni tuk khowk.28Akat khe lowk ia mih dow ang pur hownia cham lawt khai, now akung kowi kaurawng uaramchak cham cha cham iaita naknak pami ang ta tuk khai. Nami hownia aia kowi katpaw ang khi dowi bowt.29Kawmat mami asawi mih kowi paw ang hownia enni cham pawla kowh cham kla phih khai hanow mami lawngtang kowi aprüa anguk hown enni nakowngta kown towbowt,’ padow tek anging khai.30“Naiawng rakowi chakramang, en kowh nar apa tut-e anging kowplan khe nami asawi mih kowi apa hawt khi dowi now apa nakowng kown towbowt. Nami asawi mih dow apa kowh sakrui iawng chekhai. Nahanow en kowh nar anging kowh pa lawngtangma mih kowi aprüa anguk hown anging nakowngta kown chekhai.32En kowh nar ang dow apa tut-e nami vüi kowi ang takhamla khai, ‘Apa, aia kowi che en tut-e ang uang plan pawla en dowi now nami aprek dow ang tut-e achowngma pauowi lah,’ ang pape khai.33Naiawng rakowi chakramang, sakrauma hown nami asawi mih takcha ang kowi phai changla ang en kowh nar diah, now nami asawi mih kowi ataimowuüa hown pe tawi mangah diah.34Nami asawi mih kowi pawla dowi matchang tawng iawng chow apa tut-e ang nakowplanah kown chow? Apa luk kowi kowh prüa ngukra nauang ting kown mih ang nowng mü dowi tham,” pape khai.The Seed Company