Uown Thawp45
Atainau-uüa kowi Josef lawtah mih
1Now Josef dow aia pur kowi kowh iowng miuüa re-e nowng taüp dowi bowt. Naiawng rakowi aia dow atünma tek mih, “Ang pur hownia lawt büah bowk diah,” pakhai. Naiawng rakowi aia pur kowi kowh iowng miuüa dow lawt büah bowk khai. Nahanow aia dow atainau-uüa pur kowi taphuang khai bowt.2Josef dow atünma kar khai. Nami aia kowh kar klow dow Aigupta maru-uüa tawi ta khai. Nami satang dow Faraw kim kowi kowh maru-uüa paw tawi ta khai.3Atainau-uüa kowi Josef tek pe mih, “Ang mih enni kowh tainau Josef chowbowt. Kawmat paw apa sing uowi reng tak bow?” pakhai. Nahanow atainau-uüa dow nami laiklow tata hanow kram kowh chür büah khai; naiawng rakowi amatni dow Josef kowi hing nowng klangah büah dowi chekhai.4Nakhowk khe atainau-uüa kowi Josef tek pe mih, “Sakrauma hown ang re-e uang tatawn büa diah,” pakhai. Now amatni kowtatawn hanow Josef tek pe mih, “Aigupta pren kowi cham chang kun miuüa tut-e kowh enni sumah mih enni kowh tainau Josef ang chowbowt.5Enni sumta ang khai chenganchepaw hangkow tuak krat büa diah, now kowmatia luk kowi paw hangkow takunmarau büa diah. Maru kowh asak naplaila kownkow enni dowi rawn Thurai uang rik chin ang mih chekhai.6Khown kuak mih pre ningchow taih tak. Nami khown dow nakuak tanga ning tak. Nami khin khe liu paw nasawt kown nadowi, now ngen paw nangen kown nadowi.7Lusa kowi enni kowh krungchak kowi nape plaiah kownkow hai piakra hownia awdara uowima hown nalawng enni kownkow enni dowi rawn Thurai uang rik chin ang mih chekhai.8Naiawng rakowi makowi enni uang chin ang mih nadowi, uang chin ang mih dow Thurai chowtaih. Thurai dow Faraw pa kowh arah kowi tow ang khai, now Faraw kim kowi kowh aluchow thawp ang khai. Nami klen kowi aia dow Aigupta pren paprenma kowi kowh nakruitown kown mih kowi tow ang khai.9“Kawmat alenma apa tut-e kowkowi now kowtek pe büa diah, ‘En chapa Josef krawi tek mih: Thurai mih Aigupta pren paprenma kowi kowh nakruitown kown mih kowi tow ang khai. En mih kra dowi kowi ang tut-e uang diah.10Ang hown kowh atawnchow mih Gawsen süng kowi uang uowi diah. En hai en chauüa, en chu-uüa, en kowh tawncher hai ruapur hawmh hai en kowh uowi mih maten uang pawla diah.11Khown kuak kown mih uowi tanga ning tak. Naiawng rakowi Gawsen süng kowi uang uowi diah, nakowi ang naming nakhet en sow. En hai en kimchakuüa hai enni bowkbowk nakhawrla dowi kownkow ang kamrüt enni chakkham sow,’ pakhai,” pape diah.12“Naiawngün laiklow dow ang matia nawr hown kowh ang tekah mih enni matia mik hown enni khi bowk khowk, now ang naumow Benjamin paw tawi khi khowk chekhai.13Aigupta pren kowi ang kowh ringkawra hai enni khi-ah mih maten apa kowi kowtek pe ngengche büa diah. Kawmat lenlenma kowkowi now apa kowi makowi uang pawla büa diah,” pape khai.14Nami kung kowi dow Josef mih anaumow Benjamin kowi dawiah hanow kar khai, now Benjamin paw aia kowi dawiah hanow kar khai.15Nami kung kowi ataimowuüa bowkbowk kowi paw Josef dawiah now namah khai, now kowbüah kowi paw karah khai. Nami hownia now atainau-uüa dow aia hown taklang khai bowt.16Josef kowh tainau-uüa uang pe pami satang Faraw kim kowi kowting khai. Nami satang tata hanow Faraw hai aia kowh maru iukuüa paw lainowmma awmrawm khai.17Faraw tek pe Josef mih, “En kowh tainau-uüa kowi kowtek pe diah, amatni dow kawrngaramchük luk kowi tangla chakkham now Kanan pren kowi pacham mang lah.18Now amatni kowh pa hai amatni kowh kimchakuüa kowi pawla now en tut-e pauang lah. Aigupta pren kowi kowh lang iung mih süng en napeah kown mih hai mami pren kowi kowh chakkham lang iung mih amatni naka cha kown mih tek pe diah.19Nami klen kowi mami ana paw ang pe en khowk. En tainau-uüa kowi kowtek pe diah, amatni kowh masi hai ngeuüa sowmlowmchow miuüa kowi nauang pawla kownkow Aigupta pren hownia pacham pawla chia kari büah lah. Now amatni kowh pa kowi paw pauang pawla lah.20Amatni dow amatni kowh dawngthawnguan kowi hangkow pacham ngan lah. Tawngplawng kowchow panow Aigupta pren kowi kowh aiung aiungma mih uanh maten dow amatni kowh chekhai,” pape khai.21Now Israel kowh chapauüa dow naiawng chang khai bowt. Faraw kowh ana pek iawng Josef mih atainau-uüa kowi chia kari hai tiama rawng kowi kowh chakkham krawi kamrüt pe khai.22Josef mih ataimowuüa kowi krawi peah khupdip tawngklai aükchi chekhai. Nachenganchepaw anaumow Benjamin kowi dow khupdip tawngklai tanga ük hai tai 300 iun krawi peah khai.23Now a-pa vüi kawrngaramchükla hamüt pum hai kawrngaramchükma hamüt pum Josef krawi sa pe khai. Nami hamüt pum mih kawrngaramchükla luk kowi dow Aigupta pren kowi kowh aiung aiungma mih uanh krawi tang pe khai. Now hamüt pum mih kawrngaramchükma luk kowi dow cha hai kawm hown akeng mih chakkham krawi tang pe khai. Naiawngün dow a-pa uang tarü mih khin khe kowh tiama rawng kowi nacha nakhamah kown mih chekhai.24Naiawngün uanh maten krawi kamrüt pe hanow atainau-uüa kowi Josef chinta khai bowt. Atainau-uüa mang mih khin khe aia krawi tek pe mih, “Tiama rawng kowi hangkow tapring tanang büah ba,” pakhai.25Now Josef kowh tainau-uüa dow Aigupta pren hownia mang hanow Kanan pren kowi amatni kowh pa Jakawb tut-e kowtowm khai bowt.26A-pa kowi kowtek pe büah mih, “Kawmat paw Josef sing uowi reng tak. Aia dow Aigupta pren paprenma kowi kowh kruitown miia chekhai,” pape khai. Nami tata hanow Jakawb dow owm dowi rakowi amawlawma own khai.27Nachenganchepaw kowbüah kowi Josef krawi tek pe mih maten ta hai aia pawk müa chia kari Josef krawi sa pe mih khita hanow aia dow awmrawm kowh sak thowr khai.28Now Jakawb tek mih, “Na khowk, ang owm enni khowk. Ang chapa Josef sing uowi reng tak now na towbowt. Kowng dowi rawn aia kowi ang kowmüla akat tak,” pakhai.The Seed Company