Uown Thawp43
Benjamin kowi Aigupta pren kowi kowpawla mih
1Nami khown dow Kanan pren kowi uang lang hu ngamlam khai.2Now Aigupta pren hownia kowh Israel chapauüa uang pawla mih chakkham dow khowk khai bowt. Naiawng rakowi Israel tek pe achapauüa mih, “Aigupta pren kowi kowplan kowi büah hanow kowran a-i chakkham büa iawk diah,” pakhai. Israel dow Jakawb chekhai.3Nakhowk khe Juda tek pe a-pa mih, “Nami pren kruitown mih maru dow, ‘Enni kowh naumow kowi che enni uang pawla dowi now ang pur kowi hauang büah tham bowt,’ padow krawi tek anging napnap chekhai.4Naiawng rakowi en che anging kowh naumow kowi krawi chin anging hanow en vüi kowi anging kowia ran en chakkham kown taih.5Nachenganchepaw Benjamin kowi che en krawi chin anging dowi now anging paw kowkowi dowi bowt tham. Nami pren kruitown mih tek anging mih, ‘Enni kowh naumow kowi che enni uang pawla dowi now ang pur kowi hauang büah tham bowt,’ pakhai,” pape khai.6Nakhowk khe Israel tek pe mih, “Enni kowh naumow uowi lowk tak pami laiklow tawngplawng kowchow aia kowi enni kowtuk tek pe khai? Tawngplawng kowchow naiawng enni tuk chang ang khai?” pakhai.7Achapauüa tek pe mih, “Nami maru mih anging lawnguan hai a-i kimchak lawnguan kowi asipma lünta anging khai. Aia tek anging mih, ‘Kawmat paw enni kowh pa sing uowi reng tak bow? Enni taichow nauchow uowi ne tak bow?’ padow lünta anging khai. Nami maru lünta anging iawng anging klangah khai. Nakhowk khe aia tek anging mih, ‘Enni kowh naumow kowi uang pawla büa diah,’ pakhai. Naiawng aia natek anging kown mih amia chow tuk?” pabüah khai.8Nakhowk khe Juda tek pe a-pa mih, “Benjamin kowi krawi chin anging diah. Now alenma Aigupta pren kowi anging tarü kown towbowt. Nahanow en hai anging hown anging kowh chauüa paw nasing kown, nakowng kown nadowi.9Benjamin vüi kowi ang takham khowk. Aia rakowi en naia pe ang aprek kown. Aia kowi che en tut-e ang uang ia plan pawla en dowi now nami aprek mih ang tut-e achowngma pauowi lah.10Makhowt anging kra dowi e dow kawmat mowr kowi anging kowkowi kowh uang ia plan pre kat bowt,” pakhai.11Nakhowk khe a-pa Jakawb tek pe kowbüah mih, “Naiawng chekhai now maiawng chang büa diah. Enni kowh sala hown aia vüi pawla pe awmrawm sung ne diah. Mami pren kowi kowh asung khakma mih singh pun, kuai tui, nam iungma mih sau, nam iungma mih paingbawng hai madam chap maiow pawla pe büa diah.12Khaleng dow pre dungna chi pawla tangka büa diah. Tawngplawng kowchow panow sala mowr kowi kowh amatni uang krawi planta mih tangka paw enni naplanta pe kown takla. Naiawngün dow amatni tawi kowh uang krawi phangta mih tarawng.13Enni kowh naumow kowi pawla now nami maru tut-e alenma kowkowi büa diah.14Lowra nowngia chang mih Thurai dow enni kowi nasaksing sanala kown mih saktuak nami maru luk kowi pacham peah lah. Nahanow nami maru mih enni kowh tainau Simiawn hai Benjamin iüah kowi enni tut-e pacham lawt enni lah. Now ang kowh chah tama khai chepaw pacham tama lah towbowt,” pakhai.15Naiawng rakowi amatni dow naiawngün awmrawm sung, tangka pre dungna hai Benjamin kowi pawla hanow tarü khai bowt. Aigupta pren kowi kowtowm hanow Josef pur kowi kowiowng büah khai bowt.16Now Josef dow ataimowuüa hown Benjamin uang tawi mih khita khai. Aia dow aia kowh kim mingkhet mih kowi tek pe mih, “Naiawngün maru-uüa kowi ang kim kowi kowpawla diah. Now kowngen tawncher hanow koweng diah. Naiawngün maru-uüa mih ani dow ang hown taiua cha ni hawm kown,” pakhai.17Nahanow Josef tek iawng nami kim mingkhet mih dow chang khai. Aia dow nami maru-uüa kowi Josef kim kowi kowpawla khai bowt.18Naiawng Josef kim kowi pawla mih tuk büah hanow amatni dow kram kowh tatek mih, “Aia kim kowi pawla a-i mih dow uang rik uang khe kowh a-i kowh sala kowi uang krawi planta a-i mih tangka rakowi naown. Khaleng dow aia natüng a-i aprek hanow nakhüm a-i kown towbowt, now a-i kowh kawrngaramchük ün kür hown napawta a-i hanow a-i kowi dow nachangla a-i nar kown towbowt,” pabüah khai.19Naiawng rakowi amatni dow Josef kimplawt re-e kowtowm büah hanow kim mingkhet mih kowi tek pe mih,20“Chakramang, mami dowi rawn khe paw anging uang rik ran chakkham akat khowk.21Nachenganchepaw anging plan mang mih khin khe tanaira kowi anging uow sala hanow chowlowkkow sala mowr kowi tangka uowi bowk mih anging khi khai. Naiawngün tangka amia chow krawi phang mih anging tuk dowi chekhai. Naiawngün tangka paw kawmat anging uang plan pawla iawk khowk. Nami klen kowi naranla chakkham kown mih paw anging uang plan pawla tangka küng tak,” pabüah khai.23Nami kim mingkhet mih tek pe mih, “Hangkow kram büa diah, sakkhawtma hown uowi büa diah. Nami tangka dow enni hai enni pa kowh Thurai mih enni kowh sala kowi krawi phang enni mih chowbowt. Enni kowh tangka ang ka khowk,” pakhai. Now aia dow Simiawn kowi uang lawtla hanow amatni tut-e uang pawla pe khai.24Nami kung kowi dow aia mih amatni bowkbowk kowi Josef kim lak kowi kowpawla now peah tui khai, now amatni dow nami tui hown sau bawng sau pang büa khai. Aia dow kowbüah kowh kawrngaramchük ün kowi paw peah chakkham khai.25Sat downg khe Josef uang kown pami rakowi amatni dow amatni kowh awmrawm sung hawt kamrütta kaneu khai. Now amatni dow nakowi nacha hawm kown pami ta büah khai.26Kim kowi Josef uang mih khin khe dow amatni uang pawla mih awmrawm sung Josef kim lak kowi kowpawla hanow Josef kowi kowap pe büah khai. Amatni dow aia kowi krawng kowi tabawk krawm se chupah büah khai.27Amatni dow iung reng tak bow pami talünta büah kung kowi Josef lüntaah mih, “Enni tekah mih enni kowh pa alawngtangma pami iung reng tak chow? Aia dow kawmat paw sing uowi reng tak bow?” pape khai.28Amatni tek pe mih, “Anging kowh pa en kowh nar kawmat paw sing uowi reng tak, now iung paw iung reng tak chowh,” pabüah khai. Nahanow amatni dow krawng kowi tabawk krawm se Josef kowi chupah khai.29Josef mih krawi tang mü hanow anaumow Benjamin kowi khita khai. Now Josef tek pe ataimowuüa mih, “Nami chowbowt bow enni tekah mih enni kowh naumow?” pape khai. Nami kung kowi Josef tek pe Benjamin mih, “Thurai pacham saksing sana en reng lah,” pakhai.30Josef mih anaumow kowi khita hanow lainowmma sak prüa rau uang khai. Naiawng rakowi aia dow nacham kar kownkow nami hownia powt khai, now aia towklak kowi cham kar khai.31Nami kung kowi aia dow murta mowr prowng hanow uang lawt khai. Aia dow townta sak hanow aia kowh tainau-uüa kowi nathen pe hawm kan kown mih aia maru-uüa kowi peah ana khai.32Hawm then miuüa dow Josef hai atainau-uüa hown Josef kim kowi kowh tawi cha hawm mih Aigupta prenchakuüa kowi alang alangma then pe khai. Aigupta prenchakuüa dow Hebrai maru-uüa hown taiua cha hawm dowi chekhai. Tawngplawng kowchow panow nami dow amatni tut-e suiiaima chekhai.33Now Josef dow atainau-uüa kowi amatni kowh ning taken iawng aia pur kowi pe chowmah khai. Naiawng rakowi atainau-uüa dow awda kowh lowkkowlowk lumowr prakowi tamü büah khai.34Josef dow aiamat pawitang hownia kowh chakkham atainau-uüa kowi pela pe ne khai. Aia dow ataimowuüa kowi lak-e anaumow sin Benjamin kowi tanga phow lang peah hu khai. Naiawng hai amatni dow Josef hown taiua cha taiua kham büah khai. Amatni dow ahuma kham grep tui hanow lainowmma piaw büah khai.The Seed Company