Ezekiel8
1Takhangra kowi cham uowi mih taruk ning nga taruk la kowi tanga ni khe ang matia kim kowi ang chowm phülü chowdiah. Nami khin khe Juda pren kowi kowh aluchowuüa paw ang ria kowi tawi uowi khai. Nakhowk khe CHAKRAMANG Thurai kür dow ang luk kowi uang ting khai.2Now lusa maru powm iawng mih ang khi lowk ia chekhai. Aia kowh kelang hownia adak pra dow maih powm iawng chekhai, now kelang hownia aluk prakowi dow kri iawng dow tawk pliplip chekhai.3Nami maru dow rut iawng uai iaw hanow ang lu kowi kowh sam uai dowk ang khai. Nami khin khe mukmang kowi Thurai Lümla mih kuang kowi towngla ang khai. Now Jerusalem marow kowi kowh Thurai chup kim alak kowi kowh viadawng kowi kowpawla ang hanow tawngphak pra kowh tapplawt kowi kowtow ang khai. Nakowi dow Thurai lang khowrbownah mih suiiai kaniaima mih arup uowi lowk chekhai.4Mukmang kowi kowh Kebar aw pang kowi ang khi-ah mih Israeluüa kowh Thurai kraingra dow nakowi mih ang khi khai.5Thurai tek ang mih, “Aw maru chapa, tawngphak prakowi sam mü madiah,” pakhai. Naiawng rakowi tawngphak prakowi dow ang haimü khai, now tapplawt re-e kowh phuchuara ria kowi Thurai lang khowrbownah mih suiiai kaniaima mih arup ang khi khai.6Now Thurai plan tek ang mih, “Aw maru chapa, tawng chow kowbüah chang mih en khi khowk bow? Mami re-e suiiai kaniaima mih lup Israeluüa chang mih sam mü madiah. Ang kowh kim chimsaima mih hownia naprütta ang kownkow amatni dow naiawng chang mih chekhai. Now mami lak-e kowh lang suiiai mih lup en nakhi küng tak,” pakhai.7Nami kung kowi dow Thurai chup kim uat kowi kowh viadawng plawt kowi pawla ang khai, now tap bang kowi kowh kua dow tüng ang khai.8Now Thurai tek ang mih, “Aw maru chapa, tap bang kowi kowh kua mih uarah küng diah,” pakhai. Naiawng rakowi tap bang kowi kowh kua dow ang uarah khai, now nakowi dow kimplawt uowi lowk mih ang khi khai.9Now Thurai plan tek ang mih, “Nami kimplawt hownia alak kowi kowkup hanow lup ngak hai suiiai kaniaima mih lup maten Israeluüa chang mih dow kowsam mü madiah,” pakhai.10Naiawng rakowi alak kowi dow ang kowkup hanow ang kowkrawi mü khai, now tap bang maten kowi dow sowr mih hai asür alawkma mih asadua rup ang kowkhi khai. Nami klen kowi Israeluüa chupah mih arup maten powm paw ang khi khai.11Nakowi dow Israeluüa kowh lawngtang aluchowuüa ranitkawm ia iowng mih ang khi khai. Nami ranitkawm ia dawnglang kowi Saphan chapa Jazania paw tawi uowi khai. Amatni rut kowi dow maikhük towng uowi lowk chi chekhai, now nami maikhük towng hownia dow kuang prakowi maikhük awr pün khai.12Now CHAKRAMANG tek ang mih, “Aw maru chapa, Israeluüa kowh aluchowuüa kukpa tawng ngai chow chang mih en khi khowk bow? Amatni bowkbowk dow kim lak kowi kowh arup atekma mih kowi chup büah khai. Amatni dow, ‘Mami pren hownia CHAKRAMANG powt khai bowt. Naiawng rakowi khi a-i dowi chekhai,’ padow tatek büah khai,” pakhai.13Now CHAKRAMANG plan tek ang mih, “Mami lak-e paw lang suiiai mih lup Israeluüa chang mih en nakhi kown,” pakhai.14Nami kung kowi dow CHAKRAMANG chup kim tawngphak pra kowh tapplawt kowi pawla ang khai, now Tammuz thurai vüi kar mih masiuüa hawmh kowi dow tüng ang khai.15Now Thurai plan tek ang mih, “Aw maru chapa, tawng chow masiuüa hawmh chang mih en khi khowk bow? Nami lak-e kowh lang suiiai mih ang natüng en kown,” pakhai.16Now CHAKRAMANG chup kim alak kowi kowh viadawng kowi aia pawla ang khai. Nakowi dow CHAKRAMANG chup kim aplawt hai kri hown kowh phuchuara takra kowi kowh viadawng kowi pirmi laitanga ia ngia maru uowi mih dow ang khi khai. Nami maru-uüa dow CHAKRAMANG chup kim prakowi dang pe kung büah khai, now satlawt prakowi dang büah hanow sat kowi dow chup büah khai.17Now CHAKRAMANG tek ang mih, “Aw maru chapa, mami re-e suiiai kaniaima mih lup Juda prenchakuüa chang mih en khi khowk bow? Mami re-e naiawng kowbüah chang mih amatni tut-e dow anama chekhai. Mami pren kowi angak hown atekma changah mih hownia amatni dow towk ang kunmarau büah khai. Mün khowt chow amatni pe ang rukrai khai mih sam mü madiah.18Naiawng rakowi ang kunmaraura lün pluplup mih dow amatni kowi ang natüng pe kown; Amatni kowi dow ang nasanaah kown nadowi, ripra hownia amatni kowi ang nape powtah kown nadowi bowt. Ang param ria kowi amatni uang lü uang leng chepaw ang nasünta pe kown nadowi,” pakhai.
The Seed Company