Ezekiel7
1Nami kung kowi CHAKRAMANG laiklow dow ang tut-e uang plan ting khai iawk.2CHAKRAMANG tek ang mih, “Aw maru chapa, Israel prenchakuüa tut-e mami laiklow ang CHAKRAMANG Thurai takcha kowi kowkrawi tek pe dit: Enni kowh chur khin uang ting khai bowt! Enni kowh pren paprenma dow natapiak bowk kown.3Nami akhin dow enni luk kowi kawmat uang ting khai bowt; ang kunmaraura dow enni luk kowi ang sunah bowt kown. Enni kowh chowm krang uowi krang iawng hai ang nachet enni tara kown, now enni kowh suiiai kaniaima mih lup maten rakowi ang narip enni kown.4Enni kowi dow ang nasana enni kown nadowi bowt, ripra hownia ang nape powt enni kown nadowi bowt. Enni kowh chowm krang uowi krang hai enni pungmadawng kowi kowh suiiai kaniaima mih lup rakowi ang narip enni ngengche kown. Nami khin khe dow ang chowtaih CHAKRAMANG pami enni natuk bowt kown,” pakhai.5CHAKRAMANG plan tek mih, “Mü diah! Phih akraingma mih dow alowk kung kowi alowk mih uang tarü thüm khowk!6Enni kowh chur khin dow uang tarü khowk. Nami dow nauang ting kown chowbowt.7Israel pren kowi kowh uowi miuüa low, enni luk kowi piakra nauang ting kown chowbowt. Akhin dow uang na khai bowt. Hungma mawngma luk kowi piaw mih klow takcha kowi takrow kowh hek klow plak klow nauang ting kown mih ni dow atawnchow towbowt.8Ang kowh kunmaraura maten dow enni luk kowi alenma ang nauang sunah kown. Enni kowh chowm krang uowi krang iawng hai ang nachet enni tara kown, now enni kowh suiiai kaniaima mih lup maten rakowi ang narip enni kown.9Ang nasana enni kown nadowi bowt, ripra hownia ang nape powt enni kown nadowi bowt. Enni kowh chowm krang uowi krang hai enni pungmadawng kowi kowh suiiai kaniaima mih lup sung ang nape enni kown. Nami khin khe dow ang CHAKRAMANG rip enni khai nowm pami enni natuk bowt kown.10“Sam mü madiah, nami ni dow uang ting khai bowt! Enni kowh piakra dow uang tarowng khai bowt! Enni kowh lup ngak hai bawrira dow thar kown chowbowt.11Maru ngakuüa kowi dow amatni krawi changla nowng mih müa hown naripah kown, now amatni kowh maru iun, dawngthawnguan hai rowsira maten dow natama bowk kown. Naiawng rakowi ia chang bawri büah kown nadowi bowt.12Akhin dow uang na khai bowt, nami ni dow uang tawn khai bowt. Ran krawng ran lai miuüa hang pacham awmrawm lah, asum miuüa paw hang pacham sak ngah lah. Tawngplawng kowchow panow Thurai ripra dow amatni bowkbowk luk kowi nauang kla kown chekhai.13Mami mukmang dow maru maten vüi chekhai; nami dow nauang ting ngengche kown. Naiawng rakowi uanh sum uanh ran miuüa dow ta sing uowi bowk chepaw nachang kun kown nadowi bowt. Maru ngakuüa dow lowk iachow paw naplai kown nadowi.14Tum pe baw hanow lowra sia kamrütia hown amatni dow nauowi kown. Nachenganchepaw miapaw cham tarü tasen kown nadowi. Tawngplawng kowchow panow ang kowh kunmaraura dow amatni bowkbowk luk kowi ang nasunah kown chekhai.15“Marow uat kowi dow tasenra uowi khai, now marow lak kowi dow khown hai makowng hawi uowi khai. Marow uat kowi uowi miuüa dow tasenra kowi nacham kowng kown, now marow kowi kowh uowi miuüa dow khown hai makowng hawi hown nakowng kown.16Ta sing uowi miuüa dow hungh towng kowi nacham powt büah kown, now amatni bowkbowk dow amatni kowh ngak rakowi lawngrawi kowi kowh uatur iawng nakar büah kown.17Amatni bowkbowk kowh bawng dow nauak kown, now amatni bowkbowk kowh kung dow nachür klukluk kown.18Amatni tarip mih krang natüngla büah kownkow nakhup sala uanh büah kown, now kram lai rakowi amatni dow nachür klukluk kown. Amatni rukrai mih dow amatni lumowr kowi nakhi-ah kown. Lainowmma amatni tarip mih dow natüngla büah kownkow nakhurta sam büah kown.19Amatni kowi angak prakowi cham pakla mih dow kuh hai tai chekhai. Naiawng rakowi amatni kowh kuh hai tai dow tiama towng nacham kuakah büah kown, naiawngün dow nachangla mawngchawng büah kown. Naiawngün dow CHAKRAMANG kunmaraura hownia nowng lawngah dowi chekhai. Nami dow amatni mu vüi chakkham ran müa khowm asun uang dowi chekhai.20Amatni kowh klangiungma mih tatawng müa kuh hai tai rakowi chang bawri büah khai, now nami hown dow asürlawkma mih arup aren hai suiiai kaniaima mih arup aren ün thawpla büah khai. Naiawng rakowi naiawngün kuh hai tai dow ang nasür nalawkta pe kown.21Naiawngün dow kür hown nacham pawla pe bowk kownkow prenlang maru-uüa hai lusa kowi kowh lang ngah mih maru-uüa rut kowi ang naapta pe kown. Nami dow prenlang maru-uüa hai maru ngakuüa nacham sürlawkah kown.22Damrauüa dow ang kowh kim chimsaima mih kowi nauang kup hanow nauang piakah kown. Tawkchedow ang nacham dangta kown; naiawng dow ang pe phawah kown.23“Pren kowi tatu tasawt hai marow kowi nowng changra tek khai bowt. Naiawng rakowi ang maru-uüa tawm müa lawngha leng kamrütta hüah diah.24Amatni kowh kim hai üa nakhünta pe kownkow chenchapuüa pungmadawng kowi kowh lang nga mih chenchapuüa kowi ang nauang pawla pe kown. Akürma miuüa kowh bawrira dow ang napiakta pe kown, now amatni kowh arup chupra ün dow natasür talawk kown.25Amatni luk kowi takrow takraira uang ting khe dow nakrawi cham thaulangra büah kown. Tawkchedow krum büah kown nadowi.26Phih luk kowi phih nauang kla kown, satang ngak klen kowi satang ngak nata büah kown. Mukmang laiklow ta kown nau rakowi amatni dow nakrawi cham risi büah kown. Tawkche uamowuüa tüngsangra hai ari aiang laiklow ün uowi kown nadowi bowt, now aluchowuüa paw nowng pe prengia kown nadowi bowt.27Manguüa paw nakar kown, mang chapauüa paw amawlawma naown kown, now pren kowi kowh maru-uüa rut dow nachür klukluk kown. Amatni kowh chowm krang uowi krang iawng hai amatni kowi ang nachangah kown, now amatni kak taing iawng hai ang naripah kown. Nami khin khe dow ang chowtaih CHAKRAMANG pami natuk büah bowt kown,” pakhai.
The Seed Company