Lai Ching9
1Akrama hai abüpma ang krawi tuak hanow lowra luk kowi Thurai kowh dow lowra sia nowng changra uowi pami ang tuk khai. Chanlaima mih hai achinawmma mih maru-uüa hown amatni kowh lup maten Thurai luk kowi chekhai. Pur prakowi Thurai sakraura bow Thurai suira bow naka kown mih miapaw tuk dowi.2Maru iung chepaw, maru ngak chepaw, chang phuchua reng chepaw, chang phuchua dowi chepaw, achinawmma chepaw, asürlawkma chepaw, takham mih maru kowh paw, takham kown kram mih maru kowh paw maru maten kowh chur krang dow katsang taih chekhai.3Lusa maru luk kowi kowh phaw mih chap maten kowi lang nga mih uowi pachap mih dow maru maten kowh chur krang katsang taih mih chekhai. Lusa maru kowh sak dow thukla sangching hai tuak ngak kangowh chowtaih, now akung kowi dow kowng reng chekhai.4Sing uowi miuüa kowh dow sakowmra uowi tak. Tawngplawng kowchow panow akowngma mih krangsi lak-e dow kui sing uowi mih lang iung chekhai.5Sing uowi miuüa dow amatni paw kowng takla pami tuk chekhai. Tawkche kowng khowk miuüa dow tawngpaw tuk dowi bowt chekhai. Kowng khowk miuüa kowh dow awmrawm sung uowi dowi bowt; amatni kowi dow miapaw sak kowi towah dowi bowt chekhai.6Amatni kowh dow sakraura, suira hai irsira mih amatni hown tawi tama bowk khowk. Amatni dow lusa kowi kowh uowi mih tawng chap paw tawi ka bak dowi bowt chekhai.7Naiawng rakowi awmrawmma hown cha chakkham diah, now kham grep tui diah. Tawngplawng kowchow panow naiawng nachang kown mih Thurai nau en chekhai.8Atungma khup tawnguat iung diah, now phawk unsi hanow klangiungma uowi reng diah.9En kowh auan uowi dowi mih chownglawng ni maten kowi en sakrauah mih masi hown apiawma sunah diah. Tawngplawng kowchow panow lusa kowi akawm akratma en uowi rakowi nami dow en kowh kakbak chekhai.10En rut kowi kowh lup uang ting mih srui en kowh kür maten hown changah diah. Tawngplawng kowchow panow en kowng kung kowi dow lup, sangkrangra, prengia hai chanlaira pami tawngpaw uowi dowi bowt chekhai.11Mukuang dak kowi ang plan khi ne tak mih dow iowm lenma miuüa taih nadowi atungma ka awmrawm sung, akürma miuüa taih nadowi atungma awng tasen, chanlaima miuüa taih nadowi atungma du pat chi ka cha, prengia chakma miuüa taih nadowi atungma kureng, now akiakma miuüa taih nadowi atungma lowra sia lang ka. Tawngplawng kowchow panow chownglawng kowi tawng ngai chow phaw mih dow akhin uang ting mih luk kowi chekhai.12Kowmatia luk kowi phih nauang ting kown mih khin miapaw tuk dowi. Powk kowi kowh dam taia iawng hai leng kowi kowh uakling tasowk iawng lusa maru luk kowi mih linlanma sang phih uang ting reng.13Mukuang dak kowi kowh chanlaira lawnguan kowi ang sak kowi abüpma chuk lowk mih ang plan khi lowk.14Marow chalachow mih uowi lowk chowdiah. Nami marow kowi maru uowi mih dow a-echow taih chekhai. Now nami marow kowi dow akürma mih mang lowk ia nauang senah kownkow uang rumta lut khai.15Now nami marow kowi mih ngaraichow mih maru chanlaima mih uowi lowk ia. Aia dow aia kowh chanlaira hown nami marow kowi hawt towkala khai. Tawkche nami ngaraichow mih maru kowi miapaw sak kowi towah dowi.16Ang tek mih, “Kür lak-e chanlaira lang iung,” pakhai. Tawkchedow ngaraichow mih maru kowh chanlaira dow maru nüah klowkah dowi, now aia kowh laiklow paw miapaw sünta pe dowi chekhai.17Bualama mih pren kruitown mih kowh arangma mih laiklow lak-e dow chanlai miuüa kowh asamchow mih laiklow sünta mih lang iung.18Tasen müa rutchün khawkleng lak-e chanlaira lang iung. Tawkche maru ngak lowk ia dow aiung chap ahuma nowng piak chekhai.
The Seed Company