Lai Ching10
1Ving kowng mih su nam hown paingbawng apalang nowng piak chekhai,nami iawng bualara ditchow mih paw chanlaira hai ringkawra nowng piak chekhai.2Chanlaima mih maru dow tiama nowm kowi mang reng.Tawkche bualama mih maru dow tiama tawi kowi mang reng chekhai.3Bualama mih maru dow tiama kowi cham mang khe khowm aia buala mih tüngla reng.Naiawng rakowi aia kowi dow bualama pami maru maten tukah reng chekhai.4Pren kruitown mih kunmarau en chepaw en kowh rah mih hangkow nuata diah,saktuak klamma uowi hanow atawi ama huma chepaw aia mih nalawtta en kown taih.5Mukuang dak kowi ang tut-e taka dowi mih ang khi pachap. Pren kruitown miuüa maiawng mih atawi ama chang reng chekhai:6Bualama miuüa kowi dow arah iuk iukma mih kowi towah khai, now kurengma miuüa kowi dow arah sowm sowmchow mih kowi towah khai.7Arah iukma mih maru iukuüa kowi dow khawk hown pe mangah hanow naruüa kowi dow kawrnga luk kowi pe chowmah mih paw ang khi chekhai.8Thai kuam mih maru dow nami kuam kowi dowh chepaw naia kown,now khue kimbang mih maru kowi dow rua chawtah chepaw naia kown.9Hua hown chang lup mih maru dow hua hown ka arau chepaw naia kown,now tu singh mih maru dow singh hown kla phih chepaw naia kown.10Marek dow sükah dowi hanow atawng lang bowm reng.Nachenganchepaw chanlaira che tawngah hanow lup chawn reng chekhai.11Rua kowi ia bia dowi rawn rua chawtta khai bowt hanowrua kowi tuk bia chepaw tawngpaw mrawkra uowi dowi chekhai.12Chanlaima mih maru dow aia kowh laiklow rakowi ka ringkawra reng.Tawkche bualama mih maru dow aia kowh laiklow rakowi aiamat piak reng.13Bualama mih maru dow bualama mih laiklow hown uown prow sang reng,now angakma hai thuklama mih laiklow hown aia kowh laiklow churah reng.14Bualama mih maru dow achüt achütma chi tek lai reng,aia dow pur prakowi nauang ting kown mih lawnguanün tek reng.Tawkche pur prakowi tawng chow naown kown mih miapaw nowng tek dowi chekhai.15Bualama mih maru dow amatni kowh lup chang hown lainowmma bowm reng,amatni dow bowm lai kowh kim prakowi mangla mih tiama khowm tuk dowi chekhai.16Ngeuüachow mih maru chowm mang mih pren kowh piakra nauang ting kown mih dow kramra uowi lai kowbow!Nami pren kowi kowh maru iukuüa dow rauchow hownia mur cha pawi reng chekhai.17Nachenganchepaw maru iuk krungchak hownia kowh maru chowm mang mih pren dow prasira uowima chekhai.Nami pren kowi kowh maru iukuüa dow pua müa nadowi kowi kür müa kowi akhin khe cha chakkham reng chekhai.18Silikma mih maru kowh kimluk dow tapiak nak reng,silik lai rakowi aia kowh kim kowi dow uang iat reng chekhai.19Pawi chak hai arak kham dow sak kowi pe piawra reng,now tangka pawisa dow lowra sia ia chang reng chekhai.20Sakdawng hownia khowm padow mang kowi hang prawng diah,now en mawk rah kim kowi khowm padow kureng miuüa kowi hang prawng diah.Tawngplawng kowchow panow en kowh laiklow mih uakling nacham iowla tarawng,now en kowh laiklow maten nami uakling nakowiowla hanow nakowtek pe tarawng.
The Seed Company