Lai Ching8
1Chanlaima mih maru iawng mia chow uowi?Lusa kowi tawng ngai chow phaw mih auan mia chow nowngia tuk?Chanlaira dow lusa maru-uüa kowi piaw kowh pe renah reng,now lumowr klimma mih kowi chimprowngchow nowng chang chekhai.2Naiawng rakowi mang kowh ana pek chün diah. Tawngplawng kowchow panow mang kowh laiklow nachün kown mih Thurai pur kowi en takham khowk chekhai.3Mang kowi nuata hanow napowtta kown mih hangkow sakkrowng diah. Now mang kowi kingküa miuüa hown hang cham tawi tabawng diah. Tawngplawng kowchow panow mang dow aia nau iawng nachang lup reng kown chekhai.4Mang luk kowi dow miapaw uowi dowi bowt chekhai. Naiawng rakowi aia kowi dow, “Tawngplawng kowchow naiawng en tuk chang khai,” pami miapaw nowng tek pe dowi.5Aia kowh laiklow en chün mowr dow thaulangma en naia uowi kown. Chanlaima mih maru dow tawng iawng chow achang takla mih hai tawng khe chow chang e taka kown mih khin tuk chekhai.6Lowra chap kowh taka klowk mih akhin uowi, now lup chang krang paw taka klowk mih tiama uowi chekhai. Nachenganchepaw lusa maru kowh tukra dow a-echow taih rakowi kawm reng chekhai.7Lusa maru dow pur prakowi tawng chow naown kown mih tuk dowi. Naiawng rakowi pur prakowi tawng chow nauang ting kown mih miapaw nowng tek a-i dowi chekhai.8Li kowi dow miapaw nowng dowkah dowi. Nami powm iawng kowng khin kowi dow miapaw nowng townah dowi chekhai. Maru ngakuüa paw amatni kowh sangkrangra ngak hown kowngra hownia dow nowng taka dowi chekhai.9Lusa kowi kowh maru mih lowkkowlowk tachang nowng khai. Lusa kowi kowh phaw mih maten lawnguan kowi abüpma ang tuakah khai.10Nami klen kowi maru ngakuüa kowng mih kowi ringkawra uowima hown Thurai maru-uüa dupah mih paw ang khi khai. Kowng kung kowi dow nami maru ngak changla lup ngak mih maten marow chakuüa tamata khai. Nami paw tawngpaw auan uowi dowi chekhai.11Chang lup ngak mih maru kowi alenma ripah dowi hanow lusa maru kowh sak dow nachang lup ngak ngamlam kownkow tatuak ngamlam chekhai.12Angakma mih maru changta lup ngak 100 kat chepaw ning huma singla mih nauowi kown. Nachenganchepaw ringkawma hown Thurai kowi kram miuüa nalang ka iungra kown pami ang tuk.13Tawkche maru ngakuüa dow Thurai kowi ringkawma hown kram dowi rakowi naka iungra kown nadowi, now amatni kowh chownglawng dow nim iawng alenma natama kown.14Now lusa kowi nowng tukah dowi mih chap plan uowi lowk tak. Nami dow maru ngakuüa kowh kakbak maru iunguüa ka, now maru iunguüa kowh kakbak maru ngakuüa ka mih chekhai. Nami paw tawngpaw auan uowi dowi chekhai.15Naiawng rakowi chownglawng kowi apiaw apama uowi diah. Tawngplawng kowchow panow mukuang dak kowi dow cha mih kham mih hai apiaw apama uowi mih klen kowi lusa maru vüi iung mih uowi dowi bowt chekhai. Nahanow mukuang dak kowi kowh Thurai pe mih lusa maru chownglawng kowi dow ni towng aia kowh lup luk kowi piaw mih towbowt nachowng auiua kown.16Ni chut uar prowt chi müi dowi kowi lusa kowi kowh phaw mih maten auan natuk kownkow ang tatuak khai.17Nakhowk khe Thurai changah mih lup maten ang khi khai, now tawng chow own mih auan achima tuk mih miapaw uowi dowi pami ang tuk khai. Lainowmma a-i chanlai khowk chepaw naia. Tawkche mün khowt chow a-i chanlai hai tuk kown mün khowt chow a-i kamrüt chepaw achima a-i nowng tuk dowi chekhai.
The Seed Company