Зак.уш26
1Кунам тый Господь Юметын тылат пуымо мландышкыже толат, тудым сеҥен налат да тушто илаш тӱҥалат,2тунам тыште погымо уло лектышын икымше саскажым налын, комдыш пыште да Господь Юметын шке лӱмжылан илаш ойырен налме верышкыже кай.3Тиде жаплан шогалтыме иерей деке мий да тудлан каласе: ”Таче мый Господь Юмет ончылно увертарем: мый Господьын пуаш сӧрымӧ мландышкыже толынам, тидын нерген Тудо эше ача-кочаланна товатлен ойлен”.4Тек иерей тыйын кидет гыч комдым налеш да Господь Юметын жертвенникше ончылан шында.5Тунам тый Господь Юмет ончылно каласе: ”Мыйын кугезем кусныл коштын илыше арамей лийын. Тудо шагал еҥан тукымжо дене Египетыш каен да тушто илаш тӱҥалын. Египетыште тудо кугу, виян да шуко еҥан калыкыш савырнен.6Но египтян-влак шкеныштым пеш торжан кученыт, мемнам шыгыремдылыныт да неле пашам ыштыктеныт.7Тунам ме Господьлан, кугезына-влакын Юмыжлан, сӧрвален кумалынна. Господь йӱкнам колын, мемнан ойгыш логалмынам, неле пашанам да пызырналтмынам ужын.8Кугу да лӱдмашан паша-влакым, палдарыше пале ден ӧрыктарыше паша-влакым ончыктен, Господь мемнам Египет гыч [Шкеак кугу куатше да] нӧлталме виян кидше дене луктын.9Тудо мемнам тиде верыш конден да тиде мландым, шӧр ден мӱй йогыманым, мыланна пуэн.10Теве кызыт, Господь, Тыйын мылам пуымо [шӧр да мӱй йогыман] мландет гыч мый лектышын икымше саскажым кондем”. Вара комдым Господь Юмет ончылан шынде, Тудлан вуетым саве11да Господь Юметын тыланет да ешетлан пуымо чыла сайлыкшылан куанен пайремле. Тек тый денет пырля тендан коклаште илыше левит ден йот калык еҥ-влакат веселитлат.12Кумшо ий – луымшо ужашым пуымо ий. Тунам шке [мланде] лектышет деч луымшо ужашым ойыро да тудым левит ден йот калык еҥ-влаклан, тулык йоча ден тулык вате-влаклан пу. Тек нуно тыйын олаштет теммешкышт кочкыт.13Вара Господь Юмет ончылно каласе: ”Шке пӧртем гыч мый святой ужашым налынам да Тыйын кӱштымет семынак тудым левит, йот калык еҥ, тулык йоча да тулык ватылан пуэнам. Мылам пуымо кӱштымаш-влакет деч кораҥын омыл, иктыжымат монден омыл.14Колышым шортмо годым мый тиде святой ужаш гыч нимом кочкын омыл, тудым ойырен пуымо годым ару лийынам, колышылан тушеч нимомат пӧлеклен омыл. Господь Юмемын мутшым колыштынам, Тыйын кӱштыметым чыла шуктенам.15Тугеже ончал пылпомыш гыч, илыме святой верет гыч, да шке Израиль калыкетым, мыланна пуымо тиде мландетым суапландаре. Вет шӧр да мӱй йогыман тиде мландым ача-кочаланна Тый [мыланна пуаш] товатлен сӧренат”.16Таче Господь, тендан Юмыда, чыла тиде пунчал ден устав-влакым шуктен шогаш кӱшта. Нуным уло шӱмда да уло чонда дене шуктен шогыза.17Те кызыт ”Господь – мемнан Юмына” манын ойлышда да Тудын корныж дене кошташ, Тудын пунчалже, кӱштымашыже да уставше-влакым шуктен шогаш, Тудым колышташ тӱҥалына манын увертарышда.18А Господь гын таче тыланда увертара: сӧрымыж семынак те Тудын калыкше лийыда. Но те Тудын чыла кӱштымашыжым шуктен шогышаш улыда.19Господь тендам Шкенжын ыштыме чыла моло калыкше деч кӱшкӧ нӧлталаш, тыланда моктымашым, кугу лӱмнерым, чапым пуаш сӧра. Тудын каласымыж семынак, те Господь Юмыдан святой калыкше лийыда».
Institute for Bible Translation, Finland