Зак.уш25
1Кок еҥ коклаште ӱчашымашан йодыш лектеш гын, тек нуно судыш мият, да судья-влак пунчалым луктыт: чын еҥым чыныш луктыт, титакан еҥым – титаканыш.2Титакан еҥ кырымым сулен гын, тек судья тиде еҥлан кумык возаш кӱшта, да тек титаканым судьян шинча ончылныжо кырат. Мыняр гана пераш кӱлмӧ чот ты еҥын титакше деч шогаш тӱҥалеш.3Эн шукыжо нылле гана пераш лиеш. Тидын деч утларак перат гын, израиль иза-шольыч уло калык ончылно намыслыме лиеш.4Шурным шийше ӱшкыжын умшажым ит петыре.5Иза-шольо-влак пырля илат, да нунын кокла гыч иктыже эргым кодыде кола гын, колышын ватыже ӧрдыж еҥлан марлан кайышаш огыл. Тек тудын деке марийжын шольыжо але изаже пура, шкаланже ватылан налеш да тудын дене илаш тӱҥалеш.6Тиде ӱдырамашын кугэргыже колышо марийжын урлыкшылан шотлалташ тӱҥалеш. Тыге тудын лӱмжӧ Израильыште ок йом.7Но пӧръеҥ изажын але шольыжын ватыжым марлан налаш ок кӧнӧ гын, тек ӱдырамаш ола капка деке мия да олан кугуракше-влаклан каласа: ”Мариемын шольыжо Израильыште шке изажын лӱмжым ынеж шуйо, мыйым марлан ынеж нал”.8Тунам тек олан кугуракше-влак саде еҥым ӱжыт да тудын дене кутырен налыт. Тиде пӧръеҥ шке шонымыжым ок вашталте да ”мый тудым ом нал” манын каласа гын,9тек изажын тулык ватыже кугурак-влакын шинча ончылнышт пӧръеҥ деке лишемеш, тудын ик йолчиемжым кудашеш, вара шӱргышкыжӧ шӱвалеш да каласа: ”Кӧ [Израильыште] шке изажын але шольыжын тукымжым ок шуйо гын, тудын дене тыге ыштат”.10Тунам тиде еҥын ешыже Израильыште ”чара йолан еш” лӱмедышым налеш.11Кунам кок пӧръеҥ кредалаш тӱҥалеш да иктыжын ватыже шке марийжым утараш толеш, тыгодым вес пӧръеҥым тарманже гыч руалтен куча –12кидшым руал шу, тудым ит чамане.13Тек тыйын сумкаштет кок тӱрлӧ нелытан кир – кугу да изи – огыт лий.14Тек мӧҥгыштет йоҥгытым висыше кок тӱрлӧ ефа ате – кугу да изи – огыт лий.15Тек кирет ден висыме ефа атет чын ончыктат, тунам Господь Юметын пуымо мландыштыже тый кужу ӱмыран лият.16Вет чын огыл ыштыше-влак Господьлан, тыйын Юметлан, йырнык улыт.17Египет гыч толмет годым тый денет амалик-влак мом ыштеныт, шарне.18Кунам ӱнардыме да нойышо лийынат, нуно тыйым корнышто вашлийыныт да, Юмо деч лӱдде, шеҥгелан кодшо вийдыме-влакым чылаштым кырен шалатеныт.19Кунам Господь Юмет пуымо мландыштыже тылат чыла велымат тушманет деч тыныслыкым пуа, кава йымачын Амалик нерген шарнымашым ӱштыл шу. Тидым ышташ ит мондо.
Institute for Bible Translation, Finland